TEAR's IN HEAVEN... BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

TEAR's IN HEAVEN... BY Tochhong Ruata

Unread post by Ngaia » May 14th, 2016, 11:14 pm

TEAR's IN HEAVEN...

" Min lei pui ang chu le" a tih avangin ka thianpa, naupan tet atanga ka kawm nasat em em Dampuia chu a awh ve thin em em Bike leipui ngei chu ka tum ve hle....
Aizawlah Collage kalin Mi inhnuai kan luah ve a, Ka chhang chiah nen awm dunin a ni...Ka nu leh ka pa hi High school zirtirtu an ni a, Ka pa pheichu Headmaster a ni nghe nghe, an pension har vak tawh dawnlo a, an hlawh pawh a sang ve tawh hle...Fapa mal ka nih bakah Kan unau hi 3 lek kan ni a, A mi lai ka ni a, U hmeichhia ka nei a, a ni chu Doctor hna thawkin Lunglei lamah a pasal fanaute nen an khawsa ve mek bawk a ni...Fapa mal ni mah ila, tunlai sualna hian min chim phak ve meuhlo, zirna lamah ka beih nasat deuh avangin hetiang lam buaipui hman hi ka nilo tih ka hria a, ka buai ve duh lemlo...Ka thiante erawh chuan hunpui laia zu han in zawk zawk an pawisa lemlo, ka duhvelo tih an hre reng tho a, min nawrlui ngai heklo, keipawn an zu in chu ka hau duh bik chuanglo a, a tul a nih phei chuan ka zawnpui zak zak chang a tam ve khawp mai...Collage ka kal nan Bike ka pa in minlei sak a, fapa mal sum hmang huau huau ka nilo bawk a, ka ngen leh mamawh ah chuan duhsakna ka dawng nasa ve thin hle a, ka nu leh pa mai bakah ka chhungte dang atang pawn engthil emaw ni ka dawng nawlh nawlh fo...Ka khawsak awlsam dan tur leh ka harsat vak chu in ring bik hauhlo ang...

Tuna ka thianpa hi kan thianho zingah lirthei neilo awmchhun niin, A pa in Kum 3 a nih laia a boral san, a nu leh a u te nen a khawsa ve nawlh nawlh thin an ni a, Thiante tan engmah ui neilo, thiante tanpui hreh ngai hauhlo, Tlawmngai leh rilru tha tak mai a ni a...kan thian ho hi 4 kan ni a, khawkhat pa awmthei fate vek kan ni, Amah Dampuia tiamlo hian, Kan vaiin bike kan nei vek tawh a, Kimtea nen Kan khuaha an awm a, Kimte hi PES school ah a thawk a, Dampuia erawh Pawl 8 pass ve theilo in kut hna thawh a ngaih vangin school a bang a, kum tin kan leilet enkawlin a siam thin a, buhfai hralh tur bakah an kum 1 tla an thar ve thin....A thianten kan phurh theih tehlul nen ama puala bike neih ve ngei tumin Meihawl rawh, Thing ai chhek, Sawhthing hmun siam leh vawk vulh ten a tuak ve ngat ngat a, Kum 3 a vei meuh chuan a lo suangtuah nasat ve em em thin Karizma bike leina tur a tuak ngah ve ta der mai...

Kei chang nilo kan thiante 2 pawn an lawmpui a, Masi chawlh hmanga hawn tumsa kan ni bawk a, Kimte a bike in Aizawl an rawn kal a, Tichuan a bike leipui tum chuan kan inhmu khawm l
ta thap a..Kan thiante rawn thlen zan hian kan thian ho chu kan in luahah kan thu bial laih a,,Krismas hun a kan hun hman dan turte kan sep ho a, Bial nu angreng nei ve deuh vek kan nih avangin kan indem fiama kan phur ve hle...Dampuia bike tur kan lei dan tur te kan sawi ho a, kan hlim dar dar viau, A bial nu ve deuh Rinsangi a phur vel tur chu kan sawi vel a , a hlimawm kher mai...Tichuan a tuk zing chaweikham a Bike lei tur chuan zan dar 12 dawnah kan mu ve ta sang sang a...

Ka harh hlawl a, ka bula mu Dampuia awzawng a lo awm tawh lo, ka nau khuma kan thiante 2 mu lah an la hnar suk suk bawk si a, Ka sana ka en vat a, Zing dar 5:40 chauh a la ni a, a inthiar lawk a nih ringin ka muthilh san leh mai a.

" Hmela tho tawh rawh, a neitu tih vanga mut rei bik" tiin ka thianten min kaihtho a..An thingpui lum tui tak mai chu kan in ho a, Dampuia awmna kan hrelo tlang vek a, Mak kan ti riau, a ni hi a helhhawlh vangin, a mutheilo a ni ang a?, kan ti fiama kan phul hlut a..Rawng kan bawl zo a, Zing dar 9 a ri der tawh, a hmel a lang thei bawk silo, kan mangang ru tlang viau tawh, Phone mai kan tum lahin a handset a keng bawk silo a..." a ni em em tawh lo, Khawnge Bike in kan tlankual thuak thuak teh ang" tiin ka tho a, Khawlai dung vela ka hmuh mial tak hlauh ka rin vang a ni...Chutia bike nena zawn tuma ka intintuah mek lai chuan a rawn hawng haw ta hnu hnu a, amah lah chu a hlim hmel em em mai lehnghal. Kan hau tliar tliar a, a nui put put ringawt a..Kan nui ho leh dar dar a..Amah ber a rawn hawn takah chuan Chaw ei kan siam ta a...

" Nia, ka helhhawlh chu a ni deuh ber mai, Ka muhil meuhlo a, Ka nu hlim hmel leh ka pa in van atangin min thlir reng lai chu ka mitthla ah a lang uaih uaih reng a, Tichuan Khawfing chah,rual vel khan ka tho a, In hnar ring bawk si a, Thingpui ka in a, ka teichhuak ta ngawt a..." tiin a zing kalchhuah dan a sawi a, a mah hau pah, fiam pah bawkin kan sawisa a, nui mai mai a, a tawpah chuan hmel tak deuh ngal hian " Thil sawi lawk ka duh a, Min ngaithla hmasa u la, ka sawi tur hi ka sawi zawh hunah, In ngaihdan ka hre duh a, ka tum ang rilru in pu a nih chuan kan thawk chhuak ho dawn a nia" tiin bul a rawn tan ta a...

" Nimin khan Aizawl kan rawn luh khan Bazar pui ah, Pi Sawmi fanu pawisa pe turin kan kal a,. Zion street an tih ah sawn kan chho hnak hnak a, Kimtea pek hian a tawih nu hlui a hmu a, Mipui zi nuaih nuaih karah an indinchilh lehrih a. Mipui thawlna lai deuh ka zawng a, chumi hmunah chuan ka lo nghak ta ngawt a...an inbe rei viau lehnghal....Ka dinna chu dawr kawt anih vangin, thil lei te ka thlir mai mai lai chuan Nu pakhat sam tlakawlh tawh tih hriat tak, Scarf hlui tawh tak a lu fun bam mai leh a fanu leh fapa niawm tak kai a rawn kal hi dawr kawtah chuan an rawn ding ve nawlh mai a..." a chil a lem khalh a, a thleng a seng a, thuthlengsei ah chuan awn duai a thu chungin, Zo zial a pak khu laih laih a...

" Chumite nufa chuan chu dawr chu an kal pel thei ta hauhlo mai a...a kaih a fate chu mipa leh hmeichha niin, Mipa chu a upa zawk a nih hmel, kum 10 emaw lek a la nih hmel, a nau zawk hmeichhe naupang chu Kum 7 emaw kum 8 emaw lek tur a ni thung, An inthuamna chu a tha bik vaklo hle a, Mahse an enkawl fai viau thung. An nu niawm tak chuan Bag dum lian vaklo a ak ve a, a inthuamna pawh a tha vak chuanglo bawk a...Ka thlir reng a, an fate 2 chuan chu dawr chu an kalsan thei tlatlo mai, Hmeichhe naupang pakhat dawr chhunga Naupang kawrfual an hak tir lai vel chu an en dauh dauh reng a, Mipa zawk chuan dawr kawta Silai lem an tar chu a lo en dauh dauh bawk a, A nu chuan " kal ang u le" a tih pawn an che sawn duh eihlo thung....Ka en reng lai chuan " Nute in bazar ve e law?" tiin dawra kawr an hak tir mawlh mawlh kum 10 vel leka upa hmeichhe naupang chuan a rawn ti a, A nu chuan " Awww Angela i te nireng a, Nute i u Angie chu chhang ta che" zawi sap hian a ti a, " Bazal lo, a pa damdawi tul kan zawng a?" a ti ta reuh a, A nu in a kaih luih tlat avang chuan lehhawi tak tak chungin an kal sawn ta a...Kimtea a rawn hman takah chuan keini pawh kan kal ve ta mai bawk a...

Nizan a ka mut theihloh chhan pawh kha chumite nufa vang chu a ni..An nu ber kha damlo na deuh dam tawk tawk ni awm tak a ni laiin, hmeichhe naupang tawngkamah a pa chu a damlo mek bawk a nih hmel si a, tiin ka suangtuah a, ka pa boral hnua kan chhungkuain hrehawm taka masi kan hman thinlaite ka hre chhuak uar uar a..." tiin a hnukulh chu a ngawi vang vang a...Keini pawh chaw bar nachang pawh hrelo chuan kan lo ka hau hlawm a..." Ka mumangah ka nu leh pa te nen hlim takin kan lo awm khawm a, Nuam ka lo ti em em a, Ka pa hian ka darah dawm chungin " Mamte mite tan inpek hi a hlu a nia" a lo ti a, ka harh zawk a, Ka mumang avang chuan ka muhil thei talo a...

Ka tho a, thingpui ka in zo leh a, " khawnge vak harh mai mai teh ang?" tiin ka pawngpaw teichhuah ve ta ngawt a, Mi an la tamlo hle mai, ka kal ka kal a, Bazar ka thleng ta hlawl mai a, Nimina ka dinna dawr kawtah chuan ka ding leh a, mi dawr hawng leh che vel chu ka thlir mai mai a, Chutihlai tak chuan Nimina hmeichhe naupang thuam hnaw ha kual vel ngei kha dawr nghaktu nu valai deuh nen an rawn thleng a, dawr neitu an lo ni a, an dawr an hawn fel hnuah ka lut ve tawp a, Zana ka mumang leh nimin lama ka thil hmuhte chu ka sawi ta vek a...chung nufa te chanchin chu ka zawt nghal bawk a....tichuan hetiang hian a sawi a..

" Kha mite nupa kha an pa dam that lai chuan an harsa em em bik lo a., an pa kha kut themthiam nei, Motor pawh khalh thiam ve tak a ni thin a, A tlawmngai em em a...Taxi khalh in a inhlawh ve fo bawk a..Vawi khat chu Sairang kawngah Bike chesual an awm a, tlawmngaih chhuah in a bawihsawm a, A taxi ah phur hawngin Damdawiin a thlenpui vat a, mahse vanduai thlak takin bike a chesual nula leh tlangval te chu an thi ta tho tho a. A hmu hmasabertu a nih manah rinhleh a kai dawn viau hman a, Mahse a mi phurhte bakah Bike chetsual dan mit a hmutu chulai hnun chhak lawk a awm te an lo awm ve bawk nen a him ta hram a...

An fanu pian a tanga thla 3 lekah an nupa in an damlo ta vak mai a, an thisen an exam chuan Hiv +ve an lo ni a. An rilru a nain mak an ti hle a. an hrethiamlo hle mai, Mahse kan veng VCP remhriatna a zarah an kai chhan an hre ta thuai a, Sairang kawnga bike chesual a tanpui na lamah a kut a ti pilh a, an thisen a lo thianghlim bawk silo a, a kai chhawng a lo ni a, an fate 2 chuan kailo mahse an nupa chuan an kai ta ngei a...hrehawm an tih em em lai chuan Synod Revival team ten kan kohhranah Gospel Camping an buatsaih tumin, an piangthar a, Testemony an sawina ah an thisen thianghlimloh thu leh a tul anga tawngtaipui turin kohhran Mipuite an ngen a...A tirah ropui tiin miin khawngaih viau mahse kum a vei meuh chuan mi thinhrik an hlawh ta daih a.

An hna ngai an thawk reng a, an khawsak pawh a ziaawm chho viau reng tho a, Mahse an natna chuan zuallam a pan ve hret hret zel si a, An nu hi a mu hmasa zawk a, an pa a chau ve leh a, an fate an la naupang bawk si a, Tihian an khawsa ve ta nawlh nawlh reng a ni...." tiin min hrilh a, Ka nghilh dup ni berin ka hria, An awmna veng leh an in awmna ka zawh hnu ah Aizawl tlak lam veng pakhat mawng deuh takah In tha vaklo an neih ve thu a sawi a...Chumi lam pan chuan ka zu kal ta vang vang a ni...." tiin a sawi a, Kan ngaithla thap a....Puia chuan " a nih enge kan sawi ho tur i tih chu,,an chhungkua chu sawi ho mai mai ang u i ti em ni?" a lo ti khauh a, Kan nui dar dar a...

" Ni love, englo a nia, an chhungkua an mahni in ngei a ka zuk hmuh takah chuan, ka lainatna a zual sauh a, An fapa zawk khan " a nu kawrmawi leh Kekawr mawi ai chuan Cycle ka awt zawk a ti a, an fanu in kawrmawi leh naute lem a awh thu a sawi bawk a, chu chu tukin zing an in kawt a ka awm laia ka thil hriat a ni. chuvangin Nangni chu ka phut hauhlo che u a, Mahse...Bike chu ka lei lehlo mai ang" a ti ta duah a..." Eee...chu i bike leina tur chu pek i tum tihna em ni?" ka ti vat a, min melh kual hrek hrek a, a nui suk a, " Nia, a zahve hi ka pe mai ang chu ka ti a, Naupang cycle leh kawrmawi ka leisak bawk ang" a ti ta roh a...

" I a chu a ni emlo maw?... hemi nei thei tura i beih nasat zia kha i hre tawhlo em ni?" Kimtea chuan lungawilo hmel zet chuan a ti bai bai a, " Nia, hetiang mai mai kan lo nghak ve che a, i ti ho khawp mai Dama chu" Puia chuan a lo ti bawk a...A nihna takah chuan a mah kan ngei tak tak hauhlo, Mahse kan rualawhpui ve na em em bike a nei lehlo tur chu kan ui pui bakah kan hrethiamlo tlang a ni ber..." Nia, Vawi engzat nge ka rilru ka siam a, ka pek dawn leh dawnloh ka ngaihtuah pawh la hrelo. Ka rilru a a rawn thawh rual rualin ka amen nghal thlap a ni, Keichuan min phur tur thian ka nei che u a, kei aiin an mamawh zawk daih" a ti a, nui vur vur chung chuan Pindan lamah a lut a, a zai rut rut a.
"Perawh u tichuan, Pekin in awm ang.
Pekah Pathian, I hnehbang theilo vang.." tiin towel veng tut chung chuan a rawn chhuak a, Kan lo en thap a, Min melhkual den den a..." Enge mak inva tih hmel ve?" a ti hu a...." Tilo e, A kan ti che" Puia chuan a lo ti hmuk a...." a nih tak chu, Pangang hlaupa" tih pahin toilet ah a lut thurh a..." Ekcheh hmangpa" Puia chuan a ti ve nghal zat a....a reh thap a, " Min ngaih em kha maw" a rawn ti dut a, Kan 3 chuan kan inen a kan nui ta ham ham a....

Cycle kan lei a, Hmeichhe naupang kawr tur leh nautelem kan lei leh a, Mipa naupang thuamhnaw kan tur zawng leh char char a, Kan class mate Siampuii te dawrah kan bazar sa kan chhawp a, Mipui zikluih luihna hmunah Tlangval 4 in phur tak maiin Naupang thuam kan han zawng mai chu a nuihzat thlak duh kher mai...a hrim hrimah an size pawh hre uk silo a an inthuamna tur lei chu harsa ve tak a ni hrim hrim...Thlansa phunga kan bazar zawh meuh chuan Restaurant ah thingpui kan in a, Kan thu thap a, Kan inmelh hrek hrek hlawm a..." In tilawmawm kher mai, a hmunah in lokal ve dawn nge dawnlo?" tiin a thiante chu min rawn kual ve ngial a...Keichuan chhan enah pawh ka en lemlo, Puia bawk chuan " i van zamlo ve tak, Kalpui dawnlo che ni i la, i ang hlai leh dawn tih kan hrelawk vek a lawm" a lo ti nang nang a, " A va tihzia ve" a ti duh chauh a.....Kan Bike te chu Bazar ah Dah In,Kan bungraw lei chu Taxi ah hlangin Kan 4 chuan kan thianpa sawi chhungkaw harsa takte In lam chu kan pan ta ngei a...

Traffic tawt lutuk vangin kan kal sawtlo kher mai, Taxi driver leh kan thiana chu an ti ti barh barh reng a...Hepa zia hi mak ve em em mai chu fiamthu hian a insawithei vak zel a, a hmel a fai vei phuk roh si a, miin an awih leh nge nge thin. Vawi 1 pawh Kan khaw thenawmah Kimtea Putea nupui hruaiin kan kal pek a, Kan thlen zanah Nula thingpui lum puiin a tawlh hrat hrat reng a, Kan va fin ve meuh chuan an inchum taih taih ngam leh der tawh...Kan awmlai ngei chuan ' Heng hi ka kid te an ni a, Zika, Dawla, Zawra te an nih hi, Kan LPK an inkhalh chhawk thin a, a chang leh shillong lamah min zui thlah diah diah zel' tiin kan hminglem min vuah a, a pawt zuah zauh a, an ti ti dun zel a, Shillongah chu nula chuan thian a lo nei a, an han sawi dun vel a, a lo hriat em em angin a chhuah mai pek a...A tukah Kan hawng a, chumi tuk chu inneih ni tur a ni, kan rinloh tak maiin Thingpui lum nula kha a rawn tel ve ta si a, a biru kual ta za zak a. Hei tunah pawh kan chuanna Taxi driver hnenah " Zirtirtu niin thlakhatah Rs.20000 lai hlawh thin angin a insawi a. a rukin kan lo nui tha hlawm a...Taxi driver lah chuan ' Ka pu' a ti deuh sek mai bawk nen, dulthuar na urhin kan chuang ta ngat ngat a ni...

Kan kalna tur veng kawn lunlai takah chuan kan in hlang thla a, Taxi fare chu " Kimte nang han pe lawk mai teh, a nawi ka ak remchang lo tlat, nakinah ka pe mai dawn che nia" a ti nghal zat a, Hnial hman ni heklo Kimtea chuan kan taxi hman man Rs 150 ngawt mai chu a pe ta nge nge a...Taxi driver a tlanliam chiah tih chuan an in melh sala dun khawp mai..." Puia hi a san tha ber a, Cycle hi pu se, Kiman taxi man a chawi avangin heng ho hi Nangin keng rawh le" tih leh kal a rual a, Kan nui ham ham a, A sawi ang chuan kan tive mai bawk a...a hlat vak ring heklo le..kan kal tirh chuan kan kal thei viau a, mahse kn thleng thei mai lo a, kan chhuk a, kan kawi a, kan chhuk leh thin a, a chang phei chuan Kawmkarah kan kal kek kek a, Puia chu a thlan hluam tawh a...Thui fe kan kal hnuah " Puia khawi ka lo chhawk tawh ang che" tiin a lak sak a, In pakhat kan thleng a, chu in chu kan kalpel leh hnuah Kawrte kamah In hlui ve tawh tak mai, Ding awn laih mai chu kan hmu ta hlawl a..." Khu khu em ni" Puia chuan a thlan hru malh malh pah chuan a ti a, Dama chuan " Ni e" a ti ve mai a..." Min va chhawk har si ve" a ti hmuk a, kan then tha hlawm a.

In kan thleng a, kawngka kan kik kauh kauh a, naupang aw hian " Lau lut lawh" a rawn ti a, kawngka chu kan nam pawt det a, a rirak a, kan inzui lut ta tham tham a...An Inchhung han hmuh chiah chuan Chumite chhungkua chuan tanpui an lo mamawh tak zet a ni tih ka hrethei ngal mai a.

Thuthleng sei upa hmel zet tawh pakhat leh Stool 4 an neih chu inlengte thutna a nih hmel. Chhuar an neihve chhun chu puanin an zar hliah ve a, an puan zar chu fai ve viau mahse a thler deuh nual tawh thung, Gas stove an nei ve ngei a, Mahse gas an neilo tih hriat takin chu gas stove chu tapchhakah Mei chhem nan an hmang daih thung, Dawhkan hniamte hmanlai dawhkan an neih ve chhun chu an tuihmun niawm takah bulah chuan an tung a...Baltin rit bel bul chi 2 leh Backet te sen vet mai. A khaihna atan thirzai thlun an hman chu belpui lian lutuklo chunga thlangra pawp tawh chungah an dah bawk a,Tui dehna ah chuan Plastic chawhtawlh, kang sawr sawi ben tawh ah chuan, Steel thleng silo loh 2 leh khuhhriang a lo let bal a...Tapchhak bula bel 2 awm chu a chhin duhdah takin a inkhup a, Chawbel ah buhtlei thing atanga siam a invuah ngauh bawk a.Pindan bang an neih ve chu puan zar a ni mai, Kan luh phat khan Naupang 1 chhuat a lo tla melh melh kan hmu nghal a, chu chu mipa naupang niin, chhuat ah chuan thingzai bung motor lem anga siam, a lu lem niawm tak thing bung kilh beh. a ke atan Siliper chhia zai bial hi a lo khal rek rek a, Hmeichhe naupang chu thuthleng seiah a lo mu hil bam thung a, a kawr hak chu a var chu a ni ngei a, mahse rehtheilo a kai nasa tawh hle, pawnfen senduk a tlang thuina peh phang tawh a ha bawk a, saisir bem chung chuan, Nautelem sam tlakawlh lek lek tawh, bal niau mai, a ban lehlam bung tawh hi a lo kuah bet tang a, Tui em em chuan a muhil sak sak a...

Chutia a an hriat ngailoh mipa kan va lut chu mak tihmel zet hian minlo thlir a, " Mama khawnge i nu leh pa" tiin Dama chuan a zawt a, a ngawi ngal a, min melh hrek hrek a, Chhuatlai ah chuan thil a tla darh nuaih a, an inkhualtelem a nih hmel..A motor lem chu ke chu a tuaivir niap niap a...." lumah" a ti zawi sep a.

" Hetah kan awm e, ka che chau deuh a, ka muzal lawk a ni e, engthil nge in duh a?" hmeichhe aw chaklo tak zawi tham deuh fiah ru tak si chuan a rawn ti a, An pindan puanzar chu kan hawng dek dek a, An mutna khum hlai pui maiah chuan Mihring hmel pawh pu tawhlo, then deuh tha mai, ruhkawl vunin a tuam ve dawr dawr niawm tak Mipa hi a lo mu saisir bam a, a mutna sir tukverh lam hnaih zawkah chuan Hmeichhe lukawlh vek tawh, Mitmeng khur duk, biang ki deuh vang, hang dum duk lam rawngkai mah mah hi a lo mu bam bawk a. Kan dak thap mai a, A ni chuan peih leh peihlo chuan min rawn en a..An mutna room chhung chu a hnawk nuaih mai a, Thir thingrem dum lian ve tak pakhat hi a lo kau tuar a, thuamhnaw hnawhluh tawp tawp tih hriat takin an lo lawr tuar bawk a, Bangrel a perek ah Mipa puitling kekawr leh kawr 3 a lo intar ve bawk a...An room bangah chuan lehkha phek ah Kutziak nalh fahran biklo hian " A man engkimah min hria e" tih intar hi a lo awm bawk a, an mutna khum thosilen chu a bal uk khak tawh mai bawk a, Thosilen ban lerah chuan thisen chaw bur ruak tawh leh a hrui ringawt chu a inkhai bawk a, An khum lu zawn bangrel ah chuan damdawi bur leh a mum a awm nual bawk a...." eee...lo leng rawh u, enge tihsak theih che u kan neih le" tiin Nu ber chu thei leh theilo hian a rawn inbeng kang ar ar a....

" Eee ka pi lo tho duhsuh, kan rawn lenglut ve lawk a nih hi" kan ti vat a, Mahse inleng neih laia mut reng chu dikbik a tilo a niang a rawn tho lui ta hram a, Pawnfen fual pangpar sin te te inziak, hlui chuar tap tawh a feng a, T-shirt rawng duk, dal deuh tawh, a nghawng ribbing dul chuar deuh tawh a ha bawk a, a rawn tho chhuah takah chuan Nu ruakhau lam deuh, hmaifang chhelo tak mai hi a lo ni a...Thutleng seiah chuan a thu a, a fanu pawisawi lo, engmah hre hauh silo a, tui taka muhil sak sak mai chu a kut cher ve tawh tak chuan a chul hliau hliau a, mittui parawl kiang chung chuan " heti mai hi kan ni a, engmah eitur han hlui mai tur che u pawh kan neilo" a ti ban chalh a.
Dampuia chuan " Ka pi engmah kan ei duh hleinem, Kan in ei puar vek tawh e" a lo ti vat a, Mipa naupang chu ka kai tho a, a mawng paw hrat mai chu beng thawk thawk in ka mal chungah ka chawi a, " Mama tunge i hming?" ka ti a, a kut a seh niap niap a..." Lawmtea" a ti sap a, " Lawmtea chu a fel hmel hle mai" ka ti ngawt a, sawitur a vang duh kher mai...Puia ka va en a, Pawn lam a lo thlir dauh dauh a, Engmah hmuh a neilo, rilru bing takin a ngaihtuahna a kal tih ka hremai, Kimtea lah hmeichhe naupang leh a nu ngawi renga in zut delh delh chu a melh kar mai bawk a....

" Ka pi, engmah neih kan nei hauhlo nangin, Hei kan neih tlemte, hi keini thian ho hian Krismas hlim taka in hman theih nan kan rawn ken che u a nih hi. Tin, hei thuamhnaw tlem naupang leh in nupa hak tur kan lei bawk a, Nautelem leh cycle kan lei bawk a, Engmah tham nilo mahse min dawn sak ngei kan beisei" aw chhuak tha thei manglo hnuk ulh aw tial deuh tuau chuan Dampui chuan a ti a. A kekawr ipte hnung a zen nuap nuap a, A wallet atang chuan Rs 1000 tlang engemaw zah chu a rawn la chhuak a, " Hei hi in mamawh hun huna in hman tur a nih hi" tiin chu nu kut cher thiak maiah chuan a hmehbel nawk nawk a, a pek nu lah a lo tang ve in, " eeee a ngailo reng reng" a tive tlat bawk a, a tawpah chuan " Ka pu, awh tlangval i van fel tak em, in zavai achungah lawmthu ka sawi e, " a sawi zawm theilo a tap ta hak hak a, Hmeichhe naupang muhil a rawn harh a, a nu tap lai a hmuh chuan hrethiamlo zet hian a hawi zak zak a, a hmelhriatloh mipa a hmuh bakah, a u chu mipakhatin a pawm lai a hmuh bawk avangin mak tihmel zet chuan a hawi hrek hrek a, " a nu..." a ti tiak a....
****

Kha In a kan awmchhung khan ka thaw a chhamlo chauh a ni ber, Kan chhukna lam step ah kan inzui chho thliah thliah a, tumah kan tawnglo, Dampuian hma a hruai a, a kal sawk sawk a, a hnungah kan zui dat dat bawk a, " Mamte, Mamapa en teh Vantirhkoh van atanga min en rengtu mittui tla chunga min thlir rengtu i tih khan Min rawn tlawh a, Hei, i damdawi leina tur leh Bawihtea te unau Krismas kawrmawi turte an rawn pe a sin" tichunga an khum bula thingthi in, an pa damlo meng peih tawk tawk bulah tapchunga a ti lai hmel te, naupang 2 in lawm taka an thil neih an khal vel te, Pa berin thei leh theilo a, kan thianho ding thap min rawn melh tawk tawk hmelte, a mittui parawl kiang maite chu mitthlaah a lang zut zut a....hah pawh ka hre neklo e, Ka kal hlawk hlawk a ni ber...Taxi la In Kan Bike lam turin Bazar lamah kan Phei leh ta a...

Kan bike awmna kan thleng a, " Dama engtin nge kan awm dawn?" Puia chuan a ti hu a, A hmel atang chuan kan thil hmuh khan a khawih viau a niang a tak ran tawh a...." Ka hrelo le, haw nghal mai in duh a mi?" tiin a lo chhang a, " Eka tunang tlai tawh ah hawn chi pawh a nih loh hi" ka lo ti hluk a, " Aww.i inluah lamah mawle" ti pahin a nui tut tut a..Kan thianpa hmel chu ka en a, " Vantirkoh, Van atanga mittui tla chunga min thlir rengtu kha a lo kal a sin" a tih hmel niawm tak chu ka hmu tel tlat pek a, a pawisa thawh chhuah sa zawng zawng mite an hlan phal khawpa rilru tha thianpa ka nei chu ka intithei hliah hliah zawk a...a ni lah chuan enghelh nei hmel tawhlo zet chuan Puia darah ben thak pahin " Tlan vat teh, ka ek a chhuak tawh a nia" a ti vel mai mai si a, Vantirhkoh hmel hmu hial in ka inhria a...Kei nu leh pa in hneh taka an chawm, awh zawng leh duh zawng nei thei zel hian, Hmeithai fapa A awh zawng pawh neitheilo, a neih theih chhun ah pawh midang kian thei khawp a ni chu ka van tluklo tak em....ka hnuk a ulh teuh a, Ka thianpa chu kuah vawng vawng ka nap hial a......Ka thiante hmuhloh lai chuan ka mittui ka hru zauh a...

'***

Kan khua kan thleng a, Zanriah eikham ah Kan luhkhawmna ber Puia te in ah Kei, Kimtea leh Puia kan thu thap a, Puia laptop chu Kimtean a khawih malh malh a, Keiin Kuhva ei tuam tuam chungin Meizial ka pak khu tulh tulh a, Masi urlawk hma in Ni 2 chiah kan hmabak tawh si a,engmah programme kan la setlo....Puia chuan TV channel a thlir kual zut zut a, " Bawiha, Chanchinthar puan a hun e" a tih avangin DD News kan en a, Chutih lai chuan Dampuia chu a rawn thleng ve chiah a.
Thingpui hang kan dawm far a, Dampuia bike lei loh chhan chu Puia nu leh Dampuia chuan an sawi dun malh malh bawk a, Dampuia chuan hlim takin a sawi barh barh a...." I nu in engtin nge a lo tih a, a hrawk hrep che em ni?" tiin an nui dun kar kar a..." Ka nu, amak lutuk, ka nu hi retheih luat vangin Pawisa hman mai mai ui zet mai a ni a, Mahse khami zan a Aizawl atanga ka rawn biak khan hetiang hian min chhang a, Mama i pek lai vel tak a niang ka chhun mumangah i pa ka hmu a, a lo tap hlawp hlawp mai a, engvanga tap nge a nih ka zawh chuan ' Kan fapa ngilnei lutuk vangin min ti lawm a ni e, Ka lawm luat avanga tap mai chauh ka ni, Vana awm zawng zawngte chu kan fapa vangin lawmna mittui an biangah a luang a sin" a lo ti a, Kei chuan Mama chuan enge a tih a? Ka ti a, Min en reng a, a bo ta daih a. ka au tuar tuar a, chutah aw hian ' Lei boral mekah Khawngaihna a khat mihring tlemte an awm avangin van mipuite lawm avangin kan tap a sin" ti hian ka hria a...Ka phu zawk a. Ka harh ta daih a....? " tiin a sawi a, Min hauh a hnekin. Lalpan malsawm che rawh se. Tiin min thlah zawk mawle..." a ti siam siam a.

" I titha hle mai, Dampuia chu, Vawiin khan I pa Huaia ( Kimtea pa) I Pu Zathuama ( Ka pa) te nen in zin haw thil rawn hawn kan sawi ho a, I Pa Huaian rawtna a siam a, chu chu kan remti tlang ta a...I Pu Zathuama In ah va kal vat u la, Naktukah Aizawlah Bike in zuk lei dawn nia" tiin Puia pa Ka pa Malsawma chuan a rawn ti boh boh a, Kan ka hau, ka in melh hrek hrek a..." Tu bike tur maw?" Kimtea leh Puia chuan an ti rual thawt a...Nui sun sun pah chuan " eee..kan fapa Vanram meuh lawm avanga tah tir theitu tan mawle" a tih tak ah chuan kan zuang tho zawk a, Dampuia mitui tla pura lo thu chu kan bawh tlu ta rawk rawk a....

Kan hlim em em a, Nuam kan ti em em bawk...kan thianpa rilru that luat vangin Chhungkaw harsa tak, Mite thinhrik leh mite buaipui loh, Chalchang a boral mai tur, Naupang rualawt taka thiante chilthli tla duah chunga thlir turte hlimna pe thei chu kan hmangaih em em vek a, a ma vangin Mi harsatna sutkian sak chu kan chak zek zek tawh a, Hlim takin Krismas kan hmang ho a, Chutiang chuan Kum tluanin Bawm kan siam theuh a, Kan chhungkaw 4 chuan kan bawm dawh chu krismas puala mi chanhaite thil pek hlutak atan kan keng khawm a, Kan hlan ta thin a ni...Kan thianpa Inbual turin a sak rat rat...
" Pe rawh u, Tichuan Pekin In awm ang"
Pekah Pathian a hneh ban theih lo va.." tih chu kan innghahna a ni ta ber a....

End....

Note:-. ka kut hlei tih tur hrelo in " Krismas Kawrmawi" tih an sak ka ngaithla pek a, chutah ka rilrua thil lo lang chu hetiang hian ka rawn tar chhuak ve mai mai a, He ka kutchhuak buarchuar tak leh hnemhnan tur awm hauh silo hi Malsawm a nih hlauh a, Sum leh pai hmansen loh neitu ten Krismas thil pek hmanga Midangte hlimna petu an nih ve tak hlauhin tih thuah ka rawn chhawp chhuak ve mai mai a ni e..."
Tochhong Ruata...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)