CONFESSION OF THE DYING MAN...

Ngaia
Site Admin
Posts: 25813
Joined: April 30th, 2016, 4:07 pm

CONFESSION OF THE DYING MAN...

Unread post by Ngaia » May 14th, 2016, 11:17 pm

CONFESSION OF THE DYING MAN...

" Ka Pu i lo kal ngei chu a ngai a ni, i lo kal loh chuan a rilru a na lutuk ang, Khawngaih takin lo kal hram teh" tia nu pakhatin min ngenna chu tih hlawhtlin sak ka duh vang em em pawh nilo in, kei akara min hmu duh ve khanglang an awmte chuan ka pan dawr dawr mai tur a lawm, tih vang chauha he hmun hi pan ka ni...

Km 6 zet Aizawl khawpui atang kan tlan hnuah, kawng chhaklama peng lo awm Tunhma chuan Black top ve tawh ni ngei tur chhe ve nuan tawh ah chuan ka car upa ve tawhlam chu ka kaltir boh boh a, " He kawng chu engkawng nge ni ngai, a hnim bawk si, motor han luh theihna reng a awm hleinem" tia in sehruh teuh chung chuan ka tlan sawt dawt dawt reng a. Mel khat emaw dawn ka insawh fe tawh hnuah Tlang thengthaw nuam leh phul hmun rai dap mai ka chhuak ta hlawl a, chu phul hmun chu ka tlanpel deuh hlek hnu-ah Tlang pang behchhan deuhroh a awm Aizawl khawpui thlir zawng a ding, In ropui hmel zet mai, ka thleng ta hlawl mai a, Main gate chu a lo inhawng sa thlap tawh a, motor chuan ka tlanlut zel a, an In sak dan atang chuan mi khawsa thei tak an nih ngei a rinawm, an compound hrim hrim pawh chu tunhma chuan enkawl uluk ve tak a ni tih a hriat viau.. Gate atanga luhna kawngpui chu a leilung pianken ve reng emaw tih turin cubic lung an rem mam nalh a, An In chu Var deuh ro rawng te pawh khawk awm zeuh zeuh tawh a ni a...An insak dan design chu Hmanlai a Sap ho insak ropui deuh ang mai a ni...

Chu in varvo kawt ka thlen chuan ka thawm hriain Nula emaw nuthlawi emaw, nu la naupang tak emaw ni hi a rawn chhuak vat a, Kamis ze tial sin deuh a tial leh Jeans kekawr a mal zen zaih tilang nalh tawk tur vela tight a ha bawk a, Motor atanga ka chhuak chiah chu minlo nuih sen sen a " Ka Pu i lo kalthei chu a lawmawm hle mai, a ni pawh a hlim sawt ang" tiin min lo chibai sawk sawk a, ka zin bag chu min lak sak a " Ka hming chu Jenny a ni a, he In hi ka Pu atanga ka rochun a ni a, Ka pu chu hriat pawh i hre maithei, Brig.Col. L.Khan Paite a ni e" tiin inchhung kan luh tawh hnu pawn a sawi lang lang reng a..." He hmunah hian keimah bakah, Mampuia kan huan leh In vel enkawltu Ka Pu Sipai tanlai a, Chakma naupang a chawm len leh enkawl leh Pi Saii ka naupan laia min enkawl thintu tunthlenga kan hnena khawsa a, pasal pawh nei duhlo nen kan 3 in kan awm a.." tiin thutkhawmna hmun kal pel a, ka room tur panna kailawna kan chhoh laite chuan a sawi zat zat reng a...

" Ekhai, I pu hrelo he Zoram zimteah hian an awm dawn em ni ang?, Mizoram leh India tana a hnathawh hi chu kan sawi bang dawnlo a ni e" ka tive luam a.." Hei hi i room tur chu a ni a, bathroom a awm a, hei steel almera a awm bawk a, heng a chhunga hian i thuam hnawte kha i khai dawn nia" nui ver ver pah chuan a ti a..." I inbual zawh hnuah helai a ka koh chhanche kan sawi dun dawn nia" tiin room atang chuan min chhuahsan ta a...

Zanriah eikham chuan Thutkhawmna pindanah chuan kan thu a, Pi Saii chuan La a phiar niap niap a, Jenny chuan Lehkhabu chhah deuh mai pakhat hi a chhiar a, " Engthil nge helai thleng thlenga min koh kal tak mai?" tiin ka be hmasa ta a..." aaa englo a nia, Greenwood Hospital-ah a hmingin Doctor ka ni ve a, Kum 4 zet chu ka thawk ve ta reng mai, Damlo chitin an rawn lutchhuak thin a, Natna maksak pui pui leh khawngihthlak tak tak te, Damlo ni chunga ngeiawm hliah hliah ' Kan sawrkar lai a nih hi' tia nurse leh a thawktu vin khar khar thin Politiciante nen lam kan inenkawl thin a. Chung zingah chuan thla hmasa ni 15 zan khan Pa Upa lam deuh hmelpu hi unconsious in an rawn dahlut a, ka enkawl chho ta a, reilo te ah Biak theih in ka enkawl chhuak thei hram a..." tiin a lehkhabu ken chu dawhkan ah a dah a, coffee no chu dawmin an lem khalh a..

" Test hrang hrang kan neih hnuah chupa chuan natna a lo ngah khawp mai a, HIV+ , TB, bak-ah a pumpui a cancer a ni tih hmuhchhuah a ni a, Zai chi a ni tawh bawk silo a, chhung khat laina a nei bawk heklo, tichuan kan enkawl chho zel a, tunah chuan khumah mu in eitur pek a ngai tih mailoh chu a harh tha leh tawh viau a, damdawiin a dahreng a nih chuan Damdawiin awmna man pek tur a nei silo a, kan dahreng thei bik silo. Tichuan ka enkawl lai a nih vangin a bill neih sa pawh ka clear sak vek hnuah ka in-ah ka la lut ta ngawt a, tunah hian hetah hian enkawl mek a ni" an ti leh a, " Chutichuan kei engvanga min ko ve daih nge i nih a?" ka ti leh a, a thusawi leh min kohchhan awm ang tur inzawmna engmah ka la man thiam lo....

" Nia, Ka rawn biak zan che, hma ni khan ka hnathawk hawng chuan ka damlo enkawl mek chu ka tlawh zawk a, a lo harh phian a, kan ti ti ta luam a, tahchuan lehkha them address card hi min pe a, chutah chuan i hming leh address bakah i biak theihna no nenlam a chuang a, engtia tihtur nge ka hriat loh a vangin ka hawi hai viau, " Kha mi kha min phone sak la, a ni kha ka mi ngaihsan leh ka mi rin ber a ni a, ka chanchin lehbka thurochhiah min vawnthat saktu atan ka duh a ni, khawngaih takin min kohsak thei ang em?" tiin min ngen ta a, Chutiang taka a mi rin chu kohsak ka intiam hnuah ka rawn bepawp ta phawng che a ni e." tiin a thusawi chuan amah a nghawng viau a niang a tak ram tawh mai a..." Chu damlo chu khawiah nge a mut a, engtin nge ka biak theih ang, engvanga kei min ko nge a nih tih nen. Hriat ka va chak ve" ka ti let ve a..." Pi Sai zanin lamah chaw i pe tawh em?, kan pu rawn kal thu i hrilh tawh bawk em?" tiin Pi Saii laphiar malh malh lai chu an bia a, " Aw, Ka pe tawh e, a lo kal thu pawh a hria e, a hmuh theih reng tawh a ni" tiin a lo chhang a...Nula chu a thutna atang chuan tho in " Ka pu minlo zui rawh le" tiin Inchung lam chhohna stepah chuan kan inzui chho ta hnak hnak a...

Ka room atana min hman tir chu kan kalpel a, a piah corridor ah chuan lutin, room pakhat kawngka lo awm chu a hawng a " Albert chaw i lo ei tawh em?" zang vah chuan a ti lut a, room chhung a lo awm, damlo khum ang deuh kam kan san tukverh lam hawia hun ah damlo pakhat lo mu chuan fiah fel tak zawi deuh si chuan " ka puar khawp mai. Pi Saii eitur siam ei theia ka nunna zuah a la ni hi ka lawm tak zet a ni" a lo ti a, Khum lam kan pan hnai a, damlo hmel kan hmu thei ta a, Damlo chuan min hmuh velah a mitmeng atangin a hlim a ni tih a hriat a, a lo nui suk bawk a, a kut cher chhe zet chu thei leh theilo a rawn phar chhuah pahin chibai min buk a tum a, ka lo dawm sak vat hnu-ah thutna lo awmah chuan kan thu ta a...

Chu damlo chu han en mai chuan Pa upa lam, keiai mah a upa a nih hmel a, pa ruakhau tak, 6 fit lai emaw tur ruhrel lian zet mai a ni tih a hriat theih a, a hmel chu a dum deuh thul nangin a hmaifang a chhelo tih a hriat khawp, a lu ah putar lukhum lum ang hi a khum nangin sam reng reng a nei tawhlo tih a hriat theih mai bawk a, A mit meng khur duk mai chu a fiah kulh thung a, a biang dinglam ah chuan kut zungchal chen tur vul hian a ser thla ruak bawk a, a nuih zawng chuan a ha a lang thu tawh a...A diktak chuan Mihring pawh a ang tawh meuhlo, damlai nisi vun chauhin a tuam a ni tlat si a ni...

" Ka Pu, Advocate Remsiama Tlau ka ni a, min mamawh niin kan pi hian a sawi a, enge tihsak theihna che ka neih a, kei kher engvanga min ko nge i nih ka va hrelo ve, nge kan lo inhre reng tawh zawk?" tiin bul kan tan phawt a. " Nia, min hre tawhlo ang, Kum eng emaw liamta khan College khatah kan kal ho thin a" a ti a. A hmel chu ka en ngial pawn ka hrechhuak zo hauhlo, " ha ha ha min hre tawhlo mai nilo in, min hrevaklo hrim hrim ang, Keichuan ka hria che a, lehkha kan zir ho lai khan i zia kha mi pawisawilo tak leh mi ti zawk zawklo tak i ni tih ka hre daih tawh a, chuvangin engkimah Kan lecture te pawn an ring che a nih kha...I nunah thil tamtak entawn tur a awm a, tuna i hna i thawhna kawng a i hlawhtlinna leh media i hmachhawn thin dante pawh ka lo en ve fo thin a. Ka thian thenkhat an buaina i chinfel sak fo tawh a, an harsatna hrethiam takin an pun manche i laksak duhlo zel thin bawk a, chutiang zawng zawng te chu ka hre kil kel a. Ka hmelhriat i ni satliahlo a, keini Misual boral mai tur he Zoram khawvela lunghahna tur neilo zawng zawngte hian kan ngaisang che a, kan ring che a, i hnenah lo chuan tluk luhna tur kan nei heklo, kan Nu leh kan pa nih i fawm a ni ber" tiin an khuh khak khak a, " ekhai...hmanhmawh duh reng reng suh, zanin a riak dawn a lawm" Dr.Jenny chuan a lo ti vat a...a mit a chhing vang vang a, a thaw a hah tih hriat takin a thaw sek sek bawk a....

" Tichuan, hetiang a ka lo awm a, ka damlai hringnun ka thlah mai dawn takah chuan, ka nun thuruk min vawn sak a, ka ro sum neih ang ang min chinfel sak hnuah " KALVARY HOSPITAL" Keini In leh lo neilo te chawlh bukna, kan inhumhimna hmun Khawzawl a mi te tanpuinan hlan vek ka duh a, chung chu min tihsak turin ka duh vang che in heta lo kal tur hian kan pi hi ka dil ta tawp a, a niin phal takin a lo ko kal bawk che a nih hi.." aw lawi lek lek tahchhuak insum tih hriat tak hian a ti a...a mimeng khurduk mai atang chuan mittui a lo luang chhuak ngiai ngiai a.." Keini akara i mi fakderna chu ka va phuloin, chutiang a min ringtu kei min hmu duhtu te lakah chuan ka tlanchhe duh ngai lo a, mahse chutiang taka i thuruk leh ro sum tikual tur chuan kei nilo midang i hmu zawk lawm ni?" mahni in sit tak chung chuan ka ti a. " Khai a, Pu Remsiam nang aia rin he khawvela mi nung zingah ka nei hlei nem" a lo tivat a, eng eng emaw kan sawi luam hnuah hetiang hian a chanchin chu min hrilh ta a...

THE CONFESSION...

" Ka pa hi Mizoran sawrkar hnuai a Power Department ah Executive Engineer a ni a, Ka nu erawh House wife a ni ve tawp nangin, kan in kawtah dawrte siamin eichawp dawr a nei ve a, Kut themthiamna talent nei tha tak mai a nih bawk avangin Khawl hmangin puan a tah thin bawk a, Sum leh pai lamah kan buailo viau thin. Kan awmna vengah pawh In kan awmna nilo 2 dang cement concrete a sak vek kan nei a, chubakah Dawrpui phei ah leh Kulikawn-ah In kan nei bawk a, chung kan in luahman zawng zawng chu thlakhatah pawh a tam tham ve viau thin. Chumai a la nilo Tuirial kamah leh Tuivawl kamah Teak hmun zau thak tin 100 hmun vel zet kan nei bawk a....Unau pianpui hi 2 ka nei a, hmeichhia ve ve an ni a, chumi nilo chu ka pa fa hmasa, a tlangval lai fa Mipa u ka nei bawk a, chu pawh chu kan bulah school kalin a awm bawk a, chutiang chu kan chhungkua chu kan ni....

" Mak deuh mai chu, ka pa hi fapa mal, unau pianpui nei miahlo a ni a, ka nu pawh unau hmeichhe 2 chauh zuk ni tlat pek a...?" an ti leh a, a chau deuh a niang thawk a la leh ham ham a....a khuh khak khak hnuah tui sik no a inchawp chu an lem khalh a.." ka hming chu Albert Lawmzuala ka ni a, Albert tiin min ko ber thin" a ti leh a...Ka hrechhuak ta uar uar a, Kha Alberta kha a nih rindan ka neilo hrum hrim, Alberta kan lehkhazirpui thin kha chu, Palian leh taksa chak hmel tak, nula te en hat hat thin a ni a, A luck viau thin a nih kha, Class kalloh mai mai a chin bakah ruih hlo an khawih nasat em vanga hnawhchhuah hial a tawk a nih kha..khami hnu atang khan ka hmu leh ta ngailo reng reng a, tun hi ka hmuh lehna hmasa ber a nih avanga ka hai mai pawh chu thil mak a ni vaklo, a damlo a, a cher em em bawk nen, ka hre mailo pawh chu a mak lemlo niin ka hria..

" Pawl 8 ka nih hma zawng chuan lehkhathiam leh mite entawn ka ni thin a, Pawl 7 ka pass a, Hostel ah min dah hnu atang chuan ka mizia a dang chho hret hret a, Sual em em nilo mah ila, meizial zuk ruk, Hostel atanga chhuah ruk, zan len engkim ka zir chhuak a ni ber. Zirtirtute pawn complain an neih fo nangin a fapa duat awmdan chuan apa mit a timim zo meuhlo a niang, Min zilh hau tha vak duhlo a, ka u te 3 chuan min zilh mai thin a, chutiang chang pawh chuan ka lamah a tang tlat zel, ka nu phei chuan min buaipui hman meuhlo, a dawr leh puantahna bak thil dang a buaipui hmanlo a ni ber...Chutiang chuan pawl 8 chu Simple pass in ka kalpel ve mai bawk a. Pawl 9 ka zir kum chuan ka nun a danglam ta dawrh a...Hostel ah ka awm peih tawhloh avangin School hranah sawn ka ni a, Nitin bus emaw taxi emaw a thlah ziah ka ngai a, achang leh ka pa driver ten min thlah thin bawk a, chutiang a kum chanve zet nuamsa taka ka kal thin ta a, Aizawl thalaite zingah lirthei khalh phachin ngaihsanna nasa tak a lo awm a, ka ngen nasat em avangin ka pa chuan scooter NV min leisak ve ta hlauh mai..Ka lawmin nuam ka ti viau, thiante biakthat ka hlawh bakah hmeichhe lam sawi sep ka kai ta thuai a, tichuan School thlenglo a nilen chang ka nei ta zauh zauh a. Chutiang ka nih meklai chuan ka pa chu a hnathawhna hmun Lunglei atanga an rawn hawng chu Pangzawl khaw bulah sawn an accident a, ka pa chu ka pawh chhawnlo in a boral ta mai si a...Kan chhung kua chuan kan tuar ve hle.."

"Chutia ka pa a boral ta chu kan tuar tlang hle mai, A thih hma kum hian promotion a hmu hman a, SE ah a kaisang hman a ni..Khatih hunlai a Engineer te sum lakluh nasat zia leh khawsak theih zia chu kan hai awmlo e, chutiang chu kan ni. Kan tuar vek a, a bik takin Ka nu in a tuar zual, Ka nu ai mahin keiman ka tuar a, ka hrethiam theilo, school ka kal peihlo a, chaw ka ei theilo a, khawlai ka chhuak ngai heklo, ka roomah ka tawm chawt a ni ber...A awm ve bawk a ni e, Nikhua ka hriat atangin ka pa fapa bik ka ni emaw tih tur khawp in kapa hi ka ngai a, a ni pawn min duat..Tlai office a ban tlai deuh changte hian a rawn haw hma chu chaw ka ei duhlo thin a. Zanah a inkhawm emaw, a leng emaw, inleng a nei emaw nise a mut hma chu ka mu duh ngai heklo...Chutiang chu ka nih avang chuan ka tuar over bik pawh chu an hrethiam ve viau...

Hetia ka pa ka sun lai hian ka thian tha tak tak ten min tlawhin an rawn kal fo thin a, min hnem viau thin, mahse an hawn hnuah ka nihdan pangngai ah ka kir leh zel si a...Kan in chu Hmun rem tak a awm niin Kawngpui an in a awm a, kan kawmthlang huan awihtlan deuhah chuan a in pharh thla zui bawk a, In luahtu pawh chhungkaw 5 lai leh Unau 2 an awm ve nghe nghe..Chutiang khawpa In lian leh ropui eltiang nimahse, kan colony ah chuan awm deldul mah i la, kei atan erawh zawng In ruak huai ang mai a ni...Ka pa tlai tin ka lo nghah thin kha, a lo hawng thei tawh der silo...Chutia lungleng leh khawhar taka hun ka hmanlai chuan Ka thianpa, school a ka kawm thin Lawma hi School chawlhni ah a rawn leng a, Nilengin kan inkawm a, Hemi ni hian Damdawi ruih nawmzia ka lo hre chho ve ta a, Hemi ni a ka luhchilh atang hian ka tawlh chhuak leh ta ngailo reng reng a ni" tiin a hun kaltawh a a thil tawn, a nun thlak thleng dan chu mittui parawl tuam in a sawi a....Kan thil ngaihthlak chuan min hneh viau a niang, thawk pawh ka thaw tha theilo lek lek a ni...

Ka pa boral kum hian Pawl 9 ka paltlang zo lo a, Ka zia a danglam tan viau, Ka nu leh Ka u mipa ( ka pa fa hmasa ) an in millo a, buaina kan nei ta zeuh zeuh a, a ni hi nupui nei tawhin kan inhnuai an luah ve a, fa 1 an pawm ve mek bawk..An buaina chu hei hi a ni, Ka pa boral takah chuan ka pa penson engkim ka u hian a buaipui a, ka pa thuro chhiah ah pawh ka u chu rokhawm tur zingah a telh ve hial nghe nghe a, amah Tlangval fel leh lehkhathiam a lo ni bawk nen Chutia ka pa Penson vel a buaipuina lamah chuan hotu lian te lamin " I pa vangin i tan hna zawn a awlsam phah ngei ang," tiin thil tul leh pawimawh an lo hrilhva, chu chu bawhzuiin ka officer hna chu chhunzawm thei em em lo mahse, LDC a hna pek a ni ve ta a...Kan unau ho chuan kan lawmpui viau laiin kan beisei ngai hauhloh ka nu thinlungah a lo awm reng chu niin " I nu ka ni a, tinge ka thu hmulo a i lo tih ve ngawt" tia bul tanin buaina an nei chho ta zel a, Ka farnute chu a hmin mai nangin ka u thlavang chu ka hauh ve tlat thin....

Hetia ka Nu in ka u hnathawh a lo lung nihloh chhan em em chu a ro khawm tur zingah a dah vangin chu hna chu ama nutapa ( Ka putea ) ka u rual vel thawh atan a lo ti vang a ni awm a, mahse engkim kalpui fel vek a ni hman tawh si a, ka nu ngaihdan a ni talo a, kan buai chho ta zel a ni...buaina a punlun zel hmain ka u chuan " Ka nu, i thu hmulo a ka lo tih avangin ka inthiamlo viau mai, mahse hnuh kir theih a ni tawh silo a...Hetia keini nufa in khat a khawsa tlang reng kan in bauh a, kan in tim reng dawn chuan Ka pa hming kan ti hmelhem dawn lutuk a, chuvangin kan Pute remruatna angin ka insawn chhuak phawt a nge, i harsatna kawng engkimah ka tanpui thei zel dawn che u nia, " tiin min chhuah san ta a...Engmah ka nu ka atangin uina leh chelh tumna reng reng chhak chhuah a awm lo, tichuan ka u ka ngaih em em min duat em em tu ni bawk chu laksawn sakin ka awm leh ta si a...Tleirawl harhvang chho mek, rilru luhlul ve tak mai, khawlai nuam ti tan chu khawharna in ka khat a, kan In chhung ngei chu nuam tihna ka nei tawhlo... Ka khawvel chu pawn lam ah dahchhuah niin ka nun thian ze inanglo tak tak te bulah khawsa in ka tlangval chhuah chhoh hun chu ka hmang chho ta a ni..

Engtin tin emaw ni ka khawvel chu chuan ve zelin Damdawi tui leh damdawi mum lek chuan ka khawvel nunah eng an ang pha tak taklo a ni chek a niang, Injection thlengin ka bei chho ta zel a...Hetih hunlai hian Proxivon kha kan la hmelhriat em em lemlo, Ka thianpa unaupa a pa Pastor Burma rama awm tawngkam atangin No.4 kan hmelhriat chho a, a rawn zin thlak leh hmasakna berah kan khul tur la turin kan inchah ve ta ngei a...Karloah No.4 chu kan khawih ve ta reng mai..Hemi tum hian kan Inchiu rih biklo, ka thianpa unaupa hriat dan in a hip in kan hip thin a...A rate pawh a la sang vak lemlo, 200 g hi Rs 1500 lekin kan lei...Rs 100 note zial mum in dawhkan ah emaw kan chap a, chhu chu pawisa zial mum chuan kan hnarah kan hip lut ta thin a, hritlang deuh reng ang mai kan ni, kan insut hreih hreih ta reng mai a...a hnu deuhah a khu kan hnim leh a, chutiang chuan nuam kan chen chho ve mek tih laiin Shillong lama lehkhazir kan thianpa rawn haw in No.4 injection na bik Insoline a rawn hawn a, chumi chuan kan inchiu ve ta a..

A tirah chuan ka luak a chhuak a, ka che theilo a, ka muhil thei heklo, mahse ka tihnawn leh hnuah ka hrethiam chho a, a hnathawh dan ka man chho hret hret a, ka thisen ah bu a khuar hneh chho ta viua a ni..Mahse, tlangkam atanga ka lo hriat dan " Heroin a injecfion te chuan an thlawk delh delh niin an inhria" an lo tih thin chu a ni hauhlo mai, thlawka in ngaihna engmah a awmlo a, kan nungchang a tha zawk zamah niin ka hria...Kei mi zakzum, thiante ti ti ngaithla ve mai mai thin pawh, ka ti ti ve barh barh phah fo tak avangin ka zahzum thupnan ka hmang a ni ber...chutih lai chuan College ka rap chho ve mej a ni..." tiin min rawn melh ralh a...Keichuan " Nia, ka hrechhuak leh tak e, College admision kan ti dun a, i thiante nen kal lawkna tur in neih avangin i form ka lo fillup sak tawp che a, ka lo thehluh sak ve tawp che a nih kha...In kawmchhak nula Zuitei min hrilh angin i profile kha ka hriat ang ang kan dahkhat ve tawp a nih kha..." ka lo ti ve vat a...a nui suk a, a nuih zawng chuan a ha chu a lang filh deuh thut a, a lang kuh lek lek bawk a...Ka mithla a Tlangval hrisel hmel tak, Ngo lam pang khatih hunlai a an hair style uar em em tukhum sam zuah a, bek mehkawlh a, chhip buklaih a sam met kal thauh thuah lai a lang zut zut a, tuna a dinhmun chu a danglam ta ngei mai....A mit a chhing a, a thaw hak hak a, zawi raih hian " ka van chau ve mawle..." a rawn ti sap a...keichuan " ekhai, Albert chawl hahdam tawh rawh, hei zan pawh a rei tawh e..Naktuk nileng hun kan nei a lawm" ka lo ti vat a, " I hun ka khawhral tir rei lutuk ang che awww" a ti niah niah a, a mitmeng atang pawn a inthlahrung tih a hriat theih...." Nia, taksa chau lutuk a i awm chuan i duhang takin thil i sawi fiah zo dawn silo a, hah chawl phawt la, chu naktuk minla champui theih dawn chu" Jenny chuan a ti a, " Ekhai Dar 10:30 lai a ni tawh, I damdawi thun a hun leh chiah bawk a nih hi," tiin banga hrui inkhai chu a pawt zauh a, dar a ri bang a, Reilo teah Pi Saii chu tray a damdawi leh syringe chawi chungin a rawn lut a. Keini pawh kan chhuahsan ve nghal bawk a, Pi Saii nui hak hak leh Alberta nui huk huk ri kan hre zui a, " a tihdan a thiam a nia" Jenny chuan a ti sap a....

THE 2nd CONFESSION....

Zing chaw kan ei zo a, Ka tihdan thin pangngaiin bual in ka pan a, tui vawt tha tak mai chuan ka inleih phar phar a, zan lam a ka thawnthu ngaihthlak in ka rilru a kap em vang a muhil thei mailo a ka awm a vangin ka nguai bur a, mahse tui vawtin min chiah takah chuan ka harh sawng sawng thei...ka inthlak a, inhnuia lamah chhukin tui sik bottle in ka keng a, Alberta mutna lam pan ka tum mek laiin Jenny nen kan inhmu a..A nalh zaih zaih hle mai, Doctor form ha a, Damdawiin ward a fang veltur chu ka mitthla a, damlo tan pawh dam sawng sawng theihna tur khawp a ni ve reng a ni..." Vawiin chu Inentir ni a nih avangin ka rawn tlai deuh ang, taka engkim i mamawh kha Pi Saii hnenah lo lam hmiah hmiah mai rawh, i In ang chiah in khawsa ang che" tiin min bia a, ka lawmthu ka sawi hnu chuan lo nghak rengtu a driver hnenah a inpeih thu sawiin a chhuak ta a...Kei pawn Alberta Room lam ka pan ve nghal a...."He Nula hi tunge maw a nih le, hmelhriat hauhloh ruih hlo tih nasat luat vanga thih mai hmabak enkawl a, a inchhungah ngei a sengluh tlat theih ni" tia mak titak chung leh a inpekna ngaisang rilru tak chung chuan ka kal ve chhut chhut a...

" Chutiang a ka awm tak fo hnuah Ka sualna ti punlun tur tingin ka ruih hlo tih vanga college atanga hnawhchhuah ka ni leh zel si a, ka nu leh ka farnute rilru a na ngei mai..An duat em em, an tahpui lawp lawp chu mak tih a harsa khawp, Zilh, fuih, hau, khawngaih engkim an ti vek, mahse kir thei ziazang ka ni silo...Ka room chhung a ka thil neih sum chang thei chuan ka ruihna tur an thawk chhuak fo ta reng a...Thawhchhuah neilo, pa ro sum thlazar hnuai a drug ngawlvei lo nive tawp tan chuan lu a hai duh map map hle bawk a ni..

Ka farnute 2 chu Delhi lamah an awm a, Pakhat a upa zawk chuan Nurse a zir a, a zir chhuah hnuah Cancer damdawiin ah a thawk nghal a, ka u chiah chuan Msc a zir mek thung...Chutia kei college atanga kick chhuah ka nih takah chuan an awmna lamah min hruai thla ve ta tehreng a, an hlimna aiin an mualphona thlensaktu ka ni ta zawk a...." a thap chhuak hawk a, ka phu zawk thei hial...." Ka farnute zahna ka siamsak ngun zia kha, chuti chung chuan vin a hnekin ka lu chungah kut nghatin min tawngtai zawk zel a...An pawisa ka ruk sak thul. An thiante hmuh laiin ka OD thul..An hawi sang ngam ngailo, Mizo te zinga awm an chak ngai heklo...Hrehawm an ti ngaih ngaih thei hle ang..Mahse, hnawk min ti hauh chuanglo..Kei rui lungpuamin ka tihtauh khum a, hawn san daih ka tum changa " in zahna siam saktu mai mai ka ni a, hnawk min ti" tia ka an vak vak chang pawn " Mamte hnawk kan ti ngailo che, i awmloh techuan kan lung a leng lutuk ang" tiin mittui nen min chelh zel zawk a...

Tumkhat pawh, kan Upa ber Makimi piancham a thianpa, Minister Fapa Doctor zir mek a mah hmangaih em em tuin a lawmsak tumin, an thian tha tak tak, Damdawiin a athawhpui hnamdang polite tak tak te, Aizawl pa hausa fapa fel tak tak te leh, Ka u thianpa U Sawma zirpui Hnamdang leh Mizo te an awm thap a. Ka u chiah Bektein min ngenlawk viau nangin ka thei nganglo...A tirah chuan ka ngawi ngal reng a, mahse pawisa ka dawng hlauh mai a, rang taka tlanchhuakin Damdawi dawrah Proxivon capsule khat ka va lei a, ka inchiu ta a...Hetih lai hian Mizoram lamah chhuan Proxivon in kan thalaite a suat nghauh nghauh lai, miin an tihkhai lai a ni nangin Delhi tlangah erawh nachhawkna pakhat a nih vangin langsar takin an la zuar a, duh duh tan a lei mai mai theih thung si a ni....Ka injection hnuah chuan ka boruak a dang daih, ka phur surh tawh a, ka tawng barh barh reng a, fiamthu ka thawh a, an nui dar dar thin a...Ka farnute pawh an hapui tawp langin an nui ve hial,,..Ka pa boral hnua ka farnute nuih nasat ber tum a ni hial ang...mahse an nuih chhung a reilo, Ka zun a chhuak anga sawiin toilet ah ka lut a, Ka inchiu leh ta a, ka tek tha leh ngei mai, toilet atanga ka chhuak, ka damdawi hnathawk ka zolo chu engmah hreloin ka thal chhuak thuai ta mai a, an sawi danin ka kut lehlamin Lapua thisen kai nuan ka hum a, lehlamin Ka damdawi chawhna bur chhin ka hum bawk a...Ka bengah syringe ka zep tat bawk a ni awm e, ka chhuak a, " Enge ka sawi" ka ti hman chauh a, ka tlu ta tawp a ni awm e...

Chumi tum chuan ka u Bektei chuan kar khat lai min be duhlo...Mahse ka thiamloh zia ka hria a, engtinmah ka ti bik chuanglo a, ngaihdam ka dil duh bawk heklo..Chutiang chuan an bulah Kum 1 pawh tlinglo ka zukawm chhung chuan ka chawkbuai thin hle...Mizo inkhawmna hmunah te ka OD hial a, an zah theih tur zia kha....Ka U Bektei chu Mizoram lamah chawlh hmang turin a haw zawk a, a rawn chhuk thla leh chu a cher kawk thei hial, a rilru nat luat vangin zan a mu theilo a, chaw a ei thei heklo, ralkhat atanga min hrilh a duh bawk silo a, Thla khat lai a cham chhung khan a thlen zan bak chaw a ei miahlo a lo ni a....achhan chu Ka pa best friend nupui vawi 2 lai neitawh, Pathlawi fa 3 lai nei leh ka nu chu anlo inngaizawng a lo ni a...Kan unau ho a kan hria chu kan khumah theuh bawkin kan tap tliar tliar a...." tiin a mit a mittui chu a biangah a luang chhuak ngiai ngiai a...Chumai a la nilo, Kan Upa ber kapa fabik chu an hnathawna ah chesualin a spinal cord a ti chhia a, khum betin a la na zui bawk nen, kan thil hriat chuan min thawngin kan rilru a tina tlang hle a ni..

Tichuan ka thinrim em vangin ka awm a nuam ta hauhlo mai a, ka u te phallo chung chu ka haw lui ta tho a, Kan In ka thleng a, ka nu khawsa zia chu ka thlithlai ru pah reng bawk a...Ka hawn kar hian zan 1 mah ka leng chhuak lo a, Zu ka hawn ruk erawh ka in viau thung....Kar khat hnuah ka zu neih a zo a, Ka damdawi tih effect a rawn lang tan a, Ka mu theilo a, chaw ka ei thei heklo, ka nu pawh a ngaih a thalo viau, Damdawiin ah min hruai a tum leh ka duh bawk silo, Ka thiante rawn kal ka lo hrilh a, ka damdawi tih tur min ngaihtuah sak ta nge nge a, tichuan ka nun pangnhai ah ka lut leh ta a, lengchhuk chuang miahlo chuan in ah ka damdawi nen ka tawm ta tluk tluk a....A chang leh ka nu pawisa ka dil a, case 1 lawih lamin ka inchiu tluk tluk a, ka hralh chhuak bawk a, Bazarah te kalin ka vawrh chho ta zel a...Aizawl ka thlen atanga thla pawh a liam hmain Dawrpui JAC ten ka damdawi vawrh lai min man hlauh mai a, jailah min khung ta nge nge a....Thla 1 ka tang a, ka nu in min lachhuak leh a...min man a, min la chhuak a, Home ah min dah a, ka tlan chhuak a...tireng reng chuan ka nun ka hmang chho ta a....

Kum a vei meuh chuan Jail vawi 8 lai ka lut hman a, Home ah leh Campingah pawh ka lut nual...Jail ka tan loh chuan Homeah ka awm emaw, Campingah ka lut emaw a ni chawk thin....ka nun chu ning ta deuh a, Ka thianpa pakhat nen Damdawi tamtawk Bhaga ami kan zuk la a, Khawthlang lama kan huan ah kan zuk ruih chilh ta miah miah a..Hetih lai hian kan huan enkawltu hi vai nupa an ni a, kan um chhuak a ni ber, Vawk, ar engkim kan hralh sak vek a...A tawpah phei chuan kan ram Buh tin 50 lai thar theihna, sangha dil 2 leh Leilet Buh tin 100 vel thar theihna nen ka hralh hmak a...Hei hi ka tih chhan chu ka nu leh a bilpa inneih vang a ni..Ka pa thlan kan siam hnu lawkah ka nu nen hian an innei nghal a, ka thinrim lutukin ka hralh mai pek a..Tunhnu a ka ngaihtuah chian hian ka a in ka ngaihtuahna a tlem ka ti leh hnuhnawh viau...

Ka pa hrawn nen kan inrem hleitheilo, ka farnute lah a mil heklo, kei drug addict mai mai chu min hnehsawh thei khawp mai...Hun a kal zel a, kan in, huan engkim mai chu a neitupa a ni tawh bawk a, a then a hralh a, Dawr ka siam e a ti a, ka nu lahin a khak ngam der bawk silo...Keimah in ka ngaithei thinlo a, ka rui sauh sauh a, inchhungah ka tuan ta vak thin a...Kan In chu nuihna in nilo in tum vuauna in a chang ta der a ni....Zankhat chu ka leng hawn lai takin ka u Beki leh ka pa hrawn chu an lo inhau a, engkhaw sawi set set loin ka pa hrawn chu chempui chuan ka sat ta pawp mai a, minlo hmu hman hlauh bakah jacket chhah zet a lo ha bawk nen, a hrim hrimin ka chempui hman kha, kum engemaw chhung tah hriam tawhloh balh huam zui a ni bawk a, a jacket chu tet ve mahse a taksa ah hliam a chhuah pha lo hrim hrim bawk a....Police ah FIR thehlutin statement sei tawk a ziak a. Kei chu tualthah tum thubuai awrh tir niin Kum 5 chhung tang tura tih ka ni ta a nih chu...Hemi tum hian ka farnute 2 leh ka u nupui chuan min lakchhuah an tum viau nangin ka nu leh ka pa hrawn chuan vaaikhat pawh min rawn tlawh duhlo a, ka nu chuan keimah tan zawngin vawi 1 pawh a ka a ang heklo..Chu ahnekin ka thiamloh thu sawiin min rel phar lochauh a ni zawk..." a tap par nghe nghe a...A chauh deuh tawh avang leh a tawng rin theih vakloh avangin ka muthilh tir a..tlai dar 4 velah kan inkawm leh thei chauh a..Jenny pawh a lo haw tawh a...kan 3 bawk chuan a mutna room ah chuan kan awm leh far tawh a...

" He mi kum hian ka farnu upa zawk chuan a a bialpa chu a nei a, a hlim ve tan dawnchauh tihah naute an chhiat a, an pai leh thei ta reng renglo..Kum 2 lai Jail bang ka zut tawh, Pathian In minla hrem zui zel a, Ka farnu Bektei chu Khawsikpuiin a damlo vak a, a nat atanga zan 2 na lekah a thi zui mai bawk a..Chumi thu ka hria ka rilruna leh thinrim lutuk chu ka tih ngai miahloh vawi khat pawh ka la ngaihtuah ngailoh thil ka ti ta a...Jail atang chuan khawchhak mi 2 nen kan tlanchhuak a, In hriat ngei ka ring, Lunglei ah pheiin Saiha kan thleng a, Burma ah kan lut ta daih a...Kum 2 zet chumi hmunah chuan kan awm a, heta kan awm lai hian Ka u te nupa chu an carin an chesual a, ka u pasal chu a hmunah boralin ka u chu a hnu lawk ah a boral zui lehnghal tih ka hria a...Ka tuar viau nangin Bektei boral ang em em kha chuan ka tuar hauhlo..achhan pawh a tan khawvel chhuahsan mai kha a tha zawk si a...a nuta pa thil tum leh a thil tih a hriat chuan rilru nat luat vangin a boral thei hial dawn si a...ka u....ka van ngai tak che u em..." tiin rawl chhuah meuhin a tap ta hawm hawm a....

" Khatia Burma rama kan chhoh hnuah khan ka thiante nen chuan Thailand ah kalin No.4 kan tawlh ta pek a, Champhai leh Manipur lamah kan thawn lut chur chur a...Pawisa ka neih ang ang chu ka khawl zel a, Mizoram a hawn hunah Ka nu hnen atanga Ka pa hnena ka ro tur thil zawng zawng lei sak vek ka tum a...a lo phallo a nih chuan an nupa chuan ka that mai ang" tih vanga khawl ka ni ber...Mahse Pathian in mahni hringtu meuh kut thlak a phallo a ni chek a niang, hekna kan tawng a, Manipurah Police in min man hlauh mai a..Manipur Jail ah Kum 1 dawn ka tan phah a..Ka thiante erawh an bibo daih avangin kan inhmu leh ta rihlo a....thla 9 zet ka tan hnuah chhuah zalen ka ni a...Tichuan ka hmel leh vun rawng thlengin ka danglam nasa tawh mai si a...Mizoram lamah ka rawn kir leh ta a....

" Engkim mai a lo danglam zo ta...Ka pa in kan chhungkaw tana a lo sak kan In ropui zet mai chu Mi hrang daihin an chang ta, Ka nu pasal leh a fate chu kan Inah chuan an vawk lal len a, ka nu pawh hmuh tur a awm tawh heklo...Amah ngai awm taka an ziah a thlalak leh thu tlemte an tar bak chu inchhungah chuan kan chhungkaw lam hnaih reng reng hmuh tur a awm ta lo a...." a tap ,a, a ngawi vang vang a. Tukverh lam a en ngar ngar a, a mit a khap heklo, a tawng chhuak tawh heklo, Khua chu a thim mup tawh a, A tukverh atang chuan Aizawl khawpui chu a lang pe un mai bawk a...a rilru tur leh a mitthla tur awm chu ka hrethiam mai, Mipa mahni ila ka mittui ka dang theilo thelh a ni...Jenny chu a mit a bui luk tawh a...." Albert, duhtawk leh phawt la, Naktuk lamah kan chhunzawm mai dawn em ni?" tiin ka be ta phawng a...Min chhang chuanglo, a biangah mittui a luang ngiai ngiai a, a heh a pet fan fan a, a en ngai a en reng a..Jenny chuan ka darah rawn dawmin, " kalsan mai ang" tih nan min signal zauh a.,tichuan zanriah kil turin kan chhuah san ta rih a...

Zanriah eikham chuan ka tihdan ngai bawkin ka inbual fai leh a, zanriah kan kil laite, ka inbual laite chuan kan tlangval chu ka mitthla ah a lang chuai chuai a, an chhungkaw boruak leh a mah chuan min hneh thlawt a ni..Ukil ka nih angin mi courtah ka dinsak nual tawh a, an chanchin lungchhiat thlak tak tak ka hre nual tawh thin a..Mahse tuna ka thil hriat in min hneh dan ang em em a min hnehtu thil hriat ka la neilo hrim hrim a ni..Khumah muin ka maimichhing a, " Engvangin nge tleirawlte sualna khura petek lut hetiang taka a siamtu hian a nghaisak le,? Tumawh nge ni ang a, tu thisen mawh nge nita ang...?....A pa eiruk nasat vang tidawn i la, A ni aia eiru nasa he khawvelah an tam tehlul nen, engvanga heti em em tuar bik nge a nih le....?" tiin ka ngaihtuah a....Hriatthiam theih siloh chuan engtin emaw tak min kam deuh to a ni ber mai...ka tawt up up a, kan khawvel chu ipik riau a hriatna ka nei hial a ni....Pi Saiin min rawn koh avangim Hmanhmawh takin Alberta mutna lam chu ka pan nghal a....

Room chhungah chuan Jenny chuan Alberta chu a lo bawihsawm mek a, a ko tuar tuar bawk a...chheih le, kan chhanlo a nihvaih chuan min beiseina ka tih puitlin sak thei dawnlo a ni dawn si a, ka damchhungin ka in ngaidam thei hauhlo ang?" ti rilru chung chuan Jenny chu ka pui sauh sauh a..." Oxygen kha lo pump char char la, a awmah nangin lo nem bawk rawh..Albert, Albert" tiin Pi Saii nen chuan kan tihtur min tuk zung zung bawk a...Ka bei a dawng tan der tawh, mahsel Pulse enna khawl ah a la tawp silo....A thaw kawk kawk a, a awm a sep dawrh dawrh a..kan au mawlh mawlh bawk a, chutiang a minute 30 deuhthaw kan bawihsawm hnu chuan a rawn thaw hawk a, a khuh bawrh bawrh a, zawite hian " Min kaltir tawh mai teh u" a rawn ti a, " a theihloh, ka phallo, ka chanpual tura min tuk ka thawk thei dawn silo a..." ka lo tinghal sawk sawk a..." Albert, zam reng reng suh, i kal kan phal awzawng lo" Pi Saii chuan a lo tive bawk a...A rawn meng suar suar a.... " Ka pa leh ka u te 2 ni maiin ka hmu che u a lawm...." zawite hian a rawn ti a....a nui sak a...A mit a chhing riai riai a, tui takin a muhil,ta siai siai a...

Hemi zan hian Jenny nen a khum bulah kan thu tlaivar a ni deuh thaw, He Nula hmeltha leh Ngilnei zet mai hi a van ngaihsan awm tak em..? Tunlai khawvelah Mi hausa leh rethei kar a zau vei tawh nen...Kan nula kei ka ni inti chin chuan hetiang mi vakvai, khawlai a riak mai mai, natna khirh takin a tlakbuak enkawl a, khawsakpui a, a dam rei theih nana engkim huamtu an la awm thei chu ka lawmin, Mizo nia kalo piang chhuak chu Vannei ka inti thar leh em em a...Jenny chu Khum pakhat awmah a tlu zal a, reilote ah a muhil tih hriat takin dimte in a thaw a...Ka dairy phawrin dawhkan te ah ka thawnthu ngaihthlak mek chu nizan lama ka ziah chhunzawmna vawiin lam a mi chu ka ziak ta niap niap a...

THE END LINE..

" Ka nu sulhnu takngial pawh an zauh tak siloh ah chuan rilru na takin kan in chu ka thlir thin a. Min hre tawh lo miau avangin In chhungah te lutin eng eng emaw Jail ka tan laia siam ka zir ka zuar thin a...Min leisak ngai chuang lo...Achang phei chuan an nula chuan minlo hrawk zek thin a...Mahse, ka In, ka pa in, Hlim taka kan lo khawsak tawhna chuan min pawt hnai lotheilo a ni... "

" Kum 2 liamta kha a ni tawh awm e, Ka thian hlui, ka naupan laia ka thian nen kan intawng hlauh mai a, Ka pa hrawn in Tuiriala kan ram leh Aizawl khawpui chhunga kan in hmun leh kan rosum neih engkim mai chu rokhawmtu nih tumin a beih thu min hrilh hlauh mai a...Ka thianpa hi Police niin DC office ah a duty thin a, ka pahrawn nen pawh an inhmelhriat viah avang in ka pahrawn chuan a thil tum chu intithei fahranin a lo hrilh vel a ni awm a, " I Thianpa lah a thi nge a dam tih pawh kan hre tawh mang silo a,, an thlah ka chhui viau pawn tumah rokhawm tur an awm silo a, chuvangin hetia awm reng thei ni heklo, Ka nupui a nih miau avangin leh ka dawm hlum a nih miau avangin Rokhawmtu thlak tir dan ka ngaihven a ni hi" a lo ti a ni awm a, chuta tang chuan ka theih ang angin kan ram huan leh In hmun zawng zawng chu pata a nih leh nihloh engkim ka chhui chhuak ta vek a, chumi copy chu ka bag te penah khan a awm...A ni pawh a rinaiin a harsat avangin a ti thei ta biklo a...Chumai bakah Ka thih thu engmah hriat a la ni bawk silo, ka thih hun nghah a ngaih avangin court chuan alo ngaihtuah sak duh talo a ni...., Mahse, Kumin November thla hian court in hearing a neih pui leh dawn a, chumi huna oa aiawh emaw, keimah emaw tumah ding an awm loh chuan ka ro zawng zawng chu ka pa hrawn leh a fafe chuan an chang vek dawn a ni.." tiin chau zetin a sawi ta a....

A bag chu ka en sak a, Zin bag pangngai nilo in. Burma bag hring ang kha a lo ni a, lehkha engemaw zah hi sarang chhungah uluk taka dah in , a tlang chu meiin an hliau a, an char bet tih hriat takin a kang sawr nian a...Chu Sarang chu ka thler vat a, A chhunga lehkha awm am chu amal te te in ka en ta diat diat a...ka beisei aiin a lo felfai a, Chubakah Ka rin phak bakin an in leh lo, ram leh huan bakah a nu pawisa khawk Bank a adah chu alo tam daih a...It tham zet a lo ni hrim hrim a...Chutia lehkha ka chin let vel lai chuan Jenny chuan bag chhung atang chuan album hlui hmel zet tawh uk deuh khar mai a lo lachhuak a...Kan en dun a. An chhungkaw hlim lai, an naupan deuhlai te, Home a awm lai thlalak te a lo awm ve nial a...Chu Album kawm hmalam ah chuan a pa thlak hlui ve tawh tak mai chu a inbel vang a...Pa zahawm tak, mengfiah kuk mai, sam khuih pial than mai, nui sung mai a ni a...A pa chu pa hmelchhe tak zawng a nilo tih a chiang..A nu lan vena pakhatmah kawl a neilo, an chhungkaw kim lai ber pawn a nu chu chehthlak bik zel a ni a...a nu chungah a lawmlo tak zet a ni tih a hriat theih....

TEARS IN HEAVEN...

" Hallo Jenny engkim ka tifel vek tawh e, a u nupui te kha ka va zawng chhuak thei hram a, a u pawh a lo la dam a, Engkim ka hrilh hnuah thuhretu ah ka hmang hlauh a, kan chak thei hram a ni..Naktuk ah A ute chhungkua nen kan rawn kal dawn e..." tiin hlim takin ka hlawhtlin dan chu ka sawi a....Jenny pawh a phur ngei mai, an in a ka cham hnu atang a thla 2 zet liam hnuah ka hlawhtling thei chu ropui ka ti hle, ka lawm nasat zia chu ka sawi thiamlo a ni ber...A pa hrawn chuan chu In chu thlkhat liam hmain an chhuahsan tur a ni tih order court in a chhuah avangin an in lama sawn thlak dantur kan ngaihtuah a ngai dawn a ni...

Motor chu Dr.Jenny in kawtah kan dah a, A u chu a fapa lian zet chuan pawm nawlhin Wheel chair ah a thut tir a, A nupui leh an fanu nen, an makpa leh an fapa naupang ber nen kan inzui lut diah diah a....Jenny te nen an inhmelhriat hnuah Inchung lamah kan chho a, Room zawng zawng a room ngaihawm ber leh ka mithla a lang ngun ber, Alberta mutna room ah chuan kan lut a...Albert a chu a awmdan pangngaiin a lo awm a, Ka kalsan lai aikhan a let engemaw zahin a lo chhe tawh, Ruhro tisa pawh neilo ang em chu nilo mahse, TB leh Cancer bakah HIV+ hrik ten an eirawn bawk a, chhe ve tawh tak a ni..A meng peih tawk tawk a, a mittui a tling piau a, a nui thei lo nangin a mitmengah chuan a lawmin a lungchhia tih a hriat theih viau..A u nen chuan an inkuah a, an tap a..Tumah kan nuilo, kan mit kan nuai sen tan vek a, hritlang a leng thut ang maiin kan insut tliar tliar a, " Lokal teh u, hei hi achanchin ka sawi thin, Khawvela ka hmangaih ber, ka nu hrawn vanga ka kalsan tak in patea chu a nih hi" tiin aw khur dar darin a sawi a...A fate ho chuan an pan hnai a, an kutin a kut vuai tawh tak chu an dawm sak liam liam a....Engkim mai chu a thar sur vek nimaiin ka hria..Jenny ka en a, Minlo en reng a, A nui seih a...Ka tek deuh chuaiin ka hria..Tlangval luck loh vang a nupui neilo ka ni biklo a, Gay lah ka ni heklo, Zoram leh Mi harsate tan hnathawh ka duhvang a, nupui neilo mai ka nih avangin hmeichhia han biak vel pawh ka zei hranlo....

An ro zawng zawng chu a u kutah a dah vek a, a niin a tul dan angin a tu leh fate tan a la hnutchhiah ve dawn a no, A nu bank account a mi chu Alberta hming tho a dah a nih avangin ka hnena a lo tiam tawh angin " Kalvary Hospital, Khawzawl" tan pek a ni a, a vaiin Cheng nuaih 40 zet a lo ni a... Alberta kut zungpui thla nem kaiin A u in a sign hnan a, Thuhretu ah Jenny leh Pi Saiin an sign bawk a..Keiin Ukil ka nihna in ka vawnhim sak thung dawn a ni..Engemaw harsatna ka tawh thut a awm chuan Ka sangawi zawnpui ka thianpa chu hanover theih turin ka dah vek bawk a...Hlim takin zanriah kan kil ho dar dar a...Zanriah eikham hmasa ber an tlangval leh Pi Saii rooma han kal leh chuan rang takin min ko a, Kan tlan chho vat a, Alberta chuan keimah leh a u chu huiin zawi leh fiah kak si hian, room chhunga awmte hriat vek tho si chuan " Min kal tir mai tawh teh u, ka pa leh ka unauten min nghak reng tawh si a, ka kal a hun tawh a ni" a ti sap sap a, a maimitchhinga a thawk a zawi tial tial a, a awm vawikhat a sep dawrh a, a thaw a hniam leh tual tual , Pulse enna khawl chu a pip pip pip a...

10, 9,8,7,6,5,4,3,2,1,0-----------....a ti ta a...Room chhung chu a ri hak a....Khua a thim mek a, Kan hma khuma mihring taksa tih hriat ve tawk tawk zal zan mai chhuahsantu erawhin a englam apan ve mek thung ngei ang" tiin ka suangtuah zui a...Dr.Jenny ka bula ding chunga mittui tla par chuan ka kut a rawn vuan a....Kan In en a, ka nui dun a...Kan hlim veng veng a ni ber...Achhan pawh a thil duh kan tihlawhtling sak miau avangin hlim takin a kal tih kan hre miau si a....

A tawp ta....
( Ka phuahchawp liau liau a ni e...)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)