NADÔ BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

NADÔ BY Tochhong Ruata

Unread post by Ngaia » May 14th, 2016, 11:18 pm

NADÔ
(Dorita Jovita El Santos)

Dt.18.3.2010 Zinglam dar 2:15 zet a ni tawh a, keilah nghate rep ang hlauh, ka la meng kar mai si a, Ka thianpa ka khum piah lawka mu lah chu a hnar ri suk suk thung a, Mihring hi ava in anloh theih tak em...Chhunah class kan neihloh avangin kan mu hrep tawh a, chuvang chuan ka mut a chhuak hlawllo a ni e...Lehkha ka chhiar peih tawh bawk silo, ka khumah chuan earphone vuahin music ka ngaithla mai mai a...Chutia zai ka ngaihthlak lai chuan zanriah eikham a, Kan room piah a awm Lambua thil sawi kha ka hrechhuak zawk a..Rang taka thoin Ka Laptop chu ka one vat a, Website pakhat " Online Chatting" awmna chu hawngin Account ka siam ta vat a...

Ka rin aiin a nuam phian a, Video chating a theih a, Audio chating a theih bawk a, Khawvel ram hrang hrang a thalai Sing engemaw zah chuan an lo tlawh thin tawh hi a lo ni a...Tunge ka biak ang aw...tiin ka enkual diat diat a, Blog ang deuh hian Ram hrang hrangin " Chat Room" an nei vek a, A tir berah India ka visit phawt a, An thlalak ka enkual thuak thuak a, hmeltha ka tih deuh te zing ami "Busy" tih awmlote chu kan " Hello" tawp tawp a, vai nula ho hi hmelchhia leh hmeltha pawh an induh ve em em zel ringawt a, ahma a Busy hleilo ka biak velah ' Busy yaar" tih an tilang vat zel a, Mi 10 vel zet biak ka tum hnuah, tuman min biak duhloh avang chuan Ram dang room ka lut kual leh ta chur chur a, Khawthlanglam room a lun viau nangin Kan Philipines unaute chu lun rep rep tak an ni...An hrat bawk a, mi biak chawt chawt an peih bawk a, biak tumtu pawh an ngah hmel thei hle...

Chutiang a ka enkual teuh hnuah chuan tumah min be duh leh ka biak chakzawng an awm lo bawk a, tiin Out ka tum ta a...Chutia out ka tum mek lai chuan ka Hello signal chu a rawn sen phe zeuh zeuh a, phur fahranin Min biak tumtu profile chu ka en te te a, Spanish nula hmeltha em em lemlo, hmai bawl tiktek hi a lo ni a, A pro pic atang ngawt chuan biak a chakawm fahranlo nangin, Spanish nula meuhin kei minbe duh ve bawk a, tiin ka accept ta hram a...

Rin aiin a lo fel phian a, kan ti ti duh nasa ta mai a, a hming ka zawt a, Min hrilh tha duh meuhlo, keipawn ka hrilh tha duh vak biklo a, Indian ka nih thu ka sawi chuan a awih ta hauhlo mai a, Philipines lam ka nih a ring tlat a, ka nihlo zia ka hrilh fe hnuah a awih ve ta chauh a, video chating pui atan ka sawm ngial nangin a duh hauhlo...A awphawi chu a nalh phian lehnghal, a aw chu tliang sin lek lek fiah tak mai a ni, a english hman vel danah English thiam tak a nilo tih a hriat a, mahse a lam kat nalh ru viau thung...Darkar chanve zet kan Inbiak hnu chuan 'Adios' tiin kan inmangtha ta phawt a....

A tuk nilengin ka rilruah a cham ta tlat mai a, Ka mithla-ah a hmel tha lutuklo, nui seih hmel a lang run a, ka bengah a aw fiah fel deuh english lam kat nak mai ri a cham reng thung, Class ah pawh ka rilru ka sawrbing theilo, thiante bulah lah ka ngawichawi ta riau bawk a niang " Ropui i va ngawichawi ve, i nuamsam lo em ni" tiin ka room mate Puitea chuan min zawt hial a...Ka dam thu leh engmah a nihloh thu in ka chhang ve mai bawk a..Mahse, a nihna takah chuan kha spanish nula, a sakhming ka hriat loh kha ka vei tlat si a ni...

Chumi zan chuan biak vat tumin ka online a, mahse a lo thim daih si a, ka beidawng ru hle, vawi engemaw zah biak tumin ka en tluk tluk a, mahse a eng vet vet thei hauhlo a..Ka thin a ur lek lek zawk hial a ni..Kan room ah Mizo kan hostela awmve dangte an lo lut khawm a, kan ti ti mam mam a, a then an zai bawk a, a thenin Vai an ngei zia an lo sawi lawng lawng a, a thenin Pune Mizo Zirlai Pawl hmalak dan an duhkhawploh thute an sawi luam bawk a, zan danga titi vawrhtu ber leh ka khabeliam an chan ber thin ka ngawi tlat chu min fiam leh zauh,zauh thin a, Puitea chuan ka lung a leng a, Aizawla ka bial nu ka ngai angin min sawisa a, an nui leh ham ham thin a, Chutiang chuan dar 12:00 kan thleng leh der tawh a, kan in lengte an hawn hnuah ka thianpa nen chuan kan ti ti leh a, chutih pah chuan Ka thiani chu biak tumin ka en zauh zauh bawk a..Mahse, a eng thei reng renglo mai a..Message ka hnutchhiah mai dawn em ni ang aw..??.ka ti a, ka in teite mai mai ang tih hlauh vangin ka ngawi ta daih a...Lehkha zing 3:00 deuhthaw ka bih hnuah pawh a la en phet phet takloh fo avangin lunghnur zetin ka mut san ta daih a..

Kan inbiak zan atanga kar 1 zet a liam tawh a, beidawng taka ka awm hnuah, zan 1 chu ka tihtur hrelo chu ka online mai mai a, online pah chuan site dang ka tlawh a, Chutia thil dang ka buaipui em em lai chuan " Hello" a rawn ti ta talh mai a, ka hamhaih lek lek zawk, mahse engmah thlenglo ang chiah a awm ka duh avang chuan pangngai tak bung deuh lek lek hian ka chhang a, Khang kar khan min biak chak theih ziate, kan inbiak zan atang khan keimah bak a rirlru a a awmloh thute a rawn sawi ta luam a, ka phur sawt viau, amaherawh chu engmah keimah lam thil awmlo ang hlauhin ka awmlui tlat a.. Zan tin biak ka tum dan leh a online ngailoh vanga ka lawmloh zia ka sawi duh lem biklo...chutiang chuan Zan tin kan inbe ta ziah a...kan ti ti a rual phiian, kan music duhzawng pawh a in zul khawp a, Keiin Fusion Jazz ka ngainat thute ka sawi luam a, a ni pawn Jazz music a ngaihthlak nasat thin ziate sawiin kan phul hlut thin a, Chutiang chuan Zan rei tak tak ( zing thleng thleng a ni zawk mah) kan inbe thin a. Mahse, vawi khatmah kan address kan la inhrilh duh chuanglo a...

Zan khat chu kan ti ti mawlh mawlh laiin ' I address min hrilh tawhla, i nick name bak ka hre bawk silo a" ka ti leh a, A ngawi vang vang a, chumi hnuah chuan Madrid ah a awm thu a sawi a, Real Madrid fans ka nih thute sawiin kan phul dun hlut a, thutak deuh zawkin " i hming ka hre thei a ngem? " ka ti leh a, Ka hming leh ka thil tih mek ka sawi ve bawk a...Nui hak hak chungin a hming chu a sawi ta a.

Ahming chu 'Dorita Jovita El Santos' a ni teh duah a, a awmzia chu Dorita tih chu ‘Gift’( Pek/thilpek) niin Jovita chu ‘God’ tihna a ni thung, Santos tih chu an chhungkaw hming niin a awmzia chu ‘Sainthood’ tihna ang vel a ni...tichuan a hming chu Mizotawng chuan Vanlalpeki a ni deuh ber,,,,(Dorita Jovita The Santos a ni mai) A pu ( A pa pa) chuan ‘Nado’ tiin a koh thin thu te, chumi awmzia chu ' Baby' ( Naute) tihna a nih thute min hrilh ta vek a.

Kan inkawm nasa thei bawka, rilru a luah hneh ang reng viau, Hnamdang nula mah nise ka vei veng veng a ni ber.,Kan inbiak loh zan te hian ka nun a nguai rawih thin a. A tuk nilengin ka mood a off zo vek thin, keimah ang thoin a ni pawh chu a awm ve thin thu min hrilh thin a, Kan Innel telh telh a, Tlang taka sawi chuan Hmel in hmu hauh silo in kan Inngaizawng a ni ber...Inhmuh kan chak thu kan inhrilh tawn fo thin a...A nawmsam loh deuh tum hian min ngaih a zual thin thute, a chhungte nen boruak an neih deuh laia kan inbiakte chuan a ti harh sawng sawng thin niin min hrilh thin a, Ka lawm veng veng a ni ber...Op-a of Tribal Power hla ' Dolma' ka ngaithla thin a, chu hla chu ka tana phuah nimaiin ka hre thin.

Ni a liam zel a, Kan induhna pawh a nasa tial tial, Hetiang khawp hian tisa in dek miah silo hian a induh theih dawn em ni? Ka ti hial thin..Mahse, a theih zia hrechiang bertu leh tawngtu ka ni miau si, Puitea nen kan sawi dun fo a, mak a tiin a awih teh chiam ngailo. “A hmelchhia, hetiang hnamdang nula hriatchhian hleihloh” etc tiin min sawichhiat sak thin mahse ka duhna a zual sauh sauh a niber. Eng eng emaw hi ka dawng nawlh nawlh mai a, Ka rinphak bakin min ngaihven a lo ni a...Kekawr, T-shirt, etc ka dawng ta fo mai a, ka remchan changin ka pawisa neih ang angin thil ka thawn ve thin bawk a, chutiang a hmuh changte chuan a lawm thiam thei khawp mai...Ka tan chuan a hlu a ni ber...

Kar 3 zet kan Inbe theilo, ka hrethiamlo lek lek hman a, A pu hna avanga an zin kual thu min rawn hrilh lo phei se ka lawmlo viau ang,. A pu hna avanga an zin nasat ziate, a lunglen thin ziate, nidang angin hunawl a neihloh thin zia leh, dawh hram hram a tul ziate min rawn hrilh luam a, chumi hnu atang phei chuan Voice msg a lo dah thin bak, kan inkawm ta meuhlo..ka khua ahar a, a aw ngaihno bei tak, english lam kat deuh nak chu hriat leh hun ka nghakhlel thin hle...Puitea lah chuan " Hnamdang, Ramdang a mi lehnghal, a chanchin pawh i hriat hleihloh, Hmelchhe bawk si, i ngaizawng a, i vei ve em em a, hei, tunah pawh a biak duh tak derloh che hi" tiin min deusawh takin a ti thin a...Ka nui liam mai mai thin nangin, a ruk tak chuan " Dawt min hrilh a niang a? A pu hna ah zinkual angin a insawi te kha dawt vek a nilo maw?" ka ti ve thin tho. A diktak chuan ka confuse viau...

" Thianpa, bansan mai teh, a zialo e mai, Niminah Nunu-i nen kan Inhmu a, Mizo Welfare Meetingah khan, a la beisei viau che niin ka hria, Engmah chu a sawi lang lemlo nangin, a mit meng leh i chanchin min zawh vel danah khan a la ngaizawng deuh che niin ka hria" tiin mu chunga kan test tur bih mek CHU min hrilh sawt sawt a..Nunu-i hi Lunglei Nula, a pa pawh Mizoram Sawrkar a Minister changphak ngat, Nu lian lutuk lemlo, Hmeltha zet mai a ni. Pune Mizo awm zingah chuan han el pha an awmlo a tih theih...a hma daih khan he nu hi ka lo mitmei ru in, ka ngaihven ru thei viau a. A ni pawn min haw lemlo niin ka hre thin, kan ti ti a rual phian a, Tul vaklo ah pawh chhuahpui atan min sawm fo thin a, Keilah ka lo phur thei viau..Mahse, In ngaizawng tihtur chuan kan awm chuang lemlo...

Nadô a lo lan atang khan tlem tlemin ka hlat hret hret a, engemaw chhuanlam siamin lenchhuahpui tura min sawm chang pawn ka hnial ta zeuh zeuh a, tunah tak phei chuan min be mumal ngai ta meuhlo..Kei pawn ka be ngai chuang heklo a. Nunui chu ka duh satliah mai mai niin ka hre ta ber...Mahse thla 3 lai kan inbiak mumal takloh avanga ka lung nihloh em em laiin Puitea'n Nunui chanchin min hrilh chuan min ti harh deuh hawk a...Nui hak hak chungin a chanchin kan sep zui malh malh a. An meeting chungchangte min hrilh a. 'International Versity Cultural Festival' neih a nih tur thu te, Pune ah hian an nghah dawn thute, Keini Mizo te pawh Cheraw kan leh Khuallam entir ve tura tih kan nih thute a sawi a..Chumi atan chuan Programme leh lam zir dan turte an sawi khawm a lo ni a...

Pune Mizo zirlai awmte hi kan vannei viau, Naupan tet a cultural dance lo zir thin, college thlenga zir a show thin an awm nual a, India ram Festival hrang hrangah participant tawh pawh an awm nual...chungte vang chuan Engemaw tih nikhuaah Kan lam thiamte an inshow deuh fo a,,President of India, Prime Minister leh Union Minister hrang hrangte hmah ah an lo show thin tawh avangin tuna festival ah pawh hian thlan kan ni ta reng a ni..

Lam zirna lamah chuan phurlo takin ka tel ve fo thin a, Nado-i nen pawh kan inbe khat khawp, a dam thu leh min ngaih zia thute, a pu nen project an buaipui dun thu te, chu an project an zawh hnuah kan lawm tur ziate min hrilh fo thin a.Mahse Puitea thusawi khan ka rilru a hneh deuh a, Dawt min hrilh tlat in ka hria a, ka e aw liam vel mai mai thin a..Nunu-i nen pawh kan Inhmu zing leh ta khawp mai..A hma ang em em chuan innel tawhlo mah i la, kan boruak erawh engemaw takin a inhmu ru riau thung...

November thla tawp Ni 25 zan a ni a, Gandhinagar a Gandhi Multiperpose center ropui zet ah chuan International Versity Cultural Festival chu opening ceremony neih a ni a...President of India chu Khuallian niin, He festival a Main Sponsore leh a duang chhuaktu ' Lo's Ambos' tih company, Khawvel hnam hrang hrangte chezia leh nungchang inthuamna etc collect a, a sample siamchhuak a, hralh leh thin tu an ni a...Multi Millionaire Mr. Jose El Santos chu Khual zahawm a ni bawk dawn a ni...Kei pawh ka Thangchhuah kawr ha in ka duhdan taka nalh chuan ka induang ve a, " Hmmm...Nunui bula awm dawn chuan nalh i khel leh ta viau a ni maw..?" nui hak hak pahin Puitea chuan min fiam a..." Engmah kan karah thil thleng a awmlo" tiin ka chhang liam ve puat a..." Bawiha, Bike i keng dawn em..? Keini ho chu Kan chuanna tur Bus a awm dawn a ni awm a, i lo chuang ve zawk dawn em ni ang?" a ti a, Keichuan, " Nunui khan Min book lawk ve miau si a, ka ken chu a ngai ngei dawn a nih hmel, " ban chalh chuan ka ti a...Ka phur viau nangin engemaw tak min kap deuh run thil a awm tlat lawi a...Ka duhtawka ka inchei hnuah ka Jacket chu ha in kan chhuak dun ta a...

G.M.C kan thleng chu, Khawvel ram hrang hrang a, Hnam hrang hrang ziarang lang thei inthuamna leh bungrua an lo pho chhuak sup sup a, dawr a lo tlep tuar tawh a, Zan dar 6:00 lek ni mahse mi anlo tam tawh viau a...Nunui chu Cultural dance show turte buaipui vel tura a nih vangin a hmun kan thlen hnuah ka kalsan ta daih a, Programme hman zawh ah parking zone ah in hmu turin kan inti a...Kei chuan Chung dawr hrang hrang GMC tual a, an pho chhuah velte chu ka lo fangkual vel mai mai a...Inchhunglam ah kan len vek loh avangin Pawnah Hmun 4 lai ah Cenema screen tiat zetin Projector in an kap ve reng bawk a...Inchhung lam boruak a tha ham ham hle..Khuallian thusawi a zo a, Khual zahawm in tawifel takin Hetiang programme a siam chhan chu report a pe a...chumi hnuah Programme an tan zui a, Zai, lam leh fashon show a ni deuh ber...

Hnam hrang hrang ram hrang hrang, Vun rawng hrang hrang kan in sulpel zut zut a, engmah tihtur hre vaklo chuan ka teikual vel mai mai a, Chutia ka teikual rak rak lai chuan ka phone a ri ral ral a, Ka en vat a, Idea number ka save loh hi a lo ni a, tutak nimaw? Tiin ka pick up a...
" Hi, Ropui, Khawnge i awm?" tiin Nado-i aw ngei chuan min rawn be ta tlat mai, ka ding chawt a, ka mur sung sung thei hial..." Hello, Ropui a nilo em ni? Tunge ka biak " a rawn tih leh takah chuan ka harh zawk a, " Yes, keimah ka ni e, Enge thil awmzia" ka phur lutuk chu ka aw a lawi lek lek thei hial.." Engmah sawina hun a awmlo, Khawnge i awm tunah" thawm ri nuaih nuaih karah chuan a rawn ti leh hram a...Ka hawi kual vut vut a, Japanese dawr bulah ka awm tih ka hrilh ta vat a..." Awle, lo awm tlat rawh ka rawn kal ang, " tiin Spainish tawng hian mi a be mawlh mawlh a...

Enge thil awmzia, Engtin nge helai hmun a rawn thlen theih?" chung zawhna chu ka inzawt mawlh mawlh a, Engtin nge ka hmel a hriat theih ang, ka sam ka met danglam tawh si a, tiin ka dinna lai chu a langsar thei tur ang berin ka sawn a...Ka hawi kual a, Nado-i hmel reng reng ka hmu mai lo, Ka phone chu ka dial vat a, " Khawnge i awm, i rawn kal ta em?" ka ti nghal tawng a, a rawn kal mek thu rawn sawi a,....ka phone ka hang-up chiah tih chuan ka hnunglam atang chuan " Hi....Ropui" tiin a aw ngei chuan min rawn tita a.....

Ka rin phak bakin thil ka tawng ta tlat mai si,..ka zam ve lek lek a, chutianga ka hnung lam atanga min rawn be thut mai chu ka phu zawk lo chauh a ni..ka hnung lam chu ka hawi a, ka hmaah chuan Ka 'Nado-i' chu a lo ding lah mai a, a nui ver ver a, a mit a de set set a, " Hi" kan inti ve ve a, kan sen dun ap ap a ni ber, ka kut ka phar chhuak a, a niin min kuah tumin a ban a rawn pharchhuak thung a, kan thil tum in anglo tak avang chuan kan nui dun ta hak hak a...ka kut pharchhuak chu a kut no nem thep mai, sei sang mai chuan a rawn dawm ta a....Kan kut a in si chiah chu ka hik deuh chuai niberin ka hria...A nui hmel mawi tak chu ka en kham theilo a ni ber, ka huaisen na zawng zawng sawmkhawmin ka lamah chuan ka pawt det a, Hmun leh hmunah kan in en ta heu mai, chutah nghet takin kan inkuah ta vawng vawng a...

Nado-i chu ka lo hmuh thin dan leh ka lo hisap dan a ni awzawnglo a...A profile hman a thlalak chu a cousin boralta ‘Maria’ thlalak a nih thute ka hriat hnu phei chuan " Khawvel a Mipa vannei ber" ni hialin ka inchan a...Spanish nula dang ang bawkin a sam chu a dum hlap a, a sei zal bawk a, a tukhumah duhdah deuhin a zial vel mai mai a, Spanish nula te hak thin Andalucia Flamenco sen hlar mai, fual hnalh mai chu a ha a, A hmelchu tha uchuak tiin sawi pawh ni ila, ka sawi sual ti chu an awm hauhlo ang...

Vantirhkoh lei lama rawn chhuk tiin nula hmeltha an sawi thin a ni a, a ni hi chu chutiang ho bulah chuan a lang larh thei ang tih tur khawp a ni...A mit meng chu a dum lam aimahin a pawl deuh riai a ang ber, a hnar ngul chu “siamtuin a uluk sak bik em ni dawn awww...” tih tur khawpin a fuh a, chu chuan a hmui sexy tak chu a timawi zual a..a ha var rual thap mai chuan a kareh chu a kap nalh hle, a nuih zawnga lang var that mai chuan a ti fresh viau bawk...A awm zawn a rawn pauh lah 2 chuan, Mipa a chawktho thei viau a ni, a kawr hak a puk em avangin a pian zia a lang,theilo nangin pian thiam tak leh nute tak chu a nilo tih a hriat mai..Kei hi Mizo tlangval valai tak 5"8 ka ni ve a, kan inchen thuak a, 5"7 emaw chuaia tam hret emaw chu a nih ngei a rinawm...

A remruat dan ang chuan Spanish ho dawrah kan kal a, chung nula tlangval, Kan rualpui awm vel lo dawr nghak hmeichhia 2 leh Mipa 3 te hnenah chuan Minin hmelhriat tir a, athen chu spainish bak thiamlo an ni hlawm a, an zinga mipa lian ber chuan english pai deuh chuan ' Nado Charming man chu i ni maw? Nitin i hming kan hre thin..." nui vur vur chuan a rawn ti a. Dressing room parda ah rawn dak pah chuan Nado chuan ' Oh...Raul..." tiin Spanish tawng hian a rawn sawi barh barh a, an lo chhang tliar tliar a, an nui hak hak bawk a, ka hrethiamlo nangin, ka chanchin an sawi a nih ka ring ber...room atang chuan a rawn chhuak ta a, a thuamhnaw inbel chu a thlak vek a, Jeans kekawr nomal tak leh Kamish zebra color a sin deuh taka tial a ha thung a, a sam erawh a tawn duhdah tih a hriat reng, a bag chu ak tha in, a thiante bulah chuan spanish tawng hian engemaw a sawi sawk sawk a, kut beng dar dar chung chuan " Good luck, Enjoy" ti niawm takin min thlah hlawm a...Ka kutah chuan rawn dawmin " Kalteh, Pune hi min fanpui teh" tih pahin min en a, a nui ver ver a...A van hmeltha tak em.....!!!!..

Park-ah kan thu dun a, chips kan ei a, kan ti ti siam siam a, Pune nuam a tih ziate sawiin a tawng barh barh a, min ngaih ziate, hetiang a inhmuh theihna remchang awm thei te, chumi atana a inbuatsaih nasat ziate a sawi siam siam a....chutih lai chuan a pager chu a ri a...a en zauh a..." Ka pu a ni tlat" tiin a phone chu lachhuakin a be ta a, reivaklo an inbia a... “Dawrah ka awmloh avangin min ngaihven deuh a lawm le...Taj Hotel Plaza i hria em?" min ti a, Ka hriat thu ka sawi a...”Naktuk zanah i lo kal thei ang em..? Ka Pu nen ka inhmelhriat tir ang che chu" a ti a, Ka hreh vakloh thu leh a pu chu a lo kal ve em ni?" tih thu ka zawt a.

A nui ta hak hak a..." Oh..ka tihpalh, ka lo la hrilh lo che a, Hetiang festival hi London leh USA ah Kum 2 liamta khan kan lo buatsaih tawh a, Kumin hian China ah neih leh tura ruahman a ni a, Engkim kan peih vek tawh laiin China sawrkar chuan Permit min pe thei ta silo a...Ka Pu a mangang hle..a" tiin a sawi a..keichuan " i pu chu enge a nih a..?" ka lo ti leh hu a..." oh...He Festival duangchhuak tu hi a lawm" a ti ta a.." Chu i pu chu Jose El Santos hi maw?" ka ti hluai a....Nui ver ver chung chuan " ni e..." a lo tive mai a...." Ka lawmpui a che" ka ti tawl a..."engvang chuan" a ti a, " Millionaire i ni miau si a..." ka ti ta a...Nui ver ver chung chuan min rawn fawp a, " ka lawm e" a tisap a...

Kan zan 1-na hman dan chuan ka lung a tiawi hliah hliah a, Thla kan la dun nasa in, kan inkai deuh rial rial reng a, Pune khawthlang lam kan fang hrep a, ka Electra bullet bike chuan khawpui kan fang kual nasa hle..Nuam a tiin India ram chu hnam ropui tak tak an tam zia leh, an ropui ziate a sawi reng bawk a, Kan chawlh deuh hlek tawh chuan kan in fawp a ni deuh reng. .Chutiang chuan Inpawh takin zan 1-na chu kan hmang liam a...Kan room ka thlen meuh chuan Zan dar 11:30 a lo ni reng tawh a..Puitea pawh a inbual zo chiah a lo ni a...Nunui thinrim thu leh, mawl min tih thu te, ngaihdam dil tura min phut thute a sawi hlut a...An show hlawhtlin ziate, nuam a tih ziate a sawi suah suah bawk a...chutah " Nang hi..enge i awm zia" tiin mak ti hmel zet chuan min en a...ka hlim hmel chu a lo man thiam a ni ngei ang....engmah sawilo chuan ka phone chu pe in, " Ka inbual ve dawn a...Photo kha lo enkual rawh" tiin bathroomah ka luh san ta a..

" wow...hei hi tunge a..?" tiin ka inbualzo chu makti hmel zetin minlo zawt a, Thil awmzia ka hrilh hnuah " Chu Mr.Jose tunu chu Nado hi maw lo ni?" a ti leh a, " Nia, keipawn mak ka ti a lawm, a pu hming atang pawh khan lo hriat awm tak a nia" tiin hlim takin ka sawi siam siam a..,," Hey....Enteh, Nizana Mr.Jose a sawi " China in permit min pek theih tak siloh ah chuan, kan mangang em em a, ka tunu chuan India ram biak athat a rinthu leh India ram ah chuan hnam hrang hrang culture hrang hrang an awm teuh thu a sawi a, tichuan Helam hi kan rawn be ta a, ka tunu beisei ang ngeiin India ram chu a lo inhawng ta em em a ni..." a tih kha, i nula Nado i ruahmanna vek a lo ni maw?" a ti a...a nih thu leh, Nado-in kan inhmuh theih dan tur a ruahman dan zawng zawng chu ka hrilh ta vek a, khang min biak theihloh chhante kha, he thil a bawhzui vang a lo ni a...Kan la hlim zia tur a sawi kha hemi vang hi a lo ni tih reng ka hriat loh thute chu sawiin kan nui dun hak hak a...

Chutiang chuan India rama Ni 4 lek an cham chhung chuan kan inzui a, Mizo ka thian dangte nen pawh an inhmelhriat ve ta zel a, kan awmdun chu mi mit kan tikham lek lek thin angem aw...ka ti thin a, kan in kai deuh reng thin a...Ka bike chuan kan tlankual deuh reng...Mizo dangte pawn a hmelthat thute, a duhawm ziate bak sawitur an hre biklo..a pu nen pawh kan inhmelhriat tawh a, Pa dam duai mai, mahse huhang ngah zet mai a ni roh a...Nadoi pa hi a thi tawh a, a nu erawh Mexico ah a awm daih thung, Nadoi hi ka rangkachak ti hialin a sawi thin a, Kum 65 zet nitawh mahse a la chak vak hle...Nadoi chu Kum 20 mi lek la ni mahse a rilru a puitling a, kawm a nuamin thil a hrethiam thei hle..Nunui nen kan chanchin pawh ka share vek a, hrethiam takin a khawngaih thu te, min hrilh a...A ni erawh keimahlo mipa hetiang zawnga en a la neih loh thu te, kei hi atana ruat ka nih a rin thute min hrilh a..Min biak hmasak ber zan a thil mak tihdeuh a neih thu a sawi a..

Keini tan chuan khami zan kha Zanlai a nih kha, an ni tan chuan chhun a ni...chhunah a muhil in a manglamah Mipakhat a hmel hriat hauhlo nen an leng dun a, Beach ah te an kal dun ani awm a, tichuan a harh hnuah online in a enkualna lamah ka Picture chu a hmu a...A mumang ami ngei chu ka lo nih thu te, chuta tang chuan engtik lai pawn a rilruah ka awm rengthute...Hetia kan inhmu thei a lawm ziate thute chu a sawi ta vek a....Duhthawh taka Infawh bak engdang mah kan thleng ngailo...

An haw hma zan a ni a, Kan roomah Puitea kei Nado kan awm thap a, Dinner kan order a, kan kil ho a ni....Puite a chuan zawhna maksak pui pui intuha lo deuh deuh a zawt reng mai a...kan nui ho dar dar reng a...An rama haw ve mai tur leh inneih mai a duhthu nen lam Puitea nen chuan min hrilh ta vek a, Puitea mak tilutuk chu a thlawk chhuak lo chauh a ni.." Ka pu pawh engkim ka hrilh vek tawh a, rem a tih thu leh ka hlimna a duhber thu pawh min hrilh vektawh a, nangma decision siam chiah kan nghak a" tih nen lam a sawi a...Ka ngawi reng a, Puitea chuan hrethiam takin " Ka chhuak lawk dawn Debbie nen inhmuh kan tuma?" tiin chhuanlam a siam hnuah min chhuahsan ta daih a..Kan 2 chauh chuan kan awm dun a...

Nu leh pa ka neihloh thute, Kan upa berin ka nu leh pa boral hnuah fa anga min enkawl seilen thu leh, a ni chu Mizoram-ah Department Pakhatah Director a nih thute ka sawi a, engkim amah kaltlang veka ti ka nih thin thu te, ka unaute 3 thu lo chuan engmah ka tih ngam ngailoh thute ka sawi a.." min hrethiam khawp. Chutihlaiin ka nu leh pa ka chan chu min khawngaih ziate, a ni chuan Nu biak tur a la neih thu te, a nu chu Actress a ni a, mahse a hmuh ngai bikloh thu leh a pu in a enkawl hneh ziate a sawi a..." Keichuan, Engpawh nise, ka hmangaih a, ka duh ziate hrilh vekin , ka chhungte thulo chuan engmah decision ka siam theihloh thute chu ka sawi ve bawk a...an hausa si a, kei engmah neilo ka nih ziate, ka sawi bawk a, chung zawng zawng chu engahmah a ngaihloh thu leh, A tana a pa in Pathian hnena a dil sak ka nih ngei a rinthu te chu a sawi a...Inhrethiam tak, mahse rilru khingbai tak chuan kan awm dun a...

" Mami....Thil hrilh tur che ka nei a?" tiin ka u chu ka bia a, a ni chuan ka thil sawi duh chu sawi turin min tih hnuah, Nado nen kan chanchin a bul atanga a tawp thlengin ka hrilh ta vek a, Nadoi min sawmna leh a thu hmulo chuan engmah ka tih duhloh thu ka sawi bawk a..ani pawh chuan hrethiam takin " Ka thu i hnial ngailo a, keipawn i duh zawng tih sakloh che ka duh ngai heklo. Mahse, ngun takin ngaihtuah chiangla, Hnamdang nupui neih a harsat zia turte, Miin ka chanchin an sawi nasat zia turte leh, a farnute 3 chu miin an sawi dan turte chu naihtuah chiang deuh tur chuan min rawn hrilh ta vek a..." tlang takin sawilo mahse ka thil dil chu min hnial tih ka hre thei mai a...." Nia, i thu thu a ni mai lawm...hei vanga rawn bia che ka ni reng a, Ka U ka hmangaih che a, ka unau dangte pawh, Bentea minlo biak dawn nia?" tiin kan inbiakna chu rilru hmin zanlo tih hriat hauhlo turin ka ti tawp ta a...ka U nen kan inbiak dante ka hrilh hnu chuan hrethiam takin min hnem a, Pathian in hun remchang a siam mai a rinthute min hrilh a..Chumi zan chu am takin kan hmang dun a...a tuk chhun a London lam pan tur an ni tawh bawk nen Puitea lahin A riah tur thu a rawn sawi bawk nen, ka khum chep takah chhuan inkuah rialin kan mu zankhua zak a...

Dar 11:00am a ni tawh a, Ka insiam zo chiah a, Ka bike chu garage atang chuan la chhuak in uluk takin ka hru hlauh hlauh a. Vawiin chhun Dar 12 ah ka duhber Nadoi a hawng tawh dawn a ni si a, tunah pawh Airport ah a thu vang tawh ngei ang ti rilru chung chuan amah thlah tumin ka bike chu ka buatsaih malh malh a...." Hey, Bawih....Khawnge i kal dawn a..?" tiin Puitea chuan Min rawn bia a, " awwwww an haw dawn a lawm, Airport lamah ka kal dawn mawle...?" tiin ka hrilh a...." i phone i kenglo dawn em ni?" nui vur vur chung chuan ka kutah ka phone chu a hmehbel a, " I u in a be duh che?" a ti leh a, Ka Phone chu la vatin ka en a, Ka u pasal U Hruaia a lo ni a..." Bawiha, nizanah i u nen kan sawi dun a, tukin ah Rosy-i leh Siamte-i kan rawn bawk a, Engmah helhkham duh suh, i duh phawt chuan, I Spanish nula chu i neih thei ang, Mahse, Kan hmu ve chak khawp mai....engkim i thutlukna siam chu kan pawm vek a, Mizoram a i hmun leh ram engkim erawh i kut ah a awm vek dawn tho a..Kan lo enkawl sak dawn che nia" tiin a rawn sawi ta mai....ka lum pup pup thei hial, engmah sawi thei ka nilo, ri manglo chuan " tak tak maw..?...ka van lawm" ka ti thei hram a..." Ni e, i u nen inbe lawk ru" a rawn ti leh a, " Bawihte, ka hmangaih che, i rilru tihnat kan duhlo, i farnute hi min rawn hre ve reng ang che aw.." tah aw pur chung hian arawn ti a...kan inbe zo chu ka bike ka kick nung a," Nado lo be teh, lo la chhuak suh se." tiin Puitea chu ka phone chu pe sawk sawkin Bike chuan Airport Km 4 zeta hla pan chuan ka tlan ta vang vang a..

Traffic a lo zam deuh nen, Airport ka thlen meuh chuan 12:00 a lo ri der tawh a, ticket counter lamah hmanhmawh tak chuan ka phei vat a, " London kaltur AI 7020 kha a chhuak tawh a mi?" tiin thaw hlawp hlawp chung chuan ka va ti a..." aw...khu an chhuak dawn chiah e..." a lo ti awlsam et a, Track lan theihna lam chu ka pan vat a, Darthlalang atang chuan thlawhna kal tual tual a pang a Air India 7020 tih intar kung chu ka zuk hmu a, a bul thuthlengah chuan ka thu hnawk a, Puitea chuan a be tlang theilo a ni ngei ang, an kal liamta a nih hi" tiin Rilru na tak chuan ka thu a...Engkim a tawp a, Pune khawlai chu ruak vek niin ka hria, ka zawi vek a, engmah phurna ka neilo....Phurlo tak chuan Kan room lam pan chuan ka inkhalh haw bauh bauh a...Ka bike hnunga thu chunga min kuah na kut nelthapte chu ka hrechhuak a,, a nui ri har har leh mitmeng paw ram maite chu a rawn lang zut zut a....Ka tan a tawp a, engtikah mah kan innei thei ngailo ang...tichung chuan ka hawng a...a dik tak chuan ka farnute ka dem ru tak zet a ni...ka tana thutlukna an siamah ka vui ngailo, tun tuma an thutlukna siam chu ka lawmlo takzet a ni..a tlai hmain tinge min hrilh loh a, zingah min hrilh awm tak an nisi a, tlai tak hnua min hrilh ni...engkim a tawp vek si a....

Room ah ka lut a, ka khumah ka mu tawp a, Nado ringawt ka mithla a, engkim kan 2 a kan tih khachuan a nuam vek a, engkim a thar sur vek a nih kha, mahse tunah erawh hmanlai hunah chengin thil engkim mai chu hneawm a tling vek si a....Ka rilru na lutuk chu mipa si ka tap chhuak lo chauh a ni ber...Ka tho a, Bathroomah ka lut a, Shower chhuan ka inphuh tir ta ngawt a....Ka mit ka chhing a, bathroom bang chu ka ngheng a, tui dai vawt raih mai chuan ka inphuh tir seng seng a, ka thuamhnaw engmah ka phelh heklo....ka thuamhnaw a zawr vek a, tui a dir tluk tluk bawk a...

" Kawngka i kal si lo a, i hawng huai bawk si a,...I inbual em ni?" Puitea chuan a rawn tilut bai bai a, Bathroom kawngka chu rawn hawngin " Hmela i mawl a mi....? I thuamhnaw a huh vek kha..inthlakna tur i nei dawn hleinem, a dang kha Insukna hmunah ka thawn vek a sin" mak ti hmel zeta min ti chung chuan a rawn ti a...Engmah ka sawilo, shower chu ka titawp a, ka pheikhawk ka phelh a, ka kekawr nen ka phelh vek a...Puitea chuan hrethiam deuh chuan, " Hey, Bawiha ka thiamloh a ni, ka be tlang thei miahlo a....busy a tih loh leh Switch off a ti zel si a, " a ti niah niah a, Towel chuan ka inhru mawlh mawlh a.." a pawi hlei nem" ka ti ve mai bawk a..." Ihhh...englo..,airport ah an awm tawh chuan India Sim a tangkai tawhlo a niang" a rawn ti leh a...chutak chu ka lungawi lohna, a phone a off dawnah tal min biak awm a nia...tiin ka lo vui ru hle tawh a....Kawngka chu a rawn kik kauh kauh a,Puitea chuan a va hawn a....a reh vang vang a, " Hei, Inleng i nei" tiin Puitea chuan nui vur vur chungin a rawn ti a...Nunui bak a nih ka ringlo bawk a, Lunglen nak alaia ka lawm teh chiamlo " Loluh tir rawh" ka ti bul nghut a...." Hi, i thinrim em ni?" hmeichhe pakhat aw hian a rawn ti a, ka ding ngil awt a...

Nado chu nui sang chung chuan a lo ding zan mai a, Mak tizet chuan ka en a, Puitea ka va en leh a, lai zetin a lo nui suih a....." Kan thulh leh a, Zanin hian Mumbaiah show neih turin an sawm si a, ka pu chuan a remti ta a nih kha" Nadoi chuan a ti ta a...Ka pan hnai a, ka kuah a, ka fawp ta vang vang a...Kan hlim takzet a ni...Engkim a kaltluang a, Ka farnute hmu turin Airport ah kan thu dun a, a pu lahin London-ah thla tharah in hmu turin min kalsan tawh bawk si nen...Kan inkuah rial a, Lengpui a tum tur light ah chuan chuang tur in kan lut dun ta ral ral a...Puitea chuan " Bawiha, ka lawmpui lutuk che...." a rawn ti lauh lauh a, Hawilet tawh chuanglo chuan ka kutzungpui chu chhawngin ka phar chhuak a...." Ka lawm e" tih nan.....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)