AMOR EPISTOLAM... BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

AMOR EPISTOLAM... BY Tochhong Ruata

Unread post by Ngaia » May 14th, 2016, 11:20 pm

AMOR EPISTOLAM...

"U Ms hei hi mipakhatin lo pe rawh min ti a?" tiin Tleirawl fel ve tawh tak hian lehkha ip sen hlui lam deuh tawh hi Ms-i pangpar vel singsa a lo buai mek chu a pe a..." Tunge..?...khawi atangin nge ni a..?" lehkha lak pah chuan a ti a..." ka hrelo Mawimawii te dawrah kan awmlaiin a rawn kal a, minlo pek sak teh u a ti a, ka hawn pahin ka rawn keng nghal a nih hi...Khu amah pawh a la awmin ka hria...?" tiin chu tleirawl chuan a ti a..

Ms-i chu a tho vat a, An varenda atang chuan an kawmthlang kawngpui a motor ding thup lam chu a zuk en vat a..." Khawi ber khu maw?" ....tiin a thlek dak dak a, " Khu car sen duk a lut chiah khu" tiin an inhrilh a, "ka van hre ngai silo ve...tunge niang..ka address a ziak dik thlap bawk si a..." ti niah niah chungin car sen tlanliam mek chu a ngaihna hrelo hmel deuh chuan a thlir zui dauh dauh..." ani Kimte ka lawm e aw.." a ti ta a...

A hnungzang kham lutuk avangin Inkhawm pawh a peihlo a, a room ah awmin a tuk inkhawmna a hak tur a siam mawlh mawlh a, a duh ang zan a nih hnuah Khumah tlu zalin a phone chu a khawih nap nap a...Whatsapp ah notification 90 vel leh Hike massenger ah Notification 30 vel lai a lo awm a...nui sak pah chuan chung thil vel chu a bih kual a, Whatsapp group pakhat 'Centralianz' tih group Central High School zirlai zirchhuak tawh an batch in an siam chu a en a, mipa thenkhat fiamthu duh deuh ten an school kal ho laia in ngaihzawng an hriatte an lo puang a, an lo infiam niin, a chhiar a a nui hak hak reng a..chung fiamthu ah chuan a hming a lang ngun malh malh hle..mahse tumah a bialpa tak tak an awmlo a, an uangthuangin an dem bel mai mai an ni hlawm bawk a, a ngai haw lem lo....chung thil a chhiar zel lai chuan chhun lama Kimtei pek lehkhathawn kha a hre chhuak zawk a..rang taka thoin Choka lamah a phei a, letter box a a dah ve tawp Lehkha ip chu a la chhuak vat a...a roomah luh pui lehin khuma tluk zal pahin a chhiar ta a...

*****&&&amp

To,

Ms-i...

He lehkha hi ziak tur in rilru ka siam felna hi a rei tawh a, mahse ka ziak thei mailo a, ralpui phiar taka ka phiar hnuah hetiang hian ka ziak thei hram a, i pawi ka sawi a, i duhloh zawng ka tilang palh a nih chuan min hrethiam dawn nia..

Tunlai ah hetiang lehkhathawn hi an ching tawhlo tih chu tlang hriat a nih rualin Hmaichhan a hrilh ngei che hi ka chak viau thin, mahse huaisenna ka nei zolo a ni ber, Phone atanga hrilh mai turche ka nih laiin la sawichhuak kimlo ang tih ka hlau si a...heti hian ka rawn ti tawp a, min ngaidam dawn nia...

Awle, Ka lehkha i hawn rual hian tunge ka nih i hrelo pawh a ni mai thei, mahse keichuan ka hria che a, ka hre reng che a, vawikhat mah ka thinlung phek atang hian thaireh in i la awm ngailo hrim hrim...khami ni kan intawn hmasak ber ni atang a, tun darkar thleng hian ka thinlungah i bet tlat a nih hi..Awmlo, i ti viau a nih pawn min hrethiam hram ang che...

Ka School kal tinuamtu ber i ni a, ka lehkha zir minti phur bertu i ni a, ka tan i hmel leh nungchang hmuh kha damdawi tha ber a ni a, I hriat miahloh khan ka tan i lo hlu veng veng a, i bulhnnai ah awm pha ngailo mah i la, nitin i hmel hmu thei tura school khata kan lut kha ka damchhung a ka thil tawn ropui ber a ni awm e.Nghet taka kuah che a, ka tangah bei hle hle in, tudangmah ngai leklo a hun hman dun kha ka duhaisam niin, Zirna beih fan fan a, Nangmah chawm thei mai nilo, nuamsa taka awm tir theitu che nih kha ka thil thlakhlelh ber a ni ..Ka zawhloh nghawngkawl mah nise ka in tlawm tir ngai dawnlo a ni tih ka tiam a..ka bei fan fan a, ka beidawn dawn a piangin i hmel hlim tak, nguina in a rawn thlak ka hmu thin a, chu chuan chakna min pe a, i hrehawm a, i lungngaih ka phal siloh chuan ka beih fan fan a ngai tih ka hriat leh phah fo thin...

Kum 3 chhung huang khatah nitin kan khawsa ho a, Kum 3 chhung khan nun hlimawm tak ka hmang vek biklo a, ka ta emaw ka tihna che khan natna min thlen ve fo thin a sin..Zamawia nen khan dem bel in hlawh thin a, a ni milian neinung fapa, engkim i nawmsak theihna tur ngaihtuah sak thei tur che a ni bawk si a. Atan ka dah chhin ngawt che pawh khan ka tliak hnawp a, ka nun a chawhnu ruih a, engkim a thim mup thin niberin ka hre thin...Mahse, ka ta i nilo a, a hriat pawh min hre manglo a, achang phei chuan khatihlai Khawvelah khan ka cheng ve a ni tih hre hauhlo ang mai i ni thin si a...ka tan chuan Nun chawhnu ruih awl tak a ni..

Mizoram Civil Service ni thei turin i tan ka bei a, Rim taka thawkte malsawm thin tu Van Pathian chuan ka nawmsakna mai mai tur nilo a, i nawmsak theih zawkna tur a nih a hriat vang nge...hlawhtlinna min khum tir a nih kha...Khatih lai khan ka kiangah awm nila chuan Ka lawm luat vangin ka mualpho ta ve ang..Mahse nang zawng khawpui nula, officer fanu lehkhathiam leh nunnem, Tlangram pangper chheng chhe zet kal sanin, Vai khawpui lam min belh san a nih kha...Ka tan be tur che a rawn kal awlai loh zia chu i hrethiam mai awm e...Tin, Ka tan chuan pawm vawng vawng che a, i biang no tak mai si chunga nuih ver ver chu, vana rah ang mai a hla a ni bawk si..Rilru kimlo takin ka hlimni chu ka hmang ve ta ngawt a nih kha.

Khawnge i awm, enge i tih, engtin nge i awm tih reng reng ka hriatloh lai pawh khan ka thinlungah i hming thaireh a ni ngailo a, i tuanna tlang khawilam nge..?...engtin nge hun i hman a, i hlim ang nge hlimlo ang tih ka ngaihtuah a, ka nilen pui a, laikhum ka belhpui a, Ka Pathian hma ah 'Hrehawmna reng reng in a bawh buai lohna tur che in, ka dilsak ziah che a...chu chuan tui taka muthilh theihna min thlen phah fo thin a ni.

Kum 5 a vei leh meuh chuan ka nunah i la bei nghet hle a ni tih a lang chhuak ta a...I pa in ka hmelhriat i ni tih hre hauhlo a, I pasal neih hmang tura sawmna lehkha a min den sawk khan, ka mit sulh thei hial a sin...Ka khaw hmuh a fiahlo a, i pa pawh ka zahzolo thelh zawk a ni..Mahse, ka nawmsam loh ka chhuanlam vat a, min hrethiam tak si khan hmuhhmaih nei bawk siin min chhuah san tak hnua ka thinlung chhun ang tlat a na kha..ka thil tawn tawh zing a ka tuar nat ber leh ka dam khawchhuah zawh puiloh ni mai in ka hria a, Khawvel hi a ruak vek a, Choak pakhat nen chauh a awm dun ang mai niin ka inhre ta a..Chu chuan ka nun kawng min sawi danglam sak ta dawrh a...

Mite fak der, mi fapa te zilh hauna hlim thla, mi fanute enthlak, Tleirawl sual pawh nei ngailo, zak zum leh mahni chauha awm mai mai chung pawh a, midangte rilremlotu nih hlau pa in a thlamuanpui, nu in a fak kham theihloh tihial a sawi thin kha...Kawm karah, mi inhnuaiah Zu leh sa chenin ka hun ka hmang ta daih mai kha..Ka sawrkar hna vang niin an sawi thin a...A dik lohna ka hre hauhlo..a chhan chu ka hnathawh chhan ber, ka ta i ni talo tur kha enge ka tan sawrkar hna thawh a sawtna tur ka hre talo a ni ber..

A ni telin, a thla bi kim thlapin, a kum tluanin ka danglam telh telh a, hna ka thawk theilo a, hna in min um a, min kal pelh san a, ka zuan luhna khur ah ka tang laklawh tawh si a..chhuak leh turin tha ka nei tawh hauh silo....Ka taksa in a zolo a, damdawi a inenkawl in awmzia keimahah a neih tak loh hnu ah..,

Ka huntha ka vanglai, engkim chu a lo tawp a ni ta reng mai a nih hi..Tihtheih engmah i tan ka nei talo...Ka thiante, ka unaute engkim a ruhlanga ka hrilh ngamten min hua a, min diriam a, ka tan i hlut zia hre hauh silo in, nangmah vanga ka nun in thlak chu an sawi thin a...Mipa nisi, hmeichhia a duh zia leh a hmangaih zia te, a tana a inpek ziate hrilh hre ngam miah silo a, thatlai hun hmang zo a, amah neitu nih ka tum ve ngawt chu mak an ti mai nilo in an zak zawk hial a, min kawk sawk sawk a ni ber...,

A ni tak a, Engvang teh chaiin nge i hnenah ka thinlung i luah zia i bulah chhak chhuak turin ka din ngamloh le...Engvangin nge ka nun, ka tum, ka engkim chu i tan vek a ti ka nih zia ka chham chhuah ngamlo tak bawk le....?...Ka indem a, ka in kek a, ka inhmusit ngawt tur a ni chuanglo..Ka dinhmun ka ngaihtuah a, Kei Khawlaia Chawhmeh zuar fapa, Kei ama pa in a duhloh a, a chhuahsan hnu, Zoram khawvela a, ram leh hmun awm zo zai zingah ' Ka in leh lo a nih hi' tih tur nei ve hauhlo...

Nu tangbel a chawtlang keng ve mai mai..A nu in chatuan atan a chawlhsan hnu, mite tanpuina a nung ve tawk tawk...Mi awmthei leh neinungte lak ata mi hnuaihnung ber, thlahtu chhui dawl hauhlo tur hian, nang khawpui nula zingah pawh tuikep lung zinga Lunghlu thami ang maia langsar, Duhawm tih in a sawifiah zawhloh khawpa duhawm, Mite ngaihzawn rawn, Mi hausa te monu ni tura hel dawn mek hnenah...Ka duh zia thu ka hlan ngam tehlul ang che...ka dinhmun ah ding nise...tumah kei mindem tur hi an awm bik hauhlo ang.A tawp ber atan chuan..,

Khang Kum 3 chhung ka lawina school bel tura Pathianin rem a ruat kha ka lawmin a hnenah lawmthu ka sawi fo a ni tih min hriat sak la..He ka lehkha hi i hmuh hunah chuan Kei ka rawih ral mek ang a, Nang erawh i hrai leh zua tangah beiin, Hlimna par tlanin i leng ngei dawn si a...Mahse, ka thik hauhlo che..thik chu sawi loh, kei hnathawh bak in leh lo rohlu chhuan tur nei hauhlo bela i nun hah taka hmanglo tura i awm thei kha ka lawm hliah hliah zawk a..Nang i hlim chuan kei ka lawm a ni tih min hriatpui ve ngei la ka duh a ni....

Ka khawvel dam hun chu keima duhthlanna ngeiin ka sat chat a, zawm leh turin theihna ka nei tawh silo a, chu nunna chu a zung nena pawh phawng hnim khawro mek ang mai a ni tak si hi, he lehkha hi min hriat chhuah ve zeuh theih nan ka thlarau ka thlah hnu a lo nih pawn...lo chhiar chhuak hram ang che...Ka tan i par a, ka tan i vul a, ka tan i mawi a, ka tan chakna i ni si a....

Khawvel thar ah nang nen inzawl tawk kan nih theih nan Khawvel thar i rawn kai ve hma zawng chu kan tan ka lo dil char char ang.....Min kalsan ngailotu Ka Pathian chuan ka dilna hi min hlawhtlin tir ngei ka beisei.

Zothanpuia ( Akuk-a)...

*****&&******

A mit sulh a, a mittui dan rual loha luang chu hruk reng a tum lo, a biang mam tha takah chuan a luang ngiai ngiai a..,A hun liam tawh hnu a chhui kir a, engkim a hrechhuak uarh uarh a...a rilru nat luat vangin rawl chhuah meuhin a tap ta hawm hawm a....

" Ka va lo hrethiam lo em...Enge ka sawi mai loh a...ka zep tlat le.,....ka va lo a tak em.." tiin a phun sep sep a...a khum atang a tho chhuakin Ziakna puan lachhuak in mittui luang zung zung chung chuan hetiang hian a ziak ve a...

To,

Akuka....

Kei hian i lakah tihsual ka va nei lian tak em...Keimah vanga i tawrhna te, keimah vanga i natna te, keimah vanga i hrehawmna te zawng zawng kha ka dawih zep leh ka tlaw luat vang lek a ni si a.

Keipawn, school kal hmasak berna ni a, Lehkhabu ka thloh min chhar sak atang khan he ka thinlungah hian vawi khat mah thaibo emaw hliah khuh emaw in i awm ngai biklo a sin.I khawsa zia kha ka mit mei a, ka thlir a, ka en reng thin a sin...Hlim taka i nui te, Mipa dang anglo taka i ngawi ngal thin te, Hmeichhia i bawr ve huam huam lo te, tupawh i kawm a, tupawn an ngaina che a ni tihte engkim ka hmuh hmaih ngai biklo a sin...

Vawi engzat nge, zan engzat nge, i hnenah ka duh zia che leh ka thlakhlelh thin zia che hrilh tawp tur che a ka intiam thin ni ang le...Kar a liam a, thla a zo zung zung a, Kum a vei thuai thuai a, sawi ngam leh silo in kha kum 3 chhung kha ka khawhral ta der a nih kha.Tutan mah ka inphal lo a, tumah midang ka lem lo a, tumah ka thlahlel ngai heklo, a chhan chu nangmah ah beiseina ka nei tlat a, i kiangah lo chuan hlimna ka nei dawn hauhlo tih ka hre reng thin a..

Mahse, i hnenah kal a, engkim hrilh tur chein ka ke ka pen zo thinlo a..Mualpho ka hlauh luatah ka chan ta che niin ka inngai a, ka nun a nguai a, ka hlim loh phah fo thin...engkim i tan tiin ka invawng thianghlim a, ka suangtuahna mai pawh nise, Lawithat zan a i hlim hmel tur hre reng chungin hun ka hmang liam zel a nih kha..

Zoram lamah ka rawn let leh hnuah tawn che tumin ka thiamna leh theihna zawng zawng ka hmang thin a.Mahse awmlo zawn ang maiin i pil vang vang tasi a, chu ka beidawnna lipui a ka pil mek lai chuan Palai hmel ka hmu ta mai si...Khawnge i awm a, khawnge i tuan hre hauh silo a, nghaktu nih ngawt ka ngamlo nilo in, ka beidawn luatah ka amen ta ngawt a nih kha..Chu chu i sawmna hmuh chu a ni ngei ang..

Tinge ka hriat loh a, tinge min hriattirtu an awm hauhlo le..Ka pa nen huang khatah Ram leh hnam tan hna inthawk dun reng si tih kha...Ka pa tehreng pawn i sakhming ka thinlai luahtu kha vawi 1 lek pawh chham chhuak se....ka harh kawk ngei ang a, ka tan nangmah hriat theihna turin thu tam chhak chhuah a ngai der silo...

Kha ka pasal tur a intulut, ka duh vang reng a ka sawm pawh ni silo khan, Pathian leh Kohhran hma ah lungsilo chunga ka tiam ni tur a thlen hma lawk in, Zah pah lo taka a rawng a lo bawlsak Pathian a ti thinur a ni chek a niang, Mualpho takin Kohhran leh Mipui hriat ah Sawn a thlak thu puan chhuah a nih tak vangin thulh a ni a...Ka lawm zia kha...engmahin a thleng ka phal ngailo ang....I tan nun thar ka nei lehah ngaiin hun ka chhiar bek bek zel a..." Khuanu Samsuih kan nih ngai chuan, ka tan a rawn lang leh ngei ang" tiin tisa pawh nilo suangtuahna mai nghak chuan hun ka hmang ta a, ka hmang chho mek zel a nih hi.

Keimah vanga i rilru na chu siam thara tihkiam a nih theih nan he ka lehkha hi chhiar chhuak a, in sang marin, beidawnna khur ata chhuak dunin Khawvel mawi taka hmang thin Hmangaih leh duhberte nen a hun hmangthin te angin kan damlai hun kan hmang liam ve tawh dawn nia...

Lo indim la, insum hram hram la...Nithar lo chhuak tur chu hmuh ngei kan tum dawn nia.

Malsawmtluangi ( Ms-i).

A lehkhathawn ziah chu vawi 1 a chhiar chhuak leh a, a kawmah uluk takin ahming a ziak a, Thawhtan a apa office kal tur thawn atan a dahtha ta a...

*****&&&&amp*****

Sunday chawhnu zanriah kil tura an inbuatsaih mek lai a ni a, Pu Hruaia chuan Phone call a dawng a, a be duhtu chu tunge..?...tiin an bih a..' Pu Lawma a nih hi..engthil nge ni ang aw..?" ti nuah nuah pahin phone chu a pickup a..

" Hello, Pu Lawm, enge nita a, sawi ta che"....."awww...ava zialo thin tak em,,,Chaw kan ei dawn chiah a, ka rawn tlan chho ve nghal dawn nia...eee..an khua ah zui a ngai a nih chu..a nih phawt le"..tiin a phone chu a dah a.

"Mami Chawi ei lo siam ula, Nui titeh ka thawmhnaw i han siam teh ang, Zampuia kha ko chho ula, motor lo buatsaih bawk rawh se...kan thawhpui Zothanpuia Mitliam in tunmai khan a boral a, a ruang zui kan ngai dawn a nih hmel.." a ti zung zung a.

Msi chawi ei siam tura inchhung atanga rawn chhuk mek chu a ding chawt a..." Tumaw thi a..?!!!!..ka pa????..."... phawk zet chuan a rawn ti a...." Zothanpuia nangmah rual vel, fel zet mai, Thla 6 kalta vel atanga zu in ve chauh a ni a sin mawle...Ka duhaiin a in nasa ka ti reng a ni.."...tiin roomah a luh san a...

" Ka uuuuuu...." ari bur a, step a lum bawb bawb ri an hre nghal a...an room atang chuan an tlanchhuak vat a...." Mamiiiii...".....an ti ta chul a...

*****&;&;&;&;****



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)