THE MAB BY Tochhong Ruata (Completed)

Ngaia
Site Admin
Posts: 25813
Joined: April 30th, 2016, 4:07 pm

Re: THE MAB BY Tochhong Ruata (Completed)

Unread post by Ngaia » April 8th, 2019, 8:37 pm

Chapter 7

Krismas hmang dun chiahlo mah i la, Urlawk zan hlim taka kan hmanna chuan kan lunglen zualpui min hnem viau, Kan thleng a, ka inbualfai a, Ka nu leh pa te hnen ațangin Krismas thilpek ka dawng a, coat Suit nalh zet mai, manto hmel tak a ni nghe nghe. Keiin an tan engmah ka tive der silo, ka inkhawm a, Inkhawm banah ka room ah ka inkhung a, Ka hmelhriat hmun hrang hrang amite, Ka hnamdang țhian Kristian pawh ni ve chuanglo te hnen ațangin Krismas chibai bukna ka dawnte chu ka theih ang angin ka chhang hlawm a. Amah Veni ngei pawh chuan min rawn wish bawk a, Ka be zui nghal a, Kan haw hnua a khawhar ziate a sawi luam a, Inkhawmna a a mutthluk thute a sawia kan nui dun ker ker a, "Tuaia, i va hlim awm hak hak ve, Inpui ah lenphei kan tia i lokal ve dawn em?" ka nu chuan ka room a rawn dak chung chuan a rawn ti a, "Awle, ka lo insiam dawn nia" ka ti a, "Chhungkaw thlalak nghal tur a nia, Induang ve deuh la" tiin a kalsawn leh nghal a "I nu em ni?" a rawn ti vat a, "aw ni e, Inpui a len an ti a nih chu" ka ti a, "Nia nangpawh i pu boral kum a ni si a, in khawhar ve tho a lawm" a ti a, eng eng emaw kan sawi hnuah kan inbiakna kan ti tawp a. Keipawh Ka thuam inthlak tawh chu ka inbel leh a, Inpui lama leng tur chuan ka inpeih ta ap a.

Motor ka khalh a, Nidang ang em em chuan motor khalh hi ka chak tawh lemlo, Krismas bazar dawn vela Veni ka bazarpui dawna ka khalh chhuah bak kha motor ka khalh leh ta miahlo. Ka Pa in khalh tura min tih a vangin phur fahranlo chuan motor ka khalh a, Ka nau hmun danga awm Krismas hmang tura a rawn haw zawk lai a ni a, Kan motor ah kan chhungkua kan chuang a, Ka u te chhungkua in an motor in min rawn zui a, Inpui lam pan chuan kan kal a "Tuaia nizan khawiah nge in hman a, I rawn dikdak miahlo a, Cake te kan order ve si a," ka pa chuan a ti bung nghut a, "Veni te khua ah Benan ka hriat miah lohin programme a lo buatsaih a, kan kal thut a" ka ti a. Ka nu leh pa hi dawt ka hrilh ngailo, Meizial ka zu ve țhin a, an hmuh laiin ka zu ngam ngai lo hrim hrim, a rim pawn an bulah chuan ka nam ngamlo. "Enge maw?" a ti hu a, "Veni te khua ah kan kal" ka ti a, "In va han peih mai mai ve" ka nu chuan a ti a. A hamah Ka pa nen kan țhu a, a hnungah hmeichhe 3 an țhu thung, "Nia, keipawn ka hre lawk miahlo tak tak" tiin Benan min rawn sawm chhuah dan leh kan kal dan ka sawi a, ka sawi zawh rual chuan "Kumthar ațang chuan bansan la a țha ang, I examna tur lamah i rilru pe tawh ang che, Miin an sawi duh dawn tlat" ka pa chuan a ti bung nghut a, ka farnu ten min fiam nak nak thawm pawh a reh nghal hmak a.

"Kan Driver fanu a ni a, Keimah ni chhungkua vangin a pa a boral a, Hna a thun kan tih makmawh a ni a. Chuvangin miin an sawiduh viau dawn a, Minister in thun tura a tih kan sawi hnawm lai a ni a, loh theih lohin Veni kha kan thun a ngai ta si a, Minister bulah pawh ka sawi a, midang thun tur ka hnawl laia an ni ka thun chu a lawm vak lo. Mahse kan dinhmun a hriat piah lamah an Bial lam Party hruaituten an rawn sawipui hlauh bawk nen min hnial ta em lo a. Nang nen in boruak hi engemaw kawnga a hria a nih chuan ka hmingchhe thei dawn a ni 'a fapa bial nu a ni hrim hrim bawk a' titawk an awm ngei ngei dawn. Chuvangin Kumthar ațang chuan i bansan ang a, Delhi ah Coaching kal turin i rilru siam ang che" a ti zui nghal charh charh a. Ka awmdan chiah ka sawi thiamlo, Ka thinrim miah lo a, ka lungawilo miahlo, Mahse ka țawng chhuak lo a, ka motor khalh chu ka khalh mawp mawp a. Veni chu kan kiansan theih ka ringlo tawp a, a ni pawn min kiansan theih ka ring bik miahlo bawk. Ka nute 3 chu an ngawi kar a, ka pa thutlukna chu an hrethiam viau ngei ang a, mahse keimah chu min lainat emaw pawh a ni maithei. Achhan chu Tu hmeichhia vang mahin ka la buai ngailo tlat a, ka buaina hmuh ve chhun kalsan tura min ti chu enge ka tih ang a, engtin nge ka awm ang tih an ngaichang a ni ber.


Inpui kan thleng a, ka phur tur angin ka phur ta hauhlo, Ka pu room ni țhin ah ka lut a, Kawngka ka inkalh hnan a, Khumah ka tlu zal a, inchung chu ka en reng a, ka rilru a kalthui viau mai. Veni lakah ka rilru zawng zawng ka pe vek tawh a, A lakah thu ka tiam tawh bakah a rukin inhualna zungbun ka hlan fel vek tawh a ni a. Chutah engtik lai maha a thu ka hnial ngam ngai loh ka lei Pathian ngei maiin kalsan tura min ti chu ka ngaihtuah neuh neuh a, Engtin nge ka tih ang a, enge ka sawi chuan ang le?? Keimah ngawr ngawr chuan hrehawm ti deuhin ka tuar fan fan thei maithei. Mahse, amah Venin engtin nge a ngaih anga, engtin nge a tuar zawh theih ngawt ang? Apa vanga a rilru ipik a kiang dawn chauh a, Keimah vang bawkin hrehawm ti takin a hun a hman phah leh ngei dawn si.. Ka awm a nuam thei hlawl lo, ka pa khan kha thu kha sawilo se chuan ka chhungte bulah ka ti ti ve ngei ang a, Ka pu nen kan chanchin nuihzat thlak tak tak an sawilia te sawn ka nui ve ngei ang. Mahse tunah chuan ka nui thei tlat silo a ni.


"Tuaia enge i tih reng a, Thlala turin kan nghak che a nia," Ka nutei (Ka patea nupui) in room kawngka a dak chung chuan a rawn ti a, "Awle, ka lo phei ang" tiin ka tho a, ka pu bathroom ah chuan ka lut a, ka inphih harh a, Ka intuai fai a, ka chhuak phei ve ta a. An hlima an nui ho dar dar reng a, Ka pu Hlimthla lian puia print bulah chuan thla kan la sap sap a, Ka Pi boral hi kei pawn ka hre hmanlo Kum 2 lek ka la nih lai a ni a, Ka pu nen hian kan inputu em em thung. Zanriah kan ei nghal dawn avangin, kei chu ka pu room ah chhuanlam siamin, chawl hahdam tur anga in sawiin ka lut leh ta daih a. Ka phone ka la chhuak a, Veni chu biak ka tum zui nghal a, Mahse a la mai theilo a vawi 3 ngawt biak tuma ka tih nawn ngial pawn a chhan theih loh avangin khumah chuan ka mu zal ar ar a, Veni nen kan inkara thil thleng tur chung chang chu engtia chinfel chi nge ni ang? Kalsan ka duhlo, ka kalsan dawn heklo, engpawh thlengse ka pa nen kan thu a inhmuh loh vawi 1na tur a ni mai. Ka pa thu ka zawmlohna hmasa ber tur a ni mai, engpawh nise.


"Aw, ka lo muhil daih a, ka tho chiah" a rawn ti a, "Ka rawn ti harh che a mi?" ka ti a, "ti harh lo e, ka harh ve hrim hrim a, ka phone ka en a, i rawn phone ka lo hrelo a ni tih ka hmua ka rawn be nghal che a nih hi." a rawn ti a. Eng eng emaw kan sawi duh a, kan nui dun a, "I pa ten an hre ta em?" a ti a, "Engmaw?" ka tia "Aw Kan khuaa in rawn kal kha, nizan kha" a ti a, "ka hrilh a lawm" ka ti a, "Awi.. an hau che em?" a ti vat a, "hau lo e, peih min ti" ka ti ve zaih a. "ka awihlo e,.. Nia In peih ka ti khawp mai, Mahse ka lawm bawk sia" a ti a, "Keipawh nuam ka ti, ka mood a fuh phah vek a lawm. Kum puitling kan nih hnua Krismas urlawk zan ka hman nawm ber a la ni hial awm e, Kan dam ang a, nakum ah phei chuan Krismas ka rawn hmang thei tawh ang" ka ti a.. a ngawi reng a, "I la awm em?" ka ti a, "Awm e" a ti ban chalh a, "I mut ala chhuak a mi?" ka ti a, "Chhuak tawh lo e, tunah khawnge i awm?" a ti a.." hetah ka pu room ah, nang?" ka ti a, "Ka room ah ka awm....U Zoram, Inbe tawhlo mai ang?" a ti ta nge nge a.

"Engvang chuan maw?" ka ti a, "ka hre chuanglo, i pa thu min hrilh kha ka hrechhuak a, I zirlai tibuaitu ka ni ang tih ka hlau, I hlawhtlin hunah kan inbe leh zawk ang a" sehchilh deuh nak chuan a ti ta a. "I ngai thutak lutuk a nih chu,, a tih ve dan a lawm" ka ti a, ka rilru tak chuan ka thin a rim țun thung. Engvanga kei hmeichhia ngaihsak ngai reng renglo ka hmeichhe ngaihsak ve chhun min tihtawp sak a tum tlat chhan hi ka hrethiamlo a ni. Naupang chhia ka ni tawh lo a, Nupui nei rual pawh ka ni ve tawh a, naupang chhe țit a min țit chu ka lungawilo tak zet a ni. "Ngaih thutak loh chi pawh a nilo, Keimah vang chuan i thil tih tur i tih theihloh phah ka ring chuang em em pawh a nilo, kan inkar hi a zau mah mah a niang" a ti a. Kum lamah naupangte mah nise unau zinga upa ber a nihna a lang a, a puitling khak reuh a, "enge kan inkar a zauh na?" ka ti a, a nui hak a "Ka sawi thiamlo, Nakum ațang chuan I pa department hnuaia Muster Roll 1 ve mai chauh ka ni tawh dawn a, I pa tan a mualpho thlak bakah, englo" a ti a, a ngawi daih a, "Enge englo chu, Ka ngaihzawng, ka nula chu eng mi pawh nise, ka pa department hnuaia hna hnuaihnung ber thawk pawh nise engmah in zawmna a neilo. Keimah ngaihdan hi a pawimawh ber zawk" ka ti a, a ngawi renga, a insut hriah ri ka hria a, "Duhtawk rih phawt ang, Zan ah kan inbe leh dawn nia, Ka nu rawng kan bawlpui lawk a nge" tiin Phone a titawp ta daih a. Ka lum pup pup a, ka thaw a sa hulh hulh a ni ber mai, Engvanga ka pa hi lo inrawlh nge a nih le?? Ka pu khan Mi hausa leh reithei, hna sang thawk leh hna hniam thawk eng ang pawh nise Pathian hmaah chuan in ang khat vek kan ni a, He leiah lo inthliar ve ngawt chi pawh a ni lo a tih țhin kha ka hre chhuak zawk a, Ka pu kha la damse, a fapa upa ber thil tih hi hrilh ka chak zek zek a ni.


Zanriah ei khamah haw an rawt a, Kei chu chhuanlam siam in ka riah tur thu ka hrilh a, Mak an ti hmel hle, inthlakna kenglo mah i la, ka pu nen hian thuamhnaw kan ințawm thei a, pheikhawk thlengin kan ințawm thei. Engmah harsatna a awmlo, harsatna awm ber chu engmah tih ka tuilo chu a ni ber mai. ka zia chu ka ni in a lo chik ru reng a ni chek a niang chu ka pate haw hnuah ka pu rooma ka inthlak mawlh mawlh lai chuan a rawn lut a. "Tuaia, mut i tum a mi?" a rawn ti a, "Tum deuh der mai, nizan ka mengrei deuh a" nui chung chuan ka ti a, "I pu thuamhnaw chu i ha tawk hle mai, i pu kha palian deuh a sin a nih, in hmelte hi a in ang a, in zia te hi a in ang khawp mai" a tia, țhutna awmah chuan a țhu a, Ka inthlak zo a, khumah ka țhu thung a, "Tuaia lungawi lohna i nei em ni? i zai a danglam tlat mai, Enge awmzia ni a?" a ti a..


"Engmah harsatna awm lo e, Nizanah Veni te khua ah kan han hmang chho a, ka chau deuh a, chuvang mai mai chu a niang" ka ti a, "Engmaw? Veni te khua ah in chho a maw?" a ti a, "aw, Bena'n ruahhmanna a lo siam a, kan kal thut a lawm" tiin kan kal dan leh kan haw leh dan chu tawifel takin ka sawi a. "A zialo ka ti e, Hmeichhia vanga Krismas urlawk Km 100 chuanga han hman daih mai chu" nui huk huk chung chuan a ti a, "Nia, zialo khawp mai, mahse kum ka tlin hnua ka urlawk zan hman nawm ber țum a ni, hla deuh mahse a hlawkthlak khawp mai" ka ti a "In han chesual vel a nge, Tumloh daiha Sawn thlak te hi a awl a nia, I pu kha Kohhran rawngbawltu Puithiam a ni a, a hming hliau zawnga awmloh tum hram hram ula, hei nangni unau bak hi Mipa in awm lo a, Kan unau kan tlem a lei ah, Tun thlenghian kan chhuang ru ve em em che u a nia" a ti a. Ka nui hak hak a "Chutiang lam chu engmah a awmlo, hlauthawng duh suh, Tin, Veni khi chutiang chi chu a ni miahlo a nia. A hmelțhat ang ang khian a rilru pawh a țha a, a nungchang pawh a țha viau a nia" ka ti a.


"Tuaia, Hmeichhia hi an hmelțhatna hi an hmangthiam duh viau a nia, Veni kha keipawn hmeichhe lepler emaw buan chaklo tak emaw a nih chu ka ring miahlo, Mahse, a chhungte vangin engkim hi a danglam daih thei a nia. A hrim hrim ah kei chu ka duh aiin a naupang mah mah, Kum inthlau lutuk nupui pasal in neih hi upat hnuah ngaihdan leh duhdan a rual duhlo viau niin an sawi țhin a nia aw. Kum 10 chuang em ni in inthlauhna kha?, Kum 2/3 leka inthlau hi chu ka hrethiam khawp" a ti a.. ka ngawi renga, ka ni pawh hian ka pa rilru ang tho a pu a nih dawn hi, ka ti rilru a. "Nia, kan kum chu a inthlau khawp mai, Mahse kei amah hi puitling ka ti ru viau a sin" ka ti a, "Nia, A puitlin hmel a lawm, a neitu tur i nia, Mahse ka chah duh che chu hmanhmawh thut thut tur a nilo, An zia hi chik a, engzia nge an nih tih ngun taka chik phawt tur. Tin, In ngaihzawn lai hian kan zia țha thei ang bera kan lantir hunlai a ni a nia, Fimkhur hle tur, Upa in Thlahtu an chhui vak vak te kha a lo țha viau a nia, inneih hnua ințhen leh hni hne hi mi min hmuhdan a danglam daih zel tawh a nia..." a ti a. "Nia, Neih mai pawh ka la tum hleinem, Nei ngawt i la chawmna tur ka nei reng reng hleinem, kum 30 kan tling ve dek dek chauh a lawm" ka ti a, ka nui a, "Kei chu i nei har tawh ka ti, Fa i neih hunah i duh aiin upa i inti tawh maithei, Mahse chawmna tur neih hmasak phawt hi tum tlat tur, Mipa an chhungte beh chhana nupui nei ve ngawt hi hmeichhe lungfing chin chuan kan nuihzat ru viau țhin a nia. Mipa an chhungte vanga nei duh mai mai hmeichhia lah hi an tam khawp a, heng lakah te hian fimkhur tluk a awmlo a nia. Nupui pasal inneih hi pawhlah taka tih mai mai loh tur, Rilru fim tak leh ruahmanna neisa thlapa neih tur a ni a nia aw" a ti a, a tho a "mu tawh rawh, I pu chu a reh ta vung vung mai chu a nia, Ka ngai ngawt mai" a ti a, a chhuak zui ta nghal a. Ka ni thusawi chu ka ngaihtuah a, a dik ka ti hle, kei pawn ka ngaihdan chiah a ni a, Veni hi ka duh em em rualin neih nghal thut thut chu ka tum lemlo, ka chawm zawhna tur khawpa hna țha ka nei a nih loh chuan ka la nei mai dawnlo tih hi ka rilru siamdan a ni hrim hrim. Engtiang takin nge ka pa hian kan inkarah harsatna a siam dawn? nge a sawi ve mai mai chauh zawk ni ang? tihte chu ka ngaihtuah ta nep nep a.


Kumthar ruai țheh tlaiah Rei tawk kan inbe leh a, Hemi hma pawh hian a khat tawkin kan inbe tho nangin hemi ni hi chu kan inbe rei viau mai. Krismas ruai țheh tukah kan chhung inkhawmna ah ka pa in "Tuaia Gulsana ka be tawh a, Ni 5 a chhuak turin Ticket am tifel tawh a, Delhi ah Coaching class i kal dawn a nia aw, Lo inbuatsaih ru deuh ang che" a ti a, chung thute chu ka hrilh a, min lawmpui thu leh țha deuha zir turin min chah bawk a, Eng eng emaw kan sawi țeuh a, A ni pawh Kumthar Office kai ruala hna thar zawm nghal tura an tih thute, a zawm hnuah Aizawlah a bungrua la tura chhuk zawk a tum thute a sawi a, Kan inhmu hman dawn talo a ni, reitawk kan inbiak hnuah kan inbiakna kan ti tawp a. Zan ah dar 12 thleng kan inbe leh a, Chu chu Veni nen kan inbiak tawpna tur a ni tih reng ka hrelo, Mahse mak tak maiin hemi zan hian kan nui hnemin kan ti ti pawh a rual khawp mai, Lunglen thute kan sawi tam lo, Ka zirlai zir tur chungchangte, a hnathawh tur chung changte kan sawi a, Ka pa duhsakna achan avanga a lawmthu te Mi pawn Zawm thar chauh a ni chunga Skill II a a zawm thei tur thu mak an tih thute an sawi thu min hrilh a, kan hlim dun hle. "Ka zir zawh a, ka hlawhtling a nih chuan Palai ka tir tur thu ka sawi a, a nui hawk hawk a, "I hmanhmawh lutuk a nih chu" a ti a, hlim takin hemi zan hian kan inbikna pawh kan ti tawp zui ta nghal a.


Thlasik a liam a, Nipui a thaw a, Delhi khawpui pawh a lum uap churh mai, Delhi ka chhuk hnuah ka malruh chu kan ennawn leh a, vanneih thlak takin ka ke pawh a pangngai leh thei hlauh nangin tlemin ka ke a bai saih saih ta thung, Hemi avang hian IPS lam chu ka hriselna vangin ka tlin ta lo phawt a. Ka chak ber IAS erawh ka la tum ngat ngat thung. Ka chhuk hnuah ka buai nghal char char avangin Veni ka be mai thei lo a, hun ka neih a biak ka tum ve țumin ka be tlang thei ngai miahlo, Msg emaw ka thawn lah ka hman loh hnuah a rawn chhang leh chauh țhin bawk si, Call pangngai phei chuan kan inbe theilo hrim hrim a ni ber mai. Ka chhuk ațanga kar 4-na ah number ka hriat ngailoh ațangin "Ka phone a bo daih, miin min ruksak a niang, i number ka ziahna ka lo la nei hlauh a, ka țhiannu numberin ka rawn hrilh che a nih hi. Ka neih leh velah ka rawn hrilh ang che" a rawn ti a, ka lawm lo kher mai, Kha Phone kha ka pek ve ngei kha a ni si a, a tibo chu ka lawmlo a ni. Ațhiannu number ah ka biak lah in "Kan awm dunlo" tih in min rawn chhang zel bawk si, ka thinrim chuan ka be chhunzawm duh ta bik lo a. Chhuanlam a siam mai mai niin ka hria, Ka number a hriat tho chuan tinge a nu emaw numbera min biak mai loh. A hmaa a sawi lawk ang ngei khan min biak tawhloh a duh vang mai maiin chhuanlam a siam niin ka ring nghet bur tawh a ni, "Min biak hmasak loh chuan ka be bik tawh lo ang, Ka pa pawh min biak loh chuan ka be tawh lo ang, Kan inkar tichhetu ah ka mawhpuh lo theilo, Ka zirlainka zirzawh hnuah pawh ka hawng a nih pawn ka patea te bulah ka hawng hmak bawk ang" tiin ka rilru ka siam sauh sauh a, Ka Zirlai ah in sawrbing tumin ka rilru ka siam sauh sauh a.

**********%%%%%%%%****************

"Tuaia, I pa i be ngailo a mi? be rawh" ka nu in a rawn ti a, "Biak ka tuma ka biak tumin a tlang theilo zel a lawm, nangpawh ka biak tam bikloh che hi, ka zirlai ah ka rilru ka pe deuh bawk nen. Harsatna ka tawk a nih chuan ka rawn hrilh mai ang che u, ka ngawi vang vang hi chuan ka buai hle rih ah ngai mai rawh u" nui chung chuan ka ti a, "Dawngmami khan hmanni chu thil min hrilh a" a ti a, "Tu Dawngmami maw?" ka ti hu a, "i va chhaw tak, I Putea fanu kha mawle" a ti a. "Aw.. i sawi teh thuta ka hamhaih thut a lawm, enge a sawi a?" ka ti a. "Veni chanchin mawle, Kan CM tupa nen an inzui ngawrh viau a ni awm e" a ti a, "Dawngmami chuan engtin nge a hriat a, a hmu ngai a mi?" ka ti a, "Aw.. I hre tawhlo a mi, College khat ah an kal a lawm, i hre ve tawh emaw ka tia" a ti a. Nia, ka putea te hi Lunglei lam daiha awm an ni a, kan intlawh pawh tam em em lo, keini naupang ho phei chuan kan inhmu khat viau, Dawngmami College kal tawh thu chu ka hre ngei a, Veni te college ah berkher a kal ve ka lo hrelo thung.

"A hai a niang, Veni te chu College a kal tawh reng reng hleinem" ka ti a, "Kal e, Hostelah an awm ho a lawm, I Putea fanu a nih pawh a hre lemlo a nih hmel" a ti a, ka phu zawk a, "engmaw? kan inbiak lohna a rei tawh khawp, a phone a tibo daih a, kan inbe thei ta reng renglo a, Ka pa khan an department ah khan a thun a ni lawm ni?" ka ti a. "Nia, thun a tuma, Mahse an chhungkua khan an duh talo a nih hmel, College kal chhunzawm leh a duh a nih zawk hmel, a nu an thun ta zawk a lawm" a ti a. ka bing deuh mup a, "Anih chu, engmah ka zawt lo a, ka pa khan be tawhlo turin min ti si a, ka be zui talo bawk si a" ka ti ve ta tawl a. "I van ho mai mai tak, i pa te chuan i zirlai a i hlawhtlinloh a hlauh vang a lawm a tih ni, Nang chu i tih zawng ti tlur chi i ni a, a veng lawk che a nih kha" a ti a, "Mahse a pawi chuanglo, a hmelțha ver reng mai a, khatiang kha chu an rilru a leple duh reng a nia" a ti a.. "Engvang ngawt chuan maw?? CM tupa nen an inzui ve deuh vang chuan maw?" ka ti a, a nihna takah chuan ka lungnilo takzet tawh.


"Dawngmami sawi dan chuan CM tupa nen hian College ațangin an chhuak dun fo a ni awm e, Hostel ah hawng mai lo in" a ti a, ka ngawi reng a, "Mahse Tuaia engahmah ngai duh, țhian inkawm te pawh an ni thei a, college kan kal ve lai pawh khan keini pawh kan bialpa nikherlo mipa țhian kan nei a, kan inzui nasa ve țhin tho a nia." a ti a, ka ngawi reng a, "i pa chu be rang rawh, a lungawilo mai ang" a ti a, kan inbiakna kan titawp zui nghal a.


Ka chhuk ațanga thla 2 na laihawl vel chauh a la ni a, Chutiang boruak chu a thleng nghal mai a ni a, Phone pawh kha a tibo tak tak a nih pawh ka ring talo, Ka ni thusawi kha a lo fing hle mai, Keilah chuan ka duh hlum lo chauh a, ka pa vangin kan boruak a chhe vek emaw ka ti a, Zampuii khan 'CM tupa in a hel nasa a tih khan thu thup a nei deuh a lo ni a niang a? Kapa kha chhuanlamah a hmang mai mai a niang, Engtin nge ka lo rin reng theih le, Kum 1 ka awm dawn a ni a, Thla 2 vel lekah pawh a danglam a ni a.. Ka ti a, ka zirlai pawh ka zirtui lo, Bena ka bia a, Zampuii hnem ațangin Nutei biak theihna neih la duh thu hrilh ka tum zuau nangin ka țhulh leh a, Thudang daih sawiin kan ti ti a, Mahse kan inbiakna ah chuan ka rilru a awm hauhlo thung. Kha Lasi Lalnu ang maia duhawm, ka vei em em mai khan minlo phatsan in Mipa dang chu min kawp san ta tak tak em ni niang? "PUC Instagram kha en rawh, I bial nu thlalak a tam khawp mai, Nikum Week an neih lai vel thlalak leh a dang pawh a tam mai, I lo thlang fuh chaih chaih khawp mai țhianpa, Mipa zawng zawngin kan thik vek ang che" a ti a.


Ka thawk lawk a, PUC Instagram chu ka search a, an thlalak vel chu ka chinglet ta chiam a. Veni, Veni, Thingtlang nula nalh Veni, PUC timawitu Veni, ava tam tak em, TT a khel laite, Badminton a khel laite, Chinese Checker a khel laite, college campus a a chetla laite, a lang chei chuai a. A vai chuan a duhawmna tizual tu vek an ni a, ka tana ennuam tak vek an ni bawk. Mahse thlalak 3 ka hmuh tharah erawh nghinglawih theihna tur ka hmu ta, CM tupa faiveng vawng tak mai leh inchei tleirawl zek zawk tak mai nen an inkai lai leh Stage a an ding dun lai "Inkawp zawng zawngah an inhmeh ber awm e" tih awm te chu a ni. Engkim mai hi a lem zo vekin ka hria a, Tunlai khawvel ah hian Sum leh pai hian thil ava ti theiin a va lo ropui em ve aw, Hmeichhia ka rin em em, Ka pa vanga min ve ngam talo emaw ka tih mai mai, ka ngaih ti țhalo em em tu ni hauhlo anga ka lo dah kha, ka rin leh beisiloh daih a lo ni si, Hmeichhia hi mipa leplerh an sawi ang mai tho a leplerh an lo nive thei reng a lo ni maw?? Mahse, thlalak dun mai mai leh mi demfiam mai mai te pawh a lo nive thei tho... Nilo tase?? engtin nge ka awm tak zel ang. Ka khumah ka let tawp a, Inchunga Fan vir pup pup chu ka thlir ta reng a...


(Ka chau deuh a, a buaichuar nuaih maithei...)



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 8th, 2019, 8:37 pm

Chapter 8.


Kan Inbiak lohna pawh Thla 4 zet a ni ta reng mai, Mahse a FB account leh Instagram vel chu ka ensak fo, ka lo duhin ka lo hmangaih tak tak a ni chiang mai, ka ngaihsak tawh lo ang tih pawh ka intiam ngun tawh ngei mai, mahse ka sawi lai chu ka ngaihsakloh ber lai a ni deuh ber, Social Media lamah ka vil zui viau thung. Facebook lamah leh Instagram lamah Follower pawh a ngah narawh, a thla lak like saktu pawh a ngah, Tin, hmun hma nuam leh hmunhma nalh hmel tak tak ah a single thlalak in post uluk deuh lai thla a tam viau bawk, Comment leh like tu pawh a ngah thei hle, a profile ah "In Relationship" a dah vang bawk a, Chu chuan min ti nghing dawt a, CM tupa Abraham nen chuan an in kar a țha tawh viau ah ka ngai nghet hmak tawh. An 2 thlalak leh an țhiante nen Inneihna leh puipun nikhua a an awm hona a tam hle bawk a, Chung reng reng ah chuan Abrahama a telve deuh ziah bawk. Ka lo laknat vakna tur a awm ka hrelo a, Ka thiamloh a ni lo a, ama thiamloh a ni heklo, Ka pa in kan inkarah hem a thlak zauh a, Chu chuan awlsam takin min chhu chat a, kan inhlat ta dawrh a ni a, han ngei zuina em em ka neilo, mahse ka thinlung chhungril tak hian thikna leh ngaih veng vengna a awm reng thung.

Ka khawhar changin ka thlir a, an ti ti ka chhiar a, kan Ințhian a vangin engkim ka hmu thei, han huattur emaw Abrahama nen an inkar thu hriat nuamlo chu a awm lemlo. Chutiang vel chu ni mahse ka thinlung takin kei aichuan a thlang nia hriatna nghet tak ka nei hmak thung. Kei apa rual deuh thawh ka ni a, Chutah zeilo eltiang ka lo ni bawk si, Ka pian leh hmel velah chuan Nula tam takin an beisei leh an en ve dak dak țhin chu ka ni ngei a lawm. Mahse amah nen erawh kum thu hla ah kan inthlau em a, kan duhzawng leh nuam tihzawng a in anglo em em a, Chutah engemaw deuh awmsa inhmuh mai mai theihlohna hmunah kan awm hrang daih a, a kum rualpui deuh leh a nuam tihzawng anpui deuh bulah chuan ka bul ngawt ai chuan nuam a ti zawk ngei ang a, a lusun tawhna nen a hlim phah zawk dawn chiangsa. Kei min hmuh chuan a pa nena kan chetsual lai kha a hrechhuak fo țhin ang a, apa keimah vanga boral ta kha a hrechhuak fo dawn a, a rilru a na thar țhin mai mai zawk ang. Ka nupui ni tura ka hauh lawkna ang reng zungbun ka pek lah a bun ngai tawh heklo, Chupawh chu ka la na em em duhlo, ka chantawk ah ka ngai hmiah a, a paih daih a ni emaw a hralh daih a, a mamawh leina atan ahmang daih a nih pawn pawi tihna ka nei lemlo, Ka phu tawk ka hmu ni maiah ka ngai.


Engtin tin emaw Bena hnen ațangin Nutei Number ka nei thei hlauh mai a, ka ve thut chu mak a ti hle bawk. Ani hnen ațanga ka thu hriat chuan Veni chu ka rinhlelhna a zual sauh a, Ka thinlung na ngawih ngawih mahse ka haw phal chuang hauhlo. Nutei sawidan hmang chuan Veni chuan Abrahama leh a class mate Aizawl lam mi a kawp nasat bakah Hostel ah pawh awm tawh lovin a naute nen in an luah a, Nutei te nen pawh an inhmu ngai manglo a, Nutei te biak phak pawh a ni tawh meuhlo niin a sawi. An college ah chauh a lar tawh lo a, College pawnlam thlengin mi ngaihven a hlawh a, a hmelțhatna chu a larpuia, a vanneih pui chho dawn nge a chhiatpui dawn ka hre hauhlo thung. Facebook velah nikhualo deuhin lang țhinlo mahse a ruk takin Abrahama nen chuan Aizawl mi hausa te khawvel chu a luh chilh thuk viau tawh maithei. Motor manto hmel deuh deuh bul vela a thlalak hmuh tur a awm zeuh zeuh bakah Aizawl mi hausa fate nen Thingpui dawr changkang tak taka an chawllai thlalak te pawh hmuh tur a awm leh nawlh țhin.


A piancham a lo thleng a, Wish tu pawh a ngah ngang mai, A piancham lo thleng tur chu ka hriatsa avangin Zinglam Dar 2 ah ka wish daih tawh, Ka wishna chu like emaw chhanna emaw pawh ka dawn ve hauhloh laiin midang ka hnunga wish tute erawh a like sak loh pawn a lawmthu a hrilh zel thung. Chung mai mai te pawh chuan ka rilru an tina vawng vawng a, Mahse ka chantawk ah ka ngai hmak a, Lungnilo takin ka pawm lui hram hram thung. Hunawl ka neih zauh chuan ka Facebook account ka hawng ziah a, Hriattirna hrang hrang ka dawnte ka enkual a, Chungah chuan ka beisei ruk em em a piancham ka lawmpuina thu chhanna a awm tawh thu hriattirna ka dawng lo hrim hrim a. Zingchaw eikham ah ka en a, a awm lo a, Chhun chawlhah ka en a, a awm lo a, Tlaiah ka ena a awm lo a, Zan ah ka en a, a awm chuang lo a. Ka zan lehkha zir muhil mood off lutuk vanga Dar 11 vela ka en leh chuan "Ka lawm e, I dammaw?" tih Dar 10:20 a min chhanna ka dawng ve ta hram a. Ka chhang ang nge chhang lo ang tih ka ngaihtuah a, a tawp ah chuan "Dam a lawm" tih chuan ka chhang ve leh ta hram a. Mahse chu ka chhana chuan chhan letna a hmu leh ta reng reng chuanglo.

A Piancham lawna Instagram lamah leh Facebook lamah a tarlang nual a, Khawi hmun emaw dangah an lawm chuang lo a, an unaua an inluah ah ka hmelhriat ni lemlo an chetzia leh lan dan ațanga Aizawl mi hausa fate tih hriat tak tak te nen an thlalak a tam viau thung. Nutei emaw Duhsaki emaw hmel ka hmu hauhlo a, Hlim leh nuam ti hmel taka an hunhman a ni deuh ber hlawm. Abrahama nen a an cake inbarh lai thlalak chu Like tu leh comment tu an tam ber a, "In inhmeh lutuk, in țha dun" tih vel comment a tam viau, Chung Comment ka en kual na ah chuan Nutei commentna ka hmu hlauh a, ka en vat a, fiamthu in an ti ti a, Duhsaki a tel bawk a, Nutei'n a chhana "U Zorama'n a dam em? a tih che kha" a tihna chu an ti ti titawptu a ni zui ta daih nghe nghe. Chungte mai mai ka hmuh chuan 'Engvanga kei hi min do ta em em a, Kei hi min kalsan a tum loh thu sawi a, a intiamna ka ni si a, min kalsan a, min hlau ta emaw tih tura a awm tak tlat nachhan ni ang" tih chu ka inzawt nasa hle. Chutiang chuan ka zirlai leh Ka Lasi Lalnu chanchin ka hriattheihna awmchhun a țanga ka theih ang tawka ngaihven chung chuan hun ka hmang liam ve zel a, Kar lo ah Delhi Mizo Țhalfavang Kut hman tur chu ka thleng ve ta reng mai, Veni hming leh hmel chu theihnghilh hauhlo mah i la, Amah nen kan inkar erawh a zau tual tual a, kan Inbiak lohna pawh a rei ta vang vang viau bawk.


"Ehe.. U Zorama chu" tih ka hnung lama rawn tih ri ah chuan ka hawi vat a, Hmeichhe 1 hi a ni a, a hmel chu ka hriat hnu chu a ni a, ka chiang chiahlo, A nui var var a, Nula hmelchhelo tak leh nalh zet mai a ni a. Veni ai chuan a hmelțha lo ang, mahse Veni ai chuan a hleitlingin a pian a dik zeih zawih hle, a sam chu dar chen vel in a tan a, a dum hlap a, amah a ngo bawk a a inhmeh hle, a hmui chu sexy tawk lekin a chhah tap bawk a, a hnar a nalh veng vawnghle, a mimeng chu lian lam pang zahawm tak a ni a, Mipa tam tak chuan tawrh har an ti ngawin ka ring, mahse keichuan Ka Lasi Lalnu mitmeng thip lam lek lek melh kha tawrh har ka ti zawk.

"Min va hriat hmel loh" a ti a, Jeans Kekawr tight tak a pian nalh tak mai tilang tura hak niawm tak a ni, a mawng khal nalh tak mai chu Veni pian nen an in anna lai a ni. "Ka hria che a lawm" ka ti bauh a, "Min hrelo tawp a nih kha, keiin ka hriat chian tehlul che nen" nui chung chuan a ti a, a nuih zawnga aha var țhat mai leh rual țhap mai chu a inhmeh kher mai, Veni ang bawkin Make Up uchuak tak hmang a nilo bawk, khawlum avanga a hmai mawm deuh hlerh te chu a inhmeh phian zawk a,.. "Dawng, hetah lokal rawh" Mipa pakhat hian a rawn ti a, ka harh zawk a, Msi kan tih țhin, Shillong a Hostela awm ve țhin kha a ni, High School kan kal lai in, a ni erawh Middle School a kal țan ve chauh awm d. "Malsawmdawng" ka ti a, a nui var var a, A danglam ta em a ni, Khang lai khan cher ria țhiuhțheuh ngo ver mai kha a ni a, Vai naupang ngo var ang mai a ni țhin. Amitmeng lian kelkawl kha ka mitthla nghal uai uai a, Tunah chuan Hmeichhe puitling tak Pian nalh zaih mai leh inphut mawi tak a lo ni tawh reuh a tin ni..

"Kha min hrelo ka tih kha, Delhi ah engtik ah nge i awm?" min ti a, "Thla tam ka la awmlo, I dam maw?, Hetah enge i tih ve, Lehkha i zir a mi?" ka ti a, Kan inchibai bawk a, a kut chu a nel thel reuh a, amah hrim hrim chu a vai mai chuan a thianghlim hmel hliah hliah vek bawk. "Awm lo e, Țhal Favang kut hmang turin min rawn sawm a" a ti a, a rawn ko tupa lah chuan a lo be sek a, "Nakin ah kan inhmu leh dawn nia, Ni 3 vel lai ka cham dawn a lawm" a ti a, Engtia sawm nge an nih tih chu ka inzawt nghal vat a, Ka bula nu pakhat awm chuan "Miss Mizoram Nikuma an thlan kha i hre ve pek na nge?? Miss Mizoram a nih kha Malsawmdawngi" nui chung chuan a ti a. Ka accident tawh lai vel a nia, Nikhaw hre mang loa ka awm vel lai thil thleng kha a ni, Hria e, hre tehlul mai, an buaipui luai luai ngei a lawm, Mahse kan Malsawmdawngi kha a ni ang tih ngaihna reng ka hrelo. "Ka lo hre ve peklo a nih dawn chu, a zialo hle mai" ka ti a, "Nia, Mahni hnam Miss pawh hriat loh" a ti leh kher a, ka en hehaw a "Ka pi accident tawkin Nikhaw hre lovin ka awm hrep a, Chutih lai vela an thlan chu a nia, TV lamah emaw ka en ve lo a, Tlangkam ațangjn Miss Mizoram an thlan thu ka hre ve mai chauh a ni" ka ti ta zek a, "ka tihpalh a nih chu, tunlai mipa ang tho i nih ka ring a, Engmah ni mang silo, hnamdang nula hmelțha hre hle si, kan hnam nula hmelțha hrelo leh viau si ang i ni emaw ka ti a, min ngaidam teh, Chuan I damțha zel maw?" a ti ve ta sawt sawt a, ka nui a "Ka damțha var tawh e, Mahse ka ruh tliak vang erawh chuan ka la bai saih saih a nih hi" ka ti a.

Function an țan a, Delhi ah hian Mizo kan lo tam ve ta khawp mai, Delhi Auditorium lan pui khat hmur tham kan awm ve tawh a, A chhung a lut lem lo, Hulhliap vela tei mai mai an awm nual bawk. Zirna avanga awmte, Hna thawka awmte, Chhungkua a khawsa ve hrim hrimte kan ni nuaih a, Hetiang zat hi kalkhawm mah i la Chawlh nei ve thei lo zirlai leh Hnathawk engemaw zah an awm bakah, Nula leh tlangval Mizo zinga awm țha peihlo leh hetiang nikhua a tel ve ngailo, Mahse Mizo hming tichhe zawnga lar leh chiam țhin an awm nual bawk, Chung mite hmel chu a lang ve lemlo bawk. Dawhsan lamah chuan Delhi YMA hruaitute an țhu thap a, Central YMA President leh Home Minster bakah Miss Mizoram chu Delhi Țhalfavang Kut hmang turin an lo sawm ve chu a ni a, Kei engmah hrechiang mang lo a kal ve tawp ka ni bawk a, ka bangbo angreng viau.

Chawhma lamah Social Meeting neih a ni a, Delhi a awm Mizo hnahthlak hrang hrangte Inpumkhatna lam hawi programme hman a ni ber, Thusawitu te pawn chulam hawi chu an sawi tam ber. Msi pawh chu a tawp lamah thutawi an sawi ti ve a, Ka lo țang țeuh a, a tleirawl lai a kan lo kaihhruai ve tawh a nih avangin a khap sual ang tih ka hlo hlau viau. Mahse ka beisei loh ang daihin a che reuh a, Delhi Hindu College a zirchhuak a ni tawh thu leh Mizo nula tam tak Delhi a awm Mizo ti hmingchhe țhin te tam zawk chu an duh vang reng a awm an ni lo a, Bumna leh Chhan hrang hrang vanga an duh loh dana awm an nih thute, Mizo mipa te chu an zahawmna humhim saka, Diriamtu ni lo a, ngaihsaktu ni zawk turin a fuih a, Mizo hnam chu hnam zahawm taka awm turin Mizo mipa leh Hmeichhiaten mawhphurhna inchen tlang reng kan neih thute, Hmeichhia ten Mizo mipa zah thiam a, Mizo mipa ten Mizo hmeichhiate zahawmna vawnhim sak te chu kan tihtur a ni tih lamte a sawi a. Central Service ah Mizo Tlangval hming a lang ta lote ch Mizo nula ten an ngaimawh thute a sawi a. Ruih hlo avanga Mizo mipa boral tam tak ziate, Mizo nula ten Hnamdang pasal an neih zawh mai a hlauhawm thute, Chhungkaw dinpui tura 'Chhungte chawmhlawm' ringawt chu Mizo nula tam zawkin an ngaihsan tak loh ziate. Hmeichhia zawk in an chawm mipa In la vei tak tak leh an nupuite thawhchhuah hmanga Lirthei țha tak tak neite chu Mizo hnam ti thangtlawmtu a nih ziate chu tawifel tak leh thiam takin a sawi a. A hmelțhain amah a thianghlim bawk nen kut beng thawm pawh a țha ham ham hle. Kan Inhmuh tirh a a incheina angin a inchei tawh lo a, Mizo hnam thuam Puanchei leh Kawrchei in a inthuam ap mai bawk a, a nalhin a langsar reuh hle. A naupanlai hrechiangtu ka ni bawk a, ka chhuang ru ve reuh hle, kut pawh beng nasa pawl ka ni ve hial a ni.


Chawhnu lam Programme chu Țhalai nuam tihzawng a ni a, Lam leh zai lam in hun an hmang tawh a. Mizoram lam ațanga an chah thlak Zaithiam, lam thiam, Rapper te nen boruak nuam leh zalen tak mai hman a ni a. Mizo hnam lam hrang hrang hmangin intihhlimna a awm bawk a, Boruak a nuam hle. Duhtawk a ei leh in tur lam tur a awm reng bawk a, Mizo ziarang lanna lemziak leh thuamhnaw chi hrang hrang lei theiin a awm bawk a, a nuam luih luih hle, Kei pawh Lemziak vel ena ka teikual lai chuan Miss Mizoram nita kan nau Msi kan tih mai nen chuan kan inhmu leh ta hlawl mai a. Thla te lak dun a rawt a, ka phone number min dil bawk a, Midang bulah chuan min inhmelhriat tir a, Special taka an sawm bik tlemte nen Taj Hotel ah Zanriah an kilna tura tel ve turin min sawm a, ka hnial viau nangin "Dar 8 ah ka lo beisei ang che, hrilh turche ka ngah teh a nia" a tih tlat avangin kal ve turin ka intiam ta nge nge a.


Kan Function hmanna ațang hian ka in luahna hi Meter 200 vel baka hla a ni lo a, Chu nilo se tun hun ah hian ka tel velo maithei. Len vak leh huau huau lawmlo chi ka ni bawk nen kal vang vang na ngaihna ah chuan ka tel peih ka ring chiah lo. Mahse Zanriah an kilna tur hmun erawh Taxi emaw laka kal vang vangna tham a ni thung. Chung lemziak leh Thlalak nalh tak tak ka enkualna lamah chuan Veni thlalak ngei mai chu ka hmu ta hlawl mai, entu pawh a lo ngah ve nasa hle. Chu thlalakah chuan Veni chu Puanchei ațanga siam kawrfual khum khuh awrh a chhing a ha a, Hmun nuam deuh maiah hian a ding zan mai a, A inthuamna chu a inhmehin hmuh a nuam kher mai, a thlalak dang awm chuan ka mit a la zual hle mai. Ramhnuai ruam rai dap mai thing lian leh țawih luih mai awmna bula phul hmunah Luite kamah a ke chiah in a țhu a, Hmaram leh Vaikawrzeh a ha a, a mal mum nalh zet mai leh var haih mai a lang chiang hle, A malchungah chuan Hmanlai Pasalțha thangchhuah diar khim a bula Silai let bal chunga mu induh hmel taka an in en lai leh Venin a sam a chulsak heuh heuh lai niawm tak hi a ni thung. "Ka Lasi Lalnu i ni" ka tih fiamthu țhin kha ka hre chhuak zawk a, a hnuaiah chuan "Chawngtinlerhi leh Mizo Pasalțha" tih a inziak a, Ka en reng a, camera man in a thiam bakah a hmunhma a inmil bawk a, a awmangin a inhmeh kher mai, "An nalh a nia, Model kha Venkimi a nih kha, Rs 2500 man a nih kha" tiin mipakhat hian a rawn sawi a, ka nui hak a "nia an ni tak tak emaw tih tur a nia, tunge Camera man hi ni reng reng a" ka ti a "Keimah ka nia" nui var var chungin a ti a. Amah chu keimah ang rual vel tur hi a ni a, "Hetiang anga ngaihtuahna i nei hi a ropui khawp mai, i thlalak hi pho chhuak turin Delh i rawn pan vang vang a mi?" ka ti leh kher a. "Nilo e, Zirlai ka nia, Thlalak zirna School ah ka zir mek, He mi puala thlalak pho chhuak turin min ngen avangin Kar hmasa khan Mizoram ah ka haw vang vang alawm" a ti a.


"Ekhai, i kutchhuak vek a nih chuan a nalh hlawm hle mai, Model i thlang thiam bawk a" ka ti a, a nui a "Nia, Kei chuan hmelhriat ka la nei mang lo a, Mahse ka țhianpa Kan CM tupa Abrahama min hmuh sak a nia, a thlang thiam khawp mai, Venkimi hi a photogenic piah lamah a takah pawh zahpuiawm loh tak a ni" a ti a, "Idea i nei țha hrim hrim e" ka ti leh hram a "Hei hi ka idea a nia, hei tak hi chu amah Veni idea a nih hi, 'Miin Ka Lasi Lalnu min ti fiamțhin a, chutiang ang chuan thla la chhin ang u, amah pawn a lo hmuh ve chuan min hrechhuak ve zawk maithei a sin" a ti a, Ka țhianpa hi kan chei chawp a, Sumsuih khaw ram ah kan va la vang vang mawle" a ti a. A thusawi chuan ka beng a verh hle, mi chu ala hreve a nih dawn hi, Delhi ah ka awm tih pawh a hria a, he hunah hian ka telve ngei pawh a ring a ni ngei a niang... "I zuar tak tak maw?, Copy dang i siam țeuh leh si ange?" nui chung chuan ka ti a. "Țhianpa, keichu ka tum dan chuan ka thlalak hi Original Copy ka zuar a nih chuan hlawk duh vanga Copy tam tak siam ka tum dawnlo, uluk deuh zawrh tlak nia ka hriatte chu Copy 1 chiah ka siam a, Chu ka kutchhuak chu a hlut zual zawk nan ka ti țhin.. Hlauthawng duh suh, ka print zawh ah, Ka gallery ah Hetiang size nilo hian enlarge theih tawhloh turin ka dah tih bak chu ka nei tawh miahlo, hei chiah hi ka neih a ni mai" a ti a, ka nui a, "Ka lei ang e" ka ti a. Ka address te a la, ka phone number te a la bawk a, "Tihian ka la tar ang a, Naktuk ah I awmna ah ka rawn dah ang a, Pawisa chu ka account ah thlalak i dawn hnuah i rawn thun mai dawn nia" tiin a account number chu lehkhathemah min pe a, Thlalak ah chuan 'Hralh tawh' tih chu a tar ta a.


Msi'n kal tura min tih hunah chuan Taj Hotel lam pan chuan Auto in ka kal ta nal nal a, Minister leh Mi challang tak tak bula Zanriah kil tur ka nih avangin ka inchei nalh ve hle, coat nen thlap ka induang ve zar a, Auto pu hi class ka kal dawna ka hman fo leh ka khawilo len dawna ka hman fo a ni a, Kum 50 mi a ni a, Delhi khawtual mi hrim hrim, Delhi a piang leh Seilian a ni nghe nghe, A fapa hi Engineer niin Arunachal ah BRTF hnuaiah a thawk a, ani in zanrei tak tak thleng Auto khalhin a inhlawh țhin thung. Taj hotel kawtah chuan ka chhuk a, "Ka ngak dawn che em?" a ti a, "Ka rawn be leh mai ang che" ka ti a, ka hawn hun tur ka hriat mai loh avangin ka innghah tir duh lemlo. watchman chuan nui var var chungin kawng minlo hawn a, Reception counter ah chuan ka kal duhna hall chu ka sawi a, Waiter 1 chu min hruai tir ta nghal a,. Hall chhungah chuan mi 30 vel țha zet hi an lo awm a, Ding chungte, țhu chungte in an lo ti ti mar mar a, ka hmelhriat chu atam zawk chu an ni nghe nghe. Zaithiam, lam thiam etc Mizoram ațanga an sawmte pawh an lo awm nual bawk. Kil khat ah chuan Msi leh hmeichhe țhenkhat an lo bial ve laih a, Mipa tlem azawng an awm bawk a, Min hmuh rual chuan ka lam panin a rawn kal vat a, ka banah kuah in an awmna lam ah chuan min hruai phei a.


"Hei hi U Zorama a nih hi, Lehkhathiam thei leh Smart em em mai a nih hi Er.Chullova Engineer-in-Chief fapa anih hi" tiin midang lo awm ve te chu min hmelhriat tira, ka hmelhriat sa an awm nual bawk, an ti ti na karah chuan ka ding ve reng a, Sawma Delhi MZP president chuan ka zirlai velah min ti ti pui ta a, Kan awm hran deuh hnu chuan "Zoram, zep miah suh aw, Msi nen hian eng
nge in inkarah awm?" nui suk chung chuan a ti ta roh a, "Engmah a awmlo, Shillong ah Boarding School ah Hostel ah kan awm ho, Mizo kan ni a, kan in hmelhriat a ni ve tawp mai, Ka chhuahsan hnuah ka vawi 1 hmuh leh na" ka ti a, awihlo hmel fe chuan a ner nang nang a, "chu ngawt lo deuh chu a awm a niang, I rawn kal hma ațang khan a sawi deuh reng che a, lo ngaihven tur che in min ti sek bawk, he nula hi i chang a nih vaih chuan i vannei ngawt a, Si 10 a nih hi" a ti a, a nui huah huah a. "ka ti tak tak, engmah a awmlo, ințhian ka ni mai, A hrim hrim in Miss Mizoram nen inkawp tur khawpa luck ah min ngai a mi?" ka ti a, kan nui duh hak hak a.


"In nuih ava za ve, min rel a ni maw?" Msi chuan ka bana rawn dawm pah chuan a ti a, "Nia, hei Sawma nian 'In inngaihzawng' a ti tlat pek a" ka ti a, Sawma hmai sen ap ap ka hmuh rual chuan ka khap sual tih ka hrechhuak zawk a "Chutiang mai mai in sawi ka ringlo" nui chung chuan Msi chuan a ti a, "Engtik nge chaw kan ei dawn a?, Ka thlenna Hotela riah an phallo a nia" Msi chuan a ti leh vat a, "Ka va zawt a nge, i țhiante chuan an ngai che a ni maw?" Sawma chuan a ti a, a kal sawn nghal a "U Zoram khawi ah nge i chen a?" min ti a, ka awmna lai ka sawi a, "avan țha em em Jenny te awmna bul lawk a nih chu 'Army Pension Colony ah khan an awm a lawm, i piah lawk ah khan, an bula riak turin min ti tlat a, rawn leng ang che i hawna a hla chuanglo" a ti sauh sauh a. DYMA president chuan zanriah ei hma hunserh hman a duhthu a rawn sawi a, Home Minister in thutlem a sawi hnuah DYMA president chuan țawngțaina a hmang a, zanriah tuihnai tak chu kan ei ho ta a.


A țhiante bula a riah dawn avangin a țhiante chuan OLA an ko a, Mahse a chuang duhlo tlat a, Ka Auto hman ah chhuan kan 2 in kan chuang a, Ka auto pu chuan nula ka chuanpui ta chu mak a ti deuh a niang nidang anglo takin a ngawi tlat a, a hlim hmel vur vur viau bawk, Msi zawk chuan eng eng emaw a sawi a, a nui hak hak a, Delhi a awmlai a sawi a, "LLB ka zir zo a, Zir chhunzawm vak pawh ka tum tawh lo" a ti a, "Engtin nge Miss Mizoram lamah i luh nawlh theih a?" ka ti a, "Kan Branch YMA a lawm, min rawn sawm tlat a, YMA angin hma kan la ngailo hrim hrim, Mahse kan vengin Miss Mizoram ni thei kan kawl che a, nangmah chuan tel i tum kan ring si lo a, kan veng ti hmingțha tur talin tel tur chein kan rawn ngen che a ni" an ti tlat a, Min Sponsored nghe nghe bawk" tiin Miss Mizoram a a luh dan a sawi a, "an naupang hlawm, ka upa ber ve khanglang mawle" a ti a, a nui hak hak a. A bula awm chu a nuam viau, a hawiher a zang vah a, a inla tak lui ve der silo, Miss Mizoram nih chu a lo ngaihsan vak loh aiin a lo hlu in mite zirtirna engemaw takin a țangkai hle a tih thute a sawi a.


A țhiante hi 4 an ni a, a tirah chuan 6 an ni a, Msi leh midang zirzo ve tawh tho an haw vangin an inluah țhin chu an sawn a, tuna an awmna ah hian an awmta daih a lo ni a. Ka room luah ai chuan lian tak a ni, Choka leh Sitting room bakah Room dang 2 lai a awm a, Bathroom leh toilet awmna ve ve a ni lehnghal. Nula awmkhawm mah nise Zirlai vek an nih avangin an dawhkan leh khum velah thuamhnaw leh Zirlaibu a let remrum hlawm a. Kei chiah mipa ka awm lehnghal, an infiama an ri nak nak reng a, Eng eng emaw an hunkal tawhte an sawi a, Miss Mizoram Contest ah an țan ziate, an campaign nasat ziahte an sawi a, an nuih pui vak vak a, Individual award ah phei chuan an țang lutuk a, an college ah Vote tura an țhiante hnamdang an tur nasat ziate an sawi a, an nui tlawrh tlawrh a. Heng nula ho hi M.Com zirlaite, Doctor (Dentist) Zirlaite, MA zirlaite an ni hlawm a, an felin an polite viau bawk, Aizawl khua 1 a awm a, abak zawng chu Aizawl khaw pawn vek an ni thung. Zan dar 12 thleng rawk kan ti ti hnuah Gate an khar tawh riak ve mai rawh an ti ta tlat pek a, An vai chuan Room 1 ah an riak khawm a, kei chu room 1 ah min riah tir an tum thung.


Midang an mu vek tawh a, ka mutna tur room ah Msi nen kan awm dun a, eng eng emaw kan sawi a, kan ti ti malh malh lai chuan "u Zoram, Bial nu i nei em? i luck bawk a, i nei țha viau lo maw?" a rawn ti chhuak a, "Nei lo e, tuman min duhlo, boring min ti thei lutuk a" nui chungin ka ti a. Bial nu ka neih leh neih loh min zawh rual chuan ka mitthla ah Veni hmel a lang nghal zat a, a nui ver ver lai hmel lehnghal. "Ka awihlo, Mipa nangni ang te chuan an nei vek a lawm" a ti a, ka mutna tur khum ah chuan Khumlu a bang nghengin kan țhu dun a, Lukham a pawm țat a, "Tak tak a lawm, ka nei ve zuai a, Mahse tunah chuan ka awl leh tawh khawp mai, Nang i nei ngah viau lo maw?" ka ti a, a nui hawk hawk a "angah a ngah zawng chuan, ka neilo, mahse min buaipuitu ve deuh a awm a, ka duh derlo lehnghal" a ti a, "I awl a, ka awl bawk a, kan ni mai dawn em niang?" ka ti fiamthu a, min en vat a, "min duhloh kha, U Sawma bulah i sawi kha ka hre hman vek a lawm" a ti a. ka nui a, "Nangman min duhlo zawk ang" ka ti a, eng emaw sawi a tum zuai a, a țhiante an rawn dak a, "Lo phei tawh rawh, In inthlahlel lutuk, nangni te chu nakinah in awmdun reng dawn a lawm, kan ngai ve em em che a, MIss Mizoram i nih hnuah hian min hlamchhiah" nui chungin an rawn ti a, kan infiam bawrh bawrh a, mu turin an chhuak ta nghal a.

Msi khan tinge khatiang min zawh a? a țhiante khan engvanga khatianga rawn sawi nge an nih le? Veni nen ka khai khin a, Chhun lama Veni thlalak ka lei kha ka hrechhuak zawk a,.. Msi chu khawpui nula hmelțha leh piannalh ni mahse Veni lakah chuan a buk keima tehna ah chuan a zang zawk hle mai. Mahse Veni chu ka ban phak a ni tawh silo... Chutiang vel ngaihtuah chuan ka lo muhil zui ta daih a..


(Hun neih hi a har em a ni e, Min hrethiam zel mai teh u)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 8th, 2019, 8:37 pm

Chapter 9

IAS exam turin ka inbuatsaih a, Khawdang ka hawi meuh tawhlo, Ka exam pek vawi 1-na tur a ni a, Mizopa IAS lo ni tawhte ka rawn kual nasa a, Ka țhian Hnamdang IAS tling tawh te ka be kual bawk a, Inbuatsaih ve fe a ngai hmel hle, Mizoram ah Higher Teacher tur exam kan neih dawn pawn kan inbuatsaih ve a ni a, IAS meuh chu a lo hautak ngat ngat khawp mai, Engkim hi zira, chhiar a, hriat vek a ngai a ni ber mai, Kan hriatloh thil alo tam ngang mai bawk. Coaching class ka kal chuan 70% vel zet chuan min țanpui nasa hle bawk, Kan Zirtirtu te chuan course zo turin min ti viau nangin Course zo kher lo a, Exam pek ve hrim hrim a, ka tlinglo a nih chuan Course kal zui leh mai ka duh zawk a, Huaisen min ti viau nghe nghe. Chutianga ka inbuatsaih reng lai pawh chuan Veni hi a lang run reng mai a, Ka pa thusawi kha dikna chen a lo awm khawp mai, Veni kha ka chakna emaw ka ti viau nangin ka chakloh phahna a ni ve theihna lai a awm. Inpawh takin hun hmang dun in inbe reng i la chuan tuna ka inbuatsaih a 60% ze hi chu ka tih theih ka ringlo, Amah biakna leh kawmna in hun ka hmang ral hnem ngawt ang. Mahse ka ngaihtuah lo tawp chu a ni lo a, Nikhat ah vawi engemaw zat ka rilru leh suangtuahna mitthla a luah a, ka ngaihtuahna a la peng fo țhin tho mai. Mahse nidanga ka chin țhin Face book leh social network danga umzui a en zui ang erawh ka ti talo thung, chuti chung pawh chuan ka thinlungah hmun a luah vung reng tho mai. Msi lah khan a khat tawkin min rawn be fo a, Keiin awmtawk lekin ka lo chhang thung, a țawngkam leh min biak dan tam zawkah chuan 'riau' erawh a awm deuh nia hriatna ka nei țhin. Mahse Veni pawh tih tawh nak laia a ni leh zel lo khung chu ka tih tur a nilo chiang tih ka inhriat chian em avangin ka hawi san lui tlat a ni.


Beisei ai tak chuan ka Exam pawh ka chhang țha, Hun ka hmang zo țhak a, zawhna ka chhan tur chin ka chhang zo vek a, ka chhan danah endiktu duhthu a sam ang nge sam lo ang tih erawh ka hrethiam chiahlo. Essay ziah ah phei chuan ka tițha ve tawk viauin ka hria "India danpuia Sakhaw zalenna hi Palzut a ni em? Hei aia khawnga kalpui nge țha ang? Sakhaw 1 a dan hi thlak țha ang?" tih a ni a, Ka ngaihdan tlang tak sawiin Sakhawzalenna chu India ram ti ropui zualtu a nih thu kil tin dap kualin ka ziak chiam a ni. Kan exam zawh tlai chuan ka la tih ngai miahloh ti turin ka țhianpa Shillong lam ațanga ka hriat Diovolen Tang nen Bar ah kan țhu dun ve kak a, Beer kan dawm dun a, Kan hun hman boring tak nițhin chu zalen leh engthawl zetin kan hmang dun a, kan course kal chungchang emaw? Kan exam chung chang emaw tu mah mah in kan sawi chhuak lo, Music khawvel a kan ngainat zawng lam daih kan sawi dun a, țawng kan inchuh nasa ve nak nak hle.


"Vawiin i chhang țha bawk em?" Msi chuan a rawn ti puam țalh a, ka khumah ka mu a, khua a lum a vangin ka tlawrh hluam bawk a, Boxer len tawnzau chauh ha in fan ka inchhem tir vut vut a. Ka room luah hi a tirah chuan AC awm a ni ve ngei a,.Mahse a chhia a, a neitu te lamin repair leh lam an ngaihsak hauhlo, ka luah ațanga thla khat vel chhung bak AC hi kan hmang hmanlo. "Chhang țha ve deuh ang chu, min hrethiam la, ka zirlai lam chu sawi ka chak lo khawp mai, ka hne thawkhat rih" ka ti a, a nui hak hak a, "Ka hrethiam lutuk, inchiah hneh lutuk chuan luak a chhuak vek thei a lawm, Naktuk ah ka rawn chhuk leh dawn a" zangkhai deuh chuan a rawn ti a, "Enge in rawn tih dawn?" ka ti a, "Femina Miss India Qualified round shooting kan nei dawn a, Delhi ah kar khat kan cham ang a, Goa ah kan nei leh ang a, Kuala Lumpur ah Kan nei leh bawk ang" a rawn ti a, "wow va nuam dawn ve, chuan Final round engtik ah nge?" ka ti a, "Thla thar ni 20 khi a nia, englo.. Naktuk chu minlo hmuak ve la" inthlahrun hmel deuh hian a ti a, "Ekhai, keia hmuah i duh a thu a ni mai a lawm, I wardrobe ah enge i thlan a?" Ka ti a, Mizo nula ngat in min buaipui dawn mawle," a ti a, "Wow CM fanu Khan maw?" ka ti a, He nu mizo nula Indiaram pum huap pawha Designing lama hming lang, Femina Magazine ah pawh huang nei phak ve ngat kha a ni a, "Ni chiang e, ka hmu leh chak tawp che, i peih chuan ngei ngei aw" a ti a, "awle, dar engzat nge i flight?" ka ti a, "Dar 11" a ti a, ka chhut nauh nauh a, "Ka lo awm dawn nia," ka ti a,.. "Rose ka duh, Pink ngat" a ti a, a nui hak hak a, "awle, I hmel hliah vek khawp in aw" ka ti a.

Kan inbiak zawh hnuah chuan Msi leh Veni bawk chu ka haikhin leh a, Veni chu a la rit zawk viau, Msi chu ngaihzawng ang chiah in ka en thei lo, kan nau ang deuhin ka ngai a, mahse amah zawkin min en dan hi ka en ang ngawt chuan min enlo niin ka hria. Khumah bawk chungin Facebook ka khawih a, Veni wall ah ka lut a, Thlalak thar leh thu post tharlam a lo ngah kher mai, Ka enkual dan dan a, Thlalak nalh tak tak a awm țeuh a, Chung zingah chuan ka thlalak lei ang deuh mahse an awmdan dang daih thungte pawh a awm, comment tu pawh a ngah nasa mai. Chu lui kama thlalak pakhat ah chuan "The Mab" tiin ka comment zauh a, a bak engmah ka sawilo. Thil dang ka enkual zel a, A status update pakhat chuan ka mit a la in ka chhiar nawn ngun kher mai "I theihtawp chhuah la, i pa beiseina ti hlawhtling ngei bawk la, Tih buai i nih lohna kha vanneih pui ang che" tih a ni a. Kan exam țan dawn hnaih a mi a ni nghe nghe, Mahse exam ka pe dawn tih ka chhungte leh Bena bakin an hre der silo, engtia lo hre ve ngawt nge a nih ang? Facebook ah emaw hmun dangah pawh engmah chutiang ka sawilang eih bawk silo, Bena'n a hrilh ve a niang a? ka ti rilru a, Bena chu ka call zui nghal a.

"Engmah ka hrilh ka va hrelo ve,? kan inbe khat khawp mai, Zan rei tawh tak ah 'Ka lung a leng em mai' tih ringawt te hi min rawn thawn țhin a, 'dam rawhse, in inhmu leh țep tawh a lawm' tiin ka chhang ve țhin, Mahse chhan letna ka hmu leh ngai chuanglo" a ti a, "A phone number engtin nge i neih?" ka ti a, "Zampuii a lo zawt" a ti sam et a, "a number chu minlo thawn ve la?" ka ti a, "A phallo, Ka number hi tumah pe suh, U Zorama pawh" a ti tlat a" a ti a, ka nui a "Chutia min pek a phal loh miau chuan ka duh bik lo e" ka ti a. "Chutianga thutak khuk a khuk pui chi a ni lo, I pa in a biak dan kha min hrilh a, be ngamlo tur che pawh a ni ve tho mai" a ti a, " Nia, chu chu remchangah la in CM tupa nen an inkawp ta reng a lawm" ka ti ve ngat a, "Ka hrethiam biklo, Mahse a sawi fo danah che hian a theihnghilh biklo che chuan ka hria" a ti a.

"Malsawmdawngi kha i hria em?" ka ti a, "Miss Mizoram maw?" a ti vat a, a nui huk huk a, "Niang chu" tiin kan intawn leh tak dan ka hrilh a, "Ka en dan ang ngawt chuan min enlo tlatin ka hria, nge ka ngaihbel chu ka hre chiahlo" ka ti a, a nui hawk hawk a "Mawla, Hmeichhe duh chi i ni ka tih kha i awih em? I lerh hauhlo nangin hmeichhia hian an ngaihven teh che a nia aw" a ti a, ka nui ve mai a "Mahse Msi berkher chuan ka ringlo, u angin min en a, min ngamtlak ve pawh a ni maithei, engpawh nise Veni chu lo enthla ru deuh teh" ka ti zui hram a, a nui hak a "Enthlak a, i nep lutuk, Midang an tam a lawm, Msi number chu minlo pe ve teh" a ti a, kan inbiakna chu kan ti tawp zui ta nghal a. Karlo ah keipawh ka thil lemin min hneh deuh a niang ka lo muhil ve ta daih a.


"I chau hmel, i hmel a diklo, Chaw i ei tlem a i mu tlem a mi?" Msi chuan amah lo hmuaktu motor chhunga kan chuan dun lai chuan a ti a, BMW hnungah kan țhu dun a, a hmaah Mipa pakhat leh driver an țhu a, Mipa chu Femina Miss India a telna tura a manager tur a ni nghe nghe. Kan chuanna car a len tehlul nen min si talh in a țhu a, ka kut a hum țang bawk a, Kan hmaa chuangte ka hmaizah deuh viau, chulo ah Miss India Contest tum a ni a, a chet dan chu an mit a kham ka hlau hle. "Nia, ka exam tur inbuatsaih lai khan ka bei ngawrh ve deuh bawk a ni" ka ti a. "Eitur țha i ei a, i mut tam a ngai a nih kha, Pu Hruai Lunch kan eina tur chu khawi ah maw?" tiin a manager chu a be zui nghal zat a, "Pu Romalsawma Flat ah a ni awm e" a ti a, "U Zorama lo kal ve ang che aw, ka sawi sa vek tawh" a ti leh reuh a, "Ekhai a, ka telvena chi a ni nang" ka ti a, "Chi lohna a awm lo, DMZP leh Mizo Welfare lam in min dawng sawng dawn mai chauh a lawm" Pu Hruaia chuan a ti ve nghal zat a "Nia, inthlahrung reng reng suh" a ti a. "Kan nula berin i telloh a hlau em mai, kan hnial ngam reng renglo" nui chung chuan Pu Hruaia chuan a rawn ti ve vat a, kan nui dar dar a, Ka inthiamlo in ka inthlahrung takzet a ni.


Lunch ei zawh ah, a thlenna tur Hotel ah ka thlah leh thlap a, Pu Hruaia nen Oberoi Hotel ah an thleng a, Ka awm ve vang nge ka hrelo Pu Hruaia chuan a ngaihsak lo riau a hriatna ka neia, a room a a indah fel laiin keiin Lobby ah ka lo nghak a, Rei vaklo ah Casual deuha incheiin a rawn chhuak leh vat a, a inbual hman hram niin ka hria, "Hawh leng ang, vawiin bak hi hun thawl ka nei dawn miahlo a nia" a rawn ti a. A inchei dan chu a uchuaklo hle, Hmeichhe dang chu nise nalh ka ti lutuk chuan ka en tlawk tlawk maithei. Mahse kan Msi kha a ni miau a, a hmelțhatna nen a inmil em a, cheichawp a nilo bawk a, chuti teh chiamin ka mit a ti nghal phaklo a ni ber mai. "I In luah ah kal phawt i la, ni nem deuh ah kan leng dawn nia,.. Delhi fan kual leh ka chak tawh a nia" a ti zui a, Pawnah kan inzui chhuak a, Motor bawk khan a lo la nghak a, "Hei hi enge a awmzia?" ka ti a, "Ka awm chhunga ka duh duh a ka hman tura min pek a nih hi, Miss India Organiser lam mi leh sa a nih hi" a ti mai a. Ka awmna lai ka hrilh a, chumi lam pan chuan min tlanpui ta vang vang a.


"Hei chu Venkimi a nih hi, a chhelo teh a nia" tiin banga ka thlalak tar en dauh dauh chung chuan a ti a, "I hmelhriat a mi?" ka ti a, "Hria e, Vawi 3 vel chu Shooting kan nei ho tawh a lawm, Tuna min chei tur fapa nen hian an inzui nasa mai, he nula vang hian Abrahama pui khian State dangah zirna a kal duhloh phah mawle" nui hak hak chung chuan a ti a, "Chu i hrechiang viau a ni maw? Nula lam ai mah chuan a hmun hma leh an tihdan phung vel khan ka mit a la, he Photographer hi a la pui ngawt ang" ka ti a, a nui hak a, "Nula hi emawni i lei chhan ka ti hman a, ka lo thik hman viau a sin" a ti then a, ka en vat a, min ngaihsak hmello deuh chuan thil dang en in a lo inher leh daih tawh a. "Khawnge kan kal ang?" ka ti a, "ka hrelo, Kal kual țeuh ang, Zan dar 8 thleng hun ka nei a lawm" a ti a, "Khawnge kan kal ang aw??" ka ti a, ka bulah chuan a rawn țhu a "i peih vak loh pawn hetah awm mai mai pawh ka pawi tilo a nia, miss nih hi a ninawm teh mai a nia, engkimah fimkhur a ngai bawk si, Ka term lah hi a zo har hmel bawk si" a ti a, min si talh chuan a țhu a.


"U Zoram, Nizan ah U Bena'n min rawn bia a, In inbe leh tawh em?" a ti a, a rimtui chek reuh a, min hlauh loh dan chu engemaw tak a awm a ni. "Be miahlo, enge?" ka ti a, a nui a, "In inbiak loh chuan a ngailo, kan rel che a" a ti a, a chd set set a, ka malchungah chuan a mu a, Hotel changkang deuh AC hnuaia boring deuha Pa tling pui pui leh Nu tling pui pui sumdawnna leh eng eng emaw sawi sek ho bula awm kha ka ning takzet a nia.. a bik takin i bula awm phei hi chu a nuam bik e" a ti a. Mipa zeilo tak nihsa bakah ngaihzawn en a ka en hauhloh a ni bawk si a, kan awmdan chuan min ti khawr țut a, "Ka bula awm hi boring an ti țhin teh a nia aw, Bena pawn Ninawm a ti țhin khawp mai" ka ti a, a nui hak hak a "kei chu ka tilo, Phi sek mai bula awm a, an ti ti ngaihthlak ai chuan cool ruih mai bula awm a, țawng bawrh bawrh hi nuam ka ti zawk, I zia hi a la ngai reng" a ti a. "U Dini, U Meloi te ho khan an va star thei tak che, Vai ho pawh khan an star țhin tho che, Anual Sports kan neih a, Hotel California in sak țum phei kha chuan an sawi nasa che a sin" a ti a, Tunhma kum liam țeuh tawh Shillong kan awmlai a sawi chhuak a, ka nui hak a "An tive mai mai a nih chu, Bena kha a lawm luck ber" ka ti a "fiamthu miah loin U Bena kha chu a harh a, mi ngaihsak a, hmeichhie mi bawk a ngaihzawng a nei thei em em a, Mahse a ruk tak chuan an ei vak hlawm lo. Nang kha chu kan star ru vek che" a ti a.


"Kan i tih, naupang in nia engmah i la hrethiam lo" ka ti a, a nui hawk hawk a "Hrethiam e, hei naupan lai star ang kha.. Nangni mipa pawn nula star in neih ve țhin tho kha" a ti a, "Kei chu min star ve lo ang, ka hmai te kha a bawl nasa thei bawk si, ka cher bawk si" ka ti a, "awi teuhlo, Girls hostel ah chuan i luck ber, vai ho pawh in an star vek che"a ti a, Kan School chung chang kan sawi chho zel a, kan nui dun hawk hawk a, Mipa tamtak nise kan awmdan leh awmna hmun chu an duhthusam a ni ngei ang. Mahse kei chu ka ni velo ka inveng dui a, Engmah hrechiang mang lovin Veni lakah ka rinawm lo ang tih mawlh ka hlau a, Pawisak neilo deuh ang chi ka ni der silo,. Khua a dai a, boruak a nuam țan a, Khawlai boruak pawh a nuam tawk vel tawh awm e tih ah, Bazar vel a lengkual mai mai turin kan chhuak ta a, Disney Land ah te kan leng a, Kan hlim dunin thla kan la nasa dun hle bawk. Chutiang chuan hlim hmel deuhin leng vak vel mah i la, ka rilru chhungril ah erawh Veni leh Abrahama chiah a awm thung. Hmeichhia leh mipa inzui ral ral ka hmuh chuan "Tunah hian Veni Abrahama chuan enge an tih dun ang le?" tih ka lo ngaithuah hman ziah bawk a, Ka rilru ah an khatliam a ni ber. Am taka hun kan hman dun lai chuan Msi hun neih a zo ta der a, a thlenna Hotel kawt ațangin a mortor hman chuan ka in luahna thleng min va dah tir leh thlap a, Kuala Lumpur a kal ve turin min sawm tluk tluk a.


"Țha maw?" tih ringawt chhanna ka dawng a, a wall picture ka comment min chhan letna a ni a, Minute 35 vel liam tawha a rawn chhanna a ni nghe nghe, a mah lah chu a la hring va va bawk a, Ka like a "ka țha a lawm" ka ti a, inbox lamah min rawn chhang nghal zat a, Thlalak min rawn thawn a, Vawiin chhun a Airport kawta Msi nen hnai set sawt a kan indinchilh lai leh a trolly ka lak sak a, a kut kai chunga a motor kan pan dun tur lai thlalak hi a lo ni a, "In inhmeh khawp mai" tih zawng hi a rawn telh bawk a. He thla hi tunge lo la hman le?? a van buaithlak țhin tak, "Khawi hmun a post nge i neih a?" ka ti vat a, "Miss India FB page a mi" tiin min rawn chhang vat a, Page chu ka search ve vat a. Zinga airport ațanga a thlenna tur hotela kan lut chiah laite, an rawn thlen hlima ka lo hmuak lai thlalak, kan indin chilh laite chu an lo tar chei chuai a, Mahse caption ah chuan "Femina Miss India a NE aiawh tur Miss Malsawmdawngi a lo thleng e" tih chauh a inziak thung. Hnam dang leh Mizo țhenkhat commeng pawh sang chuang zet a lo awm hman tawh a.


"Ka lawmpui khawp mai che, a chhelo khawp mai" a rawn ti a, "Engmah a awmlo" tih zawng ka chhang a, Ka zungbun pek dawhkana a dah lai thlalak min rawn thawn a, "U Bena ka lo pe dawn nia" a ti a, a thim nghal hmak a, "I thu thu le" ka ti zui ve ngat a. Anihna tak ah chuan Kei aiin midang a kawp hmasa zawk a, Mi zawng zawngin an hria ang chu, Kei pawn ka hmu fo a lawm, Mahse ka rilru na viau mahse ințhen hlen tur duh khawpin ka awm ngailo a. Engmah hre chiang hauh si lo in ka thlalak 2/1 vang maia ințhen hmak a duhna chu ka lawm em em biklo a ni. Abrahama a duh zawk a, a rualpui leh a tuizawng tuipui phak a ni a, kei aiin a duh si a, ka lakah thutiam a lo nei ve zauh hman tawh bawk si nen, zahzel ah ka chet vena ni a lang chu a hmang ta mai ah ka ngai hmak bawk. Ka thin a ur ve hle, ka rilru chhungril tak ațangin a na ngat ngat mai a ni ber. A lehlinga min puha min țhen a duh zaih mai chu ka lawmlo takzet zawk a ni.

Msi Delhi cham chhung chuan kan in hmu zauh zauh a, Result nghak a Delhi awm reng ringawt chu nuam ka ti chiah biklo, Mahse Mizoram lama hawn ka phur bawk silo, ka hun hman dan chu ka ning ve takzet a ni. Goa an kal dawnin min sawm a, ka hnial zel a, Kuala Lumpura an kalna turah ka hnar leh bawk a, Achhan pawh Media lam an nghal si a, beisei loh deuhin Msi nen kan inkarah eng emaw an ti than chiam ka hlauh vang a ni deuh ber zawk. Goa ațanga an rawn haw hnuah vawi 2 Zanriah kan kil dun a, Kuala Lampur an kal dawn zanah zanriah kan ei leh a, Cinema kan en dun a, kan nui hnem viau.. Mipa tam zawkin an tawrh zawhloh tur Fawh chakawm tak tak leh ka fawh beisei deuhte pawn ka bulah chuan awm țhin mahse ka thinlung takin Veni laka rinawmloh ka duhlo takzet a ni, Ka lakah a rinawmlo tih finfiahna ka la nei miah lo a, chuvang chuan han rinawm loh san ka la duh bik lo a ni. Ka rinawm hmasa lo ang tiin ka intiam tawh a, amah a rinawmlo tih ka finfiah a nih hma chu ka ti thei biklo a ni. Msi te Kuala Lampur a an zin dawn avangin kei pawh ka țhianpa Sanjay-a sawmna chhangin Mumbai lamah Result nghak tura chhuk ka tum ve ta a. Ka nu in min rawn bia a, Result chhuah hma haw turin min rawn ti nangin Mizoram lama haw ka phur thlawt lo, Veni nen kan boruak țha viau nise chuan haw pawh ka phur ngei ang, Mahse kan boruak a ziaawm em em silo, chu lo ah ka hlauhthawn em em Veni chu mipa dang nen an lo in kungkaih tak tak a ni tih ka han hre vel ang a, ka na dawn lutukin ka hria a, chuvang chuan rial deuh vang vang a, hawn chhoh chauh ka tum a, ka fail a nih phei chuan coaching class chhunzawm leh turin ka awm tlang leh nghal duh ta zawk a ni.

******************%%%%%**************


Sanjay hi Mumbai Rajasthan lam mi niin Mumbai ah Firm lian ve tak pakhat a nei a, Maha Tax Service neitupa a ni a, B.Com a zawh rual in Insurance lam company ah thawkin bul a țana, tunah chuan ama pualin firm a din der tawh a, GST lam a buaipui avangin a hlawk ve viau a, Hnathawk pawh mi 30 rual zet a nei ve der tawh. Delhi ah College kan kal ho a, kan inkawm nasa hle țhin, Music tui ve tak a nih avangin College ah Band kan din a, kan bei ve nasa țhin viau, zaithiam tak a ni nghe nghe bawk, a tum ber chu Studio ropui tak neih kha a ni țhin a, mahse a tumloh lam daih a tuipui ta ani ber mai. Fort hmunah Flat lian leh nuam zet mai a nei tawh a, Nupui a la neilo nangin Jeetu nen an cheng dun a, inneihna chiah awmlo mahse an nupa chet a ni deuh ber mai, Jeetu hi Doctor a ni thung a, Sanjay pian leh hmel nen Jeetu hi a inhmeh thlawtlo. Jeetu hi nu hmelchhelo tak tia sawi tur a ni miahlo, nu te lam bial deuh hman mai a ni a, Maharashtra thingtlang lam chhuak a ni a, Mizo chu nise a zo țengțawng ve hle kan tih tur ang hi a ni. Sanjay lah inla changkang leh smart zet mai a ni thung a, engtia Jeetu hi chenpui duh nge a nih ka hrethiam theilo.

Ka thlen zan pawn an Driver in Airport ah minlo hmuak a, Ka thlen hnu rei vaklo ah Jeetu chuan a clinic khar meuhin min dawngsawng turin a rawn haw a, Colaba lamah te min tei chhuahpui a, Zan dar 7 ah Sanjay a rawn haw a, induh hmel takin an inlawm a, "Ka Lalsi Lalnu a nih hi!" nui vur vur chungin a la ti zui lehnghal a, Nu hmelchhe tak leh zeilo tak chu a ni bik chuanglo, a sum leh pai a duh a niang han ti dawn i la, Sanjay a flat ah Jeetu hi a cheng ve zawk a ni lawi a, Tin, Sanjay sum lakluh hi Jeetu lakluh aiin a la tam daih zui bawk si, eng aiah nge hetia a chenpui chhan hi ka hrethiam theilo hrim hrim a ni..

Ni 3 ka cham tawh nitin ka duh duh a ka hman turin BMW car pakhat an dah tawp a, Ka duh duhna ah ka tlankual ve mai țhin, Camera ka keng a, Mumbai khawpui ka chuan kuala vel a, Thane lamah te Juhu Beach lamah te ka thenkual vel a. Ka cham ațanga nithum na ah chuan History a kan zir ve țhin leh a thawnthu kan lo hriat ve em em țhin Gate Way of India lamah kal ka tum ta a, Ka Camera chu ka keng chhuak leh a, Driver nen chuan ho lam taka incheiin kan chhuak dun a, an driver hi Assam tlangval Kum 23 leka upa a ni a, ahming tak hi sei zet mai ani a, Govind tiin an ko mai țhin, Pa lian lemlo ha var em em mai dum thal mai a ni thung a, engkim a hria emaw tih turin thil reng reng hi a sawi ve thei viau zel. India tlangval tam zawkin an buaipui Cricket aiin Football a tuipui zawk a, Mizo footballer pawh hriat a nei ve nual a, an chanchin hi kan lenchhuah hian kan sawi ngun malh malh viau, a bik takin NE United Player Roberta chanchin hi a sawi nasa țhin hle. Aizawl FC fans ruhkawl a ni bawk a, Aizawl FC chanchin min zawt nasa em em a, Mizoram a zin a MPL en a chak thu a sawi uar viau bawk.


Dar 3 a ri tawh a, Gate Way of India ah thla kan la a, Photographer chuan camera lianpui mai an camera man aia to mah kan keng tih hre reng chungin "Thla lak in duh em? hei en teh heng hi ka kutchhuak a nih hi, I duh dan dan in kan hmeh sak thei ang che, i duh leh duhloh a ni mai, Kan print nghal thei" tiin Kamis var leh kekawr dum ha in backpack ak in min umzui dat dat hlawm a,. Govind chuan a camera lawk zet mai lek chhuah pah chuan "Unaupa hei nang aiin ka lek lian zawk, I camera kha engzat man nge? hei hi chu Nuaih chuang man a nih hi" an ti vel a, Nuam a ti ham ham viau. Hei hi ka hriat lawk vanga Camera awrh tir kha ka ni reng a, hmeh erawh a hmet thiamlo ngang mai, Nula thla ka lak tir te chu an lu a cut loh leh an bula mi an lang tam zawk mah țhin.h Gate Way of India bulah chuan ka țhu a, Govind chu camera kengin a kal kual a, a duh duh thla a lak sak vel a, kei erawh ka țhutna ngaiah țhu in Phone ka bih ngar ngar a, Gate Way of India chanchin chu Ka bih kual vel a.

Khual zin an tamin School uniform nena kal dal dal an zirtirtute niawm takin an hruai dam dam hmuh tur an awm zut bawk a. Tin, Sap nula khualzin tih hriat tak in ak bawr luk mai mahni in ringtawk taka kal vel hah hah te pawh hmuh tur an awm zut bawk, Mizo niawm tak tak pawh ka hmu leh nawlh țhin. Kan piah lawka Taj Hotel ropui zet mai ding luah lam chu ka thlir vauh vauh a, Taj Hotel in beih a tawh dante, beih a tawh hnuah Security an tih khawng tak em vanga Gate Way Of India main gate a checking an uluk tak ziate chu ka ngaihtuah neuh neuh a, Vai nula mawlh chuan ka nuih an ti za țhin, "Mizo nula ka hmu a, thla ka lak sak a" tiin ka bula rawn țhut pah chuan Govind chuan a rawn ti a, "Khawi maw? kan hmel pu ang zawng zawng hi Mizo an nilo a nia aw, Nanga, Manipuri Khasi ho nen kan in ang a nia" nui chung chuan ka ti a, "Sab, Mizo chu ka hria a lawm, Uisa an ei țhin" a ti deuh kher a, ka nuih a "Vai sa pawh kan ei țhin" ka ti a, "enge vai? a tui em?" a ti sauh sauh a, a camera chu ka lak sak a, a thlalak tawh sa chu ka en kual sak vel a, Mizo tak tak an ni hlawm, Țhian rual khat emaw Zirlai tripping rawn nei emaw an ni maithei, An hmet nasa hle an hmel han hriat awm ka neilo. Chutia ka en kualna ah chuan ka rin loh daih ka hmu nawlh mai, Veni leh Hmeichhe 3 bulah Govind chu nui sawng chunga dinglai thla hi a ni a, "Hei hi khawiah nge an awm?" ka ti vat a, "Khawi maw? ka hre nang, an chhuak tawh in ka hria" a ti a, ka hawi kual nasa nghal hle, chutah Marine lawng lama kal turin Mizo rual khat lawnga chuang lut mek lai chu ka va hmu a, "Saw kal ang" ka ti a, kan tlan ti tih nghal a,..Kan va thleng a, Lawng chu a kal țan mek a, amah Veni ngei mai chu ka zuk hmu a, min rawm hmu ve chiah a, mak ti hmel deuhin a rawn en a, a bula ding hmeichhe pakhat chu a kuai a, ka lam a rawn hawi a.. An nui var var a, an ban an rawn vai lauh lauh a.. ka thaw hluam hluam a, Chutah a thlalak ka hmuh fo țhin Abrahama ngei mai chu a bulah rawn ding ve in min rawn en ve a, phur hmel deuh chuan ban a rawn vai a "Red Shield ah kan thleng" a rawn ti vak a, Veni leh a țhiannu chu za deuh hian an nui hawk hawk a.


Red Shield kawt ah kan ding a, an rawn let hun kan lo nghak ngat ngat a, Khua a thim chhulh tawh a, Govind țhat ve na em em chu tupawh hi nel takin a be bawrh bawrh thei zel hi a ni. Red Shield reception counter țhu pa chu a ti ti pui siam siam a, Sanjay chu an lo hre phian mai lehnghal an tax velah Sanjay a firm chu an dawr țhin a lo ni a. Chuvangin keini pawh chu min ti țha viau nghe nghe. He Red Shield Guest House hi Salvation Army enkawl a nia, Guest House ah hian Mizo kan thleng nasa hle, Zirlai Trip nei reng reng pawh he hmun hi an pan tlangpui țhin. Dome lian ve tak tak a awm nual avangin a remchang phian. Sap vakvai an tih mai Mingo zin vak Hotel changkang a thleng lo pawn an pan ve chawk bawk. A building chu a hlui tawh viau nangin a sak a țha tih hriat takin a nghetin a tlo hmel tlettlawt hle.. Khua a thim chiang tawh Mizo mipa 3 hi an rawn lang nawlh a, min hmu chu an ding deuh chat a "Khawi College nge in nih?" ka lo ti nghal tawng a, ka nui suk bawk a. "PUC, hetah i thleng ve ami?" min ti a, "Thleng lo e, Kan nau a lokal ve a, kan rawn ngaihven" ka ti a, "anih chu, tunge?" an ti a, Midang an rawn lang ve țak țak a, an rawn ri nak nak bawk a, Min hmu chu an phawk hra a, a țhen chu an kal tlang nghal mai zel thung a "Venkim" ka ti a, "Veni maw? Duati khawnge i țhiannu?" Lawnga Veni bula ding rawn lut ve chiah chu an lo zawt nghal chat a. Chu nula Duati an tih chuan min hmu chu a nui var var a, "In lo awmna a rei tawh em? Toothbrush a ti bo a an lei kawi lawk an rawn thleng mai ang" ka bula țhut pah chuan a ti a. "a nuam inti hmel hle mai" ka ti a chutih lai tak chuan Veni leh Abrahama chu an rawn lut ve ta chiah a.


"Eh.. In lo kal a ni maw?" Veni chuan ban chalh chuan a ti a, "Nia, tumloh takin ka hmu thut che u a, ka lo nghak ve tawp che u a nih hi" ka ti a. "Ab, hei hi U Zorama a nih hi, Hei hi Aba, hei hi Duati" tiin a țhiante chu min inhmelhriat tir a, "Sab, Room ah inkawm rawh u, nangni chu kan phal sak ang che u" Counter nghak pa chuan a rawn ti a, lawmthu kan hrilh hnu chuan room lama lut turin step ah chuan kan kal chho ta nghal a. " I hmel ka hmu thut kha mak ka ti lutuk a, Aba lah khan engmah hre hleilo khan kan thlenna kha a rawn hrilh tawp che a, kan nui nasa mai, i van hah hmel em em, i mit a tla deuh a lawm" Veni chuan stepa kan kal lai chuan a sawi a, CM tupa meuh pawh changkang takin a awm thei biklo a ni e, a țawng zat zat renga, "Hepa hian thla alakpui na che u kha ka hmu a, Kan rawn zawng nghal che u a, kan rawn nang hmanlo țhelh che u a ni" ka ti a....An dome ah chuan Kan kal a, an mahni hruaitu an lecture Miss Melo an tih mai chu min hmelhriat tir a, "Kan naute an nia, Helai thleng thlenga rawn kal chu Zanriah rawn ei se ka ti deuh a, an țhian dun hian ka rawn lam ve tawp mai a sin" ka ti nghal tawng a. Veni chu ka va en a, a lo ner nak a,.


"Ekhai, an va vannei bik ve, Mahse rawn hawng harlo se, Kan thlenna te hi an in la strick ve khawp a, Gate an khar hma chuan in rawn thleng em ang chu maw?" an miss chuan a ti a, "Thleng hman ang, an ni lam chu vengthawn an ngailo, tax velah kan indawr țhin a, kan inhre sa a lawm" tiin dawt var ka sawi a. Ka pa hrelo hi Aizawl khawpui ah chuan an awmlo tlem khawp ang, hawiharh chin leh chinchang hre chin chuan P&E Engineer-In-Chief chu an hre deuh vek ang. Chuvangin min ring ngam ve hrim hrim bawk a, "Insiam ula, inthlakna tur keng ula, Sawtah in inbual daih dawn nia" ka ti a, Min hnial na hman awm tawh heklo, an in nuiha an insiam nghal sawk sawk a, "Counter ah kan lo nghal ang che u" ka ti a, an miss chu lawmthu ka hrilh a, kan chhuak zui ta nghal a "Kha kha Zoramthanga kha maw?" avan chhe tawh, a cher bawk si" an miss in a tih ri chu ka hre hman hram a.


Sanjay leh Jeetu ka biak sa avangin Sanjay pawh a lo haw hma niin Fort kan thlen chuan In ah casual dress nen a lo awm vang tawh a, Jeetu chu choka lamah eitur siam in a buai thunga, Govind erawh a duty a zawh tawh avangin a haw zui nghal a. "Miss Beni leh Miss Duti (Miss Veni leh Miss Duati a tih ve dan) kan lo lawm takzet a che u, in in angah ngai ang che u, lo țhu rawh u, Jeetu Mr Cool an rawn thleng e" Sanjay chuan a ti chul a, an inchibai nak nak a..engmaw chen kan rik hlut hnuah ka room ah ka hruai lut ve ve a, Bathroom ka khawhhmuh a, "In tifai ula in rawn chhuk ve leh mai dawn nia" ka ti a, ka chhuahsan zui nghal a. "Zoram hmeichhe hmelțha tak a nih kha, Veni kha i bial nu maw?" nu vur vur chung chuan Sanjay chuan a lo ti a, "Engtin nge i hriat?" ka ti a, "In eye contact kha ka hmuh hmaih hlei nem, a țha ang, a rilru pawh a țha ang" a ti nghal zung zung a,. kan nui a, kan chanchin, kan intawn dan, a pa nen chetsual kan tawh dante engkim ka hrilh a. Ka beisei loh deuha kan Mumbai ah daih kan inhmu chu mak ka tih thu ka hrilh a, "Hlim deuh in hun in hmang dawn nia, Naktuk Delhi chhoh i tum tawh bawk si" a ti a...


Kan 5 chuan kan ti ti bawrh bawrh a, Zanriah tuihnai tak an awmpui nu leh Jeetu siam chu kan kil ho a, Engmah thudang kan sawi lo kan nui ho a, kan college kal lai vel chanchin a sawi a, College week a kan perform ve țhin dante a sawi a, album en tir a tum bawk a, kan nui dar dar reng a. Tlai leh puar deuhin zanriah kan kil ho hnuah țhut khawmna pindan ah Desert kan ei ho leh a, Sanjay a phur bawk a, Album a phawrh a, thlalak ka neih ve reng reng loh a lo kawl nual a, kan en tlang a, "Duat, Veni hi ti ti pui ka duh a, minlo nghak ta che?" ka ti a, "e.. sawi tur a ngah ngawt ang, Msi chan chin tih loh chu in sawi dun vek dawn nia" nui chungin a ti a, Sanjay leh Jeetu bulah ti ti kan duh thu ka hrilh a, ka room ah kan lut ta a.

Kan lai leh țut tawh a, Ka room veranda ah kan ding dun a, kan hnuai lama Mumbai khawpui kawngpui zau zet mai a, Motor chak tak tak tlan de sup sup chu kan thlir dun ren rawn phawt a. Sanjaya flat awmna building hi Chhawng 11 zet a ni a, a chungber ah awm a ni a. a flat chhung ah hian a la chhawng leh cheu a, Choka, țhutkhawmna leh a Studio awmna chu a hnuai ah awmin Leihlawn kual zal raih maiin Room awmna a pawh chho a, Corridor a awm a, Vei lam ah ka room leh Mikhual dang room a awm a, Ding lam ah Sanjay te nupa room leh a library room a awm thung. Veranda a nei ve ve a, Keiin chhuah lam ka chang a, an niin tlak lam an chang thung. Ka awmna room pawh hi chhangchhe room tiat zet a ni a, khum lian țha hemhawm tak mai leh Sofa țhutthleng single leh double a awm a, Refrigerator single lian vaklo a awm bawk, Toilet leh Bathroom hran ve ve a awm bawk. Keiin kawngpui lam ka thlir a, a ni room lam hawiin a ding a, a phone a sik neuh neuh a, enge ka sawi ang aw ka tih rilruk lai chuan amah zawk chu a țawng hmasa ta zawk a.

"I chhang țha bawk maw?" a rawn ti a, "Chhang țha ve chuan ka hria, Engtik ah nge in rawn chhuk a?" ka ti leh pah nghal a, "Nimin khan, Naktuk zan ah Goa kan pan leh ang" a ti a, "A nuam bawk ang maw?" ka ti a, a nui hak a "nuam ve tho mai, mahse a lum em a ni" a ti a. "A season vaklo a lawm, January leh February thla vel ah in kal lo a, Chutiang hunah chuan Mumbai hi a pangngai ve deuh, Mahse lum tak tho a ni" ka ti a.. A sam sukna sampoo rim nam chak chuan ka lung a ti leng hle mai. "Nia, kan hun neih chhun a ni ve bawk sia, Miss Melo-i nen khan in inhre sa em ni?" a ti a, "Hre lo e... ka ngai țhin khawp mai che" ka ti nghal zat a, a nui hak a "Msi i ngai zawk lo maw? an haw tawh nge an la ti dawn chauh" a ti a, ka din chilh sauh sauh a, "Engmah chutiang sawi suh, Nangmah lo hi tumah duh ka neilo" ka ti bung nghut a.

"Kei pawn, Mahse nuam i tih hmel" a ti leh hram a, a darah ka dawm a, min rawn chhoh en ha a, "Engtik lai mahin i bula ka awmloh chuan nuam ka ti ngailo, nang chuan min be duh lo a, Phone tibo angin i sawi a, Min biak i duhloh vangin, Chuan Kei zeilo leh boring lutuk bula awm i ning a, zei leh hausa em em CM tupa nibawk nen In inkawp ta zawk a ni lawm ni?" ka ti ve ta fak a. Engmah a sawilo a mittui a tling pam a, khap zeuh se a per chhak ang, chu a mitmeng thip ram mai phena rilru na tih hriat zet mai chu ka hmuh hmaihloh nasa mai, a hmui sen vap ham chu ka kun hniam a ka fawp ta vang vang a. Min hnar biklo ka inpawm a kan inkeih mawlh mawlh a, kan chawl dat a "Engmah i hrelo" a ti țiau a, "Chutiang sawi suh" ka ti a, ka pawm nawlh a, room chhungah ka pawm lut a, khum fai tak leh mut chakawm hliah hliah ah chuan ka mut a, ka fawp pah reng bawk a, ka mipatna chhuak chu ka do zo lo, ka duhthawh malh malh hle, min hnial lo, min dal heklo, a thaw halh halh a, a thuam leh ka thuam ka hlip kawlh vek a, "Engtin nge ka tih dawn, ka laklawh tawh" ka ti sap a, engmah a sawilo a mittui a hnam sak a... Ka lainat nge ka hrethiamlo mahse ka kal laklawh tawh bawk si, Engkim chu a pawi zo ta nge ka hrelo, a țha zawk tih pawh. Mahse a nih tur ang kan ni zo vek tawh si.


A phone a ri det a, "hawn a hun, Duati Miss call" a ti a, rizai a hlim a chhuata a thuamhnaw tla chu chhar in bathroom ah a lut a, a va nalhin a va kham awmloh tehlul em. Insiam peih apin a rawn chhuak a, ka lo inha zo ve chiah a, Ka kuah a, lungchim em em in kan infawp leh ngar ngar a, room kawngka a rawn ri karh karh a, Kan hawng a Duati chu a lo ding reng a, "Miss in a rawn phone a" a ti a.. "Kan va thlah ang che u" ka ti a, Sanjay te nupa nen Motor chuan Colaba lam pan chuan kan thlan leh ta nal nal a. Motor chhung ah chuan kan kut a inchelh reng a, Sanjay te nupa ti ti leh inchhiah chu kan nuih pui dar dar a...Red Shield kan thlenga Sanajay hmel an hmu chu an phusa nasa hle, Sanjay hi Vai film star ang maia smart leh hmel zahpuiawm loh tak a ni reng a ni... An Miss chuan "Sir a lawm vak lo a, kan rawn ko che u a nih kha" inthiamlo hmel deuh chuan a ti a,.. Chutih lai chuan an Lecture mipa zawk chu a rawn lut ve chiah a, "Zoram te daih chu, Midang daih turah ka ngai che a, Hey Sanjay pawh chu" a rawn ti chul a. An sir chu Delhi a kan college kalpui tho Lunglei lam mi B.Mala kan tih țhin chu a lo ni a, kan ri ta chel chul a.

(Nizan lam Net ka nei chhe lutuk a, Ka rawn dah theih loh avangin ngaihdam ka dil mawlh mawlh e..)

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 8th, 2019, 8:38 pm

Chapter 10


"Ka tlang ve hlauh e" tiin kapa chu ka bia a, "Interview result a chuak tawh maw?" a ti hu a, a lawm tih a awki ațang chuan ka hre thei. "aw ni e, Site ah khan lo en ve chhin teh" ka ti a, "Tuaia chu a tling ve a nih chu" a phone off chuang lo a a tih ri chu ka hria a, A lawm ve khawp ang, a Office a lengte bulah a sawi ni ngeiin ka hria. Ka nu ka hrilh a, ka u ka hrilh a, Bena ka hrilh leh a, Karlo ah Message nen Whatsapp ah nen Phone call nen lawmpuina thu ka dawng ta mawlh mawlh a, Chief Minister in lawmpuina thu min thawn bakah amah ngeiin min rawn be bawk a. Tin, MZP lam ațangte Central YMA lam leh Mizo Government Service Association lam ațangte, Zoram Upa Pawl lam ațang ten lawmpuina thu ka dawng mawlh mawlh a. Msi phone call ka dawng a, rei tawk kan inbia a, Instagram lamah ka thlalak nen a tarlang bawk a, Facebook a ka wall lah chu Lawmpuina thu hlirin a khat bawk a, Kei tu khawkhah hriat loh emaw ka lo intih chu lawmpuitu ka ngah kher mai. Ka ni a rawn țap pur bawk a, Bena nen rei tawk kan inbe bawk a, Chung lawmpuina ka dawn zawng zawng zingah chuan Veni min lawmpuina ka beisei ber mai ka hmu hauhlo thung.


Mumbai ațanga kan ințhen hnuah vawi 3 kan inbia a, a phone a bo leh pek a, Duati phone ațangin kan inbe zauh zauh tih loh chu kan inbe tamlo hle. An thlenna a kan thlah a kan haw hnuah kan chettlatna khumah chuan thisen a lo val kalh a, a lo la thianghlim tih ka hriat phei chuan ka duhna a zual sauh a, ka khumah te chuan a rim a nam chek chek in ka hri a, Zankhua a chu khum zaupui maiah chuan chep deuha mut dun zankhua ka chak hle. Kei Delhi lamah dar 12 ah ka thlawk chhuak a, an ni Goa panin zan dar 10 ah trainin an kal thung a, Khua a har vung vung mai. Mahse kar a liam meuh chuan min biakna tur a nei tawh silo ka khua a har viau nangin ka thin a rim leh țeuh tawh. Mahse ka haw tak tak phal bawk silo, Kan written exam result a chhuak a, ka lawm em em a. Interview turin ka inbuatsaih leh nghal char char a. Kan zawh fel vek hmuah result țha tak ka nei a, ka lawm em em laiin Veni hnen ațangin FB ah emaw pawh lawmpuina ka dawng miahlo chu ka thinrim pui leh țeuh tawh a nih hi.


Engkim peih fel a nih hnuah training țan hma in Mizoramah haw zawk turin ka inbuatsaih a, Miss India thlanna ah Msi pawh Miss Photogenic lawmman a dawng a, Top 10 ah a lang phak ve hial a, lawmpuina thute ka thawn bawk a. Msi hi ka thinlungah a cham rei thei tak tak lo a lakah chuan Veni chu Saipui ang maiin a lang lian kulh thung. Mahse a khawngaih thlak ve tihna chang ka nei țhin, Hrethiam lo ber pawn an hriatthiam theih ngei ngei turin min be tlat zel a. Mahse ka hrethiamlo der tlat țhin a, ka bengkhawn țha duh vakloț, Ka in hamtang laklawh ang tih mawlh ka hlau ve tho bawk a ni. Chutah Delhi a rawn chhoh a, Kan hawn rual theihna turin ticket minlo la tih kep vek zui lehnghal a, Lo hnial ngawt theih a ni bik silo. Mipa tam tak nise Msi chu Veni ai chuan an thlang zawk ngei ang, Mahse kei chu ka nive tlatlo. Hmelțha in fel in zei em em mahse ka Lasi Lalnu khum zo reng an awmlo.


"Tuaia hi chu a luck a nia, Miss India Contestant nena an inzui ru lai hi thlalak a darh nasa thei a nia, Dingdi leh Zozam phei chuan "IAS tlangval leh Miss India Top 10 zing a mi Mizo nula hmelțha hi an inkawp fuh hmel hle.. Inkawp fuhlo leh in hmehlo ti chu an mit a fuh zanlo ngei ang" tiin an chhuah kha" Ka u nupui chuan ka IAS tlin lawmna chhungkaw bil chauha zanriah kan ei ho țumin a sawi a, kan nui ham ham a, Veni an sawi chhuak a, ka pa hmel ka en vat a, a tak run a, enge a ngaihtuahna ni ang ka hrethiam chiahlo. Veni duhzawk ah ka nu leh ka ni an țang a, Msi duhzawk an tam zawk, Mahse tam lam in engmah awmzia a awmlo, keimah lama țang chu tlemte ni mahse Veni chu hnehtu chan a chang zawk tho tho a ni. Kan hlim a kan lawm a, Kum hmasa lam lawka Thi chhawnga let reng mai kha tunah I.A.S pachal ka ni ve ta reng mai a ni a, Mi tamtak beih ngamloh ka bei a, Thiamna lamah leh zirna lamah mi aiin ka sang fal emaw ka thiam fal emaw a ni chuanglo, Mahse ka tumruhna in min hlawhtlin tir ve miau mai si. Tam takin vawi engemaw zah an exama an tlang theih loh chu awlsam takin a vawi 1-na ah ka tlang mai si a, awih har ve deuh a ni. TV ah leh Chanchin bu lamin min kawm a, an ti chhuak chuai chuai a, Lawmpuina thu leh thil pek ka dawng nasa malh malh hle. Vengkhat tlangval hawi ve mai mai, thlan lai ve zauh zauh, Khawhar in a tlaivar a zaikhawm ve țhin satliah, tun an biak lumlam lemloh, Țhian pawh kawm tam lemlo kha Zoram pum huapah ka hming a thang ve ta hluai mai chu a ni a, Ka zia hrechiang țhenkhat ten min sawizuina "a chut bawk a, IAS tling awm reng a ni" tih te, "Ruih hlo ti ngailo tlangval fel, Inkhawm thlah thlam ngailo a ni" tih ten ka nihlohna tawpah te sawi ka hlawh bawk a. Min fak arek lek lek khawpa min fak nasa an awm laiin min sel phar lo chauh tawk an lo awm ve bawk a, Mizoram a nia, Mizo zia ve reng a lawm tih mai chu harsa ve lek lek țhin.

Ka vanglai hun ka hmang mek a ni ber mai, Rilru a thi theilo Veni hmu tura chhuahvah na hun ka nei meuhlo, In leng leh sawmna ka dawng awl lo, Ka school lo kai ve na zauh tawh phawt chuan min sawm in Thingpui in ho na leh naupang bula fuihna thusawi tura sawmna a ni tlangpui, Chutiang a buai em em karah pawh chuan Veni bak rilru ah a lang theilo. Mumbai a zan khat theihnghilh tawh reng reng loh tur kan hman dun hnuah a thawm riva engmah ka hre ngai tawhlo, FB lamah leh Instagram lamah pawh a thawm riva engmah ka hrelo, Chutianga buai taka hun ka hman lai chuan Nutei hmel a rawn lang nawlh mai a. Ka IAS tlin lawmpui turin kan in ah min rawn tlawh vang vang a, Kan phul hlut a, Midang awm loh lai chu chuhin "Nute, Veni chanchin hi i hre ngai em?" ka ti a, "Hostel ah a awm tawh si lo a, College ah lah kan subject a inanglo bawk si, kan in hmu khat khawp mai, school chawlh ah lah a rawn haw ve hman ngai si lo a" a ti a, "Anih chu, Tour kha in nei ve nange?" ka ti a, "Nei e, an hma chiah khan kan kal a, kan hnungah zel an rawn kal a lawm" a ti a. "Kan inhmu a" ka ti a, phawk hra chuan "Chu chu a nih chu an sawi, 'A bialpa niawm tak a rawn kal a, zanriah an ei chhuak dun a, Sir Mala pawh a thinrim lutuk an tih chu, Mumbai an haw hnuah vawi khat kan in hmu zuai a, abak kan inhmu ta ngai miahlo, Ralkhat a ka hmuh bak" a ti a.


Veni awmdan hi ka hrethiam lo takzet tawh, a tirte ațang khan Ka pa vanga min kian san ah ka ngai hmak a, Mahse Msi a lo lan khan thik aw a rawn nei leh lawi a. Mumbai ah kan inhmu a, a hlim ve hmel em em a, a thianghlimna hial pawh ka tan a hlan phal a, Mahse Chumi hnuah a reh leh ta vang vang bawk si. "Țhiani chu a hmel en ang a nilo, a thinlung hi a lian lutuk, Mahse a sual lamin a nilo, a tih tawh chu a ti tlat a, engkim a huam a ni ber mai" a ti a, "Ka pa nen an inbiakna i hre ve em?" ka ti a, "Hre nang? chutiang engmah min hrilh lo, thu te hi a zep thei lutuk" a ti a. Ka duh chi hlir hian a awm lehnghal, Hmeichhe țawng liam zung zung hi ka ngaitheilo nasa mai si. Hmeichhe tam tak chu an mipa hauhna lamah engmah an pawisa lo a, zah pawh an dawn ngailo a ni a, Veni erawh hi chu a dang lam khawp mai, nge min duh ve tak tak lo ni ang? Min duhlo tak tak nise a thianghlimna min hlan phal ka ring bawk silo. Hetia ngawi renga min kalsan ang deuh a awm tlat hi ka hre thiam lo a, ka thin a ti rim ve țhin khawp mai. Min ngai ve țhin ang nge? min ngai ve ngai hauhlo ni ang?..


"Pu Zorama maw? Ni 12 khian Mizoram University ah Mizo nula leh tlangval an mahni line țheuha hlawhtlinna khumtu te hnenah chawimawina hlan kan tum a, Nangpawh Chawimawina hlan tur zingah i tel ve a, hun min rawn hmanpui theih chuan kan lawm hle ang" tiin MZP Gen Hqtr Secretary chuan min rawn phone a, Remchan lohna dang em em ka neilo bawk a, ka lo remti ve mai a. A hun a thleng a, Aizawl khawpui chhunga College ațangin kal an tam kher mai, Veni erawh a kal duh ka ring lemlo, Dawhsan ah kan țhu lo a, Tlar hmasa ber ah kan tan țhutna bik an siam ah kan țhu a, Dawhsan ah chuan hun neitu tur an han chho mai țhin. Hruaitu in thiam takin kan hun hman chhan chu a sawi par par a, Keini ho chu kan hming leh kan zirthlen leh kan hlawh tlinna chante chu a tarlang zung zung a, Citation leh Mizo thangchhuah diar min hlan țheuh a, Chumi hnuah Thusawi turin min sawm hlawm a.

He hunah pawh hian Miss Malsawmdawngi chu chawimawina pek zingah a tel ve nghe nghe a, ka bul chet ah a țhu a, Camera man te chuan kan 2 chuan min veh bik deuh niin ka hria, Kan hma zawn ah chuan thlalakna chu an rawn lek deuh reng ni maiin ka hria. "Ka bula i rawn țhu hi a fuh ka ti vak ta miahlo" ka ti a, a nui a "Engvang chuan maw?" a ti a, "Ka duh aia tam ka lang dawn tlat, Nang rawn țhu lo la chu tiang khian min veh awm der silo" ka ti a, a nui hak a "Ngeiawm si, Nangmah zawk a lawm an lak che" a ti a kan nui dun hak hak a. Msi thusawi hun a thleng a felfai takin lawmthu sawina nen a han nei leh thak a, He nula hi a fel takzet a ni, engkim a hnehsawh em em zela a ngaihsan awm hle, Aizawl chhungkaw hlun leh pangngai tak ațanga chawr chhuak a ni a, Pastor thlah chhungkua an tih mai țhin an ni a, A pa pu ațanga Kohhran mi an nihna chuan an chhungkua ah rah țha a chhuah chho ta zel a nih hmel. Ka hun a thleng a, Ka thiam ang tawkin thu ka sawi ve a, Minute 10 pawh tlinglo hun ka hmang a ka thusawi chu ka sawițha nge țhalo ka hrelo "Mizo nula in India ram nula țha ber ber in enlna ah Top 10 ah a lang pha a nih chuan, Keini Mizo tlangvalte hian India ramah kan phak tawk ah top 10 ah lan hi kan theilo bik lo a, kan nula te mah an theih tawka an thlen theih chuan mipa hi kan awm mai mai tur a ni biklo. Miin Tlangval chut leh tlangval hawih hailo tia an sawi, țhian kawm nachang pawh hrelo kei pawh I.A.S ah ka inziah tlin theih chuan nangni hi in thei ve ngei ang, Pawl 7 ka pass a ka țhianpa patea Shillong a awm I.A.S khan min chibai a Mizo te I.A.S tlangval kan tlem tawh a nia, tia min hrilh khan ka thinlungah thuk takin thu a sawi a, Tichuan, I.A.S ni turin ka rilru ka siam ta ngar ngar a ni. Kan tum tlat chuan theih loh a awm lo, Mizo Tlangval hi kan huaisen ve tawk a, Ruih hlo ti ngamlo khawp leh Ruih hlo nghei ngam khawpin kan huai ve tawk a ni tih hi Țhangthar zelte tan entawn turin i hnut chhiah ang u Ka lawm e" tiin thlan tla phungin ka sawi ve a. Msi chu a ding nalh a kut a beng a, Msi ber a din takah chuan a bula awm Hall chhunga awm zawng zawng chu an ding fai vek a, Kut an beng ta hluah hluah a..Ka sen ap ap thung.


Ka thusawi tawp chiah rual chuan Veilam kil tlar chho hnung deuhah Veni țhu chu ka han hmu ta a, ka nuih sak a, a nui ve var var a, a bula țhu Abrahama chu ka han hmu bawk a, Kut an benga an ding ve laite chu ka han hmu phak vek a. Dawhsan ațanga ka chhuk rual chuan chulam tlar ringawt chu ka rilru aj a awm tawh thung. Inkhawm a zo a, pawnah Refreshment tuihnai tak an lo buatsaih a, an zi huai huai a, thla min lakpuitu an awm ve zeuh zeuh nangin Msi chu lun tak a ni, Footballer leh India ram Badminton Number 1 nihna rei tak hauhtawhtu pawh chu thlalakpuitu a ngah hle bawk. Ka mit chuan Veni a zawng ru deuh a, mahse ka hmu mailo ka hawikual vak vak a, min chibai tura rawn kalte chu ka lo chibai a mahse an mahni lam ka ngaihven vak lo, Veni.. Veni.. Veni khawnge? tih ringawt chu ka rilru ah a awm..


"Tunge i zawn a i hawikual vak vak a ?" Msi chuan ka bula rawn din pah chuan a ti a, "engdang ni lo e, Mumbaia ka zin laia zirlai ka hmelhriat țhenkhat kha ka hmu a, kan enzui deuh a lawm mawle" ka ti a, Chutia ka sawi rual chuan Veni leh hmeichhe 1 Car bula ding chu ka va hmu ta a, "Ka hmu e, lo awm lawk rawh" tih pah chuan mi awm luai luai lai chu tawn tlang bawrh bawrh in Veni te lam chu ka pan nghal vat a, an ni pawh chuan min rawn hmu a, Duati nen anlo ni a. Anbul ka va thlen chuan minlo nuih var var a "Ka zawng nasa khawp che u a sin?" ka va ti a "Kan hmu reng che a lawm, i buai em a chibai tu i ngah bawk si a" Veni chuan a lo ti a, a hmel a dawldangin mut a hmu meuhlo tih a hriat theih. "Hawn in tum der tawh em ni?" ka ti a, "Nia, Aba hi a hmanhmawh deuh a, kan haw mai ang" Veni chuan a ti a, Duati chuan min be miahlo, chutih lai chuan Abrahama chu a rawn kal a, "Thu i sawi țha hle mai" tiin min rawn chibai a, "Hawh u kal nghal mai ang" a ti a, "I hmanhmawh viau chuan ka rawn thlah hawng mai dawn em ni?" ka lo ti vat a, "Ngailo, Keini pawh kan hman hmawh a, kan lawm e" Veni chuan nui lui tih hriat tak chuan a ti a "In thu thu a ni mai" Abrahama chuan Motora luh pah chuan a ti a, "U Zoram min hrethiam la, Duati hi a nuam sam lo a kan haw mai ang" tiin Car seat hnung lamah chuan an lut zui ta nghal a. An tlanliam tur chu ka thlir zui vauh vauh a, Ka inhera Hulhliap lam chu ka pan zui leh ta nghal a, Duati hmel awmdan te, Veni hmel dawldang bal maite an hlim nui nilo te chuan ka rilru a kap kher mai. Hetia Veni ka laka a hlat em em nachhan hi engvang nge ni ang? Ka pa khan engtiang takin nge a țawng khum ang? Ka pa lah ka zawt ngam der silo, angaihna ka hrelo takzet a ni.. Ka nu ka zawh tir mai ang" ka rilru chuan ka ti ta a.


"Venkimi te kha maw i hmelhriat chu" Msi chuan a ti a, "Nia, I hria em ni?" ka ti zet nangin Delhi a ka inluaha a rawn len țum khan a sawi ka hre leh si a, "Nidawn tak e, i sawi tawh tak" tiin Msi'n an inhriat dan min hrilh nawn leh lai chuan ka lo ti a, "Ka motor ka haw tir mai a sin, i ruala haw i phal tho ka ring a" nui var var chung chuan a ti a, "Phal e, Mahse Ka nu clinic ah kawi lawk ang aw" ka ti a, "I thu thu a lawm" a ti a, "I nalh khawp mai" ka ti a, a nui hak a "Nanga lawm, College student ho khan an enduh hlawm khawp mai che, Ka bula dingte phei kha chuan "I.A.S pawh a anglo, Filmstar ni awm a ni, a inchei dante saw, coat suit a ha up lo a" an tih kha" nui chung chuan a ti a.. Midang in min rawn fin takah chuan kan thusawi chu kan titawp ta rih a..


Haw kawngah chuan Msi ti ti ka ngaithla a ni ber mai, Eng eng emaw a sawi a, kan nui dun hak hak a, Hotel regency ah Governor in Keini khualțha ho bik leh MZP hruaitute nen zanriah min buatsaih sakna lamah kal tur kan ni tawh a, Hmeichhia tih takah Msi chu Inthlak a duh avangin an in lam Mission veng kan pan hmasa a, India ram hrang hrangah Mipa in hma an sawn em em laiin kan state bikah Mipa kan tlahniam tulh tulh a vei thute, Țawng lama harsatna kan neih chu chhuanlam tling a tih loh thute, Femina Miss India ah pawh english kawi khat pawh țawng theilo Hindi pawh ti thei manglo an hnam țawng chauh thiam an awm ve thute. Țawng hi kan quality mai mai a nih ziate a sawi siam siam a. Mizoțawng chauh pawh thiam i la kan professional line a kan kal tlat chuan țawng thiam in min umzui mai thute, Țawng ah harsatna kan tawh dawnloh ziate. Ruih hlo avanga kan state ah mipa boral kan tam ziate chu a sawi siam siam. Mipa hmeichhe chawm hlawma in la nalh ve em em te, Mipa hmeithai fapa engmah thawklo a nu hausakna ringa khawsa a ngaih hoh ziate, Abrahama pawh a nu designer lar a ni a, a nu thlazar hnuaiah Motor leh thil changkang tak tak a nei ve ngawt te, a nu in phal pheise Foreign lamah awmbo daih a tum thute, Mahse a nu in a phal sak loh thute thlengin a sawi a. "Enge a nu chuan a phal sakloh chhan? Hnamdang ho tumruh zia a hmu ang a, hma a sawn zawk ang chu" ka lo ti a, "Chutiang chuan ka tive tho a, 'Phai ah hmun țha țha ah ka daha, a rawn zir haw chu thuamhnaw man tam leh thil holam manto tak tak a ni mai, Ram danga awm a chak chhan pawh an life style zalen vang chauh a ni' a ti tlat a. Enteh, Nitin a nu in Rs 1000 a pai ziah a nih chu, nula thil a present ve duh te hian a nu a hrilh a, a nu in a leisak a, inti thei deuhin a pe țhin" nui chung chuan a ti a. Ka rilru te te in Veni țhianpa chu a hmel en ang ngawt a nilo niin ka hria.


"Venkimi kha thil pek hi a pe reng a, Venkimi lah khan a duh vak hmel silo, a chang chuan Venkimi hian a nu a rawn phone a, Kalsan a duh thu a sawi tawp zel" a ti a, Chuchuan ka beng a verh zawk a "Engvanga kalsan duh nge a nih" ka ti a, "Ka hrelo, an sawi dan hmang chuan Ngaihzawng nghet deuh a nei a, Mahse a mipa chhungten an duh chiahlo a nih hmel" a ti a... Ka ngawi reng a "Engtin nge an chhungten an duhloh theih ka hrelo, Vawi 3 kan zin ho ve tawh a, Venkimi hi hmeichhe ze țha tak leh nunngil tak niin ka hria" a ti a, sawi zel ka duhloh avangin thudangah ka pakaipui daih a. An in kan thleng a, ka lo nghah chhung chuan a pu ka pu ang bawka Pastor pension tawh la hrisel viau si nen chuan kan ti ti a, ka pu chanchinte kan sawi a, Ka pu lehkhabu ziah tam zawk chu Synod Book room ah chhut țhat leh tir turin min rawn bakah amah ngeiin ka pu chanchin a ziahna chu chhugțhat leh a duh thute a sawi a " i pu kha Pathian tana hausakna leh ropuina thlang lo a, a rawngbawl tura hunpuma inpe anih na chu nangmah ah a lang chhuak zel a, India rama kan ngaihsan em em I.A.S mizo ten kan neih leh theih phah a ni" a ti chuar chuar a. a thusawi chhung zawng chuan Banga Venkimi leh Msi thlalak an tar mawlh chu ka lo en a, Mizo nula inthuam dik takin an inthuam a, Pakhat in emping a phur a, Pakhatin Paikawng a phur thung a, Tuibur an zu der dun a, an sam an ti țuak pheuh pheuh bawk a a hmunhma in a zir bawk a, an inhmehin an nalh dun khawp mai...


Hotel Regency kan va thlen chuan min lo en duh hlawm hle, Msi chuan kawr senduk fual hnalh mai a ha a, Scarf pan lace lam rawngkai deuh lek lek hi a bat tel bawk a, Kei erawh chhun lama ka inthuam dan ang thoin ka la inthuam a, Thla an lo la sap sap a "In inhmeh khawp mai, Nupa ni awm tak in ni" Pakhat chuan a ti a, kan nui ham ham a. Governor pawh a hun tiamah chiah a rawn thleng a, thutawi a sawi a, thla te kan lak ho hnuah zanriah kan kil ho ta nghal a. Zanriah eikham ah Msi ka thlah a, an in kawtah kan ding a "Lo leng lut la" a ti a, Nula in leng turin min sawma han hnial ngawt chu ka hreh viau, Mahse dar 9 a ri ul tawh mai si a, "A va tlai hmel tawh ve" ka ti a, "Tlai love, dar 9 chauh a la ri a lawm, a hrim hrim ah i rawn leng duhlo" a ti a a nui a, "Len duhlo pawh a awmlo, hun ka neilo ve em a" ka ti a, "Engtik nge i chhuk hun" a ti a, "Sunday ah chhuk ngei ngei ka ngai, Sunday ka chhuk loh chuan ka tlai ang, Vawiin programme awmlo se ka chhuk hun tur a ni tawh a" ka ti a, min din hnaih sauh a, ka kut a dawm a "chu i chhuk țep tawh chu" tih pahin an in lamah min kai ta a.


A inthlak laiin a nu leh pa te nen kan lo ti ti a, a inthlak zo a, Casual dress simple deuhin a inthuam a, a hmelțhatna leh pian nalhna a dang chuanglo. "U Zoram inchung zawl ah țhu daih ang khua a lum bawk si" a rawn ti a, "nia han hawi thawveng tawh u" a nu chuan a lo ti a, Inchung lam pan chuan kan inzui chho a, Inchung zawl ah chuan Artificial grass an lo phah a, lawn nuam zet mai an lo siam chu niin. A pa hi Department pakhat ah Director a ni a, Kohhran upa a ni bawk a, anu hi hranghlui zaithiam a ni thung. Swiming pool 12fit bial vel hi a lo awm bawk a, Light pawl deuh hian inchung chu an kal phut bawk a, Hul hliap lian vaklo hi a sir dinglamah a awm a, chutah chuan țhutna then thei hi an dah bawk a, Chutah chuan kan țhu dun a, Aizawl khawpui pe un mai chu kan thlir a, Ralkhat a Bike ri ring zeta tlan huk huk thawm te chu a hriat chian theih viau.


"U Bena khan engmah a hrilh na chenge?" a ti a, hman deuha a sawi tawh tho kha a ni a, Benan engmah minla hrilh lo "aw, engmah a la sawi awm ka hrelo, eng chungchang nge?" ka ti a, a nui a "A van sual tak, ka lo hrilh ang a tive sia" a ti a, "Nia, kan inbe khat em a lawm, Aizawl ah a awm bawk silo" ka ti a, "Nupui neih a tum kha i hria em?" a ti a, "Hre nang, engtik ah?" ka ti hu a, ka hrelo tak tak a, "Ka țhiannu nen an innei dawn a lawm, Mahse an la puangzar chiahlo a ni maithei, Palai chu an kal tawh a" a ti a, "Tunge? chutiang engmah ka hrelo" ka ti a. Bena chuan nupui neih a tuma engmah minla hrilh lo chu a nia.. "Ka țhiannu Lunglei a mi a nei dawn a lawm" a ti a, "Engti mi nge?" ka ti a, "Engmah a thawk lem lo, Super Model a nia" a ti a "nupui neih i hun ve tawh tihna a nj mai" a tih zawm zat a, ka nui a "ka hmu hlei nem" ka ti a "hmmm.. ka awihlo i luck khawp ang, Kan Hostel ah pawh i luck ber țhin kha" a ti a.

"Class 10 in pass a hostel in chhuahsan ta daih si a, ka ngai thei lutuk che a, Delhi ah a awm an ti a, Lehkha rawn thawn che kha ka tum țhin a, mahse ka zak bawk si, Chuan i fb profile kha kan check vak vak zel" a ti a "Enge min ngaih ve ngawt chhan" ka ti a, "aw... I ngaihawm em a lawm, I thlalak kha kan ruk sak che a, ka lehkhabu karah ka zep țhin, tun thlengin ka diary karah ka la zep reng" a ti a, ka nui hak hak a "ka van awihlo tak, engtika ka thlalak maw?" ka ti a, "Rose & Fire Band in performed lai kha maw le" a ti a, Ka thlalak bo ka tih kha ka hrechhuak zawk a, Rose N Fire tih kha Band kan nei ve a, kan bei nasa ve țhin hle.. Kan School function nikhua chuan kan performed ve ziah lehnghal, khatih hunlai kha GNR kan ngaisang thei em em a, an style pawh kan la viau bawk. a kawr awm a țang chuan ka thlalak hlui chu a rawn phawrh a Jeans kekawr lian hnekhnawk deuh ka ha a, T-Shirt dum Axl Rose lem lianpui mai chuanna ka ha bawk a, Kan Band Front man leh guitarist ka ni nghe nghe.


"Ekhai, ava rei ve tawh ve, engtin nge in ruk theih zawk a?" ka ti a, a sawi siam siam a, kan nui dun hawk hawk a, "Zan lehkhazir dawn a piangin ka en ziah țhin" zawi sap hian a ti a, "I va fel ve, keini thlalak mai mai han en peih che" ka ti a, a nui a "Fel vang a nilo, ka ngai che a lawm, Nangmah lo chu mipa duh ka la nei miahlo" a ti ta reuh a.. Ka ngawi reng a, Kan piah a pe un lam chu ka en vung vung a, "Hei ka thusawi i hria em?" a ti a, a lam ka hawi a "Hria e, Ka lawm lutuk a engmah sawi tur ka hrelo a lawm" ka ti a, kan in en hnai set sawt hle, Vai hnar chu nise kan hnar zumlai chu a insi phak ang, "Ka duh che a ka hmangaih che a, ka la duh reng che a, ka la hmangaih reng bawk che" tiin a phun sep sep a, a thaw chu a rimtui ham ham bawk a, Ka chhan hma chuan min rawn fawp ka nge nge a...


"Farnu angin ka en che a sin, Hman ațang khan" ka ti a, "Ka awihlo, midang ngaihzawng i nei a niang" a ti țiak a, a kun lap a. Min rawn fawp chu ka lo chhang lo, dimtein ka nam kiang kha a ni a. Mipa ah pawh a zeilo ber mai leh zakzum em em mai ka ni a, chutia a hmeichhia zawkin min rawp fawp chu mak ka ti takzet a ni, "Nilo, ngaihzawng ka" ka neilo tih ka tum uk a, ka nei a, ka vei em em a ni si, "Ka nei nia ka nei a, atan rimawm turin ka lo intiam tawh si a" ka ti a. "Min ngaidam dawn nia, Mi ngaihzawn lai ka lo fawp ve ringawt che a, zawt hmasa lo che in" a ti a. A va mak reuhin a rilru a va thianghlim tak, mak ka ti zawk "inthiamlo duh suh, keimah zawkin hrilh hmasa tur che ka ni a. Mahse chu hmeichhia chuan min la nghak em ka hre chiang ngam chiah bik lo a, ka hrilh duhlo mai che a ni" ka ti a. Phur hmel deuh chuan "khawia awm nge?" a ti a, "Ka sawi thei rihlo, ka la sawi thei lo tlat a ni, engkim a chian hunah ka la hrilh ang che" ka ti a. A hawi vauh vauh a, ka en reng a a hmel chu a fuh thlawt a ni, Mizo hmel diktak nisi, hnamdang hmel kai lek lek bawk si hi a ni a, a mitmeng fiah kak mai leh lian kal mai te chu a zahawm kul mai a.


"Khawi hmuna awm nge a nih pawh i hre lo a, I tan a rinawm leh awm loh pawh i hre lo a, chuti chung chuan atan i la rinawm thei a nia, Ka u ka hmangaih em em rilru țha tak kha i la ni reng a nih chu, i huangah min khung ve theilo a nih pawn ka hretiam che. Mahse i tan a lo rinawm talo a, i rilru i la thlak leh thei ngai a nih chuan kei hi min hre reng dawn nia. Kum 10 zet chu he hun hi ka lo nghak tawh a, Ka hmui hi ka nu leh pa nilo chuan tuman an la fawp bawlhhlawh ngai lo a, zanin ah nangin i si hmasa ber ta a ni" a ti a, a mittui a tling pam bawk a. Ka lam ah ka kuai hnai a, ka awm ah a bei a chhuak em em in a țap ta hlap hlap a, kei hi eng ka ti nge ni ngai, Veni ka lakah rinawmlo tase, kei hi ka lo rinawm tluk ringawt si a, tunah kei mai mai min duh em vangin a țap mek chu a ni si.. Ngaihtuahna a vak thui duh kher mai, Mi a thil tih tawh thlak mai mai ngailo leh lepchiah taka mipahnih kawp dun duh chi ka ni bawk silo.Ngawi reng chuan ka țhu a, a sam chu ka chul sak heuh heuh a, rei vaklo ah chuan a țap a bang ta a, "Min hrethiam dawn nia" a ti sap a.

Veni nen kan intawn dan leh hmeichhia ka tawn ve tawh te laka ka rilru put hmangte Veni ka tawn tak hnua ka rilru awm dante, kan inkar boruak zawng zawngte chu Veni hming lam map lovin ka hrilh a, a awmna khua leh veng lama thil thleng engmah ka sawilanhlo thung. "Chutiang khawpa mipa rilru dik chu ka duh zawng tak a ni, I tan rinawm takin a lo la awm ngei ngei ang. Miin a chanchin an hrilh che pawn, mita i hmu em? Ama țawngka ațang ngeia i hria a nih loh chuan pawm reng reng suh, Itsikna hi a sual teh a nia" a ti ta then a. Ka pa chuan kei min ngaihtuah vanga lo țawng ve mai mai ah a ruat hmak bawk a, "i hlawhtling tawh a, amah nen chuan insuihzawm ula, in be pawp leh tawh pawh ni ula a hnial ka ring tawhlo" a ti a. ka ngawi reng a, ka pa hi keimah ang thoa rilru puthmang ti danglam mai mai ngailo a nia, Veni hnenah engtiang takin nge thu a sawi ni ang? engmah sawilo tawp chu a nilo mahse heti taka Veni danglam hi ka hrethiam theilo, chuvangin ka pa bulah pawh engmah ka sawi chhuak chuang heklo.


Zan a rei a, kan ti ti hnem hman khawp mai, Motorcycle chak tak taka tlan thawm pawh a khat pharh tawh, Ralkhat a rawn ri leh zauh lo chu thawm a awm meuh tawhlo. Kei pawh hawng turin ka in tintuah tawh a, Inhnuai lam kan chhuk leh pawn a chhungte an lo mu diak tawh, a tih tlat avangin an choka ah Thingpui tui taka a lum chu kan han indun leh te te a, Chumi hnuah ka motor thleng min thlah a, kan in mangțha hnuah kei chu kan in lam panin ka tlan zui leh ta nghal a. Kawng lakah chuan Dolly Parton zai ka play riai riai a, kan awmdan chu ka ngaihtuah pah bawk a, Msi chu a nuchang reuhin a rilru a țha ka ti hleț chutih laiin kei chuan Veni laka rinawm lo nih ka lo hlau ve viau bawk si, Veni lah engtin nge a awm? enge a rilru lah ka hre ve der silo, Min biak a chaklo nge min biak a duhlo ni ang. Kei min kalsan tawh niin ka rin lahin ka tan engkim a phal ve lawi bawk si.


Delhi ka chhuk leh hmain Veni biak dan ka zawng ru reng a, Mahse ka hun neihin a tlin talo, ka chhuk leh ta nge nge a, ka chhuk hma ni chiahin Duati nen mak deuh maiin ka nu clinic ah kan inhmu hlawl mai a, a Brace vuah a lo thlawn tir a, Hun reilo te kan ti ti chhung zawkin Duati chu a damsam loh avangin an khua ah ahma ni chiah chuan a haw thu a sawi a, Chutia ngawi renga a haw ringawt chu ka haw lek lek a, Mahse nidangah pawh min be ngai chuang a zeng pawh nilo lo huat ve ngawt kha awmzia a awm lemlo. Phurlo deuhin Delhi ka chhuk a, ka lung a lengin Mizoram ka ngaih em em țum ber a ni hial ang. Ka nu ka ti ti pui a, Veni chung chang kan sawi duna ka rilru a lut ka rilru tina em em tu chu "Theihnghilh tum zawk la a țha ang? A nu țawngkamah i pa a lawm vaklo, Msi nen in inkawp tho a lawm" a ti chu a ni. Ka nu hian minlo va hrechiang lo tak, an fapa hi chuti mai mai a rilru thlak chi ka nilo tih leh an thu ka awih vang ngawtin engkim hi lawm tak leh rilru si takin ka ti thei nghal zel biklo a ni tih ka awmdan thlengin a lo man lo takzet a ni. Training turin Ram hrang hrangah kan awm a, Thla 6 zet training kan nei dawn a ni, Ka programme tlem ka chhungte ka hrilh a, A zawng zawng ka hrilh duhlo, engvanga Veni chu theihnghilh tura min ti nge tih chu ka thinlungah a lian em em a, Ka lung a awi thei lo tlat a, an lakah ka hel rilru ve tlat a ni. Ka u te 2 leh ka nau bulah erawh ka lungawi loh thu ka sawi a, Ka u mama chuan ka pa lo sawipui a tum thu min hrilh a, ka u leh ka nau erawh chuan "Engkim hi kan țhatna tur vekin an ti a lawm, a rei anga i dam ve mai ang" an ti a, Mahse kei Zoramthanga hian ka tih tawh chu holam takin ka bansanin ka theihnghilh ngai tawh hauh silo.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » April 8th, 2019, 8:38 pm

Chapter 11.

Prime Minister kaiza vengtu ah min dah tlat pek a, PM meuh hnung han zui chu ka huphurh ang reng viau mai, Ka lo rilru ruk dan chuan Delhi khawpui hi chhuahsanin state dang daihah ka awm ve tawh ang chu ka ti deuh a ni a, Mahse chutiang engmah chu beisei chi ka ni tawhlo, PM berin min thlang mauh mai si. Ka chanchin chuan Zoram khawvel a deng chhuak hneh nghal kher mai, Rulling party lamin min rawn be nghal chat a, kawng a awlsam sawt an beisei thute min rawn hrilh a, an lawmthute an rawn sawi chiam bawk a, YMA leh MZP lamin Chakma chung chang a an hmalakna kawng lo siam turin min beisei bawk a, rilru a buai duhin ka inham tang thuk duh dawn hlein ka hria. Hming țhat viau theihna lai a awm a, Hming chhiat theihna viau lai a awm bawk niin ka hria. Sakhaw zalenna kawnga in tihbuaina awm ka vei ber erawh a theih anga PM sawipui ka tum ruh viau thung.. Ka hah tlauh tlauh viau, Peng hrang hrangah CM kaiza vengtu hi kan awm nangin a naupang ber kei chu min hruai kual nasat ber bakah min biak rawn zin ber ka ni lawi si, Chawl hman ka ni meuhlo, Mizoram pawh Kum 1 leh thla 7 zet ka hawng talo, Ramdang ah kan zin deuh reng a, a tour programme ka dung vek a, Interview ka duan saka, a thusawi tur kan draft sak a, a kip a kawiin kan inzui a, Zing dar 6 a țanga zan dar 10 thleng kan inchenchilh a ni ber mai. Private Body Guard min pek thlap bakah bullet proof Motor min pe tel thlap a, Ka flat luah pawh PM chenna ațanga Minute 5 kal lekah venhimna țha tawk hnuaiah a awm nghe nghe bawk.


Chutianga ka buai em em lai pawh chuan Veni chu ka thinlungah a thi theilo hrim hrim, ka mumangah ka hmu chamchi țhin, Mahse biak emaw nidang anga a chanchin enzuia Face book leh Instagram lamah pawh engmah ka en hman lo. Mahse ka hre reng a, ka marphut rualin a hming a phu tel ve reng ti ila ka tisual awm lo e. Kan zin haw Thlawhna a kan chuan laiin Delhi ah Media conference ah a thusawi tur ka draft mawlh mawlh laiin ka bulah PM a rawn țhu thurh a, "Mr.Zoa, i chau lutuk ang chawl hahdam teh" ka dara ben thuk thuk pah chuan a ti a, "Chau lo e, India ram tana kan hnathawhna kawngah hian ka chau thei tak tak lo e" nui chung chuan ka ti a. "PM ka nih tirh phat ațangin Mi 12 zet PSO ka nei tawh, nang hi a best i ni, Mizo hi in rilru a dik a, a huaisen bawk a ni" a ti a, "Ka lawm e Sir" ka ti a, Sapzu țha chi an rawn pe a, No 1 chu min pek a tum a ( a tum fo a, ka la hnial zel a) ka lo hnar a, a nui vur vur a "Enge i duh ber tunah hian" a ti a.. ka nui suk a,.. "Ka bial nu hmuh ka chak ber" ka ti a.. a nui ta hawk hawk a, "a thlalak min hmuh rawh" a ti a, Ka laptop ami chu ka hmuh a "Hmelțha lutuk, khawnge a awm?, min hmelhhriat tir rawh" a ti a, "Delhi ah a awm lo a" ka ti a "Mizoram ah maw?" a ti hu a, " aw ni e, Mizoram ah a awm" ka ti a, a ngawi vung vung a, thil a chhut niin ka hria "Engtik nge in inbiak tawpna ber, Ka rawn kal hma lawk kha em ni?" a ti a.. ka nui a "Kum 1 leh tlem a niang" ka ti a... "Kum 1 leh thla 7 kan inzui tawh, Chawlh i la la miahlo, inla inhmu miahlo tihna a ni maw?" a ti a, "Niang chu, Sir.. Nangpawn i nupui thla 3 danah chauh a lawm i hmuh tho" ka ti a.

"Kei chu ka nupui a nia, nang chu i bialnu.. Kan nu nen kan inchhai lai chuan kei chuan ni 1 ah vawi 3 ka hmu ngei ngei a sin, Delhi kan thlen hunah thla 2 chawlh i la dawn nia, Rakheshan i ai awh zawk ang, I rawn zawm leh hun hun ah i post ngai hi i hmang leh ang.. In inneih hunah Thla 3 i chawl thung ang" a ti a, kan nui dun hawk hawk a "Sir, Media Conference hi zo phawt se" ka ti a, "I hah tawh, Ka chenna kan thlen vela sign theih turin Paper lo siam la, i chawl nghal ang" nui chungin a ti a, lawmthu ka hrilh a "Ka thusawi tur chu" a ti a, ka laptop chu ka hlan a, kuttin seh nuap nuap chung chuan a chhiar a, "Hei hi a lawm ka duh em em na chhan che, Ukil ang maiin engkim hi a nihna thlap thlap in i remkhawm țhin.. Dan zir hrep tawh ang maiin Law and order i hre em em bawk si, Ka mamawh reng che a nia, Phone call chhang thei turin awm reng la" a ti a.. amah vek chuan "Nilo.. Chawlh reilote i neih chhung chu i chhungkua leh i bial nu tan am takin hmang zawk ang che, kan tibuai lo ang che" a ti a.. A tho a, "Ka chau ka mu dawn" a ti a, a room lam pan chuan a kal ta nghal a.

****************%%%%%%****************

"Veni, Mambawih an be duh che" tiin a nu in a ko lauh lauh chu ka hre thei a, ka zuathau a ka mur seng seng thei hial a. Khawi ațangin nge? Kha naute hi chaw lo pe teh" a tih ri phone alak rik rak rual chuan ka hri a, Khawilam naute nge chaw an pek ang? a nah mipa khan nupui a nei ta em ni ang?.. Nupui a nei hma awm hle mai ka ti rilru a "Hello" a aw chu a nalh ngai rengin a la nalh.. ka chhang mai theilo, "Hello, a dah hman a mawnle, a dah bawk silo ka aw i hre thei em?" a ti niah niah a "Veni i dammaw?" ka ti a, a tawp chat a.. kan ngawi dun vang vang a, "aama.. phone a hmang a lawm" naute țap bai bai ri leh a nu țawng ka hria.. ka bing nghal mup a, a reh vang vang a "tunge, in țawng miah lo a" a nu chuan a rawn ti a.. a țap niin ka hria, a insut hraih a "ka dam a lawm, i dam zawk maw?" tiin hmun hranah a kal sawn tih hriat takin a ri țek țek a.


"Enge awmzia, Pasal i nei tawh a mi?" ka ti tuak a, ka aw a lawi vek a chhuak țha theilo lek lek a, "Mmm... I lo haw a mi?" a ti sap a, chu chuan min chhu dawt ni berin ka hria... "Pasal i nei tawh maw?" ka ti nawn leh ngata.. țap tih hriat takin a insut hraih hriah a "mmmm.... Nakin ah ka rawn be leh ang che" a ti a, phone chu a dah nghal hmak a. Enge awmzia, Pasal tinge min neih san, Enge awmzia?? Duati number min pek hmangin ka be ngei si a, Ka tliak vek niin ka hria. Chawlh hmanga haw turin ka inbuatsaih a, thlawhna ticket ka lakna ah Duati nen kan inhmu hlawl a, Hmanhmawh takin a number min pe a, engmah a sawi bawk silo.... Tunah a pasal te ina a awm lai ka han bia a niang, Duati number ka dil tello chu ka inchhir hle, Naktuk maiah Mizoram lamah ka hawng dawn a ni a, ka hawn chhan tur berin Pasal a lo nei hman a nih si chuan engtin nge ka awm tak ang, Ka thin a rim a, ka rilru ana ngawih ngawih a, Mipa han țah chi a ni der silo, Rak chiam chiam mai ka chak.. Ka rak chiam chiam a nih chuan ka security guard ho an phawklek nasa mai dawn si.. Khuman ka țhu hnawk a, ka thuamhnaw hawn tur inrem kau tuar chu ka en tlawk tlawk a, Nupui atan ka sawm anga ka pe ang tia ka lei Rangkachak leh lunghlu a siam zungbun ka lei a bawm nen thlapa ka dah chu a let bal bawk a.


Engkim hi a tawp a, engkim hi ka rilru lo ang vekin a awm a, Khawvel hian mawina a nei lo a, Mizoram hawn chakna reng reng ka nei tawhlo. Ka pa ka hua a, ka nu ka hua a, engkim ka hua.. Tinge ka duh ve ngawih ngawih nen kan inkar an tih chhiat vek a, tinge min hmangaih ve tu nia ka hriat, ka phatsan phal miah lohin min phatsan bik.. Zirna kawngah ka hlawhtling em em a, ka tum tak hna ka thawk a, India ram tan țhahnem ngai takin ka thawk a, Ka ram leh hnam himna ka ngaihtuah a, thlamuang taka awm ka duha, hah pawh sawi thei lovin hna ka thawk a, hlawhtling pawh ka inti viau.. Mahse ka hlawhchham fai vek ta ni berin ka inhria, Ka tan chuan han tih leh chuan tur a awm tawh silo, engkim hi a bul hmuka, a ping vek ni maiin ka hre tawh a ni. Engvanga min biak a, min hrilh tlang nghal mai lo a, hmun fianrial a neih huna min biak chauh a tum kher ni. Ka be lo ang, engvang mahin ka be hek lo ang, ka chhungte bulah ka hawn tur thu ka thlen tawh a, ka hawng ngei bawk ang a, Mahse kan In ah ka lut lo ang a, Ka pu room ka luah mai tur a ni.. An duh dan takin engkim a kal bawk a, tunah chuan ka duhdan ang takin engkim a kal ve tawh tur a ni, Puitling ka ni ve tawh a lawm... tiin ka rilru ka siam mawlh mawlh a, Lungnilo zet chuan ka room chhungah ka phun mawlh mawlh a.


Aizawl chu hmana Aizawl tho kha ala ni ngei mai, Mahse Ka tan chuan Aizawl thar a ni aawm e, Ka hawn thu hria apiang in min ngaihven a, Kan In lamah minlo va zawng tawk an awm bawk a, Kan Inpui lama ka thlenna hria chuan min rawn pan bawk a, Thil pek eng eng emaw ka dawng a, Prime Minister Personal Secretary nita chu sum leh pai lama min vawm tum an awm sup bawk nia. Kristian ramah hetiang ang em em a thil tih duh hi an awm ka lo beisei ngailo, Chungte chu zahawm tak leh dik takin ka lo hnar țhin a. Central ațanga hnathawh tur kal Private company lamin hmuh an inbeisei avanga chutianga min rawn ti chu an ni ber mai. "Tuaia i pa in helamah i rawn haw a beisei sei viau a sin" tiin ka nu in ka haw hma zana ka luhna tur ka hrilh chuan min chhang a "Ka hna hmuh hmasakna bera ka hawnna hi Ka pu pindan a ni ngei tur a ni. Kawng engkima ka hlawhtlin chhan hi ka pu Pathian țhihna vang chauh a ni a, Kan In lamah chuan ka tarkun thlengin ka la awm dawn a lawm" tiin thiam takin ka chhang a, an lawm ve hle niin ka hria. Mahse ka luh loh chhan zawk tak chu Veni nen kan inkara an thil tih dan ka lung nihloh vang zawk a ni reng si.


Bena pawh nuipui neiin Fa an hial an lo nei ve tawh a, a nupui pawh hmelchhe lo tak nalh zaih mai a ni a, Mizo film industry lamah chuan mikhual lo tak a ni nghe nghe a. Zanriah ei turin min sawm a, Msi nen kan kal a, Bena pawh MPS ah a lo inziak tling tawh a, Traffic Police ah SDPO in a lo awm ve vang tawh a. A nu leh pa te inhnuaiah an in dang a, an khawsa thei hmel viau, An nu pawh Tv VJ hna thawkin a awm a, an harsa lemlo. Zanriah tuihnai tak min hlui a, nula awmpui an nu cousin an nei bawk a, An la chhangchhe em em lo, Keimahni tawkah kan hlim ve dar dar hle "Heti hian in nei mai ula ava țha dawn ve" Bena chuan zanriah kan kil khama kan ti ti ho lai chuan a ti a, "Nghah a nei a, kei chu a second choice ah min dah rih a nih hi" Msi chuan nui chung chuan a ti a. Msi hnena ka thusawi Veni ka laka a rinawm loh chuan kei chuan ka rinawm san theihloh thu ka hrilh chu ka hre chhuak zawk a "Ekhai, chutiang chu inlo sawi vek tawh a maw?, a hrim hrim in Msi pawh midang lo neih ve rih mai tur a nia" Bena chuan a ti a kan nui ham ham a, "Kan Inneih a ka dinpui kha MCS a ni tawh a nia, Darlawn BDO a ni rup tawh, a beisei ropui si che" Bena chuan a ti a, "Khai a, Min duhlo a niang Zaithiam nen an inzui ka hmu ngun lutuk" Msi chuan a tia a "Țhiannu chu Luck deuha awm reng hi țha ka tihpui rih e, a beisei ber a hlawhtling țep tawh ang" mei nei deuha min melh pah chuan Bena nupui chuan a ti a "Ngawi teh, Ka awmdan ah hian Nupui neih lam ngaihsak hman pawh ka nilo ka hawi vel mai mai zel zawng a nih hi" tiin ka chhang a, Hlim tak leh inpawh tlang tak chuan kan titi ho a. Bena chuan "ti teh țhian thil hmuh tir tur che ka nei a nia" tiin an nupa room lamah min hruai lut ta a.


A Inhmun lei chungchang min sawipui a, Luangmual ah Ex MLA in hmun zau vaklo a lei vel kan sawi a, a thlalak nen kan en dun a, chutiang vel kan sawi kar lakah chuan "Țhianpa, Veni naute neih chungchang kha i hre ve tawh em?" a ti ta a. "Thawi deuh chuan ka hria, khawi lam a mi nge a neih a?" ka ti a, "Tunah hian Abrahama kha ASI in ka hnuaiah a awm mek a, a sawi hmang chuan A fa paina pa hi a sawi duhlo a ni awm e" a ti a, ka phawk hra a "Engmaw? Amah Abrahama fa kha a pai turah ka ngai" ka ti a, "Ka duh lutuk, mahse min duhlo, vawi 1 pawh ka fawp lo, Hmeichhia hi ka lakah an inphal thei viau a nia, Venkimi chu chutiang a ni ve miahlo, Ngaihzawng ka nei a ti tlat a, kan țhian inkawm ta vel mai mai a ti" a ti a, "Anih chuan tu fa nge a pai tak ang?" ka ti a. "Mumbai ah khan in inhmu tiraw?" a ti a, ka en hu a "Engtin nge i hriat?" ka ti a, "Abrahama ka ațangin, Mumbaiah kan IAS pa hian a rawn hruai chhuak a, chutah chuan a țhiante zing ami nen an inkawp a ni maithei, a ti a, Rindan ka nei a" a tih mek lai chuan engkim ka hrethiam deuh ta kuar kuar a, "Kan chesual ngei a lawm, Mahse ka fa a ni thei dawn a mi?" ka ti a, A hun leh ni ka la hrechiang bawk a kan han chhut a, "Ka ring tlat a ni, Nanglo an ni theilo ang" a ti ve ta a. Ka awmdan chiah ka hrethiamlo, ka bing deuh mum mum in ka hria, Kan inbiak lai khan nakinah ka rawn bia ang che a ti a, ka thinrim khan ka phone ka off daih si a, Mahse Pasal i nei em ni ka tih khan aw tiin min chhang si.. "Ka rawn haw hma zan khan kan inbia a, naute thawm vel ka hria a, Pasal a nei em tih ka zawt a, a aw bawk si a" ka ti a.. "Nilo, ka ringlo, Kha nula khan i lakah zep a nei mai mai a niang, naktuk ah finfiah turin kan kal dawn em ni ang?" a ti ta a..


Kan chet sual hun ka chhut a, Kum 1 a tling ve tawh dawn der tihna a ni a, A tak tak a nih chuan, Kan haw kawngah chuan ka ngawih chawi em avangin Msi pawh chu nidang anglo takin a ngawi ngal mai a, kei pawh ka rilru a kal ding kher mai, Ka fa nge ni ang midang fa, Pasal chu a lo nei tak tak reng tawh a ngem? Nei ta tak tak se engtin nge ka han awm ang? Risk a sang deuh chu ka ti viau nangin Kal lo a finfiah loh tawp chu ka ngaingam chiah silo, Engtin nge ni ang engmah kan hrelo chu a ni si a. Mahse finfiah chu ka duh bawk si. An kawtah ka dah a, leng turin min sawm a, mahse chhuanlam ka siam a ka hawng tlang ta nghal a. Kan in ah ka kal kawi a, reife ka nu leh pa te nen kan ti ti a, an hmelah chuan engmah danglamna a awm lo a, Ka chhuah dawn ah "I u kal ve se a țha ang, In 2 ringawt chuan a zahawmlo e" an ti a, "In rawn haw hunah hetah rawn lut kawi ang che" thil dang engmah sawilo chuan ka pa chuan a ti a, ngawi rengin Inpui lam pan chuan ka tlan haw zui ta nghal a.

"Nute, ka room ah in 2 in ti ti pui che u ka duh a nia, Patea hi khawnge?" ka ti a, "Room ah a awm a niang, kan ko a nge" a ti a, Ka room ah ka inthlak a ka va chhuahfel leh chuan an 2 chuan țhutkhawmna pindan ah an lo awm a. "Hei thutak nge thu taklo ka hrelo, ka chhut dan chuan a ni ngeiin ka ring a" tia bul țanin Venkimi nausen pawm mek chung chang ka sawi a, Kan chanchin chu ka damloh lai khan an hre vek tawh a, ka sawi tam lo, Ka pa in a lo ti ti pui dan te ka sawi hnuah ka pa lungawi zan lohna thu a nu țawngkam nia an sawi thlengin ka sawi chhuak a, "Tichuan, naktuk ah hian finfiah turin Reubena nen kan kal dawn a, Ka u a lo tel ve maithei bawk, Naktuk zingah kan chhuak ang" ka ti dap dap a, "Nia, Ka u sawi dan khan Venkimi nu khan 'kan hna hmuh ve nate chu kan pa damlo chung an hruaichhuak a, a nunna chan takah chuan an inthiam loin hna min pe ve mai mai a nih hi, An fapa khan ka fanu a atchilh bawk si, chuvangin keini min thlun beh theih nan hna minpe ve chauh mai mai a ni' a ti a ni awm a. Mipa zawkin hmeichhia atchilh em em anga a sawi te kha i pa chuan tlawmthlak a ti deuh a ni. Tin, BA lai a zir ve a, BA ve meuh Un-Skill chauha inthun hi a inhmehlo" ti te pawn a lo sawi a ni awm e" a ti a.. Ka ngawi reng a, Venkimi nu leh pa zia kha ka hrechiang hman miahlo, Mahse an mitmeng leh chetzia ah erawh chutiang engmah han sawi mai mai chi an niin ka hre theilo, a phen ah dawt a awm niin ka rin thute chu ka sawi a "I u hruai chu a fin thlak ang, I la hrilh loh chuan tunah hrilh rawh" Ka patea chuan a ti a, "An in ah ka riak phei ang chu ka ti a" ka ti a, "a țha khawp ang hei dar 11 a ri tawh a, an mu vek tawh lo maw?" a ti a, "Ka phone lawk tawh e" ka ti a. Rei vaklo hnuah ka u te ina riak tur chuan ka thawk chhuak ta nghal a. Ka u te hi Kan inhnuai ah awm tawh lovin, Kan Inhmun 1 veng dangah an sa ve a, tahchuan an indang pumhlum ve tawh a ni.


"Kan rilru a in ang chiah a nih chu, Venkimi leh a nu kha ka ti ti pui ve ve tawh a, engmah an țawngkam leh chezia ah khan han tih remrawmna an neiin ka hrelo, an pawnlam landan chauh a nih ka ring bawk heklo" ka u nupui chuan a ti a, "Nia, Ka tana a rinawm zia hi ka hrechho zel a, ka lo rinhlelh na țhin te kha ka rinloh dan ang daih a lo ni zel bawk, Min duhlo nise a thianghlimna kha min hlan phal ka ringlo" ka ti ve bawk a. A tuka Venkimi te khua a kal tur chuan kan inbuatsaih zui ta nghal a, Ka mutdawnah khum bula țhingțhi meuha țawngțaiin ka thil tawn tur chu ka rinloh dan daih a lo nih pawn tuar thiam thei tur leh huaisenna nei turin a țanpuina ka dil a, Ka muhil mai theilo ka helhhawlh a ni ber mai.


Kan tum aia hmaah an khua chu kan thleng a, Ka inluahna te chhungkua chu an chhungte khaw danga awm an boral avangin an lo awmlo vek a, Ka thawhpui țhin Sir Sawma te in ah kan innghat ve ta tawp a, kan inhmu chu a lawm hle mai, IAS meuh ka ni tawh a, chumai a la nilo India ram Prime Minister Private Secretary ka ni bawk a ni a, min lawmpui thu leh min chhuan zia thu a sawi mawlh mawlh reng a, "Kan ti ti a talang chuan Venkimi nen kan chanchin kha i hre ve tak em?" ka ti a, "Hre ve deuh e, Kan hriatna ten a zirlo bawk a, kan lo dem rilru ve viau hman che u a, Mahse Principal berin 'Pu Thanzuala te chhungkaw sawi awm tawk leh a ni e" a ti mauh mai a, kan ngaithiam leh ta deuh a" nui chung chuan a ti a. "Ka inluahna te maw?" ka ti hu a, "Niang chu, Sawpa pui saw mipa si thil hi a sawi liam puat puat a, a ngaihtuahna hi tak tak emaw a ti a, chutah amah vek hian a awih leh a, a thutak sawi ta mai țhin. Venkimi te chhungkaw zia chu kan hre tlang vek a, inngaitlawm leh țawng tamlo tak ani a, Kan naute sawidan phei chuan Venkimi nen in inngaihzawng kha Nutei tan a lo it si che a, dawt a sawi kual ta vak a nih hmel, Nutei leh Veni pawh naupan tet ațanga inkawm țhin an inkawm thei ta reng reng lo" a ti ta zel a. Eng eng emaw kan hriat belh țeuh a, Nutei leh a nu chu nuțha pangngai tak an ni nangin an pa ber chu pamham leh duham tak a thil duh zawng ah chuan zah pawh hrelo, dawt tlem sawi pawh hrelo a ni a, Kohhran mi em em thlarau hruai ni miah silo a nih thute an sawi a. Rin dan kan nei thiam tlang ta khawp mai "I fa a nih ka ring ve ngawt a, In in ang ru riau a, Mahse miin CM tupa fa an ti thul engmah chiang a awmlo, hetia inlo kal takah chuan an mualphona pawh a kiang duak dawn a nih hmel. Kan Zirlai naupang zingah mi pawisawi lo kan khua ang pawha kan nula chhuanvawr a ni ve a, sawn a pawm nawlh mai kha chu kan lainat khawp a sin" A ti a, Engkim tih fel thuai thuai ka duh takzet a ni.


Zanriah eikham ah chuan Veni te in lam pan chuan kan kal ta a, Kan thlenna veng leh Veni te veng hi a inhlat lutuk lo nangin Kohhran hran an ni thung a, Veni te in kawtah chuan motor kan din tir a, An inchu a eng at a, a hlui deuh țhiap in ka hria, a lunglen thlak viau, Inchung lam ka en a kan țhutdunna pawh a lo la awm bam bawk a, a lunglen thlak takzet a ni. Sir Sawma chuan kawngka a kik a kauh kauh a, Veni aw ngei mai chuan "Lo leng rawh" a rawn ti a, Kawngka a hawng a, "E zanriah in ei kham chauh a ni maw?" a ti lut a, "Sir ve teh mial chu" a ti a, Bena leh ka u hmel a hmu chu a tawp chat a, "awi U Bena te chu" ban chalh hian a ti a, Kei chu min hmu zui ve ta nghal a.


Inchhungah chuan chhuatah Mipa naupang hi toys che ve tawh lam hi a lo khal a, a hnawk rum a, Veni chuan thleng a lo sil mek a, Veni nu hmel a langlo, a unaute hmel a lang heklo, amah chauh chuan a lo awm a, Bena chuan mipa naupang chhuata lo țhu chu a țhut chilh a, "Va tlangval ve aw" tih pahin a pawm kang a, Ka pa leh ka u hmel a lang nghal, a chal a arh phak a, a meng bial kal a, a nui ver ver a "A pu" a ti a, kan nui ham ham a, "Hai chi a nilo" Bena chuan Veni en chung chuan a ti a, Veni chu a nui hak a, a sen ap ap a. Veni chua cher deuh nangin cher chhia a nilo tih a hriat, a hmel a dawldang deuh a, naute hnute hnek a haw ve deuh tih a hriat. Mahse a duhawmna leh a hmelțhatna chu ala ngai reng, Pawnfen fual a feng a, khawlum avangin tawnzau nghawng zau lutuklo a ha bawk a, a vun nalh zet mai nen chuan a inhmeh kher mai,. Room ațangin a nu a rawn chhuak a, "Aw... In lo leng e law, teh thut che u chuan" a rawn ti hlut a, a nu hmel pawh a tla deuh dak bawk a, "Nia, hei an rawn thleng thuta kan rawn haw thut a nih hi" Sir Sawma chuan a ti a, "Lo țhu rawh u" a ti a, naute in a chawh hnawk te chu a dahfel nghal zung zung a, Ka u nen an inpawm a, an in ang viau mai a.


Veni thleng sil zo chu ka ep chiah ah chuan a țhu a, a kun ngal a, Naute chu ka ban a "ka fapa chu kan pawm a nge" ka ti a, an ngawi țhap a, Bena nuih insum hmel chu ka en a, a nui puh puh a, "A fel a nia, a țap ngailo reng reng, nileng hian chhuat ah a țhu a, toys a khal a, a mut chhuah hunah thutlengsei ah hian a lawnkai mai țhin" A pi chuan nui chung chuan a ti a, ka lainat kher mai "Tinge engmah i sawi loh" ka ti a, a ngawi reng a "Hrilh rawh" ka tih pawn a ngamlo tlat a, mi lah chuan dawt an sawi deuh reng bawk nen, Miss Mizoram nen an innei dawn, tih thawmte kan lo hre ve bawk si a, kan ngawi ta mai mai a ni, buaina kan titam mai mai kan ti a" a nu chuan a lo ti vat a, Naute pawm chung chuan ka ding hluai a, "Kan hawn mai ang, a nu berin min duh bawk silo, engmah pawh min hrilh duh bawk silo" ka ti a, Veni chu a ding awk a, ka nui hmel a hmuh chuan a țhu leh vat a "Ruk sak chu a hlau mai mai" Bena chuan a ti a, kan nui ham ham a... "Rem intih chuan Inchungah kan ti ti lawk duh a, Kan duhdan kha ka u te nen lo sawi ho ula a țha ang" ka ti a, Veni chu ka kut ka pe a, ka kaia Inchung lama chho tur chuan kan 3 chuan kan chhuak ta a.


"Miin engtin nge an sawi che a, engtin nge i tawrh tlang theih zawk, tinge min biak duh miah loh a, Min do tlat le" ka ti a, Naute chu ka chul hliau hliau a, an sawi ang takin a tlei em em mai a, "Ka be duhlo che a nilo, ka be chak lutuk che,.Mahse biak che chuan biak zel che ka chak tlat țhin si a, I pa khan dawt a dawngsawng bawk si, chuvangin ka tan chuan biak loh zel che kha a țha ber a ni
lo a" a ti sap a, "enge dawt a dawnsawn chu?" ka ti a, "Kan nu țawng loh pui țawngah an puh a, Ka pa boral chhan mawhpuh ang che u in an sawi a" a ti a, "Anih ka pa khan enge i bulah a sawi?" ka ti leh ngat a, "IAS nih hi a tum ber a nia, a zirlai chuan inbe tam lo ula a țha in ka hria" a ti," a ti a, Engkim tlang takin kan sawi a, kan ti ti tawp lamah chuan "anih ka zir zawh tawh hnuah pawh min be chhunzawm duh si lo a?" ka ti leh a "Msi nen khan in inkawp ta bawk si a" a ti a, ka nui hak a "i rinthu a ni maw? kei pawh Abrahama nen khan inkawp ah che u ka ngai a, Mahse in lo ni der silo, Hetia kan awm hran reng hi a țhalo, Palai ka rawn tir dawn en mi?" ka ti a, "I thu thu a lawm" a ti sap a, Naute hmuh lai em a han fawh chu ka hreh si a.. Kan 3 chuan kan inkuah a, engemaw ti takin ka hlim veng veng a.


Kan sawitlan fe hnuah Principal leh a pa chhungte ho naktuk zingah an ko khawm ang a, keini pawn tukțhuan kan ei nghal ang a, a țul dan angin kan inkut suih hun tur ruat fel a, Ka chawlh lak chhung ngeia Inneih fel a, an nufa a hruai thlak nghal law law ka tum a. remte kan ruat fela, engkim kan sawi fel hnuah hawng turin kan inbuatsaih a, ka fapa chu ka pawm hla hla a "A hming pawh ka hre hleinem?" ka ti a, kan mangnghilh chiang hle hlawm. "Zoramkima a ni e" a ti a, a biangah ka chuk zauh a "Bawihte ka bulah i awm thuai dawn nia, tui deuhin mu rawh aw" ka ti a, a nu nen an mutna khumah chuan ka mut riai riai a, Rizai te ka sin fel tir hnuah chuan Veni chu ka kuah lawk a, duhthawh em em chuan ka fawp a, kan inhmuhlohna a rei tak bawk a niang... "U Zoram ka lawm takzet a ni, Ka nu in Rinawmna hian rah țha tak a chhuah țhin a tih kha ka hre chhuak, i tan ka rinawm ngar ngar a, A niang tih mai mai ah ka tlawm duh lo a, Nupui a nei an tih hma chu ka nghak ang, ka ti a tunah chuan ka rinawmna rah chu ka seng a ni e" a ti a, a mittui a sur zung zung a, "Țap teh suh, kan inneih hun ah chuan thihna vang a nih ngawt loh chuan keimah vangin i biangah hian mittui a luang tawh tur a nilo" ka ti a, lungchim zet chuan ka fawp leh ta a.


Engkim mai hi Lalpa țihna na hian a lo keng vek a nih hi, Khawvel nawmchenna chen dawn i la ka duh ang thal in ka chen ve thei ngei mai, Duh chuan midang mutpuiin kawp san thei ka ni, Mahse ka duhlo chu chu Lalpa Pathian ka țih vang a ni, rah țha a chhuah ta reng a ni. A tuk zingah an chhungkua an awm kim țhap a tih theih, Eiin zawng zawng kan tum vek a, Zingah chaw kan ei ho a, Kan sawi fel nghal vek a, Thla thar lo awm tur Ni tawp ber zing ah Kan veng kohhran hall ah kan inkutsuih a ngai ta si a, A ni chu kohhranah an lawmlut leh tawh kei erawh kohhran dan ațanga hnawhchhuah ka ngai chauh thung. Chuvang chuan Biak In hawngin kan inkutsuih thei talo dawn a ni. Chuvang chuan kan rualin an nufa in Aizawl ah an chhuk ang a, a nauten In an luah ve tho a vangin chutah chuan an awm ang a, Naute Birthday kan lawm te te ang a, Mumbai ah ngei kan bazar ang a, Chumi hnuah Inkutsuih turin kan inbuatsaih zui nghal ang. Tukțhuan te kan eikham a, Muangchang tawh loin Aizawl lam panin kan haw ta vang vang a, Ka u in motor a khalh a, Veni te nufa nen a hnungah kan chuang a, zinkawng nuam tak a ni. Kan kal lam kha chuan hlauthawng reng rengin kan kal a, tunah chuan Kimtea chhawn chhaih chungin kan hawng thung a dan a dang hle mai. Veni tawrhna hriatpuia mi sawichhiatna hriatpuitu mittui lawm avangin a tla thung, Engkim hi a thar sur vek maiin ka hria.


"Ka tupa diktak a nih hi, Hei a chal te a hnar te, a ke țhiah te reng reng hi ka pa chiah chiah a ni, Ka pa chuan hmu ve se In ang a inti ve ngawt ang, Ka pa chi chu tih punin a awm belh zel a ni, Timothya unaupa tur dik tak a nih hi" ka pa chuan pawm durh durh chungin a ti a. Ka pa hnenah thu diklo an hrilh a, a hrilhtute thiamlohna a awmlo, an hriatna a diklo mai zawk a ni, Nutei te chhungkua chu umzui ngai hauh lovin an kim ki a, an khua ah sawichhetu an ni tih hretu vek an ni a, khawlai ah leh Kohhran thlengin an tan hmun nuam a awmlo a ni ber ta mai. Kan thlen zan chuan kan family ka nu leh pa lama chhungte nen Zoramkima lawmna kan nei a, Ka pa in Banner mawi tak alo print tir a, Veni te ina kan 3 a kan thlalak an tar kulh a "Welcom Home Kimtea" tih an tar a, Veni'n a hmu chu a insum thei meuhlo a ni e. Ka pa chuan "Bawihi, ka thusawi ah khan hriatthiamloh tur a awmlo tiraw?" an ti te te a, "Nia, awm lo e, keipawn a hlawhtlinloh ka hlau ta em a ni" a ti a.. "Nia, Mahse a hnu zela dawt ka hriat khan min ti hel ta em chauh a ni" nui vur vur chung chuan a ti a. Kan nui ham ham a, Chhungkaw din turin ka inbuatsaih ve tak tak dawn ta a ni. Zanrih eikham ah an in ah ka thlah leh thlap a, a nuate chuan Kimtea an hmu chu an lawm kher mai, Toys a dawn te an han khal tlang a, an tupa chu an duat ve hle tih a hriat, an kil a an nuih a, an ri nawk nawk a ni ber mai, Kan 2 chuan Veranda ațangin ka thlir a "Pa neilo ang maia chawilian turah ka indah hman a, Mahse tunah chuan a pa diktak in a enkawl thei dawn ta a nih hi" a ti a, kan inkuah rial a.


"Engtin nge i ruaklo tih i hriat tirah khan i awm?" ka ti a, "ka duhthusam a thleng a lawm, Kan inhmuh hma lawk khan ka thi a hul a, Kan chetsual dawn khan ka duh chuan ka hnial thei reng che, ka hnial che chuan i tumlui dawnlo tih pawh ka hre reng, Mahse nangmah chan dawn che mah i la, i fa tal pai kha ka zuam tlat nia, amak lutuk, ka nu pawn huaisenna diklo a ni a ti hial, Palai tir turin ka pu ten min nawr a mahse ka duhlo, i hmingthatna a chhiat phah ka hlauh vangin, a hriat hun hun ah a hre ve mai ang, ka ti tlat a. Ka duhna min zah sak ta zawk a ni. Engtik emaw ah chuan engkim hailanin a la awm tho ang, mahse tunah chuan a mualpho ka phallo ka ti ve tlat a" a ti a.. Ka lainat a ka khawngaih a ka chhuang bawk si, huaisen ka tiin ka tana a lo inhuam thui em em mai te chu ka zak rum rum a, Ka laka rinawm taka alo awm chu ka lawmin ka inthiamlo hial zawk a, Kei ve chu Msi khan min fawp tlat si a ni.


Naute Piancham lawmni chuan Lawmpuina kan dawng hnem hle, Msi zarah CM fanu design ngain kan inthuam vek a, kan nalh ve hle, amah bawk chu kan inneih thuam pawh lo design turin kan ti bawk a, ka ngen tlat avangin Msi chu Veni dinpuitu ah kan ti a, a hnial viau dawn nangin a pawm ve hram a, Veni nen inhmelhriat lo tawp chu an ni biklo bawk nen. Ruai kan țheh a, a tukah Mumbai ah Reubena leh Msi nen kan chhungkua bazar turin kan liam thla a, Bazar han tih ah eng tehual chu lei tur kan nei lo, Kan theuleu a ni ber mai. Prime Minister hnenah ka thiltawn chu ka hrilh a, Ka dil belh ni kiah lovin Chawlh min phalsak a, Khawvela Chawlh hmanna tur atana ka awh ber Havana ah ngat honeymoon hmang turin kan inbuatsaih ta bawk a. Engkim a tluang purh a ni tawh mai, Veni pawh rilru hahna tur leh vei em em tur a nei tawhlo bawk a, a hmel a eng sawt sawt a, a thau tarh a, a hmel a țha vawng vawng a ni ber mai "Ka lo bel chiang lo a, a hmel a lo țha hle mai" tih chu an comment dan a ni tlangpui bawk.


Kan Inneih ni chuan mihring an tam ve hle mai, Zingkar mah nise kan kohhran hall lian zet mai chu kan khat hneh hle, Chutah ka pa telna Pavalai hoin hnatlang meuhin Hualhliap an zar duai bawk a, chumi ah pawh chuan an khat hmuk a, Kohhran dan thianghlim phaklo mah i la kohhran dan thianghlim ang maiin inkhawm an tam a, Veni hmel chu a eng phet phet hi a ni ber mai, A duhawm in a hmel hmuh a nuam em em a, a hlim tih a hriat ngawih ngawih bawk. Thla lak chhung pawh a rei hle, Kimtea chu an la lawr hle bawk a, nuam a tiin amah a tlei chi a ni bawk nen a tlan kual vel thul nuihna tur a tam hle. Tukțhuan ruai puar leh tlai takin kan kil a, Chawhnu dar 2 a thlawk chhuak turin Lengpui lam kan pan zui nghal a, Ka nu leh Veni in Delhi thleng min zui a, Kimte a chu ka nu chuan a chang deuh chawt a ni ber mai.


"U Zoram, Khawvel fang chhuak dawn pawh ni i la i kiangah chuan engmah ka huphurh lo ang, Mahse Keimah chauh chuan Kan khua leh Aizawl inkar te kha hla ka van ti tak, Khatia ka ruaklo tih ka hriat khan, kan khua ah hawng turin ka insiam a, Sumo ah ka chuang a, ka chuanpuite khan engmah an hre ve der silo, Mal leh khawhar ngawih ngawih in hun ka hmang a, Kan khua leh Aizawl inkar kha a tawp thei dawnlo emaw tih tur khawpin a thui a, ka khua a har em em a, I kianga awm a thlamuang taka muthilh siai siai kha ka chak ber. Ka țah a chhuak a, ka luak a chhuak a, engkim mai kha ka ning ngawih ngawih a, kan motor chuanna kha khamah tlanliam tur niten ka hre tlat a, Ka ngai ngawih ngawih che a, Chawimawina i dawn nia i inthuamna i inhmeh ziate kha, Engtikah tak a bula mu in, ațang bel leh ang maw? tiin ka suang tuah a. In kan thleng a, ka nu ka hmuh rual khan lungchhitana leh Khawharna khan min bawh a, ka insum zo tawhlo ka nu ka kuah a ka țap ta ngawt mai a. Ka țap zo chu ka zang huai thei hial in ka hria." a ti a, ka kutah chuan a kuah a, ka darah a lu a nghat a, Inneihna thuam a la inbel hnalh a, Keipawh ka la inthlak chuanglo, Airport ah Ka driver ten minlo hmuak ang a, Prime Minister chenna ah kan lut hmasa ang a, Inneih lawmna tawi kan nei leh lawk dawn a, chuvang chuan kan thuam inthlak lo turin PM in min ngen a ni..

"Tunah chuan kan nghahhleh em em.xhsng dun turin kan awm tawh a lawm, Rinawmna rah chu a tawpah hlimna in a khat țhin tih hrechianga tawngtu kan ni tawh a, midangte zirtirtu ah leh hrilhtu ah kan țang thei tawh dawn a ni.. Ka hmangaih țhin che a, ka la hmangaih reng che a, ka hmangaih zel bawk ang che.. "tiin a chalah chuan ka fawp zauh a.. Thlawhna thlawk kang nul nulah chuan nghet takin min chelh a "Kimtea saw engtin nge a awm ve ang le?" a ti sap a, a meng ngam lo a, a maimitchhing tlat a.. Kan piaha Kimtea leh a pite 2 țhu tlar țham chu ka va en a, Kimtea chu a rawn hawi phei a "A pa" a rawn ti lauh a, kan nui dun hak hak a..


A tawp ta..


Ka thawnthu beitham ve tak mai leh chhang khat tak, Chhiar nuam em em fahranlo min chhiar sak a, Min ngaihhlut der ve tute zawng zawng chungah lawmthu thinlung takin ka sawi e... Mipa mahni thawhchhuah a harsatna Paltlang ngam lo a, Nawmsak duh luat vanga nupuite chawm hlawm nih hreh miahlo te hi Mizo mipa an ni ve si chu a ni a.. Kan hnam kan ram chhanhim nan Mizo mipa ten puanven i sawi chhing sauh sauh ang u...

Thiamlo taka ka kutchhuak min chhiar sak ve țhin avangin ka lawm em em e. Dam reng ng che u...
- Tochhong Ruata.
(VAwiinah ads click lo in la awm a nih chuan a hnuaia advertisement milem khu in lo click vek dawn nia)

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)