TRAGIC COMIC BY Tochhong Ruata

Ngaia
Site Admin
Posts: 25813
Joined: April 30th, 2016, 4:07 pm

TRAGIC COMIC BY Tochhong Ruata

Unread post by Ngaia » April 8th, 2019, 9:50 pm

yr57harh.jpg
yr57harh.jpg (11.63 KiB) Viewed 8967 times

TRAGIC COMIC.

"Lal U, Zan ah enge i tih dawn?"
"Ka hrelo, Chhotra Beem ka en ang"
"Uang lo teh, I tanpui ka mamawh a nia"

"Ka uaang hleinem, Chhotra Beem ka en dawn ka tih kha"

"I hman tihna a nih chu, Man ka ei dawn a, min kalpui ang che aw?"

"Khawiah maw?" " Dar 6:30 ah ka lo inpeih ap tawh ang, Dar 7:00 tan hun a ni a, tlailo hram ang hmiang?" "Ka rawn kal thei dawn em ka la hrelo" "Hmmm.... vel a che, Dar 6:30 ah chuan aw...Hey ka bai chhuan a liam dawn nih phawt" a dah ta daih a, Ka phone chu dawhkan ah chuan ka dah a, Ka naupan tet atanga ka kawm ngaih em em, ka ni fanu Mali khawsa zia chu ka nuih pui suk a, Ka dawhkan a file intiang ur chu ka en a, Signature ka pek loh awm a awmin ka hrelo bawk a, Banga Sana pui tar chu ka en a, Dar 4:50 a ni bui tawh a, hnadang emergency awm ka hrelo bawk a, Bell ka hmet ri a, Karlo ah Pu Zova a rawn lang nghal a "Pu Zo, hei file hi dah chhuak la, Driver khan Motor lo buaitsaih rawhse aw" tiin ka laptop leh thil dang ka hawn tur te chu ka bag ah chuan ka khung pah bawk a. "awle, Sir, kan bang tawh dawn tihna em ni?" Pu Zova chuan a ti leh kher a, " Bang tawh mai ang, I hrawk ka hrek rei tawh lutuk ang e" tiin ka fiam zui a, a nui huk huk a "Ka tlai zo vek tawh a lawm, Dar 4 thleng bak wine shop an hawng lova" a ti a, kan infiam zui bawrh bawrh a.

Office banah Ka inbual fai a, zanriah ka ei kham ah Mali chu sawm turin Ka Inkhalh chhuak leh ta nghal a. November Thla chawhhnu lam a ni baw k a khua avawt chho ve tan tawh hle, An in ka thleng a, Motor atanga ka chhuk hma hma chuan Mali chu a rawn tlan chhuak nghal a 'i van rei ve, ka tlai tep a lawm, Kal nghal ang" arawn ti nghal bawrh bawrh a, Thil sual ti angmaiin ngawi reng chuan ka lo en ringawt a, Motor seat a rawnthut pah chuan Darthlalangte a phawrh chhuak a, a mithmul a dum nghal mawlh mawlh a, chumi zawh ah a lipstick chu a phawrh leh a, a hmui a hnawih zui leh nghal zat a. Ngawi reng chuan ka lo en ringawt a "Hey, Enge? ka hmanhmawh ka tih kha kal vat ta che?" a ti a, min melh ram ram a, "Awle, Ka Pi" tiin ka motor chu ka tinung a, "Khawi vengah nge kan kal dawn kha?" ka ti leh te te a "Ramhlun South ah mawle, ka hrilh vek tawh che kha" a ti hmak a, "I sawi ka hrelo a niang" tiin Motor chu ka tlanrtir zui ta nghal a.

"Mam, Sangpuii te hi chu ka khawngaih tlat thin" a rawn ti chhuak hlawl a, "Tunge chu chu?" ka lo ti ve mai a, "Kan kalna tur hi mawle, I hrelo em ni, a nuhrawn bula awm ka tih kha?" ati zui vat a, ka ngaihtuah let ngial hnuah pawh ka hrechhuak zo chuang lem lova, "I la hmu tam vak lova, Chuvang chu a nih dawn chu, i hmuh hunah i hre mai ang, Pa Zuia hi chu ka ngei tlat thin, fanute thlavang pawh hauh ngam lo, nep lutuk mai" a ti hlut a, "An diklo te pawh a ni ve thei tho a, Enge i lo helh ve em em ngawt" ka lo tive boh a, "I hrelo a nih kha, Sawtiang nu engmah thawk peih derlo a inti lal ve em em ringawt lehnghal" a ti zui hlak a, A phone a rawn rik tak avangin kan ti ti chu kan tawp chawpchilh nghal a. Mali chuti khawp a lung ti awilotu chu a fel vak dawnlo niah ka ngai hmak a, Mahse engtiang taka khawngaih thlak nge an nih erawh ka hmuh veloh miau avangin ka suangtuah thiamlo thung.

Ramhlun South kan thleng a, Kawn ah Motor kan dah a, Step ulh ve deuh ah Keiin kan chhuk leh a, Step sir tawn tawn ah chuan In a lo awm thluah a, In tha tak tak kan kalh pelh hnuah Kawm karah kan kal leh a, Assam Type Lian lo tak leh hlui ve tak tawh Ding awn deuh laih tawh kan pawh a,Chutah chuan Silpoline pawl a lo i zar ve a, YMA thuthleng 20 emaw vel hi a lo inrem ve nial a, Kawtah chuan mi tlem an lo thu a, Kan hmel an hmuh chuan Hmeichhe 2 hi an rawn kal vat a, Mali thiante Remremi leh Hruaii an lo ni a, "Mam i lo kal ve a law, i vanfel, Inchhung ah kan lut nghal mai dawn em ni?" Hruaii zawk chuan a lo ti vat a,Chhan pawh ka chhang hman lo, an kal ta daih a, Lai deuh chuan ka ding ta reng a. Ka hnung Kopang dep a Thuthleng awl awmah chuan ka thu ve ta ngawt a. Mi chetlavel chu ka en kual vel mai mai a, Sangpuii a tihte In chu 199-- tih bawr vela sak tawh tih hriat tak ani a, An In thlang lam leh chhak lam ah chuan concrete building lian tak tak hi a ding khup a, In chu a chhawng ve ngei nangin a nghet em em tawh hmello thung, an in a awm te pawh han chuti teh ual tur chu an ni lemlo hlawm, Mahse an phak ang tawk tawk chuan an inbuatsaih nasa ve hle tih chu a hriat theih mai. "i lo lut ve duhlo em ni?" Malin a rawn ti a, "hetah ka lo nghak ang che u" ka ti a, Meizial ka zu hlat hlat a. Tleirawl leh Rawlthar 6,7 vel hian Thingpui niawm tak buaipuiin ka thutna piah lam deuhah chuan an bial ve laih laih reng a, Chutia ka awm reng lai chuan "Sir, ve teh tlat che chuan, enge i rawn tih teh daih a?" tiin kan Staff pakhat Pi Zuali kan tih mai chuan min rawn bia a, "aa hei Ka Unaunu ka rawn kalpui a, Man ei tur a nih hmel, Enge nang i tih ve zawk a?" ka lo ti a, Ka bula rawn thut pah chuan "Kan Pa Farnu Fate an ni a, Man kan ei ve dawn a" a ti a, "a lo nih tak chu mawle, Hei tunge pasal neitur ber pawh ka hrelo, ka lo ui chuang hawi ve mai mai rih a nih hi" ka ti a, "Ngawirawh kan pa ka zuk hmu lawk ang a, ka rawn thutpui dawn che nia, Hmelhriat neih lohna hmuna awm ngawt chu ninawm ve deuh ania" a ti a, Inchhung lamah chuan min luhsan zui ta a.

"Kan Pa farnu tak hi a boral tawh a, unau 3 chiah an ni a, an nu hrawn hian Fa chhawm 5 a rawn nei bawk a, an harsa ve khawp a, an khawngaihthlak tak tak a ni" Pi Zuali chuan a ti bawrh bawrh a, ka zawt pawh ni silo chutiang min hrilh ngawt chu ka hrethiam chiah lo, " a nih tak chu mawle, Eng mi nge pasal a neih tur hi?" ka ti let ve a " Awiii Ka chiang chiah bik lo, kan ral hriat dan chuan Sawmi hmelhriat a ni awm e, Pa upa ve tawh lam deuh Pathlawi Fa pawh neilo, Sumdawng a ni awm e" a ti a, Chutih lai chuan Mi an rawn thlen belh ve zel a, Pi Zuali chuan chung mi lokalte chu minlo hrilh fiah sak zel bawk a, ka bulah a rawn thu lo ang tih ka hlau rilru hle. "Saw saw, Sangpuii chu a nih saw, a bula Mipa naupang ding saw a nuta neih chhun a nih bawk saw" a ti a, Pi Zuali hawina lam Veranda chu ka en a, Nula keimah ni rual vel tur hmaitlak chhelo tak leh Nui mawi zet mai leh amah ang tho Kum 13 emaw mi vel tur Mipa naupang ding dun hi ka zuk hmu a, Mipa chuan a u chu engemaw a hrilh ni ngeiin ka hria, "A hmel a tha a ni a, Officer pakhat in neih a duh tehlul nen tuna mi hi a nu leh pa ten zuk thlansak tlat a" a lo ti zui vat a, "An duh zawk tihna a nih dawn chu" ka lo ti boh a, "Saw Mipa lam pawh an rawn thleng ta a lawm" a ti a, Kan kalna lam chu ka hawi vat a, Pa Dulkiar tawi satha hmemhmawm deuh, Lukhum parh hlai zet mai khum leh Pa Chersang lam deuh, Zo lo chung chunga Kawrchung ha tih hriat taka zawr hnuang mai, leh Kum 40 emaw ni tawh tih hriat tak chal thui lam deuh, Ngo vengvung tak, hmelchhia chu nilo mahse hmel tha tak chu nibik lemlo, Inchei tunlai lui tih hriat zet hi an rawn kal a, an hnung deuhah chuan Amah angrual hmuihmul nei hi a rawn kal ve mek bawk a "Chalthui deuh saw mopa tur chu a nih saw" Pi Zuali chuan a lo ti vat a, Ka nui huk tep a, ka insum thei hram, Sangpuii hmel ka zuk en leh kher a, Hlimlo taka hlimlui hram hram hmelpu chung chuan Mikhual te chu a lo dawngsawng a, An Inhmeh lo dun lutuk chuan ka nuih a ti za a ni ber mai.

Chutiang a Palaite an rawn thlen takah chuan hun an hmang zui nghal mai a, Man leh Mual inhlan hmain Palaite leh Mo chhungte lam atangin Thu an sawi a, Chumi hnuah Man leh mual an inhlan fel a, Inchhung lam chu an nui leh dar dar thin a, " Kanpa chu a lungawilo leh dawn mange, Thusawi tir an tumlo tak tak a nih dawn saw, Sawmi sual zia hi chu aw" a ti vawng vawng a, Chutiang a Pi Zuali a insawh mek lai chuan Inhnuai lam atang chuan Kum 20 emaw lek tur Hmeichhe 2 rawn inzui chho ka zuk hmu a, a hmasa a kal zawk chu samtawi lam deuh thau mum nalh mai a ni a, a hnunga rawn zuitu erawh Cher Sa pan lam deuh, Lian lutuk bik lo, Mahse Inphut mawi tak mai a ni thung. an rawn chhohna chu engin a chhun thei nangin an hmel a hmuhchian theih chiah lo, Chutia ka en reng lai chuan Kawtlai engin a chhun phak chu an rawn thleng ta a, Ralkhat atang pawha ka en chik em em chuan ka mit a la ta zar mai le, A hnung zawka rawnkal chuan ka mit a men sawn tir thei talo a ni ber mai.

Nulian vaklo, 5 ft emaw a aia hniam emaw tur lek nimahse Van thleng khawpa ropui hmelpu zuk ni thung a, A mitmeng chu a val kalh ni maiin ka hria, a sam sei lutuk lemlo tih hriat tak chu bawrchhawr lam lek lek hian bakilh in a tawn tawm ve nial a, A thuamhnaw inbel chu tha lemlo mahse a i hmeh hle bawk, a taksa lang thei chin chin chu a var parh ni berin ka hria, Chutia ka en reng lai chuan "Puitei a nih saw, Sangpuii nau Saizikpuii a nih saw" Pi Zuali chuan rawn ti a, ka mitmeng a lo hmu em ni ang ka zak ru deuh chem chem a, "A bula mi saw kan Fanu a nih saw" a ti zui Zat a, "Fa i va nei nula tawh ve" ka ti ta vel ngawt a, "Aaa sawmi u saw Mipa a la awm mawle, Sipai ah a tang a, Arunachal ah a awm mek mawle" nui hak hak chung chuan a ti a, Kan lam pan chuan nula 2 te chu an rawn phei a, Pi Zuali bul an thlen rual chuan Puitei a tih zawk chuan Pi Zuali chu a kuah lawk a, a tap ta hawk hawk a, "Siii...Insum rawh, Puite miin an hmu ang che, a thih san che u pawh a ni loa, Chutia Mithi ang mai a tah chi a ni nem" a ti sar sar a, Puitei erawh a inhnit hlawp hlawp thung a, Pi Zuali fanu pawh chu athu kun lap a, a tap ve fap fap bawk a. Awmdan pawh kathiamlo, ka hawi vak vak ringawt ni maiin ka hria, Inchhung lam ah lah pawn lamah boruak rit deuh aawm tih hrelo in an nui ham ham reng a, "Insum rawh, hei Tlangval a thu reng a nia, a nuih zat palh ang che" Pi Zuali chuan min en chung chuan a ti a, Tlemin a ziaawm tawh bawk a, a inhru nak nak a, a sam tawn chu a tawn tha malh malh a, "Thingpui In rawh u a, ka va la ang e" tih leh thawh a rual nghal a. A chevel chu ka en reng a, ahma lawka Lungchhe em em nisi kha, midang bulah chuan hlim hmel deuhin a va nui var var a. Tray ah thingpui a rawn chawi phei a, pawna thu mi tlemte chu a rawn sem phei nghal zel bawk a. "An unau hi an inngai lutuk a a buaithlak a nih hi, Sangpuii hi an Nu ang maiin an en thin a, Pasal a nei tur hi a huphurh ve lutuk a i hrethiam dawn nia" Pi Zuali chuan a ti a, "nia, ka hrethiam a lawm, Hetiang hi a thleng chawk a lawm" ka ti liam ve mai a. Kan thingpui tur chu min rawn pe a, "Thingpui hang mai mai a ni a" a rawn ti thawp sap a, Chutia a ti min rawn en lai chu ka lo en reng avangin a sen ap ap a, "a hang hi ka duh ber zawk a lawm" ka lo ti a, Kha second chhung lek khan ka tuiral cchiang hle niin ka hria. Ka thingpui in laite chuan a chezia chu ka mitmei ru reng a, "Pi Zual, Sangpuii hian enge a zirthlen?" ka ti a, "Ngawiteh, Sangpuii hi a B.A niin ka hria, Private Schoolah athawk ve a, Puiteii erawh Pawl 10 a passed hnuah Sikul a chawl nita in ka hria, Siamtea sawn Pawl engzah nge a zir chiah ka hrelo" a ti niah niah a.

Chutihlai chuan Inchhung atang chuan Palaite leh Mo neitu leh a thiante chu an rawn chhuak a, An hnungah cchuan Sangpuii leh a thiante 3 an rawn chhuak a, "Saw saw Sawmi chu a nih saw,a bula ding saw Sangpuii pa Kunga a nih sawh" Pi Zuali chuan a ti a. Veranda a nu upa ve tawh hmel lam deuh, Dul diar luah mai, Satha mum tul nibawk, Incheina uar deuh inhmeh hleilo a ni tih hriat tak, Sam kir tawi lam, Kuhva thial suah suah mai leh Pa cher dawldang lam Meng phelh phung, Meng khur deuh dak hi ka zuk hmu tel bawk a, a mitmeng chu Puitei mitmeng ang hlein ka hria, an Makpa te haw tur chu a fiam zui lang lang a, Sangpuii te thian ho chuan Step thleng an thlah a. Chumi hnuah Man an sem zui lehta nghal a. Man an sem tak avangin Pi Zuali chu Inchhungah a lut a, Ka bulah chuan Puitei an tih leh Pi Zuali fanu chu an la thu a, Chutih lai chuan Pi Sawmi an tih chu a rawn chhuak a, a hawi vual vual a, "Puite,Bawihi hetah lokal teh, ka va mamawh che ve" a rawn ti lung lung a, Puitei chu rang taka tho in A nuhrawn awmna lam pan chuan a kal vat a, Enge an sawi chu ka va hrephak chiahlo nangin Pi Sawmi chuan Puitei chu eng emaw thilah a tir dawn niin ka hria, a bag a zen rak rak a, Pawisa a phawrh a, Rs 500 tlang niawm tak chu a pe a, Puite chu kan thutna lamah a rawn phei a, "Nute, Dispo Cup lei a ngai a nih chu, min kalpui la" hmel nur nang chung hian a rawn ti a, "awi khawiah maw? tunang zanah khawi ami nge kan lei ang, Eng tur nge?" Nutei ( Pi Zuali Fanu) chuan a lo ti a, a peihlo hmel hle bawk a, "Vengchung ah" a ti chuai raih a, "A van hla emem, ka hlau deuh a sin, hei dar 10 a ri tep tawh si a" a ti bai bai a, "I hriat vek kha, kan kal ngei ngei a ngai a nia" Puitei chuan a ti a, Veranda a ding a nu lah chuan "Kal vat rawh u, an inkhar hman ang" a rawn ti lung lung a, "Naktuk zingah lei mai ang" Nutei chuan a ti let ve a, Pi Sawmi chuan ram hmak hian "Saizikpuii khawi keimah kan kal ang e" a rawn ti thur thur a " Kha, keimah in ka kal mai ang" ti a a nuhrawn en pawh en ngam tawhlo chuan Nutei chu a kalsan zui nghal a, "Kal lo mai rawh" a nu chuan a ti leh kher a, Puitei chu a ding a, "Ka han kalpui a nge" ka lo ti ta vat a, Nutei chu ka hui zauh a, "Kan 3 in han kal ang u" ka ti zui nghal a, Pi Sawmi chuan en pawh min en chuanglo chuan a inher hmuk a, "Rei reng reng suh u, Inti no thei lutuk mai" a ti zui bai bai a, Nutei ka sawm tel ve takah chuan kan 3 chuan Kawm karah kalin kan inzui ta hnak hnak hlawm a.

"I nu hi chu a ti mak ve thin reng reng, Tunah Dispo lei tura intirh, a hma daih khan lo lei lawk tur a nia" Nutei chuan a ti niah niah a, ngawi reng chuan an bulah chuan ka kal ve zel a, "Kan mamawhna awm tur ka hrelo reng reng, Naktuk a mi tur YMA no kan hawh vek tawh sia, Eng atan nge maw a tih dawn le" Puitei chuan a lo ti niah niah bawk a, "a sual vang mai mai a nih dawn chu" Nutei chuan a rawn ti hlak a. An bulah ngawi renga kal ka awm tih an hrechhuak a niang inthiamlo hmel deuh chuan "Kan Fiamthu mai mai a nih kha" Puitei chuan za vaklo a nui chung chuan a ti a, "Ka hria a lawm" ka lo tive mai a, Chutihlai chuan kan lam pan chuan Tlangval 3 hi an rawn kal thla ve mek a, "Kima, Dawr inhawng a la awm em?" Puitei chuan a lo tivat a, Kima niawm tak chuan "Aih awmtawhlo, Pi Muani te pawh an inkhar tawh, enge in lei dawn a?" a ti a, an ding a. "Awiii....avan buaithlak tak, Dispo cup kan lei dawn a?" Puitei chuan a ti nang nang a, "Chanmari Kawnah Vai dawr kha inhawng, an hawng rei thei khawp mai, chutah chuan a awm ang" Kima bula ding chuan a lo ti a, "awi...a hla emai" Nutei chuan a ti a, Tlangval ho chu an kal sawn nghal bawk a, "Kan lei loh chuan min hau dawn a sin" Puitei chuan a ti leh a, "Ka motor in kan kal mai dawn nia, Kawngpui ah khian ka dah a lawm" ka lo ti vat a, "awi a zahthlak e" Puitei chuan a lo ti vat a, "A harsa hleinem hauh i tuar ai chuan kan kal ngei a ngai sia lawm" ka ti a, an nui var var a. Motor kan thleng a, Chanmari kawn lam pan tur chuan kan Inkhalh chhuak ta nghal a.

"Thianpa, awh...Thianpa ka tive ngawt che a, (an nui dun hak hak a) enge kan inah i rawn tih ve reng reng a?" Puitei chuan a rawn ti a, ( Back seat ah an thu dun a) "Mali ka rawn kalpui a" ka ti nghut a, "eee U Mali thianpa maw i nih, U Mali fel zia hi chu aw..an hausa si a hmeltha bawk si" Puitei chuan a ti ta duah a, "Nilo, a thianpa ka nilo" ka lo ti vat a, "Ka hrethiam e, Kan lawm lutuk, min kalpui ve avangin" Puitei chuan a ti leh , a bula ngawi renga thu Nutei phone khawih lai chu a bihpui tih hoodglass atang chuan ka han hmu thei a, "Engmah a ni lo e" ka ti satliah ve mai a. Kan Kal tumna chu kan thleng a, Kan lei tur chu kan lei fel hnuah In lampanin kan tlan let leh ta nghal a. In kan zuk thlen chuan "In va rei em em ve, I pa in a sawilo a, vawiin ah a lo lei leh daih tawh a lawm, Pawilo, naktukah in thleng leh mai dawn nia, Thingpui no khawm rawh u, Vala, tikhan lo nghak lawk mai rawn, an chemuang thin lutuk a" tiin a nu chu a lo tawng liam phur a, 'Vala' a tih chu keimah ngei niin ka hria, chutih lai mek chuan "Mam, khawnge i lo kalbo daih a, Hei Sangpuii chu a nih hi, Sangpui hei hi Mama ka tih chu a nih hi" a thian dangte nen kan bul an raan thlen rual chuan Mali chuan a rawn ti a, "aww i u a ni maw, Saizikpuii Bialpa emaw kalo ti pek a," Za vak lova nui chung chuan Pi Sawmi chuan ati liam puat a, inchhung lamah a lut zui nghal a, "I fel hle mai, naktukah rawn inkhawm ve ngei ngei ru a, Mal, In rawn tel a ngai a nia" Sangpuii chuan a lo ti ve vat a, ka michuan zawn a nei a, mahse ka hmu tawh mai lo, Nutei erawh Pi Zuali leh an pa nen an 3 chuan an rawn chhuak mek thung a...

"Sir, Hawn intum ta mai em ni?" Pi Zuali chuan a rawn ti a, a fanu nutei chu a mengphawk hra a, "Pa-a hei hi kan Pu ber a nih hi, Pu Mama kan ti mai, Hei hi ka pasal Rohminga chu a nih hi, hei hi ka fanu Nutei a nih hi" Pi Zuali chuan a rawn ti bawrh bawrh a, "a ni maw? i lo kal ve reng a ni maw?" Pu Rovachuan arawn ti a, kan Inchibai a, "Thianpa te Puitei khan a tivel che a, hriase a zak ngawt ang" Nutei chuan nui hawk hawk chung chuan a rawn ti a, kan nui ham ham a... Kan ti ti khawmuan leh deuh hnuah Kan Inmangtha a, keini pawh kan haw zui ve ta nghal a.

"A nu boral hma chuan an khawsa thei ve tho thin a, An kawmchhak a In lianpui kha Sangpuii nu Cancer enkawl nan an hralh tawp a, an awmna chiah kha an chang ta a nih kha, Sangpuii lehkhazir lai a ni a, ka khawngaih tak tak a ni, Puitei kha a hmeltha tehmai a nia, a nu achhun lutuk a, apain a duat viau a, Nu Sawmi hian a thik tlat thin a, Chuvangin Puitei hi a ti duhdah deuh bik niin ka hre thin, Pawlsawm a pass ve hram a, Sikul a chawlh tir a, Puanthui a zir vel ta mai mai a, Mi dawrah a inhlawhfa ve thin a, an khawngaih thlak a sin aw" Mali chuan ti bawrh bawrh a, Sangpuii leh a naute chanchin chu min hrilh mawlh mawlh reng a, Ngawi reng chuan ka lo ngaithla a, Mahse ka mitthla ah Puitei hmel fiah fel khap mai leh nunem hmel deuh chu ka mitthla reng tho a, In ka thlen hnu ah pawh ka ngaihtuahna a luah ta ngut ngut reng a, Ka muhil thei mai lova, ka let ka let a, Kha nula khawngaihthlak tak kha chhanchhuah ka chak takzet a ni.

Office lamah kan buai deuh avangin Inneihna lamah ka tel ve talo. Mahse, nilengin Puitei zun chuan min sawisa a, min luh ngut ngut a, hna ka thawk sawt thei lo kher mai. MCS ka inziak tling a, chumi hnuah kum 3 vel Rural Area lamah BDO hna ka thawk leh a, Chumi hnuah Department Pakhat ah Joint.Director in ka awm leh a, Tlangval Senior lam ve tawh ka ni nangin ka hmel a naupan hmel deuh bawk a, Ka kum an ring diklo tlangpui thin reng a ni. Ka hnathawhna ah ka serious em em a, nuam ka tiin Office chu ka khamlo a ni deuh ber thin, Mahse vawii zet chu ka ning rilru hle, Ban thuai thuai ka duh rum rum a, chutiang chuan ning em em chung chuan Tlai ban thleng chu ka office tluan thei ve ta hram a. In ka thleng a, ka inbualfai a, ka khumah ka mu a, Nileng a ka rilru luahtu Puitei hmelbawk chu mitthla chungin ka maimitchhing ta vang vang a.

Puitei ka hmelhriat hmasakna ber atang a kar 2 hnuah Engemaw thil a hak tur Kawrchung thui tir turin ka nu in min ti reng bawk a, Kawrchung thui tir tumin ka nu nen kan chhuak dun a. Ka nu hi Keimah ang tho a MCS ni a ni a, Tunah Health Department ah Director in a awm mek a, Kum 1 hnuah a pension dawn tawh thung. Kapa chu IFS (Indian Forest Service) niin Tunah PCCF a ni mek thung, a ni pawh Kumin ah a penson ve tawh dawn nghe nghe. Kei chiah fa min nei a, Mahse ka ni fate 2 hmeichhia ve ve kan bulah an awm thung, Aizawl Khawchhuak dik tak kan ni a, Kan Chhungkua pawh kan hlun ru viau bawk. Ka nu hian ka inthuamna tir engkim a buatsaih vek thin, Tunah pawh Kawrchung min sawipui leh ta pek a ni, Kawrchung hak ka peihlo thei em em a, Mahse ka hna nen hak hun ka nei nual si a, Chuvangin hak 1 lek neilo turin minti fo thinreng a ni.. Vawi tam tak min nawr hnuah ka remti veta nge nge a, tichuan Kawrchung lei tur chuan kan chhuak dun ta nge nge a ni.

'Fashion Inn' an tih ah chuan kan lut dun a, dawr neitunu chuan minlo dawngsawng tha kher mai, "Pi Rebeki te ve hlawl chu, Lo leng rawh u, enge in duh, Pu Sapa Kawrchung tur bawk em ni?" a lo ti sawk sawk a, Thutna minlo kawhhmuh na ah chuan kan thu a, "Nilo e, Mama zawk hi a nia, Tunlai Design in nei tharlam tha bawk em?" ka nu chuan a ti a, "Heng ho hi kan neih tharlam deuh chu an ni mai" tiin Album pakhat hi a rawn dah chhuak a, ka nu chuan a keu a, Kawrchung an thui tawhsa Mipa Model an hak tir thlalak chu an lo tar tiar a, "a nalh hlawm hi, Tu design nge ni hlawm a?" ka nu chuan a ti a, "duhzawng i nei em?" min ti zui a, "Aw.. Nula fel leh themthiam zet mai kan chhar thar a, Kan Dawrah a rawn zir a, kan chhawr zui nghal a, khatah khan induh kha tlang ula, Mesurment kan la dawn nia" Dawr nneitu chuan a lo ti nghal zung zung a, "A that hlauh chu, Mam, enge i duh, hei hi a mawi, hei pawh" tiin ka nu chuan kawrchung chu min thlanpui malh malh a, "Ka hrethiam chiah lo" ka ti a, " E hei a rawn kal a lawm, Puite hei Mama hi han en la, eng design nge a pian nen inmil thei tur han thlang te " Dawr neitu chuan a ti a, ka phu deuh zawkin ka hria, "Puite" tih ri chuan min tiphu zawk a ni ber. Ka Hawi chhuak vat a, Zan tam tak hmuh leh chaka ka lo suangtuah thin ngei mai Puitei chu a lo ni a, "E nagmah maw? hetah i thawk a ni maw?" ka ti a, Nui var var chung chuan "Nia hei ka thawk a nih hi, Eng ang lam hawi nge i duh a?" min ti a, "Ka hrethiam chiah lo, kawrchung ka ha ngailo lutuk a" ka ti a, "Tihian ti ang, In puan duh zawng leh Color induh zawng han thlang phawt ula, Mesurment kan la bawk ang a, A nalh tur angin Puitei lo desing maise, Naktukah In rawn kal tha leh ang a, a design ang chu induh chuan kan thui thei nghal mai dawn tih na ani mai" Dawr neitu chuan a lo ti a, "a tha viau tak ang chu, hak 3 lai kan duh lehnghal, A Pawduk dum lam lek lek, A sen buang Velvet puan leh Paw eng duk lam deuh nise" ka nu chuan a ti a, kei aiin Min hrechiang zawk a ni techek a niang ka e aw liam ve mai mai a ni.

"Hetah lokal rawh, Mesurment chu la ang hmiang" Puitei chuan a rawn ti a, Inhnuai lam kailawn ah chuan kan inzui chhuk ta a, Inhnuai ah chuan Mipa leh hmeichhia Kawrchung, Kamis, T-Shirt, Hmeichhe kawrfual leh Naupang etc hak thuamhnaw an lo thui sap sap hlawm a, Bangkil bera Puanthui khawl awmna lam chu min panpui zel a, "Hetah hian lo ding rawh aw" a ti a, Dawhkan chu a dap rak rak a, Measuring Tape a rawn phawrh a, Lehkhapuan leh pensil nen a inchhawp a. Ka hma ah chuan a ding a, ka dar chu a ban pha chiahlo deuh a, "i van sang em em, kun deuh mai rawh" a ti a, a nui hak hak a, "Thuthleng hniam ka dawhsan kha khawnge maw a awm le" a ti zui nang nang a, "Hetah hian a awm" nui hawk hawk pah chuan nu upa ve hmel deuh tawh chuan a lo ti a, An fiam zui nghal bawrh bawrh a. Tichuan, ka hma ah chuan thutleng hniam dawhin min teh ta niap niap a, a ziak pah nghal zel bawk a, A rimtui inkah rim nam chek chuan ka hnar a verh zar mai, ngawireng chuan min tehkual vel chu ka lo en reng a, minrawn melh ralh a, kan hawi sawn dun rang kher mai, a sen ap ap a, lai deuhin a nui saih a "a tawk e" a ti thawp sat a, "Naktukah in rawn kal lehmai dawn em ni?" a ti zui nghal a, "Induh chuan innghak lawk thei bawk" a ti zui leh sap a, "Naktukah ka rawn kal leh mai ang" ka lo ti vat a, Ka hmuh duh leh vang chauh zawk a ni. Reipawh awmlo chuan Inchung lamah kan inzui chho a, Puan than dahna lam chu min panpui a, Ka nu duhthlan color an neih ang chu a la chhuak nghat nghat a, "Ka Pi hetiang ang hi em ni i sawi kha?" tiin Ka nu chu a zawt a, "aw, i vanthlang thiam ve, khatiang kha ni rawh se" a lo ti ve vat a, "Full in nge induh, full lovin?" "Enge Full chu?" ka lo ti hu a, "Wiastcoat leh necktie tel vek tihna" Dawr neitunu chuan a lo ti a, "a full chu a tha ang, naktukah kan rawn kal leh dawn nia" Ka nu chuan a lo ti a, A ding hluai a, Kan Inbiakfel hnuah Dawr chu kan chhuahsan ta nghal a.

"Kha nula kha i hria em ni?" " Aw....hria e, Puitei a nih kha" "Engtia hria nge i nih a, i awmdan a danglam daih a, mak ka ti tlat" mei nei deuh a min melh chung chuan a ti a, Ka motor khalh lai chu fimkhur taka khalh chung chuan "Mali Thiannu Nau a ni a, man a ei zan khan kan inhria a" ka ti a, "I ngaizawng deuh niin ka hria" ka sen nghal ap ap a, Val niar tawh lam pawh ni i la ka nu leh pa hmuh laiin meizial ka la zu ngamlo hrim hrim a, Ngaihzawng lam phei chu sawi a hnai lo. "Ka hrelo, Ka duh deuh ani mahna" zak chung chung chuan ka ti a "a hmeltha viau mai, mahse a te mah mah niin ka hria" ka nu chuan a ti a, "Nia, Mahse Nulian deuh hmelchhia aichuan a tha zawk tho tho lawm ni?" ka ti ve ngat a, "I van zamlo tak, i pa ka hrilh dawn" nui hawk hawk pahcbuan ka nu chuan a ti a. "mawl suh, a zahthlak" ka ti hluk a, za em deuh chuan kan nui dun ta hawk hawk a.

A tuk Dawrah ka va kal leh chuan Puitei chu an ko chho vat a, Lehkhabu nen a rawn chhuak a "i lo thleng der tawh elaw, hei han en teh" tiin ka bulah chuan a rawn dinga "Heng hi a nia, hei" tiin a design ziah chu min hmuh tir a, Color in a chei thlap lehnghal "A nalh viau dawn hi" ka ti a, "Engtikah nge a lam theih ang?" ka ti zui zat a, "Naktuk tuk ah rawn lam rawh u, kan zo hman tawh ang" Puitei chuan a ti a, "I Office ah kan deliver thei bawk a nia, Puitei hian a rawn kalpui mai dawn a" Dawrnghaktu chuan a lo ti vat a, "a nih chuan Ka office ah chuan rawn dah mai rawhse" ka ti a, Eng eng emaw kan sawi leh hnuah Office lam pan chuan ka kal zui nghal a, Ka mithla ah Puitei hmel hlim hmel tak a tawng siam siam chu a lang uarh uarh a. Naktuk tukleh ni thuai thuai se ka duh tawh kher mai... Ni a liam a, A tuk tluka ni rei tihni ka nei awm love, Dawra va kal sek lah ka inthlahrung ru deuh bawk si, Mahse ka za et et tawh bawk si, Nilengin ka helhhawlh ni maiin ka hria. A tukah chuan Dar 2 velah Puitei chu a rawn lang ta nge nge a, Simple deuha inchei chungin ka kawrchung a thuite chu hanger ah a rawn khai lut dar dar a, "han ha chhin teh" a ti a, amal te te chuan ka ha a, Thla a la ziah lehnghal a " enge thla i lak ziah le" ka ti a, nui chung chuan " Ka Design thar lam a nih vang mai mai mawle" a ti a. Sawiselna tur engmah a awmlo bawk a, A mante kan inpe fel a, Thingpui ka ko a, Kan ti ti dun ta rih a, Kan innel ve tawh viau bawk a "Puite, zanin enge i tih dawn a?" ka ti ta phawng a.

"Engmah ka tilo ang, enge nita?" a ti vat a, "Mela ah kal ang hmiang?" inthlahrung deuh chuan ka ti a, "Ka chak lutuk, mahse" a ti a, "enge mahse cbu?" ka ti vat a, "Ka nu in a phal kherlo ang" a ti a, "Ka rawn sawm dawn che a lawm" ka ti vat a, "a chiloh lutuk, min khuah khirh sawt a ni mai, Ka puanthui min bansan tir nghal bawk ngei ang" a ti a, a meng ram ram a, "A nih tak chu mawle, hunawl i neih hmasa berah min hrilh dawn nia" Ka ti a, Eng mah sawizui talo chuan kan in then leh ta rih a... Chutiang nu sual lakah chuan Puitei chu engtin nge ka lakchhuah theih ang, ka ngaihtuah leh ta ngut ngut a, Tlai ban hun tep tawh ah Number lawng atangin call ka dawng a,

"U Mam, Puitei ka nia, Zanin kha ka hman dawn e, Mahse kan In ah ka awm dawnlo a nia, Kan Pite in ah ka riak dawn a" hlim hmel deuh chuan a rawn ti a, "awle, Dar 7 ah ka rawn lam ang che" ka ti nghal vat a, ka lawm ker mai "Mahse keimah chauh ka ni dawnlo a nia, Ka thiannu Rki leh kan Pi tute 2 nen kan ni dawn" a rawn ti a, "pawilo, i telve phawt te chuan" ka ti a, za lo deuh chuan a nui hak a, Zan lama inhmu turin kan inthlah ta a. Ka phur zia chu sawiin a siak lo zawk, Ka zanriah ei te chu ka helh hawlh deuh nge ka ei tlem hle, "Mama enge i tih dawn? lenchhuah i tum em ni?" ka nu chuan a ti a, "Nia, Mela ka tlawh ve lawk dawn a" ka ti mai a, "Puanthui nen khan em ni?" ka nu chuan a ti hram a, Ka pa chu ka melh ralh a, ngaithla lo ang maiin Chaw a lo bar mek bawk a, "Nilo...aaa..aw ni deuh tho" ka ti bah nuk a, "Hmmm....Fimkhur tur, tunlai hmeichhia hi an nasa a nia, Mipa sum ei hek bak an thiam lo" ka nu chuan a ti a, "Nia, ka fimkhur ve khawp a nia, Min ngaihtuah duh suh u" tiin ka thleng ka seng a, Zai rat rat chung chuan Inchung kailaan ah cchuan ka chho ta a "Tu Puanthui maw i sawi a?" tia ka Pa In ka nu a zawt chu ka hre hman hram a. Ka Insiam sawk sawk a, Motor Chabi ka lain Inhnuai lamah ka chhuk lehnghal a, "Eng motor nge ken i tum?" Ka pa chuan a lo ti a, "Ka hrelo, ka Motor ka keng mai ang chu ka ti deuh" ka ti ve mai a, "Nanga Gypsy Trawng lutuk a nula phurh i zak lawmni, Kan room ah Ka motor Chabi a awm kha va la rawh" a ti a, Min ngaihsak zui lemlo chuan Chanchinthar puan lai chu min en san leh ta daih a... Ka Dil ngamloh dil buai ngailo a min hmantir chu ka lawm kher mai. Ka Pa Motor hi Mahindra XUV dum tle hlurh mai a ni a, Kan khawih pui ngai lemlo, Ka Nu in Bolero a nei a, Keiin Bullet Bike leh Gypsy ka nei ve thung..

An awmna ka va thlen chuan Minlo nghak thap tawh a, Puitei chuan Gardigans fual lam lek lek vutbuak rawng a ha a, Jeans Kekawr mar nalh tawk vel lek a ha a, Sandal hniam set sawt abun bawk a, A inchei dan chu simple tak ni mahse a inhmeh em em a, ka enkhamlo a ni deuh ber mai. An lo inleih at tawh avangin Naupang 2 te nen kan 5 chuan MELA neihna hmun 3rd MAP Ground Mualpui pan chuan kan tlan ta vang vang a. Naupang ho leh RKi chu back seat ah an thu a,Ka bulah Puite chu a thu thung, Motor ka khalh pah chuan ka mitsir leh zauh zauh thin bawk a, A hlim hmel viau nghe nghe, "Tih tur dang i ngah awm sia, a nuam chiahlo" a ti a, "Nei i la ka sawm nang che" ka lo ti bauh a, "Kei chu Mary Go Round ah ka chuang ngam lo reng reng" a ti a, Naupang 2 chuan "dawih e kei chu ka chuang ngam" an lo ti vat a, kan nui dar dar a, Eng eng emaw kan sawi a, Kan hlim viau mai. A hmun kan zuk thlen chuan mi an lo zi nuaih nuaih tawh a, Motor ka hunfel hnuah Main Gate lamah ticket la turin kan kal zui ta nghal a, "Sir, Enge i rawn tih ve dawn?" Police pakhat hian a rawn ti a, ka en ngial pawn ka hre thei chuanglo "Nia, hei naupang ho ka rawn kalpui ve a nih hi, " kative mai a, "Sir, Min hre tawh nange?" a ti leh hram a, "Kan School ah i rawn thawh ve zawk tawh kha, Hruaihlua kha ka nia" nui var var chuan a ti a, Ka chiang chiah tawhlo nangin "aw ni maw, Police ah i lo lut tawh e law?" ka tive hlut a, "Nia, Pawl 10 ka passed khan ka Tang ve ta daih a lawm, Hei hi In nu em ni?" Puitei chu en pah chuan a ti a, "Aaa..h Aw...la ni chiah lo," ka ti veta ngawt a, "Nupui i nei hmeltha dawn kher mai" a ti zui leh hram a, "Nia..." ka ti ve tawp a. Gate kan luh rual chuan "tinge khatia i tih ve ngawt a, a awih tak tak hmel ropui si" nui pah chuan Puitei chuan a ti a, "Nia, ka hamhaih deuh a niang, I duh vaklo em ni?" ka ti a, "Nilo, chutiang pawh chu a ni chuanglo" a ti niah niah a, Naupang pakhat chuan "A'u Puite saw tahsawn akal ang" tiin Naupang intihhlimna lam chu a kawk va a, An inkai ta dat dat a, An chezia vel chu ka thlir reng a, an thil tih duh ah Pawisa ka pek sak nghal zel bawk a, an inthlahrung dun viau nangin keiin engahmah ka ngai duh der silo.. Hmun hrang hrangah an kal kual duah tawh hnuah Mary Go Round ah Rki leh naupang te chu an chuang ta a. Thutna tura an siam ah chuan Puitei nen chuan kan lo nghak dun ran a...

"Puite,...."ka ti deuh ngawt a, "Eih..enge?" ka lam rawn hawi ha pah chuan a rawn ti a, "Englo..... Ka...Ka...Ngaihzawng i nei em?" ka ti nuah nuah a, "Nei nang, Ngaihzawng ka neih ka la hrelo" a ti a, " Enge chu chu min zawh chhan" a tih zawm zat a, "Aaa eng ni love, Ngaihzawng i nei ang a, Minlo hmu si ang a, A tha dawnlo em a" ka ti ta vel mai mai a, a nui hak hak a, " Chutiang tur chu tumah an awmlo, Nangin i neih bawk siloh chuan" a ti ve khauh a. Naupang ho chuan an rawn au leh chul thin a, a kut a lo vai lauh lauh a, "Chuti a nih chuan Kan Inkawm reng thei dawn tihna a ni maw?" ka ti a, "Eee kei min kawm duh a nih chuan ka hnial reng reng lo, Min kawm tha duhlo zawk ang" a ti ve leh mai a, Naupang an rawn thleng tak avangin Kan thusawi chu kan pawtchat zui ta nghal a. In lam ah kan haw a, Naupang chuan Candy leh thil dang eichi an pawmhawng tan bawk a, an in kan thlen chuan "U Mama rawn lenglut la, Thingpui te kan lum Dawn nia" Puitei chuan a ti a, Ka inthlahrung viau nangin ka hnial duh bik lemlo...

"Naktuk ah Dawr i kal dawn em?"

"Kal awm tak a nia, enge nita a?"

"Chhun thingpui In turin ka rawn sawm ang che aw, i hman thei ang em?"

"Ka lo tum dawn nia" " awle, 12 ah ka rawn lam ang che" "awle"..."Mangtha" "Mangtha le".....

Pawl 10 ka passed tum khan ka lawm em em a, Ka nui deuh var var reng a, Ka kawng kal pawh ka zang vah vah hle kha a ni a. khami tum ai mah khan zanin ka hunhman hian min ti hlim ni maiin ka hria, Ka motor khalh pawn ka polite thlap thlap hle, Car tape ah hla ka play a, ka sakpui pah bawk a, Ka hlim veng veng a, ka rilru a nui verver ni maiin ka hria. Hetiang em em a Aizawl khawpui mawi leh nalh ka tih hi ka la hre ngailo, Engkim mai chu a fuh velvek a, A hlimawm em em vel vek a ni ber mai. In ka thleng a, Ka suangtuahna mitthla ah Puitei hlim nui hmel ka hmu a, Khumah tluzal chungin kha nula hlim thinlung chhung ril ber atanga rawn irh chhuak nimai awmhmel chu ka mitthla a, Duhawmna a khat nimaiin ka hria. Ka hmuh hmasakna ber zan kha ka hrechhuak a, Khami zana ka hmuh Puitei kha chu Lungngaihna thuk tak pai, Hlimna tawng miah silo hlim hmel anga lan tum, Natna khirh takin atlakbuak tih inhre ru kar si a, Midang zinga natna nei lo ang maia lan tum, Hmeltha si lungngaihna in a tlakbuak avanga hlim luih tum ni khan a lang a. Zanin a Ka hmuh Puitei zet zawng Hmangaina famkim dawnga, Khawvel mawin a hlutzia leh ropui zia hria a, hmabak eng tak nei hlim taka hun hmang mek ni maiin a lang tawh thung niin ka hria. Chu nula ka vawi 1 tawn a ka vei nghal, Duhna, Lainatna, Khawngaihna leh Hmangaihna zawng zawng pu chunga ka en ngei mai chu suangtuahin 'Ka Tana Khuanu Ruat reng a lo ni ang em?' tiin ka mit ka chhing diar diar a.
***********

"I tan kei hi enge ka nih a?, min ngaihven ve viau ni?, Khawngaih takin min kalsan la, Ka hmuh phak ah emaw, ka ban phakah emaw, khawi hmunah mah rawn inlan leh tawh ngai suh" min ti a, Lehlam a hawi hmak a, Chak takin ka Office chhung atang chuan a chhuak ta nal nal a, Ka thutna ngaiah ka thu reng a, A thinrim hmel, amitmeng fiah kak maia min en kal chunga mittui rawn ham tiamtiam hmel duhawmna a khat chu la awm reng nimaiin ka hria a, a dinna zawn chu ka la thlir vung vumg a. Engthil nge ka tih a, ka chungah hetiang taka a thinrim a, Kei min ngaihzia nizan lawk khan min hrilh a ni si a, Tunah khati taka a kianga awm tawhlo tura min hrilh leh si nge maw a nih le, Ka bangbo in, ka hrilh hai chiang kher mai.

Ka duhna leh ka thawhrimna vangin ka vawi 1 hmuhna ah ka hmangaih nghal em em a, ka duh nghal hluah hluah a, Tlawm leh zah pawh dawn chang tawhlo in a bawh in ka bawh ruak ruak a, Keimah lah indahtha in ka duh zia leh hmangaih zia chu ka chetzia leh tawngkam in ka lantir in ka hrilh hre vek a. Chu ka thil tih chu ka duhthusam aia tha in chhanna ka dawng a, tichuan Pangpar mawi tak a hnah rawn chawrno chho a, A Parmawina lantir tum a kuhmum tan mek chu zankhat thil thu ah Vuai ta sulh ang maiin Ka duhna leh ka hmangaihna engkim chu hnawlin a kiangah lang tawh hauhlo turin min rawn ti leh mai si chu ka hrethiamlo kher mai.. Ka hrethiamlo lutuk tihngaihna hrelo chu engmah tih tur hreloin ka thu ngawi reng mai a ni. Chutiang a ka awm reng lai chuan ka harhchhuak thut a, Dawhkan a bell chu ka hmet ri a, ka rang takin Peon a rawn lut a, "Ka room atanga rawn chhuak chiah nula kha i lo hmu em? umzui la, i umphak hunah rawn hruai kir leh teh" ka ti nghal tawng a, a ngaihna hrelo hmel deuh chuan a ding ul a, "Ka sawi chu i hrelo em ni?" ka ti vin leh tuar a. Ka hna ka zawm tirh phat atangin ka Staff ten ka awka vin leh bung an hrengailo a ni a, Chutiang taka ka thinrim awka vina hriat takah chuan engmah sawilo chuan min chhuahsan nghal vat a. Ka nghak thei nanglo ka umzui chhhuak ve nghal zat bawk a. Mahse a mawngphe pawh kan hmu hman tawh silo, Pawnalo awm ka staff te zinga amah hretu ten Taxi lain a tlan nghal thu minlo hrilh a, Ka tliak hnawp a, Ka zawi vek ni maiin kahria. Ka room chhungah ka thu a, "Engvang a he thil hi thleng nge ni le?" tiin ka ngaihtuah vung vung a. Kan Intawn hmasakna ber atanga amah ka hnimhnai hnu leh ka duh a, min duh ve thu kan Inhlan atang khan Thla 4 zet a liam ve tawh a. Ka nu leh pa pawhin 'Puanthui nula' mai pawh nise min duhpui a, Ka staff te pawn ngainat awm an ti a, Ka unau nu Mali ngei pawn a ngaina em em hman tawh a, A chhungte pawn kei nen kan inkarah engmah thu thalo an nei heklo, Chutiang chuan Hlim leh nuam ti takin Thla 4 kan inzui hnuah Zankhat thil thu a boruak inthlak thut chu ka hrethiam theilo takzet a ni.

"Nutei maw?" "aw nie, tunge aw?"... "Keimah, Mama, Puitei Ka be theilo a, a chanchin i hre mial lomaw?" "Hre miahlo, Nizan khan min rawnbiak a tum a, Ka Inkhawm lai a ni bawk si a, ka chhang hman lova, Enge harsatna in nei em ni?" "anih chu mawle, hmmm nei a ni deuh mai" ka ti a, a thawri ham ham chu kahria a, "Englam pang hawi nge ni a?" Nutei chuan a rawnti leh a, "Ka hrethiam hauhlo" tiin chhuna ka office a thil thleng chu ka hrilh ta malh malh a, "anih tak chu, Engmah ka hrelo, Biak kan tum leh phawt ang e" ati a,Kan inbiakn chu kan ti tawp ta rih a. Zanriah ka kil lova, ka office banah karoom ka inkhung nghal hmak a, Ka nu leh pa pawh an ngaih a tha zanlo, mahse chhuanlam ka siam avangin ka boruak tawn chu engmah min hriatpui lo hrim hrim thung. Chumi ni atang chuan ka phone call a la duhlo a, a hmet busy a 'Please call me later' tih msg ka dawng zui nghal zat zel a, Text msg ka thawn lah a delivered ngei pawn chhanna ka dawng ngai ta reng reng lova, Enge a chhungah thleng a, engharsatna nge a tawh ka hre bawk silo, ka buai ru em em reng a.

Vawi engemaw zah a thawhna dawrah leh an In lamah ka pan thin a, "A la rawn kallo" "an chhuak lawk" " vawiin chu a chawl" etc ka dawng ziah a, In lamah lah "a leng a niang, khawnge a awm kan va hrelo ve" tih emaw, "a thiante nen an chhuak lawk, anlo haw har deuh ang" etc tih te bak dawn ka nei ngai bawk silo, Tu hriatpui siloh in ka thinur ru teuh a, Ka beidawng duh chuang hlei lova. Nitin vawi 5 tal ka call ngei ngei a, Vawi 3 emaw tal Msg ka thawn bawk thin. Tin, a hnathawhna dawr ah ka kal deuh ziah thin bawk a, Mahse hmuh tikni ka nei thei chuanglo. Bei a dawng a, rilru ah mahni inkhawngaihna a rawn lut a, "Engemaw min duhlo a, min kalsan tu chu ka um ka um bik lem angle" tiin ka rilru ka siam ve tan ta a. Officer Ka duh duh thlang thei, Ka ngaihzawn emaw buai ngai hauh lova min ngaihven ru em em nula 'Kei ka ni' inti chin ngat pawh an awm ve nual a lawm le, Amah chauh Hmeichhia an awmlo, tiin ka luhlul ka chhuah veta nge nge a. Ka tawn hma a ka nundan pangngai ang pat a nung chho leh in keimah, ka nu leh pa bakah Ka hnathawh bak thil dang engmah ka ngaihven duhlo lui ve ta tlat a.

Puiteii ka biak chhunzawm duh tak bikloh atanga kar 2-na chiah a ni a, Ka Office Bang tihtur hrelo chu College kan kal lai atanga min ngaizawng em em thintu Lianpuii dawrah ka leng lut a. Lianpuii hi Aizawl mi hlun chhungkaw khawsa thei, neinung zet mai an ni a, Chanmari ah 'Shoping Mall lIan leh changtlung zet mai a nei a, M.A a zirzawh hnua a hawn a ni nghe nghe. Ka hmel a hmuh rual rual chuan phur zetin minlo welcome chul a, "Awi...Hepa hi Officer a nih hnuah biak theih ta reng renglo mai, i rawn bazar dawn nge? i rawn lut ve mai mai" a lo ti bawrh bawrh a, "Ka rawn teilut satliah chu a ni deuh ber nangin, he dawr siamtu nu hi ka kawm chak deuh mawle" fiamthu titak deuh chuan ka chhang a, kan nui dun hawk hawk a, Customer an nei ngah viau nangin, Items hrang hrang bulah hnathawk tleirawl uniform ha a duty tir deuh vek a, atan buaipui tur dang an awm lemlo, Card emaw, pawisa fai emaw lo thai sak a, pawisa lo thleng sak te bak hnadang a neilo bawk a, Kan inkawm pah zel a,. Lianpuii hi nula ngo leh pian inphut nalh tawk tak mai a ni a, Kohhran ah inhmang tak, Zaipawl member niin an veng nula ah pawh an hawlh lar berte zing a mi a ni bawk a, Kawm a nuamin a bula awm a hahdam thlak viau. Chutia kan ti ti karlak ah chuan "Tunlai hian engemaw thawm hriat ka nei a, a dik leh dikloh chu ka hrelo" mei nei deuha min nuih pah chuan a ti a, "Enge i sawi awmzia chu ni a, Kan Thiante zingah Pasal emaw nupui emaw nei tur hnaivai an awm tihna emni a?" hrethiamlo deuh chuan ka ti a, "an ti deuh a, Nangma chanchin mawle, Designer zui deuh i nei niin an sawi ka hria" a ti ta hlawl mai a, ka rilru a thi tan tawh Puiteii ka hrechhuak nghal zawk a, Mahse ka hmelah engmah a langchhuak hmanlo thung "Khawia dawt phuahchawp nge maw i hriat le, kei chu heti ve mai ka nih hi" ka ti deuh nghat a, "Awii dawlo mai teh, a thawhna dawr neitu fanu hi ka thiannu a nia sin, zak ve deuh teh" ati a, a nui sen sen a, "Aaaa chutiang engmah a awmlo... Englo a nia" ka tih mek lai chuan Sa Tin awmna lam kan ep chiah a Customer pakhat chu ka hmu a, Puiteii ngei a ni tih ka va hre nghal chat a, Sunglass dum a bun a, scarf pawdal Pan deuh hian a lu a tuam deuh bawk a, A pian leh hawiher engkimah kei uluk taka lo belchiang thin tawh chuan ka hailo nasa hle thung, Ka thusawi lai ka tawp tak thut avang chuan a thil khawih lai mek chu chawl meuhin min rawn en a "Enge ? englo ania, i tih chu?"Lianpuii chuan a rawn ti a, "lawk aw, Minlo hrethiam lawk teh" tih leh ka thutna atang a tho chhuakin Puiteii ka hmuhna lam pan chuan ka kal ta vut a, Mak minti hmel chu ka hmuh chiahlo nangin, Min enzui dan tur erawh ka suangtuah thiam thei thung.

Ka mi vahmuh chuan min hmulo tur zawngin a awm bawk a, hnai set sawt ah a hnungah ka din chilh te te a, "Puite" ka ti thawp ta sat a. A nghing lawih ni maiin ka hria, Chumi second reilo te chhung chuan Dawr chhung a thawm ri awm reng reng chu a reh nghal duk ni maiin ka hria, Ka thinrim nge ka hlim lutuk zawk tih pawh hriatloh khawp a ka thin phu ri dup dup chu ka hre thei hialin ka hria. Chutah engmah hrelo ang maiin a thil enlai chu en pahin dinglam ah chuan kalsawn tumin a inher a, a ban ah ka man a, a ding chawt a, "Min kalsan rawh, i tan engmah ka nilo ka tih tawh kha" a ti vawt ta raih a, Kan awmna lai chu Lianpuii awmna atang chuan a langlo vel chiah chiah maithei, Mahse kan sir leh lam ve ve ah Thil lei tum midang an awm ve nualthung, A awki chu sanb lemlo mahse keima tan erawh a fiah kek kawk hle thung.

"Engvang in maw?"

"Ka sawi ang chu a ni mai"

"Enge ka engmah i nilo tih sawi a?"

"Keiman, Kan inthlau lutuk" ka kut dawmna chu a kut lumthar thar chuan a rawn la kiang a, Pen khat a tawlh sawnhret a, "Engmah sawi fumfe silo a min kian san i duh chhan hi ka hriat ve ngei a tulin ka hria" ka ti a, ding chat a, a thaw halh a, Chutah a sunglass a hlip a, min hnungchhawn zawng a awm a ni a, a hmel ka hmu mai lo, mahse a hma zawna ding dawr nghaktu tleirawl mak ti hmel ka hmuh chuan engemaw tak a thleng ngei niin ka hria, Chutah a thil nawr lai chu a thlah a, a lu khuhna scarf chu a hlip thla a, ka lam hawi chuan a rawn ding ta a. Kan Inhmachhawn rual chuan ka phu deuh zawk thei hial a.

A lu ah sam a awm manglo, hmeichhia nisi lukawlh tul mai han hmuh chua mak ve deuh a ni, uluk taka nawr kawlh a nilo chiang tih hriat takin a kheng deuh nuk mai a, a mit dinglam chu a duk val kual ruih a, a sen rum bawk a, chu chuan a hmai a ti vung deuh nge a lang bial deuh hlek bawk a, a mit ko ah chuan hmun 3 lai a chilh ngai khawp kak sei a awm bawk a, a mitmeng zahawm leh nalh em em mai kha a ni tawh hauhlo, a mitmeng chu sawisak hrep hnu lungawilo leh phuba lak chakna mitmeng ang mai a ni tawh zawk. "Tihian i hrethiam thei tawh em, Heng zawng zawng hi nangmah vang a ka neih vek a nih hi" a ti a, a tahaw tiau bawk a. Engmah sawilo chuan ka awm ah ka pawmbei thlawp a, " Heng hi keimah vanga i tawrh maw ni a?" ka ti thawp sup a, ka thinrim rilruna lutuk chu ka puak keh lo chauh a ni. Chutia ka tawng chhuah rual rual chuan chhuak em em in ka awma bei chung chuan a tap ta hawk hawk a, kan bul vela awmte chuan makti hmel zet chuan min en thap a, "Enge maw in en le, Drama kan show reng reng hlei nem, khawngaih in min kalsan teh u" ka ti a, inthiamlo hmel deuh chuan an kalsawn nghal sang sang a, Mi an kalkian rual chuan ka hma zawn chhuar awmna bulah chuan makti hmel zet hian Lianpuii chu a lo ding reng a, Kan in en deuh renrawn hnuah nula fing tihtak ah min rawn pan hnai vat a, "Enge thil awmzia Thianpa?" tiin kan bulah chuan a rawn ding ve ta ngawt a. Ka awm a bei Puiteii lah chu chhuak em em in a la tap hlap hlap reng a, a lu duhdah deuh a cheh kawlh sak tih hriat zet mai chu khawngaih leh lainatna zawng zawng nen ka chul sak niap niap a, Lianpuii mak tihmel deuha ding reng chu ka en a, "Amah hi a ni e" ka ti ta a.

Lianpuii Office chamber chhung a Sofa chungah Puiteii kuah ran chungin ka thu a, Kan ep chiah a dawhkan kila revolving chair ah chuan ngaihtuah muk hmel deuhin Lianpuii a thu ran mai bawk a, Puiteii lungchhe zualpui pawh a reh tawh a, a insut faih faih reng thung a. "Hetiang thil a thlen dan hi min hrilh tache" ka tivawt raih a, "tikhan lo awm ula, customer ka lova dawngsawng ang e" tiin Lianpuii chu a ding a, en pawh min en zui eihlo chuan a chhuak ta daih a. "engmah sawiin awmzia a awm lo, Ka hawn vat a hun tawh takzet a ni" a ti a, a in hnit faihfaih a, "ka hriat ngei chu a ngai a ni, Keimah vang a i tawn niin i sawi a, thudik a nih ngai chuan ka hriat ve ngei chu a ngai a ni" ka ti ve tlat a. Ngawi reng chuan a bag chu a hai rak rak a, Tissue paper a phawrh a, a mittui luanna biang velchu a hru mawlh mawlh a, "Ka hawn vat a ngai" tiin a tho tharh a, "Ka zuk thlah ang che" ka ti a, ka ding zui nghal a, "Engmaw? Min thlah i duh a maw? awle minthlah ngei ang che, tichuan ka mit hi a deltawh ngei dawn tihna a ni mai" a ti chang ta khalh a. Engtia tih chinge ka hrelo, ka thu hriat chuan min barakhaih chiang bawk a, ka awmdan tak pawh ka hrelo. Lianpuii Office atang a min chhuahsan lai chu ka en liam ta ngawt a, A chhuak fel chiah tihah ka thu hnawk a, Mak tihna in ka khat a, chet lak dan tur engmah ka hre heklo... "I thlah dawn nange?" tia Lianpuiin min rawn biak takah chuan ka harhchhuak thut a, "Ka biak leh ngei a ngai" tih leh tlanchhuah ka rual ta nghal a.

Zadeng Shoping Mall pawn ah ka va hawichiam a, ka hmu hman ta chuanglo, Lianpuii ka phone a, ka kal nghal mai thu ka hrilh a, Chaktakin Pi Zuali te In lam pan chuan ka tlan ta pur pur a, Khua a thim tan tawh a, Motor a tam viau mai bawk nen Traffic a lo zam chhen bawk si, ka insawh sawk sawk a...ka duhangin ka tlan hmanhmawh thei silo, ka thinur ka puak darh lochauh a ni ber. Muang changa kan tawlh bek bek hnuah Hrangbana college bul kan thlen chuan a lo ziaaam tawh bawk nen Chammari west ah chuan ka tlan lut thla a, Pi Zuali te awmna veng Kanan lam pan chuan ka tlan ta zar zar a. An inkawt ka thleng a, Motor atang a chhukin an doorbell chu ka hmet ri ta vawt vawt a. "Aw Pu Mama lah ni reng a, lo lut rawh" Pi Zuali pasal chuan kawngka a rawn hawn a, ka hmel a hmuh rual chuan a ti nghal chul a, "Pi Zuali a awm em? nia hei engemaw thil ah biak lawk ka duh che u a" ka ti a, Inchhung lamah kan inzui lut ta a. Pi Zuali zanriah lo buatsaih mek chuan mak minti hmel deuh chuan "Sir enge kan inah i rawn lan ve tak hlawl le?" a lo ti a, "Nia, In nupa in biak fal lawk che u ka duh a, in remti em?" ka tite te a, "Rem tuk e, zanriah i rawn kil ve nghal bawk ang chu mawle" Pi Zuali chuan a ti vat a, Choka a an fate chu lo eisan mai tura chahin an thutkhawmna Pindan lamah kan inzui phei ta a.

"Englo a nia, In nau Puiteii chanchin zawh che u ka duh a, Enge hriat in neih" ka ti ta tawp a,
"Nia, Hriat fumfe chu kan nei chiah lo nangin, kan fanu nen an inbiakna kan hriat dan chuan, Nang nen a in inkawp chu an duhlo a, an zilh hau thin a, Mahse in inbansan thei bik silo a, Kut a tuar ta a ni ber awm e" Pi Zuali pasal chuan a ti chuar chuar a.

"Chungawt pawh chu a ni lo, Sangsiama Khawchhak Sumdawng hausa zet mai chu Puiteii ngaizawngtu a awm a, Chumi nen chuan a nu hrawn khuan inneih tir a tum a, Chutiang vel vanga an inhnail takah chuan khutiang khu a tawk ta a ni. A nihna takah chuan Nangmah a kawpche chu an haw ber, Sangsiama nupui tura an tih laiin nang i lo lang a, a lo duh zawk nasa mai bawk si che a, Chuvang chu a ni" Pi Zuali chuan a tia, Ka ngawi reng a, "Kan tih theih a tlem bawk si a, ka tute ho khu ka lainat takzet a ni" Pi Zuali pasal chuan a lo tive mek bawk a. "Enteh, tihian ti ang, Naktuk ah Helai hmunah hian koh chhoh dan tur lo ruahman ula, A rawn chhuak thei a nih chuan min rawn hrilh ula, ka ru haw hmak mai dawn a nia" ka ti ta tawl a. An nupa chuan mak ti hmel zet chuan min en a, an in en a, anhawihai hle. "Engtin maw? kan nau chu i nei ang maw?" an ti a, "aw... Engkim in kutah ka dah e, Ka hawng phawt ang, Ka nu leh pa ka hrilh hre ve bawk ang" tiin ka tho a, Min chelh an tum viau nanga ka hnial tlat a. Chak takin kan In lam pan chuan k tlan ta vang vang a. Ka motor khalh laia ka riru chu phochhuah theih a, hmuh theih nise Naupang tan mai nilo puitling tan pawh rapawm khawp ani awm e.

Engkim ka hrilh lawk sa diam a, Engtik lai maha an thu hnial ngailo an fapa in ka thu thlen chu mak tiin min hnial eih lo, "tha nia i hriat ang chuan che tawp mai rawh, i bulah kan ding tlat tih erawh i hre dawn nia" ka pa in min ti bawk a, rilru a thlamuangin mahni inrintawkna ka ngah phah sauh niin ka hria. "Sir, Chawhnu Inkhawm banah a rawn chho dawn a nih chu" tiin Pi Zualin min rawn phone a, "Ka kalve tur thu kha hrilh hauh suh u aw?" ka ti nawn leh ngat a, an hrilh dawnloh thu min hrilh a. Chawhnu inkhawm ban rual chuan Kanan veng lam pan chuan Ka Pa Car manto chuan ka tlan ta diai diai a, Ka bulah chuan ka unau nu ka thian nibawk Mali chu a thu ve ran bawk a. An In kan thleng a, Amah Puiteii ngei chuan kawngka minlo hawnsak a, Min hmu chu mak a ti hmel kher mai. Rei pawh kan thut hma chuan Pi Zuali ruahman angin an nula room ah chuan kan 2 chauhin min kalsan ta rih a..

"U Mam i hnenah ka sawi tawh kha, I tan engmah ka ni tawhlo ka tih kha"

"Engvang chuan maw? Ka tan engkim i ni a, i ni zel a, i ni reng bawk ang, Keimah vanga hrehawm i tuar ka phal tawh hleinem"

"Nilo, hrehawm chu ka tuar zo vek tawh, Heng ka sam te hi keima cheh kawlh vek a nia sin"

"Engmaw i sawi a?"

"Min kalsan mai rawh, Kei chu i tan bawlhlawh ka ni"

"Enge i sawi awmzia?"

"Ka thianghlimna min thliahsak tawh, I tan bawlhlawh mai ka ni" a tap nghal hawk a, Keipawh thir dawlh ang mai ka thu nghil khawng auh a. Ka thil hriat chu ka bengchhe ri mai em ni? enge thil awmzia ni a? "Nang nen kan Inkawp tih an hriat khan min hau thin a, Mahse ka ngaihsak duh bik lova. Ka nu Hmelhriat Sangsiama min neih tir an tum a, Min neih chuan Ka nu sumdawnna tur pawisa a puk tir dawn bakah Kan In min sak sak dawn bawk a, chumi it chuan min thlem ta thin a. Mahse ka duhloh thu leh Nangmah ka duh zawk thu ka hrilh tlat a. Kha msg ka rawn thawn hma che zan khan ka nau mipa chu ka pa in a sawisa ta vak a, Ka nu hrawn chuan "I kawp zui zel a nih chuan, i nau hi sikul a bang ang a, A inhlawhfa ang, Sangsiama rualin Burma ah kan thawn bawk ang, I u, i thiante emaw I nu unaute tupawh i hrilh vaih chuan a pawi khawp ang,. Hei hi keimahni tan mai a nilo, In unau za tan a ni tih hre reng ang chs, Sangsiama i neih phawt chuan kan harsatna sutkian a ni dawn tih i hre tel ngei ngei tur a ni" min ti a, Ka nau vangin ka be duh talo che a. Dawrah emaw, In ah emaw min biak i tum reng reng pawhin ka awmlo ang a sawi turin ka thiante ka hrilh sa vek a ni. Chutiang a ka tih hnu lawkah Sangsiama chu a rawn zin a, Sa leiin kan inah chaw a rawn ei a, Kapa chu an hrairui a, achatthla der mai a, Ka naute ( ka nu fa bikte nen) 5D En turin ka nu te an kal daih bawk a. Kan 2 chauha kan awm dun takah chuan Min neih a duh thute, min neih chuan Ka nuamsa hle dawn thu te, min hrilh a, Min rawn kuah ve ngawt a, A ni ka neih dawn loh thu leh Nangmah ka duh zawk thu ka hrilh ta nek a, A thimrim chuan ka thu hle hle lai chu min hnek thal ta tawp a, Emgmah hrelo chuan ka tlu ta reng a. ka harhchhuah leh meuh chuan ka khumah Saruak ngalngatin ka lo mu reng tawh a, Ka lu a na ut ut a, ka mitko chu a vung phui vek bawk a, ka engkim chu a silthum mai bawk a... Engkim ka ngaihruat thiam nghal a, Ka nu leh Sangisama chu an ti ti ri ka hria a. Ka nu in Police hnena zualko ah avo a, Pawisa an indil a, An inremsiam ta a. Mahse ChumI chu duhtawk lo chuan ka room ah rawn lutin kei taksa chaklo thisen chhuak vanga che theilo chu tlaivar thakin min mutpui ta a ni" a ti a, a tap zawih zawih a, Engmah ka ti theilo, ka thimrim lutuk chu ka puak keh lo chauh tawh a ni. "Tichuan, ka sam hi ka tan chhum ta vek a, Ka hna ka bansan ta bawk a, Ka pa bulah Khawlai ah KS angin ka awm a,VDP ten min tansak angin ka nu in a lo hrilh ta vel a, ka insawi fiah peih ta biklo a... Tun thleng hian kapa chuan minla be duh talo a ni" a tih zawm leh a, Ka ngawi reng a, "U Mam nupui thianghlim ngei nei turin Inbuatsaih zawk rawh, Kei chu i tan engmah ka ni tawhlo.." a ti chuai raih a. Ka thawk lawk a, Ka pawm a, ka kuah ta vawng vawng a, A tap lo, a tang heklo, a ngawi hle hle ringawt a.

Ka rilru ka thlak a, Ka ruahman sa ang chu paih in Ka thiante Police lam te nen fing taka remruatin Sangsiama man theih dan tur kan zawng ta rih a. Chutiang mi Pawisa ngah lutuk chuan engemaw tak tih a neih ka ring tlat a ni...Thla 3 ngawt an umzui hnuah Zokhawthar Sumo ah a Silai tawlh ruk leh a Cocain tawlh ruk nen Seling ah an man ta hmak a. Chumi rual chiah chuan Puiteii u Sangpuii chuan FIR a nu leh Sangsiama lakah a thehlut ve ta chiah bawk a. Khami zana thil thleng a Puitei thuamhnaw hak kha Puiteii khan a ten em avangin khawih pawh khWih sawn duhlo in khum hnuaiah thisen kai chungin a vawm lut a, Chu chu test tir vek a nih bawk a, Sangsiama DNA nen a inmil thlap bawk a. Tichuan Sangsiama Chu Court hmaah a inpuang bawk nen Puiteii nu hrawn nen Damchhung tang turin an thawn liam ta a ni. Puiteii Nuhrawn chet dan a hriat in Puiteii pa inchhir chuan zu a invak vak a, An in panna Stepah a lum palh hlauh a, A boral zui ve ta mai a. An In chu ka hralh tir a, an In hralhna chuan Vengdang ah Inhmun kan lei leh a... Kum 2 zet kan Inzui hnuah Kohhran Dan thianghlim ngeiin Kan Innei ta a ni.

Ka Hmangaih a, A ni pawn min hmangaihna, Ka tan a tuar a, thih hial pawh hlau lovin a tuar a lei ah, a duhthu vang reng ni lova a thianghlimna an thliah sak chu Hre reng pawh ni i la emaw Ngaidam theilo teh reng pawh ni i la a danglam phahin a koh kir theih tawh dawn chuang silo a. Chuvang chuan ka thinlung zawng zawng in kha sernung kha ka theihnghilh sak hmak a, Kohkir theihtawhloh chu kalsan in Kan hmalam a thil lo thleng tura kan duh, kan hun hman chhoh zelna tur kawng uluk tak a thlir pah zel a, Nupa hlim tak nih tumin kan In Hmangaih zual deuh deuh ta zawk a ni.
"I hun kaltawh vanga a dem fo che a nih chuan, chu I kawppui chuan Hmangaihna leh khawngaihna atangin a ngaidam lo che a ni tih i hre ve mai mai dawn nia"

(Ka kut chhuak hmun dang a mi, kan dah țha ve leh lawk teh ang... Moderator ten min dahsak ring tlat chungin....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)