KA LEI VANTIRHKOH BY Te-i MrsAmbrose (Competition 2022)

Ngaia
Site Admin
Posts: 21956
Joined: April 30th, 2016, 4:07 pm

KA LEI VANTIRHKOH BY Te-i MrsAmbrose (Competition 2022)

Unread post by Ngaia » August 4th, 2022, 1:22 am

eauxgr3y.jpg
KA LEI VANTIRHKOH
(Competition 2022)
"Inthen ang" ka ti halh ringawt, za lo tih hriat zet hian a nui ro halh a, "Eng vangin maw? Min hmangaih a ni lawm ni?" a lo tih let ve chuan ka chhing sawk, ka hmangaih vang reng in alawm tun thleng pawh hian a tan bang lova ka tawngtai sak fo thin, a nun hi siamtha in Pathian hnaih se tih hi ka duhsak a, mahse kha ka tawngtai sak thinna te kha, a ni hian min ti beidawng takzet tawh, insiam that tum a hnekin nitinin a bawraw telh telh mai zawng anih hi.
"hmangaih hle che mah ila, i nun i sim theih chuan siloh chuan" ka ti let ve leh sak, "eng ang pawhin awm ila, keimah ka nih avang hian min hmangaih la ka duh,ka thiltih, ka mizia leh ka hmel vang nilo in, keimah ka nih avang zawkin min hmangaih turin ka duh che hetiang hi chu inthen nan chuan a ho tham mah mah, ka then chuang lovang che" a ti khawng at "Nangmah ka hmangaih vang zawk che anih hi...tinge i hriatthiamloh fo, nangmah ka hmangaih avang che in i thlarau kalna tur ka ngaituah lo theilo a nih hi," ka mittui te chu a tling pam tawh.
Ni e, ka hmaa ding hi ka hmangaih lutuk, a nun hi siamthat sak ka duh a, amah avang hian vawitam ka chhungte thu pawh ka zah zolo fo thin. Zantin chhuakin a rui ziah a, a nun a beidawng hle tih ka hria, kan inzui tirh atang tawhin a nun a bet tlat ani tih ka hria a, a nun a beidawng a, a nu in a boral san dawn lai vel khan a nu dam nan vawitam Pathian hnenah a dil a, mahse a nu chu a chan ta tho anih kha, khami hnu atang khan Pathian hi a ring leh tawh ngailo, a hmaa tlangval fel tiha an hriat thin nun kha a inthlak hlawk a, mite pawn an khawngaih hle thin anih kha.
Keipawn a hma chuan beiseina sang tak ka nei ve thin, tlem tlem a a sim theih mai ka lo ring thin, mahse chu ka beiseina chu ani Jonathan Lalrinpuia hian beiseina beidawnthlakah a thlak ta hlawk anih hi.
"Tawp tawh mai ang, heti chuan tlang sel pawh ka tawk nasa tawh,ka pa pawh kohhran rawngbawltu a ni a, nang ka kawp avang che a ka chhungte hmiangchhiatna tawrh zawng zawng pawh nangmah avangin ka haider lui fo thin, mahse tunah chuan ka thei tawh lo, min ti beidawng takzet tawh" tiin ka mittui luang chu ka hru a,"Nilo,min kalsan suh"tiin ka ban chu a lo vuan a, "anih chuan kei nge he i thil thalo tih thin hi?" tiha ka zawh chuan, "Nang leh ka thil tih thinah chuan duh min thlantir suh"
"anih chuan keipawn duh thlantur ka nei bik lo anih chu" tiin ka mittui chu ka hru leh tawk
"a tir atang khan beiseina lo nei lo tawp ila tha tur" tiin ka ka hnungchhawn a, hawi kir leh tawhlo chuan ka kalsan ta a.
A tan a khawvel leh a neihchhun ka ni tih ka hria, keipawn kalsan ka duh lo, mahse a nun a sim thei lova, sim a hnekin tunah chuan a bawraw telh telh mai si a, ka chhungte chuan vawitam kalsan turin min ti fo thin, mahse a sim theih ka ring fan a, ka chhungte pawh ka kalh fo anih kha, mahse tunah chuan keipawh ka beidawng tawh.
Rinpuia chuan min lo au let leh a "a tha alawm, I duh chuan kal rawh, mahse eng thil pawh lo ti ila, min dem suh ang che, a chhe ber ka lo thleng anih pawhin" a tih chuan ka hlauthawng a ni, ani hian thil thalo zawk a ti mai ang em?
In ka thlen chuan ka khumah bawkin ka tah thawm ka chhungten an hriat loh nan ka puan a ka ka hupin ka tap khur ngawt ngawt, ani khan kei aiin a thil thalo tih kha a thlang zawk anih chu! Chuti chung chuan min hmangaih a inti maw, huhh.. ani khan min lo hmangaih ngai reng reng lo anih dawn kha.
Zing ka tho chhuak chu ka mit a bui luk a, ka chhungte chuan a chhan min zawt lem lo, an hrethiam vek a ni ang chu. Chaw pawh chu tlemte tak meuh meuh ka ei a, ka roomah bawk ka let leh a, ka inngaihtuah neuh neuh, a ni pawn kei aia a thil thalo tih a thlan zawk chuan kei pawhin tinge amah ka thlan reng bik ang.
Zanah chuan ka thiannu chuan min lo call a, ka chhang mai duh lo, a lo ti nawn tak sek avang chuan ka chhang ta hram, ka chhang chiah tih ah "Dinpui, hmanhmawhin lo chhuak rawh, Lalrinpuia hi,,zu a in nghek a, tunah hian racing a tel leh a tum mek ania, heti chuan a rui si a, tawhsual a tawk ngei ang" a tih chuan ka hlauthawng tan der, nimin khan eng thil pawh lo ti se, a chhe ber a lo thleng ta nih pawh in amah dem lo turin min ti anih kha "Ram,,tel lo tur in lo hrilh mai rawh, kan inkar chu a tawp vek tawh, hmu turin ka lo kal lovang" ka tih chuan lehlam ami chu a lo thaw hrawk "inthen leh inthen loh chungchang lam a nilo, a thiante takngial pawh in a thu a sut tir theilo anih hi, hmanhmawhin lo kal rawh" a lo ti vin vak "ka lo kal lovang" ka ti ve talh "Laldinpui Rinpuia hi chan ta ila, i inthiam thei tawh dawn em ni? " a lo tih ve chuan ka in ngaihtuah rauh rauh, a hnu fe chuan "aii" ka ti tawi tak.
"anih chuan lo kal vat rawh, dar kuaah race chu an tan dawn i la tlai lo ania" tiin call chu a cut hmak a, keipawh ka insiam sawk sawk. Tawp tawh mah ila, ha khawvel ata chan erawh ka duh kher lo.
Racing na hmun tur ka va thlen chuan Rinpuia chu a lo rui hle a, bike ah pawh a thu hlei thei lo, a thle leh bak thin. heti khawpa a ruih hi ka la hmu ngailo.A bula chuan va kal hnaiin "Lalrinpui eng thil nge i lo tih hi?" ka tih chuan min en vang vang "min kalsan i duh a ni lawm ni? Chuvang chuan keimah zawkin he khawvel atang hian kalsan zawk che ka tum anih hi" sehchilh zeta atih chuan "ai,,min kalsan lovang, lo kal rawh, racing a tel a tullo" tiin a pawt nawk nawk, a hnu fe chuan hmun falah ka kalpui thei hram a, "Vawikhatmah khatiang thil kha ti tawh ngai suh ang che" ka tih chuan ka kawngah min lo kuahin "nangpawn min kalsan tum tawh ngai suh aw" naupang chhia zet chuan a ti a, chhanna ka pe mai thei lo "i thil tih thin hi i sim thei thlawt lo em ni?" ka ti chuai raih ringawt, kalsan ka duh lo a, mahse min ti beidawng ngun tawh em a, kalsan lo theilo in min siam leh thin.
"min kalsan lo a min puih dawn phawt chuan keipawn ka thil tih thin chu sim ka tum ang" a tih chuan ka lawm lutuk chu ka biangah mittui hial a luang chhuak, ka khabe ah dawm kangin lungchim zet chuan min fawp a, rei pawh kan infawp lo, ka nam kiang a, "Zu rim i nam lutuk" ka tih chuan min nuih suk.
"Nangmah vang anih kha" a tih chuan ka en ha, "eng nge keimah vang anih na?" ka tih chuan "min then kha, ka rilru na in ka in vak alawm" a tih chuan ka nui ta tawp.
"Le, anih chuan haw ang le" tiin ka kai a, a bike awmna kan thlen chuan bike a lawn mai a tum a, ka lo pawt vat, "a ngailo, bike khalh chi ini lo, bike chu i thianten tih dan lo ngaihtuah mai rawh se" tiin ka pawt phei nawk nawk. A ni pawn min lo zui ve mai, kawngah chuan kan pahnih chuan kan kal dun a "Dinpui min kalsan tum tawh ngai suh aw, min kalsan chuan ka dam zo lo ang" a tih chuan "kalsan ngai lo turin nung la, keipawn ka kalsan lovang che," ka lo ti let ve a, "a har awm e" a ti niah niah, a hnu phei chuan a tawng duh tawh khawp mai, kawng tluanin ka khap reng.
Kan in kan thlen dawn kawiah chuan a ding a, ka haw tur pawh chu min ui hmel viau mai, min pawt hnaiin min kuah vawng vawng, "I va han rui nawi e aw" ka ti ringawt, a rui zawk hian ka thlah ang che a ti mauh mai sia,, han hnial dawn pawn amahin kan in lam panin a pen pawk pawk mai si, han hnial chi ziangzang lah a ni silo, engtin tak haw ve ang maw.
Kan han inthen rei lo dan chu a, in ka luh chuan min lo en thap, kapa chuan "amah vang bawk kha em ni?" a tih chuan chhang lovin ka bura nghat ringawt, ka nu chuan "ka siam tha thei ang tih rilru pu hian in ngaizawng thin a, nangmah ni zawk hi a hnuah siamthat ngai zawk in leh thin, hei tunah pawh amah vangin zan tlaiah i chhuak a,i bialpa chu i siamthat hmel tawh viau mai alawm kha" a tih chuan "Nu, tun tum chauh hi a ni tawh ang, a ni pawn sim ve a tum tawh alawm," a tih chuan tham loh hmel zet hian a nui a, "Ui mei chu tel in zut zut mahla, ui mei a nihna a bo chuang lovang, ani pawh eng ang pawhin siamthat tum mahla nang hmeichhe awmnem zawk hian i siamtha thei ngai lovang" thamlo zet a a tih chuan min vit sawk nimai hian ka hria "Nu, eng thil nge a tawn pawh i hriatpui hleinem, a thil tih thin sawn chhan a nei a, chuan tunah hian sim tir tumin ka bei mek anih hi."ka chawl dat,
"He khawvel hian min thlawp lo mahse, nang tal chuan min thlawp ve ka lo ring asin" ka tih zawm leh zat.
"Khapa avanga i chhungte thu i kalh hnem tawh zia te hi i hria em? Hmeichhe duktak loh takah i chhuah phah der tawh hi" a tih chuan ka biang a lum thla pap.
Chutiang chuan maw min hringtu nu ngeiin min tih a, tawng ka tum mahse ka tawng theilo, ka kha a chih tlat. "Min chhan tum tawh lo khan thlah nghal ang che" a tih chuan "Nu insiam that a tum mek a,,tun hi min mamawh hun ber a ni, ka thlah lovang" ka ti ve ngat,ka sawi rawh rualin ka biang a ri nghal that, ka roomah ka tlan chho a, ka khum bawhin ka tap khur ngar ngar.
Eng ang pawhin thlah turin min ti mahse ka thlah mai thei lo, ahma ang kha chu nise ka thlah ngei ang, mahse tunah chuan insiam that a tum mek a, kei lehzelin ka thlah chuan engtin nge hmalam a pan leh tak ang, a nu in a boral san atangin kum li lai a ni tawh, mahse tun thlengin hmalam pan harsa a la ti a, tunah chuan hmalam pan turin a inhuam tawh a, kei chuan ka pui ngei bawk ang.
Zing ka thawh chuan phur lo zetin inhnuai lamah ka chhuk a, eirawng ka bawl nghal mial mial, ka nu leh ka ute chuan min be lo hrim hrim, keipawn hmu lo ang maiin ka thil tih ka ti mawlh mawlh ringawt.
Zing atanga zan thleng chuan ka chhungte tumahin min be lo, keipawn ka be bik lo, tunah hian ka chungah thinrim rih mahse, eng tik niah emaw chuan an thinrim hi a la reh ve mai ang, chu chu ka beiseina awmchhun a ni.
Zan dar kua bawr velah chuan Rinpuia chuan min lo call a "Din, I lo kal thei ang em? ka thi takngail dawn" atih chuan ka hlauthawng tan der, "khawiah nge i awm, ka lo kal nghal ang" ka ti nghal vat, a lo tawng lawk loh avang chuan ka hlauthawng tawh hle, chhuat dungah chuan ka vei tawn sek tawh, "Rinpui i la awm em" thawm a ri sat sat a, a hnuah chuan "în ah ka awm" tih zawngin min lo chhang a, thawmhnaw lum ka in bel nghal mawlh mawlh.
Ka pindan atang chuan ka chhuak a, kawngka ka hawng dawn tihah chuan ka U Lianzuala chuan min pawt her nawk, "Khawiah nge zan zan a chhuah i tum?" a ti chang bawl, "U ka chhuah ngei ngei a ngai, mi,,min manmawh" ka tih bah nawk ka hmanhmawh tawh hle. "Nang hian zana chhuah ching angin ani kha pawn dawk dawk i tum a" tiin ten hmel zet chuan a sawi a, "U i ngaih ang kha a nilo" ka hmanhmawh tawh lutuk, engtin a awm tih takngial pawh ka zawt hman silo a.
"I chhuak lovang" a ti chang leh bawl, ka nu pawh chuan "Ni e, i chhuak lovang, in inngaihzawn pawh tih tawh nak laiin nang hian zanah lehzel pan i tum a maw?Khawiah mah i chhuak lovang" a lo ti chang ve fak "Nu i hrethiam lo anih kha,tunah hian a kianga ka awm ngei ngei a ngai" tiin chhuah luih ka tum a, mahse ka pen chhuak dawn chiah tiha an thu lo sawi avang chuan pen chhuak ka tum uk tawh chu ka tawp chat
"Tunah hian i va pan anih chuan vawikhat mah lo haw tum tawh suh ang che, kan in mihran a ngai tawh ang" ka nu chuan a ti a, ka pa pawhin engmah a sawi lo.
Ka biang chu a lo lum thla nghal pap a, mahse ka chhuah a ngai, ka thlen tlai a thiang lo, thil pawi zawk thleng thei a ni tlat. Ka chhungte thinrim chuan reh hun ala nei ang, mahse tuna ka kal loh chuan a chhe ber thleng ta ila, ka inthiam thei tawh ngai lovang.
Pawnah chuan ka chhuak lui a, ka chhungte chuan kawngka an kalh thawm pawh chu ka hria, hmanhmawh tak chuan ka tlan a, kawng tluanin ka mittui chu a tla char char.
Rinpuia te in ka thlen dawn chuan ka mittui chu ka hru sawk sawk, kawngka ka kik chuan a lo inkalh lova, ka lut ka tawp, Rinpuia chu ka au a, mahse min chhangtu reng reng an awmlo, a room lamah chuan ka lut a, Rinpuia ka hmuh chuan ka hlauthawng hle,chhuatah chuan a lo mu reng a, a lamah chuan ka tlan nghal a, ka mal chungah chuan a lu chu nghatin ka sawi mawlh mawlh, a hnu chuan a lo meng diar diar a, min hmuh chuan a nui suk, keipawh ka lo tah nuih hawk.
"Eng vangin nge hetia i lo awm a?" ka tih chuan "Zantin zu ka in thin a, mahse nangmah vangin zanin chuan ka in silo a, ka suffer anih kha" a tih chuan amah ka khawngaihna leh ka hlimna chu a inzat ngei ang, "Ka hmangaih che" tiin a chalah chuan ka zuk fawp a. Min lo nuih sukin "Hetiang hi a nih ziah dawn chuan eng ang pawhin lo suffer nasa ila, ka tuar chhuak thei ngei ang" a tih chuan kan nui dun ver ver.
A thlan a tlak nasat em avangin bathroom lamah chuan ka hruai a, chhuahsan mai ka tum chuan ka banah lo man in, "ka chau nangman min bual rawh" a ti anih chu.
"Nangmahin lo inbual rawh" ka ti a, khatia a sawi ringawt pawh khan ka sa hat hat, ka ngam teuh lo.
Rinpuia nen hian kum khat leh a chanve lai chu kan inzui tawh, mahse infawh aia thui kan la kal ngai lo. Min hmangaih ve tak tak ti ka hriat na chu ka thianhlimna min vawn him sak ngei a tum tlat thin vang a ni.
Min nuih suk a, keipawh ka chhuak nghal. A pindan chu mipa pindan tih takah a rawng dum lam hlir a ni a, mahse a hnawk vak lemlo. a khuma a a thawmhnaw te chu ka thlehfel sak a, Rinpuia pawh a lo chhuak har lo. Towel thianghlim var zet hi a kawngah a veng a, towel dang pakhatin a sam huh chu a hru mawlh mawlh bawk, a six pack leh v line pawh a lang chiang teh a, ka chil ka lem ri khalh.
A nui suk ri ka hriat chuan ka harhchhuak thut, lehlam ka hawi vat, "Ti teh Din, chiang taka i en vek tawh tho kha, tuna taka lehlam hawi kher a ngai em ni?" a tih chuan ka zahna a belhchhah.. Khatiang em em a uluk khan en ka tum bik pawh a nilo. Chhan ngaihna hre lovin ka lei ka chhuah zeuh ringawt. Chutah a rawn nui ta hawk hawk. Ka lam lo panin min chawi kang lawp a, a rim fresh zar leh a shower gel hman rim pawh chu ka hip nghal kawk darthlalang hmaa dawhkanah chuan min thut tir a, ka bulah a lo ding nghal "ka sam hi min hruk sak rawh" tih leh towel chu min pek a rual a, ka lo ban ve mai, a sam chu ka hruk sak mawlh mawlh a,ani pawn ka hmui a fawp leh zeuh thin.
"Tihian nupa ni tawh ila ka ti e" a lo tih chuan ka lo nui ringawt a hnuah "kan la innei ang chu, tuna i fel ang hian han fel phawt mai la" ka lo ti ve a, a lu a bu nghat nghat naupang chhia hian.
Zan dar sawmpakhat rik dawn vel chuan ka haw a, mahse in ka thlen chuan kawngka an lo kalh a, kawngka sirah chuan ka luggage leh ka bag a lo awm a, a chungah lehkha a lo awm bawk, ka en chuan ka pa kutziak ngei a ni.
"Zanin tun darkar atang hian kan fa angah kan en tawhlo che a,kan tan chuan mihrang i ni tawh ang. keini aia I thlan zawk kiangah chuan kumkhua in awm la, i chhiat I that ni pawn keini chuan kan fa kan ti tawh bawk lovang che. Tun atang chuan Nang Laldinpuii hi kan fa ini tawh lo ang" tih thu chu a lo inziak a, rawl chhuah lovin ka tap khur ngawt ngawt.
A hnu chuan Rinpuia chu call in min lo lam turin ka ti a, a hriatthiamloh hmel hle. Mahse a lo kal tur thu chuan min chhang ta tho , ka luggage bulah chuan thuin ka chhungte min tih dan chu ka ngaihtuah let a, mahni inkhawngaihna in ka khat a, ka bianga mittui a luang zung zung a, hru turin tha pawh ka neilo.
Kei hi hnawhchhuah leh tuithlar ka ni tih hi ka awi theilo! Mahse awih lo eng ang mah ila, hnawhchhuah leh tuithlar chu ka ni tak tak si.
Rinpuia a lo thlen chuan min lo pan nghal a, ka bul a lo thlen chuan a hmelah mak thihna tamtak ka hmu. chutia pawna luggage nena ka lo awm chuan a thawng ve viau a ni mahna, ka kuta lehkha ka ken chu la in a chhiar a, a chhiar zawh chuan min pawt thoin min kuah hle hle.
"ka tihpalh ka thiam loh vek a ni, ka thiamloh vek" a ti mawlh mawlh, "hetiang thil ichunga a thlen ai chuan tawp mai ang, kei chu min lo ngaihtuah suh aw, ka tha vek mai ang" a ti a,, a hnuah amah bawk chuan "ka thiamloh vek" tiin a phun leh bul bul thin. A hmui ka hupsak vat a" engmah i thiamloh a awm lo, engtik niah emaw chuan ka chhungte chuan nem leh hun an la nei ngei ang, chuan min thlah hi tum leh tawh ngai suh," ka ti let ve a
"tunah chuan nangpawn hmalam I pan mek a, I kiangah awm zel ka duh, ka theihna kawng apiangah ka pui ang che.He khawvel hian hnungchhawn che in,mi zawng zawng hian hawisan che mahse, kei chuan ka thlawpin ka theihna kawng apiangah ka pui zel ang che" ka tih chuan min fawp vawng vawng keipawn ka lo chhanglet ve nghal.
An in lamah chuan min hruai haw a, inru ni lo mah ila, vangtlang leh mipui ngaih dan turah chuan kan inru a ni tawh mai si.
Heti khawp hian ka chhungte hian an lo iai ang tih ka lo hre ngai lo.
Zantin chhuakin a rui thin tih chu ka hria, hetiang mipa chu tuin nge mahni makpa atan duh reng reng ang, mahse a thiltih chhan an hriatpui lova, hriatsak tum a hnekin mite chuan an nun a beidawn tawh tehlul nen, an nun beidawng zet tawh chu a aia thuk beidawnna ruamah an nawr lut a, tho thei tawhlo puih ngai em em, puitu nei lova puitu tur zawng thinte chu puih a hnekin an nat belhna tur leh an tluk hlenna tur thu an phuhchhuak zawk thin, hetiang vang hian mi tamtak chuan mahni a tuar zuam tawh lovin an nunna hlu tak pawh chu thlahlel zo tawh lovin an nun an chhat leh mai thin.
Thihnu piah lamah an tawrh tur hre reng chungin he khawvela an natna chhawksak tu tur an tawng miau lova,he khawvelah chuan an lungaih beidawm laiin an kianga mi te erawh an hlimin a nun a nuam a, khang nun nuam tak te kha an awt ve thin asin.Khawvel hi fair lo an tiin hrehmuhnah chuan inang tlang dialin na an tuar dun tawh anga, chu an intluk tlanna ringawt pawh chu an tan chuan he khawvela hmusitna an tawrh leh mi chirhthehna an tawrh zawng zawng ai chuan a nawm zawk ngei an ring thin.
Mi rethei fapa chuan nitin inhlawhin chhuak ve mahse mi chuan an en liam mai mai thin. Mahse veng khata mi hausa fapa chuan han inhlawh ve se an ngaisang in "thawh hreh a neilo" tiin an fak rawn em em a, ka mi rethei fapa chhungte chawm nana nitin inhlawha chhuak ve thin erawh kha chu "school pawh a kal tha peih lova, saw tunah chuan a inhlawh mai mai tak saw" tiin fak a hnekin an sawichhe zui thin.
Kha an mi sawisel khan eng harsatna nge a tawh a hriatpui lova, chhungkaw retheihna avangin school kal chak ngawih ngawih khan school pawh kal thei tawh lovin a chhungte enkawl nan hna nitin rim takin a thawk a, mahse a chan ve chhun erawh chu mi fakna nilovin mi sawiselna zawk tho a ni a chan ni.
Mi hausa fapa chuan school kal peih tawhlo in khawlaia eng ang pawhin rui mahse mi hausa fapa anih avangin tumah in engmah an sawi ngailo "engtin pawn awm se, a pa a hausa a, a thawh ve kher a tul hleinem" tiin.
Mi hausa tan chuan engkim hi a lo tih theih vek mai anih hi, mi rethei chuan eng ang pawhin lo thawnrim ve thin mahse, a retheih miau avangin tuman an fak lova, mi hausa erawh chu mi tam zawkin an fak rawh hluai hluai thin.
Kei chuan ka hmangaih in puih a ngaih lai hian thlah ka tum lova tunah chuan insiamthat a tum tawh a, kei chuan amahin insiamthat tumna rilru a put chhung chuan thlah lova chelh tlata tanpui ngei ka duh bawk a ni.
Rinpuia te in kan thlen chuan ka rilru a nuam zan lo, ka thian dangte în a innghah mai te ka duh leh hnuhnawh, a chhan chu khawtlang leh mipui ngaihah inru kan ni dawn si a, chutiang ai chuan mahni thiante belh kha a tha zawkin ka hria, ka luggage chu Rinpuia chuan a inah chuan a dah lut a, kei chu lut mai lovin pawnah ka la ding reng "Hawh, lut ang le" tiin min nam kal dat dat, "a,,ka thiante inah ka awm rih mai dawn maw ni" ka ti niah niah, ka rilru a nuam thei zan lo a tin ni.
"Din, tunah tak chuan i chhungte chu i chungah an thinrim hle a, engtikah nge an lung a dam leh ang tih pawh a hriat loh, i thiante inah chuan i inthlahrung mai mai ang, engtia rei nge i awm dawn tih pawh a hriat siloh" a tih chuan dik ka ti ve pah reng sia, "Mahse mite ngaihah chuan inru kan ni mai dawn asin" ka tih chuan a lamah min pawt herin ka darah a kut pahnih nghatin "mi chuan engtin pawn sawi mah se, nangmah leh keimah hi kan pawimawh ber, kan inru lo tih hrechiang ve ve tu khan nih kha, keiin I puihna ka mamawh a, nangin tunah rih hi chuan kei lo chu pan tur i nei chuang lo, midang ngaih dan tur te mai mai chu ngaihtuah lovin lungmuang tak khan awm rawh" a ti thum dut a.
"Mahse mipa leh hmeichhia in khata chen dun reng chuan..ihh" ka ti leh niah niah ka sawi tum a hrethiam a ni ang "Dinpui, min ring rawh, dan khatna ngeiin ka nei ang che"a ti khawng at, a aw chu a nghet cher churh hle a, keipawn ka ring nghal thlap bawk.
A inah chuan kan lut a, nu leh pa a nei tawhlo avangin a ni chu a nu leh pa roomah a riak a, kei a roomah min riahtir thung.
Zing ka thawh chuan ka awmna chu ka hai thelh , mahse nimin thil thleng ka hriat leh chuan mahni inlainatna in ka khat a, engtikin nge ka mittui a tlak tih reng reng ka hre hman lo, tho lawk lo chuan khumah chuan ka thu reng. Ka chhungte khan an sawi ang tak tak khan engtikah mah kei hi an fanu ah min pawh tawhlo ta se. Chu thil ngaihtuah chuan ka thu ngawi reng, ka mittui pawh ka dan sen rual a ni lo.
Room kawngka a lo inhawng a Rinpuia'n chutia ka lo thu min hmuh chuan min lo pan nghal rawk rawk a, a awmah min kuah bet nghal hlun a, ka chhipah a fawpin ka hnung a chul heuh heuh thin.Ka insut faih faih reng, "Tah thawl phawt i mamawh a nih kha" a tih chuan nimin zan atanga ka tah theih loh na bang kha a chhuchhia a ni ringawt, a ri meuhin ka tap chhuak a, a hnu chuan ka thawl ta hawk mai.
"Ka lawm e" ka tih chuan "keimah vang vek alawm, min tawng lo nila chuan hetiang thil hi i chungah a thleng lo tur" a aw ah pawh chuan a inthiamloh zia a lang. "Nangmah in dem tawh suh, he thil hi chu ka cho chhuah ve reng a ni a, tunah chuan min tuithlarin min hnawtchhuak mahse, he thil hian i nunah rah tha tal a chhuah chuan ka rilru pawh a dam ngei ang" ka ti let ve a, "Nangin min rin a ka kut i chelh chhung chuan engmah tih theiloh ka nei lo" a lo ti let ve a, a mitah tak ka en a, a mitah chuan a ti tak tak a ni tih ka hrethei. Ka en a, ka nuih sen sen, a biangah fawp zeuhin bathroom ah chuan inphih fai turin ka luh san a.
Pawn lam atang chuan ring mangkheng hian "Zing ka thawh tirh ata ka thil tawn nuam ber a ni ka damchhung zawngin" a tih chuan bathroom atang ka lo nui ringawt.
Kar hnih lai a liam ve ta, ka chhungte tumah chuan min la be lo, biak ka tum ve fo thin, mahse tumah biak theihin an awm ngailo, an lakah chuan ka beidawng takzet tawh. Mahse Rinpuia erawh a nun a sim chho tan mek a, zanah hian a suffer leh zeuh zeuh thin. A nasat lutuk tawh hi chuan tih ngaihna hrelo in zu chu tlem ka intir leh ringawt thin.Tunah erawh chuan zia tawh tak a ni.
A nun a siamtha mek zel a, amah avangin ka natna pawh ka theinghilh phah fo mai, hnawhchhuah leh tuithlar ka ni tih min theihngilh tir thak khawpin min duat a, a nunah chuan ka pawimawh ber a ni tih a ni telin ka hre tam chho telh telh bawk, ka nunah mipa dang ang lenglo ang bawkin a nunah chuan keimah chauh ka awm tih ka hria a, ka thla a muan phah hliah hliah thin, mi chuan eng ang pawhin min lo sel mahse, kei chuan thlah ka tum lova, a thlarau nun bo mek tawh pawh hi ka hruai let sak ngei bawk ang.
Kan pahnih chuan kan hlim em em thin a, keipawn a nun a sim chu ka lawm hle a, mite chuan eng ang pawhin min lo sawi sela, Rinpuia nen kan nih phawt chuan kan paltlang thei zel ang.
Inkhawm zanah hian kan inkhawm dun thin a, mi chuan min melh leh zuk zuk thin. Hetiang mi te avang hian inkhawm chak ve ngawih ngawih thin tam takte hian inkhawm ngam lovin inkhawm lovah na tlak leh mai thin.
Mi inkhawm ngai lo te han inkhawm se an melh leh zuk zuk thin a. eng eng emaw inhrilh ruin an thiante nen an nui leh thinte hian a inkhawm ngailo lo inkhawm ve te tan inthlarunna nasa tak a siam sak a, a hnu phei chuan inkhawm ngam lovin an inkhawm loh phah thin. Mi thenkhat vangin Pathian hnaih ve chak thin te chuan hnaih pawh hnaih ngam lovin an tlukna ngaihah bawk an tluk leh phah leh thin a, ding chhuak tura an chakna neih chhun pawh an hauh phah thin.
"Dinpui innei tawh mai ang" ka beng bula lo ti thawp sup tu lamah chuan ka inher e "Imm,,,neih te pawh kan la innei ang chu," ka lo ti ve mai a, " 'Kan la innei ang chu' ti leh ngawt zel mai, engtikah nge kan inneih ang a? " hmui pet sawi chung chuan a ti a, ka lo nuih ringawt "Aww,,ka tih loh ten, 'aii' tiin chhang che ila i duh dawn tawp silo" ka tih let ve chuan "ka duh reng nang,inneih i duhloh chuan ee..." tiin a ngawi zui daih.
"Duh lo ta ila,,engtin maw??" tiin ka mithmul ka san euh euh, "Chimawm suh" tih zawngin min chhang a.
Chhun lamah chuan hna thawkin a chhuak a, keipawh kan ina ka awm tawh silo a ka dawr enkawl ve thin lam pawh ka pan ngai lo, ka chhungte khan an tih dan dan a ni tawh mai. Ina awm reng chu ninawm tak a ni. Hna han thawh ve ka tum pawn Rinpuia'n a phal tlat thin lo a, ka awm awl nasa lutuk a, ka thau vek tawh.
Thla hnih lai a liam ta, ka chhungte chuan min la ngaihven lo fo, an lakah chuan beisei engmah ka nei tawh lo, mahse Rinpuia erawh chuan a thil tih thin engkim a sim fel vek tawh a, ka chhungte vanga ka rilru natna pawh Rinpuia vangin ka tuar na lutuk tawh lo, engtik lai pawhin min duatin min ngaihsak em em a.
Zan kan mut chuan khua a chhe hle a, zanlai a lo nih meuh chuan tek a tla nasa mai , khawpui ri a nasa in ruah a sur buan buan, hlau tak ka ni, tun anga khaw chhiaah kha chuan ka nu leh pa bulah ka mu thin kha ania, mahse tunah chuan "nu pa" tih a ka auh phakah an awm tawh silo, khawpui ri lah chu a nasa telh telh a, current a la thim zui. Rinpuia bula kal tawp mai ka duh tawh, mahse current a awm silo a, ka tho chhuak ngam lo, hlau tak hi ka ni, kawl a rawn phe leh ciah tihah chuan mipa hlimthla hi chhuat dungah ka hmu a, ka au vak ngam silo, puanin ka lu ka khup a, ka dak chhuak ngam tawhlo reng reng, ka mutna khuma chu lo lawn an awm tih hriat takin a awn deuh duai a, kut vawt thlerin min lo khawih chuan ka au vak, mahse a hnu chuan "Shtt,,keimah " Rinpuia'n a lo tih avang chuan lawm tak hi ka ni, ka kuah nawk nawk.
"ka hlauh hman zia chu a" ka ti chhuak hluai a, "i hlauh ka rin avangin thim tham hnuaiah ka lo pan che anih hi" a lo ti ve a, ka bulah lo inthawlhin min kuah tha sat sat , nghet taka min kuah chuan ka thla a muang nghal sawng sawng, ka chhipah fawp zeuhin "Mu tawh rawh le" a tih chuan keipawh chuan thuawih takin ka chhing ve nghal a, Rinpuia kiangah chuan thlamuang takin ka hmuhil siai siai a.
Tunlai chu inneih chungchang a hma ai zawng khan a sawi ngun a, mahse zep lo ah chuan min hrilh dan hi thing thei e. Mi te hi purpose ve tal tur a nia.
Tlaiah chuan Rinpuia a lo haw a, a ni hian bank ah hna a nei a, a hma zawng khan ka sawi ngai lo nangin a hna hi tlin tak a ni. Chaw kan ei lai chuan "Dinpui nau pai i ngeih khawp mai" a tih chuan ka chaw ei ka phuh chhuak thawt. A ri meuhin min nuih a, inah ka awm tam avang hian ahma ai mahin ka ngo a, ka thau sawt viau avang hian min hretu te chuan ka rai emaw tiin rai ka ngeih thu min hrilh fo thin. Rinpuia pawh hian tunlai chu hetiang hian min tilui fo mai. Rai tak tak lo mah ila, ka zak ve pah reng.
"Jonathan Lalrinpui" ka ti nghek "imm,,ka hming hi chu nalh i ti tih ka hria lawm, naute hming tur ngaihtuah ang" tak deuh deuh hian.Ka fian ken lai chuan ka vawm pawp, a lo indang hman hram.
Chaw kan ei kham chuan kan eina vel aman a seng a, keiin thleng ka, sil thung. Thleng ka sil zawh chuan thutthlengah ka thu awm duai, ka puar lutuk hi awm ngaihna ka hrelo.
Rinpuia chu lo kal hnaiin ka dul thep tak chungah chuan a kut lo nghatin a chul hliau hliau "Baby, anu hi i ti hah khawp mai" a tih chuan a lu ah ka beng pawp "Lalrinpui over thin suh, ka rai tak tak emaw ka ti tep thin, che over thei lutuk mai" ka ti nghek, min nuih suk suk a "anih chuan naute chu siam mai ila" beisei nei zetin min melh a "inneih pawh kan la inneih loh hi" ka ti leh vak, hepa hi tunlai chu a hlim thei riau eng a hria nimaw.
Zan dar sarih bawr velah chuan Rinpuia chuan gift bawm lian zet hi min lo pe a, ka birthday pawh a ni silo, eng atan tak ni maw "tinge?" ka ti ringawt "hawng mai rawh" tiin ka bulah a lo thu a, ka hawng ve nghal mai , a chungah chuan kawrfual sen leh pheikawk dum a hill sin te, kawr nena inchawih deuh hi a lo awm a, a nalh kher mai, mahse hetiang kawr te eng atan nge? "A nalh lutuk, mahse eng atan nge, ka piancham pawh a ni silo a" ka tih chuan min melh reng ringawt "kawr kha va ha chhin teh, chuan pheikhawk pawh kha lo bun chhin la" a tih chuan a chhan ka zawt ve phet, mahse min chhang duh thak lo anih chu.
A hnu chuan kawr leh pheikawk chu ka va ha ta nge nge, darthlalang hmaah chuan ka ring reng, ka inhmeh phian ka hnung lam atangin min lo kuah a, "i mawi lutuk" a ti sup, ka lo nuih ver ver, darthlalang hmaa thutthlengah chuan min thut tir a, ka sam a khuih mawlh mawlh a hnuah amah chuan min bawk sak a, make-up hmang lem lovin lip gloss ka inhnawih ringawt a. min pawt tho nghal.
"Leng chhuak ang" a tih chuan ka en reng ringawt "Heti hian ka chhuak ang maw" ka ti vak, "rai hi i haw mah mah, kawlh hlik hlek lutuk" "Lalrinpui ka rai loh hi aw," ka ti leh vak, min pawt dawr dawr, pawnah chuan kan chhuak a, a bike-ah ka duhlo chung min hlang nawlh amah zawkin "i van rit sawt em em" a la ti tak deuh deuh anih chu.
"ka chhuk leh daih mai tur asin" ka tih chuan min nuih tlawn ver ver a,"chhuk lovang, khawvela thau ber pawh nila, Laldinpuii i nih chhung chuan ka duh ber zel tho ang che" "hmm,,khawvela thau ber ka ni kher lovang" tiin ka thu tum vuau mai.
Bike chu a start a, kan tlan chhuak nghal a, restaurant kawtah a ding a, "Chaw te chu kan ei tawh reng kha" ka tih chuan "ka la puar ve hleinem" a lo ti sam mai "em em an a, awihawm loh lutuk, khawrh li lai i ei" ka tih chuan a nui huah huah.
Restaurant chungah chuan min luhpui a, light pawh ti eng lovin in bati tam zet an chhi a, pangpar rim a nam veng veng bawk, an restaurant chu a changchang in romantic tak a ni, dawhkhan pakhat zawnah chuan min thutpui a, a hmaah chuan rose sen a tam ngang mai, ka pangpar ngainat ber a ni bawk a, ka la a ka hnim vang vang, "a mawi lutuk" ka ti chhuak hliai.
Dawrah lah chuan mi tumah an awm lo va, a nawm tehreng nen, tumah an awm lo chu mak ka ti viau mai ka hmaah chuan Rinpuia chu lo thingthi in bawm sen tereuh te chu phawrh a "Dinpui nang hian kha ka nun buaichuar zet atang khan min hruaichhakin nun thar min tanpui a, tuna ka nunah hian bungthar min kaipui turin leh tun atanga kumkhua a ka nupui ni turin ka duh che, min nei duh ang em? " a tih chuan ka thutna atangin ka ding chhuak hluai.
Ka mit atang mittui a luang nghal a, chhana ka pe mai thei lo, Rinpuia hmelah chuan ka chhan mai loh avangin hlauhthawna a lo lang a, a hnu fe ah "aw, ka nei ang che" a ti chhuak tiau, bawmsen tereuh te atang chuan zungbun nalh zet lo phawrin ka kutzungtangah chhan a lo rawlh lut a, lo ding chhuakin ka chalah a fawp zeuh a, "ka lawm e" tiin ka mittui luang chu min lo hruk sak a, light a lo eng a, ka han hawikual chuan ka thiante leh ka chhungte chuan min lo hual thap chu niin.
Ka chhungte ka hmuh chuan ka hnuk a ulh tun mai, ka nu chuan min lo kuah a, "Bawihte kan tihpalh aw, i awmloh chuan maw i pa leh i ute tumah hi kan hlim thei tak tak lo, kan ngai thei lutuk che" a tih chuan "Nu keipawn ka ngai thei lutuk che u" ka ti chhuak ve tiau a, ka u te leh ka pa te pawn min kuah liam liam hlawm, tun ang tluka ka hlimna hi piang nawn leh pawh ni ila, ka tawng tawh kher lovang.
Rinpuia pawh chuan kan chhungkua inkuah khawm chu min lo en reng, ka nu chuan a hui lauh lauh "Ka makpa lo kal ta che" a tih chuan Rinpuia hmelah chuan a hlim zia chiang takin ka hmu thei, a hlim hmel ka hmuh hian keipawh ka hlim thin.
Ka nu chuan "Rina, palai te lo tir ve phawt la, tichuan in innei dawn nia, in inneih hma chu Bawihtei hi lo haw rih rawh se, kan ngai ve rih si a, in inneih phei chuan kan kiangah a awm tawh dawn silo" a tih chuan Rinpuia chuan min ui hmel ngang mai, ni e, thla thum dawn zet kan lo cheng dun tawha, amah a han awm leh chu a hreh ve ngawt ang. Kei tak pawh hian a ruk chuan ka hreh a, mahse kei chu ka chhungte ina let leh tur ka ni a, Rinpuia erawh chuan nu leh pa leh unaute a nei ve silo a. Amah te chauh chuan a khawhar thlak ngawt ang.
Mahse inngaihzawn laia in khata chen reng thei ni heklo, Rinpuia pawn lungthlu zan lovin "aw" a ti ve thei hram "Mahse zanin chuan lo la haw lo se, naktuk zing lamah keimah ngeiin ka lo thlah dawn nia" a ti ve khauh a, ka chhungte pawn an lo hnial bik lo.
A bike chuan kan inphur haw a, zanah chuan room hranga mu thin kha ka bula mut a ti tlat a, reitak inhmu tawh lo tura kalsan tur pawh ka ang alawm. Mahse ka hnial lem lo. Ka bulah chuan lo mu in a ban puam lian zet chu ka kham a, "nangmah chuah chuan i khua a lo har ngawt ang a" ka ti a, "Ka ngai ngawt ang che" tiin ka chhipah a fawp vang vang a "keipawn ka ngai ngawt ang che" ka lo ti let ve vat, "palai te lo kal phawt se, thlakat vel bak awm hrang lo ila a tha ang, ka ngaih lutuk na lamah che ka â hman mai ang" nui suk paha a tih chuan "i â hman em lovang, reilote chauh alawm kan awm hran dawn, kumkhuain kan cheng dun tep tawh alawm" ka lo ti let ve a, fiamthu deuh hian "ih maw i tel lo chuan nikhat pawh hi nileng a ni asin" a tih chuan ka nui vak "nikhat chu nileng a nih mai lovin" ka lo ti let ve a. kan nui dun leh thin.
Zanah chuan tui takin Rinpuia ban kham chuan ka muhil a, a tuk zingah chuan Rinpuia chu a tum vuau reng mai, ka haw tur chu min ui khawp mai, mahse inngaihzawn kai a inkhata awm reng chu a ni thei silo a, kan inah chuan min thlah a, kan inchhung ka pen luh chuan ka hnuk te a ulh leh dawn dawn tawh, thla thum dawn zet kan in hmulo in inchhung
ah pawh ka lut lo kha ania, Rinpuia chuan ka luggage chu min khailuh sak a, ka roomah chuan min dahluh sak a, reilote thu khawmuangin a haw nghal a, a haw chiah chu ka ngai nghal veng veng.
Tlailam chaw kan ei chuan ka eitui khawp mai ka nu chuan min melh leh vang vang thin, a hnuah "Bawihte rai iva ngeih ve, kha i chaw ei te pawh a tui viau a nih kha" a tih chuan ka antui hawp lai ka phuh chhuak lo chauh, "Nu ka rai reng reng lo" ka tih chuan ka chhungte chu an meng bial nasa mai kapa chuan "Eng a! ka rai lo e aa" a ti chhuak phawng "imm,,ka rai lo" ka tih chuan a ngai te bawkin mak tih hmel tawkin min en hlawm. "i thau sawtin i vun a nung a, i chaw ei a tui bawk a, i railo takzet a maw!?" kanu in a lo ti leh a "imm,,rai lo, rai lo, inah ngawt ka tawm a, chuvang mai mai chu alawm" ka tih leh pawh chuan an la awi chuah lo "Bawihte test kit ka lo pe ang che, va in enfiah phawt i ngai, i rai tih i la test loh vang ani ang, mi zawng zawng pawn i rai an ti vek" ka nu chuan a la ti talh.
"Nu rai chi pawh ka nilo, ka la thianghlim alawm" ka tih leh chuan ka u in a antui hawp lai a phuh thawt "thla thum dawn chuang chu i bialpa nen in khatah in khawsa a, i la thianghlim a maw! Awihawm loh loh" a ti nghek, min va han awilo hlawm chiang tak "Ka la thianghlim, dan khatna ngeiin alawm pasal ka neih dawn" tiin ka kham daih, chaw ei lai lai a khatiang han inzawh reng reng te chu a.
Mi rai lo pui rai thana han than chiam chu a, tuin nge maw ni ka rai te lo ti reng reng ni Rinpuia call a lo lut a, ka lo chhang nghal thuai "Chaw I ei tawh em?" tiha ka zawh chuan "aii ka ei peih lo" tih te tawlh in min chhang a "tinge? chaw te chu ei tur alawm" ka lo ti vat a, "I awm silo a, engmah ka ti peihlo, ka ngai che" ril ruih a a lo tih chuan keipawn ka ngaih tawh zia chu pui tak a ni, "keipawn ka ngai che" ka lo ti let ve thuai a.
"ih maw, ka kianga i awm thin lai pawh khan ka khawi reng chung che pawh khan ka ngai thin che a, tunah phei chuan ka khawih thei tawh silo che a, lo let leh tawh mai la ka ti" a tih chuan min ngaih tur zia ka ngaihtuah ka, ka khawngaih lutuk chu ka tap lo chauh.
Hepa ka tawng hi chu he khawvela mi vannei ber ah ka inngai, "thla khat vel lek alawm ka awm hran dawn, chumi hnu chuan kohhran leh mipui hriatpuina ngeiin in khatah kan cheng tawh dawn alawm" tiin ka hnem a.
Kha ka hnemna khan keimah pawh min hnem zo mawlh lo, keipawn a kianga awm ka thlahlel tawh takzet, ka chhungte chu ka ngailo niloin ka chhungte chu inhnem chhawng thei tur vek an ni a, Rinpuia erawh amah chauh a ni a, a lungngai hnemtu tur pawh an awmloh vang a ni.
Ka roomah chuan ka u chu a lo lut a "tu emaw chu a lung ava leng bik ve" a lo tih chuan ka lo nui mai "Bawihte, pasal min neihsan daih i tum tawh mai sia, kan hnenah awm reng la tha tur " a tih chuan min lo ngaih ve zia ka hria a, ka hlim veng veng. "Bawihte Rinpuia chuan a chawm zo ang che tiraw, chuan a kiangah i hlim bawk ang em?" a tih chuan "aw,, u a kiangah chuan ka hlim em em ang, chuan ngheiin min dah ngai lovang tih ka chiang alawm" tiin ka lo chhang a.
"I hlimna tur a nih phawt te chuan" tiin min kuah a, keipawn ka lo kuah let ve a, min chhuahsan hnu chuan keipawh ka khumah chuan inthlawh in Rinpuia nen chuan ka in text a, a hnu reiloteah chuan ka muhil ta siai siai a.
Ni hnih hnuah chuan palai hmel chu kan hmu ta ngei a. 'Chhungte kan lo in rawn khawm ve phawt ang' tiin an thlah a,a naktip niah chuan palai an lo kal nawn leh a thla thar ni sawmhnih pakhat (21) ah inneih ni tur chu a ruat a, thla khat tha chu hun kan la nei, Zanah chuan Rinpuia chuan min lo call a, ka chhan rual rualin "Inneih ni thleng vat tawh se ka ti" a tih chuan ka lo nui ringawt "nui mai mai suh, thleng vat se i ti ve lo em ni?" a tih leh chuan "thleng vat se ka ti tawh lutuk a lawm, chuan ka ngai che" ka tih chuan a ngawi vang vang "keipawn ka ngai che, ka inah ngei pawh hian ka lengin ka in hre lo, i sulhnu i hnutchhiah tam lutuk a" a tih chuan a lunglen tur zia ka hrethiam mai, kan pahnihin kan lo cheng rei tawh em bawk a tin ni.
Kan inneih dar ri chu ka bengah chuan ri mawi ber a tling hial awm e, ka pa chuan min kaiin ka pasal ni mai tur Jonathan Lalrinpuia lamah chuan min kai mek a, ka zam rualin ka hlim viau bawk, inneih thu kan chham lai te chuan a tihtak zia ka hria a, a hlen ngei bawk ang tih ka ring bawk.
Thla lakna hun kan hman lai chuan mipui min tawiawmtu an tam khawp mai, kei tluka hlim hi an awm leh kherin ka ring tawh lo.
Mi thusawi ruk ka hriat chuan ka nui suk "khati khawp khan an lo cheng dun rei a, a rai emaw tia, a lo rai miah lova, dan khatna an la tlin hial zawk" tih thu an sawi chu ni, mite chuan mak min ti hlawm khawp mai, ka rai emaw an ti vek hlawm kha ania, kei lah chu ka rai der silo a, ka nui ru leh suk suk thin. Kei tlukin ka pasal ni ta Rinpuia pawh a hlim tih ka hria a, chu chuan lawm lovin min ti nui leh thin.
KUM CHANVE HNUAH CHUAN;
"Baby lo chhuak vat tawh rawh, Ama leh Apa hian kan nghakhlel tawh che ania" tiin Rinpuia chuan ka dul tlema puar ve deuh tawh chu chulin a be mawlh mawlh, ka rai thu kan hriat tirha kan hlim zia kha, naute pawh thla li (4) a tling ve tawh a, Rinpuia lah chuan chawlh a la tan der tawh, mak tak maiin a thawna te pawh chuan an lo phal ve mai bawk, thawk tura ka tih luih ngail pawhin a duh tlat lo, "hnathawh ai chuan nang leh kan naute bula awm ka duh zawk" a ti mauh mai sia, tih ngaihna pawh ka hre tawh lo.
Naute pawh mipa nge hmeichhia tih hriat hma hauhin naute thawmhnaw leh toys in în chu a khat nghal der tawh, ka nuih tawp tawh heti khawp hian naute kan neih hma pawhin a phur tawh a, a fa lo piang tur chu a hmangaihna zawng zawng nen a hmangaih ngei ang tih pawh chiang takin ka hria, Rinpuia ka pasal a ni hi chu hmeichhe vannei ber ka ni.
"Ama naute i pai hian i hmeltha zual sauh, kan naute pawh hi a nu anga nunnem, fel leh hmeltha em em ani ngei ang" a tih chuan "Apa anga tumruh leh hmeltha a ni dawn alawm" ka lo ti ve thuai a, a thutna atang chuan lo tawlh chho in ka hmui a fawp vang vang "Ka lei vantirhkoh dik tak chu i lo nih hi" a tih chuan, "eng maw i lei vantirhkoh ka nihna chu" nui chungin ka lo ti ve a "nang hian minlo hmangaih lovin, ka nun ka sim nan min pui lo la chuan tunah pawh hian kha ka nunhlui kha ka thlah ka la ring lo, nangmah vang liau liau in tun dinhmun hi thleng thei ka ni, Pathianin ka tana a lo tirh Ka Vantirhkoh ngei chu i ni" a tih chuan ka lo nuih ver ver.
Chu thu a sawi lai chuan he thu hi ka thinlungah a lo lut zawk a, mi Pathian ngai ngawih ngawih mahse pan ngam silo, pan an tum pawha mahni inthlahrunna, mahni insitna an nei thin lai hian keini Kristian in ti te hian puih a hnekin an tluk hlenna tur mualah kan nawr liam thin, hetiang mi hi nilovin, kan puih theihna kawng theuhah pui ila, an mahni an insit loh nan, kan kianga nun nuam an tih theih nan, an mahni hriatthiamna nen an kiangah awm tlat ila, hetiang mi nun beidawng ngawih ngawih te hian keini ringtu tha inti te ai chuan an mahni ang tho a khawlaia rui thin te kianga nun nuam an ti zawk, a chhan chu keini ringtu tha inti te chuan an nun kan hrethiam lova, hriatthiam pui a hnekin an mahni hlat thei ang ber turah kan awm thin. An ni pawn kan hlat sawt hle tih an hriatin an in kiltawih a, min hnaih ngam lovin, an mahni rilru hrethiam ber tu, an mahni ang ho kiangah awmin tumah inhnem thei chuang an awm lova, an thlarau nun chhanhim tu tur ber keini Kristian inti te lahin chhanhim chu sawiloh, hnaih takngail pawh kan hnaih duh thin loh avangin thlarau bo tam tak, kan chhan theih rengte chu chhanhim lova awmin a aia sual nasa zawkah an tlu leh thin.
Keini ringtu inti te hian in enfiah kan mamawh takzet a ni. Nun beidawng tawhte pan ngam khawp ni turin inhawng zauiin an thil tawn te hriatthiam pui tum ila, tun aia tam zawk thlarau bo te hi kan chhanhim thei ngei ang.
"Ka hmangaih che, ka lei Vantirhkohte" ti thawp sup tu lamah chuan ka inher a, "keipawn ka hmangaih che" ka tih chuan lungchim zetin min fawp vawng vawng a.
☆*:.:*☆ A Tawp Ta☆*:..:*☆



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)