LUNGDUHTE KHA BY MR. Fanai Rt

Ngaia
Site Admin
Posts: 25717
Joined: April 30th, 2016, 4:07 pm

LUNGDUHTE KHA BY MR. Fanai Rt

Unread post by Ngaia » October 5th, 2022, 11:26 am

LUNGDUHTE KHA
(Competition 2022)

MR. Fanai Rt


Ka room tukverhah dak chhuakin, khawchhak lama zan lalnu chharthlapui eng bial kûng chu thlir vang vangin, lung muang fê hian ka zozial cheh lai bung tawi lam deuh tawh chu a ka fawp sek sek a, panlai nun te ngaihtuah kirin ka lung a leng ngang mai, khawtlang lunglen an tih ang hi ani ber ang chu. Chutih lai chuan ka fapain kan chawhmeh ei bang alu kan, plate ami tam lutuk tawh hi lo rawn chawi phei lâ lain, "apa hei hi ka ei zo vek dawn," a rawn tih chuan panlai nun chhui kir mek ka lo ni nen, ka nuih a zain ka lung a ti leng zual kher mai. Aw le, tiin tukverh lam bawk chu hawi leh a, panlai nunah bawk ka lunglenna chu vah kual tir lehin, ka phone zai ring thei em em chu ka hmet nuap nuâp a, ka play list a ka hla duh zual ka dah khawm ami chu play tur zawng kualin ka chhu kauh kauh va, a tawpah Lenrual an kim ta lo tih hla, TBC.Zaithanpuia sak ngei mai chu hmuin, a hmehna bial laitak chu ka han hmet ri kauh va, zai ngaihthlak nan ti a kan vaihlo hralhnaa ka lei ve ngât, Burma chhuak ka phone sound ring em em atang chuan, "Dawn a sei lenrual an kim ta lo" tih hla chu a rawn sa ta vang vang mai le, Lunglenna chuan min rawn fan chhuak nghalin, ka fapain ka ei zo vek dawn a rawn tih leh ka thianpa Awmawma te nen ei zo vek rual kan nih lai chu ka ngaihtuah kawpin, Awmawma pi kan chhaih buai thin zia te chu ka ngaihtuah kai zel a, lawm loh chuan lung leng takin ka nui ta var var a.

Ni e, pan lai nunah lungduhte nen khan changpat cheh chhum ang maiin, eng dang dawn lo lekin leh at so reng reng khan nakin hun dawn nachang la hre hlawm hek lo vi, kan tal ve naw naw a, INDIA ram Prime minister nih tum lam kha chu hla tak a ni. Ni khat chu ka thianpa Awmawma'n, "Api hei hi ka ei zo vek dawn," tih paha a pi Ba chhum bel zen rak rak pahin min rawn mitmei zuk zuk a, kei lah chuan ka lo hrethiam mai si lo, a pi chuan," i u Mama eitur dah ve rawh, engkim hi i ei zo duâk duak reng ringawt mai, thawk chhuâk thei mang si lo," ti a a rawn an tak hlak hlakah chuan thil awmzia ka man thiam ve ta! Bal chhum kha min pek ve chuan a u mama khan a chang ve dawn lo va, a thianpa min hmangaihna avang khan a bel chawpa tlanchhiat pui a, hauh mai pawh ni lo, ka tana vuak tuar turin thutlukna a siam a lo ni. Tlan phut thei turin min mitmei a lo ni. Chutah kawngka pui hlui ve tawh lam, hawn leh khar zawnga inhlap ring thei zet lam chu a veha veh tak meuh hian ka hnaih hriau hriau va, chutah le! Ka inrin hma chuan ka inring tawh emaw tiin, 'Dohrâng tar phunchiâr,' tiin Bal chu abel chawpa rawn chawi vawkin, ka lamah a rawn dawk phei puat a, kawngka chu rawn nam hawng thuaiin a inkhawh chhuak nghal zawk, kawngka chu a inhlap ri nghal bur a, a pi pawhin, thinrim takin hmunphiah a rawn lek kawh nghal, ka hamhaih chu tlan lawk nachang pawh hre lovin ka ding phawk deuh hru ringawt, chutah harh chhuak thutin, ka tlan ve meuh chuan ka thianpa pi chuan hmunphiah kuang lam hian min rawn hawlh fuh hman thuak, kawngka kha Awmawma khan anam hawng rawk kha ani a, chumi rawnin vaw let leh ka tlan chhuak tur chu kan innangching tawk vel viau a ni. Kawngka chu ka chala tauhin ka petek nawk, ka chal tuai deuh vut pah hian ka hawi let zawk a, Awmawma pi chuan hmunphiah kuang lamin min rawn hawlh hman zuau zuau, ka tlan leh tur chu sumhnun mawih lai chu rap fuhin ari hmawk a, kaitenah tlahawlh deuhin, ka ngal char chuan la mawih lo lai chu ka tauh nghek, na duh tîktêk tak a ni. Thlasik lai a ke zungpui tin kan chhuih kau hâwk ai khan a lem chuang awm lo ve, naupang tawrh atan phei chuan na tak a ni. Ni e, thlasik laia ke zungpui tin kau hawk khawpa inchhuih lo chu mi tlemte chauh an nih ka ring. Chutia ka tlu chu hawi chhuak tawh chuang lo chuan ka ke na ngaihsak hman ni tawh hek lo le, ka ke phawi theihdan tur ber chuan ka theihtawp anain ka han zuang dawrh a, Awmawma pi pawn min rawn man hman thuak mai, ka kawr hnungah rawn pawt hmanin hlauthawng zuang ka ni tawh bawk nen, ka kawr hmalam a ri tuarh a, ka dul kiar ve tak chu a lang nghal hawk, tar chak lo ta chuan min chelh nghet zo lovin min thlah ve mai bawk a, ka siliper khing lehlam sen, lehlam pawl tlir zawt zawt khawpin, mei kawhin ka tlanchhe ve thei hram, hawi let leh zawkin, Awmawma pi chu sei thei ang ber a lei chhiah khumin, a chhe thei ang ber chuan ka insiam chhiat khum vak a, an bawrh bawrh pah chuan thei leh thei lo hian min rawn la um ve zel, tar chak tawh lo tan chuan keini khawkhat naupang harh ber pawl pahnih chu umphaka man ngaihna kha awm hek lo, Kawi thum vel ka tlan hnu chuan min rawn um peih tawh lo tih hriain ka inthlah dul hret, kawi lina velah chuan Awmawma chu hmuin a bel nen a lo inpawm mang nuau, a lo ding phawk hra a, a pi rawn tlanna lam chu bih leh dak dakin, a rawn um tawh lo tih a hriat chuan thawven hmel deuh huai hmel pu hian min rawn en leh a, tlai chaw ei a a haw hunah hauh emaw vuak a tuar ngei dawn tih hre chang tawh hauh lovin a nui chhuak ta hawk hawk a, kei lah chuan kan chet dan vel chu a nuih emaw tiin ka thianpa chu kawkin ka nuih let ve kiah kiah.

Kan nuih za zualpui a reh chuan tawng rual thawtin ani'n, i kawr hma chuh a rawnti a, chumi rual chiah chuan i hmai chuh tiin kan hanin nuih leh chiam phawt a, chutah, ka kawr hmalam ruak huai chu dapin, a pi min man behna atang ka tal chhuaha ka kawr a rik tuarh khan ka kawrkilh awmchhun pahnih ka chan leh tawh a lo ni, ka seh tlak pawh tih tawh nak alai a, a chung ber chiah chu khawhar takin a la intar ve va va a. chutah, ka kamis hma lam chu zut thla thuakin a hmawr leh hmawr chu lain ka suih tawp, pa hi ka inti hliah hliah mai ani. Kan Sikula mipaho zawng zawng mit fukna ber thin, Sentei pawn chutianga ka kawr tlang suih chu min hmu ve se, pa min tih ve ka ring tlat a ni. An kawt pal tlang tur zawng ngatin kan thianpa Chhana te in lam panin kan kal ta hnak hnak a.

Kan khua-a tukverh darthlalang nei tlemte zing ami, Pu.Thana te tukverh zawn kan thlen chuan, Awmawma darah dawmin ka tuai vir mawp a, darthlalang chu ka kawk nghal vâ a, a then mang ta nuau mai si chu nuih za si, zak ve deuh si hian a then sûng a. chutah, kan chhaka tuihawk luang fim deuhah chuan phih nawk nawkin, Sentei hmuha hmai mang nuau a awm kha a duh bik lo va, tuikawk pawh a pawisa tawh lo a ni. a bel pawm lai ka melh deuh zak zak takah chuan ka tan liau liau a vuak huam a a tlanchhiatpui a bel pawm laichu zen rak rakin, a pi ba chhum sa, a u Mama ei aia min ruk chhuah sak, biang phe hlawk hlawk khawpa kan tlanchhiat pui chu rawn phawrh chhuakin, lian tha teltawl tak chu min rawn pe a, rang taka lo ban vatin ka kheh nghal mawlh mawlh, keih khat kan keih hman tih chuan Awmawma u Mama rawl ngei chuan, "Biakhlu tinge ka ba ei tur in tlanchhiat pui" tiin a rawn au teng nasa mai!. Chutah le! bak lêngin kan tlanchhe leh ta! Awmawma chu ka hmaah a kekawr mawng tet, inthiar dawna kekawr phelh ngai lo tur khawpa tet hnuang kar atanga mawng rawn lang phe leh zauh zauh thinin a tlan phe dawr dawr a. A hnung chiahah, Pu.Thanate TV a kan en thin vai filma a changtupa tlandan ang thei tur bera ka hriat chuan ka ban chu vai kual velin, meng rum ve deuh al chung hian chak thei ang berin ka lim chhuak ve ta puat puat a, ka Ar pa tlan a ni deuh ber mai, ka kamis kawrkilh kim tawh bik lo a hmawr suih ve si, alai kilhna awm lo ta chu, ka tlan zawngin ka kawr hma phelah chuan thli a dawng tha duh ham ham hle a, ka kawr hnung lam chu a puar tha duh pap pap ngang mai. chu tak te chuan minti tlan chakin, minti lang pa hliah hliah hian ka hria.

Awmawma u Joela nen hian kum khat chhuak niin, ka thianpa Awmawma hi keini ai kum khatin a naupang hret a ni. chutih rualin an unau hian ka kawm ve ve a, kum1 chhuak mah ni ila naupan lai chuan thla khat leka upa pawh kha kan inhlau deuh thin a ni. Min rawn um phak anih chuan Awmawma hi velh a tum leh ngei dawn a, Awmawma ka chhan avangin kan insual a tul leh ngei a ngai dawn tih a chiang reng. Awmawma chu khuar rapin a tlu sawp niaih a, tlan pel thuakin ka ding chawt, joela rawn tlanna turah chuan ka kut hum ruhin ka lo ding khawh ta tau mai? joela ai hian a thlain nau hret mah ila pumruaah ka lian a, minti tha ngam bik lo a ni. Kan bul a rawn thlen pawn min rawn bawh ngam mai bik lo, 'Awma' tiin ka thianpa tlusawp niaih chu a rawn au nghal ngawt, rawn tawng chhunzawmin, "khawi ka Bal ei ve tur kha?" Tiin ka thianpatho chhuak mek a ke bilh avanga ner nang nang chu min en kanin a melh ngar mai le! chutah kei chuan, "i ngam chuan chhuhsak la," tiin ka lo vo ve khar khar, upa zawk nanana chuan min rawn bawhin kan insual leh chu a ni der, upa zawk ta nanana chu hneh hek lo, a hnuai lamah ka awm rang kher mai, Awmawma chuan ka che chhe lau chu a hmu thei ngang lo ni tur a ni, a rawn au that that a, rawn kal bai deuh saih saihin, a u nanana chu a hlau hle tih hriat takin hlau aw tih hriat tak hian, Mama ka ei ai hi ei mai rawh, tiin a bal kenlai chu a rawn lek chhuak a, joela pawh chuan min thlah ve mai bawkin, a nau ba ken lai chu a rawn ban nghal zat. joela ba ei lai Awmawma'n a thlir dauh dauh chuan ka tihtur ka hai bik lo, ka Bal ken chu a lai takah phelin, ka thianpa tuk zana ka kawm hnenah chuan, "kha inphel mai ang," ti a pe nghalin tui ti takin kan ei tlang a. Ni e, naupan lai khan inhauin inti thiam lo thin mah ila, reilovah kan han vir mawp a, theihnghilh nghal daihin kan intih thiam lohna kha kan hre zui tawh ngai lo. kha nun naupang rilru thianghlim kha kan pathian nung meuh pawhin, naupangte a lawm em em chhan pakhat a ni ve tlat a ni.


Chutia bal kan ken lai theuh lungawi tak a kan lo keih mial mial lai chuan kan thianpa Rt ti a kan koh thin chu chaw tlang liantha lerh lawrh tak mai rawn lek larh larhin, an kawngka atang intithei fahran hian a rawn chhuak a, kan hnen arawn thlen chuan a chaw tlang liantha tak zum ki deuh lai keih rem zet chu duhthaw taka han keih thlain, a kut veilam a a ken chi var uk deuh khang chu a han liak pah zauh a, thial pawng talh talh chung hian a rawn thleng phei ve a, han lem khulin, "Biakhlu min lo kawm ve" a rawn ti leh ngawt. Ka chhan hma chuan joela chuan, "keih khat min keih tir ve la kan kawm ve ang che" a rawn ti vat a, chutah le! Rta chuan, a chaw tlang ken lai chu a ka chung awng pahnih atanga tui tlawnhnih rawn chhuak fan duah duah chung hian a chaw tlang chu a han keih leh hmawk a, chutah zet zawng keini pathum chu insum zo lo vin kan uak nghal tuarh tuarh, phal takin kha, a rawn tih chuan joela chuan a ban lo chiang kher mai. Rta hi kan thianho zingah a phakar thin em avangin kan kawm tha duh meuh thin lo va, tuna a chet dan pawh hi joela chuan a phakar vangah ngaiin kan kawm ve peih lo che a ti nghal mai reng a. Kei chuan," lokal ve rawh ka tih mek lai chuan ruahthimpui leh thlipui tleh hun lai tih takah khawpui a rawn ri dur dur a, chhum chhah tak a rawn inzial tup tup bawk. Chutah, hawh u, Chhana te in ah tlan vatang u, tiin kan awmna atanga hla ve deuh taka kan thianpa te in lam panin kan tlan dawr dawr, ruah hmitein min rawn tlak phuar phuar avangin Rta pawh han telh a ban hman ngaihna a awm tawh hek lo le, kan rual chuan rang fahraninin a rawn petek ve nghal. Awmawma pawn a bel ken lai chu kawng sir hnim buk laiah theh ri bawlin kan hnung deuhah a rawn tlan bai ve saih saih, Joela leh Rta chu ka hmaah chak thei ang berin an lim puat puat tawh, hetiang zela ruah hmi a tlaka a sur chhunzawm chuan kan huh hman dawn tih chiang, ka hnunga ka thianpa, bai saih saih chunga a theih tawka chak a rawn tlan chu nghah deuh pahin ka tha tawpin ka tlan ve duh lem lo va, Chhana te in kan luh ve meuh chuan ruah rawn sur tan chuan min nan zawr hman tep, duh ni ila, joela leh Rta thlen hma daih khan hul phiangin Chhana te in kha ka thlen kalh thei reng, ka thianpa ka ngaihtuah avangin ka tlan pel duh lo mai mai a ni. Thli a tel deuh nen, Chhana te in kan luh meuh chuan kan khur lut bauh bauh a, Chhana leh a pi leh pu tar tawh lam chauh lo awmin, mei an lo chhem hluah a, Chhana pu chuan, "Biakhlu he lamah hian rawn thu ru" tiin tap lum lam chu min lo kawh hmuh vat, chutih rual vek chuan ruah chu namen lo a tam a rawn sur nghal a, kawl rawn phe zawrin, Awmawma nen chuan beng hup pah hian tap kil kan thleng phei rang kher mai. Khawpui rawn ri dur durin tek pawh ring mangkhengin a rawn ri tuarh a, kan beng kan hup phui zo lo nge? A ringin kan phu nasa ngêi mai, Chutah kan zinga dawih ber Rta chuan aw khur dar dar leh mengphawk hra chung hian,"Chhana ruah sur hi a bang leh thei angem le?" a rawn tih chuan Chhana chu kan melh rawn nghal thap, khatiang thlipui leh ruah surin inchung rangva ring mangkhenga a rawn nan rik buan buan leh, in nghing lawih lawih khawpa thlipuiin a rawn nem tatak sawk sawkah chuan, a rapthlakin naupang tan chuan a reh mai rin loh kha thil awm ve tak a ni. Kan thianpa Chhana hi kei ni ai rual u hret a ni a, thil hre ruauva kan hriat avangin keini thianho hian engkima kan rawn leh en ber a ni rêng a, Chhana chuan lehlam hawi pah a nui deuh put put chung hian," a bang tawh kher lo maithei a ni, a nasa e mai," hawi kual vual vual chunga a rawn tih chuan kan rilru chu a vak thui hlawm kher mai, kan unau, kan khungte rilruah a lang nghal uarh uarh a, kan in theuhah haw tawh lo tura inngaihna nen kan tihngaihna hre lo chu kan ngawi thiap ringawt mai a ni. chutih lai chuan Rta bawk rawn tawng chhuakin, "Anu hian min rawn hruai se aw" a tih chuan, Chhana pu chu a aw then khurh khurh pahin muangchang hian a rawn tawng chhuak bauh bauh a," Ê, lungai reng reng suh u, in haw em em ang, ruah a sur reng ngai lo va, Ni pawh a sa reng ngai hleinem " tiin min rawn hnem a, thawveng hmel kan pu deuh huai hlawm. chutih rual chuan khawpui ri ring em em chu beng khawrh zawk khawpa rawn ri tuarhin, Rta thlaphang meng phawk zet ka hmuh fuh chuan ka nuih a za kher mai, ka nuih tak kiah kiah chuan a ngaihna hre lo zet hian min rawn melh thap a, chutih lai tak chuan kawl rawn phe zawrin kan beng kan hup rual leh hlawm a maimitchhingin, khawpui chu a hma ai ring chuan a rawn ri leh thawt, a hnu rei lovah thlipui leh ruah thawm chu Chhana pu sawi ang ngei chuan zawi zawia rehin a bang ve ta mai bawk a. Kan thianho chu tho suauin; Chhana chu a tuka inkawm leh tura tiam chungin kan tlan haw nghal nal nal a.

Kan haw lam Sentei te kawt kan thlen chuan an kawtah tuihawk tam lutuk lo hi lo luang dar darin, hawh u khuap ang u, tiin phur takin tuihawk tling tam deuhna khuar bik lai deuh chu kan hai khuar belh a, Awmawma nen a khuahna hmanrua tur hmawlh leh phelsep, lung, a remchang apiang chu kan la khawm mawlh mawlh a, Sentei'n an kaiten atang min lo thlir reng tih ka hmuh chuan ka che lai deuh hu, Awmawma pawn a hmu ve tih hriat takin a che vel chu a phur hmel kher mai, a thlirtuin a zir bawk a niang kan lung lak te chu a hla sawtin a lian sawt hle a, Joel-a leh Rta pawh anmahni tawkah lo buai ve hlein, chirh vel chu an theih anga tam an lo hai khawm ve turh turh a, hmawlh khawng deuh chu kheng tlarin phelsep chuan kan ping leh thliah thliah a, chutiang chu tlar hniha siamin alaiah chirh tam thei ang ber kan hnawh khat leh a, a sira tui chhuak tur chu chirh hmangin kan dang ping zel bawk a, hmawlh leh phelsep hmang chuan kan tui khuah chu zauh zelin naupang dangho pawn kan kiang lawkah kan tih ang chuan an rawn khuap ve zel a, khuap hmasa ber kan ni a hmanrua kan lak khawm chak ve vang nge kan tuihawk khuah chu laili deuhah a li lung tawh mai. Duhtawkin lungawi fe hian kan thlir thap a, keini aia nau deuh ten chen min rawn dil chuan an tichhia ang tih hlauvin kan lo phal lo, chutah kan veng parawl thir Deng pa Pu.Denga kan tih chu rawn kalin min rawn fuihpawrh ta! Cheng ula a nuam ngawt ang tiin a rawn nui var var a, Awmawma leh Rta chu rang takin an zuang lut nghal. In ngam ve nange? A rawn tih leh chuan Joel-a pawh a tlan lut ve leh, Biakhlu i van pa lo bik ve a rawn tih chiah chuan Sentei te kaiten ka melh zawk chuan min lola thlir reng tih va hmuh chuan Sentei hmuha pa loh hlau takin kan tuihawk khuah; ka thiante chen nut vek tawhah chuan a bawha bawk takmeuh hian ka zuang lut ve bawrh a, Sentei pawn pa tih hmel taka min rawn enin a lo nui ve var var a, chu chuan phurna min pek belhin kan sapatal tak tak mai anih kha, ka thiante nen chuan tui intheh perin kan ri chelchul a, kan hlimnain van atawng hial ang. chutih laitak chuan Awmawma leh Joel-a putea chu rawn au that thatin, Awma Joel-a haw nghal rawh u ka vaw dawn che u, tiin a kut chungchal pir vahin an unau chuan a rawn kawk vu a, engmah sawi tawh lovin an tlan haw nghal nal nal, keini pawh chhungte hauh leh vuak hmabakin berh phung chuan kan haw ve hna hna hlawm a.

Favang khaw nawm vanglai ni leh tawhin zan boruak thiang leh Thla bial zan a ni a, Thla eng tihtakah engkim mai fiah angreng taka chhun en ruih hnuaiah chuan keini thianho pawh khawlai fangin kan insawm kual leh hlawm tawh a, a tawp berah kan thianho zinga nghahmuan kan tih thin, Lza te kawtah ding khawm leh lat lat tawhin, a luruh ring ber Vanlala chuan," Lz hawh pawnto ang" tiin a han au lauh lauh a, Lza pawh a rawn tlan chhuak nghal tuang tuang, kan kim thawkhat ta maw tihah Pu.Thana kawt zawl zau lai panin kan pawnto dan tur sawiho pah zelin kan tleh phei dal dal, kan phur tlang kher mai. A hmun kan va thlen ve chuan naupang dangho pawh lo ri nak nakin, hmeichhe naupangho pawh an lo awm thap mai. Kan va thlen ve chuan pawnto ang u tiin kan pawntona tur kan thlang nak nak hlawm, hmeichhe naupangho leh mipa naupangho chu kan tihdan turah kan inhnial laih laih, a thenin sakuh ui lut an ti, a thenin Sakei bu ka luah ka luah tiha pawnto an rawt thul, thenkhatin inbiruksiak an rawt daih bawk, keini chu naupang lian pawl kan nih avangin kan thu chu a tlang deuh. Mahse, hmeichhe naupangho zingah chuan an zinga hotu chan chang deuh ber pakhat hian min hnial ve zel mai a, kan pawnto tlang thei lawk lo. Chutah hnunglam deuh atang Sentei chuan, " Tira mei kaiah tih kha," a rawn tih dak dak chuan, ni e, tiin hnial buai theih hauh loh tur hian Sentei sawi anga intira mei kai turin ka insiamrem hmiah. Ka thiante chuan ka kawr hnawng hmawr femah rawn fuanin, midang pawn hnial thei tawh hek lo, kan tih ang chuan rawn intlar ve zelin an kawr hnungah an rawn inpawt ve zel a, thui tak kan intlar hnu chuan pawnto hla sa tanin hmazawng chuan kan su ta dal dal a.
Tira mei kaiah Chhimtira mei kaiah ha haaaa. A hnuhnung hnung phungin seh. Tiin, tual lai thla eng hnuaiah kan hlim takin kan zai dal dal. Chutih lai chuan a hnung bera la naupang deuhhlek chu a rawn tap bai baiin, kan hual tiau tiau a, tinge? Tia kan zawh tliar tliar chuan a hma ami amah ai upa deuh nen phung seh hlauin hmasak an inchuhna lamah an lo invel tap a lo ni. Apa bulah ka sawi dawn, tiin a tap haw bai bai a, ngawithapa kan thlir thap lai chuan hmeichhe zinga hotunu ber chuan, "pang aw inzial ti leh ang u." A rawn tih chuan phur tak leh hnial buai tawh bik lovin kan inkai kual leh diah diah a. Ka bula ka thianpa Awmawma kutah chuan kai ve in, phur takin thiante lamah ka tlanphei pui dawr dawr, midang kiang kan va thlen chuan ka kut vei lamin Awmawma bawk ka va vuan leh chat, mak titakin ka kut dinglama ka vawn chu ka en let vat, Ka thianpa Awmawma kaiha ka kaih kha Awmawma awzawng a lo ni lo, Sentei lek lo niin, a kut chu a sa ta viau nge ni? Sadenmuanga pistol phawi tluka rang chuan ka thlah vat, ka mangang lutuk chu ka hawi kual vual vual, midang chu an lo inkai vek tawh si, kei leh Sentei alai vela awm chiah kan lo inkai lo chu niin, Sentei pawh a zah hmel kher mai. Sen tan tanin, a kut a rawn phar chhuak a, muangchanga lo vawnsak lehin ka kut a khut ru der der mai.

pang aw inzial inzial pangpui aw pang par aw inzial inzial tiin kan zai leh dal dal, ka kut dinglam ami chu thlah tum tawh lo ang mai hian nghet takin ka vuan tlat, nuam ru veng veng tak a ni. A ni pawn nghet takin min hmer let ve, chu zan thla bial lawma nula tlangval inngaizawng inrim tamtakte ai pawn ka hlimin nuam ka tih hial ka ring. Tin ahun takah chuan, tindialah tindialah tia inkai kual lehin Sentei leh ka veilama Awmawma ka vawn pawh ka la thlah chuang lo, kual pap hian kan tlan kual ham ham hlawm a. Khamlo tlang hle mah ila zan atlai deuh tawh avangin Tin dialah tin dialah naktukah khua var sela, inkawm leh dial dial ang u. Muttui mangtha, chaw ei tui mang tha, mahni in lam kawh theuhah tiin mahni in lam theuh chu an kawk suau, kan in kawh tuma ka phar leh Sentei kut phar chu inkhak buaiin kan kawk kual nawk nawk, in en tawn a mahni in kan kawh ve meuh chuan thianten, a che che sih hlawkah an rawnti leh thut, tihngaihna awm hek lo, hnai takah inhawi tawnin kan mit erawh hmundangah kan len ve ve, manganthlak duh tak a ni. Kan thiante chu i che tiin kan inum te tengtung hlawm a, inum haw hlawmin kan thianho pawh kan inthlah tliar tliar hlawm a.

A tawpah Awmawma te unau hnih nen kan pathum chauh kan chuang ta! Awmawma te in leh kan in hi veng hmawr lam fal deuh takah awmin, an in atanga hla deuh takah kan in hi a awm a, inthenawm e tilo chuan inhlat ve fuin, kan in inkarah hian thing a ding deuh khup bawk nen hian, zan pawnto haw hi ka huphurh thin hle a ni. Chutih nak alai chuan Joel-a chuan, an in leh kan in inkar khat leh thing din khupna hmun chu sawi hrangin tualsumsu awm thin thu leh Thinlanga pawh a awm ve thu chu a sawi lang zauhva, an in kan thleng chu a ni nghal mai si! keimah chauha Thinlanga leh tualsumsu awmna paltlang chu huphurh takte hian ka huphurh, a tukah inkawm leh tura intiamin min luhsan hmak, chhei! Thla engin achhun thing hlim hnuai hnuai eng reiruai hnuaiah chuan tlan phutin ka pa ka koh nghal chul. Hmanhmawh em emin ke artui mawng hlap ri zawt zawt khawp a tlanin, ka pa a lo muhil tawh ang tih ka hlau kher mai.

Thlasik vanglai January ramtuk thla a ni tawh a, khua a rovin naupangho tana fai har em em hunlai, ngal charah karah Ar hmul a thiah theih mai dawn emaw tih maitura chat hunlai, nu leh pa leh kan u ten kan peih lo chung chung tuiluma kan ngal chat na ti em em chunga min nawh khawk sak hun lai a ni. Naupang thenkhat phei chu an nawt tap rawng rawng thin anih kha. Ni khat chu; kan nitin tihdanin kan khaw thenawm atanga kan khaw pawh tur kawngpui an laihna lamah ka thianpa Awmawma nen kan thian dangte liam tawh umin kan kawr neih chhun kamis uk deuh khang tawh; sazu ang mai a kan ha hleiin a kawrkilh kan seh thlak vek avanga a hnuai lam hmawr kan suih bawk ngawt, sawi deuh tlan si avang chuan kawr hma a phel duai lo thei lo va, han tlan zawng khan thliin kan tlan zawng khan kilhna awm ta lo chu kan han tlan zawng khan kan kawr hnung lam a puar tha duh pap pap kher mai, chu tak chu keimahni kha a lawm lawmah kan tang leh a, chung vel ka sawi lai chuan ka nupui duhtak chu biangsum lang kalh hian a lo nui var var a, a biang sum chuan a ti lang hmeltha zual kher mai. Sawi chhunzawmin, kawr hnung puar pawp pawp khawp a kan thiante kan um pawh a kan um phak mai loh avang chuan beidawng deuhin kan tlan muang hret hret a, kawng laih hian kan khua chu rawn lut tep tawh mah se naupang tan chuan a la hla deuh a ni. A hlat deuh avang chuan a tlana han tlan tlen chi rual a ni lo va, kal bek bekin kan ti ti ta ringawt a, chutah chuan alawm ka thianpa hian ka sawi chhuah apianga ka nuih ti za tawp thei lo a sawi ni.

Ngawi rengin kan kal dun mawp mawp a, ramhnuai a lo ni tawh nen, ka hlau kher mai, Awmawma ka en chuan barakhaih hlim hmel hi pu deuh duiin a lo hawi kual hrek hrek a, kei ai mahin a lo hlauh hmel zawk, kal zelin kawng chhaka Laiking tlanchhe ri avang chuan kan hawi rual kher mai, thla chu nei ni ngat ila kan thiante thlawh pelin kan tum ram Bulldozer lei laiah kan va fuk vang tawhin ka ring, thla nei miau hek lo le, kan kang awka, tlan ang tia insawm hranpa ngai hauh lovin ahnung zawka tlan hlau chuan kanin lehpel zak zak , thui fe kan tlan hnu chuan ralmuang deuhin kal pangaiin kan kal leh a, chutah, Awmawma chuan tihian zawhna a rawn siam ta a," Bulldozer leh JCB hi insual ta se, tu zawk nge chak ang le?" A rawn tih chuan ngaihtuah vung vungin, JCB lê ka lo tih chuan, ner deuh nanga min rawn en deuh ha chung hian, "Bulldozer a chak fe zawk ang" a rawn ti a, timaw? Tiin zawhna ka lo pe let vat. A dang ro chil lem khalh pahin "Bulldozer te chu a ke kan en vek mah anga thir vek a nia, amah thir vek ani bawk a, a rit dawn ropui si, JCB chu a nawr hneh ngawtang a rit dawn ropui sia, JCB-in a kutin a khai zo dawn der si lo vâ," tia a ngaihsan Bulldozer fak chuan a titi tui ngang mai a, a fak tawp lamah, Bulldozer lei lai hi a hmuhnawm e, tiin a Bulldozer lawm lutuk chuan, Bulldozer tel lo chuan ka nung thei lo a tih chuan ka nuih za lutuk chu dul dawm meuh hian ka lo nui dir char char. A zak leh deuh si chu sei deuh deuh a lei chhuahin a thir seh nuih tut tut ringawt. JCB hmuhnawm ka tih chhan leh a kut tihchet vel dan chu ka sawi chhunzawm ve a, inhnial leh bap bap thinin kan tumram kanthleng ve chu ani der.

Mak ti deuh taka ka nupui hmeltha tak khur ngawt ngawt ka en zawk chuan, a nuih za lutuk nui ring ngam si lo, naute tih harh hlau lutuk hian a lo nui khur ngat ngat a lo ni. Nui deuh tha chungin ka bula mu ka nupui hmeltha tak chu kuah nghet sauhin, mut a chhuak tawh lo bawk a, sawi chhunzawm zel tur chuan ka insiamrem sut sut a, chutah ka nupui chuan ngawi lawk teh tiin a nui dir leh char char, naktuk chu Bibi-i bulah Awmawma chanchin chu ka sawi dawn khawp tiin a nuih za chu a insum thei thlawt lo. Ka thianteho hian nupui fanau an nei ve vek tawh a, ka nupuiin Bibi-i a rawn tih pawh hi Awmawma nupui a ni. Nupui kan nei vek e ka tia a dik leh lo, naupan laia kan sawi lawk leh kan rin lawk ang ngei a la hmu zo ve lo Lza hmulphurh tha fahran lo ve tak, kan thianho nuihna ti tam bertu hian a nak ruh bo a la hmu ve lo tak e. Ka nupui nui mawi em em nuih za zualpui a zia deuh takah chuan sawi chhunzawm lehin, Bulldozer lei laihna chu va thleng vein naupang dang lehlam vengho pawh an lo tam ngang mai, naupang mai ni lo, patling thankin zet tawhte pawh, chu khawl ropui zet en chuan an lo ther ve fuk tho. Ni e, kan khua hi thingtlang khaw nuam tawk tak nivein in250 Chuang zet khaw chhehvel ten an tiat vak lohna khaw hual vel ni mah ila, Bulldozer chu kan la hmu ngai lovin a hna thawk lai chu a hmei a pa, naupang mai ni lo, puitling tan pawh a hmuhnawm em a ni, tar lam deuh pawh an kat ve nuk thi mai. Kan thiante thleng hmasa chu zawngin kan inhmukhawm vat a, Bulldozerin a laih ko lai, hmun dang a hmalakna a laksan leh sina lai a hnathawk lan chian theihnaah chuan ni sa pawh pawisa lo chuan beka thlantui luang huh hluam chung chuan hmuhnawm ti em emin kan en a, kan thianho chuan kan thu tlar deuh thap, khaw dang kan melhsan phal meuh lo, Awmawma ka va en chuan, a ngaisang hlerh hlerh bawk a, thawk pawh a lo la mumal phal meuh lo a ni ber. Chutia rei tawk fang kan en hnu chuan kan mawng kham vel chu insiamrem sat sat hlawmin, ka zun chhuak chu ka tho a, Bulldozer lei vung paihna awih tlanah chuan naupang dang tamtak lo tawlhin an lo ri chelchul chu va hmuin ka zung zo chu ka thiante lamah tlan vatin, leivung tawlh ve tur chuan thianteho chu sawmin ka va tur sek sek hlawm, an ni pawh tho ve phak phak hlawm a, phur zetin leivung tawlh tur chuan kawng thlang lamah kan tlan liam sang sang a.

Naupang rual tamtak leivunga tawlh chu nuam kan ti tlangin ka au chel chul a, kan kekawr mawng pawh sazu kawng tum ang maiin a bel han tawh hlawm, thing bung leh changel kung; puitlinghoin min laksakah chuan chuangin pahnih pathum tete a inphurin ko sang ber lai atang chak takin kan tawlh thla a, kan chhuanna changelah chuanin pathum kan inphurin, a hmasa ber a thu ka ni bawk a, intithu leh inla motor khalh em emin Driver ten motor stearing an herh kual pap pap ang hian ka kut leh ban vel chu ka vai kual pap pap, chutah le! A mawng kan tawlh thlen dawn chuan thing bul su thla dawtin kan chuanna chu a ding chawt a, invawn nghehna awm lutuk lo ta chu a hma lamah rual em em hian a mawng; leivung lo tlin khawmna chu inbawh thuah deuh tap tapin kan thleng thla rual tlang hle, kan nui hawk uarh uarh a, hlim taka kan nuih lai chuan kan thlang hretah naupang dang tap ri ah chuan kan hawi thla rual thap. Chutah kan thianpa Tahbelh leh tap ring thei ber Rta chu ring leh uar fahran hian a rawn tap khawk ta rum rum mai le! Naupang dang hlim thawm leh au chelchulte chu a tap ring bawk aniang a hliahkhuh hnehin chulai vel chu a khawk rum rum mai, kan thianpa tap chu a ring sauh a. In en he hawin kan pawh thla vat a, a ban na lai ni awmtak hi lo dawmin a lo tap uar nasa mai, puitling thenkhat pawh an rawn thleng thla vat, kha tia kan thlen thlak rual khan lo lum thui bikin a ban a delh ulh a lo ni. Kawngpuiah hruai chho vatin puitlingho chuan a theih dan dana buaipuiin kan hawpui hnak hnak a, Vanlala Bulldozer en kham lo mawlh kha ka khawngaih kan liam dawn thleng khan hawi letin a ring a la fan nasa kher mai. Sente ti a ka sawi dat dat chuan, ka nupui chu lo thaw sak sakin a muhil tih hrilh hranpa ka ngai lo, kuah nghet sauhin tawnmamg ramah lungduhte nena lengho leh turin ka chhing ve ta riai riai a.

Ka hnar za mer merah chuan harh zawk a, ka fapa chuan pencil nen minlo thutchilhin hnai zetah min lo en kiau, ka hnarah chuan a pencil humlai sei em em chu ka hnarah hawlh luh a tum mek hi a lo ni. Ehe! tiin man tumin rizai hnuai atang kut ka phar chhuak hluai, man ka han tum chuan, te chul chungin a nu a koh vak vak a, chutah ka nupui duhtak chu room kawngka atang rawn lutin, ka fapa nena kan thingpui in tur a rawn chawi lutin a rawn nui lut var var, ka nupui tak hi chu âw ka khawvel hi a va hanti famkim tak êm, min rawn be nghal siam siamin, 'Lalapa vawiin chu inrinni ani bawk a, Lalawma chu ka fiam chak tawh a nia', tiin ka hlim nan ti ninawmtak hian min nuih var var, ' Rta pawh hi phone nghal teh an ni nen pawh kan inkawm khat emai an nu kha rawn hruai ngei ngei rawh se" a tih zawm deuh duah, lo nuih let var var pah hian, Aw le, aw le, president ka tih chuan nalotein min rawn chum taih taih, phone vat mai teh, ti hlukin, a eirawngbawl vil turin min chhuahsan nghal daih, ka fapa chu tir nghal zatin, ka phone rauh em em chu la turin ka hanti a, thu awih takin a rawn la ve mai bawk, a bianga lo piai zauh pahin muangchang hian ka contact list ami ka thiante number hmet chhuakin ka han phone kual zung zung a. Chaw kan ei kham a, tihfel tur ang ang ka nupui fel leh mawngzang takin a tihfel zawh chuan Awmawma te in lam panin kan chhuak nghal vat, ka ngaihtuahna hria niawm takin ka nupui chu kei ai aiin a phur emaw tihmai tur a ni. Ka thiante nupui hi a thiante an ni ve deuh vek mai a, hei hi a rilru zau vang ni berin ka hre bawk. Kan va thlen ve chuan ka thiante leh an nupui te theuh chu lo thleng vek tawh a, Ka nupui chuan Awmawma chu fiam nghal bawrh bawrhin, " Bulldozer tel lova nung thei lo pa chuan eng sa nge min ei pui dawn" a ti lut nghal hlut, thiante pawh ka nupui fiamthu chu lo hrethiamin Awmawma chu enin an lo nuih ve nghek nghek, Awmawma chuan phat ngaihna lo hre hek lo, min rawn melh rulh ringawt. Nupui la nei ve lo awmchhun Lza chauh kan nghak tawh a, kan thlen atanga rei lovah rawn thleng ve chhut chhutin, kan lo fiam nghal laih laih, a phawk ber Rta chuan nui duh hauh lo hian, "kha kan val sinior chu che muang rêihruih ve, nghahmuan nghahmuan" Lza tana ngeiawm tur fê hian a lo ti deuh hluk. Kan lo nui tha hlawm.

Ni e, thianpa Lza hi pui thei deuh a hi a nia, a muang theiin school pawh kan tlai phah fo thin, naupang lian ve tawh tak niin kum13 vel kan ni ve tawh. Pawl ruk zirlai kan ni ve tawh a, ni khat chu keini thianho chu hma takah innghak khawmin school tualah sertawk pet tur kan ni. Lz tiin an kawmchhak atang Awmawma'n a auh lauh lauh chuan, chaw la hmuam tun tih hriat tak hian, "min lo nghak ru" a rawnti puam tulh a, Rta chuan "kan tlai leh ngei ngei ang khelh tawp ber bak khel hman leh lovin dar ari leh anga," tiin a lo ner nung, rin ang ngeiin rei fe kan nghah hnuah a rawn chhuak ve thei hram, lo hau laih laihin Rta bawk chuan, "nghahmuan nghahmuan" tiin a lo melh ram ram, hmanhmawh lutukin kan tlan phe nghal dawr dawr a, school kan va thlen ve meuh chuan Sawi lawk ang ngei ngeiin khelh tawp ber a lo ni tawh, kan thianho khelh ve hun niin kan filled neih chhun zau lutuk lo school tualah luh tuma kan inzui tham tham lai chuan, keini aia pawl sang, pawl sarih zirlai Pali vel chuan min luh khalhin kanin dinchilh rap mai, keini ai pawl sang an nih avangin kan ngam chiah lo va, kan khelh aia khelhtir kan tum bik Chuang hek lo, chutah kan piah lawk atang hmeichhe aw chang fak hian, Biakhlua te luh hun anih kha, thinrim aw lam lek leka a rawntih chuan hawi thapin, kan luh aia luh tum zinga upa ber U vala chuan," nang hmeichhia kha lo inrawlh lo mai teh" tia pan a tum chuan, an inkarah tak lo tlak khalh vatin, engmah sawi chuang lovin rum taka melh chung hian ka ding khawh ve tau mai, ka kut chu ruh takin ka hum ram bawk, chutihlai chuan Sentei chu tlan thut in, office lamah a tlan nghal nal nal a, a pa, kan headmaster sir.thana hnenah a sawi dawn tih a chiang reng. Chu tak chu huaitaka Sentei tan, aia upa ka dinchilh ngamna chhan kha a ni ve tlat, U vala pawn thil awmzia chu hre mah se, ai naupang laka tlawm a hreh ngang aniang chu, a din ngaiin a la ding ve reng a, ka thiante pawh ka bulah rawn ding thap tawhin zirtirtu ten min chhan dawn tih hriain an rawn meng rum thar veleh, kan zirtirtute an rawn thlen chuan kei leh U vala chu min rawn auin office lamah lut turin min rawn ti, zirtirtu zinga pakhat chuan kan sertawk kan ball neih chhun chu la-in office-ah an keng lut hmak ui leh pawi tih hmel takin kan en thap ringawt. U vala nen office lam kan pan nghal hnak hnak a, huphurhawm tak a ni. kan va luh chuan a zamawm duh kher mai, kan zirtirtute chuan min zilh liam liamin, sir.Thana phei chuan kei chu min melh ding deuh ngar, kan zirtirtu anih mai bakah Sentei pa a nih avang chuan ka zam zual kher mai, school hi football khelhna tur ani lo va, lehkha zirna hmun a ni. In inkhelh hian in uniform inti bal a, in form pheikhawk inti chhe bawk, school-ah inkhelh tawh loh tur tia min zilh dap dapin class-ah va lut tawh ru dar a ri dawn tiin min chhuah tir a, dar pawh a ri zawm nghal.

Class ka luh hma hret chuan U Vala chuan min pawt ding chawtin, "hmeichhe phena huaisen pa, school banah i chak lovang" tia a kuttum min hmuh ruk chuan ka chil ka lo lem khulh ringawt, hawichhuakin Sentei'n min lo en reng tih ka hmuh chuan inti pa thar lehin, chhang ngam tak tak chuang lovin a mitah tak ka en ve ngar, bu nghutin class khat ni lo ta chu mahni class-ah ve ve kan lut a, ka thiante chuan enge an sawi? U Vala chu an hau em? An vua em? Tih vel chu min zawt nghal sawt sawt hlawm, tu zawhna mah chhang lovin ka thutna lam ka pan san daih hlawm a, mak ti deuhin min en thap ringawt, school ban mawlh chu ka huphurh leh tawh, U Vala hi keini thianho hian kan hre chiang a, a sawi tawh chuan himdam taka min haw tir ka ring lo bur, Sentei ka melh zawk chuan chhei! Min lo en ve chiah nen kan mit a intawng sak, ka lungphu mai mai chuh, Buh deng khawl ri hi ka tehkhin ber, Doctor ten lungphu ngaihthlakna ang hian ka lungphu chu Buhdengkhawl mai ni lo, khawpui ri ang dur dur a nih hial ka ring. Sentei ka va en leh chuan min lola en reng si, ka tihngaihna hre lo chuan lehkha zir peih lo ber khan lehkha zir ang takin zirlai bu ka keu ngawt, Manganthlak hian.

Thianten min zawh tak sekah chuan Uvala thu sawi chu ka hrilh ve a, kan mangang tlang khawp mai, ka chantur kha kan chiang tlang em a ni. Chawhnu ban dar arik chuan ka bag akin a suih nghehna chu ka tlan tibuai lo turin ka han suih nghet mawlh mawlh a, zirtirtu ten school tualah class dangho zawng zawng nen min line tirin, Uvala pawn a kuttum min rawn hmuh leh zauh zauh tawh, Sir.Thana'n bang ru a tih chiah chuan ka theihtawp takmeuhin ka tlan nghal, ka rualpuite tan umphak ngaihna ka awm awm lo vang, kan school hi khua atang fal deuhah awm niin veng hmawr in hmasa ber ka thlen hma chuan ka bag hruia rawn pawttu avang chuan ka ding chiang hle, nidangah pawh enganga chaka kan tlan pawha kan bag hruia min pawt hman ziahtu chuan min pawt ding tih a chiang reng, hlau chung chunga ka hawi let chu ka hnar ari no chak, let tawpin ka mittui a tla nghal zawih, ka thiante pawh rawn thleng ve nak nak hlawmin, Ukawnga hnenah kan sawi dawnnia an rawnti nghal sap sap bawk, Ukawnga hi kan thianho min kaihruaitu Uvala nena inrual an ni. ka ngawi renga naupang dang rawn thlen hma inthiarfihlim vat tuma ka ding chhuak chiah chuan ka hma-a romol var thianghlim em em mai rawn lek va ka hmuh chuan ka phu zuk, ka hnar a thi tih pawh ka hre leh chang tawh lo. A romol min pek pawh ban lawk nachang ka hre lawk lo hial a, i hnar kha hrufai rawh a rawntih chuan harh chhuak zawkin, laksak tur nge angai lo tia kal mai tur nge tia ka ngaihtuah mek lai chuan ka hmai vel rawn hru nawk nawkin kha hup ping la min pe leh mai rawh tiin a kal nghal daih. Naupang dang an rawn rik nak nak chuan min hmu ang tih hlauvin hmanhmawh takin thianten min kalpui nghal nal nal.

A tuk school kal a hun chuan insiam peih atin, romol pawh pek let ngei ka tum a, sukfai hiarin ka bag-ah thlehfeh tlapin ka khung mawlh mawlh, chutihlai chuan Awmawma chu hmanhmawh taka rawn tlanin, " hmanhmawh rawh, Kan nang lovang" tiin min tlanchhuahpui nghal dawr dawr, enge ti chunga tlan ve hlawkhlawk ringawt, i hre maiang tiin hmanhmawh em emin min kai a, ahmanhmawh ngang mai. Sir.Thana te kawt kan thlen chuan Sentei motora a lut tur chiah ka va hmu hman, min rawn hmuh ve chuan min rawn vai bik tih hai rual loh hian a kut a rawn vai lauh lauh a, hmelah chuan lungai hmel hmu tlatin ka inhria, chu chuan ka thinphu a ti rang tlat. Harh thutin ka bag a romol var ka phawrh vat, a lu thingin motor-ah a ta lut daih. a ngaihna hre lo zetin motor tlanliam chu ka thlir vung vung ringawt. Awmawma nen chuan school lamah kal hnak hnakin kei chuan ka suangtuahna ka kawm mawlh mawlh a, school kan thlen chuan Sentei thiannu Olivia-i chu be hrangin Sentei chanchin chu kan zawt chiang vat, Olivia chuan tihian min lo hrilh ve mai bawk a," tuna Sentei nu khu a nuhrawn tih in hria anga, a nuhrawn khuan ti duhdahin hreawm a ti hle thin a, Sentei hi a khawngaihthlak lutuk, chung vel vang chuan a pu Aizawl ami te hnenah awm turin a kal anih kha" a tih chiah chuan ka bing mum mum a, ka taksa hi a mur chhuak vek nimaiin ka hria, class laklai te chuan engmah ka ngaihtuah thei lo va, ka zirna thlengin a nghawng phah. Naupang kum13 mi naupang mai khan hmeichhia ngaiin ka kur nitin a ni ta ber mai, zahthlak hian, ka ngaih ber lah chuan min ngaihtuah ve em tih pawh hriat loh lehnghal, ka ngaihtuah chian deuh chuan ngaihzawng nei rual pawh la ni lo hi hetiang hian ka awm lehnghal ka zak leh hnuhnawh deuh, ngaihtuah loh tum ngawt ila tihngaihna a awm der si lo, ka hui leh pap ringawt thin. A romol te chuan a mawina a hlauh ang tih hlauvin uluk takin ka enkawlin ka sufai ve reng a, intawn leh hunah pek let ngei ka tum ruh hle, Engtikniah emaw chuan intawng leh ngei tur anga suangtuahin ka nghak ta ngawt ngawt mai a ni.

Ka tlangval chhuak ve tawh a, chutih rualin Sentei pawh nimin ang maia chiangin ka thinlungah ala thar reng , theihnghilh chu sawi loh nitin minute tih ka ngaihtuah ani ber mai. chhungkaw dinhmun avanga lehkha zir chhunzawm thei lovin thingtlang lo kan nei ve a, nitin lo lamah ka chhungte nen kan liam nitin thin a, zirtawp tlai ka feh haw chu Olivia chuan min lo biain pâl deuhtak hian, naktukah Sentei a rawn zin dawn tiin min rawn hrilh a, biakzui hman lohvin hmanhmawh takin a kal leh nghal daih, a hmel kha dik lo riauvin ka hre lehnghal, a thiannu arawn haw dawna a phur lutuk vangah ngaiin ka ngaihtuah zui lem lo, naupan lai atanga ka rilru taksa thlarau chenchilhtu a rawn zin dawn tih chiah ngaihtuahin lawm avangin ka zuanglo chauh, rit deuhhleka tuahthing ka put haw te chu ka vawr lochauh ani ber, Awmawma inah a awm avangin Olivia-i khan a hrilh daih tawh ka ringa an in lama hrilh ngai lovin ka feh haw kan in lamah min lo hmuah ngei ka ring. Ka ring sual lo chiang kher mai, kan kawta thing ka keuh ri a hria tih hriat takin kawngkaah a rawn lawr vat a, "Awmawm i hria tiraw" ka ti thla ngawt, a lu lo bu nghauh nghauhin inchhung lamah kan inzui lut nghal, inbual fai zung zungin ka intih fel zawh chuan thingrem mawnga uluk taka ka dah romol var rei tawh tak ka enkawl uluk avanga la var thianghlim sar mai chu la chhuakin Awmawma chu ka entira ka phur hi ani tawp mai. Awmawma chuan min lo fiam deuh hlutin "hmeichhe pakhata buai pa khang te i lola nei elaw? a hmuh ve hunah a lo hre tawh lo mai angah a tih chuan thil ni thei anih avangin ka hnual lek lek, nui chhuak hawk hawkin CM hmuaha lo hmuah chi ni si lo, lo hmuah dan tur boruak hi engtin nge niang aw" tiin muk hmel fe a ngaihtuah hmel a pu. In nu Olivia-i te in lamah lo awm phawt mai ila tha ang ka lo tih chuan a bu ve nghut nghut. Awmawma leh Olivia te hi kan tlangval chhuah hnuah inhmel duh vein an inzuina erawh rei lutuk ala ni lo, reitak an inhrilh pawh ngam loh avangin an inkungkaih har ve deuh a ni. Rei lovah Awmawma hian palai tirh a tum thu chu ka hnenah a sawi ngei kha, kan titi viau hnu chuan chaw ei turin min tin san a, zanah pawh Olivia-i te in lamah kan thianho kan leng a kan titi tui ngang mai. Awmawma chuan Sentei rawn haw tur chungchang rawn sawi chhuak thutin phur takin kan sawiho nak nak a, Olivia-i ka en chuan min rawn en ve a, a hmelah chuan dik lo awmin ka hre tlat, va zawh dawt ka ngam bik mai si lo, leng haw Ar rawn khuang al alin kan tin ta hlawm a, zan ka mu chu ka helhhawlh awm ngaihna hrelo chu ka inlet sek, mutthilh lam chu hla tak a ni. Zing lamah lo muhil ve sekin zing ka harh meuh chuan dar sarih a lo ni der mai, ka mut kham lo chu ham bui buiin peih lo zet hian ka tho a, Awmawma'n pawn atanga min rawn au lung lungin a rawn loh chuan insiam vat vat rawh a rawn tia min rawn tur leh sek sek tawh. Ninawm tlaiah chauh a lawm rawn thlen dawn tia muangchanga hmai ka phih chuan khaw dai mai an rawn thleng tawh tiin a chhuak daih, ka mangang ta hmanhmawh em emin ha ka nawt sawk sawk a, ka thawmhnaw hak chuan ka duhthu a sam loh avangin ka buai hle, Sunday thawmhnaw hak chi ni bawk si lo, ka thawmhnaw tlemte neih chhun fai alawi awm bawk si lo, ka mangang ta, ka thawmhnaw inkhai ho chu hai kual buan buanin ka inhai hnawk ta ngang mai, atawp atawpah ahmaa Be the red tih inziak a hunlaia kan uar em em chu lathlain ka ha a, ala chuar deuh zui hak maitur dang awm si lo, ka kekawr haklai chu bengfai thuak thuakin ka sam ti huh thuak thuakin tel tak tlem ka han inchulh thuak thuak a, Vanlalsaiova hair style ang thei tur berin ka sam ka tuai chho puat, darthlalangah ka inen chuan ka duhthu asam thei thlawt lo, a mal mala herh vial chhoh ka tum lai chuan kal daih tawh emaw ka tih Awmawma aw chuan " Tuan muangpa hmeichhe insiam chen zet ami insiam i tum hmanhmawh rawh" a rawn ti lung lung, a aw atang pawh a hmanhmawh tih a hriat hle. Amal mala herh vial chhoh hman ni tawh hek lo, samkhuih lain chho zawnga khuih puat puatin Olivia te in lam panin kan tlan nghal dawr dawr hmanhmawh thlak tak a ni. Min kalsan ni pawn hetiang chiah hi kan nih kha.

Olivia-i te in kan thlen phei chuan a nu leh pa chauh lo awmin khawnge Olivia ka ti nghal a thiannu rawn thleng kha a va hmuak anih kha an tih chuan het tiin Olivia-i nu min biakna pawh chhang fumfe lovin kan tlan leh nghal, Sir.Thana te kawt kan va thlen chuan kan khaw sumo lo ding vang tawhin Olivia-i leh athian midangho an lo ri chelchul hlawm, harh chhuak thutin ka ding chawt a, hmanhmawh taka ka hnunga rawn kal chuan min rawn su bu deuh lawp, enge a rawn tih hluk chuan zam lutuk avanga khur ru deuh dar darin ka kawkawr iptea ka romol ah chu ka zen rak rak a, i khur deuh elaw tih pahin sumo hmalam thleng min nam phei deuh dat dat, Sumo hnung deuh atang Olivia chuan kan pahniha min rawn huiin a rawn nui var var a, chutah le! Sumo phen atang reitak ka lo nghah tawh Sentei ngei mai chu Sumo hnung atang rawn chhuak thutin Olivia-i huina lan rawn en tih hriat takin min rawn thlek deuh ha a, ka lungphu chuan khawvel asawi ta emaw tih mai turin a rawn nghing dur dur mai. Sumo hnung atang rawn lang chiangin nau hram ve tawh tak hi a rawn pawm chhuak a, chumi rual chiah chuan a hnung chiahah mipa rawn lang ve zatin Bawihi khawi Bawihtei kha ka lo la ang tiin nau a rawn laksak, lehhawi vatin ka kekawr ipte ah ka romol ken chu muangchanga zen lut riai riaiin ka mittui rawn tla zawih chu ka dang hman ngang lo. A tawp ta....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)