THU TIAM BY Tetei yuki chhakchhuak

Ngaia
Site Admin
Posts: 25813
Joined: April 30th, 2016, 4:07 pm

THU TIAM BY Tetei yuki chhakchhuak

Unread post by Ngaia » August 25th, 2019, 1:29 pm

sg08wnq4.jpg
sg08wnq4.jpg (26.18 KiB) Viewed 7052 times


THU TIAM

(Repost)

Tetei yuki chhakchhuak
(story competition 2019)

Ka phone ringtone a ka hman ngei mai Tatiana manoais hla 'like you' chu a rawn zai a, 'tu tak ni ang maw?' Ti rilru chung chuan ka pan phei a,number hlang chauh a nih vangin lak ka tum lo zet a, ka inngaihtuah chhung chuan a rawn ri nawn leh nghal a.

"Hello"

"Hello, hello" thawm a awm chuang lo, "hello, ka tawng i hre thei em?" thaw ri hrawih ri ka hre ta! Ka thin phu a ti rang chiang ngei mai! Kum tam liam mahse a thaw ri erawh ka thinlung chuan alo la hre chiang ngei mai. "Remruat.. " ka ti thawp sat a. " Umm... Keimah Remruata. Tebawih i dam thin em? "

" Aw, Pathian zarah ka dam e" ka ti ve leh mai a. Nunhlui ni tawh mah se, chumi vang chuan biak chhiat kher ka duh lo. Chu mi vang chuan ka beisei leh ka ti chuang lo bawk.

"Alo rei ve ta hle mai, kum nga hnuah i aw te ka'n hre leh a, ka dam sawng sawng mai." Awiii ... Hepa hi eng nge a hriat a, hetianga a rawng ṭawng vel ni... Ka rilru ka sawi chhuak teuh kher mai.

" Engtin nge ka number i neih theih a?" Ka zawhna chu awm lo a ni chuang lo.

"Kan duh ber leh hmangaih berte number hriatte chu a har hleinem, i number ka hriat dan chu ka sawi dawn lo tih te chu i hriat sa nih ka ring." Awi over ve e! A awmdan tur ka hre nghal a vei nuih suk nga a,za lo zetin.

" Alo nih vel tak chu.. Eng atan nge min rawn biak ve teh mial a?" Zawhna hi ka ngah ve e. Mahse ka hre duh miau a. "engmah chhan dang awm chuang lo e, ka ngai che a, ka rawn bia che".

"Ka rin loh ngaihtuah loh lam thil daih a ni i rawn sawi ni."

"Eng nge sawi se min tih a?"

" Ê Ka hre chuang nang, tun ang zan rei tawh dawn lamah leh nghal."

"A la rei vak lo, dar 9 vel chauh a nih hi Tebawih."

"Rei tawh e, ka mut a chhuak ṭan tawh." Sawi tur hre tawh lo-in ka sawi chhuak ve thawr mai.

"Tebawih," a chawl det a, chutah a rawn ṭawng chhuak leh a.

"Tebawih, engtik lai mah hian ka theihnghilh ngai lo che a, ka thinlungah i cham reng mai. I awih lo ang tih ka ring mah se thudik a ni.Ka la duh chein, ka la hmangaih reng che asin." A aw ri chu a nghet chhurh mai.

"Hun kal tawh sawi hian awmzia a nei tam tawh lo nia, chutiang chiah chuan kan pahnih a hun kal tawh kha a siam ṭhat theih tawh dawn chuang lo. A tawp duhtu hmasa i ni a, i duh ang ngeiin kan tawp reng a,i duh duh a i khalh kual theih wheel borrow ka ni em ni?" Ka thu sawi tawp lam chu a ri fak mai. Ni e, kan pahnih inkar hi a tih tawp duh hmasa tu a ni a.Inhauhna kan nei hran lo a vawi leh khatah inṭhen kha a duh miau alawm. Mipa mahin inṭhen anduh chuan ṭhen ve mai tur. Dan ka tum hauh lo bawk a, kan inṭhen reng bawk a.

"Ka ti dik lo a ni tih ka pawm, khang hun lai khan eng nge ka hriat pawh ka hre lo, keimah ngei pawh kha ka inring tawk lo a ni a hun lai khan a chhan ka hre bik lo." A ti zawi sup a.

"Remruat engmah rilru ti nung thar a natna tur sawi chhuah leh hi ka duh tawh lo. Bialnu i nei a i bialnu kha va be ve mai la. Inkawp hi ka duh ngai lo tih nang pawn i hriat chian kha." Ka thik vanga sawi ka ni lo. Kan nih lai paw'n a hre chiang a. Inkawp hi ka duh ngai lo, kawp nih pawh ka duh hek lo. A tuartu tan a na ṭhin l. Chuvangin ani pawh hrilh a sawi ka ni reng bawk a.

" Tebawih,min haw hle ang tih ka ring, i rilru pawh ka ti na ang tih ka hria asin... Mahse i thu hriat zawng zawng kha a dik vek bik lo asin. Min ngaithla la ummm..." A aw aṭang chuan ngaithla ila min duh tih a hriat ngawih ngawih. Mahse chu ti maiin ka rilru hi a dam thei bik lo a ni. Ka ngaidam thei hrih lo a ni.

"Sawi tawh lo ang, duh tawk ang. Muttui le."

"Tebaw. .. " ka off hmak.

Ngaihthlak zawm ka duh lo. Rilru natna bak a ni leh dawn lo. A rawn call leh nghal; Mahse, lak ka tum tawh lo. Ka phone ka silent a ka mu hmak. Khumah mu mah ila kan nunhlui liam tate kha ka chhui let leh a. A bul aṭanga a tawp thlengin, kan nuih dun lai te kha...
Nunhlui ni mai tur atan chuan ka phal ngai lo, ka phal loh vang ngawtin a ni dawn lo chuang si lo.Ka mit chhing vang vangin kan nunhlui chu ka chhui kir a... A hmasa berin kan pahnih a kan thu tiam ngei mai khan a rawn lang hmasa ber a.

'Nupui pasal nei hma loh zawng sex hmang lo turin' kan intiam a. Mihring hmaah thu kan tiam lo, PATHIAN hmaah a ni kan tiam ni. Kan vawng reng tur a ni. Remruata nen hian kum 3-in kan inthlau a, kum 23 ka nih laiin a ni chu kum 26 a ni tawh thung, a mah hi a sang tha a, feet rûk (6) vel a nih laiin kei chu ft 5'4 chauh ka ni thung!.Chungkaw khawsak harsa anni lo a. Amah hi lehkha thiam thei tak a ni a, a naupang viau nangin bank manager a ni bawk. A nu hi zirtirtu niin, a pa hi Dr a ni thung. Unau pali anni a, a u te pawn hna an nei vek a, nupui pasal neiin inhrang an chang tawh thung. A nu leh pa leh amah nen inkhatah anla awm ho thung a.

Chhungte hriatpuina thlap a inngaizawng kan ni bawk a,ruih theih thil engmah a ti ngai hek lo. Kan inngaihzawn lai paw'n mi enzui kan hlawh thei hle a, amah a pa len chu thuhran ni se, a ngo hluak lo a, a hang bawk si lo a ngaihno bei leh zun ngah tak a ni tawp. A mahah hian engkim a dik thlup a ni ber mai. A hnar hi vai hnar ang mai hian a dik thlup bawk si,a pian dik thlup mai hi hmeichhe tam tak enzui a ni ziah bawk. Kan kal tlan chang a hmeichhe dangin a thlir zui vawng vawng paw'n engah mah ngai lovin keimah zawk hi ka dik lo tep zel zawk. Ngaih melh tak a i ta an en chuan i lungawi bik lo ang. An thlir zui tih a hriat paw'n ti hian min hrilh thin, 'anduh tawkin min thlir rawh se, an ta ka ni chuang lo, kei chuan ka bul a mi hi ka duh ber, ka hmangaih ber bawk a ni.' tih pah hian min siai zeuh thin.

Kan inkarah tumah an tlak zeh kan phal ngai lo va, thik thu hi a chhe ve khawp a. Mipa dangin min bia emaw min awm hnaih tawh ni a a hriat chuan a hmel aṭangin a lungawi lo a ni tih leh a awmdan aṭangin ka hriat thiam theih turin a awm thin. A thinrim hi a hlauhawm hran lo a; Mahse, a ngaihdan pel chin emaw a duh loh dan a thil ka lo ti a nih chuan a thinrim hi tawrh a har ve viau.Biang sum khuar lang kalh mai a a nuih tawh hi chuan kan thinrim a ni tih ka theihnghilh lo chauh zel. Amahah ka lungawi a, hlimna min thlen leh min pek ang hi chu tuman min pe let thei tawh lo ang, chutiang khawp chuan a ni ka tan a tih thin ni. Amah ang ka duh lo amah hi ni ka duh. Khawi hmun pawh hi amah nen a nih chuan a nuam vek zel ṭhin.

Thil tih ka ngai a nih paw'n ka tih zawh hma loh chu min nghak chhuak ve thlap zel ṭhin. Min sawisei ve ngai lo va, ṭha takin ka ti dik lo a ka ti sual a nih chuan ti dim turin min fuih ṭhin. Min tih phur dan tur a ngaihtuah a, ka chak lohna lai leh ka phur lohna lai ka tih ngai a nih si chuan ka phur thiam theihna turin min hrilh ṭhin.

Ka tan engtik lai paw'n a awm reng ṭhin a. Ka dam loh lai paw'n ka chhungten an khap hial khawpin min duat ṭhin a nih kha. An hauh lah hian 'ka naute a nia, mipa duk dak lo te'n lo duat ta se,kan vaiin kan buai vek dawn asin. Chumi a thlen loh nan kei man ka'n duat mai nge aw' a ti mai zel ṭhin. Ṭawng duh lutuk lo e tiin an sawi fo ṭhin a, ka bulah erawh hi chuan têl(oil) in ang mai hian a dak char char zel, min hnial dan turte hi a zir sa emaw tih tur hian a hre thei phian si. A awm dan leh a chezia hi chimawm em em si hian a cute thung(👈 ka thiannu min tih dan🤣).

A bulah hian ka thla a muang a, a bul a ka thla a muan ang chiah hian ka kianga a awm hian a thla a muang ve thin. Kan duh zawng leh duh dan a inang lo a nih paw'n hmeichhia ka nihna ang hian min dawh zawk fo ṭhin. Mi dik leh famkim kan ni lo a, kan dik lohna leh kan famkim lohna hmuh kánin kan dikna lai kan inhmuh sak khan kan lo famkim zawk a ni. Mi pahnih inkar chu a tha reng thei bik lo va, kan inhauh tamna ber pawh a thik thu chhe lutuk hi a ni ber. Ka hmelhriat a fanu dam lohna vangin a aiawh turin Revenue dept. Ah a ai ka kalsak a, tah pawh chuan ka kal dawn tih a hriat paw'n a hmunah min thlah thlap a.Ka office kalnaah lah khan hmeichhia aiin mipa an lo tam zawk nen khan min lo hruai changin ka hriat loh laiin a lo thu tawh ṭhin a. Chungah chuan mipa hovin min lo biak chang khan a thik ta ṭhin a, chu chu kan inhauh phah ta ṭhin a ni. A hnuah chuan kan inbe tha leh mai ṭhin bawk a. A office bang hi min hruai haw turin ban hmain a rawn kal ngei ngei a, zing lamah pawh min thlah ngei ngei zel bawk. Kan lo bang hman lo emaw kan ban hma chuan min nghak ve ngat ngat zel. Chutiang khawp chuan min ngaihsakin min ngaipawimawh ṭhin. An hna chung changah zin chhuah a ngaih chang a awm fo ṭhin a, chung hunah 'lo rinawm a kan thutiam kha vawng reng turin min chah nasat ber a ni'. Ninawm khawpin min hrilh thin. Ka ning tih hre reng mahse sawi a bansan ngai chuang lo.

Phatsan nih kha a duh loh leh a hlauh ber a ni ṭhin. A phak ang tawkin Pathian a bel ve ṭhin a, tlin lohna leh fel lohna nei mah se,'khawngaih rawngbawlna hna min pek hi Lalpa pui tlin turin chakna min pe thar zel la, mite'n ka nunah hmuh an neih theih nan keimah hi a tharin min siam thar zel ang che' tiin a inhlan fo ṭhin. Zantin kan pahnihin Biak Inah kan ṭawngṭai dun ṭhin.

Kan hma lam hun hria a sawi lawk thei kan awm lo, lo hria pawh ni ila tumah hi kan läwm chuang lo ang. Kan ngaihtuah te hi chunglam ngaihtuah a ni lo a, kan awm dan te hi a duh dan a ni hek lo. Mahse, kan tan a ṭha turin ro min rel sak ṭhin. Mihring hian engmah tih theih kan nei lo, a duh dan zawm mai hi kan tan a tha zawk ṭhin. Natna kan tawhte hian amà hmel min hmuh tirtu atan hmang zawk turin min duh zawk, vui ngam tur kan ni lo,malsawma tam takin min vur a, chhiar dawn ila kan chhiar seng chuang lo ang. Chutiang chiah chuan rul dawn pawh ni ila kan rul seng hek lo. Hengte vang hian läwm thu sawi tur kan ni zawk si. Lawmna tak thinlung neih hi a ṭha zawk eng pawh tawk ila.

Tlai khat min rawn lam chu a hmelah thil ṭha lo thleng ni awm hian a ngui ruai a, ban dawn thlengin a mood a dik thei lo a. A hnu deuhah chuan bike a kan chuang dun chu 'thil hrilh tur che ka nei'tih zawng hi a sawi a. Ngawi rengin kan kal a, hmun fianrial lam pan chuan kan kal dun a. Chuta a thusawi chuan keimah ngei pawh hian ka huphurh a ni. 'Te, kan hotu te lam aṭangin Serchhip lamah hna an indaih loh a vangin kum 2 chhung awm turin min rawn ti a.Hnial theih miah lovin order an rawn pe chhuak nghal a, naktuk a kal tur a tih ka ni nghal bawk a'.A thusawi chu a mah ngei paw'n har a ti tih hriat tak hian a ngawi ngul a. ' I tello a awm chu sawi loh ni khat em pawh ka awm thei mang lo nia, nang hmu lo che a awm tur chuan kal kal thei dawn em ni? A har ka ti emai, min zui ve mai la'a thusawi chu ka nuih za viau chhan dan tur mai ka hre lo, kei pawn hrehawm ka ti dawn lutuk ringawt ngaihtuah pawh ka peih lo zawk.

Chu mi tlai chuan kan haw tlai deuh a,thil tam tak kan sawi dun a, kum 2 hnuah chuan a lo haw hunah inneih a duhthu a sawi tel bawk a. 'I tel lo chuan ka kim dawn lo, innei ila min sawn chang paw'n ka kiangah i awm ve reng dawn a, a hrehawm tawh lo bawk ang. I tel lo chuan ka engtih mah a nuam dawn lo, hna pawh ka thawk ṭha thei dawn lo.I tel lovin ni khat pawh a har ka tih laiin kum 2 chhung chu a rei dawn mah mah a ni. Chuvang chuan kum hnih hnuah chuan TIAM TLAT E kan ti tawh dawn nia.' A ti nghet churh a. Ka hnena a thu sawi hnuhnun ber a ni ta. Hun hi her let leh theih ni se a ṭha tur. Amah vang a hlim a nui ṭhin kha amah vangin zawkin ka na ta si a.

A kal ni a lo thlen chuan ka thlah a, a hmel a hrehawm tihna leh lungngaihna kha laksak theih a hlim hmel a thlaksak theih kha ka chak asin. Mahse, kei leh zelin khatiang hmel ka pu anih chuan a kal hrehin awm khawmuan dan tur a zawng dawn si a. Chuvang chuan ama tan ngaihthlak nuam tak leh ka hlim loh leh ka lungngaih lai ber pawh a min ti hlim thei tu kha tunah tih hlim ngai ber alo ni ve ta si a. Ka ngaih loh avang leh ka thlakhlelh loh avangin ka kal tir dawn a ni lo. A hmaa a tih tur a piang ti a hlen tum ṭhin mipa kha keimah avanga a ṭhulh ka phal lo. Mipa a ni a, mipa a nih ang ngeiin a hma a tih tur apiang chu ṭha tak a ti turin ka duh vang zawk a ni.

'Kan inngaih chang a kan hmel kan inhmu lo tur chu hrehawm mah se kan thinlungah erawh a inhmu reng dawn lawm' tiin tha takin kan inthlah a nih kha. Ka chan erawh natna a ni dawn tih erawh ka hre hauh lo.

A kal aṭangin thla thum a liam ve ta reng mai a,kan inbe ve reng zel a. Inngaiin inthlahlel viau mah ila han awm hran chuan chhel kan lo zir ve zel a. An hna lamah an buai thei em em a, a hma ang em em chuan kan inbe thei tawh lo a, ka vui ngai lem chuang lo. Ka hre thiam ve tho a, chutih rual erawh chuan nghah nih a nuam a, nghaktu nih erawh a hrehawmin a rei duh thei hle thung. A hunawl neih chhun erawh ka tan a insiam ve ṭang ṭang ṭhin.

Dam chuan hun a kal chak em em a, a liam duak duak emaw tih tur khawp hian a kal chak ni ber hian ka hria. Hun pui pawh kan lo thleng hnai leh ta reng mai. Mahse, remruata erawh a haw thei dawn si lo tur erawh chuan min ti hnual hle thung. Heng hun hi chu inhriat thiam ka ring ve tho. Urlawk zanah erawh tlaivar ṭhakin kan inbe thung. Hunpui a liam a, kum thar kan lo chuangkai ta der mai. A ni paw'n 'Kumin chiah kan nei ta'tiin a sawi ṭhin, kan hma hun kan sawi dun a, kan hlim ve thin asin. Kan lo sawi ṭhin ka duhthusam te kha a thleng ngai dawn lo a ni tih ka hriat ni a ka mittui tlak nasatzia kha!

Dan ka tum lo mah se a na ve thlawt a ni. I hmangaih ber khan mi dang ngaihzawnsan chein phatsan chein, chu aia la na leh tur chu hmeichhe dang lakah sáwn thlaksan che se la, engtiang angin nge i awm ang? Na i ti ve sa tliah nge ni ang i thinglung a kehsawm ve ang? Tu mihring mah hian na an tih loh ka ring bik lo. Ka na ti lutuk te kha ka á chhuih ni te hian ka hre hial,awm dan tur te kha ka hre thiam lo, ka nuih erawh a za hauh lo thung. Nuih hunah ka nui a 'tiang vel chuan ka awm ber. Min tina ngai lo tur a min tiamtu, rinawmna min tiam a, bumhmang hmelma duhawm ber chuan ka thinlung hi a pawtsawm hneh ngang mai.Sawi fiah dan ka thiam ber kha chu A NA tih khan a sawi fiah ber a ni.

Kha thu ka hriat aṭangin ka biak theihna leh min biak theihna tur awm ang ka ti bo vek a. Ka hria tih a pawh a hre bawk a,'ka fa ni lo' tiin a rawn insawi fiah nasa mah se ka fiahna dawn kha a tam lutuk a ka ring zo lo a ni ber.

Biak ka duh tawh lo ang bawkin nat leh ka duh tawh lo a ni tawp, chuvang chuan keimah leh keimah kha ka infuih a, hnunglam hawi leh kha ka duh tawh lo a ni bur. Harsa ti tak chung khan hmalamah ka ke ka pen lui ṭang ṭang a, ka tuar chhuak ta maw tihah min rawn be thar leh ta si.

Kha zan min rawn biak aṭang khan min rawn biak nawn a tum tlut tlut reng a, a call pick lo mah ila massage a hnutchhiah ziah thung.

'Te, min ngaidam rawh ka thiam loh a ni tih ka pawm a, ka khawhar lutuk kha inhnem nan ka lo kawm ve a mah se , kan mu dun miah lo'.

"Te, min ngaidam hram la.'

'Tebawih, ka ngai che'

'Ka hmangaih reng bawk ang che'

'Min kalsan suh ka awm thei lo ang' tih ang reng te a tam lutuk.

Zankhat chu ruah a sur nasa bawk si a, ka lo mu daih a, call ka dawng tih ka hria a; Mahse, ka mu lum nuam tawh lutuk a ka chhang peih lo a. Message a rawn thleng a, ka en zawk a. Remruata massage a lo nia.

"Pawnah ka awm a, i lo chhuah hma loh chuan ka awm reng dawn.'' Ka reply chuang lo. Ruah a sur nasa si a, a awm reipeih ka ring lo a, ka mutsan leh daih a. Ka mu tui dawn chiah tihah ka nu chuan min rawn ko-in ka pindan kawngka chu a sawi pah dawt dawt a. Peih lo deuh chuan ka va tho a.

Kawngka bulah ka nu chu alo ding reng a. ''Nu, eng nge ni ta a?"

'' Remruata khu a dam lo mai ang, ruah sur tirh atang khan ala awm char char a, tih dan zu ngaihtuah rawh."

"Hepa hi chuan min ti buai hneh ve chiang läwm." Tih pah chuan ka chhuk a, nihliap la chhuakin pawn lam ka pan a, ruah sur a nasa bawk a pawn boruak chu a vawt ngei mai. Ka hmu chhiah phei chu ka ngei bawk si, ka khawgaih bawk si. Vawt ti tih hriat tak hian a hmui a lo duk a. Ka hau hlak hlak a, a nui liam vel mai mai, a ngai ho ve thei si a.

Inah hruai chho-in, ka room-ah ka chhoh tlangpui nghal a, ka chhungte hian an hre thiam ve tho. A hma zawng pawh a an kit ti kham zawng a kan awm ngai loh avangin tun ṭumah pawh engmah an sawi lo. Min ringngam a, min rinngam ang chiah hian min rinna tih chhiat hi ka duh hek lo.

Nunhlui sawi chhuah reng hi ka duh lo na chungin kan awm dan atang hian kan sawi chhuak dawn tih chu min hmutu tan pawh a hriat thiam theih ka ring. A bul atang a sawi fiah a duh, kei paw'n ka duh, tun hi a tawpna ni ber ni nghal bawk se.

'Tebawih, ka chungah i lungawi lovin i thinrim tih ka hria a, thudik ka hrilh che ang a min lo ngaithla la, min lo dang lo ang che.. Khatia ka va awm kha min hmuh vawikhatna tang khan Diki khan min lo hmel duh nghal a, ka hre hauh lo mahse, thla khat hnuah kan thawhpui te'n min hrilh a.Engah mah ka ngai duh hauh lo thung,ka duh kha ka chiang a. Chuti chungpawn min ngaihzawn kha a sim chuang lo, sim chu sawi loh ka mit la thei ang ber turte'n a awm vel thin a. Vawi khat chu phone a kan inhauhna kha alo hre palh a, khata ṭang khan ka lakah beiseina a rawn nei nasa zual a. Kei a thinrim khaw hmu tawh lo nen khan a thu sawi pawh ngaihtuah chiang lo khan ka 'aw' liam ve mai a(ka meng phar awk mai,tiang hian a awm ang tih ka ring pha ngai lo, min rawn melh zawk a) kan inkawp ang chu alo ni ta ber a nih chu. A tan khan beiseina ang tur chi khan ka awm miah ngai lo thung chuan ka hria. Engtin nge atan beiseina ka pe lo chung pawh a ka fa ala pai theih teh reng ang ni. Kan inbe pangngai tih ai chuan biak pangngai ai chuan kan awm dan chu asang ve deuh ang. A taksa erawh ka la dek hauh lo asin. 'Tiang chung cuan i tan ka la inserh hrang reng asin. Ka thinlungah i awm reng a, ka kiangah Diki kha awm mah se i hmel a ni ka hmuh zawk ṭhin ni! Chu mai piah lamah kan thu tiam kha ka theihnghilh ngai hek lo, thehnghilh a hnehin ka hre reng zawk ṭhin. Khavang khan theih tawp chhuahin ka bei let leh ṭhin asin."

A sawi sei bawk a, a sawi zawh meuh chuan a thaw ham ham mai. Ni e, zanin hian kan pahnih inkar hi fel rawh se, insawi fiah a duh nih chuan insawi fiah rawh se, kei chu ngawi tur a min tih angin ka lo ngawi char char a, a thu sawi lo pawh chah ka tum lo chu ai chuan thudik engkim min hrilh se, Amà ká ngei aṭanga hriat hi ka duh zawk bawk.

A rawn sawi zawm leh a,'"Dik tak chuan ka rawngbawlpuite'n min hmu lo, ka va awmaah khan mi thar ka ni a mah se ka LALPA khian min hre chiang a, ka tih dik lohzia leh ka tih sual kha ka hre chhuak a, PATHIAN hnenah pawh ngaihdam ka dil a, mite'n min hmu lo mah se chunglam khian min hmu reng si a. Ka tih dik lohna lai hre reng chung a ka ti sual a nih chuan min chhui dawn si a, a hremna tur chu ka pumpelh dawn si lo,ngaihdam dilin ka ṭawngṭai ṭhin, thinlung leh tih tak zet a ka ṭawngṭai a nih chuan min ngaihdam hi ka ring. Ti chuan, Diki chu ṭhian ang chuan ka kawm chho ṭan a, a bulah pawh kan pahnih inkar thu thudik tak ka hrilh ta vek a,a hnu leh chu tun hi a ni mai. I lakah ka ngaihtuahna awm chungin engtin nge midan ka neih theih ang, ka thei ngai lo vang. Mihring hma maini lovin PATHIAN hmaah thu kan tiamin sex hmang lo tur a intiam kan nihna khan nunkawng sual ka dai tur hi kha thu khan min veng ṭhin asin' a ti zui a.

Thu dik engkim ka hriat mai bakah kan sawi dun ta bawk a. Kan inngaihdam ta zawk a,ngaihdam nih aiin ngaidamtu nih kha a ropui zawk. Chhan sang tam inṭhenna tur awmin tawk viau mahse, chhan khat chauh lungdam nan thinlung hian a pawm leh zel si😊.Ti sual thei vek kan ni a, kan tih sual tekan inchhui reng a nih chuan kan dik thei ngai lovang. PATHIAN pawn a chung a kan tih sualah mah min ngaidam thei a nih chuan keini mihringte hian kan chung a ti sualtu te chu kan ngaidam ve thei tur ni. Kan inngaihdam tawnna ṭangin a ni thumna ni-ah a kal ve leh a a hnalamah, a kal hma chuan kan chhungkaw hnih chuan chaw ei khawmna hun kan nei a; chutah Remruata chuan kan pahnih chung chang chu a sawi chhuak ta a," Ka nu ka pa, September thlaah ka lo haw chho leh dawn a, tah chuan inneih lam sawi ve tawh ila, octrober thla ni 21-ah innei thei tawh turin, he ni hi kan ni bik a nih vangin chu mi niah ngei chuan tih kan duh bawk a ni.'' Zam ve tho si nghet churh hian a sawi chhuak a. Kan chhungte ve ve paw'n an sawi dun nghal a, ṭha an ti ve bawk a. Kan duh dan leh ṭha kan tih ang zawng chu kan sawi dun a. Hlim takin kan hun chu kan hmang ho a, kan hlim dar dar khawp mai. Chhung kaw ho chuan min fiam pahin kan nui dar dar a.

Remruata pawh a sawi ang ngeiin a rinawmna ka hmu ta zel bawk a, engkim kan inhrilh tawn a, kan pahnih inkarah chuan tumah hian hre thiam vek lo mah se kan hlim a ni tih kan inhriat tawnna khan rah a chhuak ṭha hle bawk a.

Naktuk mai hi kan inneihni a lo ni ta! Ka hlim rualin ka huphurhna a inzat reng. Mahni inchhung lum chhuahsan mai bakah mahni chenna ngai loh hmunah ka va awm dawn chu ni a. Tu mah hian an zuam bik kher lo mai thei! Hmeichhia te hi kan lo chhel ngawt mai, hriat ngai loh chhungkuaah kan va lawi lut a,chhungkaw khawsak phung inang lo mahse kan insiam rem leh vek thiam bawk. Kan fakawm ve ngawt mai. Mipa te hi hmeichhia te inah lawi lut ta se an tlin teuh lo,chutak chu hmeichhia kan chhelna a ni.

Biak In chhungah chuan kan inneih min hriatpui turin mipui an lo pungkhawm ka hmu chiah chu mahni mah zam sa naklaiin ka zam zual ni te hian ka hria! Ka pain min kai lut a, ka pasal bul thleng chuan min kai phei a. Remruata zawn ka thlen chuan min hmangaihna chiah a ni a mit mengah chuan ka va hmuh ni. Ka zamna chu hrethiam ve ni awm hian min lo kai ve vat a. Pastor hmaah leh mipui hmaah 'a nuam emaw a hrehawmah pawh, hrisel leh bawrhsawmah pawh, hmangaih a in enkawl tawn turin kan intiam ta a'. PATHIAN hmaah kan THU TIAM ngei mai chu kan hle ta.

A tawp ta...

PATHIAN HNÉNA THU I TIAM CHU NGAIHTHAH SUH;MI Á CHU A LAWM SI LO. I TIAM CHU HLEN NGEI RAWH. THU TIAMA HLEN SI LOH AI CHUAN TIAM LOH LAW LAW I TAN A THA ZAWK. Thuhriltu 5:4-5 .



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)