HMANGAIHTU RINAWM BY Irene Pachuau Irene Pachuau

Ngaia
Site Admin
Posts: 25813
Joined: April 30th, 2016, 4:07 pm

HMANGAIHTU RINAWM BY Irene Pachuau Irene Pachuau

Unread post by Ngaia » August 28th, 2019, 6:06 pm

HMANGAIHTU RINAWM
(competition 2019)

Ka phone sms tone chu a rawn ri rak a, rang takin ka han en vat a, "Bawiha, vawiin kha aw", a tawi viau nain ka hrethiam nghal mai. Ni e, vawiin hian class tlanbo kan tuma, kan khaw piah deuh lui dam zeta picnic kan tum anih kha. Ka phur lutuk chu ka helhhawlh nge pawh ka hrelo, chaw pawh ka ei mumal thei meuhlo. Chaw eikham chuan ka room lamah ka luta, ka insiam zung zunga, ka va phur tawh tak em. Ka insiam lai chuan sitting room lama ka thianpa tawng lawng lawng ka hriat phei chuan ka hmanhmawh zual ngei mai. " Bawiha, hmanhmawh rawh, kan tlai palh ang e, First period kan neih kha aw", ka room-a rawn khik thaw pah chuan a rawn ti a. Lo kiai sak pah chuan, "Zo tep, lawk aw", tiin khum mawnga ka dahthat SAPZU chu ka bag chhungah chuan ka thun nghal mawlh mawlh a. Room atanga chhuah pahin, " Nu, kan kal duh tawh a, petrol ka neilo a", ka tih zawm zat bawka. Ka nu chuan, "Petrol lah hi i heh bawk si, tullo lova tlankual i ching a nilo maw", atih niah niah pah chuan 500 hi a rawn phawrh a. Rang takin ka la vat a, kan chhuak ta nghal a.
.
College pawh thleng lovin kan thiante min lo nghahna tur pan chuan thlen khalh hlau awm fahran hian kan lim phei zuai zuai a. Kan RV kan thlen chuan an lo kim thap tawh a. Mahse, kan thian zinga tello, hmuh pawh ka la hmuh ngailoh hmeichhe pakhat ka hmu tel tlat. Tu chu ni ang maw? A chhelo phian lehnghal. Chu chu Emily Lalmuanpuii ka hmuh vawikhatna a ni. A mitmeng chu a si-sap mai hian ka hria. A bula thu tawng zawt zawt Angela chuan a cousin anih thu leh kan college a rawn lut thar tur anih thute, a pa an rawn transfer vanga rawn insawn annih thu chu sawiin, kan pawlah kan lawmluh ve theih leh theihloh chu min rawn zawt a.Kei lah chuan mit tla dawnin ka lo la thlir veng veng mai bawk si. Ka melh dan chu dik mawlh heklo le, Angela chuan a man rang ngang mai. Bah nuai hian, " I unaunu anih chuan", ka lo ti ve boh a.Kan han chhuah dawn chuan Angela chuan zei fe hian, "Emy, kha Sangtea khan phurh tur a nei chuanglo a, rawn inphur mai rawh u aw", tih pahin thianpa Zara bike ah chuan zei fe hian a lawn nghal theuh a. Eng han sawina hun awm heklo, " Nia", tih mai a ngai chu ka lawm zawk teh asin aw...

College kallai, tumah han dahsan em em neihloh lai, ka thei ve tawk intih lai leh ngaihtuah tawi lai, puitlinga chhiar chin, rilru puitlin hma, nun nawmlai hun kan chen mek chu anih hi. Khami ni atang khan Emily nen chuan kan inkawp ta nghal a ni deuh mai awm e. Class kan kal lahin kei leh Zara kan inkawp bik deuh chawt bawk nen, Emily leh Angela, kan in zura phian mai. Class kal turin kan sawm a, kan haw rual bawka. Kan college ah pawh kan thang ta hat mai le, awmlo pawh ka ti chuanglo. Mahse, chumi karah chuan kan kara hem lo thlak tum an awm ve reng bawka. Menah kan thlak ta mai thin pawha, ka thin chu a khei teuh thei hle thin. Kei mipa alaia inti MAN em em leh thikthuchhia chuan ka tuar zolo tep thin. Mahse, Emily hian ka rilru sukthlek hi a hre hneh em a, min thlem lungawi leh mai thin zawk a. Kan college ah hian pawl ang reng deuhin kan inthen a, engkimah kan inhal em em a. A chhan ber pawh Emily vang a ni ka ti lo theilo. Lehlam pawla an hotu ve deuh ber chu Joseph-a a ni a, MLA fapa a ni nghe nghe. Emily hi a ngaizawng ve em em a, ka awmloh hlek hi chuan alo thutpui hman ziah lehnghal, keia huat tawk a tling ve em em lawi si.

Ni a rala, thla a liama, Emily zia chu mak tih chang ka nei fo mai. Kei chuan thianghlim takin ka kawm thin a, mahse eng emaw chang chuan han insum zawhloh tep chang chu nei mahila, kan kal thui hma tak takin ka rilruah hian khawngaihna a awm leh tlat zel. Zara lahin, "MAN lo em mai, i khawngaih khan awmzia a awmlo, nakinah khawngaihlotu a tawng ang a, ila inchhir ang", tiin min fuih ka ti dawn nge min bawl ka ti zawk ang. Nikhat chu ka nuin min tirh vangin class ka kal tlai a, college ka thleng ka thiante ka han pawh chuan eng emaw thil thleng chu a awm ngei tih ka hre nghal mai a. Min melh hrek hrek hian ka hria, engmah hrelo chuan ka thawven ngai chuan ka ri phar phara. An in melh relh relh mai," Bawiha, eng nge thil thleng a awm em ni, Angel, khawnge Emy?", ka tih chuan an thaw deuh hawk hlawma ka hriat chu. Zara chuan, " Bawiha, englo ania, Emy ania, kan Joseph-a khan a birthday party-a kal turin a sawm a, kannu pawhin kallo turin a ti a, mahse a zawm duhlo a, i rawn thlen hma deuh khan an chhuak ve deuh chiah. Bawiha, Emy hi thlah mai rawh, nakinah i rilru a tihnat lehzual ka hlauhpui deuh che a ni. I rilru i pek tak tak hmain bansan mai rawh", atih chuan ka sa phat mai, ka nâ a ni, ka bing chuk chuka, ka tawt up up hian ka hria. Ka lo hmangaih hman viau a ni mahna, Zara pawh ka chhang hleithei lova, ka rilruah Emy bak a awm theilo. Joseph-a ka huat dan leh ka thik zia pawh a hriaa, chutia engmah min hrilh lova ka mi thik leh huat ber mai a zui ta chuan min pawisak lohzia a lang vekin ka hria. Chumi ni chuan class pawh ka la peihlo, ka in ngaihtuaha, ka thinrimin ka na ngawih ngawih mai. Ka awmdan hriain ka thiante chuan min tih hlim an tum hram hram a. Chawhnu lamah chuan anni pawh chu class la tawh lovin leng khawthawng turin kan chhuak ta a. Park lam pan chuan kan tlan ta vang vanga.

Park kan thlen chuan mi an lo awm nual mai, keini thianho pawh chu engmah ngaihtuah lem hranlo chuan kan kal apianga kan awmna thin Bung thing zar du mai leh a hnuai thelh hun maiah chuan kal paha kan thil lam in tur chuan kan thu bial laih a, kan wine ken chu a zatve pawh kan khulh zo tawha, kan thawm pawh a tha tlang hle nghe nghe. Chutia tawng inchuh deuh nak naka kan titi lai chuan kan thianpa Mama chuan, "Uai, kan zawng Joseph-a chu(h), kan khawih deuh teh ang", tiin a ding hluai mai a. A hawina lam ka han en chuan Joseph-a leh a thiante bakah Emy chu ka han hmu a, Joseph-a nen chuan inhnaih deuh hian anlo kal dun rial rial a. Ka sa ta zak mai, ka ding hluaia, " Tumahin min lo dang suh u, Emy ka biak a ngai", tiin an lam pan chuan ka chho ta a, ka hnungah chuan ka thiante chuan min rawn zui nghal vat bawka. An hnung deuh atang chuan zawi thawp deuh sat hian, "Emy, kan inbiak a ngai", ka aw chu a khur deuh hiala ka hriat chu. Emy chu a rawn lehhawi a, makti hmel taka min en pah chuan, " Eng nge ni a", tiin hmel pha deuh dai hian min rawn pan tum chuan a inher a, mahse, a kutah chuan Joseph-a chuan alo chelh thuai a. Chu chuan ka thin a ti rim zual ngei mai. " Nang kha, Emy kut kha thlah nghal rawh", ka ti chhum deuh hmak a. Chapo hmel fe hian Joseph-a chuan, " I fanu a ni em ni, a chungah hian thuneihna i neilo", atih phei chuan ka va han sa lehzual tak em. Rum taka melh pahin, "Thlah rawh", ka ti bul hmuk mai. Emily chuan, " Eng nge ni a, intibuai suh u, a zahthlak", min rawn melh pah chuan, " Nakinah i sawi duh chu i sawi thei mai em, hei ka thiante nen hian kan lengho a, a pawimawh viau chuan phone pawhin a inbiak theih tho alawm", tiin lehlam min hawisana, " Seph-a, kal ang u", a ti a. Kei chu ka dinna ngaiah ka la ding reng a, ka va na tak em, ka na a ni. Ka lo hmangaih em em leh a chhiatna tur aia a thatna tur ngaihtuaha a tanghma ngai em em thintu chu min hnuchhawnin min kalsan ta. Ka thianpa Zara chuan, "Bawiha, kal ang, ani lo pawh midang an tam lutuk, khatiang hmeichhia sum chauh duh kha eng atan mah ngai suh", a ti lang lang a. Ka ngawi renga, sawitur reng ka hrelo. Mama leh a bialnu Engi chuan min kai a, kan thutna lam chu kan pan leh ta a. Ka awm a nuam tawh lova, ka eng tih mah a nuam tawhlo. Ka thiante chuan min hrethiam takin min ngaihsakin min tihhlim an tum nasa hle a, awmzia erawh a nei tam hranlo hle mai. Rei pawh awm tawhlo chuan kan haw ta a.

Khami ni atang khan Emily nen chuan kan inbe ngai tawh lova, college lamah pawh kan inkawm tawh ngailo. Joseph-a nen chuan an inzui ngawrh hle a, Joseph-a chuan min tihel tih hriat fe hian ka hmuhlai ngeiin Emily chu a kaihloh leh a kuah deuh kher zel. Ka tawng tlemin ka thiante pawh chuan tih ngaihna vak min hrelo. Emily ka hmangaihzia an hria a, ka rilru nat turzia pawh an hrethiam tlang khawp mai. Mama leh Zara phei chu zanah ka bulah an rawn riak fo mai, theihnghilh turin min rawn fo bawka, mahse ka theihnghilh mai thei si lova. Ni leh thla liamin kumtawp kan hnaih ta, tlem chuan ka rilru nâ pawhin zia lam a pan ve zel a, ka nunphung pangngai tak chu la nei lemlo mahila, a hma ang em kha chuan ka tuar na tawhlo. Zankhat chu dar 10 a ri tep tawh tih hian ka phone chu a rawn ri tlang tlang a, ka han en chuan Emily number ngei a ni, mak erawh ka ti viau mai. Rang takin ka pick up thuai a, "Hello, Emy", lehlam atang chuan in sut ri hraih thawm ka hre tlat. " Emy, Emily, i tap em ni?", ka rilru chu a su dup dup ni berin ka hria. " Min ngaidam rawh aw, ka thiamloh a ni", a aw chu a zawiin a lungchhe hle tih ka hre mai. "Emy, eng nge i chungah thleng, khawnge i awm", ka ding deuh hluai mai, " Min theihnghilh rawh, ka tha e", a insut hraih a, " Khawnge i awm, khawnge Joseph-a", ka awki chu a sang lek lek a ni. "Min bum alawm, ngaihzawng min neihsana", atih chuan ka sa phat mai, " Kan zawngsena chu aw, Emy, khawnge i awm?", ka awki chu a sang tawh hle mai. " Min ngaihtuah suh, ka chantawk anih hi, i lakah hian thil ka tisual a ni, ih...ih...i rilru ka tina, min ngaidam theilo anih pawhin ka chantawkah ka ngai. I tan ka tling lova, ka laka i thatna zawng zawng kha ka theihnghilh ngai lovang". " Chutiang sawi a ngailo, i awmna chu min hrilh rawh, Emy, khawnge i awm min hrilh rawh", ka tih chuan, " Hotel Moonlight kawtah ka awm, rawn kal a ngailo, taxi ka la mai ang", atih chuan lo awm reng turin ka ti a, car lachhuakin , ka tlanchak ngang mai. A hla vaklo bawka ka thleng thuai mai reng a. Car chhung atang chuan Moonlight Hotel kawt chu ka han thlir kual thuak thuak a, tumah lah ka hmu bawk silo.

Remchang laiah chuan car chu ka hung fel zung zung a, ka phone phawrhin call ka tum lai chiah chuan Hotel sir deuh a thimlaia tu emaw thu chu ka hmu leh lawi si a. Car atanga chhukin ka va pan ta chawm mai a, ka hnaih deuh takah chuan inhnit deuh hraih hraih thawm chu hriain ka pan hnai zual a, Emy ngei alo ni a. Rang takin ka thutchilh nghalin a darah chuan ka han vuan a, "Eng nge thil awmzia, khawnge kan zawng Joseph-a chu a awm?", ka tawngkam hman chu ka duhlo viau nain ka insum hman thlawt lova, engkim ka sawitur chu ka sawi fel vek tawh mai si, tui baw hnu ruh leh tum chu thil harsa tak a ni reng a ni, awmzia a awmlo. A ngawi reng a, muangchangin a rawn hawichhuaka, a mittui luang chu varanda light eng atang chuan ka hmu thei a. " Hawh, kal phawt teh ang, helaia thut reng hi a tha berlo", ka tih chuan a insum zolo a ni ngei ang min rawn kuah hnawp a, a tap zui ta hawm hawm a, ka va lainat tehreng em aw. Ka lo kuah vat a, ka awmah chuan a hmai chu phumin a tap hawk hawk a, a sam chu duat takin ka zut sak hliau hliau a. " Emy, Bawihte, tap tawh suh, i tah hian i hmelchhe vek zel a nia", ka tih chuan rawn dak deuhin a tahnuih hak hak a, " ka tan hian i va han hlu tak em, ka kalsan che avang khan min ngaidam rawh aw", a ti tham tiak a. Ka chhanglo, muangchangin ka car dahna lam pan chuan ka kuah phei ta a. Eng han zawh leh chi ni a ka ngaihloh avang chuan thildang ka sawipui ta daih a. An inah ka thlah a, keipawh chu in lam pan chuan ka inkhalh haw ve ta a.

Monday zing a ni a, class kal turin ka insiam mawlh mawlh a, ka rilruah Emily-i chu a awm reng mai. Khami zana ka va hruai atang khan karkhat lai a liam leh tawh a, Emily nen chuan kan inbe zui ta miahlo a, vawikhat mah class a rawn attend bawk si lova, a chungah eng nge thleng lah chu a unaunu Angela tak ngial pawhin a hre der mai silo, a be hmasaa tan lah chu thih hreh takin ka hreh lawi si. Ka ngaihtuah takzet zet a ni. Chutia ka insiam mawlh mawlh lai chuan Mama leh Zara chuan dan pangngaiin min rawn sawm leh der tawh a. Kan chhuah dawn chuan ka nu chu pawisa ka dil a, min pek takah chuan mi zawng zawng thlenkhalh tum ang ziazangin ramhuai naute speed tak meuh meuh chuan kan lim phei leh ta fua fua a. Angela-i te in kan thlen chuan inchhunga lut lovin horn kan hmet tuar tuar a, rei nghah ngai lovin Angela chu kawngkhar hawngin a rawn chhuak a, a hnunga rawn zuitu ka hmuh chuan ka phu dawrh thei hial mai nia. Emily chu a ding det a, Angela chuan rang taka a bana vuanin a rawn kai phei det det a. A hmel chu a tla deuh riam a, chaw tha ei ngailo ang maiin a dawldang bawka, ka va lainat tehlul em. Kan bul an rawn thlen chuan thilthleng awmlo ang maiin Angela chuan, " Mam, single rih lawk mai rawh aw", a rawn ti zui phar phar a. Angela tak hi chu aw, "Zar, a la hma deuh bawk a, kal kawina tur ka nei a, min rawn zui zel mai r'u aw", Mama nen min melh tawn pah chuan ala ti tak deuh deuh a. Chhan pawh chhanglo chuan Emily ka bike hnunga a rawn thut takah chuan Zara chu a tlan ta nghal a. Mama nen chuan kan umzui ve nghal mai bawk a. Kan kalna chu a veng keltil tan riau mai lehnghal, mahse rei kan tlan leh hma chuan in pakhat kawtah hian Zara chu a ding dat a, keini pawh kan thleng zui ve nghal mai bawk a. " Eng nge kan tih dawn?", ka tih tak deuh hu avang chuan Angela, Zara leh Mama chu an in en a, an nui ruh ruh a, ka va han hrethiamlo ve. Mahse, keimah chauh chu hrethiamlo ka ni biklo, ka hnunga chuang Emily pawh chuan a hrethiam bik hauhlo. Chutah Angela chuan, "Class kan 'bung' dawn", a ti ta heu mai le. Ka nuih chu a za miahlo. Mahse, ka ti lang duh lem chuan biklo, Emily pawh chu ngawi rengin ka hnung atang chuan a chhuk ve mai bawk a. Kan boruak chu a tir chuan a rit ru phian a, mahse, Mama chuan a bag atang chuan whisky leh beer a rawn phawrh a, kan han lem tak nualah chuan boruak pawh a zang tan ta, fiamthute thawhin kan nui zui ta ham ham a. Mama chuan, " Ange, Kiki-i chu", a ti zauh a, " Zar, Mama hi han hruai lawk ang hmiang", hmelchhe hlawm lutuk, Emily nen chance pek min tum chiang mai, pawi erawh ka ti em em hranlo. An pathum chuan an chhuak ta dial a, kei leh Emily chauh chu kan awm ta.

Ngawi reng a kan thut hnu chuan a khaiuai zawk na na na chuan bul ka tan ta nge nge a." Ngatinge kar hmasa kha class i rawn kalloh?", ka aw chu a bung deuh mah mah em aw. " Nia, ka nuam vaklo a", a ti bah deuh nak a, sawi leh tur a va vang tak em aw. " Joseph-a nen inla inbe thin em?", a va pawi tak em, chutiang zawh chi pawh va ni suh. Mahse, ka sawi zo vek tawh lawi bawk si. " Aih, be love, phone chu min rawn phone reng a, mahse ka chhang ngailo", a kun chal a, ka zawhna khan zir mawlh heklo le. Huiham!! Ka va han zeilo thin tak em. Ngawi renga kan thut leh hnu chuan, "Min ngaidam rawh aw, ka thiamloh a ni, i rilru ka ti na a", ka ngaihdamna a va rei tawh si em. " Ngaihdam dil a ngai hleinem", ka lo ti vei sup a. Tlem chuan kan boruak pawh a zang ta deuh e. Darkar 2 dawn an thang hnu chuan Zara te pawh chu Kiki-i te nen chuan an rawn thleng ve ta a. Chumi ni chu nuam tak leh hlim takin kan hmang ta a.

A tukah chuan dan ngai bawkin Mama leh Zara chuan min rawn sawm leh a, phur takin Angela leh Emily kan sawm kual hnuin Kiki-i kan sawm leh a, college lam pan chuan kan lim leh ta puat puat a. College campus thlen hma deuh chuan Joseph-a leh a thiante 4 chu an lo ding taih a, an awmna kan thlen phei chuan Joseph-a chuan min lo pbar ding a, tha tak chuan kan ding ve mai bawk a, chutah Joseph-a chuan min rawn pan a, chapo hmel tak hian min rawn melh a, "Emily, ka be lawk duh che", a rawn ti a, " Ka duh ve hleinem", ", Ve khanglang", tih leh Emily chu ka hnung atanga hnuh thlak chu a rual a, ka tawrh theih chin bak a ni ta. Mahnilo maha ka hnek chak nak a laia chutia Emily a rawn hnuk tla kher chuan ka zaidamna zawng zawng a perh bo ta. Ka bike chu ka stand vat a, Joseph-a leh Emily lo in hnuk lai chu Joseph-a dara va kawih her sawk pah chuan a khabe takah chuan ka theih tawp chuan kan hnek siah mai a, kawnglaiah chuan duhloh theh ang thlawrh chuan a thal chiang ngei mai. Joseph-a thiante chuan min rawn bawr nghal a, mahse thian rinawm pahnih ka nei alawm, ka bul an rawn thlen hman hma chuan ka bulah Mama leh Zara chu an rawn ding ve nghal phat a, a rem rem chu kan in hnek nghal bawrh bawrh a, .ahse rei kan insual hmanlo, college naupang dang an rawn thleng a, min pawt then ta a, Joseph-a pawh a rawn tho ve tuah tuah a. Kan intihbuai dan lo hmu vektu an awm nual bawk nen Joseph-a te chu a thiamlo zawk an ni bawk a, rum fe hian min melh a, inla hria ang ti hmel pu chung chuan an motor dahna lam pan chuan an kal ta hna hna a. Thawkkhat chu a veng ta, ka hnek chak em em mai chu ka duhthalin ka hnek thal ta bawk a. Kan chanchin chuan college campus a al hneh hle mai, a tam zawkJoseph-a te thianho lo ngei em em tute chuan Joseph-a te thianho chuan an phu tawk an hmuah an ngai hmiah bawk a, min faktu an awm nual mai, kan college ah pawh ka lar phah hle bawk.

Kumtawp hunpui kan hnaih ta, bazar pawh a lun tawh em em a. College kan chawl ta bawka, kan thianho chuan kan lo rel tawh angin Chrismas chu thingtlang lama hman kan tum kha a ni a. Ni 22 chawhnu herah chuan kan thian zinga Motor nei zawngin motor kan thawh a. Kan thawmhnaw ken tur ang ang kan in load fel hnu chuan a rualin motor 4 chuan thlasik tlaini tla tur eng sen mawi takah chuan kan tum ram pan chuan ka bula thu ka hmangaih Emy kut dinglam vuan chung chuan kan tlan liam ta vang vang a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)