*A REM VE SI LO* BY J.Lalhminghlui

Ngaia
Site Admin
Posts: 25813
Joined: April 30th, 2016, 4:07 pm

*A REM VE SI LO* BY J.Lalhminghlui

Unread post by Ngaia » August 30th, 2019, 6:47 pm

bvqgmz5y.jpg
bvqgmz5y.jpg (16.89 KiB) Viewed 6367 times

*A REM VE SI LO*

(Competition 2019)

J.Lalhminghlui

Ka fate school ṭan hun a hnaih tawh avangin an zirlaibu leh mamawh dangte lam khawm tumin ka Bazar a. Lehkhabu dawr aṭanga inpawm bawr luai a ka chhuak lam chuan mipa naupang pakhat kum 12 bawr vel tur hi ka suthlu tawp mai a.

"A na em, Mama" tih paha kaitho in amah chelhtu hmel kan en chu ka nghing lawih mai hian ka hria a.A ni pawh chuan chiang zet hian min lo melh ve reng mai bawk a.

Karei maw...Khawiah nge a awm a , engtinnge a khawsak tak zel tih pawh ka hriatzui tawh loh , a chanchin erawh hriat ka chak em em fo ṭhin ngei mai chu ka hma ah ading a.A hmel ka en chuan mitthla ah kumtam liam tawha kan nunhlui kan hlimpui ṭhin te kha an lo inlar zût zût a .

Hmelhriat satliah anga biak ka harsat a . Chhungril hliam Sêra chang tawh hnu a rawn thual thar zawm zat a . Inthing harh lui chungin " I dam ṭhin maw ?" tiin kan inchibai ta a.

Rilru ah Nunhlui alo inlar thar a . Kan School leh Hostel zawngte nen lam khan a fiah leh ta vek mai .

Cl - X kan zir kumah loh theih loh in ka peihlo chungin Hostel ka awm a ngai a . School danga insawn ka dil pawhin ka Pa in a phal bur loh avangin phunnawi fe chungin ka inpu lut ve ta poh a .

Hun reilote pawh Chhungte hlata awm ngailo leh Zin ngailo keini ang tan chuan Hostel nun chu ngaia neih a harin a ninawm nitin a ni tawp mai .

Unau 3 zinga naupang ber leh hmeichhe awmchhun , Chhungte bula pangchan bak thiam leh theih neih lemlo khan mahni a thil engkim inbuaipui alo ngai tawh a .

Ei leh In nise a inang tlang ṭhup a , Chawhmeh ei duhloh ngah lutuk sa keini ang tan phei chuan thin tirim thei tur atam mah mah ṭhin .

He nun mil hian insiamrem ka tum hranpa lova , achang phei chuan tlanbosan daih ka châk fo ṭhin .

Chutianga a ngai pûta thlakhat dawn kan awm hnu chuan , tlaikhat chu ṭhiannu Mami nen Hostel kawta puanpho kan lo senglai mekin Gate ah chuan kan rualpui awm vel Mipa , Sanghet leh hang lampang mitmeng lian leh ngainatawm tak hmelpu hi a Nu niawm tak nen chuan inkhai bawr luk chung chuan an lo lut a .

Nu zawk chuan " Mami khawilainge Principal te awmna hi " ti a min zawh chuan " Mam , lo tih zawm la kan hruai ange " tiin kan Principal te awmna lam pan chuan ka kalpui a . Chupa pawh chuan lawm hmel takin min lo nuih sak a .

" Heihi ka fapa in Hostela Cl - X zir tur anih hi , in Principal hi a Pu tur ania , tihian a nau hmeichhe pahnih kan khua ah kan rawn kalsan bawk a , a Pa hian nikum lam khan min boralsan tawh a , ani hi kan inghahna ber tur anih hi " tiin anu chu a ṭawng bawrh bawrh a .

Principal te In kan thlen chuan lut ve lovin ka kirsan a . Kan hawilet hram a , nui chungin ban min lo vai zauh a . Ka nuihlet rual chuan ka hriat ngailoh thil danglam engemaw tak hian min fân nghal rawih rawih tih ka hrethei a .

Ngaihzawng ka la neih ngai loh avangin mâk ka tiin ka inhrethiam mai biklo .

Chumi zan kan lehkhazir pawh chu ka rilru ah alut thei hlawllo . Ka notebook ah te , bangah leh hawina lam apiangah a hmel chu ka hmu tel a . Ka maimichhin lahin mitthla ah a inlar zel bawk si .

Teh ringawt chuan leh..ahming takngial pawh ka hriat lohin min han thunun nghal ringawt chu le !! An khawlam ah te pawh alo nei ṭha phian maithei asin . Chutiang mai mai ngaihtuah chuan ka thin an rim ringawt bawk a .

Hetiang hi hmangaihna anih si chuan rilru hahna hlirin ka khat dawn a nih hi..keia ngaihve dan mawl tak aṭang chuan .

Mami lehkha chhiar lai chu kan sawipui ve ngial a . Ani lah chuan pawlawh zetin

" Khatiang Officer hmel lo lutuk ṭha lo tih ve te chuhh..Innei ula thingtlangah in awm anga Buh leh thlai in thar ṭhatah in lawm ve em em anga , in Vawkpui in no a neih kumah in lo Bazar anga Chhangchhe tawkin " min la nuih uar uar zui lehnghal a .

Ka Pen kenlaia a Lu ah khawn fawk pahin " A hriat tura min chhaih vaih chuan i laka ka phuba lakna tur chu i hriat kha " kan ti ve ngial bawk a .

" Awii..ka lawmpui lawk che ni rawh se , a harsa dawnlo lutuk , eitur tui inei thei bawk a, bul ṭan dan tur ṭha deuh ka hria , lungngai suh hetiang lam i sawi ve chhunah min ring tawp la ni mai " thlamuan thlak ṭhin mang e , ṭhian ṭha nge nge an hlu fo .

Hostel ka luh tirh aṭangin naktuk Class kal hun tur tluka nghahhlelh ka la nei ngailo tih ka chiang .

Tukṭhuan kan eilai pawh chuan Principal te In lamah an awm nge ka hmu ve lova , Classroom kan luhfel vek tawh hnu Dar rik hma deuhin Teacher pakhatin a rawn hruai lut ve a .

Kan ṭhutna zawn mipa ho ṭhutna ka sirah chuan an kawhhmuh angin a rawn ṭhu chat a..Fuh tluang zel e . Ka lam hawiin min rawn nuih leh sak a , kei lah chuan nuihlet chu sawiloh ka lo enliam mawl tawp . Min aikaih hneh lutukna chuan nunphung pangai tur min hloh tir zo vek nia.

Ka rindan chuan ani nen hian kawnghnih chiah zawh tur kan nei . Kan induh viau anih loh chuan kan inhlat ngawt ang . Ka rilru putdan aṭang hi chuan.

A chezia leh hawiher chu a rukin ka mitmei pah reng a . Hmelhriat sa a neihloh avangin ngawi rengin a ṭhu a . Inkiltawih leh zak hmel erawh a pu lemlo . Mahni inringtawk tak chi anih hmel a , kalthar leh thingtlang mi a nihna anga han chhaih nawmnah chi a ni lo tih an hmuthiam ve ani mahna..Mipa ho pawhin ṭha takin an be zawm ve mai .

Class awlah chuan ka lam lo hawiin " Masanga ka nia Lalthansanga , min la hria ang chu tiraw " nui sang chungin a mitko a san zauh bawk a " Hre dawn lawm ni , Zonuntluangi ka ni a , Entee(NT) tiin min ko ṭhin"ka tih rualin ṭhiannu Mami lo siai zauh chu ka'n melh rum zawm nghal zat a .

Class thuhmun leh Hostel khata awm kan ni bawk a . Kan inkawm in kan innel zui nghal ve mai a .

Kan inhrechiang chho telh telh a , a hmel Pâ tak mai bakah a mize ngaihnatawm tak te chuan min hip thûk zel a nitinin , mi nuntlang tak, a nih anga langchhuak mai chi , nelawm leh fiamthu duh tak , Zaidam leh mahni pawh insawisa a nui mai thei khawpa rilru zau a ni bawk .

Thlakhat dawna a rawn ṭan tlai chung pawhin Zirtirtu leh Zirlaite ngainat hlawh thei khawpa hûhang nei lian chi ani bawk .

A chhungte an awm hlat avangin mamawh engemaw a neih hlau in ka ngaihven ru a . Eitur leh thildangah pawh kep a harin a tlawmngai a , ka bulah phei hi chuan inkawmngeih tho chung si hian a zia hi a danglamin midang angin min fiam ve ngailo . A inti mitak daih zel hi mak ka tiin ka bula awm hi nuam ati ve lo anih ka ring fo ṭhin .

Hmeichhe luhlul tak ka ni a, mifel ti a sawi hlawh tura fing ka ni lova , mi zingah pawh langsar lo a awm nuam ti chi ka ni a. Mi inkiltawih leh zakzum chi ka ni bawk .

Chuvangin Masanga pawh ka rilru a lian ber ni mahse atan hriat turin ka awm hranlo . Min biakin ṭha takin ka chhang a , a ngawih leh ka be biklo leh mai bawk a . Zirlai mai kan la nih avangin kan zirlai tibuai thei thil chu kan tan a ṭha berin ka hrelo bawk nen .

Nikhat chu break laiin kan Classmate Partei hmelṭha leh hetiang lama zei zet mai chuan min lo vawn chawt pahin

" Masanga hi itan engnge a nih ? Ṭhian nge a aia thuk " tiin min lo zawt thawr a . " Ṭhian anih hi "

" Van tihzia em ! In inkawm bawk a , ṭha ka tihzia ilo hrilh dawn nia aw " ka aw lo thei silo , ka thaw a ipik nghal vek..lo duh ve ta se..Hrep tak chuan lehh !!

Ṭhiannu Mami ka hrilh nghal vat a , ani lah chuan ngaihsam zetin " Hrilh miah suh , alo duh let vaih chuan i chân dawn sin , aduh lo che iti hmiah dawn nia "

" Ka hrilh hreh sia Partei'n min zawt leh anga dawt sawi tawp chu ka inthiam chuanglo ang " ka ṭap lo chauh tawh a " I mawl lutuk hi a buaithlak dawn chauh , iduh ang chiaha duh ve an awm a ,an sawi mai..naktukah i rilru hi Masanga ka hrilh vek ang,kan tlai hma hian " Mami chuan ati hmak . " Sawi miah suh aw ka hmu ngam tawh lovang ahriat chuan heti hian engtin emaw alo inher fuh ve mai ang..I fel kha Mam "

Hrilh ka duh ka hreh si , Partei'n min zawt sek tawh si , a tawpah bah nuaiin ka hrilh ve ta ṭawk a .Ngawi rengin min en vâng vâng a , ka kut min chelhsak pah bawk a.

" Lawmawm hle mahse Entee , nangin engtinnge min ngaih ve tih hi ka hrechak ber kei chuan . Ka rilru ang hi i pu ve em ? Ka duh che tih hi i hria tiraw ? "

Ka hresual lo a thusawi hi . Ka chhan kher a ngai heklo . A lama min pawh hnaih chuan ngaihngam leh lungawi zetin a awmah chuan ka bei thlap a .

Nun chhungril inpawh chungin kan titi a , kan nui dun a ,duhthu kan sam fo ṭhin . A bula awm hi a hahdamin a hlimawm a .

Thil engkim mai a êng zawngin a thlir thiam a . Keiin thil tesep engemaw mai mai rilru hah nana ka hman ve te pawh a bula ka sawi chuan fiamthu nen hahdam zawkin ka ngaihdan min thlak sak ṭhin.

Achang chuan " I rilru hi ahah ve ngailo mi, engmah hi i ngaihtuah ve lo " te kan ti leh ngawt bawk a . " Sawtlo ngaihtuah ka peihlo, nuna lo thleng tur hi engmah kan dâng thei lova, kan lo dawnsawn dan hi a pawimawh zawk " ati mai zel .

Kan chungchangah pawh hmalam hun tur sawiin thu min tiam ve sise lova . Hmathlir neilo khawpa mawl erawh a ni heklo .

Masanga vangin Hostel ka nin em em nuam ka ti thar a, Chawlh neih pawhin Inlama haw pawh ka phur ruai tawh heklo .

Kan hun hman dun ngaihawm tak te sawisen a ni lo. Chutih rualin Zirlai kan nih kan hria a, lehkhazir tibuai zawnga awm lovin kan infuih phur tawn ṭhin.

Hun a ral a, Krismas boruak rim a nâm ṭan a. He hunpui lo thleng tur hi ka huphurh lawk nasa mai thung a. A tello a awm chu ka huphurh ngawih ngawih a ni tawp.

Chumi kum Krismas chu ka tawmim in lehkha zir nan ka hmang hlauh a, ka hlawk phah phian.

Kum athar rualin Matric exam tura rilru pek angai tawh a. Kan ṭang bawk a, First div.ah kan pass dun hial.

Kan lawm em em rualin rilru erawh a buai hle . A nu in zir chhunzawm tura a fuih a, aduh hle laiin Ani erawh chuan Chhungkaw harsatna hrerengin a nu pui paha a naute enkawl a duh tawh zawk a.

A dinhmun en chuan a âwm reng mai. Mahse an khaw lama a haw chuan engtinnge ka awm tak ang ? Kei lah hmundanga zir zawm turin chhungte'n min la ti zui lehnghal vei nen.

Vawitam kan sawidun a, kan sawifel lem hlei lova

" I tana chhuan tham ni thei tura zir zawm ka châk zia hi i hrepha lovang Entee, Chutih rualin ka dinhmun harsat zia phei chu i hrethiam lo leh zual ang. Ṭha takin zir la nang chu, inkawp tur kan nih chuan engmahin min ṭhen lovang " ka mittui a tla a. A tan tihsak theih neih ka châk zual ṭhin.

A haw dawn hnaihah kan Inah ṭhian ṭha zual te nen chaw kan eikhawm a. Kan Inchung zawlah Thla eng hnuaiah kan zai ho va...

'Rualduh kan inṭhenna turin

Hun leh ni ahnai ta

Hlim leh lawma kan
lenlai ni

Hmanlai an chang dawn ta'

Chanchin atam thei ang bera inhrilh zel tura intiam chungin kan inthlah a. Kei pawh ka pa thu angin ka u awmna Shillong lamah zir zawm turin ka kal ta a.

Thildangah hreawm ka ti lova. Masanga hlat zawng hlira hun ka hmang chho chuan ka awm ati nuamlo zo va. Ka ngai em em a, lehkha ka thawn awllo a. Englai mahin ka theihnghilh ngai heklo.

A chanchin dilchhut taka ka zawh pawhin min hrilh tamlo, a ze ngai bawkin ka tana hriat nuamlo tur chi a mimal harsatna a sawi ngailo.

Midang kâ aṭanga ka hriat danin a Nu a dam ṭha thei lova, a remchang apiang thawkin a hah hle tih erawh ka hre ru rân thung a.

Mi hnuaiah Nisât laia inhlawhfa a thlan fara hna a thawk tur te chu ka mitthla a. Inzir chhuah vâta aphur chhawk zangkhai tura hna neih chu ka duhthusam sângber a ni fo mai.

Chutianga inhmu miah lova Kum hnih dawn kan awm hnu ah haw na tur remchang ka nei mial a, ka hrilh nghal vat a. Nidanga ka haw in harsatna engemaw vangin kan inhmu fuh thei ngailo.Tun ṭum chu ka hmuhna tur engmahin a dal dawnlo ani tawp.

A ṭul leh an khua ah pawh ka kalchilh mai ang a. Thil mawilo leh mi min sawidan tur ka dâwn sise heklo vang. A rei tawh lutuk inhmuh loh nan hian.

Ka vau nasa bawk a, Masanga pawh a nu damdawi tur ngaihtuah pahin alo zin a. Kan inhmu leh ta, Ka va han ngai ṭhin tak em !!

Hna athawk nasa ani tih a hmelah a lang a. Ka Sana hawnsak erawh a lawm thiam hle. A mizia pawh ka hriat ṭhin Masanga kha a ang ta lo. A nui tlem a, sawitur a hrelo a, ka lak aṭang ngei pawhin a hla deuh tlat ni hian ka hria a. Ka ngaih a ṭha thei hlawllo.

Mahse, a dinhmun ka inchân in a rilru hah dan tur ka hriatpui thung. A nu Cancer natna in a eichhe mek a inenkawlna senso a hautak em em a. Chutah a naute lehkhazir enkawl chu a kut ala ni tel bawk nen.

Ka thiam tawkin ka hnemin tihhlim ka tum a, a nui a, a chhungril hah zia erawh a haider theih si loh va.

Inlam a ngaihtuah em avangin a chamrei hmanlo.." Entee, ka phur hi a rit lutuk a, min hmangaih leh ngaihsak reng na avang hian ka lawm a Mahse, itan hian engtikahmah ka ṭha tawk ve ngai dawnlo. Chuvangin min theihnghilh tawh la, i nawmna tur kawng dâltu nih ka duhlo "

Ka ngaih tehreng nen, a thusawi chu mak ka tiin ka hrethiam theilo.

" Ni love, i harsatna chu engpawh nise phurh ve ka inhuam asin, midang ta i nih a ka tan i awm tawhlo tih ka hriat hmaloh chuan i laka ka rilru hi a pangai reng ang " tiin ka thlah ve thung a.

Ka kal aṭanga reilote thlahnih hnu ah a Nu boral thu min lo hrilh a, "Atan theihtawp i chhuah tawh a, i enkawl danah i Nu pawh lungawi takin a kal ang " tiin ka lo hnem a.

A hahpuin a buaiphah lutuk a dik tak chuan atan a hahdam thlak tura a Nu a boral kha amah ka lainatna avangin ṭha ka tih pui tawh zawk.A tawrhna ṭawmpui phaka awm hnai thei tal ni ila ṭha tur.

A nu boral hnu aṭang chuan ka ngaihsak leh zual a. Buaithlak ber chu duh angin chanchin kan inhrilh theilo , lehkha leh mi kâ aṭang lo chuan..

A lehkha ka dawn ve lahin tawite, khamawm loh tawk velin a rawn ziak ve lek a !

Ka beisei leh duh angin min ngaihsak ve lo tih hriatna ka nei lian telh telh a, rilru hah buai nuaiin ka awm a, chaw ka ei theilo a, ka muhil ṭha thei bawk heklo va !

Thlasik boruak karah Krismas rim a nâm ṭan a.Ka haw hun tur a hnai ve tial tial bawk a. Ka hunawlah nikhat chu ka hawn tur thil engemaw lei tuma ka chhuak chuan nu pahnih, an thlenna lam pawh hrethiam tawhlo kawngbo ka hmufuh a.

Kan inbuaipuina lamah an chanchin an han sawi chuan ka phu zawk mai..Masanga te khua an lo ni reng a.

School kan kal dun ṭhin a tiin a chanchin ka'n zawh chuan " Hmanni lawk khan Nupui a nei alawm " an ti ta mai a...An hresual ani thei ang tiin a hmel, a mizia ka sawi ngial pawhin Amah ngei chu a ni si !! An bulah ngei pawh khan ka mualpho chu ani ber e.

Engmah ka tih zawm peih hlawllo. Ka tlan haw vâng vâng a. Khumah ka bawk thlawp a, ka ṭap a, ka nâ ngawih ngawih a, awmngaihna reng ka hre lo !! Amah biak theiha a chhan zawh chian ka châk ber tawp.

Ngun taka ka ngaihtuah let chuan, tunhnaia ka laka a awmdan, ka duhna leh ka ngaih em avanga ka lo hmuh hmaih hote anga ngaia ka lo enliam te khan awmze thuk zawk neiin ka hmufiah thiam leh hnuhnawh a.

Tum lawk sa rengin ani hetiang thil hi atih ni ! Huat theih ka duhin ka châk ngawih ngawih a, min duhloh vangah ka puh phal lawi si lo.

" Entee, i bulah ka sawi tawh kha..ka retheihna leh harsatna tawn ang zawng zawng tawng chho ve tur chuan i hlu lutuk..ka phallo che. I tana ṭha ber tur kawng zawh thei tura i laka ka inthiarfihlimna hi lo pawmdam tum la. Min ngaidamin kei chu min theihnghilh tawh ang che " tih zawng hi a lak aṭanga chhanna ka dawn chu a ni ta !!

Tunah hian Ani chu ka hma ah ading mek a, thinlung kila riak reng ṭhin kha tlangval ngei mai kha..a landan hunin a tihdanglam sak te chu ka hmuh hmaih lo.

Mitmeng harh leh nungsarh ṭhin kha ameng dûl ve ruih tawh a. Nghet taka min kuah ṭhin tu a bân thahrui ngah tak te kha a zawi hmêl zo a, a kawr hmalam chenin alo puar ve ta hial a..ka tan erawh a ngai reng tho si a !!

*********************

Entee nen beiseiloh taka kan inhmuh leh nawlhna boruak chuan mipa zawk mah ni ila min ti hamhaih buai ve nawk tho mai. Min hrelo derin min hua in min be duhlo nise, ka chantawk ania ka vuilo zawk tur a..hun chuan a rilru ṭha tak ṭhin kha a liampui ve lo anih dawn hi.

Ka tawn tirh ni aṭanga vawiin thleng hian Entee tluka hmangaih ka neilo a, englai mahin ka theihnghilh ngai heklo. Chuti chung chuan kha chen kha a tello a nun ka zir a, ka thei ve mai bawk a..tunah a hmel ka hmuh rualin rilru chuan reilote chhungin ngai a awh fel leh hman vek thung si !!

Chutiang rilru pu chuan a mitmeng ka en a, ka laka a rilru kha ala pangai reng niin ka chhiarsak bawk. Ka phu tawhlo..ni lul suh se.

A ni nena kan khawvel leh kan hun neih chhun chu a liam tawh a. Kan tan hun ṭha a awm nawn thei tawhlo tih kan pawmdun a ngai tawh zawk si.

Vawitam ka ngaihtuah let fo ṭhin. Ka duhna kha hmachhuanin lo innei ta ila kan dinhmun inthlau lutuk avang khan kan hlim tluan thei angem tih hi. Hmangaih ber te nena retheih huam chung hian retheihna avang hian hmangaihna pawh hi a dai thei ani tih hi ka rindan ani ṭhin.

Kei chuan tuna a nun nawmna hmun sawma ṭhena hmunkhat pawh hi ka pe ve thei ngai dawn lova. Rethei bakberha thingtlanga inhnuk hnawk tur atan chuan ka hmangaih em avang zawk in ka phal theilo a ni zawk. A chhungte pawhin an fanu tan hian min pawm heklo vang.

Chuvangin ngun taka engkim thlir lawk chungin ami huatna thlenga tuar huamin ka kalsan lui a. Ka tihsual ka ring lo.

Ka rinlawk ang chiahin tunah chuan Cl - X kan zirpui ṭhin, chhungkaw hausa leh belhtlak, kei ngei pawhin fel ka tih leh innghahna tlak ni a ka hriat Dr.Thanpuia nen innei chho in, In nuam takah an fate nen chhungkaw hlim tak dinin Nu zahawm tak ani mek tih te chu min hrilh lo mahse ka lo hrepha ve zel thung.

Khang hunlai aṭang tawh khan Puia hian a ngaizawng tih ka hria a. Kan inkawp tih a hriat avangin Entee hriat turin a sawi ri lo. Doctor a zirchhuah hma hian kan intawng fuh nawlh a.

Entee nen kan chanchin min zawh chuan tlang takin..Entee ka hmangaih zia leh ka dinhmun harsa tak ṭawm tura neih ka ngamin ka phallo ani tih ka hrilh chiang vek a. Kan titi khan awmzia a nei chho aniang e. Keiin ka neilo anih chuan nei sela ka duhsak ber Mipa a nei ta reng a.

Ka hmangaihna avangin, rilru leh taksa hahdam takin Puia bulah chuan a awm ang tih ka chiang a. Ka rilru a damphah ṭhin.

A tir aṭang reng khan ka neihphak tur a ka ngaih loh avangin rilru pek chin ka nei ṭhin a, a rilru ṭhatna te, a nun zawiawi dam thlap mai te khan min hip thuk telh telh a. Min hmuh ruala an meng khûp lap leh a chetze buai niai te kha hmuhnawm ka tiin ka mitthla fo ṭhin.

Hostel aṭanga kan chhuah hnu ah kan inhmulo zui anga, kan inhrereng lovang ka ti mai a..Mahse Entee chu hetiang mi hi ani ve lo..Zenghet tak leh luhlul tak, rilru na hma leh mi hriatthiamna ngah tak rinawm leh lerhlo tak ani ṭhin.

Hmundang daihah inhmu theilo in awm mah ila, ka tan ngaihṭhat lohna tur awm miahlo in a khawsa a. Min ngaihsakin min ngaihven fo ṭhin.

Ka nu boral hnu ah ka naute lehkhazir hmundanga an awm alo ngai chho a, keimah chauha awm chang ka neilo theilo a. Inchhung ruak lutuk chuan ka khawhar a tizual em em ṭhin. Nupui neih ka ngai tih ka ngaihtuah apianga ka rilru a lang chu ka cho rual a ni silo.

Tichuan tumlawk pawh nei mumal lutuk lo in kan khua ami Maseni, nula taima leh Sakhawmi tak nen chuan kan innei chho a. Bawiha min hrinsak hnu phei chuan a tlachawp ringin hausa lemlo mah ila, lungawi takin chantawkah hlim takin kan nung ve ṭhin.

Ka nun ka thlirlet chang hian Vanduaina hian min bawh bik ni hian ka hre fo mai. Maseni chuan Bawiha Kum 5 anih kumah nat lawk pawh awm lovin luna satliah a kan ngaih laiin min boralsan thut a. Nun hi a ruak ngawih ngawih a. Bawiha awmlo se dam chakna hi ka nei tamlo khawp mai.

Kan In leh lo, ka nu leh pa, ka nupui lunghahna hmun nimahse kan khua chu, Bawiha hma hun tur ka ngaih pawimawh zawk avangin a Ni te bulhnaiah Lunglei lama awm turin kan chhuahsan rawih a. Kan pafa mai kan ni bawk a, a Ni te inhnuaiah a rem apiang thawkin kan inchhuang hrang a, Bawiha pawh School ṭha ah ka admit ve thlap bawk a.


Heihi Entee tello a ka hun hman chhoh kual dan chu a ni.Lungleiah an awm tih ka hrelo a, ka hmuh phei chu ka ringlo leh zual.

Ka hrereng na a, kan khawvel a inpersan tawh bawk a, ka vei nâ run tawh lemlo viau.

An awmna hmun min hrilh pah chuan " Lo leng ngei ngei ang che u, Puia pawh i hre tho a, ka lo hrilh ang " tih pahin ka no. min dil a.Ui ṭung anga lan ka hreh avangin ka pe hram a. Ṭul ka ti lemlo hle.

A rilru ka hre hauhlo na a keimah zawk hi ka free bawk nen, nun alo khawhar bawk nen tumloh lamah ka buai thar ang tih ka hlau in ka inveng ani mah zawk awm e.

Kan inhmuh aṭanga reilote ah Entee call ka dawng a. Thu tesep engemaw sawiin a vawikhatna'n rei ngial kan han inbe phawt a. Kan awmna te min zawtin a ze ngai te in a dilchhut leh pek hle. Min zawh miau chuan chhan ṭhat loh a har si. Chanchin inhre tamlo ila kan tan a ṭha zawk tawh tur.

Ṭhian kawmin kan inkawm nel thar chho leh a. Kan mimal rilru leh nunhlui erawh kan sawi ri ngailo thung. Titi a rualin thu ho mai mai pawh za takin kan nuihpui dun leh a. Hmanlai boruak ah kan cheng thar leh ta.

Kawppui nei lai anih miau avangin ka duh huna ka biak a remlo a, keimah vanga an nupa boruak chhe tur ka phal heklo. A call leh text châng hian ka Phone ka en awllo a. Nun hi a hahthlak in ava nuam si em !!

Inbiak mai duhtawk loh chin kan nei thuai a, kan Ina lo pen kawi a nei zauh zauh ṭan a. Ṭha taka inkawmin kan titi a, an Ina leng tura min sawmna erawh ka hnial ziah thung. Engkima ka phakloh tur an chenna va hmuhpui kher kha tlawm ah ka la nge, ka thei lo a, ṭul ka ti lo bawk.

A ni hi ka thinlung zawng zawngin ka hmangaih a,a hma hun tur ka duhsak luatah hmangaihna avang vekin harsa ti chungin ka kalsan a, ka lo thlahfel tawh kha a ni a...

Engatinge tunah engkim kan tan a tlai vek tawh hnu ah alam ka hawithar leh tak ? Lo inhmu fuh leh kherlo ila ṭha zawk tur ?

Nupui hial neihsana ka inthiar fihlim te kha ka inchhir thar leh titih a. Inhmuha inbiak fo takah chuan chhungrila nunhlui mutthlu tawh, thi si lo kha kan tiharh leh ṭan ta. Entee Zûn zet zawng ka phurchhuak thei ngai dawnlo anih hi.

Rilru chhung erawh a nuam tak tak theilo. Ṭhian inkawm satliah angin awm mah ila.

Ka khawhar zual zanreh boruakah ka be ngamlo a. A lakah beisei engmah ka nei theilo chungin ka beisei ber chu Amah tho chu ani lawi si a.

Kan boruak chuan nun a tihah a, kawng diklo lam kan zawh dun mek ani tih ka hriatna chuan min tibuai takzet a. Nuam ka tihve tho si avangin tih tawp har ka ti bawk si a.

Kei Pathlawi ka ni tawh a, Mi nu nena inkawmngeih fal viau kha tu ngaihah mah thil dik leh mawi ani thei heklo.

Sawi kan kai hma ngeia hmaichhana sawidun a dika ka hriat avangin lengah ka sawm nghal a.

Ka thiam tawka kan sawi ngial pawhin " Ṭhian ṭha kan inkawm ani mai a, tihsual engmah kan nei lo, chu ringawt pawh i duhlo anih chuan thuhran nise. Ka rilru i hrechiang a, haw ngawih ngawih tur che ka nih laiin huat ahnekin ka ngai zual tulh tulh si che a, min hrethiam la, hetia inkawm chauh hi zawng remti ve mai rawh, thildang engmah ka beisei lo a, ka nihna ka hre ve asin" a mittui chu a tling kiau bawk a.

" I hrethiam lo ani Entee, I retheih hlau in harsa ti chungin ka kalsan tawh che a, tuna i nun nawmna tichhetu nih hi ka duh heklo. Hetiang anga kan awm zel chuan reilote ah ka hlauh ang hi alo thleng anga, sawi kan kai thuai dawn ka tan chuan pawi a awmlo, itan erawh damchhung daih ani dawn sin. Kan inbia in kan inhmu zui tawh tur a ni lo "

Min chhang lovin a insut zui hlawp hlawp a. Keimah vanga a nât atam a, ka hmuh lai renga aṭap chu hmuh hreawm ka ti a, ka kuahbet a, sawitur ka hre tawh lo.

A mittui kar aṭangin beiseina mitmeng nen min lo melh chho va, a hmel ṭha lutuk chu ka hnar theilo..Karei engnge kan tih tak ? Hetiang hi alo thlen palh hlau reng rengin kan inveng ve ani lo vem ni ?

Kan hun liam tawh kha zawngah pawh remchang hmu mah ila ka pehhel hram ṭhin kha mi ta anih hnu ah ka ruksak leh si..ka va inhaw tehlul em!!

A ni lah chu ka hriat ṭhin Entee ni awmlo fahranin pawiti leh inchhir hmel reng a pu ve si lo !!

Ka rilru chu inthiam lohna leh pawi tihna in a khat a. Fello viau mah ila, thiamloh ka inchan tirna khawpa tihsual hi ka nei ngai lem lo.

Maseni damlai khan hunrei nilo mahse, Pathian a hriatna leh engkima ṭawngṭai mi a nihna te khan ka nun hi thui tak alo kaihruai ve hman a. Ka tan ninawm tura Pathian hming sawiri ring satliah lovin, ka hmuh turin a nunpui mai a.

Ka nupui bulah khan taksa mai nilo Thlarau nun thlengin hahdam takin ka chawl thei ṭhin. Hei tak hi Entee nen an danglamna a ni bawk.

A boral hnu ah Bawiha nen chauh khawhar taka kan awm pawhin, kan theih chinah leh phak tawkah Pathian hi kan innghahna leh rinchhan ber a ni a.

Chuvangin mihring laka ka inthiamlohna aiin Pathian mithmuhah thil ka tisual ani tih ka inhriatna chuan min delh rit zawk a, Vawitam ngaihdam ka dil reng a ni.

Entee biak zui loh chu ka tan thil harsa ani lemlo...mahse a hma aiin ani a rawn che na sauh thung a, Puia awmloh chhung zawng hi min call nan a hmang aniang e..ka chhang senglo a, ka tum heklo.

Kei akar engni lo hi, induh leh sual nih hlawh huamin kan intipa thar leh ngawt a. A aw ka hriat rualin ka rilru siamfel tawh sa hi a nem leh ṭhin si a..min hrechiang in a luhlul ve bawk a, a beidawng mawh hrep lehnghal a.

Kan inkar boruak hmasawn zawnga ṭhang thei tawh ngailo tur hi ka tihtawp fel vek a ngai nawn leh ta. A hma ai mahin a khirhin a sak tawh lehnghal.

Inbiak pawha inkawm nel hi kan tan chuan meisi hlauhawm, meipui fawhkai a ṭha ber tur ani miau si a.

Ka ngawihsan mai loh chuan kan mualpho thuai ang a, an Chhungkua a kehdarh anga, rilru na leh zak tur tam tak an awm bawk ang. Kan tawpsan erawh chuan kan pahnihin tu hriatlohin kan tuarchhuak thung ang..khuareiah.

Mahse, a harsa ngât ngât ṭhin mang e . Ka reply loha a rilru na hmel tur te, a lungawilo mitmeng tur te, a hla duhzawng te nen lam ka suangtuahin ka mitthla vek fo ṭhin.

Ka vanneih asiamin ka ti dawn nge, Puia chu Aizawl lamah an sawn hlauh mai a. Hmun hrana inhmu lova kan awm chuan kan intawpsan hlen ve mahna le. Ka beiseina chuan ka lung ati leng nghal vawng vawng tho mai.

Tlaikhat chu kan tualah ka Bazar haw lamin an Car lo inhung chu ka hmu a, ka letsan ru dawn mi aw ka tih rualin kan inhmuh tawpna pawh ani thei tiin ka bihruksan duh ta lova.

Inchungah ka naute Inah an nupa in min lo nghak a. Kan Ina ka chhukpui hnu chuan Puia chuan, " Kan nu nen chuan in lo inhmu tawh ani awm a, hunawl hi ka neilo khawp a keive hi chu..min lo hrethiam la, hei Aizawl lamah min transfer a, kan inhmu khat leh zual dawn si a,kan kal hma in chaw lo ei ula kan ti deuh a, engtiknge in hman remchan theih ang ?"

Kan chanchin engmah a hrelo tih ka hriatin ka zahru veng veng mai.

" In ti lawmawm lutuk, mahse Bawiha hian hmundanga chaw ei hi a hreh thei lutuk a..hriatthiam kan ngai, in kal dawnah kan rawn thlah zawk ang che u " ka ti liam ta ringawt a.Entee hawi tau deuh hmak hmel chu hmuh a nuam lemlo.

Puia pawh chuan min sawmlui zui em em biklo a. Kallo mah ila pawi atih vak pawh ka ring hranlo. An nu rawtna hnial a hreh vanga rawn zui pawh a ni mahna. An haw tur ka thlah liam chu kan inhmuh tawpna a ni ta hlawm a.

Tunah chuan ka tan Entee chu ngaihtuahna leh rilru luah liantu ber ni tho mahse, hriat ngailoh mihrang ang mai alo ni leh ta.

Sêr nung angin damchhung daihin keimahah hian a nung tawh ang a. Kei chuan Pawnlam him dam chungin chhungril nâtna hi nunpui ka zir nawn leh pek anga. Khuarei chu ka tan min hnemtu tur a ni tawh ang.

Chhun leh Zan chu ka tan a reh vawng vawng a. Ka ngaihtuahna te chu i hnenah bawk alo kir leh ṭhin. Kan tan hun leh khawvel a awm ve tawh si lo !!!

" MI ṬHENKHAT CHU I THINLUNGA CHENG TURA RUAT AN NI..I NUNAH NI LOVIN "



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)