Kumtluangin, Emma BY vanlalruati

Ngaia
Site Admin
Posts: 25813
Joined: April 30th, 2016, 4:07 pm

Kumtluangin, Emma BY vanlalruati

Unread post by Ngaia » September 1st, 2019, 10:04 am

a7zvh3a9.jpg
a7zvh3a9.jpg (17.74 KiB) Viewed 6572 times

Kumtluangin, Emma
(Competition 2019)
_vanlalruati
2014 September
Tunge ka nih chiah a? Heti reng hi ka ni dawn em ni? Ni chhuak chhíarin nun khaw chhuah nân buai rêng rêngin ka ni ka thlah liam a, zan ka hmang ral ṭhin. Kum 27 chhúng khán khawvel êng zau zâwk thlira hma lam pan rêng tum lovin mahni tal talin, a ṭul apiangah ka hun ka hmang ral a, mahni mawina leh hmakhua pawh thlira thutaka laa ngaihven hman meuh lo leh ngaihsak nachang pawh hre hauh lovin.
Danglam bîkna leh thiam êm êm bik pawh nei lo ni hian ka inhre thin, ka tuipui ve deuh ber thin designing-te chu luhchilha puitlin tak tak tum nachang lah ka hre lova.

Mizoram chhim tâwp a awm, Lawngtlai khawpui atanga mel 10 vel chauha hla thingtláng khuaah piangin ka seilian a, kan khua hi a lian lem lo hle. Thingtláng khuaah chuan a che changkang ve pawl tak chu kan ni ngei ang; mahse, hausa tak tia sawi theih erawh kan awm lo thung.
Thingtlang nula tam takte anga zirna lama thleng sáng lo ka ni a, pawl 12 chu ka pass chhuak ve hrâm ani. Zir chhunzawm ta lovin in lamah chhungte puiin a ṭul apiang thawkin ka awm ve naw naw a, ka nunah chuan ka lungawi tawk ve êm êm thin. Hmelṭha tia fak chiam theuh ka ni lo, lian lemlo hle mah ila mahni tawkah chuan tha ka intiin ka lungawi ve hle. Ka nu hian tihian min fuih fo ṭhin
" Nûte, nun hi ho taka hman ral tum lo la, i duh leh châk zâwng takah hlawhtlin ngei tum ṭhin ang che. Hausak hi hlimna ber ani lo; mahse rethei lutuka dam chhung hman reng erawh a thlanawm loh asin. Hmeichhe chaklo leh dawm ngái renga awm ni ngai lo la, i zahawmna humhim nan tal mahni kea din theih tum ang che. I pa nen hian theihtawp kan chhuah ve thin, sáng taka in thlen ve theih nan. Beidawng ngai lo la, Pathianah innghat reng ang che," tiin. He ka nu min fuihna hi rei tak ka ngaithla liama, thui tak ka ngaihtuah zui ngai lo; mahse, tlai khaw hnuah ka inngaihtuah chhuak hlauh a, vanneih asiamin ka nî ten min rawn sawm bawk nen, inngaihtuah buai ve hle mah ila hmasawnna ûmin Aizawl lamah designing zir tur chuan ka rilru ka siam fel ve ta anih kha.

Zîng khaw vawt thiang nuam tak ani; ni a la chhuak lo va, zân lama ruah sûr khan khawlai vut leh thing paw phukte kha a tleng faia, ka ngaihtuahna buai nuaih pawh kha a rawn fîm ta diak mai. Zin nân chuan boruak duhthusam ani.
''Nûte, tho rawh le, kal a hun dawn tawh ania''', tiin ka pa chuan dim tê in min rawn kai tho va.
"Umm, pa, reilo te aw", puan chu ka insin tha sauh a.
"Thingpui ka peih a nia, kan tlai hlauh ange, a muanchan hun loh aw", ka nu chuan dam tak bawkin a rawn ti a, ni dang zawng aiin a aw a némin min ngai hle dawn ani tih a hriatthiam theih a ni.
Zan lama ka muthilh har avangin thawh ka harsat hle a, ka inphih faia, thingpui in zawhin ka inchei leh a. Kawrlum paw hain jeans ka inthawlha, pheikhawk flat bunin shawl lian ve tak ka bât bawka. Thingtlâng nula zin turte inchei dan tlángláwn ber ani ve ang.

Ka nu'n min ṭawngtaisak a, ka pa nen motor min chànpui turin vêng tawntirh lam kan pan ho a. Ka unau te pathum awm vete chuan an manglamah chuan min thlah ve mahna, mi nawlpui tân chuan thawh hun ala nilo rêng ani. Kawia kan liam tur chuan kan in, kum sawm chuang zet ka lo luah lum ve tawh ṭhin chu ka thlir zui vawng vawng a, lungte pawh a chhe dâwn dâwn a. Waiting shed-ah ṭhuin ni dang zawnga ka lo chîk ngai loh thing hnah te, kan khaw leilung rual rem lo tak tùr inrem fel thlap si te, ka ngainat êm êm ngai loh kan khaw mi te in, la reh thiap mai te, kan biakin, khaw dang biakin aia mawilo tia ka lo sèl ve ṭhin te, tuikhur leh zunin thleng mai chuan ka chuanna tur motor ka nghah chhung chuan ngun takin ka ka thlir doh doh a, ka ngai vawng vawng nghal ringawt mai ani. Rei tak ka la chhuah bosan ngai silo.
Thingtlang tih takah motor tlân a tlem êm êm a, a la hma bawk a, a reh ṭhuap mai. Rei kan nghah hmain motor a rawn thleng ta. Thawmhnaw tlem ka ken ve chu min hlansak a, ka lut nghal a.
Driver chu kan hmel hriat sa a ni bawka, zin kawng thui tak tur ni mahse ka huphurh lem lo, mahse kan khua chhuahsan tak tak erawh ka hreh viau thung a.

“ Nûte, tluang takin va kal la, ṭawngtai theihnghilh ngai suh ang che aw. I pa nena kan thuchah che kha hre reng bawk la ”, ka nu chuan hlim hmel put hrâm hrâm a tum a. Ka pa chuan min chibaiin " Mangṭha, Emma" tihin min thlah a.
“ Ka Nu, ka pa, mangṭha u".
Kan invai liam ta a.
Ka vanneih ve êm êm na pakhat chu, nu leh pa fel tak ka nei a , an fate zinga an duat ber ka ni ve tlat hi a ni( ka thlirna atang chauha dik pawh a ni maithei). Pawn lamah erawh mite ngainat hlawh lo ve tak ka ni a, mipa lamah pawh ka hnawng ve hle.

"Emma"
Ka hmaa thu driver fel tak tia an sawi thin, Sawmtea an tih chuan a rawn ti a.
"Emma maw inih a."
“Aw, ni e Emma Lalremruati”.
“Hming nalh tak anih chu le, zirlai nge hnathawka awm inih a?".
“Hnathawh tur zawngin ka inzir phawt ang, Aizawl ka vawi khat kalna tur ania.”
“...hahdam tak khan chuang u la, harsatna in neih chuan sawi hreh su aw, Pathian hla ka play thin a, in ning em lo ang chu maw?"
"Zinnaah chuan a thlamuan thlak ber alawm" Ka hnung chiaha thu nutling chuan a rawn ti ve bawk a. Kei hi passenger chuang hnuhnung ber ka ni, seat pawh kan luah khat tawk chiah chiah a.
Ṭawng tam chi ka nih loh avangin leh motor chuan ka harsat thin em avangin motorah chuan ka ngawi deuh reng mai zel a. Driver a fel bawk a, passenger te a be thiamin an titi malh malh hlawma. Kei chuan ngawi rengin ka lo ngaithla a, a rei deuh hnu phei chuan pâwnlam thlirin tlâng te, van dum pawl thiang mawi êm êm te chuan ka ngaihtuahna an la pêng a. Theihnghilh ka tum thin, ka hriatchhuah tawh ngailoh nunhlui, kum sawm liam ta ami daih tawh kha ka rilruah thlifim angin a rawn tleh heuh heuh a, thil dang zawng chu chhìnsanin ka dawn kir veng veng mai ani.
2004
~ Kum 2004, July thla chawlhkar hmasa ber inrinni ani a. Naupan lai aṭanga ka ṭhian kawm ngeih ber Felin mi rawn leng a. Feli hi hmeichhe fel, nelawm leh ṭhiante ngaihsak tak mai ani a. A hmel a ṭhain ngaizawngtu pawh angah thin hle, kei chuan ka tluk lo nasa ani. A pa sorkar hnathawk a ni a, an harsa lem lo, incheina pawh a nei ṭhain, a thiam hle bawk. Kei aiin tlemin a sang hret bawk a, ka mamawh hun apianga awm, ka ngawih hun pawha ka sawi ai min sawisak ṭhintu ani.

" Star thar ka nei asin…
Emma! Star thar ka nei ka tih chu".
Ka chhuat nawh lai dahthain a thusawi ngaithla turin ka ṭhu chawl a. He nu hian star thar alo nei leh tawh anih chu.
Kan khua in zà pawh tlin lohnaah hian a star tur mi thar an awm tawh pawhin ka hre lo. A luck tehreng nen hian, duh hi angah ve zel tho bawk si a; mahse, a duh tawhte hi chu an chhe ngai lemlo.

"Tunge?"
"Mikhual thar kha, kâwnah Rinsángi te inhnuai ruak kha a rawn luah a, nimin khan alo thleng chauh alawm, i hriat ka la ring lova."
“ Hre lo ve, nang angin ka chhuak ve reng hman lova, in lam hna tul ka ngah em hi. Nang zawng inrinni pawh i äwl bik ania.”
"Sual suh, Emma. Enteh, a chhe lo lutuk, i tân ka lo hual sak che ania, kei chuan ka neih reng hi hria la".
"Ui! Nang hi, tu tih pawh ka la hriatloh min dem nghal ringawt lo la. Amah pawh hmu ve phawt ila, khawilam thingzai emaw te hi alo ni leh ange, mi deusawh lah hi i thiam sia maw".

" Aizawl tlangval ngat ania ! ti khân ti suh, nangmah chauh hi la star ve lo i nih ka ring, tukin pawh khan amah hmu tur ringawtin kawnah kan kal hlawm alawm, haha."

" Aizawl mi maw, tinge? He laiah daih daih, thil pawimawh a tak a awm ani ngei ang".
" Lawngtlaiah hna a rawn thawk dâwn a, kan khuaah kher a rawn awm dâwn nih chu. Kum 25 vel anih ka ring, a chhelo, fresh si, a aw a nalh lutuk bawk. A polite ropui sia, ka u te thianho phei chuan an sawi nasa hlawm teh a sin. Zanin chu inkhawm ngei ngei ang aw. Rawn hman hmasa la, kan inah nalh thei ang berin inchei dun ang".

"Ni e; mahse, Aizawl mi, mikhual pakhat avanga lo inpen parh vak chu a tlawmthlak ka ti deuh, a khawpui ngaihsanthlâk em mai".
"Engmah a hriat lâwk loh ania, fai tak khan inbual la. He khawpuiah hian i chhe ber tawp lo ania".
" Haha, tehreng mai, nih chuan thingpui lo lum la, ka hna kan zawm leh phawt ange"
" In léng tîr peih tak chu inih hi", nin hmel tak, phûr viau si chuan a ti a.

Chhûn thingpui kan in a, eng eng emaw kan sawi leh duah bawk a. Zêp loh chuan a rûkin ka phúr êm êm a, mikhual tlangvâl hrim hrim chu kan lâwm tlâng vek a alawm. Ei rawng ka bâwl laite chuan ka hisâp neuh neuh a, 'Eng ang mi nge ni ang aw? Feli lah khan a sawi ṭha ropui si a. Engpawh ni se zanin na na na chu han vul êm êm phawt i la', tiin, ka ngaihtuah neuh neuh a.

Tlaia school bâng lo haw ka naute chuan chu mikhual pa an hmuh thu leh a hmelṭhat zia thu bawk chu an rawn hâwn a, kei chuan mikhual nih vang maia lawm fal lo turin ka lo zilh ve bawk, Feli vang khan a rûk tak chuan hmuh ka châk takzet ani. Mahse khawpui mite hi ka ngaina hran lo, mi hausa fa, chapo ve takte alo nih hlauh phei chuan.

Zanriah eikhamah chuan inkhâwm tura insiamin Feli te in lam ka pan nghal a, ka nu chuan ka chhuak hma lutuk chu mak a ti deuh aniang, min en zui vawng vawng mai. Ka thlen chuan a lo inpeih dâwn tawh hi a ni a, inkhawm ṭan nân pawh darkar khat lai ala awm . Feli'n a sam pawhngilna hmangin ka sam ka dar thleng pha chiah chiaha ka tan chu min pawhngil sak a, mithmul zawng zawng nen, tin thlengin min hnawih saka, a tâwp berah ka hmai uluk taka a chei hnu chuan zahthlâk khawpin ka nalh ve chuan ka inhria. Ka hmêl hi mizo hmel tak ani lova, vai hmel äwn lam lek lek ani, hei hi ka lansarh ve na pakhat ania. Duh taka kan inchei ve ve hnu chuan biakin lam kan pan ta a.
An ṭhenawma awm tlangvâl, a rûka min duh ve em em ṭhintu Rinhlua an tihte nen chuan kan kal ho a. Biakin kan thlen chuan a chhûngah lût nghâlin tlar hma lam kan pan a, inkhawm pawh a nuam hle. Mahse inkhawm chhung zawnga min thlirtu awm ang tlata hriatna chuan min tizâm in, tute emaw inneih nia mawi taka inchei ang maia ka inchei zân anih vâng taka langsar ta riaua ka inhriatna chuan mahni leh mahni chu zaktheilo ka intiru hle zawk a.
Inkhawm bàn chuan páwnah mikhuala chu an lo chibai sap sap hlawma. Mi dang zawngin an lawm hnu chuan Felin min sâwma, kan pan ve ta ngawt a.
"Chibai", Feli ka nia, hei ka thiannu Emma anih hi.
"Chibai, Hminga ka nia, in nalh dun hle mai", Feli hnenah chuan a ti thüm dup a. Ka kut a rawn vuan ta, ka chibai lêt ve em ka hre lo. Ka kûn a, a hmêl pawh en tha ngam lo chuan zah zèlah ka aw kan thian der vel a. A hmêl hmu fiah lo mah ila, a faiin mipa hmelchhe tak chu ani lo ang tih a chiang mai. Feet 5'8 vela sáng anih ka ring, kan khaw tlangval tam tak ai chuan a sáng zâwk a, ka hawi chho ngam der lo. Aw khur deuh chung chuan " Chibai le", ka ti zum ét a, engmah ka sawi zui lo. A rim mawlh chu kan hriat ve phak ngai loh perfume man to ani ngei ang, a rim a tui chêk mai. Ka duh aia rei kan invuan a, ka hriatchhuah meuh chuan ka kut chu ka la lêt vat a. A nui ru zeuhin ka hria.
"Venglaiah sâwn kan awm a, i duh chuan rawn lêng ve thin rawh aw", Feli chuan zei takin a sawm nghal der mai, a kum phu lovin he nu hian a ngam huai hi ka tia, ka nuih a za lek lek.
" Tehreng mai, zaninah pawh in phal chuan, lêng tura sâwmtu ngah viau mah ila, i thian nu hi alo tel ve dâwn chuan…"
"Fel, zan dangah a ni mai, zanin chu lênna tur tha zawk angah tawh ang, haw san phawt mai ang", polite lo chu min ti ve ngawt ang. Mahse sâwm tu angah zia a sawi khan ka thin a khei hle, ka rin ang ngeiin khawpui mi tak anih hi ka ti rilru a.
" Tak takin, Feli pa te nen hian hna kan thawkho dawn a, an ina leng tûr ka ni alawm. Feli, i pa khan engmah a sawilo ani maw?"
"In lêng kan neih tûr thu chu sawi e..."
"Nih chuan kal nghal mai ila".

A ke pên, a chêt dân leh a tawngkam chhuak aṭangte chuan mipa rilru nghet leh ngawichawi a nih ka ring a. Rei fé hnuah a aw mawlh khan ka beng tuamin ka rilru ala luah reng ani tih ka hrechhuak. A ke pen tinte chu chik takin ka lo chhiar thlap a, a hnung atang chuan.
Feli te in kan thleng ta. A pa leh a a thawhpuite thenkhat an lo awm a, a zawm ve nghal a. Feli leh kei chuan thingpui in tur kan buatsaih a. Zâwi têa titiin kan hlim dun hle.
"Ka rin aiin a hmel atha, zep loh chuan".
"Kha kha ni mai asin, ka sawi rêng kha maw, bialnu te hi a nei angem aw, a _luck_ dawn ropui sia? Engang chhungkua a mi nge niang aw?"
"Chhungkaw tha leh awmthei pangngai tak chu an ni ngei ang. Kha i thiltih lai kha theihnghilh daih kher lo la. Takah Rinhlua kha kan kalsan daih sia, a lungawilo viau angem aw?"
"Awi lo êm êm lo ang, mikhual pawimawh te a ni ve a,a hrethiam leh mai ang, bakah ani zawng, hneawm khawpa i kianga awm nuamti anih hi maw," khi sak chungin a ti a.
Hminga chu a hmelṭhat dan a mizo raih a, a sam chu dumin sei lutuk lova zuah ani a, a hnarngul anlahin a khabe kual thla chu hriam lam ani, a khabe velah chuan a tipà tur tawk lekin hmui a ṭo phek phek a.
An thusawi hre pha lo mah ila, puitling pawh a kawm thiam viau tih a hriata. Ka rinaiin a tawng duh zêk bawk; mahse, a hlim hmel chu hmuh a nuam êm êm si. An inkawm ho zawh hnu chuan haw zai kan rel ta hlawm a. Feli nen a hmaa min kaltir kan hnungah Hminga a kal ve thung. Chutia kan khaw mikhual ṭha, mite ngaihven êm êm bula kan kal thei chu a rûk tak chuan intihtheihna tham a ni, kan rilru ala puitling lo bawk a, atûk lama thiante hnena sawi atân tiin Feli nen chuan kan inhrilh ru sep sep a.

Inah ka lût a, khumah chuan muin ka han ngaihtuah chiang a, ka insit leh hle lawi si. A tira ngainat ka tum loh, khawpui tlangval, a nunhlui engmah ak hriat loh, chapo hmel tak tura ka lo ruat a kha, ka hmuh zan khatna aṭang ka vei nghal ani tih ka hriatchhuah meuh chuan, inthiamlohin a, ka inngei hle; mahse, a nuam veng veng tho bawk si. Ka awmdan chu ka la hrethiam pha chiah lo. A tûkah enge lo thléng dâwn hre lâwk lo mah ila, naktûk chu ka nghakhlel a, zahtheihlohna nena a rûka ka vei, engahmah min ngai ve lo tu tura chu hmuh leh ngei inbeiseiin chu zan chu ka muthilh san ta a.

Zîng ni chhuak chu a mawi danglam hle mai, boruakte chu a tharin a fim ngiai hian ka hria. Kan khaw zim leh phut ve takah hian malsawmna ruah a rawn sur emaw ni chu le. Chawlhni inkhawm bânah véng kan fang kuala, kan khua hi duhaiin alo zim hret ani, kan tum aia hmain kan fang zo si a. A tân engmah ni dawn lo mah ila, thian atâna keini kher min sáwm chu kan hnar phal bik lo. Kan khaw nula chhelo zâwk leh changkâng zâwk an awm thliah laia keini kher a ṭhian kan lo ni ta chu, mite pawn an lo sawi nasa ani maithei, ngeitu pawh kan ngah hman hlein ka ring.
Tlaiah zanriah ei laiin ka nau Ruatan, " Ka u chu mikhualpa kha ilo ngaizawng hrim hrim ang", an ti chu ka zak sen tawn tawn mai.
Ka nu'n," Nute, thian thar tha tak in chhara a lawmawm e. Mipa ani a, a hmel a tha bawka, fimkhur hle ang che aw, khawpui mi a ni si a, keini anga rethei chhungkaw tan phei chuan fimkhur taka thian kawmte hi thiam angai asin. Ninawm leh hmuh hrehawm khawpte khan lo nél lo hram ula, i thiannu Feli pawh hrilh ang che. Tawn sual te hi thil thleng reng thei ani tih hriat tur", tiin fiah takin min fuih mawlh mawlh a. Ka pa paw'n kawm chin tawk hriat tur tiin min hrilh bawk.
Ni e, a dik a ni. Keini ang mi liante neih ang nei pha ve lo tan chuan fimkhur taka nun hi hman angai leh zualin ka hria. Thingtlângah ngat phei chuan kan in hre pawh êm êm a, darkár reilo te chhungin vêng tawpa thil thleng bengverh deuh chu kan lo hre ve vek hman zel ṭhin anih kha.
Tihian ka inhrilh a,
_Ka lo ngaina dawn anih pawhin, ni lo,ni khat chhung chauhin ka ngaina nghal em em ani zawk. Mite pawn an a hmel avang ringawt pawhin an ngaisangin a chanchin an ngaihven peih ani a, kei, tleirawl rilru chuan ka ngaihven zual lo thei lo. Mahse ka inveng ang , a chintawk hrethiam tur khawpa sihhnip leh mawl lutuk chu ka ni lo tih ka inhria._

Kar a liam a, nitin kan nun dán pangngaiin ni kan vui liam a. Hminga chu chhunlamah hna avangin khawpuiah a kal thin a, a kal loh ṭum chuan a rawn léng ve thin. Zan lamah pawh a rawn lut ve fo mai, ka nu leh pate nen pawh an inpawh ve viau ta a. Tu mai pawhin kan ngaina tlâng hlawm ani. A finga, a chapo hek lo. Khawpui mite ka lo ngaihruat ṭhin ang nen chuan a inpersan hle. Zan rei tak thleng a leng ngai lo va, ka chhûngte bulah chuan thu tam tak sawiin khawpui nun te kan hriat ve phah ṭhin, ka nu pawhin a ngaina hle. Ka kianga a awm cháng hian, mak tihtheihin a ngawi thei leh êm êm ṭhin a.

Ka duh aia nasain ka ngaina a ni.
Thawnthuah te, film-ahte ka lo hriain ka lo hmu ve nual tawh a; mahse, hmangaihna hi enge anih ka la hrethiam ngai lo. Heti ang lamah hian rilru ka pe lo ve hrim hrim bawk.
Chanchinte zawtin kan in hre chiang ve deuh deuha, ka ngaina zual sauh sauh bawk, ka thunun theih piah lam ani dawn in ka hre thin. Kei chauhin ka ngaina lo tih pawh hriain mi mit mei ka vêng ve reng a, chuta karah ka thiannu Feli lahin min duhpuiin sawidun nuam kan la ti êm êm zui.
Hetiang hian mipa ka la ngaina êm êm ngailo, ngaihzâwng pawh pakhat chu ka nei ve tawh a, mahse hrethiam turin ka la naupang deuh ani maithei. Kar hnih a liam zet chuan ka duh takzet tih ka hre ta, mahse ka duhzia tilang mai lo turin ka invêng reng ṭhin.
Nilaini tûk ani a. Tukṭhuan ei hmain Feli alo kal a, chhun lama tihtur ka neih leh neihloh rawn ngaihvenin an in lama lêng turin min rawn sâwm ani. Ka nu leh pate hrilhin chaw ei kham chuan muangchangin ka phei a. Ka thlen chuan Felin," Hminga a nuam sam lova, va kan ve la tha ang, i chhungte hriatah chuan ka sawi lang ngam lo anih kha, tihpalh," inthiamlo hmel tak chuan ati a.
"Pawilo, mahse kan pahnihin aw".
"Nilo, nangmaha hmuh che a duh vang ania, engmah hlauhthawn tur a awm lo"
"Nih leh le, haw lamah ka rawn péng ang."

Zàwi têin ka kik ri tek tek a, a vawihnih naah a rawn hawng a.
"Hei, lo lut rawh, i vawikhat rawn lênna tiraw khah?"
"Ni e, rinaiin a hnawk daih mai", ka'n nui hak a.
Ṭhutthleng seiah chuan ka ṭhu a, pindan hrang a neih loh avangin khumah a mu a, kan inbe pawh thei mai.
Tukverh pahnih a awm a, chokaah chuan gas a hmanga, bél báwm a inhung bawk a. Ṭhutthleng sei pahnih, Fridge leh TV a nei bawk. A in neitute hian heng zawng zawng hi atîr khan an dah lo tih chu ka hria. Min barakhaihtu chu, khum awmna lam, tukverh bul dawhkanah chuan lemziak mawi tak tak a darh nuaih mai, a bulah chuan lem ziahna hmanrua a awm ṭeuh bawk a. Lem a ziak ṭhin tih rêng rêng a sawi ngai lo.
"I ziah ani ngei ang ti raw?"
" Aw, ka la hrilh lo che ani maw?", min zâwt lêt zâwk a.
" Belhchian i phal em? Ka ngaina lo hranlo asin"
" Thinrim lo la, i duh chuan i en thei ang"
Ka hûi khawm a, a mal tê têin ka en diat diat a, hetiang lemziak hi a takah ka la hmu ngailo, mahse kan ngaisang ve hle thin, 2000 kuma Titanic film kan en achinah khan.
A hnuai lamah chuan mak ka tihtur khawpa mawiin ka lem alo awm ve reng mai. Mak ka ti a,mawi ka ti a, thlalak pawh kan hlut viau laia mahni lemziak, atak ai maha keimah anga chu hmuhnawm tiin ka thlir tlawk tlawk a, ka zak ru hle thung.
" Hei, a mak viau em ni? I duh chuan i nei thei ang, pakhat chauh kha"
"A dang chu awm tawh lo hram se"
" Mawi iti lo em ni"
" Ni lo, ka phu lo"
" Haha, ho viau lo teh, ka tuina ber ani a, nang i awm a, ka tui lehzual asin. Takah mi rawn kan ve duha, ka lawm khawp mai. Eitur engmah mi rawn ken si lova, thingpui tal chu mi han lum la", ngeiawm reuh tak hian a ti a.
" Sual viau suh aw. Chaw te i ei thei meuh zawk em? I duh chuan kan inah pawh i rawn ei thei reng ania. I chhungte'n an hre ve em?"
" Hrilh loh a tha zâwk, min ngaihtuah lutuk ang. Ka tha leh vat mai ang, i thingpui in phawt ila".
Ketli ka chhuang dawn a, gas hman dan tur ka thiam chiang lo tih ka hre chiah.
_Awi, ka va han zak tak, zak anga lan a tul lo_
Ka thiamloh thu chu zak ru teuh chungin ka hrilha, a lam pawh hawi lo chuan. Keini chuan gas kan hmang ngai lova, thing thuk hmangin eirawng kan bâwl ṭhin.

Dìm têin a rawn pen a, muangchángin ka kawngah chuan a kut rawn zenin min rawn pawm anih chu. Ka che sawn lo, enge thleng ka hrethiam lo, ka thin a phu dup dup a, ka sa ut ut mai. Hetiang hian mipa ka la hnaih ngai lo. Ka ngawi reng a, talchhuah ka tum lo, a mi vawnna kut chu ka tân chuan innghahna tlâk kut, ka hriat ngailoh thil min hriattirtu ani. Ka nghâwngah a rawn fawp a, ka mit ka chhing siar siar a, chutah ka thil ken lai gas lighter chu rawn la in
" Tihian, tihian, tihian", min nuih suk a, khum lamah a lêt leh thuai a.
Ka ngaihtuahna a fim ve chiah, _enge thleng kha? Min ngai khawlo viau angem? Kei rilru mawl leh lutuk hian chet pawh ka tum eih lo maw? Min hmusit ru viau ang le; mahse, engmah a thleng lo_ tiin ka inthiam chawp chawp a.

" I ngaih anga awl chu ka ni lo an.." ka sawi zo hman lo
" Shh , ka hria , ka hria alawm. Engmah sawi angai lo", pawisawilo hmel tak chuan ka mitah tak a rawn en a.
" I rim a tui hle mai, perfume i hmang miahlo tih ka hria, kumtluang daiha rimtui anih dawn kha".
_kumtluang chu eng chen nge le_

Thingpui kan in zova, a in chu ka tihfaisak thuak thuak a. "Min mamawh chuan ka rawn tifai thin ang, a rem anih chuan, inthlahrung lo la".
"Tehreng mai, mahse inhlawh nan hmang la a tha ang, ka lo hre tlai deuh ani, i nu leh i pa ka lo hrilh dawn nia. Takah kar tawp aṭang hian Lawngtlai lamah kar hnih chhung ka awm lawk angai dawna, ka in hi i kutah ka dah ang. I duh ang angin i lo sawisa thei ang."
" I ngaihawm ngawt ang, nang hi! i damlo der chiang mai, tikhan i pangngai leh vek tawh ania, sual thiam viau thin su aw," a hmelah chuan damlo hmel reng a awm tawh lo, a tider ani chiang lutuk, thinrim angin lang mah ila, ka hlim veng veng thung.
"Zanin ah Saron tlangah ka lo nghak ang che, Feli'n a rawn hruai dâwn che kha."
" Awle, mahse rei lo se, thil tha lo engmah thleng tawh lo bawk se, ka kal phawt ange". Ka lem a ziah chu chhuang takin pawm haw a. Feli hnenah thil awmdan ka zawt chianga, an lo ruahman lâwk vek chu niin, zn lama inhmuh dan tur pawh kan rel nghàl a.

Feli te ina lêng tura chhuanlam siamin ka chhuak a, Feli leh a bialpa Mawitea nen tlâng kan pan chhova, Hminga erawhin milo nghak ani. Saron tlang hi kan khuaa tlang sáng lo tê, lèn nâna nuam ve tak ni mah se a veng a daikil deuh avanga lun em em lo a ni. Tah hian inngaizawng te chuan len nan an hmang deuh ngei ngei thin.

Electric êng awm loh zan ani a, thla a eng lo bawk.
Tlanga lung inchher chhuanah chuan _mombati_ alo inchhi eng tuar a, a mawi takzet ani. Felin te chu an kal hrang daih a. Hminga ka hnaih deuh tih chuan music a rawn ri a, sap hla ka la hriat ngailoh a rawn zaia
'Just one year of love
Is better than a lifetime alone…'
tih ani a…a thu hrethiam vek lo mah ila a nalh kher mai, zan a reh tawh bawk a, a boruak dai dep nen chuan, film vela kan hmuh ṭhin ang mai niin ka hria.
"Queen hla, One year of love anih hi. Emma, Happy birthday, tlai viau tawh mahse, nang hmeichhe pawisawilo lutuk hian piancham pawh hrelo khawpin i buai thin anih hi."
"Awi!" Ka ngawi deuh vang vanga, ka hnung aṭang chuan Feli te ṭhian dûn chuan min rawn ṭhawng ve bawk a. Ka pian hnu lamah 'tiang hian ka piancham ka la lawm ngai lo, hlut nachang pawh ka lo hre ngai lo zâwk a.
Cake lian lem lo nalh zet hi an rawn phawrh a, kan pali chauh chuan kan ei a. Chutah ka pian hnu lama ka thilpek dawn hlu ber tur chu uluk fahrana tuam mawi hian Hminga chuan min pe a. Feli leh Mawia chuan hun thâwl min siamin min hawsan a. A kiangah chuan lungawi tak leh hahdam takin ka thu a. A ni erawh midang hmuha hlim reng leh harhvang tak thin kha ka kiangah chuan vei ruk êm êm nei ang mai hian a awm ṭhin. Thu tamtak sawiin chu zanah chuan ka kum 17 hman ral takte kha kan thlah liam a. Inah min thlah thlen hnuin thilpek ka hawn chuan Walkman hi alo ni reng mai, cassette pahnih alo awm bawk a. "Emma, hei hi i tan, min hnêm ṭhintute an nih hi" tih hi lehkha themah a inziak bawk, ka lawm zia chu ka sawifiah thiam lo.

Kár tawpa min zin san hlan chuan ka ngai êm êm a, thiante awm mahse ka mal ngawih ngawihin ka inhria. Lehkha kan inthawn zeuh zeuh a, mahse inngaizawng tak takte angin thu thlum leh lungkuai tak tak kan sawi ngai lo. Hun hi a kal muang ngawih ngawih ani.

(Zinkawngah chuan)
Ni e, hun hi a chângin a kal muangin a chângin a chak leh em em thin lawi a. Motor ding ri hruihin min tihharh hlawl chuan Thenzawl kan lo thleng ta der mai . Zun ramte thiara kan chhuah thawven chhung chuan ka hawi kual vêl a, a khaw chhehvel inphah zàwl dàn chu a mawi kher mai. Ka ngaihtuahnaa kal o chen rei deuh vang aniang, kan thlenchin rêng rêng ka lo hre mang lo hi ani a. Ni danga motor chuan rei ti êm êm ṭhin khân, reilo te chhungin kawng chanve kan lo thleng hman der ani tih ka hriat chuan mak ka ti reuh hle, chuan hrehawm tihna ka nei miah lo bawk. Kan lut fel a, driver chuan tunah chuan lengzem lamah aw niang tia radio herh riin kan tlan leh ta vang vang a. Mut chhuakin mi rawn zem zuia kan hla play ri pawh chu ka hre riai riai chauh a ani. Vanlalsailova'n
'Hun herin', tih hla lungkuai zeta a sak kha ani tih chu ka hria, lung a len hle a ni.
(2004)
A awm loh hlan chuan a in chu ni 1 danah ka tihfaisak thin a, lehkha min rawn thawn ṭhinah ka hriat ngailoh thil tam tak, ho tak takte leh ril tak tak a rawn thai fova. Ka hriat ve ngailoh tur thuruk vanga a chhungte remtihna ngeia he lama rawn awm leh khawpuia piang leh seilian anih vanga hringnun ala tem ngailoh hriatthiam tuma thingtlang khera awm duh anih thute min hrilh a, mak ka ti telh telh mai. Ka ngaihtuahna tibuai em em tu chu thla khat hnuah Aizawl lama min pheisan tur thu min hrilh chu a ni. Tunah mel 10 vel awrhin kan inhlat a, hrehawm ka ti ania, Aizawla a let leh daihin engtin nge ka awm ang, ani lahin engah mah a ngai awm der si lova.
Kâr tawpah chuan a rawn haw leh a, pawn a chhuak khátin rual a pawl tlem ta hle a. Kohhran pawh a bel khat ta hle, a chhungte vang em ni ang aw tiin ka chhut ve neuh neuh thin. Engmah ka zâwt ngai lem lo. Kan awmdun ṭhin hian min ngaina ve hle tih chu ka hria, mahse keiina ka duh ang hian ani ve lo. Kâr khat chhung chu kan inhmu tlem hle a, keiin ka ngaiin ka thlahlel êm êm a, be hmasatu nih leh chhan hriatlohva tihbuai ka inthlahrung si. Ka naute chu chhuanlam siamin ka tîr thin a. Enge a tih thin tiha ka zawhin hna a thawk aniang, lehkha te a ziak reng zel tih bak an sawi vak ngai lo.
Ni sarih chu kar lovah a liam thuai a, keipawn ngai hle mah ila tihtheih neia ka inhriat loh avangin ka ngaihsak em em ta lo.

Chawlhni tlai inkhawm ban ani a, kan inah lo kalin len chhuahpuiah min rawn sawm a, Feli pawh atel lo.
Ṭhalai pawlin zaihona an neih avangin an reh diak a, Saron tlâng pawh a ngawi veng veng, thlifim thaw heuh heuh leh thereng hram ri raih raih chauh lo chu hriat tur a awm mang lo. Lungpui ding chu nghengin kan ṭhu dun a.

"I rawn kir leh angem? Kan ngai ngawt ang che, i châm rei lo ngawt mai", rei ngial kan ngawihdun reng hnu chuan ka ti chhuak ta phawng a.
" Ka sawi lâwk thei bik lo, kei tak hian ka ngai ang che, nangmah, Emma, ka ngai ngawt ang che", a sawi zawh rual chuan min rawn fâwp ta thut mai, ka inring hman lo.
Ka mipa fawh hmasak ber ani a, ka zei em ka hre lo, amah chuan chêt a la a, ka thiam angin ka chhang ve mai chauh a ni. Rei tak ka lo nghah thin, ka lo suangtuah ruk ve veng veng thin, a hmui thianghlim tak chuan dim tein min rawn bia a, kan sawi ngailoh thu tam tak a rawn sawi a ni. Rei ngial kan infawh hnu chuan a aia thui kal a tum lo, min vawnna thlahin ka mal khamin a rawn zál ta zawk a.
Tihian ka rilruin ka bia a,
_Hming, kar khat chauh a awm tawh asin, i kianga ka awm reng chunga ka ngai em em che hi ka hrethiam lo, ka hmangaih che tihna ani angem? Min kalsan hun phei chuan ka va mal dawn tak em? I tan chuan i thingtlang zinnaa thiantha pakhat ve mai ka ni awm si a._
Tlai ni tla tur chuan khua chu a kah eng phêt a, a mawi dangdai hle. Ni zung chuan Hminga hmaiah chuan a rawn chhun a, a hmelah chuan ka hriat ve loh thuruk tam tak a inphum ru ani tih a èn chhuakin ka hria.

_Hei hi em ni an sawi thin hmangaihna chu! Hmangaih ka nei dawn anih chuan Hminga hi ani ngei ang. I tan hian enge ka nih ve ang le? Ka tawn aṭang che thla tam pawh ala ral lova, mahse hriatthiam phak bâkin i zùnah uaiin ka intulut ta si! Hminga, ka hmangaih che_
Ka rilru chu hre ve ni awm tak hian ngainatawm em emin mi rawn nui seih a.
(2014)
~ Ka suangtuahna ata chu tlai ni tla tur chuan mi rawn chhun harh a, kha mi ni a ni tla tur kha ka rilruah a rawn fiah leh uar uar mai. Thing leh hnim kan tlan pel fua fua a, a kár aṭang chuan ni zungin a rawn chhun ve nak bawk. Chung kan tlan pelh tâk thing, hnim leh tláng pàwngte chu chak em emin nunhluiah an liam a, inhmu leh ngei ang aw ti niawm hian min rawn thlah ni hian ka hria a. Aizawl pawh kan hnaih ve ta hle tihin kawng laklawhah chuan kan motor a chiang lo tlat mai a, passenger kan chhuk vek a. Mipa lamin an check hlawm a, hmeichhe lam chu kawng dungah te chuan kan tei khawmuang a.
(2004)
Min hawsan nân ni thum leh zan hnih chauh a awm ta. Ka thâwk tinte chu ka chhiar vek emaw tih mai tur ani, hun a thlawk liam zung zung a, ka ngaina tulh tulh si. Zan dar sawm pakhat a pelh tawhah hian
"Emma, emma", ka mutna zawn bang phen atang chuan ring silo hian a rawn phun bul bul a. Hminga a ni tih ka hre mai.
Ka chhungte hriat hlau takin ka tho vat a, ka chhuak nghala.
"Tun ang zan tlaiah enge i rawn tih, i mawl ta em ni? Awi, i rui elaw, i rimchhe bawk si?", thinrim leh ngaihsak aw chungin ka vin a. Engmah sawi lovin a in panin min kai phei a, tan ka tum lem lo, ka zui ve mai a. Ka ring tawk a ni engtiang pawhin awm se; mahse ka ring mah mah lo maw, ka ring sual angem tih ngaihtuah leh chung chuan ka ban ka vai thla a.
" Enge i duh, enge i mamawh chu sawi phawt rawh", ka vin hlek a.
" Nangmah, Emma. Ka khua ahar ani, min hnèm turin ka mamawh che", rui si ah chuan a aw a fiah kher mai.
Kan in kai lut nawk nawk a, thutthlengah ka muta, hrukpuan huh ka hru fai vêl a. Kan ngawidun vang vang a, chutah tape awmna lam panin cassette pakhat a la a, a play ta a. A zai ri rát rát a.
"Emma, i lámdun ang hmiang", ka vawn hun nghakin a kut a rawn dawha, ka nuih a za lek lek. film chang ang mai kan ni, a khawhar hnem nan tiin ka vuan a. Chu rimawiah chuan muangchangin, kei eng làm mah thiamlo chu min chhai kual vel a, ka mit ka chhing a, min pawt hnaia, ka thlawk delh delh hian ka hria. Chu zan reh takah chuan zan hram ṭhinte pawn min tihbuai an hlau ani mahna, an ngawi thiap mai.
Ka taksa a rawn lum tana, a insum theilo hmasa zawk ka nih hmel, ka pawm nghet chawt a, hmeichhia zawk ka nih dahthain zahtheih loh chhuahin ka fawp ta vawng vawng a, min rawn chhawn a. Duh ve ve chu lungrun takin kan infah tawna, a rui zual chu a reh daih tawh a ni, a zu rin nam chhak te chuan ati itawm zovin ka hre lehzual a. He khawvelah Hminga nen chauh hian kan awm emaw ni, thildang rêng rilruah a lang lo. Hminga, mipa harh ve tak leh tawngduh ve zet thin kha ni lovin, mipa cool tak, ṭawngkam avang aia taksa ngainatawm alo nih tak siah chuan. Kei erawh hmeichhe zahawm leh invawng tak ṭhin kha ka nihna chu thaibo vek ang ani, taksa inngheng renga awm chu kan tawp thei mai lo, khum lam ka pan sana, fimkhur tura fuihna tam tak ka dawnte khan min veng zo lova, ka hmangaihna leh amah ka thlakhlelhna chuan min phuar hneh em ani. Min rawn panin min rawn fawp leha, ka vawi khatna ni mahse zirtir chawp ngai chu ka lo ni bik lo. A kawr phelhsak ka tum a, a phal lo.
" Ni lo, Emma. Hei aia thuia kal ka duh lo, hrethiam hram la aw", ka beng bul seta rawn sawiin a ṭhu fel a. Mak ka ti kher mai, hmeichhia zawk dan ngaia ka awm chu ka zak bawk a, muangchangin ka tho sawn ve a.
" Tihpalh, Hming. Hetiang hian ka la awm ngailo asin."
"Ka hria. Emma, pa lo min ti anih pawhin a pawilo. Kan hma hun ka hre lawk si lova, i natna thlentu nih ka duh lo, engmah ka tiam thei silo che a. Mahse Emma, ka ngaina che, zanin chu min awmpui rawh aw."
Khumah ka mu a, a ni thutthlengah; kan inbe sep sep a, hriatloh hlanin ka lo muhil ta ani ang. Ka harh chuan ni alo chhuak der tawh a.
" Lalpa! Hming, ka tlai lutuk, engtin nge ni ang? ", Ka hlauthawng takzet a ni.
"Feli ka va ko ang e, tikhan lo awm la"
Mi ten an hriat ka hlau a, a kal hlan chuan ka ngaihtuah lêt a, zan lama ka chêt dan chuan min tizak hle; mahse chhungrilah ka hlim ru em em si.
" Engmah a thleng em lo ti raw", nui hak chungin Feli'n a ti a. " A lan dan ang hi ani lo ania, nizan ka ruia, min riahpui turin ka sawm ringawt alawm", mi rawn chhan vat a. Feli chuan min ringhlel lo. Mahse kan haw tur chu in neituten min lo hmu hlauhva, ka nu leh ka pate an lo tho tawh bawk nen insawifiah mah ila an rin ka ang ta lo.

Chu mi ni chuan chhungkuain min zilh a, khawtlang a fan chhuak nghal a. Ka va han zak si em! Feli chauhin min hrethiam a, lo kalin min hnem a, amah kuahin ka ṭao zawih zawih anih kha. "Mite chuan hmeichhe khawlo takah min ngai ngei dawn si a, ka lo fimkhur lo mah mah ani",tiin ka inchhir thu ka hrilh a.
" Bawihte, ka hrechiang che alawm. Lungngai suh, tuman an sawi zui reng peih lovang."
" Fel, ka tan i awm hi, ka va han lawm em!"

Ni hnih leh zan khat a liam a. Zan khat leh ni khat chauh a awm ta. Ka chhungten chhuah an phal lova, Hminga a rawn lang miah lo bawk. Rilru na leh lunglengin ka inkhung ringawt mai ani. Zanriah eikham ah chuan
" Ka nu, ka pa, ka tihpalh takzet ani; mahse mualphothlak khawpin eng thil thalo mah kan tilo ania. Naktuk tlaiah Hmingan min hawsan tawh dawna" tiin ka insum theilo tah ka rual a, ka nu awmah beiin zah dawn lovin ka insut hreih hreih a.
Min rawn kuah chung chuan", Aw! Bawihte, a van pawi ve, i sawi vat si lova engmah kan lo hre ve hleinem," ka nu aw dam diai ka hriat chuan ka lung a chhe zual a.
" Nu, pa, ka tiam a che u, thil tha lo a thleng lo. Ka ngai dawn em ani. A khawhar hnem turin riakah min rawn sawm ru a lawm".
" Anih chuan, nute, bang tawh la. Nula tan tah reng a mawi love, kan hrethiam che a alawm. Mahse mite min ngaihdan tur thlir ve te hi angai a, fimkhur a tul em avanga in hau thin kan nia lawm. Kan lo hau na deuh ceh anih chuan kan tihpalh ani e," ka pa pawn min rawn hnem a.
Zan hnuhnung ber ani ta, zan lai pel tawh mahse ka muthilh zai ka rel thei lo. Ka ngaihtuah a, tlang rel zawng zawng aia tawrh har ka tih zawk chu rinai hmaa Hmingan min hawsan tur chu ani. Ka lung a leng lawk lutuk chuan ka lukham chu pawmin ka tah huh hnuang anih kha.
A tukah chuan tukṭhuan ei khamah Feli nen kan inah rawn kalin tlai lama chhuak tur anih avangin Lawngtlai lam a pan angaih tawh thu an rawn sawi. Kàwn thlenga thlah turin min rawn sâwm anih chu.
" Ka ngai dawn hle mai che", a ti bul hmuk a.
" Engtikah emaw tal rawn let leh la aw, Feli te phone ah i rawn call thei a, lehkha pawh min rawn thawn thei bawk a, min reh san daih lo la aw"
Ka kut a rawn hmer a, ka chalah a rawn fawp zeuh a.
"Mangtha, Emma", a nui saih a.
Kei erawh ka nui der ve thei lo, "Ka hmangaih che, Hminga, ka thinlung zawng zawngin", zah zo lovin alaka ka thurûk vawn reng thin chu ka hlan ta anih kha.
Motor a nung a, an tlan liam tur chu a rawn hawi let lo, Felin a vai liam a, ka mitah chuan thlahna mittui a tling thung.
Lunglêng rêng rêngin ni ka vui liam a, a lo phone hun ka nghak a, lehkha thawn dawn beiseiin nitin ka nghak thin. Engmah ka dawng ngai lo. Driver Sawmtea lahin ṭha taka an thlen thu a sawi si. Ni a liam a, kár a tâwp a, thla a ral a, ka beiseina a chau tial tial a, nep ka inti ngawih ngawih a ni. Hminga ka rinna chuan min tina a, ka ring lo phal si lo; mahse, tinge min rawn ngaihsak miah loh theih zâwk le. Min ngailotu ngaiin ka khua ahar a, mi te min ngaihdan a khawlo bawk a, zahthlâk ka tiin ka nun chu hrehawm ka ti hle a. Hminga ka ngaihna chuan ka chhungte min hlattira, ka chhuak khât hle, mi pakhat avang chauhin nun hi ka ning ngawih ngawih ani ber.
Ka chanchin chu mak tak taka an sawite pawh ka lo hre ve leh zel tho bawk nen rilru ana ngawih ngawih ṭhin. Hminga pawh a chang chuan ka haw em em a, ka hua tih reng a hre pha dawn si lo, min theihnghilh tawhin Aizawl khawpuiah chaun nula chhelo tak takte nen hlim takin an leng ho ngei anga_ tih tein ka inngaihtuah lunghnûr thin. A address engmah kan hre lo, Aizawl tih chauh lo chu, tinge engmah kha ka lo ngaihtuah thui loh le aw?

Ka chhûngte chu ka tán an awm renga, thiante pawhin min hual reng ṭhin. Kum a tâwp dawn a, Krismas pawh Rinhlua te hoin kan hmang a, nun chu apangngai chho ve leh ṭan a. Chungrilah erawh ka hmangaih hmasa ber Hminga a cham renga, kan sulhnu te ka fan lêt changin amah min hriatchhuah tir fo thin. Mahni chauha chhun ni len changte hian a thil min pek Walkman kha ngaithlain mite hriat ve lohin ka dawn a, ka suangtuahna ah ka lo cheng leh veng veng thin. Kum a vei meuh chuan theihnghilh tumin ka ingaihtuah tha a, a hla ka ngaithla tawh ngai lova, hrechhuak tawh lo turin kan sulhnu awm zawng zawngte chu ka tlansan zawk a, tlaini tla tur pawh ka thlir ta ngai meuh lo, a hla thei ang berah ka tlansan a, a thuk thei ang berah ka phum ta zawk a. Rinhlua khan ka tan ṭhat a chhuah êm êm a, ka mualpho hnu pawhin min la ngaihsak reng ṭhin, ka ngainat zâwng nilo mahse, a chungah ka lawm êm êm a.
(2014)
Darkar khat meuh kan chawlh hnu chuan kan tlan leh a, thim hnuah khawpui chhung kan tlan lut ta a. Aizawl chu alo eng tuar mai, ka lo ngaihruat thin ang aiin alo mawi daih mai, zan anih vang pawh ani mahna. Ka ní ten an sawi fo Mellinium kawtah min lo hmuak a. Ka níte pawh ka chungah an ṭha êm êm a, mahse mo anih zâwk avangin leh kan inchhûng khat dan a hlat deuh avangin pawhin keimah ka inthlahrung êm êm ṭhin zâwk, in lamah pawh theihtawp ka chhuah ve bawk a.
Ka ní thiannu Designer pakhat Amawitei hnenah privatein ka zir ve tanin, a hna ka pui nghal bawk a. Ka zirpui tam zawk chu kei aia naupang deuh vek ni mahse nuam ka tiin ka thiam châk zawng tak a lo ni bawka, taima taka ka beih ṭhin vang pawh chuan min duhsak hle. Aizawl ka awmna pawh thla nga lai alo liam ve ta a, mobile phone ka nei ve tawh bawk a, ka chhungte nen pawh kan inbe ve zeuh zeuh ṭhin. Khawpui nun pawh ka man thiam ve ta hle a, acháng chuan kan khawlam pawh ngaihtuah hman meuh loin hun ka hmang liam ve thin.
Vanduaithlak takin ka ni chu a damlo serious hlauh maia, damdawiinah ka hruai a tul ṭhin a. Inentirin ni thum azáwnin kan kal a, kar khat hnua result lam leh turin in lamah kan inenkawl leh ta a.
Kár khat hnuah, Damdawiinah chuan ka ni inentir pawnah ka lo nghak leh a. Hun khawhral nan phone ka khawih melh melh a, ka nun a rawn call a, ka nu nena kan inbiak lai chuan _wheelchair_ hian mipa pakhat lukhum dum phiar khum hi hmeichhiain a rawn nawr a. Ngaihsak lemlo chuan ka hawisawn a, mahse hriatchhuah ka nei tlat. Ka hawi let zawk a, a mal chunga lehkha bu awmah chuan ka hming inziak ka hmu tlat, ka chiang ngam chiah lova, chu pa mitah chuan ka en nghal a, mi rawn en ve chat bawk a. Chutah boruak chu a tawt up a, ka thawk a tawp chawt a, hun hi a ding ta emaw tih mai turin ka mitah chuan engkim mai chu an che muang em em vek a. A ni, Hminga ngei ani; kum sawm liam taa a hmel kha chu ani tawh lo, a mit mengah erawh chiang takin ka hria ani. A hmaiah hmul a khat nuk a, a hmel erawh la tha em em a, patling hmel takin a ṭha ani. Eng vanga hetia awm nge a nih a, beiseina zawng zawng a bo vek tawh hnuah tinge hetiang khera kan intawn leh tak!
"Hminga!", tim tak chungin ka kova, min hre awmin a awm lo.
"Hminga, hminga ini tiraw? Min hre lovem ni?" tih pahin a nawrtu chu min chhan beiseiin ka en a. Aw tiin a bu nghat a.
Chutah ka inring hman lo, dan rual loh ka mittui rawn tlingin a rawn luang a. Enge ka sawi anga enge ka tih chuan ang, rei tak ka hmuh tawh loh, theihnghilh tawh emaw ka intih thin kha tunah ka hmu a, ka thinglung atanga ral vek ta emaw ka tih khan ka mittui a luantir leh thei ania, ka hmangaih hmasa ber khan, ka thinlung hi alo la luah reng ani maw.
A nawrtu chuan hrethiam niawm hian min rawn kuah a, zah pawh dawn lovin ka tap feih feih a.
A ziaawm deuh hnu chuan Hminga chu ka en a, ani chu a rawn nui saih a.
Ka thin a rim dawn nge ka hlim dawn?
" Sual viau suh aw", ka mit mengah chuan zawhna tam tak a awm tih a hrethiam ngei ang.
Engmah sawi lèm lo chuan a lehkha ken chu a phek tawp ber keuvin ka chhiar turin mi rawn pe a. Hei hi a kutziak ngeiin a inziak a,

" Tunah zet zawng, hlat tur chein ka rilru ka siam fel thei ta. Min ngaidam la, i nat ka duh loh vang ani.
Ka ta ini thei ngai dawn lo tih hi i kianga ka awmin ka theihnghilh leh ṭhin. Ka zawn ṭhin nun hlutzia min hriatfiah tirtu ini; i kianga ka awm chhung reilo teah khan he khawvel hi hnung chhawnin ka khawvel i rawn ni a, nun thar min rawn siam a sin.
I hmangaih tlak ni ve lo hi min Khawngaih la, min kaltir rawh. Aw! Ka mit mengah tal hian hrethiam ve la, i hnenah ka sawi ngai loh tur thuruk leh i hriat hlauvin ngainatna nen ka thlir reng thin che tih hi. I duhthua i chelh ni si lo hian, i thlah hun nghakin a vuan che a, châm tura i ngen ni silo hian kaltîr tur chein a ngên si che anih hi.
Ka hmangaih ang che. Kumtluangin, Emma"



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)