MIN CHELH RAWH BY Notei Sailo Mk

Ngaia
Site Admin
Posts: 25813
Joined: April 30th, 2016, 4:07 pm

MIN CHELH RAWH BY Notei Sailo Mk

Unread post by Ngaia » September 1st, 2019, 10:09 am

ebpyxaq9.jpg
ebpyxaq9.jpg (27.82 KiB) Viewed 7253 times
MIN CHELH RAWH
(Competition 2019)

Ziaktu-Notei Sailo Mk

"Saw ka star a lo kal, a chhe lo asin," ka ṭhiannu, Ruati chu ka hrilh ru sar sar a.

"U Kima saw maw?" A tih chuan ka lo bu nghat a. "A duh ve chuang lo ang che," a sawi zawh rualin ka nghawk nghal sawk.

U Kima te hi an khawsa theiin an awm thei em em a, keini ang cho phak rual a ni lo tih hre rengin ka vei em em a; School Principal niin a neitu a ni nghal bawk. Pa sang leh lian ṭha ve tak chu a ni, a thau lo a, a cher hek lo; a taksa ruangâm a dik thlarh bawk nen nula lamah pawh a tla na a, zar buaitu a nei âwl lo. Ngaihzawng a neih awm erawh ka hre miah thung lo.

Kei hi Malsawmi ka ni a, ka pa fanu duat, naupang ber ka ni. Unau pathum lek kan ni a, ka u te ang lo takin ka ṭawng duhin ka harh fâl bik hle. Ka sân zawng erawh ka chhuang fahran lo khawp mai, feet nga ka tling awrh chauh a; college-ah kalin kumin hi ka chhuah kum a ni a, Pathian zarah zirna lamah ka tluang a, ka fail ngai bîk lo.

Ruati, ka ṭhiannu cool em em nen kan inzui haw hnak hnak a. Ka thu sawi kar laka a lo ṭawng zeuh tih loh chu ngawi rengin ka titi a lo ngaithla a. Hei hi a tih ṭhin fo dan a ni a; ani hi zawng mi cool râih, ṭawng tam lo kha a ni miau a!

Kan ṭhian ho a kan awmkhawm hian tlêmin a ṭawng duh ve deuh ṭhin. 'Ṭhian ho' tih lêmah kei leh Ruati, Sawmtea kan ni deuh mai. Anni pahnih hi ka thu rûk engkim hretu te anni a; Ruati nen hian inṭhenawm kan ni a, Sawmtea erawh vêng hranah a awm thung.

In ka thlen chuan ṭhutthlengah ka ṭhu nghâl hnak a, khâ programme boring zetah khan u Kima kha lo kal ve lo se chu ka haw ru daih ang. Kohhran khatah lâwiin hmu fo ṭhin mah ila ka en ning ngai lo. Ka inkhawm tur te hi ka phur sârh zel!

Kohhran leh YMA-ah a in hmang hle a, a theih phawt chuan a tel ngei ngei thin. Kei erawh inhmang em em lo mah ila, rual pâwl tâwkin ka tel ve a ni deuh ber; chanvo ka neih ve chhunah erawh ka theih phawt chuan ka tihlawhtling hrâm ṭhin.

Zanin aṭangin kan bial chhung ṭhalai intawh khâwmna kan ṭan a, Ruati nen phûr takin kan kal ve a. He intawh khâwmnaah hian intih hlimna ni pah fâwmin in-elna chi hrang hrang an buatsaih a, kan kohhranin kan thlen dawn vângin kan buai ve viau.

U Kima'n min rawn koh chuan a lam panin ka phei vat a, ka rilru tak chuan min ko ringawt pawh chu ka hlim veng veng mai. A bul ka thlen chuan min lo en char char tih ka hria a, ka lâi ve det.

"Ms, solo competition-ah i tel a ngai, zâi tura kan tih kha harsatna a neih vângin a thei lo hlauh mai a, khawngaihin tlawmngai mai ta che," a tih chuan ka thin a phu dup dup a, U Kima'n khawngaih min dil a nih chu! Ka ngawih reng avang chuan, "I thei ang tiraw?" a rawn tih zawm leh zat a.

"Â, ka hre lo, ka zâi thiam hleinem,"ka ti bah nak a. 'Zâi thiam' tia sawi tur ni lo mah ila zai chu ka zai ve ṭhin.

Competition-a tel ka duh loh rualin u Kima min ngenna tih loh ka hreh bawk si, ka rilru a insual buai nuai nuai a ni ber.

"I thei tih ka hria, he mi hla hi sak tur chu a nia, lo en la," tiin lehkha min pe a, ka en vang vanga ka thiam sa a lo ni hlauh a, a tih zia phian.

"A hângin em ni zâi tur? ka'n ti leh hram a(h)

"Ni lo e, guitar nen tur a nia, kan pahnihin tihna a nih chu," a rawn tih chuan ka huphurhna zawng zawng kha a bo vek. Amah nen maw? Awi! Nuam dawn lutuk, ka khi ver ver mai. Chawpchilh viau mah se a ni nen anih chuan kan zâi poh a ni ang chu.

Kan zai hun a lo thlenga u Kima dawhsanah a lâwn a, a hnungah ka zui ve det det a. A palian si a, ka tê bawk nen pafa kan ang ngawt ang. U Kima chuan guitar chu a perh ṭan a, keia tan chuan ka lo sak fo tawh anih vângin mit chhing diar diarin ka sa thei nghal mai a. Ka hla saka ka chên tak tak hi chuan ka meng ngai lo; ka zâi zo chu kut an beng dar dara u Kima paw'n min nuih suk mai, zâi ṭha ve viau chuan ka in hria.

Dawhsan aṭanga kan chhuk pawh chuan kan inzui thla leh dat dat a, Ruati bul ka thlen chuan ka zâi ṭhat thu leh pakhatna ka nih a rin thu a lo sawi ve sap sap a. U Kima erawh ka hmu zui tawh miah lo.

Kan programme a zawh chuan Ruati nen kan haw hnak hnak a. Biak in hnaih viau lo mah ila lirthei lek chhuah kan peih loh vang chuan ke in kan kal mai ṭhin; bâkah ke-a kal nuam kan ti hrim hrim bawk.

Kan bula motor lo ding chu tu ta nge tih zawh hran ka ngai lo va, ka chiang lutuk tlat. Glass down-in, "Ka lo thlah ang che u," amah u Kima ngeiin arawn ti a. Kei chuan chuan nghal mai ka duh deuh rum rum. Mahse...

"A ngai lo mai, kan lâwm lutuk," Ruati rawn ṭawng chu ka en hâ a, ka ngei ber ṭum a la ni hial ang.

"A tlai tawh si, hmeichhe tan a him lo, lo chuang r'u, in in lamah kal ka ngai tho a," a tih chuan kan chuang ta nge nge a; nuam ka'n ti leh mai mai khawp a.

'Âw, min han duh ve mial mai se,' ka thil ngaihtuah avang chuan ka nui sak a, front mirror aṭangin min lo en reng chu niin, lei ka chhuah khum teh ngawt. A la nui ang suk a...

In ka thlen chuan ka inthlaka mut pahin ka online zuai a, number hlang ringawt aṭang chuan, "Zanin kha i zâi thiam lutuk," tih ringawt lo awm a. Tunge tih a dp ka en chuan u Kima lek lo niin! Ka hlim bawk si chu ka au chhuak lo chauh.

"Ka lawm e, nang pawh i tum thiam lutuk" tiin ka va reply nghal a. Ka ngaituah a, "I tum thiam," ti lovin "I ti ṭha lutuk," lo tih zawk tur a nia. A music thiam zia kan bial chhungah chuan kan hre vek si a. Â inti lutukin ka inhau mawlh mawlh ringawt.

"Kan ti ṭha ve ve, naktuk kha lo kal r'u aw," a rawn ti leh a. Naktuk hian outdoor games lam tih tur a ni a, zanah result puan a ni dawna ka huphurh ngei mai. "Aw le, kan lo tum dawn nia," tih chauhin ka chhâng a.

Chuta ṭang chuan kan in be ta zeuh zeuh a, mi zingah erawh pawimawh leh ṭûl a nih loh chuan kan in be ngai lo. Meet kan zo a, u Kima nen pawh lawmman pakhatna kan la nghe nghe.

Hun a kal ve bek bek a, kan in be tam tial tial a, min duh thu a sawi dawt lo nain min hnar bik lo tih ka hre ve kar. Kei lahin ka duh thu hrilh hmasak ka tum bîk der lo.

Dârthlalang hmaah uluk takin ka insiam mawlh mawlh a, ka hmaiah make-up tlemtê ka hnawih ve a, ka thawmhnaw te thlâkin uluk mangkhengin ka in en leh; nalh chu ka in ti ve viau mai keima tawkah. U Kima'n chhuahpuiah min sawm a, a vawikhatna a nih vângin in uluk kha a ngai miau a lawm.

Ka nu'n min rawn koh chuan room aṭangin ka chhuak nghal a, u Kima kan sitting room-a lo ṭhu kur chuan min lo en renga ka lâi lutuka ka biang te a sa hat hat mai. Ka nu bulah kan chhuah dâwn thu ka hrilh hnu chuan kan inzui chhuak ve nghal a.

Durtlang lamah min tlanpuiin tlêma fâl deuhah chuan in pakhat a lo awm a, a hmun chu a thawvengin a nuam takzet. Tu in nge tih ka ngaihtuahna chu lo hria ni awm takin, "Kan in pakhat zawk a nih hi, chei ṭhat kan tum a," a rawn ti a, kawngkhar lam min panpui a.

Inchhung kan lut a, a faiin engkim mai chu uluk taka enkawl tih a chiang reng. In lian tak ni lo mah se a nuam tawk em em si. Thli fîm lo thaw heuh heuh chuan hah ati dam sawng sawng mai a lawm.

"Lo ṭhu la, in tur i duh em?" ati nghal zat a, a hmel hmuh a hahdam thlak hle.

"Duh lo mai, in in nei nuam hle mai," a nuam ka tihzia ka thup seng meuh lo a ni e.

"Ka lawm e," ti supin choka lam a pan nghal a.

Banga thil tar vel chu ka en kuala a nalh hlawm ang reng, thlalak hlui lam pakhat, an chhungkaw thlalak niawm tak hi lianpui a intâr bawk. Chu thlalak ka en vang vang chuan ka nu ang deuh ka hmu hlawl mai! Ka nu emaw tiin ka en chiang a, "Â, ka nu chu a ni thei lo; mahse, an in ang hle mai," tiin ka phun sap a.

"Eng nge i lo phun sep sep a," tih ri ah chuan ka phu zawk, ka hnung lawkah a lo awm chu niin, chuan min hnaih mah mah bawk.

"Eng ni lo e," ka ti liam puat ringawt a, ka kut a rawn vawn chuan a lamah min pawt phei a, a awm ka su chawrh lo chauh. Ka thinphu chu rang tak a ni! A phu chhuak nawlh ang tih ka hlau hle bawk, Chhuah tum chuan ka tal laih laih a, "Tâl tâl suh," ti supin a aia nghetin min kuah a.

"Ms, ka duh che," a thu sawi vang chuan ka tâl lâi ka tawp chiang ngei mai. Ka hre sual a nih ringin a hmel ka'n en chu min lo melh chhuk run mai.

"Maw?" Ka ti deuh hû, ka mawl hmel viauin ka ring a ni.

Nui suk chung hian, "Ka duh che, min chhân nghal kher pawh a ngai chuang lo a nia," a tih zawm zat a. Ka zak bawk si, lawm bawk si chu awm ngaihna pawh ka hre lo, ka mumangte pawh a ang rum rum lawm le...

Zanah chuan vawiina kan hun hman dun dan ka ngaihtuah lêt neuh neuh va. U Kima khan min duh thu a sawi a nih kha, kei mahin ka'n nuih vur chu le, chhâng châk viau mah ila a chhungte hian min pawm kher ang em? Â, ngaihtuah lo zâwk teh ang.

Kar hnih a liam meuh chuan u Kima nen kan inzui fel der tawh, duh viau mah ila a chhungte vangin chhân loh ka tum kha a nia; mahse, ani chuan, "ka chhungte ni lovin kei chauh min en rawh, keima'n a lawm duh che," a tih tlat vângin ka chhâng ta chauh kha a nia.

Ka hlauh ang ngeiin a chhungte'n an hriat meuh chuan min pawm lo chiang teh e, phone call leh inbox-ah te u Kima kalsan turin min ti nasa ngang mai. Mahse, u Kima'n amah chauh en tura min tih vângin ka palzam mai mai rih a ni.

U Kima nen kan inzui aṭangin Sawmtea'n min kawm ṭha duh lo a, a ngaihna pawh ka hre lo. A in la hrang tlat mai a, a tirah chuan kohhranah a inhmang ve sia, a buai nih hi ka ti mai a; mahse, a lo ni hauh lo mai! A chhan erawh ka la zawt chhuak tho ang.

"I fanu hi veng ṭha rawh, ka fapa lo zui tawh suh se," tih thâwmah chuan ka harh chiang ngei mai. Tu nge a nih zawh ngai lovin u Kima nu a ni tih ka hre nghal mai a, "Nula leh tlangval an ni tawh lawm," ka nu chhânna avang chuan ka nui suk.

Thinrim anga lang duh si lovin ṭha takin a chhâng a, chu chuan u Kima nu ati thinur zual sauh tih ka hria. "A ṭhen lo a nih chuan eng nge ka tih theih chu i hriat kha, tun hma ang a ka chet a ngaih loh hrâm ka beisei," tih leh kawngka inkhar ri ṭhuai chu a inzui zat a.

Eng nge a sawi kha? Tun hmain an lo inhre tawh ṭhin maw? Makti tak chung chuan Room aṭangin ka chhuk thla a, ka nu chuan ṭha takin min lo bia a, a dan ngai tê in min fuih leh nghal seuh seuh a.

Ka ngaituahna a buai map mai, ka nu leh u Kima nu chu tun hmain an lo inhre ṭhin tih a chiang ngei a, eng tak ka nu chungah ti ang maw? Ka nu ka zawh chuan min hrilh duh lo ngei awm si a.

 ngaihtuah tawh lo teh ang.

(Kârkhat hnu-ah)

"Sawmte, lo ding teh," thaw hlawp hlawpin a bul ka thleng a.

"Eng ati nge ka lak aṭang hian i inlâk hran tlat a? Ruati i be reng tho a, min biak ve ngai Ioh a, i thin ka ti rim em ni?" Ka zawt nghal zung zung a, ni danga atih dan angin min kalsan leh mai ka hlau a ni.

"Ka buai lutuk a," tih zawngin min chhâng! Ka va'n ngei mai mai tak.

Ruati a be hman tho sia ka lungawi lo ve viau a ni; lunghnur deuhvin class lam ka pan a, Ruati a lo kal lo nen Sawmtea a inla hrang bawk a, ka mal ngawih ngawih.

Class kan ban chuan mahni tê-in ka kal hnek hnek a, u Kima pawh vawiin chu min la rawn be miah lo! A reh vawng vawng a, thla thum lai kan inzui ve tawh a, a chhungte erawh an nasa tawlh tawlhin a pawngpawrh tulh tulh a; chhe tin rengin min puh a, engah mah ka ngai duh lo. U Kima'n amah chauh en turin min ti a, ka palzam thei zel.

Ka thil hmuh avang chuan ka kal lai chu ka ding chawt. Ka kut ka hum ngar ngar, U Kima leh hmeichhe pakhat dawr aṭanga lo chhuak chu ka en ngawt ngawt a, an hlim tih a hriat! A bânah hmeichhia chuan a vuan a, a chhe lo hle bawk. Duh tih hriat taka u Kima a melh te chu ka thin ti rimtu a ni, a lo hetih vang a nih hi vawiin chu a reh em em ni!

Ka en reng lai chuan u Kima chuan min rawn hmu ta a, a meng deuh kâwk a; mahse, min kal pel ta tho.

Ka rilru na lutuk chu ka biangah mittui a lo luang thla nghal a, hruk buai pawh ka tum lem lo. Ka khaw hmuh a phê ruaia engtin tin emaw in chu ka thleng ve hrâm. Khuma bawk thlawp chungin ka ṭap khur der der a, kei hi bumin ka awm, phatsan ka ni! Ka âwm a rawn tâwt up up a, ka thaw a chham dawn hialin a nia ka hriat...

Ruati a lo phei a, ka hrilh chuan a thinrim kher mai. "Eng tin nge a tih theih zawk? Keima'n ka lo bia ang," a tih chuan ti lo turin ka hrilh vat a, a lung a âwi lo kher mai.

Ka ṭhian nu cool lutuk tak ngial pawh, ṭhu hle hlê thei lovin a vei tawn sek a, hetianga a thinrim hi ka la hmu ngai lo.

Zanah chuan u Kima'n a rawn call a, ka la duh bîk ta lo.

A rawn tih nawn tâk sekah chuan ka switch off ta ringawt a. Chaw ka ei thei lo a, zan pawh ka mu meuh lo, ka ṭap tlaivar a ni mah zawk.

A tûkah peih lo tak chungin ka tho a, ka lu a na bur mai. Ka phone ka'n on tê tê a, missed call a lo awm nual, u Kima aṭang vekin a ni! Message lo hnut chhiahin vawiinah min hmuh a duh thu leh thu sawi tur a neih thu vel a lo awm a. Kal ka tum lo ut ut nângin hetia ngawi renga tawp chu ṭha ka tih loh vangin kal tum chuan ka insiam a, Durtlâng lam pan chuan ka chhuak ta a.

An in ka thlen chuan door bell ka hmet a, kawngka a rawn hawng a, ka luh theih nan kawng min kian bawk a. Ka ṭhu fel chiah tihin ka ep chiahah rawn ṭhu ve nghalin ei tur ka duh leh duh loh min zawt a, ka duh loh thu in ka chhang a, eng mah ka ei châk lo.

"Tlang takin ka'n sawi ang e, keini pahnih hi kan tâwp a ngai a ni," a tih chuan ka na nawn awn awn ni maiin ka hria.Ṭap lo turin ka insûm hram hram a. Harsa ti tak chung hian, "Eng nge a chhan?" ka ti thei ṭâwk.

Ka ṭawng ring lo nain a hre thei tih ka hria.

"Chhan vak a awm lo, nupui ka nei dawn," a tih leh phei chuan min ṭhawng tak zet. Khang hun chhung zawng khan min lo kawp tihna maw! Aw Lalpa leh, hetiang bum hmang hi engtin nge ka lo rin theih zawk!?

"Ka lawmpui a che, ka kal mai ang e," tih leh thawh ka rual a,

"La kal suh," ka kut a rawn vawn chu thin thlâk ngial tumin ka beia ka hlawhchham chiang hle. Chutah ka natna chu thinrimna in a rawn thlak chuan a hmaiah ka beng sawk a, ka kut a thîp zawk mai.

"Min khawih suh, bumhmang khawih ka duh lo a nia," ka tih chuan thinrim mitmengin min en a. Ka la duh tawk mai lo, "Bumtu nih chu kohhrana i nihna nen pawh a in mil lo," ka ti leh hram a, ka kut chu a hmer na salh a, ka ṭawngkhum danah a lungawi lo tih ka hre mai. Ka hlau bîk lo.

"Ka nupui neih tur hi ka hriat lohvin ka chhungte'n an lo ti fel vek a, bâkah nang nen hian engtikah mah kan awm dun thei chuang lo ang," a hmel en aiin a ṭawng dam!

"Eng nge a theih lohna tur? I chhungte'n min duh loh vang maw? Nang mah berin palzama, engah mah ngai lo turin min tih kha? Tunah chhuanlamah i hmang dawn maw?'' ka ṭawng tawp lam erawh a chang fak.

"Ni lo e, sawi chhuak tu nih ka tum lo, i duh chuan i nu i zawt thei ang," a tih chuan, "Ka nu hnuk lût suh," ka lo ti hmak a, ngeiawm zetin a kiai suk ringawt.

"I nu sawn ka pa a ti na asin, i nu laka phuba lâk ka duh vang chauhin ka hnaih che, ni lo se nang ang mi tê lutuk hi ka duh tak tak che i ring em ni? Â lutuk mai," a tih chuan na leh tur chuang ka awm tawh lo. Ngawi rengin ka kut a vawn chu ka phelh a, pawnlam panin ka chhuak nghal a.

Ka scooty-ah lâwnin chst zetin ka tlân chhuak ta a; ka mittui rawn luang thla pawh hruk hul tum chuang lo chuan ka khalh mawp mawp a.

'Nang ang tê lutuk ka duh che i ring em ni? Â lutuk' tih leh 'phuba lâk ka duh vang chauhin ka hnaih che' tih chu ka rilru-ah a inrîk chhâwk tluk tluk a; ka mittui chuan ka khaw hmuh a ti fiah lo a, thil ri bur ka hria a, ka khaw hmuh thim ta riai riai te ka bula thâwm vel pawh chu a hla tial tial in ka hre bawk a.

Ka harh chhuah chuan ka chung zawn var vek ka hmu a, ka hawi kual a, damdawi inah ka lo awm reng chu niin!

Ka nu in min bawihsâwm nghal a, nu ṭha tak hi chu a va'n ni tak! Doctor a lo kal chuan hliamna lutuk ka nei lo bawk a, a tuka ka chhuah theih tur thu a rawn sawi nghal a. Ka accident dan ka zawh chian chuan kopang ka lo su chu niin! Scooty pawh a chhe nual a ni awm e.

Ruati leh Sawmtea pawh zan tirah an rawn lang nghal a, tlaiah lo kal an tum viau a, ka chhungte damdawi ina lo kal vek an duh vangin kan in lamah rawngbawl turin an lo va tir phei a lo ni a; ka nu, chaw pe in an lo kal a, min riahpui tum viau mah se ka nu in a remtih tlat loh vangin an haw leh ta kha a nia.

Sawmtea lakah erawh ka lungawi loh êm avangin ka be ṭha vak lo. Ani paw'n hrehawm a ti nge ni min be vak bik lo. Mahse, min thlir leh veng veng ṭhin tih ka mit sirin ka hmu vek.

Damdawi in aṭangin kan chhuak tawh a, mahni in nge nge chu a lo nuam e. Ka khumah chuan ka mu deng deng a, ka rilru-ah erawh nizan lam ringawt a awm thung. Ka nu hi engkim ka hrilh ṭhin vangin nizanah pawh u Kima nena kan chanchin ka hrilh leh vek kha a nia. Chuta a sawi chu...

"Kima pa nen hian tun hmain kan innei tawh ṭhin a; mahse, a nu rapthlak lutuk hian dawt thu a vaivir a, chu chu Kima pa in awihin kan inṭhen phah a, kan inṭhen hnuah a luhkhung nghal, kei chuan kum thum hnuah i pa hi ka nei chauh a ni. I pa hian ka nun hlui sawi chhuah hi a phal ngai lova ka nih ang ang hian min pawm tawp a, a mi hmangaihna hi ka phu lo asin," a ti a nih kha.

Mut dawnah ka phone ka on a, message a lo lut nghal chur chur a, ka chhiar thla zela u Kima hming zawnah ka tawp chat. Message open chuang lo chuan a hnuaia ka ṭhiante message ho chu ka chhâng daih a, Sawmtea message erawh ka chhang ve ta lo.

Ka muhil chu min rawn sâwi nawk nawk tu an awm vangin ka harh a, Ruati leh Sawmtea ka khum bula lo ṭhu kur chu ka hmu hmasa ber! Ka tho a, bathroom lam ka pan a, ka chhuah lai pawhin ngawi rengin an lo ṭhu a, ka nuih aza lek lek, ṭawng duh lo ve ve anni miau a.

Class kal lo in min awmpui dawn chu ania, an ti ropui ve hrim hrim e. Sawmtea'n a chhuah lawk tur thu a sawi a, chumi hlan chuan U Kima nen kan inṭhen thu vel Ruati ka hrilha min hnem ve malh malh.

Ka ṭhiannu hi chu ava han hlu vet vet tak êm. Sawmtea lo lut chuan ei tur a rawn khai ṭeuh a, kan lo en hâw ringawt! A ṭhiante pahnih hian ei kan thei tih a hre chiang em a ni. Titi pahin kan ei mawlh mawlh a, ka accident thu an hriata an mangan zia te min hrilh a, ka'n nui leh ang bâwk bâwk a.

Ka accident aṭangin kâr tam a liam leh tawh, u Kima te pawh thla thar hian an innei dawn a, rilru nâ nuai bo tumin ruih ka chîng ṭan ta. Ruati leh Sawmtea'n min hau reng mai. Ka chhungte erawhin an la hre lova Sawmtea pawh ṭhiante na na nâ kan thinrim khum rei thei lo ani ber e, kan inkawm ṭha leh tawh viau.

Class bunk-a ruih nilên ka ching hle a, zirlai ka ngaihsak mawlh lo. In chhung aiin pâwn nuam ka ti ṭan a, inkhawm ka bansan hmak bawk, u Kima hmuh ka duh lo, ka rilru nâ a dam fel mawlh loh avangin biak in lam hawi ka tawpsan hmak a ni.

Ka chhungte paw'n mi kâ aṭangin ka rui ṭhin tih an lo hre thâwi a, min vil chawt mai. Eng mah hre lo a 'ruih chhum hmawk' hian rilru nâ min chhâwk berin ka hre miau a, harh fim lai ka nei khât ta khawp mai.

Ka chhungte rilru a hah ṭan a, Sawmtea leh Ruati lahin min hau reng bawk si. Nun hi ka hnê ngawih ngawih tawh, an theih tâwpin ka nghei theih nan an bei a, kei lah ka pawngpawrh tulh tulh emaw tih mai tur a ni.

Ṭhian hrang hrang ka kâwmin ka zui a, mipa ka zui erawhin Sawmtea'n min melh no lo thei khawp mai. He pa hi eng nge maw a awm zia ni?

Kâr lo ah u Kima te inneih ni chu a rawn her chhuak a. Zing kar aṭangin ka kâi chiai chiai mai, harh fîma awm ka tum lo bur.

An inneihnaah pawh kal tum lo kha ka ruih vang nge ni kal châkna in min tur ut ut a, kâi chiai-in ka insiam a, ngawi reng hian biak in lam chu ka pan ve ta.

Ka va thlen ve meuh chuan hunserh lo hmang zo tawhin thlalak hun an lo nei mek a, kei lah ka kâi tawh bawk si, an lam pan chuan ka kal a, mite'n min en hrek hrekna pawh haider hmakin ka pan hnai zel a, U Kima'n min hmuh chuan a lawm lo tih a hmelah ka hmu nghal zat bawk.

Chibai pah chuan lawmpuina thu te chu ka'n chhâkchhuak ve tak na a, eng nge ka sawi ber pawh ka hre fumfe lo. An nu bulah a pasal chu bum hmang anih thu ka sawi chiang hle tih ka hria. A dang chu Ruati leh ka u te'n min hruai chhuak tih bak hriat mumal ka nei lo.

Ka harh chhuah leh meuh chuan ka room-ah ka lo awm der mai. Ka zun chhuak lutuk chu bathroom lam ka pan a, ka chhuah leh chuan ka nu ka room-ah a rawn lut ve chiah bawk.

Ka khum ah chuan ka ṭhu a, ka bula ka nu a rawn ṭhut thlâk chuan, "Mate, kan hmangaihzia che i hria tiraw?" uar fahranin ka lu ka lo bu nghat nghat a, "Kan rilru tih nat pawh i duh lo ang tiraw?"

"Uumn.." ka ti sap a, an rilru ka tih natzia erawh ka hre reng tho.

"A nih chuan heng i thiltih zawng zawng hi bansan la, nun bul ṭan ṭha la, i chhungte hian kan pui ang che. Hetia i nun chhiat hi kan phal lo, Kima lo pawh mipa dang an tam lutuk, ani vangin inti chhe duh suh, a nuihzat lutuk palh ang che, chak takin awm la, i tan eng mah a ni lo tih hmuhtir zawk la a inchhir rum rumna turin awm tum zawk rawh," min tih chuan dik ti lutuk in ka lo bu nghauh nghauh a.

Ni e, tu nge ka nih hi ka la hmuh tir dawn khawp mai, ka thei em em ang.

"Nu, min puih dawn phawt chuan ka in peih reng e," ka tih veleh ka nu chuan lawm tih hriat takin min rawn kuah nghal a. "Ṭha lutuk, i ti thei tih ka hria lawm, chhungkuain kan ṭang tlang dawn nia, kan hneh ngei ang," tiin a inla hrang a, "I pa ka'n hrilh ang e, a lawm ve khawp ang," tih leh room chhuahsan a rual a.

Ka thu tlûkna siam chu ka siam sual loh hram ka beisei.

Dik tak chuan ruih reng pawh nuam ka ti chuang lo, hlimna ka hmuh phah bawk si lo a, chhungte'n rilru na taka min thlir ṭhin te hi hmuh hrehawm ka ti.

Keimah vangin chhungkua kan hlim loh phah bawk. Mipa pakhat vangin ka kun reng bik tur hi a ni lo. 'Come on, Ms, i thei a nia', kei mah leh kei mah ka infuih sauh sauh ta.

Whatsapp-a kan ṭhian pathum chauh awmna group-ah chuan "Hi guys, Msi thar hlak in hmuh duh chuan in mi puihna ka mamawh dawn a nia" tih chu ka post a, Ruati leh Sawmtea an rawn lang nghal zat. Min rawn fuihin min puih tur thu an rawn sawi ve a, an hlim thu leh an phurzia te sawiin zana an rawn kal tur thu an sawi bawk.

Tuma'n vawiina ka chet dan an sawi lang lo erawh ka lawm viau mai.

Pathian khawngaihna changin ka chhungte leh ṭhiante puihna in, indona ka hmachhawnah chuan hnehna ka chang ta a. Kan lawmin kan hlim tlang hle. Chhungkaw ṭha tak leh ṭhian ṭha tak ka nei hi ka vannei takzet a ni. Kohhranah pawh tel leh in, ka hnung lama min sawi sep sepna te chu ka hai der a; hrehawm tih châng awm mah se ka tuang ti chhah luiin ka tel lui zel thin. Anni vanga rawngbawl ka ni lo ang bawkin anni vanga tel loh phah emaw tawp san kher a ṭulna ka hre lo a ni.

"Ms, ka duh che, ni lo ka hmangaih zawk che, ṭhian ang reng chuan ka en thei tawh lo che. He kan inṭhian ṭhatna vang hian rei tak ka zêp a, tunah chuan zêp thei ka ni tawh lo; ka chân leh mai ang che tih ka hlau a ni," Sawmtea thu sawi chu mut hmunah ka ngaihtuah neuh neuh a. Mak ka ti!

Zaninah gospel concert-naah kalin kan in thlen dawnah min pawt dingin min hrilh a, sawi tur mai ka hre lo a nih kha. Eng vanga kei kher min duh nge maw a nih le? Ani chu mi fel tak a ni a, a rintlakzia lah ka hrechiang em em si. Mahse, u Kima pawh kha ka ring em em chungin min bum anih kha.Tihsual leh ka hlau a, bum nih leh ka duh tawh lo, tun ang hian ka tuarchhuak leh kher ang em ka chiang si lo va.

Â, chhâng lo law law ila ṭhian ang hian awm tlang zel zawk ila a fuh ka ring. Ka ngaihtuahna kawm neuh neuh in ka muhil zui ta a.

"Ka bawihte, Good morning," Sawmtea message chu ka harh velah ka hmu nghal a. Ka khi suk mai, ka chhâng tawp si lo a.

"I bawihtei pawh ka ni bawk lo," tih thawnin bathroom-ah ka luhsan nghal a.

Ka chhuah leh chuan ka phone lo êng, thim ta chiah chu ka hmu hman hrâm. Ka ban vat a, Sawmtea missed call leh message a lo awm reng a, message chu ka open a.

"Duh lo mah la, i ni dawn tho tho,"

"Ka ring chiah lo," tih zawngin ka chhâng.

A seen hnu lawkah a rawn call nghal zat a. "Eng nge?" ka'n lo ti nghal tawng a.

"Vawiin chawlh a nia, chhuak lawk ang ka lo sawm dawn che a nia, dar 10:30 ah lo in peih ang che " a sawi zo chu a off nghal hmak nia. Ka hnial dawn tih hre lâwk ni awm fahranin...

"Ka peih lo ka mu dawn," message ka va thawn hram.

"I bulah ka lo mu anga a ni mai,"

"A teuh hian a hnai lo,"

"A nih chuan lo insiam ang che," a ti leh a.

"Ka peih lo ka tih chu," ka nuih a za deuh.

"Bialpa te thu an hnial ngai lo," a la ti hrâm.

"Ka bialpa pawh i ni bawk lo,"

"Tun darkar, tun second aṭang hian i bialpa ka ni a, ka bialnu i ni bawk, sawi buai theih a ni lo. Lo insiam ang che, i chhungte ka hrilh vek tawh, chaw ei nghal tur khan in ring bawk la," a tih chuan peih lo tak chung hian ka insiam ta nge nge a. Ka ṭhian a nih vang hrimin chuak tur chuan ka insiam ve ta tho a.

Room atanga ka chhuak ka nu in min hmuh chuan, "I nalh lutuk," min lo ti nghal a, ka nui ver ver mai. Ka confi phah sawt bawk. Sawmtea a rawn thlenga min en vung vung chuan kei mahah dik lo a awm emaw tiin ka in en a, a awm áwm ka hmu bawk si lo.

"Wow!" a rawn ti chhuak phawng a, a kut zungpui a rawn ti pir vâ bawk.

"I chhe lutuk, dik lo a awm emaw ka ti hman alawm," tih pah chuan kawngka lam ka pan nghal a. Min rawn zui ve mai bawk a, Car-a kan ṭhut fel hnu chuan min thlek vang vang chung hian, "I nalh lutuk," ati sup a, ka lo lâi ve ringawt nia.

Hun rei tak kan inkawm tawh, a bulah hian ka lâi ngai der si lo a.

"Khawiah nge kan kal dawn?" ka sawi tur hre lo chuan ka zawt ta tawp a, "Bazarah kan kal anga chuan birthday lawmnaah kan tlang dawn nia."

"Tu birthday? I birthday chu a ni lo chiang a," ka tih chuan a nu birthday a nih thu leh a lawmna a min hruai tur thu a sawi a.

"Ruati i sawm em? A thinrim ang e,"

"A hman lo alawm, bakah ka bialnu ka hruai si a, midang chu awm ve lo mah se pawi ka ti lo," a ti zawm zat a.

"I bialnu ka ni ziah lo," car chu ti dingin ka lam a lo hawi a.

"Ka bialnu ni turin min chhân kher ka phut lo. Ka hmangaih che a, i rilru a la inpeih lo a, hlauhthawnna i la nei tih ka hria a lawm; nawr luih che ka tum lo, ka nghak thei che, i inpeih hun hun a ni mai, ṭhian angin rei tak kan inkawm tawh; mahse, i bialpa chauh ni lo i pasal nih ka duh. Chumi tur chuan chance min pe rawh. Min ring la, min chelh tlat turin ka duh che," a ti duah. A sawi zo chu thâwk a la halh mai.

"Nat leh ka hlau a ni," hnuai lam bih pah chuan ka ti sap a.

"Min en teh," amah en thei tur chuan ka inher rem a. A mitmenga min hmangaihna lo lang chhuak chu ka hmu thiam ve reng.

"I na tuar ka hmu thei lo ang bawkin i nat ka phal ngai lo ang. Min ring tawp la, ka kut hi chelh tlat la, thlah ngai suh ang che; i lo nat tawhna zawng zawng khâ tuam dam leh turin ka bei ang. Min kalsan tum ngai lo la a ni mai," tiin min kuah vawng vawng a.

Chance min dil a, ka pe mai a ni ang chu, ka nunah a pahnihna turin mipa ka la lut leh dawn chu a ni a, pakhatin min bum a, a pahnihna hian ka nunah eng tak thlen ve ang maw?

An in kan thlen chuan mi an lo awm nual tawh, a chhungte nen inhre sa tho mah ila, a nu leh pa bulah chuan, "Ka bialnu," tiin min inhmelhriattîr thlap mai. Inchibaiin piancham lawmna thilpek bazar kan kala ka lei sak chu ka pe bawk a, lawmthu min hrilh ve mawlh mawlh.

Sawmtea nen chuan kan inngaizawng chu a ni ta dêr a, a nu thu min hrilh kha ka theihngilh thei lo.

"Sawmtea hian in inkawm lai aṭang tawhin a hmangaih tawh che a, ṭhian innih miau avangin i hriat chuan i kawm duh loh a hlau a, a zep ta a ni. Bialpa i nei tih a hriat khan a tuarna em em a, a hmangaih che tih a hrilh loh vang che in a inchhir a, pawi a ti bawk; chaw a ei mumal ngai lo, a mu tlem em em a, i lakah pawh a inla hrang hial a nih kha. Mahse, i hlim em avang khan a hrilh duh ta lo che a ni. I rilru nat lai te khan i tan a ṭawngṭai ṭhin a sin. Ka fapa hian nang lo chu duh dang a nei lo. Khawngaihin ti na suh,”a ti a nih kha.

Nitinin min hmangaihzia leh duatna, min ngaihsakna ka hmu zel a, ka natna turin a awm ngai lo bawk. Ṭhian kan lo ni sa bawk nen engkim mai chu a tluang purh a, inhauh leh buai kan nei ngai meuh lo.

Ruati'n a hriatin min lawmpui bawk si, a mak ti bawk si hmel chu hmuhnawm tak a ni.

College kan pass chhuak ve ta a, Sawmtea chuan a pa hnuaiah an sumdawnna a enkawl a, Ruati nen erawh la zirzawm tumin university lamah admission kan ti a, class erawh kan la ṭan chiah lo.

Sawmtea chuan zir zawm tawh lo a inneih mai kha a duh a; mahse, ka lo hnial thung. Amahah rinna ka nghat tial tial tih in hre tho mah ila inneihna chu chuti mai a tih chi ah ka ngai lo a ni. Dam chhunga awm dun tura Pathian hmaa thutiam nei tur chuan ka la inpeih lo a ni ber.

Hun a liam ve zel a, class kan ṭan tawh a, kan ban hma chângin Sawmtea te dawrah kan pêng kâwi ṭhin a, zan lamah a lo leng thung ṭhin.

A chauh viau paw'n lo lên a ṭhulh duh chuang lo. Inkhawm zanah erawh chuan banah a rawn kal mai ṭhin.

A lakah ka nêm telh telh a, ka hmuh loh chângin ka ngai thei hle. Min duat a, kan nat hlau a, min ngaihsak ngawih ngawih tu chungah chuan nêm loh har tak a ni; ka thinlung a hneh tial tial a, a sawi ang ngeiin hmangaih lo thei lo in min siam a ni.

Eng nge ka sawi kha?Hmangaih maw? Ni e, kei hian Sawmtea hi ka duh mai pawh ni lovin ka hmangaih hial tawh a nih chu...

"In hmu lawk ang," U Kima message chu chhâng lem lo chuan thil dang ka tihsan a.

Eng vanga min rawn bia nge maw a nih le? A nupuiin nau a chhiat hnu lawkah an inṭhen kha a nia. A chanchin ngaihven lo mah ila min hrilh châk tak tak leh ka hriat loh hlau hi an tam khawp a, ka hre lo thei ṭhin lo.

"Khawngaihin," tia message min rawn thawn leh chuan, "Sawi dun tur kan nei lo," ka chhang ve ta hram.

"Keiin ka nei alawm,"

"Ka ngaihthla hman lo ni mai teh se " ka out san nghal a, a rawn thawn leh pawh chhân tumna ka nei lo.

Class kal tur chuan ka insiam mawlh mawlh a, 'kan tlai leh ngei dawn a nih hi' ti pah chuan ka bag chu ak in ka chhuak nghal a. Kan in piaha u Kima lo ding reng ka hmuh chuan ka ding chawt a, ka lam pana a lo kal chu hmu lo derin scooty ti nungin Ruati te inlamah kan inkhalh phei nghal a, min en zui tih side glass aṭang chuan ka hmu reng.

Ka hlim ve teh reng nen eng nge maw a lo lan ni. Mood a off phah vek a lawm, Ruati chuan an kawtah min lo nghak reng tawh a, university lam panin kan inkhalh thla ve nghal a.

Class banah bazara kan kâwi leh avangin chau takin in ka thleng a. Number hlang aṭanga ka thu dawn chu a ngai tê bawk. Sawmtea hlat tura min vauna tho a ni! Ni hnih liam ta aṭang khan nitin min rawn thawn ṭhin a, engah vak ka ngai lem lo na in awm erawh a nuam chiah lo.

Thlalâk nen lam min rawn thawn tawh miau avangin rilru hlauhthawnnain ka khat lo thei lova Sawmtea bulah erawh ka sawi chhuak duh lêm rih lo a.

Zan khat erawh kan inhau chiam mai. A phone en ka dila min pe ve maia chutah chuan an in biakna ka hmu a, min bum niin ka ngai a; ani lah lo ṭang ve si chu kan in hnial ta chiam a, ka rinhlelh avangin a niin na a ti bawk. Thinrim takin min hawsan kha a nia.

A tukah chuan amah zawkin ngaihdam min rawn dil leh a, a thiam loh a awm lo tih chu ka hria, an inbiaknaah pawh huat tur ka hmu lo.Mahse, bum ka lo nih tawh vangin min bum ve mai ka hlau khan thinrima ânkhum ta ringawt ka ni.

Ka nu in inlêng ka neih thu min hrilh vang chuan room aṭangin ka chhuak a. Kan sitting room-ah u Kima lo ṭhu ka hmuh chuan ka pên lai chu a tawp chat a.

He pa hian kan inchhung engtin nge a rawn rah ngam zawk? Zak thei lo hi ka'n ti mai mai khawp a, mi lah chu a la en ang dauh dauh a, ka bêng kaih châk lutuk.

A epah chuan ka ṭhu a, ka be chuang lo, ka biak a ṭulna chhan tur hi ka hre lo. Ka pa nen an titi na karah ngawi rengin ka lo ṭhu ve kur a.

Thingpui an in zawh chuan ka pa chu a thu sawi tur inbuatsaih a duh vang chuan room lamah a phei a, ka nu lah choka lamah a buai bawk si, kan pahnihin kan ṭhu ngawi reng mai.

"Ngaihdam dil che ka duh a," a rawn ṭawng chhuak chu ka en vat a.

"Engah chuan maw?"

"Ka tih nat che avang khan, ka nu dâwt sawi ka lo ring a, min ngaidam rawh," a hmelah chuan a inchhir tih a lang reng. Ka chhân mai loh avang chuan amah bawk a rawn ṭawng leh a.

"Ka pu in ka nu chan ai i nu ro a sem a ti a, ka nu chan tur i nu-in a lo chang daih kha fair lo ka ti a, ka pi leh pu in i nu an ngainat zia ka hre ve vek a, i rilru ka tihnat chuan i nu pawh a nâ ang a, ka pi leh pute nen inzawmna nei duh lo in ka pu ro a chan chu a hnâwl ka ring a; mahse, a lo ni si lo. Ka pu khan pek chu a tum ngei a; mahse, i nu in a lo hnial thung si. Ka nu chuan i nu in a hnial tih hre lo in a pawmah a ngai hmiah a, i nu ro chan tur chu chhuhsak a lo tum zawk a lo nia. Khatia kan inzui takah chuan a ni têlin ka duh telh telh che a, tihnat tum che in bul ṭan mah ila ka rilru ka thunun zo si lo. Chu chu ka nu'n hriain kan inṭhen theih nan hma a la a, ka hriat miah lohvin ka nupui neihna tur alo ti fel vek mai. Nei lo thei lo in min siam a, a chhan chu school saw ka chân thiang si lo. Khawngaihin min ngaidam rawh aw," a ti duah a. A sawi zo chu thâwk a la halh a. Mak ka ti, ka nu in eng mah min hrilh si lo.

"Ngaihdam dil a ngai hleinem, ka na tawh lo, bakah hun kal tawh a nia, theihngilh zawk ang," ka ti sap a. Ni e, theihngilh hi a ṭha ber.

A hâw tur chuan thlah a phût tlat vang chuan ka thlah a. Pawn kan thlen chuan a ding dat a, min hmachhawn zawngin arawn kal hnai a, "Lo kir leh rawh khawngaihin ka bulah lo lêt leh rawh." Min rawn kuah thlawp pah chuan a ti a. Kei lah a chet dan vang chuan ka hamhaihin nam lêtna châng pawh hre lo hian ka lo dawh tawp mai a. A inlâk hran hnu chuan, "I lo kir ang tiraw," beisei nei hmel pu takin min en rân a.

"Ka thei lo,"

"Midang awm an awm em ni?" ka lu ka bu ringawt a, a hmelah natna ka hmu.

"Ka tlai a ni maw! Anih i hlim em?"

"Hlim lutuk,"

"A nih chuan lo hlim zel rawh aw, duhsakna ka hlan a che," tih leh a car lam panin a kal nghal a.

In ka lût a, sana ka'n en chu Sawmtea a lo la thleng lo tih ka hre chiah! A lo thlen a hun tawh si a, a rawn chhuah tur thu a sawi hun ngaihtuahin a lo thlen a hun daih tawh! Ka phone phawrhin a number hmet chhuakin ka call nghal a, a ring ral ṭhak.

"I lo thleng dawn tawh em?" ka va text tawp a, ka nghak vang vanga min chhang chuang lo. Sana ka thlêk chhen a, a lo lang thei chuang si lo. "Eng ati nge, a reh vang vang le?"

"I lo kal leh dawn si lo em ni?"

"Call leh text i chhang thei si lo, i ṭha maw?" a hnu fe ah chuan ka text leh a, ka call in a la thei bawk si lo. Sana ka en, dar 11 a ri tawh, a la reh char char bawk si.

'Eng emaw buaina a nei a ni ang,' tiin mut tum chuan ka insiam a.

Zinga ka ṭhang harh veleh ka phone ka ban nghal a, Sawmtea message a lo awm ringin ka en thla diat diat a, hmuh tur a la awm ta lo fo. Tûk dangah min wish ziah ṭhin sia, a message hmuh tur awm lo chuan min ti lunghnur hle.Tui vak lo chuan 'Good morning' tih chu ka thawn ta tho a.

Class kan ban hnu-ah Sawmtea dawr lam pan chuan ka tlan chhuak nghal a. A reh hian a reh vawng vawng a, ka call a pick lo a, ka text erawh a hmu vek tih ka hria; mahse, min chhang lêt ngai lo. A thinrim ti dawn ila a thinrim chhan tur awm ang ka hre dêr lo, kei mah zawk hi ka thinrim hlur tawh zawk. An dâwr ka thlen chuan a awm loh thu in min lo chhâng a, lunghnur tak hian in lam panin ka haw hna hna a.

In ka thlen chuan ka phone phawrhin a number bawk ka hmet chhuak leh a. A ring ral leh ṭhak a.

"I thin ka ti rim em ni?" Message ka va thawn leh a. Chhânna a awm chuang lo. "Min ti mangang a nia, i lung ka tih âwi loh chuan min hrilh la," Ka va thawn leh ngat. Ka dawhtheihna en chhin a tum a nih chuan a ti sual khawp ang. Hawrawppuiin "MALSAWMTLUANG" send ka hmeh hnu chuan "A ṭha a lawm min chhâng tawp suh," tih ka thawn leh nghal zat a.

Ka dawhtheihna in a tlin tawh lo, ka in duh ve na zawng zawng dah ṭha in biak tumin ka bei a, a hmuh paw'n min chhang duh lo a nia. Ka tlâwm tawh dawn bik lo tiin ka rilru ka siam a, a lehlam zawng tak chuan ka ngai em em bawk si.

Zanah pawh chuan a reh vung vung a, ka hriat chhuah tak chu ka lo ngaiin ka lo thlahlel hman hle a ni. Min kalsan mai hlauhna in ka khat a, ka ṭah te a chhuak ut ut tawh, a tawp nan an ina kal tum chuan ka rilru ka siam fel ta a.

Zing a lo nih chuan an in lam pan tumin ka insiam a, nizan ka mut ṭhat loh vangin ka lu chu a rit lûk a. Mahse, kal ngei ka duh si, a tawp nan tak tak a ni tawh ang tiin ka in ti paukhauh a. An in ka thlen chuan ina a awm loh thu leh zanah a haw loh thu-in min chhang a, ka rilru a buaiin a mangang tawh takzet. Engtia tih chi nge ka hre si lo. Min bum a nih loh vêk pawhin a rûka min kalsan a tum a nih ka ring hial tawh.

An in aṭanga ka chhuak chiah chu gate-a a rawn lut nen kan in tâwk a. Ani leh ni lo angin a lang pawr fap mai! Chau tak hmel a pu bawk. Va kuah thlawp mai ka châk a; mahse, ka rilru thlâk thutin ka scooty lam pan chuan ka kal a, ka tlân chhuah hma-in min rawn nang ching a.

"Eng nge i lo tih?"

Ka biang chu rawn lum thla papin ka mittui ka hmaia luang chu hru tâwkin scooty chu ka start nghal a. Amah vangin rilru hah tak leh mangang takin ka awm a, an in hial ka pan a 'Eng nge ka tih' tih min la zawt a nia. A â deuh a ni hial ang!

Ka tlanchhuah theih tak si loh ah chuan scooty chu off in ka chhuk thla leh a. Ka ngawi reng a, ka ṭawng anih chuan ka ṭap mai dawn si a.

"Eng chu maw i rawn tih a?" a tih chuan ka ṭap khur ta dar dar a. Ngawi reng hian min kuah a, chu chu duh lovin ka lo tâl laih laih a.

Ka ṭah bân deuh hnu chuan ka inla hrang nghal a. "Sawi la," a ti sup a, ani hi in sawifiah a tum lo a nih hmel.

"Nang mah ring a, chelh tlat tur che in min ti a, ka chelh ta che tihin ngawi rengin min kalsan leh si. Ka call leh text pawh i chhâng duh lo a, rilru mangangin min siam a, chanchin ngaichangin zah pawh dawn lo in, in inah leh dawrah hial ka lo pan che a, chutah nangin 'Eng nge ka rawn tih,' tih min zawt a maw?' a tawp lam phei chu ka âu a ni ber.

Ka ngawi dat a, "Ka hmangaih veleh che min kalsan i tum leh si a, i sual lutuk," ka ti leh ṭuak a.

Min kuah thlawp pah chuan "Ka tihpalh," a ti sup a. "Chuan eng maw i sawi kha?" A âw ah lâwm aw a hriat theih.

"Ka haw lutuk che," ka lo ti ṭiau a.

"Ni lo, kha lo kha,"

"I hre reng," ka ti hlar a, ka sawi ka hria, ka hmangaih thu ka hrilh anih kha...

"Sawi nawn leh la," hlim tih hriat takin a nui var var a.

“Ka..â.. min nuih suh," a nui hmel ka hmuh chuan ka ti leh hlar a.

"Kima bulah khan i lêt ka ring a, i duhzia ka hria, ka hmangaih che a, i hlimna hi ka duh ber. Harsa tak chungin kalsan che ka tum a, chuvanga i call leh text pawh chhang lo ka ni; chhân che ka chakzia i hre kher lo ang," a tih chuan a âwma chum pahin,

"Mi mawl pa, i kut chelh a, thlah lo turin min tih kha, ka chelh tawh chea ka thlah mai mai dawn lo che. Min nin rak khawpin a nia ka chelh dawn che ni."

"Chuti chu kan inneih vat a ngai a nih chu, ka ning ngai lo'ng che," tiin min kuahna ti nghet salhin ka chhipah chuan a rawn fawp a.

"Kei ang mi tê lutuk hi min nei duh ang maw!?" Ka melh chho kiau a.

"Nang ang duhawmna a khat hi neih loh atan chuan i uiawm mah mah," a mitmeng, hlimna a khat chuan min en a.

A rang thei ang bera palâi tir tur chuan hlim takin ka hawsan ta a.

Sawmtea nen kan inneihna pawh kum sarih lai a ni ve ta. Pathian malsawmna changin fanu pakhat leh fapa pakhat kan nei a, kan hlim ve hle.

Thu in hmuh loh châng awm mah se thinrimin kan in chhâng ngai lo. 'MIN CHELH RAWH' titu kut chu ka chelh tlat a, ka tih sual loh zia ka hre chiang hle bawk a ni.

"Min chelh tlat avangin ka lawm e," tiin uar leh duh thawh taka min fawh vawng vawng hnuah khumah chuan min mut ta riai riai a.

Kan inkâr a hmangaihna leh rinawmna chuan rah ṭha chhuahin nupa hlim tak kan ni chho ta.

Harsatna leh lungngaihna ka tawh châng pawha amah chelh tlat tura rinawmna min tiam tu Malsawmtluanga kut chelh rân chungin ka nui ver ver a....

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)