NGHILH LOH RUATI By :- Sangtea Kawlni

Ngaia
Site Admin
Posts: 25813
Joined: April 30th, 2016, 4:07 pm

NGHILH LOH RUATI By :- Sangtea Kawlni

Unread post by Ngaia » September 1st, 2019, 5:41 pm

btndl988.jpg
btndl988.jpg (23.75 KiB) Viewed 18797 times

NGHILH LOH RUATI
(Competition 2019)

By :- Sangtea Kawlni

Thla khat vêl lek ka la kawl ka motor lei thar nen chuan kan pu-te in lama kan chaw eikhawm zo chu zan dar-11 vêlah in lam panin ka haw mek a. Vanapa Hall kawt ka thlen phei chuan ka fâwn a rik avângin ka motor ka ti ding a, fâwn chu ka chhâng a. Ka U in ka lo haw tawh dâwn leh dâwn loh vêl min lo zâwt a, ka haw mek thuin ka chhâng a. Chutia fâwn ka hmang zo chu Vanapa Hall kawt thim deuh lai, street light de zauh zauh hnuai aṭang hian thâwm ri deuh nek nek ka hria a; anmahni chu hmu chiang chiah lo mah ila an thâwm aṭang chuan sum lamah an intibuai ani tih ka hre mai. "Mi buaina mai maite ka lo buai ve na tur a awm lo," tiin han kal leh mai ka tum lai tak chuan ka aw hriat ṭhan zet mai, kum tam tak ka lo hriat tawh ṭhin aw hi ka hre tlat in ka hria a. Ka'n ngaithla chiang a, a ni ngêi e. Ka hmangaih êm êm mahse, kum tam tak liam ta a min kal bosantu Ruati aw ngêi a ni tih ka hai thei lo.

Ka motor aṭangin ka chhuk a, thâwm chu ka ngaithla chiang a, a va mak êm! Ka hmangaih êm êm ṭhin, tun thleng pawh a ka la hmangaih Ruati chu 'KS' a lo ni! A hmangtuten a sum tur an pêk loh avângin an lo intibuai a ni; a thim chin lai aṭang chuan rilru natak chungin ka lo thlir ngawih ngawih ringawt mai a ni. Engtin nge a nih theih? Engvang nge?... zawhna chhân sên loh a lo lut zawt zawt mai. An inhnial nasa ta mai a, an thâwm pawh a ring ṭha tâwk a ni tih chu kawnga kal ṭhenkhat leh motor tlân aṭanga Vanapa Hall kawt thim chhah lai rawn melh leh zauh ṭhin an awm aṭang chuan a hriat mai. Heti ang reng a nih chuan reilotê-ah kut hial an thawh dâwn tih ka hriat avâng leh ka khawngaih lutuk chuan engtik laiin nge a bânah ka va chelh a, ka motor-a ka hruai luh ka hre hauh lo!

Motor chhungah chuan kan ṭhu ta vâng a. Min hmu chu a kûn ngal a, min la hria a ni mahna. Kei chuan," Ruati, min la hria em?" ka ti a. Mahse, min chhâng thei lo. Ka zâwt nawn leh a, inhnit faih faih chungin," Ka tih palh," a rawn ti a, ka hmel a en ngam lo a ni ang a kûn tlat a. A kut chu a khûr hlerh hlerh bawk a, ka khawngaih hlê mai. "In inah ka hruai haw ang che," ka ti a mahse, a duh tlat lo. "In a i haw duh loh paw'n kan inah i riak dâwn nia," ka ti leh a, a duh lo nasa mai. Mahse, ka hmangaih êm avângin kha'ng mihur ho bula a awm tur kha ka hmu phal lo a ni. Chuvângin, a duh lo chung pawh chuan kan inah ka hruai lui ta tho a.

Mission Veng-a kan inah ka hruai a, motor aṭangin kan chhuk a, kan in chu a en a, mak a ti ve hle a ni ang," Hei hi nangma in a mi?" a rawn ti a. Kei chuan," Aw, ni e," ka lo ti vat a. Panlai nun aṭanga rethei taka seilian ka ni a, mahni inhlawh chawp in lehkha ka zir chhuak a, tunah chuan Department pakhatah Asst. Director ka ni hial tawh a ni. Ni ê, mak a ti pawh chu a âwm e. Khati ang naupang rethei tak, tunah mite ang ni phalo mahse, Concrete in lian leh ropui ve tak a ka han awmte leh motor nêna ka chhuak ta ṭhin chu mak tih loh rual a ni lo ve. " Lut i la?" ka ti a, mahse a inthlahrung nge ni a ṭang deuh ṭung a. "Tunge inah awm?" a ti a, kei chuan," ka nu leh pa te an boral tawh tih i hriat kha, tunah chuan ka U hmeichhia Tluangtei nên chauh khân kan awm, inthlahrunna tur a awm lo, lut ang le," ka ti a, ka kai a.

In chhung kan lut chu ka U in min lo hmu a mak a ti ve hle ani ang a meng pâwng deuh hawk a. Ka U chuan zawh duh tam tak a nei tih ka hria, mahse engmah sawi lo tur a ka tih avângin a ngawi ve mai a. Ruati chu inbual turin Bathroom-ah ka luh tir a, chutih lai chuan ka U nen kan ti ti a. Ka U chuan," Engtin nge i hmuh leh theih a?" tiin mak tih hmêl tak hian min zâwt a, kei chuan ka hmuh leh dân vêlte chu ka hrilh a, ka U pawh chuan a khawngaih khawp mai.

Ka nu leh pate hian naupangtê kan nih laiin min boralsan a, ka U hian sikul pawh kal lovin tun dinhmun ka thlen theih nan hian min enkawl seilian a. A nuamah leh a hrehawmah pawh engmah sawi lovin, a sur a sa hnuaiah pawh nu leh pa nih fâwm in min chawi lian a. Hmeichhe dangte angin lehkha zir ve thei nise ka U hian I.A.S. nih a châk ber ṭhin. Mahse, ka U hi I.A.S. pawh ni lo mahse hmeichhe ṭhenkhat, mahni tâwk a thiam inti leh chapo êm êm, fêng chhîng tak tak ho ai hian ka U hi a ropuiin ka ngaisâng daih zawk. Philosopher tam takte thu sawi ai chuan, "En zui vawng vawng tlâk nih ai chuan, entawntlâk nih tum ṭhin ang che," ti-a ka U in min hrilh ṭhinte kha a nêp bikna ka hre hauh lo. A ni chuan Pathian thu leh hmangaihnaa khat in min zirtir a, he khawvêl miropui kan tihte, thusawi thiam tak takte ai hian a Pathian thu min hrilh ṭhinte, thil ṭha tinreng min hrilh ṭhinte kha a ropui zâwk a, tun thleng hian ka nun hian a la theihnghilh lo a ni. Ka U ka lâwm e, ka tâna i thil tih zawng zawng avâng hian...

Ka U nen thil tam tak kan sawi hnu chuan Ruati inbual zo pawh a lo chhuak ve ta a. Ka U chuan hmangaih leh lainat takin a lo kai a, a hak turin a ma thawmhnaw a pe a, engmah sawi lovin a eitur a siam sak leh nghâl a. "Le, ei tawh rawh le," tiin ka U chuan Ruati chu a ti a. Mahse, Ruati chuan a ei thei mai lo, a kûn reng a. Ka U chuan i duh ber ka siam sak che hi, ei tawh la tiin nui sâng chungin a han ti a. Mahse, Ruati chu lungchhe takin a ṭap ta mai a. " Tinge engmah min zawh loh? Tinge eitur min siam? Tinge ka kalna min zawh loh? Tinge min la hmangaih reng a? Tinge min hauh loh? Ti... Nge... (A ṭap a, a sawi zawm thei tawh lo) ...?" tiin Ruati chuan ṭap chungin ka U chu a ti a. Ka U chuan hmangaih takin," Ka nau i nia, kei pawh i U ka ni lâwm, i inah i lo haw a, engmah zawh i ngai hleinem," a ti a. Sitting room aṭangin ka lo thlir reng a, ka rilru tê tê chuan," Ka U hi a lo va'n fel tak êm, heti ang hmeichhia hi an piang leh tawh dâwn em ni?" ka lo ti a. Mittui nen chawte chu an han eikham ve ta a, kei chu kan hotute in lamah zanriah ka ei tawh avângin ka puar tawh hlê.

Mut hunah chuan ka U chuan Ruati chu a Rûm-a riak turin a ti a, mahse Ruati chuan inthlahrun hmêl takin," Ṭhutthlêngah ka lo mu zawk ang," a ti a. Ka U chuan, "Ṭhutthlengte chu ṭhutna tur lâwm," tih pahin a Rûm-ah chuan a hruai lut daih a. Kei pawh ka intifai a, mu turin ka rûm lam ka pan a. Ka U leh Ruati chuan thil an sawi tih an thâwmah ka hria, min lo rêl mai ang a te ka tia. Mahse, an pahnih a an awm chuan min rêl ngai lo tih ka hria. Ka muthmunahte chuan Ruati chanchinte ka ngaihtuah neuh neuh a, kan tunhma lam chanchin zawng zawngte ka chhui kir a. Ka muhil thei mai lo chuan ka rilru in chhuahtlâng hmunhlui lam chu ka'n fang leh a :

Pathianni ( Sunday ) a ni a, inkhawm turin ka insiam a; ka U chu Sande Sikul lamah a ṭan dawn avângin a kal tawh a, ka nu leh pate pawh inkhawm turin an chhuak a, kei pawh kan Department lam panin ka chhuak ve nghâl a. Biakin lam pan a ka kal lai chuan kawng chhak step aṭang hian hmeichhe tleirawl pakhat hi a lo chhuk a, ka lo en reng a; ava'n hmelṭha teh lul êm! A chhelo êm êm a, a thawmhnaw inbelte chu inkhawnaa hak atâna zahpuiawm ni lo, fai leh nalh tak a ni. A hmelṭhat ziate chu, khawi lam Vântirhkoh lalnu nge tih hial tlâk khawp a ni. A ni hi chuan Vântirhkoh zingah khian thuneihna a ngah ngawt ang! Mihring ṭawng hian a sawi fiah zo âwm lo ve. A hmelṭhat chu thu hran, apiante hlei hlei chu a va dik êm! He nu lakah hi chuan Miss World Contestant-te chu nêptê an ni. Rose-par ianga a hehsen mawi takte, a vun nung sar leh var nalh takte chu mipa ti tuiraltu atân chuan a aia iai awm loh a awm chuang lovang. A rawn chhukna step-a hnahthel ro-te chu thliin a lo chhêm kian sak dar dar a, step sir-a Naubân pârte pawh chuan zahna chibai an lo bûk ni hian ka hre hial mai khati ang êm êm a Naubân pâr nalh ka hmuh leh tawh loh dânah hian! Thlifimin a sam a chhêm lên diâr diâr lai a a mitmeng fîm kâk mai a han khap zauh laite khan Vân mipuite pawh khian an hnathawh lai châwl meuhvin ania an thlir ve ka rin ni. Chuachhapah, a sam uai hniang mai a beng kâwm a athual laia a hmui 'sexy' zet mai a han nuih saih phei kha chuan ka lungphu hi a phu rang lutuk a, thisen sâng ka neih phah lo leh 'Heart Attack' vânga ka boral lo kha ka vannei thlawt! Kan sawi uar thiam lo zawk hial âwm e...

Ka zâwn a rawn thleng a, ka lo en nasat êm avâng chuan mak a ti ani ang," Tinge min va en nasa ve?" Nui sâng chung hian a rawn ti a; a aw mawi thiang nalh leh fîm tak avâng chuan ka harh deuh kâwk mai. "A... en tur dang a vâng êm a..." ka ti ta in ka hria. Khawi Department-ah nge i inkhawm dâwn tih min lo zawh chuan," Intermediate Department-ah," ka lo ti vat a. " E, kei pawh Intermediate Department tur ka nia, mahse tumah hmelhriat ka nei lo va, kan sikul hostel aṭangin ka chhuak chiah a, a zahthlak ngem le?" tiin ka mitah tak chuan min en pahin min zawt a. Ka thi mai dâwn emaw ka tih laiin ka hmuiin min lo pui hlauh a, " Zahthlak lo ve, kan kal dâwn nia," ka ti a, Biakin lam pan chuan kan kal ta a. A fel êm êm a, biak a nuam bawk. Hmeichhe dang bulah chuan pangngai takin ka awm thei mai a, mahse a ni bulah hi chuan ka By-heart sa pawh ka theihnghilh vekin ka hria! Sawi tur a tam lutuk kha sawi tur ka tlachham hlê. Mahse, a fel êm a, a hawiher a zângkhai a, tlem chuan a ziaawm deuh. Amaherawhchu, ka Krismas kawr ka lo ha lo kha chu lu thak lo pui kan hiah phah ta ringawt pek a.

Biakin kan thleng a, hmeichhe ho ṭhutna ka kawhhmuh a, fel takin a ṭhu ve mai. Kei pawh ka ṭhutnaah ka ṭhu ve nghâl a. Kan Department-a mite chuan min en duh hle mai. Ka ṭhut pui pa pakhat phei chuan," Tunge a, a va chhelo ve, a khal tawp?" a rawn ti pek a. Kei chuan," Lo kal thar a nia, chuti ang lam sawina hun a ni lo..." tiin zai hruaitu in-a a hla sak chu ka zawm san daih a. Inkhawm chhung zawng chuan ka ṭhian thar-i chu fel takin a awm a. Zai hunah a zai a, zirtirtute thu sawi a ngaithla ṭha bawk a. Midang ho khân entawntlâk an ti ngawt ang.

Inkhawm bânah chuan ka bulah a lokal leh a, ka ṭhiante chuan min en duh viau mai a ka zak zawk lutuk chu ka hmai a sen tâwn tâwn thei. Kan haw rual leh a, thil eng eng emaw kan sawi a, ka be ṭha ve ngam deuh tawh bawk a insit tak chungin a hming kan zawt tawp mai a. A ni chuan Vanlalruati a nih thu leh 'Ruati' ti-a an koh ṭhin thu min hrilh a. Ka hming min zawt ve a, kei chuan," Lalhmangaihsanga ka nia, Sangte tiin min ko ṭhin," ka ti a. Eng nga tinge sâp hming i neih loh ka tih chuan, " Mizo ka nih avângin," tiin tawitê hian min chhâng a, mahse a kim êm êm thung a, sâp hming a neih loh chhan khan chhânna dang a ngai tawh lo. Tunah chuan ṭhian kan ni tawh bawk a, hmingte kan inhre tawn tawh bawk a tiin kan in chibai a, a vawi khatna atân kan nui dûn ta a. Eng eng emaw kan sawi hnu chuan Inkhawm kal dâwn a kan inhmuhna step-ah khan a peng chho leh dâwn a. An in a leng turin min sâwm a, mahse in lamah lehkha zir a ngaih thu leh thil dang tih tur ka neih thute ka hrih a, remchang hmasa berah ka la lên tur thu ka hrilh a. Tichuan, in 'bye-bye' chungin mahni in lam ve ve chu kan pan a.

Zanah chuan chhûn lama kan hun hman dânte ka chhui kir a, a kham awm loh khawp mai. Ngaihzawng ka la nei ngai lo va, nei dâwn pawh ni ila kan chhungkaw dinhmun in a zir lo êm a mite zinga mahni mawng hlim ang lek ka nih ka hlauh avângin ngaihzawng ka nei ngai lo a ni. Mahse, Ruati erawh ka ngaihtuah tâwp thei lo. Kei hi hmangaihna lipuiah ka zuang lut ve ta em ni te ka tia, mahse kei ni angte chu min duh chuang lovang te ka ti kual vêl a, ka rilru a insual vêl a ni. Ruati chu ka lo ngaihtuah nasa lutuk a ni mahna lehkha zirtur a ka ṭhu pawh, ka lehkhabu rêng ka lo la keu hleinem.

Ruati nen chuan St. Paul's Higher Secondary School-ah kan kal a, mahse ani aiin pawl khatin ka sâng hret thung. Khami ni aṭang khan Ruati nen chuan kan inkâwm nasa êm êm a, Biakin lamah te, sikul lamah te leh a ṭul hunah chuan in lamahte in kalpawh tawn in kan inkawm nasa êm êm a, ṭhian dang rêng kan ngai lo. An inahte chaw ka ei a, a ni paw'n kan inah a ei ve fo ṭhin. Ruati-te hi Lunglei khua anni a, a pa hi Doctor a ni a, Pa Malsawma tiin ka ko mai ṭhin a. Aizawl Civil Hospital-ah hna a thawk a, chuvângin a hnathawhna Aizawl lamah a nupui fanaute a rawn hruai thla ve a ni. Tichuan, Mission Vengah hian in an rawn luah a, an awmna pawh a rei ve leh tawh. Ruati nu hi Pi Mawitei a ni a, Lunglei Serkawn Higher Secondary School-ah Lecturer a ni a, mahse a pension tawh thung. Unau pathum an ni a, Ruati hi an milai niin an unau a hmeichhe awmchhun a ni bawk. A chhungten an duat êm êm a, kehthei dawm tak meuh meuh a an dawm a ni. Mahse, chumi avâng chuan Ruati chu a pangchang chuang lo va, a puitling êm êm thung. An hausak avângin midangte a enhniam chuang lo va, a khawngaih zawk hle ṭhin. Kei ni chhungkaw rethei tak pawh hi min hmusit hauh lo va, hmuhsit a hnêkin kei ngei pawh hi a ṭhianṭha berah min ruat hial zâwk a ni. Ruati nen chuan kan inkawm nasa a, fâwn ka nei lo va, mahse a ni chuan a nei a. Fâwn-a inbiak a ngaih châng chuan ka nu fâwn ka hmang mai ṭhin.

Ka nu hi New Market-ah chawhmeh zuar in a ṭhu ṭhin a, ka pa hian Tlangnuam a kan huanah ka nu chawhmeh zawrh tur a la ṭhin a, ka nu chawhmeh hralhna aṭanga kan sum hmuh chu kan chhungkaw ei ber a ni. Mahse, chuti chung chung pawh chuan vawiin nî thleng hian tuma buhfai no-khat pawh puk ngaiin kan la awm lo thung. Puk ngai lo tur a ka nu leh pate thawhrim zia chu sawi fiah chi a ni lo. Rethei hlê mah ila Pathian Ram (Sâwm-a-pakhat) erawh kan pe ziah ṭhin. Kan chhungkaw dinhmun avângin ka U pawh pawl riat thleng chauh sikul a kal a, mi dawr nghakin a inhlawh ṭhin a. Heng zawng zawng hi kei ina ṭha tak a lehkha ka zir theih nan an tih vang a ni. Ka chhungte hian min lo va hmangaih tak êm...

Pathian zarah pawl-12 (Arts) pawh ka zo ve ta reng mai. Lehkha ka zir lai zawng hian hna harsa leh hahthlak te chu ka chhungten min thawhsak zel a, chuti ang avângte pawh chu a ni mahna pawl-12 pawh Mizoram pumah pasarihna ka ni ve hial a. Kei aiin ka chhungte an lawm zâwk hial a ni. Passed lawm nan tiin ka nu leh paten nidanga kan la hmeh zen zen loh Vawksa chu an chhûm a, Ruati pawh chaw eitur in kan sâwm a. He mi zan hi kan hlim hle a, chhungkua kan hlim ber ṭum a ni hial ang. Chaw eikhamah Ruati chu an inthleng ka thlah a, inthlahlel tak chungin a tuk a inhmu leh turin kan inmangṭha a. In lam ka pan leh nghal a, ka nu leh pate chuan naktuk lamah huan a kal a chawhmeh lak an tum thute an sawi a, keiin College kal ka duh thute ka sawi ve bawk a. A chang leh kan nui a, ka ri deuh huk huk reng a, kan hlim hle a ni. Mahse, a tukah ṭahna a thleng dawn tihrêng kan hre si lo...

Zing khua a lo vâr a, chaw eikhamah ka nu leh pate chu huanah feh turin an chhuak nghâl a, ka U pawh dawr nghak turin a kal ve bawk a; kei chu in lam tifai turin in ka nghak thung a. Chutia ka nu leh pate feh tur a an chhuak chu khua a rawn dur nghal viau a, ruah a sur nghal a ni mai. Ka nu leh pate chu thlamah an awm a, chutih lai chuan thlam chhak a lei chu a rawn min ta thut mai! In râl rinna hun a awm tawh si lo, tichuan chu lei hlawm chhah tak chuan ka nu leh pate chu thlam chawp chuan a hnawl ta! Kan huan piah a lo nei ve pu Muana te chuan chanchin an hriat veleh veng chhungah an hriattir nghal a. Kei pawhin ka hriat veleh kan huan lam panin ka liam ve nghal a. Ka nu leh pate delhtu chirh hlawm lian leh chhah tak chu ka hâi nghâl char char a; ka nu leh pate ka ko bâng lo. Rei fê hnuah chuan tlangval ho chuan ka nu leh pate chu an hâi chhuak ta, mahse minung ni lovin mitthi an hâi chhuak thung! Ka nu leh pa ruang chirh nen a inpawlh chu ka kuah a, ka ṭap zawih zawih a, tih theih rêng ka nei si lo. Tichuan, tlangval ho chuan hlângte siamin ka nu leh pa ruang chu kan inah an zâwn luh a ni a, ka U pawhin a hriat veleh a lo haw nghâl a. Ka U nen kan inhmu chu kan inkuah a kan ṭap dun char char a. Kha mi nî a ka u ṭah nasat zia kha, mihring ka nih ve chin aṭangin kha ti êm êm a tam mittui tla kha ka la hmu ngai lo. Ka nu leh pa a hmangaih avâng a ka U mittui tla kha, dâiper tham hial a ni ngei ang le.

Tichuan, a tukah ka nu leh pa ruang chu vui liam a ni a, kei aiin ka U hian a tuar zawk hial ang. Ruati te chhungkua pawh kan lungngaihna min hnêm a min tuarpui turin an lokal ve bawk a. Ruati pa chuan ka U bulah kan pachhiat lutuk loh nan sum ṭhahnem tak pêk a tum a, mahse ka U chuan ," A ngai hleinem, hna kan thawk thei a, kan rethei lutuk bik lovang, in mi duhsakna avângin kan lâwm lutuk," tiin râlna atâna sum an dah bak chu a lak belh duh lo a ni; ka U hi chu a ropui thlawt a ni. Mi ṭhenkhat chu ni se an thawh theih reng lai pawh in thawk hmasa si lovin sum hmuh an duh âwm tho si a. Ruati te chhungkua khan min enhniam vâng leh min hmuhsit vânga sum min pêk tum an ni lo va, an miṭhat leh an fel êm vâng zawk a ni. Mahse, "kan thawh theih chhung chu kan thawk ve tur a ni, chuta ṭang a kan thawh chhuah chu kan ei ve chauh zawk tur a ni, keini aia mamawh zawk an awm ang," a tih vâng chauh a ka U khan la duh lo mai a ni. Ruati pawh chuan min tawrhpui êm êm a, min hnêm ve nasa a ni. Ka U chuan min kuah pahin," Bawih a, lungngai rêng rêng suh, kei ka awm a hna ka thawk ang nga, ka châwm zêl ang che. Lehkha hi ṭha takin zir la, hna ka thawh theih chhung chu kan rethei hauh lovang," tiin min thlamuan a; ka U hi chu thlamuan pui tham a ni rêng a ni.

Ka nu leh paten min boralsan aṭang a thla thumnaah chuan College ka kal ve ta a. Ka U in hna a thawk a, Class kal loh niin ka thawk ve bawk a; ka U chu min enkawltu ber a ni ta. Ruati pawh pawl-12 a ni ve ta. Hun leh nîte an liam zel a, Ruati paw'n pawl-12 (Science) chu a zo ve ta. A zo satliah mai ni lovin, tuma tluk rual loh in Mizoram pumah pakhatna a ni. A passed lawmnaah min sâwm ve a, ka U nen kan kal a, kan hlim tlâng viau a ni. College a kal ve ṭan a, Science lamah a kal a, kei chu Arts lam a ni thung. Kan Semester leh kan Class, Subject-te nen inang lo mah ila, a bâng hmasa zawk in innghahna kan sawiah kan innghak ngei ngei ṭhin.

4th Sem ka zirlai a ni a, ṭumkhat chu kan College restaurent-ah thingpui in in ka ṭhu a, ka bulah chuan kan class a mi hmeichhe pakhat a lo ṭhu ve a, thil kan sawi a, kan nui nasa mai. Chutih lai chu Ruati Class bâng chuan min lo hmu a, a lo ṭhu ve duh lo va; mahse kei chuan ka lo hmu hauh lo. Tichuan, class bânah Bus kan châng leh a, mi an tam lo bawk a Ruati bulah chuan nidanga ka tih dân ngai bawk in," Vawiin class a nuam em?" Nui chungin kan ti leh a. Mahse, nidang pawh a hlim tak leh ka zawhna bak hial chhâng ṭhin khan, tunah chuan a rul tawk lekin min chhâng thung. Thil ṭha lo a awm a nih ringin Ruati lehlam hawi chu ka kuai her a," Ruati, thil dik lo a awm mi, min hrilh la?" Ka ti a. " Bialnu i neih rengte chuan tinge min biak reng," tih pahin lehlam a hawi leh daih a. " Bialnu ka nei lo reng reng, nangman min duhte nih loh chuan," fiam deuh ti tih hian ka ti a. Ka lam lo hawi pahin ka mitah min en a," Sangte, ka hmangaih che," a ti a, min kuah nghâl a; a inhnit faih faih bawk a. Ka nui hmêl a tâwp chawt a, ka thinlung lâwmna in a rawn zui nghâl a. Kei pawhin hrilh ka lo chak êm êm, mahse ka sawi ngam si loh kha, chutia a hmeichhia zawkin a sawi takah chuan kei paw'n lungchimte'n ka ṭangah pawm in hmangaih biahthu ka hlân ve a, kan inpawm vawng vawng a, inhmangaihte tih dânin 'in-kiss' chuan a chhunzawm ta a. Kha mi nî aṭang khan Ruati nen kan inngai zual emaw tih turin kan inzui nasa êm êm a, Ruati chhungte paw'n kan inhmangaih tih an hria.

B.A 2nd Year ka zo ve ta, Ruati paw'n B. Sc 1st Year a zo ve ta bawk. Mahse, Ruati'n 1st Year a zawh hnu lawk hian ṭumkhat chu City Park-a lêng turin min sâwm a; he mi ṭuma thil thleng hi ka nu leh paten min boralsan hnu a ka mittui ti tla leh tu hmasa ber a ni. City Park-ah kan ṭhu a, Ruati chuan min en pahin," In ṭhen ang, phaiah ka awm dâwn a min lo zawng suh," tiin thutak zet hian engmah pawh ka sawi hma chuan a ti nghal hmak a. Sawi tur pawh ka hre lo, min ṭhawng thut a ni ber mai. "Ka duh lo, inṭhen ka duh lo..." tiin ṭap chungin ka ngên a, mahse a ring a ti khawng tlat si. A kal a, kei chu lungngaih avângin ka la indawm kun thung. Engvang nge? Min hmangaih thu min hrilh tu kha engtin nge heti ang hi a tih theih zawk? ... Mahni leh mahni chhân theih loh zawhna ka insiam a, ka rilru a na takzet a ni.

Inah ka haw a, ka U ka hrilh a, min khawngaih hle. Ka U hian Ruati nen a kan chanchin zawng zawng a hria a, heti ang a min kalsan ta mai hi min khawngaih êm êm a ni. ," Bawiha, lungngai rêng rêng suh, an ni chu kan tan chuan an sâng lua a ni, Pathianin kawppui ṭha tak a pe leh dâwn che lâwm," tiin Ruati sawi chhe miah chuang lovin ka U chuan min hnêm a. Ka U hi chu ka thlamuan pui ṭhin asin. Ruati tel lo va hun ka hmang ta chu mal riau hian ka inhria a, midang chuan hmeichhe pakhat ve mai mai... an tih laiin ka tan chuan engkim a engkim a ni si. Lungngaiin awm mah ila, ka U in-a min hnem ṭhinnate chuan min chhâwk ve hle a ni.

Hun leh ni a liam zel a, B.A pawh ka Graduate ve ta reng mai. Tichuan, M.Z.U. lamah University zawm turin admission-te ka tifel a, ka thinlungah chuan Ruati a reh thei chuang lo. Nula leh tlangval inhmangaih taka an kal dûnte ka hmuh hian kan hlim lai nite kha ka ngai ṭhin hle. Hun leh ni a lo liam ve zel a, M.A pawh ka zo ve ta. Tichuan, kum khat chhung Certificate Course zirin hun ka hmang leh a, tunah chuan Department pakhatah Asst. Director hna ka hmu ve ta hlauh mai. Mahse, hun leh niten an liam pui ve loh ka hmangaih êm êm Ruati chanchin erawh hriat tur a awm lo thung.

Ṭum khat chu Ruati te inah ka va leng a, Ruati pa chu a hnathawhna (Doctor) aṭanga a lo pension tawh avângin an khua Lunglei lamah an lo haw chho tawh hi a ni a. Ruati chanchin hriat tur a awm tâk mialin tiin Lunglei lamah chuan ka han zin chho ve a, Ruati nu leh paten min lo hmuh chuan min lo lâwm thiam khawp mai. An haw chhoh chanchinte min hrilh loh chhan chu an fanu in ka chunga a thiltih avângin an lo inthiam lo ve hle a ni. An fanu chanchinte ka zawt a, anni paw'n sawi tur rêng an hre bik lo. " Phai lamah ka awm dâwn a tih hnu khan tun thleng hian tumah min rawn la be lo, tihngaihna kan hre tawh lo," tiin Ruati nu chuan lungchhe takin a sawi a. A lan dânah chuan an fanu chu a ruang tel lovin an vui a ni ber. Ruati nu leh pate pawh in kan inhmangaih zia an hria a, heti anga a chanchin hriat tur a awm lo ringawt mai hi an tuar hle a ni...

Ṭing... Ṭing... Ṭing... Ka Alarm a lo ri a, ka harh hlawl mai, sana ka en a zing dar-5 a lo ni a. Nizan lama ka thil ngaihtuah kha ka lo mutthilh pui a ni ngei ang. Ka inphih fai a, ka U leh Ruati chu an la mu a. Tichuan, ka tih ṭhin dân pangngaiin zing exer la turin ka chhuak a. Dar 6-ah ka haw leh a, an lo la thawh loh avângin breakfast ka buaipui nghâl a. Breakfast ka siam lai chuan ka U a lo tho va, Ruati a thawh leh thawh loh ka zawt a, " A la mu nih kha, nizanah ka pum a na a ti deuh reng a, zing lamah khan a mu nghet ve deuh chauh a," tiin ka U chuan min chhâng a. "A pum a nat leh chuan damdawiin lamah kalpui i la a ṭha ang," ka ti a, ka U pawh chuan a ṭhat thu a sawi a. Ka U a intih fai hnu chuan eirawng a bawl chhunzawm a, chutih lai chuan Ruati pawh a lo tho ve ta a. Ka U chuan, "Mikhual mu rei lutuk mai," a lo tifiam a. Tichuan chaw ei turin dawhkân kan kîl a, mahse Ruati chuan a pum a nat thu leh chaw a ei châk loh thu a sawi a, a pum chu a dawm deuh vawng vawng a. A pum chu nâ a tih êm avângin Aizawl Hospital lam chu rang takin kan panpui nghâl a.

Casualty ah kan lût a, Nurse ho chuan nachhawkna in an lo chiu a, tlem chuan a ziaawm deuh. Doctor chuan test hrang hrang hmangin Ruati natna chu a han en a, chuta a result min hrilh chuan ka rilru a ti na takzet a ni. Ruati chu thisen leh pumpui Cancer a lo ni a, HIV positive a ni bawk...! Ka U nen chuan sawi tur kan va vai chiang êm! Doctor chuan," Heti ang hi chu phai lamah pawh tih vak ngaihna a awm tawh chuang lo, a nasa tawh êm a ni, Pathian thu thu a ni tawh," tiin beidawn hmêl takin a sawi a, min kalsan a. Ka U nen chuan a rukin kan ṭap a, ka U chuan a khawngaih takzet a ni. Ruati chu Ward-ah an dah a, mahse a natna chu engmah kan hrilh duh lo thung.

Chhûn lamah chuan Ruati chu ka U in a awmpui a, kei chu Office lamah hna pawimawh tak a awm avângin hnaah ka kal thung. Ruati nu leh pate pawh ka U in a lo call-a, a rang thei ang ber a lokal an tum thu an sawi a, mahse an awmna aṭang chuan naktuk zing vêlah bak an lo thlen loh hmêl. Office bânah chuan in lamah ka intifai phawt a, tichuan damdawiin lam chu ka pan leh a; Ruati tân a chhang duh ber ka ken sak bawk a. Ka U chu zan inkhawmah Kohhran lamah chanvo pawimawh a neih avângin a haw a ngai a, Ruati chu ka riahpui a ngai a ni. Ka U chuan a haw hma in Ruati chu a ṭawngṭai sak leh a, tichuan a haw san ta a...

" Ruati, vawiin engnge i an?" ka ti a, a ṭhat thu in min chhâng a, mahse a taksa a chau tih erawh ka hria. Ruati chu kan en ṭhin a, a taksa a chêr tawh tak zet a ni. Thil tam tak zawh duh ka nei a mahse, ka zawh hma hma chuan ka rilru a hria nge ni ka zawh duhte chu amân a sawi nghâl vek a... A inthiam loh thute a sawi a. Khatia min kal bosan chhan chu ka tân a thianghlim tawh lova a inhriat vâng a lo ni. Zan khat chu a ṭhiannu Birthday lawmnaah a kal a, zu a lo in chhin ve a ni. Duhaiin a lo in tam ta hret a, mahni in 'control' zo ta lo chu, chuta awm ve mipa ṭhenkhatte nen chu a ma duhthu ngeiin mipat hmeichhiatna an hmang a, a inhriat chhuah meuh chuan a tlai zo ta. Ka tan a thianghlim tawh lo tih inhria in ka hlat thei ang ber a awm a tum a ni. Ka tan a thianghlim tawh lova a inhriat avâng chuan hmeichhe dang nen a bul ṭan leh turin min duh a, min kal bosan dân a ngaihtuah a, a chhungte lakah pawh a kiltawih a, a kal bosan ta a ni. Chutia mahni a awm ta chu sum thawhchhuah a ngai a, a taksa hmang chuan a lo sumdawng ta ṭhin a; mi motor-ah te riakin hun a lo hmang kual ṭhin a ni. Ka chanchin a ngaihtuah reng a, min ngaih ṭhin thute a sawi bawk a. A mittui a tla a, a chauh êm avângin ṭawng tawh lo turin ka ti a, a inthiam loh thu a sawi reng bawk a, ka rilru a na takzet a ni.

Zanah chuan Ruati bulah naktuk zingah a nu leh pate pawh an thlen tur thu ka hrilh a, a mittui a tla leh rih a. Ruati chuan chauh hmêl tak chung leh hlim luih tum chung hian," Sangte, khami nî-a Bus stand-a 'KA HMANGAIH CHE' min tih nî kha maw, ka hringnuna ka la hlim nî ber a ni asin," tiin ka mit a min en chung chuan a sawi a. Ṭah a tum a mahse a hmuiah ka 'Kiss' khalh a, a nui ṭap ti tih ta zâwk a. Kha zân kha kan nuih dun hnuhnung ber ani dâwn ta! Mu tur a kan inbuatsaih lai chuan Ruati pumna chu a zual ta thut mai a, rang takin Doctor leh Nurse te an lokal a, I.C.U. -ah an dah lut nghâl a. A dinhmun a ṭha lo hle a, ka U pawh ka hrilh nghal a, a ni pawh a zan a zan in a lokal nghal a. I.C.U -ah chuan zankhua in a awm a, kan unau pawh kan mu bik lo.

Zing khua a lo vâr a, Ruati nu leh pate pawh an lo thleng ve tawh a. An fanu chu hmuh an duh a, mahse I.C.U. -ah luh an phal loh avângin pawnah kan ding a. Ruati nu leh pate chuan lawmthu min hrilh mawlh mawlh a, keiin kan inhmuh leh dânte chu ka hrilh ve bawk a. Zing lam dar-7 a lo rik chuan Ruati chu a zual ta thut a, Doctor leh Nutse ten theih tâwp chhuan in an bei a, Ventilator hial an hmang chung pawh in Ruati nunna chu chhan hman a ni ta lo! Ka hmangaih êm êm ka lo nghah reng ṭhin, ka duh êm êm leh ka engkim a engkim chuan mual min liam san ta! Ruati nu leh pate ka en a, an fanu ruang bula an ṭap thâwm chu ngaihthlak hrehawm tak a ni. Ka U pawh a ṭap nasa kher mai. Nula fel a an sawi ṭhin, an hausak avânga midangte en hniam ngai lo, nitin sa hmeh thei rengin kan in a chaw a lo ei ṭum a Dâl chhum leh Maian bai chauh kan hmeh ṭum pawh a puar tak a min ei pui thei leh midangte sawi chhe ngai lo, hmeichhe inngaitlawm tak kha a ni asin. Kum tam tak hnuah kan inhmu leh a, reilotêah khawvela in hmu leh ngai tawh lo turin min liam san ta si. Ka ring thei lo ni, ka rilru a buai takzet a ni. Ka U nen kan inkuah a, kan ṭap dun ringawt mai a ni.

Ruati ruang chu Lunglei lama phurh chhoh turin an buatsaih a, tichuan chawhma lam dar-10 vêlah Aizawl Hospital aṭang chuan Lunglei lam chu an pan ta. Ruati'n Aizawl a rawn rah hmasak ber nî kha chuan sikul naupang niin tleirawl tituai nalh tak a ni a. Mahse, an khua-a a haw chhoh leh dân erawh a va lungchhiatthlak tak êm! Keini unau pawh in Ruati ruang chu kan zui chho ve a, a vuinaah pawh ka U in thu a sawi ve bawk a. Hemi ṭum a Ruati ruang chunga ka U thu sawi hian ka mittui a titla leh ṭhin: " Mahni a kal mai chu a harsa lêm lo pawh a ni thei e, amaherawhchu mêl-za tam kan fan pui tawhte tel lova lêt leh erawh thil harsa tak a ni," a tih kha.

Ruatin min boralsan aṭanga a thih champha vawikhatna a ni a. Lunglei ah Ruati thlâna pangpar dah turin ka zin chho a; ka U erawh chu pasal a neih tâk avângin a pasalte inah a awm tawh a, a rawn kal ve hman lo va. Khua chu a thiang kâk mai a, Ruati ka hmuh nî hmasa ber a khaw thiang leh vân dumpawlte kha an lo lêt leh ta ni berin ka hria. Mahse, min tawrhpui ve a ni ang nge, chhûm chu vanlaizâwlah a inthual mup mup a, nî pawh in a ênna a ti dul deuh a. Tlân bula thingkungte pawh chu an ding ngawi reng hian ka hria. Chutih lai chuan thifîm a rawn thaw heuh heuh va, Ruati chu ka bulah a awm ni hian ka hre ber. Tichuan, thlanlunga inziak chu ka en a, ka phun sep a," Ruati, tunah chuan kan Department-ah Director ka ni ṭep tawh asin, min lawmpui ang tiraw? Thil tam tak min hrilh tur i nei tih ka hria, kei paw'n hrilh tur che ka nei asin... Tinge engmah kan sawi hmaa min kal san?... Pathian in rem a tih chuan, hei aia zual zawk a inhmangaih turin min lo nghak rawh aw...? Ka theihnghilh ngai lovang che... Ruati..."

" Ni ê, kei pawh in ti hian ka chhâng ang che, khami nî a 'KA HMANGAIH CHE' min tih kha ka hringnuna ka la hlim nî ber a ni asin... "

THE END

( Nimin 31/08/19 khan vârṭian aṭanga zan tairek thlengin Zemabawk in power supply kan hmuh loh avângin ka phone a thi ṭhak mai a, ka story ziah sa post mai theih a ka dah chu ka post thei lo va. Tin, Pathian ni (1/09/19) chhawhnu lamah current kan neih ve chauh avângin ka phone pawh ka charge ve nghal ani a, tunah pawh signal a chhe khawp mai. Tichuan, Group admin-te leh judge zahawm tak takte zarah min khawngaihna avângin ka post ve thei hlauh mai a, ka lawm hle mai. Pu Mafaa Hauhnar (L) ṭawngkam takin, "Ka lawm lutuk chu ka beng thleng ka bawp ka khai a..." )



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)