*MALSAWMZUALI* Ziaktu- Nuntluangi Chhakchhuak

Ngaia
Site Admin
Posts: 25813
Joined: April 30th, 2016, 4:07 pm

*MALSAWMZUALI* Ziaktu- Nuntluangi Chhakchhuak

Unread post by Ngaia » February 16th, 2021, 12:15 am

malsawmzuali.jpg

*MALSAWMZUALI*

Ziaktu- Nuntluangi Chhakchhuak

(Competition 2021)

"Ka duh lo, min ti lui suh," tiin Tluangtei chuan tharum nena beitu chu a theih ang angin a bei let ve a. Mahse, mipa tha leh hmeichhe tha chu a lo inang thei si lo. A theih tawpin a ṭang a, a theih tawpin amah sualtu mipa chu a bei let a; mahse, a tawpah erawh a dang zo ta si lo. A bekah chuan vawi hnih a rawn ri deuh chawrh chawrh a, a lu a hai nghal muai muai a. Che turin tha a nei tawh lo, amah sualtu pa chuan a beka a hnek chu duhtawk mai lovin a hnarah a rawn hnek leh a. A hnar aṭang chuan thisen thar lâm a rawn luang chhuak nghal nguai nguai a. Tluangtei tan chuan thih mai pawh a thlanawm zawk ta ve ang. Amah sualtu pa chuan a duhtawkin Tluangtei taksa mawina chu a suasam ta mawlh mawlh a. Amah sualtu in nuam a tâwl lai chuan Tluangtei erawh lungchhe taka insûtin, dan zawh rual lohvin a biangah chuan mittui a lo luang zung zung thung a.

"I rai a nihpawn nupuiah ka nei ang che. I bialpa ka ni a, ka nei ngei ngei ang che," tiin Rempuia chuan Tluangtei sam thur bum chu a tuai mâm sak a. Mahse, Tluangtei chuan engmah a sawi lo, a hmangaih em em leh a in nghahna awmchhun, a bialpa chuan hetiang thil tenawm hi engtinnge a chungah a tih theih le? tiin a ngaihtuah nasa hle mai. Rempuia chu khum aṭang chuan a tho chhuak a, choka lamah a va phei a. Fridge chu a va hawng rawk a, ice cube 4 vel chu a rawn hûm phei ṭûn a. A romol chuan ice cube chu a tuam a, Tluangtei bek duk chur leh a hnar vel te chu a deh kual sak vel a ,"A tirah khan ṭha takin remti ve mai la, hetiang hi i tawrh a ngai miah lo tur a ni a. Ka duh lo ve, i ti kawi kual ve khanglang a nihkha," a ti zui leh bawrh bawrh a. Tluangtei chuan engmah a la sawi lo, Rempuia awmdan chuan a rilru a tina takzet a ni.

Khatianga a chunga râwng taka Rempuia a chêt hnu kha chuan, biak pawh a be ṭha ta vak lova. Mahse, amah Rempuia zawk hian a rawn biak âwl loh avangin a rul tawk lek lek hi chuan a lo be ve mai zel a. Mahse, a thinlung erawh Rempuia lak aṭanga lak kian in a awm tawh a ni. Rempuia chuan Tluangtei nu leh pa te tih lungawi dan lah a thiam em em mai bawk si. Tluangtei erawh thinlung chhungril na tak tuarin a rum vawng vawng a ni si a. A thinlung natna erawh tuman an hmuh sak thei si lo, a chunga thil thleng chu a ṭhian ṭha ber Mzi hnenah pawh a sawi ngam lo a ni. Mahse, ṭhian te nge nge chuan an lo hre chiang a, a awmdanah ngaihṭhat lohna a nei ta rêng bawk a ,"Bawih, tunlai i awmdan hi i cool riau mai. Rempuia nen in ṭha maw? I chungah eng thil ṭha lo nge thleng a?," tiin Mzi chuan a zawt ta nge nge a. Mahse, Tluangtei chuan nui sâng chungin ,"Chutiang engmah a thleng lo, ka ṭha lutuk a nia aw," a lo ti nghal vat a. Mahse, Mzi chuan a ṭhiannu awmdanah ngaihṭhat lohna lian tak a nei tlat bawk si ,"I ṭhian ṭha ber hnenah hian thu zep ruk i nei dawn a maw? Malsawmtluang, i chungah eng nge thleng a? Kan pahnih inkarah chuan engmah zep ruk kan neih ngai loh kha," a rawn ti leh mawlh mawlh a. Tluangtei chuan ,"Rempuia hi ṭhen ka duh," a ti tawi tuk a. Mzi chuan mak a tih hmel hle mai ,"Maw? Ngatinge? A ngaihsak viau che in ka hria a sin," a lo ti nghal vat a.

Tluangtei chuan Mzi chu a rawn kuah thlawp a ,"Rempuia hi mihring pawh a ni lo. Ramhuai a nih hi, ka hua ka haw ngawih ngawih," tih pah chuan lungchhe van kaiin a inhnît nghal hlawp hlawp a. Mzi chuan Tluangtei sama chûl pah chuan ,"Keiman ka lo be dawn nia, ka ṭhiannu tina tu chuan a tawrh ve ngei a ngai ang. Hmeichhe dang a biak san che em ni?," a ti leh nghal mawlh mawlh a. Tluangtei chuan a lu a lo thing mai a, Mzi chuan ,"Nihchuan, eng thil nge?," a lo ti leh vat a. Tluangtei chu a ngawi ta reng a, Mzi lah ṭhiante thlavang hauh tina mi a ni bawk si. Rempuia chu kan bia ang e, ka ṭhian ṭha ber hi tuman an tihnat ka phal reng reng hleinem," a ti leh nghal bawrh bawrh a. Mahse, Tluangtei chuan Mzi chu Rempuia be lo tura a lo khap tlat si avangin, Mzi pawh chuan a be lui ta bik lova.

Rempuia'n tharum hmanga mipat hmeichhiatna a hmanpui aṭang khan thla khat a liam leh tawh a. Mahse, Tluangtei chuan a hun takah thi a nei thei ta tlat lo mai. A awm a nuam thei tawh lo, Rempuia nge Mzi a hrilh hmasak ang? A nu hnenah a sawi zawk dawn em ni? A ngaihtuahna chu a buai chuar zo vek mai si. A rilru hah avang chuan chaw a ei thei lova, zanah lah nise a muhil thei hek lo. Chutianga hun a hman reng vang chuan a taksa pawh a chhe sâwt hle mai a. A nu leh pa pawn chaw a ei thei lo lutuk chu an ngaih a ṭhat loh thu te an sawi ve ta hial a. A pa phei chuan Doctor hnena hruai mai a duh thu te a sawi a; mahse, amah Tluangtei berin a duh miau bawk si loh chuan tih ngaihna a vâng hle mai. A nu mangang chuan chaw a ei tui nan tiin supplement eng eng emaw a lei sak thûl. Mahse, awmzia erawh a awm lo chiang kher a sin.

Nikhat chu a ṭhiannu Mzi chuan chuan chhuah dun puiah a rawn sâwm a. A nu pawh chuan chhuak harh ve turin a lo ti ve bawk a, an ṭhian dun chuan bazar turin an in zui chhuak ve ta a.

"Bawih, tunlai i awmdan hi a mak e. Tun hma in hetiang hian i awm ngai si lova," tiin Mzi chuan Tluangtei awmdan mak a tih thu chu a sawi leh a. Mahse, Tluangtei chuan engmah a la sawi chhuak duh chuang lo ,"Engtinnge maw ka awm vak le? Ka ṭhat em hi," a lo ti liam mai a. Mahse, Mzi chuan a ṭhiannu thusawi chu a ring hauh lo ,"I mak ve e, ngatinge ka lakah thil zep i neih tak le? Ṭhian kan nihkha," a lo ti leh a. Tluangtei erawh chuan ,"Aaaa, chutiang hlir chu kan sawi a. Ka ril a ṭam e, thil ei ila," tiin thudang a rawn sawi ta daih a. Mzi pawh chuan a sawi chhunzawm lui ta bik lova.

Thingpui dawr an hmuh hmasak berah chuan inzui lut nghal a. Mahse, ṭhut pawh an ṭhut fel hma hauhin, Tluangtei chu a hmui hup chungin a tlan chhuak leh nghal a. Mzi chuan a ûmzui nghal vat a, Tluangtei chu mi hmuh lohna laiah chuan a lo uak nghek nghek a. Mzi chuan thil thlen dan chu mak a tih rualin a hrethiam rang kher mai ,"Bawih, naute i pai tiraw?," tiin a ṭhiannu pum chu a va dawm sak vat a. Tluangtei chuan a zep zo ta bik lo, mittui tling pamin a lu a lo bu nghat a. Mzi chuan a kokiah a rawn vuan a ,"Rempuia chu i biak hreh pawn keiman ka be mai ang," a ti leh a. Tluangtei chuan ,"Kha mi tenawmpa kha ka hua a ni. Hetianga awm hi ka duh dan a ni bik lo a sin," a lo ti zui vat a. Mzi chuan ,"Eng pawh nise, kan In lamah haw ila, thil thlen dan engkim min hrilh dawn nia aw," a ti ta a, an In lamah chuan an in zui haw ta a.

Tluangtei chuan Rempuian tharum hmanga a sual dan zawng zawng chu a ṭhiannu Mzi hnenah chuan a sawi ta vek a. Mzi chuan a kuah a ,"A tirah khan min hrilh ni la, khapa vanga i nâ te pawh hi a zia deuh tur a nia," a ti vawng vawng a. Tluangtei lah chuan ,"Min rin loh ka hlauh bakah min dem ka hlau a lawm," a lo ti pek a. Mzi chuan ,"Ka ṭhian ṭha ber i ni a, hmeichhia ve tho ka ni bawk a. I chunga thil thlengah khan demna che pakhatmah ka nei lo. A chhanchu, i thiam loh engmah a awm lo. Kei hian ka hre chiang che a, kum 15 kan nih laia kan thutiam kha i vawng reng ang tih pawh ka ring. I tan ka awm reng ang, i chungah engpawh thleng se," tiin a ṭhiannu chu a hnêm mawlh mawlh a.

Tluangtei leh Mzi te hi an naupan tet aṭanga inkawm ṭhin an ni a. Kum 15 an nih hian an ṭhian dunin thutiam an nei ve a. Chu an thutiam chu 'Virgin in pasal kan nei ang a. Pasal kan neih hunah ṭhianah kan in hmang ve ve ang' tih a ni a. Mahse, a thiam loh leh a duh thlanna ni miah lovin Tluangtei chuan an thutiam a bawhchhe ta si. Tluangtei chuan ,"Kan thutiam kha kei chuan ka bawhchhia a sin," a ti a, a mittui chu a tling pam mai a. Mzi chuan ,"I duh rêng vanga bawhchhia i ni hleinem. I chunga thil thlengah khan i thiam lohna a awm lo a nia," a ti leh a. A sawi pah chuan Rempuia number chu a hmet chhuak nghal a, Rempuia chu a call a, an Ina kal turin a ti nghal bawk a. Tluangtei pawh chuan Mzi chu dan a tum bik tawh lo ,"Mahse, ka chhungte hnenah engtinnge ka sawi ang?," a rawn ti zawi sap a. Mzi chuan ,"Ka awm hi, min ring tawp mai rawh. I kiangah ka ding zel ang," a lo ti vat a, Tluangtei kutah chuan a vuan a.

"Eng a? I ṭhiannu hian ka fa a pai a maw? Huh," tiin Rempuia chu ngeiawm zet hian a nui huk huk a. Mzi chuan ,"Ka ṭhiannu hian bialpa pakhat chiah a nei a. Chu a bialpa chu nangmah i ni a, a ring em em bawk che a. Mahse, a chunga i thil tih kha i hria em? Khatiang kha bialnu te chunga awmdan tur a ni ngai em ni? Mipa pawh inti ve tawh suh," tiin Rempuia chu a ânkhum nghal hlawih hlawih mai a. Rempuia lah chuan ,"Hmeichhia te chu nuam tâwlna mai mai a lawm in nih," tiin ngeiawm zet hian a nui leh a. Mzi chuan ,"Tunah hian Tluangtei hian i fa a pai mek a sin. Chuti chung chuan khatiang khan i la sawi ngam a maw? Zahna chhete mah i nei miah lo em ni?," a ti leh hlaih hlaih a. Rempuia lah chuan ,"Naute chu titla se a fel vek a ni mai a lawm. Nupui neih ka la duh reng reng hleinem. Pawisa in mamawh a nihpawn ka pe mai ang che u," a ti leh ham ham a. Tluangtei pawh a insûm thei ta bik lo a ni ngei ang ,"Lalrempui, a tawk e. He naute hi i fa a ni lo, min thlawh bosan vang vang teh," a rawn ti ve bawrh bawrh mai a. Rempuia chu a nui leh huk huk a ,"A ṭha e, ka bo vang vang ang. Nang aia ṭha hi khawvel hmeichhiaah hian an tam lutuk," a ti leh hram a. Mzi chuan ,"Tluangtei aia hmeichhe fel leh ṭha chu i hmu lo tawp ang. I tuh rah chu i la seng ve khawp ang, hre reng rawh," a rawn ti leh buan buan a. Rempuia chuan ,"Hmmm, kan la hria ang chu," tih pahin Mzi te In aṭang chuan a chhuak nghal a.

Tluangtei nu leh pa hnenah chuan Mzi chuan engkim a hrilh vek a. Rempuian a ṭawngkhum dan zawng zawngte pawh engmah thup nei lovin, a sawi ta kelh a. Tluangtei pa pawh a sa ve zak mai ,"Khanglang a, chuti chuan kan fanu hi a lo ti ve ngam a maw? Khawnge motor chahbi kha, an Inah ka va luhchilh teh ang," a ti nghal buan buan mai a. Mahse, Tluangtei nuṭa Mapuia chuan a lo khap dâi vat a ,"Ni love ka pa, in bengdai rih teh. Thil thleng tur ang ang chu a thleng zo vek tawh a, tunah chuan Tluangtei leh naute hi ṭha taka kan enkawl a ngai a nia. Rempuia chu kan theihnghilh vek ang, naute pa tur pawh keimah hi ka ni ang," a lo ti nghal mawlh mawlh a. Tluangtei chuan a chunga thil thleng vang chuan, a chhungte chu a lakah an lungawi loh a hlauh tehreng nen. Mahse, a thlavang hauhtu an nih mai bakah a tawp thlenga a lam ṭang an ni zel chu a lawm a ni.

Tluangtei nau pai pawh thla 5 vel zên zâwn a ni ve ta. A dul pawh a lian ve ṭan ta hle mai, ṭhenawm khawveng ho lah chuan, fiamthu ti tak deuh leh mei nei deuh hian ,"Naute pa ber lah hmuh tur a awm si lova," tih hi an chîng a. Ṭhenkhat lahin an nuthlawi chei nghal ringawt bawk a, sêlna leh deusawhna ṭawngkam zawng zawng chu a dawng vek a ni ber mai. Mahse, chutiang hunah chuan a ṭhiannu Mzi bawk chu a tan a ding ṭhin. Mzi chuan a hunawl apiangah a rawn awmpui deuh chawt ṭhin a. A chang chuan ,"I chan hi ka chan ni zawk se aw," te a ti leh hlawl ṭhin. Tluangtei chuan nui chungin ,"Ka chan hi i chan nise, min hnem thiam ang leh ka tan i din ngam ang hian ka theih ve ka ring lo," a lo ti thung a. Mzi chuan ,"Hmeichhe chak tak i ni a lawm. Chuti ni lo se, ka laka i zep chhung zawng khan i tlu ngei tawh awm si a," a lo ti ve bawk a.

Pathianni a ni a, Mzi chuan Tluangtei duh lo chung chu inkhawm turin a rawn sâwm chhuak lui a. An pahnih chuan Biak In lam panin an in zui hnak hnak a, Tluangtei naupai pawh a len ve deuh tawh avangin a dul pawh a lian ve tawh hle mai a. Ti ti malh malh pahin an kal dun hnak hnak a. Biak In an thlen hma hret chuan, an venga nula fel leh hmelṭha ti a an sawi ve hat pahnih Jennifer leh Lsi hian an lo ûm phak a. Jennifer chuan ,"Tluangtei chu i rawn inkhawm ve dawn a ni maw? I puar tawh tehreng nen," tih pah chuan an nui zui hak a. Mzi chuan a lo pai dai leh thei ta tlat lo mai ,"Biak Inah hian raipuar tan inkhawm ve a rem lo em ni?," a lo ti ve leh khauh mai a. Jennifer-i ṭhiannu Lsi chuan ,"Phal loh thu a awm hleinem. Mahse, aaaaa, engmah a ni lo," tih pah chuan a nui zui leh a. Lsi bawk chuan ,"Tluangtei chu ni ila, ka inkhawm ngam tawh teuh lo," a rawn ti leh sap a. A hmaa a âw ki aichuan a hniam deuh na a; mahse, Mzi te ṭhian dun chuan an hre phak vek tho si a. Mzi chuan ,"Biak Inah hian nula virgin chiah inkhawm theih ni ta se, nangni chu in inkhawm thei lo nghal," a ti ve leh ngat a. Lsi te ṭhian dun chuan sawi tur an hre lo chiang teh a sin. Tluangtei chuan ,"Bawih, duhtawk rih teh. A zia lo e mai, keimah vang chuan midang hau lo teh," tiin Mzi chu a lo khap ve bawk a. Mzi lah chuan ,"Engvanginnge an nuihzat ve khanglan che ni? Mi tumah hian hma lam hun kan hre lo, anni pawh hian sâwn an pai ve thei tho. Tumah in nuihzat thei kan awm lo," a lo ti leh hlaih hlaih a. Jennifer chuan ,"Tluangte, kan fiamthu ve mai mai a nihkha aw. Lo la thutak duh suh," a rawn ti leh a, an kalsawn nghal vat bawk a. Tluangtei chuan ,"I mak thei e mai, anni kha chu kan veng nulaah pawh a fel ber pawl leh a class ber an nihkha," a rawn ti leh a. Mzi chuan ,"Huiham, an fel loh zia chu tikhan i hre mai ang chu. Pawn lamah fel awm deuhin an awm a, an chhungril hi a tenawm a sin. Inah pawh engmah an thawk ngai lo, kan inṭhenawma ka hre chiang lutuk. An kekawrte thlengin an awmpui nula ten an su vek zel," a ti leh hlaih hlaih a. Tluangtei chuan ,"Nihchuan, hetah hian duhtawk rih ang aw. Chuan, vawiin bak chu ka inkhawm duh tawh lo a nia aw," a rawn ti leh a. Mzi chuan ,"Anni ho vanga inkhawm i hreh chhung chu ka sâwm reng peih che. Kohhran leh Kristianna kâwra hmang ho hi ka hua a nia," a rawn ti leh a. Tluangtei chuan nui chungin ,"Khawvel a ni miau si a lawm le," a lo ti a, Biak In kawtah chuan rei vak lo an din hnu in an lut ve ta a. Mood fuh vak lo tak chung chuan chawhma inkhawm chu an tlingtla ve thei ta hram a.

Rempuia chuan a hmelṭhatna leh a hausakna hmachhuanin hmeichhia a chhâi thlu ṭhin a. Hmeichhe tam tak thinlung a tihnat sak bakah an thianghlimna a tihchhiat sak ṭhin bawk a ni. Chutiang mipa a nih avang chuan hmangaihna tih velin a nunah awmzia a nei vak lova, hmangaihna awmzia lah a hre hek lo. Hmeichhe hmelṭha leh duhawm a tih deuh chu tunge an nih tih lam a ngai pawimawh ve lem lo, thiam takin a chhâi thlu a. Mahse, a tawpah na takin a siam a, a kalsan leh ṭhin a ni. Chutianga a kalsan tak hmeichhe tam tak zingah chuan Tluangtei pawh hi a tel ve a ni. Tluangtei hian Rempuia hi a lo hmangaih hman si a, a chungah a rinna zawng zawng a nghah bakah, pasal atan pawh a iai lo kha a ni a. Mahse, a mize dik tak a hriat meuh chuan a lo tlai hman tawh si, a nuna thil thleng chu a duh dan ni miah lo mah se, lungawi taka tawrh dan a zir mai a ngai si a.

Tluangtei naupai pawh thla 7 a rawn ni ve ta reng mai. Hmuhsitna leh deusawhna tam tak karah chhel takin a tuar zel a. A theih tawpin Pathian lam a hawi ve hram hram ṭhin bawk. A ṭhian ṭha ber Mzi'n a phatsan ngai loh bakah, a chhungte pawn an phatsan ngai bawk a. Naute pawh him dam taka a hrin theih nan Pathian hnenah a dil nitin ṭhin bawk a. Rilru hah taka awm chu ama tan leh naute tan a ṭhat loh zia hria in, a theih ang angin a inti hlim ve hram hram ṭhin. A ṭhiannu Mzi pawn a hunawl neih apiangah a rawn tlawh âwl lova, a ṭhiannu chungah chuan lawmthu a sawi leh malh malh ṭhin.

"Nang hi awm lo la chuan ka chhe vek tawh ngei ang. Ka kianga i din zel vang hian ka lawm lutuk a nia aw. Naute ka neih hunah pawh ka bulah awm ang che aw," tih mawlh mawlh pahin Tluangtei chuan Mzi kut chu a vuan a. Mzi chuan nui sen sen chungin ,"Keimah vang a ni vek bik lo a nia. Nangmah pawh i chak ve tawk ka tihkha, bakah i chhungte pawn kawng engkimah an ngaihsak em em reng che a lawm. Chuan, naute i neih hunah chuan i kiangah ka awm ang a, naute hming pawh ka phuah ang," a lo ti ve vat bawk a. Tluangtei chuan ,"Tehreng mai, nangman i duhthusam thlapin i phuah dawn nia," a lo ti ve nghal vat bawk a.

"Rempui, tunlai i awmdan hi eng nge a awmzia? Zanah nise, call i chhang duh ngai si lo. Message lah min chhang har thei si. Keimah lo hi hmeichhe dang biak i nei em ni?," tiin Cindy chuan Rempuia chu a zawt ve ta hlawl mai a. Rempuia chuan ,"Ka buai ve ṭhin tho a," tih chiahin a chhang a. Mahse, Cindy chuan a ring lo a ni ,"Zan dar 11:00pm thleng thlengin eng nge i thawh ṭhin a?," a ti let leh a. Rempuia chuan ,"I van mak tak e aw, min ring lo ve hrim hrim a nihkha tiraw?," a rawn ti lêt zek leh nghal a. Cindy chuan ,"Ni e, ka ring lo che a lawm," a rawn ti ve nghal hluk a. Rempuia chuan ,"Engvanginnge min rin lohva?," a rawn ti ve leh a. Cindy chuan ,"Rin turin awm miau hek lo che," a rawn ti leh hluk a. Rempuia chu ngeiawm zet hian a nui huk huk a ,"Huh, min ring lo tu lakah hian ka rinawm reng nachhan tur ka hre lo. Mipa duh ang pawh ti hlawhtling thei lo i nihkha," a rawn ti let leh zêk a. Cindy chuan ,"Chuti chuan maw kan tih dawn a, mi rinawm lo hi engatanmah ka ti bik hleinem. Min rawn be tawh hlek suh ang che," a ti a, Rempuia kiang aṭang chuan a kalsawn nghal a. Rempuia lah chuan ,"Huh, kal daih rawh, engatanmah ka ti bik lo che," tih pah chuan Cindy kal liam tur chu nêr sawk pah chuan a thlir zui hram a.

"Nu, Pa, ka pum a na lutuk," tiin Tluangtei chu a khumah chuan a mu kawm chal mai a. A nu leh a pa pawh chu rang zetin Tluangtei room lamah chuan an rawn tlan lut nghal vat a. Tluangtei nu chuan ,"Bawihte, nau i vei dawn a nih hi. Pa-a, motor kha lo han la chhuak la, Bawihtei hi Damdawiin lamah kan kalpui vat a ngai a nia," a rawn ti nghal chûl a. A zan a zanin Tluangtei chu Damdawiinah an tlan phei pui nghal a. Mzi pawh a rawn thleng rang kher mai.

Zan dar 9:30pm-ah chuan Tluangtei chuan fanu duhawm tak a nei ve ta. Nurse chuan nau neihna room aṭangin naute chu a rawn pawm chhuak a. Mzi chuan a lo pan nghal chat bawk a ,"Awiii, a van duhawm reuh tak," tih pahin naute chu Nurse hnen aṭang chuan a la nghal a, duat tih hriat takin a pawm nghal hle hle a. Tluangtei nu leh pa pawh chuan an lo pan ve nghal vat a, an hlim tlang kher mai. Naute leh naute nu chu an khum turah chuan an muttir nghal bawk a. Tluangtei chuan ,"Naute hming chu Mzi'n a phuah dawn a," tih pahin Mzi chu a rawn melh a. Chau viau e ti lo chuan, a nui sâng mai a. Mzi chuan a kutah a lo vuan vat a ,"Hming nalh deuh ka hual lawk tawh a lawm," a lo ti ve nghal vat bawk a. Tluangtei Pa chuan ,"A nu Mzi chuan a duh ang takin a hming chu phuah ngei rawh se," a lo ti ve bawk a. Mzi chuan nui var var chungin ,"Bawihtei hming tur chu Malsawmzuali aw. Keimah leh a nu hming chawiin aw," a ti a, naute chu a en a, a nui leh var var a. Tluangtei pawh chuan ,"Yes, a nalh lutuk ringawt," a lo ti ve nghal vat bawk a. Mapuia chuan ,"Malsawmtluangi leh Lalmuanzual hming chawiin Malsawmzuali, immmm, a nalh lutuk e," a lo ti ve bawk a, an hlim tlâng dar dar hle mai.

Naute birth cerificate siam a hun ta. Naute pa hming atan Rempuia hming dah chu tuman an duh lo. A chhan pawh khati khawpa an fanu tina tu leh ama thisen zawm ngei a fa pawh duh lo tu kha a ni miau si a. Naute pa hmingah chuan Tluangtei nuṭa Zonunpuia (Mapuia) hming chu an dah ta a. Naute a rawn len hunah pawh Mapuia chu 'Ka pa' tiin a ko dawn a ni. A chhan chu, 'Pa' ti a koh tur nei lova hringnun chhiar tir chu an remti lo a ni.

Hun leh ni a liam a, Malsawmzuali pawh kum 1 a lo tling ve dawn ta reng mai. A piancham lawmna programme pawh ropui taka tih an tum a ni. A piancham lawmna niah chuan Mzi leh Tluangtei pawh an buai kher mai. Chutia, buai em em a an chêt vel lai chuan tu emaw hian door bell hi a rawn hmet ri ral ral a. Tluangtei chu hmanhmawh zetin kawngka lam pan chuan a kal phei nghal vat a. Kawngka bul a va thlen chuan hmuh thiang lo hmu ang maiin a ding nghal chawt a. A hmaa ding chu mit khap lêk lovin a melh tlawk tlawk ringawt a. A rei tak êm avang chuan Mzi chuan a rawn ngaihven nghal vat a ,"Bawih, i ṭha maw?," tiin Tluangtei kokiah chuan a rawn vuan a. Tluangtei pawh chu a in thing harh nghal vat a, a hmaa mipa ding chu bia in ,"Eng nge i duh?," a ti bung hmuk a. Mzi erawh chuan engmah a sawi lo, ngawi rengin Tluangtei chet dan tur chu a lo nghak tawp a. Rempuia chuan ,"Khawngaihin ka fanu min hmuh tir rawh," a ti tawl mai a. Tluangtei chuan a kut chu a hum a, a thinrim lutuk chu a khur thei hial nia ,"Hetah hian i fanu hmuh tuma rawn kal i nihchuan, hmun dik loah i lo kal a ni ngei ang. Khawngaihin hmun dangah i fanu chu va zawng zawk mai ta che," tiin thinrim tih hriat takin, Rempuia chu a melh râm râm a. Mzi chuan Tluangtei chu khap beh a tum lo; a chhan chu, a ṭhiannu rilru natna chu a hriat thiampui mai ni lovin a ṭawmpui a. A duhtawka a in hrikthlak theih chu a duhsak a ni. Rempuia lah chuan ,"Khawngaihin ka fanu min hmuh tir hram rawh," a ti leh a. Mahse, Tluangtei chuan hmuh tir a tum lo chiang kher mai ,"Nang hi ka hre ngai lo che a. Helai hmunah hian i fanu a awm lo bawk a, khawngaihin min kalsan tawh ta che," tiin Rempuia chu chê lo châng lovin a melh kal mai a. Rempuia pawh chu beidawng zet in a kal ta hnû hnû a.

Sitting room-ah chuan Malsawmzuali leh a pa Mapuia chu an lo infiam mek a. Tluangtei leh Mzi chuan ngawi rengin an thlir reng a, Tluangtei chuan Mzi kutah chuan a rawn vuan a ,"Nang hi khawvela ka ṭhian ṭha ber i ni. Engtiklai pawha ka kianga i din reng ṭhin vangin ka lawm e aw," tiin a ṭhiannu hnenah chuan lawmthu a sawi leh malh malh a. Mzi chuan ,"I laka ka bat a nihkha," a lo ti zawi sap thung a. Chutia an din dun reng lai chuan, Malsawmzuali chuan nui sen sen chung hian fiah lo zetin ,"Amaaa," tih pahin an lam chu a rawn hawi a. Mzi chuan ,"Tu pawh hian kan tuh rah chu kan seng vek ṭhin. I fanu pawh hi i tuh rah a ni a, ṭha deuhin enkawl la. Nangmah anga hmeichhe chak ni turin zirtir ṭhin ang che aw," a ti leh siam siam a.

Ni e, mi tu pawh hian kan tuh rah chu kan seng vek ṭhin. Rempuia pawn a tuh rah chu a seng ve mek bawk a, hmeichhe tam tak rilru a lo tihnatna te leh an nun a lo tih chhiatsak ṭhin na te khan, tunah chuan a vaw let ve mek a. A lo chhuan ve em em ṭhin a hausakna te chuan an kiansan zova, a hmelṭhatna te chuan awmzia rêng an nei ta lo. Hlimna ûmin a duh danin a nung a; mahse, tunah chuan a duh loh dan hlira a nun a ngai ta. A rila rah a fanu a hnâwl hnu chu hmuh châk viau mah se, a fanu chuan ani chu amah hringtu a pa a ni tih a hre ve lo. A chhan pawh, a pian hma hauhin a hnâwl vang a ni. A nun ti hlim tu hmeichhia a tawng ve a. Mahse, chu pawh chu a hringnun aṭangin lakbo sak a ni leh a. A hringnun hman mekah chuan hlimna aiin hlim lohna a tam zawk a ni. Chung zawng zawng pawh chu a tuh rah vek an ni si a.

Tluangtei te nufa erawh Pathian malsawmna dawngin, hrisel ṭha takin an nung chho zel a. A chhungte leh a ṭhian ṭha ber chuan an phatsan ngai lo. A theih tawpin Pathian a hnaih a, a fanu pawh Pathian lamah a hruai hram hram ṭhin. Tlangval awmṭha duh lo ṭhenkhatin kamchhe tleuh nan 'Nuthlawi thar lâm' tiin chhaih fo ṭhin mah se, hnual phah nan a hmang ngai lova. Chak tak leh chhel takin a awm hram hram ṭhin, a fanu chu engkimah a dah hmasa ber ṭhin a. An nufa tana ṭha lo tur ni a a hriat chu eng thil mah a ti ngai lo. A hringnuna thil thleng tam zawk te chu a duh dan ang diak diak ni lo mah se, tluk phah nan hmang mai lovin in tih chak nan a hmang zel zawk ṭhin.

***** A TAWP TA E *****



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)