HMUHSITNA ROHLU By - Mala Varte

Ngaia
Site Admin
Posts: 25813
Joined: April 30th, 2016, 4:07 pm

HMUHSITNA ROHLU By - Mala Varte

Unread post by Ngaia » February 17th, 2021, 6:58 pm

75k1x0gw.jpg
HMUHSITNA ROHLU

(Competition 2021)

By - Mala Varte

Thingtlang naupang, thlasik lai a vûr dawh a, sava leh sazu thang kam a in awmtlei a hlimna hmu ṭhin kha Mizoram khawpui ber Aizawl a high school kal turin chhung te'n ruahmanna min siamsak ta luah mai le ! A sang ema ka phaklo a ni tih ang mai in kan khua aṭang hian Aizawl hi a hla ema ka zuam lo a ni tih mai ka duh, mahse, chhungkua a keiai thu ṭhiau te thuthlukna leh ruahmanna chu kei âk za hnih rawng lo lehnghal tan chuan hnial mi ani miau si lo. Aizawl ah chuan in lian pui pui leh motor a tam lutuk asin an tih a thu a kan hriat ṭhin kha a tak ah hmu in ka chenchilh ve dawn chu a ni si a, engtin tak awm ang i maw ti a ka ngaihtuahna a kal thui ṭhin viau lai in admission tihna tur school zawn chawp kan ngaih dawn avangin school luh hun hma deuh fe ah Aizawl lam pan in ka pa he lei a ka mi ngaihsan em em nen kan liam ve ta rawih kha a nia. Beisei ang ngei in Aizawl chu alo pui ngei mai, thler tinah ka hawi hu hu a ni ber a, rei kan awm hma in school luhna tur kan zawng kual a vanneihthlak deuh mai in Aizawl a sorkar school lian ber zinga pakhat ah seat ka chang ve hlauh mai a, school kalna tur te kan tih fel hnu in ka nutei te ina awm tur in ka pa chuan min hnutchhiaha min haw san ta a, a haw zana ka lunglen zia tak kha aw.

Ni a liam a, school luh ni alo thleng ta, school a naupang lokal khawm te kha an tam emaia kan school thar a lut ve vek tur annih kha ka ringlo hial a, kan khua a kan kawmthlang pa boral ta pawh kha a lo kalve reng lo maw tih rilru ka pu ṭep hial anih kha. Thlakhat lai mai kan kal hnu chuan ngai ah ka nei chho ṭan a, ṭhian tih tur pawh ka neive ta nuam pawh ka ti ve ṭan viau mai mahse hmundanga awm bo ngailo tih tak ah mahni khaw lam ngaih chu a reh thei meuh si lo, pen tui a ziak pencil nawhrehna a nawhreh tum ang hlauh a ni.

School kan luh ṭan aṭanga thla li na ah first term exam kan nei a lehkha zir bak lenna tur leh tih tur dang em em nei ta lo chu kan class ah pahnihna ka hauh hlauh mai, thingtlang lamah pakhatna hauh ṭhin mah ila khawpui ah em chuan hetiang a sang hi ka thlen ka rin loh em avangin ka lawm kher mai. Zirtirtu te duhsak ka hlawh ṭan a, class dang ah pawh min hretu an awm phah thuai ta reng a, school pawh a hma ai ngawt chuan nuam ka ti ta viau mai, sport nikhua ah ni se thingtlang nun hrualchhuah ngal char chin ngat ka nih vang nge ni football ah pawh ka rum ve viau ṭhin mai, ka thiam vang em em ni pawn a langlo mahse a langsar pawl ka ni ve thei tlat vanneih thlak tak a ni. School nuam ka tih lehzual na tur kei thingtlang rawlthar hi in exam na a ka tluk loh Lalrinsangi (Sangtei) chuan min haw lo mai nilovin ṭhian aia thuk in laichinna min neih pui a hrehlo tih ka hre leh ta zel a, mahse ka nuna hmuhsitna leh diriamna ka tawrh phah na tur ani tih reng ka hre pha hauh silo. Ni e, Sangtei hi a fel ema, ka mit ah chuan ani ai ṭha an awm biklo tlat a ni. Sangtei pa hi police ani a anu erawh in an thawmhnaw dawr a enkawl thung, retheihna hre miahlo in a sei lian a kei erawh thlantui hlut zia naupang te ni chung in ka chiang em em thung kan dinhmun in thlauh zia chu khaikhin chi pawh a ni lova khaikhin tih ṭawngkam hian a khaikhin pha lo hial zawk awm asin, mahse a vawikhat nan bialnu ti a sawi tur ka nei ve ta. A hma zawng ai in school chu a nuam a, inrinni leh Pathianni te hi ka tan chuan ni Sakei a ni a, thawhṭanni mi te'n ni Sakei an tih hi ka tan chuan ni duhawm ni Ṭhuro ani hawt e, ka hmangaih hmasa ber ka hmuh theihna ni inṭan ni ani tlat alawm le. Chumi kum chu ka huphurh ai in ka kum hman tawh a zawnga kum khat rei ka tihloh ber ṭum a ni hial ta ve ang.

Thla leh kum a liama, Sangtei nen pawh kan la in zui ve zel mahse langsar lutuk a in ngaihzawn erawh kan ngam lutuk lo chutih rual in min chhaih a min fiam tawk erawh an awm zut tho mai, mobile phone la awm hek lo school a kan inhmuh leh ban a an in a engemaw changa ka kal kual ve ṭhin tihloh ah chuan inkawmna leh inbiakna hun leh hmun a awm lova, chuti chung chuan ka engkim a ni a, a hmuhlaia zirtirtu te hrem nih leh thiamlo nih ka duhlo a ka va ṭang ṭhin tehreng em, mahse english subject ah ka tluk loh ṭhin em avang in exam result ah erawh a ti ṭha zawk a ni leh nge nge ṭhin. Sangtei ka duhna leh ka hmangaihna chuan ka phu lohna te leh kham kar a thing sang taka nauban par ka thliah phak hauhloh tur ang ani tih ka hriatna te chu a hneh zova, a zûn neih zawng zawng chu ka phur vek ni mai in ka hria.

Thawhlehni a ni a, Sangtei chuan an in a kawi a thingpui in tur a min sawm tlat avangin inthlahrung tak chung in ka zui veleh ta nge nge a, an in kan luh chuan a nu leh an awmpui nu an lo awm a, Sangtei inthlak a room a a luh lai a a nu in ka laka a ṭawngkam hman chuan ka khawvel leh ka hlimna min laksak zo ta, " thian satliah innilo tiraw, inlo in ngaihzawng ange chhungkaw phu tawk hriat tur" min tih khum a nih kha. Ka sa chhuak veka zah luat ah lu leh ban chhum thei ni se a chhum mai nilo in a sawm vek hial ang chu ka na takzet ani mahni lo mah a inthlahrun naklai in. Sangtei in thlak zo pawh nghah chhuah chi nita lo chuan ka haw nal nal a khami tlai aṭang khan ani ka tleirawl lai hmangaihna thianghlim tak chu up beh a alo awm tak ni Sangtei chuan min haw lo, min la duh tih ka hria mahse engtik ah mah ka ta ani thei ngai dawnlo tih ka hriatna chuan min hnaih tir ngam tawh lova, ka taksa chuan a hlat a ka rilru erawh in a hlat thei silo. Chhungte in aṭanga school kal ve mai engmah chhuan tur neilo tlangval hre ṭan ve chauh tawrh ah chuan ana ve em asin. Pi leh pu kei chauh pawh nilo ka chhungkua hmusit tu neih ai chuan mal leh khawhar tak a ka hmangaih hmasa ber chu kalsan angai ta, a ṭulna vang chauh ani nilo se engtik ah mah ka thlah phal tawp loang le.

Hun a kal zela hmuhsitna ṭawngkam ka dawn ka thinlunga ri tluk tluk ṭhin kha dawn nawn ka duh tawh lova, ka zirna ah theihtawp ka chhuah a ka hlawhtlin hun chuan ka duhzawng leh hmangaih pawh ka nei ve thei tawh ang tih rilru ka pu reng ṭhin. Vawikhat hlawhchham na hi a tawpna ani lova a bul ṭan na zawk chauh alo ni si. Ni e, Sangtei nu khan ti tak khan min ṭawngkhum in ka chhungkua hmusit lo ta se ka tumruhna leh rual ka el na rilru kha ka nei pha kher lovanga, kha min hmuhsit na avanga theihtawp ka chhuah na te chu Malsawmin a awma ka phak tawk a sawrkar hna ṭha tak ka neih te hi ka nei kher lovang le. Kha tleirawl lai hmangaihna leh hlimna khan par chhung hman lovin leh chhum leivak ang chauh a ral leh mai ni mahse hmangaih hmasa ber nih ai a ka hmangaih hnuhnung ber nih thlang zawk tu Kirby Lalramchhani nu Zothanmawii hi kumtluang a runlum nuthai atan ka nei ta zawk anih hi. Ni e, Sangtei nu min hmuhsitna kha ka tan chuan malsawmna a ni a, hlawhtlinna ka chan theih nana a chahbi ani bawk, kha HMUHSITNA ROHLU ngei mai kha



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)