DRUGS ZUAR IN TI MAW?? Ziaktu:Hluhlui Chhangte.

Ngaia
Site Admin
Posts: 25813
Joined: April 30th, 2016, 4:07 pm

DRUGS ZUAR IN TI MAW?? Ziaktu:Hluhlui Chhangte.

Unread post by Ngaia » February 18th, 2021, 5:38 pm

oic6ol3g.jpg

DRUGS ZUAR IN TI MAW??

(competition 2021)

Ziaktu:Hluhlui Chhangte.

"Hello,aw ni e,ka lo kal nghal ang,"pangai taka tih leh ka night dress thlak ka rual nghal a,tunah hian kan ṭhenawmnu a pum a nat vak avang leh nau pai lai mek a ni bawk nen a pasal mangangin min lo call harh tawp a.

"Khawnge Manuni chu?"

"Room ah a awm helamah,"a pasal chuan tiin an room lam kan pan dun nghal a ,an nau neih a la hun loh thu leh thla ruk chauh a la nih thu chu min hrilh pah nghal zung zung a.Manuni chu ka buaipui nghal a,a na ti lutuk chu a thlanfim te pawh a rawn chhuak ṭiam ṭiam tawh,thil awmdan a diklo tih hriain ambulance ka call nghal a,damdawiin kan thlen chuan amah enkawl ber ṭhin tu Dr.Zonuni chu emergency thil vanga hospital-a a awm lai a lo ni hlauh a,a lo buaipui nghal vat .Ka doctor pui leh ka ṭhianṭha a ni bawk a ,damlo tana a inpekzia hi ka hrechiang hle.

In ka thlen chuan zing lam dar 3:00 a.m a lo ni tawh a,mu chung chuan thil ka ngaihtuah mai mai a.Tun hmaa min hmusit thei em em tute,min chhaih a,min ngainep tu,ka mittui vawi tam min tih tlak sak tu ho kha engtin tak awm ve ang maw?An la chapoin,an mil loh te chungah an hausakzia la pholang thin hlawm tak ang maw?Nge ni ang a an nunhluite an lo sim tawh zawk,a nih loh pawn hna ṭha tak an lo thawk ang a,an la chapo reng zawk....bla bla bla...ka ngaihtuah peih tawh lo,an duh duh in awm hlawm teh se .

"Ellen,Ellen bawihte harh teh, hnaah i kal dawn lo em ni?,"ka mutthilh leh lai pawh ka hre lo.

"Aw pi,ka lo tho,"zimar ṭuah ṭuah chung chuan ka ti hap a.

"Awle,eitur ka lo siam ang che aw,"nui sen sen chung a tiin a chhuak nghal a.

Damdawiin ka thlen chuan nidang ang thoin ka hna ka chhun zawm nghal a,thil thleng danglam a awm hran lo.Bân a hun a garage awmna lam ka pan lai chuan ka mi hmuh duh ngai loh ka hmu thut mai a! Ka meng zau kawk a,ka hma a hmeichhe ding pawh a meng buai nak a,min en rei ngam lo ni awm tak hian hmun dang melhin min kalsan ta a.Ka hmu thut hamhaih bawk si chuan chet nachang pawh ka la hrelo,ni e ani kha Lucy ngei a ni.

In ka thleng a ,ka room ah lutin ka mu nghal .Kan hostel a ka ṭah zawih zawih lai ka mit thlaah lo langin ka rilru a rawn na thar leh.'Pa neilo' tia min auh nawmnah a,min chhaih ṭhin lai te kha ka bengah hian a ri nawn tlut tlut a,ka pa chungah ka thinrimna a zual sauh bawk.

"Ka fa hi ka duh lo,ka pawm lo a ni,"tia sawitu chu a hma a ding hmeichhia chuan mittui tling pamin a en kar a.

"Naute kha titla la,i duh te chuan midang fa i pai mai dawn nia;mahse,keihian fa neih ka la duh lo,"pawisak nei lek lovin aw thum bul mai chuan a tih zawm leh a.

"Naute pian kha ka phallo,nilo ka nun tihrehawm tura a pian ka remtilo,nang nen a awm dun ngat phei chu ka la suangtuah ngailo hrim hrim."

"Engtin nge i tih theih zawk?,ka thianghlimna hial ka hlan che a,"ṭap zawih zawih a hmeichhe thinlung keh sawm vek tawh tih hriat,dam leh thei ngai tawh lo tur chuan a ti ve thei hram a,a awah chuan a natnate chu a lang chhuak hial!Chu mipa chuan a hmaa hmeichhe rilru natna te chu hriatthiam chu sawi lo khawngaihna a nei hauh lo.

Ni e,kei hi ka pa lakah chuan he khawvel êng hmu ve thianglo mai chauh ka ni.A fa ngei pawh duh lova palai lo tir a titla ngei tura thu lo chah tu ngei ka pa kha,amah avangin 'pa neilo'tiin school ah pawh chhaih ka ni thin.Ka lo ṭhang lian zel a,mi zingah ka inkiltawih phah a,pa ka neih ve loh na khan hmeichhe naupang kum sarih mi lek kha min vel ṭap zing em a sin,ka thiante'n an pate an inhruai tir a, an len tur thu leh thil mawi tak tak an lei tur thu an sawi ṭhin lai khan keichuan sawi tur pawh ka neiin ka hre ngai hauh lo a nih kha,ka tana tawrh leh hriatthiam a har ṭhin zia te kha.

Ka mittui chu a rawn luang zawih zawih a,ka ṭhiante ka awh theihzia kha!Kei leh Pathian chauhin kan hria ang.Naupang mah ni ila ka nu ka chhun em avangin ka fing em em a ,ka hrehawm tihna te leh pa ka duh ve thu pawh ka nu ka hrilh ngailo.Ka mittui chu ka hru tawk a."Ani khan pa nih a phu lo," tiin ka phun chhuak sap a.

Huaisen tak chungin ka nuin min paitlang a,tun hnu a mi sawi ka hriat dan in khan palai kan in a lo kal ho khan an inchhir thu leh ka nu huaisen an tihzia te,an zah zia te,engtikah mah an inthiam theih tawh loh tur thu te an lo sawi ṭhin a ni awm a.

Ka ngaih ve dan chuan an palâi hma khan an palai chhan tur an hre reng a chutiang chung pawhin ka pa kha hnial lo in palâi hna an rawn thawk a ,an duh chuan palai ah an ṭang lo thei reng mah se an tilo.An tana tangkai hauh lo turah inhnamhnawihin an dam chhung hun inthiam loh nan an hman phah ringawt a .Thil nazawng ah inhnamhnawih hi a ṭha reng lo a ni.Keinin ngaidam mah ila ,thil chu a nih dan turin a thleng vek tawh,ana tur zawng zawng pawh ka nuin a nat pui vek tawh a. Kan ngaidam emaw ngaidam lo emaw ka nu natna kha a kian phah dawn tawh chuang lo.

Kum 10 ka nihin ka pu in min boral san a ,inchhung enkawl bertu a lo ni bawk nen kan khawsak a har chho zel a. Ka nu lah nise kei min pai khan pawl 12 zirlai chauh a nih avangin hna nghet a nei lova.Nitin thingpui dawr ah cheng 200 hlawhin a thawk thin a.

Ka pi hian lung natna a neih avagin hna a thawk thei lova,khatia ka puin min kalsan kha tuar lovin a lung natna a lo chhuak a ,doctor te chuan a lung kha a rang lama thlak a ngaih thu leh a thlak nan cheng nuai 20-25 inkar a ngaih thu an sawi a.

Ka nu mangang lutuk hmel mawlh kha ka theihnghilh theilo,chutih lai karin kan in luahna ka ni te ngei chuan chhuak turin min lo tichhen a,ka nuin kan chhungte dang dang a be kual a ,anni lah chuan kan dinhmun chu nga tan mah ngai loin min ngaihsak duh hauh lo a.Khami ni a ka nu mittui hru leh zeuh thin te kha a hmutu nih a nuam hauh lo.Tun hnua ka ngaihtuah let hian ka nu kha ka khawngaih a ni.Ka nu kha a lo va mangang nasa dawn em!

A tawpah drugs a zawrh phah ringawt a,tuna kan in Bazar veng a mi hi a lei a,a hma chuan in chhe te a ni ṭhin.Drugs zawrh kha a duh bik hauh lo tih ka hria.Kuva,tuibur leh sahdah tak ngial pawh tiduh lo mi khan a chhungte min chawm nan leh kan dam khawchhuah nan dan phalloh thil a ti a. Dan phal leh phal loh ngai pawimawh tur khan theihna a nei miau tawh lo.

"Bawihi, i thil chah a lo thleng a lo endik lawk la,"a rawn au lang lang a.

"Awle,ka lo kal ang ka nu"an awmna lam chu ka va pan phei a.

"Hei,i ni te an lo leng a "harsa tih hmel fe a ka nuin a rawn tih chuan ka awm zawn a rawn tawt nghal up up a.

"Bawihi ,doctor i ni tawh tih te kan lo hria a,i tet lai aṭang tawhin nang hi chu i inzir puithling ngei ang ka tih ṭhin kha, "tia ka niin nui ṭhaw chunga a lo tih chuan nuih za lo zetin ka khi ve suk ringawt.

"Ni e, sum ka thawkchhuak a ,tute emo ang lo takin midang pawh an harsatnaah ka theih tawpin ka pui bawk a" ngei awm lek lek a tiin ka room lam ka pan san daih a ,an meng khup zal zal kha ka hmu hman reg.

"In hi dawr atan kan siam duh a,hmanhmawh takin in lo inthiar chhuakdawn nia,"mit meng ling hlar a ka niin ka nu a hrilh lai te kha ka mitthlaah a lo lang zut zut a.

"Mahse ka u,kalna tur kan nei hleinem,khawngaih takin tiang hian kan chungah ti lo hram rawh,"tia ka nuin inphah hnuai taka a ngen pawn awnzia a awm lo a nih kha.

"In duh leh kutin dawh ang a,in duh leh in taksa peng in hralh ang a,in duh leh in inzuar ang a ni mai lawm.Kan inluah tur hian kan duh ngai lo che u,chhuak rang rawh u,"ti ṭhawtin vak vai turin min hnawtchhuak kha a nia.

A thusawi zawng zawng te kha a thleng lo hial emaw tih turin an rawn khawsa ngam vel nia.An va han zak theilo tak.Kan mamawh lai ber a min hnawtchhuaka vakvai tura min hnawtchhuak tu kha an nia,ngaihdam har ka la ti fan.

Kan chunga khatiang an ti chung khan an rawn kal ngam hi mak ka ti zawk.Ka nu khan damdawi chu a zuar ngei mah se a zuar rei hran lo.A hlawk em avang erawh chuan pawisa erawh kan ngah hman phian. Puanthan dawr a siam hnuah erawh a thil zawrh ṭhin pawh a chhunzawm tawh lo a.Kan nunphung pawh a pangai ta viau reng a.

Hostel ah board exam tur vangin ka awm a ngai a,ka awm ta reng a,a thiam thei pawl pawh ka ni.Mahse hmeichhe awm khawm ta na na na chu min ngei tu,rel tu leh er tu pawh ka nei ta thuai a.

"I nuin mi a hrai ruih thin vanga lo hausa ve mai mai in nih kha,pa pawh nei ve tawp silo,zak theilo lutuk mai,"tiin Lucy khan hmaichhanah min an khum a nih kha mah se ka chhang let hran lo.

"Nang ang poisa bawlhhlawh hmanga chhawm seilen hi kan school hian kan mamawh lo,tih hming ṭhat aiin i thisen bawlhhlawh khan a timualpho zawk."

"Kan school hi midangin min hmuh hniam phah ngawt ang,mi bawlhhlawh kan kawl bawk nen...... Uiiiii!!!!keichu ka zak ngawih ngawih,"mitmeng ngeiawm tak leh huatna a khat chuan min en ran a,ngeiawm zet hian a nui vak vak a.

Ka mittui tla chu hruk zawh sen rual a nilo,ka nu min hmangaih em em tu kha tiang tak hian a ni maw an lo ngaihhniam.'Mi hrai rui thin' a tih te kha a awmzia pawh a sawi tu ngei khan a hreawm top silova,kei aia lehkha thiam lo fe zawk khan an hausak vangin zah a hre lo in mi dang a hmusit chu a nia.

Ka nuin tumah a pawnga takin a hrai rui lo,drugs chu a zuar ngei mah se a ti ṭhin bakin a thil zawrh kha an lei ngailo.Zuar lo pawh nise ,a ti ṭhin kha chuan an tih loh phah lo,a zuarte chauh hi kan dem hlur a,a ti ṭhin te kha lo thi tase a zuara te tho kan dem leh a.Ni e,an dem awm loh chu ka tilo,an thiam e chu ka ti hauh lo mahse a ti ṭhin te khan an duh vanga ti an ni tih kan hrechang tawh lo a.A ti ṭhin awm lo tase chuan a zuar tu pawh an awm lovang,chutiang bawkin a zuar tu awm lo tase a ti ṭhin an awm lovang,an dinhmun a inang reng tih hi tinge an hriat tel thin loh le.
A zahawmna leh hmingṭhatna chan nawn leh huamin min hmangaih tu ka nuin kan tana a thil tih chu amah hmuhsit phah leh endawng nan an hmang ta si a.Kei min pai avanga a zahna leh mualphona a reh ṭan chauh a,a dinhmun pawn zia lam a pan lai mek in a tawrh nawn leh a ngai si a.

Tu nuin nge mahni fa hrin ngeite riltam dang chara awm a,hrisel loh nain a tlak buak,thawmhnaw hak tur mumal pawh neilo,taksa chak lo leh dawrawm tak neia,a mit menga a rualawhna leh nun phung pangai tak a duh vena lo lang chhuakte hmu thei bik ang?A mamawh lai khan puitu pakhat tal hmu se he thil hi a tih bik a ngai kher lo ang.

Ruihtheihthil zawrh kha a ṭha lo,a ṭha hlawl lo;mahse,ka nun lo nawm ve nan leh ka pi tan anin a nun pumpui a hlan a ,miten a thiltih chhan hre lovin ngainep mahse ka tan chuan ka khawvel ,ka engkim a engkim,min hmangaih em em tu,he khawvel a nu ṭha ber a ni a.Miin a nun hlui vang leh a thil tih ṭhin vangin hmusitin,dem mahse kei chuan kha ka nu a chhungkaw tana a theih tawpa beitu kha ka zahpui ve ngai lo ang.

NU,KA THINLUNG ZAWNG ZAWNGIN KA HMANGAIH CHE,KA TAN I NUN PUMPUI I HLAN A,KA KHAWVEL I NI.

*A tawp ta*



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)