'KA HRINGNUN' BY Linda Lalsangpuii

Ngaia
Site Admin
Posts: 25813
Joined: April 30th, 2016, 4:07 pm

'KA HRINGNUN' BY Linda Lalsangpuii

Unread post by Ngaia » February 24th, 2021, 9:04 am

'KA HRINGNUN'
(COMPETITION 2021)
.
.
"Mahni nupui te kut thlâk fo ringawt mai, a mipangai phâk loh thlâk lutuk" ka pâ thinrim taka a ṭawng ka hriat vawikhatna ani hial ang. Pa ṭawngtlem tak ani a, azaidam hle in ka hre bawk. Tunah hian ka thlavang hauh in ka pasal a hau mek ani.
.
.
"Ruatkimi pawh hi a diklo ve bawk alawm, engemaw hlek hi lâk thutak vak aching a, na tak in kut athlâk pawh anihloh kha, chutia hauh chiam chiam angailo. A rêng rêng ah khatiang mai mai tlân na tham atlinglo, i no leh lutuk" Ka taksa a sil ṭhem ṭhum a, ka biang ahnek na phei chu a duk churh mai, chu thil hre vek chung chuan, ka nu in a fapa thlavang hauh nan chu thu chu ala sawi thei anihchu! afa hrin chunga thil thleng ni sela a awm mai mai loh tûr zia hi!
.
.
" I fapa in heti khawp hian a sawisa a, i la dem ngam zâwk amaw? I va huai zâwk ve?" Ka pa in ka thlavang ahauh nat ber ṭum ala ni hial ang.
.
.
"Nangpawh hi Ruatkimi hi i ṭan leh lutuka, mahni fa hrin zawk hetia dem chiam chiam tur em mawni" ka nu chuan ati leh hlawih hlawih.
.
.
"Aaaaaaaakhai keizawng ahahthlak ka ti em mai, ihriat mai mai atan Kimkimi hi kan chhungkua a alo luh aṭangin kan fapa nen hian ka en hrang ngai reng reng lo tih lo hre rawh. I lo en hrân lutuk vang ani mahna inthlahrung dék a, a hun ahman ni" ka pa in atih tâkah chuan ka nu pawh chu angawi ve ta.
.
.
"Eng pawh chu ni teh se, Kimkim nangpawh haw angailo, va mu rawh u, Benjamin nangpawh han chho rawh, naktukah i ruih loh hunah chiang takin in nupa in titi ula, chuta inṭhen in la duh ṭalh anih chuan keini chu kan rawn inrawlh tawh lovang" ka pa in atihchuan ka pasal Benjamina chu ngawi rengin room ah alut a, ka chho dawn nge ka haw lui ang tiin ka rilru chu a insual buai nasa takzet. Ka pa chuan ka ngaihtuahna hria ni âwm takin, ka bag chu alo la a, room ah chuan min hruai chho, ka pa ka hmai zah lutuk vang ani mahna ka hâw duh thu ka sawi lui ngam ta ngang lo. Ni e, naktukah rilru fim zawkin kan titi anga, chuta kan thuthlûkna azir chuan kan nupa inkar chu a awm chho tûrah ngai ang.
.
.
Ka pa chuan khuma Benjamina mu chu ngawi rengin a thlék dauh dauh, a fapa neihchhun ani a, alakah beiseina sáng tak anei lo thei biklo, kan chhungkaw kal zel tur hma hun a kutah a awm a, hetiang mai mai hian ala khawsa ani si; tu pa nge lungawi bik tehlul ang, hmai sen ṭun chuan a thlek a, engmah erawh asawi lo, lungawilo tih hriat tak hian amelh ngawt ngawt. Bena pawh chu a meng khup lâp mai.
.
.
Ka pa a chhuk hnu chuan bathroom ah ka lut nghal, ka hmai duk churh mai chu puan huh in ka dep, a vung nasa lutuk tûr chu ka huphurh ngéi mai. Kut min thlak chhan tur âwm ang ka ngaihtuaha engmah ka hrelo, tlai lamah kan ṭhian ho in kan dine out dawn e atia, zan dar 12 velah arawn haw a, ka lo muhil tawh, alo haw hun chu ka nghak ve ngei a alo hâw har em avangin ka hriatloh laiin ka lo chahthlak san ta kha ania, chutia ka mu hle hle lai chu ka chhip sama rawn hmer vak in min rawn kek tho a, kut min thlak zui ta chiam mai ani. Ka pa in ahauh lai pawn kut min thlak chhan engmah asawi lova, amah in sawithiam pawh a tum chuanglo.
.
.
Inchhungkhurah a thinrim aniang ti dawn ila inchhungkhur hna engkim ka thawk a, mipat hmeichhiatna chungchangah thik anei aniang ti dawn ila, a thik tur anga han khawsak nan pawn hun ka nei mang silo, anihna takah chuan he in a ka mo atang hian ni khata darkar awm zat hian min daih lo ani ber zawk.
.
.
Pawnah hian ka chhuak ngai meuh lo, inchhungkhur sek rek khawih tur a awm ve renga, ka nu hetiang mize pu hi alo ni ve kher bawk nen a phûn tam loh theih dân ber ni a ka hriat fel fai taka chet chu ka nitin hna animai. Phone hmet a thian kawm na hun takngial pawh ka neilo, pasal neih hnu a chhungte in tlawh fo aṭha ngailo an tih avangin atello in vawikhat mah kan in lam ka tlawh ngai bawk hek lo. Engvanga kut min thlak ngawt mai thin nge anih ka hrelo takzet. Hetianga chhan sawi tur mumal neiloa kut inthlak fo mai hi ka duhlo, thil vei rei chi ka ni a, ka duhloh zawng chu rei tak ka hre ṭhin, awlsam taka theihnghilh ṭhin mi ka lo nilo bawk nen; vei nei reng chunga hlim lo taka nupa kar akal ai chuan kan la naupang tho bawka, fa te kan neiha kan inkar athûk tak tak hma a inṭhen mai ka duh zawk ani. Chuvang ania kan inneih hnu ah a vawikhat na atan chhuah ka tum ni.
.
.
Bathroom aṭanga ka chhuah hnu chuan khum mawngah hian a lu dawmin alo ṭhu kun bûr a, ngaihven lo luiin dressing table hma ah chuan ṭhu in ka hmai ah chuan cream ka hnawih, min en reng ani tih chu ka mitsir in ka hmu thei, ka thawmhnaw chu thlak in ka mutkawr dang ka inbel, kan inchai buaina lamah khan ka thlan atla ve hluâm a, ka rim atui lutuk lo. Ka in rin hma in ka kâwngah chuan lo kuahin ka dar ah akhabe alo nghat a,
.
.
"nṭhen lo ang" thãwp sat hian alo ti a, ka thin rim reh lam tawh a kai tho leh ani ringawt. A che zia chu ka ngaihtuah chianga, duh tâwka chhan mumal pawh awmloa kut min thlâk hnu ah engmah thlenglo ang maia min kuah lehnghal thei te chuan ka thinrim ati zual. A kut chu paih thlâ in ka thing nawk , ka thinrim chu ka so bawrh bawrh tawh ani ber.
.
.
"Enteh Benjamin naupang té in kan innei a, ka nu leh pa te rem ti lo chungin ka rawn zui che, hetiang hian kan inkar a awm chho dawn tih hre lawk ila chuan, nilo hetiang ang mihring hmeichhe kutthlak ching mi laktlâklo lutuk ini ang tih hrelâwk ila chuan ka nei miah lovang che" ka ti ve ta siah siah mai, ngawi rengin min en a, min rawn hnaih atum chuan ka tawlh hnung leh hret "Ngaithla rawh ka la sawi zo lo. I duh duh huna i kut thlak tur ka nilo. I chhungkaw mize mil tur hian ka insiam rem ve nasa khawp mai. Ka pa ka hmâi zah avang chauhin zanin hian ka chhuaklo ani tih hre rawh" ka ṭawng hnem lutuk nge ka thaw hlawi hlawi mai. Ka kut chu hum ruh ṭeuh in rum zet hian ka melh a, a insawithiam tum lo hmel te chuan ka chhungril tak meuh meuha keimaha misual awm hi a kâitho ni ber in ka hria.
.
.
Dam dáp hian min melh a, kut min thlâk tur emaw min hnial tûr hmel apu lo, chutia angawih tak rengah chuan ka thinrim lutuk vanga ka lungphu rang lutuk pawh a in thlahdul ve ta. Rei tâwk fang chutia kan ngawih hnu chuan ''Ka tihpalh'' arawn ti chhuak sap, ka lo melh ngar ngar thung, a thusâwi tur dang ka ngaichang ani ber. Chutia ka en reng tâk ah chuan "Rinzuala khan chhelo atih thu che asawia" arawn ti anihchu, athusawi avang chuan ka ṭek chhawk mai,
.
.
"Mai mai che chuan" tih leh anghawnga ben ka ruâl, min en in a nui suk mai, chûng te hlei hlei chuan min ti thinrim, min chhaihkawlh a tum zawk em mawni "Enteh, Rinzualan chhelo min tih avang chuan kut min thlâk amaw?" Âw khur der der hian ka ti chhuaka,
.
.
"Ît awm atih thu che pawh asawi" a mitko a sân zeuh, thîkna mitmeng amita la chambang reng chung chuan min hnaih zual sauh. Za lo tak mai hian ka nui lui ta hrep. Ka kawnga arawn kuah rual deuh thaw chuan a áwm ah ka nem sawk a,
.
.
"Ka ît ve em? Chhelo ka ti ve em?'' A áwm a la nem sawk sawk chung chuan a mita melh kalh in ka ti, achhânna ka ngaicháng nge; sawitur ka haihchham pawh ka in hrelo. Ngawi rengin amitah chuan ka melh kalh a, ka che zia vanga hrilhhai hmel zet chuan min melh, ani rêng asin hmeichhia te hi, nilo, mihring reng reng chuan keimahni ah hian kan nei tih pawh kan hriat loh a 'vawrtâwp' hi kan nei vek, chu keimaha avawrtâwp awm chu a hawlh thleng ni berin ka hria. Hetiang em em hian ka ṭawngthei in hlauh ka neilo ang tih ka inring ngai bik miahlo.
.
.
"Benjamin, hre rawh chutiang 'chhelo' 'ît' tih vel mai mai ngaihtuah nan hun ka neilo. I duh duh na ah nupui nei chungin i vak a, enge ka sawi? Hmeichhe dang dang nena in thlalak i status kuala enge ka sawi? I hmeichhe thlalak pui te nen tenawm takin in khawsa lo ang tih pawh hriat va ni suh. Engmah ka sawilo, achhanchu nupa inkar ah hian in rin tawn na a awm angai, i ṭhiante chhelo ti tur hian ka hmanlo. I hria em? ka buai lutuk, inu duhthusam mo ni turin nitin ka bei tih lo hre bawk rawh" ka ṭawng tâwp lam chu ka au ani ber, hetiang taka thinrim hian amah ka la ankhum ngai lo, chu vang ani mahna, mak ati tih ahmel ah alang reng.
.
.
Puan chu chhuatah theh thlâ in khumah chuan ka mu a "chhuatah khuan mu rawh, min rawn si hlek suh" tiin ka in lu khup zui ta zat, light chu a off a, a mu ve ta aniang, thawm engmah anei zui lo. Ka mittui chu alo tla ngiai ngiai a, ka ṭap tih ahriat loh nan ka insum nasa takzet. Tun ataka ka mittui tlâ chuan chak lo riák ah min inngaih tir a, tláwm ka inti hlê, tui taka a muhil nghal tur anga ka ngaihtuah phei chuan in ngaihtuah thinrim thar leh in amu lai chu zuk tlawh chawrh mai te ka duh rum rum hial ani.
.
.
Benjamina nen hian pawl sawm kan nih in school khat ah kan lut a, chuta ṭanga inhria chu kan ni. Kum tâwp lam atang chuan inngaizawng ṭan in pawl sawmpahnih kan zirlai thlengin kan inngaizawnga, pawl sawmpahnih final exam kan neih lai hian exam kan tlanbo a, haw ngamlo in kan in ru ve ta ngawt mai kha ania. Tleirâwl ât lai ngang kha ania, khang hunlai kha ka nun a kohkîr ka chak ber hun ani hial ang. Kokir thei ngat ila chuan ka nun pawh adanglam deuh tur!
.
.
Khatia kan inru ta khân reilo ah ka chhungte beng athleng a, an thin arim ngang mai, nu azawnga nu nasa ber mai ka nu chuan Benjamina te in ah chuan minlo luh chilh in min vaw chiam mai anihkha, tun hnu hian ka nu lo nat dân tur kha ka hrethiam ve chiah. A fa neihchhun, naute ang maia ala ngaih, naute cheibawl tak meuh meuha ala cheibawl khân; nikhat thil thu ah kum naupang té in pasal a ûm ania, tu nu nge thinrim lo bik ang? Fanu te pasal ûm na inchhung a luh chilha kut va thlak duh tur chu, khawvel nu tam tak zingah hian tlem te ni mahse ka nu ang thin thawk thut nei mi, thinrimna pawh hre rei leh ngai lêm chuanglo ang chi tan chuan atih âwm tak pawh ani. Min hmangaih em vang ani tih erawh chiang takin ka hria. Bena nu lah hian tun thlengin sawi nuam ala ti, ka chet sual enge maw hlek ahmuh fuh chuan ka nu in min vuak kha sawi chhuakin 'anu pawh khatiang kha ania enge maw alak ah hian beisei tur awm, engtik ni ah emaw chuan tûr in min la hraihlum vek lo ang tih pawh hriat va ni suh' ka hriat phak tur ngeia ringin ati ṭhin.
.
.
Kum 3 kan innei ve tawha, Bena chuan open ah pawl 12 a exam ṭha leh, ka pa in exam ve leh turin min ti tak nâ chu lehkha zir hi ka chem kal na anih hlawl loh avangin ka exam buai peih ta lo. Bâk ah ka nu ân hla ti tam tu mai mai bak ani leh dawn chuanglo. Bena erawh lehkha thiam thei tak ani a, angaihtuah peih leh peih loh ah a in nghat ber, tunah hian BA final year ani ve mek.
.
.
Naupang té a pasal nei ni mah ila, ka lâwi luh na chhungkua in azir ka ti dawn nge ka kum phu loh in ka puitling chak. Diktak chuan Benjamina hi ṭhen ka chak zek zek anilo. Ka hmangaiha amah pawn min hmangaih in ka hre bawk, hmangaihna awmzia min hriat tir a, atelloa hringnun hman chu ka huphurh ve lutuk tho. Kan innei rei telh telh a, mipa dang ang lo takin ache zia athianghlim renga, amah a in enkawl fel faiin, ahmel te hi atha tulh tulh emaw tih tur ani. Nula tam tak beisei tu anei ṭhin rêng a, amah pawn min hrilh fo mai. Ka nu vang hi chu nilo se he inchhung ah hian hlim takin ka awm thei ang. Tih lâwm tum poh leh fimkhur angai nasa a, a thu hla hian min vaw chau ani ber mai!
.
.
Zing lam dar li leh a chanve vel ari tawh ang, ka inngaihtuah nasat em avang chuan ka la muhil theilo. Inṭhen ta ila atha zawk angem? atha zawk lo angem? tih chuan ka ngaihtuahna ati buai ber âwm e.
.
.
"I mu tawh em?'' Benjamina chuan alo ti a, amuhil daih tawh emaw ka tia. ''Ka rilru ahah lutuka ka rui areh vek tawh'' nui hul hak paha atihchuan ka in lukhup na puan hnuai aṭang chuan ka beng ka lo dawh kár a, ''Min be duhlo mi?'' Pangchang âw taka atih leh tâk ah chuan ka in lukhup na chu hlipin ''Ben, inthen atha zawk in ka hria'' ka ti sep a, angawi vang vang. ''Min hmangaih la chuan chhan awm lo in kut min thlak fo lo ang" ka ti leh sap.
.
.
"Ka hrelo, ka thikthu hi achhe lutuka, ka duh vang anilo, ka insum hman ṭhin lo ani. Ka tihpalh tak tak" mangan hmél tak hian alo ti a, ka khawngaih leh tlat tawh.
.
.
"Aih, englo hmeichhe ṭhian tam tak i kâwm a, chuvang chuan keimah ah i beisei ang i hmulo aniang, kan la naupang tho bwka i duhthusam ang tak neih nan pawn ala tlai hleinem" ka ti leh sap, min chhang tawhlo, ka khumah chuan alo bawk a.
.
.
''Kan inṭhen chuan bialpa inei dawn asin'' ati leh niah niah, mi ai bak baka thikthuchhe chi hi ani ve bawk nen, ka lainat rilru takzet. Ka thinrim areh lai reng reng ka hrelo. Ka thinrim emaw ka tih laiin ka thinlung chuan alo ngaidam fel leh dêr tawh pawh ani mahna. ''Lo mu rawh'' tiin ka bul chu ka beng thek thek a, alo in thawlh vat. A áwm ah chuan bei in nghet tak hian min kuah a,
.
.
''Hna ka neih veleh kan in dang dawn nia' arawn tih chuan ka nui ri hak.
.
.
''Lehkha pawh zir ṭha peih mang silo'' ka lo ti sap. Pasal ka neih tak hnu aṭanga ka hriatchhuah tâk chu, nupa leh inngaizawng te inkar hi alo danglam lutuk. Inngaihzâwn laiin hei ai chuan innei pawh ni ila kan in pawh leh thei tawh chuanglo ang tih rilru kha lo pu ṭhin mah ila, nupa nih a nitin dawhkân khat kil dun a, zantin khum pakhata mut duna puan sin han in ṭawm reng tâk ah chuan rilru hi alo nem thei khawp mai. In ngaihzâwn laia ni thum kan in biakloh theiha kan in tih taurau theih laiin pên thum lek dan a, han in tawh fo tâk ah chuan; chutiang ngawta rei alo thinrim theih bik miahloh.
.
.
Zing dar nga leh achanve ah chuan ka alarm chu alo ri ral ral a, phak zeta mengin ka mit ka nuai nuah nuah, ka kawnga min kuah tu hmel chu ka thlir dauh dauh a, "Engin nge kan hma hun ah hian min hmuak ang le'' ka ti rilru neuh neuh. Tho chhuakin ka ha ka nawta in phih faiin inhnuai lamah ka chhuka, ka taksa sil ṭhem ṭum avang chuan chêt a harsa lek lek. Ka chhungte lo thawh huna an in mai theih tur in thingpui siamsa chu flask ah ka daha, hmun te phiatin chhuat ka nawt a, chhuatnawhna vel ka suk fai hnu chuan ni sat tak tak hma in tual chu ka phiat fai leh rih. Ka pa arawn thawh chuan a thingpui in tur ka lo thlit chhuah sak vat a, eirawng ka bawl ṭan nghal chu animai.
.
.
''Kimkim chhuah chu i tum tawhlo ang chu a'' ka pa chuan thingpui dáwt ri kauh pah chuan alo ti a, ka lu ka lo thinga, ''athat chu nû pâ nihchuan rik bap bap chang te hi a awm lo thei lo ania, dawh hram hram rawh kan Benjamina ve hi a puitling thei rihlo anih hi'' tiin min fuih chuâr chuâr a. Ka nu pawh rawn tho chhuak in thingpui ka lo pe ve leh vat a, ka hmai chu thlek vang vang in ''Kha engtin mah a awm tawp loh kha, khatiang vanga tlan te lo tum'' min ti leh hram. Ka eirawng bawl lai chauh chu ka lo ngaihtuah thung. Ka nu ṭawng hi chu lak thutak loh hram tum ila, atheih phei chuan beng kaw lehlam ah hian chhuah tir nghal zel ila kan rilru ana lo animai.
.
.
Chaw kan ei lai chuan ''Lunglei lam mi, kan u Sanglura fanu kha Bawiha te college ah hian alo kal ve ani âwm e, Usangluran minlo bia a, private girls hostel ah a awm thina, an hostel kha an zalên lutuk deuh nge ni MHIP in an hostel an khar sak a, mahni a in luah tur chuan u Sanglura ten an ngaingam silo nên, tleirawl nun kalsual a awl hunlai ani si a, heng lamah chhungte tih tur an nei bik silo nen, an fanu kha heta lo awm ve mai tur hian ka ti ta ringawt mai, Bawiha nen pawh class an kal dûn thei anga'' ka nu chuan a tih fo ṭhin angin ka pa chu a thuthlûkna ahrilh leh a, ráwn ang deuha lang hian a thu tlukna hi a hrilh tawp zel.
.
.
''Chûng te chu in râwn hmasak ve âwm ania lawm mawle,ngawt ngawt ṭhin che hian,eng ang mi nge an nih pawh hriat va ni suh'' ka pa chuan ati ta reng a.
.
.
''Eeeeee lungngai suh Lunglei mi challang ka u Sanglura anih khu, eng ang mi vak an nilo, kan chunga leng mi an ni'' ka nu chuan ati leh hlawih hlawih.
.
.
''Che thei deuh hlek hi chu i u te hi an lo ni vek zel maia'' ka pa chuan fiamthu ti tak deuh chuan ahan ti leh a, ka nu huat tâwk a tling leh kher mai, a thleng chu chawiin a âng zui lâng lâng a, tumah phei chuan kan bengkhawn zui lêm hlei lo a.
.
.
''Tiffin i pai dawn em?'' Alo bu nghat, a tiffin pâi tur chu ka siam sak malh malh, an college canteen a an eisiam hi a ṭawp ati tlat peka, class aneih nilên dawn hi chuan tiffin apai mai ṭhin.
.
.
Chaw ei thlêng te ka seng fel hnu chuan room ah ka chho a, Bena erawh alo inbual mek, almerah a a t-shirt var chu la chhuakin ka nawta, a cotton dum chu la chhuak leh in a timberland leh mawzá bun mai theih turin ka dah chhuak bawka, a incheina tur ang ka tihfel hnu chuan a bag ah tiffin leh a phone a mamawh tur ho ka dah lut leh a, ani pawh alo in bual zo ve chiah. Min rawn kuah leh hlû hlû a,
.
.
''Ti vat vat rawh i tlai nge'' tiin a taksa huh lai thenkhat chu ka lo hruk hul pui a, athawmhnaw a inbel zawh ah chuan uluk fe hian ka biangah dawmin min en a ''Ka va han hmangaih tak che em'' ti pah chuan minlo fawp zeuh. ''Inhauh tuk ah bak i fel ngailo, kal rawh'' tiin ka lo fiama, anui ve mai.
.
.
Bena akal hnu chuan ka ni hman chu dân pangaiin a in ṭan buai chho leh ta mup mup mai. A khât tâwkin ka nu in min lo hrawk ve bawka. Ka nu min mil loh viau chhan hi ka ngaihtuah ṭhin, mahni thiamlohna hi chu hmuh alo har ve bawk nen avang ka ti ṭhin kher mai. Pasal nu te han tlawna han ti huâm mi ka nihloh avang hian keipawh ka thiamlohna chen a awm ve tho mai tiin ka in hnem ta ngawt zel.
.
.
Nileng a ṭhu hman meuhloa ka chet hnu chuan ka kâwng te chu a sil ṭhem ṭhum tawh. Tlailam dar thum rik hma deuhin Bena alo haw a, room ah kan in zui chho zat. Khumah chuan a mu thla tawp a, abulah chuan ka let thla ve tawp.
.
.
''Ilo chau em?'' Chhing vang vang pah hian ati a, ''chau lo e'' tiin amah melh kalh pah in ka lo chhang thung.
.
.
''I ning em in a awm reng hi?'' Thu tak deuh fé chuan min zawt a,
.
.
''A khat tawka ka nu in la Govinda ṭhin tihmai loh ah chuan nin nachhan tur a awm hleinem'' ka ti sap. Za zet hian a nui a.
.
.
''Hrethiam hram rawh, arei anga azia ve mai ang'' atihchuan amah en kar pah chuan '' kan indang daih dawn nia itihkha'' ka lo ti a, anui deuh suk. ''Ni tak'' ati ve leh mai bawka.
.
.
''Ruatkim enge i tih eirawngbawl ahun tawh mu zawl zawl reng mai'' ka nu arawn au leh ta chiam chiam mai.
.
.
''Chu pui'' ti pah chuan ka in beng kang vat, lo nui ri huk in ''In indawr tawn thiam fu alawm, ka lo bawl pui dawn che nia'' ati a, inhnuai lamah ka chhuksan nghal.
.
.
Bena nen eirawng kan bawl lai chuan kan titi pah mial mial a, class a a ni hman dân te chu kimchang tak in report a pe a, kan inhauh thinna ho zia te chu sawiin kan nui bâwk bâwk mai.
.
.
''Bawiha, Lily kan hruai angai dawna, lo in peih rawh. Ruatkim nangpawh Lily eirawng lo bawl kep rawh'' ti pah chuan ka nu chu phur zetin room ah a lut a, ka pa thusawi chu hrechhuakin keimahin ka nui tut tut mai. Che thei viau lo se chuan kan ina awm tur hian aduh miahlo ang le.
.
.
Ka nu leh Bena in zui chhuak pawh zân dar 6:30 velah in an lo thlenga, ka pa nen tv ah chanchinthar kan lo ngaithla mek thung. Bena leh ka nu chuan bungrua eng eng emaw an lo thiar luta, atawp ah Bena hnungah chuan ka nu in Lily atih ngei mai chu alo lut ta, Mizo ani pawn ka ringlo hial zawk. Hetiang taka hmeichhe hleitling leh hmelṭha, piân leh hmaifang engkim in vuah dik thlarh mai hi ka vawikhat hmuhna ani hial ang. A sam chu serthlum rawng deuh hian a awm a, a mawng chen vela sei ani. A thlah hnâp a, keini ang hian pu ve ila chuan khawilai kilkhawr engemaw a mi awm ṭha duh vak lo kan ang viau ang chu, ani erawh chuan a inhmeh hnâp mai, ati duhawm zual emaw tihtur ani, alang nasa ve miahlo. Inthlahrun hmel tak hian alo ding zum zât a. Ka pa pawh chuan lo chhâwnin alo be bawrh bawrh a, a âw te lah chu a thâm ṭiak mai. A duhawmin ahmelṭha si, sawiselna tur hi vang ka va han ti tak!
.
.
''Ukimkim ka lo siampui dawn che mi?'' Lily chu ka bulah alo dinga, a bula ka ding te chu ka han in hmu te em em khawpa, ka nau nise tui vawt a khawih ka phal tawp lovang le.
.
.
''Min u duh suh, kan in rual reng ang'' tiin intih nelawm tum deuh tak hian ka lo ti a, kan landân mai atang chuan ka upat hmel zawk ve em mai bawka.
.
.
''Akhaihhh.....bawihte nangchu lo ṭhu mai mai rawh. Amahin asiam thei alawm'' ka nu chuan alo ti vat.
.
.
''Ni e, lo ṭhu rawh nakinah min la pui zawk dawn nia, i chau awm si'' ka tih ṭalh pawh chuan nuam a tilo nge chaw te chu lo khawrh in fian te alo rem kual ve bawka.
.
.
Thla thum liâm hnu-
.
.
Utekimi dawrah chuan tel leh eng i lo la turin ka kal a, a kuhvarah thel tur awm chu thel puiin kan titi mial mial,
.
.
''Enteh Kim, sawi nuâm chu ani chuang lova mahse nangmah i in vên ve nan hrim hrim pawn in pa leh Lily hi enthla deuh teh miin an sawi duh teh mai ania'' atihchuan mak ka lo ti vak lo.
.
.
''An in kawm ngeih alawm. Nupui neih hnu a hmeichhe dang nen a class nitin kál dun ta na na na chu an sawi duh pawh a awm tho mai'' ka lo ti liam mai. Achhan pawh kan pa lam ai mah in Lily te ang in ka pasal Benjamina te ang aduh ka rin loh lutuk vang ani. Duh duh thing thei khawpa hmelṭha hian engtinnge keia pasal berkher chu athinchhuah teh lul ang ni.
.
.
''Oi Kim chutiang ngawt anilo. Khawlaiah pawh Lilyin akuah thuak thuak reng alawm keipawn ka hmu ve fo mai'' atih tâk ah chuan tlemin ka îp ta deuh. Mahse engmah sawi zui ta lo chuan ka lo nuih liam pui leh maia, ka rilru erawh a káp ru ve angreng hle.
.
.
Ka haw kawngah chuan Utekimi thusawi chu ka ngaihtuah chet chet. Lily hi hrechiang chu ka la inti ngamlo na in ka hre ve thaw khat viau chuanin ka in hria, ahmelṭhat mai piah lamah inchhung chet engkimah afel em em a, aṭawngduhin fiamthu a duh a, ka pa nen pawn an in ti lawm thiam fú. Ka nu tak hi chuan azar hian azar a, Lily alo awm aṭangin kan inchhungkhur bungrua apung nasa sâwt hle, ka nu hian hre khiau hek le, atlawn hiam hiam reng mai ni. Lily pa te an lo che theia, an lo â lo in, inthlahrun nachang an lo hre ve bawk nen ka nu hian ava phone chhen a, hmanni pawn va phone in ''kan fride hi achiang chiahloa,lily hian tui vawt hi angaina sia, apawi tak tak ani siam tir thuai angai'' ava ti nihchu, dil chiah silo hian lehlam te tana tih loh nuam miah silo tur hian aṭawng thiam lutuk, tichuan ani lâ lá in Pu Sanglura chuan fridge double door manto fé leina hi pawisa alo thawn nghal réng a, ka nu hian a Pathian en ka ti ber. Chapona te hi anei ve lom mawni ka ti rilru neuh neuh ṭhin.
.
.
Eirawng bawl in ka rilru chu ka kawm pah malh malha, reilo ah Bena leh Lily class kal pawh an lo bang thuaia, an lo nui lut dun leh hak hak mai. Lily chu inthlak turin room ah aluta, ka nu pawn ani hman dân te zawtin azui lut leh hnâ hná tawh. Keipawh chuan Bena chu room ah ka zui lut a, ngawi rengin athawmhnaw hak tur te ka lo dahchhuah sak.
.
.
''I mood ava fuhloh hmel ve'' min rawn kuah in ka bek ah chuan a fawp zeuh.
.
.
''Ben miin Lily nen in awmdan hi an sawi duh tehmai che u nia'' inthlahrung ru deuh tak chuan ka ti, achhanchu min ngaih kawih ka hlau ani. An chhungkaw tan Lily hi ahlu ropui si. Min en vung vung in nuihza in sum zet hmel hi apu 'Enge' ti sup pah chuan ka in la hranga,
.
.
''Yessss......thik anei ve tawh'' ti pah chuan hlim hmel em em mai hian min pawm vir anihchu.
.
.
''Min thlah rawh i mawl lutuk thik lam anilo'' adar ah chuan ka beng a, min dah thla in ka hmui ah chuan achuk zeuh.
.
.
''I thik kha'' ati sep.
.
.
''Thik lam anilo'' ka lo ti leh vat ''Ahmel aṭha a, anungchang amawi bawka, afel em em a thikna chhan tur ka neilo. Mahse an inkuah thuak thuak zel an ti che u a, fimkhur turin ka timai che lawm'' athawmhnaw hak balh chu bal bawmah ka thlak thla a.
.
.
''Aaaaaaaaa......keichu i hmelṭha ka ti daihzawk. I fel zawk daih bawk. Taima bawk si. Min duat bawk si, ka pangchang zo vek tawh, hei kawr pawh keimahin ka ha theilo'' atihchuan ka nui ri hak..
.
.
''Heihaaaa......ava mipa sawi chi loh ṭhin ve. Pasal zawk hi ka ni ringawt'' ti pah chuan a kawr chu ka hak tir a, inhnuaiah chhukin eirawng ka bawl na bulah chuan games khel in alo thu ve a. Rei vaklo ah Lily pawn kekawr bul eng chhing té ha hian alo chhuaka enge ka hriat tak ni Benan amal a en leh en loh te chu ka lo chik ru kar mai. Tlaitin hetiang hi aha ziaha engtinmah ka rilru a hel ngai si lova, Utekimi vang vek ka ti rilru neuh neuh.
.
.
Chaw eikham chuan inbual faiin kan mu mai mai Bena chuan ka kâwng na lai chu min hmeh sak paha, kawngkhar a inkik rîk karh karh chuan hawn tumin ka tho a, Bena athawh tâk avang chuan ka mut ngaiin ka mu leh.
.
.
''Kan khêl dawnlo mi?'' Nui sáng a Lilyin alo tih chuan ka va dâk chhuaka, Bena chuan minlo melh zawk, min ráwn ani berin ka hria.
.
.
''Games khelh kan tuma'' min melh pah chuan ati a,
.
.
''Eee aw khel ula'' ka lo ti ṭha ve mai, min hnial se ka ti rilru hle.
.
.
''Kan reilo ang" ti pah chuan aphone chu a phawia inhnuai lamah min chhuksan.
.
.
''Hetah pawh an khel thei reng sia'' ka ti chhuak sap. Tihtur hrelo zetin ka mu. Ka nu ka ngaih deuh riau avang chuan ka phone a, alo pick vat.
.
.
''I va buai awm em em ve min biak nachang pawh i hriat reng reng loh'' alo ti leh tâwn tâwn. A rawl hi a ring chi anih mai bakah a âw hi a pâ rût mai bawk si a, hrechianglo in kan titi hi ngaithla ṭhin se chuan thu pangai kan sawi ah pawh kan inhau reng emaw an ti ang.
.
.
''Buailo e ka phone hi achiang tawh lutuk lova'' ka ti ta ringawt.
.
.
''I pasal nu te khân aleina te chu an pe ve lo che mi. Khanu lah kha mahni fa hrin ti hlur ringawt mai'' ati leh hlawk hlawk.
.
.
''Ahhhh.....nu chutiang lam pawh anilo. Apa amu tawh mi?''
.
.
''Chutiang lam ani. Naktukah pawisa ka lo thawn che anga, athar va lei rawh. I pasal reng reng pawh hi i thlavang hauh nachang pawh hrelo'' a áng hlawk hlawka, kan inbiak lai zawng chuan a âng char char animai.
.
.
Ka nu nen kan inbiakna kan tih tâwp hnu rei fé ah chuan Bena alo la chho lo, ka va text ta tawp. Ka msg chu a seen veka min reply lo anihchu. Ka lung aphu ta dep dep mai. Ka ṭhu chhuak hlawl, chhuatah chuan ka vei kual ta sek. Ka call a min reject hmak. Rei deuh fé chu ka ngaichang leh a, zan dar 12:45 ah pawh alo la chhoh loh cheu avang chuan ka zuk chhuk ta tawp. Room kawngkhar chu ka kik dat dat a, an hawng lo. Ka ngaihtuahna ah chuan rinhlelh na hlir a awm. Kawngkhar chu ka hawng ta hmiah. Khail'eeeeeeh...Bena chu khumah alo muhila, chhuata ṭhu in Lily chuan khum a bawh a, alo muhil ve bawk anihchu! Ka phu chiang kher mai. Sawi tur hrelo chuan rei vaklo chu ka thlir reng ringawt. Mak ti zet in ka chhuahsan a, kaihthawh tumna pawh ka nei lo, kan room ka luh chuan chhunglamah kawngkhar chu ka kalh hmiah. Chhuatah chuan ṭhu sawp hnawkin thil thleng chu ka ngaihtuah a, ka ṭap mai theilo ahnu rei vak lo ah chuan insumna tel miah lovin ka ṭap chhuak ta anihkha.
.
.
Mu miah lovin ka ṭhu tlaivar ṭhak. Ka inngaihtuah nasa takzet. Zinglam dar 6:30 ah chuan kawngkhar chu Benan alo chum ri dat dat a, ka hawng lo.
.
.
''Kim lo hawng teh'' ring vak lo a atih te chuan ka hnuk ati ulh thar leh rih. Rinhlelh awm lutuka a awm chuan ka thin ati rim takzet ani. Hawng duhlo luiin ka ngaihven lo lui char char.
.
.
Zing dar 7 velah pawh eirawng ka la bawl ṭan loh avang chuan ka pa chuan kan room pawn atangin Bena chu thil awmzia alo zawta, Bena chu angawi reng. Ka pa chuan ''Kimkim enge thil awmzia lo chhuak teh, hei hna ka tlai mai dawn'' arawn tih tâk ah chuan kawngkhar chu hawngin inhnuai lam pan chuan ka pa leh Bena chu beloin ka chhuk san a, ngawi rengin eirawng chu ka bawl mial mial, tuman min be zui lo. Ka nu pawh alo la tho chhuaklo.
.
.
Chaw kan ei lai chuan ka nu engmah hreve lo chuan engmah sawilo in chaw chu a ei mial mial. Bena leh ka pa leh Lily erawh chuan min ngaichang khiau a, an mahni ngaihsak âwm pawha awm lo in chaw chu ka ei.
.
.
Chaw eikham chuan thleng te seng felin ka sil nghal thlap. Nidangah chuan Bena class kal tur ka insiampui zawh hnu ah akal hnu ah ka sil chauh thin. Thlêg ka sil lai chuan Lily chu ka bulah alo ding a.
.
.
''Nizan khan kan lo muthlu a'' inthlahrung deuh taka atihchuan ka ngawi reng ''I thinrim em?'' Ati leh a, ka chhang chuanglo. ''Ka tihpalh lutuk in nupa inkara buaina thlen ka tum miahlo ania'' atih pawh chuan engmah ka sawilo. Engmah ka sâwi duh tâk lo ah chuan min kalsan ve ta, thlêng ka sil zawh chuan pawn ah chhuakin pawn ka phiat faia, Bena chu ka bulah alo ding.
.
.
l''Ka mutthluk lai ka hre miahlo'' alo ti sap a, ani pawh ka chhang chuanglo. ''I thinrim viau em?'' Ka la chhanglo.''Ka tihpalh tak tak, ka hrelo tak tak alawm'' ati leh niah niah. Bawlhhlawh chu rut in inchhungah ka lut a, ka kut sil faiin ka nu ṭhutkhawmna pindana ṭhu chu ka pana.
.
.
''Nu, ka nu te inah ka va in ti thawveng lawk ang, naktuk ah lo haw leh ka tum dawn nia'' dil buai duh biklo in ka thu tlukna chu ka hrilha, min en há mai.
.
.
Ka pa in ''va chawl hahdam tak rawh i chhungte pawn an lo ngai tawh ang che helam te chu lo ngaihtuah duh reng reng suh. I peih chen chen va awm la, i hahdam deuh hunah ilo haw dawn nia'' atih tâk ah chuan engmah sawi zui lovin room ah ka chho a, ka inkhung fel nghal mawlh mawlh.
.
.
Ka che lai chu Bena chuan ngawi rengin min en a, ka thawmhnaw bag a ka khung dawn lai tak chuan ka kawr chu min chhuh in chhuatah a vawm a, min kuai her lawp in '' ka tihpalh ka tihkha'' tiin a au tuarh mai.
.
.
''Ka....englo....ka....ka tihpalh Kim chhuak suh, min kalsan suh'' ti pah chuan ka biangah dawmin ka chal chu achalin arawn si chial a. In lak hran pawh ka tum chuanglo.
.
.
''I mutthluk lai i hre miah lo amaw?'' Zâwi te hian fiah fai takin ka zawt.
.
.
''Hrelo ka hrelo tak tak. Kim thinrim suh. Games pawh ka khelh pui tawhlo ang. Mawh thinrim suh'' hlauhthawn hmel tak hian ati leh a.
.
.
''Ka hriat duh ka hre tawh e'' ti chauhin ka chhang. Ka thawmhnaw chu khungin ka in thlâk sawk sawka, chhuah ka tum lai chuan min kuai her lawp in a áwm ah chuan nghet zet in min kuah.
.
"Lo haw leh rawh aw,ilohaw ang tiraw?" atihchuan ''I mutthluk lai chu i hrelo takzet aniang. Ka msg pawh i seen vek a, ka call pawh i reject vat hman alawm'' ka ti sap. Min thlah in a phone chu aban a, hrilhhai hmel zet hian a phone chu a check a, min en chuan ka lo nui sak. ''I thianten min ît thu an sawi ringawt pawn ithik ania'' beidawng zet hian ka ti chhuaka, ka chhuahsan zui nghal.
.
.
Taxi hmangin kan in lam pan chuan kan tlan a, kawng tluân chuan ka inngaihtuah ngut ngut. Ka na lutuka ka ṭap theilo hial zawk. In ka thlen hnu chuan ka nu leh ka pa chuan mak ti tak hian minlo thlir a,
.
.
''Engati tehthut nge? I tlân em ni? Enge thil awmzia? An hau che mi?'' Tih chu min zawh chhawka.
.
.
''Ka ngai che u a, ka lo awm rih dawn'' tih chauh chuan ka chhang. Achhan kimchang tak erawh ka hrilhlo.
.
.
Ka nu leh pa nen nilengin hun kan hmanga nu leh pa te hlut nachhan ka hriat belh leh ta, eng anga rilru hah pawh ni ila, an kiangah chuan rilru hahna zawng zawng a bo vek thei, chutiang khawpa nasa chuan min lo thlamuân thei alo ni.
.
.
Benan msg tam tak min hnutchhiaha, vawitam alo call bawk. Vawikhatmah ka pick lo a, a msg pawh ka seen bawk hek lo. Whatsapp ah chuan lut in ka online. Ka thiante tutu emaw nen chuan inbia in intih thawven hram hram ka tum lui. Lily chuan status alo update a, ka view chiân hma chuan Bena a ang ka tih êm avang chuan ka view chak zek zek mai. Gb whatsapp ka hman avangin status ka view tih ahmuh theihloh na tur chuan ka daha, ka view ta vat. Kan khumah chuan Bena chu aṭhu a,phone ahmet bawk, chu chu lo status in caption ah ''Lungleng te kan awm ahhh......min kawm hman lo vel'' tih hi alo hmang anihchu. Enge achhan pawh ka hrelo. Ka contact a neia, a status ka view thei tih ahre vek bawk, amah vangin tihian Bena nen kan inkar a awma, hetianga thawven hmel taka status ala update thei chu azaktheilo ka ti viau. Kan room ah an awmdun ani tih ka hriatna te chuaân ka kawchhung ati so bulh bulh mai.
.
.
Out in ka phone chu ka daha, ka mittui alo tla leh ringawt tawh, ka nu chu lo lut in ka bulah alo ṭhu a, ''Achhan sawi rawh le, engtinmah ka inrawlh lo ang'' atih tâk ah chuan zep nei miahloin engkim chu ka hrilha. Engmah sawiloin min kuaha, ka sam chu achul hle hle.
.
.
''Ka thu kha lo awih la chuan tunah hian nula ila ni tur, i lerh thet thawt lutuka'' atihchuan ka nui chhuak hawk. ''Engkim hian chhan anei vek a, chutiang bawkin eng thawnthu pawh hian thlir na tláng hran an nei vek bawk. Chuvang chuan nangma lam ringawt thlir lo in Bena lam pawh thlir ve la'' atih chuan ka ngawi reng.
.
.
Chumi zan chuan ka nu in min mutpuia, ka pa bula mu tura ka tihpawn 'ilo in ti hlum palh ang ka hlau' ti a fiamthu thawh pah in zankhua chuan min mutpuia ka zân hun hman khawhar lutuk tur pawh ati zia.
.
.
Ni thum aliam hnu pawh chuan ka la haw lo. Haw tura ka rilru ka siam ve deuh ṭum pawn Lily in status eng eng emaw Bena nena an thiltih alo update fo a, eirawng an bawl dûn lai te ani hlawm, chu chuan ka rilru dam tur a ti hel thar leh a, ka haw leh lo nge nge ṭhin. Bena chu ka ngaia, ka thlahlel hle bawk. Chutianga ka telloa ahlim hmel lutuk te chuan min ti na takzet. Bena msg tam tak te pawh ka la hawng lo. Hawn châk na pakhatmah ka neilo ka thil hmuh kha achiang si a, dawta in phatmar a tum na ka ngaihthlak chuan adâwt sawi ten min ti na leh dawn tih ka hriat vang ani. Ka pa pawn thil awmzia zawtin min rawn phone fo a engmah ka hrilh duh rihlo. Ka haw leh haw loh lam thu ah erawh ka duhchen chen hahdam turin min ti thung.
.
.
Zan dar 1 velah Bena alo kal a, arui hle nghe nghe. Phone ka chhân theihloh avangin ka nu alo phone a, ka nu in kawngkhar hawn sak in ka room ah alo tir lut hi alo ni. Ka bulah mu in minlo kuaha, min kuah ngheh lutuk vang leh a zu in rim avang chuan ka harh ani ber ang chu. Amah ani tih ka hriat nghal mai bik loh avang chuan ka hlauthawng hle nghe nghe. Light ka on chuan phelh phang a meng hian minlo melh a, a mitkhur te chu a tla dâwk hian ka hria. Ahmai te chu alang cher kuang bawk.
.
.
''Enge hetah ilo tih?'' Nelawm lutuk lo hian ka ti.
.
.
''Ka ngai tawh che lawm'' min melh miahlo chuan a tawng bual bual a, ''Min ngai ve miahlo mi?'' Ti paha beidawn hmel taka min melh chuan keimahah amah khawngaihna a awm leh nghal dêr tawh. Awlsam lutuka ka ngaihdam nghal zel theih avang hian keimah hi ka in haw letling zawk. A sam kir bap chu a hnawk niaih mai, ruilo ang taka lan tum hian atheih anga zau hian amenga, ''Nangmah bak hmangaih ka neilo. Ka ti tak tak'' achil alem zawng chuan abiangsum alo khuah kek mai. Engmah sawilo chuan ka melh renga.
.
.
''A hmeltha alawm, kei aiin angaihsak thiam zawk ang che. I nu pawn aduh hmel em kha'' Lily chanchin ani ka sawi. Min en vang vang a.
.
.
''Lokal teh'' tipah chuan ka ban ah min pawt a, amal chungah chuan min pawt thu lawp. Min pawm vawng vawng in ka dar ah chuan akhabe anghat a.
.
.
''Kim, Lily chu ahmelṭha alawm, mahse nangmah ani hleinem'' atihchuan achhan pawh ka hrelo ka chhungril chu anui ver ver mai. ''Khawvel ania, Lily aia hmelṭha zawk te pawh an awm leh dawn alawm, chumi aia hmelṭha leh zawk te pawh. Tunge hmelṭha zawka tunge hmelchhe zawk tih chu athlirtu mit alawm, chuvang chuan ka mitah chuan i hmelṭha ber'' athusawi chu aká atanga thu chhuak ngailo tawp anih avangin chu chuan min ti lawm hle.
.
.
''A duh che ka hrevek'' ka tihchuan angawi reng ''Kha nangpawn aduh che tih ihriat reng kha'' lawm vak lo hian ka ti leh.
.
.
''Nizan khan min hrilh a, khatiang zawng khan min en ang tih ka ring phak miahlo'' ati chuâi raih.
.
.
''Nangpawn arukin i duh tho lawm'' arilru hriat tum deuh tak hian ka ti a, ameng phar nasa mai.
.
.
''Ateuhlo mai. Hmeichhia angin ka en lo hrim hrim. Kan inah alo chêng ve a kan chhungkaw member angah ka lo ngai hmin hmak'' ati leh sap.
.
.
''Anihchuan engatinge ka call kha i reject a chuan ka msg kha i reply loh?''
.
.
''Englo, Lily in ka mutthilh hnu khan ka phone alo khawiha, chutah chuan aniang.......'' Atih chuan ka rilru adam huâi huâi mai. Engmah sawi tawhlo chuan ka mu a, minlo kuah in ka bulah chuan amu ve bawk. Kan rilru kan kawm ve ve aniang engmah kan sawi tawhlo.
.
.
Engtik laiin nge ka mutthilh pawh ka hrelo, zing dar 6 velah chuan harh in ka bula tui zeta mu chu melh in asam karah ka kut ka rawlh lut a, alu chu ka tuai neuh neuh. Ahmel chu ka en vawng vawng a, kan inngaihzawn dawna hmeichhe tam tak zinga amah chang tura ka beih nasat fâl chhan te chu ka ngaihtuaha, he ahmel vang ngei hi ania lawm. A hmel hi ahmeichhe duh zawng takin a awm reuha, mi aiin ava pâ fal bik pawh anilo, ahmel hian sawifiah thiamloh hian zûn anei ani ber ang chu.
.
.
''Ka mu hmel pawh ka tha ngawih ngawih mai animaw?'' alo ti a.
.
.
''Kal teh, engtinnge Lily te ang in hetiang hmel hi a duh theih tih alawm ka ngaihtuah'' ka lo ti pawr hlar mai.
.
.
''Lily ai ṭha pawn min duh hi'' a aia nghet zawk chuan minlo kuah leh a.
.
.
''Chaw ei khamah haw rawh'' ti hluk pah chuan ka thawhsan.
.
.
Eirawng ka bawl lai chuan ka bulah alo ṭhu a, games khel in ka nu te an lo la tho lo bawka a awm nuam awr awr viau.
.
.
''Class i kal dawn lo mi?''
.
.
''Inrinni nih hi'' minlo enin anui ri hak, mak tak maiin ni hi ka hai reng mai ni. In ah ka awm nasa lutuka nitin hi ka tan chuan a inang put mai chuvang te pawh chu aniang.
.
.
Ka nu te an rawn thawh hnu chuan chaw ei ka siama Bena inthlahrung lutuk chuan minlo pui ve mial mial. Ka nu lah hi ahan hlau khawpa, ka pa phei chu amitah pawh a en ngamlo. A en lai ka la hmu miahlo zawk. An biak te hian hnuailam amelh tlat zel. Chaw kan ei lai chuan ka pa in min ngaihsak deuh turin Bena chu afuih mawlh mawlha, thu hi a awih hmel asin, asawi zawh hma hma chuan alo 'aw' diam diam mai.
.
.
Tlai lamah chuan haw turin ka insiam ta nge nge, ka nu leh pa min nawr luih nasat lutuk vang pakhat ani. Bena lah ka telloa kir atum map silo. Hetah ka nu in atheihtâwpin min hmangaiha sawlama ka nu pakhat zawk va hrawn leh chu huphurh awm tak ani. Lily ka hmu chak lo hle bawk.
.
.
In kan thlen chuan ka pa in minlo lawm nasa mai. Ka nu erawh chuan thu kam khat mah achhak chhuaklo. Lily pawh chuan min melh ngamlo ani ber ang chu, ka nu chuan Lily chu tun hma ai mah in atlawn emaw tih tur ani. Bena chu ko in Lily bulah athut tira, achezia chu Lily nen hmehbel atum ni tlat hian ka hria. Ka awm loh lai khan engthil tak nge thleng ni. En zui duhloin kan room lamah ka chho ta daih. Reilo ah Bena pawh alo chho a.
.
.
''Ka nu khuan Lily in aduh che tih ahria tiraw zep hlek lo in min hrilh rawh'' lungawi fahran lo hian ka zawt.
.
.
''Englo, nizan hmasa khan a status update vel vang khan ka thin arima, i hmuh ka lo hlau ve bawk sia, kan inkar felloh laia khatianga alo tichhen kha ka thinrim insum theilo in ka hau a, phone reject tu kha anih leh nihloh te ka zawta, chu chu ka nu in alo hre phaka Lily kha azawt ta aniang ka hre zuilo'' min tih thinrim hlau tih hriat tak hian ati a. Ka fiah ta kuarh mai. Ka nu chuan awm bo hlen mah ila pawi alo ti tawp lo tihna anihchu.
.
.
''A rualin class pawh kal tawh suh, games pawh abulah khel tawh suh. Abul hnaiha i awm lai ka hmu leh anihchuan......'' Ka tihlai chuan nuihza insum zet hmel pu hian min melh ''Enge''
.
.
''Ka hrelo. I thikthu chhiat hian anuam ka ti'' naupangchhia zet hian ati nihchu.
.
.
''Ka fiamthu lo nia inu in ka awm ve reng chung pawn mo atan a iai lo ani tih ati lang tawha, tawrh reng ka tum tawh biklo'' thutak deuhin ka ti leh. A bu nghat nghat ringawt.
.
.
Ni aliama, thlâ aliama Bena pawn tun hma ai zawngin min ngaihtuah. Ka nu lakah ka thlavang ahauh ve ta zeuh zeuh bawk. Ka nu chuan Lily a iai lo tih hriat takin mawi leh mawi lo pawh ngaihtuah chang lovin mi awm lai leh lai lo pawh dáwn lovin Lily chu angaihsak a, engmah sawilo in ka ngawiliam mai zel thung.
.
.
Ka pasal ka lama aṭan tlat vang pakhat ani. ''Bawiha nen hian lo in tawng hma sela, han innei sela aṭha tur, tu hmel te pawh kan hmu ve tawh tur hi ania'' atih chang lah atam. Kum 3 kan innei tawha fa kan la neilo, achhanchu keimah hian ka duh tlat rihloh vang ani. Fa ka awt lo ani biklo mahse ka pasal nu in a zir êm maia, ka pasal lah zirlai mai ala ni si nen, châwmhlawm hian châwm leh chhawng tur ka hring ngam ngang rihlo a tin ni. Bena nen kan tîti thlap hnu a kan pahnih thu tlûkna ani bawk. Amah Bena tak pawn ''ka nu thusawi te chu engah mah ngai duh suh'' atih avangin ka ngaihthah lui ve tlat.
.
.
Chawlhni tûk ani a, chhung inkhawm kan chhungkua in kan hmanga, chaw kan eikham chuan inkhawm turin kan insiam malh malh hlawma, inchei peih tak mi ka nih lêm loh avangin ka simple leh hle. Reilo ah ka in peih leh rêng a. Bena nen chuan room aṭangin kan chhuaka, ka nu te pawh kal mai turin an lo inpeih tawh. Lily chu kan nghak ṭhap. A room aṭang chuan ṭap pûr hian alo chhuaka, ka nu ten thil awmzia an lo zawt vat.
.
.
''Apa damdawiin ah a awm mek, lunglei atangin an lo refer a, a lung lam an tia, tuk in zing khan an lo thleng tawh" ṭap hliâm hliâm chuan alo ti.
.
.
''Eeeekhai Bena, Lily chu damdawiin ah lo han kalpui rawh i nu te nen khan lo han kal ula, Kimkim nangpawh han kal ve rawh. Kei ka thusawi hun ani si a, han thulh ngawt lah achi tawh si loh, inkhawm ban veleh ka lo kal ve nghal ang'' ka pa in atih tâk ah chuan kan room lam panin Bena nen chuan kan inthlak leh sawk sawk, motor la in damdawiin lam pan chuan kan in phur chho ta ani. Kawng tluânin Lily chu aṭap hliam hliam renga, ka nu chuan alo hnêm mawlh mawlh. Damdawiin kan thlen chuan Lily pa chu ala hmuh theihloh thu an sawia, ICU ah a awm ani âwm e, Lily nu chuan Lily chu kuah in athlamuân mawlh mawlh.
.
.
''Ben engtinmah a awm lo ang tiraw?'' Tipah chuan ka pasal áwm ah chuan beiin ava ṭap ta mai nihchu. Chu kher chuan mi khei ta zak mai. Ka lo melh rûn a, Bena chuan ahnungah a beng thek thek, minlo melh zeuha, ahmel te hi ka hmu pha dui leh ta nghal. Kan boruak tawn in azir loh em avang chuan engmah ka sawilo. An hnem rawn mial mial a, asirah chuan ka lo ding ngawi reng thung.
.
.
Darkar tam kan nghah hnu chuan Lily pa pawh ward pangai ah an sawn tawh, azia deuh ta chu alawmawm ka ti hle,lily leh a nu chuan pu Sanglura chu an ṭhutchilh deuh khar renga, ka nu pawh ava lut a, 'ka u a pawi emai' tiin ava ṭah ve chiam kha. Bena nen erawh pawnah ngawi rengin inbe miahloin kan lo awm. Ka pa pawh alo thleng a, Lily pa pawh chu ava hmu ve bawk. Tlai lam dar 3 vel ah chuan in lam panin kan haw a, Lily pa chu aṭhat leh mai an beisei thu an sawia ngaihtuah awm ani tawhlo chu kan lawm hlawm hle.
.
.
A tukah chuan class pawh kal lo in Bena leh Lily chu damdawiin lam pan chuan an inzui chho leh a, thik tur men a ka men hman bik meuh loh avang chuan chutia an kal dun chu ka lo ngaimawh biklo, mi harsat mangan laia thik tur lo zawn ve sek pawh ka ti deuh.
.
.
Bena leh Lily damdawiin kal chu zan dar 10 ah pawh an lo la haw lo. Ka phone lah in call ala thei bawk silo. Ka pa hnena an chanchin ka zawh lah in engmah hriat anei bik silo. Ka nu ka pa in azawh lah in ''za cheng suh u an tlanbo lo ang'' min ti zek mai si.
.
.
Damdawiin an kal hma khan thinrim takin Bena hi kan room ah alo luta, ka phone awmna min zawta, ka khawihloh avangin ka dahna ka hriatloh thu in ka lo chhang, azawn fe hnu chuan ka dressing table chhunga drawer ah ahmu, eng eng emaw chu khawihin thinrim hmel zet hian phone chu ahmer ngawt ngawt. Engthil in nge chuti tak in athin tirim ti a ka va bih ve chuan msg tam tak midang nena in text na ni âwm tak hi alo awm. Hrilhhai zet chuan enge anih ka zawta, min chhang lo in min melh ngat ngat, dam dap hian phone chu min pe a, bangah min nawr bet thut in ka hrawkah a rek a, ka hrilhhai lutuk chu ka che theilo ka lo ding mawl tawp. Mittui tling pam in a mitah chuan ka melh a, lo meng sen hlar in ''I lak atang hian hetiang hi ka beisei miahlo'' tih chauh asawi. Min hnek dawn emaw ka tih avang chuan ka lo chhing sawka, ka hnung bang chu ahnek ri ta bur mai. Engthil nge thleng mek tiin ka inngaihtuah buai nasa ngang mai. Chu chuân nilengin ka ni hman ati nuamlo. Min lo text tu number lah chu akhát tawkin ka text a ka call bawk eng chhân letna mah ka dawng bawk silo.
.
.
Kan inkara in hriatthiamlohna kan pahnih thlen ni miahlo avang chuan nuam sa in ka hun ka hmang lo chiang teh e. Rilru khingbai takin ka awma, Bena pawh akhat tawkin ka call fo rêng bawka, msg chu vawi za chuang zet ka chhiar nawn, ngaihzawng nei ka ang hle a, mahse heng msg te hi ka thawn ani bawk silo. Lily te chu ka han puh dáwn dáwn thin, mahse thil hrechiang hmasa loa midang han puh ngawt hi atha ka ti chuang bawk silo. Ka rilru chu ahreawm takzet. Chutia rêi fé hnu pawha an lo la haw loh avang chuan ngaihṭha chiahlo chuan pawnah ka lo nghak. Ka awm hle hle thei biklo atin ni.
.
.
Ka lo muthlu sek ni tur ani garrage a motor in park ri avang chuan ka harh zawk mai. Dar zat ka en chuan zinglam dar hnih alo ri tawh. Ka ke te chu amu churh churh mai. Ding in an lam pan tum chuan ka kal a, car chhungah an la ṭhu dûn ani tih ka hmu thei. Lily in car chu akhalh aniang driver seat ah aṭhu a, Bena erawh passenger side ah aṭhu thung. Eng eng emaw Lily in asawi tih chu ka hmu theia, an sawi tak erawh ka hre theilo.
.
.
Ka thil hmuh avang chuan ka hit muai muai niberin ka hria, Lily chuan Bena chu afâwp anihchu, car chhung light an on avangin engkim chu chiang takin ka hmu thei. Bena chu arawn meng siar siara, Lily in afawp ani tih ahriat chuan a nemsawn hleka, ka lam rawn hawia min rawn hmuh tâk ah chuan min rawn enin ameng rum ngal mai. Ka sawi thiamlo amitmeng chu athîp lutuk. Chutah, lily sam karah chuan akut chu rawlh lut in a nghawng chu achul sak a, duhthawh em em hian a fawp ta mai nihchu. Ka mit sulh ni ber hian ka hria. Ka hmuh lai ngeiin ka pasal in hmeichhe dang a fawp anihchu. Rei fe chu ka che lo, muang cháng in ka inher a, inchhunga ka pên luh rual chuan tu emaw tawh ka nei tih leh min bia ani tih pawh ka hria, ka chhang theilo, ka ṭawng chhuak theilo ani ber ang chu, room ah ka lut a, khumah chuan ka ṭhu thla hnawk. Ka sawi thiamlo keimah hi ka hah ngawih ngawih.
.
.
''In va han tenawm em em ve'' ka pa ṭawng ri chu ka hre zui zat, ka chal chu dawmin hnuailam ka melh ngawt ngawt. Ka mittui chu hru zeuhin ''A tawk tawh e'' tiin ka phun chhuak sep. Ka thawmhnaw te, ka bungrua he inchhunga ka chhawm luh zawng zawng chu ka khawm vek. Ka thawmhnaw ka mamawh zualpui tur chauh chu bag ah ka khung thung.
.
.
''Pa Marem ka tihpalh lutuk, ka tihpalh tak tak'' Lily ṭawng ri ka hriat chuan ka uak tuarh mai. Ka insum hman thlawtlo.
.
.
''Hau chiam chiam suh, hmangaihte an thlan theih ngai em ni, duh vanga hetianga in hmangaih pawh an ni bik tawp nâng'' ka nu chuan chu thu chu asawi anihchu. Ka nui hul hak mai.
.
.
Thil ri thlawp ri ka hria a, ka dinna ngâi ah chuan ka ding ngawi reng, ka pa in Bena abéng tih ka hria.
.
.
''Ngaihdam han dil rawh'' ka pa in atihchuan ''Aih, ka dil lovang, ani pawh aduh angin akhawsa a keipawh ka duh angin ka khawsa dawn'' Benan ka pa thinrim lai achhân lêt vawikhat ka hriatna ani!
.
.
Ka bag chu khaiin ka chhuk thlâ a. Ka pa in ''Bawihi'' ti a inthiamlo hmel taka min melh chuan ka lo na ngawih ngawih ''aṭha ni e, kan chhungkua hian kan phu lo che ani. I lakah hian ka zak hle mai. I hmel ka hmu ngam tawhlo ani. Min ngaidam hram rawh'' ti tu, ka pa, an pindan lama lut ta chuân amah vangin he in hi nuam ka ti ani tih ahria angem le!
.
.
Ka nu chuan ka pa chu pindan ah azui lut hlawk hlawk a, Bena pawh room ah achho tawh, thil thleng chu pawi atilo tih ka hriatin ka lawmpui takzet ani. Kan rem ve ngang lo ani tiin ka rilru chu ka siamfela.
.
.
Lily kal tur chu ka ko dinga, pawisawilo hmel zet hian min melh, engmah sawilo in ahmel chu ka en vawng vawng mai, ngawi renga ka melh vang vang hnu chuan ''I hmeltha a, i duhawm em em a, engkim inei asin, Mizo mipa ah hian i duh duh i nei thei ang chû, chutiang khawpa kei ai pawha ka lo dahsân thin ini asin, engatinge ka pasal kher?" tlawm ka va han in ti vawng vawng êm! Ka mittui luang ngiai ngiai chu ka hru buai peihlo, a hmel chu ka thlir vawng vawng a, ahmui sen vâm ham te, amit mawi tak te, ahnar ngúl in vuah dik thlarh mai te ah chuan engmah ka chhiar thiamlo. Min chháng lo a, min en bawk hek lo. Chhân na ka dawn tâk loh ah chuan Ka bag chu khaiin kir leh ngâi tawhlo tura ka rilru siam felin chu in ka tana 'beidawnna' a in ṭan na hmun chu ka chhuahsan ta ani.
.
.
Kum nga liâm hnu-
.
.
''Oi.......Lalkimkim, Ruatsanga kha lo haw nihchu, zanin ah dine out nghal ang u ati, reunion kan nei dawn. I lo kal ve ngei ngei angai. Ruatsanga nen kan lo lam ang che'' Mapuii message chu chhiarin ka reply vat.
.
.
''Oi...Lalruatsanga chu ka hmu chak tawh tawp dar engzat vel ah nge minlo lam dawn?'' tiin ka va reply a, chincháng te kan in hrilhfiah zawh hnu chuan phone chu dah in ka thawmhnaw hak tur ka en fel nghal mawlh mawlh.
.
.
Kan inṭhen aṭangin kum nga zet aliam leh tawh. Kan inṭhen hlimchhawn kum hnih kal ta vel kha chuan inchhungah ka tawm ngut ngut ani ber. Ka nun ah ka beidawng em em a, ka nu mangang in ka thian te bia in min kawm hlim turin kan in ah asawm ṭhin, an ni lah min ngai der thiamin an lokal nitin a, achang leh an lo riak thûl. Ka chhungte leh ka ṭhiante vang liau liau in tunah chuan ka pangai ve viau tawh. Ngaihzawng lam erawh ka ngaihsak chhunzawm duh ta lo. Bena leh achhungte, Lily tiamin an chanchin ka ngaihven tawh ngailo. An innei ta em tih te engmah ka hre zui lo.
.
.
Bena pawn vawikhatmah min rawn belo. Ka phone hman thlâkin ka number te pawh ka thlâk zui vek a, social media ah whatsapp chauh khawih ka nei bawk. Phatsan na chu tuar na viau mah ila, ka tan pawn hmalam pan apawimawh ve tho a tiin ka inti phur lui hram hram, bâk ah, an ni min phatsan tu zawk te pawn hmalam an pan theih laia kei ahniam zawnga ka tluk zel nachhan tur a awmlo tiin in fuih nan tak ka hmanga, tunah chuan ngaia neih chin te pawh ka nei ve tawh. Hunin aliâmpui ve zel mai bawka.
.
.
Chutia hnathawk lo a ina ka awm leh mai mai tâk ah leh ka nu leh pa hmangaihna dawnga atha ber bera vur ka nih ve leh tâk ah chuan ka vun te pawh alo mam in, ka no ve leh ta deuha, tun hma ang mai khan ka lang naupang leh hle tawh. Min beiseia min hêl tu te pawh tawng ve ṭhin mah ila, mak tak maiin mipa dangah ka rilru ka pe thei ngang rihlo, mi ringa bul ṭan thar leh turin ka la in peih lo aniang ka ti ta ngawt mai.
.
.
Kawrfual senduk kâk mai ka khup khuh lo hlek, zuih tha tak mai, ka pian pholang em em mai chu ka ha a, ka tí tuai alo mam ve ta deuh nên ka inhmu nalh ve viau mai, achungah chuan jacket loose lam ka ha leh a, vans var ka pa in hmanni a min leisak ngei mai chu ka bun bawk. Ka sam ka kâwng chen vela sei ngil ṭha tak mai chu sang vah hian ka ṭawn kawh a, ka hmaia make up eng eng emaw ka bel hnu chuan darthlalang ah ka in en vang vang a, mawi ka in ti ve takzet. 'Benan hetianga ka inchei hi min hmu ve se' tih ka ngaihtuahnaa alo luh rual rual chuan ka paihchhuak leh nghal.
.
.
Tlai lam dar 6:30 ah chuan Ruatsanga chu kan inah alo lut hlawl, Mapuii hmel erawh ka hmulo, a hmel chu en vang vangin ka nuih ver ver, ''va inti chhe lo tawh vel ve'' ti pah chuan ka fiam zeuha, laih hmel zet hian ''Nu manun a nuthlawi hnu aṭang hian ava ṭang thar ve'' tiin ka nu chu azawt a.
.
.
''Hmanah pawh in inneih ṭhelh tawh kha, tikhan va leng ula va inngaizawng ru'' ka nu in alo fiâm let leh tâk ah chuan sawi tur hrelo zet hian anui mawl tawp ringawt.
.
.
Kan dine out na hmun tur chu muansangi te in ani a, kan thlen chuan an lo awm ṭeuh tawh. An kawppuite lo hruai tâwk an awm bawk. Chutia pawl sawm kan zirpui ṭhin ṭhianhlui te nen kan han inhmu leh chu kan ri hlut mai. Anuam kan ti viau bawk. Nuthlâwi te pathlâwi te an âwm ve nuk avangin keimah ka inhmu hniam bik em em lo. Ka lan ṭhat thu chu min hrilhin fakna ka dawng âwl lova nuam ka ti rilru viau zawk.
.
.
''Kan ei tawh dawn mi? Ei pah in titi ila, ril pawh atam tawh alawm'' Muansangi, in neitunu berin alo tihchuan kan lo phusa nasa ngang mai.
.
.
''Lawkin Benjamina leh Rindika an lo thleng tep nghak lawk ang u'' Victoran alo tihchuan ka lung aphu nghal dup dup mai. School khat ah kan kal tih ka lo hre chang miahlo. Ka zâm ngang mai. Chu chen inhmu lo in kan awma chutia han inhmuh leh chu ka phur lo ka tihrualin keimah ah hmuh châkna a awm tho bawk si. Ka hlauhthawn ber chu angai angin kan kâl leh phah ang tih ani.
.
.
''I tha em?'' Ruatsanga chuan alo ti a, za lo deuha nui hian ka lo bu nghat. Reilo ah Bena leh Rindika pawh an lo thleng aniang an lo lâwm nak nak hlawm. Ahmel en chu sawi loh a lam hawi tur pawn ka dâk chhuak lo hrim hrim. Ruatsanga bulah chuan ka ding a, a banbul chuan ka in hliah ani ber ang chu.
.
.
Zu leh sa, eitur chi hrang hrang chu dawhkânah an chhawpa, Ruatsanga chuan nuamlo ka ti tih chu ahrethiam aniang, ka eiduh chu min zawt a, "i duh duh nimai" ka tih tâk ah chuan a duh ang ang chu minlo lak sak in thleng minlo pe a, dawhkân pakhat chu kil ho in Ruatsanga bulah chuan ka ṭhu a, ka dâk chhuak tawhlo hrim hrim.
.
.
''Kan haw mai dawn mi?'' Ruatsangan ka beng bula zawi te a alo tih chuan ka dâk chhuak zawk, Bena chu Ruatsanga hma tak ah alo ṭhu a, ka hma ah Rindika aṭhu thung. Bena chuan a beer can hum lai lem khalh pah chuan mit khap eih lo hian minlo melh a, rei vak lo chu amah chu ka va melh ve. Ahmel te chu alo puitling tawh in ka sawi thiamlo ahmela anaupangchhe hmel la chambáng kha alo bo tawh, akhabe hmul te pawh alo ṭo ve seng seng tawh a, chutia mit khap eih lo a ka en kar chu sec sawm vel lai ani. Inngaihtuah harh in ka hawi sawn thuaia ka thil ei te chu atui leh tui loh pawh ka hrelo ka ṭhial liam vel mai mai ani.
.
.
Music an play rin êm avang chuan Ruatsanga chuan ka sam chu hûih kiangin ka beng bulah alo kun hniam a, chutih lai tak chuan a beer can hum lai chu dawhkanah a nghat ri bur, Bena chu kan melh ṭhap, min khap eih lo hian ahmela thîkna nasa tak lang chhuak chung hian Ruatsanga kut, ka sam khawih mek tu chu amelh ngar ngar anihchu. A mit chu tun hma ang maia hrawk kual ngam tûr anga a mên tawh loh avangin chu chuan ka ti ril ati khur der der mai. Thil thalo zawk athlen hlauin Ruatsanga kut chu ka vuana dawhkân hnuaiah ka dahthlak sak vat. Chu ka che zia chuan anuih ati za tehreng aniang chu nui hul hak in lehlam ahawia dawhkan chu athawhsan ta hmak.
.
.
Benjamina achhuah aṭang chuan ka awm pawh anuam zui tawh neklo. Khati tehhrepa in hmuh nawn leh. Kan inkar engkim hre vek tu te an awm nual avangin nuamlo ka tih hlau takin min ngaihven em em hlawma, chu zân chu ka tling tla ve thei hram.
.
.
Chawlhni ani a kan inkhawm bang chu inthlak lo in ka thiante rêl angin thla la turin hmuifáng lamah kan liama, car pahnih lai kan inzui, kan thian zinga kan photographer Liansanga pawn ahmanrua arawn in keng bawr ve lûk bawk. Tlang kan thlen chuan thla chu kan la a, ahmun alo theng thaw in alo hahdam thlak bawk nen rilru adam sawng sawng mai.
.
.
''An insual ania'' ti a ka ṭhiante an tlân liam tak pur pur na lamah chuan keipawh hmanhmawh zetin ka tlan ve.
.
.
Hmai thi sûng hian leiah chuan Ruatsanga chu alo mu a, achungah ṭhu in mipakhat hian ahmai ah chuan ahnek siah siah mai. Chupa hmel ka en chuan ka ṭe tuarh mai.
.
.
''Benjamin'' ka ti tuarh, 'hetianga kawng sira insual vel mai mai tur hian animaw i level alo hniam tak!' ka ti rilru vawng vawng.
.
.
Bena chuan min rawn melh zawka, ka kawr bah hak chu chik zeta rawn melh in ''Hrep tak che u hian'' ati hluk a, Ruatsanga hmaiah chuan na zet hian a hnek leh. Ṭhelh theih pawn an khawsa lo.
.
''Kha mâw achanchin chhe lam sawi chuan i sa phat mai lawm'' nui deuh suk in Ruatsanga chuan alo ti ''a easy tehmai nia'' ruatsangan atih leh chuan Benjamina thinrim chu a chhem alh leh zual emaw tih tur hian a ri leh ta buan buan mai. Ruatsanga akhuh thi tak ṭhawt ṭhawt ah chuan Bena pawn aduh tâwk ahmu aniang, ding chhuakin abike lam panin akal a, Rindikan azui vat. Ruatsanga bulah chuan ka thu thla vat.
.
.
''Engati ringawt nge ngatinge Bena kha alo kal'' Zawhna hlirin ka khat. Midang pawh chuan an lo zawt ve zung zung.
.
.
''Va kal rawh. Sawidun tur in ngah ang. In inkar siamthat nan hian ka tuar na hle mai. Ka damdawiin awm man in tum angai bawk ang'' nui pah chuan ati a.
.
.
''Nuih na hun pawh anih loh hi, enge thil awmzia?" ti pah chuan ka vin nghek. Ka phili zo tawh a tin ni.
.
.
''I easy thu ka sawia athinrim in helai thleng minlo zui ta anihkha'' atihchuan ka lo meng phâwk hle.
.
.
''Maw? Engatinge chutia dâwt i sawi''Ti pah chuan ka ding hluai a.
.
.
''Va kal rawh inbe rawh u'' atih tâk ah chuan inbiak nachhan tur kan neih pawh hre chuanglo chuan Bena kalna lamah chuan ka tawngpawng kâl ve ringawt.
.
.
Bike bulah hian ṭhu in meizial alo zu a, akut chu athi ṭuam mai. Rindika chu abulah alo thu ve bawka, min hmuh chuan Bena dâr a beng thek in min kalsan. A bulah chuan ka ṭhu thla a, ngawi rengin ameizial zuk chu laksak in ka paihsak a, a kut thi lam chu laksak in ka rawmawl chuan ka hru faia, ka tuam mial mial.
.
.
''I hlim bawk aniang maw?'' Arawn tih chuan ka nui hul hak ''i hlim zawk viau ang chu'' ka ti sap.
.
.
''Engvangin maw?'' Dam dap hian alo ti, ka chhanglo ''Kha Lily vang khan maw?'' a ti leh a, chhang lo in ka lo nui. ''Mai mai che hian'' ti hluk pah in meizial chu a ṭan leh a, ka lo paihsak leh vat.
.
.
''Pathlawi nih tâk vang maiin meizial zuk tur ania mi?' Ka ti pawr hlar a.
.
.
''Nuthlawi nih tâk vang maiin taksa lang tam deuh deuh hak tur ami?'' Kei aia pawr mah chuan ati ''Easy a tih phah che kha'' ama hriat tham leka tura sawi tum ni âwm tak hian alo ti zawi raih.
.
.
''Min ti ang hmiang i buaina tur a awm mi? Min duhlo a hmeichhe dang i fawp ani lawm ni?''
.
.
''Min kham khawp lo a, kan inneih laiin ngaihzawng inei ani lawm ni?'' Khail'eh.
.
.
''Enteh, Benjamin i duhleh min ring tawp suh. Ngaihzawng neihsan tur che in vawikhatmah ka rilru akal hé ngailo. I bialnu Lily khân engtin tin emaw ka phone alo la anga, ngaihzawng nei anga ka lan theih nan ruahmanna tenawm tak alo siam pawh ani mahna'' ka ti ta sak sak mai. Ka vei ruk reng thudik ka hriatchiân loh avanga ka sawichhuah ngam ngailoh anih avangin ka sawichhuak chu a veng hawk mai.
.
.
''Chuti zawng chuan ka lo la ngaihtuah ngai miahlo'' ati zâwi raih.
.
.
"Hmeichhe lerh tak ni ila, hmangaih lo bawk che ila engvangin nge tunah hian ngaihzawng neilo in ka la âwm reng ang" ka tih chuan ka thusawi bengkhawn tih hriat tak hian minlo melh a,
.
.
''Ruatsanga nen khan in inngaizawng lo maw?'' Zawhna ngah tih hriat tak hian a lo ti leh.
.
.
''I mawl ami? Bialnu nghet nei anih saw" ka tih chuan a thaw huai mai, "thu chiang hre tawp silo, in la pâ ve lutuk mai'' nuihza insum zet hmel pú hian min melh a.
.
.
''Tikhan min melh suh, meizial te lo zuk, in la pâ ve lutuk mai'' ka ti zawi leh raih.
.
.
''Ka ngaih zia che ka hre chiah'' Min melh vawng vawng in ka hmui ah chuan alo fawp vawng vawng a, khawvel hrân ah ka chêng nimaiin ka inhria, a in lak hran hnu chuan ''duhleh Lily kha ngai rawh" lâi deuh reuh tak hian ka ti a.
.
.
''I mawl sia maw. Bialpa min neihsan emaw ka tia i thiknan ka fawp ve mai mai anihkha, i chhuah hnu atang khan vawikhat pawh ka si leh tawhlo'' tiin ahan in sawifiaha.
.
.
''I fawh tho kha'' ka lo ti chuâi raih. Ka thik tih ka tilang nasa lutuk nge anui ri leh hawk mai. ''Khabe hmul te lo zuah ve inti pâ ve lutuk mai'' ka ti leh niah niah a, a nuih aza tih ahmelah alang chiang hle. A coat hak chu a phelh a,
.
.
''Kan inneih lai pawha inchei peih mang silo, nuthlawi nih tâk vang maia inchei vak kher, inti lerh lutuk mai'' ka tihdan zir pah chuan a coat chu min hak tir a, ka lo nui tut tut mai.
.
.
Engtin nge ache ziâ chuan amah min rin tir leh nghal thlap theih ka hrelo. Ka chhungril takah hian amah huatna leh amah hnaih duh tawh lohna a awm tawh miahlo. Chu mai niloin hlat kha ka lo duh tak tak ngailo a, ka lo haw ngailo hrim hrim zawk ni hial ten ka hria. Achhanchu keimah ah hian hnartu tur chakna pakhatmah a awm tawhlo. Ka thlahlel thar hle zawk ani.
.
.
''Kan tha ta maw?'' Ruatsangan nui sang paha alo tihchuan Bena chuan ava pan vat.
.
.
''Ka tihpalh lutuk thianpa, azialo hle mai'' ati sap a, adar ah chuan abeng thek thek.
.
.
''In inthen leh anih chuan phuba ka la ve tawh ang'' ati sap a, kan nui hak hak.
.
.
Haw lam chuan Benjaminan a bike ah min phura, midang zawng car in an haw thung. A hnungah chuan ka bei hle hle a, atih dân takah amah ka lo ngaih thin zia abula ka awm hian ka hre chiah. Kan in kawt ah chuan ding in min kuah a, min fawp vawng vawng mai, keipawn ka lo chhang chiang teh e.
.
.
''Ka pa adam tha em?'' Ka tihchuan abu nghat a ''ka nu pawh adam tha e'' ati sap, ka lo nui a, ninawm viau mahse ka nu pawh angaihawm viau mai.
.
.
''Lily kha khawnge a awm tak?'' Ka tihchuan min en vang vanga ''i thik ve chiang ani tiraw?'' Tipah chuan anui huk huk a, ka lo ner náng.
.
.
''Pasal anei daih tawh lawm kum 2 liam ta khan'' atihchuan amak ka lo ti hle. Inchhunga lut mai lo chuan pawna thutthleng awm ah chuan ṭhu pah in kan tî ti a.
.
.
Lily chanchin chu ka zawt thui zela, kan inṭhen khan Benan alo tuar hle aniang, in lamah ka nu leh Lilyi'n an zar chhén avangin inah pawh awm tam duhlo in Rindika te inah alo riak fo ṭhin ani âwm e, zu a in nasat thu te chu asawia, college pawh a zo ngawr ngawr ani âwm e, zir zawm tawhlo in ka pa in a pension hlawh in sumdawnna alo ṭan sak a, kan chét pawh apangai viau tawh ati. Lily thu hlaah kha chuan beiseina siamsak lo ta na ná nâ chu a beidawng ve ta aniang, azar zui reng tawh biklo.
.
.
Ka nu pawn inchhungkhur chêt engkim atih vek angaih tawh avangin sawi lo mahse i lo hlut zia kha ahrechhuak ve uarh uarh tawh anga ilo haw leh chuan a ân khum chiam tawhlo ang che ati a, ka nui liam mai nâ chu ka awih vaklo, ka nu kher saw chuan a zia a thlak ka ring hlawllo atin ni. A âng tlem ve deuh tawh atih erawh chuân min ti lawm hle.
.
.
Kan in tih thiamlohna te chu kan sawi fela, kan lo inngaih tawn zia leh kan lo in hmangaih zia te chu kan hrethar ani ber ang chu. Nû pâ kan lo ni tawh ṭhina keimahni ah inthlâk hlelhna tam tak a awm lo theilo, nghet tak hian kan in kuah a, kan in ngaih thu kan in fah châm chí bawk. Fiamthu in ''ka lo mo tawh dawnlo min neih duh chuan kan inah ilo awm ve tawh angai'' ka ti a.
.
.
"I nu te pawn fa mal nangmah chauh an nei che a, an khua a khar ṭhin ngawt tak ang, chuvang chuan kan in awm chhawk anga an 2 lam ve ve lungleng hman lo tûra siâm kan tum dawn nia" atihchuan atha ka lo ti rilru hle. A thil ngaihtuah dân kalphung aṭang chuan amah pawh alo puitling hle tawh ani tih ka hria a, innghahna tlâk ani ve ta chuân min ti lawm takzet.
.
.
''Naute nei ve tawh ila, nau áwm tûr an neih chuan an khawhâr pawh azia mai ang'' thutak deuh tak hian ati leh a, ka lo nuih sen sen.
.
.
Harsatna tam tak tâwk in han in ti táurau chiam ṭhin mah ila, a bulah hi chuan ka hlim a, ka hringnun ti famkim tura ani ka nun a ka tawng hi ka lawm takzet ani.
.
.
A TAWP TA.......



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)