The Last letter BY Rini Mualhlun

Ngaia
Site Admin
Posts: 25813
Joined: April 30th, 2016, 4:07 pm

The Last letter BY Rini Mualhlun

Unread post by Ngaia » March 5th, 2021, 8:42 pm

đź“·The Last letter
(Competition 2021)
"Whenever you feel like criticizing anyone....
Just remember that all the people in this world haven't had the advantages that you've had"
Inrinni tlai dar 2:00pm vel a ni a, ka bazaar haw ka tih thindan pangaiin ka fanu neihchhun, ka hmangaih leh chhuan em em, ka engkim, ka nun hlimna ber Mambawihi chu ka ko a, 'Mambawih ka lo haw e' tiin choka lamah chuan ka lut a, 'Mambawih, Mam... ka rei!.... Mambawih, ka duh lo..... min puihru, ka fanu eng vang nge? A ni thei lo, ka mitthla a ni tiraw?' ka khur nasa lutuk, ka awm chhungah hnawhtu an awm ka thaw hlei thei lo, ka awm ka chuma ka tap chhuak thei chuang lo, ka zawiin mu leh mal reng ka nei thei lo.
Ka engkima engkim, ka khawvel he khawvela ka neihchhun ni bawk, amah a vanga nung tura ka beih ve tang tangna thin ka fanu ngei mai chu a intihlum, amah leh amah a inthat a ni. Ka authawm leh tap thawmah chuan thenawmte lo tlanin min buaipuia, kei erawh che changtur pawh ka awm lo, mu leh mal nei loin ka â ruaia, ka na tak zetin ka zak bawk.
Pasal ka nei lova, ka fanu hi keimahin ka enkawl, nu leh pa dinhmun ka kawp vek chung pawh hian pa dinhmun chu ka luah zo chuang lo, pa a mamawhna a nep loh zia ka hriatpui, ka lainatin hrehawm ka ti thin, keia tan pawh hian hrehawm leh hahthlak chang a tam, chhungkaw pa tel lo in chu a ruakin a kim lo ngawih ngawih mahse ka fanu vangin ka in tichak hram thina, engkim amah a vangin ka tuarchhuak vek, chu ka chakna hnar, ka engkima engkim chuan min kal bosan ta, lei hnuai thuk taka zalh a tan chuan a pamhmai lua em a ni. Ka thinlung hi ngunhnama chhun tlang angin a na ngut nguta, ka kehsawm vek, engtin nge min ti chaktu, ka neihchhun tel loin khawvel hi ka hmachhawn tak ang?
Ka fanu vuinaah chuan a bialpa, a thawhpui ni bawk Dr. Rema pawh ka hmu a, kei ang thoin a tuarna hle tih ka hmuin ka hre bawk, mahse hnem turin chakna reng ka nei lo, lawmthu sawi tura chakna phei chu ka nei lo leh zual, inhnem turin kan chak tawk lo a ni mahna! diktak chuan ani aiin hnem ka mamawhna a san zawk daih ka ring, Mambawihi (Lalnunkimi) kha chu awm se, min kuah chungin, "Nu, lungngai suh, engkim a tha leh vek mai ang" tiin a aw, ka thlamuanpui ngawih ngawih thin khan min hnem ngei ngei ang, mahse, ka inhnemna thin khan min vel tapa, min hnemtu, ka hlimna, ka thlamuanpui em em thin vangin lungngai, beidawngin ka tap ta a nih hi! Min hnemtu tur reng an awm loa, ka inhnemna Mambawihi chauh lo chuan min hnem thei lo ang, tumah reng neih ka nei ta lo.
Engkim ka zirtir thin, ka fanu huaisen leh chaktak ni thin kha eng vanga in tihlum ta mai nge a nih? Khawvel hmachhawn ngam lo khawpin eng thuin nge siam ta, mi huaisen leh tumruh, beiseinaa khat ka fanu kha dawihzep leh beidawng ngawih ngawiha mahni in tihlum hial tur hian engin nge siam? 'Mambawih, I hma i va sial em! I nu hi engtin nge ka awm tak ang? Mal ngawih ngawiha ka awm hi i phal em ni? I harsatnate min hrilhin kan paltlang dun thei lo em ni? He khawvel hmachhawn tur hian ka zirtir thin che a, mahse, i nu zirtirna chu engmah lo mai a lo nih hi! I nu hi ka mawl em a ni, fate innghahna, harsatna leh manganna hre lo khawpa numawl hi min ngaidam ang che Mambawih.'
Hun leh nite an ral a, kei erawh ka lunglenna, ka fanu ka ngaihna a reh chuang lo, 'tlaitla har ti ila, zankhua hrui ang a sei leh si.' an tih ang khan chhun ni a rei a, zanlam a rehin a rei zual zawk in ka hre thin, ka fanu nena kan sulhnu ka hriatrengna thinlung hi a ral thei si lo, 'khuareiin a hnem mahna' ti thinte chuan an la tawn ve loh vang mai mai a ni. Khua a rei poh leh ka tan khawvel a reh zualin a khawhar thlaka, a lunglen thlakin a hrehawm ngawih ngawih.
'Mambawih I thihna phena thil inthup tal hi hre thei ila chuan ka rilruna leh hrehawm tihna hi a nep deuh tur' ka fanu thawmhnaw an phum ve loh ho chu pawmin ka fanu rim chu ka hnima, Mambawihi rim nu chekte chu a la pangai reng, a closet kila Mambawihi naupan laia kan chhungkaw thlalak; ka fanu, kei leh Dr. Jerry hoa kan lakte chuan lunglen a kaithoin a tizual tak zet, keima thlalakte pawh a kawl nuala ka mittui tling pama ka en laiin, a hnuaiah chuan lehkhathawn pahnih hi a lo awm, kei leh Dr. Rema tana a ziah ni ngei tur a ni, ka fanu lehkhathawn hnuhnung ber chu ka hmu ta.
" Ka hmangaih em em ka nu,
He lehkha hi i hmu tawh a nih chuan kei chu i kiangah ka awm ve tawh loa, minung tia sawi tur ka ni ve tawh lo ang, ka taksa duat taka i enkawl thin chu thlan khur, lei hnuai thuk takah zalin, ka thlarauin rorelna nia a chatuan hmun Setana angchhung a pan hun nghakin ka mu mek ngei ang ka nu.
Ka nu, ka hmangaih, ka engkim i ni tih hi inhria la ka duh, I rilruah zawhna tamtak a lang ngei ang, nangmah i indem mawlh ka hlau a ni ka Nu. Khawngaih takin mahni indem lo la, kei hi min dem ang che, he ka thil tih phenah hian kei mah chiah ka awm, a hmasa berah chuan puitling tura min enkawlna kawngah khan ka lawma, piangnawn leh tur ni ila, zahngaihnaa khat Pathian, a rawng ka lo bawlsak ve tawh thin hnenah chuan, pa nei dawn lo mahila nangmah bawk hi ka chhungkaw neihchhun a tan ka dil ang, ka nausen tet a tanga min enkawl danah vuina tur ka nei ngai lo, nu leh pa nih i kawp veka, I ko rihzia pawh ka hria, mahse, ka chhawk thei lo chea, chhawka hnekin zahna mai ka thlen che a vangin min ngaidam ang che NU.
Nu, he thil ka tih hma hian ka ngaihtuah ve che em! tih i hre duh tiraw? He thil hi pum pelh hram ka duh a sin, ka ngaihtuah nawna ka tel loa i awm turte ka ngaihtuah, kawng dang awm se ka ti lutuka ka bei nasa, kawng ka dap nasa mahse maw nu eng kawng mah a awm lo! Kan vai a tan, kan chhungkaw tan, ka mi hmangaihte tan, ka kal hi a tha zawk a ni. Mi chuan 'mi dawihzep, khawvel hmachhawn ngam lo' tiin ka thlan an lai ngei ang mahse maw nu, hmangaihna hian min ti huaisen ka ti zawk a sin, ka chatuan hmun tur, ka chan tawk Seoul hre reng chungin he thil hi ka ti a sin!.
Nu ka bialpa Dr. Rema ka hmangaih zia i hria tiraw? Nu unaupa ang ni loin Mipa angin ka hmangaih, ka bialpa, ka pasal ni ngei tura ka duhthusam leh ka suangtuah thin a ni. Mahse maw nu thil thleng thei ngai lo tur suangtuahna mai a lo ni, ka unaupa a ni tih ka hriat khan ka beiseina leh duhthusam zawng zawngte chu keimah ang bawkin an ral riai riaia, nung chungin nitin ka thi mek a sin. "
"Adik a lawm nu, Rema hi ka unaupa a ni, nangpawh he thu hian a thawng hle ang che tih ka hria, kei paw'n ka hriatna a la rei lo, I rooma thlalak, kan chhungkaw thlalak kha ka ena, ka kawl ta nghe nghe, kha kha Rema pa niin Rema nen pa hmun, nu hrang kan ni"
Lehkha chu khur zawih zawih, insut hlawp hlawpin ka chhiara, engthil nge a sawi hi? 'Bawihi kha thil i tih hma khan vawikhat tal min rawn la, i harsatnate min hrilh ve ni la chuan tun hi kan thleng lo tur.' Engkim hi ka thiam loh vek a ni, kei hi mawhphurtu ka ni, ka fanu i van lainatawm tak em! 'Bawihi min ngaidam ang che aw' lehkha chhiar zawm leh tur paw'n huaisenna ka nei tawh lo, mahse ka fanu lehkha hnuhnung chhiar zawm leh turin ka in tih huaisen a ngai.
"Nu, Rema pawhin a hre lo, he thu i fanu i hmangaih em em in thlankhur a thlenpui hi kumkhaw thuruk ni se ka ti a ni. Ka pa thlalak ka en lai khan maw nu, ka nun hi a hlim veng venga, i hnenah erawh ka sawi ngam ngang lo, i rilru tihnat ka hlau em a ni. Ka pa thlalak chu enin 'hei hi maw ka pa chu, ka zawng chhuak anga, fanu Doctor a nei a ni tih hi ka la hriattir ang' ka ti a, mahse duhthusam bei tidawng tu tur mai a lo ni si, Rema'n chawei min sawm khan ka nu a vawikhat nan ka pa diktak, ka bialpa pa chu ka hmu a sin, ka suangtuah fo thin ka pa kha ka hmua, hlim tur ni siin ka hlim hauh lo, ka thinlung hi a na lutuk, ka kehdarh vek a sin! Ka pa hmuh ka lo duh fo thin chu ka mipa hmangaih pa, kan pa intawm a lo ni si!
Nu natak chungin hlim hmel put a ngai a, kha ni kha ka khawvel nun hman tawhah he lehkha ka ziahlai tih loa, ka tana hun leh ni hrehawm ber a ni. Rema te inah khan kal lo ila thu dik ka hre lo anga ka nun a hlim deuh tur, emaw Rema nen hian lo intawng lo law law ila kan vaia kan tawrh a tul lo tur, Rema pa chuan min kuah chungin, " Nang hi maw? Ka fapa hmangaih thinlung ruksaktu chu, i hmelin a lo zir em a nih hi, kan chhungkuaah ka lo lawm a che, ka Fanu" min ti a sin. Nu ka pa ngeiin a vawikhat nan ka fanu tiin min ko, mahse maw a fanu ka nih dan a dang, min koh dan ki a hrang, a thizen zawm a fanu ang ni loin, a fapa nupui, a mĂ´ la ni mai tur angin a sin min koh!
Nu, Rema ka hmangaih zia min hriatpuitu i ni a, ani paw'n min hmangaih lutuk, ka pa ka hriatchhuah hnu a tang khan vawitam tak then ka tum thina, mahse ka thei lo. Keimah vanga a na hmel ka hmuh khan ka na a, ka then thei ngang lo, Nu, I fanu hian engtia tih tur nge ka hre lo, hmasial takin ka unaupa chu ka ngaizawng reng thei si lo, ka thinlung hi a na ngut ngut thin, ka kehsawm hneh em a ni. Ka harsatna, buaina leh natna zawng zawng, a bo a bang awm loa i hnena inbunruah vek ka duh thin, i room-ah pawh vawitam tak ka lo lut, mahse ka hrilh thei lo che, he thil hi a tak ni lo se tih ka duh em a vangin ka tih loh tawp tur ka ti ta a, beiseina beithamte ka neih chu a taka chantir turin ka beia, Rema pa DNA leh ka DNA chu ka test ta a, Nu, khami ni khan maw ka beiseina sanzia chu, ka nghahhlelhna leh hlauhthawnna kha a inbuk rit chhawk reng thin.
DNA result a chhuak ta, beiseina beidawn thlak a nih zia ka hre thar a, thil ni thei lo ni tura ka duh lutuk, ka lo suangtuah thin lak ata ka harhchhuak kawk kawk, ka beiseina meichher lo de ve che che chu, thawk leh khatin DNA result chuan min tih mih sak chiang hle, ka beiseina kha ka beidawnna khua tisei tur lek a lo ni, ka nun hi a rum ngawih ngawiha, ka beidawng a sin!
Rema ka thlah theih loh tluk zetin a hlimnan thu dik ka hrilh thei lo, ngun taka ka ngaihtuah hnuin ka mi hmangaihte, kan vai hlimnan ka kal mai a ngai a ni. Nu, nangmah tih loh kawng engkima min hrethiama, ka bula awm zel thin, nangmah tih loha ka hmangaih ber leh nangmah ah duh ka thlan a ngai tih ka hria, khawvel hi a fair lo tak zet, ka naupan laiin Pa ka neih ve loh a vangin hmuhsit, nuihzat leh tih duhdah ka ni thin, mahse, ka vui ngai lo, khawvela nu thaber mai ka nei chea, ka pa i ni bawka, ka engkim i ni, ka thlang lo thei lo che. Lehlam ah Rema, ka harsatna engkim min sutkian saka, ka kianga awm reng thin, ka tlin lohna zawng zawngte nena min pawmtu, ka kianga awm renga i aiawh thintu, mipa dang ka bula awm phal loa, ka hmangaih aia nasa a min hmangaihtu, ani pawh ka hnawl thei lo, inthen ka rawt ringawt pawha a thinlung keh sawm vek kha ka hmuh hmaih lo, ka tan hian duhthlan a va har em!
Nidang ang chu ni se Nu, i hnenah engkim sawiin, duh ka thlan theihnan min pui ngei ang. Mahse, tun tum chu a danglam, tu hnenah mah ka sawi thei si lo, a vawikhat nan Pathian hnenah hian ka vui ngawih ngawih a sin! Ka duhzawng leh min hmangaihtu ka neih ve hi phal loh a nih dawn hi! He thutlukna ka siam hi ka inchhir loa, Rema leh I tan ka hmangaihna zawng zawng ka hlan a ni.
Tap chunga he lehkha ka ziah lai hian nu ka thinlung hi a naa, kawng dang awm hram se ka la ti fan, mahse, he kawng hi thlang lo ila, Rema ka kalsan thei si lo, mi ten thudik an la hrechhuak a nga, chhungkaw hnih mualphona thlentu ka ni dawn si, chu zawng aichuan Rema na hmel ka hmu duh lo a ni. Nu i beisei ka pha loa, nang nena hmathlir kan neihve te pawh ka puitlin zawh pui tak loh che vangin min ngaidam ang che.
Hmasial takin he kawng hi thlang ta lo ila, thu dik hre reng chungin Rema hi kawp ta ila, ka tan khawvel hi a nuam dawn chuang loa, inthiam lohna nen ka nun ka hmangral dawn tho a ni. Ka hmasial a vangin chhungkaw hnihte an hmingchhiata an kehchhiat aichuan, keiin ka lei nun ka lo thlakhlel ve thin em em hi ka chhuahsan a tul zawk a ni, nungdamin la awm pawh ni ila ka tan he khawvel hi chenve na tlak a ni tawh dawn lova, ka tan ni a ĂŞng ve tawh dawn lo a ni.
Nu, ka ziak thui ta khawp mai, a tawp berah chuan maw, fanu dawihzep tak, mahni harsatna pawh hmachhawn ngam lo fanu ka nih a vangin min ngaidam ang che, he ka taksa hian a siamtu dodalin, ka lo beisei thin chhandamtu angchhung chu ka beisei ve ngam ta lo, lungduh zawng zawng kimna hmun, vanram nuam inthen awm tawh lohna hmunah chuan ka telve thei dawn ta lo, thih hnu piah lam ram tal hi ka hmangaihte kianga ka awm theihnan la beisei ve ngam ila ka ti ngawt mai, Setana lalram bak chantur ka nei ta si lo! Mahse maw nu, kei i fanu laktlak lo zet hian ka thih dawn thlengin ka han dil leh ang che, nang nena lawm taka a rawng kan bawl thin hmangaih Pathian, zahngaihnaa khat hnenah chuan ka thlarau tan zahngaihna min han dilsak ve thin ang che aw."
Ka fanu kutchhuak hnu hnung ka chhiar zo chu ka insum thei lo, heng zawng zawng hi ka fanu hian a phu bik lo, engkim amahah a inbela, engkim a kovah a nghat vek thin, 'Bawihte, ka tihpalh a ni, ka thiam loh vek a ni, min ngaidam ang che, ka fanu, i huaisenzia hre loin dawihzep ka ti chea, ka thiam loh a ni, engmah ka hriat loh vang a ni, nu ni ve tlak pawh ka ni lo, ka fanu huaisen i thlarau chantur hre reng chungin maw? Ka van lainat tak che em! "eng tikah mah ka nunna ka la ngai lo ang nu, nang nen khawvel kan hmachhawn ang a, kan hneh zel ang" i tih kha ka la hria a sin, tun tumah chuan ka paltlang pui si lo che, i bulah ka ding thei si lo, kha ni khan lo bazaar lo ila chuan ila dam tur, i natna ka chhawk thei si lo che, ka fanu ka ngai lutuk che, Bawihi i ngenna chu ka ti hlawhtling ngei ngei ang, ka tiam a che he thu hi tuman an hrechhuak lo ang.'
'I nunna i lak hma khan vawikhat tal chu i buaina min hrilh ni la chuan thudik ka hrilh vek tur che, vawiinah hian ka kiangah ila awm ve tur' tiin ka fanu lehkha hnuhnung ber chu ka hal ta a......
********** The end **************
Vanlalrema ( Rema) POV hriat a chakawm khawp mai, a lehkha hnuhnung a chhiarna te, thu dik a zawng chhuak dawn em? Nge thu dik dang ala awm zawk tihte, eng pawh chu nise he Story hi movie pakhatin min inspire a ni a, ilo chhiar ve a nih chuan suicidal promote na a ni lo tih min hriatsak hram ru.
I nunna tih tawp duhna rilru i pu ve tawh a nih chuan, hei hi hre reng ang che dam duh ngawih ngawih, tihdam theih loh natna nei ten an nunna pawhsei a nih theih nan an bei tang tanga, nung turin an bei thin. Pathian hian kan thatna turin thil engkim a rel thin, Zan khawthim chhah laiin arsi a eng mawi zual thin ang hian, i nun beidawnna kha Pathian nena in inkar siam tha tu, Pathian hmel hmuhtira, amah hnaih nan hmang hlauh ta che, tichuan i nun anchhia anga i ngaih kha malsawm a nih zia i hre mai ang. Ani chuan a hnar ngai dawn lo che ♥♥
"Keinin vânduainaah kan ruat, A hmangaihna lantirtu; Mahse, thlaphân, mângan, buaina, Lawm nan a siam ta zâwk a."
Hmangaih Pathian a ni si.
Lalrinzuali



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)