MISS FAE BY Siamthari Hmar

Ngaia
Site Admin
Posts: 18313
Joined: April 30th, 2016, 4:07 pm

MISS FAE BY Siamthari Hmar

Unread post by Ngaia » March 9th, 2021, 9:07 pm

2t2xn7j1.jpg

MISS FAE
(Competition 2021)

Nipui chawlh lai a ni a, school naupangte'n exam an zawh tawh avangin ka pi thingpuidawr a puih leh answer paper check bak kar tluanin tih tur em em ka nei lo. Kar tawpah pawh chuan dan pangaiin ka pi chu ka pui leh a, School kan kal thin lai a ka junior thin, tun a ka zirlai ni mek Hruaitluangi chuan lehkhabu hawh min rawn dil avang chuan ka hawi kual a, customer tam lai a nih avang chuan rei lo te pawh nise in a lehkhabu la tur a ka pi chhuahsan chu tih chi ni in ka hre lo. "Sir, ka pi chu ka lo pui thei a lawm. Lehkhabu kha ka chhiar chakna a rei tawh lutuk a." tiin apron in bang chu a la a, eisiamna pindanah chuan a lut tlang nghal a.

Dawr leh ka pi nen a kan chenna in chu a in hlat loh em avangin ke in kan in lam chu ka pan a; Hruaitluangi chu Lehkhabu a chhiar chak tawh em vang nge min hmuh chak hrim hrim vang a lo kal a nih ang tih ka ngaihtuah pah bawk a. Highschool kan kal ve thin lai a tang daih tawh khan athiante'n ka hming hian an chhaih fiam fo thin a, min en dan atang pawhin min ngaihven a ni tih ka hai lo. Tawngka a engmah min hrilh loh avangin ka en liam ve mai mai thin a, ka ngaihtuah zawm ngai lem lo.

Ka room ka pan tlang nghal a, dawhkan a lehkhabu chu la in ka chhuak lehnghal a. Dawr ka han thlen leh chuan ka pi leh hmeichhe pakhat hi an lo in be mawlh mawlh a. "Miss Fae!" tiin ka hriat tawk lek chuan ka phun chhuak a. Chu hmeichhia chuan min hmuh veleh min rawn pan a, ka ban a rawn chelhin, "I lo la than belh zel a nih hi!" tiin uluk takin min en a, sawi mai tur hre lo in ka ding khawng reng ringawt; Hruaitluangi chuan theitui a rawh ken sak a. "Ka ngai thin hle mai che u. I hmel pawh a that ngaiin a la tha reng!" tiin a nui a, ka hnungah chuan na lo tê in min beng a; thut pawh thu lovin a chhuak leh ta nghal a. Ka rilru fim deuh hnu chuan ka tlan chhuak a, mahse ka hmu zui tawh lo. Ka luh leh chuan Hruaitluangi'n mak ti tih hriat tak a min lo la en reng chu hai derin lehkhabu chu ka pe a.

Nileng chuan ka rilruah thildang a awm thei tawh lo. Zanah chuan ka thianpa Hriata chu len chhuahpui a sawm tumin ka call a. Miss Fae Lunglei-ah a lo zin a, chaweikhawm an rawt thu leh zan lam a school hlui a kal an tum thu min lo hrilh zawt zawt a. Miss Fae chu naktuk mai a a haw leh dawn thu a sawi chuan ka hmui ka pet a, ka thinphu rawn rang lutuk chu thunun tumin thawk ka la vak a. Eng laiin nge kan School hlui thleng a ka bike a ka lo in khalh hman ka hre lo. Hriata leh abialnu Nutei te chuan "gate a in kalh a, lawn liam angai" tiin ring theih tawpin an rawn au a. Ka phone flashlight chu on in class ix room lam ka pan nghal a; corridoor-ah chuan ka phei zel a, "Ruatpui!" ti a min rawn au tu avang chuan ka ding chawt a. " College-ah i thawk tih i thiante'n an sawi a, hetiang tak a i lo puitling ta ka hmuh che hian ka lo upat ve tawh zia min hriat chhuah tir!" tiin a nui hak a. Class room chu a phone flashlight chuan a chhun eng a, "Tlar hnung berah sawn in thu thin a." tiin min rawn en a. Amah chu Ka lo en char char a ni tih a hriat ka hlau hnuhawh leh si a, ka hawisawn vat a.

"Lehkhabu thar rimte, thawmhnaw suk fai nisa ngei a pho ro rimte, nichhuak lai hmu hman tur a zing thawh theihte, tlai lam a chhang dawr kalpelh dawn a an chhang ur thar rim han hriat changte leh tuemaw tan a kan rin ai daih a kan lo pawimawh ve a ni tih han hriatchhuah changte hian nun man hi a awm hliah hliah hian ka hre thin." tih a sawi lai a hmel a hlimna leh thathona te kha a hmelah hmuh tur a la awm reng. Kum tam a ral tawh a, mahse nimin ang maiin a thusawite leh a sawi lai a a hmelte chu ka la la hria in ka mitthlaah a la cham tlat si.

Class ka tlanbo ni in Bazar veng thlanmual-ah kan in tawk a; inneihna a kal tur ni awmtak a ni. A tirah chuan min hmu lo emaw ka ti a, ka in her a. "School form i ha si a, tun ang hun a he lai hmun a i awm chhan hi sawifiah ngaiin i hria em?" ti a min rawn pan hnaih takah kha chuan ka lu a na a, haw ka dil thu in ka chhang a. Principal call a tum leh zel avang chuan ka in puang ta a nih kha. Ka nu'n min thihsan hma em avangin a hmel pawh thlalak a ka hmuh ang bakin ka suangtuah thiam lo. Ka pa zu in reng leh nula naupang te te lo hruai haw reng chu ka sawisel a, ka pi awm loh lai a nih bakah a lo ruih lai a ni si a; min hnek thlu ta tawp kha a ni a. Ka thiante'n school-ah chuan ka pa chungchang an lo sawi a, ka pa chunchang midang sawi chu ka ngaithei leh si lova, kan insual ta a; class tan hmain ka nu thlan lampanin ka chhuak ta daih a ni. Tlanbo tum reng a inchhuahsan kha ka ni lo. Miss Fae chuan chungthil ka hrilh chuan min ring a ni tih a mitmeng atangin ka hre thei a. Ka thawl hawkin ka hria. Ka hnung a min rawn ben thek thek takah chuan ka hnuk a ulh tep a, 'Mipa ka ni' tih in hrilhnawn rengin ka mit a mittui tling erawh kha chu ka biang a luan thlak tir ka tum lo ve nasa hle a nih kha.

Sual pawh ni i la tuman min ngaihsak tak tak lo ni in ka in hria a, ka fel khan awmzia ka tan awm chuangin ka hre lo. Kan class a Mipa dang zawng zawng ai khan ka lehkha ka zir nasa a, result tha ka neih chang a min lawmpuitu ka pi chungah ka lawm em em thin. Ka pa in min ngaihtuah lo lutuk ni a ka hriatna leh nu ka result tha min lawmpuitu ka neih ve loh avang a lehkhazirin awmzia nei a ka hriat loh chang awm mahse Miss Fae a awm atang kha chuan result tha neih kha ka tan khan a nuam zual ta thin a ni.

Khami ni khan Miss Fae khan ti hian min hrilh a, "Mite'n fel an tih vang che khan i fel ta sawt a ni lova; mite'n i thil tih that an hriatpui loh vang che khan i fel lo tihna a ni reng reng lo." A sawi zawh chuan a bag atang chuan tui bottle a rawn phawrh a, min pek a tum chuan ka lu ka lo thing a; amah chuan a in ta zawk a. "Tun a kan thil ngaihtuah em em te, kan ngaihtuahna luahkhattute leh kan rilru hah em em chhante hian kan ngaihtuahna an tan a sen hi an phu reng em? Tun atang a kum sawm a ral leh hun a kan thlir let hunah kan hun hman ralna te leh kan ngaihtuahna luah em em tute hi kan tan an la hluin kan nunah an la pawimawh angem? A tlai lutuk hma hian enge kan tan a pawimawh tak tak tih kan ngaihtuah a pawimawh em em a ni. Tuemaw huat na'n emaw, tuemaw lak a phuba lakna'n emaw, in ngaihtuah lungchhiat a mahni inkhawngaih nan he kan dam chhung hi a tawi deuh a ni. Hun tha i la neih lai hian i vanglai hun chen la, mite tan malsawmna i ni thei a nia." a ti a.

Ka dinhmun a hrethiam tak tak ni a ka hriat vang leh a thusawite sawi liam mai mai lova a tak a a nunpui thin avang chuan ka ngaina in ka ngaisang a ni. Naupang fel tak anga min en a, min biak thin avangin fel chu nuam ka ti ta telh telh a. Tlangval kan hriat tirh a hmeichhe thenkhat min lo ngaihven ve tute ngei tlat ka chin pawh ka sim ta a. Miss Fae vang chauh hian midang ngaihdante leh midang duhzawngte zahsak nachang ka hriat phah bawk a ni.

"Fae!" ti a mipa rawn au ri chuan ka ngaihtuahna atang chuan min harh chhuah tir zawk a. Miss Fae chuan a hming a rawn ko tu chu a lo kuah a, "Ruatpuia, ka student hlui ka sawi reng thin kha a nih hi!" min lo kawk pah in a lo ti vat a. Chupa chuan min rawn chibai pah in, "Rinsanga ka ni a, Fae pasal." 'Fae pasal' a in ti maw? A thusawi dang ka hriat zawm tawh lo. Miss Fae chuan pasal a nei tawh a nih chu. Ka rilru chuan 'a awm reng a lawm' a ti a, ka thinlung chuan pawm harsa a ti tlat si. An kal liam tep tihah chuan Miss Fae pasal chuan a car a min thlah ka duh leh duh loh min zawt a. Ka bike chahbi chu vaiin ka ngaihtuahawm loh thu ka hrilh a. "Miss Fae mangtha!" Ka tichhuak leh thei hram a. Mipa ve si a tawp thleng a Miss Fae ka rilru put dan ka hrilh ta lo chu ka in thiam loin nep ka in ti. Hmanah khan lo hrilh ta i la, min ngaina ve hle thin si a. Min hnawlna tawngkam tal hre tur a ka lo in puang ta lo kha ka inchhir a ni.

Atukah chuan class tan a hnaih tawh avang leh answer paper check tur ka la ngah deuh avangin ka pi pui turin Hruaitluangi ka sawm a, a lo hman hlauh a. Room a ka awm lai chuan kawngkhar kik ri ka hriat avangin room atang chuan ka chhuak a. "Sir, lehkhabu ka lo dah let dawn a." tiin Hruaitluangi chuan a lehkhabu hawh chu min pe a. "Ka pi'n Bulbawk pickle fridge-a a dah la nghal turin min ti a." a tih chuan kan in zui lut a. Fridge atang chuan Bulbawk pickle a dahna lian ber chu la chhuakin dawhkanah chuan ka dah a. Theitui thlit sak ka tum lai chuan Bulbawk pickle dahna bawm lianpui chu amaha ken mai a lo tum a. "A rit a nia!" ka ti hman chauh a, a thlauh tep avang chuan a hnunglam atang chuan ka chelhpui vat a. Ka tum lawk vang ni hauh lo mahse a taksa ka tawh avang chuan nuam a ti lo a, a zak deuh ni a ka hriat vang chuan kan pahnih chauh a in a awm chu nuam a tih loh ringin dawr lam pan in Bulbawk pickle keng chung chuan ka chhohpui ta zawk a.

"Sir, thil ho te te anga lang, i sawi chhuah dawn a mi tan a ho si; i tan a hlu em em i nei ve ang tiraw? A sawi a sawi emaw a ziah a ziah a fiah mai thei ni pawn ka hre lo. Atawngtute tan chauh a thilpek, a hlut em avang a midangin min hriatthiampui loh ang hi.." Hruaitluangi'n a tih chuan han chhan mai dan tur ka hre lo na a Miss Fae ka mitthlaah a rawn lang zawk a. "Maithei!" tiin ka nui ringawt a.

Miss Fae chuan hriatrengna hlimawm tak min hnutchhiah a; ka tan chuan ka hmangaih hmasa ber, nu hmangaihna ka dawn teuh ber leh a tha lam a ka nun min kai hruaitu ti in ka hre reng tawh ang. Ka tun hun a ka hringnunah tel ve tawh lo mahse kan in hmu leh ngaite a nih chuan, "Hmanah khan.." tiin amah ngei ka rilru put thin dan te kha hrilhin ka la nuih liampui ve thei mahna.

THE END



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)