ERIC -DawngiKawlni-

Ngaia
Site Admin
Posts: 25813
Joined: April 30th, 2016, 4:07 pm

ERIC -DawngiKawlni-

Unread post by Ngaia » March 11th, 2021, 11:24 pm

terb4uq2.jpg
ERIC
(Competition 2021)

-DawngiKawlni-

College ka kal hmasak berna ni a ni a, Govt. Johnson College lam chu pan turin ka insiam a,ka chhuak ve bauh bauh a,ka phur dan leh ka phur loh dan a inang vel ang,a hmun ka thlen chuan hriat ngai reng reng hi an lo awm lova,hawina lam apiangah mithar ka hmu a,nungchang that leh inlak fel vang pawh ni hauh lo chuan ka ngawichawiin ka awm ve chet chet a ni ber e.

Mitin mai chu an phusa em em a,an chhe lo hlawmin ka rin ai daihin make up te chu an lo hmang nasa a,thian an nei nghal vek nimai hian ka hria. Nuam an tiin an hlim tlang tih erawh an hmelah a lang thei. Nuam tihna ik ka nei ve ta hauh lo mai.

Ka section chu ka zawng hmu vat a,classah chuan hmelhriat reng ka neih loh avangin tlar hmasa berah ka ṭhu kur maia.

Class kawngkhar aṭanga lo lut chu an inang lo hlawm em em a,chiang takin ka lo en hlawm a,ṭhenkhat chu han en reng reng pawhin lehkha zir hi an hmelin a support lo tih tur an awm a,ṭhenkhat lah inchei em emin fashion show an bei emaw tih tur khawpa chhe lo te an lo luta,ṭhenkhat lah music lama tui tih hriat em emin beng hnawh tuta lo lutte,in la punk leh a letling thawk Pathian thu hril mi nih tum ni ang takte,khawlai mi leh mi smart tak takte nen ,rim chi hrang hrang nen an rawn nam lut a ni ber e. Hma hun ngaihtuah lo chu an awm ka ring chiah lova,mahse hma hun atana ruahmanna fel tak nei hmel erawh ka hmu meuh lo a ni.

Kan class tukverh atanga dah chhuah chuan thingkung buk pakhat hnuaia thutna an siam hi chiang takin a lang a,chu chuan ka mit a la nghal em em mai a,ṭhian ka la nei lo bawk nen,chawlh ve leh chuan chu hmun chu ka han pan nghala,tumah lem chuan an rawn ngaihtuah ve pawhin ka hre lo. An zingah chuan awm ve lo ang mai ka niin ka inhria. Ṭhian hluite ngaih a na hle a ni. College luh hmaa ka lo ngaihtuah ṭhin tam tak kha chu ka tawng dawn hauh lo mai.

Thuthlengah chuan ṭhuin earphonein hla ka ngaithla a,ka hla ngaihthlak moodah ka cheng bawk a,music videoa awm ve ang maiin ka suangtuahna a vak thui a ni. Chutia ka han inlak lungrun,ka ṭah lek lek ṭep tawh lai tak chuan ka bula mi pakhat lo kal chuan min lo beng bu lawp a.

Ka han hawi chhuak a ka han en chiah chu,mipa sang veh vawh,ngo lam ai chuan fai sar mai mahse hang tia sawi tur ni si lo,vawi khat hmuhnaah pawh a zûnah a uai nghal theih ang ti khawpa mi hipna ngah,a hmel chuan mipa tih a sawifiaha,a pian chuan chhe lo tih a hrilhfiaha,a inthuam dan chuan mi hipna ngah tih a sawifiah. Chung zawng ai chuan a rim mawlh mai kha,a rim ka hriat rual khan ka awmna hmun ata kha ka thlawk delh delh a,huan nuam tak leh hmun ralmuang em em a awm ang mai ka ni.

Min beng bu lawp e ti lo chuan,a ,ha ka ti ngang aniang ka lo melh ngar ngar a ni awm a,a lehkhabu chuan min han vaw leh awrh a,ka harh zawk.

"Enge?"
"Lalthanzami i ni tiraw?"

Awiii a aw chu,a thawp sut a,a thum deuh,zawitea sawi ang mai hi a ni mahse a sawi erawh a chiang fak si.

"I ni tiraw?"
"Maww,aw ni e"
"Principalin officeah a koh che"
"Keimah maw,tinge?"
"Ka hre bik nang,"

Ka tho a,ka lehkhabu leh ka earphone vel ka khung khawm lai chuan a kal liam tawh emaw ka tih chu a rawn hawi let a,

"Kan principal khi hlau rawh aw,a nung chungin mi a ei thin ania,kei chu ni ila chemte ka pai ang" a rawn ti a.
Ka meng phawk hle,ka chil ka lem deuh dat a,ka in ak fel amah ka pelh dawn lai tak chuan, mipa pakhat aw ring leng lawng fiah em em mai hi a rawn au lauh lauha,

"Eric,principalin a koh tel che"
"Principalin a koh ve che aw Eric"
a rawn au nasa kher mai.

Ka bula mipa chhe lo leh hawihhawm lo zet chu Erica a ni maw tiin ka ngaihtuaha,kan inmelh a,principal office lam pan chuan kan chho dun ta a ni.

Office kan thlen chuan ka zam hle maia,ni khatna a principal officea koh han nih mai chu,ka nun hman tak zawng zawnga ka tihsual ni awma ka ngaih ka chhui kir ni berin ka hria,ka bula mi erawh zam chu sawi loh a thinrim hmel mah zawk.

Principal chuan a officeah min koh lut a,zun ka cheh dawn hialin ka hria. Principal ka hmu chiah chu,ka ngaihtuahnaah thil dang a rawn lut rang hle.Kan principal chu a te lutuk,a chal a ngalh mai sia,Erica phei chu a chho en,a kim ve biai bawk si,ka nui chhuak phut renga,mahse ka insum thei hram e. Ka tlangnelna hmuna awm chu ni ila,chhuat bengin ka nui ang,coat a ha fel at lehnghal,tarmit te reuhte a vuaha,a kim ve biai bawk si,nuih bawm a hawlh ngei mai.

Principal chuan min rawn biaa,
"Zami maw i nih,hei i record ka lo en a,result tha tak nei i ni lem lova,lehkha thiam tak tia sawi ni si i 12 result hi a chhe ngei mai 2nd ah i pass pha awrh a nih hi mawle,chuta karah i landan i uluk lo em em lehnghal a,zing hmai pawh phih lo hmelte i put reuh kha mawle"

ka mitah tak en pah chuan a nung chungin min phum ni berin ka hria,insual pangai ila ka ngam awm tehlul nen.
Tih ngaihna vak awm hek lo 'niaaa' ka ti thei awrh.

Principal chuan min melh kaka,
"Erica nen hian project khawih dun turin ka duh che u a ni. In laktlak loh dun em ema,thluak ṭha tak nei siin in mawl em em a,rilru chak tak nei siin thiam reng in nei lo ve ve bawk. "

Mak ka tih tluk zetin Erica chuan mak a ti a ni ngei ang,
"Enga?" a rawn ti thawt.
Ka tawng hman lo principal vek chuan
"Erica-te ṭhian ho hian band ka din ve e an ti a,music video siam an duh a,ka lo hriat danin in school hla inphuahsiakah pakhatna i ni a,i thil phuah leh i ziah thenkhat ka chhiar a,kan college theme song tur phuah ula ka ti a ni.Erica pawh chhawrna a awm ve a ni tihna a ni mai" a ti zawm zata,kan ṭawng ve hma hmain chhuak turin min ti a,kan chhuak nghal.

Office pawnah chuan Erica chuan hla ka phuah ṭhin leh ṭhin loh vel chu min zawt a,ka phuah ngai loh thu leh thuziah pawh ka tih lutuk loh thute,kan school hla ka phuah kha chu intihsiak kan tlem em em thute ka sawi zawt zawt a. Erica chuan duhthlan tur kan neih loh thu leh hla puitlin nan thla 2 chiah kan neih tawh thu min hrilh a. College banah canteenah amah hmu turin min hrilha,a band member dangte nen min hmelhriat tir a tum bakah project atan meeting neih a rawt nghal bawk.

Ka college ni hmasa ber chu principal chhe bulbawk ve te-in min tih chhiat sak vek ni berin ka hria. Nilengin thil dang ngaihtuah a har tawh hle mai.

Thildang zawng ai mah chuan Erica te ṭhianho nen chuan kan section a inang niin,an class rawn lut te chu aw an chhe lo mahse hma hun hi a awm hlawl lo. An zinga khawsa tur anga ka inngaihtuah phei chuan kan hma hun hi a thim mai ni lo a dum vekin ka hria..mahni tawka laktlak loh tak nih nak alaia kei aia laktlak loh ka kawp dawn ni berin ka inhria.

Tlai lam kan inhmu khawmte chu thil pawimawh chhak chhuak ik hi kan awm lo reng reng.Keimah ang ṭhah panga dang nena han awm khawm mai chu ka nu leh pate chu awm se an thi dang hial maithei a ni.

Mah se kan zingah chuan ngawi chawi deuh mai hi a awm a,hmeltha tak chu a ni lova,midang aia chungchuanna a nei lo mi pangai tak mai a ni a,hmelṭha tia sawi tur a ni lo mahse a chhe lo. A mizia erawhin min hip hle a ni. Tarmit a vuaha a rawn nui ve leh seih thin.

Erica ṭhianṭha ber niin a hming chu Felix a ni. A hmingpum a sawi duh miah lova,Erica pawhin a hming pum a hre lo. A ngawi chet chet a,a sirah te hian guitar a lo perh melh melh thin. A bula ka awm chuan ka hahdamin,ka thla a muang ṭhin hle a ni tih ka hriatchhuah nan kar khat bak ka mamawh lo. A tawng tam lo nain min hrethiama,a harhvang lo nain min dawhtheia,midang aia tha bik ni lo mahse kei chuan Felixa chu ka thlang ber a ni. A tawi zawngin Felixa chu ka duh a ni ta ber e.

Keimah ang chiahin Erica pawh chuan an bandmate zinga mi Dawngi chu a duh tih ka hai lo. Dawngi hi hmeichhe nu hnap mai a ni a,a zia a zawiin,a nu em em a,a puitling em em a,thil khawih fel tu ber a ni. A pian,hmel leh a mizia chu a inrem em em vel vek hian ka hre thin. Ka hmeichhiat pui ni mahse ka duh em em mai a ni,ka en tlawk tlawk thin. Amah ang nih kha ka chak ve ber a ni.mak deuh mai chu Drummer a ni tlat kha a ni.

Felixa leh Dawngi chu an innelin an inngaina em ema,an zia a inang bawka an inman a,an pahniha an awm tawh chuan an hlim em em a midang an mamawh lo ni berin a lang thin.Lehkha an thiam dun em em bawk.

Lehlamah kei leh Eric,kan pahnih erawh hi chuan thlipui thawk thut thei ang reng kan ni.kan thlenna chin apiangah chhiatna kan thlen ni berin ka hria. Kan fail loh leh kan pass tawk tawk a,class bunk leh class a mut te chu kan hna a ni deuh ber mai. Kan kalna apiangah eng emaw hi tum loh deuh hian kan tichhe zel bawk a. Kan inmil letling phian. Rei lo teah thiantha tak kan ni ta reng bawk a.
Erica nen chuan mak tak maiin lehkha chhiar,ziah leh hla phuahte chu kan tui em em a. College theme song pawh chu tha takin kan phuah a,a thluk pawh a nalh hle,Erica aw pa takin an sak phei hi chuan a nalh hluah hluah a ni berin ka hria.

Engtin tin emaw college 1semester leh 2nd semester chu ho lam fahranin kan zo ve mai a,Erica nen chuan attendance-a kan tlak avangin 2nd semester kan exam thei lo nghe nghe.

3rd sem tan tura college ka pan leh lai te chuan Erica hmuh ka nghakhlel em em a,chawlh laiin inbe tho mah ila phone atang ngawt chuan a ho deuh thin a ni. Erica ka hmu chu ka hlim hle,ka hlim tluk zetin a hlim ve in ka hria. Dawngi leh Felix pawh an lo lang ve nghal hlawl a,kan bass perh tu Tluanga erawh Delhi lamah zirna min zawm san thung.

Dawngi chuan an in a chaw ei turin min sawma,class bunk thakin kan bazzara,tlaiah chaw kan eikhawm nghal hmak a.
Chaw kan ei kham kan intihfel lai vel chuan ,inchung atang chuan kawngkhar khat dawt ri a lo ri thuai a,Erica chu a rawn thlan chhuak hlawk hlawka,a thinrim emaw ni tih tur khawpin. Dawngi chuan a rawn um chhuak a,Felixa nen chuan kan zui nghal a.

Dawngi chuan a au tuar tuara,bike a Erica chuang tur te chu a kuah thuak thuak a Erica chuan a rawn nam thlu dawrh a,Felixa chuan Dawngi chu a rawn kai tho vat a,Erica chuan a rawn en deuh a,mahse chak lutukin a tlan chhuak ta daih a.

Inchhung kan luh hnu chuan Dawngi chu thil awmzia kan zawt a, Dawngi chuan Erica chu a bialpa ni turin a lo sawm hi a lo ni a,a tap zawih zawih a,Felix chuan a roomah a hruai chho a,kei erawh chuan mak ka ti hle. Erica'n Dawngi a duh zia hre chiangtu ka ni tlat a ni. Erica nena kan thuruk a ni a,Felixa ka duh thu min thup sak a,keiin Dawngi a duh thu. Dawngi tan hla te kha a phuah hial a ni si a,tinge a hnar leh si ka va bo tak em!!

Erica hlir hi min thlahtu a ni a,mahse a tlanbo tak daih avang chuan Felixa chuan Dawngi a that deuh hnu chuan min va thlah haw ta a,kan in kan thlen hma deuh chuan Felixa chuan bike a ti thi a,kan in panna kawngah chuan thingkung a awm deuh that avangin ke a kal a chak thu a sawi a, min 10 vel lek kal a ni bawk a,ke in min thlah haw ta a. A ngaite bawkin engmah a sawi lem lo mahse a bula khatia kal vel kha nuam ka ti em em a,ngawi renga zui thintu ka nih angin ka zui leh det det a,thawm engmah a awm lo a mahse eng emaw chu chiang tak hian a ri ral ral hian ka hria. Thawm awm lo kha ka hria ni berin ka hria. Kan in chu kan thleng vat a,kan inmangthaa,thlah let leh tal ka tum leh pek a,min nawr lut nawk nawk a ni ber e.

Zan khua deuh thawin Erica chu biak ka tum a,a phone a lak loh bakah a switch off ta daih a,msg pawh a seen lo. Kar khat vel chu Erica ka hmu lo. College a lo kal si lo. Felixa nen an inah kan va kal ta ringawt a.

Erica te in kan va thlena min lo chhawntu chuan min tiphu zawk mai le,kan principal a lo ni Erica pa chu kan principal hi a lo ni awii ka rel nasa thin mai si a. Erica roomah a awm thu min hrilh a,kan chhoh dawn lai tak chuan Felixa chuan call a dawng a,anu damdawiinah an admit thu an lo hrilh a,engmah hrechiang bik si lo chuan rilru buai takin damdawiin lam chu a pan a.

Erica bulah kei ka kal taa,a room ka lut chiah chu kha rim,ka hmuh hmasak ber nia rim tui ka hriat ngei mai kha alo nam chek a,Erica chuan min lo kuah thuak pah chuan a pa ka relna zawng zawng kha recordin a nei tih min lo hrilh nghal zet zet a,ka ngei lutuk chuan ka chhuih tawk nghe nghe . Thil sawipui ka tum pawhin engmah a sawi pui theih loh,thil ho lam mai mai a sawi a,a nui.huat huat a,min beng thuak thuak a,games te kha kan khel.nileng vel.ta mai maiin ka.hria.

Erica hi a na tih ka hria mahse a lo tuar thiam zek a, zantin deuh thaw Felixa ka duh vanga ka tah thin lai khan min hnem a,Felixa'n bialnu a neih apianga ka inhnemna awmchhun a ni. Felixa rilru a nat changin ka hnem a,Felixa vanga ka rilru na min lo hnem leh chhawng thin. Nitin deuh thaw min tiduhdah mahse ka period laia min duat thin em em tu a ni.

Ni a liam a,kar a liam a,kum a liam kan college kum tawp ber a lo ni ta reng mai. Nitin mai chuan kan la ho em em a,Dawngi erawh kan lak atang a inla hrang tia sawi theih a ni. Kei leh Eric leh Felix kan ni deuh tawh tlawng mai. Mahse Dawngi kan hmuh apiang hian Erica hian a hmangaih a ni tih hi a mitah ka hmu thin. Felixa pawhin bialnu dang min neih san leh tawh a,a ruk bawkin ka tuar leh a,Erica nen bawk chuan min hnem leh mai a.

Zan khat chu dar 1 dawnah ka phone a lo ri,kan lak chuan Erica alo ni a,Felixa damdawiin a awm thu min lo hrilh a,rang takin damdawiin lam ka pan a,ka hlauhthawn zia kha ka thaw pawhin ka hre lo. Damdawiin ka thlen chuan an lo awm deuh nual tawh a. Doctor sawi danin Felixa kal chu thlak a ngai a ni awm a,test vel an lo nei mek a,ka pek theih beiseiin keipawh chuan ka test ve a,mak tak maiin Erica chuan a lo mil a,vawi khat te pawh a inngaihtuah buai lo a kal pe turin a inpeih nghal.

Erica vang chuan Felix chu a rawn dam chhuak leh a,Erica hi chu thawvengin chhe hawr hawr thin viau mahse kan inhumhimna kulh ang vel a ni. Dawngi a tih nat chhan erawh ka la hre lo.

College kan zo ve ta der mai,hma hun a buai ta nuaih nuaih mai le. Zirtir lam ka tui avangin DIETah training turin ka tling hlauh mai a, Felixa' erawh MZU lam a hawi a. Erica erawh zir zawm tum a nei lova music a ni mai a ti ringawt thin.

Thla thum a liam ta kan tuanna tlang a dan hnu chuan ni khat chu inneih sawmna ka dawng hlawl mai Felixa hnen atangin a ni. Mak ka ti lutuk kha ni khaw hre loin ka tlu hiala,ka harh chuan ka sirah Erica a lo thu a,ka thlanin min bual chhuak vek a,ka thaw te kha a hahin ka hria,ka hriat loh laiin ka mittui a lo tla zawih zawiha,ka dang hman lo.

Erica chuan min tung tho a,min kuaha,ka tap tha thei lo. Felixa ka ngaihdan engkim.hre tu a ni a,Felixa vanga ngaihzawng pawh nei ngai lo ka ni a,min duh dertute pawh ka hnawl.vek thin . Felixa ngei chuan nupui a nei dawna,sawmna min lo thawn a ni. Kal ka tum lo,ka tuar zawh ka inring lo. Mahse Erica chuan
"I hmangaih anih chuan a hlim ni berah hlim takin i kal tur a ni,I hmangaih tak nei thei lo mahla ani chuan a hmangaih tak a nei thei a,hlimin nui thei lo mahla duhsakna tal chu i hlan tur a ni" tiin min fuih a,"hmangaih berte kan tel lo a an hlim lai tluka hmuh hrehawm a awm lo" tiin a sawi zawm zat a,a sawi danah chuan hmangaihnain a hrual hrep te pawh a ang ve lek lek tep alawm le.

Erica chuan min hmin hram a,Felixa te inneih ni chu nui mang lo vin ka va hmang ve a,monu chu mittui nen kan khuah ta lawp lawp te khan ka hria.Erica chu min veng turin ka bulah a awm renga,a rukin tissue min pe deuh sek a,mopa thianpa a ni lo kha tun thleng hian mak ka la ti. Felixa khan a thian atan a sawm tih ka hria.

Dawngi pawh a rawn lang ve hlawl a,a chhe lo lehpek hle a ni.Erica mit meng a la inthlak lo Dawngi hi a hmangaih,Dawngi pawh hian a hmangaih reng,an inhmu chiah chu boruak a rit duh hle,kei lah Felixa nupui nen rilru na nen,inhmen tur hi kan va awm lo tlang tak. Erica chuan engmah thleng lo ang maiin Dawngi chu a thlir liam a.

Erica'n a hnawl hnu khan vawi tam Dawngi hian a beinawn leh a,Erica hian a hnar vek a ni. Dawngi kha engvanga beidawng mai lo nge le tiin ka ngaihtuah thin,Erica lah hian engmah min hrilh duh lova. Felixa vanga ka tah hnem tluk zeti Dawngi hi Erica vangin a tah hnem ka ring.

Kum a liam a,Dawngi pawh pasal a nei a,a pasal neih ni khan Erica kha a hlim berin ka hria,nuam a ti a,duhsakna zawng zawng kha a hlan ni berin ka hria.Dawngi chu a insiamna roomah chuan kan han hmu a,Dawngi chu thi mawi deuh mai a present a,ni leh thla awm kawp hi a ni a,Erica chuan Dawngi chalah a fawpa,
"Hmangaihna leh malsawmna zawng zawng ka duhsak che,i nui hmel i put reng theih nan hian mi tuemaw chuan a hmangaihna zawng zawng a hlan vek tih hria la,tapin lungngai suh ang che aw" tiin Dawngi a thlah a,Erica kal liam tur Dawngi'n a thlir laia a mittui far kha ka theihnghilh thei lo.

Felixa pawh fa te a nei tawh a,kei chu zirtirtu ka ni a,Eric erawh musician awm awl a ni deuh tawp.Ni khat chu Felixa nen kan inhmu thut a,thil ei turin min sawm a,kan titi lai chuan Felixa chuan min en a,
"Zam,mi zawng zawngin Erica an tih vek laia ka tana hmangaihna i vawn tlat avang khan ka lawm e aw,that bikna kha ka nei lo a mahse min thlan tlat thin avang khan ka lawm a,i kiangah kha chuan engtin pawh ka awm ngam thin a ni" an ti chiah mai chu ka phu dawt. Mak ti takin ka en a,a nui seih a,kha nui ngei mai ka luanliamna kha . Engmah ka sawi zawm thei lo,ka ei zawh hma chuan ka chhuahsan a. Erica ka phone nghal,Eric tih leh tah ka rual a ni ber e.

Erica chu a lo thleng nghal a ni mai,min lo kuah a,aw rawl chhuah meuhin ka tap a,khang hun chhung khan a lo hre vek a,mahse engmah hre lo ang mai khan a lo awm a,ka hrethiam lo zawhna ka ngah lutuk,mahse Felixa zawh tumna ka nei lo. Ka hniam rawng rawng ni berin ka hria. Thil engkim chu a pangai ang hmakin ka khawsa zui a,Felix bulah pawh chuan ka danglam ik lo.

Hun a liam zel a,mahni tuanna mual mualah tiin kan buai hle a. Ni khat chu Erica'n min lo phone a mahse aw ka hriat chu Eric a ni lo. Apa alo nia. A thu lo sawi chuan min deng ngang aniang,ka ding khawng reng mai. Ka awi lo mahse ka hmaah chuan Felixa a lo ding,min lo hruai turin. Ka la ring lo,min tihder aniang.

"Eric a boral"

Awih lo tak siin,Felix chu ka zuia,ka duh thei lo Erica-te in kawtah kan ding.Mi an lo thu thup tawha,ka lut thei lo,Erica ruang bulah chuan ka ding khawng reng a,ka â mai dawin ka hria,ka buai mup a ni ber e. Erica ka thlahliam lai zawng zawng,an phum lai nen khan ka mang hriat vek ni berin ka hria,thil thleng tak tak a ni tih ka pawm thei lo.

Kar khat a lo liam meuh chuan,Erica a awm lo tih ka pawm thiam tan a,a thih chamah chuan a thlanah ka zu kal a,ka thlen chuan Dawngi leh Felixa chu an lo awm a,ka thlen meuh chuan haw an tum tawh lam a lo ni a,an haw tur chu ka thlir reng a.

Dawngi ni e, Erica a thih khan a hmangaih leh amah hmangaihtu a chan. Erica kha HIV positive ni lo se chu Dawngi kha a vuan anga,a bialpa nih kha duhin Dawngi nun kha a ti chhe vek thei. Mahse Dawngi hma hun avang chauh khan Erica khan Dawngi kha a kal tir a ni. Dawngi nun a chhahnhim letling zawk a ni. Duh nise Dawngi'n a duh dan ngaihtuahin Erica khan Dawngi kha a tichhe vek thei a ni.

Felixa, ni e, Felixa chuan a best a chan a,a nunna chhantu leh a unaupa a chan ang mai a ni. Felixa tan khan engkim a ti thin a,Erica khan Felixa kha a kawm mai a ni lova,a enkawl a ni mah thin.

Kei,ni e, Erica ka chan khan,ka thiantha ber leh ka thuruk vawnghimtu,min venghimtu,min hnemtu ni e,ka engkim ka chan a ni ber e.

Chutia ka ngaihtuah lai chuan pitar pakhatte hi ka bulah a lo kal a,

"Mami hei hi Johnson college principal fapa Erica thlan kha a ni tiraw?" tiin min lo zawt a
"Aw ni e" mak ka ti hle.

Chu pitar chuan rose sen pakhat a rawn dah a,an inhre thin em ni tia ka zawh chuan,Erica chuan chu pitar chu thla tin pawisa a lo pek bakah a tulna apiangah a lo pui thin hi a lo ni a,pitar mittui tla chu ka en reng a,pitar pawh chuan min haw san ta a.

Ka ngaihtuahna a kal thui hle a, Erica khan kan hriat lohin mi engzah tak lo tanpui ang maw. Erica khan a thih hun tur a hriaa,a tam thei ang ber kha a lo tanpui a lo ni.

Dawngi te inneih zanah te khan Felixa ka hmuha ka nat em avanga ka tah te khan Erica khan min hnem zankhuaa,amah kha avan lo na dawn tak em mahse a tilang ngai lo.

Erica khan duh a thlanga,a natna a tilang lo a,midangte tana nun kha a thlang a ni. Rei lo te a dam dawn tih a inhriaa,a nun dan tur kha a thlang fel a ni.Erica khan a duh tinreng neiin midang nun a tichhe thei a,mahse chu lam kawng chu a thlang lo.

Mitin hian duhthlanna kan nei a,harsatna tam tak karah pawh a tha zawnga nun leh chhe zawnga nun hman hi kan kutah a awm. Erica khan kan zingah harsatna a ngahin a nei thuk ber mahse midangte tana luang chhuak ber a ni.

Erica ka hriatchhuah apiangin thawnthu ziah zawh loh chhiar ang ka ni ziah tawh dawn a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)