ZONUNSANGI BY Tetei

Ngaia
Site Admin
Posts: 25813
Joined: April 30th, 2016, 4:07 pm

ZONUNSANGI BY Tetei

Unread post by Ngaia » March 13th, 2021, 9:38 pm

hnqbttb0.jpg


ZONUNSANGI
(Competition 2021)
-Tetei


YMA information-a an thu puan avang chuan a nui sak a. ''Chhiat tawh thu, Pu Lalrinenga, Pi Lalengzami pasal chu tukin zing dar 5 khan anmahni chenna inah a boral a, chhiat tawh thu hi…..''
'A phu tawk chiah a ni', tia phun sapin a room lam a pan a. Khuma thlalak a dah chu a en vang vanga chutah, "Nu, pa, en teh u, in fanu hian in phuba chu ka laksak ta che u a sin, tunah chuan hahdam takin in awm thei tawh ang tiraw. En teh Mami, Kha mihring tenawm khan tunah chuan a phu tawk a hmu tawh a sin, thih hnu piah lamah pawh hreawm taka a awm zui ngei ka beisei. Nu, pa, û, kei pawh in bula awm tawh turin ka lokal thuai ang" tiin, rei tak chhung a lo up beh tawh a thinlung natna te chu a țah chhuah pui ta hawk hawk a.

……………………

Darthlalang hmaah chuan dingin a uniform thar hak chu ngainat hmel takin a en dauh dauh reng a, thildang a tih san thei mawlh lo; a hak ve chak theih zia te a ngaihtuah a, chutia nitin a hak ve tur a lo ni ta chu a hlim em ema dar zat reng a lo ngaihsak lo. "Zonun, Kan tlai ang e, lokal rawh" a room pawn ațang chuan an rawn ti a, "Aw, ka lo kal nghal rei lo te" tiin, a sam te chu a țawn țha mawlh mawlh a.

"A'u, tunah chuan school kan kal rual ang a kan haw rual ziah tawh dawn tiraw", nui var varin a bula kal a u chu a bia a. "Bawihte, a hreawm i ti lo ang maw? I țhiante tumah an kal ve bawk si lo a.." "Nangmah i awm dawn a lawm" a u thusawi pawt chatin a lo ti thuai a. Ni e, țhian dang a mamawh lo, a hmingin țhiante chu nei ve bawk mahse a kawm tam lem lo a, a theihna apiangah a u a zui deuh chawt țhin.

Chhungkaw hlim tak niin a nu leh pate hian sawrkar hna an thawk ve ve a, hausa lua tia sawi tur ni lo mahse midang an awt ngai bik lo a ni. Chutia hlim taka chhungkua an awm ho lai chuan apa chhungte lamin harsatna an tawk a, a pa te unaua naupang ber Lalrinenga chu an awmpui a ngai ta a ni. Pu Ramtea hi pa țha tak mai a ni a, chhungkaw ngaihsak mi tak a ni; A chhungte tan hian ui a nei ngai lo a, a theihna kawngah chuan țanpui zel duh mi a ni. An unau hi panga niin mipa pahnih chauh an awm a, Pu Ramtea leh Lalrinenga inkarah hian hmeichhe pathum awmin pasal an nei vek tawh nghe nghe. Pu Ramtea hian In pui nghah chu duh viau mahse a nau te nupa in luah tur zawnga buai tak sum thawh chhuah mumal nei si lote chu a kian ta zawk a, tichuan a nupui fanau te chu a indan pui ta a ni. Mahse a vui ngai lo a, a unaute tan thil țha tak a tihsakah inngaiin a lawm em em zawk țhin.

Tichuan an chhungkua chu an pun belh ta a, Pu Ramtea nau Rinenga pawh a fel sawt sawt viau mai, inhlawhna turte zawngin a tihtheih ang apiang chu a ti ve bawrh bawrh țhin. Zonuni te unau chu a duat thei em em a, Rampuii erawh chuan a ngaina tehchiam lo; thil a leisak te hian a laksak duh ngai lo a, mahse anu te vangin a la leh nge nge țhin.

Thla thum dawn a ni ta. Ni khat an school kal chu Rampuii chuan,"Bawihte, patea hi nel lutuk suh aw, a sual lutuk a nia, fel deuh angin a awm der mai mai a nih hi" tiin a nau chu a hrilh ta a. "Ehe..! a'u patea te chuan min duat sia a fel em hi,eng nga ti nge misual i tih a?" Zonuni mak ti chu a phawk deuh hra a. "Naute, en teh zana ka lehkha zir laiin patea phone hmang lai ka hria a lawm, nang chuan ngaihtuah buai vak lo la, mahse nel lutuk tawh suh aw" a nau chuan a thusawi chu zawm ngei se a ti tih a hmelah chuan a lang chhuak thei hial a ni. Eng thil nge ni ta ang? Engvanga a patea ngei chu ring lo nge a nih tak ang le!

Nilengin Zonuni chuan a u thusawi chu a ngaihtuah neuh neuh a, a u chuan eng chiah nge a hriat ang, eng nga ti nge a patea chu hlat tura a tih, ama tawkah a rilru a buai ve em em a, ani ang naupang rilru thianghlim tan chuan mak tih loh rual a ni lo. Tlaia an haw chuan a u inthlak laiin a va zawt leh ta nge nge a, "A'u, patea chuan eng nge tihsual a neih a, mawh, misual a ni lo a fel lutuk min duat theih em hi" tiin, a u hmaah chuan a ding a. "Naute, ngaihtuah vak vak suh ka tih kha, nakinah apa te kan hrilh ang a tihdan an hre mai ang; tunah chuan en,gmah ngaihtuah tawh suh aw, chuti lo chu patea hian a hrethiam mai ang" tiin a lo chhâng mai a. Mahse Zonuni chuan a duh khawp lo nasa mai, "A'u, eng nge a sualna chu sawi la, a sualna ka hre ve hlei nem; a sualna ka hriat loh te chuan apa te bulah pawh ka sawi thei nang" a ti ve ta tlat a. "Ihmaw naute, tunah chuan engkim ka la hrilh thei lo che mahse patea hian apa te hi a bum a ni, i hrethiam em?" A dara vawn pah chuan, "Chuvang chuan engmah min zawt buai lovin apa te kan hrilh hma chu pangngai takin awm rawh aw" dam thlap hian a ti a. "A nih a'u, patea chuan ngati nge min bum kher a?" A u chuan thaw hak chung hian "Ka hre bik lo naute, apa te kan hrilh phawt ang a, chuan a fel vek mai ang. Tunah chuan apa te lo haw hma chu lehkha lo zir rawh aw" tiin a room-ah a hruai ta a.

Tlai lam dar 5 rik dawnah chuan a nu chu lo thlengin chawhmeh eng eng emaw a rawn khai bawr țeuh bawk a. "Vawiin chu kan tlai deuh a, i patea hi a lo la haw lo em ni?" Tiin a thil hawn dah țhat pah chuan a fate chu a zawt a, "La haw lo, apa hi a lo haw har dawn em?" Rampuii chuan anu puih pah chuan a ti nghal a, "Lo haw har lo se keichu ka ril a țam tawh" pang chang zetin Zonuni chuan a lo ti ve bawk a; a nu leh a u chuan an nuih hak hak a.

Chaw te chu Rampuii'n a lo chhum tawh vangin Alu an kang a, bai leh eng eng emaw te an siam leh hnu chuan chaw ei an peih ta der mai. "Ka'n intifai lawk ang e, i pa pawh a lo thleng har tawh lo ang" tiin room lamah a phei a, Rinenga pawh lo haw ve chiahin a fate chu a be leh sawt sawt a, mahse ni dang angin Zonuni chuan a be țha meuh lo, "Kan naute duat hi a dam lo em ni a va tûm ber bur ve" Zonuni țhutna bula țhut pah chuan a'n ti a. "Vawiinah school-ah an inhau deuh a, a mood a chhia a nih kha" Rampuii chuan a lo ti vat a, Zonuni erawh a ngawi reng thung; a u sawi ang khan a patea hi a lo sual tak tak a nih chuan…. a rilru a kal thui ngang mai. Rei vak lo hnuah a pa pawh lo thlengin zanriah te an kil a, zanriah ei kham chuan Rinenga chuan,"Zanin chu vengthlang lam nula ka'n rim teh ang" tiin a insiam a, a u te nupa chuan fiam hlut pahin haw har lo tur leh fimkhur tur chuan an hrilh ve bawk a. Rampuii chuan chu hun chu remchangah lain a patea chhuah hnu rei vak loah a pa te bulah chuan tihian a sawi ta a.

"Pa, ka hrilh ang che u ka ti țhin a, mahse, hun remchang a awm thei lo lutuk a. Ih…, patea lo awm tirh khan zanah test tur kan neih vangin lehkha ka zir rei deuh a, patea phone hmang thawm hi ka hria a, a tir chuan ngaih thlak em em pawh ka tum lo mahse, i hming a lam tlata ka hriat vangin ka ngaithla a; Lehlam țawng chu hre thei lo mah ila a țawng danah chuan thil țha a nih ka ring lo a. 'Tunah chuan engmah tih chi a la ni lo, hmanhmawh vut vuta thiltih hian engmah a sawt lo, lo nghak hram hram rawh. Ka u hi mi fel tak a ni a, min rinhlelh na chang pawh a hre lo ang' tih thu te a sawi a, ka ngaih a țha thei lo a ni" tiin, a pa te chu a hrilh ta a. "Eng emaw thil zep a nei a ni lo maw le Pa-a?" Pi Zuali chuan a lo ti thuai a, "Umm.. eng pawh nise chîk deuh a ngai dawn a nih chu, eng thil nge tih a tum tihte kan hriat a ngai a ni" Pu Ramtea chuan a lo ti dap dap a. "Mampui, eng pawh nise ngaihtuah buai lo la, lehkha țha deuhin han zir phawt mai ula; he lam hi chu keini'n kan buaipui thei a lawm" ti lehin a fate chu room lamah a tir lut ta a.

"Keichu pa-a a hma țang khan ka ngaih a țha lo tawh, in pui lam lah an biak theih loh hmak bawk si. Khawlaia han intawh changte pawh hian i naute hian min pehhel tlat zel a, chanchin zawh theihin an awm si lo. Thil dik lo eng emaw tak a awm a ni ang" Pi Zuali chuan vei nei hmel tak hian a ti a. Mahse Pu Ramtea erawh chuan hahdam hmel tak hian,"E, Nu-i rilru tihah mah ta che, ka thli thlai ru reng tawh zawk a lawm. Kan Rinenga rawn awm dawn pawh khan eng ang harsatna nge an tawh tihte ka chhui hmasa phawt a, sum leh pai lam an tlakchham mai bakah Rinenga hian mi pawisa a pûk sak ni awm tak a ni. Chu a sum pûkna te chuan a rulh vat loh chuan a nunna in a tawrh tur thuin an vau a ni awm e, lo lungngai lo phawt la, a mamawh chu sum a ni. Ti hian a inhlawh ve zel ang a, tih dan te pawh kan ngaihtuah pui ve ang chu" a ti ta a. Pawn lam ațang an thusawi chu mi tu emaw hian uluk takin a lo ngaithla a, "Nangni sum ringawt kha ka mamawh lo e, ka nu leh pa te lak ațang engmah chan ka nei ve lo a, mahse he in leh ram te hi chu ka taah ka siam ngei ang. Min lo chhui zui vel a maw? lo ngawi tak rawh u, inla hre dawn a lawm" tia a hriat tawk leka phunin a kalsawn ta a.

Kar khat lai a liam leh tawh a, mahse Pi Zuali te nupa chu engmah thleng lo ang maiin an awm a; Rampuii te unau erawh chuan an patea chu an țih ru tlat tawh a, naupang ta na na na chuan han zêp vak dan an hre tlat lo a ni. Rinenga pawh han rinhlelh turin a awm duh der lo a, Pu Ramtea te tan pawh hma han lak vak ngaihna a awm lo a ni.

Rinenga rawn awm ațang thla nga-na chiah a ni ta. Rinenga chuan a u bulah chuan Taxi second hand lei ve a tum thu a sawi ta a, Pu Ramtea chuan "Ekhai..! Kei min rawn a ngai hlei nem maw, nang berin i duh te chuan a țha a ni mai a lawm" tiin a lo chhang a. Tichuan Rinenga chuan Taxi la thar țha ang reng tak chu a lei ve ta a. Naupang sikul kal pawh a taxi chuan a thlah mai țhin a, mahse Rampuii chuan eng emaw tih thut a tum a hlauh vangin "Pate thlah kan ngai hlei nem a hnai tho a, ke paw'n kan kal thei a lawm" tiin a hnial țhin a, mahse a patea chuan, "kal hah kher ngai loin ka thlah thei che u a lawm" a ti ve tlat a.

Thla khat zen zawn Taxi a vawn hnu chuan a u te nupa chuan Aizawl lama Pi Zuali chhungte dam lo kan an duh thu sawiin an motor ken ai chuan a Taxi a hruai mai turin an ti ta a. Kar khat vel cham tum an ni a Rampuii te unau a ní te in lama awm mai turin an ti a, mahse, "Kan ngaihtuah awm lo ang" an tih ve tlat vangin in an lo nghak dawn a ni. Tichuan Aizawl lam pan chuan tlai lam dar 3 velah an chhuak ta a. Hetia tlai lama an chhuah chhan pawh Rinenga chuan, "tunlai kawng siam awm nen tlai lama kal hian a nuam zawk ang, Aizawl kan luh hunah pawh motor vei vak an tlem ang a" a tih vang a ni.

Rampuii te unau pawh chuan in te tifaiin an nu te chin chu an zawt ve reng a, khaw kar kawngah hian signal a chhiat theih em vang erawh chuan an inbe țha thei meuh lo. Zan riah te eiin an seng fel a, TV ena mut an tum lai chuan phone a rawn ri ta ral ral a, "Aw hello.." Rampuii chuan phone chu a la thuai a.

"Hello… tunge ka biak aw" a aw ațang chuan nula a nih ngei a ring a, "Rampuii ka nia, tunge ka biak, ka pa phone a niin ka hre si a"
"Aw.. a ni maw, puitling biak tur an awm em bawihi" dam thlap hian a rawn ti a.

"Aih ka nau nen chauh kan awm a, anu leh apa te chu patea taxi-in Aizawl-ah an kal a"

"Bawihi, hei Keifang quarry bul mai-ah hian nu pakhat leh mipa pahnih hliam tuar kan hmu a, i nu leh pa te chu an nih hmel khawp mai. Champhai lam pan tur kan ni a, mahse, rawn phurh chhoh nghal mai chi niin kan hre si lo a, Keifang lamah let lehin kan bawihsawm a. Mahse, i pa ni ngei tur chu a hliam tuar loin tun mai khan a chatthla ta a ni. I nu pawh hi a dinhmun a țha lo ang reng khawp mai, a lu-ah hliam a tuar a, a harh chhuak thei mai lo, eng pawh nise lo thlaphang lo ula hei tunah Champhai lam kan rawn pan dawn a, in chhungte in lo hrilh dawn nia" a rawn ti dam thlap a.

Rampuii chuan țawngna chang pawh a hre lo, a mit ațang mittui a rawn luang thla zung zung a, a nau chu kuahin chhuak em em mai hian a țap ta a. "A'u, eng nga ti nge?" Zonuni chuan hriatthiam loh hmel tak hian a u chu en tumin a inla hrang a. "Naute, anu te'n tawhsual an tawk a, tunah an lo haw pui mek, lokal rawh a ni te inah han kal lawk ang aw" tiin, a nau chu a kai chhuak nghal a.

A ni te in an thlen chuan Rampuii chuan thil awmzia a sawi nghal zung zung a, a pa Hriata chu pawi tih hmel tak hian a chek tlak tlak a. An unau chuan lainat hmel tak hian a en a, mahse, a țawng chhuak thei lo. A hnu deuhah chuan,"Lokal rawh u, hruaitute lam ka'n bia ang a, in in lamah chhuk thla phawt teh ang u" a ti chhuak thei hram a. A nupui erawh chuan a u te tawh sual tawk chu pawi ti emaw khawngaih hmel pawh a pu hauh lo thung; a rilruah eng tak awm ang maw!

Zan rei tawh mahse Mizo chu Mizo nge nge, a hrehawm leh khirh lai laiah hian Mizo kan nih zia a lo lang chhuak țhin zawng a nih hi. In singsak ngai ang ang te tlangval ho chuan an tifel zung zung a, nula ho lahin an tihtheih ang ang an ti zung zung bawk a. Nu leh pa lam nise chhiat tawkte thlamuan turin an awm ve reng bawk a, vanduaina karah malsawmna an va ni tehlul em. Rampuii phone chu a rawn ri leh ta ral ral a, a pa number ațang bawk a nih vangin a la nghal vat a. "Aw, bawihi khawi vengah nge in awm?" Motor a ri deuh rak rak a, an awmna te an inhrilh hnu chuan an thlen țep tawh thu hrilhin phone a dah zui a. Rampuii chuan kawtah a lo nghak a, a pa Hriata pawh a lokal ve nghal; rei vak lo hnuah an lo thleng nghal a. A pa ruang chu inchhung lamah zawn lutin a patea erawh hliam na lutuk a nei hran lo a nih hmel. A nu ve thung chu nichina lo be tu Amuani chuan "Hei kan pa te damdawi in ah an kal dawn a, kan hruai nghal mai dawn em niang, a dinhmun hi a țha lo riauin a lang a" a han ti a. Pa Hriata chuan, "A, nia mahse hei he lamah awm vete kan ngai dawn a, anni unau lah naupang mai an la ni si a, engtin nge rem kan ruat ang ka va hrethiam mai lo em..!" rilru buai hmel tak hian a ti a, "A khai, chu lam chu ngaihtuah suh u; Hei kan veng pawh a inang a lawm, saw lai lawkah sawn kan awm dawn a, keini'n damdawi in lamah chuan kan kalpui ang a, he lam lo buaipui rawh u". Amuani'n 'kan pa' a tih chuan a rawn ti ve a. "Kan va lawm dawn ve aw.. engtin nge kan koh ang che u" pa Hriata chuan a han ti a, "Amuani ka nia, hei hi ka pasal Zorema."
"Aw a ni maw, in lo awm hlauh chu a tihzia mang e" tiin, pa Hriata chuan a'n chibai leh te te a. "Eng pawh nise lut tawh phawt rawh u; Keini pawh kan han kal ang e, hei ka pi hi enkawl vat loh chuan thil pawi zawk a thlen a hlauhawm riau" Zorema chuan tiin an inthlah ta a.

In chhungah chuan lutin Zonuni leh a ni te lo awmna lam chu an pan a, ruang an kil ve nghal a. Rampuii chuan a mittui a dang thei mawlh lo a ni. Zonuni erawh a țap thei lo, engin emaw a hnawh a, a ngawng vek ni maiin a inhria. Chutah ruang bula a patea lo țhu chu a va melh a, a hmai khem ve niaih leh a lu bandage a an tuam chu uluk takin a en a. Mit la sawn miah loin a patea chu a en ta reng a. A patea rawn hawi chhuakin a hmuh chuan phu deuh zuk mahse a insiamțha nghal thuai a; Engmah danglam awm lo ang maiin a awm zui leh a.

Pu Ramtea chu vui liam a ni ta. Ui-tu leh râltu a ngah kher mai, pa țha tak kha a ni reng a. Nu Zuali pawh Amuani te nupa chuan an buaipui chawt a ni mai a, Rampuii te unau lah an chunga thil thleng mek chuan a țhawngin an nun a nghawng hle a, in lamah apa râltu leh in leng neuh neuh an awm ve reng nen damdawi in lam pawh an kal reng thei lo va, phone ațang Amuani te nen an inbe pawp reng thung a, Amuani te nupa an lo fel hlauh a, a zia tak a awm e. Pu Ramtea thih ațang kar hnih zet a liam ta, Rampuii te unau erawhin sikul an la kal lova, an nu damdawi in lamah a la awm ve bawk nen zirtirtute paw'n an ngai thiam viau rih e. A nu damdawi ina a awm chhung chu Rinenga ho chuan an awm ve nawk nawk a, a ni te nupa in an in lama awm rih mai tura an tih chuan an tan a awlsam zawk dawna an hriat vangin Rampuii te pawh chuan an lo rem ti a, a ni te in lamah an awm chho ta a ni.

Pi Zuali pawh hma a sawn ve hret hret zel a, mahse a la harh mang lo; rin aiin a hliam na phian niin an sawi. Ni khat Pi Zuali kan tura Rampuii te unau lokal chu Zorema chuan a lo chiau au thuai a, tlai lam deuhah chuan Rinenga pawh a rawn kal ve a. Zorema chuan "Pu Rineng kan inbe lawk dawn em ni" tiin a hruai hrang a. "Pu Rin, thil pawimawh tak sawi duh ka nei a, Pi Zuali dinhmun han en hian rei a daih a rinawm tawh lo a. A eng lo a nia, tawh sual in tawh dan kimchang kha ka zawt thei che ang em le. Pu Ramtea boral sâr hû lai a ni nen a hma khan ka zawt hreh deuh che a. Nunna hial chan phahna a thlen bakah hei thih ngamin pakhat a awm bawk a, police hnena report te pawh a țhat ka ring a" tiin, a ngaihdan chu thu phungin a'n sawi a, mahse a rin loh deuhin Rinenga chuan a chhang ta tlat "Police a…! Eng nge i lo buai ve vak a, kut min thlak tute khan hmai an tuam vek a, eng vanga ti nge an nih tih zawn chhuah chu thil theih loh tawp a ni. Police hnenah kal ta ila an fate thleng hian an tuar phah thei a sin, Doctor nang chuan i hna chauh thawk rawh" ti chang fakin a kal sawn san ta a. Zorema chuan mak ti takin a kalna lam chu a en reng a, 'a chuanpui te chuan hliam na tak an tuar ve ve a, eng vanga ani hi hliam tlemte chauh nei nge a nih bik?' tiin a rilru chuan a'n chhui kual vel a, a rilru a buai tak zet a ni.

Thla hnih zet Pi Zuali chu damdawi inah a awm hnu chuan beisei a bo țan ta hle mai. Zorema phei chuan "a kal mai hi a tan a țha zawk a ni" a ti hial a. Tlaiah Rampuii te unauin an rawn tlawh kawi a, thawmhnaw thlak tura an haw hnu rei vak loah chuan Amuani call an dawng zui a. "Bawihi, hei i, i nu, i nu hi"
"Eng nge thleng Uamuan….! Engtin nge ka nu chu a awm?" Hlauhthawn hmel tak hian Rampuii chuan a lo ti vat a. "Bawihi i nu a awm tawh lo" lungchhe taka a rawn tih rual chuan 'lokal kher duh lo mai sela kan zu dah mai dawn em ni, an chhungte ang tho kan nia keini'n kan buaipui loh chuan" mipa aw hian a ti a; Rampuii chuan sawi tur rêng a hre lo, eng nge an tihsual a an chhungkaw chungah hetiang chhiatna hi a thlen tak mai ni!

Pi Zuali pawh an vui liam leh ta. Rampuii te unau chu 'fahrah' an ni ta mai chu a ni si a, a ni te lahin an ngaihsak zui lo a, Pa Hriata chuan khawngaihin lainat viau mahse a nupui thu hmu lo chuan engmah a ti ngam der si lo. Rinenga ho chuan an awm leh ta phawt chu a nia, eng tak an chungah thleng leh ang maw? Rampuii te unau chu an lusun a reh hleithei meuh lo a, Rampuii tak phei chu inchhung enkawl leh a nau buaipui nen a khawngaihthlak viau a ni.

Hun te a liam ve zel a, a nu leh pa te boral ațang kum hnih zet a lo liam leh ta; Rampuii pawh pawl 12 a zir zo ve tawh a, kum hnih chhung khan a ni te lamin ngaihsakna pakhat mah an nei lo a, Rinenga chu a ngai te-in inhlawhna te a zawng a, a ṭha durh durh phian mai. Mahse chik taka en chuan eng emaw enghelh lian tak a nei tih hai rual a ni lo. Veng țhenawm nula senior nen an inkawp ve a, zan lamah phei chuan an in riah chilh ngun ang reng hle bawk. Amuani te nupa chuan an theih tawkin Rampuii te chu an chhawm dawl a, Rampuii'n sikul chawlh mai a duh thu a sawi pawhin anni nupa hian kal turin an tilui char char a, 'nakin zelah in unau tan a țha zel dawn' tiin an fuih țhin. An nau ang maiin an en a, an inhlat vak lo bawk nen an thisen zawmpui te ai mahin anni nupa chuan an ngaihsakin an tan an inpe zo em em a ni. Rampuii paw'n college kal lo a a theih ang ang hna te zawn ve a tum a, Amuani a hrilh chuan "Ka dawrah lokal la, tuna thawk mek hian chawlh a duh tawh a, hna hahthlak a awm hran hlei nem" tiin a sawm a, Amuani hnuaiah a inhlawh ve țhin a ni. Amuani hian thawmhnaw dawr lian vak lo a nei ve a, a dawr awmna a fuh bawk a niang a hlawk ve phian tho mai.

Zonuni pawh kum hnih chhung chuan a inthlak danglam hman khawp mai, mahnia awmin room-ah a tawm tam hle a, school-ah nise tuma'n an be țawng zo lo a, in lamah pawh a țawng tam loin a patea phei chu en pawh a en ngai lo. A nute room-ah chuan a hun tam zawk a hmang țhin a, Rampuii paw'n tih ngaihna vang a ti hle, mahse, a nau hi a hrechianga mi luhlul tak mai a ni a, eng ang pawhin nawr mahse a tawrhna hi chuti maiin a reh dawn lo tih a hriaa a en liam tawp mai ṭhin.

Zan khat Rinenga leng haw chu amah chauhin a ni ta hauh lo. Zan dar 9 velah chuan kawngka kik karh karhin Rampuii'n a lo hawn thuaia "Mambawih kan lo haw e" nui vur vurin a ti a, lehlam a mi chuan phawk zetin a lo en reng thung. "Kan lo lut thei tawh ang em?" nuihza aw deuh hian a'n ti a, "aa lo lut rawh u" bah deuh taka tiin kawng a kian thuai a. "Mambawih hei i nutei tur a nih hi" tiin a hmeichhe rawn hruai chu a hmelhriat tir a, "I patea hian in chanchin a sawi nasa thei lutuk a, Zami ka nia, nute min ti tawp mai rawh; Hming a in koh kher a ngai hlei nem" tiin, ban a phar chhuak a. A ruk tak chuan zak thei lo ti viau mah se han lan chhuah tir vak chi niin a hre si lo; nui tawk takin a kut a va vuan a "Pate ka mu tawh mai dawn a sin naktuk thawh hma ka ngai dawn si a" tiin, chhanna pawh nghak lem lo hian a room lam a pan nghal vat a. Rinenga leh chu nu chu in melh ralhin an kiai suk a, an ngaihtuahnaah chuan thil țha a awm a rinawm mawlh lo a ni.

A tuk Rampuii dawr kal chuan Amuani bulah nizan thil thleng a hrilh a, Amuani lahin a lo rin dan chiah a nih vangin mak a ti lem lo. "I u Zorema hian a țhianpa police pakhat hnenah a sawi tawh a, i nu leh pa thihnaah khan i patea hi a ringhlel tlat a, an en thla renga mahse engmah ngaihbel tur thil a tizui ta si lo nen hmalak ngaihna an hre lo a ni. Thu an zawh lahin anmahni khawihtute chu a hriat loh thu bakin a chhang ngai si lo a, finfiahna țha tak kan nei bawk si lo, engtin nge maw kan tih dawn ni " a lo ti ve mial mial a. "Umuan, ka rilru a hah a ni, Zonuni lah hian a tuar thiam lo si a, tunah patea lahin nupui a rawn hruai ngawt mai bawk si, ka rilru a hah tak zet a ni. Patea bak hi rinhlelh ka nei miah lo, khami ni pawh khan tlai lama kal kha a rawt tlat a, bakah in rawn hruai haw lai khan ka rilru a chiai a ka lo chik lem lo a, tun hnua ka ngaihtuah let hian hliam te kha a nei mang loin han buaipui vak tur khawpin a hliam kha a na miah lo mak chu ka ti a ni" rilru buai tih hriat tak hian a'n ti a.

"Eng pawh nise bawihi fimkhur ula, i patea thil tih a lo nih tak tak phei chuan in unau tan hian thil țha lo zawk a thlen leh pawh a hlauhawm a. A lungawi lohna turin awm lo phawt ula, hma kan la zel dawn a nia. Chuan maw, beng chhi ranin awm la, an thusawi te ngaihven țhin rawh; Engtin emaw tak an sawi chhuak maithei a sin." Thil tih dan turte hrilhin ngaih ngam taka awm turin a hrilh bawk a, Rampuii chu thawveng huai hmel hi a pu deuh a. A nu leh pa laksaktu chu a phu tawk hremna pek ngei a tum nghet tlat a ni.

Zan khat chu a patea a rawn haw tlai hle a, kawngka an hawn chuan rui tih hriat takin a lo bu lawp lawp a. An nu thinrim lutuk chuan a hau nghal bawrh bawrh a. Rampuii te erawh room-ah an awm thung. La muhil miah lo mahse va pawh phei kher a tum lo a, bakah a patea zu rui mai mai buaipui a peih lo a ni, 'nupui a nei ve tawh a buaipui rawh se' a ti ve hmiah mai. An rik deuh rap rap hnuah thawm a awm ta lova, an muhil ta a nih a ring; thawm dim takin a tho a, bathroom lam a pan, a let leh lam chuan țawng ri sar sar a hria a, engin nge maw mawlh ni ngaihthlak a chak ta tlat mai bakah Amuani khan "bengchhi karin awm la, eng emaw sawi pawh an nei maithei a sin" a tih tak kha mawle. Thawm dim thei ang ber turin room kawngka lam chu a pan a, vanneih thlak takin a lo kau sa hlauh, a beng dawh hnaiin an țawng chu a ngaithla ta a.

"Țawng zawi teh naupang i tiharh ang" an pa zu rui țawng chu a khap a ni ngei ang.
"An thih tawh hnuah pawh harsatna min la siam tho a nih hi" a ruih em vangin a țawng te chu a bah deuh nawk nawk a. Rampuii chuan a phone phawrin an țawng chu a record ta a.
"Mi thi tawhin eng harsatna mah an thlen lo ang che, i duh duh i tithei, he in pawh hi i hmingin i dah tawh a, naupang te pawh i duh chuan i hnawtchhuak thei; engmahin i kawng an dal lo" zawi angreng tak si fiah kâk hian Zami chuan a ti a.
"Eee.. i hre lo a nih kha, Ramnunziri hian eng emaw hriat ruk a nei a lawm. Ka u bulah khan a hrilh a, ka u khan min chhui zui phah a. Tunah ka u te nupa an boral hnuah phei chuan keimah hi a rinhlelh ber tur ka ni sa, mi â a ni lo! a rukin thil tih a neih ngei ka ring tlat" a aw pawh a fiah sawt khawp mai, a rui lutuk a reh țan te pawh a ni ang. "Zonunsangi hi chu a la nau deuh bawk a, thil engmah a hrethiam tak tak lo. Ramnunziri erawh a ngaihtuahna a fim ve kar tawh a, nam nul mai mai chi a ni lo. Doctor Zoremsanga an tih te nen sawn an in pawh em em mai lehnghal a, buaina min la siam tho ang" a ti leh bûl bûl a. "Mu phawt teh, zan a rei tawh chutiang mai mai ngaihtuah buai a ngai lo. In ber i kutah a awm tawh a, naupang ho pawh i enkawl an nia, veng mite pawhin i u te thattuah an ngai hauh lo ang che. "Thawm a reh zui vang vang hnuah chuan a phone chu hmet zeuhin a room lam a pan a, mahse a room kawngka a hawng dawn chiah tihah a banah an pawt lawp a, hlauthawng taka a hawi let chuan a patea te nupa chuan thinrim hmel takin an lo en reng chu niin.

Zonuni zing tho chu a u room-ah a va kal a, "A'u vawiin chu sikul ka kal peih lo e..ka pum a nain ka hria" tiin a u chu kaihthawh a han tum a; mahse a u chuan lumna reng reng a lo nei tawh lo, a taksa te chu a khawng vek a, Zonuni chuan a thawk leh thawk loh hriat tumin a kun hniam a, a lo thaw hauh lo mai. A hlauthawng lutuk chu a thin a phu dawt dawt a, tih tur ber pawh hre lo chuan khum bulah a țhingțhi hnawk a; chutah chhuak em em hian a țap ta a, "U...u..a ni thei lo, ngati nge? mawh?" a áu hian a áu a ni ber tawh. A thawm hriain a patea te pawh room-ah an rawn lut ve nghal thuai a. Țhenawm hnai zual ten an thawm hriain an rawn tlan lut ve bawk a; Zonuni chuan a u a chan leh ta. Veng chhung mite paw'n Zonuni chu an lainatin an vanduaina chu an tawrhpui takzet a, tihtheih erawh an nei tlem thung si. Amuani te nupa pawhin theih tawp tak meuhin an buaipui a, a patea thiltih ngei a nih an rin ngheh tlat vangin Zonuni chu a him theih nan a tam thei ang ber an va len chilh țhin. Zan lamah pawh rei tak thleng an leng a, a chang phei chuan Zonuni chu an in lamah riak turin an sawm chhuak fo a. Chutia Amuani te nupa chet dan chuan Rinenga mit a tikham hle a, tlai khat an rawn len chuan a lo phun khum nasa hle mai a, mi â ni ta lo chu Amuani te pawh chuan ngawih an chuh ta zawk a.

Rampuii thihna pawh karhnih dawn a ni tawh, Zonuni dah țhat dan tur chu Rinenga leh a nupui chuan an ngaihtuah ru reng a, mahse an ngaih ang ngawta awlai a ni hauh lo. Zonuni chuan a chunga kut an thlak theihna remchang a siam sak duh hauh loh chu thuhran, Zonuni room-a an luh chuan a thawmhnaw a lo awm ta reng reng lo mai; Zonunsangi chu a tlanbo a nih chu. Veng chhungah an han zawng kual a, an hmu mai bawk si lo; Zingah kha chuan inah a a awm ngei a, chhunah an chhuah hlanin a lo tlanbo a nih an ring ta ber. Tunah tlai dar 5 a ri tawh a, khua a chhuahsan phei chuan. Khawi lam nge a pan tih lah an hre der si lo, beidawng takin in lamah an haw leh ta a, khawvel dangah thawn kher lo mahse a tibuai thei tawh lo ang a, a tlanbo tawha tunah chuan dip daltu an awm ta lo tihna a nia Rinenga pawh a hmel a nung sarh mai.

Chutih laiin Amuani te inah chuan mûk takin an titi a, chet lak dan tur an rel a ni. "Tuna kan chet nghal chuan thil a buaithlak ang, finfiahna țha tak kan neih a ngai a ni" Zorema chuan a han ti a, "Hei, hei hi ka u phone a nia, hetah hian finfiahna chu chiang takin a awm. Mahse saw mihring saw jail a nuamsa taka hun a hman ka rem ti lo, a thi ve ngei tur a ni" tiin phone pakhat hi a lekchhuak a. "Bawihi, mi nunna lak hi thil țha a ni lo a nia, doctor ka ni a, mi nunna chhan tura thutiam ka nihna piah lamah nunna min petu Pathian zah vang tal paw'n he thil hi chu ti suh" Zorema'n a tih leh chuan "A thihnaah hian ka hming hi a lang hauh lo ang, nun hrehawm tak min hman tirtu saw a nun saw hremhmunah ka chhuah sak ve dawn..!" tum ruh hmel fe hian a ti a. A tukah chuan Zorema pate bul Aizawla awm turin Zonuni chu a liam thla ta a.

Kum nga hnuah chuan Zonunsangi pawh nula puitling a lo ni ve ta. A hmelah chuan nui hmel a lang khat hle a, thil eng emaw ngaituah bing tak nei tih hriat tak hian a lo awm leh țhin. Țhian a kawm ngai lo a, a hma ang thoin room-ah a tawm reng țhin. Zorema pate chuan hrethiam takin a awm ang ang chuan a en liam mai zel a, an fate hnen ațang a hun tawn rapthlak takte kha an hre tawh miau a ni.

Zingah chuan Zonuni pawh a chhungte (Zorema pa te) nen an inthlah a, tluang taka kal tur leh a thlen vela be vat turin an chah bawk a; Champhai lam panin a tlan liam leh ta. In a thlen chuan Amuani te chuan an lo buaipui vat a, anni pawh fapa kum thum mi neiin tunah nau an keng leh mek a ni. Aizawl lam pawh chanchin an hrilh nghal a, Zonuni lo thleng chu an fapa chuan a lo bawh deuh chawt a, a kalna apiangah a zui a ni ber. Fiah mang lo hian a țawng thei ve a, a u chu zuiin eng eng emaw a sawi ve niah niah mai a, Zonuni pawhin a hlimpui khawp mai.

A motor chuang a chauh deuh vangin a inbual hnuah a mu nghal a, a rinai takin a mutui phian mai. Ar khuang leh naupang țap deuh bai bai ri chuan a tiharh a, a'n zik mar vel chuan a taksa kham leh na țhem țhumte pawh reh huaiin a hria a, hmai te phihin choka lam a pan ve nghal thuai a. "Kan naute duat hi tunge lo hau a" tiin, choka chhuata Puipuia mittui tla phunga țhu chu a pawm nawlh a. "Eng nge maw tukin chu a hriat ni, nuar char char mai" Amuani chuan chawhmeh siam mawlh mawlh pahin a lo ti a, a pum puar ve ák tawh nen a'n ang vel hlak hlak chuan Zonuni nuih a tiza ru hle a, nui ri ngam chiah si loin lehlam hawiin a khi suk suk a. "Apa han kai tho daih rawh chuti lo chu ama lung kan tiawi zo lo ang" tiin, Puipuia chu a chhuk tir a, Amuani pawh a kiai ve suk mai. Phak zeta Puipuia te pafa rawn inpawm lut chu rum em em hian Amuani'n a lo melh a, Zonuni lah a lo nui khur char char bawk si; hriatthiam loh hmel fein Zorema lah chuan an nu chu a en leh țhin a, "Eng i hria chu ni maw zing ațanga i men ling nghal hlar le" nuih insum zeta a tih chuan, "Zingah te hian hma takah thoin rawng te bawl ve țhin rawh, Lalrinpuia a sual si, rawngbawl nen ninawm lutuk mu tluk tluk zel mai" a bai chhuan chawh rawk rawk pah hian a lo ti hlar a. Zonuni insum zo lo chuan "In tuh rah in seng a nih kha" tiin a nuih a nuih bawk a. "Football team khat daih neih ka duh sia a va buaithlak dawn ngar ngar ve" Zorema'n a tih chuan, "Țawng ve mai mai suh, a hreawm zawng zawng ka tuar a, i duh leh nangmah khan pai la dul puar luah a chet hahthlak zia te hi han hre ve teh" pakhat lahin a lo ti hlak hlak bawk, chaw eikham hnuah pawh Amuani chu an han fiam leh zauh țhin a, an ri dar dar reng mai.
Chaw eikham chuan Zorema rualin a chhuak ve a, phone leh SIM card thar a lei a, Puipuia thil tur lei lehin a haw lehnghal mai a. Dawr ațang chuan in a hlat vak tawh loh vangin ke-in a kal a, an in Rinenga in lo ni ta a kal pelh dawn chuan a ding dat a, "In lo hlim bawk maw…! Nuam ti tak khan han awm phawt teh u, a daih rei emaw chu…!" tiin a kal pel a. Zanah chuan a phone lei thar chu phawrhin SIM card te chu a'n vuah a, a u phone a dah țhat chu phawrh lehin a hmet neuh neuh a, khi deuh sukin a u phone chu a dahna ngaiah chuan a dah leh a; phone thar zawk chu khawihin eng emaw hi a hmet mawlh mawlh a, "In hun hlimawm chu tawp tawh rawh se." tia phun sepin a hmet thim a, hahdam hmel takin a maimitchhing ta vang vang a.

Rinenga chu a message dawn vang chuan a hui leh pap pap țhin, Zonunsangi chu a lo let leh ta tih a hrechiang ngang mai a, eng emaw tak tih a tum dawn tih lah a hrechiang ropui si. Hriat loh chi a ni lo "Kan inah khan nuam i lo ti bawk maw.. i hlimna chuan a kiansan loh nan che țawngțai rawh. Mahse nang ang mi tenawm țawngțaina hi Pathian pawhin a chhân duh ka ring lo e. In nuam takah khan zan hun nuam tak hmang la, naktukah i chungah eng nge thleng dawn i hre si lo" tih a dawng a nih kha. Engtin mah a tih ngam ring chiah lo mah se a ngaih a țha thei meuh lo, a nupui chuan "eng i hria chu ni maw, mu teh ninawm lutuk mai" tia in let thawkin puan a sin țha mawlh mawlh a. "Engmah rilru hahna tur a awm lo e, a ni naupang mai mai hian engmah a tithei dawn chuang lo" tia inhnem chawpin a chhing ve ta a.

A tuk chaw ei lai chuan a chet tum dan a sawi mawlh mawlh a, "Mahse chutiang vang ringawt chuan saw mihring saw a insiamțha hauh lo ang" Amuani'n a lo tih chuan "he khawvela dam reng chakna nei lo khawpin a nun saw chawh buai vek ka duh a ni, dam reng tlak pawh a ni lo saw tiang mi tenawm" a chaw bar țhulh țhakin Zonuni chuan a ti a. "Tihdan ka hria, i patea saw mi sawi hmanga ka hriat danin an nu a thlim zeuh zeuh țhin a ni awm a, an nu hriat a hlau viau a nih hmel bawk a, bakah saw tia a hminga In a awm hnu phei saw chuan kohhran lamah te hian a inhmang phian roh a, hmingchhiat a hlauh viau ka ring". Zorema'n a tih chuan Zonuni beng a verh hle a, "Engin nge ei an zawn tak le?" phur sarhin a han ti a, "Nikum ațang khan Zokhawthar velah khuan an kal zut mai a, kuhva leh cigarette velte khu an khawih ve niin ka hria. Nei anga awm si lo sawn an nuamsa phian bawk a, a langah chuan khung sumdawnna te khu an khawih ve lo, mahse a ruk hian an khawih a ni tih chu a chiang a ni" Zorema'n a tih leh chuan Zonuni chu a nui ta var var a.

"Sawrkar phal loh sumdawnna a khawih hmanga nupui te thlima hmeichhe awmpui ching. Lo ngai tak rawh, i nawmsak duh vanga kan chhungkaw chunga i thiltih zo zai te nen khan hremna i la hmu dawn khawp" a rilru chuan a ti mawlh mawlh a.

Zantin a phone pakhat zawk hmang chuan Rinenga chu thu a thawn ta ziah a, a chang leh a u-in an țawng a lo record te chu tawi te te mahse a lo hre tawh tu tan erawh hriatthiam theih tur si hian a thawn țhin a, "Lang lo tura thuhruk engmah a awm lo" tih chu a tawpah a dah tel zel a. Rinenga chu a message dawn ho chuan a rilru an tibuai kher mai, "He nu hi ka dah țhat vat a ngai a ni, khawi ațang nge hetiang te hi a neih theih" tiin rilru buai takin a phi sek a. Chutah a ngaituah chhuak ta, kha thu an sawi zan, Rampuii an thah zan khan a lo record hman a ni ngei ang; Khatia Rampuii a room lam pan tura a inher lai tak kha Zami chuan lo hmuin thawm dim takin an zui nghal a, an thusawi a ngaithla a ni tih chu chiang mahse a lo record ang tih rin ngaihna reng reng an hre lo a ni, a kâ hupin a room-ah an luhpui a, khumah man betin lukham chuan a thawk tawp thleng a lu chu an nawr bet ta kha a nia.

A message tone rawn rik leh chuan Zonunsangi bawk a nih ringin rang takin a en vat a, mahse a rin loh lam daih a lo ni, "Naktukah ka lo leng dawn in nu kha lo chhuah tir rawh" tih a lo ni, 'rilru buai laia hriatah chuan a duhawm lo viau ang' tih tur ni mahse Rinenga hmel chu hahdam huai hmel a pu zawk tlat; ni e, a bialnu hnen ațang a ni tlat a ni. Sumdawnna a khawih tirh khan a bang bo hle a, mahse he nu hian buaipuiin thil kalhmang te a hrilh hre țhin a, kum khat dawn an in buaipui hnu chuan sumdawnna lam bakah pawh an inpawh chho ta viau mai a. Mahse a nupuiin a hriat a hlau hle thung, a u te chhungkaw chunga a chet dan zawng zawngte a hre ve vek si a. An nu hian rinhlelh chang chu nei țhin bawk mahse a pha mar thiam em a, chiang taka han man a nei lo bawk nen a ngawi leh nge nge țhin.

A tukah chuan an nu hnenah "Vawiin chu bungrua buaipuiin kal ve thung ta mai che, ka chau riau mai; nizan lam ka mu țha vak lo a khua ka zuam lo riau" a han ti a, Zonuni hnen aṭanga a message dawn țhin ho kha an nu hriatah hi chuan a la sawi duh lo a ni. "Tunlai hi mawlhtu eng emaw nei ni awm tak hian i awm a, i dik lo riau mai, engthil nge thleng a?" Zami chuan a ti let thuai a, "Eng dang ni hran lo e, sumdawnna lam ngaihtuahin rilru a chawl lo ema ka hah a ni ang" a ti sam et a.

Tichuan chaw eikham chuan Zami chu a chhuak ta a. Rinenga chuan Zonunsangi'n message a rawn thawn țhinna number chu a han dial a, mahse switch off a inti zel a, a hmuh ngei beiseiin message a thawn ta ringawt a. Dar 11 velah chuan a bialnu Thantei chu call in "Zanah chauh a lo haw ang" a ti sep a. Dar 12 bawr velah chuan doorbell a rawn ri ta ral ral a, kekawr bul leh tawn zau hain a sam huh deuh chap chu towel a hruk mawlh mawlh pahin a va hawng a, Thantei nui sanga lo ding nen chuan inhma tawna dingin an innuih var var a.

Room lamah inzui lutin eng eng emaw sawiin an nui leh țhin a, Thantei chuan "In nu hi țhen la, innei ve tawh mai ila" thlem ti tih hian a ti deuh sar sar a. Rinenga lah chuan, "Dawhtheih hi a țha ngai, hmanhmawh su su a thil tih chu a fuh thei ngai lo e; hun țha a la inher chhuak em em ang, la nghak leh hram hram rawh ka taah ka siam ngei ang che" thutak fe hian a han ti a, "I ta chu ka ni sa reng a lawm, mahse inthup ngaia awm hi ka ning tawh" kuah deuh thuak thuak paha a tih leh chuan "Kei a nuam ka lo ti viau mai a sin" tih pahin khumah chuan a bawh nghal thlawp a, Thantei lah chu a nui har har reng a.

Chutia an nupa khuma hmeichhe dang nen an khawsa lai chu tu emaw hian an thla a lo la reng mai a. Mask a vuah a, lukhum khumin tarmit a vuah bawk; kawr leh kekawr lian tak ve ve a ha a, camera a an hmel a lan chian theihnan kawngka chu tlema kuai zau hretin a camera chu a dah rem a. A duhtawk a hmu tawh a niang hmanhmawh tak si thawm dim em em hian a chhuak leh ta țham țham a.

Ina a luh chuan Zonuni chu a thlan hluam a, a lukhum leh mask te chu phelhin a thawmhnaw hak pawh a thlak nghal thuai a, "Rei a ni tawh lo ang" tia phun sapin bathroom lam a pana a intleuh nghal thuak thuak a. Laptop la chhuakin camera-a a thil lakte chu a dah lut a, a phone pakhat chu la chhuak lehin a han on a, message a lo awm va mai "Zonunsang min tihțhaih tum lo mai rawh, tu nge ka nih i la hre chiang lo a nih kha; mit khap kar lekin he khawvel ațang hian ka nuai bo mai ang che" tih a ni. A khi sak a, "I chiai țan tih chu a chiang hle mai maw. Hnehtu inti, mi kawng eng saa kala thei ber a maw inti mi dawihzep, Lalrinenga kha i la ni reng" tih pahin laptop chu a hmet mual mual a; a phone-ah chuan cable thlunzawmin thlalak leh video te chu a dah lut a.

Ni hnih vel chu Rinenga pawhin message a dawng ngai ta lova a reh hmak mai, a thu thawn kha a hmua a hlau ta nia ngaiin "Naupang te tein 'ka vau e' min han ti ve khanglang a, țawngkam khat lek ka chhak chhuah ve paw'n a reh nghal hmak mai a nih hi, nep lutuk" a ti chhur chhur a. Kar khat a liam meuh chuan a rin loh lutuk thilin Rinenga chu a deng dawt mai le. Zing a tho sitting room lam a pan lai chuan "I chau hle mai maw" awmze nei tih hriat taka rawn ti ri a hriat chuan a ding dat a, "chau ve bawk ang chu" ti hmukin sofa-ah a țhu thla nghal dawt a. "Ni e, i chau tak ang. Sumdawnna lam chauh ni loin hmeichhe dang lakah i rilru i sen a ngai ta si a. I hah ngawt ve ang, lo han mu hahchawl leh mai ta che" ten hmel taka en pahin Zami chuan a ti fak fak a. Rinenga mak ti chu a ka hau ringawt, chutah ngaihtuah chhuakin "eng hmeichhia nge maw i sawi le?" A han ti he haw a, "hre lo der vel lo mai rawh, ka awm loh laia i hmeichhe khawsak pui țhin te kha ka hre vek tawh, tenawm lutuk; police hnena report che in Jail-a khung vang vang che ka chak a sin, mahse, chutiang ka tithei lo hrehawm i tuar ka phal si lo a ni. min ti ngawt ang tiraw, ni e, ka â tawh a nih hi, ka hmangaih em em chea ka â zo tawh a nih hi; min phatsan mahla ka hmangaih tho che" mittui tla zawih zawihin a ti a, a tawp lam phei chu a sawi țha hleithei meuh lo. Rinenga pawh chuan khawngaih hmel takin a nupui chu a en a, han hnem dan tur a hre meuh lo a ni.

"Ka tihpalh" ti chuai raihin a nupui mittui tla zawih zawiha ding chu a ban a. "Ni lo, ka thiam loh zawk a ni. I chungah rinna ka nghat mah mah a, hetiang hi i ti ang tih rin ngaihna ka hre lo lutuk kha ka inhua a ni" insut hraih hraih chungin a lo ti a, sawi leh mai tur pawh a hre tawh lo.

Rei tawk tak a pasal hmaa dinga a țah hnuah chuan inhru faiin "Chaw ei ka peih tawh, va ei rawh; naktukah in ka chhuahsan ang a, i duh dan danin hun i hmang dawn nia" tiin a pasal chhanna pawh nghak tawh lem lo chuan room lam a pana a kalh nghal daih bawk a.

A message dawn chu a ennawn leh țhin, an room ngei hi a ni tih a hre chiang si, an pa hian a awm loh hlanin an inah, an nupa khum ngeiah hmeichhia a lo awmpui țhin tih chu awih harsa a la ti fan a, tihtheih erawh a nei tlem hle thung.

Zonuni chuan a phone chu en in a nui var var reng mai. Zami chuan thlalak leh video a thawn chu "Tunge i nih? Ka pasal hi engvanga enthla nge i nih?" Tia a rawn chhan khan, "I hmakhaw ngaitu" tih zawngin a chhanga, Zami chuan a rawn chhang leh lawk lo a, tlai lam rawngbawl hun velah chuan "Ka lawm e, pasalte thlim nih hrehawm zia i hriat ve hunah ka nat dan chu i hrethiam maiin ka ring. Engpawh nise ka pasal a ni miau a, a mualphona chu ka mualphona a nih vangin mualpho taka siam kher ka tum lo, i chungah erawh thinlung takin ka lawm e tih bak sawi theih ka nei lo" tih a rawn thawn leh a. "Hmangaihte rilru hliamsak sawh khâwk i hmuh ngei theih nan duhsakna ka hlan a che" a phone a Rinenga thlalak melh reng chung chuan a ti ta sep a.

Thla khat lai a liam leh ta, Zonuni chu a reh tak hmak vangin Rinenga pawh chuan ngaih țhat lohna nei lem loin hun a hmang ve zel a, a nupui pawh kha "ka tihpalh a ni, ka ti leh tawh ngai lovang" tia thlemin an inti lungawi leh ta phawt chu a nia, buaina em em nei loin hun an hmang chho leh ta a; mahse, Zami rilruah erawh thil dang daih a awm thung. A pasal hian a u te in leh lo zawng zawng kha a hmingin a dah tih a hria a, chu chu ama hminga thlak dan ngaihtuah emaw thu ro chhiah siam ngei tura hmin a tum tlat a ni. Rinenga lahin "ka ta chu i ta vek a lawm" ti ve bawk mahse a nupui hian a ring zo tawh si lo a ni. Tichuan Rinenga chu hrai ruiin in leh lo te chu a hminga thlak turin a thlem leh taa, Rinenga lah a ruih tawh chuan bawl nuam tak hi a ni rauh a, a nupuiin thiam taka a'n tih kual vel chuan î-hê loin a ti ve mai bawk a; a rui a reh hunah engtin tak awm ang maw.

Chutia rui taka a awm reng lai chuan "Tah khan mu mai rawh ka sawn peih lo che" tiin a nupui chuan puan sin tur a rawn laksak a, a ni lah lo zawi ve tawh bawk nen a țhutna sofa-ah chuan a mu nghal thlawp a. A hnar zui nghal bawrh bawrh chu Zami chuan "Mangțha le" tiin a pasal zu inna novah chuan eng emaw hi a dah ta zauh a.

Rinenga pawh zing lam dar 4 velah chuan a harh leh kur tawh a, a lu na bur chu a han thing deuh nawk nawk a, a chhah vekin a inhria; dawhkana zu chu inthlit lehin a han lem leh pawp a, rei vak loah chuana taksa a rawn danglama a thlan fim a luang zawih zawih ta mai. A mit te chu a vai riai a, muangchangin a thim riai riai a, engmah a hre zui ta lo.

A nupui zing tho chuan "Tho teh khumah va insawn rawh, in leng kan nei dawn a nia" tiin a pasal chu han kaihthawh mai a tum a, mahse a pasal chu kaihthawh zawh rual a ni tawh lo, kum khua atan a muhil tawh a ni.

………………………..

"Zonun, Bawihi, kawngka lo hawng teh" tiin, a room kawngkhar chu an rawn kik dat dat a. A mittui hru hul sawk sawkin a va hawng a, "i patea kha…."
"Ka lo hria a lawm" Amuani chuan a kuah thlawp a, "Bawihi, thlamuang takin awm tawh rawh" a hnunga ben thak thak pah chuan a ti a.

"Tunah chuan ka tih tur ka hlen ta bawk a, ka chhungte hmel pawh ka hmu ngam ve tawh ang" in lak hran pah chuan a han ti a, Amuani chuan hlauhthawn hmel tak hian "Eng nge i sawi awmzia, nang hi intihhlum i tum em ni?" a ti he haw a, nui deuh hakin Zonuni chuan, "Uamuan, ka chhungte thlan hi vawikhat mah ka la tlawh lo a sin, ka inthiam lo em em a, mi dawihzep takah ka inngai a ni. An rual khan lo boral ve zawk ila tiin ka ngaihtuah fo țhin, mahse tunah chuan ka hre tawh. Kan in leh lo ka patean min laksak te kha ka la let leh vek dawn a ni; chu chu he khawvela ka la awm chhan pakhat a ni. Pakhat chu ka hlen tawh a, ka chhungte nena min țhen hrangtu chu hrem a ni tawh a, pakhat chiah bak ka nei tawh" a tawng tawp lam chu a chang leh viau tawh.

Rinenga vuinaah chuan Zonuni chu a va kal ve a, rei erawh a awm lo; vui hma deuhin a va phei a, vui zawhah chuan a inthiar fihlim lehnghal a. A va kalve chhan tak pawh a nutei hmel a hmuh duh vang a ni. A nutei chu lemchan thiam hi a ti khawp mai a, mahni pasal ngei thatin a mi that ruang chungah chuan a tuar ber awm ang takin a țap hluam hluam mai kha a nia. A ngaihtuah zawng pawh chuan ten lutuk chu a luak dawn hialin a hria.

Rinenga boral ațanga rei vak lo, inleng te pawh an la nei reng tihah chuan Zami chuan message a dawng leh ta nawlh mai "In leh lo kha i hmingin i dah tir tih ka hria, ka hminga i thlak tir lo a nih chuan i pasal i thah dan hi ka puangzar ang" tih chu. A rilru a buai hle a, a hlauthawng lutuk chu a thlanfim a luang zawih zawih thei hial a ni. "Tunge i nih?" Tia a zawhna chu "Zonunsangi, i pasalin a duham luat vanga a chhungte a thahsak tak kha ka ni e. Ka thu i awih lo a nih vaih chuan tualthah vangin Jail-ah hun i hmang ngei ang" tih a lo lut leh nghal zat a. A hlauthawng ta kher mai, ni e, jail a hun hman ai chuan Aizawl lama a chhungte bula awm mai pawh a duh zawk ta a niang kar khat hnu velah chuan Zonuni hnenah chuan in leh lo a hminga a dahna lehkha thawnin "khawngaih takin min tibuai zui tawh suh" tih a ziak tel bawk a, Aizawl lamah a liam thla ta a ni.

Thlan hmaah chuan țhu sawp niaihin "Nu, pa. Kan inah khan lo let leh rawh u, tunah chuan in pawh ka hmingin a awm tawh a sin. Pa, lo tho teh, i fanu hi min kuah dawn lo em ni? indonaah chuan hnehna ka chang a min lawmpui dawn lo em ni?" tiin, a țap hawm hawm a, a chhungte chu ngaiin ko țhin mah sela koh kir rual an ni tawh si lo.

Thlan hmaa țhu chung chuan ni tla tur chu a thlir vawng vawng a, "Aw turni, i liam rual khan ka nâ te hi liampui ve ta che" tiin, a phun sap a.

A tawp ta…



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)