BASTARD BY Arini Khiangte

Ngaia
Site Admin
Posts: 25813
Joined: April 30th, 2016, 4:07 pm

BASTARD BY Arini Khiangte

Unread post by Ngaia » March 14th, 2021, 12:08 pm

BASTARD
Arini Khiangte
(COMPETITION 2021)

Bung 1
"Miss Ruati chu bialpa thar a nei a ni maw?" Seni chuan a rawn ti hlut a. A hawina lam ava en chuan Car chhunga pa lian tak lut mek chu ava hmu ve nghal a. "A nih ngei dawn saw" a lo tih pui a.
Ruati nula hmelṭha leh fel tak, an thawh mekna school neitute a ni. A lo lut chu nidang anglo takin a hmel a thutak a. "Zorin, enge in khua kha?" A rawn ti daih a, a ni chuan "Buangkawn" a lo ti a.
Ruati chuan " Kan inbulah sawn in khaw miin workshop a nei a sin. A mah chu Zorema a nia, i hria em?" A ti a.
"Zorema chu ka hre ngeia, mahse Workshop a neih ka hrelo?" A ni chu a ni theilo ang.
"A tir chuan a ta a nilo a, workshop ah sawn mechanic a zir ṭhina, a neitupa in a enkawl theihloh hnuin a zawrh taa, loan te la in a lei a, a thawkrim bawka, a rul zo leh vat a, hma pawh a sawn nasa, a naute haw hnuah pawh a la thawk char char zel.
Zorema nu chu nula hmelṭha tak niin an khuaa hnathawka rawn awm nen an inngaizawnga, mahse chupa chu nupui fanau nei a ni tih an hriatchhuah chuan nau a lo pai hman tawh si. A pate chuan an rawn ngaihsak miahlo a. A nu chuan a indanpui a. An inhnaih avangin an naupan lai aṭangin Zorema nen chuan an inkawm ṭhin a. a nu feh haw hma chu an inah a lo awm ṭhin. Lehkha athiam thei ngailo a, a beih nasat avangin a pass ve hram ṭhin. Inkawm rengchu inngaihzawnnaah an kai chho a, inneih hun thlengin an sawi ve ṭhin. Matric a pass a Aizawl lama sikul a kal dawn pawhin an pahnih atana zir ni a inhria in a ṭang nasa ṭhin. Zorema erawh a fail nen, a nu hrisel takloh avangin sikul a chawl a, a peih vak tawhlo a, zir tur dang ala zawng ang, a ti ṭhin.
Kum a tawp a, phur takin an khaw lam panin a haw a, a ni fanu, an khua hmuh ve chak nen an haw chho a, mahse a a haw chak chhan, hlim taka mass hmangho tura a lo hisap chuan amah aiin a cousin chu a lo ngaihvena, khawpui nula a ngaihsan thu hrilhin, a ni pawh khawpui lama la awm a tum thu nen lam a lo hrilh a, a cousin chuan a khawngaih vangin a hrilh leh vek si a. Zorini chu a keh chhe vek a ni. An khua chu thlakhlelhna pawh a nei tawhlo a, haw pawh a chak tawhlo. Zorema nu thih pawh a hriaa, mahse a kallo, chumi hnu in a pa in a rawn lama, a ni pawhin an khua a rawn tlawh tawh ngailo.
"Kan inlamah lo haw kual la, ka kawhhmuh ang che"
Hmuh a chak, kum 10 chhung hian engtinnge hun a hmana engtinnge aawm tih a ngaihtuah fo ṭhin. Mahse a lo hlawhtling tawha, Lehkhathiam zawk chuan a eikhawp a thawkchhuak ṭawka, hna nghet lah a ni heklo. Tuna han hmachhawn chu a hreh ru hle.
"Ka chak khawp mai, mahse hun remchang dangah kan ti zawk dawn nia, vawin chu tihtur ka lo nei tawh tlat" tiin a hnial ta hrih a.
"Aw le, mahse min puih ka duh a nia,Neih ka duh, pawh a har em em a, han biak deuh tum ila, a in la hrang tlat zel a, kar leh khi ka birthday a nia, chumi hunah chuan lo tel ve se ka duh a, min hruaisak la ka duh a ni."
"Kan tum dawn nia" a ti puat a. Hmanah chuan hmeithai fa a ni a, lehkhathiam bawk silo, mahse tunah chuan Aizawl mi hausa fanu in neih duhin a zar ta chu a ni a. Engtinnge hma a lakpui ang.


Bung 2
Chumi kartluan chuan Ruati chu a rawn hruai leh anga, an inhmu fuh palh ang tih hlau reng rengin aawm a, a chang chuan inhmu mahse ṭhianhlui angin a be mai ang, zam viau tur a nilo tiin infuih ṭhin mahse, sikul a thlen dawn hi chuan a hlauthawng zel tho. Ruati lahin engmah a sawi leh talo, hmuh erawh a chak viau tho.
Ruati erawhin a tum chu a lo ṭhulh reng renglo, a birthday ni chuan a sawi thut a, an vai chuan chaweiah a sawma, phatna a pawmlo a, phatna hun lah aawmlo. An thawhpuite chu an lo phur phian a.
Midang ho in leh a vel fanga an rik chul lai chuan Ruati chuan a rawn mitmei ta vat a. A rilru chuan hreh hle mahse, midang han tihpui se, midang a ngaizawng lai ngei a hmuh hunah hmalam a pan thei mahna a ti a ni. An pahnih chuan workshop lamah chuan an kal pheia, a hmun an thlen chuan ral aṭang aimahin a lo lianin a changtlung, hnathawktu tamtak an lo awma, an vai chuan an ṭul tlang khawp mai. Office bula hnathawh thawmhnaw nena lo ding, Palian tak leh tihrawl ngah hmel tak, mi pakhat nena lo inbe mawlh mawlh chu a hnunglam aṭang pawhin Zorini chuan a la hre thei.
"Zorem" Ruati chuan a ti a, "Ka rawn hruai hi enteh"
A rawn en thuaka, a rawn en nawn leh vat. Mak a tih hmel khawp mai. Zorini chuan a nuih saka, "Heyy, i dam maw?"a ti a, a aw pangngai taka a chhuah theih avangin a lawm hle.
"Dam e, eng titiha rawn lang ve hlawl nge i nih le?" a lo ti ve a.
"Miss Ruati birthday lawmnaah kan lo kal a, kan rawn kalkual pah a nih hi, hetah ilo awm reng a?" a tih chuan Zorema chu a mengzau kawk a. Ruati chuan "Sikulah kan thawk ho a, helaiah i awm tih ka sawia, a hmu chak che a, ka rawn hruai"a lo ti a.
"A nih chu, office ah khan lo ṭhu lawk ula, thil kan han sawi zo lawk ange"a tih chuan a biak pa chuan, "Kan sawi zo tawhin ka hria, ka kal ange, inleng i nei pawimawh hmel sia," nui chungin a lo ti a, a kal ta nghala.
"Thingpui in rawh u aw" A rawn tih chuan Zorini chuan "Nilo e, insiam la, Birthday lawmnaah kal a ngai" a lo ti vata.
"Ka va hmanlo ve."
An inngaizawng tawha, a duhlo tu a ni maia, amah pawhin ngaizawngtu duhloh a nei ve tho, zah lutuk tur a nilo tiin a infuih a. "Insiam rawh, i in pawh ka hmu duh"a ti ve tlat a.
Zorema pawhin hnial chiah a ngailo a ni ang. "In en tlak pawh ka neilo, ka sa pum tawp a ni mai" tih pahin office a lo ṭhu hnenah chuan, "Kan zuk kal mai ange" a ti ta nge nge a.
"Thingpui kha lo inlum mai rawh u, mipa chenna a nia, lo in zawn chawp mai rawh u" tih pahin inbual turin a kal a. In chu a thlir vela, a la tuaihnumlo hle. "In lam hi a khawih hmanlo a ni maw?" A ti a.
"Hna a thawk nasa, hei vang hi a nia, a workshop pawh a lun em em" Ruatin a lo ti a.
"A taima ṭhin hrim hrim"Zorini chuan a lo ti ve a.
Thingpui an lum zawh chuan Zorema pawh a rawn peih ve mai. Casual deuhin a incheia, a inhmeh tho mai, a hma ai chuan a lo puitlin hmel tawhin a taksa pawh a inphut tawh a, a lang pa leh zual. School an kal ho lai pawhin hmeichhe ho chuan an duh ṭhin. Mahse tumah a hawi ngailo, amahlo chu.
A bulah chuan a rawn ṭhu a. Zawh chak a ngah mai. Mahse Ruati puala kal anni a, chutiang tih chi a nilo.
"Makima te inneihah haw i tum em?" Zoreman a lo ti a.
"Maw? an innei dawn maw? Engtikah" Makima leh Siamtei tenen an pali chuan inkawm ber ṭhin anni.
"Siamtei nen an innei dawn?"
Teh daih chuan , An tleirawl chhuaka, anni pahnih chu an inngaizawng nghal mai a, Siamtei te erawh chutiangin an in en ngailo reng reng. Matric an pass a, hmun hranah an kal darh ta vek a. Siamtei leh Makima chu BA an pass in an khuaa English Medium School an din tharah an thawk dun nghala, mahse a haw hnuhnung ber pawh khan ngaihzawng hran an nei ve ve sia.
"Ngatinge? "A ti hau mai a.
"Nau an pai a lawm" Leh zel chuan!! A ṭhiante pahnih chanchin chuan a ṭhawng lutuka, thildang a ngaihtuah theilo. An inngaizawng ngai miah silo a.
Ruati leh Zorema chu awmdun tir dan a zawng deuh ngar ngar aa, mahse Zorema chu a in la hrang tlat a. Chawei lai pawh chuan a bulah aawm tlat a, chaweikham veleh chuan haw puiah a sawm ta nghe nghe a. Ruati lakah inthlahrung hle mahse, nuam a tilo ni a hria in a sawmna pawh chu a lo hnial duh ta lemlo a, amah pawhin haw a duh ve reng reng a. Haw vat vata Siamtei phone a duh a ni. An inbe fo nangin a la hrilh miahlo chu mak a ti hle.
"Miss Ruati hi???" Ke a an kaldun lai chuan a sawichhuak ta hram.
"Enge a ni chu?"
"A ṭha iti lo mi?"
"Ti tehreng mai, mahse hausa deuh ni a min hriat vanga min duh ho hi ka hlau, chutiang ka ni silo a". Han sawi pui vak ngaihna a hrelo.
"Lo lut la, thingpuite in ila, " a tih chuan "Ka la puar khawp mai, hundangah ni zawk se, Pawi itih loh chuan haw vat ka duh zawk, inthlak vat vat ka chak tawh" A ni chuan a rawn thlek vut a, "A ni maw? Bike kan la chhuak ange" a ti a.
Bike a an chuan hnu chuan, "Makima te chu? " a ti vat a.
"Siamtei a bialpa nen an inti thiamlo a, a rilru na kha Makima hnenah a kala, a ni lahin tih vak ngaihna a lo hre lo, zu an indun a, an ruia, an chesuala, nau a pai ta si a, naute chu tih fahrah an duhlo a, inneih an tum" a ti puat a.
"Engtiknge an tuma"
"An la sawifello"
"A nih tak chu, chuvang a nih chu min la hrilhloh, chuan ka la sawilo a, i hlawhtlinga, ka lawmpui che"
"Inrinni hian chaw lo eila" Diktak chuan ṭhian anga han inkawm leh chu a chaklo. A hmuh leh hnu phei chuan a rilru a na leh tlat. "Sikul chawlh ni a ni a, tihtur i neilo a?"
"Dik tak chuan ka buai ni tak a ni zawk"
"Tlailam tur alawm"
"Han tum phawt ila, kan la inbe leh dawn nia"
"Aw le, i number lo save rawh" tiin a phone chu a rawn pe a, a save pah chuan a phone chu a call nghal a.


BUNG 3
Inrinni zing hma lutuka a phone rawn ri chu thinrim zetin a en a, Zorema a lo ni, chawei turin a sawm kha a ni a, a rawn ṭhulh leh a manile, eilohna tur chhuanlam tur a zawng char char a, mahse han hnial tawp chu a hreh ve si.
"i va hma ve? a ti nghal thawr a.
Chawei ringawt pawh hreh nak alaiin Inrinni a nia, a buai thu leh bazar a ngaih thu a rawn hrilh a, a hnial hman hmain phone a dah daih zui.
Muanglui ve ṭalhin chawhnu lamah a chhuak a, Bazarah a kal khat avangin kal rau rau chuan thawmhnaw lei nghal a duh, thawmhnaw a lei khata, sikula kal dawnin thawmhnaw lei tur a ni, a ti ziaha, a thawhpuite zingah an hlawh chu mahni in enkawl nana hmang mai mai vek an ni a, incheina an nei nalh thei riau. A ni pawh a nu leh pa chuan chutianga hmang tur chuan hrilh mahse, a ni chuan a nau college kal leh, an in enkawlna chu a tum lui tlata, a pa te purlo in aawm.
A va thlen chuan a sawi ang tak takin a lo buai hmel khawp mai. Hnathawk erawh tam vaklo an awm tho, mahse an buai tlan hmel. A rawn hmuh veleh a rawn pan a, pawisa pek pahin i duh duh lei la, taxi in kal rawh" a lo ti nghal sawk sawk a. A ni pawh chu inchhung lut lemlo in a kal nghal a.
Hmanhmawh lemlo in a bazar, a thawmhnaw mamawh pawh a leikim, in a thlen chuan a lo tlai duai tawh. Hnathawk pawh an lo haw tawh hlawma, Zorema pawh a lo in tifai tawh, mahse register nen a lo inchhawp hnawk hle.
"Enge kan siam ang?"
"I duh duh, bai ka ei chak khawp mai. Mipa pahnih kan awmduna, siam awlsam apiang kan siama, chawhmeh pangngai tak ei ka chak vang a nia, chaw lo ei tura ka duh che."
"Hmeichhia ei rawngbawl thiam deuh ruai ta che. Hna thawh a, pawisa ngah ringawta, i taksa i duat siloh chuan i hrisello anga, i thi vat anga, i thawhchhuah sa kha midangin an chen mai mai dawn asin" a ti duah a.
"Engtinnge ka chanchin i hriat chu ka hrelo a, mahse workshop changtlung tak leh hnathawk engemaw zat ka rawih avang mai hian ka hausa tihna a nilo, bul ka ṭan chauh a nih hi." Tihpahin register chu a keu mawlh mawlh a, Pawisa khawihtu pawh a ruailo a ni ang. A buai emai.
Eirel a zawh chuan khua a thim tawh hle, Zorema pawhin a thil tih chu a dah a. A inrin aiin a hahdam daih a, a lawm hle, hmana ṭhian an nihlai ang khan a en theiin a inhria.
"Pawisa khawihtu inei em?"
"Nei e, mahse tlaiah check a ngai a, sikula thawh hi nuam iti em? Hetah lo thawk daih maila" a lo ti a.
A duh teuhlo, nitina inhmuh tur chu, a chunga a thiltih kha a hrechhuak zel ang a. "School hi ka lo ti tawh sia, chutia ban mai theih pawh a nilo" tiin chhuanlam a siam a.
"Private school a thawh reng hi i tum a mi?" A lo ti sup a, a hmusit deuh emani le?
"Hna hi a vang khawp mai, a awmte lah hi kan inchuh luih luih mai si a, lehkha zir pawh hi awmzia a awm vaklo a nih hi." Tiin a chhang a.
"I la hmu mai ang. Hlawhtlin i tum hma lutuk a nih kha," a lo ti a.
"Nang chu i hlawhtling der tawh a"
"Hlawhtlinna hi sum leh pai thawhchhuah tam lamah i teh chuan a ni tho mai. Mahse ka hah zia hi en la, nangni ang lehkhathiam chuan in peih miahlo ang" a lo ti a.
"Hah taka thawhna tur hmulo pawh kan tam a lawm, lehkhathiam chuan hahdam deuha thawkchhuak ṭeuh tum turah i ngai a mi?" A lo ti let ve a.
"Lehkhathiam hna chu a hahdam deuh a lawm, i siamtui khawp mai, rawngbawl hi i lo la thiam reng a nih hi, zanin chu riak la, naktukah ei min rel sak leh la" a lo ti daih a.
"A chi loh e" a lo ti a.
"Chi lohna vak aawm hleinem, khaw khatah kan awmdun renga, kan lo inhre har lutuka, lo hre hma ila, kar tawp apiang i rawngbawl ka ei char char tur a nia" An chungchang kha a theihnghilh hmak bik a nih hi. Ṭhian annihna chiah kha a hre tawh a nih hi.
"Zanin chu ka inringlo hrim hrim a, nakinah zawk kan la ti dawn nia" thawh pah chuan a ti a, a ni pawh rawn tho ve nghalin ṭhutkhawmna lamah a phei zui daih a.

Bung 4

Thleng a seng zawh chuan Zorema chu ṭhutthlengah a lo mu duai a, a muhil emaw ni, a chhing tlat lehnghal.
A phone a rawn ri hlauh, a la harh thei chuanglo, a va chau awm em em. A rawn ring nawn hlauh mai, phone chu a la vata, sawi harh pahin phone chu a pe a, a rawn menga, phone chu enin a hmet tawp leh daih, mahse a rawn harh phaha, a lawm hle.
A rawn ena, a la mutchhuah hmel ropui. "I va chau awm ve" a lo ti a.
Ṭhut chhuah pah chuan, "Riak mai rawh" a ti sup a.
"Eng a? awm anglo lutuk"a lo ti vak a.
"Ka chau emai, motor ka khalh theilo ang, naktukah sikul i kal dawn chuanglo a, ka khumah sawn mu la, tah hian ka mu mai ang"
"Mahse... engmah ka inring bawk silo a."
Mu turin inrin vak a ngai hleinem, min hrethiam mai rawh, han chhuah leh kha ka peih nganglo a ni." A va phakar tak. Han riah ringawt chu,
"Nilo, ka riak theilo ang"
"Thei e, i riak thei alawm" tih pah chuan a rawn tho a, a bana manin room lamah a pawt luta, ṭang teh mahse a hnehlo, khumah a nam thu a, "Ti khan mu la, i riak a mai"
Tih vak ngaihna a awmlo, "Nih leh"tih pah chuan a mu a, a han en chho a, "muttui" ngeiawm deuh chuan a han ti a.
Rang deuh chuan a bulah chuan a rawn inthawlh ve a, a rawn kuah bet nghal a. "Enge i tih? Tho rawh" tih pah chuan a nam vak a.
"Shhhh, ka chau a nia," tih pah chuan a la rawn kuah lui zel a, a ṭha lo tih hre mahse a taksa chuan a rawn kuahna chu a hre riau, a han kuah leh chiah hian a lo la ngaih zia a hrechhuak uarh uarh mai. A bula a mut a, a kuahna hnuaia muthilh chu a thlakhlelh ber a ni. Mahse...
"Tho teh"
A ni chuan a rawn kuah nghet leh sauh a, a hmui chuan a hmui lam chu a rawn zawng ruai a, a za uaih uaih mai. A insum thei ta thlawt lo a, a rawn fawh chiah chuan insum miahlo in a lo fawp let ve nghal.
Engmah sawi tawhlo in an in fawp mawlh mawlh a, a kawr a rawn phelhlaite chuan thlahlel deuhin a lo kuah chung chung a, enge thleng tur a hriaa, mahse pawi a ti phal tawhlo, pawitih a hnekin a thiam ang angin a lo pui zel a. A hmangaih ber a ni ṭhin a, tunah pawh a la nireng a, a laka inpek chu pawitihna a nei tawhlo.


Bung 5
Kawngkhar riah a harh zawk, a meng kawka, Zorema inbual zo thawm a lo ni. A lo meng a hmuh chuan a rawn en a, a mitmeng chu... a ip chawih mai. Ṭawng ngaihna pawh a hrelo.
"I harh tawh maw?" A lo khap sak sak a
A nui suka, mahse nui lui hmel a pu. Hnai deuhah a rawn bih a, a lo hawisawn vat.
"Khatianga zak hmel deuha awm kher kha a ngai hleinem, min han thlem leh la, min thlem thlu leh mai thei a sin." Rapthlak ti deuh chuan a en a.
"Mahse ila thianghlim a ni tih min lo hrilh la chuan nizan pawh khan min thlem thlu kherlo ang. Zan khat riah pui zawk atan chuan nula thianghlim kher chu ka phulo a sin." A va han rapthlak tak, hetiang hi a nih a lo ring pha ngailo.
"Ka hausa tak tak emaw iti a mi? Hetianga i thianghlimna hial hlana min mutpuia? Mahse pawi ka ti khawp mai, hetianga mutdun hi chu ngaiah ka lo nei tawha, ka thinlung a khawih che lemlo a nia. Bakah mi hausa neih duh a, an taksa zuar ṭhin hi chu keichuan ka ngaisang lemlo. Ka ngainep chuanglo che a nia, hetiangmi hi in tam lutuk a..."
A ṭawngkam na tak tak ngaihthlak reng chu a thei tawh biklo. A tho thut a.
"Neih duh vang che a mutpuiah che min ngai a maw? A teuhlo mai, nang ang mihring hi chu engtikah mah ka nei ngailo ang che." A ti ve ta hrawk a, a thawmhnaw tla chu a chhara, a thinur chu a khur hlawk hlawk mai. A thawmhnaw pawh a ha ṭha theilo.
"Mi chapo, engahmah ka ngailo che," tih pah chuan a chhuaka. A thinur em avang chuan a kal hmawk hmawka, a ṭah a chhuak ṭun bawk, engvanga lo mutpui nge a nih? Thlemah te a puh vela maw? A mah ania a thlemtu zawk. Engtinnge khatiang khan a puh theih? A lo sual takzet a ni. Sum a nei a, a nun a chhe vek a nih hi.
Nileng chuan a mu a, a ṭap a, mahse engmah a siamṭhat theih tawhloh. inchhirin awmzia a neilo, a hmu leh ngai tawhlo anga, nun pangngai taka hman a tum tur a ni.
Thawhṭanni a sikul a kal tur chu a phur vaklo. Thawh tawhloh mai te a duh rum rum mai. Zorema hming an sawi ri reng dawn sia, tlanbo san mai nge ṭha ang hmachhawna ngaia neih? Bang dawn pawh nise tunah chuan Exam a hnai tawha, hna dang thawh tur a hre mai lo nen, hun a tam tawh hleinem.
Sir Sanga gate bulah a hmu miala, he pa hian a hma daih aṭangin a ngaihven hle a, ngaihzawng anga a en theihloh avangin a mitmei te chu a haider lui char chara, tunah chuan tihdan tur a hre ta, ngaizawng kherlo mahse a be ṭha tawh ang, duh leh a nih pui mai tur a ni. An chanchin chu Ruatin a hrilh anga, la na vak angin a hre dawnlo a ni. A nuih saka, a bike dahṭha chu lo nghakin an lut dun a.
Ruati chuan a lo kal khalh ve mial, an ṭhutna a inhnaiha, inbiak loh theih a nilo. A lo nuih var vara, a hlim hmel riau.
"Weekend i hmang nuam a ni maw?" a va ti a.
Beiseina thar chu ka nei alawm" A mit lo san ak chu hmu in, Sunday chhung kha kan awmduna" duhlo hle mahse a thin chu a na vawt vawt mai. Ngaihthlak a duh tawhlo, mahse inthup a ngai si.
A lo ngaihdan chu a chiang viau mai. Zanah an riak duna, a zanlehah nula dang. Mahse Miss Ruati chu a ankhum velo a ni ang, a hlim hmel emai.
A ni lahin a sawi phur hmel si, an chungchang chu a hrilhlo a nih hmel, a thiltiha a lawm ve chhun a ni awm e. "Vawin pawh sikul kalloh mai ka duh a, mahse a phallo a"
"Kan awmdun thei dawn chuanglo a, exam hi a hnai tawh bawk sia, a pawi ka ti. A zin dawna, kal ve ka duh tak zet" a beng hup mai a duh rum rum, duhlo mahse a na tho si.
"Ka lawmpui che"
"Lawmna tur vak chu a la awmlo. A hma kha chuan ka hip ve theih ka inringa, mahse tunah chuan chutiang nilo a theihtawp chhuah ka tum ta zawk. Thildang pawh kan duh chu neih tumin kan beia, pasal tur pawh kan bei mai ang chu" a nui pah hawk hawk a.
"Dik chiah"
"A chanchin min hrilh la, a ngainat zawng te, a rilru nat theihna lai te, "
"Ka hre tehchiamlo, kan inkawm lai kha chuan kan la naupanga, naupang inkiltawih tak a ni a, class ah pawh a ṭawng ngai manglo, a taima hle a, a inthlahrung thei hle"
"Fahrah a nih vang a ni angem?"
A ngaihtuah vang vanga, fahrah a nihna lam a lo ngaihtuah ngailo nge, chuti lamin a lo ngaihtuah ngailo. "Ka hre biklo le, chuti lamin kan ngaihtuah thleng lo hrim hrim a" a ti a.
" Ka lawm e"
"Good luck" Tunah chuan a thlah ta tak tak. Thlah pawh a ni chiah a mani, a ta a ni ngai reng renglo a ni zawk.
Sikul ban chuan Sir Sangan an venglamah tihtur a neih sawiin hawpuiah a sawma, a lawm hle, bul ṭanna ṭha tak a ni. An inthleng a thlaha, zanah lo len a dil chuan a lo remti vata, mahnia inngaihtuah ngut nguta awm a duhlo.

Bung 6
Bell a rik chuan sikul naupang ang maiin a thaw huai mai. Tunah chuan sikul an chawl dawn ta. A subject paper a check zo vek tawh a, tihtur a nei tawhlo. Vawinah Siamtei a lo thleng anga, inneih thil vel a bazar pui anga, an haw dun ang. Nitin Zorema chanchin a hre tawhlo anga, zanah rilru nat vangin a ṭap khat deuh tawh ang.
Sumo counter lamah chuan a tlang nghal a, rei a nghah pawh ngailo in an lo thleng nghal. Siamtei chu en chian chuan a lo lang ve ak tawh. An inkuah chung chung a. Makima pawhin a rawn fin ve nghal.
"In lo phei dun angem?" A tih chuan Makima chuan "Zanin chu chhungte inah ka kal phawt angai a, Zorema pawhin ka riah a beisei a, kan la inhmu khawm dawn nia" tih pahin Siamtei chu a en a, "lo chhawr vak vak suh aw, lo dim viau ang che" a ti zui a.
Zanah chuan Siamtei nen chuan an mengrei dun viau, sawi tur an ngah. Siamtei chuan Makima nen an chanchin chu chipchiarin a hrilh a. Mi puitling ve ve a hriatchian ve ve an ni a, an innei tur chu a lawmpuia, a ngaihtuah lemlo.
Siamtei chu tih tur ṭul a tihpui char char a, chau ṭhin hle mahse nuam a ti. Siamtei a ni ten riah ni chuan in a kalsan dawn sia tiin tih fel ni atan hman a tum ve thung a. Mahse Makima rawn phone chuan a mood a ti off vek. An ṭhianho a dine out an neih tur a rawn hrilh a, Zorema hmuh leh chu duhlo hle mahse, Siamtei te inneihah ṭhianah an ṭang dun ve ve dawn a, engkim hi palzam ve a ngai. Chuvangin engahmah ngailo anga lan a ngai a ni. Khami ni aṭang khan Zorema ala hmu leh miahlo a. Ruati pawhin a la neitu thei chiahlo nangin an inkawp nasa tih erawh a hria.
Tlaia an rawn sawm chuan a lo inpeih vek tawh a, Inah luhtir lo in pawnah a lo chang a. An lo thlen chuan a hnunglam Siamtei bulah chuan a ṭhu lut nghal a. Zorema chuan Car lo khalhin a rawn en zawka, hma lam a thlir leh nghal vat.
"Nupa inni mai tur hi mai tur hi mumang a ang ka ti" tiin bul a ṭan a.
"Ka lo dream na a rei tawha, chutianga ilo ngai ve chu kan inang a nih chu" makima chuan a lo ti vat a.
Siamtei neih hi i lo dream ṭhina maw?"
"Dream tehreng e, khami zan pawh kha ka plan vek a lawm"
"I mawl a mi, uang uang suh, Siamtein a lo ti vat a
"Ka uanglo. I rilru na kha chance ka la vat a nih kha, ka ti fuh phian lehnghal, mahse i rai mai kha chu rin phak bak a ni."
Zorini chu a lo nui char char a" Rai lo ta se" a lo ti a.
"Plan B apply a ni leh mai." Siamtei chu a tum bar a. Zorini erawhin phur takin a lo sawi zawm puia, Siamtei leh Zorema an ngawi dun char char thung.
An thil chah an nghah lai chuan Siamtei chuan "Zorema hi titi na hun tak tak kan nei talo a, engtinnge i awm tak zel? A rawn ti ve thung a.
"Ka chhuk kha Mechanic ka zir nghala, tuna ka neih takah hian, ka thawk zawm nghala, a neitupa in a enkawl peih taklohah khan min zawrh a, tihian ka nei taa, ka la enkawl ve ta zel a ni ber" a chhang tawi thiam khawp
"Aizawlah in awm dun reng sia, tinge in pahnih hi in va inpawh lo ve"
"Hmanni deuh lawk khan kan in hmu leh chauh a lawm." Zorini chu a ngawi lui tlat. A duh dan danin chhang rawh se.
"A nih leh bialnu lam te?"
"Chutiang lam pawh ka ngaihtuah hmanlo, bul ka ṭan chauh a, ka la buai lutuk a"
"Chutianga intihbuai tur a nilo. I tlai mai ange, Zorini pawhin bialpa a nei tawh a, kan neihsan vek mai ang che." Siamtei chuan a lo ti a.
Makima a rawn phur," Tunge? tinge kan hruai veloh?" A rawn ti chung a.
"A ti mai mai a nih kha"
"Ka thlen aṭangin zantin a lo leng, sikula a thawhpui a nia, a fel lutuk" Siamtei chuan a lo ti a.
Makima chuan "Keini kan inpuang zut zuta, nangni in lo inzep a, fair lo e, ṭhian kan ni ta lo mi?" tiin a lo vui der.
"A ti mai mai a nih kha," a la ti fan, nia bialpa lo tih ve ngawt chu a chiloh, heti lam an la sawilo. A awmdan velah Sir Sanga hian duh hmel deuhin lang mahse, engmah a sawi bawk silo a, ṭhian angin a en nge pawh a hre lo.
An thil chah a lo thlenga, a han ei chiah chu a hrawkah a rawn hnawh up up mai. A hmui a hup a, toilet lamah a tlan lut nghal. A uak vak vaka, a chau rawih mai, engtizia nge le? Khatiangte chu a ei fo va.
Nilo, a ni hi, khami aṭang khan a period tawh miahlo. A rai a ni thei angem? A nnih vaih chuan aww.. A luakchhuak a reh chuan a inhru faia, a ṭhiante hmuh a hreh ngei mai, a zak. An thil ei kha hmuh pawh a duh tawhlo. Chhuanlam siam a ngai ngei ang. A ṭhiante chuan a chhuak chu an lo en ṭhap a, an ngaih a ṭhat loh hmel. "A dang kan chah a nia, lo kal rawh" an lo ti vat a.
"Nilo, a ngailo, tlailamah khan ka rilṭam vangin thil ka lo eia, khavang kha a niang, in tur lam ka lo in ange, tui deuh khan eiru" a ti a. An piahah chuan a ṭhu a, an ei tur chu en loh hram hram a tum, a luak leh ang tih mawlh a hlau. An hrethiam a ni ang, an ko zawm talo. A ni pawhin thingpui hang a chah a, thei thur lam a ei chak viau, mahse a chah tel talo.
An ei zawh chuan muangchanglo in an chhuak vat. "Boruak ka ti chhe vek, pawi ka ti" a ti sap a, a ṭhiante pahnih chuan a pawiloh thu an sawi vat a, Zorema chuan ngawi ngulin motor a khalh a, inngaihtuah muk hmel hle.
Siamtei chuan "Min hrilh vek rawh le" an mut hnu chuan a ti a.
"Eng maw?" A lo ti hu a. "Ka bulah lehzel i zep dawn emni? i naupai chungchang hi?"
"Naupai maw, keihi ka raiah i ngai a maw" A mah inring tho mahse, chiang lutuka a ṭhiannu a rawn sawi chuan a ṭhawng khawp mai.
"Ni e, i hrethiamlo a mi?" A lu a lo thing ringawt a.
"I rai a nih ka ring, kan awmdan a in ang emai. I period hun i hria em?"
"Thla hnih ka period tawhlo"
"I va mawl tak, tinge i test vatloh? Sir Sanga chu hrilh vat rawh."
"Sir Sanga a?"
"Aw, tinge amah a nilo mi?"
"Kan inngaizawnglo, engtinmah kan awmlo."
"A nih tunge?"
"Zorema" a sawi chhuak ta tawp, a ṭhiannu bulah chuan sawichhuah a duh zawk, an awmdan, a tihdan zawng zawng chu a sawi ta veka, Siamtei pawh a thinrim ngang mai.
"A va tenawm ve, tihthlak i duh em? I duh phawt chuan ka pui ang che, a hunlai tak a ni ang." A ti ve ta nge nge.
"Tihtlak, nau tihtlak, chutiang chu a ti ang tih a ring ngailo. Chutiang dinhmuna a din pawh a ring ngailo. Mahse paitlang tase, a faah a pawmlo ang. Pawm pawh nise a hmuhsitna tur zawng zawng a ngaihtuaha, a hriat pawh a duhlo, mahse a pa zep ta se, a nu leh pa, a zep thei silo ang. A dinhmun chu a va rapthlak tak.
"Engpawh nise, naktukah kan test anga, a lo nih leh kan la ngaihtuah dawn nia, itan chuan thu tihtluk a har viau ang, i thutlukna a piang ka pawmpui ang che." Siamtei chuan hrethiam takin a lo ti a.
An ṭhiandun chuan an inkuah vawng vawnga, ṭhianṭha neih man ava awm em, mahse a thutlukna tur chu.. Tinge a rai kher le? Mi pawh an chesuala, an rai vek silo a. Nau tihtlak chu a ngaihtuah pawhin rapthlak a ti. A tih atan a duh ngailo. Mahse han pai se, Zorema hian a pawm kher pawh a ringlo. A pawilo, a pai anga, a pa chu a sawilo mai ang. Mahse a va mualpho nasa dawn tak, a nu leh pate zah dan turte, a fapa ngei pawh a pa hrelo a aawm tur te. Siamtei chu a muhil bawrh bawrh a, a ni erawh chhin khatmah a chhinglo.

Bung 7
Zungbun chiah lei an ngaih tawh avangin Makima ruala Zorema rawn kal ve chu mak an ti hle. Zorini pawh chu insiam ve turin a la tur zui. Zungbun an lei anga, test kit a rawn lei anga, a rai a nih chuan tlailamah clinic ah kal an tum a nia. Mahse hnial ruallohin a tur luia, pawilo e, an haw duntir anga, a remchang tho alawm tiin a kal ve ta a. Zan a mulo nen a chau ngawih ngawih a, Carah chuan a lo muthlu hman a, a din dawtah chuan a harh a, zungbun dawrah chuan an lo ding a.
"In lo lut ve angem? Lo muthilh a duh, a lu a thinga. Zorema pawh chuan, "Va lut ru" a lo tih ve takah chuan anni pahnih chu dawrah an lut a. An kal ta maw tih veleh motor chu a ti nunga, a biak peihloh nen. "Khawnge i kal dawn? Kalna tur ineih chuan ka lo chhuk ang."
A thusawi hrelo ang hmak chuan a tlanzui a. Khawiah pawh hruai mai tehse, a ṭawng peihlo, hnialpui pawh a peihlo. Mahse a dinna a en chuan a phu chiang hle, ani nena in entir chu a duhlo a sin.
" Kal rawh le."
"Khawiah maw?" A haider lui ve tlat a.
"I inentir dawn"
"Inentir ka ngailo."
"Pawhchhuah i duhloh chuan lo chhuak rawh" van thinchhe tak.
A hmel chu a rum em avangin engpawh a tihduh mai a rin avang chuan a chhuak a, ngawireng chuan a zui a. Clinic chhunga lo awm nu hmelṭha tak chuan hlim hmel takin a lo chiau au a, an kal tur a lo hresa ni awm tak a ni.
"Ka rinaiin in rawn tlaia, ka lo chhuak hman ṭep a ni, lo kal rawh, ti vat vat ang" a lo ti bawrh bawrh a. "I lo lut ve dawn mi?" tihpahin anmahni zuitu Zorema chu a en a, a ni lah chuan ngawirengin a zui lut a.
"Thla engzatnge i period tawhloh?"
"Eng a?" A duhloh ber a thleng mek, mahse zeploh ṭha in a hre ta thut, a nih nih hmachhawn a ṭha zawk.
"Thla hnih."
"Heihian va test phawt teh. Test kit pe in toilet lam chu a kawk a. Test kit chu a en vang vanga, a tha chu a khur nasa hle. Enge a hmachhawn ang le, he Doctor hi Zorema hmelhriat a ni phawt mai a. Engvanginnge a hruai? A ringhlel ve anga, tuma hriat hmaa tihtlak tir a tum a ni ngei ngei ang. A nei duh dawn silo a, fa vangin a tihbuai a hlau a ni ang.
Muangchangin kit nen chuan a luta, doctor chu a pe a, a ni chu a lo au chul a. "Naute chu i pai chiang a nih hi, ultrasound in kan en dawn em mi niang?"
"Tu fa nge?" A ngawireng a. "Tu fa nge ka tih chu?" Zorema chuan a rawn ti a.
"Lo buai duh suh, ka puh dawnlo che".
"Ka fa tiraw?"
"Ka fa a ni tiraw?, bialpa i neilo tih ka hria". A la chhang duhlo. A kun tlat a. Sawisa hrep dawn pawh nise a chhang duhlo. A reh vang vanga.
"Kan innei ang". A ṭawng zawi khawp mai. Mahse a chiang tho. A nei chatuanlo ang.
" Ka nei dawnlo che."
"Ka fa a fahrah ai chuan engpawh ka ti ang." Chiang kelh kawlh chuan a rawn ti a.
"Ka ti tla dawn" A bek chu a rawn ri chawrh mai. "Sawi leh teh." A aw chu a ṭengchhuai mai, a hlau lutuk chu a khur nghal, a benna lah chu a na lutuk. Doctor pawh chu a lo ṭe tuarh.
"Kutthlak tur che in min siam tawh suh, engkim i chungah hian ka thlentir thei. Kan innei ang." A chhang ngam tawhlo. A inhnit faih faih a. Ṭahloh a duh nen, a lungchhe tlat.
"A pawi ka ti, ka insum hmanlo a ni. Khatiang kha a thleng leh tawhlo ang." Chawpchilhin ngaihdam a dil leh nghal.
"Ti tla ila, kan pahnih tan a ṭha zawk ang." A la ti hram, neih a hreh em a ni.
"A theihloh"
"Kan inneihna hi a hlawhtling chuanglo ang."
"Hlawhtling turin kan bei dawn alawm, tualthah ka duhlo. I duh ṭalh a nih erawh chuan engkim i huam a ngai ang. Jail tan thlengin." A hmel chu a en a, a lo thutak kher mai. Duhthlan tur a neilo. Engvanga neih talh duh nge maw a nih le? A hmusit hle si a.
"Nang chuan i hrethiamlo ang, fahrah ila ni ve miau lo a, kei chuan ka fa chu sawiloh, midang nihna atan pawh ka duhlo. Engkim, ka fa tan chuan ka inhuam, a tuar ai zawng zawng tuar ka thlang. Ka theihtawp ka chhuah ang."
Hnial ngaihna a hre tawhlo, a ngam tawhlo a ni mah zawk. A fa chu fahrah a phal bik hleinem. A fa tan chuan engkim a huam ve tho a lawm. A nei poh a ni ang chu. Mahse remtih thu chu a sawi chuanglo. Motor chuan an in thlengin a thlah a, engmah an sawi tawhlo. In an thlen pawhin ngawirengin a chhuk a, a luhsan hmak.

Bung 8
A tuk zingah chuan Siamtei nen chuan haw turin an insiam a. Nimina an thil tawn zawng zawng chu a hrilh veka. Siamtei chuan "A ṭha zawk turah ngai ang, thil a la kalfuh mai ang, engemaw inhriat fuhlo aawm a ni ang. I tum phawt chuan a rilru chu ila hneh em em ang" tiin a hnem a. Inhriat fuhloh aawm chu a ring chiahlo. Chuti taka pa a neihloh vanga an hmuhsit leh hreawm a tuar vak pawh a hrelo. Mahse a tuartu a nilo a, a tuartu in a sawi miau si chuan, a nilo lo tih tlat pawh a thei chuanglo ang.
A phone ri chu a en vata, Zorema, lakloh a duh deuh thut a, engemaw a rawn sawi dawn ni? Inneih a duh lehlo tih pawh a ni mai thei.
"Vawiin chu haw lo mai rawh. Tlaiah inpuiah chaw ei a ngai a, naktukah kan haw dun mai dawn nia" a rawn ti nghal zung zunga.
"Ka duh lo" A chhan dan chu a naupang chhia a ti ve tho.
"An hmu duh che lawm"
"An duh leh hetah min rawn hmu rawh se?" A nui huk ri a hriaa. Phone a dah hmak a, a thu a aawm leh tho a ngai ang. a hma chuan a hua, tunah chuan a hlau tawh.
Siamtei chu thil awmzia a hrilh nghal a."Nghak ve mai la, naktuka kan pahnih chauha rawn chhoh ka peihlo e" a ti nghal a.
"Nilo e, engkim i hmachhawn a ngai, ticket kan la vek tawha, bakah inlamah buaina tur tamtak aawm bawk, khawtlai thei ka ni tawhlo"a lo ti tlat a. A va huphurh tak!
Chaweikham chuan Zorema chuan a rawn lam a, ṭhiante tan chuan a inpe khawp mai. Siamtei te vangin hna a ṭhulh hnem khawp mai. Siamtei pawh chuan a lo sawi bawrh bawrh a. A ni lah chuan, nangni vanglo in hna ṭhulhna tur ka nei hleinem. Hna thawh bak tihtur ka neilo a, ka hah theih nak alaiin"a lo ti ve ngial a.
Siamtei chu counter ah an va thlah a. An kalliam thleng chuan an awm a. An liam veleh chuan kal sawn a tum nghal a. Zorema chuan rawn zuiin a banrekah a rawn vuan a, lo phelh nghal a tuma, a ni lahin a vuan nghet sauh.
"Tihtur i nei em?"
"Ka ngah mai" a lo ti hmaka.
"Nih leh, ka va thlah ang che."
"A ngailo, hna thawk rawh"
"Ka zawi vek, nuhah ka la na dawn niang," a nui vur vur a, a hawi tau hmaka, mahse a nuih aza ve tho, a hmuhah nuih a duhlo mai pawh a.
A thlah pawh chuan haw mai tumlo chuan a ṭhu renga," i haw dawnlo mi" a tih chuan, "Ka nghak che anga, chuan ka insiam min nghak anga, inpuiah chuan kan kal ang chu." A lo ti et a.
"Tinge chaw ei an tih kher kher a?"
"An hmu chak che, i sual dawn nge dawnlo an hre duh a ni ang." A nui suka, vawin chu a mood a fuh riau, eng chu a hria ni maw?
"In inah chuan tutu nge awm?" A ti ve ta nge nge a.
"Ka pi leh pu, ka nu leh pa, nimina kan in entirna kha kan upa ber, pasal a nei tawh a, khami chhang hmeichhia bawk. Mipa, kan inrual vel, chumi nau leh chu hmeichhia."
"An awmkim vek angem?"
"I huphurh deuh a mi, tumah hlau suh, ka chhan zel ang che. Anni lo pawh an awm ang."
"Ka hlau kher lo."
"A ṭhat chu, Nih chuan insiam la".
"A la hma e"
"Nih leh kan mu lawk dawn mi?" Rum deuh chuan a va melh a, a ni lah chu a lo nui vur vur leh nghal. An boruak chu siamṭhat a tum hle a ni ang.

In pui an thlen dawn chuan a zam ve deuh, a rilru chu hria ni awm takin a kutah chuan a rawn vuana, "Ka sawi tawh kha aw, tumah hlau suh"a rawn ti a. Vawikhatmah a la hmuhlohte an ni si a, a hrawn tur anni lo a, an duh leh duhlohin awmzia a nei lemlo tih hre tho mahse, a zam rilru tho. Mi be bawrh bawrh chi a ni bawk silo. An lo biakloh phei chuan biakna tur a hrelo viau ang.
Inchhung an luta, a nu niawm tak chuan a lo chiau au vat a. "In va tlai ve, eirel turin lo kal ta che u" nui chung chuan a lo ti a. An va inpawh hmel. Khatichen an ngaihsak silo a.
"Chhawr nghal vak tumlo la, min neih a huphurh phah ange" ti phawtin, "Heihi ka nu a nia, midang hi? Zorema chuan a ti a.
"An lo la haw lo, i pi leh pu va hmu hmasa ru, midang lo thlen hma in"A nu chuan a ti a.
Zorema chuan room lamah a hruai nghal a. A pu chu wheel chair ah a lo ṭhu a, lehkha a lo chhiara, a pi chuan TV a lo en a. An upat tawh hmel.
"Ka pi, ka pu, kan lo thleng, hei ka nupui tur chu a nia, Zorini," Zorema chuan a ti a, a pi chuan TV chu a off vat a.
"A ni maw, lo ṭhu rawh u, Zorini chu i va hmelṭha ve", a pi chuan a lo ti a, Zorema chuan ṭhuttirin a bulah a rawn ṭhu nghala, a kut chu a vuana, a pi leh pute bulah chuan induh taka innei tur anga lan a tum hle mai. "Kan damchhung hian mo hmel kan hmu dawnlo emaw kan lo ti tawh asin," an lo ti bawrh bawrh a. Zorini chuan nelawm a ti hle. Kum kha chen ngaihsaklo mahse an enkawl hnuah chuan an hmangaih hle niin a hriaa, Zorema chu a lawmpui hle. A nu nen chauha awmdun ṭhin khan chhungkaw hung tak a nei taa, nuam a tih hle a ring
"Kan inhmu fo tawh dawn a lawm," tiin a lo chhang ve vat a. Phur ang deuha lan chu a tum ve.
A pi chuan, "Ni e, kan inhmu fo ang, Bawiha hian min tlawh a tum ngailo a, hna ringawt mai a ngaihtuaha, nang i awm chuan hna thawh dan tawk thiam turin i hrilh anga. Kan inhmu fo ang chu" . A lo ti ve a.
"Ka rawn tlawh fo che u a lawm," Zorema chu a lo in sawithiam vat a.
A pu chuan, "Enge i tih ṭhin le?" A lo ti a. Private sikulah ka thawka, tiin a lo chhanga.
"I thawkzawm a ngem?" An la sawi dun miahlo, Miss Ruati te nena thawhho leh chu a nawm vak a ringlo.
"Ka hrelo le, kan la sawilo a," a ti mai a.
"A thawk hman tawhlo ang, sawtah hna a tam lutuk, a nau neih hma chu min puih a ngai ang". Zorema chuan a lo ti a. A zawt miahlo a, a duhdana awmlohna atan a thawk zawm lui ngat maithei a ni. Mahse heta inhnial chu a duh biklo.
A pi chuan "motor chu i siamtir velo ang tiraw," a lo ti a, annui ta vek a.
"Siamtir maithei a ni."
A pu chuan, "Ni e, hnathawh loh kha a fuh ang. Hna thawh ve ve chu a buaithlak, naute innei vat dawn a, midang kuta inchhung dah vek mai chu a ṭha lo, Engtiknge inneih in tum?" A ti a.
"A hma thei ang a ni mai"
"Engkim i pa aṭangin i hre tawh a, nupa nih tawh hnu a rinawmloh pawi zia te, kumkhuaa nupa hlimlohna bakah tuartu dang an awm ṭhin, nang chuan iti ve tur a nilo" A pu chuan a ti charh charh a.
"Ka hria alawm ka pu, fahrah hreawm zia pawh ka hriaa, kei chuan chutiang a thlen ka phal ve dawn lo" Zorema chuan a lo ti a, Zorini chu a lo thlamuang huai a.
A pu chuan Zorini lam chu a lo hawi a, "Keini aimahin Bawiha hi i hrechiang zawka, khaw khat inni hi ka lawm viau a ni. Nula tamtak hian an zar ve fo tih ka hria, mahse hengte hi chuan amah hi an hrechianglo a, nang chuan i hrechianga, chuvangin a dinhmun hretu ini a, chhungkaw ṭha tak in din dun ngei ang tih ka beisei a ni" Zorini pawh a lo bu nghat nghat a. A niin a tum phawt chuan a ni pawhin a tum ve tur a ni.

Chutihlai chuan room pawn lamah thawm a lo awm a, room chu a rawn inhawng nghala, nula hmelṭha deuh mai lo lutin a pi leh pu chu a thil hawn a rawn pe a. Nula fel deuh a nih dawn hi, tar a ngaihsak thiam emai. Chutah an lam alo hawia, "in lo thleng tawh a ni maw? Awi, i va hmelṭha em em, engtinnge mama hi i duh theih? A ti ta chul a.
A nuih a za hle, "Ka lawm e" a lo ti a. Zorema chuan a lo kuah thuak a, "Ka pu, ka lo nawr dawn che mi?" A ti nghal a.
An chhungkua chu an felfai thlupa. An pa chu a hmuh tum ang a nilo. Nupui nei chunga nula kawp a nih vang khan ler hmel deuh tura hmuh a lo tum a, chutiang a nilo reng reng, a zahawm thlup a, nel har tak tur a ni. Annu pawh chutiang zia tho chu. An naupang ber erawh a ri ve chel chul thunga, a ni awmlo se chuan an chhungkua chu a reh ve ṭhin ngawt ang. An fapa erawh ruihtheihthil ti ve ṭhin a ang. An vai chuan Zorema chu an ngaihsak hmel vek. Chaw ei chhunga an titi pawh an inneih tur chungchang vel a ni.
Chaw ei kham chuan a pu chuan Zorini chu a rooma nawr tur chuan a ti a, thil sawipui duh a la nei a ni ngei ang. Pawi a tilo, an titi chu lo zawm ve ngaihna a hre vaklo bawk a.
"A chanchin i hriaa, kan ngaihsaklo kha mak iti viau in ka ringa, dem pawh min dem maithei. Mahse khatihlai khan chhungkua kehchhe maithei dinhmunah kan awm tlat si a, Kan fapa thiamloh a ni a, a kehchhe tur kha kan dan hram hram a ngai si a, kan ngaihsak theilo a ni." A hrethiam tho mai, a lo bu nghat nghat a.
"Kan rilru chuan hrereng mahse, chhungkua a kehchhiat ai chuan kan ngaihthah lui ta mai a ni. Tuna kan laka a hel viau pawh hi kan demlo." An inpawh hmel hle sia, mak a lo ti viau. A ngaihtuahna chu hria ni awmtakin "A langah chuan tihian a ni pawhin min huatna a ti lang duhlo a, mahse a awmdanah hian kan hre vek a ni. A thlawnin engmah kan hnena mi a la duhlo a, chhuanlam tur a neih veleh a inla hrang hmaka, thil min tihsak zawng zawng hi reilo te kan bula aawm chhunga kan tihsak min rulhna mai a ni."A hrethiam ta kuarh mai.
"Chutiangin in lakah a hel tih ka lo hre hleinem."
"Engmah a sawilo ang, a rilrua awm a sawi ngailo, chetzia in a lantir mai a ni. Chhungkuate chu kan inlaksaka, kan inpe a, chu chu amahah chuan a ni velo, a chhungkuaah min ngailo a, tute emaw a chunga ṭhatchhuahte ang bakin min ngailo a ni."
Englaimahin hlim hmel a pu lo a, a nuih pawhin a lem vek a ni. A hlawhtlinna pawhin a ti hlimlo a, engemaw a tihtura awm ti ve chauh ang maiin aawm a ni. Chuvang a nia, nang a nei tur che hi ka lawmna, hlim ve se ka duh, kan pek theihloh hi i pe thei ang tih ka beisei a ni."
A pi leh pu rilru chu a hrethiam ta kuarh mai. Mahse a ni pawhin hlimna chu a pe dawnlo. Tihtur ti ang chauhin a nei dawn. A tan hlutna a nei biklo. Hlimna pek theih ngaihna aawmlo. Mahse pitar putar chu a ti beidawng theilo ang anmahni avang tal pawhintheihtawp chhuah a duh a ni.
"Ka theihtawp ka chhuah ang", a ti ta nge nge a.
Bung 5
A tukah chuan insiam sa vek a ni bawka, a lo nghak rei hle, chawhnu lamah an chhuak hman ṭawka, a tlai chhan a sawi chuan a hrethiam hle a, a ṭhiante rawn zin vangin hna a ṭhulh nasa ve a, tunah inneih dawn vangin a ṭhulh leh bawk si. Hna a ngaha, a hlawhtlin chhan chu a thawhrim vang tih a hre tawh. A customer te duh hun takah a zo hman ṭhina, heihi customer te pawhin an pan leh zel chhan a ni. Chumi tur erawh chuan a thawkrim hle.
Hla an play a, inbe vak manglo chuan an chuang dun a, remti tawna innei tur nise a ti ngawih ngawih. A nulat ṭan aṭanga a duh leh a hmangaih a ni a, a duhlo tih a hriat hnu pawhin tumah ngaihzawng dang a neilo, an inhmu leh a, a hmangaihna chu a pangngai reng a ni tih a hriaa. A in pe a, chu chuan inneihna a hringa, duhloh dan deuhin an innei dawn a ni si a.
"I pi leh pute khan i hnaih duh vaklo niin an hriaa" tim deuh chuan a zawt de dek a.
"Ka theih tawp chu ka chhuah ve a, an la duh khawplo a ni maw?"a lo ti daih a.
Zawh zel chu a hreh hle, mahse a hre chak bawk sia "An bulah i hlimlo an ti a"
"Vawilehkhatah ka pi leh pu anni thut a, awmdan thiam har ve deuh a nia" a tih chuan a hrethiam ang reng. Eizawnnaah a hhlawhtlinga, chhungkua a neia, tinge a la hlimloh, tihte hriat a chak a, a chhang duh ange maw?
"Eizawnna ṭha deuh inei a, chhungkua i nei bawka, a hlimawm i ti em?" A ti leh a.
"Engkim hi a lan dan ang a nilo, kan nihna hi chu a ngai reng a ni." A lo ti leh mai a, engmah a zawt chhuak tak tak dawnin a hre lo, A zawt peih tawhlo, pawn lamah a dakchhuak ta daih a.
An khua an thlen chuan a tlai tawh hle, a pute an au zawk a, an inlamah thlah turin an tlang nghala, a chhungte chu an lo ri chula, Zorema chu an lawm zual. A chanchin an hre tawha, a nu leh pa pawn an chhuang tih a hria. A ni lah chuan an thil tur a lo hawn vek niin. Chawei nghal turin an ti a, a ni erawh chuan a puten an lo nghah thu a sawi a.
"A lawmawm hle mai, eizawnna ṭha tak i nei a, ka chhuang takzet che a ni." A pa chuan a ti a.
"Ni e, ka vannei a ni e, remchang a lo awm hlauh a" A ding uaih a. "Ka awmreilo ang, nakinah ka lo leng leh zawk dawn nia" a ti a. motor thleng chuan thlah turin a kala.
"I nu leh pate hrilh rawh aw."
"Ka hreh eee"
"Engvangin, min duhloh i hlau deuh ami?"
"Chutiang a nilo," Tinge maw a inngaih hniam reng le? Lehlamah a induhtawk viau bawk si.
"Rai maw?"
"Ummm" A rawn hrethiam ta hlauh e.
"An fanu lehkhathiam, nungchang ṭha tak, a lo rai si....."
"Min hmusit."
"Chutiang a nilo, i hreh leh keiman ka hrilh mai ang." A pum chu a rawn chul a, "Hrilh lawk a ngai si a lawm. Ka kal phawt a nge. Muttui"
Inchhung a luh chuan a nu leh pa chuan Zorema chungchang an lo la sawi tui hle, hetiang dinhmuna a ding hi an lawmpui takzet tih a hria, an chhuang bawk. A tumruh dan kha ala hlawhtlin ngei ka ring reng a ni. A pa chuan a ti. An chungchang erawh a la sawi ngamlo.

BUNG 6
A tuk zing aṭangin Siamtei lo lang nghalin a hruaiphei a, an in chu a tlawh ta lo vang vang. Zoremaa chuan a hrilh tange hrilh talo pawh a hre lo. A ni nen lah an inhmu heklo, mipa lam tur a nia, chuti lamah chuan a tal a niang chu a ti mai. A chhungte a ngaih ve nen, a tumloh danin a haw ta nen, a inthlahrung ru viau bawka, a ngam sarh lo. Inneih dawn tlai chuan a nu in Siamtei nen chaw ei turin a rawn ko a, an phei hram.
Zorema leh Makima pawh an lo awm renga, zanah Counselling an nei dawna, in sawmkual ngailo in a rem phian.
A pa chuan Chhung inkhawm a hmanga, an tum reng a lo ni ngei ang. "In vaiin kan fate ang veka kan ngaih inni a, zirnaah te, eizawnnaahte in hlawhtling veka, ka chhuang che u a, lawmawm ka ti. Chutihlaiin in nupui pasal neihdan erawh ka lawmlo hle" Zorema chu a va en zeuh a, a ni chuan a lo melh ve vat. A hrilh tawh a ni ngei ang, a lo bu nghat. "Biak In hawngin innei vek ula, phur taka tih sak che u pawh ka duh a, mahse in awmdan hian min ti phurlo vek a ni."
"Amaherawh chu bul ṭan dan fuhlo mahse, a insiamṭhat theih a, kan nun chhohnaah Pathian duhdan anga nun tum ila, inṭhente hi tum reng reng loh tur. Inṭhenlo tur chuan inneih nghehna tur kawng zawh tur a ni a, inrem dan kawng zawn zel tur. Pathian laka thu tiam hi zah em em tur a ni" tiin a ṭawngṭai zui a, ngaihdam a dil sak nasa hle bakah a kaihhruaina a dil sak bawk.
Zak ngai lo leh thawveng ṭhin tihtakah chaw ei laiin Makima chuan a pa chu a chhuahchhal a. "Hetiang hi kan tumdan a ni biklo a, mahse kan inneihna tur kawng a ni miau si a, min dem lutuk su, mahse inṭhen chu kan tum miahlo ang, a buaithlak dawn e, tu ve ve pawh inṭhen ila, kan inṭan anga, ṭan zawk kan nei anga, pakhat zawk pawh inṭhen ila, pakhat zawk pawh kan inrem thei chuanglo ang" a ti a, a nu leh pa nuih a za hle.
"Ni e, inneih tawh chuan inṭhenloh tur, in puitling tawha kan ngaihtuahlo che u". An lo ti then a, Zorini te inneih hun turte chu an sawi zawm ta zawk a.
"A rang thei ang ber ka duh." Zorema chuan a lo ti a. "Keimahin ka awm rei lutuka, chaw pangngai pawh ka ei ngailo, ka ning tawh. Thil chhawmte kha a ngailo a nia," a ti zung zung.
"Tinge mahni a i awm? I chhungte bulah awm mai ta che."
"A buaithlak, ka tlai thei sia, zing aṭangin ka thawk duh bawk sia, kan khawsak dan a inmillo a." A chhungte chanchin a sawi duh miahlo.
"Zorini hi a hna hi ila thawhtir a ngem?"
"A thu thu a ni mai. Min pui se chu ka duh, midang rawih ai chuan, mahse a thu thu" a lo ti daih. Phakar lutuk, thawhzawm pawh tum se, a phal awm der silo.
"Nangman i khawih mai lo a"
"Hnathawh a ngai si a lawm. In nupa hian lo chhuk ula, inhnuai khu kan chei anga?"a lo ti a. Makima chuan "Ka duhlo, ṭhian inchhawr chu a nuamlo ang" a lo ti a, a dik viau.
"Zorin, enge i ngaihdan? " Siamtei chuan a lo ti a.
"Sikul bang min hruai a phur phian mai thei" a lo ti chu an rawn en hau mai.
Makima chuan "Nia, thawk zawm duh mahla, an bân tho che in ka ring", a lo ti ve a, hepa hian hriat a nei chiang mai. Siamtei chuan a lo man vat. "Thawh zawmloh chi a nih chu, mahse a dangah zawng leh tho la, kei chu zirtirtu nih hi nuam ka ti, naupangin thiam thar an neite hi a nuam em asin." A lo ti a.
Zorini chuan "Tun maiah chuan tum dan pawh ka la nei hrih lo, hun han kal phawt se" a lo ti a.
Counselling tura an kalnaah pawh chuan Makima te pahnih chu inpawh deuhin an titi a, kut an invuana, an inkawm ṭhin lai ang reng khan an awmdun. Thla chu a eng ruih a, an lenna ṭhin zawng zawng chu a en ruih a, lunglenglo mi tan pawh lunglenna tham a ni.

Zorema chuan a kut chu a rawn vuana, a lo en vat a. A rawn enlo a, a ni pawhin a kut chu a pawt let bik ta chuanglo, ngawireng chuan an kala, an nunhlui kha a hrechhuak ve a ni ngei ang. Mahse a duhlo kha a ni sia, an nunhlui zawng a ngai ve lo ang. Mahse a ni chuan a ngai a, tunah pawh kuah se a duh, a awm nghenga bei a chak a, a ngai ngawih ngawih. Mahse tihlan erawh a duhlo, a hmusit dawn sa, a nihloh leh thlemah a puh leh mai ang.
"Sikulah chuan i thawk tawhlo ang" a ti sup a.
" I thu hnuaiah min dah nghal vek i tuma" tiin a lo vui a.
"Nitina mipa dang nena hna in thawhho ka duhlo" Nangmah anga ler turah min ngai a mi, tih a duh viau a, mahse a hmun an thlen tak avangin a chhang talo law law.


Bung 7
Zorema a hmanhmawh em avang chuan inneih chu an ti rum rum a, Zorini pawhin pawi a ti chuanglo. Rai len hmaa inneih a duh ve tho. A duh ang tak thawmhnaw nei mahse, a dul erawh a duhthusamin a awm thei tawh biklo. A chhungte'n Aizawlah innei se an tih laiin Zorema chuan an khuaa inneih a duh tlat a. An hnial chiamlo nangin an rilru erawh a na tih Zorini chuan a hai lo.
A chang chuan inneihna tih hlawhtlin duh viau angin lang ṭhin mahse an inneih meuh chuan chutiang a lo tumlo tih a hrechhuak rang khawp mai.
Sumdawnna dang tih a duh vangin a buai hle a, Workshop a sum veivel zawng zawng chu a kutah a dah hmak thung. A zin deuh reng a, a zin apiangin hruai a nei ziah a, zep lah a tum ngai heklo. Sawisel a tum biklo a, a rilru na hle ṭhin mahse engmah a sawi duh biklo, nau a nei anga, a ṭhen hmak ang tih chu a tum dan a ni. Engvanginnge hreawm a tuar reng bik ang? An hnuaia thawk ten khawngaih hmel deuha an en te chu a hrelo a ni biklo. Inṭhen hma lutuk kha zahthlak a ti mai chauh a ni.
An chanchin chu tuma hnenah sawilo mahse an chhungte chuan an hailo tih a hria. Nikhat Mapuii hnena check up a neih tum pawhin an sawi dun zawk a.
"Nau ka neih veleh ka haw ang" a ti a. "A pawi ka ti khawp mai. Tihngaihna ka hre biklo a ni"Mapuii chuan a ti a.
"Tinge hetiang em em hi a nih tak le? A hma chuan a felin a inngaitlawm hle ṭhin kha a ni sia" a ti vawng vawng a.
Chumi hnu reilo teah A pa te chuan chaw eiah an rawn sawm , hauh an duh vangah a ngai a. Nidang ang bawkin Zorema chuan kalloh a rawt leh a.
"Tinge i nu leh pa te hi i hlat tulh tulh a" a ti ta nge nge a.
"Hnaih i duh viau leh nangmahin va kalla" a va ngeiawm ṭhin tak. Nau neih zawhah ṭhen a tum chu a ni nangin, zaninah hian ṭul leh pawilo a ti ta deuh.
"Keia hnaih leh hnaihloh a nilo, an hmangaih che a, an ngaihsak che a, tinge hlat i tum tlat?" A ti veleh zela.
"Min hmangaihlo, min hmangaih nise hmanah min ngaihsak ang. Fahrah min nihtirtu annih saw"
Makti deuh chuan a en ta tlawk tlawk a, a hnu fe ah chuan "Mahni chauha awm hi i duh zawk a mi?" A ti ta hlawl a.
"Mahni chauh bak ka ni ngai hleinem"
"Tum ve la, ini lo a ni mai a lawm"
A hmai bul setah chuan a rawn en a, "Mi hausa leh mi pangngaite chauh hmangaih ṭhin ho hi ka hua, Lehkha zir thlanglo a Mechanic zir ka thlan zawk ṭuma min nuihzat zia i hre lo, tunah ka hausa ni a an hriat hnu chauh a Bawiha min ti an nih saw, ka dinhmun min siam sak chu an duh, min hmangaih vang a nilo a, an mawhphurhnaa an ngaih vang a ni." Sawi tur pawh a lo hre ngailo, ngaihdam tumlo a, ṭhatlohna hlir thlir tlat mi tan chuan hmangaihna a neih theihloh tih a hre chhuak, mahse a sawi ngam tawh hrihlo.
"Sawi tur i hre nange? Nangpawh fahrah ka nihlai kha chuan min duhlo a, tuna ka hausak hnuah chauh min nei duh a ni lawmni? Chaweinaah chuan va kal rawh, chhungkaw hausa tak nena inhnaih i chak a ni lawmni?"
A ngaihdan chu'h, a hma ang reng khan a la ngai a nih hi. A tho thut a, engtikahmah a rilru a thlak dawnlo. Roomah a lut a, a bag la in chhuah a tum a, a nite hnenah a kal dawn.
"Khawnge i kal dawn?" A rawn ti tuarh a.
"Ka haw dawn" Kawngkaah chuan a dinkhalh a, "khawiahmah i kal dawnlo"
"Min dang suh"
" I kal dawn chuanglo" a rawn pawm nawlh a, tal vak mahse a hnehlo, a thinrim lutuk chuan a samah te a keka, engahmah a ngailo, khumlamah a pawmlut a, a nghat a. A la dawmbet renga.
"Khatiang kha sawi tur ka nilo, min ngaidam rawh" chhuahluih pawh tum se a phal leh dawn silo a, a ngawi reng a.
"I hriat angin thinlung tak hian ka la pawm theilo a ni. Ka thinrimna hi ka insum theilo leh ṭhin" a tih tak sap sapah chuan a khawngaih ve leh tho. Tumah hmangaih neilo leh hmangaihtu neilo a han inhriat chu. Mi khawngaihthlak tak a ni. Engtinnge hemi lak aṭang hian a chhanchhuah ang? Tihte a ngaihtuah. A mah pawhin haw hle mahse, heti ringawta aawm chu a khawngaih angreng viau bawk a.
"Ngaihdamna tello chuan hmangaihna aawm theilo" zawite chuan a ti a, a hria nge hrelo chu a hre lo. Mahse a nui saka, "Ka la inzir chho ve zel ang" a lo ti ve a.

An boruak siamṭhat a tum nange inpuiah chuan chaw ei tur chuan an kal a, zilh deuh an tumna ni tura a ngaih chu a lo nilo. A pu Birthday a lo ni a, tinge an hrilh loh an tih chuan thilpek pek a duhloh vang an ti a. A nite chhungkua leh anmahni chauh anni a, an tam lemlo. Zorema lemchan thiam zia chu mak a ti. Ṭha takin an titi a, a hmalakna te pawh an zawh chuan ṭha deuhin a chhang vek a.
Chawei kham chuan a pu chuan Zorini chu an room a hruai tur chuan a ngen leh a, a ni pawh chuan a nawr lut ve mai a.
"Ka ṭhutrei deuh hian ka nuamlo ṭhina, mut hahchawlh ka mamawh, in nupa in ṭha zel maw?" A ti a, zawt satliah a ang. A fapa te nupa avangin a tupa teah hian a hlauthawng tawh a ni ang.
"Kan ṭha e, ni e, i ṭhu rei ve tawh mah mah a ni" a lo ti ve a.
Eng engemaw sawi chuan an titi zui ta deuh reng a. Aw rawl ring zet zet an hriat hma chu. kawngka a rawn inhawng rawp a. Zorema chu lo lutin a banrekah rawn manin a pawt tho a, " Haw ang" a ti a, a thinrim hmel em avangin engmah sawilo chuan a zui a.Inchhung an paltlang lai chuan a han mitsir deuh a, a pa chu thinrim hmel deuhin a lo dinga, a nupui chuan a kutah a lo chelh a. Midang chu an lo ngawi ṭhap a, hmeichhe pakhat chu a lo ṭap.
Engmah a zawt ngamlo a, motorah chuan ngawirengin an luta, a tlan chak mah mah, an accident ang tih hlau in a lo kimki chawih chawih a, a maimitchhing tlat bawk a. In an thlen pawh chuan engmah a la sawi lo. Engtinnge a tih ang aw tih a ngaihtuah nauh nauh a.
"Thil thleng min hrilh thei em?"
A rum nghut a. "Saw inah sawn kan kal tawhlo ang"
A ngawi leh vang vanga, a rilru a a buai hmel hle, a lo en reng a.
"Nangpawh naktukah i haw dawn nia" A phu zawk mai. Ṭhen a tum renga, mahse Zorema zawkin a rawn sawi ta zawk chu mak a ti.
"Engtizia nge?"
"Min ṭhen i tum reng a ni lawmni? I duhlo chung ka nei che a nih kha, tunah chuan i zalen tawh e." Engdangmah sawi tawhlo chuan room lamah a lut nghal daih a, a ngaihna hrelo in engemaw chen chu a ding ren rawn a.
A thinrim laia sawi a ni a, thil awmzia hrelo a hetia awm ringawt chu a ni theilo. Roomah chuan a lut a, a ni chu sofa ah chuan a lo in dawm kun renga, khawngaihna in a khat, hetiang dinhmuna aawmlaiin a chhuahsan theilo ang. A ṭhian a ni ṭhina, a bialpa a ni leh a, a ni chuan lo duhlo mahse tunthlenga a la hmangaih a ni a. A nat chuan a lo na ve tho a ni.
A hmaah chuan a va ṭhu a, a khupah chuan a va dawm a. Hre lo ang hmiahin a lo awm. a hnu fe a a rawn en chuan a aw a thian kharh a. "Ka chhuahsan dawnlo che" a ti sap a. Chhuak tura min duh nachhan i sawi hma chu" a lo ti tlat a.
"Min nei duh ngai reng renglo a ni lawmni?" A lo ti a.
A mitah chuan natna a hmu tlat, a tuar theilo leh pek. Heti khawpa ti hreawmtu hi a hmangaih tlat si.
"Englai pawhin ka nei duh che, nangman min duhlo avang chauh a ni" thu dik a sawi chhuak. A thawl hawkin a hria.
Ngeiawm deuh chuan a nui a, "Ka hria alawm, tunah chuan fahrah ka ni tawhlo a, ka hausa tawh bawk a".
A en tlawk tlawk a, tinge fahrah a nih thu a sawi."Engtiklai mahin fahrah inihna ka sawi ngailo, kan inkawm chhung zawng2 te khan fahrah inihna lam ka hre ngailo"
"Fahrah ka nih vang khan pasal atan chuan min duhlo a ni lawmni?"
"I duh duhin min puh suh" a lo ti hlura.
"I unaunu khan Aizawlah ngaihzawng i neia, fahrah ka nih vangin neih tak takah min duhlo tih min hrilh a" chu thu a sawi chuan a en ve ta chauh a.
"Chutiang a sawilo ang, a ni bawk heklo"
"A sawi ngei a lawm, ka nat zia i hria em? Ka ṭhian, ka hmangaih bawkin fahrah ka nih vangin min lo nei duhlo reng tih ka hriata ka nat zia i hria em?" A aw ah chuan tih tak takna a lan avangin a en vat a.
"Chutiang dawt ringawt a sawilo ang"a la ti ṭalh a, a duh zia leh neih a tum zia a hrilh renga, chutiang a sawi chu a ring theilo. "Nangmah zawkin i lo ngaizawng a nih kha" a ti veleh a.
"A mah khan min ngaizawng zawk. Thudik chu kan hre thei reng alawm, va kalin kan zawt thei alawm, phone pawhin, a number i neih reng kha"
A tih tak em avangin a thusawi chu a ring ta deuh. A unaunu sawi kha dawt a lo niha, an pahnih kara chutianga dawt a lo veivir tawn a nih chuan a ni pawh a rilru natna kha chuvang chu a lo ni ang tih a ngaihtuah a.
"I ti tak tak emni? Jeny kha i ngaizawnglo maw"a ti ṭha ve leh a.
A banah chuan a kai a," va zawt ila," a lo ti a.
A ban chu a pawt let a, "I ngaizawng a, mahse ka duhzia che a hriaa, ka hrilh nasa bawka, kan inkara tlakzeh a duhlo a, khawpui nula ngei i duh thu leh nangpawh khawpuia awm vat i tum thu a sawi a" A rilru ana thar a.
Mak a rawn ti ve thung. "Chutiang chuan a sawia maw"
"Aw sawi e, Mahse thu kal tawh hnu sawi hian awmzia aawmlo"
Zorema chuan alamah chuan pawt hrawkin a nghet deuhin a kuah a"dawt vek a nih chu, nang chauh hi ka ngaihzawng neihchhun i ni a, ila ni reng bawka,"
A thu sawi chu aawih lo. A kuahna ata chu a talchhuak a."Tunah pawh maw" a en chho haa.
A rawn kuah leh a,"Aw, nangmah chauh, nang tihloh hmeichhe dang reng reng duh ka la neilo. Fahrah ka nihna hi min duhlo chhan ni a ka hriat vangin fahraha min siamtu te chu ka hua a, nangmah pawh ka hua che. Neih che ka duh a, ka nawrlui che, mahse min duhloh dan ka hrechhuak leh ṭhin a, tih nat che ka duh ṭhin, mahse ka tihnat che hian keimah hi ka na zel zawk a ni" a ti mawlh mawlh a.
"Min tihdan kha" a lo ti a.
"I unaunu kha thah hial mai ka duh, kum engzatnge min tih hreawm? Ka ngai che a, tihnat che ka duh bawk a, ka nun hreawm zia hi i hrelo ang" a lo ti leh a.
A hnungah chuan a lo chulsaka, hnem a duh, a tawrhzia a hria "Tunah chuan kan ngaihdam mai a ngai a ni. Min tibuai tawh dawn hleinem" a lo ti a.
A lo nui saka, kuah leh vat pah chuan, "Ni e, tumahin min ti ṭhen tawhlo ang" tih pah chuan a rawn fawp ta vawng vawng a.


A nu leh a unaute ho in an naute thawmhnaw tur an en laih laih lai chuan a pa thusawi chu a ngaithlaa. "Khatianga thlahthlam che kha ka tum a ni biklo, nangmah enkawlna tur zawng zawng kha pek ka tuma, mahse i nu khan a duhlo a ni. Helamah ka nu leh pa, unaute zawng zawng ka nupui lamah an ṭang vek a, I nu lahin min do ta tlat a, ka nupui ṭhena, a mah neih ka tum kha a duhlo a ni. Nupui nei chunga ngaihzawng ka neih kha ka tihsual a ni a, nang chuan rawn ti velo la ka duh a ni" A ti mawlh mawlh a.
A nupui chu a en a, an pahnihin dawt vangin an inṭhena, an inṭhen chhunga a nundan kha a chhuileta, a damchhunga tawrh leh a duh tawhlo. "Ngaihzawng dang ka neihsan ngailo ang" A ti sap a. A va pan phei a, a beng bul setah chuan "Ka ngai che" a ti sap a, a ni chuan a lo nuih var var a.
ATAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)