NUNHLUI NGAIHAWM LOH KHA Ziaktu:- Ska Renthlei

Ngaia
Site Admin
Posts: 25813
Joined: April 30th, 2016, 4:07 pm

NUNHLUI NGAIHAWM LOH KHA Ziaktu:- Ska Renthlei

Unread post by Ngaia » March 14th, 2021, 12:47 pm

NUNHLUI NGAIHAWM LOH KHA
(Competition 2021)
Ziaktu:- Ska Renthlei
,
Chhuani chu mittui tla zawih zawiha zuk kun hniamin, khuma mu Diktea hmuiah chuan lungchim em em hian a zuk fawp a ,"Dikte, a pawi ka ti, a pawi em mai!," tiin. Diktea biangah chuan dawmin Diktea chu a en ngawih ngawih a. A mittui a sum seng lo a ni; a mittui chuan Diktea biang leh hmui velah chuan a far huh kiang a. Diktea pawh chu a insum thei bik lo a; thuk tak, chhungril thúk takah a nà a ni tih hai rual loh hian a han maimichhíng vang vang a.
Mittui parawl vanga mitmeng tle sar chung hian thàwk a han la kal raih raih a ,"Chhuani, min kian san mai hi a ngai a ni. Kei aia chhawrnahawm zawk leh innghahna tlak, hmangaih leh duat taka enkawl theitu tur che i tawng thuai ang. Min ngaihtuah tawh suh; kei chu mi hmuh ang hian..."
Chhuani chuan, a kut no leh sei sél mai khur der der chuan Diktea hmui chu alo hupsak vat a ,"Dikte, chutiang sawi suh. Ka thei lo a ni, heti mai chuan ka thei lo, ka kiang mai thei lo tih i hriat kha. Bul kan tan ve dawn chauh a nih kha... Aw.. Pathian," lungchhe tak hian a ti vawng vawng a. Diktea chu bawhin, a àwmah chuan hmai phumin a tap khur ta ngat ngat a.
Rei tawk fang an ngawi dun ta vang vang a. Diktea chu a rilru a kal thui hle mai. Chhuani chu enin a'n ko sap a. Mahse, a chhang lo a lo ṭap muhil lo niin!.
Diktea chuan a hmangaih em em Chhuani, beidawnna leh manganna vanga taksa chau tawngkhawng, ṭap muhil ta chu a han kuah salh a. A beidawngin a rilru a hah ve takzet a ni.
Tunhnaiah Chhuani hi a chhung te'n pasal nei turin an nawr urhsun deuh a, a rilru hah hi a mu tlem hle ni tur a ni?
Chhuani hi Diktea tan chuan hmeichhe ena a en ve hmasak ber, a mipa thinlung kawngkhar intipa taka a khar tlat ṭhin 'Leh,' pawh ti hman hlek lova hmangaihna leh duhawmna nen fàwmkéma, loh theih loha kik hawn saktu a ni. Chutiangin Chhuani tan pawh Diktea hi a hmasa ber leh awm chhun a ni reng ṭhin.
An inlaichinna kawng hi a harsain a khirh ta em lah tak a. Chhungkaw dinhmun lamah chuan harsatna an tawk lem lo; Chhuani chhungte khan tunhma zawng kha chuan an hre lem lo bawk atin ni. Chhuani te hi awmthei pangngai tak an nih laiin, Diktea te thung hi chu hmeithai chhungkua an ni a. An khawsak a sang lo ve hle a ni; Amaherawh chu, mahni insit turin mi lei bat ngai hian an awm ngai lem lo thung. Chuvang chu a ni pakhat ang, Chhuani hi phû loh lutuk en chuan a en ngai hran lo.
A nu hi a taima em em a, nu remhria leh taima tak mai a ni bawk a. Aizawl veng hulum ve taka cheng e ti lo hian huante siamin, huanthlai te a nei tha thei thin hle. Bazarpuiah panhnahte a zuar bawk thin a; mangan that that chang te chu nei ve bawk ṭhin mahse, an chhungkua chu mualphoin a siam ngai lo.
Chutiang chu nimahse, tunah erawh engkim a danglam ta si! Diktea tawhsual tawk hian an tan hmalam hun chu thim chhah takah a rawn chantir ta a. Chu thim chhah tak chu an tan vai én ngaihna awm hian a lang si lo a ni.
An pahnih tana kawng awm chhun chu Diktea hi Chhuani'n a luhkhungin a ni a, chu lah Diktea induhtawk vena chuan a hnar tlat si! Chhuani hi a hmangaih a, ani ang engmah tithei lo leh khuma mu ringawt, malsawm fanau chawipui theih a nih pawh beiseiawm tawh loh hi, a hmangaih ber tan chuan a inphal thei ngang lo a; a tan phurrit mai nih chu a ngaingam lo a ni.
He khawvéla a lo pian chhuah ve tirh ata, hmeichhiat mipat kawnga a hmeichhe hmangaih awm chhun, a àwma tap muhil ta chu, a kutbawr, a kut zungṭang che hleithei lo chuan a biangah chuan a han chulsak heuh heuh a. Rem leh remlo chuan a luah chuan a han fawp vang vang a, chutia a fawh vang vang hnu chuan inchung lam melh ran chung chuan, hun liam tate chu a han chhui kír ta veng veng a.
"Ka Nuaithangparmàwite, ka hmangaih Hermàwite, khuanu lunglai ka nat em ni le? Engah nge maw ka ta ni ngai lo tur nang, duhawmna tinreng leh hmangaihnaa khat nunném zaidam, angil(Angel)-te kianga tual chai ve thin ni hial àwma mawi hi, mi lo tawn tir tàk mai ni ang le?! Nge ni, khua ruat loh hi ka lo tawng palh zàwk che?'
I duhawmna leh hmangaihna lipui lamah mi hruaiin, a tui vawt leh thiang kuk mai chu mi dai tir a. A vàwt nuamin thlan sa huam huam pawh a dai sawng sawng mai; Mahse, a nawmna tak tak hre turin, ka dai zel leh ka chàk em em, a hleuha hleuh chu phalsak ka ni ve ta si lo maw?
A mak lo e, ka dem lo che; ka dinhmun hian min phalsak ve ta ngang lo a ni e. Kar min dantu bang hi a sang ta em a, a lawna han lawn chhuah zawh rual a ni ta lo e. 'Engah hmànah kan lo àm loh le,' ka ti vawng vawng mai a nih hi. Kan piang nawn leh ngai a nih chuan e, i hmangaihna lipui chu, tu mah leh engmahin a tihbuai loha min hleuh tirin, thúk tak, a mawng thlengin min liluh tir dàwn nia aw," ti rilru vawng vawng a.
......... .......
"Good.. Morning.. Sir..." Pawlriat zirlai naupangho, an zirtirtu an lo 'wish' zet chu a thlúk a sei tha ràih ràih ngei mai. An zirtirtupa paw'n kawngkhar bulah lut mai lo chuan a han nghak deuh rih phawt a, chutah a lo lut ve ta chauh a; Mahse, a hnung maiah chuan hmeichhe tleirawl ek ek, hmeltha tak hian a rawn zui lut ta tlat mai! Naupang ho, ni danga zirtirtuin ṭhu tura a tih ruala ṭawng ri zui nawk nawk ṭhin te pawh an reh ṭhiap a. Ṭhenkhat te phei chuan ṭhut mai nachang an hre lo hial a!
Chung zíngah chuan Lalrindika(Diktea) chauh chu awmdan theihnghilh vek awm chhun a ni bík lo maithei. Chu tleirawl chu a hmelṭha reuh em a; ngaihtuahna la peng thei tur tak a ni reng a ni. Kum chanve dawnah an class-ho pawh an inhriat chian viau tawh hnuah, mithar hmelṭha leh duhawm, nu hnep mai rawn lut thar chu, anni ho chuan awm dan pawh lo theihnghilh hlawm se a mawh hlawm lo e. A bik takin Lalrindika tan chuan, chu hmeichhe tleirawlin amaha nghawng a neih dan chu a danglam ta tlat a ni.
An Sir chuan zirlai thar an neih thu leh lo kawm tlangnel ṭheuh tur leh, chu hmeichhe tleirawl hnenah chuan mahni inhmelhriattir tur chuan a han hrilh nghal zat a. Ani chuan aw zangkhai vah ring vak si lo hian, "Lalchhuanmawii ka ni a, 'Chhuani' tiin min ko thin. Ka pa an transfer vangin kum laklawhah ka rawn insawn a ni," tiin a chanchin chu tawi fel tak leh aw ngaihnobei tak hian a sawi a. Chumi ni chu a ni, Lalchhuanmawii leh Lalrindika te inhriat ṭanna chu.
An Sir chuan Chhuani chu Diktea leh Hruaia inkarah ṭhu turin a han hrilh a, an class master Sir Chhana hian hmeichhia leh mipa a inkarthlak vekin a ṭhut tir ṭhin a. Hmeichhe pahnihin mipa pakhat, mipa pahnihin hmeichhe pakhat an karcheh a, chutiang zel chuan a khat tawkin a inthlak kual tir ṭhin a ni.
Diktea leh a ṭhianpa Hruaia chiah hi hmeichhia laitat lo a ṭhu awmchhun an ni a, Hmeichhiain an daih loh avanga hetia ṭhu hi an ni bawk.
Chhuani chu a ṭhutna tur lam pan chuan a kal a.
Zirlai ho chuan Chhuani chu Hruaia nen chuan an lo dem fiam zui nghal nak nak a, an hlim dar dar hle mai; mipa ho chu an phawklek hle mai a, an awm hle hle thei meuh lo a ni ber mai. Kum laklawhah zirlai thar hmeichhia, hmelṭha bawk siin an class a rawn zawm thar a ni a, anni ang rual rawlthar phawk tak tak tan chuan han rikpui hlut awm reng a ni.
Chhuani chu Hruaia hmaah chuan a lut phei a, Hruaia kut chu a en leh zeuh ṭhin a, Diktea nen an inkarah chuan a ṭhu dawn ta a; Diktea chuan melh zoh pah hian a sir lamah a lo tawlh a. Chutih lai tak chuan Hruaia chuan a kut lek chhuakin Chhuani nghawngah chuan a lo kuah fiam a. Chutah le! Chhuani chu a ṭe ṭhawt a. Diktea lamah chuan a bawk phei ta rawk rawk mai a! Zirlai dangho chuan an lo nuih dar dar a.
Diktea chuan a malchunga Chhuani rawn bawk tur chu lo invengin, a kut a lo dawh a; mahse, eng nge thleng ta? Chhuani nauṭamtlei(hnute)-ah tak chuan a lo dawm ta chat mai le! Chhuani hamhaih chu reilote tak tak che chang loin a han awm a; chutah Diktea khabe hnuai aṭang chuan àng deuh phiau leh, phàwk deuh hra hian a rawn dàk chho a. An mit leh mit chu a intawng ta siah mai! Diktea chu a khur nghal deuh dar dar a, eng emaw, 'thil' amahah thawk a awm a ni.
Mipa rawlthar intipa ve tak a ni a. A ṭhiante'n ngaihzawng an buaipui sap sap tawh hnu pawha ṭhiante puaraka ṭan vel bak, hmeichhiat mipatna kawngah hmeichhia reng reng la belbul ve ngai lo kha a ni a. A hmuh tirh phat aṭanga a thinlung sàitu, chu hmeichhia nen chuan an inmelh hnai mah mah tlat a ni A hmeichhe duh zàwng tak nen vawikhat intawnnaah chutiang chuan an awm a ni a, a lai viau pawh chu a awm ve hle tho a ni.
Nichin deuh mai, an Sir-in a rawn hruai luh lai kha chuan mi thar hmelṭha deuh a hmuh thut vanga zàm deuh mai niah a inngai a; tuna a zàm dan erawh hi chu a dan a dang a ni! Chu hun rei lo te, mit khap kar emaw lek chhung chuan hmeichhia leh mipa induh tawnte kara awm thin héng: hmangaihna, thlakhlelhna, suangtuahna, beiseina, lungawina, lunglénna, lungvaihna, lunghnurna leh túr hlauhawm ber pahnih rinhlelhna leh thikna sualte hi, amahah a inchhung lut hman vek a ni tih hre tak ang maw le?
Hmangaihna hi zawng, a mawiin a nelawm si a. Mit khap kar maiah pawh a lo piang thei si. Tleirawlte hmangaihna ngat phei chu a thianghlim asin; Mahse, mi a tina thei takzet si! Chuti chuan tu mah rengin, a hliam an tawrh zet hma loh chuan an hnar phal si lo.
Chhuani pawh chu a bang bik lo e, a khur ve dar dar tho mai; nge ni Hruaia kut kha a hlauh em vang zawk em ni le? Chhuani chu a rawn harh chhuak hmasa ta zawk a ,"I kut hi," rawn tih sep pah chuan Diktea chu a melh zeuh a.
Diktea pawh a rawn harh chhuak ve nghal vat a.
A kut chuan eng thil nge a khawih a han hriat chuan a kut chu rang lutukin a la sawn nghal a ,"Ka...ka...ka tum a ni..a ni miah lo," a rawn ti bah nawk nawk mai a. Chhuani chu Diktea malchung aṭang chuan inbeng kangin a rawn tho a, a ṭhu tha zui nghal a. Chung thil thlen chhung zawng chuan an ṭhiante chuan an lo la nuih dar dar reng a; chu chuan an inkar boruak sosang hman tak pawh chu a ṭhelh dai hma ta hlauh a ni.
Hruaia hi kut pahnih búl a ni a. A kut hi a bàn, a kiu thlen hma ngúntàng vel bawrah hian a bul a. Accident-ah a inhliam vangin an tansak a, a vanduai hle a ni; Mahse, a vanduaina hi insalbeh tir a tum lo hle a. Tih theih loh hi neih a tum lo a ni tawp mai. Lemziak te chu thiam tak a ni. Lehkha pawh a thiamthei hle a, fiamthu a duh hle bawk; a kut hi miin an ràp deuh thin vang hian mi fiam nan tak hian a hmang ṭhin a. Chu chu a ni Chhuani pawh khan a ràp deuh a, a ṭhut dawn khan a melh zauh zauh reng a, Chu chu Hruaia khan a hriat vangin a lo fiam zui réng a nih kha.
Diktea chuan Chhuani chu a zah ru hle a; mahse, zak awm chuan a awm duh bik dér lo a. A hming te hrilhin a lo inhmelhriattir thuai a, chibai meuh erawh chuan a inhmelhriattir ngam em lo a. Chhuani pawh chuan nuih seih chungin a buk khum ve zauh bawk a. Chumi ni aṭang chuan Diktea chuan Chhuani chu a vei zui ta reuh reuh reng mai a ni.
----------------------
High School sport lai a ni a, sikul naupangte pawh an ṭang hle mai. Diktea te pawh pawlkua an lo ni ve ta. Hmun hran hranah inelna chu neih a ni a. Diktea chu inti pa ve tak anih vangin a ṭhiante an bialnute ina lenpui leh an puaraka ṭan bak, 'ngaihzawng neih,' tih lam chu Chhuani a tawn hma zawng kha chuan, ngaih pawh a ngaihtuah ngai lo kha a ni a. Chhuani pawh chu a thinlung leh a taksain ngaizawngin, a bulah chuan awm dante theihnghilh ṭhinin, a chhungrilin thlahlel ṭhin hle mah se, a pawhin a chhâi mai hreh tlat si a ni.
Chhuani chuan a haw lo tih leh a ngaina ve hle tih a hria. An mit han intawn chang a Chhuani lài, han talbuai ve nak ṭhin te pawh chu a hmuh hmaih bík lo; Mahse, a ṭhiante bulah, 'Ngaihzawng in nei a, hmeichhia tihlawm loh in hlau thei si. In pa lo dei dei em mai. Kei chu ngaihzawng ka nei ve peih lo,' a tih fo ṭhin vang te pawh nifahmiang. Tun thleng paw'n Chhuani chu nulat tlangval hawi zawngin a la kawm ngai lo. An mit erawh an inzawng ta emaw tih tur hian a intawng thei hle ṭhin thung a.
An sikul-in lammualah 'Foot ball' chawhnu lamah an khél dawn a. Chawhma lamah Zemabawkah 'Hockey' an khel bawk a. Zemabawk atang chuan lammual lamah Bus-in an in trip phei a. Bus chu a tawt hle mai.Ṭhutna an inchan lo a, mipaho chu an ding a. Chhuani chu driver hnung zawn seat a hma awl tlem awmna laiah chuan a thiannu Nutei nen an ṭhu a. An hma awl tlem awmah chuan Diktea leh Hruaia chu an ding a. Chhuani chuan invawnna tur kut nei lo zawk Hruaia chu sawm loin, Diktea chu a malchunga thu turin a sawm ta mauh mai!
"Lo ṭhu rawh, ka lo pawm ang che," a ti a. Mahse ,"Nute, Hruaia hi nang pawm la," a ti zui lehnghal zat a. Diktea chuan, "A ngai lo e, kan ding thei alawm," a ti nain, Hruaia chu Nutei malchungah chuan a ṭhu vei tharh ta mai si; Chhuani lah chuan a kut rawn phar chhuakin, Diktea banah chuan a rawn kai zui bawk si nen; Chhuani malchungah chuan a ṭhu ve ta nge nge a. Chhuani chu sir zawng deuh a han en pah chuan ,"Keiman ka lo pawm zawk ang che chu," a han ti a. Chhuani chuan ,"I ṭhianpa pawh a ṭhut hle hle hi, ṭhu ṭha ve hle hle teh," a lo ti a. A nuih seih bawk a.
Mipa zawk, hmeichhia han inpawm tir chu âwm lo viauin lang mah se, an ni ang rualah chuan a awm lo hran lo. Tleirawl inngamtlak tak tak rual an ni a, an inkawm nel em em bawk si. Hmeichhe ho ṭhutna an kian a, mipaho an ding far a. Mipa ṭhenkhat pawh chu hmeichhe ho chuan an pawm ve far tho a; an ri chél chúl bawk a.
Chung an ṭhiante ri chel chul karah chuan Diktea chu a ngawi ta kar mai le! Chhuani chuan a kawngah zen lutin a rawn kuah a, a chechang ngam ta miah lo mai; a hnung lama rawn do khal ṭalhtu chu eng nge a nih a hre chiang em a ni. Chhuani hnute chuan a rawn do a, Chhuani lah chuan ngaimawh leh hria ang pawhin a lang si lo. Diktea taksa lah chuan a hre ran tawh bawk si a, Nek nat loh hram tumin a ṭhu ngil hram hram a; mahse, bus han insawh zawng chuan Chhuani mal aṭang chuan a tawlh liam dawn zel si. Chhuani chuan pawm ṭhat pah chuan alamah a han kuah nghet deuh salh ṭhin a. Chhuani'n a han pawm ṭhat deuh apiang chuan a hnute chu a nék na zual leh sauh ṭhin bawk si! Chutia hnute nék nék ta na chu hnuailamin a rawn hre ve thuai a. A vaibel dàwn chuan nunna rawn neiin, harhtharna a rawn chang ta tlat mai le! Rúl fún ang ṭalh ṭalh a rawn ni ta mai le.
Rawlthar hrisel ṭha ṭeng ṭawng a ni a, atan insum tum eng ang mah se, thil theih a ni lo. Duh duha thunun ngawt theih a ni lo a, ngaihtuahna hmang a khap daih ngawt theih a ni tawh hek lo. Mahnia thuthlúkna siam fel ta ang mai a tihmawh leh luhlul a ni ta! 'Dak chhuak la, en vel teh' tih hla kha hre ve ta ang hrimin, chung lamah rawn dah chhuah a tum ve ta ur ur mai; Duat tak leh che sawn thei miah lo tura hrenbeh a ngai a ni.
Diktea chu a zak ru kher mai. Chhuani hriat chu a hlau si a, a thlanfim a tla lo chauh a ni e; Chutih nàkalai chuan, Chhuani kut han siam ṭha vel chuan a khak fuh leh zauh thin bawk si, Chhuani chuan eng thil nge thleng tih a hriat tawh ngei chu a ring a. Mahse, ani lah chu hre àwm in alang der si lo; A hriat ngei chu a ring tlat a ni.
Chutia zak tak leh hrehawm ti reng renga awm reng ai chuan, Chhuani chuan a hria emaw hre lo emaw, hriat phah dawn pawh ni se, Diktea chuan a rúl fun chu hrem zal mai a duh ta a. Chhuani'n a kuahna kut chu a sawn sàn sak a, duat em em ta chuang lo hian a roluahpuia chu a zuk rek ta; chunglam hawitir vahin, a kekawr kawng chuan a hreng bet ta hmiah a, thlamuang takin a thaw ta siai siai a. Chhuani chuan engtin nge a ngaih ang le? Tih pawh chu a ngaihtuah zui duh ta lo a.
Chumi nileng chuan Chhuanite ṭhiandun leh anni ṭhiandun chu an inzui ta a. Tudang an ngai lo kher mai. Vúrsen te eiin saràngah hairép nen an chiah a, tui an va ti tlang tak em! Diktea chu a hlim takzet a ni. A lo ngaihzawn ruk em em nen an inzui a, anin a lo haw bawk si lo; Chutiang tak chuan duh takte nen a len ho chu a lo nuam thei a ni tih reng a lo la hre ve ngai lo a ni.
Haw lam chu ke in an haw tlang a, Aizawl chhim lama awm vek an ni bawk a. Hawn kawngah te chuan inkai rial rialin an kal hlawm a. Tu dang an ngai mawlh lo e. An pali chuan an tlei tawkin an hlim tak zet a ni. Tleirawl inngaihzawnna hi chu a mawiin a thianghlim a ni. A rukte pawh ni se, a derin hmun a chang lo a, thinlung leh ngaihtuahna zawng zawng an inpe a, a lemin hmun a chang hek lo. Bumnate'n hmun an chang lo a, ngaihtuahna a péng bo thei hek lo. Thíknate lo piang ve bawk ṭhin mah se, tauh sanin a hmangaih chu a hlat san phal ṭhin lo a. A tan a hauh tlat a, a zawng zawng a hlan mai ṭhin a ni.
.........
Chumi zan chuan Diktea chu a inngaihtuah atalangin a muhil mai thei lo a. Chhun lama Chhuani duhawm zia te, ngaihawm taka a rawn melh a, biangsum lang deuh kalh a a han nuih seih ṭhin te kha! Suangtuah mitthlaah a hmu zui reuh reuh a. Amah zawkin a tih ngam miah loh, tum pawh a tum chhin ngam loh Chhuani'n a kut rawn vuana a kai te kha! Bàkah, Chhuani khan a nek talh talh ṭhin a nih kha! Chúng zawng zawng bàkah, a ngampat ve deuh hnu a ngam leh ngam loa a kawnga a kuah te paw'n a haw miah lo a nih kha.
Khang zawng zawng zawng te kha suangtuah mitthlaa chhui kir lehin, Chhuani chuan a duhve viau tho ni-ah a ngai a, Rizai hnuaiah chuan a khi leh sak ṭhin a. A chang leh 'Ṭhian ṭha ngamtlakah min ngaih vang mai mai a ni ang, ka rilru ang hi a lo pu ve kher lo ang' te a han ti rilru leh rih ṭhin. Chutiang zawnga a han ngaihtuah chang chuan a han thaw leh halh ṭhin bawk a.
Chhuani chu duh tak tein a duh tawh a. A bulah chuan awm dan pawh a theihnghilh fo a ni. An taksa a han innawk changa a awm dan, amaha nghawng a neih nasat theih dan zia te kha mak a ti a ni. Khatiang hmeichhiat mipatna kawnga inhipna kha a vawikhat tawnna a ni a, a khur hial anih kha! Chhuani'n 'ka lo pawm ang che' a tih a, a kai lui tlat te kha a han ngaihtuah nawn leh a; tichuan thuthlukna chu a siam ta a.
Chhuani chuan a haw lo a, a ngaina ve em em tho. An mit a intawng fo a, an mit leh mit a intawn chang paw'n eng emaw 'riau' a awm ṭhin a ni. Remchang a hmuh veleh a duhthu hrilh ngei chu a tum ta a.
Mahse, rilru kap deuhtu a la nei ta cheu, An chhungkaw dinhmun hi a inthlau deuh lo maw; Chhuani te chu an neinung a, vantlang chung lam mah an ni si a. An inah pawh a leng ve ngam tawp lo ang le, anni lah hmeithai chhungkua mai an ni a; Mahse, eng nge pawi, an induh tawn phawt te chuan. An chhungkaw dinhmun avanga ṭhiante zingah pawh inkiltawih fo ṭhin rawlthar thinlung hian a dàwn khawl tam lua em ni le?
Chutia a han ngaihtuah kual vak vak takah chuan mahni insitna in a thinlung ngaihtuahna a rawn rûn leh a; Mahse, enga mah hriat hmaa tlawm ngawt erawh chu a tum bik lo. Chhuani chu hmeichhe fing leh nungchang mawi tak a ni a, nu zàm mai, an vengte paw'n an fak rawn a ni a; a fel leh nungchang mawina chu a ni'n hrethiam loin, 'a duh ve emaw a lo ti ta mai em ni ang?' ti tein a han inngaihtuah hlauthawng leh hnuhnawh a. A mu thei lo chu a inlet a inlet ta mai a.
A tawpah zawng, 'a enga pawh chu ni se, mipa ka ni alawm. Naktukah emaw, remchang ka neih hmasak berah ka duh thu hi ka hrilh ngei ang' tiin, rilru a siam ta sauh sauh a. Zanlai pelh dawrhah a muhil thei ve ta hram a!.
A tukah chuan Brigade field-ah sport chu an neih chhunzawm leh a. Zuansan, zuanthui, bawlben, inhruipawh leh intlansiakah te an inel a. An ṭang hlawm hle mai; an sikul aiawhte ṭheuh chu ṭanin an au ṭe chelchul hlawm a. Diktea te ṭhiandun pawh Chhuani te ṭhiandun nen bawk an inzui leh dal dal a. Chanvo engmah nei ve ta lo chu field kotlangah ṭhuin an pawlte an lo au a, an ṭang ve hle ringawt mai a ni.
An au nasa bawk a, an hrawkte pawh a kham ta a ni ang, Diktea chuan, "Ka tui a hal hle mai, Chhuani, sàwlai Gurkhali bawng vulhte inah khan tui va in ang hmiang," a ti a. Chhuani pawh chuan, "Kei pawh a hal lutuk alawm, hawh u i va in ang u," a ti ve a. A ding zui nghal tharh a. A din pah chuan, "Nute, in inve dawn lo em ni?," a han ti a. Hruaia leh Nutei chuan, "Aih!" an lo tirual ṭhawih a. An han nui zui leh dar dar a. Nutei chuan, "Kan thlah fâl ang che u," a han ti hram a. Chhuani chuan Nutei darah a han beng taih a. Diktea nen chuan an kal zui nghal a.
An tui in tur chu an kal muang dun kher mai, Diktea chuan Chhuani chu a melh leh zoh ṭhin a. A duh thu chu hrilh ngei a tum a ni; Mahse, a sawi mai ngam leh ta tlat lo mai. Zan lama sawi dan tur a ngaihtuah khawl sa zawng zawngte kha an bo ta duak si a! Sawi dan tur chu vawi tam tak, chi tam tak a ngaihtuah lawk ṭeuh a nih kha. Sawi dan tur ṭha ber ni a a hriat pawh a vawng ṭha khiau tawh a nih kha. Ṭha tak tak pawh a hnawl nual bawk a; mahse, tunah a saseh a lo thlen meuh chuan an bo duak a, a kha achih leh ta tlat si chu a mang a va'n ang em! Ngam se zawng maw, hetiang hian lungkuai takin biahthu a han hlan tur.
'Ka hmangaih che'..tiin biahnem hlan che ila
'Kei paw'n ka hmangaih che,' tiin némte'n min chhawn mai teh la,
A aia hlu ka tan a awm lo'ng e
I mi ngaihsakna te'n mi zui zel se..
Ka thinlung en rawh, i tan hmangaihna leh thlakhlehna nasa tak i hmu ang,
Chungte chu hlir chhuak la, i kumkhaw tlai i ngah ngei ang.
A la bang chu kalsan ta la, lungvaihna chauh i hnutchhiah ang,
Tihian mi zawt ta la.. 'I lunglai khamtu chu a-i-emaw?'
Nang chauh ka vei ṭhin che asin
Tihian zawt ve ta che ila, 'Kumtluang chen in ka tan, ka tan chauh hian i vul ang em?' tiin.
Tui in chu an dil a, an in zawh chuan an let lehnghal a. An let leh lamah pawh chuan Diktea chuan Chhuani chu a melh leh zoh thin a, sawi mai dan tur chu a haihchham a ni; Mahse, hun ṭha chu bawhpelh erawh a tum tawh lo hle. Chutah, Chhuani kut chu a ban da da a, a chelhsak ta! Chhuani pawh chuan boruak chu a lo hai bik awzawng lo mai; a kun deuh hlek a, a kal muang deuh sawt bawk a. Chutah Diktea chuan zàm avanga aw khur deuh dar dar hian, "Chhuani,..ka..ka duh che," a han ti ban deuh chat a. Chhuani chu a pawt ding dat bawk a. Chhuani chu a melh ta ran a. Sawi dan tur a lo dàwn khawl ve zawng zawng te kha chu an bo zo vek tawh a ni.
Chhuani chu a la kun deuh chal a. A zám ve hle a ni ang, a khur ve der der a, chutah zah avang a dah pawh rawn dak chhuak ṭha ngam lo hian, "Kei paw'n ka duh che," a rawn ti ve ta sap a. DiKtea mitah tak chuan rei lo te a rawn en ve zawk a, a kun leh nghal daih a. Diktea chu a nghilh dup mai! A thin a phu zawih zawih a, a bíng mup mup bawk a. Mahni inring tawk zo lo zet; mahse a beisei ruk, a beisei ngam chiah loh ni bawk si, chutia a duhthusam chhanna a han dawng ta mai chu, rei lo deuh chu awmdan a lo theihnghilh hial a. Chhuani pawh a lém chuang lo e, danglamna tlangah an ding dun miau a lawm le!.
Diktea chu a han hawi kual thuak a. Tu man an ni pahnih chu an lo bengkhawn lem lo tih a hria a, chutah an bul lawkah chuan kawng peng tereuh te, a sir tawn tawn a thingbuk in a bawh deuh làk, bawngchaw sat ho kalna ṭhin niawm tak chhuk deuh euh euh a péng thla hi a han hmu a. Chulamah chuan Chhuani chu hmanhmawh takin a kai thla ta dar dar a. Thui lote an chhuk a, chutah an inkuah ta vawng vawng a. Diktea chu a zauthau hle mai; a la khur dar dar reng bawk a. Chhuani pawh a bang chuang lo, an inkar a inhíptawnna chu a nasa em a ni. Mahse, Diktea chuan inrintawkna tak a nei tawh a, Chhuani'n a lo dawnsawn dan leh a mitmenga amah thlakhlelh vena lo langte chuan amahah inrintawkna leh thlamuanna a siam a, zuam ta viau tihna erawh a ni lo. Tunah chuan a duh ber leh a lo vei em em ṭhin khan, a zawhna chhanna duhawm ber a pe ta si a; a thlamuang ta siai siai mai.
Chutia inkuah a an inpawm vawng vawng lai chuan Chhuani chuan, "Dikte, a zahthlak miin min rawn hmu ang e," a rawn ti chhuak ta sap a. Diktea chuan a chhang lo a, a kuahna chu a han thlahdul a; Chhuani mitah tak chuan a han en a, Chhuani pawh chuan a lo en let ve kiau a. Chutah Chhuani khabe phir deuh lek lekah chuan dawmin, a hmuiah chuan dimte hian lungchim em emin a han fawp ta a. Chhuani hmui chu a lo khur der der a, a lo chhanlet mai loh avang chuan a han chawl deuh det a. Chutah, a thiam tawk leh ngamtawk a uar hian a han fawp leh ta a, Chhuani chuan a rawn fawp let ve ta!
An zei dun hran lo. An inhíptawnna in a hruai ang zia zel in an infawp a ni ber mai. An uar dun tan tan ta hle mai, duhtawk an ngah a, an han inthlah meuh chuan thawk an la dun halh halh mai a ni; an mitah tak an inmelh ran a. Chutah, Diktea mitmeng chu rawn danglam hmasain, a han khi sak a; Chhuani hmui la khur der der, a fawhna vang a huh hnawm chap chu a han melh zauh a. Chutah Chhuani pawh a rawn pangngai ve thuai a. Mitmeng tal deuh tap leh zak sen ṭan ṭan hian, biangsum tlem lang hian a han nui vei seih a. Diktea tan chuan a va'n duhawm lungrun tehlul ém!
Diktea chuan Chhuani hmui chu a kut zungpuiin a han nulsak zeuh a. Chutah a kut chu a pe a, Chhuani chuan a lo vuan thuai a. Tichuan, thinlung chhungril a hmangaihnaa inzawm tharte chuan, chhungril a thlamuang leh lungawina nen, inkai rialin kawngpui lam chu an pan chho dun ta a.
--------------
Chhuani chu a rawn zi ṭiah ṭiah a, a rawn harh ta a. Diktea àwma la bei tlan chung chuan Diktea chu a han melh chho a, Diktea chuan a lo en reng a; Chutah a han nuih sak a. Chhuani pawh chuan a lo nuih let seih a; Mahse, an nuih zawng a za dun meuh lo a ni. Chutah Chhuani chuan a sana a han bih zeuh a ,"Ka va han muthlu rei em!," a han ti a.
Inbeng thawh pah hian ,"Tunlai chu ka mu ṭha lo takzet, ka muhil thei lo ṭhin a, zíng thawh tlai a theih si loh," a han ti niah niah a. Amah vek chuan "Ka delh sil vek lo che maw?," nui sen sen pah chuan a han tizui zat a.
Diktea chuan engtia chhang lem lo hian a lo en ran reng a. Chutah inchung lam chu melh chhovin thaw a han la vang vang zet a. Chumi hnuah a khumtlanga ṭhu Chhuani chu hmanhmawh miah loa melh leh vang vangin thawk a han la leh hap a. Chhuani chuan a lo melh ve ran bawk a. Chutah ,"Chhuani, kum sawm lai a ni tawh! Heti'a pasal nei loa i awm reng hi ṭha ka ti thei lo. Mahni inthiam lohna hlir in ka khat a ni," a han ti chhuak hram a; a thu sawi chu amah ngei pawhin sawi chhuah a chak lo tih chu, a hmelhmai leh awm danah chuan a lang reng mai.
"Dikte, ka ngaithla duh tawh lo. Thu ngai bawk kan sawi leh dawn..."
Chhuani chu a mittui a tla leh par tawh a.
" Vawi tam min nawr tawh a. Kei pawh ka inngaihtuah ve fo," a han ti a.
Diktea chu a lo meng deuh kawk a.
"I inghaihtuah fo maw?" Ama hriat tawk lek hian a lo ti sap a.
"A tak thleng tur chuan ka ngaingam ṭhin lo a ni. Nang chauh hi ka nuna mipa awm chhun leh ka hmangaih i ni asin, i hriat vek kha," a hmai hupa ṭap ṭiau chung chuan Chhuani chu a insut hlawp hlawp bawk a.
"Mahse, ka dinhmun hian nangnen chuan min phalsak ve tawh lo, a ni lo'm ni? Engmah ti thei lo, engkima buaipui leh tihsak vek ngai ka nih tak hi," Diktea chuan zawi deuh sap hian a han ti leh a. Chhuani chuan engdang a chhang lo hian ,"Aw, kan veng tal hi la inhnaih deuh sela a ṭha tur. I kiangah ka awm tam theih phah deuh tur a nia," a lo ti daih a. Ngaihtuah ding hmel fe hian tukverh a ṭanga ral hla taka tlang lo lang paw chúk chu a thlir pah vang vang a.
Chutah, fiah chang deuh fak hian Diktea chuan ,"I chhungte paw'n kei ang engmah tithei tawh lo ai chuan 'Rammuanawma nei rawh, i hlimna leh nawmsakna tur zawk a ni' an ti che a ni lo'm ni?" a rawn ti chang ta fak a. Chhuani chu a rawn lehhawi thuai a, a kà deuh hau bawk a. Chutah a kun deuh riai riai a, a kut elh niap niap pah chuan zawi sap hian ,"Dikte," a han ti zuai raih a.
"Hruaia leh Nuteite'n min hrilh vek a ni. A rim ngawrh hle che a ni lo'm ni? 'D' riallova a ni ngawt e' an tih kha," a han ti zui zat a, za lo zet chuan a nui lui hul hak a. Chhuani chuan a lo melh ngawih ngawih a. A kut vawnsak tum pah hian ,"Dikte," a han ti leh sap a. Mahse, Diktea chuan ,"In inhmeh ngawt ang chú," a han tizui leh hram a. An nui 'hu..huh' leh vel a.
Hruaia leh Nutei te khan Chhuani an khawngaih em vanga Rammuanawma chungchang kha hrilh an ni tih a hre reng; Mahse, mawlhtu a awm a, ti zawng hian a sawi chhuak ta mai a ni. A tum em em vang pawh a ni bik lo nain; heti reng reng a nunkhua chhiar hi zawng a ning ve tawhin, a dinhmun leh Chhuani a hmangaihna hian a buan chau hneh ve tawh em a; an nih tur lam lam nih rawih tawh mai a duh ut ut chang hi a tam ta ém atin a ni.
Chhuani chuan ,"Dikte, i ngaih ang kha eng mah a awm lo. Nang pawhin i awih loh tawp kha, kha i hmelah a lang reng alawm; ka nunah mipa dang an awm ngai lo nang chauh lo chu. I hria a, i hre chiang lutuk tlat; Len chu a rawn leng zing khawp mai, nula pangngai tan tlangval inleng lo hnar a biak chhiat ngawt thu a awm miau si lo a. Ka lo be lumlam ngai lem lo chung pawh hian lo len hi a ṭhulh phah duh chuang si lo a ni," a ti chhuak ve ta khawl mai a.
Diktea chuan ,"Pàn loah tho a fú ngai hleinem," ngeiawm rawng kai lam mah hian a lo ti zauh pek a.
Chutah meuh chuan Chhuani chu a ṭeu ve ta hlar mai ,"Engtin maw min tih a? I rilru a va chhe em em ve," ṭah chhuak aw lek lek hian a ti ṭiau a.
An pahnih hian ṭawngkam thiam leh biahthu han inhlan kur dup chi hi an ni lem lo a; An interek hrang ngai hek lo. An inthlakhleh viau a hunfal an neih paw'n, infawh bak chu kut invawnsak a ni leh mai. An inngaizawng tih pawh hi Hruaia leh Nutei bakah, Diktea chhungte chiahin an hria a ni. Mahse, chuti chung chuan an nghet dun em em si. Tun hnuah Chhuani nu'n a lo hre chhuak khawtlai ve a, Chhuanin Diktea a buaipui hi a duh loin a ngaithei ta lo hle mai si nen; Rammuanawma hi nei thuai se a ti ta a ni.
Chutah Diktea chuan ro deuh halh hian, "Lo inngaihtuah buai duh tawh suh. I nawmna tur pa chu nei la, min rawn tlawh tawh suh. Natna kan insiam tawn rei ta lua a ni. Ka na peih tawh lo," bul hmuk hmuka ṭawng chhuakin a ti ta bawl mai a.
Chhuani chunga thinrim a ni lo. A dinhmun chhe ta lutuk beidawnthlak zet avang hian amah leh ama chungah hian a beidawng em atin ni. Chu chuan a tithinrim thut a, a lo dàwn khàwl fo ṭhin tawh zawng zawngte nen, a insum thei lo a ni; Tunah tak phei hi chuan a insum duh lo a ni zawk mah e!
A hmangaih ber, a hlimna leh lawmna ber, a beiseina leh a chakna; khawvél nawmchenna leh ruihhlo ai pawha a thlan tàk, chu a hmangaih tana rinngam, rintlak leh innghahna tlak nih ngei tuma theihtawp chhuah a ṭan a lak lai a heti mai a han nita hi a rilru a na a, a thin te hial a rim phah a ni. Chhuani chuan mak tih hmel tak hian Diktea chu a han melh a ,"Nangmah vang zawk a nih kha hetia kan la awm," tiin ṭap chhuak lo tur chuan a hmui chu a pet fan fan a. A mit tui erawh a dang seng ngang lo a, a khap per sak sak mai a ni.
"Ni e, keimah vang vek," Diktea chuan a lo ti zauh a.
"Ka sawi awmzia chu i hria, i kiangah ka rawn awm ve mai ang, ka Chhungte'n phal dawn lo mahse, puitling ka ni a, ka thutlukna siamah min dan theihna an nei lo,' ka tih paw'n, nangman min la hnar zel a nih hi," a ti a. A ṭah chhuak lutuk chuan a duh ang pawh a sawi tir hleithei lo a.
"Aw, ni e, i ti alawm. Chutiang chuan i ti ziah alawm, mahse...,"
Chhuani chuan rang zet hian," Eng nge mahse...i tih chu?" a lo ti var a.
"À, Chhuani, ka nepzia hi mi hriat nawn tir fo lo teh. Khawngaihin min hawnsan tawh mai zawk la," a han ti ta bawl mai a.
Chhuani chu a thinrim kher mai. A rilru a nat hmel hle bawk a; a kut chu a hum ngat ngat a, a hmui a pet fan fan bawk a. Thinrim insum aw khur deuh dar dar hian ,"I tan hian rilru hrehawmna thlentu ka ni fo tih ka inhria alawm; ka tan hian nang kalsan che hi a harsa ve takmeuh tih lah min hriatpui duh der si lo; ka hmangaih che asin," a ti zawi sap a. Kun hniamin Diktea biangah chuan a zuk fawp zauh a. Khum sir dawhkan tea a bag dah chu ban pah chuan a ding nghal zat a, hmanhmawh zetin Diktea room kawngkhar lam chu a pan nghal ruak a. Kawngka kalhna chu a hawng nghal rawk rawk a, insút hraih pah hian a mittui a han hru zauh bawk a. Diktea kohna pawh chu bengkhawn duh tawh lo chuan a chhuak nghal ta nal nal a. Diktea chuan kawngkhar inkhar dawt chu a melh tlawk tlawk a. A nu in Chhuani a lo biakna 'i ṭap elo' a tiri te chu a hre pha reng a. Chutah kawngkapui inkhar ri khap chu a hre zui a. In chung lam bawk melh chuan a mu ngawi leh ta ran a.
'Àw, Chhuani, ka awm dan vel hi mi lo chîk chiang ngai em? Mahni induh tawk vena tlang ata i hnuhthlak hi. I zún suaiin a bual ât chalchàng talbuai awmdan chu ka awmdan ngei hi a ni a sin! Awmngaihna reng ka hre lo a, awm loh ngawt ngaihna lah ka hre chuang si lo. Theih ni se, keh darhin chumchi lengah te chang ila; nang bàwmah leng vel chem chem ila ka ti asin! Dinhmun a phet luatah thinlung a tawt changin, sawi tur leh sawi loh tur ber pawh thliar thei loin, i kiangah ka inhrithla leh si ṭhin. I mi hmangaihnaah hian ka lungawi a, ka dinhmun min ṭawmpui tur erawh chuan, (ka hmangaihna che a vangin) ka chhia leh ṭha hriatna hian a phal thei ngang si lo che a; Chhuani min ngaidam teh, awmdan tawk ka thiam thei lo a ni e.
'I chhíngmit mengmawi, Hmangaihna mit a min thlir chang hian, ka hlimna hian hàihlim a tia ṭhin asin; Mahse, ka han inbih chiang a, tunge ka nih ka inhre leh si ṭhin.
'Ka tan vanduai vanpui a lo chim a! Sakruang a mawi lo e, laitha a zam lo e. Sakhmelah dar a zam ta lo e. Lungduh nang ka kiangah i awmin, mahni insit a zual a. Ka hlatah i awm tur ka dàwn chuan e, lung ka phang leh si ṭhin! Hlimlawmna thalfangin thinlung chu sai fo mah se, ṭap chungin laikhum thlehnem ka bêl leh si thin. 'Hmangaihna chauh ka hmachhuan e,' tiin mahni insit ka bàng si lo.
Chhuani'n tap chunga a chhuahsan ni atang khan kum hnih hial a lo vei ta reng mai! Chhuani'n rawn lan leh tih reng a nei ta lo! Ani lahin biak pawh leh zai a rel tawh bik hek lo a. Zan khat chu thla a eng ngang mai a, 'electric' a awm bawk si lo. Thla chuan tukverh atangin a khum chu a rawn chhun eng ruih mai si. Diktea chu a lung a leng hle mai. A suangtuah ramah chengin, nunhlui a chhui kir neuh neuh a. Dam tha pangngai chu ni ve se, varanda-ah chuakin tingtang nen thla eng chu a lawm ngei ang.
Mahse, tunah zawng ramtuileilo leh rualbanlo mai a ni tawh. A pindan tukverh atanga lang thei tawk, ral hla taka tlangdung leh ruam, thla engin a chhun pawt ruih te chu, a thlir phak tawk an ni ta mai si a! Chhuani a ngaihtuah a, ani lah pualleng-a thlang tla an sawi ang vang vangin a reh ta mai si. Duhleng tawngin a lungdumtu val dang a tawng ta em ni dawn le! Tap chunga a chhuah san ni atang khan, vawikhat té pawh a rawn lang leh tawh miah si lo!.
Kumtluang tuahrem ka tiam ngam lo nang nen,
Cho har, rûnah len dun
Cholai d' lawhleng kha
Awi maw, vanpui lo chim
Cho rual a chang ta si lo maw!
Ngaihngam tein pawm rawh i lungtum vala chu
Ngaihngam te'n zanmu ka chhing ve tawh mahna
Lungvai lo'ng che awmkhua i har changin
Lungchhir a sawt lo e!
Ni lo! A ni thei lo ang. Tu dang tan mah 'ani' kha a phal thei ngai lo ang. Ani kha a hmangaih a sin. Mahse, khawnge a awm tak ang a, eng nge a tih tak ang le?.
"Chhuani, 'ka duhtawk tawh e, tuna ka awm ang hian ka lungawi tawk e,' i ti thei lo ang. 'I tum chiam lo' min ti thei hek lo ang. Khawi i hmun nge kan thlen tak hi le!.. Eng dinhmun nge kan din tak na hi? I beng bulah min phun tir leh sep sep ta che.. ka hmangaih che. I mita mittuite kha min hruk hul tir leh rawh aw. Ka lam lo hawi leh lul rawh. 'I tum aruh tawk lo' chu mi ti lulh suh ang che!." Diktea lungleng khawhar chu suangtuah ramah a vàn ruai ruai a ni ber e. Englai mahin Chhuani a ngaihna chuan a kiansan ngai si lo.
Beiseinate an dai tial tial a, bei erawh a ti dawng phal ngawt si lo. Chhuani lah a reh tlawk tlawk mai si! Che chhuak thei ni se, a zawngin, a ngaihven ngei ang le! Midang ani aia innghahna tlak zawk, hmangaih dang chu a tawng ta tak tak em ni ang le? 'Ka lo luhkhung mai ang che,' a tihte kha a sawi ve mai mai thin em lo ni le?.
An tleirawl lai hun te a ngaihtuah kai zel a. Aw, kha tih hun lai te kha chuan, mite ang bawkin an inhmangaihna kha a par a mawi a sin le. An tan khawvel kha a par mawi a sin..! Chutiangin a bumboh lai te chu a awm ve bawk a. Mahse, an chingfel leh mai thin kha a ni ngai a. Tunah zawng Chhuani chu a rehin a reh ta vawng vawng mai! Engtin, a theih zawk le..!?.
Engah kher nge maw kiansan tura a lo tih reng reng le? Amah a han inen a, Chhuani chan tur a han thlirpui bawk a. Mahni insitna nasa tak nen Chhuani tan phurrit a han nikumkhua tur chu a ngaingam thei ngang thin lo a ni. A damchhung leh a piahlam ram thlengin a kiangah awm se a duh alawm. Alak atangin a tir bo a, 'duhsakna' hming vuahin a hnawl a. A chakna nithin kha tunah chuan a chaklohna a lo ni kumkhua dawn ta em ni le? Zawhna hlir, zawhna hlir, chhanna a nei si lo!.
Tunah, a nundan mek te a han chhut neuh neuh a. Hmabak a va nei lo teh lul em! Thiante'n an rawn kan chang leh 'Whatsapp group'-ah te hlimna tur hmuh chang awmin, nuihpui ve bawk bawk thin mahse, ani a ngaih a bang thei tak tak si lo. Karloah biak tur leh kawm tur a nei lo a, suangtuahna kawmin, lunglengin a kûr leh thuai mai thin!.
Tunah chuan a taksa chaknate a lo tlahniam ta deuh nen, wheel chair-ahte pawh a thu thei ta meuh lo a. Khumah a mu chawt a ni ta mai si. Atan zing ni chhuak mawi tak leh tlaitla eng mawi tak te thlir theih a ni ta lo. Lungno kai chhuak thei thil a neih ber chu, 'love song' ngaihthlak a ni. A chang chuan a lungleng hian hla lungkuai tinreng te a khawn khawm a. Chung chu a kûrpui ta thin a. Mittuite hial a koh chhuah chang a tawng bawk thin! Chung chu chaklohna-ah kan puh sak dawn chuan, hmangaihna-a a chaklohna an ni.
Tuna a tih theih tawk chu TV en leh apiah tukverh atanga, ral hla taka tlang leh ruam lo lang paw ruih te chu thlir a, suangtuahna kawm melh melh te, inchung melh ran paha inngaihtuah veng veng te, emaw, ngaihtuah ber pawh nei chuang lo, rilru mang vek chunga inchung melh leh ngawt ngawt thin te an ni tawh mai. 'Thian' ti-a a lo chhal ve thin tam zawkte chuan ani chu an hre chang ta lo! Suangtuahna thian chauh lo chuan.
A chang chuan a rilru vak kual nasa lutuk tur vennan, mahni intiphur chawpin 'music hot' tak takte a ngaithla bawk thin a. Alu chauh tichein a bu vak vak a, 'ka lam e,' te a ti thin. Puitling hi a chang chuan han à lui chiam ila(a tha zàwngin), thawpikna hi a vai kian ve theih thin a ni. Nge, 'fing hlauh ila,' kan tizawk dawn? Amaherawh chu, puitling à tak tak chu nih duh loh tur. Mahni inkhawngaih hi mahni hrehawm lehzuala inhnuhluhna leh mahni inteitetna mai a ni. Chu chu hre ranin Diktea pawh chuan, 'hrehawm tuar aliamah mahni insiam chawp, hrehawm lehzual chu pumpelh zel tur,' tiin, mahni a infuih ve sauh sauh thin. Mahse, a va'n har thin si em.
...,....
Zanrei lamah chuan Hruaia a rawn lang hlawl mai! An inngam bawk a, a rawn phul lut hlut a. Ani pawh hian a rawn tlawh khat ta khawp mai. Nupui fanau neiin an indang tawh a. Inchhungkhur uap a ngai ve tawh a ni. Kawngkapui rawn kàn luh pah chuan, "In veng thenawmah sawn kan chhungte boral an awm a. Ka kal dawn a, ka rawn tlawh kawi hram che u," a rawn tilut bawrh bawrh a. Diktea pindana luh tlang pah chuan, "A-u, eng emaw te te hrilh tur che ka nei ania," a tizui nghal zat a. A-u ti hlir hian Diktea hi a ko a, Diktea ai hian kum khatin a upa hret zawk a. Diktea pawh hian 'Ek-a' ti bakin a ko ngai bik chuang lo.
Diktea chuan, "Ek-a, lo thu rawh, thih hun awmdan mawi a va hre lo ve. Mahse, min rawn tlawh phah a, a titha tho e. Lalpa'n in chhungte chu thlamuan rawh se," a lo ti fiamthu hluai a. A lo nui var var a. Hruaia chuan, "Thih hun sawi takah chuan, thih thuah leh dam thuah hi chuan thu kan nei lo teh e. Nang ngei pawh an thih khalh leh hnem tawh che em mai! Bakah, lungngaihna leh beidawnna vawrtawp tawh laia induhsak a, 'Pathian lam chauh hawi rawh, intichak rawh,' intih vak vak te hi a sawt pawhin ka hre lo. Beidawnna vawrtawp tawh lai chuan beidawnna phena beiseina kawl lo la eng tur kha tu'n an thlir phak thin rih miau si lo. An kiangah lo awm a, an nih ang anga lo tawrhpui thiam hi a tangkai ber. In ka hria," a tawpah a han ti ban chat a. A nui a. "Duah mai a," a han ti zui a.
Eng eng emaw an sawi zui a, rei thu lo chuan Hruaia chu a ding leh ta hluai a. "Ka kal ang e." a han ti zui a. Diktea chuan, "Aw! I thu min hrilh tur chu han sawi ve tho la," a lo ti vat a. A nui sàng bawk a. Hruaia chuan, "E! Ni tak, Chhuani'n naktukah pasal a nei dawn! Rammuanawma kha!," a han ti a. A ner zui deuh sawk bawk a. Diktea chu a phu dawrh thei hial a ni.
Hruaia chuan, "A-u, a àwm ve tawh alawm, tiraw," a ti a. Diktea chu a melh vang vang a. Diktea chuan a melh ngai a lo melh char char a. "Ka kal mai aw, naktuk zingah hawn pahin ka rawn râl ang che," a han tifiam hram a, a chhuak zui ta nghal a. Diktea chuan chhan pawh a chhang ta lem lo a.
Aw, Chhuani chu..! Alo hetih dawn vang hi em ni le, zanin zantir lam atang khan amah hlir mai a lo ngaihtuah ni ang le! Tunah zet chuan thenhlenna tur ni, kawlah a lo eng dawn ta tak tak e! Awmngaihna a va hre lo em.
Hruaia chhuah hnu chuan, a hna ngai bawk. Chhuani leh an nunhlui bawk ngaihtuah chuan, loh theih lohin suangtuahna thian bawk chu a kawm zui a ngai leh ta! Tawhsual a tawh hlimchhawn leh a dinhmun vanga a inngaihtuah sual chang te khan thih daih hial maite duh rum rum khawpin lungngaihna vawrtawp leh beidawnna a lo tuar tawh a. Hmangaihnaah pawh, beisei nei ngam lo, beidawng phal bawk si loa hun hei leh chen a awm hnuin. Tunah, a beidawn phal loh chhan ber chuan a tibeidawng hlen dawn ta e!.
'Ka kiansan mai thei lo che a ni,' a ti thin a ni lo'm ni kha(h)? Tawnmangah mai an chang dawn ta maw! A phal lo asin. Amah a ngaih leh lunglen a tawrh chhung chu engti'a rei nge ni ang le.. Aw, a damchhung nite hi chhiar zo ve thuai tak ang maw le.. Atana awm reng ni-a a hriat lai kha chuan, beisei sang lo mahse, a ngaih a ngamin a thla tal a muang thin asin! Aw, Pathian, ngati nge heti ang dinhmunah hian min din tir bik mai le!?.
Ni lo, Pathian chu a dem thei lo. Pathian meuh zawng ani dem rual a ni si lo. A ngam pawh a ngam lo a ni. A chhungril erawh a dam kim thei si lo. 'Tinge ka hetih bik,' tih zawhnain a thinlung a kap fo si.
A 'Biakfung'(phone) chu a han ban a. Muangchangin chhuani thlalak leh Chhuani nena an lakdunte chu a han en diat diat a. Chhuani'n eitur a barh laite chu ngun takin a thlek vang vang a. Chhuani thlalak pakhat tih chauh lo chu a nawtreh ta vek a. Chutah, tukverh atanga a hmuh phak tawk, ral hla taka tlang leh ruam, thla engin a chhun pawt ruih chu a thlir leh ta vang vang a. An nunhluite chu amah tihrehawmtu mai an chang tawh dawn si. Ngaihtuah loh theih a duh a, a la tibuai dawn chauh niin a hre si. Atana NUNHLUI NGAIHAWM LOH tak chu a ngaihtuah lo thei bawk si lo!.
Tunah zawng beisei tur reng a nei ta lo! Inchung melh a, nunhlui chhui kir a, suangtuahna thian kawm melh melh a, hui leh pap thin bak chan a nei ta lo. Suangtuahna chu a thian rinawm ber a nizui kumkhua tawh ang le! 'Hringnunah hrim hrim chuan 'mibeidawng' nih a tum bik lo fan e,' tih chauh a ni ta. Chu pawh chu thei tak ang maw le? Kha chen, 'ka nghak che, ka kalsan lo ang che' titu khan, engah tunah tang dang belh zai rel atum leh tak mai si le! Zawhna ngai hi a inzawt a inzawt mai dawn a nih tak hi.
Naupangin a nu a thlahlel leh a kiangah a thla a ngam thin ang mai hian, ani kiangah khan a thla a muang thin asin! Tunah erawh chuan a hmel takngial pawh a hmu leh ngai tawh lo maithei. Anin a rawn tlawh tawh awm lék si lo a! A thihni te chuan a la rawn hmu ve leh mahna? Thuro ang maia zaidam leh nunnem ni-a a lo hriat kha, atan a lo va râwng tak em! Ni lo, chuti zâwngin a puh thei lo ang. A va mak em nunkhua inher dan hi! Vawikhat, mahni leh mahni chunga a beidawn luatah, 'thinrimin', kalsan turin a ti a. Ani'n hun thaah a lo hmang ta mai em ni le? Arsi eng mawi tak, khawih fuh hleka boral thei ang maiin a bo hlen ta mai maw!?.
Mahse, a dem thiang lo, mihring a nive bawk. Beidawng ve thei a ni. A hma hun tih chhiat vek aiin, 'mipangngaite' kawng a zawh ve a nimai! A tawpah zawng hmangaihna chuan, hlingbawn hmunah a paih lut ta! Khati fakau a atana rinawm khan.. Engtin! A theih zawk le! Aw,.. Hmeichhia.. I hmangaihna..!!?.
A tawp ta!
Engtin awm zel imaw!.
Nun chu a hausa a
Mahse, a tawi lu deuh a ni
Mitkhap karah hmangaihna a lo piang a
Kawlphe angin a bo leh mai si maw?
Huntin mai hi ninawm a chang zo e
Ka lak ata i hla ta si
Hun reilote chhungin lungnihlohna a lo piang a
Kian zai i rel mai maw!?
Hlim chu a hlu a
Mahse a daih rei lo lu deuh thin a ni
Thlamuanna mi thlen lo a
Hahdamna min pe hek lo
Dawn kir changin ka na si thin
Ka ko atan phurrit a ni a
Thihna thlen thei natna a lo ni!
Tichuan,..
'Beidawnna khurah min paih lut suh,' ti ila
Mahse, mahse..ka tlai zo ta!
Lunglai chhir hian bàn bàk a pel dawn lo e!
Suangtuah mitthla-a'n rawn inlar tawh lo la
Helaiah hian i lemthla takngial paw'n lawm a hlawh ta lo e
Lungdamin i then ang aw
I lakah thinlung kha put ka duh lo e
Sual ka chhuah(sual lamah ka ngaihtuah) a thiang lo e
Mahse,..
Englai paw'n suangtuah ram i luah si maw
Tlaikhua a lo ngui a, zankhua a lo reiin
Tlaikhua ka varpui che a bàng si lo
Ka ngai, NUNHLUI NGAIHAWM LOH KHA
Ka ngen che aw malsawm khuanu
Thiam leh damte'n ka tuar ve nan
I dam i daawihlo min tulh la
Min hualin min veng zel rawh.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)