Hmangaih Vangin! Ziaktu: Ell Arr Ess Bc

Ngaia
Site Admin
Posts: 25813
Joined: April 30th, 2016, 4:07 pm

Hmangaih Vangin! Ziaktu: Ell Arr Ess Bc

Unread post by Ngaia » March 15th, 2021, 7:03 pm

9gzzsoln.jpg

Hmangaih Vangin!

(Competition 2021)

Ziaktu: Ell Arr Ess Bc

"Nu vawiin eng nge i lo an.?" Ka nu chau tih hriat zet kan pindan zîm leh chêp tak a mu bula thut thlak pah chuan in ka zawt a.

"Eee... Mambawih i lo haw tawh a ni maw... Ka tha a nia, min ngaihtuah suh" meng siar siar hian zawi te chuan a ti a. A hmel landan leh awmdan a tang chuan eng kan ang lo tih ka hmu thiam ve, mahse a fanu hi ka rilru a hah ang tih hlauin tha anga lan a tum thin. Kan pawisa neih loh zia a hria a, in enkawl na tur kan nei lo tih a hria a, a nawmsan loh pawh engmah a sawi ngai lo. Ka rilru a hah ang tih a hlau lutuk hi;ka rilru a na thin mi tam tak in sum hman sen loh an nei a.. Keini nufa erawh in kan mamawh ngawih leina tur pawh kan nei si lo!

Lalmuansangi ka ni a, ka nu nen kan khawsa. Ka nu hi Cancer natna in a tlak buak a, ka theih ang tawkin ka enkawl ve. Kan harsa em em a, mi inhnuai luahin kan khawsa ve naw naw a, ei leh in, inchhung khur mamawh chungchang ah pawh kan buai ve fo thin. Kum 12 ka nihin min hringtupa ka pa ngeiin min pawngsual a, ka nun zawng zawng a chhiat phah ka ti lo thei lo. Ka nu ka hrilh ngam lo a, tunthleng in ka nuin ka pa in ka chunga a thil tih hi a la hre lo! Hrilh pawh ka la tum chuang a, a natna nei nen a dawngsawng thiam dawn lo em a, a nunna hian a tuar mai ang tih ka hlau.

Pawngsual nih hi a na, hringtupa ngei pawngsual nih phei chu a nat hian a na ngawih ngawih! A tenawm bawk, vawikhat mai ni lo, vawi tam tak min pawngsual a, ka nu hnehah engmah sawi lo turin leh ka sawi a nih chuan ka nu nen a min thah a hreh loh thu in min vau thin. Ka la naupang ve bawk nen engmah thil tih dan mai tur ka hre lo a, ka ngawih bo pui tawp a, a rukin ka tap a, ka nun chhungril kha a hlim lo ngawih ngawih thin. Ka pa mizia chuan danglamna a lo, kei erawh in ka ten, min melh dan tenawm zet te kha ngaihtuah let a tan pawh ka duh lo. Lainatna, hmangaihna leh khawngaihna nei miah lo a, ka thianghlimna, ka tan a thil hlu ber min tih bawrh ban sak ni atang khan 'Ka pa' ti hian ka ko leh tawh ngai lo. Kha tiang mihring tenawm zet khan ka pa ti a koh hi a phu hlawl lo. Ka nu lah eizawnna vangin a buai a, ka pa kha ka koh leh koh loh pawh a hre lo a ni ngei ang, zawhna engmah ka dawng ngai lo.

Kum 15 ka nihin ka pa in ka nu a sazu meidawh san leh a, kan nufa in kan khawsa zui a, ka nu rilru na kha hmuh hrehawm chu ka ti mahse, kei erawh ka lawm thung! Min veng leh hlau thawng reng rengin nun ka hmang a, ka tan khawvel kha a ippik em vangin! Thih daih chak chang lah ka ngah mahni in tihhlum pawh ka tum fo thin.

Theih tawp chhuahin ka nuin min enkawl a, eizawnna a awl ai si lo. Ka school kalna a hau tak tial tial bawk nen ka nu rilru kha a hrehawm dawn lutuk. A taksa in a mamawh chaw tha eina tur a nei lo a, ei tur tui deuh nise ei phal lo in ka ei a tan min pe a Nu hmangaihna hi zawng a hluin a va ropui tak em!

In luah man pek tur neih loh chang kan nei a, ei leh in, mamawh neuh neuh a tam si, lakluhna tha awm si lo;chaw leh maian bai nen chauh a chaw kan ei chang a tam lutuk. Kha tih hunlai khan ka la â ve a, tun hnuah chiah hian ka hrethiam ve tak tak ka nu hi theihtawp a duat a, ei tur tha tha ei tir ve ka duh, min retheih pui zia ka hria a, mahse a dam lo thi lek lek enkawl na tur pawh ka thawk chhuak zo tha thum si lo. Kan nufa tan chuan pawisa hi van a rah ang a ni.

Class 10 kan exam hma deuh a tangin ka nu a in sawisel tan a, in entir tura ka tih pawhin pawisa a awm lo a ti zel si. A tuar tlawk tlawk a, a chang chuan ei tur zawng a chhuah peih lo chang a nei! "Nu.. Pawisa te chu kan thawk anga a awm zel dawn lawm. Dam a pawimawh ber" ka tih pawhin pawisa kan neih loh thu bawkin min chhang zel! Ka school kalna mamawh a sang si, ka nu hna thawk hlei thei lo bawk nen ban hial ka rilru ah a awm chang a tam. Mahse, ka nu in "zir hniam lutuk a tha ngai lo. Nakinah i tan a la hrehawm lutuk ang. Ka dam anga, pawisa te chu ka thawk chhuak leh dawn lawm" a ti tlat a, keimah ah beiseina sang tak a nei ve a, tih beidawn ka duh loh vangin ka theihtawpin zirnaah pawh tan ka ve bawk.

Ka nu chuan dam tih a nei thei lo, dam a hnêkin zual lam a pan zawk a, ka mangang takzet tawh. Cheng 700 a dah that ve tang tang nikhat chu form fillup na tur a ngaih vangin ka keng a, ka in ngaihtuah rauh rauh a, ka exam lo mai anga, pawisa hi thawhchhuah belh dan ka ngaihtuah a nga, ka nu enkawl nan ka hmang ang tih rilru pu in ka awm ta a. Mahse, vanneih thlak takin kan class teacher hnen a ka harsatna ka sawi chuan min lo khawngaih a, form fillup na tur leh exam mamawh tur min tum sak dawn thu min hrilh a, ka lawm zia kha! Tun thleng hian ka theihnghilh thei tawh lo.

Engtin tin emaw class 10 kal tluanin, tha takin ka pass ve a. Ka tan zawmna kawng a kaw tawh si lo, a rem remah ka in hlawh ve thin. Ka nu chiah eizawng tu ai chuan hlawh tlem te te ka neih ve chuan tlemin kan khawsak phung a hma ai chuan a ti zia ve deuh! A theih tek tek chuan ka nu pawh a chhuak a, mahse a chak vak tawh lo. A dam lo leh thut thut thin tichung chuan min ngaihtuah em vangin school kal leh turin min nawr leh hram hram thin. Mahse, kan dinhmun ka hre chiang a, kal tumna pawh ka nei tawh chuang lo.

Ka pawisa thawh chhuah khawl tlem te chu ka nu entir nan ka hmang a, rilru hah leh rilru natna tizual turin Cancer natna a neih thu in min thawng leh a! Engtin nge.. Khawi a sum in nge kei hian ka enkawl ang.? Ka rilru a buai mup mup a, tuna ka hlawh chhuah hi zawng a bei tham lu lai a ni...

Ka tih duh loh ber zing a mi ni thin mahni taksa hmangin sum ka lakluh phah ta. Ka nu ka enkawl theihna a nih phawt chuan engpawh ka ti ang, ka neihchhun a ni tlat si a! Ka thianghlimna ka hloh tawh vangin ka tan harsatna em em a awm lo. Tam tak chuan min dem ang; ni e, mahni taksa hmanga sumdawn te chu a tenawm lutuk mahse, engtin nge ka tih chuan ang sum ka mamawh a, ka sum hmuhna tur awm chhun ber a ni sia lawm le! Tanpui tu tha leh fuihtu nei ni ila, tiang a tenawm tak hian nun ka hmang bik in ka ring lo.

Ka nu enkawl a ngai a, ka sum thawhchhuah a beitham si a.. Vawikhat ka hna thawk haw zan dar 9 chho vel a ka haw chu Zodin phei ka thlen chuan hmeichhe pathum hi an lo awm a, an in daih loh tur thu sawiin min sawm ve a, ka nu zai nan sum tam tak a ngai bawk nen; hlawh a tam bawk nen pawi tih na ka nei bik lo. He zan atang hian a ni Ks/Call girl ka nih tâk ni. Ka nu in hria se, a rilru a na dawn lutuk, a nunna in a tuar hial ang. Mahse, engtin nge ka tih chuan ang ka sum hmuh thatna ber tur a ni a, enkawl lo a a thi liam mai mai tur ka hmu thei thlawt lo. Kha leh chen rethei, harsa leh hrehawm em em in min enkawl sei lian a, ka puitling ta cheng a, enkawl lo leh hrehawm reng reng in ka thih tir thei lo. Hmeichhe thianghlim ka ni lo bawk a, hlut tur ka nei tawh chuang lo.

A hausa deuh tawn fuh phei chuan zankhat ah singli nga hmuh chang pawh ka nei, ka nu pawh a hma ai chuan ei leh in turah ka duat thei ve ta. Damdawiin ah kan awm deuh chawt, min dawr tur an awm chuan chhuanlam siam in ka kalsan thin.. Ka vanneih ve na pakhat chu Nurse duty fel deuh ka tawng a, kan dinhmun min hriatthiam pui a, tih tur nei a ka chhuah hian ka nu min buaipui sak vek zel. Kan chhunga a thatna hi ka thawk tek tek chhung chu ka theihnghilh leh tawh ngai lo ang.

Mi tam tak chuan tun a ka nun dan hi min dem ang; duh leh min dem rawh se ka pawi ti lo. Ka nu ka enkawl theihna awmchhun a ni tlat. Min demtu chu dinhmun tha, rethei te dinhmun hrethiam lo tur khawp a dinhmun tha an ni ang. Chung ni lo ka retheih pui te chuan mahni in zuar ka ni chu tha ti chuang lo in 'a dinhmun in a zir lo ve em a ni' rilru lehlam tak chuan an ti ang.. Ni e, mahni in zawrh hi a tha miau lo a lawm, mahse ka tan a kawng awm chhun a ni miau si!

Mi tupawh an dinhmun leh nih na i hriat chhian hma chu an nun hman dan va dem ngawt suh.Mihring kan in ang lo kan harsatna hmachhawn thiam dan pawh a in ang lo. Tuna ka harsatna tam tak tawh hi mi pakhat tan paltlang awlsam tak a ni ang; chutiang bawk in mi harsatna kha awlsam tak a ka paltlang theih a ni ve thung thei bawk. Harsatna chu a tawng tu a zir a lian a tê a ni a, tupaw'n harsatna tawk ila a len leh a tet a pawimawh lo. Kan hmachhawn dan a pawimawh zawk!

Keima tawkah ka fimkhur a, in venna hmang lo chuan tu mipa mah ka mutpui ngai lo. Eng ang a pawisa tam pawh min offer mahse, in venna hman duh lo chu ka hnar thin. He mipa ka hmangaih ni tur a ka tawn rawn lan hma kha chu!

Rilru nat hmel zet mipa, kei ai a upat na a tam lo ang; pa lian tak a ni a, tih tak zet in min ngen a.

"Mipa thlianghlim ka ni. Pawisa pawh min dil zah zah ka pe ang che" a mitmeng a dawt sawi hmel a put loh vangin, hreh tak chungin ka pawm sak ta a. Kha mi zan a tang khan zantin deuh thaw min dawr ta ziah a. Mipa dang hun ka hman pui loh phah ta ni. Mi pakhat ah ka in pum pek tawp a ni mai ka duh ang zat sum ka hmu tho bawk nen!
An hausa ngawtin ka ring a lan a tang chuan, min mamawh hun ah min rawn hrilh a, hotel vel ah kan in hmu mai thin.

Zankhat chu min duh thu min hrilh a, ka awih thei lo. Ka nihna engkim a hre vek a, ani ang tlangval luck leh nghal in, engah mah ka ngaihsak lo a.

A in hrikthlakna ni mahila, min en hniam hmel a pu ngai lo a, min duatin min ngaihsak em em a, kei pawn ka ngaina ta thuai reng a, ka ngaihnat na chu duhna in a thlak a, duhna chu hmangaihna in a thlak leh a! Ka dinhmun ka en in ka kawp tur a ni lo tih ka hria, mahse zantin nupa ang mai a khumlaizawl a che tla dun nih chuan ka duhna kha ka zep thei bik ta lo. Kan in ngaizawng ta dêr a!

Theih tawp chhuahin Doctor te leh staff ten ka nu an enkawlna chu engmah a ni ta lo. Ka khawvel, ka neih chhun ka engkim chuan lei hrehawm hnutiang chhawn in lunglohtui min dâwn san ta. Nâ hi ka ti hmangaih chân nat zia hi, a tawngtu bawkin min hriatthiam pui ang. Pa hlutna hrethiam lo a, nu hlutna chauh hrethiam hmeichhia ka ni. Keimah lam atanga ka thlir chuan ka nu min laksak hi Pathian a sual ka ti a chhan chu ka hma ka sial vangin! Mahse, a mah ka ngaihtuah chuan lei ah hrehawm reng reng in a awm a, vanah hlim deuhin a awm dawn chu ka lawmpui tho bawk si. Mahse, ka ngaiin ka la thlahlelh a ni .

"Thanpui min kalsan mai rawh. Engtikah mah i chhungte'n min pawm thei ngai lo ang" chhungril na vawng vawng chuan ka ti a. Min duh lo hi ka dem lo, tu nu leh pa in nge mahni fapa nupui a tan ks/call girl ni tawh hnu hi duh tehlul ang.

"Ka hmangaih che ka tih kha! Ka hmangaih chu ka chhungten duh lo eng ang mahse, thlah tum na ka nei lo" luhlul tak chuan a ti a.

Ka nunhlui kha Thanpuia nu leh pa beng a thleng a, tum khat an in a ka duh lo chung min hruai luih in a nu in "Tiang hmeichhe tenawm lutuk hi ka mo a tan ka duh ngai lo ang" min tihkhum phiar phiar a nih kha, ka zahna khan van a tawng hial in ka hria! Khûk chem chem a khûk ral ka daih ka châk zia kha! Ka nun lo hman dan vangin ka hmangaih ka neih theih loh phah dawn ta. In chhîrna tlêm tê chu ka nei a lawm ka zep lo, mahse khang khan ka nun hmang lo ila ka hmangaih hi ka tawng lo anga, ka hmangaih ka nu ka enkawl thei lo bawk anga tun thleng hian mahni in dem a, rilru na reng rengin ka hun ka hmang ngei ang. Ka hmangaih nunchhan ka duh vangin mi min nuihsawhna tur ka ti a, leh lamah ka hmangaih ka tawn phah a, mahse in kawp rem thei tur kan ni si lo. Kan karah chun leh zua nunrawng an hrang si!

Tiang hun hi a la thlen rin na kha nei sa mahila, a hun a thlen chuan min den dan a dang zar mai. Ani chu ka tawn tur a khuanu ruat; ka ta ni ngai lo tur a duan a ni mahna!

Harsa ti hle mahila, ka thlah a ngai. Ka hmangaih zahawm na tur a ni si! Nge ka hma sial in ka vuan lui reng zawk dawn. Ka rilru a phir ve nuai mai. Pawngsual tawk lo ni ila, tuna ka buaina ah hian ka buai awm kher si lo a maw! Hlimna in min tuam ve dawn chauh a, lungngaihna chhum a zing leh nghal a. Hlimna hi ka tan a siam a ni ve lo nge ka ti hial. Beiseina tlêm te ka nei a, chu beiseina atang chuan beidawnna bawk hi a ni ka chhar chhuah leh thin ni. Beidawnna hi ka beidawn tir ve thei thlawt lo a nih hi!

"Thanpui nang chu ka phu loh i ni. Ka nunhlui vang a nih chu thuhran, sum leh pai ah pawh kan in thlau a ni" chhungril na vawng vawngin ka sawi. Thanpuia pawh a thaw hawk! Kalsan pawh ni ila, ani ang a min hmangaihtu hi ka tawng leh in ka ring lo.

"Min hmangaiha a tawk. Hmangaihna hian phu loh a nei lo chutiang sawi tawh suh" a ti bung vut a. Phal tak in min kal tir mai nise, a zia deuh tur!

"Ni e. Hmangaihna hian phu loh a nei lo. Mahse, hmangaihtu mihring hian phu lo kan nei si a lawm le!" ka mittui tla chu ka hru zeuh a.. Ani in min kuah vang vangin ka hnungzangah a chûl heuh heuh a.

"Engmah ngaihtuah tawh suh" a ti dam sup a.

Ka nu thil hlui ka khawm na lam ah lehkha them ka hmu a, chu lehkha them ah chuan tihian a in ziak a
"Ka fanu i nu hi min ngaidam rawh aw. Keimah vangin i nun zawng zawng a chhiat phah dawn ta si a! Mahse, ka hmangaih lutuk che ka fanu." tih te hi kut hnu phelh phang, ziak hlei thei lo tih hriat fahran hi a kawi niai a!

"Nu nangmah vang a ni lo asin. Kha ka pa hmangaihna pai lo mihring, i pasal vang zawk kha a sin" phun sep a ka tih chuan ka mittui a luang ngiai ngiai mai.
Ka nu khan engtin nge ka taksa hmangin sum ka hai lut tih a hriat ni ang tih chu ka zawhna a ni mahse, min chhang tu tur ber a awm tawh si lo.
A thihdawn pawh in rilru rethei bawk in maw a thih ka nu riangte kha! Kha mihring min khawih chhe tu ka huatna a zual leh sauh! A thi nge a dam pawh ka hre zui ta lo.

"Nu... Van atang i fanu hi min hmu em? Ka ngai takzet che... Tunah chuan hmangaihtu ka nei a, ka nun a hlim tawh lutuk a sin. Min rawn ngaihtuah suh aw" ka nu thlan hma ah thingthi in ka tap hawm hawm a

"Papa.. Maama a tap a nia" ka fapa tawngfiah lo zet in a pa a hrilh vat a. An fa in an rawn thu hniam a, min rawn kuah vang vang a.

"Nu.. Kan rawn tlawh leh vat dawn che nia" tiin ka nu thlan chu ka en vawng vawng a.

"Aapi Maama hian a ngai thei lutuk che a, a tap thin a nia.. Keipawhin ka hmu chak che" ka fapa chu a pa nen kan en a, kan nui suk..

Thanpuia hian ka hmangaih tluk zetin min hmangaih a chhungte'n min duh ngang loh vangin tlawm leh zah pawh dâwn lo in min luhkhung tawp a, a nu leh pa in an tuithlar phah hial! He ti khawp a min hmangaihtu ka tawng hi khawvela hmeichhe vannei ber ka ni ka ti ngam.

I mihring pui nunhlui a ni emaw an nun hman mêk kha a tha lo a nih pawhin dem nghal ngawt suh. Engtiang a nasa in nge a tawrh ngaihtuah hmasa phawt thin rawh. A duh vang reng a kawng sual zawh a ni lo ang. An pawn lam landan i hmuh vang ngawtin deriam ngai hek suh... I tanpui thei lo a nih chuan ngawi san ngam rawh.. I lo diriam a, i sawisel vakna khan a ai a dinhmun hniam ah a dintir thei tih theihngilh ngai suh. Diriamtu ai in tanpui tu an mamawh a, hmangaihtu leh ngaithla tu an mamawh ve a sin.

Hmangaihna dik chuan engkim a ti thei a, a dawhthei a, ngil a nei bawk. Ka nunhlui chu tenawm mahse hmangaihtu chuan Hmangaih Vangin
min theihnghilh sak a, hlimna tlang chhipah min lawn tir a ni.

I hmangaih chu eng ang a nunhlui duhawm lo nei pawh nise, rinawm tak a vawn tlat hi hmangaihtu tih tur a ni.

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)