HRINGNUN BULTANNA BY Lalrindiki Adikdoki

Ngaia
Site Admin
Posts: 25813
Joined: April 30th, 2016, 4:07 pm

HRINGNUN BULTANNA BY Lalrindiki Adikdoki

Unread post by Ngaia » September 18th, 2022, 8:24 pm

gfezd3wq.jpg



HRINGNUN BULTANNA
(Competition 2022)

"Tawlh deuh teh,a lum bawk si tháwk pawh ka thaw tha theilo" ka tih avanga lo mengrum em em Zuali chu a tawlh ve mai a, tawlh ti ila a che hrut a ni zawk mah.Ruah a sur chung pawhin Aizawl khawpui nge nge a lumin boruak a uap churh tho in ka hria.Ka scooty a chhiat avangin Bus tawt takah kan chuang nitin ani.

Stand dawt kan thlen leh chuan conductor lah chuan pawn lam ami te chu auvin lo lut turin a la ti ta deuh deuh zel a. A hnung lama ding ho tawlh hret tura min rawn tih chuan; "Bus hi a fán thei te anih ngawt loh chuan a tawlh theih tawhloh" Zuali chuan alo ti vin hlar a.

Zuali hi ka thiantha ber ani a, thingtlang mi ve tho a nih vangin kan inkáwm theiin kan in mil hle.Hnathawhna hmun atanga inhria kan ni a,mimal nun erawh kan inhriatthuisak lutuk lo ve ve ani.

Kan chhukna tur hmun kan thlen chuan kan chhuk thuai thuai a,kan thaw dun huai maiin ka hria.

Kei hi Rosangzuali ka ni a, thingtlang khaw té ve tak atangin Designing zir turin ka patea te bulah kum2 lai ka awm ve tawh a,tunah hian company ah designer niin hna ka thawk ve mek bawk.Hmeichhe harhvang tak leh thinchhe ve tak hi ka ni a,mizo hmeichhiaah chuan a sáng pawl chu ka ni ve in ka hria.Ka vun hi a háng lo a, ka hmeltha anih ka ring hmeltha min titu an awm dánah. Mihring inkiltawih leh zakzum lutuk, mahni dikna pawh sawi theilo khawpa tawng tlem ang kha ka ni hauhlo bawk.

Kum3 kal ta khan ka pa in cancer natna vangin min boral san a, ka pa boral atang kan chhungkua chu kan kehdarh ti ila ka sawisual lo ang.Ka pa boral atang karkhat pawh a liamlo ang tihah ka U in pasal a úm a, hnam dang a úm vangin haw pawh alo haw ngam lo a, a reh zui vawng vawng a ni ber.Ahnu lawkah ka nu in pasal dang neiin kan inchhungah a rawn hruailut a, ka pahrawn chuan nitin, tlaitin, zantin engtiklai pawhin ti ila ka sawisual lo ang zu a in thin a ka nu nen pawh an in hau ngun thei hle . Engtik atang nge ka hrelo ka nu chuan zu in ve alo ching chho a,tunah chuan zungawlveiah an chhuak dun ta a ni.

Ka nu chu a in thlak danglam nasa em em a,ka pahrawn nen nitin zu an in dun thin.Ka nu ka hriat thin ang kha ani tawh lo a,min ngaihsakloin awm velo ang maiin min ngai ani ber; min be ngailo a, hmangaihna mitmeng pawn min melh tawh ngailo. Ka pa leh ka U chu ka ngai thin hle.

Ka nu leh ka pahrawn chuan ka pa lungphun reng reng an ngaihsakloh avangin ka patea ka pa chhang chiah hi ka pa lungphun turin kan khuaah alo zin a, kan awmdan leh kan chhungkaw boruak a rawn hmuhin an hnena cheng ve mai turin min sawm a kan in chu a hrehawm ka tih ém vang leh boruak dang hip a intih thawveng ka duh vangin lungphun zawh chuan ka zui haw ve nghal ta ani.

Ka pa kha puanthui thiam tak ani a, a damlai chuan kan chhungkaw eizawnna ve ber niin dawr kan nei thin bawk. Aizawla ka awm tirh pawhin thildang engmah zir chhunzawm duh lo in puanthui te zir tha lehin designing lam ka luhchilh ta ani.

"Vawiin chu hna banah bazar-ah kal kawi lawk ila" zuali'n a rawn tih chuan nutein a fanu alo haw dawn tih a sawi ka hrechhuak zawk a.

Patea te fanu hi kei ai kum2 in a upa a, Delhi-ah awmin Company lian takah designer ani mek bawk.Helama ka awm hnu in a rawn la haw miahlo a,hmuh pawh kan la inhmulo ani.

"Patea fanu Delhi a awm kha a lo haw dawn a, vawiin chu a room tihfaisak te angaih ka ring" ka tihchuan a hnathawh te sawiin company lian tak tak a hnathawh ve kan chak thu chu sawiin kan titi dun malh malh a.

Kan titi tui dun bawk a kan hnathawhna kan thleng ve mai bawk. "Thingtlang nula pahnih pawh an lo thleng ve hram alawm, bus rim a rawn nam ka ti reng ani" kan senior Ukimi chuan ngeiawm tak hian alo ti nghal a." Traffic a jam deuh a" pha dai hian zuali chuan a lo ti nghal a, mi hi a ngeitheilo in min millo ve em em ringawt a, a pawi kan sawi pawh ni tawp silo hian. Keichuan ngawi rengin ka thutna lam ka pan san a ka chhanglet ve anih chuan kan inhnial a ni nghal dawn a ,vawiin chu inhnial mood-ah pawh ka awmlo ani.

Nidang ang bawkin mahni buai buaiin kan buai hlawm hle a, thla tawpah competition ang deuhin kan design te pho chhuahna hun kan neih dawn vangin kan buai zual tlang hle.

"Sangte, eng team-ah nge i awm?" phone en pah chungin zuali chuan a rawn ti a, gold team a ka awm thu ka sawi chuan silver team anih thu alo sawi ve nghal thuai a.

Tuna show kan neih turah hian kan company Designer zawng zawng te Team hnihah inthenin Silver Team leh Gold Team tiin an vuah a, kan company ah hian designer kan tam em em a, ram dang atanga zir chhuak leh thiam tak tak an awm nawk bawk.

"Competition a titha panga te kha JD Company lam khan an designing team-ah an lalut dawn an tia, theihtawp chhuah ve ang aw" a rawn tih chuan ka en nghal vat chutiang an sawi áwm ka lo hreve miahlo a tin ni. Chutiang company lian lutuk a thawhna chance a awm dawn anih chuan ka phur thar ve takzet bawk hlawh a that mai bakah an sawi ka hriat danin an company chuan an designer te thla tin show an buatsaihsak thin an la to zui, mahse tunlaiah mahni thiamna hmang ngei ngei pawn engmah tih theih tawhloh ,hmelhriat nei tha leh ram dang atanga zir chhuak ho hi an lak ka ring leh hnuhnawh.

Zuali bazar a kal kawi avangin mahniin phur lo takin bus-ah chuan ka chuang leh hna hna a, scooty ka tichhe kher kher hi chu bus tawt tawkah ka chuan angaih phah ziah bakah In ka thlen har phah ziah a ka ning ve det ani . Phone-ah hla playin earphone ka vuah nghal a, khaw lum leh uap lutuk chu ka mainitchhinsan vang vang a ; a vawh phah erawh ka hre chuanglo.

Vawi leh khatah tháwm a rawn awm huk a, mi te chu hnunglam en pahin an in hrilhru ser ser reng bawk. Engtak chu en ni maw ti a ka va hawi phei ve chuan mipa pakhat coat suit nena lo induang zaih mai ,palian ve tak hi a lo ding a, a hmel erawh sir zawng chiaha ka hmuh theih vang in ka hmu chianglo ani a kutah chuan mipa naupang kum4 mi vel amah ang chiah a sam kir hi a kai a, pafa annih ka ring.

"Daddy, kan chuanna hi a lum eee.." ti nang nang riah chuan ka hnung lawkah an ding tih ka hrethei ani. A chhandan tur ka hriatchak vang in ka lo ngaithla ve ker reuh a.. " Khawi , i kawrlum kha phelh ang kan motor-ah hahdam taka kan chuan theih laiin helai hmuna chuan i ngen tlat anih khaa!! a ding leh veleh kan chhuk dawnnia" a tih thum dut ri chuan ka nuih a tiza reuh tlat pek a, coat suit nen a fapa in a ngen vangin bus-ah an rawn chuang ve chu nisia ,hremhmun pate a ni ringawt ang, a lum ropui sia .

Ka phone lo ri chuan chu mite pafa ringawt ka ngaihtuahna tang min tiharh zawk a.

"Aw nute, ka lo haw mek a eng nge nita?" ka tih sep chuan Bazar-ah chawhmeh leikawi tura min tiin a off leh nghal daih reuh a. Bazar kan tlanpel tawh tih ka hriatchhuah zawk vangin chhuk dilin ka ding nghal mai, chutah ka hnunga ding pa áwmah chuan ka bei ta thlawp a, zak tak chunga ka han en chhoh chuan kan mit chu a intawng chiang kher mai ,min melh chhuk rúnin a mitmengah chuan mak tihna, lawmna leh sawitur nei hmel pu tak chungin min en ta ngar ngar a.

"Ka......ka tihpalh lutuk ,ka hmanhmawh lutuk a" bah deuh nawk hian insiamtha sek sek pah hian ka ti a. " Ka kawrah i make-up a kai vek alawn" ti pahin a in hrufai mawlh mawlh a. Chutah ka thin in a tuar leh ta pek lo "Ka pu, make up ka hmang ngai lo" mengkual ralh pah hian ka ti a, min ei loh hmel ngang mai, a chhanna pawh nghaklo in ka chhuk nghal a ka va hawi phei leh hram chuan an pafa chuan mitmeng hriatthiam har takin min lo en dun dauh dauh a.

Chawhmeh zawrhna bik chu pan ding nghalin a man tlawm leh to pawh ngaihtuah lo in ka hmuh hmasak sak ka lei a, a tul a ka hriat ka lei zawh hnuin hmanhmawh takin ka haw leh nghal a.

"Matei pawh alo thleng tep a, ei rawng chu ka lo bawl mai ang a room kha lo han tifai rawh aw" in chhung ka luh rual chuan nutein alo tinghal a, ka intihfai zawh veleh a ka tihfai nghal tur thu sawiin room -ah ka chho nghal a.

Ka patea te hi mi awmthei ve tak anni a, nutei hian Mc-ah thawmhnaw dawr liantak neiin an fanu,vawiina lo haw tur hi designer niin hlawh tamtak anei bawk. Ka patea erawh contractor niin Lunglei lamah tunah hian a awm rih a ni.

Ka intihfai zawh chuan Urinhlui room tifai turin ka phei nghal a, a room leh ka room inkarah hian mikhual room a awm bawk. Urinhlui room hi a zau ber a mahse ka hman chang changa ka tifai thin vang hian a bal lemlo ani.Chhuat chu nawtin a khumah chuan bedsheet thar hlak ka phahsak leh a ka zo ni nghal der. Inhnuaia ka chhuk leh chuan nutei alo awm loh avangin ka phone nghal a, Urinhlui hmuak tura akal thu asawi chuan a room pawh ka tihfai tawh thu ka lo sawi ve nghal thuai bawk.

Pangpar tui ka pek lai chuan nutei te chu an lo thleng a, Urinhlui chuan a chauh thu sawiin a room-ah a chho nghal daih a nutei chu bungrua vel khailuh puiin ka dahfel pui leh nghal vek bawk. Nutein chaw ei a duh tawh thu sawiin Urinhluii han ko tur chuan min ti a, chawhmeh te chhuangluk zung zungin han ko tur chuan ka chho leh nghal a.

Urinhlui chu khumah alo muhil a, a muhil chung pawh chuan a hmelthain a vun chu enkawl lutuk tih hriat tak hian a nung sar reuh a , chutia ka lo en reng lai chuan rawn harhin "Eng nge?" ti nghalin a rawn tho a, a aw lah chu a thinrim emaw tihturin nelawmna pakhat mah aneilo. " I á deuh ami?" a rawn tih leh chuan chhanglo in ka lo la en reng tih ka hrechhuak zawk a, ka átloh thu hrilin chaw ei kan duhtawh thu leh lo chhuk nghal tura tiin ka chhuksan leh nghal a.

Chaw kan eilai chuan nutei chuan patea alo tur thu Urinhlui chu a hrilh a, ka lo lawm ve em em ringawt mai ni, a chhan chu patea hi kan chhungte zawk a nih vangin a rawn haw chang hi chuan hetah pawh ka mihrang lo in ka in hre ve thin ani.

Chaw eina vel ka tifel a, thleng vel ka sil fel vek hnuin roomah ka chho nghal a, competition a hnaih tawh ém vangin inbuatsaih ka duh ve tawh ani. Ka designing book chu la chhuakin ka suangtuahna chu mitthla nghal vang vangin ka draw tan nghal a.

Ka alarm alo rik chuan ka harh zawk a, ka muttui hle aniang ka alarm ka tho khalh lo ve khiah!!! Ka luna leh ka hnungna ngut ngut avang chuan ka khumah ka mulo tih ka hrechhuak nghal a,ka dawhkanah ka lo muhil leh pek chu niin. Intifai zung zungin ei rawng bawl turin ka chhuk nghal a, nutei rawn tho chuan patea lo haw tur thu leh a awm ve reng tawh tur thu a sawi chuan ka hlim lutuk a ka luna leh ka hnungna ka theihnghilh vek hman tep ani.

Ei rawng ka bawl zawh chuan insiam turin ka chho nghal a, kawrfual dum khup chen hain pheikhawk pum ka bun leh tawp a, make up ka in hnawih ngaihloh vangin ka sam sei ve tak chu ka tawn sang vah a ka hman chu ni leh der.

Bus stand ah chuan Zuali'n min lo nghak leh rán tawh a,min hmuh veleh competition a huphurh thu sawiin kan titi dun bawrh bawrh a,kan hnathawhna hmun pawh kan thleng veleh mai bawk.

Nitin kan hun hmandan chu a ngai pát a, show kan neih hun pawh karleh mai khi ani tawh . Designer zawng zawng te kan thawkrimin kan tang hlawm vek a, a titha panga zinga tel a JD company a luhngei kan tum vek a ni ber.

"Vawiin chu mikhual kan nei dawn ania" choka-a lo luh pahin nutei chuan a rawn ti a, zawhna mitmeng chuan ka en nghal vat a, Urinhluii thianpa anih thu sawiin patea awmna min zawt nghal a, thenawmte inah a kal lawk thu ka hrilh chuan a inthiar zawha min rawn puih nghal tur thu sawiin bathroomah a lut nghal a.

Chawhmeh channa bal vel ka tihfai lai chuan door-bell a rawn ri a, kawngka ka hawng chiah tih a ka mi hmuh vang chuan ka lungphu chu a rawn rang nghal ringawt a,a mitmeng hriam hrák leh pá tak chuan min melh rún a hmani anglo takin coat suit a ha lo a, t.shirt nghawng V hain a chungah leader jacjet dum a ha a, jogger pants changtak hain Nike original ngei mai a bun bawk . "Ka lo lut thei angem?" a rawn tih thum dut chuan harhzawk in ka lu chu ka búk khum nghat ringawt a. Inchung atang Urinhlui rawn tlan chhukin lut turin a rawn sawm nghal zung zung a, kei erawh kawngka bulah ka la ding reng ani. Ka patea leng haw in ka nu ka phone ngai em tih min zawh chuan ka phone a chhán ngailoh thu leh kan inbiak hnu hnung bera a ruih ém vanga ka biak duh tawhlo thu chu ka hrilh a..

Chaw ei chhung zawng in Urinhluii chu amah anglo takin a titi siam siam reng a, a bula mi lah chuan ngaihven áwm pawhin a awmlo. Min rawn en leh zuk zuk thin vangin kei chu ka diklo zo a, chaw chu ka ei puar em pawh hrelo in ka kham ta daih a..An titi hmangah hepa leh Urinhlui thawhna company hi business partner anni a,Delhi lamah pawh an inpuitawn nasa viau ani áwm e.

Thleng ka sil lai chuan khuh kherh ri hi ka hria a, ka va hawiphei chuan kan mit a intawng chiang leh hle ,keimah hi ka diklo ka lai deuh reuh emawni leh nghal ni a mitmeng sawn min thunun ni berin ka hria. "I tawngthei em?" a rawn tih chuan min biakna pawh hre léklo in ka lo suangtuah kual ani tih ka hrechhuak zawk a, " maw...awwww? Engmaw i sawi?" bah deuh nawk a ka tih chuan mawl min tih hmel ngang mai.Bathroom awmna min zawtin pawn lam verandah-a a awm thu ka hrilh chuan a kal nghal ve leh mai bawk.

Thleng ka sil zawh veleh roomah chhoin competition ami tur ka inbuatsaih leh nghal char char a, gold colour nena inmiltur tak ngaihtuah angaih avangin ka titha ngunin a har ka tireuh hle.

Dar 10p.m velah tui la turin inhnuaiah ka chhuk a, sitting room lamah thawm a la awm avangin Urinhluii thianpa kha a la awm reng amaw ka ti a, Urinhlui lo zawk chu hmeichhia niin ka hre bawk si chuan ka va en a, ka mi hmuh avang chuan mak ka ti ngei mai Ukimi hian hetah daih daih eng nge alo tih ang le chupawh Urinhlui nen leh nghal ; an in kawm thin te pawh ni mahna ti a kalsan mai ka tum chu an thusawi avang chuan ka ding leh chiang hle.

"Competition-ah ka chak anih phawt chuan hei aia tam hi ka pe leh ang che" ti nghat nghattu chu Ukimi ngei ani. Ka enchian chuan pawisa a ni ngeiin ka hre bawk.Urinhlui chhanna ka hriatchak vangin ka la ding reng a," a tha alawm mahse tuman an hretur anilo ania , bakah endiktu turah ka tel tihte engtin nge i hriat zawk a,keipawn vawiin tlaiah ka hreve chauh asin" nui pah deuh hian ati a... Min lo hmuh ka hlauh vangin thawm dim thei ang berin roomah ka chhohsan thuai a.

Ka thiltih laiah chuan rilru pawh ka pe thei tawhlo , nachin maia ka thilhriat mawlh mai khan ka rilru aluah a, Urinhlui Designer thiam tak leh thleng sang tak ani tih chu ka hria mahse an company aiawha endiktu tura an thlan ém chu ka beisei lo a,chu ai mah chuan khatianga thamna alak kha ka beisei lo hulhual ani.

Zingah chuan chaw kan ei lai chuan Urinhlui chu inchei fahran hian alo chhuk a, patean a kalna tur a zawh chuan, a chhuah lawk tur thu leh an company aiawha endiktu tura an ruat thu sawiin a chhuak zui nghal a. Chaw ei chhung zawngin nutei chuan Urinhlui chu a fak char char a, an company tan a thawh hlawk zia leh ram dangah pawh a tha pawl anih thu vel chu sawi nuan ati hle .Nizana ka thil hriat zawng zawng nen keichuan ka hmuhdan a dang vek tawhin ka hria. Urinhlui endiktu tura a tanna tur show- ah chuan ka tel ve dawn tih pawh ka hrilh ta lém lo ani.

Hna kal tura ka insiam laiin Zuali'n min lo phone a, a nu a damloh thu leh an khuaa a haw nghal angaih thu leh competitionah pawh a telve theih dawnloh thu a rawn sawi chuan ka khawngaih reuh hle. A nu hi a neihchhun ve liau liau ani tawh a ni. " Lungngai lutuk suh, a dam leh vat mai ang....nangmah pawh kha in enkawl tha la, ilo chho leh vat dawnnia" ka tih chuan lawmthu rawn sawiin kan inbiakna kan titawp zui a.

Competition a tel theilo tur ka khawngaih rualin mahnia hna kal ka peihlo kher mai. Ukimi mawlh chuan ka rilru aluah a, a chetdan mawlh kha thing ka tiin ka nuihzat takzet. Hnathawhna hmunah engtin emaw tak minlo tih chuan nizana ka thil hriat zawng zawng kha ka sawichhuak vek ang ka ti rilru neuh neuh a.

Phurlo takin hna chu ka kal ve zel a, competition lamah rilru an pek hlawm ém vangin tuman min ngaihsak lo a, ukimi taknial pawh ka hmu ngailo ka huphurh ang aiin a hrehawm loh hlauh ani.

Kan kawr siamte ha turin model kan duhzawng kan thlang theilo a, company lamin min ngaihtuahsak dawn ani. Ka duhthusam ang taka ka design hnuin a material tur leh ka design mil tak tur puanthan chu company chhung dawrah ka zawng nghal a, ka duhthusam ang tak an kawlloh avangin basar-ah zawng turin ka kal a .

Dawr pakhata puanthan ka en lai chuan " saw laia mipa naupang sawn nachin a tang khan a en tawh che i hmelhriat em ni?" dawr nghaktunu in a rawn tih chuan a hawina lam chu ka en vat. Hmanni a bus chhunga ka mipa naupang hmuh ngei kha ani min en reng avangin ka nuih seih ringawt a ,chutah rawn tlan pheiin "mommy" fiahlo taka a rawn tih chuan ka hau hian ka lo en ringawt . Ka kutah rawn vuanin"mommy" a rawn ti nawn leh. Sawitur reng ka hrelo ka ding ngawi reng ,ka nilo lah chu ka tithei derlo leh nghal achhan chu min kohdan leh min khawihna khan min tidanglam tlat ani.

"Jayden, lo kal sawn suh ka tih kha , i pa pawh a lo thleng tep haw vat ang" hnunglam atang nuvalai ve tak hian rawn tiin a kai nghal dawr dawr a.

Ka ding ngaiin ka la ding reng a, ka ngaihtuahna a vak kual nasa ngang mai, kha naupang khan engvanga A nu amaw min ti nge anih le tih leh; mommy ti a minkoh khan engvangin nge keimahah danglam a awm , a chhan tur áwm ang lah chu ka ngaihtuah nasat poh/pauh leh ka lu chu a puak mai dawnin ka hria. Engdangmah ka ngaihtuah theih tawhloh vangin ka duhthusam ni chiah lo chu leiin ka haw nghal ta ringawt a.

Show kan neih hun tur pawh kan thleng ve ta mai a, ka zám deuh nge thawh veleh atang ka phil a, ka chebuai hle. Insiam zung zungin show kan neihna hmun tur building chu ka pan nghal a..Ka va thlen chuan rinai takin mi an lo tam tawh a,ka model zawng turin inthlakna room chu ka pan ding nghal a...Ka hmuh mailoh avangin ka rilru chu a hmanhmawh tet tet tawh a,vanneihthlak takin Silver team lam an in lan hmasa dawn a, an in siam suau suau na karah chuan ka model tur chu ka zawng pah zel a, show an tan mai dawn avangin ka beidawngin hotute office-ah chuan ka kal tawp a, ka model ka hmuh zawh veloh thu leh min ngaihtuahsak nghal tura ka tih chuan an phone nghal tur thu an sawi a.. Office atang ka chhuak chiah tihah ukimi ka hmu thut chu rilru hmanhmawh nen ka phu nasa kher mai, "i model tur kha......." a rawn tih chuan ka en nghal vat a," model dangin design nalh tak tak an hák dawn lai a, thingtlang nula design a ha bik tur kha a lawmlo a, a haw ta anih kha" ner pah nawka a rawn tih chuan sawi ve tur reng ka hrelo.. Ni e, design thiam leh lartak ka nilo a , ram dang atang ka zirchhuak ve heklo mahse he kawr siam tur hian ka thawkrimin ka suangtuahna zawng zawng a nei vek asin. Ka ngaihtuahna vang chuan ka tah a chhuak em em a, ka mittui a tla dawn a ka hriat vangin bathroom lam chu ka pan dawr dawr a, bathroom pindan bikah chuan lutin ka thu thla nghal hnawk a.

Ka suangtuahna, ka thawhrimna , mutmu pawh tuah tha hmanlo a ka siam, ka kawr ka phochhuak ve theilo tur chuan ka rilru a tina in mahni insitna min neihtir a, tihtheih engmah ka neilo te chuan min tithinrim hlur a. Ka design pawh hmu hmasa lo a a haw ringawt thei chu hriatthiam a har ka ti hle.Mi te angin design nalh tak leh material man to tak tak a chei nive lo mahse ka suangtuahna leh duhthusam kawr chu a ni ve tho asin tiin ka in hnít hlawp hlawp a..

Mi rawn lut thawm ka hriat avangin thawm dim takin ka awmna ah ka awm reng a, a in pindan a vangin min
hmu theilo ani. An thawm atang chuan mi pahnih anni tih ka hria a , chutah " Gold team ami thingtlang nu kha i hria em?" titu chu ukimi ani, ka chungchang an sawi a ka hriat avangin ka ngaithla kar a, pakhatzawkin a hriat thu a rawn sawi chuan " a model tur kha pawisa ka pe a, ka hawtir daih nihkha a titha panga zingah a tel ve anih chuan thawh ho ka paih tawhlo a keichu ka tling dawn chiang sia" nui har har paha a tih leh chuan ka inhumruh nasa hle, an thawm a awm tawhloh avangin an chhuakta anih ringin ka awmna tang ka chhuak ve nghal a. Ukimi'n ka model a haw tir chu ka thin a rim hlur a, hotute bulah sawi pawh ni ila ukimi zawk an tan dawn tih ka hriat avangin tihdan tur ka ngaihtuah pawn ka beidawng hle.

Ka hmai chu phihin darthlalangah chuan ka in en vang vang a, ngaihtuahna thar ka neih avangin keimah leh keimah chu in nuih seihin ka tihtur ang ang chu ka tinghal a.

" Khati zawng kha silver team lam atanga kan thlir theih anni a, an design te a mawiin model te pawh in an in hmeh hlawm hle mai, tunah chuan Gold team lam kan sawm ve leh anga , stage hi in ta ani e" thupuangtuin a rawn tih dap dap chuan kut beng riin a zui a, bathroom atang chuan ka chhuak nghal thuai a.

Mi min enna pawh ngaihsakloin stage lam chu ka pan ding ve nghal chawt a, model ho pawh chuan minlo en duh hle a, a thenin min nuihsang bawk.

An kawr hak aia ka kawr hak a nalhloh bikna ka hrelo a, ka tling emaw tlinglo emaw ka thawhrimna ka phochhuak ve tho ang tih ngaihtuahna chuan min tihuaisen a ni ber.

Ka hming zawnah ngei mai chuan ka han ding ve nghal a, endiktu tur ho ka han en chuan ka mi hmuh a vangin ka zám chhe nghal titih a, mitmeng hriatthiam har tak hian min lo en rún a, a thutna hma a thil inziak vang chuan JD company neitupa ani tih ka hre nghal bawk. A bulah chuan Urinhlui ngei mai chu a lo thu ve a minlo hmuh chuan mak a tih hmel ngang mai.

Ka hun a thlen ve chuan ka zám em em a, ka vawikhat tihna a nih vangin ka zeilo hle bawk ; ka design , keima kawr ngei alawm ka hak ti a intipaukhauh luiin ka huaisenna zawng zawng leh ka thiannu Zuali an khaw lama min hawsanta huaisenna tlém pukbelhin ka kalphei ve ta.

Endiktute hmaah chuan ka va ding ve ang rén ràwn a, pakhata lah khian min melh hlum a tum amaw tihturin min melh ang ngur ngur a, rei pawh dinglo in ka letsan leh nghal thuai a.

Gold team design kan inlan zawh hnuin Silver Team lam zawng zawng stage-ah an rawn chho a, chutah thupuangtuin JD company neitupa thusawi tura sawm nghalin kut bengin a zui nghal a.

Ka bula mite chuan JD company neitupa chu chhelo an tih thu leh pathlawi anih thu an sawi chuan mak ka ti ngei mai. Pathlawi maw lo ni, kha mipa naupang "mommy" min ti ringawt tu khan Nu a nei tawhlo tihna maw lo ni tiin ka ngaihtuah rauh rauh a. Ka khawngaih reuh hle.

" Kei hi JD neitupa ka nihna ang in, vawiin show a titha panga te contract kan sign pui ang ka tih chu, ka rilru thlak lehin titha ber pakhat chiah ka thlang anga, chu nen chuan contract chu kan sign ang" a tih thum dut dut chuan mak kan ti hlawm kher mai.

A titha panga zingah kha chuan beiseina kan neivek hlawmin ka ring a, a thaber erawh chu ka beisei ngamlo hrim2. Bakah ukimi khan urinhluii pawisa te kha a pe a, senior tamtak kan nei bawk a ka ti rilru neuh neuh a. A hrim hrimin chupa mai mai pawh chu panga thlang lo a, a thaber pakhat chiah a tih kher le tia thinrim taka melhrum ka va tum ve ringawt chu ka hlawhchham chiang hle.

Min lo en deuh thup a, mawl min tih hmel hlawm ngang mai.Ka melhrum tum ber ka va en chuan min lo en ve rún a, "Designer Rosangzuali Gold team, a titha ber i ni a, i lawmman i rawn la dawn lo em ni?" a rawn tih leh chuan ka hriatsual a maw tiin kal mai nachang pawh ka la hrelo a, mipui lamin kut an lo ben dur dur chuan ka harh zawk a, ka phei ve nghal thuai bawk.

Mak ti viau mah ila ka awilo phallo, ka lawm ém ani.Ka thawhrimna leh ka suangtuahna te an thlawn lo tih ka ngaihtuahin ka mittui chuan lo chhuah a chak zek zek a, ka dang buai peihlo; lo chhuak mawlh mawlh teh u tiin ka inhrilh phei sep sep a, hmanhmawh taka kalin ka hmaa mipa chu ka kuah ta vak ringawt a.

Mipui kut beng an reh ták thut avang leh ka mi kuahpa chu a nuih chetdawt vangin harchhuak zawkin ka thlah nghal a.

"Ka....ka tihpalh lutuk, ka lawm lutuk a" bah neuh nawk nawk a ka tih chuan " khaaa ..... I hmelah a lang vek alawm, i tap nasa lutuk a i make up pawh a pherhnuai mai" kiai suk hian a rawn ti a, thinrim a lak pawh ka thei tawhlo ka lawm ém em ani ringawt mai ni.Ka tihngaihna hrelo chuan ka nuih ver ver ta ringawt a.

Mi te chuan min chibai lawp lawp a, keive tehlul min lawmpui thiam lutuk chu ka hnuk te pawh an tiulh dawn lawm le!.... Ka design chu a simple ang aia a changkang reuh thu chu fakna ka dawn hnem ber ani.

Building kawta ka chhuah chuan khapa bawk kha a motor nghengin a lo ding a, min hmuh veleh ka lam lo pan nghalin; zanina contract chungchang sawifiah tur a neih thu leh an In a kal mai tur chuan min ti a, a kal leh nghal daih a.

Hlim takin In lam ka pan a, ka lawm ém a ka nui ver ver reng mai ni. Min lo hmutu thenkhat chuan mawl min tih hmel ngawt ta ve ang.

In chhunga ka luh chuan sitting room lamah an lo thu thap a, Urinhlui'n min lo pan nghalin " i va zaktheilo ve, mipui tamtak hmaah engtin nge Malsawma kha i kuah ngam zawk a, nang chu thingtlang nula i ni a i zaklo anih pawhin malsawma zahdan tur kha hrethiam ve ta che" a rawn ti khur khur a, a mitmengah chuan a thinrim takzet tih a hriat bawk. Min tihdan chu ka beiseiloh ém vangin chhan ngaihna pawh hreloin ka la ding reng a, " eng ang taka ropui nge anih pawh i hria em ni? Hmeichhe zaktheilo lutuk hi ka ngaithei thaklo ania, engtin nge competitionah te khan i tel ve ngam zawk " a rawn tih chhunzawm leh nghal bawrh bawrh a, " eng ang taka ropui nge a lo nih bik vaka, JD company neitupa a ni tih chu ka hria, A nihnaah ka zah em em bawk . A titha bera min thlan avangin ka lawm lutuk a, ka kuah mai anih kha" ka ti ve tawn tawn a.
" A titha panga zingah khan tel pawh i tel phalo, midang zawngin kimtei kan thlan laiin engtin nge nanghi a thlan theih che;Nanghian company neitupa ani tih i hriat avangin ilo thlém zawk em ni? Thingtlang nula tih awm tawk lek lek ilo ti em ni? Contract i sign a nih vaih chuan he In atang i chhuak nghal ang" a rawn tih leh chuan ka insumthei tawh biklo " Nang, mi hnuaihnung ang lekah em ni min ngaih, i pawisa dawn kha ka hrelo a maw iti em ni? Kha kha thamna anihloh chuan enge?" .... Ka biang a ri nghal sawk a,nutei chu kan bulah engtiklaiin nge a lo thlen phei hman ka hrelo...Ka biang chhahmup leh sa vut vut vang chuan ka mittui a tling pam a,.. "Nang ve mai mai hian engtin maw ka fanu i sawi?....Chhanglét ngam tur pawh kha i ni em? Kan chubga lawm zawk tur si hi awmdan chintawk hreleklo a i awm le he In atang hian chhuak nghal ang che" thinrim hmaisen teuh chungin nutei chuan a rawn ti tawn tawn a, ka mittui lo tla tur dan tum chuan ka inpetruh fan fan a.
Ka ding ngaiin ka ding reng a, nutei chu ka en tlawk tlawk ani ber, kut min thlak mai bakah chhuak tura min ti ringawt thei chu mak ka tiin ka rilru ana hle , patea ka va en chuan a hawisawn nghal daih a rilru na takin room lam ka pan nghal a.

Khumah chuan bawkthlawpin ka tap khur dar dar a, ka pa ka ngaizual takzet ani. Ani chu la dam nise helai hmunah hian awmin henghi ka tuarlo tur tiin ka inngaihtuah lungpuam a.A changin ka nu ka dem a, a changin ka pa boral hma bik lutuk chu ka vui a.

Ka tap muhil ani ngei ang ka phone lo ri chuan min ti harh a, min lo call tu ka en chuan number hlang anih avangin tunge anih ka zawt nghal a, Kan khaw lama kan thenawmnu nu pari lo niin ka nu apumnat thut avanga aizawl lam an lo pan thu leh Hospital an thlen tep tawh thu a rawn sawi ta mai ; ka nu chu a that leh thatloh zawt nghalin hospital lam ka pan ve nghal tur thu ka sawi a.
Ka nu chu engvanga pumna nge chiang takin ka hria ani, vawitam zu in tawhlo turin ka hrilh a,ka pahrawn vangin a in zel a, kháng kum2 chhungzawng khan biak pawh min lo be ngailo .A lakah lungawilo viau mah ila natna a tawh meuh chuan ka ngaihtuah takzet ani.

Ka tah nasat ém vangin ka mit chu a bui lúk a, ka hmai pawh ka phih tha zing hle ,insiam sawk sawkin nu Pari sawina hospital lam chu ka pan nghal a,ka tglen chuan hospital kawtah nu pari lo ding chu ka hmu nghal a, va panin; ka nu enge a an ti a ka zawh chuan test hrang hrang an tih zawh chiah thu leh enge result a la hriat bikloh thu in min lo chhanga.Hlauthawng lutuk lo tura min hrilh in a chhungah chuan kan lut nghal a.

Ka nu chu khumah a lo mu zawi ngiai a, a cher hle bawk. Ka pa damlai ka ngaihtuah chhuaklo theilo , ka nu leh pa kei leh ka U hlim takin kan awm thin .Ka nu hian zu in chu sawilo hetiang lam hawizawng reng reng hian a awm ngailo. Tuna damlo khuma mu mek hi ka nu kha a ang tawhlo takzet ,thisen neilo tih hriat takin a dawldang em em bawk .

" Nu, tinge kumhnih chhung khan min lo biak ngai miahloh min ngai ve miahlo em ni?" Ka rilru a awm hmasa ber chu ka sawi tawp a, " Bawihte, ka ngai thin lutuk che lawm, lo kal hnai teh i damtha em?" a rawn tih chuan ka pan phei rawk rawk a, ka kuah nghal thlawp a.
"Nu, zu in tawhsuh ka tih kha, ka pa khan tiang hian hmu ta che sela engtin nge a ngaih che nga" ka ti leh tawn tawn a ni ber , la duhtawk mailo chuan a hmaia hliam vel chu a neihdan ka zawh chuan a nui tawi tak ringawt .Ngaihdan erawh ka nei thiam mai mahse, ka pahrawn thlavang a hauh lutuk leh a chhiatna lai a ngaithla duh miahlo te hian min ti thinrim ani.

"Nu tunah i eng ber nge na?" ti a ka zawh chuan engmah na a neih tawhloh thu in min chhang a.

"Zuala pawh hi a ngaihtuah miahlo che em ni?" Nu pari'n ka nu bula a tih chuan, ka nu chuan engmah sawilo turin a lo mitmei nghal thuai a, ka nu damdawiin hruai ngai khawpin a awm a, a lo telve miahlo erawh ka lawm rualin mak ka ti hle ,ka pahrawn chungchang ka hriat peih bik vakloh avangin ka zawtlui duh ta biklo a, khawiah emaw a chatthla leh daih tawh anih ka ring.

Thil ka hruat theih tirh ata ka pa khan zu a in áwm ka hrelo, tuna ka pahrawn hi ka nu hian engtin nge aduh theih ka hrelo ,tunah chuan pasal a tglan fuhloh avangin hmuh theihin a chhe rawp rawp ani ber.

"Pi zonuni chhungte in awm em?" Doctor in a rawn tih chuan a fanu ka nih thu in ka lo chhanga, a officeah hmu nghal tura min rawn tiin a chhuak zui leh nghal a.

" I nu hian engtik atangin nge zu a in?" Ka va luh rual chuan alo tinghal a, "kapu, kum2 chu a chuang tawh ang" insehruh chunga tiin ka nu chu a that leh thatloh ka zawt nghal thuai a.

" I nu hian cancer a vei mek a, stage tawo ber a ni tawha enkawl ngaihna a awm tawhlo ani,a pawi ka ti khawp mai" a rawn tih chuan ka nghilhdup thei,ka tha te chu a khur hlawk hlawk bawk. " Ka pu, damdawi tha tak chawhin in enkawl dam theilo em ni?" ti a ka zawhna chu a theihloh tih hrechiang ber tu ka ni .Ka pa kha cancer natna a nei tih kan griat tirh khan a stage pawh a la hniam a, kan ouanthuina dawr kan chhungkaw eizawnna ve ber hralh hial khawpin kan in enkawl a, a damzo chuang silo ...."Mami, eng ang chiaha hrehawm nge i tawrh ka hriatpui lo che mahse, natna te, damna te kan thu ani silo ani" a ti dap dap a.Ka pawmthiam viau erawh ka hre chuanglo.

Nu pari'n chanchin min lo zawt vat a, chhang pawh ka chhang tha theilo, ka nu chu pan nghalin "Nu ka U hian a lo be ngai che em?" ka ti nghal ringawt a..."i u ve hi zawng ram dangah pasal a nei a, theh hmeh ang hmak a reg vang vang mai ni , kan inbiak hnu hnung ber kha chuan an damtha a,tunh chuan an number te pawh an thlak tawh in ka hria,; tinge i u chungchang chu min zawh thut a, eng nge ka result ni ta,damdawi te min chawh nga kan haw leh nghal mai ang ti raw?" a rawn ti zung zung a, chutih lai mekin ka phone rawn ri chuan ka patea te chanchin engmah ka la hrilh lo tih ka hrechhuak a,pawna phone ka hman lawk tur thu sawiin ka chhuak ta daih a.

"Engvangin nge zaninah i rawn kalloh ? Kan company nen a thawhdun chu i duh lo em ni? " Phone ka lak ruala rawn ti nghal tu chu JD neitupa ani. Contract chungchang sawi aduh vanga zanina an ina kal tura min tih kha ka hrechhuak zawk ka lo theihghilh pek chu niin . Ka thil tawn vel vang hian ka phurna zawng zawng a bo veka, bakah khang thil zawng zawng a thlen tawh hnuah engtin nge nutei leh Urinhlui te ka hmachhawn ngam tawh ang; tunah lah ka nu damlo bawk nen . Ui viau chungin an company a ka thawh theihloh tur thu chu ka sawi a, enge maw ri bur in a zawm a line a in cut nghal daih a. Tunah khan Ka duhthusam ka hnawl zo chiah tih chu ka rilruah dah duhlo in ka nu damlohna ringawt chu ka dah lui a , thawk erawh ti ipik zualtu mai ani.

Nu pari chuan helai bul hnaiah chhungte an neih thu leh a riah tur thu sawiin a fate a ngaihtuah tawh vanga naktuka haw nghal mai atum thu a sawi chuan lawm thu te sawiin kan in thlah liam a.

Ka nu bula ka let leh chuan pawisa a neihloh thu leh riak kher lo a, damdawi in chawh tir mai a duhtawk thu alo sawi a..
" Nu, lungngai mah ta che ,ka awm a ka patea te pawh an awm a, keipawn pawisa khawl ka neive a lawm .Doctor ten awm tura an tih chen chen che i awm ang" ka tih chuan tap mai tur hmel a pu a, " Nu i in thlahrung em ni? I fanu ka nih hi" ka tih chuan a insut ri hraih a .

"Bawihte, khang kum2 chhunga ka lo biak duh loh na chhan che kha i hre duh takzet em?" a rawn tih takdaih avangin ka hamhaih zawk angreng hle ,ka hriat chak ber thin anih avangin ka lu chu ka bu ta nghat a.

"Bawihte, ka fanu ini velo" a rawn tih chuan "Nu, i á em ni? I damlo tih chu ka hre tho a ,i hriatna a khawihpawi tel em ni?" tiin ka pan nghal rawk rawk a.

" Bawihte , ka natna hi engchiah nge ka hrelo mahse ka taksa ani a ,rei ka daih tawh dawnlo tih chu ka in hrethiam ve ania chuvangin ka thil sawi tur hi ngun takin lo ngaithla ang che" a rawn tih chuan ka lung chu a ohu dep deo tawh a chhanchu ka nu hmel hian fiamthu thawh hmel reng a pu silo.

"Bawihte, i pa nen khan fa pakhat chiah kan nei a, chuchu i ú hi ni" a ngawi leh dat a, keichuan sawi tur reng ka hrelo ka en mawl tawp ani ber. " Tlai khat chu i pa hian a rawn hruai haw che a, naupang hmeltha tak kha ini sin. A fa inih thu sawiin a enkawl tawh tur thu che leh fanu ang chiah a ka en ve ngei ngei che a ngaih thu a sawi a, hun reitak chhung chu kan in hauh phah in kan intithiamlo ngun hle .Min uire san vanga rilru na chu sawiloh ka fanu anga entur che in min la duh zui a .Naupang engmah la hrethiamlo kha i ni a, i u lahin a ngaina nghal em em che a ,mahse keichuan ka hmuh apiang chein uire san ka ni tih ka inhriatnawn thin vangin ka haw em em thin che " en pawh min en tawhlo in tukverh lam chu a hawi daih a , ka thu hriat khan min thawng ém vangin keichuan ka nu chu ngawi rengin ka en tlawk tlawk ani ber.

" Nangchuan min ngaina in , i U aipawhin min ngai zawk hial thin a, hun a kal zel a keipawn ka ngaina tial tial che a.nangman i zir ém vangin hmangaih loh che kha i har ani.Mahse, i pa thihna kha ka tuar em em a, a thihna ah khan puhtur zawngin " sawi zolo in a tap zawih zawih a.." Hmangaih inti si che khan i lakah engthil nge ka tih tak ? Natna khuma ka mut meuh chuan ka ril a rah ka fanu ai pawhin min ngaihtuah zawk si" a tih leh meuh chuan ka insum thei tawhlo tap hawm hawm chungin ka kuah a," Nu , ka nu neihchhun i ni a, nu dang ka mamawh lo a ka nu i ni reng ang. Nu, i kiangah ka awm tlat tawh ang khawiah mah ka kalsan tawh lo ang che ,...Nu, damdawiin atanga kan chhuah hunah pawh i rualin ka lo haw ang" ka ti hlawp hlawp a. A natna a hneh emaw hnehlo emaw, ka pahrawn zurui hmuh nitin ngaiin a kamchhe tleuh nan min hmang nitin mah se ka nu damchhung chu a kiangah ka awm tawh ang tiin zui haw ngei pawh ka tum ruh hle .

Engmah pawh sawi tawhlo chuan kan in kuah hle hle a. Zanriak tur kan nih thu hrechhuakin eitur leh kan mamawh tur ang lam turin ka chhuahsan nghal a.

Eitur ka pack tir lai chuan patea te chan chin hrilh ve tumin ka call a ,a lak theih mailoh avangin nutei chu ka call leh a; ani pawn a lak bikloh avangin an mu tawh ringin ka ti nawn duh talo a.

Dawr atang ka chhuak dawn chiah tihah ka ohone a rawn ri a ,patea te annih ringa kan en chuan ka nu zawk alo ni .Ei chak te a nei anih ringin ka la thuai a,chutah lehlama mi chuan nurse a nih thu sawiin ka nu an chhanhman loh thu an rawn sawi ta mai.

Hospital lam chu hmanhmawh takin ka pan a, ka khur nasat em vangin ka duh ang pawn ka tlan chak theilo .Ka va thlen chuan ka nu chu ICU atang an rawn zawn chhuak mek a , pan hnai rawk rawk in ka kuah a, ka ko mawlh mawlh bawk. Min chhang thei si lo .

"Nu, ka pa kiangah i kal dawn ti raw?" tiin ka phun sep a, chubak sawi tur ka hrelo ani.

Tunge hrilh a, phone hmasak ber tur pawh ka hrelo, pa Ruata(ka pahrawn) lah biakpawh theihna tur pakhatmah ka neilo, patea lah call an la thei bawk silo. Nu pari hrechhuak zawk in ka phone nghal a, vanneihthlak takin alo la mulo hlauh a, ka nu chungchang chu hrilh zung zungin;a rawn kal leh nghal tur thu a rawn sawi a.

Doctor lo chhuak chu pan nghal in ka nu awm dan ka zawh chuan ; A pum a rawn nat vak thu leh thisena luakin a chahthlak chhunzawm nghal thu min hrilh a.Ka lo chhuahsan kher chu ka inchhirin mahni inthiamlohna hlirin ka khat bawk .

Ka thutna tang ka tho thut chu ka lu a hai muai muai a, engkim chu phe vekin a thim nghal mup a.

Ka harh leh chuan zaikhawm ri ka hre hmasa ber a, ka hawi kual chuan kan in a ka room ni thin ah ngei ka lo mu ani. Ka nu ka ngaihtuah chhuak a, tunah zet zawng ka mittui chu dan rualloh in a rawn tla ta zung zung a.

Kawngka an rawn kik chuan ka mittui chu hru hul sawk sawkin lo lut turin ka hrilh nghal a ," U sangte ,lo chhuk tawh la, vui hun ani tep tawh a" tgenawm te naupangin a rawn tih chuan ka chhuk nghal tur thu ka sawi a.

Ka nu ruang chu ka pahrawn in a lo kil ve mek a, va pan hnaiin ka nu ruang chu ka en tlawk tlawk a. Amak ani; ka nu leh pa cancer natna in min laksak ve ve a, natna in ang neiin an boralpui ve ve a ka nu erawh A ma insiam ani ka tilo theilo ani..

Ka nu kan vuina pawh karkhat a liam leh tawh a, pa Zuala pawh haw pawh alo haw ngailo,mahniin kan chhungkua a kan hlimlaini te ka chhuikir a ,Engkim chuan ka nu leh pa min ngaihzual tir ani. Chanchin ka hriat danin ka u chu an awmna ram a buai avangin a lo haw theilo ani. Ka nu ruang taknial pawh hmulo in a awm a, hnam dang pasala a nei chu ka dem phah hle bawk. Ka patea te pawh Delhi lamah Urinhlui thlah tura an kal kha an rawn la let miahlo a ,chám deuh rih an tum thu ka hrezui bawk.

Inchhung ka tihfel lai chuan ka hriat ngai miahlo mipa pahnih hi an lo lut a, an hmel atang chuan an thinrim hmelin min melhrum dun tha ngang mai .

"Ka pu, lo leng ru eng nge ni ta?" pha dai hian ka ti a,"Eng nge nita a!.... Thla hmasa khan he In hi chhuahsan daih tawh tur in ni lawm ni? Hetah enge in la tih reng a?" pakhat zawk chuan a rawn ti khur khur a.

"Ka pu i hresual aniang , hei chu kan In a lawm ," ka tih chuan min eizo vek duh hmel a pu tawh .

" in In chu a ni ngei a, mahse Nu Zonuni leh pa ruata ten ka hnenah an hralh tawh, i hnena sawi thui ve vak angaih pawh ka hrelo , tunkarah lo chhuak ang che" a rawn tih leh chuan ka thu thla nghal hnawk .Ka nu leh ka pahrawn chuan engvangin nge ka Pa in chu an lo hralh ve ngawt nachhan ka hrethiam lo hle, engmah pawh sawi tawhlo chuan ka ngawi reng a.

"Tunkar chhung chuan lo chhuak hman tawh ang che" ti a kal mai an tum chu pan rawk rawkin an hmaah chuan ka thingthi nghal a.

" Ka pu, ka nu leh pa Zuala chuan engvanga Ka pa In hi lo hralh ve ngawt nge annih ka hrelo a, engzahin nge an hralh lah ka hre hek lo ,mahse ka pu, he in hi kan chhungkua hlim taka kan lo chen ho tawhna hmun awm chhun ani a , khawngaih takin hun min pe la i pawisa ka pe let leh vek ang che " ka tih chuan ; pawisa ber a hmuhlet dawn chuan pawi tihna aneiloh thu leh a lét a rulh a ngaih tur tur thu sawiin an chhuak zui nghal a.

Ka beidawng tih hian a sawifiah zo lo ani ber . Ka rilru chu a buaiin a hah tak zet zet ani . Ka oa ka ngaihtuah chhuak a ,ka tap lo theilo .He in hi ka pa in a ni a, ka pa lei a ni bawk .Engvanga ka nu leh ka pahrawn chuan he in hi hralh nge annih ang tih ringawt chuan ka rilru a luah hneh hle.

Kawngka lamah thawm a rawn awm vangin ka hawi phei nghal thuai a .Ka pahrawn ngei mai chu rui tih hriat takin, kal pawh kal ngil theilo in a rawn lut a ,"Pa" ka ti lo sep a, a rawn hawi phei rang kher mai ,a mit meng chu buai nak in maktih hmel takin min en chhur a. "Pa, he in hi eng nge in hralh na chhan" melh kiau chung chuan ka ti leh a .Ani erawh ka koh dan vanga mak ti hmel kha a la pu reng a ,a chhan erawh ka nu pasal anihna angin vawikhatmah "Pa" ti a ka koh ngailoh vang ani. Tunah erawh he in an hralhna chhan leh pawisa engatan nge an hman ka griat duh vang ani.

"Lei bá kan ngah ém vangin kan dahkham ringawt alawm,kan hralh hleihnem" a rawn tih chuan ka thinrim her mai.

" He in hi ka pa in anih hi, engtin nge in dahkham theih Zu leh vang bawk em ni ? . He in hi kan chhungkua hlim taka kan chenho na awmchhun ani asin . Tunah phei chuan ka nu leh pa ruang nghahna hmun ani a ,engti kawng pawn ka la let dawn " tap aw tiau a ka tih chuan inthiamloh hmel tak hian a chhuak nghak nul nul a.

Khawthim thleng chuan ka awm ngaiin ka awm reng a, ka hringnun chu a buar ka ti takzet bawk. Chenna tur neiilo in pawisa ka ngaihtuah angai dawn a, chu chuan min ti ipik zual ani .

Ka phone rawn ri chu tunge a nih pawh enlo in ka la tawp a ..." Sangte, keimah Malsawma . Contract chungchang nilo thil pawimawh tak sawipui tur che ka nei a naktukah kan inah rawn kal ta che" a rawn tih thum dut dut chuan ngenna aw a ri tel tlata hriatna ka nei bawk.. Kan khaw lama ka awm thu ka hrilh chuan amah zawk alo kal tur thu sawiin,ka chhanna pawh ghak loin phone chu a dah nghal a.

Eng ang thu pawimawh tak ni maw, helai hmun thleng thleng alo kal khawp hial na tur chu tiin ka ngaihtuah neuh neuh a.

Zingah chuan peihlo takin ka tho veleh hram a , pawisa neihdan tur ringawt ka ngaihtuah avangin mut pawh ka mutha lo . Thingpui in pah chuan pawisa neihdan tur tho chu ka ngaihtuah leh ngut ngut tawh.

Kawngka an rawn kik avang chuan tun ang zing kar karah tu tak ni maw tiin ka hawng a...ka mi hmuh avang chuan ka hrilhhai lek lek ani ,a chhan chu tun ang zing kara helai hmun lo thleng tur chuan zanlai vela a rawn tlan angai tih ka hriat vang ani..

"Ka lo lut thei angem?" a rawn tih chuan ka lo la en reng tih ka hre chhuak zawk a, ...Lut tura sawmin thingpui a duh ve leh veloh chu ka zawt nghal a ,a duhve thu in min lo chhang ve mai bawk a.

Ka lo in zawh chiah vangin alo la sa a, siam sak ve nghal in , ka keng phei a.

" I lo kal chhan chu engpawh nise, contract chungchang kha... Khatih lai khan ka nu a damlo a, lo hnawl kha ka duhdan ani biklo ania . Tunah kha contract kha a la awm reng anih chuan ka thawk duh e" thingpui pek pah chuan kan ti hmasa te te a.

"Contract chungchang kha chu i thu thu ani mai, chuan i duh duh hunah kan company ah ilo thawk thei bawk ,ilo thawh veleh khawvel huap intihsiakna ah show kan nei ve nghal bawk dawnnia " a rawn tih chuan ka rinai a awlsam phian a ,ka nui ver ver mai ni.Nizanah sawidan tur ka ngaihtuah kual nasat teh reng nen lu na burin ka ngaihtuah ve a ;ka ti rilru neuh neuh a.

"Chuan ilo kal chhan chu" nui ver ver pah hian ka ti a.

"Hei ka lo kal chhan diktak chu nia' tiin a ipte a zen rak rak a, a ipte atanga a rawn phawrh chu thlalak a ni. Ka han en chian chuan ka bih chiang rang kher mai .Inneih thlalak ani a, Amah leh keimah a ni..Nilo, keimah ang tak keimah chiah chiah a ni. Chu thlalaka hmeichhia leh Keimah ah danglamna pakhatmah a awm lo ,kan hmel ,kan pianhmang leh kan engkim ani mai. Danglamna awmchhun chu chu thlalak a hmeichhia chu a rai mek ani tih hriat takin a pum chu a puar ve âk a ,chuchu kan danglamna a ni.

" Hei chu keimah nih hi" ka tih sep chuan a rawn kiai suk a...."Nilo, hei hi ka nupui ka hmangaih em em anih hi. Jayden a neih khan thisen a hlauh hnem lutuk vangin a boral a" a mitmengah chuan khawhar rukna leh a nupui a ngaihzia ka hmu thei a, chutih rualin kha mipa naupang hmeltha tak mai kha ka mitthla ah a lo lang ve nghal.. Engvanga "mommy" ti a min ko ve ringawt nge anih ka hre ve chiah ani ,a chhan chu A nu thlalak chu a hmu ve fo awm si a, danglamna kan nei silo .

"Ka hmuh hmasak ber che khan ka nupui a lo dam leh ta maw ka ti hman hial asin. In hmel, in landan leh in engkim a in ang vang kha nge ka hrelo , ka rilruah leh ngaihtuahna ah i awm reng a.Show neihni a ka hmuh leh lek phei che kha chuan i chanchin hriatchian chakna in ka khat a. Mahse , i chanchin hriatbelh tur ka hrelo ka nupui nen khan phir inni tih chauh loh chu , ka nupui kha fa lak anih avangin engmah hriattheihdan a awmlo ani" a rawn tih chuan ka hau in ka en ringawt tawh ..." I unaunu in khawvelah kei leh kan fapa chiah min hnutchhiahin pialralah a kal ta daih a maw ka ti a; mahse , a lo nilo ....Nang hi Jayden Nu lo ni ta che"...

Ka nu a boral hma lawkin a fanu ka nilo tih ka hria a.
Tunah lah phirpui unaunu ka nei tih ka in hre leh bawk a.

Kan hmel leh landan a in ang vang ngawtin hepa lah hian Jayden nu niturin min sawm a.

Ka unaunu pasal leh fapa hi ka hringnunah chuan ka senglut ve kher angem ? Nge ni a hemi te pafa hi ka khawvel thar tura, ka HRINGNUN BULTANNA tur zawk..



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)