KA THINLUNG HMUTU by Kimboihi Ralte

Ngaia
Site Admin
Posts: 25813
Joined: April 30th, 2016, 4:07 pm

KA THINLUNG HMUTU by Kimboihi Ralte

Unread post by Ngaia » September 21st, 2022, 5:03 pm

Untitled-2.jpg



KA THINLUNG HMUTU by Kimboihi Ralte (Competition-2022)

"Ehe ! khawimaw i arngeng thar chu i va inhmeh ve" tih pahin ka hmai chu hnai fahran hian a rawn thlek a, "Zawnga" ka lo ti chang fak duh chauh. Hmanhmawh deuhin school- kan pan dawr dawr a,kan tlai ta tho .Kan zirtirtu zaidam zet Sir- Muanzuala chuan ka rual a thlêng ve ka ṭhian Duhsaka chiah chu a hrem a,kei chu ka vawikhat tlaina a nih a vang in hremloh in min luh tir. Lalduhsaka hi chu a luhlul piah lam ah a la ngeiawm thiam zui hi a lâwm zirtirtu te hrem zing ah a tel ve ziah ṭhin na chhan. Hrem loh theih reng ah pawh hrem ngai hian a awm lui nitin ṭhin niin ka hria. Hrem hi chu a ma chau chhuah liau liau ṭhin hi ani a. Tumah dem thei ani lo .A bengtlak lohna em em dang leh chu a lawm em emna thilte a beitham lulai lutuk ṭhin hi ani a. Hua hua a lâwm in ,in tibuai awmna tawh ah chuan a hmel hmuhtur a awm ziah ṭhin ti ila ka sawi sual lo ang.Chuti chûng pawh chuan ka tan chuan mi hlutak anihna a bo chuang lo. Mihring sual thiam leh luhlul tak ni mahse ka tan chuan ṭhian rinawm ber leh ṭha ber a ni. Ka diklohna ah ngêi pawh awr phiar tawn tawn a min ṭan ziah tu ani a,ka tan engmah tih hreh a nei ngailo hi a ni ka tan a mi hlu ber anih chhan. Ka ngaihzawng Malsawma aia pawh in ,ka dah pawimawh zâwk châng a tam a, mahse,ka duh ang tih erawh hi chu ngaihtuah chhin na chang takngial pawh ka hre ngailo.

Mizoram chhim lam thingtlang khaw tê ve tak a khawsa ,zirna in pawh nei ṭha lo khua ni tawh nak lai in ,thatchhe tan phei chuan exam-a ṭha tak a pass ziah chu har tak a ni.Kan rual pui tam tak in school - an bang phah a,zirna lam ah chuan kan sang lo in kan langsarlo hle. Kuthnathawk kan tam a, kan rualpui tam tak ramṭang tawh an awm nawk.Kan khua ang ah chuan ngaihzawng nei te hi kan langsar bak ah .A chhezawng a kan thang chiam ṭhin vang hian lang deuh a ngaihzawng neih pawh thil tih chi ani lo.

Ka bialpa Malsawma nen hian kum khat leh thla thum kan ni ve tawh a, pawl 9 kan nih tirh aṭanga inkawp chho ṭan nghal kan ni. A fel hle a, ka tan chuan sawisêlbo a ni. Chutihrual in inngaizawng ang tak tak in hun kan hmang dun tam lem lo a,tu vakmah in kan inngaizawng tih pawh an hre lo. Ka ṭhianpa Duhsaka nen hian ,ka bialpa Ms-a hi ṭhian inhnaih tak an ni ve bawk .Duhsaka nen hian têt lai aṭanga inṭhenawm tawh kan ni a ṭhian ṭha tak kan ni satliah lo, ka unaupa ang mai hi a ni. Kan in pawlrual chho char char a. Kei aiin a thla in naupang mah se ka û aiin a huai zawk a, min chhantu ah a ṭang fo. Amah vâng chauhin kan class-a mipa hmelṭha ber, ka star ruk em em Lalmalsawma nen pawh kan inngaizawng theih phah . Msa nên kan inngaizawng tih hretu awmchhun anih a vang erawh hi chuan buaina ka tawk fo.

February ni 13 zan a lo ni a, khua a vawt in vân lam chu a thiang in thli vâwt a thaw heuh heuh a. Ka pindan tukverh chu hawng in thlifîm vawt ver chuan min rawn chhem heuh heuh a. Boruak a nuam tak zet a ni. Naktuk Valentine's day ni a Msa ka pek tur pack in ka buai hle. Zan dar 10 velah chuan kan ṭhenawm te inhau thawm a ring leh angreng viau mai a. Duhsaka nu leh pa te hi an inhau nasa in kut an inthlak nasa thei khawp mai. Inhnaih lutuk lo mah ila an thawm hi chu kan hre pha fo.Keini chuan ngai ah nei thei mai ṭhin mah ila Duhsaka tan chuan a hreawm ṭhin ngawt in ka ring.
He an chhungkaw boruak rit tak avâng hian Duhsaka pawh hian rual a pâwl tam lutuk loh phah te hian ka hria. Mahni tawka lalduhsaka sual thiam ve êm êm ṭhin pawh hi a âwm tih nachen ka nei ṭhin.
Ka ṭhiana chu ka ngaihtuah hle a, ka thil tih laiah pawh chuan rilru ka pe theilo. Ka room tukverh aṭang chuan ka dâk chhuak a, pâwna Duhsaka lo awm chu ka zuk hmu a. Ka ngaihtuah em avangin ka tlân chhuak rang khawp mai. An inbul Theihai kung bula ṭhutnaah chuan a lo ṭhu ngawingal a, ka zu ṭhu ngawi ve reng ringawt. Min rawn meh zeuh zeuh na a engmah a sawilo . Ngawi renga rei fè kan ṭhut dun hnu chuan "Ka puitlin hunah chuan Aizawlah inhmuh ka lei anga, in nuam deuh ka sa anga ka pêm daih ang Kan khuaah hi chuan ka awm hlen dâwn lo re re keichu" a rawn ti thâwp sap a. "Keipawh" ka lo ti satliah ve ringawt. "Malsawma i neih chuan kan khuaah i awm hlen a ngaih hmel emai nang chu" tih pahin a nui sap a, a nui hmêl phêna natna, a zahna leh hrehawm tihna inphûm ru te chu ka hmuhsak thei. "Aizawl-a indan ka ngen tlat mai dawn lawm" ka lo ti fiamthu ve vat a. Thutak zawk chuan, "Naupang ber a ni si a, in pui chang tur a nia, in indan theih pawh ka ring lo" a rawn ti leh deuh nghut a. Kan titi chu kum 16 mi ve ve titi ah chuan a nuihzatthlâk zâwk lek lek alawm le. Nui chung chuan, "I ngaihtuah thui emai a, Msa hi ka pasal pawh a nilo maithei a, bialpa hmasa ber pasala neih te chu a har an ti" ka ti ve deuh hluai a. Kan in a riak turin ka sawm zawm ta daih a, kan titi chu ka tuipui zawng a ni tehchiam lo atin ni. A lo hnial lem lo, a tih fo dan a nia, a nu leh pate intihbuai apiang hian kan inah a rawn riak ziah ṭhin a, U Fela bulah a mu mai ṭhin. Kan in kan pan lai chuan zawi sup hian, "Pasal tlak i ti em Msa hi?" a rawn ti leh ṭâl a, vîn hlar hian "I ninawm Lalduhsak" ka ti deuh tuar . Ka tûm deuh hmuk ringawt. Ka lungawiloh chhan em em pawh ka hrelo, min chhaih peih leh lutuk hi ka ning ṭhin. Msa nen kan inngaihzawn tirh kha chuan min chhaih khan nuam ka ti a, tunah chuan ngei lamah a kal tawh.

Ka pindana ka lut chu mut chhuakin min rawn zem chiai chiai a, ka thil pack - lai pawh zo peihlo in ka mutsan ta daih a. Zing thawh ka hai lehpek a. Ka nu leh ka pa hian hna ṭul avangin zan thum lai ram lamah min riah san tawh a. Zîng khua a lo var a,ka mit ka meng rual chuan ka pindan kawngka pâwn lam a ṭang in Lalduhsaka chuan, "10 tleng ka chhiar anga i la hman loh chuan ka kalsan ang che " a rawn ti lawng lawng a.Nizan lam ah a râwn riak tih ka hrechhuak chiah.Thawh phan pawh sawilo in ka tho nghal vat a.Hmanhmawh deuh in ka in siam nghal , Number- lah chu a chhiar chak tual tual leh nghal a.Min tihmanhmawh zual sawt,ka hmanhmawh pauh leh chuan ka insiam sawt lo a. Lalduhsaka lah chuan min lo tur ve sek bawk nen hmai bui chur chuan ka insiam zo ve thei hram. Kan chhuah dawn chuan "theihnghilh i nei em?" Min lo ti var a, rang zetin " Neilo" ka lo ti ve. " V-day a nih kha aw" a ti leh deuh nghut a, ka theihnghilh ka hrechhuak chiah. Ms-a ka pek tur gift- kha, ka room-ah chuan ka tlan let leh dawr dawr a, 'ka la tuam zo bawk silo a va han hahthlak ṭhin tak em! ' ka ti rilru mawlh mawlh a; mahse, a lo intuam fel diam mai. Mak tihna hman pawh ka nei tawhlo a chak thei ang berin school lam kan pan a, Vanlentine's day a nih ang ngei in nidang aia ngawt chuan Ms-a nen pawh kan in hnim hnai ve ta deuh . Hun fâl kan hmangdun tak ah chuan ,ka lo ngaih ang em em in Ms-a chu a lo ṭha famkim bik lo. Mipathmeichhiat na em chu hmanglo mah ila ,kan khawsak dan chu mawihnai lo tak a ni.


Valentine's day a zawh chiah aṭang chuan ka thil thlir dan chu a inthlâk deuh dawrh hian ka hria. Ms-a ka ngaihdan chu a in thlak hlawk a, ''ka duh loh phah " chu ka in ti ngam chiah lo mahse,amah ka ngaihsânna erawh a kiam sâwt viau .Class- 9 ami Zuali an ti mai a; Mahse class 10 hmeichhe ho chuan Zualchhehawti kan ti deuh kher ṭhin. A over lutuk pawh a ni chuanglo; Mahse a hmelṭha in a luck ru zèk a,kan khaw Middle School zirtirtu fanu a lo ni bawk nen kan tluk loh vang te pawh a ni ang.
Zuali chuan lehkhathawn hmangin Duhsaka hi biahthudi a lo hlân a ni âwm a, kan hmêl huat tawh sa nâk alaiin a over lutuk chu kan sêl rawn luai luai mai.chutah ka mit ti kham zual tur tâwk lek hian Duhsaka nen chuan an in zui peih ta riau leh nghal.
Duhsaka hi ngaihzawng te care thiam deuh ,zêi deuh an tih ang chi kha a ni a.
Mi tam na hmun ah te a bialnu te hi a kuah deuh thuak thuak reng ṭhin .
A ngaihzawng tawh rêng rêng te chuan ,a zêi zia te,in fawh a zêi zia leh mi care a thiam zia ngawt an sawi ṭhin . Ms-a lak a ka rilru ka lo pêk vak loh lai alo ni bawk nen , Duhsaka leh Zuali te inkawp thuthang vel vang chuan zîng thlawhfuh tuk ka nei ta mang meuhlo.
Duhsaka chuan ka School- kal tur min rawn sawm tawh ngai lo a,min hlat tual tual ni hian ka hria . Ka lo hauh ru viau pawh ani mah na,ka rilru chhûngril ah hian sawifiah theih siloh in na veng veng hi a awm reng ṭhin.
Ka bialpa Ms-a lak ah ka ṭuan a ka thinchhia in ṭûl lo ah ka in hnial pui ta fo mai.
Ho tê tê ah thinrimna tur ka hmu a, Ms-a chung ah chauh pawh anilo ,ka chhûngte,ka ṭhiante leh kan ṭhenawmte , kan ranvulh te chung ah thleng pawh ka lungawiloh na ka hrithla a.
Chutia tumah mil thei lo ta na na chu ,September thla a rawn in her chhuah chuan Msa chuan in ṭhen a rawt ta hial a .
Han in ṭhen em chu ka duh bawk silo,thla tam tak kan in biak loh phah a.
Hun a kal bek bek a, Bord Exam- a hnai chho tawh hle a,class 10 zirlai ho chu School ah camp- neih pui kan ni a, Ms-a nen pawh kan in be ṭha leh tawh a,tlem chuan ka awmdân chu a pangai ve leh tawh .
Camp na ah Zuali a rawn luh ve theihloh a vangin ka thla a muang te pawh a ni zâwk maithei e.Duhsaka han biak vel pawh ka phur leh ta deuh ,a khat tawk in ka be ta zeuh zeuh a.
Zuali chu ka chheih ta fo mai . Ka chheih a piang in a pha ziah a ;mahse,a phat chuan nuam ka ti zâwk. Pha lo nise chu ṭul lo ah ka thinrim leh reng awm si a.

Hun a liam a, pawl 12 kan zir chho a,kum 18 pawh kan tling chho ve ta ,
Msa nen pawh la in zui reng mahila, Duhsaka chu ka vei tual tual a.
Kan chhûngkua hi 4 kan nia ka U fela,ka nu leh ka pa leh kei ,ka hming chu Rempuii ka ni. Thlasik khawvawh lâi ani a,ka nu chu Aizawlah bazarin a zin a .Ka u lah a ṭhiante in ah riak chhuak in ka pa pawh zan lam ṭawngṭai tleivar inkhawm ah a kal ve a,mahni chauh in ka awm. Ka tih ṭhan anih a vang leh kan khua ah hian chutia han hlauh em em tur an awmlo a, hmelhriat vek an ni . Kâwngka pawh ka kalh lem lo a, thlamuang deuh in TV ka en a, Dar 10 vel ah chuan ,Khua a vâwt bawk nên ka in sin lum si a ka lo muthlu sek a.
Kan kâwngka ri deuh rawk vang chuan ka harh zawk.Va en tum a ka tho chu ka bul lawk ah kan ṭhenawm pathlawi Pa Ngaiha hi alo ding deuh lua a,a rawn lut thawm a neih loh em a vang chuan ka phu deuh zawk nghe nghe .
" I pa te an awm na nge Rembawih ?" tih pah in ka bul ah kher chuan a rawn ṭhu a,
ka ngaih a ṭha vaklo . Kan in hi a fal ve ang reng a,Duhsaka te hi kan ṭhenawm hnai ber an ni .
A in pawh hi kan in a ṭang chuan la thlang tak a ni.
Kan in chhak hla deuh hlek kawngpui thlen dawn ah hian Pa Ngaiha in hi a awm a.
School kal dawn leh dawr kal dawn reng reng paw'n Pa Ngaiha in hi kal pel ziah a ngai ṭhin.
A ṭawngkam a ṭha in hlauh en ah vak ka en ngailo a mahse ,tun ṭum kher chu ka hlau ru kher mai .Aruk a thaw dep dep chung chuan
"Aw apa chu alo haw ṭep ang thingpui ka'n lum ang che " tih leh thawh ka rual a. Ka thawh rual chuan kal mai ka tum zet a,ka ban rek ah chuan na tak in min lo hmer ta chawt mai .
Ka hlau chu ka khur ti tih nghal der mai ,hlau lo ang tak chuan ka nui der a.
Pa Ngaiha chuan "thingpui chu min lum duh rih suh lo ṭhu ve rih zawk la" tenawm tak a tih pah chuan ,a mal chung ah min pawt ṭhu a.
Ka hlau lutuk chuan aw khur der der hian ,
" Haw rawh ,i tenawm lutuk,ka au vak dawn a nia Lal Pa Ngaih" ka ti ṭah aw deuh nghal ṭua a.
Ka thusawi chu bengkhawn lo zet hian min man bet nghet sauh sauh mai si.
Ka kawr chu rawn zen lut in ,ka dul vel chul pah chuan thenawm zet hian ka beng bul ah ,
" Tuman an hrephak lo ang Bawihte,ka vei ruk na che hi a rei tawh sin i hmelṭha si " tih pah in ka beng a rawn pet a.Hlau tak chung chuan ka tal ta phut a,ka âw tawp chuan ka âu ve mahse ka hlauh em vang chuan, ka âw chu a chhuak ṭha thei si lo .
Hlau tak a tlan chhiat ka tum chuan,min man bet in ṭhuthleng ah chuan min pawt tlu pawp a.
Ka thawmhnaw chu phelh luih a tum ta,ka tal ve nasa mai a mahse ,
ka hneh meuh lo . Rei vaklo kan in chei buai hnu chuan ka chau ṭan ta .Au tur in châkna pawh ka nei tawhlo .
Ka tha ka thlah vaih chuan ,ka thianghlimna,kum 3 ngawt ka bialpa ka duh ve em em lak ah pawh ka la hum ve hram hram,ka hlut ve em em chu lâksak in ka awm dawn tih ka hre si .
Chau tak chung chuan ka beilet ve hram hram a. Ka chau tawngkhawng tawh chuan ka tha ka thlah ria ria a .
Thawk lehkhat ah kan in kawngka lam ah chuan Duhsaka âwri ka hre ta hlawl mai .
Ka mumang ang mai a ni ,Pa Ngaiha pawh in rin hman hma chuan ,ka aw rawl tawp in , ""Min pui rawh Duhs..." Ka lo ti hman hram a.
Ka hmui chu Pa Ngaiha chuan hup nghal mahse ,
Duahsaka chuan a hre hman tho . Ka hming a min kauh zui nghal in kawngka a rawn sawi nghal bur bur a . Ka taksa chu che theilo tur a manbeh tlat la ni mahse ka thla erawh a muang sawng sawng.Kha a âw ri ngaihnobei fahran lo tak ,thinrim awki vin lek lek zawk kha ka beng ah chuan rimawi ngainatawm ber ani hial ang .
Kâwngka a rawn tlawh rik ṭhuai ṭhuai lai chuan ,
mi tenawm, Pa Ngaiha chuan chhuahna tur a dap rang hle . Kei chu ka chauh em a vang in ka thlan in min bual huh vek a.
Duhsaka a rawn luh rual chuan ,ṭah aw ṭua hian "Hetah ka awm " tih pah in kalo pan nghal a ,
Ka khur hlawk hlawk bawk .Duhsak a'n min hmuh rual chuan a kawrchung chu hlip in min rawn tuam nghal a,Ka thla a muang sawng sawng mai. Ka kawr te pawh a ṭet pheng phung a, zawhna engmah min zawt hmasa lo chuan ,
Pa Ngaiha chu a um nghal a,pawn ah chuan in man hman in an in sual ri zui nghâl bur bur a.
Ka mang ang chu ka khur der der a ka hlauh em a vang chuan ka kalsawn hlei thei leh tawh bawk silo .
Minute 1 hnu vel ah chuan ,ka va chhuak thleng thei ve hram a.
Kawt lai ah Pa Ngaiha chu thisen bual vek hian a lo mu a,
a thi tawh ni mai hian ka hria. Duhsaka pawh hliam tam tak nei in thisen nen a lo ṭhu sawp nuai a.Duhsaka chuan a that mai ang tih hlau tak in khur zawih zawih chung in ka va kal chhet chhet a.Ka hlauh ang ngei in Pa Ngaiha chu alo thaw tawh lo .
Duhsaka chuan mittui tling pam hian " Ka tih luih ani lo " a rawn ti tham ṭiau a.
Pa Ngaiha tluk na zawn ah tak chuan lung char tak lo awm in an in sual buai nasa lutuk in a tauh palh a,a vanduai zui ta a ni. Duhsaka kut chu a khur dar dar a,zâm aw tak hian " Ka that em ni? " a rawn ti khur leh dar dar a.
Ka lainat tâk zet ,keimah zawk chu ka ṭap chhuak ta hawk a.
Duhsaka zawk chuan min rawn kuah in ka hnung ah a beng thek thek a engmah sawilo mahse ,ka awm a nuam sawng sawng mai .
Duhsaka chuan ka û min phone sak a,reilo te ah an rawn thleng nghal .
Ka pa leh ka û chuan min ngaihtuah in an thinrim em em a,vawi tam tak ka ṭhat leh ṭhat loh min zawt nawn a ,a n ngaih ṭhat nan ka ṭhat thu lo hrilh mah ila ka ṭha mawlh lo .

Kan khaw VC te pawh an lo thleng thuai a , thil thlen dân te chu ka hrilh fai vek a,
tlem chuan ka khur nasa zual pawh a reh tawh .Tun ah chuan Duhsaka chu ka ngaihtuah ve let ling tawh zawk a. A tuk tlai thlêng ṭhak chuan Duhsaka chu VC ten an kawl a,
police te kut ah an pe ta.
Duhsaka chu ka thei tawp in ṭan in a thlavang hauh mah ila kum 2 chu jail a tan angai ta tho a.
keimah vang in tual hial a that a,chutah jail- hial a tan angai dawn a maw .
Engtin nge keimah ka in thiam theih tawh ang.A van hreawm tak em !! Central jail- lam ah chhuk pui tur in motor ah an lawn tir ta a.
Keimah vang ani bawk nen ka ṭap zawih zawih ,
ka in thiam thei thlawt lo ani . Police motor- chu a tlan ta a,ka tha neih zawng zawng in ka um zui a,ka ṭap hawm hawm bawk . Ngaihdam ka dil mawlh mawlh a .A hmalam hun keimah vang a a chhe vek tur chuan min ti hreawm ani.
Thui lo te ka um hnu chuan Police motor chu a ding a,ka va tlan nghal dawr dawr .Police bul ah chuan keimah zâwk min man mai tur in ka va ngen chiam a, awmzia erawh a nei hran lo . Duhsaka chu motor -a ṭang a lo chhuak in ka hma ah chuan a ding a,nui var var hian ,
" a pawilo !! in thiam loh duh suh ka ṭhian ,nangmah vang anilo ania" a ti dam thlap a. Ṭap chung chuan ngaihdam ka dil mawlh mawlh reng tho . Ka lu a rawn chul pah chuan dam thlap hian " Venghim che hi ka duh sin mahse , hlauthawng tak in ka awmtir che a, min ngaidam rawh" ti a a sawi lai chuan ngawi reng in kalo en tlawk tlawk ringawt. Chhan dân tûr pawh ka hre tawhlo . Duhsaka bawk chuan " Chuan maw ka ṭhian ka hmangaih che, chu chu i hrereng dawn nia" tih pah in ka mittui luang chu a kut in min hruk sak a ,ka chal ah chuan dimte hian a fawp zauh a.Kan bul a Msa leh Ka pa,ka U te rawn thleng ve lai reng reng ka hrelo .Tun ah zet chuan Duhsaka lak a ka feeling- te chu ka in hrethiam ve ta. Ka lo hmangaih a ni mahse ṭhianṭha ang nilo in, mipa ang zawk in.Phâk mang lo chuan a nghawng ah ka han kuah a, " Kei pawn ka hmangaih che " ka bialpa Msa awm lai ngei chuan Duhsaka chu ka ti let a .
Msa chuan ka kut ah min lo vuan a, Duhsaka en pah chuan " Ka lawm e Duhsak ,ka lawm lutuk. Theih tawp in kan pui ang che " a rawn ti dam thlap a, engkim hmu vek mahse hrelo ang mai in a lang .
Duhsaka chuan nui var var in alu abu nghat ringawt .kum 18 mi lek hmalam hun êng tak nei keimah vang a jail a a lut tur chu ka in thiam thei thlawtlo.Duhsaka chu motor-ah chuan a lut leh a,mittui nen an tlan liam lai chu ka thlir a.


Ka thil tawn a vang chuan harsatna tam tak ka tawk zui a.Kan khua a lo lian lo bawk nen , pawngsual tawk ang ten ka thang a .
Min khawih hman lo tih chu sawi ve ṭhin mah ila ,tumah in min awi tak tak lo .
Depression - nasa tak ka nei chho a,mahni in sit reng reng in hun ka hmang a.
Rual pawh ka pâwl thei ta lo ,ka room - ah ka in khung deuh chawt a.
Ka chhuak ngâi tawhlo mahse ,engtik lai mai pawh hian ,ka kiang ah Msa chu a awm rêng ṭhin. Min sit a hnek in min ngaihsak zual sawt ni in ka hria mahse tun ah chuan, ka thinlung,ka taksa leh ka rilru ka engkim hian Duhsaka chu an vei a, "Engtin nge a awm ang ?chaw a ei ṭha a ngem? . Jail- chu a hreawmsi a a muhîl thei a ngem le" tih ngaihtuah rêng rêng hian zanhun ka hmangral ṭhin. Nitin a tan ka ṭawngṭai ṭhin a , vawikhat chiah ka hmuh leh theih nan Pathian hnen ah ka dil ṭhin.

Kum 2 lai a liam leh hnu chuan college pawh kan kum hnihna a lo ni ve ta mai a.Kan khua chhuahsan in Aizawl ah kan awm tawh a, khawpui boruak chu a nuam in kan in hrechiang hlawm lo bawk a a nuam zawk phian. Ka hun tawn harsa zual tak tak te pawh paltlang in ka pangai ve tawh viau . Msa nen pawh kan in ṭhen hleitheilo a,han ning deuh chang nei ve zeuh ṭhin mah ila, amân min ṭhen a tum ngai miauloh a vang in,kan in kar chu a nghet tual tual zawk .
Kum li lai in zui ve tawh ta chu Pathian phal loh thil pawh kan ti ve ta fo mai . Chuti chûng pawh chuan , Duhsaka chuan ka ngaihtuah na a luah reng ṭhin tho a, Duhsaka min lo biak hun ka nghâk ru reng ṭhin ,a chhuah hun a thleng hnu ,thla hial a liam hnu ah pawh min rawn la be hauh lo a, tlawh tur a jail a ka kal lah in min hmu duh ngai bawk silo. Min hmuh duh loh chhan ṭha tak a neih chu ringtho mah ila.Min hmuh duh tawhloh tak tak ka hlauh êm a vang chuan ,a chhuah hun a min biak a duh vang a ni ang tiin ,keimah ka in bum fo ṭhin. A chhuak tawh tih an sawi a ṭang a thla hial a liam tak a vang chuan ka mang ang chuan kan khua a zin chu ka chhûngte ka dil ta a. Ka chhûngte lah chuan ka zin duh chhan min lo zawt uluk hle. Kei chuan " ka tan Duhsaka hian jail - hial atang a lawmthu hrilh hi ka bat a ni a, Duhsaka bul a lawmthu sawi ka duh a ni" ti ve mah ila a rûk chuan ka hmuh leh duh vang chauh a ni.ka ngâi em a sin.Ka mihring huat ber ṭhin te ang chuan awmin , Msa chu Duhsaka number a neih leh neih loh ka va zawt ta tawp mai . Ka in hua in ti diklo ka in ti ngawih ngawih a mahse ,ka thinlung duhna chuan min nawr kal zêl si. Msa chuan a neih loh thu in min lo chhang sam hle . Rei tak Duhsaka chungchang ka sawi tawh loh a vang chuan ka va zâwt thut chu mak a lo tih ve deuh ka ring a nia, mahse, mak ti awm pawn a awm lo . Ṭha deuh in kan in bia a , Msa nen kan in kar ah boruak chhia engmah a awm phahloh loh a vang chuan ka ngaih te pawh a ṭhalo lek lek zawk .Class 10 kan zir lâi kha chuan Ms-a hian Duhsaka a thik na hi a tilang viau ṭhin a. Tun ah chuan engngah mah a ngai tawhlo ang mai in a awm ,A ta ka ni tih a chian em vang te pawh ani ang . Duhsaka biak pawh dan ka hriat tak silo ah chuan ka chhûngte chu kan khua a zin lawk chu ka dil a mahse ,ka nunhlui a ka harsatna tawh te ka hriat chhuah leh mai mai an hlauh a vang chuan min rem tih sak lo . Ka puitlin ve tawh thu te hrilh in thiam tak in ka nu leh ka pa chu zin ka dil ta fan fan a, a tawp a tawp ah chuan min remtih sak ve ta hram . Phur tak a in siam in kan khawhlui ka ngaih vang ni hauh lo in vawikhat tal Duhsaka hmuh leh ka duh a vang zawk chuan ka phur in ka hlim a ni . Eng ang pâwn lo awm se nupui pawh lo nei tawh mahse a pawilo ti rilru reng mahila, Nupui a lo nei tawh tak tak erawh ka hlau ru hle ,jail- a ṭang a a chhuahna a la reilo a nupui êm chu a neih ka la ring lo te chu ka ti rilru leh ṭhin . Enge Duhsaka lak ah hian ka beisei pawh ka hrelo, keima'n ka zir loh teh reng nen hian a lak ah beisei ka nei a ni tih hi chu ka in zêp tawh lo . Kar leh mai a,kan college in students award- dawng tur a min thlan na pawh chu ngai pawimawh lo in ,kan khaw hlui ah chuan ka zin ta rum rum a.
Kan khawhlui ka thlen chuan lung a lêng ve hle a. Hun harsa ka tawn aia in hun hlimawm tawnghnem zawk mah ila ,ka hun hreawm tawn te chu ka hrechhuak nasa zawk .
Khawi hmun dang ah mah peng lo in ka kal chhan Duhsaka tein lam chu ka pan nghal a, ka thinphu a rang sawt hle . An in ka thlen chuan ,Duhsaka nu a lo awm a.A fapa chanchin chu zah pawh hre chang tawhlo in ka zawt ta bawrh bawrh mai . Duhsaka nu chuan " Duhsaka chu jail- a ṭang a chhuah hnu ah kan khua ah a rawn la let miah lo . Aizawlah a in hlawh ṭhin a ,pawisa te minlo thawn ṭhin a" a lo ti ta daih a Aizawlah a lo awm ve reng a maw. !??Chuti si tinge min lo biak ngai miahloh!? zawhna tam tak ka nei a, chhânna erawh pakhat mah ka neilo.
A awmna veng te ka zawt a,ka ngui hle mai ,an in ah meuh kal chilh ta chu ṭha deuh in Duhsaka awmna veng leh a in luah awmna te chu min hrilh ta siam siam a. A chhûngte bul ah chuan, rilru leh tih tak zet in ngaihdam ka dil a,hreawm ka tih zia an hriat chuan min khawngaih in a tuar tu ve tho ka nih zia min hriat sak a,min huat na te pawh a paih bo thei ve ta . A rang thei ang ber in Aizawl lam ah let leh nghal ka tum a . Rei pawh ka in ngaihtuah lo ,ka scooty ah chuan chuang in ka tlan lêt leh ta vang vang a .Aizawl chu thim hlim ah ka thleng a,ka chau viau na a,haw pawh hawlo in Duhsaka in awmna lam ni a ka hriat chu ka rin zawn ta chiam a.


Zan dar 11 pelh ah pawh ka la hmu theilo ka beidawng tawh lutuk chu ka ṭap tawp tawh a,a phone number nia an sawi ah lah chuan a tlang thei bawk silo . A tlang ve chhun lah in a la thei bawk silo ,ka beidawng tawh lutuk chu in pakhat kawt ah hian ka ṭhu hnawk a . Ka hnuk ulh chu ka mittui ka hru ka hru a . Ani kha ka damchhung a hmu leh tawh lo tur a ka in ngaihtuah chhin ringawt pawh chuan ka awm chu rawn tawt up up in thaw theilo hial dawn khawp in a rawn na thei .Msa miss call a tam tawh em avangin ka call back a, " Khawnge i awm Duati ,tinge kan khua ah i zin tih pawh min hrilh loh" a rawn ti dam thlap a. Ka ṭah chhuah em a vang chuan ka lo ṭah khum ta chiam a ,minute- rei fe ka ṭah hnu chuan ka ṭap zawi vek hian ka hria . Mangang deuh in,Msa chuan thil awmzia min zawt a. Ka chhang thei lo ,kan ngawih reng hnu chuan zâwi sep hian" Duhsaka i zâwng ami? nga ti nge ?,min duh khawp lo ami? " a rawn ti chang deuh fak a,ka hamhaih hle . Duhsaka lak a ka feeling -te hi Msa'n a hria tih reng ka hrelo .Ka lo ti lâng viau pawh ani mah na ,mahni in te'n na leh Msa lak a in thiamloh na in ka khat nghal a. Ka chhan hma chuan phone chu min dah san hmak bawk si. Ka rilru puthmang pawh ka in hrethiam tawh lo ,ka in ten ngawih ngawih a ni. Ka thaw a ip pik em a, rei fe ka in ngaihtuah hnu chuan Ms-a lak a ngaihdam dil chu tum in,va biak leh chu ka tum ngial a phone a la duh tawh lo .
Kal leh mai tum a in buatsaih in ka scooty ah chuan ka lawn a,ka piah lam deuh a ṭang a,nui ri lo chhuak chuan ka beng chu a rawn verh ta kawk mai.Rang tak in ka en nghal a, nileng zankhua a kalo zawn tawh Lalduhsaka hmel ngei chu ka hmu ta . Ka lawm a vang in ka biang ah mittui a rawn luang nghal sep a,chu ka hlîm na leh lawmna chu reilo te ah chhêm mih ang duak hian a rawn tawp chawt .


Duhsaka bula hmeichhe ding ve chu ka lo hmu reng renglo ,chiang tâk in ka en dun tlawk tlawk a. Hmeichhia chu a la hmelṭha em em zui bawk si ,ka mittui bawk chu a rawn hnam leh nghal ṭiam ṭiam a. Hmeichhia chuan Duhsaka bul ah "" mangṭha le ""tih pah in chhak lam ah chuan a chho san a,an in huat hmêl loh viau. Ngawireng in kalo en tlawk tlawk .An in mangṭha fel hnu chuan , Duhsaka chuan minlo pan a. Kum 2 leh thla 4 lai kan in hmu tawhlo a chuti chung pawn min auh a, min rawn pan nghal vat na chang pawh a hrelo. Second 50 hmalam khan min hmu tawh reng tih ka hria,ka thinrim leh rilru na chu ka puak keh thei mai dawn a ka hriat a vang chuan ka ṭah chu a chhuak leh ta viau . Duhsaka chuan min rawn kaih pah in, " In chhûngah i ṭap dawn nia " min tih pah in kalo din reng na in ah chuan min nawr lut bawrh bawrh a,a in alo ni reng ani . In chhung ah chuan thingpui te min lum sak a,kan ṭawng lo ,ka ṭhu thum bua a. Ka lungawiloh na te chu Lalduhsaka ka hmuh leh vang a ka lâwmna nen khai khin chuan engmah lo mai a ni . A hmuh ah chuan ka hmui ka ti pawrh nasa mai a, hmeichhia a lo kal pui a vang chuan ka lungawilo tih hria se ka duh a ni . A thingpui lum min rawn chhawp pah chuan " i dam maw?!,i duh chuan ṭap tawh rawh ,nge min ngaih viau a " a rawn ti thum dat a, min rawn la nuih tlawn vawr vawr zui ,ka melh deuh kawr ringawt " i thinrim ami ? , engtin nge min lo zâwn hmuh?" a tih leh tak ah chuan ka thinrim tawngkhawng chuan , thingpui a rawn chawi na chuan ka vawm ta pawp a,a lo in bum hman a vang in chhuat ah chuan a tla keh chuai. Vin hlar hian " Nge min lo biak pawh i tum loh? " ka ti ṭah aw ṭua a.
" Ka tih palh ,chuan ka ṭha e ,ka dam ṭha lutuk , " tih zawm zat pah in ka zawh ngai miah lo in eng eng emaw chu a sawi zui ta nghek a. Jail a tan lai a ka thlawh a piang a a in lan duh ngailoh na chhan te chu ka zawt a ,a chhuan lam chu ka hrethiam teh chiam lo mahse, a sâwi kual thui em a vang chuan a awiawm ve tho. Jail-a chhuah hnu a ,a hun hman dan kim châng chu min hrilh a tum emaw tih mai tur in a ṭawng awl lo a .Ka thinrim a reh lai reng reng ka hre lo .Ka mit ah tak chuan min en in a hmel ah chuan lungawiloh na ka hmu lo. Ka hahdam sawng sawng ni hian ka hria .

Kan ti ti mawlh mawlh lai chuan ka tai a rawn na ta vak a.
Ka period a la hun bawk silo ,ka tho nghal vat a. Vawin lam ah lehlang in ka zin a ,chawlh pawh chawl miah lo in Aizawl ah ka let leh nghal a,ka hah lutuk te pawh ani mai thei . Ka thi chu a lo put nasa tawh mai a.
Duhsaka Bathroom ah chuan ka va in ti fai a,ka thi put a reh thei bawk silo.Bathroom- pawh ka chhuahsan thei lo a, zân a rei ve tawh bawk si , Duhsaka chuan " Nangmah in lo awm la khu ta kawngthlangah khuan dawr a awm ka zuk kai tho mai nge " Bathroom - kâwngka bul a ṭang chuan a rawn ti su su a.
Ka tai a na bawk si ,ṭawng pawh ka ṭawng peih lo , " Stayfree - a mi ka lei ang ??" a rawn ti leh hram a.
Ka na lutuk chuan " haw ka duh " ka lo ti thei ṭawk tawh bathroom - ah chuan a rawn lut ta thawr a,zah pawh ka sawi thei tawh lo ka na em a ni. Duhsaka bawk chuan min pua a,ka thi chhuak chu a kawr var thianghlim deuh ah te chuan a kai nghal nua a. Pawiti hmel a pu chuang lo " Damdawiin a kal i ngâi zawk anih hi " mang ang deuh a tih pah in min paw chhuak a. Kâwngka a kalh bawrh bawrh lai chu ka hria,ka nat êm a vang chuan nikhua ka hrelo zeuh zeuh a.Damdawiin kan thlêng lai erawh ka hre ruai ruai ,ka harh leh chuan khua a lo var vek tawh a. Ka bul a lo muthlu lap lap chu Ms-a a ni,ka kai harh nghal a,enge thil thleng ka zâwt thuai a. Duhsak an a call thu a sawi rual chuan ka thin a sa phat mai a hma zan lawk ah Duhsaka Number- a neih loh thu kha a sawi sia ,ka lungawilo, âng ka tum lai tak chuan , " Doctor te'n nau i pai an tia" a rawn tih zawm leh nghal zat a,ka sawi tum ka dang chiang teh e ,a ngaihna hrelo zet in Msa chu ka melh reng a "mahse nizan khan i chhiat a , enge i tih fahran a, Duhsaka hnen a lawmthu sawi chu a pawimawh viau ami, engkim ka hrethiam vek,kan khua ang hla lutuk a ,i zin te chuan zankhat tal riak ta che " thinrim in sum tak vin hauh silo chuan a ti rum hmak hmak a. Ka bing deuh mup a vang chuan ka ngawi reng ringawt . Ms-a lak ah ka in thiamloh a,ka naute lak ah pawh chuan ka in thiamloh a,ka rilru lêp ler lutuk vang in naute pawisawilo chuan a tuar a,he khawvêl eng hi a rawn hmuh ve theih dawn ta si lo . Ka âwm chu ka chum dawt dawt a,a na em a ka thaw ṭha thei lo ,ka ṭap chhuak thei bawk silo .Ka zak lutuk chu tu hmêl mah pawh ka en ngam lo hial a ni.

Kan hun tawn teh hrep a vang chuan ,rei tak chhung pawn ka chhuak lo a. Ms-a nen kan in kar khi zau tak âwm tawh sa chu khîk belh zui zel in.Duhsaka in ah kher nau ka lo chhiat bawk nen kan in kar chu a ṭha thei ta ngâng lo a. Kum 4 leh thla 5 kan in kawp na tur ni ah chiah in ṭhen thu kan sawi ri ve ta. Ka thiamloh a ni tih ka pawm a. Ms-a lak ah chuan ka ti diklo ani tih pawh ka hria,a rilru nasa tak in ka hliam a mahse , kha leh chen kan lo in kawp tawh a.A fa hial ka pai tawh bawk a,tun ah chuan kan veng zawng zawng in ka nau chhiat thu an hre darh vek tawh leh nghal .

Kei ve teh lul hian engtin nge ka zahawmna ka neih lêt ve leh tawh ang,a pawilo ka phutawk chauh a ni e, har hle mahse ka kal tir a hun tawh . Kei aia hmangaih tu a phu a ni. A rilru nasa tak in ka hliam belhchhah sak a, misual tak ni mai te hian ka in hria . Duhsaka pawh ka be zui tawh chuanglo . Engkim ah chuan keimah ka in dem a,tu vak mah ka be pawp ngai ta lo .
Ka phone chu off in mi min biakpawh theihna tur ang zawng zawng chu ka ti tawp vek a . Ka mualpho em a vang chuan ṭhenawm khawveng te leh ka chhûngte hmuh pawh ka in thlahrung phah em em a ni. Ka nun pawlawh a vang chuan ka hnunglam ah rel ka tawk fo a,ka hun kal tawh nen lam pho lan sakin ka awm . Mithenkhatin bialpa nei rengin mipa dang lak ah fa ka pai vanga ka bialpa'n min ṭhen ta ang te'n min sawi bawk ne'n, dem thei kani lo chungin Ms-a chu ka dem ve tak zet. Tuma'n mi pangai en in min en tawhlo ni mai hian ka hriat a vang chuan, Champhai a ka pi te in lam ah chuan ka han zin ta daih a. Thla 4 lai ka pi, ka nû nu leh pa te in lam a ka awm hnu chuan ,a vawikhat nan ka phone - ka on a.
Duhsaka message a lo tam hle , messege hnuhnung ber a, ka ṭhiannu Mariai messege" Msa'n bialnu thar a nei" tih nihnih liam ta vel a rawn thawn tawh chu a rawn thleng ve chiah . Ka lâwm pui rual in a fa hial ka pai a,thla 4 chhung khan vawikhat mah min rawn be pawp lo . Ka rilru chu a na ve reng mahse ,kan in ṭhen chhan bul chu keimah ka ni tih ka hriat a vang in ka phutawk lek hmu ah ka in ngai . Lungngai a in dawm kun reng chu thil ṭha ber ani lo tih ka hria a, Ms-a pâwn hmalam a pan tawh a, keipawh in hmalam ka pan ve angai tiin ka in fuih a .
Ka phone te chu recharge in ,ka ṭhiante ho chu ka ṭhat tawh thu ka hrilh kual a.Aizawl lam ah class kal ṭha leh tur chuan ka in buatsaih ta nawk nawk a. Duhsaka pawh chu ka awmna leh Aizawl lam a ,ka haw tawh tur thu te chu message in ka va hrilh a mahse ,a online thei lo hle ,reife ah chuan a seen ve hram a." E" tih zawng in min la chhâng zui . Ka rilru na dawn nge, ka thinrim dawn nge,ka nuih a za dawn tih pawh ka hrelo ,ka hamhaih em em a ni mai. Aizawl a ka haw hnu chuan ka zia chho ve ṭan ta deuh a. Lehkhazir ah rilru pe in kar khat hnu ah phei chuan ka zia tawh hle.

Zing hma tak ah kan in kawngka a lo ri kharh kharh a ka va hawn chuan Duhsaka a lo ni .Ka beisei loh em a vang chuan lut tur a sawm lawk na chang pawh ka hrelo .A mah chu rawn in beng var in ,in ah chuan a rawn lut a. Ka naute chhiat chhan ah chuan a mah alo in thiamloh ve hle a ni .Ka nu leh pa ka û te in neihna lam ah zanriah an ei dawn a vang in chaw ei ah ka sawm a. Zanriah kan ei dun lai chuan sipai ah a ṭan tur thu a rawn sawichhuak thut a. A sawidan chuan ani ang lehkha zir sang lutuk silo, jail bang zut tawh bawk si tan chuan sipai nih tluk ah thawh tur ṭha chuang a awm loh thu te a sawi ve luam a. A lo puitling tawh zia ka hmuh chuan ka chhuang hle a ni. Fuihna thu min fah zeuh in Ms-a nen chuan in kawp leh tur in min râwn a.Msa nen kan in kar chhiat chhan ah chuan a mah a in dem hle tih te min hrilh a. Kei chuan bialnu thar Msa'n a neih tawh thu ka lo sawi ri zauh a. Duhsaka hmel chu a in thlak hlawk mai ,kan pahnih chiah in kan awm a,chaw kan ei mawlh mawlh lâi chuan " ka lak ah hian feeling i nei lo ti raw Remrem ? "a rawn ti chhuak ta hlaw a. Ka chaw hmuam lai ka phuh tuar ," ṭhing thei e " tih pah in a kawr a ka chaw phu kai te chu a thingthla mawlh mawlh a, hnuai lam melh chung in a chaw a ei zawm leh daih lawi a. Kei chuan " Min zawh dan ki kha ka neih i hlauh hmel " fiamthu ti tak fe chuan ka lo ti ve , zaktheilo ka in ti in ka sa pup pup mai .A ngawi vang vang a,a chhan na tur chu ka lo nghak ru reng ,ka huphurh ru hle a,ka thaw dep dep bawk.Duhsaka chuan " Hlau lo e,nei la ka ti zâwk, Ms-a thik reng reng in , hringnun ka hmang tawhlo anga ." A rawn ti nui hak a, ka thil ei lai ka hak nghal khawrh khawrh . Tui min suah thuai a,ka bul ah chuan ding in tui chu min pe a,ka hnung ah chuan a rawn chum dat dat a .
" Lalmalsawma'n bialnu dang a neih san ringawt che chu ka dem dawn viau a mahse , anih na tak chuan pawi pawh ka ti lo " a rawn ti deuh leh ang hluai a,ka lo nui deuh huk ," ka hunṭha a lo in herchhuak ve tawh dâwn tih na ani mai" a ti leh hap a. A tukhumah chuan ka beng bu deuh nghal lawlh . A fiamthu ang tih ka hlau em a ni, tia'ng zawng a min fiam vaih anih chuan ka na dawn em a sin , " Fiamthu thawh a hun lo ,i chaw va ei rawh " ka ti chang fak . Ka mit ah tak en chung chuan ka dam chhûng a ka thu hriat tawh a zawng a ngaihthlak la nuam ber chu min hrilh ta,
"Ila hria êm Remrem?I sawi kha ! Kan ngaihzawng hmasa ber te nen chuan inneih a har i tih kha !! " a rawn ti nui var var a, " Aw " tih zawng in ka chhang .
" Kum 4 liamta kha chuan i bialpa , valentine day ni a present mawitak a tuam, i pek ṭhin ka nih ve hun ka suangtuah ṭhin mahse, Kha thil i sawi a ṭang kha chuan i bialpa nilo in i pasal nih hi ka duhthusam a ni ta zawk a. Ka ṭhian chauh nilo a ka nupui i ni teh anih ngat chuan ka hlim dawn em a sin ""dam thlap leh ka mit a en kal chuang chuan a ti thawp sep a . A fiamthu lo tih ka hriat rual in mah ni in sit na in ka khat nghal vek .

Kum 4 liam ta a ṭang a ka Bialpa nih a lo suangtuah ṭhin anih chuan ,ṭhian kan nih tirh a ṭang daih tawh khan min lo duh tawh tih na em ni ? . Zawhna tam tak nei hmêl puin ka en reng a,kan hun kal tawh te ngaihtuah let in , Msa nen kan in zui lai a ,a mit meng a thik na awm ka ngaihbel vel mai mai emaw ka tih te kha ,ka rinthu satliah an lo ni lo. A rilru ka lo va hliam nasa ṭhin dawn tak em . Ka in thiamloh lutuk chu ka in rin hma hauh in ka mittui a rawn far a. Ka hru hul thuai ,chawi ei dawhkan chu ka thawh san deuh hluai a,ka hnung lam ah chuan min rawn kuah in ,
" Hun ṭha vawikhat chiah min siam ve rawh ,Msa chu ka tluk thei lo ang tih ka hria mahse, i tan engpawh tih ka huam a sin ,ka ti na in ka kalsan ve ngailo ang che kei chuan ,min hrechiang ber tu i nih kha" tih pah in Ka bengbulah chuan a rawn thaw lum pap pap a. A lungphu rang tak te chu ka hnungzang a, rawn che det det leh a zâm vang a a thaw rang tak te chu ka beng chuan a feel- thei ." Min hrechiang ber tu i nih kha Lalduhsak,ka phu tawh lo che " hnûk ulh deuh ṭeuh chûng chuan ka ti tham ṭiak a, " Chutiang sâwi suh " tih zawng in min chhang engmah kan sawi zui tawh lo ,chawieidawhkan bul ah chuan a in hnungchhawn zawng in min kuah bet reng a.
Minute 1 dawn lai min kuah hnu chuan zawi muangin min thlah a, ka hma ah chuan rawn ding in ka kut chu zawi muangin a rawn la a. A awm chu min khawih tir in a lungphu chu min ngaihthlak tir ta .
" He lung hian hriṭha lo a vei te anih ngawt loh chuan Hmangaih na vang a tiang a âwm hi a ni ngei ang " a rawn ti chhuak sap a.
Sawitur tur pawh ka hre lo ,ka mipa duhloh zawng ka hnawl ṭhin dan idea- zawng zawng te chu han apply- ka tum ngial a,ka ngaihtuah na thu rawn chhuak âwm chhun erawh " ka phu lo che " tih zawng ani .Chu mi thu bawk chuan ka chhang nawn leh ṭhin, " Kar leh Nilai ni hian training - nei tur in sipai ah ka lut tawh dawn a,i chhan na ka lo nghak ang,chaw tui tak min hlui a vang in ka lawm e ka ṭhian," tih pah in pâwn lam ah min chhuah san ta daih a. Ûm zui na chang pawh ka hre tawh lo ,chhuat ah chuan ka ṭhu sawp nuai a,ka hun tawn zawng zawng a hre vek a. Mipa dang lak a nau hial ka pai tawh tih a hria a,ka nih na ang ang in ,hman a ṭang in min lo hmangaih reng tawh a.Keive mai hian tiang khawp a hmangaihtu hi ka lo nei ani maw !. Ka va'n phu lo tak em. Ka chhûngril chu a hlim veng veng a,a sâwmna pawm tur em chuan ka tling tawk in ka in hre bawk silo . Mahni insit na in ka khat a, kartluanin,ka rilru ngaihtuahna luah khat tu a ni.Nilai ni alo in her chhuah chuan ,ka rilru chu bâwm tawt tak a hnawh phui vek ang mai hian a tawt a.
Duhsaka kal ni a ni tawh bawk si, dar 9 :00am ah hian sipai camp lam ah an kal tawh dawn a,chumi hma ngei a ka hmuh chu a ngai a ni .Chhan na ka pek loh chuan ka in chhir dawn tih ka hre si a. Eng pawh nise Duhsaka kal tur chu ka thlah hrim hrim angai ti rilru in kan in chu ka chhuah san a. Pawn a ka scooty ka ti nung tur chiah chu ka bul ah Msa a lo ding a,in biak a duh a vang in ,kan in bul ṭhutna ah chuan kan ti ti a. Msa chuan ngaihdam min rawn dil in bul ṭan ṭhat leh a duh thu a rawn sawi a. A rilru nat vang in bialnu te han nei lui ngial ṭhin mahse,ka lak ah a in thiam theihloh thu te sawiin ,kan naute piang ve talo vang tal pawh khan kan in kawp leh a ngaih thu a rawn sawi a. Min la hmangaih reng thu min hrilh in ,inneih pui ah min rawn sâwm ta heu mai anih chu . Ka hawi hai nasa hle a,kan la naupang dun si a,chu mai ani lo ,thla 4 lai kan in ṭhen ve tawh a,chutia nupui tur a han in sâwm leh deuh thut mai chu hriat thiam a har ve hle mai .Ka makti a ta lang in sana en na chang pawh ka hre lo ,kan piah naupang te pakhat anu in school a tlai hlau tak a,a kai dawr dawr lai chu ka va hmu a .Kan Naute kha lo dam chhuak ta se tiin ka pum chu ka dawm vang vang a,ngui deuh a ka ṭhu kun lap lai chu Msa chuan ka chal a rawn fawp vang vang a. Chu tih lai in naupang leh anu school kal tur liam ṭep chuan "In ṭan nan minute 5 bak a awm tawh lo ,i kal lo mai zawk dawn a mawni" a ti bawrh bawrh ri chu ka hre pha. Ka rilru ngui tak a ṭang chuan harh chhuak in dar 9 rik nan Minute 5 chiah a awm tawh tih chu ka hrechhuak a . Msa bul ah chuan phawk fe hian " Sipai training chhung hi engtia rei nge?" Ka ti ta daih a,Msa chuan a ngaihna hrelo zet in " kum 3 a ṭang kum 5 ,tinge" a rawn ti ve mai bawk . A reilo ber ah kum 3 em em chu ani kha ka in nghah tir thei tawhlo ,ka ṭhutna ṭang chuan tho in , Msa en chung chuan " Ka tihpalh mahse nang hian tunge ka hmangaih tih chu i hrechiang ber in ka hria Ms " ka ti nui sap a,a lu a bu ringawt .Hmanhmawh deuh in ka scooty ah chuan ka lawn a, Duhsaka in lam pan chuan ka tlan a . Ka hmanhmawh in ka speed pawh sâng tak ani hmanhmawh deuh a tlân pah chuan hone- ka pe ri tuar tuar a, ka rilru chuan , Ani kha a ni Ka thinlung zawng zawng a ka hmangaih awm chhûn chu !!! Ani chauh kha a ni ka thinlung hmutu ,min hrethiam tu chu" ka ti rilru mawlh mawlh. Ka hnung lam a traffic Police ho in min lo hui ding pawh chu ka ngaihsak tawh lo thawk leh khat ah .Ka bek rawn lum puat leh thil ri bur ka hria a,ka khawhmuh chu zawi zawi in a thim ta ria ria a.


A tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)