FÅVANG BY Peki Lelhchhun

Ngaia
Site Admin
Posts: 25813
Joined: April 30th, 2016, 4:07 pm

FÅVANG BY Peki Lelhchhun

Unread post by Ngaia » September 23rd, 2022, 3:42 am

Untitled-1.jpg

FÅVANG (True story)

(Competition 2022)

Ziaktu- Peki Lelhchhun

A kut chuan ka hnung lam a ṭanga min kuahin kei chuan a darah ka lu nghatin lungmuang takin kan hma lam ngaw pui chhah tak chu ka thlir vawng vawng a.. Tlai khaw thim dawn ruai ni berin ka hria mahse hmana a kianga ka thlamuan thin ang khan ka thla amuang leha, kum tam liam tawh mahse chu ka mumang tawi te chuan hmalam ka pan san tak nunhlui min hriatchhuah thar tir leha.. .

"Passport a neihloh vangin sipaiin an man a lo nia"

"Pu Ruata te landline aṭang khan lo biak che a tuma mahse i putea'n a lo chhanga, 'lokal tawh suh itello in hlim takin a awm tawha, ilokal leh chuan kan lo vawthlu duh mai ang che' tiin a lo chhanga.."

"I pasal neih hnu lawk khan a lokal leha, a fanu thlalak tal en min rawn dila, mahse kan hmu zo lo reng reng"

"Ka tiam che.. ka tiam che...."

Chu'ng ṭawngkam te chu ka bengah a rawn ri thar leh a, ka kianga ka pasal leh ka fa te tui taka an muhil sék sék te pawh ngaihtuah chànglo in ka pasal leh fa te'n min hriatpui ve loh ka nunhlui ngaihawmah chuan ka suangtuahna chu a kir leh ta vawng vawng a ni ber mai..



Kum 2004, February thla a ni a, ka thiannu nen YMA Conference Leng khuaa an nghahna ah chuan kan kal ve a, kan vawi-1 kalna a ni bawka kan phur hle mai. Kan thlen veleh kan inbual faia, rawng te kan bawlpui a, zanah Hall a kal turin tlangval pahnihin minlo sawma, kei chu ka insiam mawlh mawlh lai a ni a, ka thiannu chu lo pheiin, " I hman tawh em" a rawn ti a "Aw ka hman" ka ti a, kan inzui phei nghal a. Ka thiannu chuan "Kal ang u, kan hman tawh e" a ti a

Tukverh bula pawn lam thlira lo ding cher lam deuh, lo hawi phei mit leh ka mit chu a intawng fuh ngei mai, en reng pawh tum ila ka ngam lo, mahse a mitmu dum tàk deuh mai chu mawi ka ti. Ka thiannu chuan a titi pui bawrh bawrha, keichu ka ngawi renga, ka hming a hrilh lai pawh chu ka hria, ka lu ka lo bu a ka lo nui ringawta, a thianpa chuan an hming chu a sawi ve a, amah chu Mawia a ni a, a thianpa chu Ruata a ni.


Hall ah chuan kan pali chuan kan ṭhu a, ka bulah a ṭhu a, a kut ka hmu chak ka va melh a, mahse a kekawr ipte ah a kut pahnih hnih chuan a lo zen then.. a dul a kiar em le?? aih aih, a dul chu a thep zaih mai, a t-shirt hak chhanah a hriat theih vek alawm. Ka hmelhriatloh mipa ka be hmasa ngailo a, a ni pawh hi biak hmasak ka tum lemlo, bakah mipa bulah chuan zahzum hmel deuha awm tur

"Kuhva i ei duh em?" awi kuhva te a ei thin ami le? "Aih" tih pahin a hmel chu zak deuh chung chung in ka han melh a, a mithmul dum hlap leh a mize cool tak chu a inhmeh tawp..
"A ei duh reng a nia, ei tir rawh a zak mai mai a nih kha" lal Hlimi tak hi chu.. a kekawr ipte aṭang chuan kuhva pack a rawn phawrha,
"Kha, ei rawh le" zam viau mahila ka nui lo theilo.

Ka thiannu chuan "Chhuak lawk ang u" a ti a, kan pali chuan kan inzui chhuak a, Hall tual a ṭhutna àwl ah chuan kan ṭhu a, rei vaklo kan ṭhut hnu chuan Mawia leh Hlimi chuan "Dawrah kan va kal lawk" an ti a, min kalsana, Kan pahnih chauhin kan awm ta. Kan ngawi renga..


Min be dawn nge kan ngawi reng dawn?? Kei chuan ka be hmasa dawnlo a.. Sawi tur a dap ve a nih chu ka ring tho, a ke a tih chet det det danah.., a aw a thian a, a hmel chu ka en a minlo en ve a, a nui ver ver a, a ha a nalhin a nuimawi tawp.. Kan hma lam chu kan en leh a..
"Inkhel i en ngai em?"
"Aw, en ve zeuh zeuh"
"Premier league ah enge i ṭan?"
"Chelsea"
"A ni maw? Kan ṭan a inang a nih chu.. anih leh ISL ah??" ehee ka hre hlawm teuhlo, Hyderabad tih vel kha a mi kha, sawi sual ka hlau bawk sia
"Ka hrelo ka hmelhriat an awm bawk silo a" ka ti tawp, a nui hawk hawk a, ka rin aiin a nuih a za..
"Ka thianpa pawh a aim in life chu ISL a khelh a nia, tunah chuan LO officer a ni daih" kan nui dun a

Arsi eng de sep sep chu ka thlir dauh dauh a, an mawi takzet.. Lunglen zana thlir atan ka awt zawk hial.. mahse tunah hi chuan ka lung a lenglo a, ka famkim riauin ka hre zawk
"Bialpa inei em?"
"Aih, nang?"
"Bialpa chu neilo"
"A nih leh bialnu"
"Aih, mahse hual ka nei"
"A that chu"
"Tunge han ti teh"
"Aih, ka peihlo"
"Van thatchhe reuh" kan nui dun hawk hawk a. A kiangah hian ka hlim riau.. a hmel te hi ṭha ka tih chi tak, a vun uk khàk te hian mipa a nihna a pholang zawkin ka hria. Thil ho te te kan sawia, dar10 pelhah kan haw a, kan thlenna in thleng min thlah a.


Ka ṭhiannu nen chuan kan mu duna, ka bulah chuan bawkkhupin min en vang vang a,
"Ruata kha i ngaina tiraw?"
"Aw, a fel ka ti tawp"
"Mizo a nilo ania"
"Engmaw... anih chuan..."
"Burma mi a nih kha, hetah a awm char char a mahse a chhungte chu Burma ah an la awm vek, hetah chuan a chhungte bulah a awm a.."

Ka ngaihtuahna a kal thui hle mai.. nie Burma mi nena in ngaihzawn chu a zahthlak deuh alawm.. Ka la naupanga, mizo ngei ka la tawng anga, mizo tlangval ngei pasala neih ka duh, Ruata hi chu ka ngaina a, chuzawng chu a ni mai. Burma mi chu pasala ka neih ka chhungte'n an remti hauhlo ang. Kan kal thui hma in hlat vat ila a ṭha a nimai.


Hma deuhah kan tho a, tui chawi turin tui point ah Bucket nen kan kala, kan bucket kan va line ve nghala. Rei vaklo ah ka dawh ni a lo thleng a, ka bucket chu ka dawha, a khat ta.. Khai sawn ka tuma mahse mipa kut chak deuh chuan a rawn khai sawn nawlha, a hmel chu ka en vat a, Ruata.., avan buaithlak, minla nuih ver ver zui.. Ka thin a phu dawt dawt a, kalsan tumna thinlung ka put vang em ni ka ngai thar riau lehnghal..

Tui kan chawi ngah hnu chuan pawnah kan ding duna
"Ka ngai lutuk che a" awilehh..keipaw'n ka ngai!! Ngatinge mizo inih ve mai loh le?? Min en renga..
"Ka thusawi chu ihria em?"
"Umm..englo.. ngaihzawng neih ka la duh rihlo a.." a hmel pawh en ngam tawhlo chuan in chhungah ka luhsan a.. ka tha te chu a khur der der a, a lungawilo viau ang aa.. engthil nge thleng ta hi?? Burma tlangval zún a ka uai tak mai!!


Chhuna kan inkhawm naah te chuan a hmel hmuh tur reng reng a awmlo, mi tam tak karah chuan ka lung a leng vawng vawng a ni ber mai. Chawhnu inkhawm laiin ka bulah Mawia a rawn ṭhu a,
"Iduh ve dawn a maw ka lo tia" a rawn ti su su a, ka ngawi reng a
"Inah a awm a, a mu reng mai" a ti leha, chhan ngaihna pawh ka hrelo, a awmna ka hriat chu a tawk viau..
"A damlo a, va kan ila"
"Awihawmloh" ka nui tawp..
"Ka ti tak tak, vawi khat tal hmu leh la, i ti hrilhhai lutuk alawm"
"Nia, lokal ru, va kan ang u" Hlimi chuan a rawn ti sawk sawk a. Chàk angreng, huphurh deuh si in ka awm a, mahse ka hmu leh ang, ka duh dan aiin ka thinlung hi a lal zawk a ni e.


Hall kan chhuahsan chu pawnah chuan kan damloa chuan nula pahnih a lo kawm a nih chu ! An hlim hmel em em lehnghal. Min rawn hmu vata, a rawn phei nghal, ka hmuh chakna a kiam.. melh pawh ka melh duhlo, "I damloh kha" Mawia'n a ti su su chu ka hre phak.. Hlimi chuan, "Hawh u, Thlanmualah han leng ang u" a ti a


Thlanmual lam pan chuan kan chho nghal a, Hlimi leh Mawia chu an kal hrang leh nghal nalh.. Thlan lung chhàwrdawh a an siam chu a kawk a
"Hetah hian ṭhu ila"
"Ka peihlo, iduh leh i hmeichhe biak te kha ṭhutpui la.." rum deuh hlekin ka melha, a hrilhhai hmel lek lek..
"Induh lo teh, min ngaih ve tho kha.." a mitmeng chu ka en a, a lài deuh, a thusawi chu a ringhlel deuh pawh a ni mahna.. Mahse a sawi dik chiah a ni. Thlanlungah chuan kan ṭhu dun a,
"Ai en ka thiam a sin"
"Awihawmloh ee"
"Khawimaw ikut" ka kut chu ka pe a, ka kut chu a kut pahniha vuanin uluk zetin a en a
"Pasal fel deuh inei dawn a nih hi" ka lo nui a,
"A ni maw, avan ṭha ve..chuan engtin zel..?" A mit a tizim a, uluk zetin ka kut chu a thlèk a..
"Fa pali i nei dawn a nih hi...aaa panga pawh a ni thut thei" ka nui awr awr a, "Awii ivan thiam em em" ka nuih lai chuan min lo en renga, ka zak deuh a, ka nui chu ka tawp a, thlan vel te chu ka melh kual a, ka kut chu a la vuan reng a, a kut chu a lum vung vung a, kei ka kut a hit si..

"L.c..".
"Um, enge"
"Ka ngai ngawt ang che.." ka ngawi reng a, a rawn tawlh hnai a, ka bek ah kuaiin a darah ka lu chu a kuai bei a, ka induh vak peih tawhlo, engmah sawilo mahila ka che zia leh mitmengah ka haw lo tih a hrethiam tlat alawm.

"I bialpa nih kher ka beisei lo, i pasal ka nih theih chuan ka duh tawk" ka nuih a za tawp, bialpa neih ka la duh loh thu te kha ka lo sawi vel khanglang a.. Ka biangah min fawp zeuha, ka pawiti hranlo..a bulah hian ka hlim riau a, enge ka hma hunah lo thleng zel dawn hrelo mahila, tunah chuan ka hma hun tur ka lungkham peih rihloa, a kianga thlamuang taka awm hi ka thlahlel a ni.

Ka pa in "Hnam dang pasala neih loh tur, mizo an nih chuan eng ang mi pawh ni se kan pawm thei em em ang" a tih kha ka bengah a rawn ri thar a, mahse Ruata hi chu mizo ang tho a ni in ka hria, a hmel te hi a ṭha in, a nungchang te hi a mawi a, a polite bawk si, a kianga awm te a care thiama, a bik takin ka laka a nungchang hian min hip a, ka chhungte paw'n hmu se an pawm theih mai ka ring a ni.

Kan ṭhian te nui ri awr awr kan hria a, kan in en a kan nui ve tawp,, a rawn thle hnai a
"Haw tawhlo mai la.. ."
"Ka haw tawhloh te'n..."
"Ka bulah i awm anga, min nei duh angem?"
"Hriat pawh kan la in hriatchian loh hi"
"A nimaw, keichu ka hmuh tirh che khan ka hrechiang nghal vek che a sin"
"I daw emai, chutiang lekah a inhriat nghal ngawt theih loh"
"Chuvang chu alawm pasal tlak ka nih"
"A in tuhà lo ee" nui chungin ka en a
"A in chaw be lo tiraw?"
""Ummm" kan nui a..

Min kuah nghet sauh sauh a, a ban ka vawn deuh ṭungna chu phelhin ka kutah chuan a hum leha,
"Ka fet tur i veng renga, inthlahdul rawh, i duhloh zawng eng thil mah ka ti dawn hleinem" a ti dam duai a

Thlifim thaw heuh heuhin thing hring mawi tak tak a chhem rik siau siau te chuan keini pahnih hmangaihna par chhuak ṭan tir chu min rawn ṭawiawmin lawmpuina min rawn hlan nimai in ka hriaa, tuna kut thahrui ngah tak min kuah mek tu hi ka suangtuah rama a changtupa ṭhin kha a ni ngei ang...

_______


Ka tawn thar di Ruata nen chuan kan cham chhung reilo te chu kan in zui chawt a. Thinlunga lal thar nei chungin ka haw a, ka hlim veng veng a ni mai.. Ni-2 lek chhunga ka thinlunga lal ram rawn din nghal thei tu hmel leh che-zia suangtuah reng reng chuan ka hun ka hmangral a, ka ngai vawng vawng ṭhin. "Lehkha ka lo thawn ang che" a tih te kha ka ngaihtuah a, kan ina lo leng lut apiang mai chu beiseina nen ka lo melha, Ruata lehkhathawn an lo keng mial lo maw' ti rilru in, a kutziak a mawi angem le? A kut ngeia min ngaih thu a ziah te ka chhiar chak takzet a sin.. nge ni a a sawi zo a, a theihnghilh lehnghal em ni zawk?? Min ngai leh thlahlel hmel em em a a awm te kha a lo ti der lek a lo ni lo maw le? Ka hawsan rual khan min theihnghilh ve ta nghal mai a nih dawn hi..



Inrinni zan ani a, kan chhungkua in T.V kan en ṭhap a, dar 8 rik hma deuhin ka ṭhiannu a lokal a min hrilhru a,
"An lokal"
"Tu te maw?"
"Ruata te.." ka lawm zia chu,
"Min nghak reng a nia, phei vat ang" pindanah ka luta, darthlalangah ka in en, powder te ka inhnawih a, ka sam ka khuih bawk, ka chhuaka
"Nu, Hlimi te inah ka leng dawn a nia" tih leh chhuah kan ruala.


Ruata te'n minlo nghahna veng hmawr lam pan chuan kan phei zela, awilehh, ka hmu ta.. ka ngaih em em-a chu. A bul ka thlen chuan ka lai thar leh deuh, ka kutah a lo vuan vata, min en vawng vawng a
"Min en reng suh.."
"I hmel hi ka by heart dawn"
"Ila by heart nange? keichu ihmel ka byheart vek tawh" ka mit a hup a,
"Anihleh, ka mithmul engzat nge?"
"Pathum...."
"Avan dik emm" kan nui a, a bulah ka nui leh thei ta..min kuah vawng vawng a..

"Lehkha ka lo thawn ang che iti sia, i lehkhathawn ka va dawng silo ve"
"Keimah aiin lehkhathawn a mi iduhzawk?"
"Umm.." nui chungin ka melh a
"A nihleh ka haw anga, lehkha ka lo thawn ang che" kal a tum dera, ka dawm a
"A ngailo, tak takin minlo thawn tawh rawh aw, lo thawn tur i hmuh remchan veleh"

Ka chalah a fawp vawng vawnga, a awm ah min kuah bei a
"Lehkha in thawn a tul tawh dawn hleinem, ka bulah i awm tawh dawna.. Lo hruai tur che in kan lokal a nia"
"Engmaw?(ka nui a) iti tak tak lo"
"Ka ti tak tak, ka ngai lutuk che.. ka hmangaih che L.c.."

Ka van lawm em! min hmangaih thu a sawi a nia, ka ngaih em em leh ka ngaihtuah reng ṭhin hian
"Keipawn ka hmangaih che" min kuah leha,
" Ka nupui ni rawh aw, ka kiangah i awm duh em?"
"Tunah chuan a la chi loh, kan la naupang sia"
"I pitar hunah a mi neih i tum?"
"Chutiang a nilo, kum2/3 tal te in ngaizawng ve phawt ila.."
"Chutiang a rei lutuk" uluk zetin min en renga


"Lo hruai tur che in kan lokal ve vang vang a nia, minti beidawng ang maw?"
"Ruat, innei tur chuan kan la naupang mah mah alawm, kum20 pawh kan la tlin loh hi, kum25 ah nei rawh min ti ka chhungte chuan"
"Enteh, nupui ka ru dawn ka tih vangin ka ṭhianpa in a Bike min hawhtir phal a, i duh leh siloh chuan a zahthlak viau ang.." ka nuihza ka insum theilo
"I pu Fela Bike a nilo ami?"
"Nilo, ka khawih a phal tawh hleinem"
"Engatinge"
"Ka tlukpui ṭhin a"
"A nih chuan keipawh min tlukpui ang tih a hlauhawm"
"A teuhlo mai, ka khalh fimkhur viau ang ka phurh che chuan" ka en renga, hmelṭha ka van ti tak..

A ṭhianpa a lokal a, "Ruata, haw vat ang u kan thleng tlai lutuk ang"
"Awle awle, hei ka sawm hlawhtling ṭep"
"Lc, i zui haw duhloh chuan Bike hawh man a ṭhing ṭeuh dawn a nia"
"In ho emai, mi bike te hawh reng reng"
"Kan hawh lohin, mi JCB a mi kan rawn hawh ang??" anni ṭhian dun hi chu thutak rei theilo..
"Lo va kalsawn teh" Ruata'n a rawn tih chuan a kalsawn veleh nghal mai bawka, "Bawihte, kal ila, ka bulah lo haw rawh..aw..iduh tiraw??" uluk fahranin min en a, a thutak hle tawh tih chu ka hria, mahse chuti maia pasal nei tur chuan ka va'n la inpeihlo tak emm!
"Ihmaw.."
"Aw, enge" min van chhang rang
"Lo han haw leh phawt ula, nakinah la rel
ṭha leh zawk ila"

A ngawi renga, ka kut a vawn chu a thlaha, "Awle.. hlim takin i awm dawn nia" chu ṭawngkam chuan min ti nghing dàwtin ka hria, akal tur chu a banah ka vuana, "Ruat, khawngaihin ngaih loh lamin ngai suh, min hrethiam ve la.." "ka hrethiam che" awiii avan hahthlak tak emm.

Bike a a lawn leh a tinung vel chu ka lo en reng a, min melh rum ul mai, mahse engang pawn min melh rum se e mengmawi ka ti tho tho.. Ka bulah a rawn tawlh hnai a,
"Lo lawn rawh ka hnungah hian" ka rin loh dan daih
"Ruat.."
"Engmah ka ngaithla peihlo, lokal la a nimai"
"Enteh.."
Ka thiannu chuan ka beng bulah "Kal mai rawh, i chhungte chu ka kutah dah rawh, ka lo sawifel vek ang"
________


"Minlo kuah rawh, Bawihte" a kawngah chuan kuahin a hnungah chuan ka bei a, chu zan thiang nuam leh thli thaw heuh heuh karah chuan ka hmangaih ber nen nun bul ṭan turin an khaw lam kan pan mek a ni. Ka hlim viau nangin ka chhungte'n engtin tak ngai ang maw??


Tunah chuan ka pasal a ni ta, a bulah chuan thlamuang takin, a ban khamin ka mu a
"A tirah te khan min hnial kual vela, lokal ṭhat ve mai mai tur che a nia, mi tawhkhirh nu" ka chalah a pen kerh a
"A na, ka tawh a khirhlo"
"Khirh, khirhi.." kan nui a. Min fawpa, ka biangah, ka chalah, ahnuhnung berah ka hmuiah dim tak leh àm tak chungin min fawp a, keipawh chuan ka thiam ang angin ka chhang let ve a..


A tukah chuan 'mo' thar lawm an lokal nek nek a, min chibai hlawm a, ka zak viau nangin ka theihtawp chhuahin ṭha takin ka lo chhàwn thei ve hlawm a, an fel em em hlawm vek mai.

Tlai lam a ni tawh a, ka inbual zo ka inthlakna vel ka dahfel mek a, "Lc-i a awm em?" choka lam aṭanga ti tu aw chu ka hriat ṭhan em em a ni. Ruata pheikhawk hrui suiha kun mek chuan min rawn en vata, ka bulah lokalin min kuah a, "I chhungte an lokal a nimaw?" a ti a, ka lu ka lo bu ringawta, muangchangin room a ṭang chuan kan chhuaka, ka u ka cousin min hruai turin a lokal a ni.

Ruata chhungte chuan ka u hnenah chuan, "Lc-i hi Ruata tan hian kan duh em em a, an mahni pawh an in duh tawn viauin kan hria, la hruai letlo mai la, palai te kan rawn tir hmasa phawt dawn em maw ni le??" an ti a..
Ka u chuan "Aa nia hei nula en pawha kan la en lohin pasal a nei ngam ve ta chu a nia(h), engpawh nise ka'n haw pui phawt anga.. chanchin kan inhrilh zel dawn nia" a ti a

Ruata hi ka ngaiin, ka thlahlel em em a, amah paw'n min thlahlel ve viauin ka hria, palai te an lokal anga, inneih thuam famkim nen thu te kan tiam dun anga, fa te pawh kan la nei ve anga, kan fa hmingah chuan nu leh pa hming kai kawpa an phuah ṭhin ang khan phuah ve dawn ta ila, a in millo viau angem le?? Amah nena kan fa chuan eng ang hmel nge a put ang le?? a hmelchhe miahlo ang, Ruata hi a hmelṭha si a... Chutiang vel neuh neuh ka ngaihtuah chhung chuan kan khua chu kan thleng ta der mai..


Ka beisei ang a nilo a, ka suangtuah leh duhthusam chu mangchhia ah a chang zo ta.. Burma mi chu ka chhungkua, laina hnai zawng zawng te chuan an pawm theilo bur. Zilhna leh fuihna aw-ka chu kil tin aṭangin ka dawng ta mawlh mawlh mai, ramsa pasalah ka nei ta emaw tih mai turin. Mahse ka hmangaihna hi ṭawngkam nem ber emaw ṭawngkam feikí bàr paw'n a ti dài thei lo, ka benga-rawngah hian a lut hlawm mawlhlo a ni.. Min hmangaih a min zilh hau tu te chu tumah ka demlo a, ka haw heklo, min duhsak tu lo chuan min zilh ngailo' an tih kha. Mahse.. ka van ngai si em!! Mo thuam famkim nena din dun chu khawilam, a hmel pawh ka hmu thei tawh dawn em ni????

Ruata tello chuan ka ruakin ka mal ngawih ngawih a ni ber mai. Nie, a tello chuan ka khawvel hi a ruak a ni.

______


Kar-2 pawh a liam hma in ka ṭhiannu hnen a ṭang chuan signal ka dawng leh ta tlat mai. Minlo nghahna hmun tur pawh ka hria, min lo ruk nawn leh a tum chiang lutuk, a lokal leh pawh ka lo beiseilo a, mahse a lokal leh si.. A lam pana ke pen duhna chuan min túr út út a, mahse kawngkapui aṭangin ka chhuak theilo, ka chhungte hmuh laiin ka chhuak theilo bur.. Engtin nge ni ta ang le??

Room ah ka luta, ka teikual a, ka awm hle hle theilo, makeup tlem ka kekawr ipte ah ka ak ru a, chumi zawh chuan ka thawmhnaw tlem ka pack bawka, tukverhah ka vawmthla tawp a, ka vawmthla zo chiah tih ah ka nau a lo lut, kei chuan zahzelah ka sam ka lo khuih a, a zirlaibu a la a, a let leh nghal. Ka nau a let leh chiah tih chuan keipawh ka thawmhnaw zuiin ka chhukthla ve nghal a, ka chhuak thei ta... Ka nau te pawh helai tukverhah hi chuan an tei ngun lutuk..


Ruata'n minlo hmuh chuan a lawm hmel kher mai, ka lam panin a lo tlan vat a, min kuah a, "Kal vat ang, i chhungte'n an zawng palh ang che.." A ngai te bawkin an khaw lam pan chuan kan víng chho leh ta.. .Ka chhungte rilru tur ka dàwnlo a, keimah vangin eng ang takin nge an rilru a hah ang tih lam ka ngaihtuah heklo. Ka hmangaih Ruata kiangah chuan ka hlim em em a, a chhungte an fel bawk si.


A tukah chuan inah kan awm a, keichuan hmun ka phiat meka, kan tualah chuan Bike a lo dinga, ka ni fapa ka u Rina a ni, inchhungah chuan a lo lut a, min hruai haw tura ka chhungte rawn tirh a ni tih ka hre nghal.
"i ṭha maw Lc?"
"Aw ṭha e" ka nui lui a
"Va insiam la, i haw chho leh phawt mai teh ang"
"Awle" room ah ka lut nghal a, Ruata chuan minlo zui lut ve nghal
"Kal suh, min kalsan suh" a mit ah tak ka en a,
"Engtin nge ni chuang ang? tihngaihna dang a awmlo a nih hi" Min en vawng vawng a. He a mitmenga min thlakhlelhna lo lang ṭhin hi a lawm kalsan theilo a min siam tu chu. Pindana extra kawngkapui an dah chu kawkin
"Sawtah sawn chhuak ila, tlanbo mai ang"

Ka bíng mup mup in ka inhria, nie, enge ka tan ṭha anga, eng kawng zawh hian nge ka nunah hmasawnna thlen ang?? chutiang lam chu ka ngaihtuah theilo, ngenngawl taka min en ngawih ngawih tu mitmeng chuan duhthlang theiin min siamlo a, ka chhia leh ṭha hriatna hmang turin rilru fim min puttir thei heklo. Amaha in nghatin, a duhthlan kawng chu ka zui zel mai a ni.

_______


"Enteh, saw Fanghma a rah a nih saw, ka va lo aw"
"Lawk..lawk"
"Enge..?"
"Thlamah khian lo han chho rawh, ka lo lo ang, nang chu lo han chawl hahdam rawh, zanin chu khitah khian kan riah mai angai ang"
"Ka hreh hleinem, khawiah pawh ka riakin chaw ka ei thei alawm" a nui a, ka biangah min piai zeuha
"Anih chuan lo han chho rawh le"


Thlam nuam tak a ni, a neitu te chu mi chengvawng tak an ni ngei ang. An tapah chuan Thing an thawlh fel then a, rapchungah thing tlem an hà bawka, khum awmlo mahse chhuatah hian kan mu thei mai anga, mahse yes, buhfai a awm hlauh.. Dekchi ung deuhah chuan buhfai a khat ṭepin a lo awm hlauha, buhfai a awm chuan a tawk viau, rilṭam lutuk tur hném ah. Ka hawikuala, an thing hàkna sira lighter ka hmuh chuan ka lawm hle mai, mei chhem tum chuan ka bei ngat ngat a, Khawnvartui a awmloh a vang chuan ka ti alh hleithei lo, "Khawimaw keiman" ka tawlhsawn a, thingther a la khawm a, a chhemalh ta hluah mai, "Kha kha nimai a lawm" a nui ver ver a, ka tan a nuihmel aia mawi hi a awm chuanglo


Nilenga kan kal avang chuan ka chau viau a, chhuatah chuan bang nghengin kan ṭhu duna, a darah ka lu nghatin ka lo muhil a, ka harh leh chuan chhuatah a kawr lukhamin minlo muttir a, thlama puan thehlep deuh awmchhun chu minlo sintir bawka, rawng a lo bawl chu niin
"Ilo harh tawh maw?"
"Aw, rawng ibawl a mi?"
"Um, ka bawl zo chiah, i ei tui loh chuan pasal rawngbawl thiamlo ka ni dawn a nia, chuvang chuan tui deuha i ei a ngai"
"Awle, ka ei tui viau ang, ka hmangaih zual sawt che"
"Rawng ka bawl ziah ang" a nui ṭha duhlo hmel chuan ka nuih a ti za zual
"Mi in thaibawih an ti dawn che a sin.."
"Ka tet te aṭanga ka thil tum chu thaibawih hi a nia" awii he mihring rilru chak deuh hi chu ka hnial hneh meuhlo, ka van nui nasa tak


Zanah chuan mutna kan siama, phah tur a awmlo a sin tur puan thehlep deuh chiah a awm a, lukhamah chuan a jacket chu kan hmang anga, aman a kham anga, keichuan a ban ka kham ang tiin kan rel a, kan mut hma chuan "Ka ṭawngṭai lawk dawna, nangpawh ṭawngṭai ve rawh aw" ka ti a, ka ṭawngṭai a, ka ṭawngṭai uluk ve hle a, mahse ka samah a lo zut a lo zut a, ka ṭawngṭai a ti tawp tlat, ka meng tawpa, rum deuhin ka melha
"Enge ṭawngṭai laia minlo tihbuai chhen a??"
"I ṭawngṭai rei em alawm"
"Chupawh ni se, ka rilru ka pe thei hleinem"
"A nihleh ṭawngṭai leh rawh"
"Ka peih tawhlo, sawtah sawn va mu rawh, hetah hian ka mu ang, ibulah ka mu dawnlo" fello viau mahila ṭawngṭai lai in tihbuai chu ka duh miahlo. Ka thinrim chu a hlau ve deuh a niang a ngawi reng a, a tho thut mai, ngati nge le???

"Ka haw daih anga a nimai" ehee, a chhuak daih..


Keimah chuan ka ṭhu ngawi renga, minute-2 hnu velah a lo lut leh a
"Haw se minti maw?"
"Tilo e, chutiang ka sawiloh kha"
"Min dan pawh itum hleinem"
"Tum e, i chhuak rang sia, ka dang hmanlo che alawm" a mu túm búr a. A ban chu ka kham turin ka dah rema, kham ka tum chiah a la sawn a..van naupangchhia tak.. Ngawi rengin a bulah chuan hnungchhawn zawngin ka mu ve a, titau thlem ka peihlo, ka thiamlo, a mahin a awm dam veleh mai ang. Hmeichhia zawkin thlem hrut hrut an ngaih fo chuan an puitling theilo palh ang..


Rei vaklo ah chuan ka lu chu rawn chawiin a ban chu min rawn khamtir a, ka kawngah min rawn kuaha, "Hmeli, min duatlo si" ka nui tawp "Naupang lian inih kha" kan ngawi vang vang a


"Kan ramah chho mai ang aw??" ka phu deuh zawka, an ramah maw?? tumah ka hmelhriat dang awmloh na ah, ka mizo pui hmel hmuh tur pawh an awm ka ringlo.. Bakah, a chhungte'n mizo ṭawng an thiam awm siloa,
"Huphurh duh suh, hrehawm iti lo ang, ibulah ka awm reng dawn alawm" a awm ah ka bei a, ka chhungte ka ngaihtuah chhuaka, keimah vangin an rilru a hrehawm viau ang..mahse Ruata hi ka hmangaih si a, ka rilru avan buai tak em!! An ramah kan chho a nih chuan kan let leh angem le? Ka nu leh pa, ka nau te ka hmu leh thei angem? unau a upa ber ka ni ve si mahse ú nih ka va'n tlinlo tak em...
"VISA a ngai em in rama luh nan" lo ngai hlauh se, nei si lo se
"Ngailo, Passport a ngai a, mahse ka neilo"
"Kan lut thei dawn ami?"
"Thei mai ang, thlîm dan kan zawng anga, kan luh theih mai ka ring. Hmanah pawh ka ṭhianpa nen kan thlim tawh alawm"

_______


A tukah chuan hma takah kan tho a, ka pasal te ram Myanmar pan zai chu kan rel ta a, Sailulak kaltlangin, Khuangthingah chutiang chuan khaw tam tak kan kalpela, Motor/Bus a remchang a piangah kan béi ve zel a, Tlang khua ah kan riaka. A tukleh tlai lamah chuan Vaphai, a hming sawi ringawt pawha rilru a Fiara tui' lo lang nghal ṭhin chu kan thleng ta. Kan thleng hla tial tial a, ka chhungte hipna a na tulh tulh a ni mai, lunglenna in min bawm a, ṭah vak mai te ka chak. Ka hmangaih kiangah awm mahila, ka chhungkua te lungdamlo takin ka kalsan si a, an rilru a hrehawm viau ang, min ngaihtuah dawn si a..


Tlai khaw thim dawn hnaih chuan Lui lian tak chu kan thleng ta.. Lui mawi tak kiangah chuan kan ṭhu chawl a,
"He lui hi Kaladan River an tih ṭhin chu a ni a, Chhimtuipui an ti bawk ṭhin (ka lu ka lo bu a)
"Ka vawikhat hmuhna a ni"
"Northeast India State pali Myanmar, Arunachal Pradesh, Nagaland leh Mizoram te ramri inṭawm a ni. He tuipui vang hian nupa kawp sarih an inthen phah an ti ṭhin a sin, an nupui ten an lo thlir tui lutuk a niang" a nui ver ver a
"Rawngbawl ngaihsaklo lekin"
"Nichiah e.."
"Han sawi zel teh" a biang a rawn dawha
"Chuk phawt la" a biangah chuan ka chuk a

"Chuan, he lui hi Mizoram khawchhak lam a ṭangin a luang ṭana, khutah Chin State leh Rakhine State, Myanmar thleng a luang a ni...He lui kan kàn hunah chuan Myanmar ram kan lut a ni tawh mai (ka mit deuh sulhin ka hria) ka ram chu i ram a ni ve tawh a lawm tiraw" "Ni e" zawi te in ka ti thei hram a
"I chau em?"
"Aw chau" ka zep peihlo ka ke a kham na urh vek
"Lokal teh" a hnung a rawn dawha
"Lokal rawh, ka pua ang che" Min pua a, "Muhil rawh aw, ka paw char char ang che" a hnungah chuan ka beia, ka mit ka chhinga, thli a lo thaw heuh heuh bawka, ka dam sawng sawng mai.. Chumi zan chu mi thlamah kan riaka



Zanlaiah ka harh hlawla, Ruata lam hawiin ka in her a, a muhil hmel chu ka en renga, ka chhungte ka ngaihtuah a, ka tawt up up a, ka thinlung a chi-ai zo a, lehlamah Ruata lehlamah ka chhungte.. Ka kalna hmun an hriat hunah engtin tak ngai ang maw?? Ka rilru hrehawm lutuk chu muhil theilo in ka let ka let a, khawvar dawn hnaih chuan ka muhil veleh hram a

Ka harh chuan Ruata chu a lo insiam meka, keipawh ka tho a ka insiam ve a, kan chhuak leh nghala. Lui kan thleng dawn, ka thinlung ipik kha a la reh theilo, ka so bulh bulh nimai in ka hria, ka ding a

"Ruat.." a lo lehhawi vata
"Enge, " a lo let a, ngaih ṭha lo hmel deuhin min en a
"Na inei a mi?"
"Aih, let leh mai ka duh"
"Engvangin?" a makti hmel leh a ngaihna hrelo hmel chu ka hmuh hmaihlo, ka insum theilo, ka mittui a lo luang zawih zawih a
"Ka chhungte ka ngaihtuah a ni, an rilru a hrehawm dawn lutuka" ka kutah a rawn vuana
"Engtikah emaw ichhungte hmu turin kan let leh dawnnia" ka lu ka thing a
"Aih, an remtihna lo a pasal neih hi ka tan a na emai, ka thei tawhlo" leiah chuan ka ṭhu tawpa, amah chu a ding ngawi renga.. .minute-5 vel dawn chu aniang chutiang chuan ngawi rengin kan awm a

"Let leh rawh, iduh phawt chuan" a hmel chu ka en vat a, chu thu a sawi chu mak ka ti lutuk
"I tello a damin ka tan awmzia a nei dawn chuang hleinem, hetah hian ka thi anga a nimai" Lui lam pan chuan a kal a
"Enge tih itum" min chhanglo, akal zela
"Ruat.. . Ruata.... " ṭap chungin ka au tuarh tuarh a, luiah chuan a lut a, a dai thuk zel mai si, ka van mangang tak em!!

Hmanhmawh deuhin ka tlan phei a, ka va kuah chawt a, "Mi à, mi mawl pa" ka ti a ka ṭap a, ka lam a rawn hawi a, min kuah let a "Ka kalsan lo ang che, ibulah ka awm ang, hetiang hian awm tawh miah suh" ka ti a. Tui a ṭang chuan kan chhuaka

"Ka tello a awm izuam bik a nimaw?" min melh rum kher mai, ka chhanglo a, a áwm ah chuan ka bei a, min lo kuah vat a, "Ka hmangaih zia che hi hre ta che" a ti a

Chhak lamah min chhoh pui a,
"Khilai khi a thuk lo a, kan daikai thei mai ang.. hlau suh aw" ka lu ka bu a. Ka kutah kaiin tui chu kan dai ṭan ta, min chím sang tial tial a, ka hlau riau mai, min rawn en a, ka hlau hmel deuh chu a hrethiam a ni ang, "Lokal rawh ka pua ang che" a ti a min pua a, muangchangin min kalpui a, nghet deuhin ka kuah tlata, kan dai kai thei ta..

Ka hawi let a, ka thlir vawng vawng a, ka ram ka chhuahsan ta.



Myanmar ram kan lut a ni ta der mai. Mahse Sipai hmachhawn tur kan nei, keini lah kut ruakin kan kal si, kan vanneih a siamin sipai ho chu kan thlîm thei hrama, passport checkna hmun chu kan pumpelh thei hram. A hnu ah chuan minlo tidinga min check tu tawng leh neuh neuh mahila Ruata chuan engtin tin emaw bia in kan kaltlang thei zela, Ruata chhungte awmna Tahan lam panin kan kal zela, ka la kal ngaihlohna ramah ka han lut ve rawih mai chu a ni a, ka lo suangtuah ngai miahlo a sin.. Ka mumang te pawh a ang rum rum alawm.


A tawpah chuan Tahan chu thlengin, an inah ngei kan lut ve ta. A chhungte pawh an lo fel hle mai, nau hmeichhia kum-15 mi leh u mipa a neia, a u chuan zu in a chínga, a ṭhalo takzet. Zan-1 pawh rui chungin a lo haw a, buaina siamin Ruata nen an insual buai deuha, ka lo hlauin ka tha a khur zawih zawiha, Ruata'n min hmuh chuan min khawngaihin a in bengdai thei hram a ni.


An ramah hian zu a zalen hle a, ṭhalai chu sawi loh putar pui pui an han rui ṭhin ka hmuh te chuan ka rilru an ti na ṭhin hle. Kan ramah ngei pawh an fa te ruihhlo in a tihbuai vanga nu leh pa lungngaia rúm vawng vawng ka hre nual mai, an fa duatlai ruihhlo in a tihbuai vanga an rilru nat zia chu.. He'ng ruihhlo runthlak hian maw eng thil ṭha mah a chàw-chhuak silo. Min rún a, kan ṭhalai duhawm tak tak te a eichhia a, dam chawhnu lam hun hmang mek tawh te pawhin an bansan hleitheilo. He'ng ruihhlo bawiha tang tawh te hian chhuah leh an van harsat tehreng em!

Tém chhinlo ila, hnawl ngam ila, a báwiha kan lo tang tawh a nih pawhin bansan ngam ila, chutianga hnàwl a, bansan ngam tur chuan mitínin chakna leh theihna, huaisenna kan nei ṭheuh si a.


Kan rilru leh thinlung hi kan ven ngun a van ngai tehlul emm! Kan ven loh chuan Setana'n min luhchilh ngam em em na hmun a ni si a. Kan thinlung ruakah lo lutin kan pànna zawnah tâwktarh itawm tak min rawn hlúi ṭhin si a..

______


Myanmar chu ka rin aiin nuam ka ti ve hle a, zan-1 pawh Ruata cousin fapa birthday lawm naah kan kal ve a, midang pawh an lokal ve nual mai. Naupang an tam zawk nangin puitling pawh tlem a zawng chu an lokal ve a, midang te chuan "Mizo ini maw" minti sap sap a, birthday cake te kan ei zawh hnu chuan zai turin min ti ta tlat mai, mizo hla an ngaithla chak a..


Awle, thiam vaklo mahila kan sa ve mai ange ka ti a, Vanlalsailoa hunlai te a ni bawka, a hla "Ka di, ka parmawite" chu uluk zetin ka sa a, an ngaithla ulukin thiam min tih ve hmel tawp.. Ka sa zo, an la kham lo, keipawh ka zai tui phian, "Hmelṭha" ngei mai kha ka sa leha, min lo sakpui dual dual a. Kan hla te pawh an lo ngaithla ve nasa a nih dawn hi.


Ka kalna apiangah minlo lawm viau zela, Mizo ka ni tih an hriat te chuan min ngaihlu thiam em em a, chu chu nuam ka tih chhan pakhat a ni. Min ngaihlu a, min zahder thiamtu te kiang hi a nuam ṭhin reng a ni.




Ruata te chuan Huan zau nuam em em mai an nei a, nitin deuh thaw kan kal ṭhin a, thlai chi hrang hrang an chínga, thei chi hrang hrang a awm bawka, Serthlum, Grape, Apple, Dawnfawh, Lakhuihthei, adt.. An ram leilung leh boruak hi a ṭha aniang thei leh thlai chitin mai hian an ngeih em em vek mai a ni.



Ruata nen hian ṭhian ang maiin kan titi dun ṭhin a. Ni-1 pawh huan kan thlo fai a, chawhnu hérah kan chawl a, thing hlím hnuaiah kan chawl duna, kan titi melh melh a,
"In ram hming hi an thlak tihna a nimaw?"
"Aw, Sipai Sawrkar hian an thlak alawm, kum 1989 khan Burma ni ṭhin kha Myanmar tiin an thlak a"
"Nih chu, a khawi zawk hian nge ka sawi ang tiin ka lo buai deuh ṭhina."

Pi Aung San Suu Kye chanchin te a sawi kaia, ka lo ṭahpui a,
"House arrest in an hreng char char mai a ni maw?? ka van khawngaih tak"
"2002 khan an chhuah zuaia, mahse politics thila a la in hman zel a vang khan nikum hmasa(2003) aṭang khan an hreng bet leh..(a ngawi vang vanga) a bansan lo ang, kan ram politics ṭhalo tak hi a veiin siamṭhat a duh takzet a ni. Amah hi a tum a ruhin hruaitu ropui tak a ni bawka, mipui te hian kan zahin kan ngaisanga, kan thlawp tlat bawk a ni."

Pi Aung San Suu Kye, amah chauha a khawsa vel tur chu ka mitthla a, chhuak theilo in, a pasal leh fa te pawh thlahlel hleithei lo in, a ram leh a mi te a hmangaih vangin hrehawm nasa tak a tuar a ni si a.. Keini ram hruaitu te ah hian a ram leh a mi te tana tuar ngam awm ve maw??

"Democracy (mipui thlan sorkar) in neih thuai theihnan ka lo ṭawngṭai ve ang"

"Awle, nia ṭawngṭaina hian thil a ti thei a sin.. mahse enteh, ka ngaihtuah mai mai zela, kan ram mipui te hi keimahni zawnah te te hian kan sual ve hlawm si a, hruaitu ṭha nei tlak pawh kan la nilo aniang ti te'n ka ngaihtuah mai mai thin. Kan rama roreltu leh hruaitu chu tupawh nise engkim chunga thu neitu leh roreltu dik tak zawk chu Pathian a ni si a."

Ka pasal thusawi chu a dik ka ti takzet, roreltu leh engkim chunga thu neitu chu Pathian a ni. Keini mihringte hi chuan eng ruahmanna pawh lo duangin, duhthu te lo sám ve ṭhin mahila, chu kan ruahmanna leh duhthusam hlawhtlinna chu Pathian kuta awm a ni a, kan thinlung hi dik hmasa phawt mai se, engkim a rawn dik chho ve mai dawn zawk a ni.


______


Hun leh ni te chu a ral ve zela, thla-3 dawn ka pasal te ramah chuan ka awm ve ta. Nikhat chu ka nu hnen aṭangin lehkhathawn ka dawng nawlh mai.

To,
Mami(ka chhungte chuan mami ti vekin min au)
Burma ah in chho tih kan lo hriaa, i chhungte pawh min ngaihtuah miahlo a hetianga i awm mai hi amak kan tiin kan rilru a na khawp mai. Nangmah vanga i pa mittui hru mawlh mawlh lai hmuh leh ṭhin hi hrehawm ka ti lutuk. Lo haw ang che, ilo haw loh chuan i chhungte angah min rawn ngai tawhlo ang che.
I nu..


Ka mittui a luang zawih zawiha, awm ngaihna ka hrelo a ni. Ka nu lehkha chuan ka thinlung hi chem a vih ang maiin a hliam a, ka pa mittui ka tlaktir amaw?? chu chuan a ni ka thinlung ti na ber chu.. enge ka tih tak ang? fanu tenawm tak ka nih hi, ka van in haw tak em! pa, min ngaidam rawh aw..??

Ruata ka bulah alokal a, a hmel chu ka en vawng vawng a, alakah thinrim ngawt dawn ila pawisawilo a ni si. Min hmangaih tu leh ka hmangaih.. Lehkha chu a laa, a chhiar a, a ngawi renga


Ka nun chu a chau ngawih ngawih a, ka mu theilo a, thil ei chakna reng reng ka nei heklo, ka thinlung hi a na vawng vawng a. Ka chhungte rilru ka hria chuan min vaw na takzet a ni. Hetah ka la awm si, haw ka duh a ni, ka chhungte kiangah, keimah hi ka hním ruai a, ka mít thei mai dawnin ka inhria.. Chem zum tak te chu ka en ngawih ngawih a, he ka thin hnúnah hian vit ta ila, a nat zawh pawh ka ringlo hial zawk.

"Ruat, kan khua ah min dah rawh"


Ka awm dan chu a hmu a, min hnial chi-ah a ngailo a ni.


A tukah chuan kan ram lam panin kan chhuak ta nghala. Ni-3 velah chuan kan khua kan lut a, khua a thim ṭep tawha, veng hmawra u Ngaiha te inah kan lut hmasa a, kan ina va luh nghal tawp chu kan hreh ve deuha, Ruata chu va pheiin, engtin tin emawni ka nau a rawn hruai hlawl a, ka nau Lr-i chuan, "Apa in lo phei rawh u a ti" a rawn ti a. Ka thinlung chu a hlim veleh ta..


Nisa kan do nasat a vangin ka vun te chu a thū veka, ka sam sei tak te pawh chu a híl búl mai, ka nau te chuan min khawngaihin mak an ti hial zawk. Ka chhungte kianga ka awm leh thei chu ka hlim takzet a, Ruata pawh kan bulah chuan a awm ve a, ka nu leh pa pawh a theih ang tawkin a duat ve a, ka nau te ho paw'n an ngaina hle. Ka nau te school chawlhni te chuan kan feh ho dél dél ṭhina, kan hlimin nuam kan ti ve ṭhin hle a ni.

____



Kum-2005 pawhin mual liam tum hnai tawhin, a hun hnuhnung lam a nih tawh vang nge a boruak chu a thlakhlelhawm zuala. Ni lum te chu a nuamin, a ngainatawm vawng vawng a nimai, a eng zám velina tlangtin mualtin a han chhun ruih mai te chuan sawifiah thiam silohin kan thinlungah eng zun emaw ni a rawn zàm tir a, lunglen chhan nei em em lo tan pawh chawhnu hêr a nih tawh chuan lung a leng deuh rúih a, zan boruak vawt nuam tak te chuan lung a dûm hliah hliah bawk si.

Nie, khang khawlum uap cherh churh leh ni sa vel vawl te, fur khaw chheng chhiain a ken tel Thosi leh Vaihmite, Vangvat leh Changpat chenin,, heng zawng zawng kan paltlang phawt loh chuan kan nghahhlelh favang chu kan thleng thei silo. Khang hun hrehawm khan a sin favang nawmna min hriattir ni. Chu'ng boruak nuam tak leh ka chhungkua leh ka pasal Ruata te nena rún khata han làwi ho bawk nen, ka van hlim vawng vawng tak emm! Keimah hi midang ni se ka thik ngawt ang.

Mahse, chu hun nuam taka ka chen mek lai chuan Y.M.A hruaitu te kan in ah an lo leng lut hlawl mai, "Kan khuaah hnamdang awm phal a nilo a, chuvangin kan khua in chhuahsan a ngai ang, nakum March thla thleng hetah in la awm thei ang"


A ngaihna ka va'n hrelo tehlul em!! Engtin nge ni zel ta ang?? Ruata kan chhungkaw zinga a rawn tel thei hi ka lawm ve hman tehlul nen, heta awm ve reng pawh hi a hrehlo a sin. Ka pa in fapa a neilo a, a thachhang dawl tu atan pawh a ṭhat dawn tehlul nen. Mahse kan khuaa awm dun turin kan khaw dán chuan min phuar si a, chu dan awm ve lohna hmunah chuan bul kan ṭan ṭhat mai a ngai dawn a ni.



*


Tukverha dakin kawngpui chu ka thlir vawng vawng a, a lo let hunah chuan saw kawngpui ah sawn alo phei ngei awm si a, "Lo lang thut mai se la aww" ti rilru chungin ka dul chu ka chul ka chul a..


Ruata'n min kalsan aṭangin thla-3 dawn a ral tawha, a fa thla-4 mi ka pai mek thu hi hrilh hlan ka van nghakhlel tak emm!! Engatinge hetiang chen chena rei min thangbo san le?? Min ngailo em ni le? Ka raino lai a ni a, ka mamawh zual hunlai tak a nia sin!


An ramah ahan let leh kha a ni a, bul kan ṭanna turin, eizawnna bul ṭanna tur a pa Puia'n Bawng puichhuah a phal thu an rama kan awm lai khan kan bulah a sawi tawha, chu chu han la paha a chhungte thil awmdan han hrilh a tum pah bawk a ni. Tunah chuan ka chhungte paw'n an pawm thei tawha, a felin a taima a, khawiah pawh awm ila, an rilru a nuam tawh anga, keipawh lungdam takin ka awm thei tawh ang.. Bakah, khawi khuaah emaw ber in hrang changin bul kan ṭan anga, Mizorama kan awm chuan kan in tlawhpawh fo thei dawn tho a.




November hun nuam leh mawi, Krista pianchampha lo thleng mai tur lo hmuaka partin an vul chhíng chheng hun leh sirva zairimawi mawi zual hun, kha hun ah khan a ni ka hmangaih kalliam tur ka thlah chu

Kan khaw kawtchhuah thleng ka thlaha, min kuah vawng vawng a

"Ka pangti lum telloin ilo dam zo em ang chu maw" a ti a, a nui ver ver a
"Lo let leh vat rawh aw" ka ti a, ka ṭah a chhuak lek lek a
"Ka lo let leh vat ang, ka lo let leh hunah chuan in ramah ngei hian kan in bengbel anga, ichhungte hi kan tlawh fo dawnnia"
"Awle.." ka lu ka bu a
"Ka lo let leh vat ang, ka tiam che" a ti a. A mitmeng chu ngun takin ka en a, a mitmenga a tih tāk zia leh tumruhna chu ka hmu thei a ni. A kal liam tur chu ka thlir renga, lo lehhawi in min bye bye a, a kalliam ta.. Ka hmuh hnuhnunna ber a ni.




Ka pasal leh ka fa te muhil lai chu ka fawp kual den den a, kha FAVANG kha herliam mahse ka tan FAVANG hun duhawm Khuanu'n a lo herchhuah tir leh ta a ni.




A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)