HMANAIHNA DIK TAK CHU By PINKY TUALLAWT

Ngaia
Site Admin
Posts: 25813
Joined: April 30th, 2016, 4:07 pm

HMANAIHNA DIK TAK CHU By PINKY TUALLAWT

Unread post by Ngaia » September 30th, 2022, 10:44 pm

80d9bwt4.jpg

HMANAIHNA DIK TAK CHU ?
--By PINKY TUALLAWT
(COMPETITION 2022)



"Bawihte! Min ngaidam rawh. I rilru tur ka lo ngaihtuah ngai lo a tin ni. Ka fanu, ka tihpalh lutûk, lo inngaihtuah chhuak hma deuh ila chuan he ti êm êm hian I nun a chhe lo tur. Bawihte min ngaidam rawh," Ṭap ṭiau chung in ka nu chuan a ti mawlh mawlh a. Kei erawh khur hlawk hlawk chungin ka nu pawh melh duh lo in chhuat ka bih ngur thung. Ka thinrim a, ka rilru a na êm êm bawk, ka ṭap chuak thei lo a, ka thaw chu a chham mai dawn in ka hria.
"Ni lo e, nu I thiam loh a ni tawh lo, duh ai ka kal thûi mâi a ni. Nu in thiam lo duh suh. Min ngaihtuah lo la, Kei chu ka awm âwmin ka awm tawh mai ang, mahse maw nu kei min enkawl ang hi chuan ka fa lo piang tur hi chu ka enkawl ve hauh lo ang". Chhuat aṭang chuan ka ding thûai a, ka mittui hru sawk sawk chung chuan rangtak in kawngkhar lam ka pan nghal hlawk hlawk bawk, ka nu'n min âu lawm lawm pawh chu ka bengkhawn duh lo.
Hruaitluanga ka hmuh rual chuan ka pan nghal thuai a, min biak hma chuan a bike ah ka lawn nghal zat a,tlan nghal tur in ka hrilh bawk. Ka awmdan chu a hrethiam a ni chêk ang chu, engmah min zawt lo in a tlan ve nghal mai dawk a, ka mittui chu hru ve ṭhin mah ila danzawh rual loh in ka biang ah chuan a rawn luang zawih zawih a, awmdan tur ka hrethiam tawh lo tak zet a ni.
Ka nu chu ka ngaihtuah zui rauh rauh a, ka inthiam thei lo, mahse ka rilru hi a na . Ni e ka nâ tak zet, ka nu tih hrehawm ka duh luat ah keimah bawk in ka tuar a nih ber hi..
Kum 18 ka nih in ka pa in min boral san a. Khami hnu aṭang chiah Khan a ni sual rawng ka bawl ṭan tak. Hmeichhe tih atan pawha mawi hauh lo tam tak ka ti a. Zu leh Drugs mai bakah ruihtheihthil engkim chu ka ti kim vek ti ila ka sawi sual lo ang. A bik in ka nu hmuh lai ngei a tih hi ka duh ber ṭhin, mahse nuam ka tih hi chu a tlem zawk ang. Ka rilru nat na a pung mai zawkin ka hre ṭhin.
Naupangte ka nih aṭang tawh in ka nu hian min fak ngai lo a, hlim hmel min hmuh ngai hek lo. Ka bulah a awm khat em em a, a awm ve chhunah midang fate a fak cham chi reng a. Kei;a fanu neihchhun hi vawikhat mah min fak ngai lo .Min fuihna ṭawngkam tak ngial pawh a chhak chhuak ngai lo. A tih zawng chu min hauh leh midang fate fak a ni. Ka la naupang em avang in ka ngai haw ngai lo a, rilru nat pawh ka hre ngai lo.
Class eight-ka zir aṭang chiah khan a ni hreawm ka tih chhauh tak; mi nu te hi ka awt thei tak zet. Rilru nat ka hre chho a, a ruk a ka ṭah a tam viau bawk. Ka nu hi ka thlahlel ve êm êm a; mahse ka pawh ngam ngang ṭhin lo.
First term exam-na ah pathum-na ka ni a. A dan ngai te in ka pa chuan min chhuanthu te, a fanu ka nih a lawm zia te leh ṭang sauh sauh tur a min duh thu te a sawi luam a, he tiang thu a sawi hi chuan ka lawm ve veng veng ṭhin.
Ka nu erawh a dang zaih thung. Nancy pakhat na a ni tih ka sawi phei chuan a thinrim tak zet. Min hau a; ka tihchhiat thu a sawi cham chi reng bawk, Nancy chu a fak char char a, ka tluk loh chhan te a sawi a, pakhat na I nih hma chu I result min hmuh leh tawh suh ang che a ti hmak bawk. Kha mi ṭum a ka rilru nat zia kha, ka nu hi min hring tunu a nih ka ring lo hman hial a nih kha.
Kha mi ni aṭang khan engkimah pakhat-na ka ni ziah a, mahse ka nu hlim hmel ka hmu ngai lo. Engmah a sawi ngai lo a, ṭawngkam khat pawn min fakin min fuih ngai lo; ṭawngkam ṭhain min zilh ngai hek lo, pakhat-na ka nih loh a hre hlur a, min hau ziah ṭhin, ka chhang ngai lo, mahse ka rilru a na thei êm êm thung.
Ṭhian tumah ka neih loh chhan pawh ka nu vang a ni. Ka ṭhiante eng ang mi pawh nise an ṭhat na lai in min zilh ziah ṭhin a, min tehkhin reng a, ka ṭhiante ka huat phah ṭhin. Ṭhian ho thil tih naah tel a phal ngai lo a, inelna a nih loh chuan engah mah tel a rem ti lo bur bawk. Ka chhuak ngai lo a, tumah an lo leng ngai hek lo.
Hun te a liam ve zel a, ka rilru pawh a lo danglam chho ve telh telh a. Ka nu min hauhna pawh chhan let ka hrat ṭan a, a mah hi ka haw ngawih ngawih tawh a ni ber. A sawi loh ang zelin ka awm a, runluih chu ka nuam tih zawng tak a ni chho a, kan in chhung chu nuam lo tak a ni. Ka pa thleng chuan ka haw tawh, ka thlavang a hauh ngai lo te, a ngawi tlat zel te chuan ka thin a tirim a, ka haw tak zet.
College ka kal chho a, mipa ka tawng a, min bem aṭanga thla 3 na ah chiah ka chhang nghe nghe. Min ngaihsakin min duat thei êm êm a, ka be ṭha duh lo chung pawh in min dawh hram hram reng a, chu ti na na na chu ka hnar reng thei bik lo a tin ni. Ka rilru nat apiangin a bulah ka kal ṭhin a. Kan chhungkaw chungchang engkim ka hrilh vek ṭhin.
Bialpa ka nei tih ka nu in a hriat chuan kan inhau leh a, ṭhen turin min ti cham chi a. "Ka thih hma chu ka ṭhen lo ang" ka tih rual chuan ka biang chu a thip nghal sawk. Ka nu thinrim hmel mawlh kha, ka chhuak nghal hlawk hlawk a, ka pa khan min lo um zui tih reng ka hre lo.
Bawihi! Hlute! Min rawn ko tuar tuar ri ka hriat rual chuan ka inher thuai a, Car-in ka pa a su chu ka hmu chiang tak zet. Ka tlan thuai a, ka pa chu ka ko a mahse min chhang thei lo. Ka mithmuh lai ngeiin ka pa chu a thi, ka ringthei lo. Ka ko leh ṭhin; mahse chhan na ka dawng lo. Ka na tak zet, min hmangaih em em tu ka pa.
Ka nu nen chauh kan cheng ta a, kan in hmu khat em em a. Kan inhmuh chhun ah inhauh nan hun kan hmang a ni ber. Ka rilru chu a hel telh telh a, ka nundan tam tak ka thlak a, ka inthuam dan zawng zawng nen. KS ang maiin ka inchei ṭhin. Zu in ka ching chho a, ka bialpa pawh chuan min hau, min zilh a, thu ṭha tinreng min hrilh bawk. Mi fel tak a ni a, hmangaihin duh viau mahila ka ṭhen a ngai. Ka rilru erawh na tak a ni. Ka hmangaih em em ka pa in min kalsan a, tun ah ka mipa hmangaih tak ka hnar a ngai leh si.😢
Hruaitluanga nen a kan inṭhen hnu chuan ka nun chu a ni telin a buai chuar telh telh tih mai tur a ni. Ṭhian duk dak lo tak tak ka kawm a, khawlai ah ka tam a, drugs thlengin ka khawih vek nghe nghe. Nitin ka nu nen kan in hau a, min zilh cham chi reng; mahse min zilhna hian awmzia a nei tawh lo. A hma pawha a tih ngai loh thil hi eng nga tan mah ka ngai tawh lo.
Thla khat zet a liam ta. Damdawi tel lo in ka awm thei tawh lo a. Ka tan chuan he khawvel a mi zawng zawng hi ka hmelma ang vek an ni, pawisa vangin drugs edit pakhat ka that tawh bawk.
Hruaitluanga'n min rawn be leh ṭhin a ,ka chhang duh lo. Ka la hmangaih reng; tih nat ka duh lo, ka thil tih ṭhin hi ka thlah thei tawh silo.
Pathian ni a ni a. Nidangah chuan Pathian ni hian eng thil sual mah tih ka duh ngai lo. Mahse, kha chu Pathian ka rin lai kha a ni. Tunah chuan Pathian tih ṭawngkam hi chu mi pakhat hming ve mâi mâi a ni tawh. Ka room-a ka inchiu lai mekin kawngkhar a rawn hawng thut a,"Eng thil nge I rawn tih"? Ka sawi zo hman lo, ka thil ken lai chu min paih sak nghal hlawk a, min sawi dawt dawt pah hian "Lalrohlu eng nge I hriat a?, eng vang in nge he tia I awm?, he tiang I nih ngai loh kha", A âwah chuan natna ka hre thei; thinlung na tak âw a ni.
"Ka nun hi I hre lo, eng ang mi nge ka nih I hre hek lo. Ka nun buaichuar tak sawi chhuah ngam si loh hi eng tin nge ka awm a nga ,eng nge ka tih ang?. Ti nge midang te ang a nun tluang pangai tak ka hman ve theih loh? Thuruk tam tak sawi chhuah ngam loh rilru nat na a khat thinlung, ṭhian tam tak ka nei mahse, tu mah ka harsatna ka hrilh thei lo.Tah vak ka chak ṭhin mahse ka thei si lo.Thil ṭha leh ṭha lo ka thliar thiam tawh lo a, minute 1 lek chhunga ka hlim ve ringawt pawh hi ka tan chuan a hlu tak zet asin. Ka hlimna tur ang a ka hriat apiang chu ka ti ve zel a; mahse hlim na tak tak ka hmu ve thei si lo. Ka nui ṭhin, mi min hmuh dan ah chuan mi awm ṭha duh lo mi hnawksak, pawikhawih hreh lo ka ni, mahse he ka nun phen ah hian lungngaihna te, rilru natna tam tak ka nei ve a sin. Mi in ka rilru nat an rin ngawih ngawih na ah pawh ka nui lui hram hram a, ka hmel leh ka chezia-ah engmah ka ti lang ngai hek lo. Mahse a rukin ka na thei tak zet a sin, ka nun hi a lem vek a nih hi!. Hmangaihtu leh ngaihsak tu ka nei lo, min hringtu ka nu ngei pawh tiam in," Ka sawi chhun zawm thei tawh lo, ka ṭap khur nghal char char a, min lainat hmel tak zet.
Ka biang a ka mittui luang chu min hruk sak a."Ka hmangaih che, eng tikah mah ka kalsan leh tawh ngai lo ang che",zawi te hian a ti sap a, kei erawh ka ṭap tawp thei lo. Hepa hi a mak takzet kei ang hi engtin nge, hmangaih mo, a mah pawh chu ka en ṭha ngam lo.
Pangpar mawina leh hlutna nei tawh lo, tawih ral mai tur angin ka inngai tawh a. A ni erawh chuan, 'kha pangpar kha beiseina nei tawh lo pangpar a ni a, beiseina a neih lai chuan mawi tak a ni. Pangpar dang zawng zawng mawina hliah khawp a mawi a ni. Beiseina a hlauh chiah Khan engkim hlauh vekah a inngai a, hlutna leh mawina nei tawh lo ang maiin a mal em em a, mite chuan kal pelin sel ṭhin mahsela kei erawh chuan a nun a hlauh hma hre reng chungin ka en a. A hma a a nun kha ka pe let leh dawn a ni. Eng tiang a sual emaw hlutna nei lo angah pawh inngai mahla ka thinlungah hi chuan nang tluka hlu leh mawi an awm lo. I nihna ang ang hian ka hmangaih che' min la ti thei a, ṭah mai loh chu tih theih ka nei lo.
Min kuah lai chuan thil hriat chhuah zawk ka nei a. Inlahrang vatin leh lam ka hawi a. Amah pawh en duh lo chuan, " Ihh Hruai ,hrilh duh che ka nei a," Ṭah aw lek lek hian ka ti a, ka hrilh hreh tak zet."Eng nge dik lo a awm a mi?" a lo ti ve vat a, a aw ah chuan a hlauhthawn hmel sa ngawih ngawih in ka hria. "Ka rai" ka sawi zawng ringawt pawh chuan ka ṭah a chhuak nghal ut ut thei.
Min chhang lo a, a ngawi reng ringawt. Zawimuangin ka in her a, a hmel lan Dan chu ka chhiar thiam lo.
"Tu fa nge?" Melh ngai melh reng chung chuan a rawn ti chhuak hlawl a. Ka ṭap chhuak hawk, a ngaihna hriat loh hmel zet hian min lo melh a,"Ka hre lo" Ka ti chhuak phawng mai. A hmel chu a buai nakin ka hria, "Ihh ka ruih lai in min sual a, a hmel ka hmu lo" Ṭap ṭiau chung chuan ka ti leh a, min kuah nghal thlawp.
"Keimah", A rawn tih chuan a ai a nasa in ka ṭap leh a, ' mahse mahse' "Shhh sawi suh" a ti dam diai a. Rei vak lo hnu ah inla hrangin min melh ngur ngur a, ka pum chu a rawn khawih a, "Hei hi ka fa a nih hi, inpahnih hian ka en kawl tawh ang che u, kei ang a fahrah ni tur in ka phal lo che" Ka pum en ran chung chuan a ti charh charh a, min rawn melh leh in a nui suk a,"Nui rawh lem naute hian anu kha lo nuih tir rawh apa a rawn ti a nia," A tih chuan ka nui chhuak hawk, ka ṭah nuih a ni ber. Hepa hi a â nge, min hmangaih lutuk vang ni ang, keipoh in ka hmangaih lutuk. Hetiang khawp hian ka tan a lo in huam ang tih ngaihna ka hre ngailo. Hmangaihtu nei ve lo a ka in hriat lai pawh khan a ni hi a lo awm reng awm si a, ka va â tak em...
'A nu a.....'Tih ri avang chuan ka nui tawp chiang hle. Ka nu chu lo lutin Hruaia chu chhuak turin a ti a. Min rawn en a ka lo buk zeuh chuan "Pawnah ka lo awm ang" tih leh chhuah a rual a. Ka nu chuan min melh no hranpa lo ve khawp mai.
'In thilsawi kha eng nge a awmzia sawi rawh, Nang hi iii,' "Aw ni e ka rai" bul hmuk chuan ka lo ti a. Kan indinchilh ran tawh, ka biang a thip nghal sawk, " He tiang mi ni tur hian ka zirtir che em ni, zahpui awmnu, nang ang fanu hi eng tin nge ka lo hrin theih zawk che", a ti hlak hlak a, ka insum thei tawh bik lo.
"Nu ,engkim hi nangmah aṭanga inṭan vek a nih hi. Hetiang a sual rawng bawl tur a min nawr tu chu nangmah hi i ni, min enkawl ṭha thei dawn lo a nih chuan engvangin nge min lo hrin kher ni?.
I lak aṭang hian eng nge ka dawn ve? Ngaihsakna, duatna, fakna,fuihna, zilhna chutiang zawng zawng chu i lak aṭang ka beisei ve ṭhin mahse nang chu I ni lo, ka nu I nih angin engmah tih I nei lo. Ni e, eitur min pe a thuamhnaw nen, mahse hei chauh hi a tawk lo a sin. Midang awt ngawih ngawihin min siam a, ka bul ah hun I hmang ngai lo a, I sumdawnna leh pawisa chauh I ngaihtuah a nih hi! Ka naupan lai aṭang tawhin i ngaihsakna leh hmangaih na dawn tumin theih tawp ka chhuah ṭhin; Mahse nang chuan eng nga tan mah i ngai ngai lo a nih kha tiraw nu?
Ka thiam ang tawk leh ka tlin ang tawk in tih hlim che ka tum ve ṭhin a sin, I ngaihsak ka duh ve êm êm ṭhin. Ka thiante, an nu te nen-a nel tak a an ti ti ṭhin te hi ka awt ve thei lutuk a sin, i hnen aṭang hian thil pakhat chiah phut ka nei chu chu ka nu i nih na ang a min min min hmaaa"....... ka sawi zawm thei lo. Chhuatah chuan ka ṭhu thla hnawk, ka tha khur nasa lutuk chu ṭah pawh ka ṭap thei lo. Ka nu erawh a ṭap hlawk hlawk a, a inthiam loh thu a sawi cham chi bawk a, ngaihsak duh lo in ka chhuahsan ta a nih kha.
Hmeichhe rak ṭhawk ri ka hria a, ka hawi chhuah rualin motor street light eng ka hmu a, a ri nghal ṭhawk ṭhawk bawk.
Chiang lo rûai rûai hian mi ṭawng ka hria a, min ko lawm lawm ri pawh ka hre nghê nghê.
Thawklehkhatah a thim mup a, ka harh leh chuan ka bulah Hruaitluanga a lo awm a. A hlauhthawn hmel kher mai. Ka ṭhat leh ṭhat loh min lo zawt nghal sawk sawk a, kei erawh chuan ka nu ringawt ka en thung.
"Bawihte min ngaidam lul teh, ka thiam loh vek a ni, I ngaihdan tur leh I rilru tur engmah ka lo dawn lo a tin ni. Ka naupan lai aṭangin rethei tak leh rual awt reng rengin ka khawsa a, zirna ah pawh ka hniam fal hle a. Ka lo tawn tawh ang kha ka fanu hian tawng ve lo se ka duh a, chu vang a I chung a kha tianga awm kha ka ni. Bawihte min ngaihdam hram rawh. I hma khua ka ngaih luatah I tuar phah ta si. Hetiang hi kan ni dawn tih hria ila chuan kha ti êm êm khan ka strick lo a nga, midang ngaihdan tur dawn hauh lo in I tet lai aṭang tawh Khan ka duat em em tur che a sin, i nu hi ka â em a ni" ṭap hlawk hlawk chungin ka nu chuan a ti mawlh mawlh a. Ka insum thei bik lo ka ṭap chhuak ve ta nge nge.
Ka nu chu ka ngaidam ,ti ilah amah ringawt hi dem tur chu a ni bik lo. Ka thiam loh pawh a ni. Sual kawng kha zawh tlat lo ila,ka nu rilru tur te kha gaihtuah ve ni ila, min hmangaihna kha hmuh tum ve ni ila, min hauh chang pawh khan min hmangaih vang a ni tih hriat tum tlat ni ila chuan tun a ka dinhmunah hian ka ding hauh lo ang. Eng kim kha a kawizawng vekin ka la a,chuan tunah hremna ka tawk mek a nih hi. Ni e nau ka chhiat.....😭
Nu ṭha tak nih ka tum a; kha ka naute kha ka beiseina neih chhun tak meuh kha a ni ṭhin, mahse tunah erawh laksakin ka awm ta si. Ka lung a dam thei mawlh lo."Pathianin hun a la ti lo a ni a nge" Hruaia chuan a ti mai a.Keipawhin pawm dan ka zir a ngai tih ka hria, mahse a harsa mah mah ṭhin a ni.
Pathian, pastor te leh veng chhung mihlim ho zarah reitak ka bosan tak ka Pathian ngei mai kha ka zawng hmu leh thei ta.Heibak a lawmna famkim hi a awm leh thei tawh chuang dawn em ni.
Damdawi in aṭanga ka chhuah hnu ah Home-ah ka lut a. Ka nu leh Hruaia chuan rem ti chiah lo mahse ka tih luih ve tlat avangin min hnial êm êm bik lo.
Ka thil tih ṭhin han thlah thut chu a harsa tak zet. Mahse,'tum na a awm chuan tih theihloh a awm lo' an tih ṭhin kha maw le. Ka tuar chhuak thei êm êm ang.
Fakna aw hi a mawiin ngaihthlak a nuam hle a, nunkawng dikah min hruaiin, mahni ah hlimna nasa tak a thlen thei ṭhin....
Chutihrualin zilhauna erawh a khain thin a thlei fo ṭhin, amaherawhchu hmaichhan a min faktu nazawng ai chuan min zilhhau fo ṭhin tu te hi min hmangaih tu an lo ni zawk fo ṭhin.
Kan hrethiam lo mai zawk ṭhin a ni...
Hmangaihtu leh hmangaihtu der thliar thiam lo tam tak kan awm a, he khawvel zim te ah hian hmangaihtu nei lo a in hriat rum rum chang te kan nei ṭhin.Mahse lo in zawt ve chhin teh, hmangaih tu nei lo a i in hriat lai pawh a i bul a awm reng ṭhin te kha, hmangaitu che an ni lo a nih chuan i eng nge an nih tak ang?



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)