BEISEINA By Ciboihi

Ngaia
Site Admin
Posts: 25813
Joined: April 30th, 2016, 4:07 pm

BEISEINA By Ciboihi

Unread post by Ngaia » September 30th, 2022, 11:38 pm

Untitled-2.jpg


BEISEINA
(COMPETITION 2022)

By Ciboihi



"Cabin ruak ala awm chuang lo maw?" Ka tih vak chuan ka hma a doctor thu chu a kum lap a. Hrep tak hian. "Room kan hauh sa vek tawh sia, eng vanga lo ruak lo nge a nih" ka ti kha leh fak, ka thinrim zia hi pui tak a ni. "Ih, emergency a nia. Mrs Hannah zanin chu lo nghak leh hram mai teh u. Naktuk ah chuan tihdan kan ngaihtuah dawn nia" inthlahrung deuh taka a rawn tih chuan ka ner khum nang a. He doctor tluka rintlak loh hi an awm kher lo ang. "Engtik ah nge dr. Benjamin a lo haw ang?" Ka sam tuai vut paha ka tih chuan rang fe hian "kar leh ah" a lo ti vat a. Melh rum nghek in ka fanu Hailey leh a Ni, u Mamuantei te bul ah ka kal phei a. Ka fanu chuan wheel chair atang chuan min lo ban vat a. Pawm kang vatin a biang ah ka fawp zeuh.



Fanu phir ka nei a, a naupang zawk hian lung thalo a nei a. Mahse a pum na a tih theih em vangin kan en tir leh a, a lo cancer a. Kan hriat hma vangin a la tai darh lo a, a lung lam a that loh vangin Mizoram a doctor ten hmunpui lam pan mai tura min tih vangin Delhi ah kan kal a, Delhi hospital ah thla khat chuang zet kan awm a. Doctor a awmloh vangin a pum chu tu mah in an khawih ngam lo a, tin a lung natna in zia lam a pan theih lo vangin tun ah US ah min riffer ta tawp mai a ni. Mahse, cabin kan book lawk sa vek tawh kha tun ah midangin an lo hmang leh si a. Engkim mai hi ka tan chuan buaina vek a ni ber. Nitin a ka thu hriat te hian min ti hah hluah hluah thin chu a ni.




Ka fanu upa zawk Jennie erawh chu a pi, keima nu te bul ah a awm a. A ni chu harh vang tak mai nia, ngaihtuahawm a ni lo. A nutein a enkawl hneh dawn tih ka hriat chiang vang te pawh hian ngaih ngam takin ka awm thei a. Mahse fa te na na na chu kan ngai a, an bula awm kan thahlel fo thin a, kan hriat loh karin kan lo ngaihtuah leh veng veng zel. A hreawm ka tihna ber pawh a ni.




U Mamuantei chuan "Hannah, eng tin nge ni ta? Cabin chu a la ruak ta lo a mi" a tih chuan ka bu nghauh a, ka chhang chak lemlo. Thaw chhuak hak in "kei chu tih ngaihna pawh ka hre tawhlo. Dr. Benjamina a lo haw phawt loh chuan staff tute mah hian min be tha duhlo nge, ka hre thiam tawh biklo. Kei chu ka hah hluah hluah" ka hahthlak tihna chu a aw ah a ri tel hial in ka ring. Ka dar a rawn vuan a, "engpawh chu nise, ward pangaiah awm rih pawh hi pawi ka ti lo a. Mahse bawihtei hian a zo lo leh thin a, a buaithlak na lai tak a nia. Ti nge le, cabin pawh kan book lawk vek tawh sia. An van ti awmang lo tak. Dr. Remruata biak tir leh chi em mawni le?" A ti nang nang a. Ka chhang zui tawhlo.




"Mommy, ka drawing kha ka la zo lo a. Ka ziak zo duh e" bawihtein a tih chuan a biang ah fawp zeuhin "yessi, kan lut dawn nia" ka ti a. A nui ver ver mai. Ka fanu nui hmel tluka hmuh nuam hi a awm kher lo ang.




Vawiin ah dr. Benjamin a lo haw dawn a, chuan hmanni khan kan cabin book lawk tawh chu kan hmang thei chauh a, diktak chuan thinrim loh a har ka ti. Kar hnih chhung meuh kan nghak a a rei ngar ngar em a ni. Ward pangaia awm kha nuamlo ka tihna ni loin Hailey buai changa midang te vengthawng renga awmte hi nuamlo ka ti a ni. Min lo ngaihtuah pui lo thei thin silo a.





Ka fanu in min ko thawm ah ka harh a, a lo thlan huh hluam a, a thawk a pangai lo bawk. Rang zet a tho in ka buaipui nghal a, a mu kawm ngat a, "bawihte, khawi lai nge na?" Mangang taka ka tih chuan kan thawm ah u Mamuantei chu a rawn harh a, "eng nge?" A rawn ti vat, ka chhang lem lo. "Mommy, mommy, ka pum a na" tap tiau a a rawn tih chuan a pum chu ka khawih vat a. Doctor ko turin u Mamuantei pawh a tlan chhuak vat.




A tap hluam hluam a, a pum na a ti lutuk chu a tawm chawih chawih a. Hmuh a hreawm takzet. Ka pawm kang a, "ka duat, i dam vat ang. Tap tawh suh le. Ka naute" tiin a lu ah ka fawp zeuh a. Kei pawh chuan hreawm ka ti takzet, ka fanu na hi a na dawn tih ka hriat vang a ni. Puitling pawh kan pum a nat chuan na kan ti thei hle a, a ni, naupangtê mai cancer natna lehnghal, tawrh a va hreawm dawn si em. Ka ngaihtuah zawng ringawt pawh hian ka rilru a na vawng vawng thei.



Doctor leh nurse an rawn tlan lut a, ka naute chu khum ah mut tir vatin bawihtei doctor ngei, dr. Benjamin chuan a rawn en a. "Zai a ngai ang. Opperation room kha lo buatsaih rawh u" tih pahin nurse chu a melh zeuh a. Rang deuhin a tlan chhuak nghal. Ka naute na ti lutuk chu a thawk thleng a buai in ka hria, "doctor, a thawk dan hi a diklo in ka hria" hlauthawng ru taka ka tih chuan oxygen chu rang takin a buaipui a. A che vel chu tih theih nei em em lo in u Mamuantei nen chuan kan lo en tlawk tlawk mai ni.




Opperation room a an nawr luh lai te chuan ka khur dar dar a, hmeichhe naupang kum 5 mi lek tawrh atan chuan a lutuk mah mah ani. A chang hi chuan Pathian hi ka dem lek lek thin a, mahse kan tan a thalo tur a ruat ka ring bik bawk silo. Amah ah chuan ka in nghat tawp a, tawngtai leh dil in ka fanu tan theihtawp ka chhuah ve thin. A chang hi chuan rinhleh rum rum chang ka nei fo va. Amaherawh chu, ka rinna tlemte hian a phatsan phal silo.




Tukverh atangin vur tla seng seng chu ka thlir reng a, ka hreawm tawrhna zozai te ka ngaihtuah chhuak a. Ka thinrimna leh rilru natna chuan ka thin a ti sa pap pap a. Khang hun hreawm tak ka tawrh kar a ka fate vanga hreaem ka tawrhna te chuan ka rilru an ti na thar leh hle a. Ka ngaihtuahna chuan kan hun kal tawh a chhui kir lo thei lo.


...............


December thla a ni a. Khua a thiangin a vawt tawh hle a. Mut pawh a tui duh sawng sawng hle. Kawngka in kik dawt dawt thawm ah ka meng kawk a. Rang zeta tho chhuak in kawngka ka hawng vat, ka pa chu niin. Ka thianten bazar tura min nghah thu a sawi chuan rang takin ka insiam vat a. Inhnuai ah ka chhuk chuan Zari leh Ruthi te chu an lo tawng lang lang a, kan in ah hi chuan an tlangnel ve hrim hrim reng a.




Chaw pawh ei lo in kan chhuak zui nghal a. Bazar kan thlen chuan mipui an tam in bazar chu a khat mup a, kal ngaihna a awm lo. MC-a Ruthii nutei dawr ah kan kal a. Dawr chhung kan luh chuan a lum pap a, boruak in thlau lutuk chu a mak letling zawk. "Nute Kim, min discount thei" ka'n ti lut nghal thawr a, nute Kimi chu a lo nui thaw mai. "Min biak that dan a zir a ni mai" a lo ti et a. Ka nui tawp.




Rei tawk fang kan awm hnu ah restaurant ah kan chawl a, kan ei zawh a kan chhuak mai tur chu ka ban rek ah tu emaw hian min rawn vuan a. Ka hawi let chu tui vawt lutuk tak mai hian min theh huh vek a. "Hei, eng nge i hriat a!" Ka ti vin hlak. Hmeichhe cher sang zet mai hi a nia. A sam a sen deuh a, hmelchhe zawk zawk chu a ni lo, "hmeli, i ngam chuan Muansanga hi kherhthluk i lo tum leh dawn nia. Ka sawisa hrep ang che. Vawikhat mah zan ah lo ko chhuak tawh suh ang che, hur lutuk mai" a ti a. Ka hawi kual zawk a, mite chuan min en thap hlawm mai. Ka zak lutuk chu sawi mai tur pawh ka hrelo. Ngawi reng chuan kan en tlawk tlawk a, Zari chuan "thiannu i hai a ni lo maw. I hresual a niang, kan thiannu hi chutiang mi chu a ni lo. I hai a ni ngei ngei ang" a lo ti dam thluam a, hmeichhia chuan a kut zung chala min kawk pah hian "ka hai lo chiang khawp mai che Hannah Lalmuanzual" a ti siah siah a, a rui a nih ka ring ber tawh.




Zari bawk chuan "Hannah hi i hre si a nih chuan kan va hre ve lo che. A va mak awm ve" a ti leh a. "Ih e, khatia min hrelo ang vel a awm kha a ngai lo. Muansanga lo tibuai tawhlo la a ni mai" pangai zawk a atih chuan "min lo hrethiam la. Tu nge i nih ka hre ngai lo che a, tu nge Muansanga pawh chu ka hrelo. Chuan maw, ka piantirh ata ngaihzawng ka la nei ngai lo hrim hrim, mi ngaihzawng chuhpui ngat phei chu. Chuvang chuan mizinga min tih zah vang hian ka lungawi miah lo a nia" ka ti ve kha kha a. Ka vin hauhlo nain ka thusawi mal tin te chu a fiah fak hlawm a. Ruthi rawn khuh deuh kharh ka hriat chuan "kal ang u. Mipangai tih atan thil mawi pawh a ni lo" ti leh kherin ka thiante chu ka kal pui dawr dawr a.




Ka thil tawn vang chuan phur taka ka chhuak kha ngui takin ka haw a, ka nu pawh in mak min tih hmel hle. Ka nileng hun hman a ti chhe zo vek. Min hai a nih pawh in a rukin emaw a in hauh theih reng a, mi tamtak hma a in tihzah kher kha a tul miahlo. Keimah niloin amah a in ti mualpho mai mai zawk tih lah a hre hek lo, hlawk na a nei pawh ni lo chuan. Hmeichhia te pawh hi kan duhna ah chuan kan thisen a lo sang thei khawp mai.




Christmas a zo a, kumthar a ni leh a. College kan tan a hun leh tawh a. Tute mai pawh chuan an mahni buaina na ah chuan an buai a, ka nau te pahnih pawh school addmission vel ah an buai laih laih a. High school kal lai ve ve an ni a. An mahni an in buaipui thei tawh reng laiin ka nu leh pa an la pawt buai reng a. Ka nu lah in upa ber na na na chu min chhawr chhawng ve lo thei silo. Kan college jubilee a nih kum a ni bawk nen, ka nau te school lam ah nen in daih loh a na thin khawp mai.




College canteen a kan awm laiin hmeichhe ho chu kawngkhar lam hawiin an phun ser ser a, ka va hawi phei ve chuan mipa leh hmeichhia hmeltha em em mai hi an rawn lut dun a. An hmeltha dun in an sang dun a, an ngo dun bawk si. An in hmeh ngawih ngawih. An in huat hmel vaklo bawk.




College gate ah Zari nen Ruthi kan nghak a, a rei phian leh nghal. Kan zawn tak ah scooty hi a rawn ding a, ka ngaihven zui lem lo. Zari chuan min nghawk zeuh pahin min mitmei zeuh a. Hmanni a hmeichhia bawk kha a ni. Ka hmu lo der hmak a, min rawn pan hnai te chuan ka lo hrelo der hmak. "Hannah, hmanni khan ka hrilh chiang tawh viau che khan ka hre sia" a rawn ti nghal ringawt a, chhan en ah pawh ka en lo. "Nang nu hi, min cho viau em ni? Hmeichhe awm herh lutuk" tih pah in ka sam ah a rawn kek a, ka in rinloh lai tak a ni bawk nen ka dak awrh a. Zari chuan "hmeli, eng nge ka thiannu hi i lo tih buai chhen le. Ka kham tawh khawp mai che" tiin a kek chhawng ve leh a. Kan ri hlut hlawm mai.




Min kehna chu phelh tum in ka ban ve ngar ngar a, min thlah duh thak lo lehnghal. Ka thinrim lutuk chuan min kehna kut ah ka sik a, ka kuttin a sei bawk nen a nat viau ka rin laiin min la thah duh chuanglo. Vawi leh khat ah min hnuk kal dawr a, min thlah nghal bawk. Ka sam chu tuai chho puatin rum lutuk hian ka melh a, mipa pakhat hian a lo pawm bet chu niin. Ka tah a chhuak ngawih ngawih a, tah erawh ka tum miahlo. A tlawm thlak ka ti.




Mipa chuan "tu mah a ni lo ka tih kha" ti hrawk in a kal pui ta daih a. Hamhaih lutuk in ka thlir tlawk tlawk mai ni. Ruthi chu a rawn tlan phei hlawk hlawk a, chutia sam phir hnuanga ka awm a hmuh chuan Zari chu a en vat. Ka bul ah rawn kal hnaiin ka hnung a chul hiau hiau a, ka biang rawn lum thla pap chu ka hriat hmaih lo chiang viau a ni.




Lo pawt sawn tu pa thiante niawm tak chuan ngaihdam min rawn dil a, an sawi leh dan chuan. Khatia min rawn puhchhiat ngawt chhan chu a bialpa khan kei hi min ngaizawng a, a bialnu nen an in hauh tumin a bialnu angin min lo sawi tel ve niawm tak a ni. A tiawm anglo ka tiin ka lungawi lo hle a, a thiante bul ah pawh tlang takin "ka hriat ngai pawh a ni lo a, chutia ka hming a sawi tel ve ngawt chu ka lung a awi tehchiam lo. Chutah diklo deuha puh ka la ni zui, mualpho takin ka awm a, a zahthlak ve tho a. Mipangai a nih chuan a thil sawi hmain ngaihtuah chiang phawt thin tawh rawh se" ka ti ngat a, an in thiamlo hle.




Kar tluan in ka mood a chhe vek a, dawt muhluma in puh nat zia hre tu ber ka nih vang hian na ka ti ve takzet. Ka lo sawi hmaih daih chu khatia restaurant kawt a min tih zah hnu khan message in min rawn vau zui chiam a, ka block hial a nih kha. Tun ah thupui ngai bawk khel in min rawn phuh chhe leh tawh a ni a, a ni zozai tawhlo. Hmanni deuh khan a bialpa Muansanga a tih niawm tak nen kan thenawm ah an lenga, ka room atangin ka thlir renga. Muansanga chu ka hriat zawng a ni miah lo. Min phuh ringawt theihna dan a nei lo bawk.




Phone bih ngur chungin class ah ka lut a, tu emaw ka su dawt a. Ka phone chu a phel chiang hle. "Ui ha. Ka duh lo" tih vak pahin ka phone chu ka chhar a. A chhe darh vek. Ka ui bawk si tih ngaihna a awm bawk silo chu ka phone chhia chu ka en kual ta vel a. Ka rilru a na takzet. Kan monu u Sangpuii min lei ve liau liau kha a nia, a la rei lo a sin le. Engtia keh phel phawk thei nge a nih le. A van mak tak, ka ui e....





"A chhia em ni?" Rawn ti thum dut tu chu ka melh chho vat, min lo en ngur a. Ka lai lek lek a ni, an sawi ziah thin Jeremy a ni a. Kan college ah na na na chuan a lar ve thaw khat hle a, a lerh hle bawk an ti, "aw, a chhia" ka ti bul hmuk thung. Rawn thu thla ve in ka phone chhia chu a en kual thuak thuak a, a bu ngauh nghauh a "a chhe hneh hle mai" a ti ringawt a. A thu rawn sawi chuan min hnem lo teh a sin, ka ngam zawng mi tak chu ni se chuan ka hau hrep ang mile. Ka chhang lem lo a, a mah zawk chuan "eng nge i hming?" Rawn ti khauh a. Ngaihdam dil a hneka ka hming min zawk daih chu awmanglo ka ti viau mai. Ka melh zawk hnu ah "Hannah" ka ti sep. A bu nghut a, ka ban bul ah chuan min vuan lawka, zo zet hian in min pawt tho lawp a. Min zo lutuk chu mak ka ti zawk. Mak ti deuh chuan ka en ha ringawt a, engmah sawi lemlo chuan a kal zui nal nal. A polite lo ka ti ru hle a.





Zanah chuan pakage hi ka hmingin a rawn thleng ve ringawt a. Engmah ka chah silo, a man lah a in pe sa thlap bawk si nen. Ngaihna hrelo zet chuan ka la a, ka chhungte chuan eng nge an hre chak ngang mai. Ka room ah luh pui daihin ka chhang chiah Nubawihi chu a rawn lut ve nghal zat. Pakage chu ka'n hawn nak chuan ka rin loh lutuk thil a nih vangin ka hau hian ka nau chu ka en tlawk tlawk a. Ani pawhin hrethiam lo zet hian min en ve kar mai. I-phone 11 pro a ni a, gold colour a ni bawk. Hetiang thil te chu tu hnen atangin ka ka dawn ang le. A chhung ah chuan lehkha them hi a lo awm a, Nubawihi chuan a chhiar nghal vat. "Ngaihdam dilna. Jeremy" a tih chuan ka chek tlak a. Hetiang em em te chu a lutuk mah mah a ni.




Ka pu Darlawn ami a thih vangin kar khat zet leave ka la a. Jeremy hnen ah pawh lawmthu ka la sawi lo. Aizawl kan thlen ni chuan zanah thil lei turin dawr ah ka kal a, Jeremy ka hmuh chuan va pawh mai ka tum chu nula pakhat hian a ban ah rawn man chat in nui ver ver chung hian an kal dun ta daih a. Nidangah lawmthu chu ka hrilh mai ang ti rilru chungin ka en liam ta ringawt a. A ruk tak chuan kha hmeichhia kha ka thik ru hle a, vannei ka ti bawk.





Inrinni ah chuan Nubawihi nen MC ah kan bazar a. Nubawihi nen hian kum 2 chauha in thlau kan ni nghe nghe. Kan haw lam chu kan in khai bawr luk a, hmeichhe pahnih bazar dun kan ni bawk a duh kan ngah in lei tur kan hre em em a. Ka nu in hria se ho a ti leh ngawt ang chu. Nubawihi chuan min rawn kheuh zeuh a, a lam ka hawi chuan ka hnung lam a thlek zeuh. Ka hawi vat a, Jeremy chuan kut min lo vei a, ka nuih suk ringawt. Hmui phun hian eng emaw a sawi a, eng nge a sawi phei chu ka hrelo "min lo nghak rawh" a ti ni maiin ka hria. Ka lo nghak a, kawngpui a kan lai te chu uluk tak hian ka en ngar ngar a. Hepa hi chu a chhelo ve chiang a lawm.




Ka bul a rawn thlen phei chuan a ngawi leh ang kar a, tawng hmasa zawk ah tang in "eng nge ni ta" ka ti ta ngawt a. A khi suk a "ih englo. Zan ah ka saw tah min kal pui la ka tia, i buai em?" A rawn tih chuan ka nau chu ka melh zeuh a, "buai vak nang. Ti nge kei kher" tiin tha takin ka chhang a. "Englo a nia. Ka thianpa birthday a nia, min kal pui la ka tia. I pheih loh pawn a pawi chuang lo a" inthlahrung taka a tih chuan Nubawihi chu ka en zeuh a, hmui phun hian "aw ti rawh, aw ti rawh" a lo tia. "Ka hre biklo le. Ka chhungte kan dil ve phawt anga" ka tih chuan a bu nghauh a. "Ka lo text ang che" a ti a. A kal leh nal nal tawh.




Ka nau chuan min chaih zui kar kar a. Huat ah pawh ka la peihlo, thian pawh kan ni em ka hrelo miau a. In kan thlen hnu chuan ka phone chu ka check zuai a, number hlang atang hian message ka dawng a. Seen loh ka tum zet na in Jeremy thusawi kha ka hre chhuak leh thut a, ka open vat. 'I lo kal thei dawn em' a rawn ti tawp a, emoji emaw thil dang pawh a dahlo. Ka nu eirawng bawl lai chuan ka va hrilh a. Ka thian pakhat birthday a nih thu ka sawi ve luam a, ka nu chuan phal chiahlo mahse ka dil ngawr em a, a remti ta a. Eng nge ka hriat a ka kal chak em em chhan pawh ka hrelo. Ka za cheng, ka phur ru em em mai te chu a ngaihna ka hrelo. Tu birthday nge pawh ka hrelo a, a hming takngial pawh ka hre lo a nia. Ka phur em em mai te chu ka in ten hial zawk a ni.




Zan ah chuan in paih sa diamin ka lo awm a, dar 8 vel ah min lo lam tur thu a sawi bawk. Phurthak ka kai ni ber hian ka in hria, heti em em a phur hi ka nei ngailo. Dar 8 chu a ri har ka ti em em a, ka ning tawh takzet. Nubawihi lahin min chaih fiam reng a, kan in um kual leh rih thin. Hahthlak hlawm a nia. Kan rik nak nak lai chuan door bell a rawn ri a, kan te berin "lo lut rawh" a lo ti vat. Jeremy a rawn lan tak hlawl ah chuan ka bag chu ka ban vut a, chhuah ve nghal mai ka tum chu Nubawihi pek chuan "a u hi i mak thin emai. Thut hahdam tir ve phawt la" ngeiawm rawng kai lek lek a a tih chuan lei ka chhuah khum vak a. Jeremy chu hui zeuhin pawn ah ka chhuah pui ta zawk.



A bike dahna bul kan thlen chuan min thlek deuh vang vang a. Ka awm a nuam lo lek lek "ti nge. Ka thing a mi" ka tih chuan a lu a thing nar nar a, "i nalh lutuk tlat" a ti thawp sup a. Ka lai vel ringawt. Hemi zan atang hian kan in kawm tan a, thla thum chhung ngawt thian kan nih tak ah chuan min duh thu a sawi a. Kei in ka lo duh ru ve tho nen lo hnar bik lo in ka lo pawm ta zawk a. In ngaizawng kan nih tak ah phei chuan kan in close lehzual a. Thian chauh kan nih laia kan tih ngailoh thil tam tak kan ti a, in hauh chang awm ve mahse zan rei ah min hmu tur hian a lo kal leh nge nge thin.




Ka inbual zo mu tura ka in siam lai chuan ka phone a ngawr dat dat a. Jeremy a nih vangin ka chhang vat, "imm" ka ti ringawt a, lehlam in "bawihte. Ka ngai che" a rawn ti thawp sup a, a aw ah chuan a rui tih ka hre thei. Zu a in ve zeuh thin a, a rilru hah lai a nih te hi chuan ka hrethiam. Chutiang nilo a a in fo mai chu ka hrethiamlo in ka lawm lo hle. "Khaw nge i kal. I rui a mi" ka tih chuan "Zorama te in ah ka leng. Ka in hnem lo tlem te chauh ka in" a ti vat a, ka awihlo nasa mai. "Tlem chuah chu a ni lo ang i rui emai" ka ti leh hlak a, leh lam a mi chu a thaw hak mai. "Ka sawi lawk vek tawh a, a nazawngin zu in thin suh ka tih che kha" ka aw ah chuan ka lawm lohna a lang chhuak thei hial. "Enjoyment atan mai mai alawm ka in. Ka rui lo"


"Enjoyment tih mai mai, ti khan rui tawkin bike i han khalh leh ang a, chet sual palh te a awm thei. Zan a rei tawh, haw tawh rawh". Ka ti malh malh a, thu tha tinreng chu hrilh ve thin mah ila a sim duh silo chu a nih hi. "Lo la memg rawh. Ka rawn kal dawn, ka ngai che" a rawn ti leh ringawt a. Phallo viau mah ila a ti lui tlat a, ka phal leh ta nge nge a. Ka phone a rawn rik chuan ka chhang vat "lo chhuk la. Nge ka lo chho dawn" a rawn ti a. Tukverh ah ka dak chhuak vat. A bike ngheng in a lo ding a, ka awmna lam chu a rawn thlir vang vang mai.



..........



"I harh em?" Ti a ka dar rawn sawi dat dat tu chu ka en vat. U Mamuantei chuan "bawihtei chu an zai zo a, an zai tluang khawp mai" a tih chuan thu chhuak hlawlin ka mit ka tuai puat a. Bawihtei an dahna room lam ka pan phei nghal zat bawk. Ka fanu khuma mu ngat chu ka en vawng vawng a, ka lainat takzet. Zai pui tawk tawh a ni a, a tuar a chhel ka tiin ka chhuang ru hle bawk. Hmeichhe naupang te reuhte ni mahse ka thinlung ah chuan a lian em em a, ka naute, ka fanu ka duat em em a ni miau a. A na te hi keimah ah hian awm vek thei se a tawrh ai tuar ka in huam lutuk tlat.




Thla khat zet damdawiin ah kan awm tawh a, bawihtei lung thlakna tur kan la hmu zo miah lo thung. Mizoram a kan chhungte pawhin min ngaihtuah in a khat tawkin min rawn be pawp reng a. Bawihtei pa ngei pawh in min rawn be ve fo mai, mahse a rul tawk te te in ka chhang thin a. Min zawh chin bak leh a hriat tur chin chiah ka hrilh mai thin. Min be tha hle thin na in awlsam tak in ka ring mai mai thei tawh lo. Hmana ka tih sual kha ka hre ve tlat tawh, bum nawn theih ka ni tawhlo. A hma kha chuan hmeichhe zuamawm tak ka lo ni thin a ni mahna, tun ah chuan ka ni tawhlo tih hi hria se ka duh.




...............




A bul ka thlen thlak rual chuan min lo kuah nghal ringawt a, zu rim erawh a nam miahlo thung. Min thlah hnu ah hnaih set sawt hian min rawn en a, a mit sen ram leh a hmui thi ser ser chuan ka mit an la hmasa ber. A hmui chu khawih sak zeuh pahin "ti nge" ka ti dam thlup a, "a na" a ti duh lek chauh. Ka ban a ka sana bun ka en chuan dar 11 a lo pel tawh. "A tlai tawh, haw tawh rawh kei pawh ka chho dawn" ti a kal mai ka tum chu min lo vuan vat. Ka in rin hma in ka hmui ah min rawn fawp a, kan in fawp fo thin a, mahse hetiang em em a dam hian min la fawp ngai lo. Chhan let loh ka tum zeta, ka thei thaklo. He mipa hian min ti a thei tak ngial dawn.




Ka room ka lut chu Nubawihin min lo melh khai khai a, hrethiam lo zet chuan "eng nge...kha ti vak vak a mi melh. Nge ka room ah i tih" ka tih chuan min melh rum vak a. A hnu ah uar zet hian a rawn nui chhuak, a kawchhung ah ramhuai a lut ta emaw ka ti hial ani. "Au Hannahi chu i lo zei hle mai. In han in muah vel lai te khan i zei ka ti thei lutuk che" uang zet, min chaih pah deuh reuh, meinei zet si a a tih chuan ka kuk lawlh, a nui nasa mai.




Kum khat dawn lai Jeremy nen chuan kanin kawp tling ve tawh a. Mipa leh hmeichhia awm fal dun na na na chuan in ven seng ni bik hek lo, kan chesual ta a. Chutia vawikhawt kan awm tawh vang chuan eng emaw hlek ah ramri kan pel fo mai. A ruk tak chuan in thiamlo viau mah ila ka duh thlan na a nih miau vang in ka in chhir ngai hauhlo.




Thla 2 zet ka period tawhlo tih ka hriat vangin ka hlauthawng ru hle a. Hreh tak chung in pregnancy test kid chu a rukin ka lei a. Ka in rinhleh ang ngeiin ka rai a, engtin nge ka tih ang tih mawlh mai chuan ka rilru a kap a thil dang reng ka ngaihtuah theilo. Jeremy chuan min nei duh leh silo se engtin nge naute hi ka tih ang tihte chuan ka ngaihtuahna zawng zawng a luah khat a, engkim mai hi ka tan hamchhawn a hahthlak takzet dawn in ka hria.




Jeremy chu call in engkim ka hrilh a, chhanna erawh ka dawnglo. A ngawi tak tlat vangin call ka ti tawp ta ringawt a, rilru hahna ti zual tu ber pawh a ni. Ka beidawngin ka rilru a na hle a, a vawi khat na atan ka thil tihsual kha ka in chhir hle a ni. Jeremy chuan min be chhunzawm tawhlo hrim hrim a, kei pawhin biak hmasak a tulna ka hre biklo. In duh tawkna ka nei ve tho a, tlawm hmasa zawk nih ka tum bik thak lo.




Ka dul lah chu a lian chak em em a, duh ai chuan a lian mah mah chu a ni. Zep reng theih ni heklo, ka chhungte chuan min hre chhuak thuai a. Ka nu rilru na bawk si leh zak bawk si chuan min be duh lo a, ka biak ve pawh in a rul tawk te te bak in min chhang ngai lo. Ka in thlahrungin hreawm ka ti em em a, ka hreawmna tizual turin ka nu berin min be duh bawk silo. Ka tan chuan awm ngaihna a awm lo. Thenawmten min sawi sep sep reng a, ka chungchang an sawi duh dan chu a chang chuan kei ngei pawh hian ka awih lo thin. 'Ka nih na bak a fak ka phut lova, ka nih na lo thleng thleng a sawichhiat ka duh bawk lo'.



Chaw ei laiin ka pa chuan "heti ringawt hi chuan a tha lo. Kan mualpho mah mah tawh a ni, naute pa tal hi tu nge sawi duh la a tha tur a nia" dam dap a a tih chuan ka ngawi renga, Jeremy a ni ang tih chu an rin ve tho ka ring kan in kawp ve nasa emai, "ni e, naute pa lam in an duhlo a nih pawhin sawn man tal chu rawn dah tur a nia" ka nu pawh chuan a lo ti ve a.




Ka nu nen clinic ah kan kal dun a, naute altrasound kan tihnaah chuan phir ka pai tih kan hria a. Lawmawm viau mah se keimah chauha enkawl tur chuan ka zuam tehchiam lo chu a ni. Ka nu pawh chuan min be tha tawh hle a, tu nge mahni fate hnungchhawn reng thei ang ni.




Zari nen kan bazar haw lam ah chuan Jeremya u, u Kimpuia nen kan in tawk hlawl a. Min hmu chu min lo be luam a, "Hannah in hmuh a va khat ve. Kha engtik ah nge i neih dawn a" a lo ti nghal a, tha deuh chuan chhang in "october ah, in dam maw" ka tih chuan a bu nghauh nghauh a. "I neih hun tur ala hla sia i pum chu a lian hle mai. Thla eng zat nge ni tawh hrim hrim" a tih leh chuan thla 5 a nih thuin ka chhang a, a lian a tih thu mawlh chu min hrilh a. Zari pek chuan "phir a pai tih pawh in hre na nge. Jeremy hian engmah a hrilh ngailo che u mile" a lo ti hlak a, ka nghawk zeuh. U Kimpuia mit meng buai nak ah chuan engmah a hrelo tih a hriat theih, Zari bawk chuan "Kal mai ang, ka hmanhmawh" a ti a, min pawt kal dawr dawr mai. Zari tak hi chu polite lo thei sia.



Kan monu in ka room kawngkhar rawn hawn dek dek pah hian "Hannah, ka pa in lo chhuk lawk teh a tia. Englo, Jeremya pa te an tel" a ti tel zeuh a, kei pawh ka tho ve vat. Inhnuai ka chhuk thlak chuan patling pali hi thingpui in pahin an lo thu thap a, min hmuh rual in Jeremy a pa ber chuan "e, Hannah in hmuh a va khat ve le. I lo dam thin maw" dam thluam a a tih chuan mawi hnai takin ka chhang a. Putar upat hmel ber chuan "hei, kan lo kal chhan chu in hria ang a. Kan fapa Jeremy tihsual vangin nangin i tuar ta chu a ni si a, kan lakah eng rilru pawh pu mah la keini lam chuan kan dem thei lo che a. Puitling in nihna angin puitling takin engkim ngaihtuah vek hi in tih makmawh a ni a, tun ah phei chuan nu leh pa in ni tawh dawn leh nghal. Engpawhchu nise, tu te ve ve pawh hian in mawhphurhna hi in hlen chhuak ngei tur a ni dawn lawm ni? Kan fapa pawh kan zilh a, thutha tin reng tih tur leh tih loh turte kan hrilh nasa ve thin. Tun ah pawh a inchhir a, naute pa a nihna ang a a mawhphurhna chu hlen ngei a duh a, tun ah kan lo kal ta a ni". Ka ngawi kar a, ani nen a inneih ka duh teuhlo.



Chhan mai tuma ka ang zuai lai chuan ka pa in "ni e, chutia naute pa ber in a mawhphurhna hlen chhuah ngei a duh a nih si chuan keini chhunglam pawh kan lo in rawn khawm ve ang e" a lo ti khauh a, "ka nei duhlo" tih leh mai ka tum chu ka nu in min lo mitmei zeuh, ka ngawi ta zawk a. An haw hnu chuan "pa, ka nei duh lo" ka ti chhuak sep a. Ka nu pawhin "kei chu naute pa ber ai mahin an nu ber saw ka tui pui lo che emai. Chapo si" a lo ti hlak a, ka pain a lo khak vat. "Pa ka ti tak tak, ka nei duhlo. Hreawm ka tihzual lai berin min hnungchhawn a, tun ah hetia a duh duh dan a min ti kawi a tum hi ka duh dan a ni lo. Naute chu kei mah pawn ka enkawl thei" ka sawi zawng te chuan ka hnuk a ulh teuh thei.




Jeremy chuan min lo be zeuh zeuh a, a tir ah chuan ka ngei thei thak lo. Mahse ka duh hneh em a, naute chungchang min zawh te hian tha tak tak a chhan let chang ka nei fo mai. Kan be tha leh tawh tih kan chhungte chuan an hriat in palai an rawn tir thuai a, keini lam pawn kan lo hnar biklo. Ka thiante pahnih chuan min tuipui lo kher mai. Mahse ka duh tlanna a ni miau a engmah chu an sawi lem lo.




Kan in neih zan ah chuan Jeremy chu a chhuak bo daih a, a thiante ka zawh lahin an hriat loh thu leh a lo haw vat an rin thuin min chhang mai a. Kei erawh ngaihtha lo deuhin ka lo awm thung.



..............



Ka meng chhuak hlawl a, ka hma zawn khuma mu ngât ka fanu chu ka en vat. Tui ti takin a muhil sek sek a, chutiang bawkin u Mamuantei pawh. Pawn lam a ri hut thawm ka hriat chuan ka va pan phei nghal ruak a, kawngka hawng in ka bik dek dek. Kan room piah deuh hallway ah chuan intibuai an awm ni maiin ka hria. Ka va chhuak phei a, rin ang ngei in pafa nu awm tak hi an lo in hau a. Va kal hnai deuhin ka thlir reng a, mipa chuan kut thlak a tum ta mai. Rang deuhin ka tlan phei nghal, hmaichhe tleirawl chuan min lo ban rawk rawk a, ka hnungah a biru chawih chawih mai. Kan thawm a nat tak em avangin doctor leh male nurse te an lo kal a, chupa chu an lo phawt sawn thuai a. Ka hnunga biru mek chu a khur hlak hlak a, ka khawngaih lutuk.





Kan room a luh leh mai ka tum chu mipa pakhat hian min lo ko a, ka ding chat "minlo hrethiam la, i handkerchief i thlauh" a tih chuan ka in her vat a, ka va pan phei vat. Doctor ni awm tak hian ka rawmawl chu a lo lek vu a, doctor hmel ka hmuh chuan mizo ang ka ti hle. Mahse ka chiang ngam lo, a hmel pa lutuk leh a body khal talh mai te chu sexy zawk tak a ni. Ka mipa hmuh tawh ah chuan hmeltha ka tih pawl tak a ni ngei ang, a mawina tizual turin a hmel a tha tel hrep nen. Ka thin phu rang thar ta lutuk te chuan awm a ti nuamlo lek lek thei nia.






Ka rawmawl chu la in lawmthu ka hrilh a, kal leh nghal mai ka tum chu "lawk. Tu nge i hming?" A tih chuan "Hannah" tih ringawt in ka chhang a, "hming pum?" A ti leh kher a, "Hannah Lalmuanzuali" ka tih leh chuan a bu nghauh nghauh a, "Mizo i ni ngei e" mizo tawng ngeia a tih chuan ka hau hian ka en tlawk tlawk. "A van mak" ka ti ban charh, a ni lah chu a lo nui suk duh chauh a. A name plate ka en chuan Ethan Zonunsanga tih hi a in ziak kulh a, a hming ringawt te chu ka mit ah chuan a pa hliah hliah tawh mai. "Kan in hmu fo dawn nia" a tih leh chuan ka thin phu a rang em em a, ka thawk thlengin a diklo vel vek tawh.




Cabin chhung ka lut chiah chu ka thaw hlawi hlawi a, a mi uap na zet kha ka zolo deuh chu a ni. Mizo mipa ah chuan ka mit la lung bertu te zinga pakhat chu a ni chiang alawm. Hlim rukna riau ka nei a, ka thinlung hi hriatthiam theih lohin a phu dut dut a. A rilru te chu a thar ang hlak a ni, a hlim em em a. Hriat fiah theih si loh in ka thla a muang veng veng a, rin phak bakin khapa khan min i danglam hneh viau chu a nih hi. Mizo a nih vang nge ka ngaina nghal ni mai hian ka hria a, a rim pa lutuk te khan tu emaw min hriat chhuah tir hial a. Mahse chu mihring, ka hriat chhuah nen chuan tehkhin theih an ni lo. Engkim ah mihrang hlak an ni.





"Mommy, tho tawh la. Ma.." tiin Hailey chuan min sawi dat dat a. Tho chhuakin "nizan i mu tui em?" Ka tih chuan a bu nasa mai. U Mamuantei chuan "Hannah, naktuk hian Mizoram ah haw ka ngai dawn a, engtin nge niang?" A lo ti nghal sawk sawk a, "ngati teh thun nge? Buaina a awm deuh ami?" Hlauthawng ru taka ka tih chuan a rhaw chhuak hak a "Sangtea a accident a. Ka nu phei chuan vawiin ah lo haw nghal turin min ti zawk a, mahse ka ngaihtuah deuh hlek che u a" a tih chuan mak ka ti hle a. Sangtea chu u Mamuantei pasal a nia, mifel tak a ni nghe nghe. "E...chutianga nih te chuan vawiin ah pawh haw mahla a pawi hleinem. Keini chu ngaihtuah ngai kan ni tawhlo a, bakah ka nau Nubawihi a awm tho a, bawitei lo hruai hun remchang a ni mai a, a pawi lo zawk daih alawm" ka lo ti ve luam a. Diktak chuan ka in thiamlo ru ve reng tho, keimahni vangin a pasal fanau te kalsan in min buaipui chawt a kan tan chuan vantirhkoh a ni ringawt. A mizia ka hrechiang thawkhat a, ka nel em em bawk. Chutia ka tih takah chuan a tumdan pawh thlak lehin vawiin lam ah haw chu a tum leh ta zawk a.




U Mamuantei a haw daih chu bawihtei a lungleng em em a, thian a kawm chak tlat a, a tap hial a. Len chhuah puiin kawt vel ah chuan naupang dang te nen an in fiam a, lemte ziak hoin nuam an ti phian a. Ka phone a rik chuan tu nge ka en vat. Nubawihi a nih vangin ka la thuai a, "hello, eng nge ni ta?" A rawn ti var a, nachin khan ka text a min lo call turin. "Englo a nia, vawiin ah u Mamuantei a rawn haw a. Karleh vel chu nangman min lo awmpui mai la, ka nu ka dil sak ang che. Bakah bawihtei pawh i lo hruai ve ang nga, hospital a riak tur ang ngawr ngawr ni lo in i hrethiam mai em" ka tih chuan a phur khawp mai. Ka nu chu min biak tir nghal a, ka nu pawh chuan a lo hrethiam khawm mai. Nubawihi lah chu phur ber ber ah atang a.




Doctorin min koh vangin a office ah ka kal a, achhung ka luh chuan dr. Ethan kha a lo awm a, a chhuak dawn chiah a nih hmel. Min hmu chu a khi suk a, a pa takzet. Mitmeng hriatthiam theih loh in min melh a, mahse chu min melhna mitmeng chuan thil eng emaw tak a sawi si.



Doctor chuan thu turin min mitmei zeuh a, ka thu thla vat. "Hannah thu lawmawm lam hrilh tur che ka nei a" a tih chuan ka hre chak zek zek, "englam pang nge ni" ka tih chuan a ngawi deuh vang vang a, a hnu ah "Hailey thin thlak na tur kan hmu tawh" a rawn tih chuan ka hlim lutuk chu ka ding hluai a, ka awih theilo hial zawk a ni "ui, tak tak em ni? Ka rei, ka van lawm tak" ka ti nghal chul a. Ka hlim lutuk chu awm ngaihna pawh ka hrelo.




Ka chhungte message in ka hriattir vat a, call chuan a rem thin lo. Bawihtei zai a ngaih vat dawn vangin a nutei te pawh an rawn kal a, ka causin Chhani leh ka fanu Jennie nen. An rawn thlen zan chuan bawihtei chuan a u chu a lo kuah chul a, an in ngai tawn takzet tih an awmdan ah a hriat theih. Hailey ai in Jennie chu a chum zawk a, Hailey sam a sei hnap laiin Jennie erawh a khabe chen vel in a tawi thung. Chutia ka fanu te pahnih awmdun ka hmu chu ka hlim em em a, he hun tluka ka tan hun nuam hi a awm kher hian ka ringlo.




..........




"Tho vat ta che, i mopui nu chu dar 5 vel khan a tho daih tawh" a tih ri ka hriat chuan ka thu chhuak thuai a, sana ka en chuan dar 7 chauh a la ni. Rai lai a nih vang nge mut a tui duh em em a, engtik lai mai pawhin mut a chhuak reng mai ni. Mut khamlo deuh in ka tho chhuak a, ka mopuinu u Mawitei chuan eirawng a lo bawl mek a. In ti fai hmasa lo chuan ka tih pui zung zung. Lo awm mai mai turin min ti mah se ka duh bik tlat lo, ka nu in ka awm mai mai lai a hmu a nih chuan min an khum leh hrep dawn tih chiang takin ka hre miau a ni.




Ka nu a phun hlak hlak lai chuan u Mawitein "ka nu khan dawt a sawi mai mai a nih kha, dar 5 ah pawh ka tho lo. Tun ah khan ka tho ve deuh chiah, nuamlo ti duh suh. Ka nu chu i hriat chian kha" a rawn ti sar sar a, ka nui tawp. Ka nu hi ka hrawn tirh chuan ka huphur ang em em in hrawn a hahthlak loh a, mahse thla hnih lai kan chenho tak ah chuan ka rin ai daihin hrawn a hreawm daih.



Ka in suk lai chuan ka nu chu thinrim zetin a rawn lut a, a kut ah kamis senno a keng bawk. Kamis chu ka hma ah rawn lek va in "hei hi eng nge i tih kai a. I insuk in uluk deuhin su thin ta che, eng ah mah hian i laktlak loh a nih hi. Eirawngbawl lah i thiam tak tak silo, i nu hian engmah a zirtir ngailo che em ni" a ti bawrh bawrh a. Ka ngawi kar mai, ka nu hming a lam ri erawh ka lungawi tehchiam lo. Kamis chu pharh nawk nawk in, "hei en ta che, a val kulh hi" tiin ka hmai si chet hian a rawn dah a, ka lo chhing sawk thei. U Mawitei chuan "nu, kei mah a nih kha. Robin ka ti baw palh a, ka lo su tha leh ang. Hannah in ka pa thawmhnaw ho kha chu a su lo hrim hrim" tiin ka thavang a lo hauh vat. Ka lung erawh a awi thei chuang lo.




Nau ka nei hnai tawh a, ka dul a lian bawk nen ka che hleithei lo a. U Mawitei lah a pa a boral vangin an khua ah a haw daih a, keimah lo chu inchhunga che tur an awm der si lo. Jeremya nau hmeichhia te lah chu ka nu ang chiah an ni hlawm nen, keimah vek chuan rawngbawlin inchhung ka enkawl a. Ka ke a vung nasa in ka infit lo zual hle bawk si, zan ah te hian tui taka mut hi ka nei tha mumal lo.





Ka nu leng chhuak tur chuan "vawiin chu kan blancket kha lo su teh aw. Kut in lo su la, machine chuan a fai duhlo, bakah a chhe duh" a ti a, ka hnial lo nain ka huphurh ru hle thung. Thuthlengte ah thuin blancket chu ka su a, a harsa takzet. Thenawmte nau ka va ko ringawt a, min pui zawk a, ni lo se chu ka su fai thei hauhlo ang.



Ka spin lai chuan ka nu a lo haw a, min hmu chu a chek tlak tlak a, "i kutin lo su rawh ka tih che kha. Machine ah a chhe duh ka ti mawlh mawlh a, sawi lo pawh ka nilo. I luhlul lutuk emai, ka thu hi zawm ve thin mai ta che. Mawitei te chuan ka sawi ang takin a ti ziah thin a, nangnu hian min zahlo reng reng" a ti bawrh bawrh a, u Mawitei nen hian min tehkhin ziah lehnghal. "Kut in ka su alawm, thenawmte nau ka ko phei a, minlo pui a" tha taka ka tih chuan a ner nang a, "mihran i suk tir leh nghal. Engtin....,awi kan chhungkua hi chu kan vanduai chiang a ni" a thu sawi mal tin te chuan thinlung a deng zar a, ka rilru a na takzet.





Ka insum thei tawk biklo chuan "ka nu, i ngaih ang em em kha chu ka ni biklo a sin. Engpawh ti dawn ila ka dul in min kam ur a, ka tan chet a harsa ve tho a. Diktak chuan ka na them thum a, zan ah pawh tui takin ka mu thei ngailo. Chu tih laiin Jeremy a rawn haw tlai thei bawk si. Rilru nuamlo deuhin ka awm a, engkim ah hian ka hah ngawih ngawih a sin" ka tap lek lekin ka hria. Ka aw a lawi vek a, ka rilru diktak ka sawi bawk a ka thaw hawkin ka hre thei hial.




Ka nu chuan rapthlak teh hmel deuh hian min en tlawk tlawk a, a phone chu phawrhin tu emaw hi a call a, "aw, lo haw nghal teh. I tihsual hi rawn hmu teh" ngeiawm zet hian a ti a, a biak dan atang chuan Jeremy ni mai in ka hria. Engmah sawi lo in rum zet hian min melh a, a room ah a lut tau ta daih. Ka thil sawi vang khan ka in thiamlo ru hle rual in ka ipikna zawng zawng azahve deuh thaw a kiang hawk a. Ka thawl ve hawk thei.




Jeremy a rawn thlen chuan rawng ka lo bawl mek a, ka nu room lam a pan nghal daih. Keichu min hmu ve awm pawhin a awm lo. Rei vaklo ah Jeremy te nufa chu an rawn in zui chhuak a, Jeremy chuan min melh khai khai a, "lo kal teh" min melh zeuh pahin a ti nghut a, ka kal ve mai bawk. Room ka luh rual rual chuan lukham hian min rawn vawm thawi thuak a, ka hamhaih lutuk chu ka en tlawk tlawk mai. Min rawnpan hnai ruakin "zaklo lutuk! Ka nu hi zahpahlo takin i be tur a ni lo. Ka nu a ni a, eng ang pawhin ngaina lo mah la i nu a ni ve tho. Kei thlengin min lo sawi tel a, zaklo hian" a ti hrawk a, ka phu chiang hle. "Engtin mah ka sawi lo che. Kan in hau ngei a, a tan a hriat nuamlo tur ka sawi awm ka va hrelo ve" zaidam taka ka tih chuan a ner sawk a "anih chuan ka nu chu bumhmang i tihna em ni. Nutling puiin dawt a sawi ka va ring chiah lo" a ti leh nghut a. "Chutiang a ni lo, ka nu chu chutiang mi a ni hleinem. Ka rilru buai nen, ka lo chau ve deuh nen ka thil sawi duhlo pui ka sawi a nih kha. Min hrethiam mai teh u" ka ti ta zawk a. Tlawm zawka tan hi a tlawm thlak zual ka ti, mahse chhungkaw in halna a nih ai chuan a hniam ber pawh nise ka kal zel mai ang. Ka kal theih tawhlo chin ah erawh chuan engkim a tawp vek tawh ang.




A chhuah hnu chuan bathroom ah lutin ka tap khur zawih zawih a. Ka ngaihtuah chian poh leh ka lung a chhe zual ting a, ka pasal min tihdan mawlh khan min tina zual ani.




Inrinni chuan ka nu te in lam ah ka leng phei a, ka nu te bul ah chuan ka pasal leh a nu in min tih dan te chu ka hrilh a, ka nu chuan min lo hau zek mai. "An hauh na ang ah che ngai lo la, an duhsakna ang ah che ngai tawp rawh. Hei i u Sangpuii pawh hian kan zilhna te hi a huat ngai loh hi, haw ta nise kan in ngeih nang. Nang pawh i nu chu be bawrh bawrh la, tlangnel takin awm la a dik vek a ni mai" a ti hlak hlak a, ka tawrhna te min hriat thiam pui se hetia a sawi ka ring bik lo. "Nu i hrethiamlo a nih kha. Nimin ah pawh ka rawngbawl sa a ei duhlo a, a bawl tha leh vek a lawm. A rapthlak a sin" ka ti a, ka nu pawh chu a ngawi kar mai.




"Chu mai pawh a ni lo, u Mawitei fapa kawr tur secondhand ka thin sak a, chupawh chu puanchhia ah a lo hmang vek a. A chhan ka zawh lahin min zahlo a ti zel sia. A...ka hrethiam tawh biklo, min haw ngawih ngawih ka ti mai. A hreawm tawp ani mai" ka ti leh a. U Sangpuii chuan "ui mate ka khawngaih che emai. Inpa hian a chhan ngailo che mi" a tih chuan ka bu ngauh a, engmah ka sawi zui lem lo. Kan nupa inkar lehzel chu ka sawi duh bik lo, a mualpho thlak mai mai. Ka nu chuan "tuar hram hram rawh, nakinah naute te in nei ang a, a zia ve zel mai ang" a tih pawh chuan ka lung a dam theilo. Nu bul a awm na na na chuan kan rilru a no zual a, ka tum loh deuhin ka tap chhuak hawk mai.




Jeremy chu zan ah a rawn haw ngai mang lo a. Rilru nuamlo deuh a min awmtir a thiam em em mai te chuan thin a tirim tun thei. Ka call a hmeichhia hian a lo pick a "hello. Jeremy chu a inbual a, nakin ah ka lo call tir mai ang che" aw zuai ralh hian a rawn ti a. Ka rilru a na lutuk chu ka ngawi kar ringawt. Phone chu dahthla riai riai in ka zawi hnawk a. Ka thaw em tih pawh ka inhrelo. Min kawp a ni tih ringhlel tho mah ila, ka phal silo. Ka na ngawih ngawih a, thu dik a nih pawh ka ring thei lo. Mahse a dik ngei a ni tih ka hre miau bawk si. Mizingah zaklo takin in kal riai in an kal a, khawlai ah lah nise ka phawk fo mai. Engah mah chuan an ngai hlei lo a, ka nat zia lah an hre heklo.



"Zanin chu chhuak lo mai la, ka pum a nuamlo sia. Ka hlauthawng e" a kamis thleh fel pah a ka tih chuan a sam chu a tuai hliau hliau a, nalh loh a hlau lehpek e. "Ka rei lo ang. Ka nalh em" awlsam zet hian a ti zui zat a. Ka bu ngauh ringawt. Ka lu rawn tuai thuak pah hian "nalh hi chu i hre ve a ni" a ti zeuh a, ka lu a rawn fawh zeuh chuan ka lo thle sawn vat. A chek tlak a, "kan duat ve dawn che a" a ti nghut a. A duat chu ka duh a lawm, mahse kei aia duat a nei tih hi hrelo i la chuan min duat na hi lawm takin ka pawm mai tur. A ngaihsak nih ka duh fova, a duat bik nih ka chak reng. Chu tluka thlakhleh ka nei chuang kher lo ang. Min hmangaih lo a nih pawhin min ngaihsak na tlemte tal chu ti lang ve se ka ti, nupa kan nihna ang tal pawh in.



Ka pum na riai riai chu hriat loh der tum eng ang mah ila a na em a, ka haider lui thei thlawt lo. Room atanga chhuakin ka nu te room lam chu ka pan a, kawngka ka kik dat dat. Ka pa chuan rawn hawng in, "e..Hannahi chu engti zia nge?" A lo ti thuai a. Ka pum nat thu ka hrilh chuan ka nu a kaitho vat a, ka pum lah chu a na em em mai bawk si. U Mawitei chuan "damdawiin ah kal pui mai ang u. Nau i vei tan a niang" a lo ti a, ka nu pawh chuan a lo pawm khawp mai. Kan chhuah dawn a sana ka en zeuh chuan zinglam dar2 a ri thuak tawh a.



Ka pum na lutuk chu awm ngaihna ka hre tawhlo, ka kal kual thuak thuak a. Achang leh ka thu a, a chang leh ka mu vel thin. Engtin pawh awm ila a nuam thei chuang lo, a na em a ni. Nau neihna room a min nawr luh dawn ah chuan u Mawitei chu hrih ru zeuh in Jeremy call turin ka ti a, a ni pawh chu a bu nghauh nghauh mai.




1 week later


Kan naute te chu hmeichhia ni in a upa zawk hming ah Jennie Lalnunpuii tiin ka pa in a phuah a, a naupang zawk hming ah Hailey Lalremruati tiin ka pasal pa in a phuah ve thung.



A naupang zawk hi a pian tirh atanga hrisel lo sa anih vangin damdawiin ah kan la awm reng a. Cabin ah kan awm bawk. Ka naute te chu hnute pek an ngai si, hnute tui ka neih that loh vangin NUN kan pe a. Siam sa kan lo nei tawhlo nen, Drip kan khai vangin khawi ah mah ka kalsawn thei bawk si lo. Tu mah an awmlo a, kei mah tlawng chuan ka awm a. Ward pangai ah awm ila chuan tih dan dan a awm tur. Tih ngaihna ka hrelo chuan Nubawihi chu ka call ta ringawt a. Reilo te ah helmet nen a rawn lut a, khaw nge mi dang ti ni awm tak hian min melh kar bawk.



Ka tah a chhuak ngawih ngawih a, "hnute tur lo siam lawk teh" ka tih te chuan ka aw a lawi vek thei. Ngawi reng chuan a siam ve mai bawk a. Hnute kan pek lai chuan "u, ti nge nangmah chiaha i awm" a ti ta reng a, "an buai deuh a" ka ti ta tawp. "U Mawitei tal chuan lo awmpui awm che" a aw ah chuan a lungawi vaklo tih a hriat theih. Kei pawn mak ka ti u Mawitei tal chu a lo lang ka rin nen nen a lo lang miahlo hi mak ka ti tawp a ni mai.



Nubawihi chuan Jeremy leh hmeichhe pakhat a hmuh ziah thin thu leh an in huat vak loh thu a sawi chuan ka na zawk a, ka thinphu a rang nghal em em a. Chhan puh tur awm silo in ka sa pup pup a, ka thin zawn hi chemte a vih ang mai hian a na zawk a. Ka thawk lak dan a diklo in ka thaw tha thei reng renglo.





Nubawihi chuan min zawt sek sek a, a hre thawi ta sa sa tiin ngaihzawng a neih thu leh kan inchhung boruak te, min tihdan engkim chu ka hrilh tlang ta vek a. Ka sawi zawng a ka mittui lo tla leh thin chu ka nau chuan leinat zet hian min en leh thin. "Jeremy hian vawikhat tal, 'vawiin i chau em? Na i nei em? Vawiin i hun hman a nuam em? I rawngbawl chu a tui hle mai. I nalh lutuk' te min ti thin se, mut naah te hian a hna chungchangte min sawipui se, a lungawih lohna te, a hlim na te engkim min hrilh ve thin se ka ti. Ni tin mai in thlahrung em em in ka awm a, zan lama a chhuak thin ringawt te hian ka rilru ngaihtuahna a la peng a. A thil tih tur leh a kalna tur hre reng chungin ka ngaihtuah ruai thin. Nupuiten an thlamuanpui ber an pasal ten an thlamuan loh hian thlapang a zual. A duat te ka chak a, duat taka min kuah te ka phut ru fova. Hman a duh tak leh hmangaih taka min en thin na mitmeng ngei khan min en leh se ka ti. A...a hreawm emai!" Ka tap deuh pur a.




A ni pawh chu a insum thei meuhlo. "Hetiang em em a nat hi ka nei thei ngai hian ka ringlo" ka ti leh sep chu ka nau chu rawn tap ri hawk in "u, i lo van tuar nasa ve! Ti nge engmah i sawi ngai loh, i tan kan ding tlat tur a nia. I tlavang hauhtu tur pawh i nei lo a; inthen mai ru. Ka phal tawhlo, a hreawm dawn emai" a ti khur hlawk hlawk a.



Kawngkhar an rawn kik chuan Nubawihi chu bathroom ah a tlan lut nghal a. Kei pawh chu in hru fai sawk sawk in lo lut turin ka ti vat. Ka rin loh lutukin Jeremy chu mitmeng zuai ralh hian a rawn lut a, a rilru a nat hmel hle. A thil rawn khai chu side table ah dahin ka bul a rawn thleng chu rem leh remlo hian min kuah nghal a. Ngaihna hrelo zet hian ka lo awm mawl tawp. "Ka tihpalh, ka tihpalh lutuk. Hetiang em em hian min thlahlel ang tih ka ringlo a ni. Bawihi ka thiam loh a ni, min ngaidam thei em? Khawngaihin min ngaidam rawh." A ti a, a tap lo na in a rilru nat zia leh a in thiamloh zia chu hriat hmaih theih rual a ni lo.




Kuah let lo turin ka in hum ruh ngar ngar a, "Jeremy" ti sep in ka kuah let ta nge nge a. Ka na lutuk, mahse ka hmangaihna hian ka duh em em inthiam lohna chu a enliam thei si lo.




Chuta tang chuan Jeremy chu zan ah a chhuak ngai meuh tawhlo a, a theih hram chuan ka bula awm a duh tlat thin. Chutia a fapa in a nupui a duat thar thut chu ka nu pawhin min khak khat ta viau a. Mahse min melh no lo thei khawp mai.



.........





"Pi Muanzual" ti tu vang chuan ka harh zawk a. Ka hma zawn ah tak chuan dr. Ethan chu a lo ding kur a, ka phu nasa lutuk chu ka petek dawr mai. A nui suk a "eng nge i ngaihtuah ka va hre chak" tu zeuh a. Kei pawh ka nui tawp "thil eng emaw ka lo ngaihtuah a, ka tihpalh lutuk. Eng nge i sawi kha?" Ti a in thlahrung angreng tak a ka zawh chuan "eng mah ka sawi hleinem" a ti duh lek a, ka ngei ang reng khawp mai. Hla deuh hlek atanga "mommy" tih pahin bawihtri te unau chu an rawn tlan dun a. Va kal hnai vat in "Hailey, vawi engzat nge ka hrilh che tlan tawh lo turin" tiin ka hau a, Jennie chuan "mommy hau suh, Hailey hi a damlo a nia." A lo ti a, a nau chu a lo tan ve khawp mai. Ka hnung lawk a ding doctor chuan "fa phir i lo nei reng a" a ti a, a nui suk suk mai.



Bathroom a ka awm lai chuan Nubawihin "u, lo hawng vat teh. Jennie ka hmulo a nia, a nauin a awmna a hre bawk silo" a rawn tih chuan ka chhuak thuai a. Bawihtei chu kan zawng ngial pawhin kan hmu thei reng renglo. Ka mangang lutuk chuan dr. Benjamin chu ka hrilh a, information lam a biak pawh dawn lai tak chuan a phone a lo ri a, a biak zawh hnu chuan a nui suk a, "Jennie bawihtei chu Dr. Ethan bul ah a awm. A room ah va kal mai ru" lo ti khauh a. Ka lawm bawk si chu engmah sawi loin ka tlan chhuak nghal a, doctor Ethana room chu ka pan nal nal mai.




A room kawngkhar ka kik dat dat a, a chhanna pawh nghak lo chuan ka hawng nghal hmiah. A chhung ka luh chuan bawihtei chu a lo awm ngei a, lehkhabu a lo chhiar a. Dr. Ethana chuan patient a lo nei a, ka inthiamlo ru hle. Ka lut ta sa sa tiin "doctor, bawihtei ka lo lam dawn a" ka tih chuan "aw, lo awm lawk rawh. Thil sawi pui tur che ka nei" a ti a. A patient nu chu eng tawng emaw hian bia in reilo te ah a kal chhuak a. Bawihtei bul a thut thlak pah chuan a lehkha bu chu ka en thuak a, a chhiar emaw ka tia, a lem a lo en lek chu niin.



Dr. Ethan chu kan bul ah rawn thu thla a. Ka thin a phu leh dawt dawt tawh. Ka thin phu ri a hriat hlauin ka tawlh hla sawt a, a nui lui sang bawk. Doctor chuan min en kar chung hian "pi Hannah..." a sawi zawh hma chuan "pi Hannah chu min ti lo teh. Hannah min ti mai rawh" ka lo ti hman a, a nui suk mai. "Hannah, i fanu thin thlakna tur in hmu tawh tih ka lo hria a ka lawmpui lutuk che u" a rawn tih chuan ka melh zawk a. Min lo en reng tih ka hriat in hmun dang ka melh leh daih. Ka thinphu a rang tawh sa nen a hma aiin a rang lehzual a, ka trek chhuai ni mai hian ka hria.



"Ka lawm lutuk. Engtin nge ilo hriat a" tiin ka zawt let a, a nui leh suk tawh. Pa lutuk hian! "Doctor ka nih hi" a ti deuh nghut a. Ka nui tawp, he mihring pa lutuk leh sexy zet hian min ti â thei takngial dawn a ka hriat vangin rei pawh awm duhlo in bawihtei chu chhuah pui thuai a.



Hailey an zai dawn ah chuan a hlauthawng ve hle a. A huhphurhin a zam ru ve hle. Mahse a U in a thiam ang tawkin a lo hnem ve a. Dr. Ethan pawn in bawihtei a zai ve dawn a, doctor thiam pahnih in an zai dawn vang nge ka ngaih a tha em em thung. Darkar 3 ngawt kan nghah hnu chuan Dr. Benjamin chu a rawn chhuak a, tluang taka an zai thu leh ngaihtuahawm a nih loh thu a sawi hnu ah a kal sawn a. Ka lawm lutuk chi ka hnuk a ulh thei hial a ni.



Ka phone ri chuan min ti harh a, caller ID pawh em lemlo chuan ka pick a. "Hello" phak chuap a ka tih chuan lehlam a mi chu a thaw ri ham ham a. Caller ID ka en chuan Dr. Ethan tih a lo in ziak kalh a. "Hello" tih leh pahin ka thu chhuak a sana ka en chuan dar1 a pel tawh. "Hannah" a rawn ti thawp sup a, a hmel hmu silo in a aw ah ringawt pawh ka tuiral leh tawh. "Top floor ah lo chho lawk teh. Thil pawimawh a nia" a tih chuan "eng lampang" ka ti let vat. A thaw chhuak leh ham ham a "khawngaihin" a ti leh sup chuan thil thalo thleng a awm a nih ringin ka aw ta a. A tawng dan vel ah khan thil thleng chu a awm chiang a lawm.




Ka tho them them a. Elevator ah chuan keimah chauhin ka ding vang a, hlau ru hle mah ila min ko tu hian min hneh em a hlau chung chung pawh in ka kal lui zel tho a. Inchung zawk la thlen chuan min hnung chhawn zawng hian a lo ding a, ka thawm a hriat chuan a lo hawi vat. A bul a ka va din chuan min en deuh vang vang a, kan ngawi dun ran a. Ka hmazawn a khawpui pe un mai chu ka en ngar ngar a, rawn tawng chhuak in "naktuk ah hian Mizoram ah ka haw tawh dawn a" a rawn tih chuan ka en chho vat. ""Ti nge" ka tih chuan ka lam ah rawn in her in "chhungkaw program a nia" a kun lap a, ka lo en kar. Rawn hawi chhuak lehin "ka kal hma hian thil pakhat hrilh duh che ka nei" a ti sup a. Hnai set sawt hian ka hmai zawn ah a rawn kun hniam a, a thaw lum ham ham mai. Ka lo mur chhuam vek a, ka thinphu ri ring lutuk chu a hre pha ang tih mawlh a ni ka hlauh ni. A hmui liak zeuh in ka hmai si deuh thaw hian a awm a. Chu tah muang changin min rawn fawp a, ka bing mup thei. Lo dang tur ka nih laiin ka lo dawh mawl tawp a. Ka chhang let lo a, ka hnar hek lo. Ka hnar biko tih a hriat chuan a hma aiin a duh thawh zawk a, chhang let lo tur a ka insum nasat zia chu.




A in la hrang a, a khi suk a "ka rilru put ang tho hi i pu tiraw" a tih chuan ka ngawi reng. A mah bawk chuan "min duh ve tho tih ka hria" a ti leh sup a. Ni e, hepa hi ka duh takzet alawm. Ka duh lutuk hi ka atchilh zawk hial a ni, ka vei vawng vawng a. A bula ka awm chang a ka thinbhu ri te hian ka duhzia an hre chiang ber ang. Ka la ngawih kar vang chuan "min chhang teh" ti leh sup a, a tawng ringlo naiin ka hre pha tho. Ka bu nghat a, a khi suk mai. Min rawn kuahin zawi muangin ka kuah let a. Ka duh leh ka vei em em mihring in kei nuthawi pa pahnih nei tawh hi min duh ve thei ang tih rin ngaihna reng ka hrelo. A taksa lian tak ina nghet taka min kuahna chuan thlamuanna nasa tak min pe a, ka rilru a thawveng sawt bawk.




A haw tur chu airport thleng thlah theilo mah ila kha inchung, thli thaw heuh heuh leh arsi eng mawi tak hnuai ah khan ngai tak chung leh thlahlel tak chung siin kan in thlah liam a. Min duhna a rei tawh tih a sawi lai khan eng vang a hma la vat lo nge a nih ka hrelo. A hma daih tawh khan hetiang hian awm ila chu duh ang zan in kan awmdun hman tur. Khang hun kalta te kha ka ui ngawih ngawih.



Phone hmangin kan in be pawp reng a, ka ngaih tawh sa nen ka ngaih a zual a. A bul a awm kha ka chak takzet. Hallway ka kal lai te hian ka hnung ah ngawi rengin min zui in ka hre tlat thin a, mahse a ni ngai silo. Chhuanlam ho te te hmang a min hmu tura a lo kal ziah thinte, ka fate hmanga min hmuh a chhuanlam thin te kha a naupang chhia ka ti thar hle a. A room kawngkhar ringawt te chuan a mah min ngainzual tir hle thin.



Bawihtei a dam deuh tawh vangin Mizoram ah haw turin kan in buatsaih a. Bawitei phur lutuk chuan min ti hlim zawk. Jennie erawh a la khawmlo hle a, chutiang bawkin a nutei pawh in. Kan haw dawn a Jennie in siam chu ka en reng a, make up a in hnawih vel a. A la thiam em em zui, Nubawihi chu ka bul a rawn thun pah hian "a pa ang chiah tur. A lerh lutuk, thil nalh te hi a hria a nia" a rawn ti sar sar a, ka lo nui tawp.



Thlawhna a kan chuan lai chuan tukverh lam chu ka thir dauh dauh a, ka hun liam tawh te chu van sang tak ah ka thlawh bo san vang vang hian ka hria. Nge ni a Mizoram lam a min lo hmuak tu tur vang zawk ka hrelo.




.........




"Khaw maw, kal teh" u Mawitei vin that ri chu ka ngaithla reng a, "Lalnunpui" a tih leh chuan u Mawitei te room lam chu ka pan vat. Jennie chu kil khat ah inthlahrung deuh hian a lo ding zum zut a, ka khawngaih zawk. U Mawitei bawk chuan "eng vangin nge ka makeup i lo khawih a, a chhiat vek hi" tiin a hnung ah a beng thum dut a, chu ve leh va lut nghal in bawihtei chu a dar tawn tawn ah ka vuan a "nu Mawitei makeup i khawih em ni" ka tih chuan a bu nghat a, a men pual pual a a tap pur mai. U Mawtei makeup chu ka va en a, compack leh eyeshadow hi a lo kawm chhia a. A chhe nasa pawh a ni lo, chtia ka fanu a beng kher chu ka rilruba na deuh. Eng mah sawi lo chuan "nu ka khawih tawhlo ang ti rawh" ka ti zawk a, bawihtei chuan tap pur chung hian a ti ve mai bawk a.



U Mawitei mize dang sawt lutuk hi ka hre thiam thei lo. Ka fate chungah hian a sual thei em em a, tawng kam na tak tak a tawng khum a hrat hle bawk. Ka fate chhan zawnga ka tawngin kan in hau nghal zel mai bawk si. Chu tih kar ah Jeremy pawh a mize ngai ah tho let lehin rilru hahna hlir min thlen a. Ka tan chuan khang hun ka hlim em em lai reilote kha a reilo lulai lutuk tlat. Ka fate vangin chhel takin ka ding chang hram hram a, na taka min siam tu hi kalsan ka phal tlat bawk silo. Ka nun hrep hi a!



A ngai te bawkin ka nu in min khak leh ta fova. U Mawitei lahin ka fate hi a hua ni berin ka hria. Ka pa in a duat deuh hlek te hian a fapa hi a len pui daih zel a, a thik thin ni mai te hian ka hre thin.



U Mawitei chu a tlan a, a chhan pawh kan hrelo. Ka nu mood chhe lutuk chuan biak pawh min be duhlo a, a room a luh pahin "nu chaw lo ei la" ka tih chuan a thu chhuak hluai a, ka en deuh vang vang. Chhuah mai ka tum chu "nang kha" a tia, ka ding chawt. Min rawn en in "Hannah, thil pakhat chiah ka ngen ang che. Bawiha nen hian inthen mai ru" a rawn ti dam thlup a, ka hamhaih lutuk chu ka ka hau ringawt. Chhan dan tur pawh ka thiam lo, thu khuh awm silo in a sawi tlang tawp a ka buai vek. "Mawitei tlan chhan pawh i hre tawp nang" tih leh chuan a chhan ka lo zawt vat, "i fate pahnih hi i khuahkhirh hneh si lo. I pa tlawn nan tak i hmang a, i pa lahin hmeichhe naupang a ngaina tih i hre ru kar a. Mawitei tan chuam chu chu thil hmuh hre awm a ni alawm. In then i duhlo a nih pawh in in in lam ah haw rih phawt la a tha ang. Mawitei lo haw se i lo let leh ang a" a tih te chuan awihlo zet hian ka en tlawk tlawk a. Ka rilru na lutuk chu ka kha a chih zo a, tawng dantur pawh ka hre lo. Ka na ngawih ngawih a ni mai.




U Mawitei chu ka haw ru em em a, ka in hnem ve na ber in min phatsan ta mai hi ka tan chuan awi a harsa in thil awihawm loh ber pawl ani. Engkim ah ka ring em em zel a, ka in nghah ngamna ve ber kha a ni a sin. Mahse ka rilru ah 'Misdangah in nghat lutuk suh, i hlimthla pawhin thimah chuan a kalsan thin si che a' tih hi a awm tlat a. Ka in hnemna ber pawh a ni.




Zan ah te chuan mu thei loin ka in let kual sek a, khum zau taka keimah chauha mu ka ni bawk nen duh ang tawkin ka in let kual a. Ka tawrh hi mi nazawng tawrh chi rual a ni lo, a rapthlak lutuk emai.



Zing ah chuan ka nu room ah ka lut a, ka nu chuan lehkhabu chhiar pah hian min lo en kar a, a bul ah va thu thla in "nu, nimin a i sawi kha nizan khan ka ngaihtuah chiang a. I sawi ang khan Jeremy nen in then mai ka duh a ni" awlsam taka ka sawi thei chu mak ka ti hial zawk. Ka nu chuan lehkhabu dahthla in min en kar a "a tha e. Ngawi rengin chhuak tawp la engkim ka lo ti fel vek ang" a tih te chuan ka na ngawih ngaih mai. Nizan khan muk takin ka in ngaihtuah a, ka pasal hmangaihna ka dawng tawh lo a, ka u ang tak tak a ka en lahin min phatsan bawk si nen he kanwg hi ka thlang ta a ni. Ka fate hmakhua ka dawn chiang a, pa lerh tak an nei tih hi an hriat thiam hma ngei a then hmak hi ka tan leh an tan a tha zawk a ka hriat vang a ni.




Kan chhuah ni chuan ka nu in bawihtei te unau chu pawisa a pe ve ngei a. Ka lo hnar nain ka tute an nia lawm a ti ve deuh at si a. Mak ka tih tawp theih loh chu tû te theuh theuh thiar bik a nei hi a ni. U Mawitei fapa chu engtik lai pawhin toys a lei sak reng a ka faten an ngen ve pawhin a lei ve ngailo. Ka fate vanga tah chang lah ka ngah.




Thawmthaw nen kan haw thut chu ka nu in min lo zawt vat a, nui sang chung hian "hremhmun ka lo chhuahsan" ka ti a, ka nu chu a phawk hle. Ka nau Nubawihi a lo haw chuan ka nu in "i u kha thil awmzia han zawt chiag teh. Eng mah min hrilh duhlo" a lo ti vat a, Nubawihi chuan thil awmzia chu min zawt ta reng a. Zan mut naah chuan ka hrilh a. Rapthlak a ti lutuk chu sawi tur pawh a hre lo. Ka fate a en a, "u, a pawi lo zawk daih. Bawihtei te unau an khawngaihthlak mai mai. I lo haw hi ka lawm daih zawk, bak ah zalen takin i awm thei tawh ang a. In pa lah kha lerh kawh lutuk, naupang deuh deuh a ngaizawng a" a ti hlak hlak a. "Ka lo chhuah chhan hi ka nu hrilh suh aw" ka tih chuan a bu nghat a, "hrilh chi loh reng reng. A rilru a na lutuk ang" a ti ve mai a. Nau engkim hrilh ngamna ka nei hi ka van vannei chiang tak.




Kan inthen fel hnu chuan bawihtei natna kan chhe chhuak leh a, ka rilru hah lutuk chu ka chhiat pui hle a. Ka cher in ka dawldang a, nikhaw hrelo a tluk chang lah ka ngah. Ka fate vang chauh a dam ve tawk tawk ka ni tak tak a. Ka hmel ah hlim hmel hmuh tur a awm ngai lo. Mahse a hma a kan nun ngui lutuk leh ka hreawmna te khan ka kalbo san tak a tang chuan ka chhungril hia nuam nagwih ngawih thung si.



.........



Mizoram kan thlen chuan ka thaw chhuak ham ham a, mahni ram ngei a let leh chu a dan a dang zar mai. Ka hmuh chak em em, zantin ka mumang thlenga ka hmuh, ka ngaih em em, ka ngaihtiahna zawng zawng luahtu ka duh ngawih ngawih doctor Ethan Zonunsanga ngei chuan kamis dum ha in min lo hmuak a nih chu. A hmel nui sang leh thlaleh taka min melhna chuan ka duhna a ti zual a, ka khawih phak leh hmuh phaka awm tawh a nihna mawlh chuan ka thla a ti muang leh veng veng tawh.




Kan hun lo thleng tur ka hre lawk lo a, kan hun kal tawh erawh Ni in a liam pui tawh thung. Khang hun kal tawh zawng zawng ma theih nghilhna tur mioa kq chharta ni mai in ka in hria.



Ka beiseina khan ka beidawn chang pawhin beisei tlat turin min ti thin a, tun ah chu beiseina chuan suangtuahna ram ah min hruai lut a. Chu suangtuahna chu a taka thlen tir chiah ka hma bak tawh.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)