LAST KISS (Competition)

Ngaia
Site Admin
Posts: 25813
Joined: April 30th, 2016, 4:07 pm

Re: LAST KISS (Competition)

Unread post by Ngaia » November 12th, 2017, 2:04 pm

LAST KISS 13
Chapter-13



Sana ka en chuan dar 5 alo ri der tawh a, chhinkhat mah ka chhing hauh lo. Ka rilru buai nuaih mai tih thawven nan chuan khum ațanga ka thawh vat angai tih ka hria.

Thingpui no dawmin ka kiu chu dawhkanah ka nghat a, Jace hmel chu ka mitthlaah a lang reng a.

"I va tho hma em em ve, nizan lam i mu lo tih i hmel ațang a lang reng alawm," Pate John-a chuan a zan mutkawr la ha chung chuan min lo pan phei a.

"Ka mu hauh lo, mahse nang pawh chu i va tho hma ve?" Ka thingpui in lai chu ka chhunzawm leh a, a hmeh erawh ka ei chak loh avangin ka ei tel lo thung.

"Bridget, Jace duh dan chu i hriat tawh kha, i rin loh vang leh i luhlulna avang khan engmah adanglam phah dawn chuang lo tih pawh i hriat kha."

"Ka hria alawm ka ti sap a," ka thinlung chuan thudik hre mahse ka nu leh pa te ka ngaihtuah chuan pawm harsa ka ti hle si a.

"Vawinah i In ah haw la ka duh a ni, i nu leh pa vang tal pawhin," John chu a thu tak ruih a, ka chhanna nghak chuan min melh rulh bawk.

"Mahse, ka ngaihtuahna ka la siam ve lo a ni," ka en let ve ran a, "Thingpui i duh em?" Ka ti zui a.

"I in ngaihtuah tam poh leh i buai zual ting a ni mai, Bridget ka thu hi pawm hram teh," min ngen a ang mah zawk, thingpui bel lam chu panin amah chuan a in thlit zui nghal a.

"Ka hrethiam alawm Pate, mahse, engtin emaw tak hian nuam lo tihna ka nei a tin ni, hlauhna zawk nge pawh ka hrethiam lo," ka ham bai bai a, ka mut a chhuak hle si a, ka mu thei lo mai pawh a.

"Bridget, Jace hian a hmangaih lutuk che, i naupan lai te ka ngaihtuah a, ral khat ațang chauha thlir țhin tu che kha ka inah ngei hian a fanu avangin a indawmkun ngawih ngawih lai vawitam ka hmu a sin," a khawngaih hle tih pawh a hriat.

"Ni e, kawngdang ka nei chuang hleinem, he ta awm reng thei ka ni si lo va."

"Chutiang lamah erawh i duh duh chen i awm thei tih i hriat kha, mahse, tunah chuan thudik i hre vek tawh a, pawm thiamin a nih tur ang tak nih tir tawh la ka duh hle a ni." A thusawi chu a nghet charh a.

Ka thaw hawk a, ka ngaihtuahna chu buai hle mahse John hian a sawi dik tih chu ka hre bawk si, ka thinlung khauh lutuk chu tihnem ka mamawh ber a ni.

"Ni e, ka tum ang," phur fahran lo chuan ka ti ve a.

"Vawiinah Rose-in a thlah ang che, i duh chuan a awmpui thei bawk ang che."

"Ni lo, tihbuai leh ka duh tawh miah lo, keimahin ka awm thei alawm, ngaihtuah ka ngai reng reng lo."

"Tun ațang chuan kei leh i Pa Jace-a te min nei tih hria la, engkawngah mah lunngai lo turin ka duh che a ni."

Ka lu chu ka lo bu liam ve satliah ringawt a, a nihna takah chuan ka nu leh pa te nen kan lo chenna in a luh leh ka duh chhan ber pawh engdang vang ni lo vin, ka nu leh pa te vang chiah a ni tih ka hria.


Jace phei chu ka pa ni mahse, tihbuai ka tum lo bur.

"In va tho hma ve," Rose-i chu mengphak tak chuan min rawn zawm ve nghal a.

"Vawiinah Bridget-i hi a In lamah haw se ka lo ti a, ani paw'n a hnial hran lo a nih chu." John chuan a ti a.

"A țha lutuk, hetiang rilru i put hi ka lo ring miah lo asin," hlim tih hriat tak chuan Rose-i chu a nui ver ver a.

"Ni e, a dik alawm ka thinlung erawh chuan a pawm thiam chiah em ka hre lo."

"Bawihte, rei lo teah i thinlung paw'n a pawm em em ang tih ka hria a ni," Pate John chuan a lo tih zawm nghal a.

"Ka thlah ngei che angai dawn anih chu, i duh chuan hun rei lo te chhung chu ka awmpui thei bawk ang che," ka bula țhutnaah chuan a lo țhu hnai ve nghal bawk a.

"Ni lo Rose, min awmpui zo chiah anih kha mawle, tunah chuan keimahin ka awm thei tawh alawm, ka mamawh che anih phawt chuan ka hrilh leh zawk ang che." Ka hmelah chuan tihbuai ka duh tawh loh zia a hmu ve ngeiin ka ring.

"A țha alawm. Mahse, buaina emaw harsatna i neih chuan min hrilh nghal vat tur a ni ang," a nui leh ver ver tawh a.

Tukțhuan kan ei kham chuan ka In lam a kal tur chuan kan in buatsaih mawlh mawlh a, Rose-i bula ka awm tawh lo tur chu ka thinlung takin ka huphurh hle, ka lungngai lawk em em si a, tuna ka dinhmun ngaiawh chho mek zel hi a tam zawk chu Rose-i vang liau liau a ni tih pawh ka hria.

Ka in pan a Taxi-a ka chuan lai te chuan ka nu leh pa te, Jace, Rafe te an pali chuan ka ngaihtuah neuh neuh bawk a, ka ngaihtuah dan kawng lah a in ang lo vek thung.

In kan thlen chuan ka thaw huai a, Taxi ațang chuan chhukin Rose-i chuan hma a hruai a, kawngka chu hawng zuiin kan lut zui nghal a.

Kan in, ka nu leh pa te nena kan in ngei a ka luh leh chuan ka ngaihtuahna chu athar em em a, nidang chu ni se ka nu leh pa te chuan min ngaih tawh zia hrilhin min lo kuah leh ngei awm si a, vawiinah erawh chuan adan a dang ta thung si.

"I țap hmel hmuh leh ka duh tawh miah lo Bridget, in sangmar la theih ang angin in hi kan tifai dawn nia," Rose-i chuan min khawngaih hle tih erawh ka hria.

Ka inbual fel a, ka thawmhnaw te ka thlak hnu chuan inlam chu kan tifai zui nghal a, ni rei lo te awmbo san mah ni ila, tihfai tur erawh a tam phian thung.

"Chawl lawk teh ang, ka chau tlat zanin chu zanriah hetah ka ei ang," Rose chu țhutphah lam pan chuan a țhu thluang ar a.

"Tehreng mai, i ei thei tur chu ka lawm hle a ni, ka lo beisei ngam lo zawk a," țhutphah lam chu ka pan ve nghal a.

"Nizan lam boruak min la hrilh miah lo a nia," hriat chak zet chuan min melh ha a.

"Nang paw'n i piamchama kan lo kal lai a Michael-a chanchin min hrilh tawh bik ngai hauh lo," tilui zet chuan Rose-i chu ka țhen khum sak a.

"Bridget kha Michael-a kha bum hmang a ni, bialnu dang a lo nei reng alawm, khatiang mipa kha ka mamawh hrep lo e," sawi zawm a duh lo tih hriat tak chuan a ner nawk a.

"A va zia lo ve, mahse a ai țha i hmu dawn tih ka hria alawm," hnem deuh si chuan ka ti a.

"Ka hmu alawm, kan in zui țan mek, chutiang lam sawi a hun lo, nizan chanchin alawm ka zawh che," a hmui a ti pawrh tarh a.

"Rafe chu nizan khan a zin a Italy-ah, Logan-a pawh a lo thleng a, a sumdawnna lam enkawl turin."

"Nizanah Rafe chu a zin amaw? Engti turin? Chuan Logan chu tunge ni reng reng?" Mak ti hmel pu chung chuan min en hu a.

"Rafe chuan Italy-ah thil tihfel tur a nei niin a sawi a, a thil tihfel tur chu a hlawhtlin hunah awmdun min tiam bawk."

"Tak tak maw, ava lawmawm ve, athil tihfel tur chu engpawh ni se tifel ngei teh se," min lawmpui tih hriat tak chuan a kut chu bengin a nui vur vur a.

"Logan-a chu min la hrilh miah lo," atih zawm zat a.

"Rafe nen Australia-a kan zin khan kan in chhar a, Rafe țhianțha ber a ni bawk, hausa tak niin pa zahawm tak a ni bawk, țhianțha tak kan ni leh zel bawk a," ka mitmeng ațang chuan engemaw tak hrethiam ang mai chuan.

"A ngaizawng che," a lu ti che miah lo chuan chiang zetin min en a.

"A ni mahna. Mahse, min duh tak tak hauh lovang, a thinlung kaldan a hrethiam lo mai a ni zawk mahin ka hria," ka kut paw tak chu ka beng fai nauh nauh a, "In tihfel hmaa ka lo inbual ta chu inbual nawn leh ka ngai ngei dawn a nih hi," pawnchhia chu lain ka hru nghal bawk a.

"Ka hrethiam Bridget," a lan dan chu thil hrechhuak thut ang maiin rang zetin a rawn țhu ngil nghal a, min ti phu hial a ni.

"Logan chuan a duh hle che a, a theihngilh thei lo bawk che, chu chu hmangaihna kan ti thei ang, pa hausa leh zahawm tak chuan a hmeichhe hmuh vawikhatnaah a hmangaih nghal ang hian, Movie vela kan hmuh țhin ang hian," a kut chu a chawi kang vel bawk a, a mengkual nasa hle bawk.

"Mahse, chu a hmangaih atan a ruat ngei emaw a lo tih chu, a țhianțha ber chuan a thinlung a lo neih sak tawh si," amah leh amah inbia a ang mah zawk, za fahran chuan a rawn nui chhuak bawk a.

Ka nuih a zat em avang chuan kan pahnih chuan kan nui chiam a, ka nuih lohna hi engtia rei nge a nih pawh ka hre tawh lo hial.

"Remchang hmasa berah chu Logan chu ka hmu ve duh ang, tunah chuan tifai chhunzawm ila, zanriah tur buatsaih a ngai dawn si a," ka chhanna pawh nghak lo chuan a tho nghal a.

A tawp ber nana ka nu leh pa te room kan tihfai lai chuan hrehawm ka ti hle, ka in thunun hram hram a, Rose-i chuan ka rilru hre takin min be buai mawlh mawlh reng a, kan zo fel thei ve hram, room chu a kalh leh nghal daih a.

"I in peih hunah chauh lut tawh ang che," choka lamah chuan a chhuk zui nghal a.

Ka in tihfai zawh chuan Rose-i pawh chuan zanriah tur lo peih diam tawhin, "Ka in tihfai hnuah kan ei thei ang," intifai tur chuan a kal zui ve nghal a.

Kei chuan dawhkanah zanriah tur chu ka lo buatsaih mek bawk a, rei lo teah Rose-i pawh lo chhuk vein kan ei nghal a nih kha. Mahse, ka nu leh pa te ka bula țhu țhin an awm ve tak loh avangin, intipachang lui hram hramin tlema zawng chu ka ei ve anih kha, ka lunglenna te chu Rose-in a hriat ka hlau hle si.

"Rose, zanin chauh chu riak leh mai ta che," tihbuai duh lo hle mah ila, keimah chauha han mut chu ka huphurh deuh a ni, "Naktuk ațang chuan ka thei tawh ang, ka haw leh hnua ka vawikhat riahna tur a ni si a," ka tih zawm zat a.

Ka thinlung chhunga awm te chu sawi lo mahila hrethiam tih hriat tak chuan khawngaih hmel zet chuan min en ngawih ngawih a, "I duh hun apiangah a ni mai." A kut chuan ka darah chuan vuanin a khi suk a.

"Naktuk ațang chuan a ngai tawh lo ang tih ka tiam a che," Rose-i ang ka nei hi vannei ka inti hluah hlauh bawk.

"Ka lakah hian engtikahmah inthlahrung ngai suh ang che, a nih loh chuan ka lungawi lo hle ang, pawn lamah kan țhu thawveng dawn em niang?"

Ka lu chu bu nghauhin pawn lam chu kan pan nghal bawk a.

Chu zan boruak thiang tak kara vana arsi te leh thla chu alang chiang em em mai bawk, khua chu a lum lam a ni țep tawh tih pawh a hriat, Rafe chu ka mitthlaah alo lang uar uar a, ka ngai tak zet tih chu ka hria.

"Ka va lawm em Bridget," kan awmna lam lo pan pheitu chu Jace a ni tih ka hria.

"Ka lo beisei hauh lo che, bakah he ina ka let leh nachhan chu ka nu leh pa ten min awmpui tlat ni a ka hriat vang a ni, i duh duh hunah i lo kal thei lo ang," ka chhanna chuan a ti thirim hauh lo. Mahse, hrehawm tihna tak a mitah chuan ka hmu thung.

"Ka hria alawm Bridget, ka ngaihtuah em vang che a lo kal mai ka ni, Rose i riahpui dawn em ni?" Rose-i lam chu a en leh daih tawh zawk a.

"Zanin chu riahpui ka lo tum deuh a, lo țhu rawh enge i in duh ang?" Rose-i'n țhu tur a atih avang chuan ka lawm vak lo.

Rose-i chuan min rawn melh zeuhin, ka lungawi lohna hmel chu engah vak ngai lo tih hriat tak chuan Jace-a chhanna nghak chuan hlim hmel chu a pu sarh a.

"Coffee ni mai rawh se," kan bul a țhutnaah chuan a țhu zui ve nghal a.

"Bridget ka lo kal chu i lungawi vak lo tih ka hria e, mahse i chunga tih ka chak ve em em te kha engmah tithei loin ka awm ta si a, tunah erawh chuan venhim tlat che hi ka tum ber a ni, a khat tawkin ka lo tlawh fo dawn che a, chu chu min hnial thei lo ang." Hnial duh lo tih hriat zet chuan thutawp a siam a ni zawk mah.

"A țha alawm. Mahse, ilo kal dawn reng rengin min hrilh lawk țhin ang che Jace," nelawm teh chiam lo chuan ka lo ti ve mai bawk a.

Rose-in Coffee a rawn ken sak chu a in mawlh mawlh a, rei lo teah chuan mitmeng dul raih chuan min rawn enin lungngaihna nasa tak nei ang mai chuan min melh a.

"Ka kal tawh ange, ka lo hrilh hmasa ziah ang che, tui takin mu ang che u," a inher a, a kal zui nghal bawk a.

"I thinlung chuan a thiam lohna i hmuh loh kha, i hriat zawng zawng kha thudik vek a ni tih pawh i hria, engvanga lo pawm mai thei lo nge i nih?" Lungawi lo tih hriat tak chuan Rose-i chuan min melh a.

A sawi dik a ni, ka thinlung chuan ka pa ngei a ni tih chu engemaw ti tak hian sawifiahtu an awm kher ngai lo in a hria a, ka pa tak ngei min lo nghak rengtu chu ka thinlung chuan a thlahlel ve hle, mahse ka nu leh pa hmasa ka lo hmangaih tawh em vang pawh a ni mahna ka luhlulna zawk nge ka hrethiam tawh bik lo.

"Bridget he thu hi tuman an la hre hauh lo, ka nau Juliet-i ngei pawhin, ka nu leh pa leh keimah chauh tih loh chuan. Mahse, harsa ti hle mahila ka hrilh che angaiin ka hria," a hmel chu a lang ngui nghal rawk rawk a, hnuailam chu a en zui nghal daih bawk a.

"Bridget, kei hi ka pa fa ka ni reng reng lo, ka nu fa bik ka ni, ka pa hian ka nu hi a hmangaihna a nasat em avangin, ka pa diktak a boral khan kei chu thla 3 mi chauh ka ni, tichuan ka pa boral hlim a pasal neih chu ka nu chuan hreh hle mahse ka pain a hmangaih em avang leh kei min ngaihtuah em avang chuan thla 9 ka nih in an innei ta a ni."

Mak ka tih em avang chuan ka mengphawk nasa hle a, "Engtin nge a nih theih?" Awih loh hmel zet chuan ka melh bawk a.

"A ni miau sia lawm, ka nu lah a boral leh ta si a, mahse nausen ka nih ațang az min lo enkawltu chu ka pa a nih lohna ka hre lo, engdang zawng aiin ka pa hi ka hmangaih a ni," a hmangaih zia chu tupawhin an hria ang chu, chutiang bawkin a pa John-a paw'n.

"Ka sawi duh tak chu, ka pa diktak a ni lo tih mi hian sawi ta se, a sawitu chu ka pawt sawm duh hial ang, nang chuan pa diktak ila nei hi i vannei hle tih in hria la ka duh a ni, i nu leh pa te an boral tawh a, tunah chuan i inchhir loh nan Jace hi i pawm angai a ni," ka kut chu vuanin min en bawk a.

A thusawi chuan ka thinlung a khawih hle a, Jace chu ka pawm angai tih pawh ka hre chiang, chutih rualin John-a fa a ni lo tih chu ka nu leh pa te ngei pawh khan an hre hauh lo ang le.

"Ngaihtuah ta che, nang aiin kum khatin ka upa tih i hriat kha, i lo pian khan ka nu leh pa te chu an la innei lo tih pawh i hria ang chu, kei erawh ka lo piang tawh thung a ni."

Mak ka tih em avang chuan chhan mai dan pawh ka hrelo hial a.

"Tunah chuan ka pa leh kei a fa hi engmah in pafa kan nihna hi an țhen thei lo ang, heng thil zawng zawng te hi i pawm thiam theih nana hrilh mai chauh che ka ni, nangmah chauh hi he khawvelah hian hrehawm ti bik i ni lo asin, midang tam tak an awm tih hria ang che."

Min hnemna leh min fuihna zawng zawng chu ka thinlung chuan a pawm thlap a, John-a chu a pa tak a ni lo tih ka hriat avang chuan ka khawngaih hle bawk. Mahse, chu chuan an pafa nihna inkarah boruak engmah a danglam phah hauh lo a, an inhmangaih em em si a.

"Kan lut tawh mai dawn em ni? A vawt țan riau mai" an pafa inkar chu dil chhut tak a zawh ka tum hauh lo, Rose-i tan a hrehawm hle dawn si a.

Room kan thlen chuan ka khuma phone dah țhat tum chuan ka number hriat ngai miah loh ațang chuan vawi nga lai mai min lo biak pawh a tum tih ka hria.

A pawimawh a ni ngei ang, nge ni a Rafe-an min lo la call hauh lo, number dang ațang min lo biak atum a ni ngei ang, ka call back nghal a.

"Hello Bridget, i țha em?"

Ka țawng hma hma chuan a lo ti a, a aw chu Rafe ni lo in Logan zawk a ni tih ka hrethei.

"Ka țha alawm min lo biak ka lo ring lo asin, i țha zawk em?" Diktak chuan Rafe-an min lobiak a tum emaw ka tih anih tak si lo ah chuan ka hnuak rawih a.

"Bridget ka lungawi lo hle a ni, engvanga i nu leh pa te boral chu min hrilh ve miah lo nge i nih le? i tuar hle awm si a," lungawi lo ti mahse a aw ațang chuan min khawngaih zia alang chiang viau.

"Rafe-a'n a hrilh tawh turah che ka lo ngai a," ka aw chu ka thian kharh a.

"Ka lo thlen khan chutiang lam sawina hun kan nei miah lo atin ni, a zin leh nghal thut bawk si a," inthiam lo lam mah chuan a ti a.

"A nih chuan engtin nge i hriat zawk si a?" Rafe-a'n a hrilh si loh chuan engtinnge a hriat theih zawk ni? Mak ka lo ti hman hle a.

"Bridget ka zawng che asin, in awmna ka zawng a, in in ngeia rawn țhawn thut che ka duh avangin, nizanah in In chu ka rawn zawng hmu ta a, mahse tumah reng in lo awm si lo a, in țhenawm te ka zawh chuan a nu leh pa te boral hnu khan ațhian te inah a awm ta aniang an ti a," a thaw deuh halh a.

"Ka ngaihtuah zia che hi i hria em? Zawnna tur che ka hre tawh si lo a, biak che ka tum nasa, mahse, ka be tlang thei bawk si lo che, nichin mai khan vawi nga lai mai chu a tlang a, chhangtu an awm leh si lo," hlauthawng tih hriat tak leh lungawi lo lam țep chuan a țawng a.

"Pawi ka ti hle mai, pawnah Rose-i nen kan awm lawk alawm le, tunah chuan ka Inah ka awm leh tawh e, ngaihtuah ka ngai lo ania, vawiin khan ka haw leh a ni."

"Ka va lawm em, khawiah emaw i kal bo ta emaw ka lo ti hman asin, naktuk tlaiah zanriah kilpui che ka duh a, chhuanlam siam lo la ka duh hle bawk."

Ka thinlung ngui tak chuan chak lo hle mahse, intihharh leh hawi thawven ka mamawh hle tih ka hria, bakah Logan-a'n min ngaihtuah zia ka hre bawk a, mahni chauha awm ai chuan a thlanawm fe zawk.

"A rem lohna a awm dawn em ni?" ka nui lui deuh halh a.

"A țhat nasat chu, tlai dar thumah ka lo lam ang che, tunah chuan atlai tawh hle si a tui takin mu phawt mai teh."

"Muttui le, Logan."

Phone ka dah hnu chuan Rose-i chu alo chek tlak tlak a, "Min sawm ve si lo a, ka ngaihdan a ni miah lo," a thinrim der leh te te a.

"I duh chuan i lo kal thei alawm, lo kal ve ngei la ka duh bawk. Logan-a i hmuhna hun remchang tak pawh a ni dawn asin."

"Ka lo kal ve te chuan a fawp ngam nang che," a nui leh uar uar tawh a.

"Sual thiam lutuk, min fawp hauh lovang țhian țha tak a ni alawm."

"Mahse ani chuan a duh hle thung che alawm," khumah chuan lawn kai nghalin a nui vur vur bawk a, Rose hi chuan engtik lai mai pawh hian min hnial dang zel mai chu a nih hi.

"Naktukah chuan ka haw chu i duh tak zet em? Nangmah chauha i awm tur chu ka ngaihtuah tak zet che a ni, min ti buai miah lo ania, a laizawnnuin a tih tur ve reng ti ka ni mai a, heta țang hian hnaah chuan ka kal thei alawm, ka pa paw'n a duhdan a ni zawk ngei ang. Mahse, Rafe i hmuhna emaw Logan pawh ni se daltu che nih erawh ka tum hauh lo."

Rose-i chu ka bulah awm reng se ka duh tak zet. Mahse, tihbuai reng erawh hrehawm ka ti hle si a.

"Ka bula i awm chu ka duhthusam a ni asin, mahse, Rose keima vanga i buai reng hi ka hmu thei lo che a ni."

"Bridget, kei paw'n nang hi hetiang ang chiah hian ka la mamawh ve mai thei che asin, ka awm hi i duh a nih chuan inthlahrung miah lo vin sawi mai la, harsatna ka nei lo tih i hriat kha."

"Ka duh alawm Rose, mahse...."

"Mahse tih angai lo naktuk ah ka pa chu ka hrilh mai dawn nia, ani pawh alawm zawk ngawt ang, tunah chuan mut tum tawh teh, i mut lohna arei tawh si a."

Rose-i'n hrehna nei miah lo a, min awmpui thei tur chu ka lawm hle a, chelh beh reng ka tum loh nachhan erawh buaipui ngai reng ka nih avangin min ning ang tih chu ka hlau em em si a.

"A țha alawm, mu tawh ang hmiang," a lam chu ka hawi a chiang taka en chung chuan, "Rose ka lawm e, nang ang ka nei che hi ka vanneih zia ka inhria."

A nui ver ver a, light chu banin a off zui nghal a, Arsi leh Thla eng em em mai de sep sep mawi em em mai te chu zangthal zawnga mu chung chuan kan thlir a, Rafe-a ka va ngai tak em.. Min lo be miah lo chu ka thinrim hle tawh bawk.

Zinga ka țhanharh chuan a ngai te bawkin sana chu ka melh zauh a, a tlai tawh em avang chuan ka in perh tho nghal a, dar sawm pakhat leh a chanve lai a lo ri der tawh.

Ka khum bul dawhkan chunga lehkha chu nizan lamah a awm miah lo tih ka hria, ka en chuan Rose-i lehkha hnuchhiah a ni tih ka hre nghal mai a.

"Hna lamah ka kal a, tukțhuan tur ka dah kha lo ei ang che, ka pa ka be tawh a, ka thawmhnaw an lo dah ang, a rang thei ang berin ka lo haw ang... Rose."

Ka khi suk a, ka mut lohna a rei tawh hle si a, ka chau tawngkhawng a nih ka ring, ka mut țhat em avang chuan ka lawm hle bawk a.

Chaw ka ei fel hnu chuan ka intifai a, rei lo tea kawngkhar rawn ri chu hawn tumin ka kal nghal a.

"Bridget-i i ni em?" Pa cher chhe ve tak meng bial ker chuan kawngka bula ding chung chuan bag lian lam kengin min lo hmachhawn a.

"Ni e, enge ni ta?" Hrilhhai zet chuan ka ti ve bawk a.

"Hei hi Rose-i thawmhnaw ania, a pain a rawn dah hman si lo a, ka lo dah a nih hi, ka kal leh nghal mai ange," nelawm zet a nui țhu chung chuan a kal leh nghal a.

"Kan lawm lutuk e," ka tih chu a hre hman em ang chu maw?" Pate John-a chu a lo kal hman dawn lo tih hrereng mahila alo kal loh avang chuan ka ngaihdan a pel țep zawk, ka hmuh leh chak tawh vang pawh a ni mahna.

"Enge i ngaituah a?" Rose-i hmel ka hmuh chuan ka nun chhungril khawhar rukna te chu an bo nghal duakin ka hria.

"Ilo va haw hma ve dar thum chauh a la ni si a," mak tih hmel zet chuan ka en a.

"Vawiin tlaiah zanriah i ei chhuak dawn si a, bakah chawlh ka la alawm karhnih."

"Kar hnih maw? Chutiang em em te chu engvangin," ka lo ti ha a.

"Bridget, tunlai chu hnalam buaipui hi ka ning deuh a ni, thawveng taka awm ka duh ve alawm," keimah vang tih chu ka hre tho mai.

"Ka thlen hlimah vawiin lam nen ka la nghal a, mahse, buaina deuh a awm avangin ka lo haw lawk thei lo zawk a ni, zanriah kil chhuak tur i ni si a, a theih ang a rangin ka lo haw a nih hi."

"Zanriah" ka ti sap a ka lo theihngilh der tawh mai.

"Dar engzatah nge a lo hruai dawn che?" Sana chu a en zauh a.

"Dar thum" ka ti leh sap a, dar thum a ri tawh tih ka hrechhuak chiah bawk!

"A nih chuan rang takin han insiam tawh rawh, engkim a tlai nih reng bik hi ațha ngai lo." A lut zui nghal a.

Rose-i hi kei aiin kum khat chauh a upa mah ni se, ka nu ang hial a ni zawk mah, ka unaunu leh țhian nen a kawp vek niin ka hre ber zawk.

Khua chu lum țan tawh mahse, vawiin lam erawh khua adur avang chuan a vawt suk thung, pawnlam pawh thli atamin ruah tla mai tur te pawh a ang mah zawk.

Ka kekawr dum ka pian ti lang chiang tak tight lam chu hain, boot sei chi ka chawnpuar ai chung mah chu ka bun a, ka jacket senduk hlarh chu ka ha bawk a, make-up tlem chu ka inhnawih bawk a, inhnuai lam chu ka pan thla nghal a.

In hnuai ka thlen chuan Logan-a chu a lo awm reng tawh zawk chu niin.

"I nalh tak zet Bridget, ding meuh chuan min lo en a.

"Min lo nghahna a rei tawh em?"

"Rei lutuk lo e, i hman tawh chuan kan kal mai dawn em ni?" A kut chu min pe nghal a. Hrethiam tak chuan ka kut chu pein, kan chhuah dawn chuan Rose-i hnenah chuan "Ka lo haw leh vat ang," ka ti bawk a.

"Nuam deuhin hmang ang che u," a khi var var hmel chuan min ti phur thar thut emaw tih mai turin ka awm zawk.

Logan-a chuan Rose-i chu enin, "I lo kal ve duh ta si lo a, a theih anga rangin ka rawn hruai haw leh ang," a ti ve bawk a, Rose-i pawh nui ver ver chung chuan alo bu nghat a.

Engtia rei nge min nghah tih chu ka hre lo, mahse min lo nghah chhung khan an lo in hmelhriat hman tih chu ka hre mai, ka haw hun ah Rose-in zawhna a ngah leh hle ang tih ka hre bawk.

Rei fe kan tlan hnu chuan Logan-a chuan a Car chu a ti ding ve thei hram a, kan chuan chhung zawng khan ka ning ang tih hlau takin eng engemaw sawiin fiamthu te a thawh leh țhin a, kan nui nasa hle a nih kha.

Logan-a in chu a pawn ațang pawh chuan lian tak a ni, mahni chauha awm nan chuan a lian mah mah. Rafe-a In nen ka tehkhin pawh chuan a len zawng chu a in ang hle ang.

Kawngka chu hawngin, "Ka inah hian ka lo lawm a che," ka lut zui ve nghal a.

"I ril ațam tawh viau ang, kan tlan thui hle si a, hahdam deuh la kan ei nghal mai dawn nia," a nui hmel mawi tak ka hmu leh chu ka hahdam sawng sawngin ka hria.

A coat nalh zet chu țhutphahah chuan a dah thla a, a kamis chu a inhmeh hle bawk, hmeichhia te chuan an zem hle ang tih pawh a hriat.

"Ka unaupa kha hetah hian a awm țhin a, mahse tunah chuan ka awm angai ta si anih hi, he sumdawnna hi atuina anih loh avangin a peih rei ka ring lo sa reng a," a nui leh suk a.

"I lo awm theih phah a, ațha daih zawk alawm," a nui huah huah a, țha ka ti zawk reng bawk atin ni.

"Tikhan lo țhu hahdam la, ka rei lo ang ka kawr hi ka thlak lawk ange, zanriah pawh kan kil nghal thei tawh ang," a kal zui nghal a.

Logan-a kal tak hnu chuan ka hawi kual vel a, a In leh a chhung a thil awm te chu ropui ka ti hle a, room lehlam chiah a țhutna nalh tak tak awmna a thlalak te chuan ka mit an la hle a, ka pan ta nge nge a.

Logan-a te chhungkua an ni ngei ang, nu hmelțha zet, nu valai tak tur kum sawm li vel tur chu anu a ni ngei ang, pa upa lam țep kum 50 vel tur chu a pa ngei anih ka ring bawk. Hmeichhe pakhat leh mipa pakhat awm ve tho te chu a unaute anni ngei bawk anga, amah ang vek a nelawm tak annih vek ka ring, a farnu a ka rin pawh chu a chhe lo tak zet.

Ka en zel a, Rafe-a nena an thlalak ka hmuh chuan ka thinlung chu a rawn na tlat, ka ngai em a tin ni. An naupan lai ni awm tak pawh chu awmin ka en leh a, Rafe hmel la naupang tak chu ațha tak zet a, kekawr bul hain, kawr sen a ha bawk a, ball a keng bawk. A bula ding Logan ve thung chuan kawr hring hain kekawr dum bul a ha thung, ka nui suk nghe nghe a ni.

A piah chiaha ka thlalak hmuh erawh chuan sawifiah thiam rual si loh hian ka hrawk a rawn hnawh thung, Rafe-a a naupan lai ni lo in, tuna Rafe ngei chu hmeichhe pakhat hmel chhe lo ve tak nena an la dun chu a ni.

Engvanga thik ve em em ringawt nge maw ka nih le? A țhian țha tak emaw a thawhpui țha tak pawh a ni thei, mahse Rafe bula ding ve a thla an la dun rigawt pawh chu ka thinrimpui hle si a.

Ka rilru tibuai zualtu chu farnu a nei lo tih ka hria, bakah an thlalak chu ala rei vak lo ang tih ka hre bawk.

"I va ngaihtuah muk hmel ve, i ril ațam tawh viau ka lo ring a sin," Logan chuan ka lam arawn pan tih ka hria.

Ka thlalak melh reng chu a hrehtiam hle tih a hriat bawk, rang tak a lain a khup zawng chuan a dah nghal a, "Kal tawh ang le,"

A chetdan chu mak ka ti riau engvang a khupkher nge a nih, a tu a pawh chu lo ni se sawi a har viau em ni?

"He nu hi tunge anih min hrilh thei em?" Logan-a chu ka melh ran a.

A thaw deuh halh a, a ngawi deuh vung vung hnu chuan, "Alessia, Alessia a nih hi."

Ka phu nasa kher mai, he hming Alessia hi ka vawikhat hriatna a ni hauh lo, Logan-a khan ka hriatah pawh thinrim takin a be țhin a nih kha, tunah lem an thlalakah chuan an nui sang thung si, ka rilru chu a buai tak zel a ni.

To be cont....


Show post links
Top



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:04 pm

LAST KISS 14
Chapter-14



"Bridget, hemi chungchang chu nakinah kan sawi mai thei lo em ni?" Logan-a chuan sawi mai chu a duh lo hle tih ka hria.

"Tunah ka hre duh a ni Logan, ka tan a pawimawh zia i hriat kha," ka luhlul chu ka chhuahlui ve tlat a.

"Alessia-i chanchin hi chu Rafe zawt zawk la ațhain ka hria, keia lo sawifiah chi pawh a ni lo, a țhianțha tak angin ngai tawp mai rawh," he thil hi tawp tawh se a duh hle tih pawh a awm dan ațang chuan a hriat hle.

"Rafe pawh ka la zawt ngei ang, mahse, nangpaw'n min lo hrilh hmasa thei tho alawm, ni lo'm ni?"

"Bridget, Rafe hian a hmangaih tak zet che tih chauh ka hria, ka sawi ang khan Rafe-a'n engkim ala hrilh ang che, hrilh che pawh a tum mek a ni," a thaw halh a.

A thusawidan chuan ka awm ati nuam lo hle, zawt mah ila min hrilh dawn chuang lo tih ka hria, 'țhianțha tak angin ngai mai rawh' atih pawh chuan ka awm a ti nuam hauh lo.

Choka lamah chuan min hruai phei a, dawhkana eitur chu a tamin a tui hmel ngang mai, a awmpui te tih hriat ngawih ngawih chuan mamawh kan neih leh neih loh te chu min lo zawt bawk a.

"Mamawh kan nei lo e, tunah chuan hahdam rawh u," Logan chu a nui sang a, a awmpui te lakah pawh a nelawm hle tih chu a hriat theih.

"Bridget, i hmel kha a hlim lo em mai, engahmah ngai suh ka tih kha Rafe chu a lo haw țep alawm, in awmdun țep tawh tih ka lo hre bawk a."

Ka nui ve suk a, mahse, ka rilru kap tlattu chu a bo hauh lo.

"Ka hlim alawm, atui hmel hle mai," tih pah chuan ka ban zui nghal a, ei tam ka tum tehreng nen, ka rilru tibuaitu avang chuan ka thil ei pawh chu ka rilruah a lut thei lo zawk.

"Ka tawrhpui tak zet che, i la naupang hle si a, i nu leh pa te chu i ngai țhin hle ang, mahse Rafe i nei a, min mamawhna i neih phawt chuan kei pawh ka la awm a," a thil eilai ei chung chuan min melh run a.

"Ni e, in awm alawm," sawi tur vak ka hriat loh avang chuan ka ngawi leh ta zawk a.

"Zanriah tui tak a ni e Logan, i bulah hi chuan ka ei tui reng mai dawn a nih hi," diktak chuan ka ei tlem hle, țhutna a țhu pah chuan ka ti a, Alessia tih bak chu ka thinlungah a awm lo zawk.

"I ei tlem hle tih ka hria alawm. Mahse, i duh ang ngei anih chuan ka lawm hle bawk, ka bulah hian ei reng thei la ka ti bawk asin," a thutak țep mah zawk a.

Ka bul hnaiah chuan rawn țhuin, ka kut chu a vuan a, chiang zet chuan min en bawk a, Alessia chanchin chu min hrilh dawn a ni ngei ang.

"Bridget, Rafe-a'n engkim min hrilh tawh a ni, a tihfel tur azawh hunah nang hi neih che atum bawk, a tihfel theih ngei pawh ka ring a ni, tichuan Rafe-a nupui i ni mai tawh dawn a, ka hmangaih zia che hi a tawp nan ka sawi leh duh a ni."

Ka beisei loh lam daih a nih avang chuan, chhan mai dan pawh ka thiam lo.

"Ka hmangaih che Bridget," a hmel chu a thutak hle a.

"Rafe-a nen in in neih hunah pawh kei ni hi țhianțha tak kan ni zel ang, i thei angem?"

"Lutuk tlat Logan, nang ang țhianțha te chu tuin nge hloh phal teh lul ang," ka rilru tak tak ka sawi tih pawh ka inhria.

Ka mu tur chu Rose-i chuan min zawt leh sek tawh a, "Logan-a kha a chhe lo tak zet, ka rin aiin i lo haw hma zawk."

Min hmangaih thu min hrilh hnuin țhianțha ni reng turin kan intiam a nih kha, chumi hnuah thingpui no dawmin, min lo thlah ta a, motor kan chuan chhung zawng paw'n Rafe-a nupui nimai tura min ngaih avang a ni ngei ang, hlimtak angin țawng mahse a hmel erawh a hlim lo tih ka hria.

"Engvak sawi tur a awm lo min hmangaih thu min hrilh a, chuan țhianțha tak ni turin ka intiam bawk a."

"A ni maw?" Rose chuan mak ti tak chuan a chek leh tlak tlak tawh a.

"A hmangaih che ka tih reng kha pasal nei mai tur hmangaihtu anih avangin ka khawngaih hle mai," a ti chuai raih a.

Zing ka țhanharh chuan tho mai lo in Rafe chu ka ngaihtuah nasa hle a, Alessia chu ka hriatchhuah angai tih pawh ka hria, vawiin hi Rafe lo haw hun a ni tawh, a tihfel theih chuan a lo haw ngei ang. Mahse, a zin chhung khan vawikhat pawh min rawn pe pawp lo chu ka lungawi lo hle .

Rose-i nen chuan pawn nilum nuam takah chuan țhu chhuakin, hunliam tawh hnu a kan inkawm dan te chu sawiin kan hlim hle reng a, ka phone ri chuan min tibuai a ni mah zawk.

"Hello."

"Hello, Bridget-i maw?" Aw ngaihno bei zet hmeichhia chuan min lo chhang a.

"Ka țha alawm, tunge i nih?"

"Alessia, hmuh che ka duh a ni Bridget, tuma'n kan inhmuh tur hi hre lo bawk se ka duh a," a aw chu a dam em em a.

Chhan mai ngaihna ka hre lo, a hming a sawi chuan ka phu nasa kher bawk, mahse, ka hmu ngei tur a ni ang.

"A țha alawm, khawiah nge ni ang," ka zam em em a, thil enge maw tak chuan min rawn chenchilh ang mai hian ka khur țep bawk.

"Caravan king's cross restaurant-ah ka lo nghak ang che, dar khatah," phone chu a dah nghal a.

Chu thingpui dawr chu Rafe company inbunna ațangin a hla lo hle tih ka hria. Mahse, an lo haw tawh anih chuan engvanga min la rawn be miah lo nge a ni? Biak hmasak erawh ka tum bik hauh lo.

"Engthil nge ni Bridget, tuin nge rawn bia che," ka awm dan danglam ta chu ngaihțhat loh hmel tak chuan Rose chuan min lo en reng a.

"Alessia, min hmuh a duh a ni," ka ti chuai raih a.

"Tunge Alessia chu?" A rawn ding nghal bawk a.

"Ka hre bik lo Rafe-a nen hian inzawmna engemaw tak chu an nei a ni, thinrimin vawi hnih chu ka hriatah a be tawh tih chauh ka hria, chu pawh phone hmangin," ka ding ngil sawt a.

"Dar engzatah? Nangmah chauha kal chu ka ngaihtuah hle che."

"Ngaihtuah ka ngai lo e, dar khatah ka kal mai angai tawh zawk a ni," room lam chu ka pan zui nghal a.

Ka insiam zawh hnu chuan nidang ang lo takin nalh ka inti lo hle bawk.

Taxi lain Caravan king's cross awmna lam chu ka pan nghal a, kan thlen chuan ka in nen a inkar chu hla hle mahse hemi ni hi chuan hla ka ti lo hle thung.

A chhung chu a ropuiin mi hausa te chauh an chawl țhin ang tih pawh ka hria, ka luh chuan hmeichhe pakhat lo țhu hnenah chuan, "Miss Alessia hmu tura lo kal ka ni a, khawilam nge ka pan ang?"

A lehkhabu chu a en thuak a, "Inchung lam ah aw, a nghak reng tawh zawk che," a țhen deuh sak a.

Step-a ka chhoh lai te chuan tha reng ka nei lo a ni ber, engtin nge ka hmachhawn ang? Ka zam tak zet a ni.

Dinglam sira khawhawina rem fahran ațang chuan "Helamah Bridget," ka hawi phei chuan ka hai bik miah lo. Rafe nen thlalakah chiang takin ka hmu tawh tlat a, ka thinlunga awm reng a ni bawk a, engtin nge a hmel chu ka theihnghilh theih teh lul ang ni.

"Lo țhu rawh, i lo kal thei chu ka lawm hle mai," a hmel landan erawh thlalak ai khan a lo cherin, a dawldang lam mah a ni, hmelțha tak zawng a ni e.

"Alessia chu i ni ang maw? Engthil pawimawh nge ni ta a?" Pangai tak leh chak lo ang taka lan ka tum loh em avang chuan ka inthunun hle bawk a.

"Thil pawimawh tak a ni, ei tur lam hmasa phawt ila ațhat ka ring," a nui seng a, a hmel landan erawh a ruk tak chuan a zam ve hlein ka hria.

"Tui hi ka duh tawk mai ange, engmah ka ei chak tlat lo," no chu la in tui chu ka thli nghal a.

"I ei duh si loh chuan keipaw'n ka chak vak bik chuang lo," nui sang hmel chu inthlak in a thutak tawh hle a.

"Aw le, engthil nge han sawi ta che, ka damțha vak lo a, arang lama haw ka duh a ni," tui chu ka in khawlh khawlh a.

"Rafe-a chungchang ania, Bridget khawngaihin Rafe-a hi kalsan ta che," a hmelah chuan lungngaihna a khatin a rawn țawng chhuak a.

Ka thinlung chu a phu nasa ngei mai, ka awmdan danglam vek chu inthunun hram ka tum bawk a.

"Bridget," ka ban chu rawn vuanin, "Khawngaihin" a ti thawp sap a, a hmelah chuan thinrimna hmel hmuh tur reng a awm lo, lungngaihna nasa takin a bual a ang mah zawk.

"A chhan tal chu i sawi dawn lo em ni?" ka khawchhung chu a khur der der a, engvanga kalsan tura min ti ngawt nge maw a nih chu le?

A thaw halh a, tukverh lam chu a en zui vawng vawng bawk a, engemaw thil pawimawh tak a ngaihtuah tih a hriat theih.

"Bridget...." a kâ a âng zuau hman chauh a.

"Ka pi, Marcus-a adam lo nasa lutuk a, i lo kal mai angai ang, thaw hlawp hlawp chuan hmeichhe pakhat chu rawn tlan lut in Alessia bulah chuan a rawn ding zum zût a.

Alessia chu mangang tih hriat takin a mengphawk hle a, "Min lo hrethiam lawk," an tlan chhuak zui nghal a.

Marcus, chu hming chu ka lam nawn sek a, ka vawikhat hriatna a ni lo, thlawhnaah tho khan Rafe-a'n Alessia a biak lai khan a lam ri anih kha.

He Alessia hian pasal a nei reng emaw ni le, nge ni a Marcus chu a fapa niin pasal nei lai reng chuan Rafe-a chu a atchilh zawk, engemaw zawk zawk a ni tih chu a chiang phawt.

Taxi chu lain, ngawi reng chuan ka ngaihtuahna buai tak tak te chu tihfim hram ka tum bawk a.

In ka thlen chuan ka thil tawn mak tak chuan min ti chau hle a, ka room lam pan chhoin ka khumah chuan ka bawk thlawp a. Thudik ka hriat hma in akal leh ta si, thudik ka hriat duh rual chuan, hlauhna chuan min zem bawk.

"Bridget, engthil nge ni ta? I va hlim loh hmel ve," Rose chu ka bulah lo țhuin ka sam chu a zut heuh heuh a.

"Rose ka hre bik lo, Alessia khan thu pawimawh a sawi hma in Marcus-a adam loh thu hriain a kal ta a ni," khumah chuan ka țhu ve nghal bawk a.

"A kal maia maw?" Mak ti zet chuan "Tunge Marcus-a chu?"

"Ka hre bik lo a pasal emaw, a fa a ni ngei ang."

"Mahse bridget.. a fa lo ni ta se tu fa nge ni ta ang, chuan a pasal lo ni ta se Rafe nen hian pasal nei reng chungin inkungkaihna an nei țhin tihna maw?" chu thil chuan a ngaihtuahna a ti buai ve hle tih a hriat.

"Ka hre bik lo le, a fapa anih loh chuan a pasal anih ngei ka ring," ka kawr thlak tur chuan ka tho nghal a.

"Rafe-a kalsan turin min ti a, chuzawng chu," ka kawr chu pan zet chu ka ha nghal a, ka boruak tawn avang chuan alum hle si a.

"A nih chuan Rafe-a chu a hmangaih hle tihna a ni phawt anga, inhmuh hun inla nei leh em em ang, chutih hunah chuan a chiang mai ang," rawn tho chhuakin "Lo awm hahdam ang che." A chhuak zui nghal a.

Ka phone chu ka ning tak zet, muthilh ka tum lai tak a.

"Bridget pawi ka ti khawp mai, ka kalsan ta si che a, ka fapa Marcus-a a damlo zual thut alawm le," ka țawng hma chuan Alessia chuan a rawn ti nghal a.

Fapa maw anih chuan pasal nei lai anih loh vek pawhin pasal țhen tawh chu a ni ngei anga, pasal nei lai anih erawh chuan zakthei lo tak a ni ngei ang.

"A va zia lo ve, a țhat vat ka beisei," ka lo ti liam ve puat a.

"Zaninah a hmun ngaiah khan kan in hmu leh thei angem? Dar sarihah. Thu pawimawh tak ka la sawi si lo a.."

Hreh hle mah ila ka hriatchhuah ngei chu a ngai si a, "A țha alawm ka lo kal ang," phone ka dah chiah chu a lo ri leh nghal a.

Rafe a ni, ka bia angem be lo angem?

Ka biak chak tak leh ka thlakhlelh ber mai a ni miau si a.

"Hello."

"Bridget, a pawi ka ti khawp mai ka rawn be lawk thei si lo che a, hna pawimawh tak tak ka nei țhin tih i hriat kha, ka ngai lutuk tawh che," a aw ațang chuan inthiam lohna lian tak a nei tih pawh ka hria.

"Rafe" ka ti sap a, ka hnuk a ulh hial a ni, ka hmangaih ber leh duhber hun harsa ka tawh laia ka thlamuanpui ber, ka thinlung zawng zawnga ka ngaih em em bawk aw ka hre leh chu ka danglam vek hial a ni.

"Bridget, i țha em? I lo dam lo leh em lo ang chu maw? Zaninah hmuh ka lo tum ang che."

Zan inah chuan ka hmuh chak ber ni mahse, ka hmu thei lo tih ka hria, Alessia ka hmuh angai tlat si a.

"Ni lo Rafe, zaninah chuan thil pawimawh tak tih tur kan nei a, Rose leh Pate John-a te nen," dawt ka sawi avang chuan ka inthiam lo hle bawk.

"Bridget min ngai ve miah lo em ni?" A aw chu a dul ruih thei hial a.

"Rafe ka ngai lutuk che, min lo be ngai si lo va ka lungawi lo hle bawk. Mahse, zanin chu kan lo ruahman lawk a ni tawh si a, țhulh leh a rem lo atin ni."

"A pawi ka ti tak zet, ka phone a chhia a, mahse, athar ka nei tawh e, bakah ka lo thlen hnuah ka la buai char char a, hun ka nei ve chiah a ni, naktukah tal chuan ka hmuh theih ngei tawh che ka ring." Aw pa zet chuan a rawn ti thum dut a.

"A țha alawm, naktukah chuan ka lo nghak reng ang che," a bul a awm a, kuah vawng vawng chu ka thil chak ber a ni tih ka hria.

"A nih chuan naktukah ka lo hmu ang che, hna pawimawh tak tak tih tur ka la nei si a, ka hmangaih che Bridget."

"Ka hmangaih che Rafe," phone chu ka dah zui nghal a.

Rafe chu Alessia chanchin ka hrilh a la hun lo tih ka hria, thudik tak ka hriat hma loh chu.

Khumah chuan bawkin ka hun tawn mak tak tak te leh hrehawm tak tak te chu ka ngaihtuah mawlh mawlh a.

"Bridget, i muhil emaw ka tia, Jace-a'n inhnuaiah a nghak che a ni," Rose-i'n a rawn tih takah chuan hun lo hle mahse ka chhuakthla ve nghal a.

"Bridget, i duh aiin ka lo kal zing deuh em ni? I țha nge țha lo tih rawn en mai tum che ka nia." A lang hlim sarh a.

"Ka țha alawm, i lo kal dawnah min hrilh hmasa tur chein kan in remsiam emaw ka lo ti a." Tun hmaa nelawm loh tak leh thinrim tak ang chuan ka lang tawh bik lo.

"Ka hria alawm. Mahse, thil tih tur pawimawh tak ka neih avangin helamah ka lo kal a, ka lo peng ta nghal zawk a nih hi," a țhu thluang ar a, in thhlahrun hmel tak chuan min en reng a.

"Coffee i duh em?" Ka zawhna chu mak a ti a ni ngei ang, a nui suk a.

"I phal te chuan," dawnkan a lehkha chu a ban in a keu nghal a.

Coffee ka lak lai te chuan tun a ka dinhmun mak leh khirh zet, ka nu leh pa ka chan chauha buaina hlirin min tuam vel chu Jace-a hnen a thlen vek chu ka duh hle a, mahse ka insum hram hram thung.

"Coffee tui tak anih hi," a no dawm lai chu chawikangin a khi leh suk a.

"Bridget, i pa anga min pawm thei lo anih pawhin i thinlung tal chuan i chhungkaw neih chhunah min ngai la ka duh a ni," a hmel thutak zet karah chuan hrehawn tihna ka hmu bawk.

"Ka hria alawm Jace, he thudik hi pawm harsa hle mahse thudik a ni miau a, engtik niah emaw chuan ka pawm tho tho ala ngai dawn tih pawh ka hria, ka tum mek anih hi, hun tlem ka mamawh mai chauh a ni." Kei pawh chu ka thutak hle tih ka hria.

"Ka lawm e, ka lo nghak reng tih i hriat kha, ka kal tawh ange," a chhuak tur chu engemaw ti tak hian chelbeh duh
na ka nei, mahse ka ti tur a ni lo.

"I ziaawm zel e," Rose-i hlim hmel tak chu lo kal pheiin, "Bridget thildik tak i ti mek a ni."

"Chuan Jace-a awm chhung zawng khan i lo awmbo emaw ka tia, kan thusawi te i lo ngaithla amaw?"

"Ngaithla lo e, in pahnih chauh a in awm kha ka duhdan a nia, tin i thu sawi tawp lam kha ka hre bawk atin ni," a nui vur vur a.

"Chimawm lutuk," ka ti sap a.

Zanriah kan kil zawh chuan Alessia hmu tur ka nih avangin ka zam hle a, ka vawikhat hmuhna tur ni tawh lo mahse, ngai a neih ahar khawp ang.

"Engpawh thleng se i zam tur a nilo, Rafe-a i hmangaih zia leh i kalsan theih loh thu hrilh la, in awmdun țep a ni tih pawh hrilh nghal ang che," Rose chuan min ngaihtuah tak chuan ka tihdan tur chu min hrilh mawlh mawlh a.

"Ka hria e Rose, ka ti ngei ang Rafe-a hi ka kalsan thei ngai dawn si lo a," darthlalang ah chuan in enin ka kawr hak te chu ka inhmeh leh hmeh loh pawh ka hre lo hial zawk.

Kan inhmuhna hmun tur ka thlen chuan hmeichhe pakhat, a hmaa ka biak tho kha lo țhu lehin, "Alessia ka hmuh angai a ni."

"A ngaiah khan a lo nghak ang che," a awm dan chu Alessia-i chu hrechiang hle a ang mah zawk.

Dinglam sir khawhawina remchang takah chuan a lo țhu leh ngei a.

"Lo kal rawh Bridget, kei pawh ka thleng ve chiah a ni."

A hmel chu a nelawmin a awte chu a dam no nalh em em mai bawk a.

"Marcus chu a dam tawh ngei ka beisei," sawi tur ka hriat loh em vanga sawi ka ni mah zawk.

"A țha tawh lutuk e, Doctor kan ko nghal a, tunah chuan a infiam leh thei tawh zawk, a khawsik a rawn sang thut alawm le."

"Thu lawmawm tak anih chu, i thu sawi turah chuan kan lut tawh mai dawn em ni?" zam hle mah ila zam ang in ka awm tur a nilo, ka kut chu ka hmer leh țhin a.

Thutak zet chuan min melh reng a, a sawi dawn ta lo zawk emaw ka ti hial! Tukverh lam bawk chu hawi lehin rei lo te hnuah chuan min rawn melh leh ta zawk a.

"Bridget, engtin nge ka sawi țan ang tih pawh ka hre lo a ni," harsa tih hmel zet chuan a thaw kawk a.

Kei erawh chuan sawi tur ka hriat ve loh avang chuan chiang takin ka en reng ri ngawt thung, ka thu hriat tur chu eng ber nge tih hre lo mah ila ka zamin hlauhthawnna chuan mi tuam chhuak a ni ber.

"Bridget, i hnen a ka sawi tawh ang khan, Rafe-a hi kalsan la ka duh a ni Marcus-a vang tal pawhin."

Ka hit chhuak pup pup a, Marcus-a vang maw? Marcus-a chu Rafe-a fa tihna maw!?

"Marcus-a chu Rafe-a fa tihna em ni?" Ka aw chu a ringlam țep tih ka hria, ka thusawi pawh chu ka sawi hnawk nuaihin ka hre bawk.

Ka kutah chuan rawn vuanin, "Bridget, Marcus-a hi kei leh Rafe fapa ngei a ni e." A aw chu a dam em em a, a hmelah chuan min khawngaihna a lan tel avang chuan mak ka ti hle bawk.

"Chu chu kei hian engmah ka lo hre miah lo a maw? Engvanga Rafe-a pawh chuan min hrilh lo nge a nih?"

"Țul a la ti lo pawh a ni mahna, hethil hi Rafe hnen la thlen lo la ka duh bawk a ni." A hmelah chuan hlauhthawnna a nei tel tih ka hria.

"A fapa chu ka lakah zepin, chuan Alessia nang hian hre lo anga awm turin min duh amaw?" Ka thinrim hle tih chu a hrethei ang.

"In bengdai teh Bridget, thinrim tur leh na zawk tur chu kei hi ka ni asin, thil pakhat zawh che ka duh a ni, thudik takin min chhang la ka duh bawk. Rafe hi i hmangaih tak tak em?" Min en chiang lutuk chu ka hlau hialin ka hria.

"Ka hmangaih alawm, ka nunna ai paw'n," thudik tak chu ka sawi ngei angai a ni, ka in chhir loh nan.

A hmel landan chu hun rei tak mu tawh lo leh chaw ei tawh lo chau tak a ang hle a, ka kut avawnna chu la thlain a kut chu a khur ve hial tih ka hmu, dawhkanah chuan a kut pahnih chu suihzawmin a hum ruh hle bawk, a kun deuh vang vang avang chuan ațap emaw ka ti hial.

A aw chu thian kharhin, min rawn en leh tawh zawk a, a hmelah chuan lungngaihna nasa tak leh hrehawmna nasa tak a tuar a ni tih ka hre thei.

"Bridget, ka fapa Marcus avang tal pawh hian ka pasal Rafe hi ka țhen thei lo a ni."

Ka lu chu a hai muai muai a, intihharh nan din mai ka tum chu chhuatah chuan ka zawi thla hnawk a.

Min nuihsawh ka rin tehreng nen, Alessia chuan rang zet in, "I țha em? Doctor ka ko ang aw?" Min rawn kai tho zui a.

"A ngai lo, ka țha alawm," a dang engmah ka sawi thei lo, thinrimna, natna, zahna te chuan min tuam hlup hlup nghal a, ka tan chuan zahthlak tak a ni, Alessia pasal chu ka nunna ai paw'n ka hmangaih tih Alessia hnenah chuan ka sawi zo chiah a ni si a.

Alessia chuan min hmusitin min ten hle ang tih pawh ka hria, a hmel chu ka en ngam tawh lo hial zawk. Mahse, Rafe chu Alessia pasal a ni tih rin harsa ka ti em em si a.

Ka chakna zawng zawng sawmkhawmin, "Alessia inbumna tenawm tak hman tum hauh suh," ka vin hle bawk.

"Bridget, hetah hian inhauhpui tura ko che ka ni lo, thudik sawidun tur a ko che ka ni," a thinrim hmel alang ve miah lo a, min deuhsawhna leh hmusitna ka hmu lo bawk, hmeichhe mak tak anih loh vek paw'n zaidam tak leh rilru zau fing tak a ni ngei ang.

Engmah ka sawi thei tawh lo a, hriat belh ka duh bawk hek lo, kei hi tu te pawh hian ka lakah thup neiin min lo bum reng anih hi, ka mittui chu dan tum teh mah ila a tla lo thei lo, ka mittui hru chung chuan chak tak chuan ka pen chhuak nghal a.

In hnuai panna ka chhuk lai chuan, "Bridget ka la sawi zo lo asin, min hmu leh duh anih chuan, ka number i neih kha min lo bia ang che."

Alessia chu chhan ka tum lo a, hawi let pawh ka tum lo, ka țawng anih chuan he Restaurant changkang zetah hian ka mualpho ngei ang.

Pawn ka chhuah chuan leiah chuan ka țhu hnawk a, Rose-i chuan min lo hruai se ka ti hle, ka chakna zawng zawng sawm khawmin Taxi chu ka phar a.

Driver-in kan panna lam tur min zawh pawh chu ka chhang thei lo țep a ni.

In ka thlen chuan chak taka lutin, ka room chu ka pan ding nghal a, Rose-in min biakna pawh chu engmah ka hre lo, ka luh rual chuan kawngka chu ka kalh nghal bawk a, tuma'n min ti buai lo se ka duh, Rose-i ngei pawhin.

Chetchan pawh tum lo chuan ka ding khawng reng a, hre chhuak leh thut ang mai chuan khumah chuan ka rak chiam bawk a.

"Bridget, engthil nge lo hawng vat teh," Rose-i mangang thlaphang aw chu ka hria, kawngka pawh chu a rawn chum dawt dawt a.

Kei hian enge damchhan ka neih tawh ni, ka nu leh pa te chuan min kalsan a, tunah ka hmangaih berin min lo bum reng a maw? Ka dam reng hi ațulna ka hre lo, mu leh mal nei miah lo in ka pawngpaw rak chiam chiam a. Ka bul a thil ka ban remchang a piang chu chhuat ah ka vawm thla darh chuai chuai bawk.

Khawngkhar chu a ri țhuai a, Logan-a leh Rose-i te chu ka hmu vai ruai a.

Ka bing mup mup a, ka taksa peng tin te chuan hna an thawk lo a ni ber, chhuatah chuan ka let thla leh tawp a.

Ka meng diar diar a, ka awmna chu ka room a ni lo tih ka hria, chiang zawk a ka men hnu chuan Rose-i chuan "Bridget" rawn tiin khawngaih hmel tak chuan min lo thlek reng a.

Ka awmna chu damdawi in a ni tih ka hria, "Rose, hetah hian ka awm duh lo haw ka duh a ni, ka ban a hrui chi hrang hrang te chu ka rap tlat a ni.

"Ni lo e, i damna tur alawm, engtin mah i awm lo vang, Doctor pawh a lo kal țep ang," ka sam chu a rawn chul mam bawk a.

"Logan" ka ti sap a, ka tluk hma chiah khan a hmel ka hmu vai ruai si a, ka mitthla zawk a ni mai thei.

"Tunah tak chuan a haw rih a, a lo kal leh thuai ang, Logan khan rawn tlawh che a tum a, i rak chiam thawm ahriat bakah thlaphang taka ka awm min hmu zui ta, kawngka kha a rawn tlawh hawng ta a ni."

Ka mitvai ni lo vin Logan chu ka hmu ngei tih ka hre ta, mahse sawi tur tam tak ka nei, Logan-a mi fel tak anga ka lo ngaih paw'n engmah min hrilh duh lo a, ka haw tak zet a ni.

"Alessia-in a hmu dawn che tih Logan-a a lo hrilh a ni ngei ang, a thusawi tur te a hriat vek avangin a ngaihtuah hle che a Logan-a kha lo kal ta a ni."

Sawi ve tur reng ka nei lo, Alessia-i nen kan inbiakna chu chiang takin a lo lang zut zut a, ka mittui chu a tla nasa hle.

Rose-i chuan ka mittui chu hruin, "Engkim ka hre vek tawh a ni, Bridget Logan khan min hrilh vek alawm, keimah ngeiin Rafe chu ka la hmachhawn ang." A thinrim zia chu ka hrethei, a insehruh nasa hle bawk.

"Ka room-ah min lo hmu dawn nia," Doctor chu a nelawm teh chiam loh, a kal zui nghal a.

Hreh tak chuan ka tho a, Rose-i chuan keimah chauha ka kal chu a phal hauh lo, min rawn zui ve nghal a, Doctor room lam chu kan pan nghal a.

"Țhu rawh u, i thil tawn zawng zawng te hi i țhiannu hian min lo hrilh vek tawh a," Doctor chuan a tarmit chhan ațang chuan min melh run a, zawi muang chuan "Nang hian rilru lam natna i vei a ni."

Ka meng phawk hraw a, "Mi a ka ni i tihna em ni?"

"Ni lo e, damdawi ka chawh che hi țha tak in ei ang che, chu chuan tam takin apui ang che, a pawimawh ber chu midangin a kan tih theih miah loh, nangmah khan i nun a harsatna i tawn zawng zawng te hrehawm tihna te a awm apiangin i rilru kha inhneh tir lo in, i thunun zel tur a ni ang.

A nih loh chuan rei lo teah i â thei a ni, ka sawi anga i ti hram hram zel a nih erawh chuan rei lo teah ngai i awh leh ang, chu bakah lung natna i neih theihna chance hi a tam em em bawk, engkimah inthunun tum tlat ang che, nangmah kha i pawimawh ber a nih chu, i taksa hi a chak lo em em bawk." Lehkhaah chuan eng eng emaw a ziak nghal a.

Rose-i chuan ka darah min rawn kuahin, "I ti thei ngei ang," a rawn ti sap a.

Kei hian ka hmangaih ber ka chan a, tuar thei lo vin ka mittui pawh ka ti tla thei dawn lo tihna em ni? Awm dan tur ka thiam tawh lo tak zet.

"Heng damdawi te hi ei țha hle ang che, damdawiin ațang hian inchhuak thei nghal bawk ang," Doctor chuan lehkha chu min pe nghal a.

In kan thlen chuan ka khumah muin, "Logan" ka ti sap a, ka phone chu lain ka be nghal bawk a.

"Logan, Rafe hian heng te hi ka hre tawh a ni tih a hria em?" Engdang mah sawi hmasa lo chuan ka ti nghal hmak a.

"A hriat ka ring lo, ka la hrilh si lo a, i duhdan zawh hmasak che ka lo tum asin."

"A țhat chu ala hre tur a ni lo, thil tlem azawng hriat ka la duh a ni," Logan-a chungah pawh chuan ka lungawi lo tih hriat zet chuan phone chu ka dah nghal a.

Alessia-i chu ka be pawp leh nghal zat a.

"Alessia ka hmu duh che a ni, angaiah khan."

"Min lo be ngei ang tih hi ka hria alawm, engtikah nge ni ang?"

"Vawin tlai dar hnihah," phone chu ka dah zui nghal a, sana ka en chuan dar khat a lo ri der tawh tih ka hria.

Ka chetdan mak sak tak chu Rose-i chuan min lo thlir reng bawk a..

"Rose vawiinah hian Rafe-a'n min hmuh a tum a, ka phone hi ka keng lo ang, a lo kal thut anih chuan thil pawimawh atih avangin a lo haw tlai i lo ti dawn nia."

Ka ding chhuak tur chu ka luhai thut avang chuan ka țhu leh rih a.

Rose chuan min lo dawm thuai a, "Bridget nidangah pawh i hmu thei alawm, tunah chuan i chak loh zia i hriat hi, thil pawi a thleng leh zawk ange."

"Ka kal tur a ni, hetah ka awm reng ringawt thei lo." Ka hmel a en chuan hnial chi-ah min ngai lo a ni ngei ang.

"A nih chuan ka lo kal ve ang, in inbiakna hmunah erawh ka awm lo ang, pawnah ka lo nghak thei che alawm," kal lo turin min duh zia ka hria.

"Ni lo Rose, Rafe pawh alo kal thut thei si a, ina i lo awm angai a ni."

Ka tho chhuak a, bathroom-ah chuan ka in tifai a, insiam buai pawh peih lo chuan ka chhuak zui nghal a, ka chhuak tur chu Rose-i chuan min en zui vawng vawng tih ka hria.

Taxi ka chuan laite chuan ka thlanfim in min bual a, ka lu a haiin ka luak te pawh a chhuak hle, ka chakloh em vang tih ka hria, mahse tunah tak hi chuan ka chak angai si a ni.

Ka thlen chuan tumah be muang lo vin inchunglam chu ka pan ding nghal a, ka rin loh takin tunțum chu Alessia-i chu keima'n ka lo nghah a ngai ve tawh zawk dawn tih ka hria.

Țhutnaah chuan ka țhu a, tukverh lam hawi mah ila engmah ka hmu lo zawk a ni, ka bul hnaia țhu ve te pawh chu an țawng reng ka hre lo.

"A pawi ka ti lutuk ka lo tlai a, min lo nghahna a rei tawh em?" Alessia chuan zangkhai taka tiin țhutnaah chuan ațhu zui nghal a.

"Rei lo e, ka thleng ve deuh chiah," pangai taka lan ka tum avang chuan hrehawm ka ti hle bawk.

"I țha chiah maw Bridget? Kha i thlanfim pawh a bawl țek țek alawm, damlo hmel i pu hle bawk, nidangah kan sawi thei alawm hahdam i duh lo em ni?" A țawngkam mai bakah a mitmeng leh hmel ațang chuan min ngaihtuah tih ka hria, min haw hle zawk tur a nih lai a!

"Hahdam duh ni ila, ka rawn be miah lo ang che, engkim min hrilh la ka duh a ni."

"Tunah chuan engemaw tal ei phawt teh ang, i awmdan kha ka ngaih ațha miah lo," a mitmeng ațang chuan hnial pawh ni ila a duh chuang lo ang tih ka hria.

"A țha alawm, i lam apiang chu ka duh ve nimai rawh se," ka ti ta ringawt a ei tur lam reng ka rilruah chuan a awm lo.

"A thil lam chu waiter hnenah chuan a hrilh a, min lo en pahin a nui sak a, hetah chuan a tui ber ang," a ti zui nghal a.

Waiter chuan, "Ka pi tun hi a hun lo hle tih ka hria. Mahse, ka hrilh ngei che angai si a, Ben-a kha a nu a boral thut a, vawiin chawhmaah a haw nghal a, eitur lam buaisaihtu kan indaih lo hle mai." Zah hmel tak chuan a kun deuh reng bawk a.

"A va zia lo ve, midang lak leh nghal tur anih chu, tunah chuan kan thil ei tur hi rang takin rawn dah phawt mai teh," a hma a ding chu a nuih ver ver bawk a.

Mak ka lo ti hle a, a nih chuan he Restaurant London-a lian ber leh pui ber hi Alessia-i ta maw lo ni a, Rafe paw'n he thil hi ala sawi ri ngai miah si lo a.

"Hahdam takin awm tum phawt teh, eitur kan eizawh hnuin muang changin kan sawi thei alawm," a kawr țial nalh zet chu a beng fai emaw tih mai turin a beng thek thek a.

Alessia hi mi fel tak zawng a ni, hmannia kan inhmuha ka tlu ta te, tuna ka landan pawr tak te ka ngaihtuah a, tlawm ta hleah inngaiin ka zak em em bawk.

Sawi ve tur ka hre lo, a thusawi te chu ka lo ngaithla mawl ve tawp a, rei lo teah eitur chu rawn chhawpin Alessia chuan ei chak tawh hmel zet chuan a ban nghal a.

Kei erawh a rim ringawt pawh chuan ka pum a ti let bulh bulh a ni ber, hreh zet chuan ka ban ve bawk a.

"Bridget engkim hian chhan leh vang anei an ti țhin a, Rafe nen kan inneih pawh khan chhan leh vang a neih ka ring țhin," Wine chu a in zeuh a.

Rafe-a nen an inneihna chu engvanga chhan leh vang awm tur a ngai nge anih le, inneih te chu induh tawnna leh in hmangaih tawnna vang mai a ni si a.

"Marcus hi ka tan chuan ka khawvel a ni a, ani hi awm lo se zawng ka dam zo lo hial ang," tui tih hmel takin ei mahse tun țumah chuan tui a ti bik hauh lo tih ka hria, lan pangai atum ve hle tih a chiang reng.

A țawng lai chu tawpin tui chu a in leh ta zawk a, kei erawh ka thil ei lai chu vawi hnih bak ka ei ka hre lo, tui ka in chuan tlemin ka awmdan pawh a ti pangai deuh in ka hria.

"James, i seng thei tawh ang," a mi koh chu rang zet a lo tlanin a ti fel nghal zung zung a.

"Bridget, i landan chu ala pangai hauh lo, mahse, engkim kan sawi thei tawh ang, i duh duh min zawt thei bawk ang, mahse thil pakhat ngen duh che ka nei, i thu hriat te hi Rafe-a hnenah i sawi anih paw'n kan inhmuh thu hi sawi lo la ka duh a ni," chiang fahran chuan min en a, envanga Rafe chu hlau em em nge a nih? Dawt a sawi chu ka ring si lo.

"Bridget, Rafe-a nen hian kum hnih kal ta khan kan innei a, chutah chuan Marcus-a chu kum khat a ni tawh."

A thusawi chu mak ka tih em avang chuan țawngchhuah ve mai nachang ka hre lo țep zawk, "Marcus chu Rafe nena in fa ang in i sawi si a." Ka ti chuak ve thei hram a.

"A ni ngei lawm, a fa Marcus ka neih avang chauha min nei a ni, chupawh a duh thlanna ni lo in a pain nupui dang a neih hma țep khan a pa a zah em em duh thlanna a min nei a ni," hrehawm a tih hmel hliah hliah a.

A thusawi engkim mai chuan min ti phuin, ka thisen kal lai te chu adanglam ber zawk.

"Ka sawi zel anga i duh chu nakinah min zawt mai dawn nia," pangai taka lan tum hram chuan a nui lui zauh a.

"Rafe-a fa ka pai dawn khan a rui hle a, a nu thihna kha atuar thiam lo in zu a in vak vak țhin a nih kha, a pa te company leh ka pa te company chu thawk dun niin, Rafe-a nen pawh hian kan innel em em țhin.

Ka thinlung chuan Rafe-a chu a lo duh hman viau a, ka lo hmangaih hman hle a ni, achung a ka rilru put ang chu ka chungah hian a pu ve angem tih hi ka in zawhna lian ber a ni țhin." A aw chu thian kharh a, a mit ko a chuar tap bawk.

"Tichuan zan khat chu a pain a company enkawl tura atih tak avangin lawmna hun chu an siam ta a, keipawh phur tak chuan kan chhungkuain kan kal ve bawk a.

A hmel erawh hmuh tur a awm lo, a pa chuan a room a awm thu min hrilh chuan ka lut zui ve nghal a, innel sa tak kan nih avangin. Tichuan Rafe-a chuan zu alo in mek a, a rui hle mai.

A tan liau liau a party huaihawt ni mahse, amah a awm chu a thlang zawk a ni ngei ang le, chutah chuan kan chesual ta a ni."

A hmel landan chu dam diai mahse, a rilru chhungril erawh a nain a hrehawm tak zet tih ka hria, keipaw'n ka thu hriat belh zel avang chuan ka inhumruh țeuh tawh, ka taksa pawh a țang hle.

"Bridget vawikhat chauh mahnise nau ka lo pai ta si a, nau ka pai tih a chhungte leh ka chhungten an hriat chuan innei turin min duh hle a, mahse Rafe-a chuan a duh ve hauh lo, kha thil a thlen khan min lo duh veah ka lo inngaiin nau ka pai tih a hriat hunah chuan a lawm ve hle ka ring bawk asin."

A insum theihna zawng zawng chu a kehsawm tih ka hria, a mittui chu a hru zauh a.

"Mahse, Rafe-a chuan hmangaih chu sawi loh duh tak ngial pawh min lo duh ve si lo a." A ngawi det a, hnuai lam a melh nghal a, a thusawiah chuan a cheng hle tih a hriat.

"Chuta țang chuan vawikhat mah rui khawp in zu hi a in leh tawh ngai lo a, a zu ruih vanga thil thleng chu a inchhir tak zet tih a hriat, ka tan erawh a na em em thung si."

Rafe-a mahni inthunun thei tak ni si kha mak ka ti hle a.

"Bridget ka tawrhna te hi atam asin, afa lo piang a hmuh hunah chuan a rilru a thlak ngei ka ring a, beiseina nen ka thlir țhin.

Tichuan a fa chu a lo piang ta a, ka rin ang ngeiin Rafe chuan mahni fa pawh hmangaih lo khawp tur chuan a awm hauh lo.

Damdawi inah chuan an chhungkuain an lo kal a, a pa kha a hlim teh a sin, 'ka tupa' tiin Marcus kha a pawm vawng vawng a."

A ngawi leh dat a, a mit chuan room chhunga thil awm te chu a melh kual ruai bawk a, sawi a hreh tak zet tih pawh a hriat.

"Tichuan, Rafe-a pawh chuan a fapa hmel ahmuh chuan a hlim ve alawm, a hlim hmel ka hmuh khan a rukin ka țap hial anih kha.

Rafe-a chuan a pa hi Pathian ang maiin a en a, a ngaisangin a thu a zawm hle țhin, a pa paw'n a duat hle reng a.

Mahse, kei min neihna kawgah chuan apa thu ahnial vawikhatna anih ngei ka ring, apa chuan thlem chikimin thlem mahse hmasawnna a awm lo, a tawpah chuan apa chuan an inzawmna chhu chat turin a vau ta a ni," tui chu la in a lem khawlh khawlh a.

Kei erawh hriat belh chaknain ka khat a, chutih rualin ka thil hriatbelh te chuan ka thinlung chu an rawn chhun nawn awn awn thung.

"Chuti taka apa thinrim chu ala hmu ngai hauh lo, an inzawmna chhut chah chu a ngam lo hle a, min nei ta a ni. Apa tel lo a awm thei lo, apa ni bawk, anu a ni tel bawk tih a hria.

Ka hlim hle mai, khawvela hmeichhe awm zawng zawng zingah chuan ka hlim ber hial ang.

Mahse kan inneih zan ațang chuan ka bulah a mu duh ta miah lo a, a fapa Marcus erawh a ngaihtuahin a hmangaih hliah hliah thung si,"

Rafe chuan, 'Alessia ka tihpalh a ni, min ngaidam ang che, ka hmangaih lo che tih i hriat kha, ka pa avang leh naute avang hian ka neih ngei che a ngai si a, mite hmuhah nupa ni mah ila, room chhungah erawh kan ni ngai lovang,' a thusawi chuan min deng na hle a, zankhuain ka țap tlaivar bawk, Rafe-a erawh chuan a hre lo thung.

A mittui chu a hru leh zauh a, hah hmel zet chuan a thaw leh kawk țhin a.

"Kei hian min hmangaih lo tu ka nei a, ka tisual hle a ni tih ka hria, mahse ka hmangaihna a nasat em avang leh Marcus-a ka ngaihtuah em avang chuan ka țhen thei ngang lo a ni.

Beiseina ka la nei fan a, Marcus avang tal pawh chuan a rilru ala thlak leh em em ang tiin ka nitin nun ka hmang ral țhin.

Mahse, a pa khan nupui dang neiin, Mexico-ah an awm ta thut si a, ka hrilhhai ngei mai, apa a hmangaih leh a engkimin chutia ati ta mai chu a tuar thiam lo hle a, ka chungah pawh ațuan hial țhin.

Țhen tur chuan min ngen țhin a, mahse ka thei si lo, ka chungah a che mawi lo ngai lo a, min hmangaih thei lo tih mai chauh a ni, Marcus nu ka nih avang chuan pangai takin min enkawl țhin anih kha."


Țumkhat chu ka thu hriat tura ka lo duh ngai hauh loh chu a sawi ta a, 'Engtikah emaw hmangaih ka la tawng ve ngei ang chutih hunah tal chuan ka duh dan ngei min pawm sak turin ka duh che a ni.'

Chu thu ka hriat chuan ka na hle a, mahse min hmangaih thei miau si lo, engtikah emaw chuan ala tawn ngei pawh ka ring a ni. Tichuan a pa a awm tak si loh vah chuan sumdawnna thil avang chuan London-ah a awm a lo ngai ta a.

Hun a neih veleh a fapa chu a rawn kan țhin a, kei erawh nu pakhat ang mai chauh in min en țhin."

A mit ațanga mittui luang chu a hru mawlh mawlh a, kei pawh chuan ka khawngaih hle bawk.

"I duh chuan nidangah i sawi zawm thei ang," engkim hre vek duh khan a hmel ka hmuh chuan nidangah pawh sawi zawm mai se pawi tihna ka nei lo.

"Ni lo e, tunah hian i hre vek tur a ni." A sam chu a vial tawm nghal a, lum a ti a ni ngei ang.

"Bridget, ka thu hriat tur ka lo nghah țhin, ka huphurh ber ni bawk chu ka hre ta a ni," chiang kel kawl chuan min en a, thinrimna erawh a awm lo.

"Chu chu nang a hmangaih che a ni, tih min hrilh ni kha a ni asin."

Ka țhutnaah chuan ka nghing dawrh a, "A sawi a maw?" mak ka ti hle bawk.

"A sawi alawm, neih ngei che a tum thu asawi bawk a, keiin a ka țhenna lehkha ka sign chiah a nghak a ni.

Min hmangaihna tel miah lo vin a nun chu ka lo phuar bet reng tawh a, hmangaih a tawn niah chuan a duh dan ka pawm ngei a phut anih kha," angawi dat a, ka bân chu a rawn chelh nghal a.

"Bridget, ka thei ngang lo a ni, Marcus-a hmel ka hmuh apiang hian ka thei lo leh zual," a kut chu lain a kut a inneih zungbun nalh zet chu a khawih a.

"He inneih zungbun hi ka tan chuan a hlu asin, ka bun theih chhung chu Rafe-a hi kalsan ka tum ngai lo, min ngaidam rawh," chiang zet chuan min lo en a.

"Bridget kha leh chen kha ka nghak asin, nang a hmangaih em che avang hian engti kawng pawhin neih che a tum ngei dawn tih ka hria, ka fapa avang tal pawh hian rilru fim tak pu la ka duh a ni.

Engti kawng zawng pawhin Marcus-a nu leh pa kan ni tho tho si a," a hmelah chuan min ngen tak meuh meuh a ni tih ka hmu a, sawi ve tur reng ka hre lo ka rilru chuan engmah a ngaihtuah thiam lo.

"Marcus," Alessia chuan ati a," ka hawi phei chuan ka phu na sa kher mai!

Marcus-a chu Rafe nen danglamna an nei lo emaw tih mai tur a ni, chechang lo chuan ka en reng a, ka mittui erawh ka ti tla tur a ni lo ang.

"Marcus, hei hi Bridget-i anih hi chibai rawh le," Alessia chuan a ti a.

"Chibai le Bridget," min en chiang hle a, a mit te, a hmui te, a chal leh hnar a pa chiah chiah a ni. Theih chu ni se țawng chhuah loh ka duh hle mai...

To be cont..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:05 pm

LAST KISS 15
Chapter-15



"Chibai le Marcus," ka mit deuh sulh sulh a, ka thawțha thei lo hial zawk. He hmunah hian ka awm reng thei lo ang.

"Marcus, tunah chuan Bridget-i nen hian thu pawimawh tak kan sawi a, inah min lo nghak thei angem?" A nu Alessia chuan a fapa chul pah chuan ati a.

"Aw le, Mommy ka lo nghak reng ang che," a bula ding amah awmtu chuan a hruai zui nghal a.

"Ka hriat tur ang zawng zawng chu ka hre tawhin ka hria, ka kal tawh mai ange," thawh mai ka tum nghal a.

"Bridget, ka pasal nen in inhmangaihna kawnga kei leh ka fapa Marcus kan lo awm ve avang hian hrehawm ka ti tak zet, min ngaidam ang che, kan la inhmuh leh ngei ka beisei, i thuthlukna chu engpawh ni se min hrilh hre ve ngei turin ka duh bawk che," a meng hnual em em a, hrehawm a ti hle tih ka hria.

Ka tho a, ka chhuak zui nghal bawk a, Alessia hmeichhe rilru zau leh zaidam tak a ni e, a pasal chuan a hmangaih lo pawh a ni mahna. Mahse, a pasal dan ang in ala ni reng tho a, midang chu ni se thinrim leh hnehsawh takin ka lakah an che ngei ang, ani erawh chuan ngaihdam min la dil zawk chu a ni si a.


In ka thleng chu ka luh rual chuan ka ding dawt a.

Țhutnaa lo țhu chu Rafe a ni. Thinrim tih hriat zet chuan min melh khûi a, a mit a khap hauh lo lehnghal.

"Eng angah nge mi ngaih? Kei hian ka hriat i ring lo amaw?" ka lam en chuan a rawn ti hriam hrawih a.

"Eng chungchang nge i sawi chu le?" He pa hi tunah chuan ka hmachhawn thei lo ang, ka mualpho mai dawn tlat.

"Damdawi inah i awm a, chuan zaninah thil pawimawh ti tur ang in i in sawi bawk a, Alessia i lo hmu reng chu niin, hrep tak hian," a thinrim zia chu a bek a thisen zam a pawng țawlh țawlh thei hial a, a hmel chu a thim khup bawk.

Tu chuan nge hrilh ang, Rose emaw Logan bak he thu hria an awm lo, Rose chu zawhna a khat hmel chuan ka va melh zauh a, a lu chu a lo thing nghal vat bawk, anih chuan Logan-a'n a hrilh a ni ngei ang.

"Ni e, Alessia ka hmuh chu enge a pawina Rafe? Nang hian min lo bum char char a, i thuruk chu ka hriat i hlau em em bawk a," cho zet chuan a hmaah ka ding khawng lah a, ka tiril khur chu ka thunun thei tur a ni.

"A hunah chuan keimah ngeiin ka hrilh ang che ka tih kha Bridget, eng vanga engmah hrethiam duh lo nge i nih le?" Ka hmaah tak chuan lo ding chhuakin kan in hmachhawn ran a.

"I nupui leh i fapa ka hmuh theih lohna chhan tur ka hre lo, mi tenawm pa," ka khur zawih zawih a, chhuatah chuan ka tlu sawp nuai bawk a, ka tlawm hle tih chu ka hria, mahse ka ding thei ngang si lo a ni.

"Bridget, engtin nge i awm?" nelawm loh tak hmel chu inthlakin, a aw pawh chu hlauhthawnnain a khat a.

Ka țawng mai thei tawh lo, ka mittui chu a chhuak zung zung a, au chiam mai chu ka duh ka thinlung hi a kehsawm chiang em a ni.

Min pawm lawp a, zo tak chuan ka room min pan pui a, khumah chuan zawitein min nghat bawk, "Doctor ka koh angaiin ka hria," thlaphan hmel tak chuan a ti a.

"Angai lo ang Rafe, anatna leh awmdan engkim ka hrilh tawh che kha, tunah chuan amah a inthunun theih nan haw tawh la ațhain ka hria," Rose chuan aw chang fak chuan a ti a.

"Ka haw thei lo ang, hetiang dinhmun a a awm lai hian ka kalsan lo ang," thinrimna tel hauh si lo chuan Rose chu a melh chiang hle.

"Engthil nge ni ta, i țha chiah em Bridget?" Jace-a a ni, hlauthawn hmel tak chuan a lo lut a.

"Ka țha alawm," ka mittui chu hruk pawh ka tum tawh lo zawk, ka melh ngai chu ka melh reng bawk a. "Mr Rafe, nang hetah maw? Enge thil awm zia hi," mak tih hmel takin Jace chuan a zawt a.

"Mr Mendler, i hnenah hian thu tam tak sawi tur ka nei a ni," Rafe chuan a;ti nghet charh a.

Hemi te pahnih hi an lo inhria a maw? Rose-i mak ti hmel pawh chu ka hmuhmaih bik lo.

"Pate Jace, Bridget-i hi damdawiin ațang a chhuak chiah a ni, harsatna tam tak a tawk bawk," Rose chuan heng thil kal mek te hi ka awm laiin an sawidun a hlau hle ni in a lang.

"Bridget maw? Tichuan kei hian engmah ka hre lo a," a hmelah chuan a lungawi lo tih a hriat hle.

Rose chuan thil thlen dan te chu Jace-a hnenah chuan a hrilh mawlh mawlh a, Jace chuan min khawngaih hmel tak chuan min en reng bawk a.

"In lo inhre sa reng a maw?"Rose chuan Jace-a chu a melh ha a.

"Ka neih zawng zawng chhuhsak ka nih khan, Italy-ah kalin Rafe te company hnuaiah hian hun rei lo te chu ka thawk hman alawm," Rafe lam chu a en bawk a.

"Tichuan Mr Rafe nen hian ka fanu Bridget-i chu an lo inhmangaih hle a," chauh hmel zet chuan min en reng bawk a, a kut lehlam chuan a ipte a zen bawk.

"Jace thil thlen dan hi a mak teh thut em a ni, i fanu hi ka hmangaih tak zet, neih ngei pawh ka tum a ni," Rafe chuan Jace chu melhin a thutak hle a.

A va mak em! Kei hi Jace-a fanu ka ni tih pawh chu a lo hre vek tawh zawk a, engthil nge thleng hi ka hriatthiam phak bak a ni.

"Bridget, Rafe nen hian inzawmna in nei tih ka lo hre hauh lo. Mahse, Rafe erawh hi chuan a hria che a ni, an company a ka thawh khan i thlalak hi ka dah reng țhin si a, ka dawhkanah khan, i chanchin te pawh ka sawi țhin. Mahse, khatih hun laia i thlalak ka neih erawh naupang mai ila ni a."

Ka mak ti hmel tak chu hrethiamin Jace chuan ka thinlungin a zawhna chu a lo chhang nghal a.

"Tichuan London-a kan in hmuh leh khan a fanu i ni tih ka hre ve chauh, ala rei lo khawp mai, kei paw'n tun hma zawng zawng khan Jace-a fanu i ni tih ka hre bik lo," Rafe-a hmel chu a țawng zawng chuan a nelawm loh leh hle tawh a.

Eng emaw tak sawi ve ka duh. Mahse, sawi ber tur ka hre lo, ka sawichhuak thei hek lo, ngawireng chuan tuma hriatpui si lo in ka thinglung chu a na ngawih ngawih a.

"Rafe ka fanu hi natna a tawk tam tawh em a ni, tuma tihnat ka phal tawh lo nang ngei pawh ni la," Jace chuan Rafe chu a melh chiang hle a, min humhim a tum tak zet tih pawh a hriat.

"Jace khawngaihin i fanu nen hian inneih kan tum mek asin, tumahin chu chu min dang lo se ka duh bawk," Rafe chuan chiang zet chuan ati a, a thinrim hmel hmuh tur erawh a awm lo, a lungngai hle tih erawh ka hria.

"Alessia vang paw'n he thil hi iti tur a ni lo asin, ka fanu tihsual nei lo rilru thianghlim tak hian a tuar nasa tawh mah mah a ni," Rafe a melh dan ațang chuan kal tawh se a duh hle tih a hriat theih a.

"Jace nang chuan engkim i hriat țhin kha, nang leh zel chuan min hrethiam tur i ni asin," a thaw hawk a, hnuailam a bih ngar bawk, a kut pahnih chu a ipteah chuan a zen lut bawk a.

"Heng thil hi kei chuan rem ka ti ngai lo ang. Mahse, Bridget-i hi a pawimawh ber tho a, tunah chuan hun thawl pe la ka duh a ni," Jace chuan a ti ve nghal a.

"Duh tawk teh u, tunah chuan Bridget hi a chau mah mah tih inhmu thiam lo em ni, Rafe i nupui leh fapa bul a awm tur i ni zawk asin, tunah chuan kal tawh rawh," Rose-i hmel thinrim avanga sen vek chu tumahin kan hmuhhmaih lo ang, a ding khawng hle a, Rafe chu rum lam lek lekin a melh bawk.

Engahmah ngai lo ang mai chuan, Rafe chu a țhen sak a, "A țha alawm ka kal ange, mahse ka lo let leh thuai ang."

A chhuak mai dawn emaw ka ti chu ka lamah lo kal pheiin, "Bridget lo dam ang che, ka nupui ni țep tur hi i damlo lai hmel hmuh ka duh hauh lo," ka chalah chuan rawn fawp zeuhin a chhuak zui nghal a.

Rang zetin Jace leh Rose-i te chu ka bulah lo kal hnaiin khumah chuan an lo țhu zui ve nghal a.

Rafe kal ta chu chelhbeh ka duh, ka mamawhin ka ngai em em si a, ka mittui chu a tla zung zung a, Jace chuan min lo hruk sak bawk a.

"Bridget in ti pachang hram teh, kei chuan Rafe hi theihngilh la ka duh. Mahse, i duhthlanna erawh a pawimawh ber zawk tih ka hria," Jace chuan min lainat hmel chuan min en reng a.

"Bridget, Jace hian a sawi dik a ni, nupa angin an awm lo pawh a ni mahna, mahse nupa an nihna a bo chuang lo, a fapa leh Alessia chan tur i dawn angai a ni," Rose chuan ka damdawi ban chung chuan a lo ti ve bawk a.

An sawi dik a ni, kei hian ka nei thei lo ang. Mahse, engtin nge ka awm tak ang? Rafe chu ka thinlung kawltu a ni si a, engtin nge ka thinlung tel lo in ka nun ka hman theih ang.?

Țawng chu ka duh ka hrawkah hian a tawt up up a, min hnawh nasa em em mai si a, ka țawng anih chuan mu leh mal awm lo in ka țap anga ka tal buai leh chiam ang tih ka hlauh avang chuan ka țawng ta lo zawk a.

"Bridget-i dinhmun hi a chau hle a ni, a natna tawrh te nen hian rem intih chuan a ziaawm deuh hma chu hetah hian awm ka duh a ni," Jace chuan min ngaihtuah zia chu ka hmu, min enkawl duh hle mahse min enkawl thei ngai lo a, tuna hun hrehawm tak ka paltlang lai hian ka bula awm a duh a ni tih pawh ka hria.

Rose chuan chhan mai ngaihna hre lo in min lo melh zauh a, ka rilru buai hle karah chuan ka pa thlamuanna chu ka mamawh tih ka inhai bik lo, ka lu chu ka lo bu ve nghat a, lawm avang a Jace-a leh Rose-i te hlim hmel chu hmuh a nuam hle a.

"Bridget," Logan-a lo lut chu a hmanhmawh hle tih hriat takin a thaw deuh hluam hluam a.

"Hetah enge i rawn tih dawn?" Ngei tih hriat tak chuan ka melh let nghek a.

"Hospital-ah ka lo kal asin, inchhuak tih tal te chu min hrilh ve tur che alawm, ka zawh hma hauh chein phone i dah daih si a," ka bulah lo kal hnaiin a lo țhu a.

"Logan nang nen hian sawidun tur kan neih ka hre lo," mu reng chung chuan chau zetin ka lo chhang a.

"Ni lo Bridget, chutiangin sawi suh," Rose-i leh Jace-a te chu a melh zauh bawk a.

"Thu pawimawh tak sawi tur nei in ang, kan lo va chhuak ange," Jace-a chuan Rose-i chu a chhuah pui zui nghal a.

"Bridget, ka lakah i lungawi lo hle tih ka hria, mahse i nunna ai paw'n i hmangaih tih i sawi miau si a, thudik hi ka hrilh ngam thlawt lo che a ni." A in thiam lo in a meng hnual raih bawk a.

"I sawi ngam loh avang chuan thudik hi a danglam phah dawn a ni si lo a, bakah min lo hrilh hmasa ni la chu inthunun theihna ka nei ngei awm si a." Ka chauh avang chuan ka țawng pawh a zawi lam mah a ni.

"Bridget, i rilru tihnat ka duh lo a ni, Rafe-a'n engkim hrilh che a tum tho a, bakah a hmangaih em em che a, a nei ngei bawk ang che tih ka chiang, chu hun lo nghah chu i tan leh ka tan ațhat zawk vang a ni," ka kutah chuan a hmer vawng vawng a.

"Rafe-a'n engtin nge Alessia nen kan in hmu tih a hriat theih, sawi lo tur khan ka ti si che a," amah pawh en lo chuan chunglam chu ka en char char a.

"Ka hrilh hauh lo Bridget, Alessia-i khan a sawi zawk a ni."

Mak ka ti hle Alessia chuan a pasal chu hrilh miah lo turin min ti si a, amah zawk chuan a hrilh leh tho si a maw?

"Logan tunah chuan ka chau tlat, khawngaih in ka damdawi kha min lo pe ta che," ka kawhna lam chu a hawi ve nghal a.

"Hetiang tel lo hian i mu thei lo tihna em ni?" Min en chiang hle a.

"Thei e, a zualpuiah chauh ka ei țhin Doctor-in min chawh miau si a," mut theihna damdawi chu mum khat mai pawh duh tawk lo in mum hnih lai mai chu ka ei a.

Ka thil tawn zawng zawng te hi theihngilh vek ka duh a ni.

"Bridget hahdam taka mut tum ang che, min mamawhna i neih phawt chuan min hrilh zel turin ka ti che a, min hrilh ngai hauh si lo, i muthilh hma chu ka lo awm ange."

Ka taksa leh rilru chau tawngkhawng avang chuan ka chhang peih tawh thlawt lo, ka damdawi chuan ka mut a ti chhuak chiai chiai a, ka mit chu ka meng thei tawh hlawl lo.

"Eng ang mihring nge i nih chu ka hre lo, mahse, a nupui pawh nupui anga en ngai lo tuin tunah Bridget-i chu natna khumah i mut tir leh amaw? Min kalsan rawh Rafe," chu aw chu Rose-i ngei a ni, a ring țha hle bawk.

Ka harh chiah tih ka inhria, zing niin ni pawh a tlangsang hle tawh, nizan lam ka mutțhat vang te pawh a ni ang ka taksa te pawh a zang tawh hle tih ka hria.

Zawimuang chuan inhnuai lam chu ka pan a, Jace, Rafe leh Rose-i te chuan min lo en țhap bawk.

"I lo chhuk kher angai hleinem, awm hah dam i mamawh ber," Rose chuan chiang fahran chuan a lo ti a, a thin ala rim hle tih chu a hmelah chuan alang.

"Bridget mamawh te i nei em? I ril pawh ațam tawh viau ang, eng emaw tal ei ang che, Rose eitur va siam sak ta che," Jace chuan a lo ti nghal mawlh mawlh a.

"Ka la ei chak lo e, nakinah ka ei mai ang," damlo engmah ti thei lo mi chak lo tak anga min en vek chu ka duh lo hle.

"Bridget, Alessia nen kan sawi dun tawh tunah chuan..."

"Rafe vawiinah i inah ka lo kal ang, tunah chuan min chhuahsan rawh dar 11 ah."

Ka chhanna chu mak tiin an in en deuh țhap tih ka hria.

"Bridget ka lo nghak reng ang che," rawn kal hnaiin ka biangah chuan a rawn chul zeuh bawk a, a mi khawihna chu ka taksa chuan a hre hle bawk.

Dawhkan lamah chuan Rose-i chuan min hruai pheiin ei tur chu a lo chhawp nghal mawlh mawlh bawk a, châk lo hle mah ila ka ei luih angai tih ka hria.

Rafe chhuak ta kha ka mitthla â cham reng chung chuan ka thil eitur chu ka ei bawk a.

"Bawihte, thuthlukna i siam tawh niin alang, thuthlukna diktak i siam ngei pawh ka beisei tlat a ni," Jace chu ka țhutna bulah chuan lo țhuin min en ran bawk a.

"Mahse, i inchhirna tur thil engmah ti hauh suh ang che, i thuthlukna chu eng pawh ni se," Rose-i chuan arawn tih zawm nghal bawk a.

"Jace ka thuthluknaah hian ka chiang a ni," Jace chu ka pa a ni tih leh thisen zawmpui ka chhungkhat awm chhun tih chu ka thinlung chuan a pawm em em tawh zawk a. Mahse, Jace tih chu ka koh dan a ni reng tawh zawk ang.

"A țha e Bawihi, eng thil pawh ti la, Rose-i sawi ang khan i inchhirna tur ti lo ang che. In inhmangaih zia ka hria, i nei duh anih paw'n ka pawm em em ang," Jace chuan ka nat leh chu a duh lo tak zet tih ka hria, a pawm ngei bawk ang.


Phur lo zet chuan ka insiam a, nidang ang lo takin ka hmai pawh ka chei peih meuh lo, ka kawrfual simple tak chu lain ka ha mawl tawp a.

Rafe te in ka thlen chuan tual zawl zau tak mai a Rafe leh a fapa Marcus te infiam ka hmuh chuan pawh mai turin chakna ka nei lo, Gate lian tak bulah chuan dingin ka mittui chu a tla mek a, ka inthunun theih hma chu ka pawh thei lo a ni.

Rei tawk fang ka din hnu chuan ka insangmar sauh a, pangai tak ang alang chuan an lam pan chu ka pan nghal a.

"Bridget," ka lam rawn en chuan Marcus chuan a pa hnenah chuan "Daddy saw saw Bridget-i anih saw," a nui ver ver a.

"Aw le, ka lal fapa tunah chuan Bridget-i nen hian thusawi tur kan nei a, thu pawimawh tak sawi tur kan nei a, Aunty bulah lo va kal ta che, kan infiam leh vat dawn nia."

Marcus chuan nui ver ver chung chuan min bye bye a, a pa lam hawiin, "Daddy infiam leh vat ka duh ania," kham lo tih hriat tak chuan a kal zui nghal a.

"Fapa duhawm leh hmelțha tak a ni," ka thinlung erawh a puakdarh lo chauh.

"Ka lawm e, inchhungah lut ang hmiang," kan inzui luh hnu chuan țhutna nuam takah kan țhu bawk a.

"Ka rei lo ang, thil lâk lawk tur ka nei a," Rafe chu a room lam pan chuan a chho nghal a, a hmel te chu a nelawmin a zahawm hliah hliah bawk.

"Ka pi," min lo en rengtu chu mak ti takin ka en let reng a.

"Linda" ka ti sap a, "Nang hetah maw?" Mak ti zet chuan ka zawt hu a.

"Thlawhna lam ațang khan company lam ah ka insawn leh tawh a ni, vawiin lam chu ka puin pawimawh a awm a tih avangin helamah ka lo kal ta a ni."

Ka pu a tih chu Rafe a ni tih hrilh nawn ngai lo in ka hria, Linda-i hian thlawhnaah khan kan la in hmu leh ngei ang a tih tak kha, Alessia erawh ka hmu ve mai si lo a, mak ka ti hle.

"Ka pi, ka pu nen hian sawi tur tam tak in neih ka ring, nakinah kan la inkawm zawk dawn nia," a dan pangai chuan a nui leh ver ver tawh a, a kal zui nghal bawk a.

"Ka rei lo turah ka ngai," Rafe chu ka bulah chuan a țhu nghal a.

"Keimah avangin vawiin lam hnathawhna ah i kal si lo a, ngaihdam ka dil e, Alessia ka hmuh ka lo beisei asin," ka kut chu ka hum ruh țeuhva pangai tak a ka awm angai si a ni.

Za vak lo chuan a nui sak a, "Ani te chu hetah a awm tawh hleinem Bridget, tukin zingah khan Italy lam a pan ta a ni," chiang zet chuan min en a.

Mak ka tih em avang chuan sawi mai tur pawh ka hre lo.

"Tichuan khawngaihna tlem te pawh lan tir lo in i haw tir a," demna mitmeng chuan ka melh ran a.

Rafe chu a thaw kawk a, thatchhiat hmel zet chuan țhutphahah chuan a țhu thluang duai a, a kut lian zet chuan ka kut chu a vuan zui nghal zat a.

"Bridget, nang ka neih theih nan che hian engmahin min dal dawn lo tih a hre chiang tawk tawh a ni mahna," keimah pawh min en lo chuan a hmalam chu a en vung vung reng a.

"Ani nen khan nupa kan ni ngai hauh lo, ka pa avanga nei ka ni, mahse ka pa lah chuan," a hmel chu a ruh hle a sawizawm tawh lo chuan anchhia a phuh sap a.

Eitur leh Coffee lo kengtu chu ka en reng a, min melh dan ațang chuan zak thei lo min tih hmel tlatin ka hria, ka inngaihbel zo nge pawh ka hre lo.

"Bridget ka fapa Marcus hi ka nunna ai pawn ka hmangaih a ni, chutih rualin nang pawh tunah chuan Alessia paw'n kan in hmangaihna hi hrethiamin min kalsan ta a ni," a hmel dur khup chu inthlakin thlamuan hmel tak chuan min en a.

"Tichuan Marcus hi i laksak tihna em ni? Natna a tuar hnem tawk tawh viau asin, Marcus leh zel chu i chhuhsak tur a ni lo," chiang zet chuan ka melh nghek a.

"Ni lo e, Marcus chu hun rei lo te a awm anga, Alessia bulah a let leh ang Alessia tan a pawimawh zia ka hria, ka tana a pawimawh tluk zetin, chhuhsak ka tum hauh lo," Coffee chu ban in a inzui nghal a.

Alessia hmeichhe zaidam tak, rilru nat luat vanga mittui tla chu ka mitthlaah a lo lang uar uar a, Rafe kalsan tura min ngen lai te, Marcus-a an fapa ngei mai naupang rilru thianghlim leh hmelțha tak chu ka mitthlaah a lo lang bawk.

"Bridget, Alessia chu a mal hauh lo vang, a in enkawlna tur sum tam tak ka pe anga, puih angaihna apiangah ka pui bawk ang, chu chu i duhdan pawh a nih ka ring," min rawn melh chung chuan a Coffee in lai chu a dah zui zat a.

Tunah tak hian Rafe hi bensawk ka chak ber, a rimpa tak leh ka bula ațhut avang chuan ka thlahlel em em si, ka thinlung hi chemte a vih ai paw'n ana a ni tih erawh a hriatthiam ka ring tlat bawk.

A ipte chu zenin engemaw a rawn phawrh hlawl a, "Min nei duh angem? Hetia in sawmna hmun hi a ni lo tih ka hria. Mahse, hun dang ka nghak thei tawh thlawt lo a ni," zungbun ka hmuh tawh azawng a mawi ber mai chu a rawn phawrh a, aman zat tur erawh ka chhut hman lo.

"Rafe hetah hian inneih sawipui tur che a lo kal ka ni tlat lo, tunah chuan ka hmangaih ber hi kalsan ka tum thu hrilh che ka tum zawk a ni," ka inthununna chu a bo vek a ni ber, ka natna chu ka mitah a hmu ngei ang.

A hmel chu inthlakin thinrimna tel si lo, mak tihna hmel chuan min en a.

"Bridget, min hmangaih tih ka hria, chuan kei paw'n min hmangaih tluk zet hian ka hmangaih che tih i hre bawk, Alessia vang anih chuan kan chanchin chu i hre vek tawh e, nupa kan ni ngai lo.

Hmangaih ka neih hunah min pawmpui turin ka ti bawk, min pawmpui nan erawh hun aduh rei mai chauh a ni," hrehawm tih hmel tak chuan min en a, a zungbun kenlai chu dawhkanah chuan a dah bawk a.

"Rafe" ka mittui chuan a rawn zawm nghal a.

"Alessia leh Marcus ka tina thei lo a ni, engang pawhin inhmangaih mah ila, i nupui leh fa an nihna hi engmahin a thlak danglam ngai lo vang." Ka hmai chu ka hup a, midang ten an hriat loh na'n ka thawm dim angai hle tih ka hria.

"Bridget țap tawh lo teh, tunah chuan engkim a fel vek tawh alawm, he zungbun hi pawm la kumkhuain kan awm dun thei tawh ang tih i hriat kha," ka hmai hupna chu la thlain dim zetin min rawn fawp nghal a.

Rang zet chuan ka tawlhsawn dawrh a, "Rafe, keichu pakhat chiah ka ni, Mi pahnih thinlung tih kehsawm ai chuan pakhat chu ala thlan awm tho tho alawm, Alessia hi nei let lehin i theihtawp chhuah la i hmangaih ni tur ka lo thlir reng ang."

Thudang sawi thei ka ni lo, ka mualpho dawn tih ka hria, rang zet chuan ka tlan chhuak nghal a. Rafe-a'n min kohna chu ka mang hriat a ni mah zawk ta ve ang.

In ka thlen chuan ka room lam chu ka pan zui nghal a, Jace erawh ka hmu lo, Rose-i chuan keimah chauha awm ka mamawh tih hriain min hnaih lo reng a.

Ka thuthluknaah hian ka inchhir angem? Rafe piang nawn leh pawh ni ila ani ang hmangaih leh duh, ka thinlung zawng zawng leh nunna ai pawha ka hmangaih hi ka tawng leh dawn lo tih ka hria.

Kei hian eng sual nge ka tih bik? Ka nu leh pa te laksak ka ni a, ka nu leh pa te chu min hringtu an la ni lo leh zel a, Jace chu ka pa tak a lo ni leh a, ka pasal ni mai tur chu nupui nei niin Marcus-a chu an inkarah alo piang bawk a. Nupa angin awm lo mahse adanglamna ka hre lo.

Dam châkna ka nei hauh lo, damchhan tur ka nei lo a ni mah zawk, ka ke ler ațanga ka chhip thleng chuan ka inhaw hial a, Rafe erawh huat tum mah ila ka haw thei ngang si lo.

Hun leh ni te an liam ve zel a, Pathian ka auva ka tawrhna te ti ziaawm turin chhanna ka hmu lo, ka mangang em em a, ka nunna min laksak turin vawi tam țap chungin ka dil chamchi a. Mahse, a chhanna a awm chuang lo, mahni intihlum tur em chuan ka huaisen tawk lo a ni mah na.

Rafe leh Logan te chu an lo kal zing hle ang tih ka hria. Mahse, ka hmuh duh loh miau avangin Pate John-a hnenah te ka awm thul ka kartawn a ni ber.

Rafe phei chu vawitam min hmuh tumin a lo kal țhin tih ka hria mahse chhuanlam siamin min thup bo tlat thung, ka hmu chak em em a, ka ngai em em a, ka thinlung hian vawitam a hming lam mahse ka hmu tur a ni lo tih ka hria.

Zantin ka mut dawn a, Arsi te leh Thla lian zet chuan min tina zualin ka mittui chu a ko chhuak reng a, mahse paih bo erawh ka duh lo, ka tan liau liau a Rafe-a'n a tih a ni si a.

Mi â ang maiin ka nun chu ka hmang a, ka chenpui Rose-i leh Jace-a te pawh an rilru hah tur zia ka hria, Logan pawh ni se vawitam lo kalin beidawngin a haw leh țhin a nih kha.

Rafe pawh tunah chuan a beidawng ve tawh a ni ngei ang, thla thum lai aliam ta bawk a. Ka hmangaihna erawh a thuk tulh tulh a ni ber, zanah ka mu ngai lo a, chaw ka ei ngai lo, ka cher in ka dawldang em em a, ka nitin hun chu țah nan ka hmang țhin, ka chhungte chuan min be mahse ațul ka tih chin bak ka chhang ngai lo.


Zantin mut theihna damdawi ei lo chuan ka mut theih ngai loh avangin ka ei ta țhin a, chhunlamah ka rilru tih ziaawm nan wine ka in nghek țhin. Min chhawk chhung erawh a rei hauh lo.

Nitin tlai ni tlak dawn apiangin nitla tur thlir liam tur chuan River beck, Kelsey park a awm lam chu ka pan țhin a. A hmun chu a thengthaw nuamin a boruak pawh ka duhthusam a ni reng a, mi chi hrang hrang pawh an tam țhin hle, chutah chuan Rafe ka theihnghilh nan ka rilru te chu ka ti paukhauh nawn fo țhin.

Ni tla tur sen phut chu a mawiin ka tawrhna erawh a zual țhin si, mittui nen bawk ka kir leh țhin anih kha.

Hetiang renga nun hmang tur chuan hrehawm ka ti mah mah, ka tawrh theih piah lam ka tuar tlat si a, rilru Doctor pawh vawi tam panpui ka niin, ka tawrhdan erawh a ziaawm phah chuang hauh lo.

Rafe chuan ka kir hun a nghak tih ka hria, mahse... mahse... kei hian mi chhungkua ka ti kehchhe thei lo tlat, ka hmangaih leh ka hlimna ber chu ka kalsan hlen tur a ni.

Tunah chuan thil pakhat chiah ka tih angai a ni, ka natna zawng zawng te chu vawikhatah a bo dawn lo tih ka hria. Mahse, hun aliam zel anga fa ka hrin chhuah ve hun a lo thlen chuan ka natna te chu a bo ngei ang, ti reng reng chuan mi angloah ka chhuak tak tak dawn tih pawh ka hria.

Ka phone chu la kangin Logan-a chu ka call zui nghal a.

"Bridget, i țha em? Engvanga min hmu duh miah lo nge i nih? Ka zawn theihna chinah chuan ka zawng nasa che asin, i Inah lah i awm lo țhin si a, i awm lahin min hmu duh si lo," thinrimna tel hauh loin Logan chuan ka țawng ve hma chuan a lo ti zung zung a.

"Logan hmuh che ka duh a ni, ka Inah hian tunah," ka phone ken lai chu ka hmer ngawt ngawt a, keh thei chu ni se a sawm vek ngei ang.

"Aw le, ka lo kal nghal e." Phone chu dah nghalin a lo thleng har lo khawp ang tih pawh ka hria.

Inhnuai lamah chuan ka chhuk a, Rose-i hnenah chuan "Logan-a min hmu turin a lo kal dawn a, ka room-ah lo kaltir mai turin ka duh che a ni."

Ka thusawi avang chuan Rose leh Jace te chu an hlim hle, mi pangai ang a ka awm lohna a rei tawh bawk atin ni, Rafe a ni emaw Logan pawh ni se ka hmu duh ngai lo a nih kha.

"Bridget ka lawm e, engkim i sual chhuak thei tih ka hria, i thuthlukna erawh kan la hre ve si lo a, kan lo nghak reng e," Jace chuan min rawn kuah nghal a.

Rose-i hmel pawh hmuh theihin a eng a ni, "In hre vat ang, rei lo teah," inchunglam chu ka pan leh ngal a.


Kawngkhar ri chu hriain ka hawi phei chuan Logan ngei a ni.

"Bridget, i țha tawh hle a ni maw? Jace khan tumah hmuh i duh loh thu ka lo kal apiangin min hrilh țhin a, beidawng takin ka haw leh țhin, vawi tam phone ațanga biak che tum țhin mah ila, i pick up duh ngai si lo." Ka bulah chuan țhuin min ngaihtuah zia leh min khawngaih zia chu hai rual a ni mawlh lo.

"Logan" a kut chu ka vuan a, chiang zeta en chung chuan "Min nei duh angem?"

A phu nasa kher mai, awihlo tih hriat tak chuan min en reng bawk.

"Bridget i țha chiah em? Na i nei zawk em ni?" A meng phawk hle bawk.

"Na ka nei lo, kei hian inneihpui turin ka sawm che a nih chu, min chhang dawn lo em ni?"

A ngawi vung vung a, min chhan mai ngaihna a hre lo tih chu alang.

"Bridget, ka nei thei lo ang che," min en chiang em em bawk a.

"A nih chuan nang paw'n min lo bum reng a nih dawn hi, min hmangaih ni khan ka hre si a, midang ang tho i lo ni ve tih ka lo hre lo a ni."

"Bridget, mi pahnih inhmangaih tak te inkarah lo tlak zeh hi ka duh lo, ka hmangaih miau avang chein, ka hmangaihna thu erawh hria la ka duh ang in, i hriat kha ka duh tawk em em tih pawh i hriat kha."

"Logan tunah chuan kei leh Rafe chungchang kan sawi lo, nang leh keimah zawk a ni kan sawi ni, min nei duh lo anih chuan a pawi chuang lo e.

Mahse, hei erawh min hriat sak la ka duh a ni, Rafe ka hmangaih zia i hriat avang khan ani nena awmdun ka thlang kher lo tih hi, ka thuthlukna siamah hian ka inchhir lo ang tih pawh ka hria a ni."

"Bridget, i rilru a hah lutuk a nih kha, Alessia pawn hrethiamin Italy-ah a kal tawh, in inhmangaihna chu pumkhat anih theih reng lai hian kei hi min sawm hauh suh."

"Logan, kan inhmangaihna chu pumkhat a ni ngai lo ang, ka thei lo tih hi hrilhnawn kher che ka duh tawh lo bawk ang, i chhanna ka nghak a ni, naktukah min hrilh ang che.

River beck, kelsey park-ah, tlailam dar thumah," hnial chi ka ni lo tih ka hmel ațangin a hre ngei ang.

"A țha alawm ka lo kal ang, Rafe-a'n kan inhmuh leh hmuh loh min zawt țhin asin. Keimah ang thoin a hmu thei bik si lo che a, hmu la ațhain ka hria."

"Ani chu țul ka tih hunah ka hmu mai ang, kan inbiak thu hi hrilh lo bawk la ka duh a ni."

"Bridget ka hmangaih che tih hi Rafe chuan a hre daih tawh alawm, țhiantha tak kan nih bakah unau ang mai kan ni țhin, zêp rûk a awm ngai lo tih i hriat ngei ka ring."

Mak ka ti em em mai a, Rafe chuan Logan-a chanchin a sawi ngai hauh si lo.

"Mak ti vak duh suh, i hmangaih zia a hria a, tin i hmangaih zia ka hrilh bawk asin, rilru thianghlim tak ka pu tih pawh a hre reng a ni, kan in hrechiang tawk em em mai si a."

"Logan, Rafe chuan mak a ti ve miah lo em ni?"

"Ti lem lo, Australia-a in lo kal khan a hre tawh, Rafe-a mak danglam na em em chu mite thinlung hi a hmu thei emaw tih mai tur a ni," a nui mawi tak chu a lan tir leh nghal a.

"Logan pawi i tih loh chuan ka wine in a thawk tlat, mut hahdam ka duh a ni."

"Tehreng mai mu rawh, naktukah chuan ka lo hmu ang che, i hmel ka hmuh leh avang hrim hrim pawh hian ka ngaih a țha em em tawh zawk a ni," ka chalah fawp zeuh in a chhuak zui nghal a.

Ka sawmna chu ka rilru buai vang leh rilru hah vangah a puh tih ka hria, a ngai thutak lovang tih pawh ka chiang...

To be cont...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:05 pm

LAST KISS 16
Chapter-16
By- Peki Ralte


"Bawihi, i țha em? Vawiin lamah Logan nen inhmu tur in ni si a, in tifai la țhain ka hria," Jace chuan ka puan chu min sin țhat tir a.

"Ka țha alawm Jace, Rose-i nen hian thu pawimawh tak hrilh ka duh bawk che u," ka in sehruh nasa hle a.

"Kan lo ngaithla e," Rose chuan a ti zui nghal a, ka thawmhnaw te chu a ti fel mek tih ka hmu.

"Kei hian Logan-a hi ka nei dawn a ni, thuthlukna ka siam tawh," ka sawi lai te chuan ka khur thei hial a ni.

Mak ti lutuk chuan engmah sawi mai nachang hre lo vin, min melh reng a.

"Bridget, Rafe hian a nupui a hmangaih lo tih chu kan hre vek ang, kei ngei pawhin an company a ka thawh tawh avangin ka hre chiang, nei mahla a pawina a awm em ni?"

"Bridget, i chiang chiah maw i inchhir mai lo vang maw?" Rose chuan a tih zawm bawk a.

"Jace, ka hria e ka inchhir hauh lo ang, ka duhdanin ka awm ve ngai lo a nih hi, engmah hi ka duhdanin a kal ngai bawk lo, ka lakah hian tu mai pawh hian thuruk neiin, chu chu kei hian ka lo tuar zel a. Tunah chuan keimah ngeiin ka duhdan chauhin ka kalpui tawh dawn a ni," ka ti ram hmak a.

Ka tho zui nghal a, ka bula awm pahnih te chu chechang lo vin, ka awmdan chu mak ti zetin min thlir reng tih ka hria, ka intifai a, ka thawmhnaw te chu ka thlak bawk a, Logan-a ka hmuh a hun mai dawn si a.

Motor horn chu rawn riin, ka lo nghahna kan kawtzawl ațanga ka hawi phei chuan Logan-a chu ka va hmu a, ka pan zui nghal a.

Motor-a kan chuan dun lai te chuan a tu ve ve pawh chu țawng tur kan hre lo a ang mah zawk, nge ni a kan rilru a thuawm te chu sawichhuah har kan ti zawk.

"Hmun nuam tak a ni Bridget, hetah hian i kal fo tih a hriat reng alawm," Logan chuan min nuih sak a.

"Ka kal țhin alawm Logan," hmun nuam takah chuan kan țhudun ran bawk a.

"Bridget, tunah chuan rilru hah tak leh buai takin awm tawh lo la ka duh a ni."

"Logan ka thusawi kha i lo ngaihtuah ta em?" Chiang zet chuan ka en ha a.

"Nang hian i hmangaih chu Rafe chauh a ni, ka hmangaih em avang che hian chu chu hre mah ila ka nei thei che alawm, tichuan Rafe hi i paih bo mai thei lo ang, kei min hmangaih hun tur chu ka nghak fan fan thei a ni.

Mahse Bridget, ka hma ka sial avang ringawtin nang hi ka nei thei lo che a ni, I hmangaih ber nena awmdun a, hlim taka i awm hi ka duh ber chu a ni." A thusawiah chuan a chiang hle tih pawh ka hria.

"Logan, ka nunah hian ka ngaihtuah phak ngai loh thil ten min țhawng nasa em em a, engmah hi ka duhdan leh ngaihdan ang in a kal ve ngai hauh lo, tunah chuan ka duh dan chauhin a kal tawh ang.

Ka thuthluknaah hian ka chiang a ni. Mahse, min nei duh lo anih erawh chuan ka nawr lui thei hauh lo che, Rafe erawh ka dam chhungin a bula awm ka tum hauh lo, ka theihnghilh theih nan hian min pui zel la ka duh bawk a ni."

"Bridget, i la inchhir ngei ang, heng thil te hi tilul suh, ka tana hnar a harsat tur zia pawh i hriat kha," a hmel thu tak zet karah chuan a ngaihtuahna a buai ve hle tih ka hria.

"Logan inhmangaih tak te hi an awm dun kher tur tihna a ni hleinem, khawi hmunah pawh awm ila kan thinlung a kan inhriat rengna hi hmangaihna chu a ni dawm lo'm ni? Ka thuthlukna chu i chiang tawh e, tichuan nang hi Rafe-a ka hmangaih ang hian ka la hmangaih ngei bawk ang che tih ka hria," ka mittui tling pam chu ka khap let tumin ka bei mêk a.

"Bridget he thil hi vawikhat mai ni lo in vawi tam tak ngaihtuah nawn leh la ka duh a ni, Rafe pawh hmu hmasa leh phawt la, tichuan thuthlukna chu i siam chauh dawn nia," a mitmeng chu a de sar sar a, atan a buaithlak tur zia chu ka hriatthiam pui bawk.

"Rafe chu ka la hmu leh ngei ang, mahse ka rilru erawh ka thlak dawn lo, Logan i thuthlukna chu kei hian ka nghak mek zawk a ni," ka melh ran a.

"Ka nei ang che Bridget, ka hmangaih che ka duhthusam a ni tih pawh i hria e, min hmangaih hun tur erawh ka nghak reng thei alawm," ka kut chu chelhin a fawp zui nghal a.

Ka nui nghal ver ver a, ka nuih lohna chin pawh ka hre tawh lo hial, ka thinlungah erawh Rafe chuan hmun a la luah reng si.

"Ka lawm e Logan, a rang lam ngei ni thei se ka duh bawk, ka theihtawp chhuahin ka bei ang a, nang ka hmangaih na'n che hian hun ka duh rei ka ring hauh lo," ka thutak hle a.

"I thuthlukna i thlak leh anih paw'n min hrilh hreh lo ang che, a tlai hma ngeiin min hrilh ka beisei, anih loh chuan ka nupui i ni hman mai ang," a nui leh ver ver a, a hmel erawh a thutak hle thung.

"Engtikah mah ka thuthlukna hi ka thlak ngai hauh lo vang, ka tiam a che," ka melh ve ralh bawk a.

Logan-a awm dan chuan min fawh a chak hle tih pawh ka hria, mahse a insum hle si a, a inrin hma chuan a hmuiah chuan ka va fawp zeuh a, mak ti tak chuan min en hu bawk.

"Ka pasal nimai tur chu ka fawp thei lo em ni?" Kan nui dun var var a.

"Alessia chuan a kal dawn khan min rawn hmu a," ka lu chu a rawn tuai puat a.

"Alessia maw?" Mak ti zet chuan ka lo meng biak kawk a.

"Duhsakna hlan tur chein min chah a, chuan a inthiam loh thu a sawi bawk."

"Mak tak a ni, ka hmeichhe hriatah chuan," ka ngaihtuah thiam lo hial zawk Rafe thinlung nei turin kha leh chen a lo nghak si a, Italy-a a kir leh mai te chu a mak a ni.

"Hmeichhe fel leh zaidam tak a ni asin, Rafe-a a hmangaih em avang hian a tih loh tur a ti a ni tih pawh a hria."

"A dik lohna a awm hauh lo, tu paw'n hmangaih chu kan nei thei alawm, hmangaihnaah hian duh kan thlang ngawt thei lo chu anih hi, a pawi ta ber zawk chu inneiin nupa an ni hman tlat si a, Marcus-a a lo piang ve bawk nen..."

"Mi te hmuha nupa mai an ni tih i hriat kha, nupa angin an awm ngai hauh lo, Bridget, Rafe nen ka hmuh hmasak ber che u khan ka țhianpa hian hmangaih a tawng ve ta a ni tih ka hriatthiam pui asin.

Rafe-a'n hmangaih a tawn ni tur chu Alessia te nen chuan kan thlir reng a ni zawk mah, Alessia tan anat tur zia ka hria, i tan anat ang bawk hian, a pawimawh ta ber chu Rafe-a'n a hmangaih che tih hi a ni."

Logan chuan hrehawm tih hmel zet chuan min en a, "Tichuan kei hian ka tum ni miah lo in ka lo hmangaih hle si che a, hrehawm ka ti khawp mai," pawi a tih zia chu a hmelah alang.

"Ka sawi tawh kha Logan, hmangaihnaah hian duh kan thlang thei lo, a lo thleng chawpchilh tawp mai țhin."

"Thil zawng zawng hi siam țhat theih ni se zawng, Bridget i tan hian engkim ka siamțha vek ngei ang, Rafe bula i awm theihna tur pawh ni se," a ti tak tak duh ngei ang atih theih chu ni se.

"Bridget, i thuthlukna hi ngaihtuah nawn ang che," Rose chuan min ngaihtuah tih hriat zet chuan min en hu a.

Logan nen rei lo te hnuah kan haw tlangin, kan in thleng min rawn thlah a nih kha.

"Rose ka chiang alawm, khawngaihin ka duh dan hi min pawmpui ngei tur a ni ang, ka nunah hian keimah ngeiin thuthlukna ka siam ve thei lo em ni?"

"I thei alawm nangmah ngeiin i siam tur a ni, mahse i inchhir hi kan hlauh ber chu a ni," Jace chuan chiang zet chuan a rawn ti bawk a.

"Reilo te hnuah inneihna chu a awm ang," Jace leh Rose te chu ka melh tawn sek a.

An hmelah chuan hlimna emaw lungaihna pawh ni se, a engzawk mah chu ka hmu lo reng reng, a țha ber tur chu an hrethiam bik lo niin alang.

"Tunah chuan Rafe ka biak angai," inchunglam chu ka pan ding nghal a.

Ni e, ka thuthluknaah hian ka chiang a ni, Rafe ka hmangaih em avangin mi â ang maiin ka lo awm tawh țhin a, ka tawn ve chu natna chauh a ni, ani pawh a nâ ang tih ka hria, mahse ka mihring mihrinna hian mi pasal em chu chhuhsak tur chuan ka ngam hlawl lo.

"Hello Rafe."

"Bridget," a aw chu a thinrim hle tih ka hria, thudang sawi atum chu a ngawi ta zawk a.

"Rafe ka hmu duh che a ni."

"Ka lo kal nghal ang, thutam tak sawi tur ka nei," phone chu a dah nghal hmak a, ka chungah a thinrim zia chu ka hai lo.

Rei lo teah chuan a rawn thleng nghal a.

"Kan kal thei angem?" nelawm loh zet chuan a ti bul hmuk a, a thinrim zia pawh ka hrethei.

Thla thum aia tam mah ka hmuh tawh loh, Rafe ngei mai ka hmu leh chu engtin amaw hian ka na ngawih ngawih a, a suit hak nalh zet leh a rimpa tak chu ka hriat hmaih ngai hauh lo.

A hmel dur khap pa tak mai, a pumraw lian zet leh engkim ti thei hmel pu chu ka hmaah chuan a ding ran a, ka thinlung neitu a ni tih ka hre bawk.

Rose-i leh Jace-a te chuan engmah sawi lo vin kan chetla chu an lo en reng a, inrawlh ve na chi ah an ngai lo a ni ngei ang.

"Khawiah chuan nge min kalpui itum?" Ka bula a din avang pawh chu a ni mahna ka zam hle a.

"Heta sawi chu i duh ka ring chiah lo, Hyde Park lama kal turin ruahmanna ka lo siam fel tawh," ngei hmel zet chuan min melh run a.

Hyde Park, hmun zau leh nuam tak a ni, London-ah chuan a lian ber pawl a ni bawk a, thingkung ringawt pawh sangli chuang awmin, dil nalh tak te pawh a awm anih kha.

"A rem lohna a awm hleinem," ka melh chho va a, ka chhuak zui nghal a, min lo zui ve tih pawh ka hria.

Hyde Park, hmun nuam zet kan thlen chuan Rafe chuan a tih dan pangaiin ka chhuahna tur kawngka chu a lo hawng leh nghal a.

Dil nalh zet tle sar bulah chuan kan țhu ran a, sawi tur neih loh vang ni lo in, sawi tur kan ngah em avanga sawi tur ber hre lo chuan kan țhu ngawi deuh vang vang a.

"Bridget, thlathum teh meuh min hmu lo a i awm thei hi mak ka ti," a thinrim zia chu hmuh hmaih chi rual a ni lo.

"Rafe hmu tur chein ka la inpeih tawk loh vang a ni," ka zam zia chu ka hria.

"Ka ngai tawh tak zet che a sin, i hmel hmuh beiseiin vawi engzat nge ka lo kal? Mi â ang maiin nang hian min siam a ni," a hmel chu a nelawm loh zual hle a.

"Rafe thu pawimawh tak sawipui che ka duh a ni," engtin nge ka sawi ang, ka ngaihzia leh thlakhlelh zia hi sawi mai ka va duh em.

"I laka ka thinrimna chu nakinah ka la rul ang che," min rawn kuah a, min rawn fawp zauh bawk a, ka beng bulah chuan a rawn thaw lum ham ham bawk.

"Bridget, ka ngai lutuk che, i tel lo hian ka awm thei lo a ni," a aw thutak zet chu palzam mai a har hle.

Ka thlakhlelh zia hrilh a, ka hmangaih zia hrilh chu ka chak ber a ni, ka insum theihna zawng zawng chu ka sawm khawm angai tak zet.

A engkim mai chuan ka lung a ti awi hliah hliah mai si a, a chetzia leh aw thleng pawh hian ka thinglung a fan em em bawk, ka thinlung chhungril ber hi min hmuh saktu awm ve se ka ti ngawih ngawih.

"Rafe, i hriat kha nangmah ang tho hian ka ngai chein, ka hmangaih che. Mahse, Rafe kan inhmangaih avang ringawt hian kan awmdun ngei ngei tur tihna a ni kher lo.

Kan inhmangaihna chu kan thinlungah hian a awm reng zawk tur a ni dawn lo'm ni? Chu chu a ni lo'm ni hmangaihna dik chu," dil tle sar leh ni herliam țep sen phut chuan ka natna an tizualin, țah hawm hawm chu ka va chak em!

"Bridget, kei chuan inhmangaih te chu an awmdun turah ka ngai a, chu chu hmangaihna dik ka ti zawk asin," chiang zet chuan min en a.

"Rafe, kan awmdun thei alawm, mahse chumi ni ațang ngei chuan ka thinlungah hian Marcus pawi sawi lo leh Alessia engtik lai pawh a i tana a nun hmang a, lo nghak reng țhin tute lakah hian ka inthiam thei ngai tawh lo vang, kei ai hian an mamawhna che a nasa zawk si a."

A hmel chu inthlak vekin, sawifiah thiam rual loh hmel danglam chu a pu a, ni tla tur sen eng phut chu a thlir reng bawk, a ka chu a chip hmak thung.

"Rafe thuthlukna ka siam tawh a ni, chu chu tumahin an ti danglam thei hauh lo vang, nangmah ngei pawh hian," ka mittui chu ka hru zeuh a, ka bing mup mup tih ka hria.

"Logan-a nen hian kan innei dawn a ni, a rei tawh lovang, tun hi kan pahnih chauh a kan inhmuh tawpna tur a ni bawk ang." Ka țah aw țuau a, ka insum em avang chuan ka khur dar dar a, dil a zuan thlak mai chu ka chak bawk.

"Chu thu chu ka tan a mak vak lo e, Logan-an a hmangaih zia che ka hria alawm, mahse hetiang thuthlukna i siam hi ka lo beisei hauh lo," min en chian em avang leh a hmel mak tak avang chuan ka zam hle a.

A kun ngar a, sawitur dang a nei tawh lo ni berin ka hria, keipawh chu țawng chhuah duh hle mah ila, ka thei bik hauh lo, a hnuk a ulh tih chu ka hrethiam.

Rafe-a, mi zawng zawng thuhnuai țhin, a huna chapo tak leh induh thiam tak, engkim thei ni a ka lo ngaih țhin chutianga ka hmu chu ka thinlung hi a puak darh a ni ber.

"Rafe, he thil zawng zawng te hi atirah khan min lo hrilh ni la chu hetiang hi athleng hauh lo tur."

"Ka hmangaih em che a, ka hmangaihna che hi tuma'n an dal lo bawk ang, Alessia nen pawh inremsiamna nei kan ni a, ka tan a pawina ka hre hauh lo," a ti thum dut a.

"Alessia chu a kal ta a, a damchhungin a thinlungah erawh i awm reng ang, ana ngawih ngawih dawn si a. Mahse, kei hian Alessia chu a kal ka phal hauh lo Rafe," ka insumtheihna zawng zawng chu hlohin ka țap lo thei lo a ni.

Ka na a ni, ka nat zia hi khawvel mihring intung chho zing ah hian sawifiah thiam an awm kher lo ang. Mahse, Alessia in kum tam lo nghakin a nun chu a pasal tan a hlan a, Marcus paw'n nu leh pa dik tak a mamawh si a, fahrah hrehawm zia hi ka hre chiang tawh tlat.

"Bridget, thuthlukna hi nangma siam a ni, chhel tak a awm tur i ni lo em ni, keimah vanga i țah hi ka duh hauh lo, i tuar nasa tawh mah mah, keimah vangin damdawi inah hial i awm a, rilru lam Doctor hial i pan țhin tih ka hria," rawn hawi chhuakin ka kut chu a rawn vuan a.

Min khawngaih em avang leh amah avang a, ka tawrhna te chu tawp tawh se a ti ve ngawih ngawih tih ka hria, ka thuthlukna chuan engmah hian a sawh sawn dawn lo tih a hre chiang hle bawk.

"Rafe, nang chuan i nunhluiah nupui neiin fapa i nei tawh a, thildang zawk te lo ni se zawng a ziaawm tur," naupang ang mai chuan ka țap a ni ber, pawi tihna erawh ka nei lo, ka natna zawng zawng hi inbunruah vek ka duh a ni, he hun hi ka tawng leh tawh dawn si lo a.

"Bridget, țap tawh lo teh, nataka i awm lai hi hmuh harsa ka ti a ni" ka banah chuan vuanin min din pui a, sawi tur reng hre lo chuan kan ding dun reng a, kan ngaihtuahna erawh a thuk hle ang.

Chu dil nalh zet chu engtianga thuk nge ni ang? Heng thingkung nalh tak tak te hian ka nun hrehawmna chu an chhawk zangkhai si lo, ni eng sen phut chu a tla țep tawh a ni, rei lo teah khua athim zui mai dawn bawk.

Rafe chuan a insumtheihna te chu a hloh a ni ang min kuah vawng vawng a, engmah a sawi hauh lo thung, ka hmuiah chuan fawpin, a mit erawh a chhing bik hauh lo.

Min fawp chung chuan min en reng a, a lungngaihna nasa tak chu ka hmu thiam a ni, Rafe-a na hmel ka hmuh hian ka na ve nghal ngawih ngawih țhin si a.

A mi fawhna chu tawrh har tak ava ni si em! Ka taksa peng tin te chuan an hre em em mai si.

"Bridget, a tawp nan hei hi min hrilh teh, ka mitah hian chiang takin min en bawk la, Logan neih i tumna chu i ngaihtuah nawn leh thei angem?" zawi te chuan sawi mahse ka hre chiang em em thung.

Hnuailam chu ka en a, ka khabeah chuan min rawn kuai dak a, amah en tur chuan min duh a ni, khua chu a thim țep tawh tih ka hria, ka chhanna nghak chuan min en chiang em em a.

"Rafe, a pawi ka ti engtikahmah thlak danglam ka tum lo," ka mittui chuan a rawn zawm leh lo thei si lo...

A kut chu la thlain hmalam en chuan a ding ngil nghal daih bawk a, a kut chu a kuangkuah zui nghal a. Kei erawh meng reng siin engmah ka hmu lo thung, ngaihtuah ber pawh nei lo in ka ding mawl tawp a, ka thinglung chhung hi a keh sawm vek a ni ber...

To be cont.

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » November 12th, 2017, 2:06 pm

LAST KISS 17
Chapter-17



"Rafe," a ban chu ka vuan a.

"Rafe ka hmangaih che, ka hmangaih reng ang che."

"Min hmangaih nila hetiang hrehawmna zawng zawng hi ka pumpelh ngei ang," ka lam chu a rawn hawi nghal a.

"Rafe i hrethiam lo a ni, engtik niah emaw chuan ila hrethiam ngei ang," tunah hian ka zak dawn lo, Rafe-a nen kan pahnih chauha kan awmdun theihna hnuhnung ber a ni dawn tih ka hria.

A biangah chuan ka chul a, mitkhap miah lo chuan min en reng bawk a, la hmu ngai miah lo ang takin a sam te chu ka chul bawk a, ka mittui erawh dan ka tum hauh lo.

Ka pawm vawng vawng a, Rafe pawh chu ațawng thei bik lo tih ka hria, tun ang renga natna hi ka la tawng lo ang, ka kuahna chu thlahin chiang zet chuan ka en a.

"Rafe, he thil hi atawp nan ka hriat reng atan ka duh a ni," ka fawp zui nghal a, ka khur hlak hlak a, Rafe chuan engmah asawi lo, min fawp let ve lo bawk, a ding mawl tawp zawk.

Ka fawhna chu harsa ti tak chuan ka thlah ta a, "Rafe ka thinlungah i awm reng ang."

'Kha kha itan leh ka tana LAST KISS a ni tawh ang' ka rilru chuan ka ti neuh neuh a. Khua chu a thim țan der tawh a, Rafe-a hmel erawh ka hmu chiang hle thung.

"Bridget, engpawh tila i thuthlukna chu ka pawmpui zel ang che, ka hmangaihna duhber hi ka kawng ka dal lo vang," ka darah chuan a vuan a.

"Bridget, Rafe-a nen in awm tih ka hre lo a ni ka tihpalh tak zet," Logan chu alo ding reng tawh zawk a.

"Logan, nang maw? Engtin nge hetah..."

"Ka lo kal a, tumah in awm si lo a, tichuan helai hmun hi i pan ngei ringin ka lo kal ta a ni," inthiam loh hmel tak chuan Rafe chu a melh nghal a.

Chechang lo in Rafe chu a ding reng tih ka hria, Logan-a chu a melh ve bawk a.

"Rafe, engtin nge ka sawi ang, Bridget-i ka hmangaih tih chu sawi nawn kher ngai lo in i hriat kha. Mahse Rafe, in pahniha in awmdun tluka duh ka nei lo asin," Logan chu a thutak hle a, kan pahnih a awm dun chu a duhdan ngei a ni tih pawh ka hria.

"Logan, heng thil te avang hian kan ințhian țhatna leh unauna hi hloh ka duh hauh lo tih i hriat ka ring," Rafe chuan a ti ve bawk a, a sana chu a bih zauh a.

Rafe chuan muangchangin Logan lam pan in Logan-a hmaah tak chuan a ding a.

"Logan, thihhnu piah lam ramah chuan Bridget-i hi ka nei ngei ang, chutih hunah chuan min thik hauh suh ang che," Logan-a darah chuan a beng thek a, rawn hawi let tawh miah lo chuan muangchangin a kal zui nghal a.

Logan-a chuan a khawngaih hle tih a hriat, chhân nachang pawh hre lo in a ding ngai chuan ading ngawi reng a, Rafe kal ta pawh chu a en zui hauh lo.

Rafe-a thuhnuhnung ber chuan ka thinlung chu vawi tam tak vit nawnin ka awm hmunah chuan ka ding ngil thei lo, chakna reng nei lo chuan ka tlu sawp nghal a. Țah ka duh, mahse ka aw te chu an chhuak thei si lo.

"Bridget, tunah hian Rafe-a chu i dang thei a ni, i ti lo anih chuan kei hian ka phal sak leh tawh ngai lovang che," Logan chu che miah lo in a rawn țawng chhuak a.

Chhan erawh ka tum hauh lo thung, bakah ka țawng thei lo hrim hrim.

Rafe-a Car ri chu ka hria, ari hriat phak loh a atlan hnu thleng chuan ka awm pangai in ka awm reng a, Logan pawh chu a awm ngaiin a awm ve reng bawk.

Ka țawng chhuak thei lo, ka mittui erawh hruk sen a ni lovang, boruak vawt lam mah tawh chuan min rawn chhem a, midang awm ve pawh an awm tawh lo tih ka hria.

Logan chuan min tihbuai tum lo takin zawi muangin ka bulah a ding ngawi reng a.

"Bridget insûm miah lo in i duh dan takin awm rawh, hetiang em ema i na hmel hi ka hmu leh duh tawh dawn hauh lo thung."

Logan-a thu sawi te chu hla tak ațanga ri ang maiin ka hria a, ka bul vela țiau vut chu țhamin ka hmer ngawt ngawt a, van lam ka en chuan Arsi te chu an lo awm tawh tih ka hre chauh.

Ka țhingțhi a, ka theihtawpa ring chuan ka țap ta chiam a, ka kut te chuan awm ngaihna an hre lo, ka sam te chu ka țham tawn tawn a, leiah chuan ka bawk khup hial a.

Logan-a chuan hrehawm ti takin min en reng ang tih ka hria, a țap ve lo anih chuan mipa anih vang chauh a ni ngei ang, Rafe-a ațhian țha ber chu a ngaihtuah hle awm si a.

Ka aw rawl te chu a chhuak thei tawh lo zawk a, ngawi reng chuan ka mu a, ka mittui erawh a hul thei lo, ka piah chiah a dil chu alang dum tle sep sep a, engkim chu reh țhuapin khawvelah hian tumah an awm ve lo a ni ber, keimah chauhin ka awm a ni, ka khawvel chu a tawp ni ber hian ka hria, dam reng chung siin ka thi a ni.

"Bridget, Bridget," chu aw chuan min ti harh a, Logan-a ngei a ni, mahse kan awmna chu a dang daih si.

Ka hawi kual a, a hmaa Hospital ka awmna ngeiah khan ka awm tih ka hria.

"Logan kei hetah maw?" zawi sap chuan ka ti a.

"Bridget, min ti hlauhthawng reng mai dawn em ni?" Ka chalah chuan a rawn chul nghal a.

Jace-a leh Rose-i te hmanhmawh taka lo tlan lut chu ka hmu zui nghal a.

"Engthil nge thleng ta hi," Jace chuan Logan chu a zawt nghal a.

Rose-i chu ka bulah țhuin, mittui tling pam chuan ka kut chu a rawn vuan bawk a.

Logan-a chuan Jace hnenah chuan ka awmdan a sawi mek tih ka hria.

A hmaa min enkawltu Doctor chu lo kal hnaiin, "I taksa zawh loh natna tuar lo tur chein ka hrilh che kha, hetia i awm zel chuan ațha lo ang."

Jace chuan, "Doctor ka fanu hian a tuar hnem em a ni, khawngaih in enge maw tal ti teh," Jace hmel a hlauhthawnna chu ka hmuhmaih lo.

"A tana harsatna engmah siam suh u," ka lam chu rawn enin, "I tawrhna alo thlen dawnin inven dan lo thiam țhin ang che, chu chu i tana damdawi țha ber a ni," Doctor chuan chiang zet chuan a ti a.

"I lunglam pawh țha lo em chu ala awm lo e, mahse ka sawi tawh ang khan ațhat loh theihna 'chance' tam tak a awm a ni, nangmah i pawimawh ber ka tih kha.

Ka damdawi chawh che hi țha takin ei la, inchhuak leh thei nghal bawk e, hahdam takin awm phawt mai teh," Doctor chuan lehkha chu Jace-a hnenah a pe nghal a.

Tunah chuan ka thlukthlukna ka siam fel tawh a, hetia awm reng tur hi ka ni lo, ka chak a ngai a ni.

Ka room thlengin Rose-i leh Logan-a te chuan min thlah a, ka chauh em avang chuan tumah ka be peih lo.

"Hahdam takin mu rawh, a țul chuan hetah ka lo awm reng ang," Logan chuan min ngaihtuah tih hriat zet chuan min melh a.

"Light kha lo off ta che," ka țawng zawi hle tih pawh ka hria.

Rose-i chuan rang zetin a lo off nghal a, an pahnih chuan inhnuai lam chu an pan zui bawk a.

Ka meng zau thei lo a, mahse Arsi leh Thla lian tak Rafe-a'n ka tana asiam chu ka en lo thei lo, ka mittui chuan a rawn zui leh nghal a.

Hun aliam a, keipawn hma ka sawn tawh hle, Rafe-a ka kalsan ațanga kar ngana chiah a ni ta, naktuk maia pasal nei tur ka nih avang chuan kan buai hle a.

Logan-a nen kan duhdan takin, pui taka inneih erawh kan tum lem lo, a chhungte Italy-ah an awm vek si a, kan inneih hnuah kal ve chu kan tum dan a ni.

Nitinin nuntharin nung țhin mah ila, Rafe-a erawh ka thinlung ațangin a bo ngai hauh lo, atan ka la țap fo zawk țhin.

Engtin tak Rafe chu awm ve ang maw? Ani zawng mahni inthunun thei em em a ni si a, ka tawrh ang em chuan a tuar hauh lo ang tih ka chiang.

Engpawh ti ila, Rafe-a hmel hmu deuh thut tura ka inngaihna paw'n min kian san thei lo, ka hawi kual leh hu hu țhin. Mahse, ka hmu ngai miah lo thung.

Zanah te chuan Arsi leh Thla te chu ka be țhin a, ka tana Rafe-a a siam ngei mai chu, ka țahpui chang pawh ala tam hle a ni.

"Tho vat teh in inneih niah tal te chuan kaihthawh ngai lo tur i ni asin," Rose chuan ka puansin lai chu a rawn phih thla lawp a.

Rang zet chuan ka inperh tho a, a tlai hle tawh si a, ka intihfai hnu chuan Mo kawr var ka pian ti lang chiang zet chu ka ha nghal a.

"Bridget, phelh rih teh, i hmai kha a cheitu ten an chei phawt angai lawm," Rose chu a nui ver ver a.

Puan chu lain, ka hmalam zawng chu tuamin "Tihian a rem tho alawm," Rose chu ka melh zeuh bawk a.

Ka hmai an chei zawh chuan ka sam chu an tikir tih ka hria, nalh ka inti ve hle mai.

"Tunah chuan kan kal a ngai tawh a ni," Jace chu lo lut nghalin ka bulah chuan a lo ding nghal bawk a.

"Ka fanu hi a van hmelțha tak em!" ka chalah chuan fawpin a kut chu min pe a, motor awmna lam chu kan pan nghal a.

Biak inah chuan mi an tam lutuk lo tih ka hria, kan duh ang ngeiin kan sawm zau lo reng a ni. Jace chuan min kai lut a, kan hmaa ding ka pasal tur Logan lam pan chuan muang changin kan kal a, a suit hak chu a inhmeh tak zet tih ka hria.

Logan bulah chuan ka ding ta a, Jace erawh a țhutna tur lam a pan tawh zawk a, Logan chuan min lo nuih seih a.

Ka mitvai chu a ni em lo maw? Dinglam sir tlar hma bera țhu chu Rafe leh a fapa Marcus te an ni, ka nun chhungril boruak chu chawp leh chilhin a inthlak danglam vek a, chu chu Logan-a paw'n min en dan ațang chuan a hrethiam a ni tih ka hai lo.

Rafe nen chuan kan mit chu a intawng fuh hle, ka va'n na si em.

Pastor-in thu min chham tir lai te chuan ka hnuk a ulh țeuh a, pasal nei mek ka ni tichung zelin ka inti paukhauh hram hram bawk.

Inneihna chu kan zo fel ta, pawn lama Logan-a Car awmna lam chu kan pan a, Rafe leh Marcus erawh ka hmu hauh lo, ka mit chu ka len deuh ruai a.

Logan-a in kan thlen chuan kan boruak tawn chu a chauh thlak tak zet si a, ka in bual harh angai tih ka hria, ka intihfai hnu chuan min lo nghak rengtu ka pasal awmna lam room chu ka pan ve nghal a.

Logan chuan min lo nuih ver ver a, ka pasal tluka nui mawi hi an awm lo ang tih ka chiang.

"Bridget, zan lam inneih lawmna hunah hian kan sawm te chu an lo kal țep tawh ang, insiam vat la ka duh a ni," min rawn fawp zeuh a, room ațang chuan a chhuak zui nghal a.

Ka mitthlaah chuan Rafe leh Marcus te chu an awm reng a, kan inneihnaa an lo kal ve chu ka lawm hle bawk, an hmel kha ennawn duh hle mahila ka ennawn ngam tawh si lo anih kha.

Ka kawrfual hak tur Logan-a'n a dah chu ka inbel nghal a, hring duk hlarh niin ka ke rek thleng a ni bawk, make-up erawh tlem te chauh ka hmang tawh thung.

Pawnlama ka chhuah chuan kawt zawl zau zet chu a eng pup a, dawhkan nalh tak tak te chu awm furin, ei tur leh intur te chu a tam hle tih ka hmu, mi țhenkhat te chu an lo kal tawh bawk a.

Logan chuan min hmuin min rawn pawh nghal a, a nupui tih hriat zet chuan a kut chu min pein ka lo chelh ve nghal zat a.

Min kalkual puiin, sumdawnna lam a mi pawimawh tak tak te lo kal chu min hmelhriat tir zel a.

"Logan, engzat vel chiah nge lo kal tur awm le?" Zawi te chuan ka ti su su a.

"An tam vak lo ang, mitam tak i ngaina si lo a, mi sawmnga vel chauh ka sawm," min melh zauh a, a nui vur vur bawk a.

"Logan mi pawimawh zualpui ka hmelhriat zo tawhin ka hria," ka melh nghek a.

Hrethiam tak chuan a nui huah huah a, "Ka nupui hi ka kalna apiangah kaihkawi zel ka tum a nih ber hi, hun thawl pek che ka lo tum miah hleinem, tunah chuan i pa te pawh an lo kal țep tawh ang nuam deuhin le."


"Ka lo let tawh miah lo ang," ti lui zet chuan Logan chu ka kalsan a, min en zui vawng vawng a.

Jace-a leh Rose-i te hlim hmel tak ka hmuh chuan ka lawm hle, an lam pana kal zui nghalin, Rose-i nen chuan kan inkuah chung chung bawk a.

"Ka fanu, hlim reng ang che," Jace chuan ka kutah chuan a rawn vuan ve nghal bawk a.

"Zanin hi i hria em Bridget, ka pa zin lo haw zan a ni asin, kan awm rei thei lovang, kan lo kal zawk chauh a ni, kan let leh nghal a ngai si a, i chanchin ka hrilh vek a, a hlim kher asin. Duhsakna hlan tur chein min chah bawk a." Rose chuan hlim tih hriat tak chuan min en reng a.

"Ni dawn tak Pate John-a kan inneihnaa a tel ve lo hi pawi ka ti hle, mahse remchang hmasa berah kan lo tlawh ngei ang," ka nui vur vur a.

Jace chuan Logan-a te awmna lam chu a pan tih ka hria.

"Bridget, tichuan kei hi kan inah ka awm tawh nghal bawk dawn a ni, Jace-a paw'n a chenna lam pan atum tawh bawk a." Ka kut pahnih chu a vuan a.

"Rose, ka kiangah hian awm lo la, kei hi engtin nge ka awm ang tih ka ngaihtuah țhin, Rose ka ngai thei ngawt ang che, engkim avang hian ka lawm tak zet a ni," ka mittui chu a rawn tla dawn a.

"Bridget, pasal nei i nih tawh hi 'tiang hian awm tawh lo teh, tunah chuan hlim taka awm hi i phu tawh asin," min rawn kuah vawng vawng a, "Ka ngai ngawt ang che a ti sap a."

Ka mittui chu ka hru zeuh a, Rose-i ka tana a hlut zia ka hria, Rose-i ka hmuh chuan Rafe-a ka hrechhuak lo thei lo, pasal neiin nun bul thar ka țan dawn a ni si a, ka nunhlui te chu liam mai tur chuan ka ui a ni mahna, hrehawmna tin reng tawk ni mah ila.

"Bridget kan kal mai angai a ni," Jace chuan kan bul chu a rawn thleng chawpchilh ve nghal a.

"Pawi ka ti Bridget, mahse tunah chuan ngaihtuah awm i ni tawh lo a," Jace chu a țhen sak a.

"Rose, Pate John-a hnenah chuan kan lo tlawh vat ang tih min lo hrilh sak ngei dawn nia," ka kuah leh vawng vawng a.

Jace-a lam chu enin, "Jace i in lama i let leh hi ka rem ti hauh lo, tuna kan chenna hi ka In ni lo in, kan pahnih a kan In a ni, nghaktu nei lo va a awm tur chu ka duh lo a ni," a ngenin ka ngen a nimah zawk.

"Bridget, he hun thinlung taka min pawm ni hi alawm ka lo nghah ni, i thinlungin min pawm tawh bawk a, chen zui kher erawh angai dawn em ni?"

"Pafa chu In khatah an awm loh in pafa an ni thei dawn em ni?" ka nui ver ver a.

Jace chuan a fanu a kuah chak em em, a kuah theih ngai si loh chu min rawn kuah vawng vawng a, hlim avang chuan kan mittui chu atla leh țhin.

Gate thleng ka thlah hnu chuan an tlan liam ta a.

Logan pawh a hlim hle a ni ngei ang, tu tu emaw nen chuan dingin an ti ti reng bawk a, kei erawh ka pheikhawk sang bun avang chuan ka ke a na țhum tawh, chhun lamah ka bun bawk nen, ka thlak ngei angai ang.

Ho lam tak buna ka chhuah leh hnu chuan sana chu ka en zauh a, inneih lawmna party pawh atawp țep tawh tih ka hria, tawp vat vat se ka duh hahdam taka awm ka chak hle tawh si a.

Wine chu ka bana, ka in ve nghal a, midang te awm lohna lam chu panin eng eng emaw ka ngaihtuah neuh neuh a, ka piah chiah a Logan-a leh Rafe-a te țhudun a ti ti mawlh mawlh ka hmuh chuan ka phu kher mai.

Va pawh mai tur nge ni ang, ka hrethiam lo hle ka ding reng ringawt a, tlem a thim lam chu ka pan nghal zat a.

Ka wine in chu kham lo hle mah ila lak belh erawh ka tum miah lo, Rafe-a ka hmachhawn thei lo ang.

Lo kal khawm te chu an haw sup sup tawh a, Logan-a bula dinga thlah ve tur ka nih laiin ka chechang ngam der si lo, boruak reh ruih avang chuan an țin darh vek tawh emaw tiin ka en dek dek a.

"Bridget hetah i lo awm reng a ni maw? I chau tawh hle tih ka hria," Ka pasal chuan min rawn kai nghal a.

Kan piah chiaha Rafe-a ding ka hmuh chuan pen harsa ka ti hle, amah chauhin a lo awm tawh lehnghal.

Rafe-a chu rawn hawi pheiin chiang zet chuan min en a, a danglam tawh hle a hriatna ka nei tlat, chu chuan min tina thar em em bawk.

"In inhmeh tak zet Bridget," a hmel thutak zet ka hmuh leh chuan ka hmangaih Rafe chu ala danglam lo tih ka hria, keimah ka danglam tak avangin danglam turah ka ngai mai chauh a ni.

"Ka lawm e Rafe, i lo kal lai ka lo hre hauh hleinem," anui suk a, ka bul ading Logan-a lam chu a en nghal daih a.

"Logan, Bridget-i hi lo enkawl țha hle ang che, i tina ngai hauh lo ang tih ka hria a ni, khawvel dangah chuan min thik tur a ni lo ang ka tih tawh kha," ka lam chu rawn enin a hmel chu ka en ngam lo a ni.

"Hlim takin awm dun reng ang che u, ka kal ange," a inhera a kal zui nghal a, Logan-a chuan Gate thleng thlah tur chuan a zui bawk a.

Kal ve tur ka ni tih ka hria, mahse ka thei lo Logan-a pawh chuan min hrethiam tak in kal ve turin min ti bik lo, ka dinnaah chuan dingin ka ni deuh belh bulh a, Rafe zunzam chuan min la fan hneh hle tih ka hria.

Gate an thlen chuan Logan-a chuan, "Rafe, khawvel dangah chuan ka thik ngai hauh lovang che, chu chu ka tiam e," an inkuah nghal thuak a, Rafe-a chu aliam zui nghal a.

Logan chuan inchhung lamah min hruai lut nghal bawk a, hlim hram erawh ka tum hle.

Room kan thlen chuan, Logan-a chuan chiang zeta min melhin khumah chuan min țhuttir nghal a.

"Bridget, Rafe-a hi i theihngilh ngai lovang tih ka hria, ka lakah hian inthlahrung miah lo turin ka duh che a ni, i duh hun hunah a chanchin min sawi pui thei bawk ang.

I hmu duh anih pawhin ka hruai zel thei che. Mahse, in hmangaih te inhmu ang ni tawh loin, Bridget kei hian min hmangaih hun ka nghak tih hrereng la ka duh bawk a ni," ka kut chu arawn vuan a.

"Logan ka lawm e, nang ang pasal ka nei che hi ka vannei tak zet a ni, nang hmangaih nan che hian hun ka duh rei lo ang ka tih kha, ka ngaina sa em em che a, i mize zau tak avang leh mi hriatthiamna tak tam avang te hian ka duh che a ni tih pawh ka hria."

"Duh maw?" A meng bial kawk a.

"Ka ngaina che a, ka duh bawk che alawm, rei lo teah ka hmangaih ngei bawk ang che," a nui ver ver a, duhthawh tak chuan min fawp zui nghal a.

Nupa kan ni tawh a, inthiamlohna tel miah lo vin hmangaihna kan chendun thei tih ka hre bawk.

Ka rilruah chuan Rafe-a kal tur thusawi te chu a awm reng a, ka pasalin a sawi te pawh chu ka paih bo tur a ni.

Hmangaihna kan chen țan chauh tihah chuan dik lo awm ang mai hian Logan chu a thu nghal dawt a.

"Dik lo a awm em ni Logan?" Hlauthawng tak chuan ka en reng a.

Mak ti tak a min enin, "Bridget, hei kher hi chu ka lo beisei lo asin," amak ti hmel chu ala inthlak hauh lo.

Ka hrethiam chiah ka nui sak a.

"Logan, rinhlelhna mita min en lai khan Rafe-a zin tur a room a kan awm hnu a lo chhuak hlim hlawl ka nih kha, mahse Rafe-a nen chuan hmangaihna kan la chen dun hauh lo," ka en let reng a.

"Bridget" a hlim hle tih ka hria, min rawn fawp leh nghal mawlh mawlh a.

Rafe-a ka hmangaih ber nen a hmangaihna kan chendun hman lo chu ka pasal hlim hmel tak ka hmuh chuan ka inchhir mawlh lo.

Logan chuan a âwmah min bei tirin, a hlim hle tih ka hria, kan muhil zui ta a.

Pang a dam a, harsatna dangin min tlakbuak lem loh chuan hun hi a lo kal chak khawp mai.

Kan inneih ațang chuan thla kua lai a liam ve ta, Logan chuan min duatin sawiselna tur ka hre ngai lo, ka nat a hlau em em țhin si a, a company lar leh lian takah chuan hna ka thawk vein, nitinin ka pasal nen chuan kal rualin kan haw dun ziah țhin.

Ka pum a naute awm pawh chu thla leh maia hring tur ka nih avang chuan kan hlim hle a, ka thinlungah erawh Rafe chu a bo ngai hauh lo, engtin nge a awm tak zel? Chu chu ka hre chak ber a.

Logan-a khan a chanchin min hrilh hnuhnun ber khan London-a a company chu a unaupain enkawlin, ani erawh Italy-ah a awm leh ta zawk a ti anih kha.

Ka nunhlui chu ka chhui kir țhin a, a changin ka nui a, achangin ka țap bawk țhin, hunawl neih tam ka duh lo hle bawk, Rafe-a ngaihtuah nan ka hmang țhin si a.

Kan awmpui te avang chuan in lam hna erawh ka khawih ngai lo, company lamah erawh ka buai thei hle thung, Rafe-a ka ngaih chang chuan pawn bathlarah țhuin Coffee ka in țhin a.

Ka pasal erawh chuan a zawng zawngin hre lo mahse, atam zawk chu hriain min hriatthiam pui em em bawk țhin.

"Bridget, vawiin chu hna lamah ka kal hmasak angai tlat, Driver i lo inthlah tir mai dawn nia aw," Logan chuan min rawn fawp zauh a, hmanhmawh tak chuan a chhuak nghal a.

Driver-in min thlah dawn chuan kawng veilam chuan ka rilru ala peng tlat, "Vawiin chu helam ațang hian kal teh ang."

Mak ti zet chuan min melh zuk a, min hnial lo chuan a tlan zui ve nghal a, mak ti tur reng pawh a ni, helam kawng ațang hian kan company chu kal theih tho mahse kan kal ngai si lo a.

BRANDROOT company zawn kan thlen chuan, "Ding lawk teh," a ding ve nghal bawk a.

Car ațang chuan ka chhuak a, chu building lian zet chu enin ka ding ta reng a, he hmuna ka interview dawna ka tlai lai te, ka thawh țantirh a Rafe-a nen kan awmdan te, ka rilru chuan a chhui zel a.

Rafe-a nena kan hun hman te chu ka rilru chuan chhuikir zelin, chiang zet chuan ka nunhlui te chu ka hmu a ni. Hehmunah hian Rafe-a erawh a awm ve tawh lo, Italy-ah a awm tawh zawk si a, chu building chu a khawkhar thlak hlein ka hre bawk.

"Ka pi, dik lo a awm em ni? Na i nei a ni lo maw?" Driver Hudson-a lamah chu ka hawi nghal a.

"Nei lo e, kan kal thei tawh e," motor-ah chuan ka lut zui nghal a. Company ka thlen chuan hna reng ka rilruah a awm lo.

"Vawiin lam chu hna i thawk peih vak lo anih hmel, in lamah lo va awm hahdam mai ta che," Logan chuan ka pum lian tawh zet chu arawn chul a.

"Rem i tih chuan ka hnial hran lo," in lama awm chu ka thlang zawk reng a ni, nau nei țep tawh ka ni bawk nen, ka taksa chu enge maw hlekah a kham na țhem țhum țhin si a.

"Ka lo haw ve vat ang, vawiin chu zing ațangin ka thawk nasa bawk sia," ka pum chu a rawn fawp zauh a, "Bawiha ka lo haw vat ang," anui var var a.

Bawiha a ti ziah, fanu pawh ka nei maithei asin ka nui suk a.

"A nih chuan ka kal ange," Logan-a chu ka fawp zauh a, ka kal zui nghal a.

In ka thlen chuan room-ah ka tawm chawt a, ka hun liam hnu chu ka thinlung chuan a kal tir thei lo a ni, Rafe-a chu vawikhat chauh tal pawh ni se hmuh leh ka chak hle si a.

Ka hun liam tawh hnu chu ka nunah bet reng mahse, ka pasal leh ka fa lo piang mai tur avang chuan theih tawp ka chhuah angai tih ka hria, chhungkaw thar ka nei tawh a, an tan ka theihtawp ka chhuah zel bawk ang, ka mittui te chu ka hru leh țhin.

Hun aliam a, ka thinlung ngaihtuahna pawh ka pasal chuan a thlak danglam ve zel, mahse Rafe erawh a bo hlen thei mawlh lo.

"Hmanhmawh ang," Logan-a hlim hmel leh phur hmel tak chuan min pawmin Car-ah chuan min luh pui nghal a, pa a ni ve tawh mai dawn si a.

"Ka fapa i va hmelțha tak em," Logan-a aw chu ka hria a ni.

"Bridget, hei kan fapa," a hlim hmel chu ka en ning thei lo hial zawk, naute chu pawm in a awmah a kuah vawng vawng a, ka bulah chuan arawn muttir bawk a.

Hlimna chhiar sen rual loh chu ka tawng ve ta, ka fapa ka hrin ngei mai chu ka en vawng vawng a, ka mittui chu a tla lo thei lo, Rafe-a awm ve se min hlimpui ve ngawtin ka ring.

"I taksa chak lo tak avang leh thisen i nei tlem lutuk avangin, engmah hre mumal lo in i awm si a," duat takin ka pasal chuan min lo chul nghal a.

"Bridget, ka lawm e aw, ka duhthusam fapa min pek avangin," a hmel thutak zet kara hlimna chu tuma'n an hmuh hmaih hauh lo ang.

"Keipawh ka lawm e Logan, fapa min pe a," ka nuih ver ver a, naute chu saisir zawnga muin ka kuah zui nghal a.

---------------------------------------

"Ding teh Jason," ka fapa pawh kum hnih alo tling ve reng ta, min ti buai thei a nia, a pa ni lo vin keimah min chhun em em thung, naupang harh vang tak leh fing tak a ni bawk.

Kan company-ah chuan hna ka thawk reng a, nau awmtu țha tak lain In lamah nau a lo awm țhin.

"Bridget, in in peih fel tawh em? Darkar hnih hnuah kan chhuak ang," Logan chuan a fapa chu chawi kangin a fawp a.

Ni dawn tak kan inneih hnuah a vawikhat nan, Italy-ah Logan-a chhung te hmu turin ka kal dawn si a.

"Ka'n in siam nghal a nge, Martha Jason hi lo en rawh le."

"Rei lo teah ka lo let nghal ang, ka nupui duhtak," Logan chu a kal nghal a.

Ka insiam mawlh mawlh a, ka kawr ka hai chhuah chu Rafe-a ka hmuh hmasak ber ni a ka hak, kawrfual wine sen duk rawng ang mai kha a ni.

Ka hum vawng vawng a, 'Rafe engtikah nge ka thinlung ațang hian i bo dawn ni?' Ka phun sap a.

Ka chhungkaw tharah chuan ka hlim a, Rafe-a pawh ka theihngilh ve hle tawh ni a ka inhriatna chu alo lang chhuak leh țhin, nunhlui chhui kirin hun liamhnu te chu ngaihtuah lehin, ka mittui ka hru leh țhin si a nih hi.

"Ka pi, ka pi, ka pu a lo haw, accident a tawk a," thlaphang zet chuan Martha chu a lo tlan lut a...

Rang zetin ka tlan chhuak nghal a, Logan-a chal thi hnuang chu ka hmu a, Driver Hudson-a chuan a lo kuah lutin room lam a lo pan pui bawk a.

"Logan," ka thlaphang lutuk chu ka țah aw țuau nghal ringawt.

"Engthil nge thleng hi?" Hudson-a melh chung chuan khumah chuan kan muttir zui nghal a.

"Ka pi, motor pakhat nen an intai alawm le, min khalhtir mai se a ni tur," inthlahrung zet a dingin hnuai lam a melh bawk a.

"A țha e, Martha hnenah khan tuilum leh damdawi la turin lo hrilh rawh," Logan a chal thi chu ka en reng a.

"Logan i țha em?" Min chhang hauh lo, nikhaw hre lo in a awm ta zawk em ni? Ka hlauthawng lutuk chu Logan-a chu ka sawi vak vak a.

"Logan lo meng teh," Logan-a awmdan chu rawn danglam nghalin, thâwk harsa tih hmel zet chuan a awm a, chatthla mai tur a ang mah zawk.

"Ni lo Logan, meng rawh ti hian awm suh," ka țap nghal tawh a ni ber zawk.

"Logan ka hmangaih che, ti hian awm suh," min kuai hniam lawk a, min fawp zui nghal a.

Mak ti tak chuan ka en reng a, "Nang hi."

"Bridget, ka na lo e, ka hria alawm mahse i awmdan ka en duh mai chauh a ni,"a nui ver ver a.

"Tun mai a i thusawi kha han sawi nawn leh teh kei hian ka nghak rei tawh si a." A thu tak hle bawk.

"Sual lutuk," ka țah nuih tawh zawk a, ka chum zawt zawt bawk, "Ka hmangaih che," chiang zet chuan ka en a.

A kut chuan ka biang rawn chulin min fawp leh vawng vawng a, "Ka lawm e Bridget, he hun ka nghahhlelh zia hi i hrethiam phak ngai lo ang."

"Khatia tihder kha angai kher hleinem, tunah chuan kan kal a hun tawh lutuk tlat."

Martha-i rawn lak tuilum chuan ka dep a ahliam chu ka tuamsak zui nghal bawk.

Khum ațang chuan min pawm tho lawp a, pawnlamah chuan min chhuah pui a.

"Logan a zahthlak ania, min dah thla teh," awmpui pa li lai kan nei si a, min hmuh hlau tak chuan ka kun tlat bawk a.

"Tu chu nge i zah le," min fawp zauh a, min dahthla zui nghalin, Jason-a chu pawmin Air port lam kan pan zui nghal a.

"Italy ka ti sap a," thlawhnaah khan kan chuang rei bawk em a ni, Logan chuan a fapa pawmin kei min kai bawk a.

In lian zet Logan-a te in ngeiah chuan kan lut ta.

Thlalak a ka lo hmuh fo tawh, hmeichhe chhe lo zet chu a rawn tlan phei nghal a, a hnungah chuan Logan nu leh pa te tih hriat ngawih ngawih chu phur takin an lo tlan bawk a.

"Logan" a unaupa chu a kuah chung chung a, kan lam rawn hawiin Jason chu lak sak a, a fawp mawlh mawlh bawk.

"Hei hi ka farnu Callie anih hi," an hmelah chuan in anna tam tak a awm.

"Ka hmu chak lutuk tawh che Bridget, ka rin ang ngeiin i hmelțha kher mai," Callie-i chu a nui var var a.

"Bawiha keini lam hi," a nu ni awm tak chuan a lo ti ve mek a.

"Hei hi ka nu Camilla a nih hi, chuan hei hi ka pa William a ni bawk." hlim hmel tak chuan a ti a.

"Kan hmu che chu kan lawm kher mai," William chuan min rawn kuah zui nghal a.

"Bridget, ka tana hun hlimawm ber a ni asin," Camilla-i hlimzia chu a hmuh theih, ngaina tih hriat takin min rawn kuah ve bawk a.

"Kei pawh ka lawm tak zet a ni, hmuh che u ka chakna a rei tawh hle si a," ka nui var var a.

Ka fapa Jason-a chu ka chang ve hman lo zawk, an pawt phar reng a ni ber, ka chauh em avang chuan ka inbual harh a, Jason erawh Callie-in a tifai thung.

Zanriah kan kil lai chuan, "Logan, sumdawnna lam chu nakina sawiah dah ila, naktuk zan hian party buatsaih kan tum a ni, in lo kal si a he hun hi kan tawng khat leh tawh dawn em a ni," a pa chuan hlimhmel pu sang hian a ti a.

Logan-a chhung te chu an nelawmin, min ngaihtuah tak zet Logan-a ang mai a nelawm leh rilru zau tak anni ngei ang tih ka hria.

"Ka phur tawh tak zet, Rafe pawh alo kal ngei ang, i ngai țhin viau lo maw? A tel lo khan i awm thei lo țhin si a, kan naupan lai zawng khan," a unaupa Logan-a melh ralh chuan Callie-i chuan a ti a.

Ka țhuthmunah chuan ka phu zuk a, Logan chuan min lo melh bawk, a hrethiam hle tih alang, naktuk zanah chuan Rafe chu a lo kal ve ngei ang le.

Zanriah kan kil lai chuan an chhungkaw chanchin te chu Camilla chuan hlim zetin min hrilh bawk a, Jason-a pawh a pu bulah țhuin a hlim ve hle, kan nui leh dual dual țhin.

"Party chu țan a ni țep tawh Bridget, ka lal fapa nen hian lo chhuk vat ula ka duh, kei erawh khualchhawn ka ngai si a," ka hmuiah chuan rawn fawp zeuhin a chhuak nghal a.

"Mommy hetah hian kan awm rei dawn em?" Ka fapa țawng la fiah lutuk lo chuan min en deuh ha chung chuan min zawt a.

"Bawiha, helai hmun hi nuam iti lo em ni?" A lu chu ka chul heuh heuh bawk a.

"Ti lo, London-a kan Inah khan ka awm duh zawk," lungnih loh hmel zet chuan min en chho van a.

"Bawihte, api leh apu te in alawm an duat hle si che a, kan haw vat dawn nia aw, tunah chuan i kawr hi thlak phawt ang le," a kawr chu ka thlak nghal mawlh mawlh a.

Kei pawh chu ka nalh ve hle, min hmu duh tam tak an awm dawn si a, ka nalh angai a ni.

"Bawihte, chhuak ang aw, fel taka awm tur anih kha, apa tihbuai loh tur aw zanin hian a buai hle dawn si a."

Ka fawp zauh a, "Ka hmangaih che."

"Kei paw'n ka hmangaih che, mahse a pa chu ka ti buai vat thei ang tiraw."

"Tehreng mai, i ti buai vat thei dawn alawm," ka nui hak a, kan chhuak zui nghal a.

Lo kal khawm te chu an tam hle tih ka hria, Jason-a chu hmuin Callie chuan a rawn pawm nghal vat a.

"I van hmelțha tak em, tunah chuan anu leh apa tihbuai loh tur, kan pahnihin i duh duh kan ti thei ang," a kalpui zui nghal a.

"Hello, Mrs Seymour a rei ta hle mai, ka hmu leh thei che chu ka lawm tak zet," ka hmaa ding Rafe ka hmuh chuan ka chawmawlh vek a ni ber.

"Rafe," ka en reng a, a hmelpa zet te, a pumraw lian tak te, mahni inthunun thei tak leh induh thiam tak hmel chu ala pu reng a.

"Rafe, ka hmu che chu ka va lawm em," ka kut chu phar chhuakin kan inchibai zui nghal a.

"Bridget, i hlim tih ka hria a ni, i fapa paw'n a chhun chein a duhawm tak zet, Logan-a nen pawh kan lo inkawm zo chiah a," min en run a, a thu tak hle bawk.

"Rafe, chuan nang engtin zel," ka hriat chak ber chu ka zawt ta phawng a, a mi hipna nghah zet chu ka la hre thei hial, ka thinlunga awm reng țhin Rafe chu ka hmaah ading si a, hun rei tak ațanga ka hmuh chak ber ni bawk chu.

A hnunga rawn kal phei chu Alessia a ni, ka meng phawk hle a.

Rafe chu a nui suk a, "I hmuh ang hian a ni mai," biak tur pawimawh tak ka nei si a, a kal zui nghal a.

"Bridget ka hmu leh che hi ka lawm zia i hrethiam phak lo ang," Alessia chuan min rawn kuah a, a hmel chu ahma aiin alo țha fe tawh zawk, cherlam ni țhin kha a lo thau deuh tawh a, a pian mil zet kawr a hak chuan a ti lang nalh hle, rilru hrehawm tak hnuah hlimni a tawng ve ta tih chu a hriat.

"Chuan nangni hi..." mak ti zet chuan ka ti bah nuai a.

Ka banah chuan kaiin pawn lamah chuan min chhuah pui a, pawn boruak chu a nuam kher mai.

"Bridget, Rafe hian a theihnghilh ngai lo che, hun rei tak chhung kha chu zu a in leh asin, nangmah avangin a tawrhzia ka hmu khan ka na em em țhin.

Rafe-a mahni inthunun thei tak leh mipa tak chu hmeichhe pakhat avang in mi â ang mai in a khawsa țhin asin, a fapa phei chu awm lo se adam chhuak lo hial ang.

Marcus-an a pa a lam reng țhin a.

A pa bula a awm lahin kei min lam țhin bawk si, Marcus chuan awmna tur lam a hre lo a ni ber, a rilru chhungrila hrehawm tam tak a tawrh te chu sawi chhuak thiam lo mahse na tak a tuar a ni tih chu Rafe paw'n a hrethiam ta a.

Tichuan thla lehah hian kan innei țha dawn a ni, Bridget heng te hi nangmah vang ka ti lo thei lo," a mittui chu a hru nghal a, a hmel hlim tak ka hmuh chuan ka thinlung chu sawi fiah thiam rual loh hian a hlim a ni.

"Alessia, heng thu hi ka hriat ka lo ring ngai lo asin, tunah chuan ka va hlim em, khawvela ka thu hriat azawnga mawi ber a ni ang," ka mittui chu ka hru ve bawk a, ka awih lo hial zawk.

"Hmeichhe pahnih te chu engvanga țap nge maw in nih le," Rafe chuan kan lam chu a rawn pan a.

"Rafe nen hian thu sawi duh tam tak inneih ka ring," Alessia chuan min rawn kuah zauhin, a inthiarfihlim nghal a.

"Rafe heng thil te hi..." ka lawm em avang chuan ka mittui chu ka hru leh rih a.

"Bridget, ka thinlungah hian nang ka hmangaihna che hi a bo ngai lovang, mahse tunah chuan kei pawn nun thar ka țan dawn mek a ni, Alessia ka tan a awm reng țhin ka fapa nu ni bawk nen chuan nun thar țan turin hma ka la mek a ni."

"Rafe, ka va lawm em, Rafe ka lawm lutuk," ka kuah lo thei lo, mahse ka kuahdan ki erawh adang tawh thung.

"I sawi ang ngei khan, inhmangaih te hi an awmdun kher lo țhin, khawi hmunah pawh awmin engthil pawh ti ila, kan thinlungah erawh a thi ngai lo ang, chutiang chiah chuan nang pawh i awm reng ang," a nui suk a, ka biangah chuan a rawn fawp zauh bawk.

"Thu pawimawh tak insawi anih hmel," Logan chuan hlim zetin min rawn pawh a.

"Logan heng baka thu lawmawm hi a awm ngai lovang, mahse nakinah ka hrilh zawk ang che," ka lo ti let var a.

Rafe-a hmel chu inthlak danglamin, a thutak hle a, a hmel landan chu aruh țul bawk.

"Logan, i la theihnghilh loh ka beisei, thu i tiam tawh kha," Rafe chuan a ti nghet charh a.

"Rafe, ka theihngilh ngai hauh lo ang, ka dam chhungin, khawvel dangah chuan inhmangaih te pahnih hi hlim takin an awm tawh ngei ang," Rafe chu chiang zet chuan a melh bawk a.

"Ka lo zawm leh ang che u, kei ber ka bo athiang lo," Rafe chu a kuah zauh a, a kal zui nghal a.

Rafe nen chuan kan ding dun reng a, kan boruak chu a mak danglam riau.

"Bridget, nikhat te pawh nang ngaihtuah lo che hian ka awm ngai hauh lo," min en leh run a, thinrimna erawh alang tawh lo thung.

"Rafe kei paw'n ka theihnghilh ngai hauh lo che, ka nunah hian i bet reng tawh dawn si a."

"Marcus hian nu leh pa diktak a mamawh zia ka hria. Tin, i duhdan ngei niin ka hre bawk," a kut chu kuangkuahin a ding zuah a.

Alessia lo kalna lamah chuan, Rafe chuan akut chu a phar chhuak a, hlim tak chuan Alessia chuan a lo ban nghal a.

"Bridget kan in hmu leh dawn nia, Marcus-an min lo nghak reng si a," Alessia chuan a rawn ti nghal a.

Rafe chuan min en reng bawk, "Bridget chu ni chu ka lo nghak reng ang, khawvel danga kan chuan kai hun tur chu," min en chiang hle a, Alessia pawh chuan lungngaih hmel takin a pasal chu a en bawk, an kal zui nghal a.

Mittui nen chuan ka ding reng a, ka thuthlukna siam te, na taka ka awmlai paw'n ka kawng tur diktak zawhin ka kal hram hram a, ka thuthluknaah khan ka inchhir ngai lo anih kha.

Tunah ngat phei chuan ka in chhir lo lehzual, Rafe chu ka hmangaih a, ka hmangaih hmasa ber niin, chu chu tuman an thlak danglam thei lo, mahse tunah chuan ka tum em avang in ka pasal chu ka hmangaih hle tawh tih ka hre bawk.

Rafe-a ka theihngilh theih loh avang chuan ka pasal chu ka hmangaih lo tihna a ni lo a, Rafe chu ka nunhlui ka theihnghilh ngai tawh loh turah a awm a, ka pasal erawh ka hun tawn meka ka hmangaih a ni thung.

Marcus-a hmel chu ka mitthlaah a lo lang nghal a, nu leh pa dik tak a nei kir leh ta.

Rafe-a chu ka dam ve chhung chuan ka theihnghilh tawh lo ang, nunhlui chhuikir chang tam tak awmin, ngaih ni pawh neiin vawi tam ka mittui ala tla leh țhin ang tih ka hria.

Ka ngaihtuahna ațang chuan harh chhuakin, ka mittui chu ka hru nghal a.

'Rafe, hlim reng ang che, keimah vang tal paw'n, i tih tur dik tak i ti a ni, ka theihngilh ngai lo vang che, nangpaw'n min theihngilh theih loh ang bawkin,' ka hriat tawk lek chuan ka ti a.

Engtik niah emaw chuan kan la intawng leh ngei ang.

Ka pasal awm na lam chu hlim takin ka pan ta a...



****************THE END****************



NOTE- Chhiartu duhtak, kei Bridget-i ka hringnun thawnthu i lo chhiar avang hian thinlung takin lawmthu ka sawi e.

Damchhan nei tawh lo a ka inngaih lai te, thih ka chak ngawih ngawih lai te, ka tan chuan khawvelah hian beisei tur nei tawh lo ang a ka ngaih lai te, ka hmangaih ber kalsan ka ngaih laia ka natna kha khawvel mihring țawng hian a sawifiah thiam lo ang.

Mahse ka tana ni thar leh hunthar chuan min lo nghak reng a, chu ni chu ka lo thlengin ka chhungkaw tharah chuan ka hlim hle a ni.

Tunlai khawvelah hian chhungkaw keh chhia avanga fahrah tamtak an awmin, nupui pasal nei reng chung si a hmangaih dang neih vang hi a tam zawk chhungkaw kehchhiatna bul a ni ngei ang le.

Beiseina nei tawh lo leh beidawnga i awm lai khan ni thar duhawm tak i tana awm a ni tih hrereng la, chu ni chu hmu thei lo mah la harsa tak chung leh pachang takin kal hram hram ang che.

A tawpah malsawmna leh hlimna i tawng ngei ang, mi chhungkaw tikeh chhetu leh naupang pawisawi lo fahrah a siamtu ni lo in, an nupui damchhunga chawrchhuak leh thei tawh lo tur khawpa natna thlen saktu ni lo hram ang che, i tawrhna chu na hle mahse huaisen takin awm tawp mai rawh.

Hei hi ka sawi leh duh bawk: khawvela changkang zel a, inneih hmaa hmangaihna chen te hi kan la thutak tawh lo hle. Mahse, pasal i la nei ve ngei ang, i pasal tana hlu ber a ni tih hriain inveng tlat turin ka chah duh bawk che.

Rafe-a chu a hlim zel ang, keipawh ka hlim zel ang, kan thinlungah erawh kan intheihngilh ngai hauh dawn lo, khawvel dang ala awm te anih ngai chuan tuma thik rual loh in kan awmdun tawh ngei ang...

KA LAWM E.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)