True Love. (Competition)

[LP Khiangte 11]

TRUE LOVE

Ziaktu: Lallianpuia Khiangte.
*************************

"Rick, hmeichhia te hi ngaihsak ve deuh la, duhtu hmu lo pawh i ni lova diktaka sawi chuan hmeichhe tam takin i ngaihzawng nih chak in an zar buai luai luai zawk che ania, hetia nula reng reng i ngaihtuah tlat lo mai hi i mak ka ti." Ka best friend Ruattea'n a tih mawlh mawlh pawh chu ngaihsak lem lovin ka games khelh lai chu ka khelh zawm miah miah a.

Kei hi Ricky Lalhlimpuia Aizawl mi hausa an sawi apianga hming lang ve ziah Pu.Lalramhluna fapa neih chhun ka ni. Ka pa hian sumdawnna a enkawl avangin in lamah min uap lum lo hle a, ka nu leh kan awmpui nula nen hian kan awm deuh chawt a ni ber mai. Keimah ka in fakna ni lo se, ka pa hausakna avang hian ka chapo ngai lova, ka in chhuan phah ngai hek lo. Duh ni ila chuan ka pa pawisa hian ka duh leh mamawh apiang chu ka nei ve thei ngei ang tih ka chiang. Mahse college ka zir chhuah thleng khan ka nu leh pa te hian ka mamawh chin bak min pe ngai lova ka dil ngai hek lo.

Ni e, tunah hi chuan bike pakhat chu ka nei ve ngei alawm; mahse, hei pawh hi keima thawhchhuah nitina office a hnathawka ka hlawh chhuah atanga ka lei ve ngei ania, duat pawh ka duat viau reng a ni. Kan veng chhungah hian mi hriat hlawh leh zah kai chhungkua ni mahila chapo nana hman erawh ka duh ngai hauh lo.

Ruattea thusawi zawng zawng pawh hi a dik vek. Min duhtu leh min beisei tu hi chu tamtak ka tawng ve nual a, chung zingah pawh tlangval dangte star rawn luai luai khawpa hmeltha pawh an awm ve alawm mahse, ngaihzawng ti a sawi tur hi pakhat te pawh ka la nei hauh lo.

Engtik ni emaw ah chuan ka thinlung sawi nghing dawt tu leh ka in duh ve tawkna zawng zawng ti bo vek theitu, ka thinlung lalnu tur chu ka la tawng ve mahna.

"Rick, ka sawi chu i hria em?" Ruattea chuan ka chal ah chuan a rawn kuk fawk a. Hepa tak hi chu aw...mi kut thlak fawk fawk te hi a sim thei thlawt lo.

"Aw hria e, lungngai suh a hunah chuan ka la nei ve mai ang" ka ti sam et a, ei loh hmel takin a ner nang nang a.

"In zo la kal ang, kan rei lutuk dawn." Ruattea'n a tih chuan ka coffee no chu ka tlak fel ve chiaha, kan in man te pe in office lam panin kan kal leh nghal a.

Ka lo sawi hmaih hlauh a ni maw! Ruattea nen hian Department pakhat ah thawk dunin kei hi Director niin Ruattea hi ka hnuaia thawk ka staff zing a pakhat a ni. Tiang hian nitin office break time ah helai Cafe ah hian coffee in turin kan thu lut thin.

"Sir, ka lo lut thei angem?" ka office kawngka ah chuan kan staff zing a mi Nunpuii chu a lo ding reng a.

"Aw lo lut rawh." tihpahin thutna chu ka kawhhmuh, a rawn thu fel nghal than a.

"Sir, ngen duh che ka nei a" inthlahrun hmel taka Nunpuii'n a tih chuan ka lo khi suk a.

"Tinge i nuih a sir?"

"Engmah ni love, min ngen tur kha ka hre sa thalin ka hria a" ka tih chuan mak tih hmel takin min rawn en a.

"Chu chu enge?" A tih leh chuan amah chu ka en vung vung a.

"Chaw eikhawm na a kal turin min sawm i tum a ni lawmni. Ruattea bawkin a mi rawn tir che, hepa lah hi mi dang dang hi a rawn tir leh nghal a." Nunpuii pawh en chuang lo chuan ka ti zui nuah nuah a.

Hetiang hian kar tin friday tlaiah hian office staff ho hian chaw eikhawm an buatsaih ziah a, min sawm ve ziah bawk a, vawikhatmah ka la kal lo thung. Ruattea lah hian amah ngeiin min sawm duh si lo hian midang dang hi a rawn tir ziah leh nghal a. Friday chawhnu lama ka office hetianga an rawn luh tawh hi chuan an rawn kal chhan hi ka ring sual lo tlangpui a nih hi.

"Anih sir i rawn kal angem?" Nunpuii chuan inthlahrung tak bawk chuan a ti leh a.

"Ka hre lo le, hetiang lam hi ka nuam tih zawng a ni ve lem lo a, ka lo ngaihtuah dawn nia." tiin ka chhang liam leh mai a, Nunpuii pawh a chhuah zui ve tak kha.

Ngaihtuah tak tak ngai pawn ka hre lem hlei lova, kal ka tum miau si lova thutlukna te chu a tir khan ka siam fel diam tawh. Tin, vawin hi ka pa thlakhat ngawt a zin bo hnu a arawn haw ni tur ania, chhungkaw kima chawhlui kil ho loh zawng ka pa a lungawi lo viau dah ange. Tlangval nupui nei rual zet tawh ni mahila ka pa tih lungawih loh hi ka hlauh ber a ni.

Office atanga ka haw dawn chuan Ruattea bulah chuan ka tel theih loh thu ka hrilh hmasa zeta in lam panin ka in khalh haw zui nghal a. Monday tukah chuan a meng rum leh teh ang chu.

Ka nu leh pa te nena chaw kan ei meuh zawng, chhungkaw in ngeih leh in pawh tak nih lo nawmzia hi ka hre chhuak thar uai uai mai, kan infiam bawrh bawrh a kan nui ho bawk a, ka pa sumdawnna leh ka hna chungchang kan sawi erawh hi chuan ka nu hian min lo pawt chat thuai zel, a tui na zawng a ni lo te pawh a niang.

"Mama, hei tlangval than kin zet i ni ve tawh a, i nu leh pa te pawh kan tar chhe mai dawn nupui neih lam te hi ngaihtuah ve tawh teh mo hmel hmuh pawh a chakawm tawh alawm le." Ka nu chuan thutkhawmna pindan lama TV kan en ho thap lai chuan a rawn ti chhuak phawng a, hetiang lam hawi hi ka nu leh pa te hian an la sawi ngai hauh lo, eng an ti tehreng nge mawn le.

"Ka nu khati lam kha chu sawi lo ang, nakinah kan la ti thut zawk dawn ania." ka ti liam ve puat a.

"Mama, nupui neih te hi fimkhur angai a tun ang laiah chuan mihring hi kan mize diktak in hriat sak hi a har tawh a, fimkhur viau ang che. Tin, nupui te hi i lo ru ve ngawt ange aw. Ka ngaihdan a ni dawn hauh lo ania, tunlai thangthar nupui pasal neih duh, palai tirh hmasak awm hauh si lova in ru leh ngawt zel thin ho te hi ka haw teh ania. Nupui i nei duh a nih pawn mizo danin palai tirh hmasak phawt a, chumi hnuah a rem theih ngang loh leh kawng dang chu zawh chauh tur.

Tunlai ah chuan palai tirh hmasak aiin in ruk hi a hmasa zawk emaw an ti tawh a ni ngawt mai a, hengte chin dan tha lo tak a ni tih hre reng ang che." Ka pa thusawi te chu ka pawmpui zawng tak leh ka rilrem zawk tak a ni.

"Ka pa, chutiang lamah chuan min vengthawng duh suh, ngaihzawng pawh ka hmu zo lo a nih hi" keimah leh keimah pawh chu ka in nuih zat lek lek mai.

"Ni e, mama hi ngaihzawng te hi i nei ve lo amaw ni? Tlangval ve pui si hi in ah hian i tawm chawrh chawrh reng mai a, hetiang chuan mo hmel pawh kan hmu thei nang." Ka nu chuan nui huah huah chung chuan a rawn ti a. Kan chhungkua chuan zan hlimawm tak hmangin kan ti ti zui bawrh bawrh a.

Ka rin ang ngeiin Monday tuk office ka thleng chuan thianpa Ruattea chuan min melh rum leh al al kher mai, mahse,a ni hi zawng thiantha ngang hi ania a thinrim rei leh chuang lovang. Chhun lamah chuan a nui leh huah huah tawh mai ang.

Kan tih dan ngaiin chhun chawlh ah chuan Ruattea nen chuan Cafe ah chuan thu in coffee kan dawm dun leh der tawh, thiana pawh a ti ti leh zawt zawt tawh a chaw eikhawm zana a chet dan a sawi leh zuah zuah tawh. Mahse, ka thianpa thusawi reng reng chuan ka beng a lut pha tawh lo...

Cafe a rawn lut thar, kan thutna thlen hma chiaha table pakhata rawn thu lut nula chuan ka mit a la ta tlat mai. Cafe kawngka hmachhawn zawnga thu ka nih avangin a rawn lut lai pawh ka lo hmu daih tawh a, kan hma lawk ah chuan min hmachhawn zawng taka a thut phei chuan hmu chiang tak ka ni, amah phei chuan min rawn en ve lem hlei lova.

"Rick, enge i en vung vung, a va hmuhnawm awm ve." Ruattea chuan ka mit zawnah chuan a kut chu a rawn vai lap lap a, in her meuhin ka mit en na lam chu a en ve nghal a.

"A va hmeltha ve" ka ti chhuak phawng, ka aw lah chu ka duhai a lo ring deuh nge ni nula-i pawh chu a rawn hawi phei zawk a, ka lo melh deuh run avang chuan a hawi sawn leh vat a.

"I mawl emai khatiangin nula an thlir vawng vawng ngai lo, a zak ang asin" Ruattea chuan a rawn ti zui vat a.

"A hmeltha em alawm" ka ti leh pek a. kan tawng kan ti zawi mang si lo a nula-i pawh chuan kan thusawi zawng zawng chu a hre phak vek ngei awm sia. Chumi avang chu em ni dawn, a rawn luh tirh ai kha chuan a hmai chu a sen deuh ap tawh a, a zak tak tak a ni thei angem.

"Tirawh, kal phawt teh ang saw i ti lai zo vek alawm. I zei lo ve heih heih sia(h)" Ruattea'n a tih chuan ngawi rengin ka zui chhuak a. Pawn kan chhuah hnu chuan "min lo nghak lawk rawh" tihpahin Ruattea chu Cafe ah chuan a va lut leh a, nula-i chu a va be mawlh mawlh a; engtak chu va sawi niang maw.

Office a kan let leh hnu pawh chuan hna lam reng rengin rilru a luah tawh lo, Cafe a ka hmuh Nula-i mawlh chuan ka rilru a luah a ka hriat loh lai te chuan ka lo ngaihtuah leh veng veng thin. Kei hi eng ka ti zo ta nge maw ni le, hetiang hian ngatinge ka awm, ka awmdan hi ka hrethiam lo hmeichhia hi tiang hian ka la vei zui ngai miah lo!

Office ban a in ka thlen hnu thleng mai chuan ka rilru luahtu a ni reng a, chu mai pawh ni lovin ka mut hmun thleng pawn ka mut ti chhuak lo tu a ni tlat. Hetiang taka ka rilru luahtu leh vei hi hmeichhia ka la tawng ngai lova, ka tawn pawh ka ring ngai hek lo, mahse, hei tunah ka chunga thleng tura ka beisei ngai loh chu a thleng mek chu a ni si a. He nu hi ka hmu leh ngei chu angai dawn a ni, hetiang taka min tibuai tu hi ka hmuh leh angai. Engtin nge niang, ka hmuh theihna tura ni a ka rin ber chu Cafe chiah kha a ni.

A tuk office tura ka kal chuan Cafe lamah ka kual hmasa phawt a, he dawr hi chu nitina kan chawlhna a nih avang hian a thawkte nen pawh hian kan in nel tawh viau bawk a ni.

"Rinte, nimina helaia thu nula kha i hriat zawng a ni mial em?" Dawr a thawk nula pakhat chu ka va zawt nghal thawr a, amah lah chuan min la nuih tut tut zui a.

"A hming chu ka hre miah lo, mahse kan regular customer a nia. Nitin dar kua leh dar sawm inkar hian a rawn kal ziah a, nimin kha chu a buai deuh vangin a rawn tlai a nih kha." Rintei chuan ka rinai daihin a lo hre hnem daih mai, he Nula-i hi helai hian a regular ve viau a nih hi.

Sana ka en zawk a, dar kua a pel reng tawh mai, ka phone ka phawrh a, ka secretary chu office ka tlai tur thu ka hrilh zui nghal a, kei erawh dawr chhunga thutna hnung ber ah chuan kawngka lam hawi chuan ka thu zui nghal a.

Rei nghah a ngai lo kher mai, darkar chanve pawh ka thut tlin hma chuan Nula-i ngei chu Cafe ah chuan a rawn lut ta ngei a, a thutna ngaiah bawk chuan min hmachhawn zawng bawk chuan a rawn thu leh a min hmu lo niin ka hria ka lam erawh a rawn hawi lem lo.

Ka chan leh hmuh duh ber chang chhuak ta cheng a engmah chu ka ti leh ngam hlei lova, amah chu ka va pawh ngam chuang bawk si lo ka thutna atang chuan dawr atanga a chhuah leh thleng chuan ka thlir liam leh ta ngawt a.

Nitin dawrah chuan amah hmuh tumin ka awm ziah a, vawin chu ka be tawh ngei ang tiin keimah chu ka intiam ziaha, a tak ram a lo thlen erawh chuan che chhuak turin chakna leh huaisenna ka nei leh ngai lem hlei lova.

Chutiang chuan karkhat chuang meuh mai ka awm ta, office pawh nitin ka tlai chu a ni ta ziah mai. Nikhat chu ka tih dan ngai bawkin ka thutna ngaiah chuan Nula-i chu nghakin ka thu leh ran tawh a, ka nghah rei hma chuan a ni pawh a rawn lut leh ta, mahse, tun tum chu min rawn en ve ta tlat mai min la rawn nuih suk zui bawk a keimah zawk chu ka zak leh sia, dawhkana ka phone dah chu khawih niawm takin ka kun nghal zuk a, phone chu ka khawih der ta ngawt a.

"Pu.Ricky, ka lo thu ve, i phal em?" min rawn be tu chu tunge tih hriat tumin ka hawi chhuak vat a, ka va han lai chiang tak em! Nula-i chuan ka dawhkan bula din pah chuan min lo nuih ver ver a, ka mit ah tak a la rawn en zui.

"Aw, aaaa...aw, lo thu rawh" ka ti bah deuh nawk nawk a. Tinge hetianga ka awm tlat mai le, he nu huhang ah hian ka zam chhe der chu a nih hi mawle.

"Ka lawm e" tihpahin a rawn thu zui ve nghal a.

Kei lah chu tawng nachang pawh hre tawh hek lo, tunah tak chuan ka bulah hian Ruattea awm se ka va ti em, a ni zawng a zam leh map dawn si lo a.

"Ti hian nitin min hmuh duhin i lo awm ziah a, engmah i sawi ngai bawk si lova min be ngai bawk si lova." Amah zawk chuan a rawn ti chhuak ta nge nge a. Sawi mai tur hre lo chuan ka khi suk ringawt a.

"Tikhan i ngawi reng ringawt dawn a mi?" huiham...a tlangval zawk hi ka ka a chih tlat bawk sia.

"A...nia, i hmeltha ka ti." amak mang e, ka sawi tum loh deuh ka sawi chhuak leh ta, tinge ka rilru a awm apiang hi he nu bulah hian ka sawi chhuah phawng phawng mai le.

"A nimaw, ka va lawm ve nangpawh i chhe lo lutuk." Nuih seih pah chuan a rawn ti ve a, a va han nui mawi tak em.

"Engtin nge ka hming i hriat a?" Ka hminga min rawn ko teh nawlh kha mak ka ti tlat a ni.

"Sawlai nula sawn min hrilh a" tihpahin dawr a thawk Rintei chu a kawk zeuh a.

" Nitin hian ka hmu ve ziah che sia, min en reng zel bawk sia nimin khan tunge i nih ka zawt ta mai a nih kha. Anih engvanga nitina min lo chang nge i nih le." Chungte pawh chu engtin nge maw a hriat le...

Um...zep buai thei ka ni lo, amah ka chan chhan chu ka hrilh tlang ta phawng mai le. Engtin tak min ngai ang maw, thil thup tit tet ka thiam lohna hi chu a pawi thin a nih hi.

"Lawmthu sawina tur chi a ni nge ni lo pawh ka hrethiam lo, mahse i rilru tak tak min hrilh anih chuan ka lawm viau ang." Ka rin loh dan daihin min rawn chhang, nula pangai leh mi biak vel thiam tak chu a ni phawt mai.

"Thu dik alawm ka sawi, anih min duh ve em?" ka ti leh phawng ringawt a, frank chu min ti ve viau maithei a ni.

"Haha...i hmanhmawh em mai, ka hming pawh i hre tawh a mi?" Aw nitak, a hming pawh ka la hre miah lo tak e.

"Aaa..hre miah lo, min hrilh theih chuan a lawmawm viau ang" ka ti ta ngawt a.

"Angel Lalrinpuii ka ni e, Angel tiin min ko thei ang." a nui leh seih reuh a.

"I hming chu a nalh hle mai, ka zawhna kha!" henu bulah hian minute tin hian ka inringtawk tawlh tawlhin ka hria.

"Tuna in chhan atan chuan a la hma mah mah lo maw, in hre chiang deuh phawt ila tiraw." Min chhan dan chu lungawiloh viau pawh tum ila a lungawiloh na tur ber a awm bawk si lo, Lungawina tur em em pawh ka hre chuang lo.

Chumi hnu chuan phone number in pe tawnin nakina in kawm leh turin kan in thlah ta kha a nia. A pumpui a thlir chuan vawin zet chu ka ti tha takzet chuan ka hria.

Ni a liam a, kar a liam a thla hial a vei ta. Angeli nen pawh kan inbe nasa in kan in hmu ngun hle a, a nel pawh kan in nel a, hriat pawh min hrechiang ve thawkhat ta. Mahse, keimah zawk hian Angeli eng ang chhungkua nge, eng hna chiah nge a thawh tih thleng hian ka la hre chiang thei lo. A nu leh pa leh an chenna tak ngial pawh ka hre thei lo tlat hi a mak ka ti. Nitin hian amah ka duhna leh ka ngaihna te hi a zual tulh tulh a, mahse, a ni erawh chuan hetiang lam hawi zawng hian min en lo nge a sawi lang ngai hauh lo thung.

Vawin chu office chawlh a nia, Angeli nena chhuah dun kan lo intiam tawh avangin kan hmun ngai Cafe ah bawk chuan ka lo nghak leh a, dar sawm a rawn thlen in tiam si kha dar sawmpakhat a rik pawn a la rawn thleng lo, Sawmpahnih a ri leh ta a la rawn lang cheu mai! Ka phone call a chhang thei lo a, ka message hnuhchhiah zo zai te lah chu a chhiar chuang bawk si lo. A chungah hian engemaw a thleng tha lo tak a thleng zawk em ni ang. Ka rilru a buai in a hamhaih ruai tawh mai, ka haw mai ange tia ka thawh chiah chuan kawngka ah chuan a rawn leh hlawl lawi sia.

"Min lo nghak rei tawh em?" ka bula rawn thut pah chuan a rawn ti nghal zat a. Han lungawi lova thinrim tur ka nih vei nen, he nu bulah hi chuan ka thinrim hleithei tlat lo.

"Nghak rei love, ka thleng ve deuh chiah a lawm. Min lo nghah reng tawh zawk ka ring a." Dawt te chu ka sawi ve thla rawk a, ka nghah rei tawh zia lah chu keiman pawn ka in hre ve kur tho sia.

"Rick, i awm rei tawh zia chu ka hria alawm. Mipa danglam tak chu i nih hi, tu mah hian khang chen chen kha min nghak peih lo tawp ang, chutah i la thinrim miah lo leh ta nghal a. Ricky ka fiahna che a nih kha." Ka hamhaih zo leh ta vek mai.

"Eng fiahna maw? Enge i sawi awmzia ka va hrethiam love." a mah chu mak ti takin ka en ha a.

"Rick, kan in hmuh hmasak ber ni khan hmeltha ka ti che in ka vawikhat hmuhna atang che khan ka duh em em che a, mahse, kei chu mi fimkhur chi ka nih avangin ka inthup hram hram a, nangmah hriat chian phawt che ka duh a ni. Tun thla khat liam ta chhung hian ka hre chiang hman hle che a, i nun ah hian zep leh thuhruk nei miah lovin tlang takin i nung a chu chu ka ngaihsanna che pawh a ni. Chuan vawina ka rawn tlai luih chhan pawh engang taka mi dawhtheih nge i nih ka hriat duh vang a ni.

Rick, nangmah ah hian mipa a ka duh leh ngaihzawnga ka duh chu a awm vek asin. Ka hmangaih che Ricky." Ka coffee in lai chu ka phuh chhuak teuh hle mai.

Chutiang teh thut chu ka beisei loh rin loh lutuk a ni, kei hi min hmangaih maw! A sawi hmasak lam kha chu ka theinghilh ti tih nghal vek a, mahse, a thusawi tawpna erawh chu ka bengah a ri nawn tlut tlut mai.

"I fiamthu lo tiraw Angel, i ti tak tak em?" Ka la ring ngam chiah lo a tin ni, min hmangaih thu a sawi kha ka ring lo a ni hauh lo...keimah zawk hian ka hresual a niang tih ka hlau zawk a ni.

"Um, ka hmangaih che Rick, ka fiamthu lo a, ka uang hek lo. He thu hrilh tur che hian ka in ngaihtuah nasa viau asin."

"Ka lawm e, keipawn ka hmangaih che."

Midang awm lohna leh hmun fal deuha awm chu ni ila ka kuah veng veng chak a ni. Ngawi teh, kuah mai pawh ni lovin thildang pawh ka ti tel chak. Mahse, kan awmna hmun hian a zir si lova.

Chutiang chu Angeli nena kan in hmangaihna bul kan tan dan chu a ni. Chuta chin chu kan hlim a, kan in ngai tawn em em a, nikhat lek pawh in hmu lovin kan awm thei lo. Kan in ah pawh a rawn leng fo va, chaw pawh vawi hnih lai chu a rawn ei tawh. Amah a puitlingin mi han kawm leh biang biak vel a thiam bawk a ka nu leh pa te pawn an ngaina in an nel ve hle in ka hria.

Mahse, tun thlenga ka rilru tibuaitu erawh Angeli hian a chhungte chungchang sawi a duh miah lo leh a nu leh pa tute nge an nih tih hi a sawi duh miah lo hi a ni. An in awmna chu ka hria a, chhungkaw neinung tak phei chu an ni hauh lo, mahse a nu leh pate ka zawh apiang hian thudang a sawi daih thin. A lung tih awi loh ai chuan tiin keipawn ka zawt tam duh bik lova, amah ka hmangaih chuan a tawk mai e tiin ka in hnem lungawi ve mai zel.

Angeli nena kan in zui atang pawn thla li zet a liam ta. Ka office bang chu in a luh pahin ka faifuk rat rat a, chutihlai chuan ka nu chu thutkhawmna lamah a awm thung a.

"Mama helamah hian lo kal hmasa lawk teh." Ka pindan pan ka tum lai tak chuan ka nu chuan min lo ko tlat.

"Enge ni ka nu?" ka nu bula thut pah chuan ka ti zui nghal a.

"Mama, i thiannu hi thlah mai la a tha ang." Ka phu zawk a, ka nu chu ka en nghal ngawt ngawt a.

"Ka nu, eng thu nge maw i sawi le. Angeli hi ka hmangaih zia pawh i hria a tin, a ni pawn min hmangaih bawk..."

"Chumi vang tak chuan alawm in kal thui tak tak hma hian thlah mai rawh. Ka thu i hnial ngai loh kha."

"Ka nu, tun tum chiah chu i thu ka hnial ni rawhse. Angeli hi ka then thei lo ka hmagaih lutuk tlat tawh." Ka ding hluai a, ka room lam a kal ka tum a.

"Ricky Lalhlimpui ka thu chu hnial lo mai rawh. I tana tha tur ka duh vang zawk a nih hi, i bialnu chungchang hi engmah i hre lo a mi? Zan lamah eng hna nge a thawh thin tih te i hria em? I bialnu hi KS a nih hi."

Ka ding chawt a, thuthlengah chuan ka thu thla hnawk a, ka nu chu ka en leh tlawk tlawk a.

"Ka nu, tunah khan eng thu nge i sawi. Ka hre sual lo tiraw? Dawt i sawi lo tiraw?" ka ti mawlh mawlh a.

"Keipawh hian dawt ni se ka ti, mahse, kan thenawm khawvengte hian ka kalna apiangah min lo hrilh a, hei zan lama a awmna thin thlalak pawh ka nei nghe nghe asin" ka nu chuan a phone a thlalak chu min en tir a.

Chu thlalaka lang chu Angeli ngei a ni, a bulah chuan nula pahnih leh tlangval pakhat an awm bawka. Han en mai chuan an awmna hmun chu Aizawl veng pakhat khawilai kawtthler emaw chu a ni ngei mai. Mahse, hetiang thlalak ringawt hi chu ka awih ve tlat lo.

"Ka nu, hetiang te chu khawilai emaw ah a thiante nen an leng pawh a ni thei a. Thlalak ho tak a nih kha" tiin ka room lamah chuan ka kal zui nghal a.

"I awih loh leh nangmah ngei khan finfiah la ti nia, ka thu hi hnial lo mai rawh." ka room ka luh laia ka nu rawn au lang lang chu ka la hre pha.

Ka finfiah ngei ang, ka nu hian dawt thu mai mai a ring a ni tih hi ka fiah ngei ngei ang.

Zan lamah chuan Angeli nen kan inbe reng a, a awmna ka zawh pawn in ah a awm thu min hrilh a. Mahse keimah ah hian engvanga rinhlelhna awm tlat nge ka hre lo, Angeli thusawi chu ka awih hauh lo tlat mai. Dar sawm velah chuan Angeli nen chuan kan in mangtha ta a, Chumi hnu chuan mu ta mai lovin ka in siam ve nghal sawk sawk a.

Aizawl veng hrang hrangah chuan zanlai dar sawmpahnih a rik dawn thleng pawh chuan ka tlan kual a, Angeli chu hmuh ka in ringa mahse, ka rilru chuan hmu lo ila ka ti lawi si. Ka beidawng lek lek tan tawh tihah chuan haw pahin Treasury lamah kual lehin Vanapa Hall hnuai lamah ka kual thla a, kawngpui sir hall hnuaia nula leh tlangval lo awm deuh thapte chuan ka mit an la tlat. An bul ka thlen hma chuan dingin ka light pawh off lovin anmahni chu ka chhun deuh kalh a. An zinga tlangval pakhat chuan pawr tawkin light off turin min rawn ti zui a, mahse chu pa chu ka ngaihsak tawh lo, a bula ding hmeichhia chu ka Angeli ngei a ni.

Ka bike chu ka hung tha te te a, a light pawh off chuang lo chuan Angeli te lam chu ka pan a, an bul ka thlen chuan tlangval pakhat chuan kawrah a rawn tham nghal zat a.

"I in ti pa ve deuh nge, buaina i zawng zawng ve hrim hrim a mi?" Chupa chuan ka kawr awma tham pah chuan a ti khar khar a.

"Angel" thudang ka sawi lo, sawi tur pawh ka hre lo.

"Engmaw i sawi" tihpahin min tham tu chuan min tham na sawt a.

"Angel nangmah i ni tiraw, ka hai lo che nangmah i ni. Helaiah hian enge i tih" ka ti mawlh mawlh a. Helmet ka la khum tlat avangin Angeli chuan min hriat chu ka la ring hauh lo, amah lah chu a kun tlat leh nghal a.

"Hepa hi i hriat zawng a mi Angel" tihpahin tlangval pakhat chuan ka helmet chhan ah chuan min rawn beng tawk a.

"Kal zawk ang u, khapa kha a rui anihkha." Angeli chuan a rawn ti a, a kal zui nghal daiha midang pawh chuan an zui ve nghal a.

"Khati ngawt kha chuan i kal lo ang, min en rawh Angel." tihpahin ka helmet ka phelh a, Angeli pawh chuan leh hawiin min rawn en a.

"Ricky, tunge i nih chu ka hria che alawm, tunah tak hi chuan i awm lohna hmun turah i awm a ni. Hetianga min hmuh hi ka duh lo asin, mahse nangpawn ka chanchin i laka ka thup hram hram chu i hre chhuak ve ta a ni ngei ang tiraw?" Angeli chuan ka mitah min en kalh a, a mita mittui rawn hnam tiam tiam chu ka hmu hmaih hauh lo.

"Aw ka hria, KS an ti che...chumi avanga zanlaia rawn chhuak pawh ka ni. An sawi chu a lo dik ngei a nih hi, engtin nge hei chen hi min lo bum theih. Ka hmangaih che min tih pawh kha dawt vek a niang tiraw." Jenny bul chet ah chuan ka ding ran tawh. A thian tlangval pahnihte erawh chu kan thlang deuhah chuan an ding a.

"Aw tunah chuan nangmah ngeiin hei min phawk ta alawm, chutia KS ka ni tih i hriat tawh tho chuan ka kalsan phawt ang che, nidangah kan la in hmu leh dawn nia." A in her vut a, a kal nghal nal nal a tlangval pahnihte chuan an zui hlawk hlawk a.

Ka awmna ngaiah chuan ka la ding reng a, chet sawn zai reng ka rel thei lo. Ka rilru ah thil tamtak a rawn lut a, ka hliam a, ka na a, tah chhuah vak vak theih ni se ka va ti em. Ka ngaihtuahna ah chuan Angeli ka hmangaihna leh kan nunhlui chu a rawn lang uai uai a. Ka tlan thut a, ka bike ah lawnin Angeli te kal liamna lamah chuan ka tlan zui nghal a.

Thui pawh ka tlan hman lo, kawngsirah hian Angeli chu a lo thu a, a landan chuan a tap tih ka chiang khawp mai. A in dawm kun a, a thu khur cher cher a. A tlangval hruai pahnihte erawh chuan a thlang deuhah meizial an lo zu hlat hlat a.

Angeli zawn ka thlen chuan ka bike pawh hung tha lovin ka keuh dawp a, Angeli ka thawm avanga rawn dak chhuak mek chu ka helmet phelhin ka va kuah nghal thlawp a.

"Eng mi pawh ni la, KS, Call Girl, addict engpawh chu nirawh pawi ka ti lo. Ka hmangaihna che hi engmah hian an dal ka phal lo, KS pawh chu ni la enge pawi? Zantin i bulah awmin ka zui mai ang che. He khawvela ka hmangaih hmasa ber leh awmchhun hi heti mai chuan ka thlah dawn lo che." Angeli chu ka kuah nghet sauh a, a ni pawh a tirah chuan tal chhuah tum viau mahse ka kuah hneh em avang chuan ka kuah ang ang chuan a awm ta hle hle a, a tap chhuak hlawp hlawp a.

"Angel, min hmangaih tiraw"

"Um ka hmangaih che Rick" a la tap hlawp hlawp a.

"Anih chuan innei ila heng thil zawng zawng hi i tih angai lovang keiman ka chawm ang che, i duh em?" Ka ti leh mawlh mawlh a.

"Rick, ka hmangaih lutuk che mahse, tunah rih chuan chutiang ti thei ka ni lo. Ka hna hi ka kalsan thei lo." Angeli min chhan dan chu ka rinloh lam daih a ni.

"Engvangin maw, hetia i taksa hmanga sum lak luh hi nuam i ti a mi?" ka kuahna thlahin a dar tawn tawnah vuanin a mitah chuan ka en kalh a.

"Rick, min ngaidam rawh...ka chhang thei lo che." a tap zui leh nghal a, a mittui ka hmuh hian tinge keimah hi ka nat em em zawk tlat mai le.

"Thianpa, Angeli hi KS a ni lova, Call girl a ni bawk lova addict a ni bawk hek lo..." tlangval pakhat chuan a rawn ti a, a tawng zawh hma chuan Angeli chuan tawngtawh lo turin a lo khap bet a.

"Angel, kan tan hian thil tamtak min tih sak a, mualpho zawng zawng pawh huamin kan that theih nan i thawk a, mahse, tunah chuan a tawk tawh e. Keimahni avanga i hmangaih i chân hi ka duh lo, a sawmna che kha aw ti mai rawh." Tlangval chuan a rawn tih chhunzawm ta tho a.

"Mahse, midang tam tak..." Angeli'n a tihlai chuan tlangval pakhat zawk chu a rawn kal hnai leh a.

"Angel, midangte chu ngaihtuah tawh suh. Tunah chuan nangmah vang liau liau in Krista ah nunthar kan nei ve tawh a, tunah chuan i hna hi kan kutah Pathianin a dah tawh, keinin kan lo chhunzawm ve tawh ange. Tunah hian a ni kha i kal tir a nih chuan i damchhungin i inchhir ang, Pathian pawh hian a bula awm tur khan a duh ngei ang che."

"Thianpa, i bialnu hi i hrechiang lo a ni. Ka sawi tawh ang khan KS leh addict a ni hauh lo, Khawvela ka mihring hriat zawng zawng zinga ngilnei leh thianghlim leh rilru tha ber a ni asin. Amah vang hian keini ang mi tamtak Addict leh KS tamtak te hian nunna thar Krista neiin kan piangthar tawh zawk asin..." chu tlangval chuan Angeli'n zan lama kawtthlera Pathian rawngbawla a vah chhuah thin dante, chumi avanga miten KS leh addict ti a an sawi pawh ngaipawimawh miah lova Pathian rawng a bawl tlat dante, anmahni ngei pawh Angeli vanga piangthar an nih thu a sawi chuan min thawng takzet mai.

Sawi mai tur pawh ka hre lo, ka thu hriatte chuan min thawngin ka hamhaih takzet. Ka hmangaih hian mi tamtak rawngbawltu in ti nazawng pawn an tih theih loh chu tiin rawngbawlna ropui tak a lo thawk reng chu a ni si amaw. Keilah hian engmah hre chiang miah lovin ka lo hmusit lek lek hman chu a ni sia.

Mi nunah hian kan lo buai lutuk a, a bulpui leh an chanchin chhui chiang hmasa si lo in, thudik a nih leh nih loh pawh hriatchian tum hmasa miah lovin mi chanchin a chhe lai ringawt hi sawi nuam kan ti a, thudik fumfe hre si lovin mi sawi apiang awihin kan lo sawi darh pui ta chiam thin hi kan sim vat angai a ni.

Ka nu leh pa te pawn thudik an hriat meuh chuan Angeli chu an ngaisangin an tlukloh en ta hial zawk a. An monu a nih loh mawlh an hlau ta lehling zawk a.

Tunang zan rei tawh ah hian ka nupui Angeli hi khawiah nge a awm ka hre hauh lova, mahse, hna ropui tak thawkin Pathian rawngbawlin khawilai kawtthlerah emaw a awm mek ngei ang. Ka tih theih chhun chu in lama lo tawngtai pui leh tha taka lo tawiawm hi a ni.

Angeli'n Isua a hmangaihna te, a rawng a bawl Isua'n a hmangaih hringfa sual bawiha tang a boral mekte chhanchhuak tura hmangaihna nen a enkawla, mualpho leh mi thinhrik nih pawh hlau miah lova, Isua a hmangaih vanga rawng a bawlna hi Hmangaihna diktak 'True love' ngei chu a lo ni.

A tawp ta...