KAN TIAM TAWH SI (COMPETITION)

[Ngaia]

KAN TIAM TAWH SI....
Chapter - 1
(COMPETITION)...
HK Renthlei

"Ka nu,ka pa," tia au chungin hlim takin inchhungah chuan ka tlanlut a, mahse, min chhangtu tumah an awm lo. Ka school bag ka dah a,room chhung chu ka enkual vel a, ka nu leh ka pa room ka han en chuan ka pa chu in dawmkunin rilrua vei nei hmel tak hian ngawi reng hian a lo țhu a.

"Ka pa," zawi te hian ka han kova.

Ka pa lo hawi chhuak chuan a mita mittui tla chu ka hmuh hlau tak chungin ka hmuh loh turin a hru hul vat a, mahse,ka hmu hman tho, enge ka pa chungah hian thleng ta le?

Ka pa chuan hmel hlim pu hram hram chung hian min en a, "Bawihte," tiin min kuah ngawih ngawih a.

"Ka pa, khawiahnge ka nu?"

Ka pa chuan hlim lo zet hian, "Bawihte,i nu chuan....." sawi pawh a sawi thei lo. Rilru nat hmel tak leh min khawngaih hmel takin min en reng a.

Kum sawmpariat ka ni tawh a, Ka pa awmdan ațang chuan thil diklo a awm ani tih ka hria, Ka nu chuan ka pa nen min chhuahsan a ni tih ka hrethiam mai a ni. Ka hriatah ka nu leh ka pa hi an inhauh ngai ka hre silova, enge a chhan ni ta ang le? Ka theih ang tawkin ka pa chu ka hnem ve a, ka pa chuan min kuah vawng vawng a.

"Pa, engvanginnge ka nu chuan min chhuahsan a?"

"Bawihte, ka hre bik lo, ka office bang ina ka haw in alo awm tawh lo a, lehkha a lo hnutchhiah a, ka hre chiah alawm."

"Pa, ka nu hian kan pahnih hian min enkawl peih tawh lo i tihna em ni?" A lehkha hnutchhiahah chuan enge inziak ang tih ngaihtuah pawh ka ngaihtuah thiam lo. Ka ngaihtuahnaa lut ber chu 'ka nu'n min duh lo' tih ringawt mai hi a ni. A pasal leh a fanu pawh hmangaih lova min kalsan tu chu engtikahmah ka ngaidam tawh lovang.

Ka pa chuan, "Bawihte, i nu hi haw reng reng suh aw, ani lo hi khawvelah nu i nei dawn tawh hleinem," a ti halh a.

"Mahse....pa....,"

"Bawihte, țha tak leh taima takin lehkha zir la, hlawhtlin ngei i tum anga, mite hmuhsit kan tawh loh na turin țang fan fan ang che aw..."

Ka inthlak a, rawng ka bawl nghal a, ka naupan zual deuh, kum riat ka nih ațangin ka nu leh ka pa hian inchhungkhur sekrek engkim tih thiam loh neih loh tur an tih tlat avangin, ka thiam ang angin min tihtir ve țhin a, ka lo tisual anih pawhin min hau mai lovin țha takin tihdan tur min kawhhmuh zawk țhin.

Ka nu leh ka pa thu țha tinreng min hrilh țhinte ka ngaihtuah ve nauh nauh a, ka nu lah nu zaidam em em mai, ka pa pawh chuti tho,inhau ngai silovin engvanga ka nu chuan min chhuahsan nge a nih le? A lehkha ah chuan enge inziak ang le?

Eirawng ka bawl zawh hnu chuan ka inbual a, ka inbual pah chuan ka inngaihtuah nasa mai, ka pa rilru tina lo tura awm ka tum tlat ang tiin ka intiam ta hial a.

Bathroom ațanga ka chhuak chu ka pa chuan, "Bawihi, chaw kan ei tawh mai dawn em ni?" a ti a.

"Pawi lo, ei mai ang. Chaw ei chu ka lo siam ange,"

Ka pa nen chauhva chaw kan ei tur chu ka huphurh khawp mai. Mahse tun ațang chuan ngaiah ka neih a ngai tawh. Ka pa hmel kan en țhin a,ka lainat ngawih ngawih. Mahse ka pa bulah chuan engmah ka sawi duh tawh lo, a rilru natzia ka hriatpui vek si a, kan school chanchinte sawiin ka titi pui vak a, ka pa pawh tlemin a zia ve deuh chuan ka hria.

Zanah lehkha reilote ka zir a, ka pa ka ngaihtuah deuh vangin an roomah ka va kal a.

"Ka pa,"

"Enge ni bawihte? Lo lut rawh."

"Ila muhil nange a, naktukah office kal i tum em?"

"Tum e, chawl thei ka ni lo alawm, bakah i nu avanga rilru tihhnual ka tum lo, hmalam pan kan tum zawk tur alawm, nang pawh taima takin lehkha zir la, mahni inchawm zo thei tur khawpin i zirlaiah țang sauh sauh ang che. Mi te pawhin kan chanchin an hriat hunah min hmuhsit phah nan an hmang mai thei,mahse, Pathian hre reng la, intihhnual nan hmang lo hram ang che. Nangmah fuihtu ah i hmang hlauh dawn nia" Ka pa chuan min zilh pah mawlh mawlh a.

"Anih leh Pa, ka mu tawh mai dawn aw, zing thawh ka hai palh ange,"

"Awle, bawihte, i rilru seng nasa lutuk suh ang che, i zirlai chauh ngaihsak ang che." Ka pa chuan a ti leh a, ka chhuahsan a.

Ka pa min zilhna chu zawm ngei ka tum tlat a, ka room ah pheiin ka mutnaah chuan keima phak tawk tein ka ngaihtuah neuh neuh a, tihian nu neilo chu ka ni ta mai si a, mahse nu ka neilo tih hriat tur khawpin ka awm ang. Chuan ka nu anga awm loh ka tum bawk ang. Kan dinhmun a chhe zawk zawk lo bawk a, ka zir chhung chu engmah harsatna ka nei lovang.

Tunah hian pawl sawmpahnih ka zir mek a, board exam kan nei țep tawh a, lehkha ka zir nasat viau a ngai ani. Lehkha thiam thei tak ka ni hlauh a, kan class ah pawh a tițha ber ka ni ziah țhin a, kan hotute pawhin min chhuang ve hle țhin. Sawmpahnih ka pass țhat viau chuan ka pa in college min zawm tir a tum a, amaherawh chu hetianga ka nu a awm loh takah chuan in lam hna ka buaipui a ngai nen, mahni in ațanga class kalna zawn ka tum zawk ani.

A tuk zing dar ruk velah ka thova, ka rin ai daihin ka lo mutui a, ka ha te nawtin ka hmai te ka phih a, inhnuai lamah chuan ka chhuk a.

Ka pa pawh alo tho tawh a, thingpui leh a hmeh min lo chhawpsak a.

"Pa, nizan i muhil thei em?"

"Thei e, bawihte, ka beisei aiin ka mutui alawm, nang zawk?" Ka pa chuan a ti a.

"Kei pawh ka mutui khawp mai, mumang bo țhak khawpin alawm ka mut," nui var var chung hian ka ti a.

Ka pa pawh chu alo nui ve var var a. Kan pahnih chuan ka nu chanchin chu kan sawichhuak duh lo ve ve a ni. Keima ngaihdanah chuan min duh lova min chhuahsan tu chu ngaihtuah tlakah pawh ka ngai lo. Chuvangin ka rilru ațangin ka paihchhuak ngei ang, theih pawh ka thei tur a ni.

Ka pa nen chuan rawng kan bawl dun a, kan pafa chuan kan hlim dun phian a, school kal ka ngaih avang leh ka pa pawh office kal a ngaih avangin chaw kan ei hma a, chaw eina vel ka tihfel vek hnu chuan school kal turin ka insiam a.

School ka thlen chuan ka țhiannu chuan min lo ko vat a, Oh, ka hming chu Lalremruati ani a, 'Arem' tiin min ko țhin a. Ka țhiannu hming chu Rindiki a ni a, 'Dikte' tiin kan ko.

"I zir nasa em?" tiin min lo pan vat a.

"Teuh lo mai, nang zawk?" Ka ti vat a.

Ka best ve ber ni mahse, kan chhungkaw chanchin chu ka hrilh ang nge hrilh lo ang tiin ka inkhâp a, a mualpho thlak em a ka hriat avangin hrilh loh mai ka rilruk a, mahse midang ka ațanga a hriat chuan ka țhian ni tlakah a inngaih loh phah ka hlau bawk si a, ka rilru a insual nasa khawp mai.

"Dikte, thil engemaw hrilh che ka duh a,"

"Eng thil nge ni a, i hmel ațang khan vei nei hmel i pu tlat ania, min han hrilh teh."

"Nakinah lunch break ah ka hrilh ang che," kan class in ang mahse midang hriat ka duh silova.

"Awle, tirawh lut ila, dar pawh a rik tawh kha."

Vawiin chu kan zirlai ka rilru ah a lut thei tlat lo, kei chu ka inngaihtuah lo, ka pa ka ngaihtuah zawk a. Office ah engtinnge a awm ang, a thawhpuiten an hre tawh awm si a tih ringawt ka ngaihtuah a.

Lunch break kan neih lai chuan ka țhiannu Diktei chu kan chanchin chu ka hrilh ve ta vek a, mak a tih rualin min khawngaih bawk si, ngawi rengin min en a, Sawi tur reng a hre bik lo.

"I nu chu a van ti mak ve mawle," a ti vang vang a.

"Kei pawn mak ka ti alawm, ka pa ka khawngaih bawk si a, hrehawm a ti ngawt ang. Tunah pawh office chu a kal tho nain, engtinnge a awm ang tih ringawt ka rilruah a awm a, ban thuai thuai ka chak khawp mai." Ka ti sap a.

"Lungngai suh, Pathianin engkim a tithei alawm, zanah lo len ka tum dawn nia," tiin min hnem ve malh malh a.

"Ni e, lo leng ngei ngei ang che, i riak nghal bawk dawn nia."

"Awle, ka nu te ka lo dil dawn nia."

Ban dar a rik chuan ka thaw huai mai. Diktei nen chuan kan chhuak a, kan haw kawng a inang bawk a, kan haw rual a.

An peng kan thlen chuan, "Lo lut la, ka nute kan dil nghal dawn nia," Diktei chuan a ti a.

"E, a țha hlauh e, chuti chu chaw lo ei nghal hlauh la, mahnia lo phei ai chuan tihian kan phei tlang nghal anga a ni mai alawm," ka lo ti nghal vat a.

Diktei te in kan luh chuan a nu leh a pa an lo awm a, luh pah chuan, "Nu sawm, Diktei kan inah chaw ei turin ka sawm a, a riak nghal bawk anga, in phal em?" Ka ti nghal a.

Nu sawmi chuan, "Phalloh pawh a awm hleinem, aman a duh leh duh loh a ni mai alawm, Pa- a,i phal em?" a han ti nghal a, a pasal a zahthiam ngei mai.

Pa Muana chuan, "A duh leh kal sela a ni mai alawm, mahse mami, țha te tea awm tur aw, in nula ve tawh, nungchang mawite hi hriat reng tur ani ngai e," a lo ti ve bauh bauh a.

"Ka pa, chungte chu ka hre ve lutuk, min ngaihtuah suh u," Diktei chuan a ti a.

Nu Sawmi chuan, "Arem, i nu chanchin kan lo hria a, a pawi kan tihpui khawp mai che u, mahse, Pathianin a awmpui reng ang che u. I lehkha zir kha uar sauh sauh zawk ang che aw," tiin min thlah a.

Ka lawm ngei mai, khatianga hmuhsitna ni lova hmangaihna țawngkam midang lak ațanga kan hriat chuan ka mittui alo hnam sawk mai a. Mahse Diktei chuan min rawn kai vat a.

"Nu,anih leh kan kal mai ania, tirawh, Arem,kal ila," tih pahin pawnah min chhuahpui ta a.

Kan in kan thlen chuan ka pa alo la haw lova, ka inthlak sawk sawk a, Diktei nen chuan rawng kan bawl dun a, fiamthu te sawiin kan nui vak vak a, pawnah chuan car thawm kan hria a, ka pa alo haw ani tih ka hre nghal a. Kawngka ah ka lo hmuak nghal vat a, a chauh hmel ngei mai.

"Pa,i va chau awm ve a, vawiin enge i an a?" ka ti vat a.

"Chau love, vawiin chu hna kan ngah deuh a, ka lo haw hma thei lo alawm, E,Dikte, i rawn leng ani maw?" Ka pa chuan a han ti nghal a.

"Aw ni e, hei Aremi hian chaw ei a, riak nghal turin min ti a, kan rawn inzui haw anih hi," a ti a.

"Chaw ei in peih der tawh elo, kan inthlak anga, kan ei nghal mai dawn nia," ka pa chuan a ti a.

Chaw kan ei kham fel hnu chuan reilote t.v kan en a,mu turin room lam kan pan dun a, mu pahin engemaw mai mai sawiin kan nui dun hak hak țhin a, kan exam a hnaih ve tawh em avangin lehkha zir nasat kan ngai hle mai.

"Dik, Sawmpahnih i chhuah hunah khawiah nge kal zawm i tum?" Ka han ti a.

"Ka hre rih lo, han exam phawt ila, ka pass dawn nge dawn lo pawh a la hriat siloh va, nang zawk?" a ti a.

"Kei chu zir zawm lova nurse zir daih hi ka duh, ka nu awm tawh lo bawk nen, zir chhunzawm ka chak vak lo, exam naa ka tihțhat viau chuan nurse emaw ka zir ang, ka pain a phal tawh tho bawk a." Ka han ti ve a.

"Arem, muhil tawh ang aw, naktuk zingah thawh kan hai palh ange," Diktei chuan a ti a.

"Ni e, muhil ang,tui deuhin muhil rawh aw."

[Ngaia]

KAN TIAM TAWH SI...

Chapter - 2

(Competition)



Zing hma takah thovin ka inphih fai a,Diktei chu ala mutui ngang mai. Ala hma thova, ka kaitho duh rih lova,inhnuaiah ka chhuksan a,thingpui te lumin a hmeh nen siamsa vekin in mai theih turin ka dah a.

Rawng ka bawl malh malh a,class kal kan ngaih avangin chaw ei hma a ngai țhin si a,chet vat vat a ngai ani.Diktei lo tho chuan, "Tinge min kaihthawh lohva,thawh ka hai alawm mawle,ka van mutui tehreng em!" a rawn ti thla bawrh bawrh a.

"I mutui tak tak maw? A van lawmawm ve a,i muthilh theih loh ka hlau lutuk a, hei thingpui ka peih diam tawh ania,in nghal la," ka lo ti var a.

"Ka in zo anga,ka phei nghal mai ang,class kal tura insiam a ngai dawn si a,min lo sawm mai dawn nia aw," Diktei chuan a ti a.

"Chaw ei phawt la,chaw ei khamah insiam turin kan kal rual mai dawn alawm," ka lo ti vat a.

"Ka phei phawt mai ang,min lo sawm mai rawh,"

"Anih,aa i thu thu le," ka ti ta ngawt a. Thingpui a in zawh chuan a phei ta a.

Awmpui kan neih loh avangin a țul ang ang ka khawih sawk sawk a,ka pa te hian awmpui neih an duh lova,kan dinhmunin a tlin loh vanga neilo pawh kan ni lo.Ka nu leh ka pa leh kei chiah kan cheng a,kan in hi lian lutuk ani lo bawk a,han tihnawk turin kan chhangchhe lo bawk a,tunah phei chuan ka pa nen chiah kan ni tawh lehnghal. Ka nu ka ngaihtuahnaah a rawn lut zawk, hetia min kalsan mai hi mak ka la ti tawp thei lo.

Ka pa hi a la upa lutuk lova,palian lutuk chu a ni lem lo,mahse pate tia sawi tur pawh a ni chuang lo.Pa hmaifang țha tak a ni a, mahse a lerh lo.

Ka nun min kalsan mahse nupui dang neia,nuhrawn hrawn tur chuan ka in phal lo,mahse hun a la kal zel anga,enge ka chungah thleng dawn ka hre hauh lo.

Class kal tur chuan ka insiam a, "Ka pa,ka kal ania aw,"

"Awle,kei pawh ka insiam anga ka kal ve nghal mai ang," ka pa chuan a ti a

Diktei te in ka thlen chuan alo insiam peih diam tawh a,school lam pan chuan kan kal dun ta a,kawngah chuan kan țawng bawrh bawrh a,school kan thlen chuan dar alo ri ve chiah a.


Exam nan karkhat chiah hun kan nei ta.Lehkhathiam thei tak ni mahila,ka lehkha zir ka țhulh ngai lo,exam dawn țepa zir vak te hi ka naupan tet ațangin ka paten an phal lo bawk a,ngaiah neiin tihțhanah ka nei a,exam dawn phei chuan beih nasat lutuk ngai lovin ka awm thei țhin a ni.

Ka pa chuan, "Bawihte,in exam chhung chu awmpui la ila,i lehkha zir a tihbahlah phah ang che,"

Ka pa'n min hmangaihzia ka hriat hian ka thla a muang țhin.

"Pawi lo,nurse ka zir theih loh phah ange," nui chung hian ka ti a.

Ka pa pawh chu a nui ve var var mai.

"Awmpui tur fel tak hual ka nei tawh a,vawiinah ka lo hruai haw nghal dawn nia," Ka pa chuan a ti a.

Awmpui han tih lemah ka exam chhung atan chauhva min awmpui tur a ni a,eng mi nge ni ang tih ka ngaihtuah vel a. Kei hi ka kum phu loh hian ka ngaihtuahna hi a puitling viau a,ka pa pawhin a min fak ve fona ani rualin min ngaihtuah em em loh phah bawk.

Tlaia ka class bang chu ina haw thuai thuai ka chak zual a,ka țhiannu Diktei hnenah chuan ka hmanhmawh deuh vanga ka hawsan mai tur thu ka hrilh a, ka tlan haw nghal nal nal. In ka thlen chuan ka pa pawh alo haw tawh a,inchhung ka lut chiah chu ka pa chuan, "E, bawihi, ilo haw tawh maw? Hei i nu Kimi a nih hi,nu kim tiin i ko mai dawn nia," alo ti vat a.

Nu Kimi chu ka chibai a,ka nu rual vel tur hi a ni a,a fel hmel khawp mai.

Ka inthlak a,choka ka chhuk thlak chuan, "Arem, i duh chuan lehkha han zir rawh,hei ka awm tawh alawm,i exam chhung chu engmah i tih ka phal dawn miah lo ania,i zirlai tih chauh lo chu," nui var var hian a lo ti a.

Vawiin tlai chu inhmelhriatna atan ka lo pui ve ang che,naktuk ațang chuan ka zirlai chauh ka ngaihtuah dawn nia," ka han ti ve a, ka nel nghal sarh mai.

Nu Kimi nen chuan rawng kan bawl dun a,engmah ka tih ve a phal lo nangin ka țang ve tlat si a,min hnial duh ta bik lo.

A mizia ka la hrechiang lo nain,nu sual tak chu anih ka ring lo.Nuthlawi ani a,fa a neih hmain a pasalin a boral san a,tun thleng hian pasal pawh ala nei leh ta lo ani tih te min hrilh a,ka khawngaih khawp mai.Hmeichhia țheuh țheuh pawh hi a va lo in anloh theih ngai vele tih te ka ngaihtuah phah,ka kum phu lohvin.

Chaw kan ei kham a,a tihfel lam chu nu Kimi kutah ka dah ta a,kan exam hun a hnaih tawh em avangin lehkha zir turin ka roomah ka lut a.



Kan exam nan nikhat chiah hun a awm ta. Ka phak ang tawk chuan ka zir ve chuan ka inhria,Pathian kutah ka innghat tawp tawh.


Kan exam ni alo thleng ta,ka huphurh rualin zawhna lo chhuak chu ka beisei aiin ka chhang țha.Top ten ka kai ngei pawh ka beisei.


Kan zo ta,ka thawveng hawk mai,inah ka haw vat a,nu Kimi chuan, "Arem, i ti țha em?" min lo ti var a.

"Ka ti țha thawkhat chuan ka hria,Pathian thu thu ani e," ka ti ve mai a.

"Ni e,Pathian kuta innghat han tih hian taima taka zir tum chuang silo,hlawhtlinna hmuh beisei ve ringawt hi chu a fuh ber lo," alo ti ve sawt sawt a.


Kan result a chhuah chuan ka beisei aiin ka ti țha a,top five ah ka lang pha hial mai.

In ka thlen chuan ka pa a lo awm reng tawh mai,ka result hria a lo haw hma a ni nghe nghe.

Nu Kimi nen chuan min lawmpuiin chibai te kan in buk a,kan hlim ngei mai. Ka pa pawhin min chhuang takin, "A lawmna kan nei dawn nia,i țhiante sawm la, chaw kan eikhawm dawn nia," a ti a, Ka hlim ngei mai.

Nurse ka zir thei dawn e.

Ka pa in phone min leisak a,Diki ka phone nghal vat a.

"Dik, ka pa in ka pass min lawmsak dawn a,chaw ei turin lo kal ang che aw,kan teacher te a sawm bawk a,lo phei hma ang che. Chuan, zanah kan party nghal dawn nia,țhiante nen, ka pa'n min tumsak vek dawn." Ka ti ham ham a.

Tlaiah kei leh nu Kimi nen,Diki nen rawng kan bawl a,ka pa'n a hrilh kual vek tawh bawk a,chaw ei hma chuan an lo thleng sap sap hlawm.

Hunserh te hmangin ka pa'n lawmthu sawi țawngțaina a neih zawh chuan chaw kan ei ta hlawm a.

Keini țhian ho chu mi sawmhnih vel bak kan ni lo.Zanah ka pain engkim min tihsak avangin Party kan nei a,kan hlim ngei mai.

Tunah chuan nurse zir turin ka inpeih ta, ka dil anga,ka tlina ka zir theih chuan țha takin ka zir anga,midang tana malsawmna ni thei turin Pathian hruaina in nurse țha tak ka ni ngei ang.

Nurse zir tur chuan kan dil ve ta ngei,interview kan neihah chuan ka tling ngei e,ka lawm lutuk.Ka pa ka ngaihtuah khawp mai,mahse nu Kimi a awm thova,anin alo ngaihtuah ngei ang tih ka ring bawk,chuan ka nu atan ka pawm thlap tawh bawk,ka pa'n duh se chuan.

[Ngaia]

KAN TIAM TAWH SI...
Chapter - 3



Nurse ka training zawh nan karkhat ala awm tih chuan ka pa in min lo phone a, "Bawihte, i nu Kimi hi nupuiah neih ka tum a, rem i ti em?"

Ka lo rindan leh beisei ang chiaha an awm chu ka lawm ngei mai, chhan nachang pawh ka lo hre lawk lova, ka pa vek chuan, "I rem tih loh chuan ka tilui lo che ania, nuhrawn hrawn tir che hi ka duh lo."

"Ka pa, ka duh lutuk alawm,a hma pawn ka lo ngaihtuah ve tawh a, nangmah hmangaihtu leh enkawltu i mamawh tih ka hria alawm, ka nu atan ka pawm thlap a nia, anih engtiknge in tum a?" ka han ti zang vah a.

"Ilo haw hunah kan sawi rem dawn nia," tiin kan inbiakna kan titawp a.

Ka pa chu ka lawmpui ngei mai, hlim takin awm se ka duhpui em em.Tunah chuan ka nu avanga a rilru natna a tihlan duh loh, a ruka a tawrhna chu a kian ngei ka beisei.


Tunah chuan nula tak tak niin kum sawmhnih pathum ka ni ve ta. Mahse mipa lam hian ka lung an la len rih lo nge ka mipa duhzawng ka la tawng fuh lo zawk, ka țhiante chuan ngaihzawng neiin a țhen chuan pasal te an nei tawh hlawm a, kei chu ka zirlai bak ka ngaihtuah loh vang hian mipa lam chu ka rilru ah an lut thlawt lo a ni.

Nurse ka training zawhah thawhna tur te ka hmuha ka insawh ngheh hunah pasal tur te chu ka la ngaihtuah ve ang chu. Ka pa hian han nei fel phawt sela...!!!


Nurse exam kan neihnaah a tițha pawl ka ni leh hlauh,ka lawm ngei mai. Haw vat vat ka chak tawh, ka pa ka phone a, ka pa pawh a lawm ngei mai.Thawhna tur min lo zawnsak a tum nghal. Mahse ka haw hunah kan zawng dawn nia tiin kan inthlah a.


A tuk kan haw ni a thleng ta, ka helhhawlh nge zanlamah pawh ka muhil țha thei lo.

Zingah hma tawkah ka harh a, khua pawh ala eng lo, zanlama ka insiam sa vek avangin buaina tur ka nei tawh lova, theihnghilh ka nei nge neilo ka en leh vek, mahse a kim biai mai, khua a var har ka ti lutuk.

Khua a var meuh chuan ka inpeih at tawh, zing a chhuak tur ka nih avangin ticket pawh ka la sa vek tawh a, ka phur tawh ngei mai.

Motor ka chuan lai te chuan zanlamah ka muhil țhak lo nain ka mut a chhuak lo,ka muhil theilo bawk. Kawngtluanin ka thinlung hi hlimin a nui ver ver mai a ni. Ka chuanpui te nen chuan hlim takin kan titi a, fiamthute thawhin kan nui ham ham a, kawngtluanin hrehawm ti miah lovin ka haw kawng ka hmang.


Dar khat velah In ka thleng ta, kan kawtkaiah tak mai ka chhuk a, ka pa leh nu Kimi an rawn tlan chhuak nghal a, ka chuanpui te ho chu mangțha pahin kan in bye bye liam a. Ka pa leh nu Kimi chuan ka bag min khai sak a, inchhungah kan lut a, kan inchhung ngei ka rap leh thei chu ka lawm kher mai.


Ka roomah lutin ka inbual nghal a, ka thawmhnaw chu nakinah ka remfel mai ang.

Inhnuaiah chhukin choka lam ka pan nghal a, nu Kimi alo awm a, thingpui leh a hmeh min lo chhawp nghal a.

"Ka nu tiin ka ko tawh mai ang che aw," ka han ti a.

"I thu thu alawm, i pa nen hian hetiang dinhmunah hian kan awm ang tih pawh ka ngaihtuah pha lo, i pa ka tawng hi ka lawm khawp mai, fanu fel leh hmelțha tak ka nei nghal bawk che ania," tiin a nui var var a.

"Rawngbawl hma in ka thawmhnaw vel ka han ti fel lawk ange aw, ka tihfel hnuah rawng ka lo bawl pui dawn che nia," tih pahin ka room lam ka pan ta a.

Ka roomah luta ka thawmhnaw vel ka tihfel hnu chuan inhnuai lamah ka chhuk leh ta a.

Nu Kimi(ka nu tiin ka sawi zel tawh ang) nen chuan rawng kan bawl dun a, zanah ka pate chungchang sawi turin ka pa unaute lo kal khawm an tum.

Tlaia ka pa office bang alo haw chuan rawngbawl kan lo peih fel der tawh a, a inthlak sawk sawk a, chhung inkhawm neia hun kan hman zawh hnuah chaw kan ei ta vat a.

Zanah chuan ka pa unaute chu an lo kal khawm hlawm a, ka pa te unau hi panga an ni a, mipa pathum leh hmeichhia pahnih an ni a, nupui pasal an nei vek hlawm. Ka pa hi a naupang ber a ni a, a u te hian an ngaihsak em em bawk.

Ka pa te inneih dan tur an sawi a, ka nu tur hi baihvai ve tak mai a ni a, a nu nen hmeithaia awmin a nu hian a boral san tawh a, pasal neiin kum hnih vel chu a awm ve a, mahse fa an nei lova,a pasal lah chuan alo boral san veleh zel bawk nen, a hun kal tawhah harsatna a tawk ve nasa khawp mai.Tunah chuan ka nu ani dawn ta.

Inneih pangngai an duh miau loh avangin tlan koha in koh mai an duh avang leh kan ina a awmsa avangin tihian a awm ve nghal mai anga, man leh mual inhlan tur pawhin a man dawngtu turah pawh ka pa te unau a an upa ber an ruat ta tawp mai a, chhung leh khat dang alo nei bawk si lo a, ka rilru chuan ka lainat ngei mai.

A hmingin man te an inhlan ve anga, chumi atan chuan ningani an ruat ta a. Kan chhung leh khat bakah țhenawm khawvengte leh ka pa țhianțha te, ka pa thawhpuite sawmin chawhlui siam ve ngei an duh a, sum te an thawhkhawm liam liam a,a tepter ve tawh em avangin inbuatsaih char char a ngai tawh.

Tunah chuan nu thar ka nei ta, kan chhungkua pawh kan hlimin kan inpawh tlang a, ka pa nen chuan ka hna tur dilin kan han chhuak ve ta a, sorkarah beisei awm a awm rih loh avangin private ah dilna an hawn chu kan han dil ve ta phawt a, nurse hna diltu zingah pathum lak tur a ni a, diltu an awm ve nual a, inteview te kan nei a, result a chhuah huna min hrilh mai tur thu an sawi a, in lam panin kan haw leh ta rih a.


Phone call ka dawn chu ka han en a, damdawiin lam ațangin ani tih ka han hriat chuan phur takin ka la vat a, ka tlin thu min lo hrilh a, ka lawm ngei mai. Ka nu nen chuan kan lawm lutuk chu kan inkuah a, Ka pa ka phone nghal a, ka pa pawh a lawm ngei mai.

"Bawihte, a van lawmawm em! Ka rawn haw pahin vawksa ka lo lei dawn nia, a lawm nan," a han ti a.


Tunah chuan nurse hna ka thawk ve dawn ta, ka phur ngei mai.Taima tak leh rinawm takin mite tan malsawmna ni turin ka thawk ang tiin ka infuih ru sauh sauh.

Ka hna țan hmasak ber ni a nih avangin ka pa in min thlah a, ka thlen chuan ka in report nghal a, ka duty nghal dawn avangin nurse form ka hak tur min kawhhmuh a, ka ha nghal mawlh mawlh a, duty roomah chuan ka thawhpui turte an lo awm hlawm a. Inhmelhriatna te kan han nei a, thawk thar tur ka nih avangin hmeichhe pakhat nen inkawp turin min ruat a, Rinpuii a ni a, 'Rp' tiin an ko va, kan han inhria chu kan mizia a inang bawk a, kan inkawp fuh dawn khawp mai.

Chutia kan awmlai chuan Doctor alo lut a, a hmel ka han hmu chiah chu ka thinlung hi a kang awkin ka hria. Ngaihzawng la nei ngai lo leh mipa pawh buaipui ngai lo, mipa țhian pawh nei ngailo, mipa hi engatanmah ka ti lo emaw tih tur khawpin ka awm a ni si a, ka awmdan chu mak ka ti ngei mai.Chu Doctor chuan min han melh zawk a, keiin ka lo melh ve reng si a, kan mit a intawk chat a, ka thinphu a rang sawt. Chu Doctor chu a ward fan apianga Rpi nen kan zui tur alo ni a, ka huphurh ngei mai, ka lungphu rang lutuk chu tihtawp ngaihna reng ka hre lo.Mahse keimah chauhva zui tur ka ni lo hlauh chu ka lawm.

Kan pathum chuan kan inzui chhuak ta țham țham a, Rpi nen chuan a hnungah kan zui dat dat a. A rawn hawi let thut a, "Thawk thar i ni maw? Enge i hming?" tiin min han zawt a.

"Lalremruati, 'Arem' tiin min ko țhin," ka ti ve mai a, a hma ang em kha chuan ka thinphu a rang tawh lo.

"Kei chu Lalruatpuia ka nia, 'Maruat' tiin min ko țhin a, hei, i țhiannu hi alo thawk hmasa hlauh a, a ni hian tihdan a hrilh pah zel dawn che nia, kan duty lai chuan thildang engmahin min tibuai tur a nilo, chu chu kan vawng reng dawn nia, damlo hmuh laia hmel hlim lo te hi ka duh lo ania," a ti duah mai.

Rpi nen a hmuh lohah kan insik ru zauh a, Rpi chuan, "A chhe lo i ti em? Nula ho hian an star hlawm teh ania aw, a lar lutuk," a rawn ti sar sar a.

Ka nui ringawt.

"I ho em mai, hna ka ngaipawimawh zawk," ka ti vat a.

"Nakinah ila buaipui ve leh si ange aw," nui var var chung hian a ti a.


*************

[Ngaia]

KAN TIAM TAWH SI...
Chapter - 4


Thlakhat lai ka thawk ve ta,ka tuina tak a ni bawk a, nuam ka ti. Damlo te bulah awmin an harsatnate ka ngaihthlaksak a, hmel hlim lo ka hmuh ngailo a, hlim takin ka be siam siam zel țhin, damlo te pawhin min ngaina em em mai.

Ka nu(tak tak) chanchin ka hriat lohna a rei tawh hle mai, a awmna pawh ka hre lo. Min hringtu ni mahse min kalsan avang khan ka hua a, mi luhlul tak ka nih avangin a chanchin ka ngaihven ngai lo. Ka nu chhungte lam pawh an chanchin ka hre ngai lo, an mahni lam pawhin min be pawp ngai bik lo. Mahse tukkhat chu zing karah phone call ka dawng a, ka nu cancer a a boral thu min rawn hrilh chu ka mitsulh a, kha chen ka huatna kha engtikahnge a bo ka hre lo, ka țap chhuak ta hawk mai, haw hle mahila cancer natna rapthlak tak tuara boral atan chuan ka phal bik lo alo ni.

"Bawihte, engtiziange ni ta?" Ka pa leh ka nu chu room ațangin an rawn chhuak nghal a.

"Pa, ka nu a boral....." tih pah chuan ka țap nghal hawm hawm mai a, a boral meuh chuan inthiamlohna in ka khat nghal a, hrehawm ka ti ngei mai.

"Kal ve i duh em?" Ka pa chuan a ti a.

"Kal chu ka duh, mahse ka inthlahrung deuh tlat," ka ti a.

"Kal ve i duh chuan tunah han insiam la, kan kal dawn nia, Nu-i keini pawh insiam ang hmiang, mami a mah ringawta kaltir chu a chi lohvang," ka pa chuan a ti leh a.


Kan kal hma chiah chuan phone call ka dawng leh a, ka no hriatloh ațang bawk hian a ni leh, kan chhang a, ka nutei alo ni a, ka nu chhang chiah.

"Bawihi lo kal in tum em?" in rawn kal dawn chuan i nu hmel hmu hman talin lo thleng thei ula ka ti hle mai," țap deuh țuau chung hian a rawn ti a.

"Aw, kan chhungin kan rawn kal dawn, kan rawn chhuak dawn chiah a." Ka han ti ve a.

Ka lo mangnghilh der mai. Ka phone ka phawrh leh a, Dr Maruata ka phone miah lo, chawlh dil turin a chawpchilh tawh si a, ka phone ta nghal a.

"Doctor, ka nu a boral thut a,ka kal a ngai si a, karkhat vel chawlh min phalsak hram mai rawh aw, chawlh han dil nan a ni thut bawk si a, min hrethiam hram dawn nia," ka han ti sawk sawk a.

"A va pawi ve aw...awle rilru nuam tak khan kal rawh, helam chu kan kep rih mai ang che,"

"Ka lawm lutuk e." ka han ti ve sap a.

Rpi ka phone leh a, ani pawh chuan pawi a tih thu leh min tuarpui thu sawiin, min hrethiam tak leh min kep tur thu a rawn sawi a, ka hahdam huai mai. Mahse....Rpi thusawi chuan ka thinphu a tirang sawt.

"Arem, Dr Maruata hian i chanchin min zawt nasa mai, a duh che anih ka ring." a rawn ti a.

"Awihawm loh loh, keini ang te chu......" ka nu leh ka pa hmai chu ka zah thut a, ka ngawi zui daih. An hriata mipa chanchin han sawi vel chu ka ngam lo. Ngaihzawng ka neih tak tak hunah chuan ka pasal tur ani ngei bawk anga, chumi hunah chuan zep miah lovin ka nu leh ka pa ka hrilh nghal ngei ang.Tute emaw anga nu leh pa hriatpui lohva a ruka mipa kawp tih vel hi ka duhdan ani ve lo ani.

"Rp, nakinah kan inbe dawn nia bye phawt aw," tih pah chuan ka phone chu ka dah a.

Ka nu ka ngaihtuah chuan cancer avei chu mak ka tiin awih har ka ti ngei mai.Ka rilru chuan, "Nu, min ngaidam rawh, ka huat vang chein ka ngaihsak lo che a," a ti mawlh mawlh mai, mahse a sawt tawh silo.


Dar hnih velah kan thleng a, kan kal dawn tih an hriat vang leh ka nu hmel ka hmuh an duh avangin min lo nghak a, ka nu hmel ka hmuh chuan a lo cher kuam mai, ka nutein min hmuh veleh țap chungin min rawn kuah a, kan țap dun hawm hawm mai.

"Nu, min ngaidam rawh aw," ka ti mawlh mawlh a.

Reiloteah thlanlam an panpui nghal a, thleng chauh ve ti lo chuan ka nutei nen inkuah chungin kan zui ve nghal a.

Inlama kan let leh hnu chuan ka nutei chuan envelope hi min pe a, a chhungah chuan ka nu lehkha hi alo awm a, bedroomah kan lut a, ka han chhiar chuan ka nu ngaihdam min dilna thu leh a ro zawng zawng ka hnena a hlan thu ziaka a dahna lehkha alo ni a. Ka rinloh lutuk thil leh ka beisei loh thil a ni, ka nu hian ti em hian sum alo ngah ang tih ngaihna ka hre hauh lo. Han ti ila, a chanchin ka ngaihven ngailoh em avangin pasal hausa deuh anei a, chu a pasal chuan a boral san leh ta mai ani tih pawh ka hre lo.


Karkhat vel kan awm a,inleng an la awm ve neuh neuh avangin engmah han sawi theih ani silova, zankhat chu inleng an rem ta deuh tih chuan ka nu leh ka pa nen,ka nutei nen ka nu lehkha chungchang kan sawi a.

"Ka nute, nangman nei mai ta che, kei chuan hna ka nei ve tawh a, ka inenkawl ve thei tawh alawm," ka han ti a.

"Ni love, i nu in a hnutchhiah che hi ka nei thei lovang, bakah pasal fanau ka nei alawm, i patean hlawh a nei ve thova, kan harsa hleinem, tihian a in pawh hi midang kan luahtir anga, a luahman pawh i tel vek dawn nia," a ti a.

"Ni love, in luah man tal chu in buaipui hah manah in chang zel dawn nia," ka ti ve tlat a.

Chu em chu min hnial duh ta bik lova.

Ka nu ro chu lak duh lo hle mahila ka laka a inthiamlohna tihreh nan leh ka ngaihdam theih a beisei vanga a lo dah vek ani tih ka hriat chuan hnial loh ka tum ta zawk ani.

Tunah chuan nula hausa tak ka ni ta ringawt mai.

Ka hna ka chawlhsan rei tawh si a, kir leh ka ngai tawh. Doctor Maruata leh ka thawhpui dangte lakah pawh ka inthlahrung zo vek.

Ka hna ka kir leh thei chu Rpi chu a lawm ngei mai, Kei pawh ka lawm. Tunah chuan hmalam ka pan zel tawh ang.

Doctor Maruata nen chuan kan la inhmu hauh lo,mahse pawi ka ti lo, ani ka hmuh hian ka awmdan a dang vek zel a, hetianga ka lungphu tirang theitu mipa hi ka la tawng lo. A pa lianin a pian a nalh a, darpharh hlai hlep hlawp, kawng fek rat mai, thahrui ngah tih hriat zet mai hi a ni a, Doctor ni awm lo a mawi a ni, a hmelțha tak te chu damlo tan pawha hmuh nuam tak a ni. A fel a, a hawihhawm a, a damlo te a ngaihsak peih em em țhin.Tupawhin an ngaina.

Rpi nen pawh chuan kan inkawp ngun tial tial a, kan inkawm ngeih sawt hle, ani nen hian khawihmunah pawh kal ila kan inzui chawt zel. Kei aia a senior avangin kawng engkimah a experience na hmangin min pui nasa em em bawk a ni.

Duty ka chawlh laiin ka phone alo ri a, kan en chuan ka țhiannu Diktei alo ni a, kan inhmuh lohna a rei tawh ngei mai, Ka chhang nghal a

"Hello," ka ti vat a.

"Arem, kan va inhmu khat ve a, pasal ka nei dawn a, țhianah ka hmang duh che ania, zaninah ka rawn leng ang," a rawn ti a.

"Awle, lo kal ngei ngei ang che, sawitur kan ngah dun viau ang, riak turin lo kal nghal rawh aw, ka lo ring dawn che nia, ka duty a hun leh țep tawh a, ka dah phawt ang e, zanah kan inhmu dawn nia bye," tiin phone ka dah a.

Diktei chu ka lawmpui ngei mai, kei lah hian pasal neih ka la ngaihtuah der silova.Tunah phei chuan nula senior ka ni mai tawh dawn. Mahse ka hmangaih leh min hmangaihtu chauh lo chu pasalah neih ka tum lo.

Zanriah kan ei laiin Diktei pasal neih tum thu leh țhiana min hman a tum thu ka hrilh a. Ka pa chuan nui tet tet chung hian, "Nang, engtikah nge i neih ve ang?" Min han ti fiam zauh chu ka zak ngei mai.

"Pasal neih ka tum reng reng lo, ka hna hi ka hmangaih ber," ka han ti ve a.

"Nia, bawihi chu pasal neih neih a ngai hleinem, min kalsan daih te chuan kan khua a har dawn lutuk asin," nui var var chung hian ka nu chuan alo ti ve a.

Kan chhungkua hi pathum chauh ni mahila kan hlim a ni. Kan infiam bawrh bawrh a, tute chhungkua mah hi kan awt lo, ka nu pawh hian ka nuhrawn tih pawh hriat loh khawpin min hmangaih a, min ngaihsak em em ani. Pasal neihsan ka chak loh phah(ngaihzawng pawh la nei hawt lo chuan).

Zanah chuan Diktei chu alo kal a, kan inhmu chu kan hlim ngei mai, nurse ka training chhung khan ani pawhin zirtirtu hna alo hmu ve a, ka lawmpui khawp mai.Tunah phei chuan pasal țha tak a nei dawn lehnghal, a pasal tur lah chu mi țha tak mai a ni a, officer a ni lehnghal.

An inneihni tur atan November ni 7 an ruat a, a hnai tawh in, a theih ang angin an lo inpuahchah ve, țhiana țang tur meuh chuan ka inring lo. Kan hnial ve țang țang a, keimah kher a duh si a, ka hnial duh ta bik lo.

A pasal tur nena min hmelhriattir pahin dinner ei chhuah a rawt a, a pasal tur hming chu Muanpuia a ni a, ka hmu chak khawp mai.

Zan dar sawmpakhat thleng kan titi a.

"Arem, ngaihzawng hi ila nei miah lo em ni? Pasal neih lam te hi ngaihsak ve teh. Nge mipa hi i ngaihsak lo ve hrim hrim ni le?" A han ti a.

Kei chu ka lo nui tawp.

"Ka la nei ve mai ang ka tih chu, pasal i neih dawn vang maiin nuihzat kher suh aw," tih pah chuan a hnungah ka chum awk a."


**************

[Ngaia]

KAN TIAM TAWH SI...
Chapter - 5


Ka duty zawh hma avangin inah ka haw hma a, Dinner eitur chuan ka insiam a, tun țum hi chu nalh taka lan ka duh ve tlat. Make up ka hmang vak ngai lo nain zanin chu ka hmang nasa ve hle, ka hmuiah erawh chuan lip gloss ringawt ka hnawih a, ka mit tlem ka hnawih leh a, darthlalang hmaah chuan ka ding a, nalh ka inti ve ngei mai.kawrfual sendang a kawng ațanga arh laih hi ka ha a, ka sam erawh chu ka thlah tawp a. Pheikhawk sang lutuk lo, bun nuam tur deuh hi ka thlang a, ka bag ka la a, room ațang chuan ka chhuak a, ka nu leh ka pa in min lo hmuh chuan nalh min ti ve ngei mai.

"Ti kha chuan nula nalh tak i ni tih a lang ve ta alawm," ka nu chuan nui var var hian alo ti a.

Kei pawh ka nui var var.

"Nuam deuhin hun va hmang ang che," tiin duhsakna min hlan a.

Pawnlamah chuan motor thawm alo ri a, Diktei te an ni ngei ang. Ka chhuak nghal a, Motor ațang chuan Muanpuia chu a lo chhuak a, kawngka min hawnsak thlap. A polite khawp mai, a hnungah ka țhu lut nghal a.

Kan dinner eina hmun tur kan thlen chuan a changkang ngei mai, a thianghlim em em bawk a, waiter in kan țhutna tur min kawhhmuh ah chuan kan țhu ta țham a.

"Ka lo thleng har em?" tih ri ah chuan ka phu zawk mai.

Ka en vat, Dr Maruata alo ni reng mai. Ka thin a phu zaih zaih, mahse ka in control leh vat.

"Thleng har love, kan thlenna a la rei bik lo, lo țhu ve nghal rawh," Muanpuia chuan a lo ti vat.

Waiter in kan eitur alo dah chuan titi pahin kan ei mawlh mawlh hlawm a, Maruata chu ka melh leh zauh țhin a, ani lah chuan min lo melh leh reng mai țhin a, ka mit ka lasawn rang țhin khawp mai.

Dr Maruata chu Diktei pasal tur Muanpuia'n țhianah hman alo tum ve reng mai. Ka ngaihtuah a, Doctor thuama a inthuam bak ka la hmu hauh lo a, suit nena a inthuam tur chu a inhmeh khawp ang le!

"I hna chu nuam i ti bawk ang chu maw?" Dr Maruata chuan a rawn ti hlawl mai a.

Min en deuh țhap hlawm a, Diktei chuan, "Awi leh, in lo thawk dun reng ani maw? A van tihzia ve aw...in lo inhria chu," phur tawk hian a han ti a.

"Ni e, a tihzia khawp mai," Dr Maruata'n a tih pah chuan min lo siai zauh a.

Kei lah pek chu ka lo lai em em mai lehnghal a. Ka lei ka lo chhuahkhum zauh ringawt.

Maruata chu a nui hawk a, kan en vat hlawm a. "Dikte, Aremi hian bialpa a nei tawh em?" Min tihzah a tum chiang mai. Ka lo sen awp awp a, ka melh rum ngang mai.

"Teuh lo mai, mipa a duhzawng ala hmu lo aniang," nui hawk hawk chung hian Diktei chuan alo ti ve a, ka van ngei dun tak.

"Bialpa ka neih loh vangin min nuihzat suh u aw...pasal neih na khua ala tlai hleinem," ka ti ve vat a.

"Tunah pawh mipa i ngaihsak lo ania, pasal neih te chu khawilam a ni ringawt. Engtikah tak nei ang che maw?" Diktei chuan min han tih khum leh a.

"Lungngai suh, ka la nei ve mai ang," kan ti ve nghek ringawt a. An nui țha hlawm lehnghal, ka van haw tak.

"Kan Doctor pawhin tun thleng hian a la neih bik loh hi," kan ti ve ngat a.

"Kei chuan ka hmu reng tawh alawm, remchang hmasa berah ka sawipui ang," a han ti a, enge ka hriat ni, ka engmah a ni silova, ka rilru a lo hnual ve nghal ringawt.

"Kan va hre chak vele, a la puanzar chi loh em ni a?" Muanpuia chuan alo ti ve a.

"Tehnang, ka bialnu tur pawhin ala hre lo hrim hrim," tia min en pahin a nui vur vur a.

Kan dinner ei chu kan hlim phian mai a, innei turte kan kap pah ve reng bawk a. Anni lahin kei leh Maruata min dembel a, kan nui nasain nuam kan ti hlawm khawp mai.

Restaurant ațang chuan kan chhuak a, Dr Maruata chuan, Muanpuia te pahnih hnenah chuan, "Aremi chu ka rualin haw mai sela, motor ka keng tho bawk a, mahnia haw ai chuan a nuam ka ti zawk ang," a han ti a.

Ka lo hnial ve sa teh a, mahse Diktei chuan nui chung hian, "Kal rawh, hmu zo lo ve ve chu inkawp teh u," a ti a, a hnungah ka chum awk mai.

Doctor Maruata chuan a motor chu ka bulah a rawn dintir a, kawngkhar min hawnsak a, ka țhu lut ve nghal mai a, kan tlan chhuak ta nghal a.

"Arem, ngaihzawng ila nei miah lo tak tak maw?" tiin min han zawt a.

"Aw, ka la nei lo chu anih hi, ka hmanhmawh vak lova, nang chu i nei a ni lawm ni? Engtikah nge in tih ve huk dawn a?" Ka han ti ve zauhva.

"Ka nei hleinem, mahse hmanni lawk khan tuemaw ka tawng a, amah pawh ka la hrilh lo." a ti leh mai a.Hmalam a en ngar a, tunge ni ang le tiin ka lo ngaihtuah ve mai mai a.

"Arem...."

"Doctor...."

Kan țawng rual chiah a, kan in en a, kan nui ringawt.

"Doctor ti a min koh kher a ngai lo, ka hming chu i hriat kha, 'Maruat' tiin min ko mai rawh."

"A tihchi lohvang, doctor i ni miau si a, chutianga ko tur khawp chein kan la inkawm nel hleinem" ka ti ve tlat.

"Nang pawh nurse ini tih ka hre ve thova, nurse tiin ka ko bik che em ni? I hmingin ka koh ve tho che hi, kan la inkawm dawn chauh alawm" a ti leh mai a.

"Hna leh mimal nun ka kaikawp ngai lo tlat," ka la ti ve fan.

"Kan la hria ang chu."

"Nia, kan la hria ang, kei ni lovin i bialnu chu ngaihsak zawk mai rawh." ka lo ti ve leh hmiah a.

"Ka bialnu chuan min duh dawn leh dawn loh ka la hre lo tlat, amah pawh ka la hrilh lo a, ka la hrilh thuai ang,"

Ka lo na zawk a, mak ka tiin, Ka awmdan chu a hria ang tih ka hlau kher mai, ka khur der der a, ka âwmah hian min hnawh ang mai hian ka awm a, pawnlam chu ka thlir ta daih a.

He mihring ka la hriat chian loh bulah hian engvanga zam hma em em țhin nge ka nih le? Ka thinphu te hi a ran em em ziah ni? He mihring hi ka duh ta mai em ni? Ni lo, ka duh vang ani lovang.

"Arem, khawilai ah nge in in a awm?" Ka phu zawk a.

"Engmaw......e...ih....." ka ti bah nawk nawk a.

"Enge maw ilo ngaihtuah le, khawnge in in a awm?" a ti leh a, ka hrilh ve mai.

Kan in kan thlen chuan dar 9 alo ri der tawh a, "Ka lawm e, mangțha mai le," tih pah chuan motor ațang chuan ka chhuak a, kan gate ah ka lut nghal a, a car thawm ka hriat chuan ka hawi let leh a, a tlan liam tur ka hmu hman hram a.In chhungah ka lut nghal a, ka nu leh ka pa chu an lo la meng a, ka haw min lo la nghak reng.

Thingpui an lo in mek a, kan dinner ei chanchin te min zawt a, kan titi leh luam hnu chuan mu turin ka room ah ka kalsan ta a, ka inthlak a, bathroom ah lutin ka insil leh zawk a, khumah ka inthawlh a ka mu ta kak a.

Kan dinner ei ka ngaihtuah let a, dinner kan ei hma khan alo kal ve dawn tih ka hre hauh lo. Ka hmuh thut khan mak ka ti hle mai a, Muanpuia lah khan țhianah hman ala tum ve leh nghal, Ka huphurh ngei mai. Chutia ka ngaihtuahna a kal vel lai chuan engtiklaiin nge ka lo muthilh ka hre lo, ka harh leh meuh chuan ni a lo chhuak uar tawh mai.

Ka tho vat a, ka inphih fai hnu chuan inhnuaiah ka chhuk a, choka ah ka lut tlang nghal a, ka nu chuan thingpui min lo thlit pahin min lo nuih var var a.

"Nizan i mutui hle ani maw? I hmelah a lang vek alawm."

Ka lo nui ve var var a.

"Nia, ka mutui lutuk a,thawh ka hai phah hial mai alawm, ehe...a va lo tlai tawh ve a, chaw kan ei nghal mai dawn ami," ka han ti ve a.

"Pawi lo,ei mai ang u, i hna ah i tlai hlauh ange, vawiin i duty i tlai angem?" ka nu chuan a ti leh a.

"Ka hre lo, engatinge a?"

"I hna kalna tur lirthei hi i ngaihtuah a ngai anih hi, taxi chan reng chu a buaithlak lo mi? Vawiinah i pa nen en ula, engang nge i duh ang?" a ti leh a.

Choka a ka pa lo phei pah chuan, "Ni e, bawihi, i hman chuan vawiinah kan en dawn nia, in hna ah te tlai palh a awm thei a, chuvang i mamawh alawm, eng motor nge i duh ang?" a rawn ti ve a.

"Scooty ka duh a, lei ka rilruk ve deuh reng reng a, mahse ka thu a tihtlang tawp chu ka hreh deuh sia, in sawichhuak ta sa sa, mamawh chu ka mamawh khawp mai." Ka ti ve nghal a.

Ka pa chuan, "Vawiin ka chawl a, i hna ah chuan ka hruai dawn che nia," a ti a.

Chaw ei khama ka rooma ka insiam hnu chuan inhnuaiah ka chhuk thla leh nghal a, jean kekawr ka ha a, a chungah T-shirt ka ha leh tawp a, ka pa'n min lo nghak reng tawh bawk nen kan chhuak ta nghal a.

Ka thawhna ka thlen chuan Rpi pawh a lo thleng der tawh a, kan inthlak sawk sawk a, kan duty na hmun tur kan pan ve ta nghal a, chutia kan kal lai chuan Maruata kan tawk thut a, min lo be vat bawk a, ani bawk hi kan zui leh tur alo ni a, ka huphurh ngei mai. Mahse ka huphurh ang aiin nuam ka ti, damlo na tak tak awmna ah kan kal lo bawk a, damlo hlim hmel ka hmuh te chuan min tihlim ve veng veng a.

Nui sang hian ka be hlawm a, enge an an tih te kan zawt zel a, rin aiin an țha chak hlawm a, ka lawm khawp mai. Chutia nui sang chunga damlo te ka biak vel pah chuan Maruata chu ka melh zawk a, ani lah chuan min lo en reng chu niin, ka hawisawn rang kher mai.

Dar 1 vela ka duty ka zawh hnu chuan Maruata hnenah chuan, "Doctor, tihtur a awm tawh loh chuan ka haw hma thei angem?" Ka han ti a.

"Awle, ka va thlah ang che."

"Thlah ka ngai lo, ka pa te nen bazar kan tum a,ka pa min hruai turin ka phone mai ang," ka lo ti vat a.

"Min hnial peih ve ngawt mai, tinge ka thlah che i duh loh viau a? Nge min haw hrim hrim zawk?"

"Ka hnial peih vang che ani lo, chuan huatna chhan tur che ka nei lo bawk, chhanna ka pek tawh che kha," tih pahin ka kalsan a, ka kal chu Maruata chuan min thlir zui reng tih pawh ka hria, ka phone ka phawrh a, ka pa number ka dial nghal a.


Ka pa chu ka thawhna damdawiin kawtah ka lo nghak a, ka pa alo thlen chuan a motor ah ka lut nghal a, kan tlan zui ta nghal a.

Scooty an zawrhna kan thlen chuan ka duh ang tak mai ka hmuh chuan tihfel ngai zawng zawng kan ti fel vek a, Licence ka nei bawk a, ka khalh thiam tawh tho bawk nen ka khalh haw nghal a.Mahse ka duh aiin ka la nervous deuh.

"Zawi muang khan tlan la, i hnungah ka rawn zui zel ang che," ka pa chuan a ti a.

"Awle," tih pah chuan scooty chu ka khalh ta nghal a, a tirah chuan ka buai deuh hlek a, mahse a hnulawkah chuan ka thei ta e. In kan thlen chuan ka nuin min lo hmuak a, "Kha zir ngai miah lovin i thiam sa a, a tihzia khawp alawm," a lo ti ve mawlh mawlh a.

"Nia, ka hlauhthawn aiin a thiam khawp mai," ka pa chuan alo ti zui ve zat a.

Inchhungah kan inzui lut ta hlawm a, tunah chuan ka pa hruai ngai tawh lovin keimah ngeiin scooty khalhin ka hna ah ka kal thei tawh ang.


Mu pah chuan ka nui var var a.


**************

[Ngaia]

KAN TIAM TAWH SI...
Chapter - 6



Nitin scooty nen chuan ka hnaah ka kal ve ta ziah a, ka nervous pawh a reh tawh. Engemaw chetsual palh a awm thut thei tih hre rengin ka fimkhur thei hle. Ka chhuah dawn apiangin ka nu leh ka pa in fimkhur tak leh chak taka khalh lo turin min hrilh ve reng bawk. Midang fimkhur loh vang pawhin chetsual palh a awm thei tiin min fuih reng țhin.

Diktei te inneih nan ni 2 chiah a awm tawh a, chawlh ka dil ve a, ka dilna an phal hlauh a,ka lawm ngei mai. Inthurual ang hrimin Maruata nen kan chawl dun si a, mak an ti ngei ang le, Rpi hnenah chuan ka hrilh vek thova, ani pawhin a theih chuan inneih nia lo kal a tum thu min hrilh nghe nghe.

Diktei te inlamah ka awm chawt ani ber, kan buai dun kher mai, kan thawmhnaw hak tur te buaipui ngai nen. An in kan tifel bawk a, a unaute mipa vek an ni bawk si a, an nupuite an fel em hlawm a, rin aiin kan buai lo zawk. Rehearsal te kan nei a, a tirah chuan kan nui nasa lutuk a, kan tițha hleithei lo, a tawpa tawpah chuan kan puitlin ve țâwk mai.

Inneihni tuk alo thlen chuan chawhnu dar 1 ah insuih an tih avangin dar 11: 30 ațangin insiam buaiin kan buai a, ka chau tawh khawp mai. Hetiang tehhrepa pasal neihnia buai chiam a, chau hnep tur chuan ka peih ve ange maw(kan nei ve ngaite anih chuan).


Biakinah chuan dar a ri ta val val mai, kei chu mopa leh a țhian nen chuan kan lo țhu tawh a, monu alo luh veleh kan ding a, Maruata kan en chu a nalh kher mai. Ka mit a tla lo chauh a ni, kan mit a intawng zawk a, ka mur nghal chuai mai. Ani pawhin nalh min ti ve hle ani tih a mitmengah ka hmu thei. Ka chetbuai vek ka hlauh avangin ka inthunun hram hram a, ka mit ka lasawn vat.

Hunserh kan zova, pawnah kan chhuak a, thla te kan la leh a, Maruata nen thla kan la dun chu ka kawngah a rawn kuah a, ka beng bulah zawi sap hian, "I nalh zia hi i hria em? Ka duh lutuk che."

Ka khawng awt a. Maruatan min duh, mak ti takin ka en vat a, ani pawhin min lo en lai tak chuan camera a de zawk a, "In nalh lutuk," tih ri ah chuan kan hawi dun vat a, thlalatu chu alo nui var var a.

Tlailam alo nih chuan Diktei chu Muanpuia te inlama lawi turin kan thlah liam ta. Kan school kal lai te ka ngaihtuah chhuak a, Diktei nena kan inzui nasat zia leh ka rilru natna te ka hrilh ve ber țhin chu tunah chuan Muanpuia nupui a ni tawh, kei ve hi engtikah nge ni ve ang le?

Diktei te inneihna tur atana ka chawlh lak chu a lo zo leh ta reng mai, ka hna ka zawm leh ta a, Rpi chuan min hmuh veleh, "Thlalak ah khan in nalh lutuk, in in hmeh bawk si, in hmelțha dun khawp mai," a rawn ti barh barh a.

"A chhuak tawh mi," ka lo ti nghal var a.

Chutihlai tak chuan Maruata chu alo kal a, "Arem, kan thlalak kha a chhuak a, i duh ve em? Kei chuan ka nei diam tawh mai, lunglen changa en ah.....," nui deuh suk pah hian a rawn ti ve a.

"Kan lang chhe awm si a, en pawh ka en ngam dawn ami le," ka han ti ve a.

"I lang chhe lo lutuk tih i hriat avanga ti mai mai ini lo maw? In chhuang viau țhin teh suh, chuan ka roomah min rawn hmu lawk teh aw," a ti zui nghal zat. A kal nghal nal nal a, a hnunglam ațangin theihtawpa rumin ka melh ringawt.

Rpi chuan, "Va zui nghal vat rawh, a lo thinrim khum che anga, i ngam leh silo ang e,"

"Huh!" tih pah chuan ka zui ve nghal mai. A room kawngkhar chu ka kik a, "Lo lut rawh," a rawn ti a.

Ka lut ve nghal mai, "Engatan nge min mamawh a?" Ka han ti nghal a. Kan pahnih chauhva awm chu ka zam kher mai. A bula ka awm tawh hi chuan ka danglam vat zel a, a hria ang tih hlau reng renga inthup a ngai lehnghal.Tunah pawh ka khur der der mai.

"Lo țhu rawh," tih pah chuan min han melh vang vang a, kei lah chu zam lutuk vangin ka khur nasa mai, ka kut ka humruh vak a, țhutna awmah chuan ka țhu ta vat a, ka ke in min zo lo țep ani.

"Enge i duh a?"

"Nangmah,"

Teh tawp chuan, sawi tur hre lovin ka ka ho mai a,ka ngawi reng ringawt, hnuailam ka bih vat a.

Ka bul chetah chuan a rawn țhu a, "Arem, ka duh che, ka duh lutuk che," thawp sata tih pah chuan ka khabea vuanin min han kuai dak a, ka hmui tuma la fawh ngai miah lohah chuan min han fawp a, chhan let dan pawh ka thiam lo, ka lo dawh tawp ringawt, zeilo min ti ve ngawt ang chu, ka zak lutuk hi khuk ral daih theih nise chuan ka khu ral daih ang mawle.

A hmui lasawnin min en vang vang a, "Tun ațang chuan ka ta i ni tawh, mipa dang reng rengin an hnaih tur che a nilo."

"Min fawhna avang ringawt khan I ta ni turin min tihluih theihna i nei lo," ka ti ve hmak.

"Ka neih leh neih loh chu kan la hria ang chu, chulovah nang pawhin min hnar bik loh kha,"

"Ka hnar loh chhan che chu experience neih nan ka in fawhtir mai che anih kha."

"Lalremruat, min duh ve a ni tih te zawng ka hai hauh lo ania," tih pahin ka țhutna ațang chuan min pawt tho lawp a, min kuah bet nghal hmiah. Ka tal laih laih a,min kuah nghet sauh sauhva, ka hmuiah min fawp nghal nawk nawk. Min fawp rei tial tial a, min fawh dan a thlak thut a,chhan let phut deuha min han fawh takah chuan kei pawh chuan ka chhang let ve lo thei lo,ka taksa a za chuai chuai a,engemaw ka la hriat ngailoh ka nei ang tih pawh ka ngaihtuah phak loh tisa nawmna hian min tuam hlawp hlawp a, ka hai chiai chiai in ka hria.

Min fawh thut ang bawkin min thlah leh thut a, ka pai nawk nawk a, ka in hum ruh țeuh ringawt, ka thaw halh halh a, ngai awh leh nan hun ka duh rei viau. Maruata erawh chu engmah thleng lo ang maiin a inthunun leh hmiah tawh.

"Tun ațang chuan nang hi ka ta i ni tawh, min hnial tawh suh ang che, Kal tawh rawh, duty i zawh tawh chuan i haw thei tawh ang, Oh, i kal hmain kha, thlalak hi la rawh," a ti leh a.

Ngawi rengin thlalak chu ka la ve mai a, ka chhuak nghal a, ka thin a so bulh bulh a, a duh duha min tihkawi theih tur ka ni lo, tiin ka insehruh nasa mai a.

Ka duty ka zo tawh bawk a, in lam panin ka haw ta hmak a, in ka thlen chuan tumah an lo awm lo hlauh, ka nu tak ngial pawh alo awm lo chu ka lawm kher mai, Lo awm se chuan ka hmel ațangin thil diklo a awm tih a hre leh vek anga, engmah ka sawi peih rih lo.

Ka roomah ka lut a, bathroomah lutin ka inbual nghal a, ka hmui te chu ka sil nawk nawk a, ka inbual zawh chuan bathrobe nen ka chhuak a, darthlalang a ka hmel chu ka en vang vang a, ka mitmeng lian kelkawl leh ka hmui chhah lutuk nilo pawrh deuh tarh mai te chu ka melh vang vang a, Maruata min fawhna ka han hre chhuak leh chu ka lu ka thing nawk nawk a, tu mipa mahin khatiang khan min la fawp ngai lo, zep loh chuan nuam ka ti lutuk, a taksa si chiala min kuah a duhtawka min han fawp kha tun thleng pawh hian ka taksa ah a la thawk in ka hria. Kei tehlul mipa la ngaihsak ngai miah lo hian a bak thlen leh zel ka duh hial nia, zahthlak zawk hian.

Ka bag ka han hai a, thlalak kha ka lo theihnghilh leh hman tawh a, ka han en chuan keimah ka ni ta lo emaw ka ti hial a, thlalaka ka landan tehhrep chu leh. Maruata nen chuan induh hmel tak hian kan lo in melh dun hi alo ni a, kha thlalatupa pawh khan 'in nalh lutuk' min tih nachhan kha hei vang hi alo nih dawn hi, ka thaw halh mai.


Rawngbawl hun tawh pawha ka nu alo la haw loh avangin inhnuaiah chhukin rawng ka bawl nghal a, reiloteah ka nu alo thleng ve nghal a.

"Nu, i van lo haw har ve a, khawnge i kal a?" ka han ti a.

"Bazarah ka kal lawk a, ka țhiannu nen kan inhmu a, duh aiin ka lo rei alawm le, i bawl peih tawh em ni? Kan inthlak lawk ange, i pa pawh alo haw ve dawn tawh ang." tih pahin roomah inthlak turin a lut nghal a.

Reiloteah ka pa alo thleng nghal bawk a, nidang aiin a chauh hmel hle mai.

"Bawihi khawiahnge i nu?"

"Roomah ka awm," ka nu chuan alo ti vat a.

"Kan puten naktukah thingtlanga zin turin min ti a, karkhat vel thang a ngai dawn a, i nu ka hruai ang ka ti a, nangmahin ilo awm thei angem?" ka pa chuan a ti leh a.

"Thei mai ang, min ngaihtuah suh u, ka theih loh leh ka țhiannu min riahpui turin ka sawm mai ang," ka ti ve mai a, a ruk tak chuan ka huphurh ngei mai. Ka tellovin an la zin ngai lova, min ngaihtuah pawh chu a awm ka ti tho.

"Han inthlak la, chaw kan ei mai dawn nia, chutia naktuk kan zin chhuah a ngaih dawn chuan kan ken turte siam angai dawn anih chu, Bawihi chu chawlh i dil ve mai dawn em maw nile," a rawn ti ve a.

Ka nu hi nuhrawn mah nise ka nu tak ai pawhin min hmangaih zawkin ka hria. Kei pawhin ka hmangaih, ka pa te hi a hmangaihin a duat thiam em em a, ka pa pawhin a hmangaih hle bawk.

Zan ka han mu chu ka ngaihtuahna a vak kual nasa mai, ka pate zin tur ka huphurh lutuk a, ka khua a har dawn lutuk. Maruata lam pawh ka ngaihtuahna ah a lut hlei thei lo.

Muhil thei lovin ka let ka let a, nu leh pa ngai rual pawh ka ni tawh lo a, pasal nei rual ka ni ve tawh asin mawle tiin ka in ngaihtuah a, ka paukhauh ve viau emaw ka lo ti țhin a, ka nu leh pa tel lo a awm chu ka lo zuam ngang lo a ni e.

*****************