LAST KISS CHAPTER-2

[David Nu]

LAST KISS 2

Chapter 2

Hmanhmawh takin ka hmaa khawngkhar lianpuiah chuan ka lut a, hmeichhe pakhat chuan "Nula puih theih na che ka nei em?"

"Tehreng mai, P.A hna interview turin ka lo kal a," a nui suk a. "Chhawng linaah aw."

Hmanhmawh takin ka kal hlawk hlawk a, ka thlen chuan hmeichhe pakhat rai puar, dul lian tak fa hring țep tawh hmel pu chuan, min melh ralh a, "Enge mamawh i neih le?"

"P.A hna interview tura lo kal ka nia," a țhen sak a, a hmui a ti pawrh tarh a.

"Interview hun chu a tawp tawh. Hun pawh vawng dik thei lo chuan hna
thawh i tum chu a ni sia," a țawngkam nel awm loh tak chu ka hai der lui ve tlat bawk a.

"Hetiang company lian takah te chuan interview tam tak an awm ka lo ring a, in la zawh mai pawh ka lo ring hleinem," ka ti let ve sak bawk a.

Ka rilru chu abuai tak zet, ka inchei uluk teh reng nen, vawi li lai mai interview hmachhawna hnawl ka nih hnuah a vawi nganaah pawh interview hman lo vin hnawl ka ni leh nghal ang maw? Thlasik lai mah ni se ka sa hut hut a, ka kut thlan chu ka nuai reng bawk a.

"Ka pi, he hna hi ka mamawh tak zet a ni khawngaihin," ka tih pawh chuan min ngai pawimawh vak lo hle tih a hriat theih.

"Nula, interview hun chu a tawp tawh. Haw leh tawh zawk mai rawh ka hun min khawhral tir lo teh. Kan pu hian hun vawng dik lo hi a ngaina miah lo, meeting pawimawh tak a nei dawn a, tih buai tum kher duh suh."

Ni lo! Haw mai thei ka ni hauh lo, ka huaisenna zawng zawng sawm khawmin, "Ka pi ka haw thei lo a ni. Khawngaihin" ka luhlulna chu ka chhuah lui ve tlat bawk a.

Min nin hmel zet chuan ngawi rengin min en kar a, a pu room niawm takah chuan a lut zui nghal a, ngawi rengin ka lo nghak a, ngaihtuah ber pawh ka nei hlei thei lo, ka zam tak zet a ni.

"I lut thei ang," ka bulah chuan alo ding reng tawh zawk a, ka lawm lutuk chu au chiam mai ka duh hial, ka hlim hmel a hmuh chuan a khi ve suk reng a ni.

Diktak chuan ka tling dawn emaw tling lo dawn emaw pawh nise, interview hmachhawn lo va haw leh mai chu ka tum lo bur. Ka luh chuan an pu chu ka hmu mai lo, dinglamah ka kual leh hnu chuan room zau tak mai, dawhkan nalh tak hma a lo țhu chu ka hmu chiah a. Ka zam lutuk chu ka ding ngawi reng a, ka kut dah dan mai tur pawh ka hre lo hial a ni. Luhlul chhuaha ka lo lut ta kha ka inchhir rum rum mai, engvanga ka pain hna min hmuh sak theih reng laia kawng harsa zawk thlang tlat nge maw ka nih le? Ka in haw rilru hle bawk.

"Tunge i hming?"

"Bringet Mendler ka pu."

"Interview hun a ni tawh lo tih i hre reng si a" aw thûm tak chuan min zawt ni lo vin min be zawk a ni. A țhu ngil nghal a, chhan tuma ka ân zuau lai chuan, "P.A hna hi i thawk tawh ngai reng reng em?"

"La thawk ngai miah lo ka pu."

"A nih leh eng hnate nge i thawh tawh țhin?"

"Eng hna mah ka la thawk ngai hauh lo mai."

Ka chhânna chuan a ti lungawi lo tih a hmelah chuan alang reng a, a mit chu a ti zim san a, "Hnathawh tawh engmah i nei ngai lo a, interview hun ah pawh i rawn tlai bawk." Min en chik em avang chuan ka zam zual hle a, ka khawchhung chu a khur thei hial a.

"Ka pu, khawngaihin he hna hi ka mamawh tak zet a ni. Bulțan nan," ka aw khur tur chu ka veng hram hram a, a hmaa lehkha chu min kawh hmuh ve bawk a.

"I number ziak la, i tling anih chuan naktukah an lo hrilh ang che."

Dik tak chuan min hrilh dawn lo tih hre mahila ka ziah ve tho chu angai si a. Kei hi ka buai tak zet a ni, engtikah mah ka tan hun țha a inhawng ve dawn lo a nih hi. Ka haw hunah ka pa hnenah an company a min sawi pui tur chuan ka ti tawh ngei ang.

"I ziah zawh tawh chuan, kal ila hun hi ka nei tam vak lo ania." Ka bulah chuan alo ding der tawh lehnghal, a țhut laia a lan dan ngawt chu a ni lo, a lian hle mai. A sam kir țep; dum hlap leh tle sar chu a inhmeh hle bawk. A mit mu uk kharh chuan ka ke ațanga chhip thleng chuan chiang zetin min en a, a chhuak zui nghal mai bawk a.

A hnungah chuan muangchangin ka zui chhuak ve nghal a, hmuh tur reng a awm tawh lo. Ka thaw hawk a, ka zam lutuk vanga ka taksa țang țeuh leh sa pup pup te chuan ziaawm lam an pan ve mek bawk.

"Alice ka nia, P.A hna chelh mektu, nau ka neih dawn avangin he hna hi ka chhunzawm thei tawh dawn lo a," nui sang chuan min lo bia a. "Enge i interview chu a an le?" a tih zawm zat a.

Za lo tak a nui lui chung chuan, "Ka tlin chu ka ring lem lo khawp mai, ka kal mai ange," tih pah chuan step awmna lam chu ka pan thla nghal a.

Pawn ka thlen chuan taxi chu phar dingin, ka awmna sawi lam chu panin kan tlan chhuak nghal a. Thli thawin min chhem chuan pawn khawvawt tak chu ka hre chhuak leh chauh a, kha hmun uap zet leh min ti zam em emtu, kha building kha chhuahsan ka chak tawh tak zet bawk nen, ka thawveng huai reng a ni.

In ka thlen chuan ka nu le pa te pawh an hnathawhna ațanga an ban ala hun lo bawk nen, muangchangin ka inthlak a, inbualna kûangah chuan tuilum chu herh hawin ka in chiah nghal a. Ka chau bawk nen ka chhing diar diar a, tun hnai maia ka hun tawn te chuan min ti chau a ni.

Naupang te ka nih lai ka hriat theih ațang a ka nu leh pa te in hmangaih tak, in hauh chang chu an nei ve ngei ang mahse, ka hriatah an la in hau ngai lo. An thlazar hnuaia hmangaih tak, duat tak leh keh thei dawma min dawm țhin kei an fanu hi hnawl ka la ni zel hi na ka ti a ni.

Vawiina interview ka neih zawh takah pawh khan hnawl ka ni dawn tih chiang takin ka hre bawk nen, kha'ng zawhnate kha a mawiah min zawt ve mai a ni.

Bualkuang ațang chuan chhuakin ka thawmhnaw te chu ka inbel nghal a, pawna kan pangpar mawi tak tak te chu ka tifai ta zawk a. Ka nu chu alo haw hun a nih țep tawh avang chuan inchhungah lutin thingpui chu ka lum leh ta zawk a. Ka pa erawh alo haw tlai țhin thung.

Reilote-ah khawngkhar chu riin, "Bawihte ilo haw tawh a ni mo? Vawiin lam chu i rawn tlai ka rin teh reng nen," ka nu chuan a rawn ti lut nghal a.

"Thingpui ka lo lum a in rawh, vawin lam chu min zawt buai duh suh." Ka chhanna vangin ka nu ka chhun em em chuan chiang takin min en a, min khawngaihna a mit ațanga lo lang chuan khawngaihthlak ka nih zia min hriat chhuah tir a, ka duh lo tak zet.

"Ka room tihfai a ngai," tih pah chuan room lam chu ka pan ding a, awmpui kan neih loh avangin ka tih dan țhin a ni reng bawk. Ngui bur leh tha tho lo zet chuan ka tifai a, ka rilru erawh ka thiltih tluang ve thei miah lo chuan a luah khat hle thung si. Ka phone ri chuan min ti harh zawk nghe nghe a ni.

"Hello, Rose tun angah te min lo call ka lo beisei hleinem."

"Bridget, ka lung i ti awi lo tak zet, naktuk hi ka birth day a ni tih i hre tawh lo a ni ngei ang, naktuk zan dar 7-ah birth day party i lo kal lo a nih chuan ka lawm lo hle ang, biak kual tur ka ngah lutuk," tih pah chuan phone chu a dah daih lehnghal.

Rose, hlim thei tak leh zangkhai vah reng kha ala ni tih chu a aw ațang chuan ka hre thei a ni. Tet te ațanga ka țhian țha ber mai, ka buai em vangin a birth day pawh chu ka lo theihngilh tawh zawk a, ka in thiam loh hnu hnawh hle bawk. A kum 19 na piancham a ni bawk, ka kal ngei ang. Ka hun tawn hlimawm loh zet karah hian intihhlim pawh ka mamawh alawm, ka kal lo anih chuan a thinrim hmel tur ka mitthlaah alo lang a, ka hmachhawn ngam dawn lo a ni.

Ka nu leh pa te hlim taka lo inkawm chuan min hmuh chuan "Bridget ka fanu, hetah lo kal teh vawiin lam chu enge a an?" Ka pa chuan min lo ti a.

Ka hmui ka ti pawrh tarh a, "Ka pa naktuk chu in company-ah chuan hna chu min lo dil sak mai dawn nia."

Chu ka chhanna avang chuan vawiina ka hun hman dan lam chu zawh buai kher ka ngai lo tih a hrethiam ve mai a. "Ni e, kan pafain nitin kan kal thei ang a, nilenga ka bulhnaia i awm hi ka duh ber pawh a ni. Ka fanu hmelțha tak mai hi tu emaw hian an tihnat mai ka hlau em em si a," a tih zawm zat a.

Dik tak chuan ka pa te company-a thawh chu ka phur lem lo, plastic lam siam chhuahna company lian tak mai 'SPLENCER' company a ni a, ka tui ve vak lo a ni.

"Ka pa, naktuk hi Rose birth day a nia, kal ve ngei ka tum asin,"

"Bawihte kum 18 i ni ve tawh a; puitling i ni tawh, i duh duh chu i ti ve thei tawh alawm, zalenna i nei ve tawh e." A țhen suk bawk a.

Ka nu chuan, " Bridget i kal hunah chuan Rose chu remchang hmasa berah zanriah kil turin lo sawm ang che. Ka ngai ve tawh tak zet si a," a mitmeng chu a chauh hmel hle bawk.

"Ka lo sawm ngei ang," tiin ka chhang ve bawk a. Zanriah eikhamah chuan ka pa hna duh tak mai, in lamah pawh hna thawk reng țhin chu zanin chuan a thawk tlat lo, hna a nei lo a nei ngei ang.

"Ka nu chuan in pafa a hna inthawh dawn chuan awmpui kan lak mai a ngai tawh dawn a nih chu.."

"Duhtak, kan pafain hna kan thawk tawh dawn a, nang te chu hahdam takin in lamah lo awm tawh mai ta che. Nitin mai a naupang zirtir chu a hahthlak hle awm si a," ka pa chhanna chuan a ti lung awi vak lo, ka nu naupang ngaina tak chuan a hna chu bansan a tum mai lo tih a mitmengah chuan alang chiang hle.

A mitmeng pangchang tak chuan a en hu a, "Jack bansan mai ka la tum lo, a ti hriam hraih bawk,"

"I fanu nen a in luhlul zia leh in pangchang hmel te hi hmuh a nuam țhin alawm," ka pa chuan khi suk chung chuan a ti ve bawk a. Kan nui dar dar a, tunkar kal ta vel ațang khan ka vawikhat nuih leh na a ni hial ang, nuih dan erawh ka la hria a ni.

"Bridget bawihte, va mu tawh rawh, a tlai hle tawh a nia, i nu nen hian sawi dun tur kan la nei, kan lo mu ve nghal ang," tih pah chuan ka chalah a rawn fawp a. Ka nu leh pa te ka mangțha hnu chuan ka room lam pan chuan ka chho nghal bawk a.

Ka mut hnu chuan ka thil tawn te ka ngaihtuah a, hna lamah ka rilru ka seng nasa a, ka thin a rim hle a, ka taksa paw'n a tuar tih ka hria, hna chu hmu thei lo mah ila ka pa vang tal pawhin hna thar ka thawk dawn tho a, a țha tho e.

Ka phone ri nawn chhen chuan min ti harh a, tun ang hunah te tunge mawle? Sana chu ka bih thuak a, dar 6 chiah a la ni lehnghal, ka tan chuan ala hma em bawk a ni.

"Hello"

"Hello, Bridget i ni em?"

"Aw ni e, enge ni ta?"

"BRANDROOT company ațangin a nia, vawiin dar 10-ah company i lo thlen angai i hna dil kha i hmu a nih chu."

Chu aw ka lo hriat tawh, Alice-i aw ngei mai chuan aw zangkhai vah chuan min lo hrilh a. Mak ka ti lutuk chu chhan mai ngaihna pawh ka hre lo, ka harh chhuah chuan phone chu a lo dah daih tawh niin, ka au chhuak hial a ni.

Choka lam panin ka tlan thla a ,ka nu chuan, "Bawihte i va tho hma em em ve, thil dik lo a awm em ni?" a lo ti a.

"Nu, a dik lutuk zawk" tihpah chuan ka pawm chûk chûk a, ka nu mit menga lawmna leh hrilhhaina lo lang chuan min ti lawm leh zual sauh bawk. "Nu ka tling ve a nih chu, min lo call a, ka tling ve mawle!!"

"Ka fanu hmelțha tak hian a ti thei ngei ang tih ka hria alawm." Room lehlam ațanga ka pa lo kal phei chuan a rawn ti lut nghal a, min rawn kuah nghalin min lawmpui tak zet tih a hmelah chuan a lang a ni.

Tukțhuan chu hma takah kan ei a, kan ei fel hnu chuan ka pa chuan, "Tlai lam ațang chuan awmpui kan nei tawh dawn a, in lam in buaipui angai tawh lo ang." Mak ti tak in ka en hu a.

"Mak ti mah ta che bawihte, nizan i mut hnu khan a be fel vek tawh alawm," ka nu chuan a lo ti a, "Han insiam tawh rawh ni hman nuam le." Tih pah chuan an in zui chhuak nghal a.

Ka tlai tur a ni lo, hmanhmawh takin ka hmai chu ka chei a, ka kawr ngainat em em mai; ka khup khuh chang chang, hring duk hlarh chu hain, coat fual dum ka nuin min lei khup khuh chu ka ha bawk a. Pheikhawk sang hring chu bunin ka tlan chhuak nghal a, taxi chu phar dingin ka kalna tur lam chu sawiin min panpui nghal bawk a, hmanhmawh tur chuan ka tur leh sek țhin.

Ka phûrna chu, ka huphurhna chuan a delh rit mah zawk a, ka hna thar tur avang chuan ka rilru ka sawr bingin, ka zam hle bawk. Keimah ngeiin ka hna tur ka hmu ve thei chu ka lawm em em a, ka rilru chu a kal ding em em si. Pawn boruak chu a vawt nge a lum tih pawh ka hre lo hial a ni.

"Miss, kan thleng tawh e," ka phu deuh zawk a, chhuak zui nghalin ka hma a khawngkhar lian takah chuan a, chhawng lina lam chu ka pan chho nghal a, hmanhmawh taka kal ka nih avang chuan ka thaw hlawp hlawp a, thlasik khawvawt tak chu ka tan chuan a vawt lem lo khawp mai.

'Morning, vawin chu i hlim tih i hmelah a lang alawm, ilo tlai leh ka rin tehreng nen," nui sang chuan Alice chuan min lo bia a.

"Ka hlim rualin ka huphurh hle bawk, tunge mahni hna țanni-ah tlai duh teh lul ang ni," zangkhai tak chuan ka ti let ve nghal a.

"I hming min la hrilh ve miah lo nia"

"Nidawn tak, Bridget mendler ka ni e," vawiin chu nimin lam aiin alang fai daih zawk lehnghal, nge keimah ka hlim em vang zawk hian ka hmu țha zawk ni.

"Awle, Bridget hun ka nei tam tawh lo, i hriattur pawimawh te ka hrilh che anga, ka kal a hun țep tawh a ni," min melh ran a. Ka lu ka lo bu ve nghat a. Rei fe min hrilh hnu chuan henu hian a hna hi a tlin tak zet tih ka hre mai, a duh khirh zia leh a țawngkam chhuak ațang chuan a pu tan hian hlu tak turah ka ring nghal ringawt a.

"Bridget, a tawp nan ka pu hian coffee thkum a in ngai lo tih i hre bawk dawn nia," a thusawi te chu naupang thu awih tak ang maiin, ka lu ka lo bu nghut nghut zel a, chu chuan a ti lawm a ni ngei ang, a khi leh suk țhin.

"Min lo zui lut rawh le." Room kan luh dawn chuan kawngka chunga lian tak mai a, RAFE CHARLWOOD tih inziak chu ka hmu a, nimin lamah kha chuan ka hmu hauh si lo, ka buai vang leh ka zam em vang te pawh kha a ni ta ve ang.

Ka pu thar tur chuan coffee chu alo in mek a, a suit vut buak rawng a hak chuan a ti lang lian em em leh nghal a.

Alice chuan, "Ka pu a hriat tur ang zawng zawng chu ka hrilh tawh a, kal mai ka lo tum tawh asin," a han tih chuan a pu mitmeng chu a dul rawih nghal thei hial a.

"Alice-i hna i tlin em em a, ka ui tak zet che a ni. A ui tih chu a hmelah pawh chiang takin a lang, naute i neih hunah min lo hrilh ve ngei ka beisei, hnazawm leh i duh anih pawh in min lo hrilh nghal dawn nia," a tih zawm nghal a.

A hna a tlin tih chu kei paw'n ka hria, Alice aiawhtu tur ka nihna hian ka phur rualin min ti hlauthawng thei hial zawk tlat. Alice ang hian ka tlin ve angem? Chu zawhna chu ka lo inzawt mawlh mawlh a, ka rilru ka kawm nasat avang chuan enge an sawi pawh ka hre lo hial a ni.

Alice chhuak tur kawngkaa ding chu ka va hmu a, lo hawi letin, "Duhsakna ka hlan a che Bridget,"

"Nang pawh le Alice," ka tih rual chuan a chhuak zui nghal a.

Ka pu thar lam ka en chuan a hmelah chuan a ui tak zet tih a lang, kawngka lam chu a thlir reng a, a kut lian tawk chu dawhkanah chuan a dah run bawk a.

"Ka pu, he hnaah hian theih tawp ka chhuah ang," hnem deuh nana ka tih chuan nui sak chung chuan a rawn ding a.. A lian tak zet a ni.

"I theih kher ka ring lo Bridget, he hna thawktu tur hi ka la fel tawh. Mahse, a pa a damloh thut avangin nizan khan an ram Italy-ah an haw a ngai ta si a ni." Chiang zet leh uluk taka min en chung chuan a ti a.

Ka rindan chiah a ni, engemaw thil awm lo se, kei hi min lak ngawtna chhan tur a awm lo reng reng, a enga pawh chu ni se, he hna chelhtu ka ni tho a, ka lawm tawk em em tho. Chhân ngaihna ka hriat loh em avang chuan ka ding mawl tawp a.

"Coffee i duh leh em?" ka ti ngawt a, nui lui tih hriat tak chuan a aia chiang leh zualin min melh run a, a hlauhawm mah zawk a ni.

"Ka duh tawk tawh phawt mai ange, i hna va thawk tawh rawh, țul lova hun khawhral hi ka ti lem lo a nia, bakah i hna thawhnaah hian mimal nun lo keng lut hlek suh ang che."

Ngawi rengin ka hnathawhna tur lam chu ka pan a, ka pu thar tur chu a nelawm chiah lo kher mai! Alice khan a lo tuar reng thei chu a ni si a, kei paw'n ka tawrh chu angai ve ngei dawn a ni. Ka tih tur te chu ka ti ve zung zung bawk a, he building hian engvanga boruak uap tak keng tel tlat nge maw a nih le?

Meeting nei tur a nih avang chuan hrilh tura ka lut chu a lo awm tawh hauh lo mai, a chhuah lai reng ka hre si lo, a meeting neih tur hrilh hriat a nih loh chuan a lung awi lo hle ang, bathroom-a ka luh hlan khan a chhuak a ni ngei ang le, biak pawhna mai tur lah ka hre der si lo.

Rang takin ka chhuak a, in hnuai lamah chuan ka tlan thla nghal a, he company-a thawk mi tam tak te chu an buai tih hriat takin an phe suau suau a, biak ber tur pawh ka hre lo hial reng a ni.

"Min lo hrethiam lawk teh, Mr. Rafe hi biak pawh mai ngaihna ka hre si lo a, min pui thei em?" Pa cher sang lam chu ka zawt ta tawp a.

Mak tih hmel takin min en hu a, "Tu nge i nih a?" A lan dan chu hmuh thiang lo hmu te pawh a ang mah zawk.

"Bridget, a P.A thar ka nia, meeting a nei țep tawh sia," chupa mit bial tak chu a nui huk a, a mit bul chu a chuar nung bawk.

"Bridget kei ni hian kan pu hi enge a tih a, khawiah nge a kal hrilh hriat kan ni ngai hauh lo mai, a P.A i nih chuan chu'ng te chu hre tur i ni a sin, i hna i thawk thiam lo zawk em ni? Ban mai i nih loh nan thupha chawi dan tur va ngaihtuah zawk teh khai."

Chupa teh hrep ka zawt chu ka inchhir hnuhnawh hle mai, chhang let tur chuan ka rilru a hah mah mah. Ngawi reng chuan ka awmna lam pan chuan ka chho a, ka pu thar thinrim tur zia ka ngaihtuah a, eng ang taka meeting pawimawh nge a nih ka hre der si lo. Mahse, thiam lohna ka nei lo, a kal dawn te chuan min hrilh hre ve tur alawm, ka inhnêm chawp mai a ni. Ka thla a muan phah hauh lo. Rei tawk fang ka hna ka chhunzawm leh hnu pawh chuan ka rilru a nuam thei chuang lo, alo haw hunah engtin nge ka hmachhawn ang.

Sana chu ka en zauh a, dar 4 a ni der tawh, kei hi ban leh nghal mai tur ka ni chiang khawp ang le. A room-ah chuan a cell phone emaw amah biak theihna tur a hnutchhiah mai thei a sin, ka lut a, ka dap rawk rawk a. Ka rilru buai lutuk chu ka kut te pawh a khur nasa hle a ni. A dawhkana lehkha pawimawh tih hriat ngawih ngawih te chu ka dap bawk a, ka thaw leh hak țhin. Ka kawchhungte chu a sa hal a ni ber mai.

"Nangkha engthil nge i tih?"

Chu aw țeng chhuai, thinrim tih hriat ngawih ngawih chuan min ti phu nasa lutuk chu ka per sawn dawrh thei hial a ni.

"He tah hian P.A hna thawk tur ni lo in, rukruk lam hna thawk tur a lo kal em ni i nih?" Ka hmaah tak chuan a ding a, kan in hmachhawn chiang kher mai, a lian em em mai si, a dar pharh hlai tak leh a kut hrawl tak te chuan min ti hlau em em a, ka khur chu inthunun ka tum a, ka thei ngang lo a ni.

"Nang hi hetah hian i hlawkna tur engthil mah i hmu lo ang," anchhia a phuh chhuak sap a, ka hlau lutuk chu ka ding khur tawp a, chhân ngaihna reng ka hre lo.

A aia ring mah chuan, "Min chhang ta che? Zawhna ka zawt che a nih chuan min chhan nachang hria ang che." Ka phu nasa lutuk chu a țhut phah bân chu awm lo se ka tlu chiang khawp ang.

"Ka pu, meeting i neih tur kha hrilh che tumin ka lo lut a, i awm si lo a, biak theihna tur che ka hmuh takin ka tia ka zawng ta a nih hi" ka ti bah nuai a, ka țap țep bawk. Ka aw te chu a lawi vek tih kei paw'n ka hria, ka nu leh pa te paw'n min la hrawk ngai si lo a, ka hlau tak zet. Rukruk tumah min la puh leh nghal!

A khabe tuai puat pah chuan a nui ri huk a, min tih elhsena nui tih pawh chiang takin a lang, "Nang hi ka thu lo a ka room a i lut leh a nih chuan i lakah tubuai ka siam ngei ang, nang lo hi he hnathawk tur thiam tak tak leh thawh chak tak an tam tih i hria ang chu. Rukru tur chuan ila naupang mah mah, a țhutphahah chuan chauh hmel tak in a țhu nghal a.

Ka lu a hai muai muai a, ka nghet lo tak zet, a bul taka ding ka ni bawk si, thawk lak pawh a harsa tak zet a ni. Chet sawn mai harsa ka ti, ka mualpho ka hlau lutuk tlat, zawimuang chuan engmah sawi lo a kal mai ka tum a.

"Ka thu an hmuh hma loh chuan an kal ngai lo asin." A ti hriam hraih a, "Bakah kan la sawi fel hleinem, ni lawm ni?" To be cont...