LAST KISS CHAPTER-4

[David Nu]

LAST KISS 4
(Competition)

Chapter 4

Tual zau tak chu a eng em em mai a, dawhkan nalh tak taka in tur te chu a tui hnai hle ang, a țhen an lâm a, a țhenin an in bawk a, a țhenin eng engemaw sawiin an ti ti bawk. Ka rin ai daiha Party lian ani, a tih țhan dan a ni reng bawk a. Rafe hmel hmuh tur chu a awm tawh miah lo.

"I lo kal thei chu ka lawm tak zet Bridget bawihte," chu aw chu pate John a ni. Thisena inzawmna nei lo mah ila ka pa țhian țha tak chhungkhat ang a awm kan ni. Min rawn kuah zauh a, a nupui Caroline chu kum 6 ka nih laiin a mu hlum anih kha, media lam chuan mahni inthat ang maiin an chhuah a, a tuar hle. Tun thlengin nupui dang ala nei ta miah lo, "I nu leh pa te an țha maw?"

"An țha a lawm," John mit menga fanu ang tak maia hlim sarh chuan min en a, ka hmuh hnuhnun ber kha chuan a cher țep anih kha, tunah erawh ngai a awh leh tawh tih ka hria, a sa inphut mawi tak mai chu a coat hak nalh tak nen chuan a inhmeh hle a ni.

"I rawn tlai deuh na a, hlim taka i hman ka besei, kan ngai tawh tak zet si che a, pawi i tih loh chuan zanin chu hetah riak nghal la ka duh bawk, i hawna tur a hla hle si a." Ka chhân hma chuan tu emaw chuan a rawn biak tak avangin, "Ka lo hmu leh ang che," tiin min kalsan nghal daih a.

He hmun boruak hi a nuam tak zet mai, duhaiin ka chau deuh tih mai loh chu. Wine chu ka ban a, ka in ve thei tawh in ka hria, kum sawm pariat ka ni ve tawh alawm. Ka in khawlh a, tui erawh ka ti lem lo. Mahse, ka taksain a mamawh tlat, engzat chiah nge ka in ka hre mai tawh lo, ka lu chu a vir muai muai a, ka piah lawk a thim lam chu ka pan chawp chilh ngal ruak a.

Music, muang fan raiha ri chu hla tak a ri ang maiin ka hria a, tu te emaw țawng thawm pawh chu chiang lo ruaiin ka hrethei. Ka luak a chhuak tak zet tih chu ka hriat chiang awm chhun a ni. Hna ka thawh nasat vanga ka taksa chau tak leh zanriah ka ei tlem em vang chu a ni ngei ang, ka wine in chuan min hneh mah mah a ni.

Ka harh deuh a; a thim ruih a, engmah hmu chiang lo chuan ka chhing leh nghal a, ka luna lutuk chu ka dawm vawng vawng a, ka âwmah hian thil rit tak a awm tlat, engthil chiah nge le?

"Mahni taksa zawh tawk pawh i hre lo chu a ni sia, in dân i zir phawt a ngai a nih kha," aw thawp sat chuan a rawn ti a.

Ka phu nasa lutuk chu khum ațang chuan ka in perh tho nghak vat a, karei..! Saruak in maw ka awm a!!?

"Engthil teh hrep nge i tih hi, nang hian min kidnap a maw?" Ka ding khur hlawk hlawk a, ka aw te chu a khur tih kei paw'n ka hria, ka sa pup pup a, ka thinrim lutuk chu ka puakdarh mai dawnin ka hria a ni.

"Kei hian ka kidnap che a maw?" Nui lui tih hriat tak chuan a rawn tho a, light chu a on chhunzawm zat bawk. Thinrim tih hriat takin a in seh ruh a, a hmel lan dan chu a rapawm hial zawk a.

"Anih hei hi eng thil nge?" Ka lu chu dawm in nizan lam chu ka hre chhuak uar uar a, Rose piancham party a huaihawtah kan kal a nih kha. Wine ka in leh a, chu bak hriat ka nei hauh lo. "Nang hian hmeichhe che thei lo chu remchangah ila a maw?" Ka khur zual sauh bawk.

Ka hmaah tak chuan a rawn ding luah mai a, a âwm phiar fat leh a dar pharh hlai tak te chu, en loh hram ka tum a, a rim pa tak chuan ka hnar chu a verh hle bawk. A sam chu tuai chho puatin, a mit mu uk kharh chuan chiang takin min en a.

"Hmeichhe lakah remchang ka la ngai hauh lo," a ti nghet charh a, ka sam chu zawi muanga rawn zutin, "Nang hian zan khuain, min hrem a sin. Tunah chuan ka hrem ve tawh zawk ang che."

Zawi muanga lo kun hniam in, ka hmuiah chuan dim takin a rawn fawp a, dang tur ka ni tih ka hria, mahse ka thei hauh lo. Ka taksa chu a hit mur mur a, eng emaw sawi fiah thiam si loh hian min tuam nghal chiai a, in la hrang nghal daihin min elhsen tih hriat tak chuan a nui lui sak a.

"Tun maiah khan i thin a rim hlein ka hre sia," khumah chuan duh dah taka țhuin, min en chik em em mai leh nghal!

Ka thinrim lutuk chuan "Engthil pawh thleng se, khawnge ka thawmhnaw, engvang a phelh nge i nih? Nizanah enge ka chungah i tih?" Ka ti phiar phiar mai a, insum thei ka ni hauh lo. Min fawp a, hnar tur ka nih laiin ka hnar mai thei si lo, ka saruakna a hmu bawk, hepa hian engthil nge ka chungah a tih?

Min hmusit tih hriat tak chuan a nui huk a, ten hmel zeta min melh chung chuan, "I thawmhnaw te chu nizan khan Clare-i ka paih tir daih tawh," a ban avai thla thuak a. Lungkham neih loh hmel zet chuan khumah chuan a mu nghal daih lehnghal!

"Engvanga paih tir nge i nih? Mr Rafe, i lakah hian thubuai ka siam thei tih i hria ang chu maw?"

Engahmah ngai lo tih hriat tak chuan, "Ka fawh leh kha i beisei tih min hrilh miah suh," a aia rum zawk chuan min rawn melh a, "Nge, ka khum hi min țawmpui zawk dawn?"

Ka thinrim lutuk chu ka mittui chu ka khap per sawk a, "Nang hi engtiang tak a, tenawm nge maw i nih ciah le? I hnuaia thawk te lakah hian remchang ila țhin a maw?"

"Ngawi hmak rawh Bridget, ka thinrimna hi cho chhuah tum kher suh, ka hnenah hian lawmthu sawi tur zawk a sin i nih, i duh chuan thu buai chu siam ta che, i thawmhnaw lak tlak loh zet, luak tam tak kai, rim chhe zet kha an paihnaah ka hai let leh a ngai dawn a nih chu. Ka thawmhnaw pawh telin." A thinrim zia chu a mit mengah chuan a lang a, a meng de sar sar bawk.

Kei hi ka luak a; ani hian min buaipui a, ka luak avangin a thawmhnaw te pawh paih tel a ni a maw? A zahthlak hle mai "Min buaipui angai kher hleinem, Rose bulah khan min hnutchhiah thei alawm, him pawh ka him zawk ang."

"Chuan, kei hian hmeichhe luak avang a rimchhe tak chu a chungah thil țha lo ka ti-ah i ngai amaw?" A thinrim insum tih hriat tak chuan a ner nawk a.

Ka thil in avanga buaipui ngai chu min buaipui a, keimah vangin a kawr man to tak te pawh paih a ni tel bawk. Ka chungah eng thil țha lo mah a ti lo tih a sawi chian takah chuan ka thawveng hawk mai, kei hian lawmthu sawi tur ka nih mai laia engvanga ka kâ chu khuahkhirh ang maia chip tlat nge maw ka nih chiah le?

"Haw ka duh a ni, ka haw angai ka nu leh pa te...."

" I pa chuan a rawn phone che a, ka sawi fel vek tawh, tunah hian dar engzat nge i hria em?"

A khum bul a sana chu ka en zauh a, "Dar 2," ka phun sap a, ka ngaihtuahna chu a buai tak zet, ka ding reng rigawt mai a ni.

"Nangmah vanga tlaivar chu ka tum lo bur, i duh leh tikhan ding reng rawh, i duh chuan ka khum hi min țawmpui thei ang," a țhen saka leh lam hawi chuan a muhil ngal emaw tih mai tur chuan a thaw ri suk suk a.

A bula mut ai chuan bathroom a riah pawh ka duh fe zawk, hepa kher hian min buaipui chu a ni si, ka saruakna zawng zawng pawh a hmu chiang hle awm si a.

"Ti teh; zak thar vel duh suh, chiang takin ka hmu vek alawm, kha tah khan i ding tlaivar dawn em ni? Hmeichhe saruak ka vawi khat hmuhna pawh a ni lo" ka lam hawi chuan hnehsawh tih hriat tak chuan a hmui a pet sawi kual vel a.

A muhil tawh emaw ka tih vang chuan ka phu deuh zuk leh nghal, "I bula mut ai chuan hetah hian ka lo ding zawk mai ange," boruak chu a uap em em mai a, ka saruakna chu khuh ka mamawh tak zet a ni.

Khum ațang chuan inthazo fahran chuan a ding nawlh a. A pian nalh tak leh a bawp sei tak, thahrui ngah hmel tak chu hmuh hmaih a har ngei mai, chu'ngte chuan min ti hlau ni berin ka hria, ka hmai chu ka hup ta hmiah bawk a.

Min khawih mai tum hmel chuan min melh run a, ka hlau lutuk! Ka țe chhuah hma chuan min kuah bet chawt a, min kuai vir mawpin a âwma min pawm beh pah chuan ka kâ chu a hup bet ta hmiah bawk a.

Ka tal nasa mai a, ka thawchham chu ka meng pawng nasa hle bawk. A chak kher asin. Nidanga a lan dan ringawt chu a ni hauh lo, a chê lah chu a rang nasa em em mai si a, ka ke chu a rawn kherh thlu a, bang nghengin min nem țhu zui hnawk a, ka hmui la hup reng chung chuan a lo thu hniam ve nghal a.

"Ngawi hmak rawh," a ti leh sup a.

Boruak hip tur ka mamawh zia hriain a kut chu ala sawn a, ka thaw hawk hawk thei hial a ni. A kut chu ka hmui zawnah dahin a kutzungchal chu a rawn dah leh nghal zat a, ka bawp sei thlarh leh ka âwm vel chu a en chik em em zui, ka theih ang ang chuan ka lo inhliahkhuh ve țawk țawk bawk a.

Rang tak chuan a in la hrang nghal vat a, thawmhnaw dahna lian tak ding ur mai chu hawngin, "Hak tur i mamawh anih kha, naktukah chuan saruaka haw chu i duhin ka ring chiah lo. A nui hul hak a, khumah chuan lawnkaiin a thawm pawh chu a reh zui nghal bawk a.

Zawimuang chuan ka ding khur hlawk hlawk a, 'hepa thil hi engmah ka mamawh lo,' mahse tunah tak chuan ka saruakna khuh tur engpawh ka mamawh si a.

Thawmhnaw awmna lam chu ka pan a, mak ka ti lutuk chu ka meng phawk hraw mai..! Hmeichhe thawmhnaw nalh tak tâk man to tih hriat hliah hliah chu a lo inkhai țeuh chu niin, engvanga ka rilru chu na ta tlat nge maw a nih le? He pa hian hmeichhe chenpui a nei tih chu a chiang a, mahse khawiah nge chu hmeichhia chu a awm ang?

Kawrfual var chu ka phih thla hlawp a, ka tan chuan a chhing lam deuh a ni. Ke rêk thleng tur a nih hmel si a, ka chawnpuar a khuh țep chauh a ni.

Ka țhu kawm ngal a, bang chu ka ngheng bawk. Duh aiin a vawt mah mah ka khur ti tih hial a, ka ni hman nuam lo tak leh rapthlak tak te avang chuan ka chau tak zet, ka damlo mai dawnin ka hria.

Ni chhuak eng phut chuan ka hmai chu rawn ênin ka mit ka han men chuan khum dup nuam takah ka lo mu chu niin. Zan lama thil thleng te chu chiang takin ka hre chhuak uar uar a, zahna leh mak tihna chuan min rawn tuam a, ka taksa erawh a dik hauh lo mai.

"I lo harh ta maw? Dar engzat nge anih tawh i hria em?" Kawngkhar chu nghengin a ding sawi hle a. A inbual zo chiah tih hriat takin a sam pawh chu ala hnawng chap a, kekawr bul var leh tawnzau dum a hak chu a inhmeh tak zet a ni.

Khum bula sana chu ka melh zeuh a, dar 11 alo ri der tawh, "Engtin nge kei hi khumah! Hnaah pawh kan kal lo." ka ti bah nuai a.

Muangchangin alo pen lut a, "Hmeichhe rukru leh rui buai avangin vawiin chu hna lam kan kal thei lo anih hi," a hmel landan erawh a dam thlup thung. "Clare-in ei tur alo dah ang," tih pah chuan ka hmuiah chuan a rawn fawp zeuh a, "Inbual nghal bawk ang che, hmeichhe rimchhe tak hi ka duh hauh lo." A chhuak nghal daih a.

Clare tih hming chu ka rilru chuan alam nawn sek a, ni tak e nizan a ka thawmhnaw paihtu kha, Rafe thawmhnaw pawh telin.

Hmeichhe pakhat, kawr par buai ha chu kawngkaah chuan lo dingin min lo nuih ver ver a, clare-i chu a ni ngei ang le. A eitur ken chu min pek pah chuan, "Tui taka i ei ka beisei," min melh dan chu a pu hmeiah min ngai a ni ngei ang.

Ei lo thei lova min siam takah chuan ka rilțam tawh zia pawh ka hria, ka ei zui nghal mawlh mawlh a, ka phone ri chuan ka thil ei lai chu min ti hak țhelh a ni. Ka pa a ni ngei ang.

"Hello"

"Hello Bridget i țha maw?" a aw chu a thum dût a.

"Jace, ipate Jace-a," a nui ri chu a tilui a ang mah zawk.

"Jace," ka ti sap a, chu hming chu ka hre tawh. Ka pa nen phone-a kan inbiak lai khan ka nuin a bia a nih kha.

"Bridget ngun takin lo ngaithla teh. I pa thingrem chhungah khan thirmum lian vak lo a awm a, chu tah chuan lehkha pawimawh tak a awm a, chu thil chu i tana pawimawh tak a ni. I nu leh pate erawh in i hriat an duh hauh lo ang, ka thusawi chu i hriatthiam ka ring." A aia ring chuan a nui zual sauh a, ka rap hial zawk!

"Kei hian pate-a ka nei lo, min lo tibuai leh anih chuan Police ka hrilh ang," phone chu ka dah nghal hmak a.

Ka thil eilai pawh chu a ti tui lo zo vek, chu pa teh hrep chu engthil chiah nge maw a duh le?

Țhian țhate leh țhenawmte chuan weekend-ah te chhungkuain hmukhawm in chawte an kil ho țhin a, chhung leh khat chu sawi loh chaw eipui kan neih ve ngai loh avanga mak ka tih thu ka pa hnenah ka thlen ta anih kha.

"Chhung leh khat sawi tur kan nei ve tawh lo, i pi leh pute chu thlawhna accident-ah an boral tawh a, ka unaupa neih chhun a boral tawh bawk, i nu te lam lah ni se, a laizawnnu te inneihna hmangin tuipui zau taka an zinkualnaah an lawng chu a pil a, i nu chauh a dam chhuak ta si a ni." A tih te chu kei hian ka la theihnghilh hauh lo.

"He hmun nuam takah hian awmhlen dan i ngaihtuah tih a hriat reng alawm."

Ka suangtuahna ațang chuan ka harh chhuak zawk a, a hmel landan chu a dam diai a, "I la inbual nange? Ei tawk hria la, Ei tawk i hriat loh avanga buai leh ka duh hauh lo," ka hmaah tak dingin min chhuk melh run a.

"Chutiang ka ngaihtuah hauh lo mai, nizan avang khan ka lawm a, vawiin lam avang pawhin," châk lo hle mah ila lawmthu sawi chu a ngai ve tlat si a.

"Nizanah kha chuan keite ang mai i nih kha mawle, lawmthu sawi kual leh hnuhnawh kha a ngai lovang," a nui sak a, a khabe chu a dawm vang vang a.

"Ka haw angai tawh tak zet ani, ka nu leh pate...."

"Nizanah i pa chuan a lo bia che alawm, ka sawi fel vek tawh," mit la sawn miah lo chuan min en run a, hepa hian engtin tak sawi ang maw..!? Inhnial nan hun ka nei lo tlat ka haw vat vat a ngai a ni ka ti rilru mawlh mawlh bawk a.

"Inbual fai la lo chhuk ang che," nghet charh chuan a ti a," a chhuak zui nghal a.

Engvanga thu min pe țhin nge maw anih le? Eng angah nge maw a in ngaih chiah ni? Hepa hian tu te pawh hi a hnuaichhiah vek a ang tlat. Kal luih pawh tum ila, ka in bual hma loh chuan min kal tir dawn chuang lo tih ka hria. Hepa nena kan buaina hi tawp vat tur chuan a thu pakhat lek ka zawm chu ala ngai fan chu a ni si a.

Ka hmanhmawh em avang chuan bualkûangah pawh inchiah rei lem lovin ka chhuak nghal a, a towel chuan intuamin a rim pa tak chuan ka hnar a verh em em zui, nizan lama ka hak kawr var bawk chu ka ha leh nghal tawp a.

Room ațang ringawta alan dan chu a ni hauh lo, in chu a lian tak zet a ni. Step-ah chuan ka chhuk thla a, Rafe chuan min lo nghak reng tawh chu niin, a coat senduk hâk chu a inhmeh tak zet, a hak tur tak a siam a ni ngei ang.

A țhen suk a, "Min zui rawh," ka hmaah chuan a kal nghal a, a car dum tliang nalh fahranah chuan ka luhna tur chu a lo hawng bawk a, a țhen leh sawk țhin bawk.

Kan tlan chhuak tan dêr a, "I address i sawi loh chuan panna lam tur ka hre hauh lo a nia, kidnaptu-ah min puh leh tur lah ka duh bawk hek lo," nuihza tih hriat tak chuan a nui hawk a, chutianga a nui hmel chu ka la hmu hauh lo.

"Mahanatan street, near palman place." Min rawn en a, a țhen leh sak a, a aia chak deuh chuan min tlanpui zui nghal a.

Nizan lam kan boruak vang te pawh a ni ang, ka mut chhuak lutuk chu ka insum thei thlawt lo, ka lu lah chu a na em em mai lehnghal.

'Tunah chuan buaina ka hmachhawn tawh dawn lo' tiin thawveng tak chuan ka mit chu ka chhing bawk a, biak tumna pawh ka nei lem lo, ka be chak vak lo bawk nen, ka kawr haklai erawh ka pe let leh ngei dawn tih ka chiang. To be cont...