LAST KISS CHAPTER-6

[David Nu]

LAST KISS
(Competition)
CHAPTER-6


CHAPTER-6


Airport kan thlen chuan thlawhna lian tak tak te chu kan kal pel zel a, a khawi ber hi nge kan chuanna tur chu ni ta ang? Rafe-a kal lai chu ka ngaichang deuh bawk a, thlawhna awm zawng zawng chu kan kalpel vek tawh si a, mak ka ti tak zet.

Kan hma a private Jet tih hriat tak var tle surah chuan a lut nghal a, kawngka bulah chuan dingin a kut chu a rawn phar chhuak bawk a, hreh tak chung chuan ka kut chu pein, "Ka thlawhnaah hian ka lo lawm a che Bridget," he thlawhna chu ama ta lek chu lo niin, a hmelah erawh chapona a lang hauh lo thung. Mahse, ka ngei tho tho.

A chhung chu ka rin ai daihin a pui leh nghal, țhutna te chu a bik taka siam tih a hriat hliah hliah a, hreh tak chung chuan ka țhu a, ka huphurh ber zawk chu thlawhna ka la chuang ngai hauh si lo zawk chu a ni, ka hlau em em zawk si a.

Rafe-a chu ka bulah chuan a lo țhu ve nghal bawk a, țhutna dang a awm reng lai a, ka bul khera rawn țhu chuan ka awm a ti nuam lo kher mai, thlawhna ka la chuang ngai lo tih a hriat ka duh hauh lo, min hmuhsitna tur a tam mai mai dawn tlat.

Captain hnen-ah chuan thu a pe nghal zat a, kei erawh hlauh avangin ka lo in hum ruh em em thung.

Reilo teah thlawhna chu a ri vut vut a, a rawn nghawr nghal zat bawk a. Ka kawchhung chu sawifiah thiam si loh hian a ni bulh a, ka lu chhunglam pawh chu a ni muai muai nghal a, ka hlau lutuk chu ka țe țhawt lai ka hre hman hauh lo, ding si lo țhu si lo in ka awm tih erawh ka chiang thung.

"Thlawhna ila chuang ngai lo tih te chu a hma daih khan min hrilh tur che alawm," ka beng bulah chuan a rawn ti thawp sat a, ka kawngah nghet takin min lo kuah reng tawh zawk chu niin, a mi kuahna chuan ka awm a ti nuam lo leh zual tak zet.

"Țhu rawh kan thlawk kang tawh alawm, hahdam tak khan awm ang che, kan thlawk rei dawn a nia, naktukah chauh kan thleng ang, alo berah darkar 22 kan thlawk dawn a ni."

A țawngkam te chu amah a ang lo hial zawk, Rafe ka hriat țhin kha chu mahni induh tawk tak leh chapo tak kha a ni țhin si a, tunah erawh min ngaihtuah hmel tak zet thung si, ka taksa țang țeuh pawh chu ka in thlah dul ve nghal a.

"A lo berah darkar 22 maw?" huphurh hmel zet chuan ka en hu a, a rei dawn em a tin ni. Ka huphurh ngawih ngawih si a.

Chiang taka min en chung chuan "Hahdam taka i awm anih chuan rei lo te angin i ngai mai ang, tunah chuan ka ril ațam tlat mai," hepa hi a mak tak zet mize pahnih a nei tlat, thatchhiat hmel zet chuan a țhu thluang a, a bawp a khawkherh bawk.

Nula chhe lo zet mai chu lo kal in kan hma dawhkanah chuan in tur leh ei tur tuihnai tak chu alo dah a, "Tui taka in ei ka beisei," a nui ver ver a, a hmel landan chuan min ti hahdam hliah hliah a ni.

"Tunah hian wine in dan zir i duh em?" Ka mitah tak chuan enin "I duh loh chuan a pawi chuang lo," a hmel landan chu a thu tak hle tih a hriat, a sana lian zet chu enin a hma a ei tur awm chu ban in a ei zui nghal a.

Ka pum dik lo chu thlawhna ka chuan vang tih ka hria, chutiang lam chu ka pum a lakluh ka mamawh lo tih ka hre bawk, "Ka duh lo mai ange," ani kherin min zirtir tur chu țul ka ti lo bawk.

Min en chung chuan a khi suk a, a lang pa hliah hliah "Australia-ah chuan buipui ngai in awm hauh suh ang che, anih loh chuan ka hnutchhiah che anga ka haw san ang che."

He pa nen a inhnial reng hi ka ning tak zet, ka nu leh pa te ka thlah tak loh avanga rilru nuam lo leh rilru hah takin ka awm tih reng a hrethiam pha ve si lo. Ani hnial hi ka kham tak zet a ni.

Ei tur chu banin ka ei zui ve nghal a, ka thil ei chu a tui leh tui loh lam pawh hre lo in ka lem duak duak tih erawh ka hria, ka rilruah chuan thildang daih ka vei thung si, he pa hian min be buai tawh lo se, ka awm anuam deuh mahna. Thei tui chu ka in zawm nghal zat a, ka pumpai pawh atih nawm deuh ngei ka ring tlat.

Rafe-a chuan a mit a chhing tlat a, ngaithuah muk tak a nei tih pawh a hriat hliah hliah, engtak chu ngaihtuah ang maw? A hmel lan dan chu a chauh hmel hle bawk a, a kut chu kuangkuah thanin a bawp sei tak pawh a thluang ar a, naupang rilru no tak tih nat awl tak a ang hle mai.

Nizan lam ka mut țhat loh em vang leh rilru buai taka ka awm vang a ni ngei ang, mut chhuak chuan min rawn zem chiai chiai a, ka chhing zui ve nghal bawk a.

Ka harh chuan, puan lum nuam tak ka lo sin reng tawh zawk, ka hawi kual a Rafe-a chu ka hmu mai lo tlat, ka bula a awmin ka awm anuam thei lo a, a awm loh lahin nuam ka ti chuang hauh lo. Khawnge a awm tak ang? Pawnlam chu a thim țan tih ka hmu a, ka mu rei hle tih pawh a hriat.

"I mu rei hle mai maw? Hmeichhe mu rei thei tak i ni tih chu ka hre tawh. Mahse, i hnâr tel kher țhin tih ka lo la hre hleinem," Rafe-a chu ka bulah a lo țhu ve nghal a.

Ka bul hnaia a lo țhu ringawt pawh chu ka boruak hip a danglam nghal thei hial a ni.

"Ka hnar ngai miah lo."

"I duh chuan Linda-i pawh i zawt thei ang," chu nu chu Air Hostess kha a ni ngei ang, midang chuang an awm ve si lo, Captain tih loh chu. Ka mut țhat loh avang leh ka mut dan a rem loh em vangte pawh chu a ni ta ve ang.

Chhan mai ngaihna ka hriat loh avang chuan ka ngawi ta ringawt a, ka va melh chuan nuihza tih hriat tak chuan a lo nui bawk a, ka ngei kher mai.

Ei tur lo nawrtu chu Linda-i chu a ni ngei mai, kan hmaa dawhkanah bawk chuan lo dahin, "Ka pi tui takin ei ang che," engvanga ka pi min ti nge maw anih le, a ai in ka naupang zawk tih pawh a chiang reng si a.

"Tui takin eila, duh leh mamawh i neih chuan, ani hnenah khan i hrilh zel thei ang," ei tur chu a ei leh nghal mawlh mawlh tawh a. Ani pawh chu a lo muhil ve tho a ni tih a hmelah chuan a hriat.

Rafe-a chu thoin hmalamah chuan a kal zui nghal a, thil pawimawh a ti dawn a ni ngei ang, kei erawh ka ei tur ei zovin ka puar hle bawk, puar taka ka ei lohna pawh a rei tawh hle a ni. Ka hma a wine chuan ka mit a la hle mai. Mahse, hetah chuan ni lo.

Darkar tam fe kan thlawk tawh tih chu ka hria, ka ching leh diar diar tawh a.

"I duh chuan i mu thei ang, hetah ni lo," Rafe-a chu ka hmaah a lo ding leh reng tawh zawk.

"Linda," chu hmeichhe hmelțha zet chu rang takin a lo kal a, "A mutna turah va hruai rawh." Thu pe aw zet chuan a ti zui nghal bawk a.

"Ka pi, min lo zui rawh le," ka pi min ti fo mai chu nuam ka ti chiah lo, thuawih tak ang chuan ka zui ve nghal a, hnial buai ka peih loh vang a ni mah zawk, bakah rem lo taka ka mut leh chuan ka hnâr leh ngei ang le, a thu sawi te kha a dik anih si chuan.

Thlawhna hnunglamah chuan ka zui a, kawngkhar pahnih lo awm kan thlen chuan chu nu chu a ding deuh a, ngaihtuah a nei tih hriat tak chuan a melh tawn sek a. Pakhat zawk chu a hawng zui nghal a.

"Tui tak in mu ang che ka pi." A nui leh sen sen a, "Duh leh mamawh i neih chuan min hrilh zel ang che." A hlim hmel chu ka ngaina riau.

"Awle, tehreng mai," ka nuih let ve var a, a kal zui nghal bawk a.

Khum zau takah chuan muin, ka hahdam sawng sawng mai, ka hawi kual vel a, engkim mamawh tur a awm ni mai hian ka hria. Ka ham zui nghal bai bai a, la rei lo hle mahse, chhungte tel lo a ka vawikhat awm hranna anih avang chuan ka lung a leng nghal riau a, ka nu leh pa te ngaihtuah chuan ka muhil zui nghal a.

"Marcus, chu ka ngai tak zet tih i hriat kha, Lisa pawh telin Alessia ka thinrimna hi cho chhuak reng lo teh," chu aw thinrimna a khat chu Rafe-a aw ngei a ni, ka room ep chiahah a awm tih pawh ka hria, engtia rei nge ka mut tih lam pawh ka hre lo.

Marcus..., Lisa..., Alessia tute nge maw ni dawn ni? Ka mut chhuak lutuk chu thil dang pawh ngaihtuah thei lo chuan ka chhing lehnghal a.

"Kan thleng țep tawh ania," chu aw chu Rafe-a a ni, ka harh chuan a ke chuan min lo khan a, a kut chu ka awm bawrah a dah bawk.

"Ni lo!!" In perh thawh ka tum nghal a, rang zetin min kuah bet a.

"Engvanga ka pasal ang maia ka mutna a lo mu ve nge i nih? I chet dan hi ka lungawi lo tak zet," ka ti hriam hrawih a.

Min kuah reng chung chuan a nui hawk a, "Ka mutna i ti em ni? Ka mutna zawk tih hrilh nawn kher ngai suh, engvanga ka mutna a lo mu zawk nge i nih? Min beisei vang tih chu ka hria alawm."

"Zak thei lo lutuk, Linda-i hnenah ka mutna tur min kawh hmuh tir a ni lawm ni? Ka muthilh lai chu remchangah lain nang hian i tum reng vangin ilo mu zawk a ni."

Ka ban bul chu a hmer sawk a, ka lo țhen tlawk tlawk bawk, "Nang hi i bula ka lo mut beiseiin, ka khumah i lo mu tih hi zep buai duh suh, room pahnih a awm a, pakhat zawk saw i mutna tur chu a ni," thinrim hmel zet chuan a ti hrawih a.

Ka hrethiam kuar e, Linda-in ka pi min tihna chhan te, room kan thlen hnua ngaituah nei taka a ding dat te kei hi a pu hmei emaw min tih vang a lo ni reng zawk a nih chu hrep tak chuan.


"Linda-in min kawh hmuhnaah ka mu mai a ni e," thinrim tih hriat tak chuan tal chhuah ka tum a, ka hlawh chham chiang hle bawk.

"Tun hi inhnialna hun a ni hauh lo, kan thleng țep tawh tih ka hrilh che kha, hmangaihna chen dun i duh tih ka hria alawm," min kuai her a, ka hmuiah chuan dim tein a rawn fawp nghal vawng vawng a.

Ka rilru chu a buai zo, hnar ka duh. Mahse, ka thinlung chuan a duh hauh si lo, a ai a uar chuan min fawp leh tawn tawn a, chutah zet chuan chhang lo thei ka ni lo. Mipa ka vawikhat fawhna ni mahse ka thiam ang tawk chuan ka chhang let ve nghal a.

A kut chu ka hnute lamah țuanin, ka hnute chu a khawih nghal bawk a, ka vawikhat tawnna a nih vangin engtia tih tur nge tih pawh hre lo chuan ka awm mawl tawp a, ka taksa vel chu chulin, a duh dan tak chuan min khawih nasa hle bawk.

Ka thluak chu a nu bulh bulh ni hian ka hria, ngaihtuahna fim hman zawng har tak a ni. A mipatna chuan ka mal ah a do run tih pawh ka hria, ka thil tawn chu ka vawikhatna nimahse, ka awm dan erawh ka chiang thung si, sawifiah thiam rual loh chuan ka taksa chu nawmna in a tuam tih ka hai mawlh lo.

Ka chungah chuan lawn kaiin, kawr pawh ka lo ha tawh lo zawk! A tak ram min thlenpui dawn tih hriat tak chuan duh thawh takin min fawp leh a, min chul kual leh nghal zat a, a thaw ri kawk kawk a.

"Ni lo!!" Ka in bengkang a, puan chu ka ban nghal rawk rawk a, hepa hi ka la hrechiang tawk lo tlat. Ka hriat chian loh hnenah ka thianghlimna ka hlan thei lo ang, a mi tawhna te chu hnar har tak ni mahse, ka in chhirlohna tur thil ka tih ngei a ngai tih ka hria.

In la hrang vatin, khumah chuan a țhu a a nui hul hak bawk, "Hmeichhe duh lo chung ka ti lui ngai lo, min hlauh ka ngai lovang. Ka tawhna che erawh i dawngsawng țha hle tih nang pawn i hriat kha," hnehtu chan chang inti fahran chuan a nui lui leh hawk a, a thawmhnaw chu a inbel nghal mawlh mawlh a, ten hmel tak chuan min melh zui râm a.

"Lo chhuak vat ang che, kan țum dawn hnai tawh," dawhtheihna a nei leh ta lo hle bawk, a chhuak zui nghal a.

Engvanga hnar harsa ti viau nge maw ka nih le? A hmela min hmuhsitna lang kha na ka ti tlat, ka hnar ta tho anih kha harsa viau mahse ka in chhir mawlh lo, ka thawmhnaw chu inbelin ka chhuak zui ve nghal a.

Duhdah tak chuan alo țhu a, a bul hnai ka thlen pawh chuan engmah thleng lo ang mai chuan melh pawh min melh chhin eih lo, a piah zawka țhutna awmah chuan ka țhu ta zawk a.

"Min hlat luih hi tum kher mah la, i thinlung chuan min hnaih tih ka hria alawm," a in ring tawk mah mah a hmelah chuan elsenna tih alang chiang hle bawk.

"Ka thinlung chu nang ni lo in keimah zawkin ka hria, i duh ang ang chuan lo ngai mai teh, ka buaina a awm lo ve," diktak chuan a sawi dik tlat a ni. Mahse, chu thil erawh puitlin ka tum hauh lo.

Captain chuan eng eng emaw chu rawn sawi a, rang takin a tlan phei nghal a, a rim pa tak chu ka hre thei bawk. He pa hi ka duh lo, mahse ka thinlungah erawh a awm reng tih ka hria, paih bo tum teh mahila ka thei hauh lo ang tih pawh chiang takin ka hre bawk.

"Kan țum dawn e, i duh chuan han hawi kual ta che," a nelawm leh mah mah tawh zawk.

Ka țhutna țang chuan ka hawi thla a, lui lian lutuk mai a tawp chin pawh hriat loh chu mawi ka ti ngei mai, "Ropui lutuk" ka phun sap a.

"Heng thil te hi i vawikhat tawnna tih ka hria lawm," ka bulah chuan rawn dingin hmuhnawm tih hmel fe chuan a thlir ve bawk a.

"Țhu rawh le, kan țum dawn ania," min nem țhu a ni mah zawk, a țhu zui ve nghal bawk a.

Thlawhna chu a nghawr leh dawt dawt a, reilo teah chuan kan ding tih chu ka hrethiam mai, Rafe-a chu a tho nghal bawk a.

Ka kut rawn vuanin, "I tho thei tawh ang, min chhuk melh run bawk a.

Thlawhna kawngka bulah chuan Linda-i chu lo dingin, "Hun nuam tak inhman ka beisei," a nui leh var var tawh a, zam tak chung chuan ka chhuk thla ve nghal bawk a.

Kan țumna chu Airport a ni hauh lo mai, a piah lam chu lui nalh tak kha a ni tih ka hria, a boruak chu a dang zar mai, ka thaw kawk kawk a, kan hmaah chuan motor chu a rawn ding nghal bawk a. Rafe-a chuan kawngka chu hawngin ka lut zui a, ani pawh chu a rawn lut zui ve nghal bawk.

Kan kalna tur pawh hrilh hriat ka ni lo a, ka chuang mawl ve tawp bawk. Reilo teah chuan Lui zau nalh tle sar sar lam chu kan thleng hlawl mai a, ka phur ru viau bawk, motor ațang chuan kan chhuk a, kein kan kal zui nghal a.

Kan hna tih tur leh chawlh hun hmanna tur chu rawngvar leh dar tle sar maia inpawlh a ni a, lawng chawlh hmuna a ding ringawt pawh chu a nalh tawk hle a ni.

"Scarlet Destiny kha tun thlaruk kal ta chhung khan hralh a tla em kher a ni." Min lo hruaitu putar thau zet, fin hmel tak chuan a ti nghawl bawrh bawrh a, eng chungchang nge an sawi ka hre hauh lo thung.

Nawm chenna lawng nalh zet lam pan chuan kan kal zel a, ni chu alum nuamin a chheh vela thil hmuh tur nalh tak tak te chu hmuhnawm thlirin ka thlir pah zel a.

Mr Rafe tan erawh thil danglam teh chiam tur a ni lo tih ka hre thei, in hmuh khawmna hun an nei țhin ang tih pawh a chiang reng mai, computer siamtu, endiktu leh an hralhchhuahna te, mi chi hrang hrang a hmu deuh sek ang tih pawh a hriat.

Lawng bathlar kan thlen chuan min lawm nan chibai min lo buk sap sap hlawm a, computer lama eizawngtu ho an ni ngei ang le.

Min lo hruaitu chuan in hmelhriatna a neih chhung zawng chuan Rafe-a chu alo nui sang a. Chutiang thil chu a tawk ngun tawh ang a, hriat zui zel tumna erawh a neih ka ring lem lo.

"Ka zinnaa ka kawppui Bridget Mendler anih hi," mikhual hnuhnung ber a chibai lai chuan Rafe-a chuan a lo ti a.

"A hming a va mawi ve, a hming a mawi ang bawkin a hmel pawh a țha a lawm, zinpui i thlang thiam hle mai." Chu palian hmelțha tak mit buang tak chuan a ti zui nghal a.

"Hei hi ka țhian țha ber Logan Seymour anih hi," Rafe-a chuan min hmelhriat tir zawm zat a.

"Ka hmu che chu ka lawm hle mai Mr Seymour."

"Ni lo, Logan zawk le," a khi suk a, an țhiandun chu in ngai tawh tak ang mai an ni. An lan dan chu mize in ang tak pawh an nei ngei ang.

Ka mipa hmuh tawhah chuan a nalhin ala hmelțha ber hial ang, Rafe-a tih lohah chuan a thawmhnaw man to tih hriat zet chu a ha mar zualin a nalh pui hle lehnghal, a hmelțha tak leh rum lam mah chu hmuh a nuam hle a ni. To be cont...