KAN TIAM TAWH SI... Chapter - 8 by HK Renthlei

[HK Renthlei]

KAN TIAM TAWH SI...
Chapter - 8



Tunah chuan Maruata nen chuan kan inzui ve tak tak ta. Min ngaihsak em em a, a tello hian ka awm thei tawh lo ang tih tur hial khawpin ka thinlung hian a mamawh tawh ani. Kan thawhna a inang bawk a, nitin kan inhmuh bakah zanlamah kan inah a lo kal fo bawk a, ka nu leh ka pa awm lo mahse, Rpi nen ka khawhar hlauin min ngaihtuah dun reng țhin.

Vawiin hi ka nu leh ka pa te an lo haw ni a ni a, zantin phone a min rawn biak mai bakah an hman remchan apiangin min rawn be reng zel bawk a, ka nu nen phei chuan kan inngai em em a, ka pa aimah pawhin ka ngai tawh zawk. Maruata nena kan chanchinte chu ka nu ka hrilh a, min lawmpui rual rualin fimkhur taka kawm turin min fuih reng țhin.

"Bawihi, Dr Maruata chu ka hmu ve chak hle mai, nang meuh a hmangaih che chu!" ka nu chuan a rawn ti a.

"In lo haw hunah i la hmu dawn chauh alawm, lungngai suh," ka ti let ve nghal zat a.

Kan nui dun hawk hawk a, "Lo thleng vat vat mai rawh u, ka ngai tawh che u ania, dar engzatah nge in lo thlen ang?" Ka tih zawm leh a.

"Ka hre lo le, kawng te hi a chhe lutuk a, kan lo thlen har chu ka ring lo, anih ka dah phawt ange aw, kawngah chanchin kan rawn hrilh zel dawn che nia," tih pah chuan phone chu a dah ta a.

Keimahin ka nui ver ver a, ka nunah hian buaina lutuk ka la tawk ngai lova, ka nu'n min kalsan kha ka nuna buaina ka tawh chu a ni mai a, mahse ka pa ala awm tho a, ka la na lo mai pawh a, chubakah mi luhlul ngang hi ka lo ni ve bawk nen.

Ka duty zo duty rooma inthlak tura Rpi nen kan kal lai chuan ka phone alo ri ral ral a, ka han la vat a, ka nu phone a ni tih ka hriat chuan phur zetin ka han la a, "Hello," ka han ti a, mahse ka nu alo ni hauh lo mai, midangin min lo chhang a, "Ka biak mek hi tunge ni aw? He phone neitu hi i hria em ni?" Hlauhthawnna in ka khat nghal a.

"Aw, ka nu ania, ka pa nen an ni a, an țha em?" ka ti thei hram a.

"He phone neitu te hian accident an tawk a, i pa nen a hmunah an boral nghal ani, tunah damdawiinah postmortem turin an kalpui chiah e," tih pah chuan an kalpuina damdawiin hmingte min hrilh hnu chuan phone chu a dah ta a.

Ka phone ka thlauh tawp a, ka țhu hnawk a, Rpi chuan mangan hmel deuh hian, "Enge ni a?" a rawn ti vat a.

"Ka.....nu......leh......ka.....pa an......accident, a hmunah an boral nghal anih chu," tih pahin ka țap nghal hawm hawm a.

Rp chuan min rawn kuah nghal vat a, keilah chu ka insum thei tawh lo, ka â vek maiin ka hria. Ka hamhaih a, awmngaihna reng ka hre lo, ka nu(tak tak) boral pawhin hetiang em hian ka la awm ngai lo, a ruala nu leh pa chân chu ka tan vanpui a chim a ni ringawt mai. Kan thawm hriain an lo tlan khawm a, Dr Maruata pawh a rawn thleng ve vat a, kal dan tur rem a ruat zung zung a, a awm lovang tih ka va han hlau tehreng em!

Maruata car ah chuan Rp nen kan chuang dun a, midang chuan min zui ve an duh hle nain, duty an țhulh thei silova, tuarpuina mij hlan mawlh mawlh hlawm nain a engamah pawh chiangkuangin ka hre hlawm lo, ka thluak a mang vekin ka hria, chutia kan tlan lai chuan ka phone a lo ri leh a, ka phu zawk a, kan en chuan ka nutei a lo ni a, "Mambawih, i nu leh i pa chanchin ka lo hria a, hei, kan chhungin kan lo kal ania, lo lungngai reng reng suh aw," tiin min rawn hnem a tum ve nasa mai. Mahse kei lah chuan ka lo țahkhum nasa sauhva, Rp chuan min kuah chawt a, 'ka nu, ka pa' tiin ka thinlung hi a țap vawng vawng mai a ni.

Damdawiin min hrilhna hmun kan thlen chuan ka patea te ho pawh an lo kim țhap tawh a, kan han inhmu chu ka țap hawm hawm mai a, "Pate, nâ ka van ti tak em! Ka nu leh ka pa hian min kalsan thei lovang, ka phal lo, an hmel hmuh chakin ka lo nghakhlel ve em em a, engatinge....an chungah hetiang hi a thlen? A ni thei lo.....! Ka țap vawng vawng mai.

Ka patea te pawh chuan sawi tur reng an hre lo, an ngui nghiai a, min en reng ringawt a, " Khawiahnge ka nu leh ka pa chu an awm? Ka hmu duh ania.

Ka patea chuan, "An zo țep ang, hetah hian kan lo nghak anih hi, engmah tihtheih kan nei tawh lo ani," tih pah chuan a mittui a hru zauh a. A inti pachang hram hram ani.

Ka bulah Maruata leh Rp in min awmpui reng bawk a, ka nu leh ka pa ruang chu an rawn nawr chhuak ta a, ka hmuh veleh chuan an chungah ka bawh thlawp a, "Ka nu, ka pa, engatinge in fanu hi keimah chauhva awm tura min kalsan? Tinge min lo hruai ve mai loh? Min kalsan hi ka phal lo asin....." ka mittui a luang zawih zawih a, midang lo awm ve te pawh ka zah zo tawh lo. Ambulance ah ka nu leh ka pa ruang chu an dah a, an kianga awm ka duh tlat vangin ka chhungte ho leh Rpi nen kan chuang a, kawng tluanin ka țap a ni ringawt mai, ka taksa pawh chau vek tawh. Maruata erawh chu a motor khalh a ngaih avangin kan bulah a lo chuang ve thei lova, min ngaihtuah hle nain, Rpi a awm tho bawk a, a ngaih pawh a țha deuh hlek.

In kan thlen chuan ka taksa chau lutuk chu min pawm lut ringawt a, ka țap bang thei lo. Paukhauh ka lo intih ve na te pawh vawilehkhatah tihchhiatin a awm ta vek niin ka hria, tun ang renga hetianga natna ka tawrh hi ala awm ngai lo. Ka taksaa chakna awm ve zawng zawng te kha khawiahnge an awm zawh tak ni tih tur khawpin ka nâ ani. Ka kehchhe vek ni berin ka hria.

Ka nu leh ka pa chu he leia an taksa hmu leh tawh ngailo turin kan thlahliam ta, ka țap nasa lutuk, mittui tla tur ka neih tawh loh thlengin ka țap a, a tawpah phei chuan țah pawh ka țap thei tawh lo. Ngawi rengin ka awm a, ka en ngai ka en tlawk tlawk a, mi â ang maiin ka awm a, min biak pawhin chhanna chang reng pawh ka hre tawh lo. Min kuah ang angin ka awm a, ka zawi ngawih ngawih a, Rp leh Maruata ngaih a țha thei lo, englai pawhin ka kiangah an awm a, an pahniha an theih loh pawhin pakhat talin min awmpui chawt. Ka patea te pawhin min ngaihtuah em em a, ka nutei te chhungkua lo kal pawh ka ngaihsak thei lo, lo ngaihsak a, lo buaipui tu tur zawk si kha, ngaihtuah ngai zawk leh buaipui ngai zawkin ka awm ta miau si a.

Chutianga buaipui ngaia ka awm hun chhung chu kei chuan engmah ka hre lo, ka han harh chhuah meuh chuan ka nu leh ka pa vui zan ațang khan tho miah lo leh chaw leh tui pawh in miah lovin nithum chhung ngawt mai nikhaw hre lovin khumah ka lo mu chu niin, ka hawi kual chuan drip khaina ka hmu bawk a, mak ka ti ngei mai. Kei hi engtinnge ka awm le?

Ni thum ngawt nikhaw hre lova ka mut lai khan ka lo tal buai hle aniang, a hnu a min hrilh leh danin, ka nu leh ka pa ka lo au vak vak a, a chang leh ka lo nui vak vak bawk a, ka nuih vak vak hnuah ka lo țap leh vak vak a, min chelhbeh zawh loh khawpin ka lo tal chiam ani awm a, min lo buaipui hle a lo ni.

Tunah chuan ka harh ta hle mai, mahse ka nun hi a ruak ngawih ngawihin ka hria. Tun ațang chuan keimaha ka khawsak a ngai dawn ta si a, ka patea te, ka nutei(ka nu nau) te chuan min ngaihtuah em em a, Ka thawhna hospitalah chawlh min lo dilsak tawp a, ka nutei phei chuan an hnena reilote awm lawk tura min hruai a duh hial a, kei pawhin ka hnial lem lo, intihharh ka mamawh tih ka hria a ni. Ka nu leh ka pa boral chuan ka nun an thlak hlawk ni mai awm hian a hmaa ka nundan kha ka pha ta hauh lo mai. Ka nun ngaia let leh tur chuan hun ka mamawh rei ngei ang le, nula harh veh vawh ni țhin kha tunah chuan nula zawiawi lutuk tak mai ka ni ta ringawt.

Ka nutei te awmna hmunah chuan reilote awm turin an rualin ka kal ve ta a, min ngaihsak em em a, Dr Maruata pawhin ka tana țha tur leh ka nunin ngai a awh leh theih na anih phawt chuan inngaizawngin min enkawl inhuam hle mahse mite hmuha a mawi dawn loh avangin ka kal chu a remti ve tho mai.

Ka nutei chuan fapa keimah ang rual vel hi a nei a, a hming chu Lalthanpuia a ni a, 'Mapui' tiin an ko țhin. Kei aiin kum hnihin a upa zawk a, ka hrehawm a hlau in min ngaihsak em em a, keipawhin nuam ka tih phahin ka lunglen hnemtu ber ani reng bawk a. Khawi hmunah pawh kal ila kan inzui a, ka tellova khawi ilo chhuah vah a duh lo tawp, min hruai ve theih lohna hmunah chuan a thiltih tur pawh a țhulh hmiah mai zel. A chang chuan ka hau ve fo țhin. "Nang leh kei hi chuan unau pianpui kan nei lova, chuvangin ka unau neihchhun leh ka venhim tur i ni, i rilru tinatu apiang chu ka hmachhawn zel ang," a ti tawp.

Kei pawhin ngawi rengin a thu zawmin ka awm phah țhin. Amah avang liau liau hian ngai ka awh leh phah. A chungah pawh ka lawm hle a ni.

Tunah chuan ka nun pawh a hlim veleh tawh takzet. Maruata pawhin nitin min rawn phone a, min ngaihthu a rawn sawi reng mai a. Kei pawhin zep lovah chuan ka ngai takzet ani. Ka hmu chak em em a, mahse ani lah a hnaah a buai em em si a, keilah haw an la phal bawk si lo nen, haw ka chak rual rualin ka huphurh hle bawk a, kan chhungkuaa kan chen hona, keimaha kan awm tur chu min ngaihtuah em em si a.

"Bawihi, i hna hi bansan mai rawh, i pa pension i patea ten an buaipui bawk a, i nu lahin a hnutchhiah hnem tho si che a, hnathawh pawh i ngaih tawh loh hi," ka nutei chuan a han ti a.

"Nute, i sawi dik khawp mai, mahse hna ka thawh hian ka rilru kalding lutuk tur hi a veng alawm," ka han ti ve a.

"Nurse kher thawk lo hian hna te chu a awm reng alawm," ka nutei chuan a han ti leh hram a.

"Eng hna maw? Ka tuina ber ani bawk si a." Ka han ti ve leh a.

"Ni khawp mai, mahni tuina zawng thawh hi chu a nuam alawm, mahse i hah lutuk anga, kan ngaihtuah che alawm, pasal neih hi ngaihtuah mai rawh." A ti leh a.

"Nute.... ka nu leh ka pa boralna pawh a la rei lova, pasal neih lam chu sawi ri tawh suh, ka la duh lo," ka ti hmak a.

Ka nute lo haw hunah Maruata nena inhmelhriattir ka tum te kha ka hrechhuak uar uar a, ka mittui a rawn tla ta zawih zawih a.

Chuveleh ka nutei chuan min rawn kuah vat a, "Bawihi, pawi ka ti lutuk, min ngaidam rawh, i rilru natna turin ka sawi lo asin, nangmah hmangaih taka enkawltu tur che neila ka duh alawm," a han ti vat a.

"Nute, ka tihpalh, ka nu leh ka pa ka ngaihtuah chhuak thut alawm le, an lo haw dawn khan kan inbia a, kan inbiakna ka ngaihtuah chhuah vang ania, ka mittui hi ka dang zolo leh țhin a," ka nutei inthiamlo hmel ka hmuh chuan ka han ti vat a.

"Nute, hmangaih deuh mai ka nei a, ani pawhin min hmangaih lutuk, amah pawh i hria ang, ka nu leh ka pa boral laia min buaipui em em tu doctor kha a nia, a hming pawh i hre hial ang chu, ani nen khan thu 'Kan tiam tawh' a, ka nu te lo haw hunah inhmelhriattir ka tum a, mahse an inhriat hmain an boral ta mai si a," tiin ka nutei chu engkim ka hrilh ve ta vek a.

"Anih chu mawle, amah chu ka hria alawm, nikhaw hre lova i awm chhung khan a buaipui char char che alawm, i țhiannu Rp nen khan, an hnaa an kal zawh veleh an lo kal nghal a, zankhuain an awmchilh che alawm, anmahni avanga hetianga awm leh thei hi ini asin, an chungah pawh ka lawm lutuk. Kha doctor khan amah a inhmangaih ai pawhin a hmangaih zawk che in ka hria, a lakah khan bat kan ngah khawp mai,"a ti duah mai a.

"Ka lo hre hauh hleinem, kan inbiak leh veleh lawmthu chu ka lo sawi ange," ka han ti ve a.

Ka nutei nen chuan kan inkuah vawng vawng a, tunah chuan ka hlim leh tawh viau, mal em em turah ka inngaih laiin ka mal loh zia ka hre leh uai uai a.

Ka pate an min rawn bia a, ka pa pension pawh an tihfel tawh thu min rawn hrilh a. "Bawihi, i țha maw? Lo haw ve tawh la, kan ngai ve tawh che alawm," min rawn ti a," a rawn ti a.

Ka patea hi ka pa u chiah a ni a, an unau rau rauvah ani hian mi duat leh zual a, ka tet zual lai ațangin fanu an neih loh vangin a fanu ang chiaha min en tu a ni bawk a. Kei pawhin ka pa tih lovah chuan ka ngaina ber.

"Kei pawhin ka ngai tawh lutuk che, ka lo haw thuai ang, tunah chuan ka țha tawh lutuk e, min ngaihtuah suh aw..." ka han ti ve a.


Thlakhat lai ka nutei te bula ka awm hnu chuan kan chenna lam pana haw ka tum ve ta a. Ka u Mapuia'n min thlah paha ka bula reilote awm a tum ve a, ka lawm kher mai.

Ka nutei nen chuan kan inkuah vawng vawng a, "Bawihi, inenkawl țha ang che aw, chanchin min rawn hrilh zel ang che," a ti a, ka hmuh loh turin a mittui a hru zauh zauh a.

"Tehreng mai, ka ngai ngawt ang che, heta ka lo kal hi ka lawm lutuk ringawt, ngai ka awh leh phah si a," ka han ti ve a.


"Kan kal tawh dawn em ni? Motor pawh alo thleng e," Mapuia chuan a ti a.

"Awle," tih pah chuan motor ah chuan kan lawn a, mittui nen ka nutei nen chuan kan inthlahliam ta a.


Tunah chuan ka nu leh ka pa te nena kan chenhona kan thleng leh ta, ka mittui chu dan kir ka tum hram hram a, ka haw tur thu ka patea te, Rpi leh Maruata ka hrilh vek a, min lo chang țhap mai, kan thleng chu min lo lawmin min lo kuah chung chung hlawm a, inchhungah kan lut ho ta a.

Kan thleng dawn tih ka hrilh lawk avangin chaw eikhawm nghal an lo rawt alo ni a, rawng te an lo bawl vek a, ka han hawi vel a, ka nu leh ka pa sulhnu a tam mai, ka mittui tla tur ka dang hram hram a, ka roomah chhovin Maruata leh Rpi chuan min zui chhova, khumah ka țhu hnawk a, Maruata chuan min rawn kuah vat a, Rpi chuan, "Inhnuaiah ka lo zuk chhuk ange," tih pah chuan kawngka khar in a chhuak ta nghal a.

"Ka ngai lutuk che, ka hmangaih bawk che, i tello chuan ni a rei lutuk," tih pahin min han fawp vang vang a.

Kei pawh chuan ka lo chhang țha kher mai, "Kei pawhin ka ngai lutuk che, ka hmangaih che," ka han ti ve a.

"Anih tunah hian thu tiam dun ang, tunah chuan i nu leh pa boralna ala rei loh em avangin ka nghak rih ang che, mahse min nghah rei tir suh ang che aw, i tellova awm chu ka zuam lo ania, min tiam rawh," a han ti a.

"Ka tiam a che, ka nu leh ka pa lung ka phun zawh hunah pasal ah ka nei ang che, thihna in min țhente anih loh chuan," ka han ti ve sap a.

Kan pahnih chuan thu kan tiam dun a, kan infawp leh vang vang a.

"Inbual phawt la, i inbual laiin hetah ka lo nghak ang che, chuan inhnuaiah kan chhuk nghal dawn nia, engemaw sawi ka duh dawn a," a ti leh a.

"Awle, kan inbual ange," tih pah chuan bathroomah ka lut a, ka inbual zawha ka chhuah chuan tukverh lam hawia alo ding vang vang chu ka hmu a.

"Enge i ngaihtuah a?" Ka han tih chuan alo hawi vat a, a hmelah chuan engmah a lang lo nain a rilru tibuaitu a awm ani tih ka hmu thiam mai. "Lehlam hawi lawk ta che, kan inthlak lawk ange," ka tih chuan a hawi ve mai bawk a, ka inthlak ta sawk sawk a.

Ka inpeih hnu chuan, "Chhuk ang hmiang," tih pah chuan kawngka lam chu ka pan nghal a, Maruata pawh chuan ngawi rengin min zui ve mai bawk a.


*********************