LAST KISS CHAPTER-7

[David Nu]

LAST KISS
CHAPTER-7
By-Peki Ralte



Rafe-a kut hrawl tak leh sei tak chu rawn vuanin, "Ka hmu che chu ka lawm tak zet.." a lawm hle a ni tih chu a hmelah chuan a lang reng mai.

"Kei deuh hi asin lawm ni, i lawng nuam zeta leng lut tura min sawm avang pawh hian," Rafe-a chuan hlim sar hmel pu chuan a chhang let ve bawk a.

"Bridget nuam taka i hman ka beisei," ka lam lo hawi chuan nelawm zet chuan alo ti a. Ka chhip ațanga ka ke ler thleng chuan min en chik hle a, ka zam hial a ni.

"Logan, Bridget-i hi London-ah ka hnuaiah thawkin khawvel hmun țhenkhat ka rawn fan pui anih hi," Logan-a bânah chuan a beng thak thak a.

"Bridget-i enkawltu ang mai i ni alawm Mr Rafe," a nui sak a, Logan-a chu a nui mawi kher mai.

Rafe chu a lung ni vak lo tih hriat tak chuan a ner nawk a, "Chuti maw? Chutiang chu anih ka ring chiah lo," a nui huk a.

"Chuti chu han fankual pui ila ațhat dawn chu, i rem ti chiah ang maw?" Logan-a chuan nelawm tak chuan a ti a, a nui hmel mawi tak chu hmuh hmaih a hlauhawm hial zawk a ni.

"Tehreng mai rei lutuk lo ula," a ban a vai thuak a, a kal zui nghal a.

Rafe kal ta chu lawm zawk awm tak ka nih laiin, ka nun chu a ruak huaiin ka hria, he lawng mawi zet min fankual puitu chu Rafe ni zawk se, a mawina chu belhchhah a ni ngei ang.

Logan-a chuan hawihhawm tak chuan, a ban chu min rawn pein, "Kan kal dawn em mi niang?" Ka kut chu a ban a rawlh hnu chuan min kalpui nghal a.

"I lawng hi mawi ka ti lutuk tlat Logan."

"Tak zet maw?" A hmelah chuan a lawm tih pawh a hriat hle.

"Rafe hi pa zahawm tak a ni a sin," ngaisang tih hriat zet chuan a ti a, a lu chu a thlebak a, "Kawng hrang hrangah tuina neiin thiam pawh a thiam zel bawk."

"A ni ngei ang," ka ti sap a, a dik ngei ang tih pawh ka thinlung chuan a hria a ni. Ka hawikual vela lawng chu a nuamin a mawi kher em a ni. Hetiang mipa hmelțha leh hawihhawm tak zahawm bawk si chu mi vannei tak zawng a ni.

"Lehkhabu chhut lam pang te, computer siamchhuahna ka nei bawk, chung te chu Rafe-a'n a hrilh tawh ngei che ka ring. Mahni insawi erawh nuam ka tih zawng a ni lem lo."

"Oh! Ni e, min hrilh alawm," min la hrilh hauh lo țhianțha ber ti ve si-ah chuan, mak tak a ni. Ka hriat a țul a ti lo te pawh a ni ange.

A hnuailam ațang chuan lawng khawl chu alo nung țan a, a chuang hote hlim tak a kut benga an lo au dar dar lai chuan lawng chu lawngkai ațang chuan a tawlh chhuak zal zal a.

Ka vawikhat chuanna anih avang chuan ka lo awn deuh luih a, nghet tak chuan ka hnunglam ațang chuan min lo chelh nghal vat a, Rafe mi tawhna ang chuan ka taksaah danglamna a nei hauh lo.

"Fimkhur rawh Bridget, i tluk sual hlauh chuan Rafe-a ka ngam lo ang," a lam hawi chuan min kuai her a, a nui ver ver bawk a, Rafe nen chuan mize danglam tak an nei a ni.

"Ka lawm e Logan, ka vawikhat chuanna a nih vang a ni ange."

Tuipui boruak chu a thiang hle a, khua a nuamin thlifim a tleh heuh heuh a, a hnuailama tuipui dumpawl ruih chu ka thlir thla a, vawt ka ti nghal sung sung thei hial a, lawng bathlar hungna chu ka bawh vang vang a.

"In tur ka va la ange," Logan-a chu a kal nghal a.

Thil tam tak ka ngaihtuah a, ka nu leh pa te chu tel ve se ka ti ngei mai, ka phone ri chu la kangin ka pa tih ka hria, ka be lo thei tawh thlawt lo a ni.

"Hello ka pa."

"Bawihte, kan ngai tak zet tawh che a ni, enge i an le? I hun hman dan chu a nuam bawk em?"

Ka pa aw dam diai ka hriat leh chuan ka lungleng lutuk chu ka hnuk a ulh mai dawnin ka hria, ka insum hram hram a, "Nuam tak a ni, tel ve thei ula ka ti hle mai."

"I thin a rim tawh lo tih ka hria e, naktukah kan haw nghal theih dawn avangin haw kan tum a, i nu nen kan lo sawi fel tawh a, engkim hrilh che kan duh tawh a ni." A aw erawh a hlim loh hmel kher mai.

"Tak tak maw?" Chu thil ka rilru ti buai em em tu chu hre turin ka inpeih tawk em? Mahse, hrilh hriat ka ni dawn a, a lo berah hlim tur ka ni.

"Ni e, kan rilru kan thlak leh alawm, i nu pawn nakinah lo biak che a tum ang, ala buai em a tin ni."

"Aw le ka pa, kan lo haw thuai dawn tih i hriat kha, ka hmangaih che."

"Keini paw'n kan hmangaih che." Phone chu a dah zui nghal a, ka nui sak bawk a.

"I hlimna chhan te chu min hrilh ve phal em?" Logan-a chuan ka lam a lo pan a, no pakhat zawk chu min pein, a kut lehlam a a no kenna chu khai kangin "cheers," a ti sap a, ka bânah chuan nghet taka vuanin min kalpui nghal bawk a.

Chu lawng lian leh ropui zetah chuan hmun tin maiah eitur leh in tur chu a awm fur a, a hmuhnawm hial zawk, Logan-a chuan a hmun pawimawh bik te leh dangdai bik te chu min hrilhfiah zel bawk a.

Hall lian pui leh thil ropui danglam tak tak kan kal pel lai chuan, "Nuam ka ti tak zet," awm lo a awm lo hial zawk ang.

"Nuam i ti chu ka lawm tak zet Bridget, tunah chuan ei tur lam kan ei a hun tawh in ka hria," kan hmazawna eitur siamnaah chuan min hruai lut nghal a.

"Heta awm eitur an neih tuiber hi ei ila a țha in ka hria," a nui huah huah zui a, a nelawmin a bula awm chu a hahdam thlak hliah hliah.

An eitur siamtu chuan a zah hle tih ahriat a, Logan-a thil lam chu rang takin alo dah nghal thuai a, "In duhthusam ngei anih ka beisei ka pu," a lu a bu zauh a, a kal zui nghal bawk a.

"Tui i tih ngei ka beisei," ka kut vuanin a nui leh suk a.

"A tui hle ang tih ka hria a ni Mr Logan," ka nuih let ve sak a, eitur te chu kan ei zui nghal a, ka rin ang ngei chuan atui tak zet a ni, in tur kan hmeh tel avang te pawh chu a ni ang ka puar hma hle.

Logan-a chuan a lawng chanchin ngaihnawm tak mai chu min hrilh pah zel a, ngaihnawm ti tak chuan ka lo bu nghauh nghauh bawk a, in tur tui ber ber chi te chu alam chhunzawm nghal a, ka tan liau liau a, a țha ber ber a tih te chu kei hian ka hnar nachhan tur a awm hauh lo, bakah hetiang hun hi ka tawng leh ang tih tuin nge sawi thei?

"Bridget i țha meuh maw?" Min ngaihtuah tih hriat tak chuan min en a, Logan-a hmel chu ka melh peih țawk țawk a ni.

"Ka țha alawm, he hmun hi anuam tak zet, Rafe a tel ve lo a nuam ka tih a zual tlat," ka thinlungin Rafe-a awm ve lo chu hrehawm ka tih em avanga, sawichhuak ka ni mah zawkin ka hria, ka nui vak vak a dawhkan chu ka bawh thlawp a.

"Hetiang te chu i hriatthiam ve mai ka lo ring a sin, Logan," thinrim tih hriat zet chuan a ti a.

"A la in țhang lo tih ka hriat loh vang a ni," in thlahrung aw zet chuan a chhang let bawk a.

Chu mite pahnih inbia chu Rafe leh Logan-a anni ngei mai, chu pawh ka mutna room lehlam chiahah leh nghal.

Ka meng chuan ka awmna chu room zau nuam tak tih ka hria, kei hi room hran pek ka ni lo anih dawn hi, Rafe-a nen a room ințawm leh chu ka duh hauh lo.

"Mr Rafe, i thu thu a min dah i tumna hi bansan tawh rawh, Logan-a hian thiam lohna a nei hauh lo, enge ka tih ang a, engthil nge ka tih ang tih chu keimah chiahin ka rel ang," ka en chho hu a, ka thinrim zia pawh ka hmelah alang ngei ang.

"Tunah hian roomah lut la, va mu leh nghal rawh," Rafe-a chuan thinrim tak, hmai ruh țeuh chuan min ti a.

"Teuh lo mai, ka duh dan ang chiahin ka awm ang, ka thu ngeiin," cho zet chuan a hmel chu enin ka hawi chho leh nghal va a.

"Bridget, ngai ila awh lo niin a lang, va mu leh zawk tawh rawh," Logan-a chuan dam diaiin a lo ti ve bawk a.

"Lut rawh ka ti a ni lawm ni," a kut chuan room lam kawh pah chuan Rafe-a chuan a ti chher chhuai a.

"Nangni pahnih thu hian ka awm hauh lo ang," ka mittui tla tur chu ka khap let hram hram a, rang zetin room chu ka chhuah san nghal a.

"Zanin hian hna kan nei tih theihngilh hauh suh," Rafe-a'n a tih chu ka hre vuai vuai a, ding leh ka tum hauh lo, duh leh amahin ti mai ang hmiang, min ban pawh ni se ka hlau ther te lo.

Engtik ațangin nge he pa hi ka rilruah a awm reng ni? Min ngaihsak lohna a hmela ka hmuh te hian ka thinlung chu a na vawng vawng a, a awm nghenga țah hawm hawm chu ka chak ber a ni.

Engtia thui nge ka kal pawh ka hre tawh lo, lawng vawnban chu chelhin ka mittui chu ka hru mawlh mawlh a.

"I va inngaihtuah nasa awm ve," ka hawi let chuan Logan-a chu hlim hmel pu sarh chuan in tur keng chuan a hawi kual a, midang an awm hnai lo tih pawh a hre ngei ang.

"Engtin nge ka awmna i hriat theih zawk?" Logan-a chu Rafe ni zawk se ka ti ngei mai, mahse ani chuan min zawng hauh lo ang.

"Ka zawng nasa che alawm, hmeichhe rilru na taka an kal hian ka awm anuam thei lo a ni," ka rilru chu a na thar thut a, chhang lem lo chuan ka ngawi ta reng zawk a.

"I va ngawi thei ve Bridget, nang ang nula hmelțha leh nalh te chu hlim taka nun chen tur i ni asin."

"Ngawih theih hi ka hna alawm, țang reng in phun nawi reng ila, Rafe-a nen hian kan thawkdun thei hauh lo ang, mahse chutiang mi nih chu ka duh chuang hauh lo."

"Chuti chu Rafe-a mizia i hai lo hle mai," a nui sak a. "I duh danin i nung thei alawm," min hnem nge ni a min fuih pawh ka hre lo, min khawngaih ve hle tih chu ka hria.

"Tunah tak chuan thawveng taka awm ka mamawh a ni."

"A nih te chuan lo kal ta che," ka banah kaiin min kalpui nghal a.

Hall zau ropui zet kan thlen chuan a kawp te te chuan an lo lãm mup mup a, a țhenin no dawm pah chuan țhutphah nalh zeta țhuin an lo ti ti bawk a.

"Lam i duh em em?" Logan-a chuan a tih țhan dan bawk chuan hawihhawm tak chuan a kut chu min lo pe a.

"Tehreng mai," kan lam dun ta rial rial a.

"Rafe nen hian in in ngaizawng em ni?"

A zawhna avang chuan ka phu deuh zawk hial a, aw ti a chhan chu ka duhthusam nimahse, "Kan in karah engmah a awm lo," chu chu anih dan a ni reng bawk, ka taksa mawina bak duh a nei lo tih ka hrechiang em em si a.

"Mahse, i thinlungah chuan awm hauh lo chu anih loh kha mawle," Logan-a chuan a mit min siai zauh pah chuan "Ni lawm ni?" A nui leh ver ver a.

"Ni lo, i ngaidan mai a nih chu kan țhu dawn em ni? Ka chau deuh tlat mai," kan thusawi lai chu pawhchah vat ka duh vang a ni zawk mah.

"I chauh hi tuin nge phal tehlul ang ni," țhutna awmna lam chu min pan phei pui nghal a.

Mi pawimawh leh hausa tak tak tih hriat te chuan lo biain an lo chibai nak nak bawk a, min lo en a min lo nuih leh zauh țhin bawk. Sumdawn thiam tak leh hawihhawm tak a ni tih a hriat em em bak a.

"Bridget a tlai hle tawh a ni, Rafe-a'n a lo nghak reng tawh ang che," ka bula lo țhuin a sana chu a melh zeuh bawk a.

"A duh danin a awm thei alawm, keipawh chutiang ang bawkin," Logan-a chuan chiang zetin min en a.

"Chu chu i rilru diktak anih ka ring hauh lo."

"Logan, tih tur i neih chuan min kalsan thei ang, i neih lem loh chuan zanriah min kilpui duh angem?" Rafe-a bul a rilru hah reng renga awm ai chuan ka duh zawk tlat.

"I ti tak zet maw Bridget?" Mak tih hmel fe chuan min en a, "Kal zawk la ațhain ka hria, Rafe khan zanah..."

"Ni lo Logan, heta awm hi ka duh thlanna a ni, he hmun nuam tak hi ka la kham lo tak zet," za lo tak chuan ka nui hul hak a.

Logan-a chuan min en chik hle tih ka hria, ka thusawi te chu a awih lo tih pawh a mitmengah chuan alang.

"A nih chuan zanriah chu ka room-ah i ei duh angem? I hmuh ve pawh ka phut tlat si a," a hmelah chuan nelawmna hlir alang leh tawh zawk a.

"Tehreng mai, ka hmu chak hle bawk."

"A nih chuan min zui ta che," a hmaa kan thil einaah chuan a lut a, a thusawi te chu hrepha lo mahila, zanriah tura order tih chu ka hrethiam mai.

Ka lam rawn pan chuan, "Zanriah ei anih hmain, hmun pakhatah hruai che ka duh a ni, nuam i ti pawh ka ring tlat, chhunlam khan kan kal hman ta si lo va."

"Hmun nuam te chu, ka ngainat zawng tak alawm," ka bânah kaiin min hruai nghal a. To be cont...