KUM SAWM PAWH NI SE (Competition )

Ngaia
Site Admin
Posts: 25813
Joined: April 30th, 2016, 4:07 pm

KUM SAWM PAWH NI SE (Competition )

Unread post by Ngaia » October 23rd, 2017, 10:10 pm

(Thiam lo tak chungin ka vei leh ngaihpawimawh em em behchhanin ka rawn thai ve țhuai, a zirtir chhe tê tê hre turin min lo chhiarsak ve hram dawn nia.)

KUM SAWM PAWH NI SE

(Competition )
Nutei Varte Nutei Varte

CHAPTER - l

"A u êi rawh" ka nauin a tih chu ring mang khengin ka'n "Eiah " vak pekah! Ka nau insum tawka leh lam hawia nui hmûn hmûn chu ka hmu hman a, ka'n ben pâwp kha. "Bûmna ngaiah vawisarih bûm nawn theih" la ti zui. Ka ben leh hlautawkin a mawng ti sawi zuk pahin pindanah a tlan lut daih a, an la kalh hmak zuiah. 'Hm.. i inkhung reng thei nâ maw chu' tih pahin ka kal san a, mi tihder hi a sim thei lo chu nih hi. Uang ta reng reng i a nia, ka la sim tir dawn khawp min ti zak zing tawh em!

Sikul bânah kan țhian hoin thingphur turin hmunpui mûal lam panin kan inzui dam dam a. Vawiin chu kan bâng hma bawka kan hmanhmawh teh chiam lo, kan phur țheuh kan ngah hnuah thing thawn mawlh mawlh pahin kan ti ti a. An bialpate bula an chet chhiatna te an sawi a, kan beng chheng khawp, sawi tur teh chiam erawh ka hre ve lo.

Ka țhiante chuan ngaihzawng an nei vek tawh a, inlêng pawh an nei fo. Zanlam chanchin an chet chhiatna hi atukah an sawi țhin a, kan nuihpui nasa thei khawp mai. Kei erawh ka pa hian zirlai ni chunga ngaihzawng neih hi a remti teh chiam lo va, "Hlawtlinpui aiin hlawhchhampui an tam zawk" hi a ti țhin a, ka pawmpui vang nge ka duh zawng ka la tawn loh vang pawh ka hrethiam chiah lo.

Ka pa hi zirtirtu niin; sawrkar hna nghet tho, mi thawh duh loh chhe tê a thawk tel bawk. YMA-ah kum sawm dawn President-a chelh tawh bâkah kohhranah a khaipa (Upa) Pathian khawngaihna zarah a chelh bawk a, a hmel phû lovin an zahder phian a, ka țhiante paw'n an nêl teh chiam lo nge? A awm lai phei chuan an lo leng țha ngam meuh lo, a zirtir chhuahte kan ni bawk nen, inlêng neih chu sawi loh bialpa pawh ka la nei ngam lo. Mahse, pa nelawm leh fiamthu duh deuh mai hi a nia, min duatin, hausa lua lo mah ila kan mamawh ang hi min ngaihtuah sak hram țhin.

Kan khua hi thingtlang ngang a ni a, zirlai ni mah ila kohhran leh khawtlangah kan inhmang lo thei lo va, chawlh changa hnathawh leh inchhûng sekrek khawih hi chu sawi lo va lum a ni.

Chawhnu bânah thing kan phur ziah a, thingkhawn pawh mahniin kan nei hrang thlap, ka thingpur haw ka keuh hma hian ka pa ka ko hmasa ziah a, "Mambawih i va phur hnem ve tiang zah zah chu rawn phur tawh suh i hah lutuk ang" min tih thlakhlelh vangin! Heee, min lo ti ziah rêng bawk a, mi hi a tiphûr thiam thei asin aw, a leh pekah a aia tam phûrh châkna min pe ziah. Sikul chawlh ni erawh chuan lo lamah kan țhianho kan inlawm țhin a. Thawh hreh leh tih peih loh tih vel kan nei ngai lo, chawm hlawma sikul kal nih kha ka duh lo va, hunawl kan neih phawt chuan tih tur kan zawng rûai zel.

Final Exam kan zawh ni chuan kan ti țha tlang bawk a, kan hlim dar dar kher mai. "Apui, pakhatna i ni leh dawn sia, i pa Vawk talh tir tawh ang che" min titu lam chu hawiin "Teh ngawt chuan result chhuah hmaa lo sawi ngawt chu, sawmna pawh ka ni mai thei sin" nui hawk hawk pahin kan Sir Mawia chu ka melh zûk a, "Anih inchawi ang aw, pakhatna i nih chuan vawk in talh ang a, chaweiah min sawm ang" "Umh, ka nih phawt chuan ha tah hriam sa hmuam chungin i rawn kal dawn nia" ka ti sam êt a.

Chhawrhthlapui êng no nghial thlirin veranda-ah ka ding vang vang a, a êng țhain lung aleng reuh kher mai, kawngka kik ri chuan inchhung lam mi pan tir a , kawngka hawn sakin "Lo lut r 'u " ka ti sep a.

Kan khaw țhenawm ami Christmas ran zawng tura lo zin ho an lo nia.

"E khai!! Lo țhu r'u, in va fel ve" tih pahin țhutna ka kawhhmuh zung zung a, ka lâi ang reng.

An țawng duhin fiamthu an duh hlawm khawp a, a zia phian e. Kan khawho fel an tih thu te. Ran mai ni lo Ranngo thlenga an zawn pah thu te sawiin an ri lenglung hlawm a, a chang leh anmahni an insawisa thul, țawmpui vak ngaina hre lo mah ila nuih erawh an ti za ngang mai ,

Pakhat erawh a zîa a dang tlat, nuih hunah alo nui ve tawp a, a țawng ve lem lo, vawikhat erawh "Insawi chhâwk ta ula ngaihthlak ber tur pawh kan hredawn hleinem mawle, nuih hun tur tal hawng teh u, in ri ang bawrh bawrhah" nui țha duh vak lo chuan a lo ti vei khauh a, a zia tê chu ka lawm zawng tak.

Thingpui te kan in a, eng emaw chen an țhut hnu chuan kan mikhualte pahnih Renga leh Mawiate pawh an lo haw zui ve ta a.

Kawngka kân rual rualin Renga chuan "Ekhai! ln va lengrei ve, mikhual haw hun aw" a rawn ti lut hawm hawm a. An țhian zinga țawng tlem ber Hlimpuia chuan, "Lennate mut hma hmaa haw te chu" min melh zeuh pahin a'n ti vei ngeiah, ka lo nuih suk a.

Renga lah chuan a țhiante haw turin alo tur ve chhen bawk a "Naktukah thawh inhai ang. Hei, hotunu hian mas chhang tur a chiah țeuh a nia" Amah lah chu nui duh der mai si lo, nuam lo an ti ang tih ka lo hlau khawpah, an innel vangah ngaihsak mai ang, nuam lo ti hmel pawh an put chuan loh hi maw!

"Yes...mengtlang law law ang" an la ti zui.

"Thingpui ka'n lum leh ang nge u Reng, lo inkawm r'u aw " tih pahin choka lamah ka pheisan a .

Hlimpuia kha ka ngaihnat zawng tak a ni, sawm dawn an nia, midang hming chu ka hre mumal lo. Ani chu a țhiante vawikhat kohnaah ka theihnghilh tawh lo.

Ka thingpui chhuan nghah pahin ka va bih thla dek dek a, Renga leh Hlimpuia ti ti melh melh chu ka en reng a. Eng tak sawi ang maw?

Thingpui ka chawi phei chu Hlimpuia chuan min lo eng reng a, ka lâi tawp, Renga lah chuan "Apui, helam ringawt lo en lo la, i inchhuih ang e" a ti fahran a. "Hmm.... ve lutukah" tih pahin ka lei ka' n chhuah khum zukah. Haha...

Renga hi chu arawn zin apiangin alo thleng țhin a, kan innel hrimah. Mi kah leh tih zah vel chu ngaiah a nei tawh. Ka nu te rual dawn a ni na chu ka u țha duh vak lova 'Renga' ka tih hi chuan min melh sa la țhin a nia.

A sawi dik reng ka va melh tlat sia lawm. Vawikhat hmuhnaah tiang hi awm thei dawn emawni le! Mahse, ka awm dan hi a va mak si em! A țhiante phên ațanga kan mit intawng siah mai chu ka mûr nasain ka țek chhuai niberin ka hria , lungphu lam lam te pawh a inthûm rawn tluk tluk nia maw le, tiang hian tu lakah mah ka la awm ngai miah si lo.

Hlimpuia chuan, "Thingpui vawihnih intawh chuan haw a hun tihna nia , i haw tawh ang u hmiang" a ti zui a. A țhiante pawh chuan "Ni e, min hnar nalh bawk sia, haw zai rel phawt ang u " tih pahin an tho sap sap a.

"Insual thiam emai chutiang ka ngaihtuah lo, ala hma lawm le, in nula rim țhin ten thingpui vawihnih in zawhah haw tur an ti țhin che u ni maw?" tih pahin Hlimpuia ka va melh zeuh a, min lo en reng chu niin ka lai chiang e. Kawngka ațangin 'muttui u' ka tia, ka lut rang kher mai.

" U Reng, kan mu nghal mai dawn mi?".

"Lo țhu phawt teh, hrilh tur che ka nei a nia"

"Hmm, sawi ho leh awm e, i kâ ațangin thu bengvar thlak hriat tur va awm suh" .

"Lo țhu mai mai teh, ka haw hunah ka ak haw daih mai tur che nia"

Mawia lah chuan "ln va inngam siah siah ve, ah haw theih i nih chuan kan lo ak haw daih mai dawn che mi tak le!" alo ti bawi bawi a.

"Hiii... an nu ka haw tir hmiah a ni mai, min phawrh hunah meng kiau pahin ka hûk thut ang a, lungleng a țah hluam hluam chiah a hmabak a ni mai lawm" ka'n ti chu Mawia nuih alo za ngang mai.

Renga chuan, "Apui, kan infiam bawrh bawrha a țha e. Tak takah, Hlimpuia khan a duh che a, lo sawi rawh min tia "

" Hm, awiawm loh lutuk, vawikhat inhmuhnaah min duh leh duh loh a hre hawt lo vang e.

"Hlimpuia mizia hi i la hre lo mai mai nih kha, kohhran leh khawtlangah a inhmangin, ruihtheih thil ti miah lo a nia , dem kai tur êih paw'n hmeichhia ala kawm lo, tiang mi hi tunlai chhanah an vang tawh asin, lo inngaihtuah ang che"

" Ni e, ni e, mu phawt ang i sawi anih te chuan kan lem duak duak zel mai niang chu" awi lo tih hriat fahrana ka'n ti chu "Chutia i tih âiah i awih hma kan mu lo vang" inla thutak vel ta lutuk, a'n ngawi vei hmak chuan ka nuih a ti za kher mai, inhmuam ûp hi chu a inhmeh ve hlawl lo.

Ka muhil țan siar siar chauh tih chuan kawngka kik rî chuan min tiharh a, tho phang tawkin ka va hawng, Hlimpuia leh a țhiante chhang deng tura rawn kal chu niin.

"Hii..inrawn kal tak tak a!" ka'n ti hukah.

"Lo kal loh ngam chi pawh ni nang , Hlima'n min tung tho hlawm a, a nawrin min nawr thleng a nih hi, 'Nangmahin kal mai rawh' kan tih paw'n min phut tel tlat sia. Ani hi eng hi ngemaw a hriatni a phur riau mai a, nula chhang den pui tura a thawhhma tak pawh kan la hre lo, engemaw tak a ti ni" an ti chu Hlimpuia ka va enzawk a, min lo en leh reng tawh, nui ver ver pahin "Ka tihngai loh tih a țul te pawh nihmiang" a ti vei sukah.

An chak țha hlawm bawka kar lovah kan deng zo der mai, kalkawnga an ei tur buhban ka chhum sak ka fun mawlh mawlh lai chuan Hlimpuia lo kalin "Apui, U Renga'n thil a hrilh che em"? "Min hrilh tur a nei mi ? Engmah min hrilh pawh ka hrehleinem, tak takah thutak min hrilh pawh ka ring lo ve" ka'n ti bah nuai a, ka va khûr nasa tehlul.

"I hre țha duh lo a nizawk lo maw ? Kan hriat duh loh zawngah chuan beng hi kan chhu ngawng duh phian a nia".

"Chutiang lam pawh a ni lo, ka awi lo em alawm,min hre ngai pawh ni si lo, lo pawma rin nghal hmiah che hi ahar a lawm"

A dik ve tho mai, mak pawh min ti mai thei, tu lakah mah tiang hian ka la awm ngai lo, ka hmu chiah che kha ka danglam nghal vek a, i chezia engkim hian min hneh em em nghal vek mai hi amak tih loh rual pawh a ni lo , keimah ngeiin hrilh che pawh ka duh a. Mahse, kan ni duah bawk nen zankhat chiah hun kan nei bawk sia, min rin loh hlau tak chungin u Renga ka chah ta mai nih kha".

Chhân pawh ka chhang țha ngam lo, mawl min tih paw'n pawi ka ti lo, sawi mai tur hre tlat hek lo vi. Ka ngawih vung vung hnuah 'hunin ala hrîl ang chu' ka ti tawi sap ringawt.

Sikul kai turin ka țhian ten mi rawn sawm a, rilruah awm viau mahse ka sawi chhuak ngam thlawl lo, anni chuan engkim min hrilh vek zel a, ka sawi ve ngam lo chu a nih hi.

Inrinni a ni a, kan Arpa chhiarkhuan kan talh phal loh tar thi țhak ta chu paih âiah tiin kan țhian hoin chakâi chiah ang u kan tia, Ka u Bawiha'n "Mate ka lo kal ve dawn mi?" a ti chu "Ngai lo hmeichhe zingah tel ve chu chi nang, țhianten nuam an ti lovang" ka tia.

Ka țhiante chuan "Kal ve rawh se, tih dan pawh kan hrenang, mipa pakhat tal hruai lo va kal chu engemaw palhah pawh a hlauhawm alawm" an tih vangin kan hruai ve a.

Tuidam lam panin kan kal a, a hmun kan thleng chu kan rak nghal teng tung mai, anuamin a thawveng bawk sia, tui lah chu a fim kûk mai a, chên a chakawm nghal ruih mai.

Chakâi chiah lam pawh kan ngaihtuah tawh lo, thawmhnaw phelh leh zuan luh kan rual a, kan ri chel chul tawh mai .Tui kan intheh thul , U Bawiha'n chakâi chaw chah tur kan Ar ken chu hmawlh kara chepin alo buaipui mawlh mawlh bawk a, a siam zawh chuan "Lo chhuak tawh r'u, ka siam zo tawh" atih vangin kham lo tak chungin kan chhuak a .

Lui hnar lamah kan chho a, U Bawiha' n kan chaw chah tur Arsa tui chhunga a dah chu "Tuia i chiahin a da vek anga sin, tui chim loh chinah a ko tlangah emaw dah ta che" ka lo ti vei zung zung a.

"Awm ang lo lutuk tui chhungah alawm an chiah țhin, lungin kan delh bet anga tikhan a lo ei mai dawn lawm, tuichim phak lo va kan dahin an rawn ei har lutuk ang asin, mawl reuh lutuk mai, lo kal lo i la engtin tak ti ang che u maw?" a ti chu kan nui nasa mai, a tih dan hria tumah awm lovin kal kan lo tum ve hmiah sia. U Bawiha hruai lo ta i la kan buai teh ang chu.

Chawchah kan dah zo engemaw chen kan nghah vang vang hnuah kan vâi thla chu a lo tam ngang mai, hmun khatah panga ten an lo bâwr a, man ngam kan awm si lo . U Boih kha pawh kha pawh tiin kan lo au teng tung a ,"Lo rak vak vak mah ta che u, inti țî zo vek ang asin, chakai ip kha ngawirengin lo keng ula atawk, tih theih innei tlem si, man tak ngial pawh inla man ngam lo leh ta nghal" nui huau huau pahin a'n tia.

Satha ip khat dawn kan man a, hlawhtling inti tawkin kan hâwng a, kan inah insem turin kan lut hmasa a, ka nu leh pa an lawm thiam ngei mai. Ka nu chuan "Tiang zah in rawn hawn pawh ka ring hleinem ava lawmawm tehlul chakai ei a khât ropui sia, a tui dawn lutuk" ti mawlh mawlh pahin thingpui a sem a. Kan chhum nghal hluah a, zanriah pawh kan ei puar tlang kher mai.

Khumah bawk zal mai mai pahin Hlimpuia ka ngaihtuah veng veng a. An haw ta kha a reh ta vang vang sia, min duh tak tak ring chiah lo mahila a thu sawi lai hmel ka'n ngaihtuah chuan dawt sawi hmel chu niin ka hre si lo, nge ka ring phal lo zawk pawh ka hrethiam tawh lo. Kei hi awmze nei lovah ka lo inbeisei sang ta viau nge mawni zawk le?? Vawikhat hmuhnaah ka vei zui veng veng chu ni sia. Min en paha a nui vên vên hmel te kha ka mitthlaah acham reng, ka vei lutuk ang tih erawh ka hlauhlel lo ve.

Sangtei leh Matlani'n hla zir turin min lo sawm a, "Zanin chu ka va za tehchiam lo, KȚP inkhawmpui lah chu hnai tawh sia" ka ti nuah nuah chu Matlani lo phur ta lutuk "Kei hi sin peih lo chu, lehkha zir tur tam bawk si, hlazir zawhah men leh hrep ngai ang a, ninawm hi ka ti a nia , khawtlang leh kohhranah kan inhmang hlawm lutuk hi sim țhen ang u , tuma'n min dem chuang lovang, kei chu ka tlin lo lam chu a ni " lo ti ve zuah zuah a.

Matlani phûr ta lutuk kha sawi fuh ka inti tehchiam lo kher mai "Matlan nia, i ngaihdan chu âwm ka tihpui khawp mai che, zirlai ni chunga engkima inhmang tur chuan mibik leh taima falbik tan lo chuan hlawhchham lerder theihna a nia lawm, chutiang kan nih loh chuan inhman tam loh hi a him zawk ngei ang. Chutih rualin kan inhmang lo thei si lo va, mi aia hah leh taimak kan ngai nih hi "Aa... kan țawng tui lutuk dawn kal phawt ang u" tih leh chhuah kan rual a.

Kan kawmthlang kawngpuiah an bialpate ve vein min lo nghak chu niin "Chhuanawma, Sangtei B chuan "In va rei em em hmeichhia tak hi chu rilrua awm zawng zawng sawi kim vek kher hi intum țhin a, in awmho tawh lah chuan mi hi inhrechang tawh ngai reng reng lo mai, kal vat r'u kan tlai dawn " tih leh Sangtei mawnga pet a rual a.

" Ngemaw ka mawng pawh chu i pet thlakzen le!" Tih leh a khupa chhuih a rual a, ahlau leh sia a tlan thut chu kan ûm chho a, thlan tla phungin hlazirna kan thleng a, kawtah an la inkhêng leh chiam zui, nuam hi an ti nia.

Christmas leh kumthar inkarah Hlimpuia putea alo zin chu niin Sangtei te nen an inchhûn vangin an inah an thleng mai țhin a, Hlimpuia lehkha a rawn ken chu Sangtei a rawn dah tir a.

Sangtei hrilhhai leh angaihna hre lo lutuk hmel kha. Zawhna mitmeng hlirin mi melh a, chhiar châk viau tawh mah ila, ka insawifiah hmasak ngei chu a ngaih hmel.

"Sangte engmah a awm lo nia, hmanni an rawn kal kha min fiam vei zûk a, chu chu nimai a bak engmah awm hrih lo, min fiamtu nazawng thu tak khuk pui chiam chi nihek lo, lo hrilh ringawt che u ila engmah ni leh si lo se, a zahthlak dawn e lawm"

"Ni ve tho mai, Hlimpuia putea 'n a sawi kha engmah hrechiang lo ta chu ka lo vui hman deuh a, keini paw'n engkim kan hrilh vek zel che sia, i zep bik turah ka lo ngai a, thil min zawt țeuh leh nghal, ka sawi bam țep a ni " tih pahin lehkhathawn min pe a, "Ka chhiar ve duh nia " la ti zui. To be cont...



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 10:10 pm

(Competition)

CHAPTER - ll


"Sangte, dik tak chuan ka rilru kha abuai ve lutuk asin. U Renga bulah min duh thu a lo sawi a, an haw dawn pawh khan min hrilh thuak bawk a, ahmaa inhre ngai pawh kan ni si lo, zankhat inhmuhnaa min duh nghal kha ka ring lo a, ring lo e ti lo chuan keilah chuan ka duh ve nghal em em mai bawk sia. Mak pawh ka in ti ve khawp mai, nang tal chu ka hrilh dawn che emawni ka tia. Mahse, ka ngawi ta zawk nih kha".

"Bakah tih sual te hi hlauhawm ve a, mi awmherh leh hmuh hnuhnun apiang ka duhzawng tak i ni ti zûr zût leh nawmsipbawl nana min hman tum mai mai te hi kan lo pawm palh chuan nunkhaw châwr lohna kan insiam thei a, fimkhur hi a ngai êm a, lo ngaih thutak vak loh kha a him berin ka hria a, ka hrilh ta lo mai che nih kha".

"Apui, i sawi dik khawp mai, hmeichhia phei chu kan tih suala engemaw kan tawh palh chuan a mualpho leh chan chhe zawk kan nia, bulțan țhat leh fimkhur hi kan ngai khawp mai. Mahse, Hlimpuia chu chutiang mi a nih ka ring lo, kan chhungte an nia ka hrechiang ve tho chuan ka hria, i duh zawng a nih chuan nih pui rawh i tihsual ka ring lo, Pathian țih mi leh ruihtheih thil ti miah lo a nia. A putea paw'n a fak mai bakah a uluk pui hmel khawp mai, min han zawt chik em em leh nghal".

"Awi zahthlak e, chutiang a nih te chuan lo duh ve ngawt pawh ni ila, a chhungte hian min lo duh kher lo thei asin".

"A teuh lo, an duh dawn che tih ka sawi ngam sak, nang te chu tlangval chu sawi loh nu leh pate thlenga an ngaihzawn rawn che i nia lawm".

"Hm, lutuk che chuan, mi hi fakder chiam zel lo teh, i ti zahthlak thei emai, Hlimpuia putea bulah te khan min lo fak chiam ange aw, ka duh miah lo a nia".

"Ka fak hran lo che i nihna ka sawi mai, ka nu leh pa thlengin a zawt a, kan inlengte nen lam kawmthlang putar nen mitdel țawng thei lo thlengin" nui uar uar chungin a ti ta duah a.

"Hmm...i chhe emai Lalsang, fiamthuna hun pawh a nih lo hi, thudik leh fiamthu pawh ka thliar hrang thiam tawh lo ve, i la chak lovang aw" tih pahin ka nambu lawpah. A nuih lah chu za telh telh zui.

"E, taka hman ni an lo kal tuk khan inchhang ami an rawn den pui che u a?"

"Aw ni e, tinge?" "A, an lo haw kha a țhian ten an kâp deuh reng a, hmeichhia a ngaihsak ngai loh vangin engahmah ka lo ngaihpui teh chiam lo va, tunge an dem ber hriat tumna pawh ka lo nei hleinem, nangmah i ni tih hria i la chuan ka sawipui nasa viau ang. Apui chhuah reng reng suh, awi nuam dawn e."

"Thlangawt che chuan, a lehkha hi chhiar phawt ila, min duh leh loh thu te pawh lo ni daih thei asin, lo phûr viau zel lo teh".

A vawikhat min hmuhnaah min duh nghal avanga ka rin loh ahlauh thu te, min nghah a inhuam thu te, uluk taka ngaihtuah chunga lehkha min thawn a nih thu leh ka duh ve a nih chuan a putea ka chhanna kentir tura min beisei thu a rawn ziak a, lawm rilru tak chungin ka nui var var a .

"Kan rinsual loh tawp chu, a chhanna tur ziak nghal ang 'Aw' hmiah rawh" .

" A ! Mai mai chuan, i ti ang lo lutuk chhâng dawn pawh ni ila ka nu leh pa ka hrilh hmasak phawt loh chuan ka ngam lo, an hriat hunah min hau dawn asin".

"Awhawi, keichu ka hrilh ngam têuh lo mai, ka duh zawng hi chu hrilh lovin ka chhang hmiah zel, nu leh pa hrilh chu sawi loh tuber hi nge kan ngaihzawng tih an hriat hlauh mahnak laia!"

"Fimkhur angaih thu i sawi ve zuah zuah sia" nuih hi a ti za thei a nia, "Keimahin ka fimkhur mai, an mizia țangin chhan chi chu ka hre ve mai alawm, nu leh pa ka hrilh loh vangin ka fimkur lo chuang hleinem hrilh kha ka zak a ni mai ni" a ti vei suah suah a.

"Zahna tur awm lo reng reng hrilh ziah tawh rawh, nu leh pa hian kan tana țha tur an hre ber, i tih sual chuan a tuar tur chu nangmah chiah".

Ka pindana ka awm chu ka pa'n mi rawn âu a, "Mate lo chhuak teh. Hei, i țhianpa pute-a'n biak che a duh a".

Awi, ka va'n hreh bêr mai, ka pa bula țhut pahin "lndam tlang maw? Engtinnge ka koh dawn che?" ka'n ti deuh ruihah.

"Pu Zual min ti la, duh leh pute pawh min ti mah la a pawi lo" nui suk pahin a'n ti vei ngeiah.

"Lo inkawm ru, mutzâl pahin nilai thupui enlâwk ka duh a", tih pahin ka pa chuan an pindan lamah min phei san daih a, ka va ngei ber mai, ka zak tih a hre tho awm sia .

"Thingpui ka'n lum ange aw," tih pahin ka thawhsan ve leh a.

Thingpui inpah chuan Hlimpuia chanchin min sawi pui a. Tûte mah ni se a chhuan thu te, amahah an innghah nasat thu leh a nupui tur thlenga an uluk thu te min hrilh a .

"I țhiante leh mi dang dang pawh i chanchin ka zâwt a, an fak hlawm che bakah. Hei, ka rawn hmu che a, Hlimpuia paw'n 'l hmu mah ang a i iai ka ring lo' min ti kha a nia. A lo sawi dik khawp mai. Engpawh ni se, lo inngaihtuah la, i chhânna pawh ka hawn a beisei dawn a nia, ka hawsan phawt ang che, thingpui tui tak min lum a ka lawm e" tih pahin a tho țham țham a.

"A la hma alawm le, la țhu la " ka ti sap a. "Lenkualna tur te ka la nei sia" a tih tlat vangin kawngka thleng ka va thlah a. Ka mangțha hnuah kawngka kalhin ka pa te pindanah ka phei nghal rawk rawk a.

An pindan kawngka ka pawh hawn rual rual chuan "Lal âpa misual nû, inleng ka nei ngai lo tih i hria, ka zak tih pawh i hria, nge min pheisan daih" ka ti bawrh bawrh chu ka pa nuih za lutuk insum tih hriat siin "A, Zuala khan sawi duh a neiin ka hria a, ka awm ve reng kha achi lem lovin ka hria alawm le, ka kal tur i ûi hmel kha ka hmu tho a chu..." A sawi zawh hma hmain "Engmah pawh ka hrilh lovang che u" tih pahin kawngka ka khar bûr a, ka chhuak nui leh ang vûr vûr a, ka pa hi chu ka zahin ka nêl a nia.

Mut hmunah chuan ka inngaihtuah nasa mai, min bêmtu neuh neuh tawng țhin mah ila, eng vakah ka ngai ngai lo, ka chhung te hrilh kher lovin ka hnar mai zel, tun țum chu an hriat a ngai dawn tlat.

Ka pa'n min hrilh țhin chu, "Ngaihzawng nei rual i ni loh bakah zirlai ila ni a. Mahse, kan tihtheih piah lam a awm anih erawh chuan mi țha lo i tawn loh nan min hrilh hre hmasa dawn nia, inngaihzawn fê hnuah chuan ințhen leh mai te hi a harsa a, i nun uluk la, i naute entawn turin awm ang che" tih hi.

Ka harh chuan ka nu leh pa an tho tawh a, tho chhuak mai lovin ka room-ah ka ko lut a, ka hun tawn mek chu ka hrilh a .

Ka nu chuan " l pa thu thu a ni mai, ngaihzawng neih hi fimkhur a ngai a, zirlaite i la ni bawk si, duh ve lo ni la chu min hrilh hre kher dawn lo va. Tin, kan ngaihzawng te hi kan pasal tur an ni kher lo tih hriat tur, fimkhur viau ang che, hmangaihtu tak tak che chuan i zahawm loh a phal dawn lova, i nun tihchhiat a duh ngai hek lovang, chu chu hmangaihtu che hriatna țha ber a ni. l nun dan hi fimkhur la nelawm leh zahawm tak siin awm i tum dawn nia. Pathian hnenah hlan la, a fel vek mai ang" tiin min zilh melh melh a.

Ka pa'n engtak sawi ve ang maw? Thin phu dup dup a ka'n awm chu.

"Mate, i thiltawn i nu leh pa min hrilh hi ka lawm khawp mai. Nizan khan Zuala nen kan sawi dûn a, kan hre tawh tho a. I nu nen pawh kan ngaihtuah nasa khawp mai, 'Min hrilh angem aw'. Ka lo ti che a, i nu sawi kha hrereng la, Pathian hnena hlan mawlh kha theihnghilh lo la, i tana țha turin ro arelsak em em ang che, Hlima pawh mi țha tak a nih ka ring. A pa pawh mi țha lutuk a nia "

"Pa in inhre ngai a maw?" "Hria e a, kan tlangval laiin khaw hrang hrangah kan inkhel țhin a, kan inhmu fovin kan inkawm nasa lawm, pi leh pu ațanga mi țha chhung an nih kha. Engpawh nise, țawngțaina ka'n nei ang e".

Ka pa'n țawngțaina a neih zawh chuan an chhuak zui nghal a.

Pa te mah ni se ka fak thlawt Pathian a țihin kawng engkimah Pathian a rawn hmasa ziah a, ho tê anga kan ngaih thlengin, ka nu ni se a dawm thiam em em a, intih thiam loh leh thinrim chang an neih paw'n kan hriatah an inhau ngai lo. Vawihnih khat chu an pindana an inkhak chu ka hre tawh

Thawmhnaw sûk tur ka zawn laiin an pindan lam pana ka kal chu an lo inhau ve nasa mai, an thu leh hla hrechiah lo mah ila an aw ki ațang chuan an thinrim dun hle tih erawh ka hria, va țhelh chi niin ka hre chiah si lo, ka ngaichang deuh reng a, ahnua ka va phei leh chuan ka nu luchungah kut nghatin a lo țawngțai sak a, inhauh hrep hnua ințawngțai leh chu a har hi ka'n ring khawpah. Kan unau min enkawl dan pawh chu ti tho.

Min chhuah san hnu chuan nu leh pa hlut zia ka ngaihtuah neuh neuh a 'Ka nu ka pa, ka harsatna, ka hlimna, ka lawmna thlenna tur leh ka nun kawng min kaihruai a, thu țha tinreng min fahtu tur ka nei che u hi ka va lawm em! Min dampui reng ang che u ' Tiin ka phun melh melh a, hmaichhana sawi chu alo har deuh a ni.

Hlimpuia lehkha tur chu a putea ka kentir a, ka ziak hnem teh chiam lo, ka duh ve thu leh engemaw mai mai atana ngaihzawng neih ka duh loh thu te, kan hmabak tam tak puitling taka kan hlenchhuah theih nana inpui tawn tur te leh rinawm tura ka beisei thu vel a ni deuh mai.

Hlimpuia lehkha ka chhan ațanga karkhat velah chuan a lehkha ka dawng leh a, ka duh ve vanga alawm zia te, a putea nen a nu leh pa bula engkim an sawi thu te. Lehkha țha deuha zir tur ten min fuih a, ka rin ngama awm a tum thu te a rawn sawi țeuh, ka va'n lawm em! A ti mai mai bik lo tih ka hriatna hian min tihlim leh zual.

Hun leh ni te liam zelin sikul pawh kan țan leh tawh a. Pakhatna ka nih vangin kan zirtirtute chuan min beisei sang leh ngei ang le! Huphurhawm țhin mang e.

School bânah thing phur turin kan țhianho kan inzui chhuak leh a, thing ala tamin hmun hla tak pan pawh angai lem lo, chawhnu bânah pawh vawihnih chu kan phur hman var var. Mahse, home work tih te kan duh țhin vangin vawikhat bak chu kan phur ngai lo.

"Kei chu news ka nei ri ra a" Sangte-i'n a'n ti chu, a sawi tur ka lo hre lawk sia ka nui tawp, hriat châk hmel fahrana kan țhiante Sangtei lam hawi a an thlebâk chu, "Ka sawi dawn em?" Ti niawm tak a Sangte'n min mitmei chu ka lo sial zauh a, phalna hmua in ngaiin "Apui- i'n 'Tawih' (Bialpa sawi nan kan hmang țhin) a nei ve tawh a a'n ti chiah chu, min lawm pui hlawm kher mai.

Hlimpuia nen kan nih chhoh vel dan Sangtei chuan a sawi zung zung a, "A duh zawng a hmu ve ta chu ava tihzia e, a duh khirh ve ropui si, a duhthusam an awm theih pawh ka lo ring hleinem, duhthu sâm reng renga a tar thih țhak ka lo ring zawk a sin" Mahlimi'n a'n ti chu, sawi dik an ti nge mawni tehreng an nui dar dar a.

Kan thing fawm rêng rêng hi êhphel kher kan duh țhin a, pum têreuh te pawh kan han ek phel kher zelah. A phel hi țha ta riau turah kan ngai a ni chawk ang chu. Kan phûr țheuh kan ngah hnuah muang changin kan hawng a.

Hlimpuia nen pawh chanchin inhrilhin lehkha kan inthawn deuh reng a, ka ring tawk bawka hlauhthawnna pawh ka nei ngai lo. Ka lehkha zirnaah nise țan lak phah nan ka hmang bawk a, ka nu leh pa ten ngaihzawng neih min khap bûr loh nachhan ka hrechiang ta khawp mai.

Tlaikhat chu ka pa'n "Mate veng mawngah naute dam lo zu kan lawk ila " a ti chu ka insiam sawk sawk a, kan kal nghal a.

A lo na angreng khawp a, mi pawh an tam phian, ka pa zui luh mai tuma kawngka ka pen chiah chu ka malpuiah min lo kheuh zeuh tu lam hawiin ka ding chawt a, Sawmmawia lo ni rengin, ka pen laklawh tawh sia nui suk pahin ka lut ta tho a. Mi an lo luh belh zel bawk nen, țhutna kên chhuanlamin ka pa bulah chhuah ka dil a.

Sawmmawia bulah ka va țhu a. Ani hi ka sikul kal pui niin, kan in classmate bawk a, kan inkawm ve nasa. Kan țhianho zingah alo tel chawt a, țawng tam lem lo mahse, nelawm tak hmelțha pian thiam leh sport lam pawh thiam tak a ni bawk a, a nui duhin a bula awm pawh nuam tak a ni .

Rei mawi tawk kan țhut hnu chuan "Haw mai ka duh naktuk test kan nei bawk sia" "Lehkha zir hi chu i peih ve ngawt mai ila hlawhtling khawp ang"

" Hm.. lutuk che chuan, sâng tak kal ka tum reng reng lo" tih pahin ka'n bêng thlawrhah. "Kal rawh, nih ka rawn thlah ang che ".

"Hiii...i rawn leng ngam dawn chuang lo va "

"I pa lo haw hma chu ngam e"

"Chiah"

"Umh"

"Nih chuan ka pa ka'n hrilh ange" tih leh kal ka rual a, ka pa bula ka sawi hnu chuan kan kal nghal a .

"Apui ka awmdan ațang paw'n i hrethiam vek thoin ka ring a, bakah kan țhiante bulah pawh ka sawi fo țhin. I hre vek tho ang, engmah hria ang paw'n i awm duh ngai si lo va. Min kâwm satliah mai mai tih pawh ka hai lo. Mahse, ka duh chein ka vei ngut ngut che sia ka awmdan pawh ka sawi thiam lo".

"Sawmmawi ka hria alawm. Mahse, tiang zawng chuan min en suh, țhian anga inkawm hi nuam ber"

"Țhian angin ka kawm ve thei lo che alawm, ka hmuh loh chhung che rei lo tê pawh hrehawm ka ti țhin. Mahse, i thu thu le, min duh ve hun ka lo nghak ang che" la ti hram.

Hlimpuia nen kan nih thu pawh ka hrilh duh ta lem lo.

ln kan thlen rual rualin "Lehkha zir ang hmiang naktuk test tur kha i thiam tawh em? Kei chu ka la zir eih lo va" Ka ti bawrh bawrh a.

"Thiam nang ka la zir bik lo "

"Nih chuan kal rawh zir ang, tu thiam hmasa kan ti dawn nia.

To be cont...

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 10:10 pm

( Competition )

CHAPTER - III


Ka lehkha zirna room-a pheiin kan zir dun a, kei âi chuan a thiam hmasa lo tlat, atha anâ rap, kan inzâwt ve ve a, kan thiam viau hnuah "Duhtawk ang thingpui in pahin sawlamah kan inkawm dawn nia," tiin ka phei pui a.

Nitin sikul kai rual a; bâna haw rual, sikulah ni se kan țhianho zinga telin inkawm reng ta na na na chu inngaihnatna chin a awm ve a. Min ngainat thu leh min duh thu lah chu kan țhiante bulah a sawi fo. Mahse, ka haider lui tlat zel thung. Hlimpuia nen ni lo i la chuan ka iai hran lo, a fel mai bakah a bula awm anuamin thu a awi vei phian bawk sia. A chang chuan ka lainat ve deuh țhin, khawngaih nih pui chi lah nihek lo le.

Sikul bânah kan haw tlang leh dam dam a, "Naktuk chawlh a ni sia, eng nge kan tih ang thing kan phur mai dawn mi?" Matlani rawtna chu an pawm tlang dial a. "Keichu ka hman dawn lo ka nu'n 'Leipui min thlawhpui dawn nia' a tia, ka lo 'aw' tawh tlat, min hrethiam mai r'u, zawh vat a duh tawh a, ka thlawhpui chuan a tukah nuam deuhin a zo thei dawn a."

"Sawmmawi khawi zawkah nge i kal ang," Sangtei'n a'n ti kherah.

Kan bûng țan dawn chauh tihin, ka beiseih leh rin loh lutukin lo lû țang 'Lalsangpui' ti a min koh luah luahtu chu Sawmmawia a ni chiang mai, rang zetin ka'n êi vak a, "Lo chhuk rawh," ka ti chu alo thlengthla rang kher mai.

Ka nu lah chuan "Aw Sawma khawnge i kal dawn helamah te ilo lan teh mial?" lo ti hû a, a zah ka hlau angreng sia, sawi mai tur lah ka hreder si lo, ka nui tut ringawt. Ani lah chuan lo chhang vatin "Vawkchaw tur changel ka zawng a," Ka awi lo lutuk chu ka nui chiam a, changel put nan chuan a hla deuh, dai velah lian țha tak tak a tam e. Hahaa...

Ka nu lah chuan lo awi ve mai a, "Saw vau-ah sawn atam alawm, i hmanhmawh hran loh chuan hlo hi mi'n thlawh pui zet la, haw dawnah ila ang a, kan haw rual mai ang chu," alo ti zaih a.

"Pawi hleinem," tih pahin tuthlawh a rawn phawrh chhuak chu ka nuih aza tawp, changel la turin tuthlawh ken chu! "Tuthlawh khan changel sah i tum a mi?" Ka'n ti kherah, "Ha..chutiang an inzawt kilh kelh ngai lo," sawi zawm a hlauh hmel lutuk khan ka nuih ati za zual, "A hrim hrimah tinge ka hmingpum khera mi rawn koh chiam a?" ka'n ti leh hram a, "Apui tih kha ka zak deuh a, zah zelah i hmingpum ka rawn hmang ta mai nih kha," ka nu hriatphak loh turin a rawn ti sur sur a.

"Min thlawhpui tur hrim hrimin i rawn kal ni maw?" kan ti nawn leh kher a, dil chhût min tih hmel a sin le. "Ni deuh e, changel te chu heta țang te chuan ka pu haw peih teuh lo, i nu awm ve sia ka chhuanlam a nih kha" a ti țha ve ta hram a.

"l ho e a, 'Ka lo pui dawn che u,' ti la a lawm dawn tehlul nen," "Naa, a zahthlak ve alawm, bakah i ngaihdan a nih loh ka hlau deuh bawk a, 'i puih kan ngai lo,' i lo tih palh takin ka tia, mi changel la tur na na na 'haw leh rawh' intih ngawt thu awm hek lo tiin ka rawn chhuanlam nih kha."

A chak fua fua bawk a, a bula hnathawh anuam kher mai "Zawh kan tum dawn nia, i nu feh ting tang ngai tawh lo turin," a ti chu ka lawm kher mai.

Chawchhun êi zawhah ka nu'n "Tihtham a awm tawh chuang lo va, vaua changel saw va la ula inlak chhungin ka lo zo hman mai ang," a ti chu kan in en a kan nui tawp.

Hnial chi lah nitawh hek lo a peih emaw peih lo emaw heta țanga a put haw ngei chu ngaih hmel khawp mai. Nge maw chhuanlam atan a hman tehreng ni.

Vaua hnimpik kan han tawn phei tak tak a le, kan in tleng chhawk hi a ni ringawt, 'i dawtsawi man kan tuar' tiin ka hau deuh reng a. Ani lah chu nui țha duh der lo lehnghal.

A duhtawk a lak hnuah ka thiarchhuahpui a; kal a harsa bawk si, duh âia thui ka tleng leh țhin, ka nuihnaah ka chau zo, kal a harsa bawk si "Ka chau lutuk tha pawh ka nei tawh lo chawl ang," tih leh țhut ka rual a.

"Chawl ila," tiin ka hnungah a lo țhu a.

"Apui, lo kal kha ka châk lutuk a, i ngaihdan a ni lo vang tih ka hlau bawk sia, ka fin lawk hreh che u kha, lo lû-ah pawh ka awmrei asin, ka tei ka tei a,
atawpah ka rawn au phut che nih kha".

"I ho e, naupang chhia nghal lo, min pui duh a nih te chuan kan tan a lawmawm daih zawk alawm, 'ngahnge i hreh mai mai, feh leh ngai lovin min zawhpui bawk si, ka lawm mahnaklaia, ka nu pawh a lawm viau ang."

"Apui, lo phei dawn tawh ula, inla hman lo mi?" ka nu'n min auh lawng lawng takah chuan kan chawl rei tih kan hrechhuak chauh, "Zia lo ve, phei vat ang. Pakhat chiah pû la i kal thei lo si, a dang chu ka rawn pu vek dawn nia, i nu' n min hauh vaih chuan ka puh dawn che i hria maw," Nui hawk hawk chungin a tia.

"Induh khawp in va la thei maw? 'Sawma i zarah kan zo thei a, a tihzia khawp mai, Mate han chhawk hmawk hmawk ula i êmah i phur țhen sak dawn nia. Sawma vawk engzatnge in vulh a?" a ti zawm zat a, "Pathum," "Chuti si inva la tlem ve" a ti chu lehlam hawiin ka nui dir char char. Heta țanga phurh haw atan chuan a tam mah mah.

Hawkawngah kan inzui vei rak rak a, feh haw an tam sia nuam ti chiah lo mah ila hreawm a tih ka hlau sia. Ani mi â lo ta chuan lo hrethiamin "Muangchangin inhnungah ka lo kal ang," a ti chu ka khawngaih ang reng.

Ist term exam kan zo a, ka nu nen buhban hmun thlo turin kan riak a, lânga thawh nan chuan a hlat deuh vangin kan țhianho pawh inlâwm lovin mahni lo țheuhah kan riak a, kan inhlat lem lo hlawm bawk nen zanah kan inlên pawh ziah a, thla ên vanglai tak a ni bawk nen, lung alengin guiter perhin kan zai chiam zel.

Hna hi ka thawk țhang lutuk lo va, ka chauin nisa do ka chak teh chiam lo, changel hlima kan chawl chu ka lo muhil daih zui, ka nu hlo thlo rî chuan min ti harh a.

"Nu tinge min kaihthawh loh?"

"Ti khan lo mu chawl rawh. Ni asa ropui sia, i la ti țhang si lo, tlaidaiah min thawh pui mai dawn nia," a ti chu khawngaih viau mah ila ka tlin ngang si lova, rei lo te ka muhil leh sek a. Vawiin chu ni ka do sual a niang ka ti thleithei der lo mai.

Tlai daiah chuan ka nu chu ka'n thawhpui ve leh mai bawk a.

"Nubawih hna ila thawk țhang lo va ka hrethiam che. Mahse, i dam anga pasal achhia a țha i la nei ang, hnathawk mi pawh i nei thei. Chuvangin, engkim hi i thiam vek angai a nia, nilênga hnathawh pawh tlin tura i beih angai, taimak leh tih hram hramna tel lo chuan engmah apuitlin theih loh tih hrereng la," a ti charh charh a.

Ni e, Hlimpuia ka hmangaih a, neih ngei pawh ka tum, kan innei ta lo anih paw'n hnathawh hahthlak zia hriat nan leh inzir nan a țha vek tho, thingtlang hnathawh abikin lo neih awmzia hre lo leh thiam nei lo a chhungte thawh chhuah sa ring a awm hi ka tum lo bur. Hlimpuia vang pawh hian ka tih ngâi loh leh thiam loh pawh tih tumin ka rilru ka siamin ka bei nasa, hma pawh ka sawn viau.

Zanriah êi kham chuan tih tur em em awm tawh hek lo, ka țhiante an lo lang mai si lo nen, thla a êngin lung alêng duh kher mai, namthlakah chuan râl lehlam mual thlirin ka hawi vauh vauh a.

Ka lehkha zir min tihbuai ka hlauh vang hian ngai viau țhin mah ila ka ngaihtuah duh ngai lo. Mahse, zanin zet chu ka hman bawk a. Ani ngaihtuah veng veng bak tih tur nei hek lo vi.

A lo zin changa a kal țhinna nikum an khaw chula kawng inkham rûahte chu ka thlîr vawng vawng a, ka van ngai tak em! Tunah te hian eng nge a tih ang, nula a rim angngem le? Ka lung alengin ka ngai kher mai, thla êng chu ka thlir veuh veuh a, "Aw chhawrhthlapui ka lungdi laitual lenna i ên ve ngei awm si a. A ngaia ka lunglen thu hi min lo hrilh sak dawn nia," ka ti chhuak phawng a, khuahmun loh D neih zawng huihamzz...

Thlam namthlaka lunglen hmel tawka ka lo țhu ka țhian ten min hmu chu "Zanin thla êng chuan i lunglen a kai chhuak a ni maw?" An rawn ti lut nghal bawrh bawrh a, "Leng ve bawk e, in lo kal har e lawm, Muanpui guiter kha perh leh la, zai han vâwr nghal veng veng ila nimai lawm, Hmingsang nang hla thlang hmasa ve rawh le, lungleng min ti bawk a, min hnem zawh hlawm loh vaih" ka'n ti hmiah chu an lawm na ngial e. "Dawt ni hek lo kan hrethiam che lawm Apui, tun angah tunge leng lo bik ang, thla lah chu a êng ropui si, tute emaw khua pawh a ên ve ngei awm sia," Sangtei'n a ti chu nui hawk hawk pahin "Hmeichhia hi chu kan ințan tlat zel a nia," ka'n ti zaih a.

Darsawm dawn thleng kan zai hnu chuan "Naktuk thawh hma angai sia" tiin min țin san a.

Dam chuan hun hi a lo rei lo khawp mai, kum chanve kan lo hmang zo
leh ta dêr mai.

Zanriah êi kham, thim thet thetah ka pu Lala chu hmanhmawh tawkin a lo lut a, "Apui, Hlimpuia arawn zin a mi? Kan kawmthlanga a kal phei ka hmu asin, Sangtei te inah a lut a. Amah a nih tâkin ka ti mai mai, lo phur lutuk lo la," tih leh tlan chhuah arual leh daih.

Min hrilh lâwk si lo va. Amah a ni dawn emawnile! Ring chiah si lo, beisei deuh siin pindan lam ka pan a, ka'n intûai thuakah. Heee...

Kawngka chu a lo kik ta ngei e. Amah Hlimpuia ngei mai chu rawn lut ta heu mai le!

"Hiii....nangmah."

"Umh keimah midang beisei i nei mi?"

"Nei ve bawk e. Haha... Tak takah ka lo besei lo che lawm, min hrilh lâwk bawk si lova."

"Nia, inhrilhlawkna hun a awm lo em alawm, ka ngai lutuk che a ka rawn phei tawp."

"I rawn phei loh changin min ngai lo tihna mi?" Ka'n ti leh kherah.

"Ka ngai lo ngai lo che, ka hriat chhuah chang che apiangin. Hehe, tak takah, ka rawn phei zin lutuk chuan min hnê ang tih te pawh hlauhawm alawm le, bakah kan khuate hian min fiam nasa thei lutuk a, ka rawn phei tur hi tawntirha in neitunu hian min hmu ziah a. 'Tun țum chu rawn hruai haw tawh la', min ti lehnghal. A thu awih hi ka tih makmawh niin ka hria, mi thu hnial hi hrehawm ka tih zawng tak a nia," nui ruh ruh paha a'n ti chu ka melh no lo kher e, "Fiamthu paw'n sawi tawh miah suh, a nih loh chuan ka zui haw tak tak che anga i tal buai viau mai tur asin," ka'n ti let sak a.

"Fiam azawngah chuan keipawh min fiam nasa, hre lo pawh an awm tawh lo," ka'n ti țha leh a.

"Ni e, mi fiamte chu kan tawrh tur alawm, nakinah phei chuan dawt thu pawh ala awm ang. Mahse, kan kâ ngeia kan inhrilh anih loh chuan engmah hi awih loh tur kan ti sia. Chuvang a nia ka rawn phei."

"Chu, hriat i nei mi, chuan i awi em!?"

"I kâ ngeia ka hria a nih loh chuan ka âwih dawn lo, ka ring tawk che a nangpaw'n min ring ve tawk tih ka hria. Mahse, khawhmun kan ni lo va, dawt thu pawh atam duh bik, êrtu pawh kan ngah tih ka hria, kan inkar chhiatna duh tam tak an awm. l hriat ve loh thil tam tak ka hria, i bulah dawt pawh an la hrilh lovang che tih pawh asawi theih loh. Mahse, lo awi miah suh ang che."

"Hlimpui eng nge i hriat a, zanin chu i dik lo, min ringhlel tihna a mi?."

"Ka ringhlel lo che. Mahse, Sawmmawia nen sawi thawm ka hria a, mi sawi turin awm lo la ka duh."

"Min ring lo tihna a nih chu, min ring ngam ni la chuan tupawh ka kawm i phal ang, inkhuahkhirh lutuk hi ka duh miah lo a nia, hmeichhia ka nia, min kawm duh leh min zuitu hi ka hnâr ngawt thei hleinem, tupawh biak țhat hi ka tih turah ka ngai, chutih rualin an beihseih tur leh an zuam tur a awm erawh ka tum lo thung, min ring tawk la, min khuahkhirh lutuk hi tum duh suh."

"Apui, Ni e, ka hrethiam lutuk che alawm, chutih rualin ka phu lo che tih pawh ka hria, ka chân ang che tih ka hlau êm a ni, ka veng reng thei lo che a, ka hmuh phakah i awm hek lo, hlauhthawnna hian ka khat țhin atin ni, min hrethiam dawn nia."

A rilru tur awm ang chu ka hrethiam. Mahse, ka duhdan leh ngaihdan ka hrilh hriat vat loh chuan nakin zelah min khuahkhirh lutuk a tum loh nan, min thlah zalen lutuk ka duh pawh a ni chuang lo, thil reng reng hi a awm tawk a awm, ka tlin loh tur ang hi chu hrilh nghal zel ka duh vangin ka țawng nâ deuh a nih paw'n pawi ka ti lo. Țhian ngaina mi ka nia, tute pawh ka kawm thei vek, bialpa te chiah tih hûama duh loh zawng biak țhat duh loh tih vel hi ka ngaihdan a ni ve lo, ka biak țhat vanga ka ngaizawng ta emaw inti erawh ka kawm țha duh tawh vak lo thung.

"Phû lo tih kha sawi tawh reng reng suh, phu leh phu loh a awm lo, kan induh chuan a tawk, ka duh che a i tan pawh ka rinawm ang. Inrin tawkna hi a pawimawh, a nih loh chuan awmze nei lovah rilru kan ti hah mai mai, min ring tâwk la, i rin anga awm pawh ka tum bawk ang, rilru nuam deuhin awm tawh ang che."

"Apui ka lawm lutuk," tih pahin min rawn kuah vawng vawng a.

Tâl chhuah pahin. "Thingpui ka'n lum ang e," tiin ka kal sawn a, inngai viau e ti lo chuan engemaw zawng hian kan awm ngai lo. Min kuah vawng vawng hi chu a tih dan țhin a nia, abak min pelh pui ngai lo hi ka ngaihsan leh zualna a ni.

Kan lo meng rei deuh a ni ang, ka pa zun ram thiar turin arawn phei tlang, an pindan lamah pawh inthiarna a awm reng sia.

"Mate mu tawh ula, Hlima mutna tur kha siam sak la, hetah riak mai rawh se, inthlahrunna tur a awm reng reng lo, Hlima riak ve mai rawh. l pa te nen pawh kan inhre țha lutuk alawm, i rawn thlenna tur pawh kan ni zawk a sin. Mate a mutna tur siam sak la mu tawh rawh u," tih leh phei a rual a,

Kan in ena kan nui tawp. "l pa chu che zei khawp mai," A ti vei huk a, a zak tih a hmel ațangin ka hre vek, hrehawm ka ti kher mai.

"Hehe, nuam lo ti duh miah suh aw, a tih ve dan a nia, inleng ka neih ve chang pawn an haw hma chu a muhil ngai lo, ti kha chuan min vil hneh zia i hria ang a, i tan pawh angaih țhat thlak sawt ang chu."

"Zantin ka lo leng thei lo va, min hrethiam êm ang chu maw! Ni e, thlamuan thlak e. Engpawh nise, ka hawsan phawt ang che. l chau lutuk palh ang."

"Âw, ala hma lawm le, la țhu rawh" ka' n ti chu nuih suk pahin. "Hma i tih tawh loh khâ, tak takah ka duati hi a chauh ka phal lo, duh aiin ka men rêi mah mah che a, ka ngaih vang che tih i hriat tho kha," Tih pahin a tho a, kawngka thleng ka thlah a, a tih țhin angin min kuah leh vawng vawng a.

'Kawm tawh suh,' min ti chiah lo mahse, Sawmmawia pawh ka kawm tam tehchiam tawh lo, Hlimpuia rilru tihnat kher kha a țul ka ti lem lo.

Ocțober thla kan chuang chhuak leh ta hlawl mai, kan pastor-te bial fangin an rawn kal a, kan Pro-Pastor-in 'Rem chânna ka la e' a tia . An khua tlawh nghal a duh a, KȚP member leh hruaitute remchang apiang țawiawm turin mi'n beisei a, Hlimpuia te khua kal pelh angai dawn a, ka lo phûr rilru ve ngawt a!

Kan kal lam chuan kan chawl zawk a, haw lamah KȚP leh SAY Join Fellowship kan neih dawn tho kha maw.

Kan chawchhun êina tur lam pana kan kal dam dam chu kawng chhak ațangin tu emaw hian, "Apuii a awm em? Khawi ber kha nge? Lo hawi teh se," a rawn ti chiam a, ka zak lutuk chu Nihliapin ka inkhuh țha sauh sauh asin le.

Kan chaw bâr laiin a rawn lut ta tho a, min rawn zawng a, ka țhian ten an lo kawh hmuh vât a, min rawn chibai pahin, "Hlimpuia țhianpa Rotea ka nia."

"Aw.. a nih chu maw le, i hming hi chu ka hre tawh alawm, i țhian pa'n a sawi fo che a. 'Ka țhian țha ber leh unaupa ni bawk', a ti țhin che a, kan inhmu hlauh chu a tihzia e."

"Ni e, keipawh ka hmu che chu ka lawm kher mai, Hlimpuia'n hmu ngêi tur chein min ti a. Amah lah chu ram kal ngei ngei a ngai a. Fu an her laklawh lutuk a, han țhulh chi lah a ni mang si lo va, i lo hrethiam mai a niang chu, hrehawm a ti khawp a nia."

"Hrethiam e le, hawlamah kan rawn riak phei dawn a, kan inhmu tho dawn alawm," ka ti a...

To be cont..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 10:10 pm

(Competition)

CHAPTER - IV



Kan Pro-Pastor te khua chu ln zahnih bawr vel niin, an khaw thlêng vel pawh nuam tak a ni, khaw luh hma mêl chanve tur ang velah hian YMA Park nuam zet mai hi a awm a. Chhawkhlei kungin a khat vek. Enkawl uluk tih hriat takin ahnuai athelh hun bawk a, lên vah vel nan pawh duhthusam a ni.

Inrinni zan, chawlhni chawhma leh zanah kohhran zaipawl leh kan țhianho kan zai a, kan zai țha phian zel.

Inkhawm bân apiangin kan hruaitu ten kan thlen in țheuhah min dah thlap zel hi ka fak thlawt.

Kan hawlama Hlimpuiate khua kan thleng chu KȚP leh SAY-in min lo hmuak niin, pahnih țheuha thleng turin min ti a, Sangtei nen Hlimpuia pu te inah kan thleng dûn a.

Zanah KTP leh SAY Presbyterian Biak lnah kan inkhawm a, hla kan nei țheuh bawk.

An inpawhna ațhain a nuam khawp mai, khaw lian lutuk an ni lem lo va, kohhran pawh Presbyterian leh Salvation chiah an awm. lnkhawmpui leh engemaw tihpui deuh a awm chang paw'n pawl pawl awm lovin an ințawiawm vek zel a, an entawn tlak khawp mai.

Bânah kan Fellowship leh dawn a, Salvation lam chan ve thung a nih vangin kan thlenin pa hi Salvation-a an khaipa ber a ni a. Rotea nen kan inhmu zuai a "Apui, inthlen inah kan Fellowship dawn anih chu, tih tur neuh neuh kan la nei a, lova phei ula rawn phei vât kan tum dawn nia nih phawt," tih pahin hmanhmawh hmel tawkin a kal nghal a.

Mi rawn kal hmain Hlimpuiate țhian dun an rawn lut a, pindanah inthlak turin ka lo awm a, Rotea chuan min rawn âu lâwng lâwng a, ka chhuak hreh kher mai, Sangtei lah chuan "A zaka a rawn chhuak ngam lo," la ti zui.

Zah hi a kal pelh tak tak theih loh chu nih hi.

Hlimpuia te hi Salvation an ni a. Amah a felin an hmang țangkai khawp mai, YMA leh SAY-ah ni se secretary atan an hmang deuh char char a, buai ve thei tak a ni, hemi zan pawh hian mike leh țhutna lâk khawm leh eng engemaw ațul zualpui an tih zawhah a țhianten "Tun țum chu kan âwl tawh ang che," an tih vangin a rawn kal hma thei zawk a.

"Apui i chau em? Menrei ka tum teh a nia."

"Chau love a. Haha... i men peih chen chen ka meng thei ang."

"Țhat chu, kal r'u țhu phei ve tawh ang u hmiang, mi tam kan nghah chuan inzak leh emaw a ni awm sia."

Kan țhu tlâng a, an khuate lah chuan kan inkawp hi an hre deuh fur tawh. Min en hrek hrek hlawm a, an rawn nui suk zel lehnghal, zak viau mah ila nuam ve tho mai.

Kan țhianho kan zâi zo min lo chibai pahin, "lnzai thiam lutuk," a ti vei sap a, a kutah ka'n sik vak asin leh.

Dar sawm leh pakhat velah kan bâng a, bungraw tih fel chhung nen, kan inchin fel zawh meuh chuan dar pawh a tam tawh khawp mai.

"Apui, i mut a chhuak tawh viau lo maw? I chau awm sia."

"Chhuak lo ve a, chauhna tur vak aawm hleinem țhalai tan."

"In va hmang nuam maw? An tlangvalte hi an kawlhrawng hlawm phian sia ka ngaihtuah deuh khawp che a."

A rawn sawi takah chuan an mipate nula lawm zia kha ka hrechhuak thut a, inkhawm bânah Biak In kawt mai pawh ni lo kawngka bula lo dingin min lo chân țhin kha ka hrechhuak a.

"Kan hmang nuam khawp mai. Hlimpui, an mipaho chu maw i sawi tâkah chuan rêl pawh kan ni ang a, mak tak an ni. lnkhawm bân rual rualin mi an bawr luai luai a, hruaitute tel lo phei chuan kan haw ngam ngai lo, kan thlenin te paw'n an hrethiam a ni ang 'Va inthlak ula engemaw chen chu lo chhuak rih sû' min ti zel. Khawlaiah ni se mi auh fiam an hrat sia, a hreawm thei asin aw! Kawm pangngai a min kâwm chu ni se pawi kan ti hran lo. Mahse, chutiang an ni lo reng reng an hlauhawm tawp. Ze țhing tak an nei, sim se ka ti lutuk," ka ti ta duah a.

" I sawi dik alawm ka hriatchian vang a nia ka ngaihtuah em em che ni, inkal dawn khan kan inhmu hman ta si lo va, hrilh lâwk che kha ka duh khawp a. Hei, himpialin i rawn thleng turah ngai ila," a ti kher chu ka la nâ kher e.

A pu zunram thiar tura rawn chhuak chuan "Hlima i va țhurei ve, kan nauvi hi a chau awm sia a mut te a chhuak ang asin men tawk hriat tur aw," a rawn ti bâi bâi a, ka lo zak si.

"Pu ka haw țep e, thingpui ka lum tir lawk a ka la țhu hrih nih hi."

A pu mu tura a kal hnu chuan "Min lumtir loh kha aw, nangma'n anih kha lûm
nge dawt i sawi ringawt ?" ka'n ti zui a.

"Chhan dan tur vang em alawm dawt vâr sawi ngaihchang te pawh a awm ve alawm, i pa'n mu tura min tih lai âi kha chuan a zahthlak nep deuh alawm. Haha....kha mi zan kha chu khawvelah hian zahna te hi awm ve sia mawm," a ti deuh duahah.

"I lo zak viau alaw chu?"

"Tehreng mai khuk chem chema khuk ral raih mai kha ka chak asin aw!"

"Hahaa...em em chuan leh, ka pa rawn țawng dan kî te chu zahna tur a awm loh kha aw, kha mi zan âi chuan zanin hi ka zak zawk, i pu khan mak min ti ngawt ang."

"Ka pu sawi pawh chu a ni tho alawm, i tana nuam loh tihna tur a awm bik loh tawp kha. Nula men hrepah min ngai a, nangmah a ngaihtuah vang zawk che a nih kha. E, Apui naktuk zingah lo leng ang che u aw, ka nu paw'n a hmu chak che a, 'lo len tir ang che' min ti a."

"Hi, ka ngâm dawn emawni le !"

"Ngam loh tur a awm lo, kan lo seh miah lovang che, hlauh tur lah kan awm nahek lo, tak takah ka lo hruai dawn che u nia, nangmah chuan i ngâm dawn lo chiangsa a. Sangtei nen in rawn kal dawn nia. Ani chu arawn tlangnel sa bawka chaw te pawh in ei nghal dawn nia," a ti chu ka rak nasa ngei e.

"Chawei kha chu a sawiin sawi lang reng reng suh, ka ngam teuh lo mai, lo len kha chu kan tum hram dawn nia, thih leh thihin," ka'n ti kher chu a ngaihdan anih hmel chiah loh kher mai.

Min kuah vawng vawng pahin "Apui ka hawsan phawt mai ang che aw, i bula awm reng hi ka chakin ka thlahlel ngawih ngawih țhin, ka kham thei lo che chu a nih hi, hun lah hian min nghak mang si lo va. Naktuk inhaw kawngah i chau lutuk palh ang e, ka hman ve leh lo zin vat ka tum dawn nia. Chuan, naktuk chu aw ka lo lamdawn che u nia," tih pahin ka darah a beng vei thak a, kan in mangțha hnu chuan ka mu nghal a, a chhuak bawk aniang ka muhil nghal hmiah.

Kan mutui lai chu Hlimpuia'n mi rawn kai tho a, ka ngei reuh khawp mai. Mi muttui lai laia min rawn tihharh chu "Ka mut ala chhuak rei lo te chiah," ka lo ti sep a. "Kan men chen a inang reng aw, a tlai tawh a nia tho vat r'u, a nih loh chuan in inkarah ka lo inzep animai," a ti chu kan tho rang teh e.

Hlimpuia te ina leng tur chuan muang changin kan phei a, ka huphurh nangial e, Sangtei lah uang ta reng reng "Kan luh rual rualin ka nu ka pa in lo dam maw? I ti nghal bawrh bawrh ang a, eng nge tih tur awm tih pahin hmun i phiat ang a, chhuat te i nawt leh ang a," sawi zawm zel a tum chu ka va pawm bet tawp, ka nuih a za bawk si, a sawi anga ti tura ka inngaihtuah zawng ringawt paw'n ka zak lutuk chu ka țim ur ur thei. Ani lah chu duhtawk tum mai lo chuan a ka an ang leh zuau a. 'Thingpui' a ti leh chiah chu "Hlimpui a ka kha hup teh nih loh chuan i chhungte bulah a thusawi ka hrechhuak ang a, zia viau lo palh ang," a sawi zawm leh ka hlau lutuk chu Hlimpuia alo nui hawk hawk a "A sawi ang chuan i awm anga ni mai a lawm țha ngawt tak ang chu," la ti zui. Kan luh dawn țepah "Chawei te kha i rawt ang e aw," ala rawn ti su su zui, a la hre ve khawp ang 'Lalnghali' hian.

Kan han lut chu an lo awmkim khawp mai. Chhungkaw member- an tam lem lo a, a nu leh pa leh a naute pathum an ni mai, a chhang chiah hi hmeichhia a nia, a dang pahnih chu mipa ve ve, min lawm thiamin min lo chibai sap sap a, ka ngaina nghal vek mai ka ti. Zak viau mah ila ka insum thei phian a, ka lawm kher mai.

A nu chuan "Apui hmuh che ka chak lutuk a, Bawiha bulah hruai tur che u in ka tur chhên a, min hrethiam dawn nia, i hreh viau ang tih pawh ka ring, Bawiha paw'n a khawngaih deuh che a. Mahse, inkal pawh hi aharsa ve sia, inrawn kal lai lai tiin ka rawn phut lûi deuh nih kha. Chaw te in ei nghal dawn nia," a ti chu ka mangang kher mai, chhan beisei tawkin Hlimpuia ka va melh zawk a.

Ka rilru hriain "Nu chaw chu ka pu ten an kep vek tawh bakah Ar an talh a, sawm luih chi an ni lo ang," a lo ti vat a ka lawm asin aw, min sawm lui ta bik em lo va.

"Thingpui tal in indawn nia" tih pahin arawn chawi thla a, kurtai arawn chhawp țeuh bawk a, "lnhawn ve dawn nia. Kurtai na na na chu kan ngah khawp mai, Hlima te pafain kar hmasa khan an va hêr a, hawn tir loh che u anhlauh khawp kha," nui deuh kur kur chunga a ti chu Hlimpuia lo țawng vatin, "Nu kha lam kha chu i thu thu alawm," alo ti vei zaihah.

A pain "Hetah lo thlen tur che u a nia, Sangtei lah kan rawn kal apianga kan thlenna in nia, Apuii nise i pa te nen țhian țha tak kan ni bawk a. Bawiha hian rawn hruai nachang che u a hre lo alawm le," a rawn ti chiah chu Sangtei lo phur ta lutuk "Rawn thlen kan tuma Hlima'n a phal lo tlat alawm le, a lo zin leh hunah a hre tawh ngawt ang, a thlenna tur ka ruat sak anga ka dah ve hmak tawh ang. Apuii pawh rawn thlen a chak tehlul nen," ala ti zui, sawi fuh intih hmel zeta min en chu ka lo melh rum kawk a.

"Duh viau mah ila thlenna tur an ruat vek sia, duh thlang thei kan ni ta si lo va," ka ti ta ringawt a. He mihring ûang țhin lutuk hi chu thutak sawi niawm fahranin a nui duh țhak lo lehnghal.

Dar riat dawnah kan haw phei a. Kurtai kg 2 ve ve min hawn tir a, an felin an bula awm anuam khawp mai, Hlimpuia'n min thlah leh a, "Ka nu khan chawei turin a ti tlat ang che u tih ka hlau khawpah, ka pu te ina ei ka tum sia, a fu dawn lo e mai," a ti vei ham ham a.

Chawei khamah muang changin kan insiam a, kal lam nen chuan inang lo ngei mai. Kawtchhuah thleng min rawn thlah a, lunglen thlak vawng vawng ngei mai. Kawng a chhiat avangin ke ngatin kan kal a, tha leh zung erawh ka nei beitham ngei e.

Kan Pro-Pastor lah chuan "Apui i kal thei maw kan let leh mai dawn mi?" a lo ti chhen zui. "Pawi miah nang, kal r'u i let leh tak tak teh ang u, min paw thleng dawn anih loh chuan min letpui leh mai teh u, ka kal thei thlawt lo, hnunglam magnet hi achak e mai," ka ti zawm zat chu an nuih a za hlawm ngei mai. Min kah nasat hmaa lo inkah khalh hi ahim ber.

Lehkha zir ka bêi ngawrh bawk a, lungleng hman paw'n ka khawsa leh tawh lo, Final Exam hnai tawh bawk nen, ka țang khawp mai. Hlimpuia pawh a pass a nih chuan an khua-ah azir zawm thei tawh dawn lo va, huphurhawm lawk khawp mai, kei chu kan khuaah ngei ka subject lak ka zir zawm thei dawn a.

Ka mutui lai ka pa'n min rawn sawi nawk nawk a, "Mate tho rawh mitthi kan nei a nia, zan arei tawh sia mi an tam vak awm si lo va, lo insiam la kan kal vat dawn nia."

"Pa ka peih lo e, ka mut ala chhuak si nangmahin kal mai la!"

"Mate kha tin an ti ngai lo, peih vanga kal tur kan ni hleinem, tlawmngaihna hi anuam chin chiah a ni ngai lo, kan peih bak pawh tih angaih chang atam tih hriat tur, kan chungah pawh engkim athleng thei a, phût let vang ni lovin. Mizo tlawmngaihna hi vawn nun reng tur. Hei aia hrehawm pawh tawrh tur ala tam ang, țhalai tan mut chhuak mai mai te chu a nep lutuk. Tho la, lo insiam rawh."

'Ka pa tak hi chu ka mut ala chhuak asin le! Engkimah hian mi hi a phût ve zela,' ti nuah nuah pahin ka tho a.

Kan va thlen chuan mi an lo awm nual tawh a. ln pawh an lo singsa zo thuak tawh, atheih ang angin ka pui ve a, Sangtei pawh a bialpa nen rawn inzui lutin, hmun te kan phiah pui lawp lawp a, ațhenin țhutthleng an lo rem zung zung bawk a.

Sawmmawia pawh hmanhmawh hmel tawkin a rawn lut ve a, "Va hma that that ve,"ka lo ti zeuh a."

"Tluk loh rim in va nam ve, ka lo mutui deuh a tin ni, zia lo khawp mai," inthlahrun hmel tawkin a ti vei suap a.

Zan a rei tawh tehreng nen, rei lo te-ah inchhung mawi tawk chu kan awm thuai tho nia mawle, kan kal chhan mitthi chungte hnêm tura kal kan nih kan hre chiang hlawm bawk a, zai pawh anuamin kan țang hlawm khawp mai.

Hmun țhenkhatah chuan khawhar in kal inti ve si, kal chhan hre lo mi zai laia lo ngâwi tlat te, phun suap suap leh lo khi vur vur tawk hi an awm țhin a. Mahse, kan branch erawh hruaitute an țhain an fel țheh țhawh bawkah zirtirna leh infuihna kan dawng zing bawk nen, khawhâr inah mit tikham tur zawnga awm hmuh tur kan awmngai lem lo.

Final Exam pawh kan zo ta, ka ti chhe lem lo chuan ka hria, Hlimpuia result ka hriat chak rualin ka huphurh angreng khawp a. A pass chuan kan inhlat leh zual dawn si.


Favang rim pawh a nam țan leh ta ruih mai, kum tina kan tih țhin angin Favang meet kan buatsaih țhin a, khaw țhenawm zawng zawng pawh he Tournament hmang tur hian kan chah khawm țhin, hmun hran tlang hrana awm ho pawh an rawn haw khawm țhin a, kan hlut thei tak zet.

Mikhual pawh sawm dawn kan nei a, Hlimpuia hi chu ka beisei tehchiam lo inkhelh lam ti mi a ni lem lo bawk nen, Rotea erawh a lo kal ve a, Hlimpuia lehkha min pek pahin "Final-te kan thlen hlauh chuan entura lo phei ngei a tum kha."

Rotea- te team pawh an țha țek țek khawp mai, Semi Final an lut ve a, ka lo țang thei si, kan khawho an zahawm angreng.

Sikul tlang ațang inkhel kan en a, Sawmmawia te team leh Phulbial team nen an in tum a, an inhneh tawkin an hmuh nawm țiah țiah kher mai, Sawmmawia hi a palianin a chak ropui sia, a la thiam em em zui, ka lo țang lutuk hi ka âu leh țawt țhin, Ka insum hman meuh lo, hun tawp dawn țepah mawi em em in a'n pet goal nih kha, ka zuang zawk a, Ka lâm lo deuh chauh, Rotea pawh ka hrechang tawh meuh lo.

Hlauh ang ngei in "Jersey No 4 chu i va țan awm ve Apui!"

"A! Kan țhianpa a nia, min lo țan dawn nia," a ti ve sia.

Hlimpuia pawh an khawho Semi Final an khelh dawn ni chuan zingah alo phei ve a, Rotea nen an lo lut a, ka lâi reng dawn nih hi, ngai aneih tak tak a awm thei dawn lo.

Rotea chu rei pawh awm lovin, insiam a duh chhuanlamin min chhuah san vat a,

" Hlimpui i inbual duh angem? "

" Duh rih lovang, kawng chin chunglam min sil la, inbual chu tlai lamah."

Ka sil zo, a inhrukna tur veranda-ah la tura ka chhuak chu min rawn zui ve niin.

"Hei, lo chhuak suh, mi'n min hmu angnge nuam chiah lo nia," tih pahin ka'n hawi phei chu kan in piah kawngpui ațang Sawmmawia'n min lo thlir vung vung chu niin.

Ka khawngaih ve deuh țhin, duh ila chu aruk pawn ka kawp thei. Mahse, lepchiah nih ka duh lo hulhual bakah mi pakhat tana rinawm hi ka duh tawk viau, khawngaih vanga min duhtu apiang nih pûi ngawt chi niin ka hre ve lo. Nakinah kan la tina tho tho dawn.

Mi țhenkhat chuan an duh loh pawh beiseitu apiang an nihpui thei mai zel a, rei lo teah rilrunâ leh beidawng takin an siam leh tho a, tianga mi rilru hliam kher hi țha ka ti ve lo, ka duh tak tak chiah ka nih pui tur a ni.

Rang tawkin ka namlut a, ka hruk mawlh mawlh lai chuan min kuah thut a, "Mi min hmuh pawh chu i va hlau awm ve, a ho lutuk hre lo an awm chuang hleinem."

"Naa, chupawh ni se, a nuam chiah lo alawm, kan pahnih chauhin kan awm lehnghal, min ngai mak ang asin, lo inha la ka'n insiam lawk ang e, ka rei lovang," tih pahin pindanah ka luh san a.

Nilengin inkhelh en chungin kan ti ti char char a, min tihlimin min tinui thiam tawp, ka van hlim em! Kan hlim chhung lah rei leh dawn si lo.

"Apui nakum chu Aizawl lamah ka zir zawm hmel sia, kan inhlat leh hret dawn nih hi."

"I result achhuak tawh mi ?"

"Chhuak chiah lo nâ chu ka tichhe lem lo va ka pass dawn tih ka hria."

"Khawhmun loh pawh tih tawh nak alai a, a aia hlaa i awm chuan engtinnge ka awm ang le! Ka ngai che ka tih chuan i rawn phei vat zel kha ania, a huphurhawm dawn khawp mai. Mahse, kan tana țha turah ngai ila kan dam chuan hun hi akal ve duak duak chu a nia, kan tuar chhuak ve mai ang. Kan hmabak țha taka kan hlen chhuah kha pawimawh ber" kan ti ve bawk a, ka va huphurh lâwk si em! Mahse, ka ngai dawn khawp mai che," ka ti leh hram a.

Thil hi i thlir thiam țhin mang e. Ni e, kan dam anga kum hnihkhat bak a ni dawn lo va kan tuar chuak ngei ang, hmeichhe tam tak chuan khual khua a ngaihzawng neih leh pasal neih te hi an ti thei vak lo va, khawhar hnemah tiin midang an kawp țhin a, nang erawh i nih loh hram ka beisei, chutiang athlen loh nan buai chung chungin ka rawn kal hram țhin a, min mamawh laia i bula awm loh hi ka hlauh ber a ni fo. Mahse, nang chu i chhelin ngaihtuahawm a i awm ka ring lo va, ka ring tawk bawk che, chanchin pawh duh angin kan inhrilh zung zung thei kher lo mai thei. Engpawh ni se, rinawmna mawlh hi apawimawh ber tih hria la, lo vawng reng ang che aw."

"Kha lamah chuan min ngaihtuah duh suh, kum sawm pawh chanchin inhrilh thei lovin awm mah ila min duh loh thu min hrih a nih ngawt loh chuan ka lo nghak reng ang che."

Kan sawi urhsûn bawkah inkhel en lam pawh kan lo ngaihtuah tawh lo, Rotea te an chak tih chiah kan hria.

To be cont..

Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » October 29th, 2017, 10:11 pm

(Competition)


CHAPTER - V


Christmas thing phûr turin KȚP member a thei thei kan chhuak khawm a, a huhoin nikum chul lam panin kan kal a, thing tamna lai kan thlen chuan mipahoin kan phur tur an fâwm a, hmeichheho erawh kan hahdam phian. Haw kawngah kan êm hnungah lungtum lian tawk an lo dah chu niin, atira rit vak lo kha rit ti ru tak chungin kan kalpui ang lâwp lâwp a, kan innêlin kan inngam tlâng hlawm bawk sia, tihvak ngaihna an vang thei țhin.

Christmas leh Kumthar pawh kan hmang nuamin kan hmang țha, inkhawm bân, zaikhawm thlengin kan tel kim vek, Ar kan leh interêk hran tih vel hi chu kan ti ngai lo.

Hlimpuia lah chu kohran lamah a buai pawl a ni bawk si, hun pawimawh lai chuan heheû mai mai chi ni hek lo.

Țhiante a kawp tê têa an chhailai D nen laitual an len laiin kei zawng mahriak ten laitual ka leng leh țhin. Ngaihzawng nei țhiau ni mahse ahranga inhmufâl zawngin an awm ngai lo, kan awm tlang vek zel a, kei erawh ka mal bik țhin.

Ruai țheh zawh thleng sil leh seng hawi ngai kan tih fel hnu chuan.Tlângah kan leng a. Ni tlatur êng sen râm mai te chuan suihlunglen a va ko chhuak chiang em! "Hlimpui, Mas hmang turin lo chah ta che ila, i lo phei angem le?" Ka ti rilru neuh neuh a, chah ila chuan a lo kal ngei ang, chu erawh a țha ber si lo.

Dam takin kan hmang zo ve tho lawm le.

Mut hmunah chuan nimin a Hlimpuia lehkha ka dawn ka chhiar nawn leh mai mai a, Kumthar chibai min lo buk a, kumthar tal lo hman a chak thu leh a hman ngâng loh thu te, lungleng tak leh min ngaihtuah chunga a hman thu te a sawi a, a result pawh a chhuak tawh a , a pass țhat thu te. Admition ti tur a Aizawl kal vat a ngaih thu leh a awmna tur a pu te puih rih a, awmtlang mai a rilruk thu te, lehkha ka thawn ve duh te anih chuan a țhianpa Rotea kuta dah a. A ni'n thawn chhawng leh mai turin a ti a, midang tumah ring lo tur leh Rotea chiah ring turin min ti nasa hle, a chhan pawh ka hre ve si lo.

Keipawh ka beisei aiin ka pass țha a, ka lawm kher mai, kan khuaah ka zir zawm leh a, lunglen nen tlem chuan lehkha zir erawh har hret.

Hun leh ni pawh liam ve zelin Hlimpuia lehkha lah ka dawng khât, ka lehkhathawn te hi lo hmu ve zel ang chu maw! A chhânna lah ka hmu ngai si lo, rilru anuam zan tawh lo.

School lam pana ka țhiante nen kan inzui chu Hlimpuia te khua ami, a țhiante ve tho. Ran zawng tur nen kan intawk a, Hlima an khuaah a awm thu mi'n hrilh chu ka sâ zawk thei.

Eng nge maw thleng ta le? Chanchin min hrilh miah lo kha ka nâ tawp. School-ah pawh rilru nuamin ka awm thei lo. Class lak lai ni se mumalin ka hre lo, ka ngaihtuahna zawng zawng a mang vek ni maiin ka hria, ka lo ringtawk bawk a, tianga a awm hi amak ka ti êm a ni.

"Hlimpui, eng nge thil awmzia? Min hmangaihin min ngaihtuah em em țhin kha a ni si a, chanchin ni se awl lovin kan inhrilh țhin a, tunah lêm chanchin inhre lovin kan va awm rei ta si em! Ka lehkhathawn zozaite lah min chhâng duh bawk si lo, inkhuaah ngawi rengin ila awm zui, bumhmang mai maw ilo nih. Biahthu min hlan zozai te kha timai hian maw i thamral tir dawn? Ka ring tawk che asin," tiin ka rilru na lutuk chu ka mittui a far zung zung a, zah pawh ka sawi thei lo, ka țhiante hmuh hlau tawkin lehlam ka hawi tlat a. A chanchin ka zawt dawn nge ka ngawi mai mai phawt dawn pawh ka hrethiam tawh lo.

Ka țhiante nen kan han sawi tlâng chu, min thinrim pui hlawm kher mai, "Ngawi hmiah la ngaihsak duh miah suh, a thei lo zawkah a țang dawn chiang lutuk, a hrim hrimah tinge maw engmah sawi lo va a awm reng reng le? A duh tehreng che nen," an ti bawrh bawrh a, "Chhan țha tak chu a awm ngei ang, ni lo se tiang hian a awm lovang," ka la ti hram a.

Lehkha tawi tein ka ziak ta tho a, chanchin engmah min hrilh loh vanga ka vui thu tê hi.

Min lo chhang let hma kher mai, Ka lehkha kha vawikhat chiah a hmuh thu arawn sawi chu mak ka ti kher mai. Ani lah chuan min thawn zing a inti em em a, ka hmu ngai bik si lo, chu mai pawh la ni lo. A hnua a hmuh leh lah kha ințhen ka duh thu la ni zui. A mangang lo haw chho hi a lo nia. Mahse, a chhui chhuak vek tawh a engkim ka hriat vek kher ngai a tih loh thu leh Rotea chiah lehkhathawn pawh pe tawh turin min hrilh nasa hle.

Ka veng ta hawk mai, chhan țha tawk awm lo se tiangin a awm dawn lo tih ka hriatchian phah.

Ka fimkhur ve viau chuan ka hria a sin le! Lo zin remchang chu ka lo pe mai țhin a. Mahse, Rotea kuta dah turin ka hrilh thlap țhin kha a nia, pe lovin abo țhin tihna anih hmel Rotea paw'n a lo hmu ngai lo .

Hrechak viau mah ila min hrilh duh miau loh chuan zawh chhen kha țul ka ti lem lo, ka hriat âwm chin chu min hrilh mai turah ka ngai.

A chhuk hmain zankhat riakin a lo phei a, sawi tur kan ngah dun khawp mai. A lehkha ka hmuh ngai loh vanga ka mangan thu ka sawi chu ka țah chhuak tawp.

"Apui, lehkha mai chuan engmah inhrilh fiah sen a ni lo va, i lehkhathawn ho kha a hlawmin ka hmu leh vek tawh a sin, kan khaw nula pakhat hian min âtchilh a, kan khaw daia in nei ka rawn kal chang pawha min hmuziah min fiam țhin ka tih kha i hria ang a, kha kha a lo hmang țangkai a, inkhaw lam kal lo haw apiang țha deuha lo biain i lehkhathawn chu amah pe a, anin keimah min thawn leh mai turin a lo laksak țhin a, chu chu Rohlui (min duh tu) chuan a lo lak sak leh zel hi a lo nia. A pawi khawp mai, an thil tih kual vel vang hian mangangin ka lo haw phah ta a nih hi, bakah min țhenna lehkha kha i hming sign a ni lo tih ka hria a."

"A nih teh duah chu a engtinnge i hriat chhuah reng reng a? Sawi hrehawm a nih loh chuan min hrilh ve la."

"Hrehawm hran lo ve, Rotea bulah i lehkha kentir pa hming i sawi kha kan zawt a. Pi Thlengi a pek thu a sawi a. Pi Thlengi kan zawt leh a, engkim kan hre ta nih chu."

"Chuan"? ka lo ti hman hmawh a. "Rohlui paw'n min beisei chhunzawm tawh lo viau ang." a ti bûl hmuk a. An chapchâr dan vel erawh ka zâwt zui duh ta lo.

"Hlimpui, ka lung ala awi chiah lo, Rohlui chanchin hi a hma daih paw'n min hrilh thei reng a!"

"Ni khawp mai. Mahse, keima'n ka duh ve chuang lo va, i rilru nawm loh ka hlauh vangin ka hrilh lem lo che nih kha. Engpawhnise, rinawm takin lo awm la, kei chuan ka țhen ngai dawn lo che tih hria la, ka tan i hluin ka chhungte paw'n an duh em em che a, ka rawngbawlna leh kawng engkima min pui tura Pathian min pek i nih ngêi pawh ka ring. Chuvangin, nangmahah hian ka rilru zawng zawng ka pe tih hre tlat la, min ring ang che. Hlauthawngin lo awm tawh lo la, keipawn ka ring tawk che tih i hrereng bawk dawn nia."

Hlimpuia pawh Aizawl lamah a chhuk thla leh tawh a, lunglen khawhar hian rah țha engmah a chhuah lo, hlawhtlin phawt hian rah țha achhuahin tuna chhe tê kan tawrh hi nakina kan lawmna tizualtu tur a nih zia ka inhrilh nawn fo țhin.

Ka pa hna pawimawhah a zin vangin sikul țhulhin an sikulah ka pa âi ka thawk lawk a.

Nikhat chu naupang ka zirtir zo. Office-ah ka lut chu Hlimpuia pa a lo awm khur a, 'Ka bia angngem aw..' ti a ka ngaihtuah vung vung lai chuan. Amah zawkin min be hlauh a.

"Apui, lo țhu ve rawh helamah. Hei, kan unaupa Chhunga damlo kanin ka lo kal a, hmuh lawk che ka duh a, i pa âi i kal tih Sangtei' n min hrilh a, ka lo kâwi lawk a nih hi."

"Nih chu, i va ti țha ve. Nia, Pu Chhunga hi rin aiin a nuam lo rei tawh khawp mai, an harsa ve angreng sia. An khawngaih thlak tak tak a ni. Nizan pawh rei vak lo kan menpui ve a, han tih vak ngaihna a awm si lo. E ! Pa Chhuan indam tlang zawk maw?" ka'n ti leh hnuhnawh a."

"Aw kan dam tlang a ni mai, kar kalta kha chuan i nu Biaki (Hlima nu) anuam vak lo va. Mahse, tunah chuan a țha ve leh tawh e, rei tak awm hman ka ni si lo va haw leh nghal mai ka tum deuh a, ka chhuah san phawt ang che. Apui lo inenkawl țha ang che aw, i pa pawh ka ngai asin le, a nih phawt mai." tih pahin a chhuak nghal a.

Ka pa thawhpuite chuan min fiam nasa mai, ka nui suk a, ka chhang duh êih hlawm lo, chhâng ila chu an pâwr dawn tih ka hre reng.

Inrinni a ni a, ka pa'n "Mate vawiin chu nilengin kohhran committee kan țhu dawn a, êiin buatsaih turin Sangtei nen kan ti che u a, lo kal hma intum dawn nia," a tih vangin.Tukțhuan êi kham ațang kan buai char char a, chawhnu lam chu kan awl deuh.

Sangtei'n hmanhmawh tawkin "Apui lo tlan teh lo tlan teh," a ti chiam a. Tukverh lam hawiin a lo dak vung vung chu niin, khu Hlimpuia ang deuh ka hmu. In pakhatin a hliah a, atlang thla kan hmuh chuan amah a ni lo ang a, a tlang loh chuan kan inah a lut tihna a nimai, kan ina a luh leh luh loh khû inkhuan a hliah tlat sia, a chhuk tlang loh chuan Hlimpuia tihna a ni mai, lo en ve char char rawh."

Rei tawk kan thlir hnu paw'n, a chhuk thla hmuh tur awm hek lo, Sangtei'n "Zuk chian lawk ila," a ti chu ka duh lo va. Amahin a kal ta tho a, mi hi chu a phurpui thei ania aw.

Ka thlir reng a. ln a luh hnu rei vak lo vah a lo tlan chhuak a, min lo bye bye a, min insiam chhiat khum chiam bawk a. Hahaa... a awmdan vel ațang chuan min hrilh hran ngai lovin ka hrethiam mai .

Zan inkhawm turin Sangtei nen min lo sawm a.

"Teh thut che chuan khawi lam thli chhiain nge lo hruai thleng che a?"

"Nia, in mi hîpna thli hi a chak êm a, min chhem lêng dawr dawr a nih hi, Aizawl ațangin chhim lamah kan kohhran khawmpui hmangin ka kal a, remchang êm a ka tia, ka lo tlang ta mai, chawlhnî ka hmang ang a, kan khua pawh tlawh lovin ka chhuk leh mai ang ka ti deuh a."

Kan kohhran inang lo mahse, Salvation kan khua-ah an awm ve loh vangin kan kohhranah hlir a inkhawm ve mai a.

A awm chhung na na na chu kan inrîal lo khawp mai, inkhawm kan kal rual a, bânah kan innghak leh thlap a, chawlhnî chawhnu fellowship bânah middle mualah kan leng a, thla pawh kan la ho nasa. Ka țhiante lah chu aphûr phûrah an țang a, 'Vawiin zet chu lungleng bik kan awm lo bawk a, țap thlem reng pawh hi a khamawm lutuk tawh' tiin min kap deuh reng hlawm a, kan hlim tlang êm bawk alawm le. Ngaihtuah athui duh angreng, khâwhmun ni ve ila. Huiham...

Kan kal dawnin ka nu'n "Mampui lo haw har lo ang che u aw. Hlima nen êirawng bawl ula ei ve nghal rawh se," a tih vangin rei tak awm lovin kan haw leh nghal a.

Eirawng min bawlpui a tum chu ka hnar duh bik lo. Tun țum a lo zin chu ka ngai ngawih ngawih, ka bulah awm reng se ka duh .

Ka chhung ten Ar puahsa siam mai theihin an lo dah a, ka nu'n "Mate, induh dan kan hre si lova, kan lo dah tawp, induh dan berin siam ang che u chawhmeh dang chu kan siam vek tawh," a tih vangin Ar siam tur chuan choka lamah kan phei a.

"Hlimpui Ar ke hi tui i ti ve em?" Tui ka tih vangin a ti ve turah ka'n ngai deuh ngawtah, "A ke ai chuan a bâwp tui ka ti zawk." Mipa hi chuan Ar bawp hi tui an ti tlangpui a nih hi a.

"Umh, Ka lo hrereng dawn nia," nui sen sen pah chuan ka'n ti ngei a "A, a ke chu tui i ti ni maw?" min nuihzat hmel tawkin a ti ve leh a.

"Ti chiang e, a ke ka ei loh chuan Arsa êiah pawh ka inngai lo," nui hawk hawk pahin "Umh, ka lo hre dawn nia" a'n ti ve kher a.

Zan inkhawm bânah kan inzui haw leh a, hun kan va nei tlem tawh em! Ka pa'n "Mate thingpui lum la, a hâng nutawk khan aw," a ti chu lum turin choka lamah ka phei san a.Thingpui kan înzawh chuan rei țhu lovin min mut san a.

"Hlimpui tun țum ilo kal chu min kalsan leh tur ka huphurh kher mai, ka ngai dawn khawp mai che. Ka awmdan pawh ka hrethiam lo, Lungleng reng renga nun hman hi hrehawm ka ti ta ni berin ka hria."

"Lo tuar hram hram rawh, a rei tawh dawn hleinem kumin a liam chuan kan tuar chhuak a ni tawh mai, kalsan reng che hi keipaw'n hrehawm ka tia sin, rinawm kan tiam kha lo vawng reng la, ka tana Pathian mi'n pek i ni tih hrenawn fo ang che. Chanchin duh angin kan inhrilh zung zung thei lo va, chhel takin rinawmna nen min lo nghak reng dawn nia aw." Tih pahin min kuah hle hle a.

Ni chhuak êngmawi tak chuan ka hmangaih nen min ințhen tir leh dawn a ni tih a inhre si lo. Ani chuan ahun avawng dik si. Kei ka tan erawh zawng lungleng khawhara ka awm leh na nî tur a ni si, kan hlim chhung hi ava'n rei lo țhin em!!

A haw tur chu kawtchhuah thleng thlah tumin ka zui phei a, ka hnuk a ulh tlat.

"Chhel takin lo awm rawh aw, ano zawng hian engmah hi thlir loh tur, i hrehawm ti hmel hian ka rilru a ti nâ tih hria la, hmelhlim takin mi thlah ta che. Kan khua pawh tlawh lovin ka lo pan vang vang che a, ka ngaih zia che chu i hrethiam mai em? Chutah chûk khat pawh ka la hlawh lo zui," a nui hmel khan ka nuih ti zain ka khi ve suk a, "Ka tan i hlu tak zetin ka ngai dawn lutuk che. Mahse, kan tawrh hram hram angai rih si," tiin min hnemin min fuih phei mawlh mawlh a.

A hmelah chuan hreawm tihmel thup hram hram tih hriat tak erawh ka hmuhhmaih bik lo. Min ngaiin min thlahlel tih ka hai lo, a chhungte pawh tlawh hman lovin min pan ve chu ni sia, chutichung pawn kuthlei leh mi fawh tum zawng paw'n a awm ngai lo chu ni sia, a insum nasa țhin tih erawh ka hai lo.

Kawtchhuah kan thleng chu ka ding chawt a, sawi mai tur pawh ka hre lo, ka țawng chuan ka țap 'aw' dawn sia, chutianga min hmuh erawh ka duh si lo, ka insum nasa lutuk chu ka biang a khâm vek .

Ka awmdan hrethiamin a awmah min kuah bet vat a, ka hnunga min chul heuh heuh pahin "A chhuah viau chuan insum lovin țap mai rawh, i inbunruah țhak thleng ka nghak ang che. Mahse, i hun kal zel turah erawh kûr reng lo la, midang tan hmuh hrehawma awm loh tur, kawng engkimah min ti chaktu i nih angin i tan pawh chutiang chu nih ve ka duh tih min hriat sak dawn nia. Pathian tih lohvah chuan i châkna nih ka duh." A sawi zawh hma chuan tum loh deuhin ka insut hlawp hlawp a, ka țah rik loh nan ka hmui ka hup hman, ka țap chhuak êm lo ve. Min kuaidak thut a, ka mitah a fawp zauh a, 'inbunruak vek rawh' tih pahin min hnem nan ka samah a chul hauh hauh bawk a.

Ka lungchhe zualpui a reh hnu chuan "Nui lawk teh, tuna i hmel awmdan hi chu lu sawm sûn ang mai alawm i nih," a ti chu ka hmel lan dan tur ka ngaihtuah a, a sawi sual ka va ring lo e.

"Hii...tunangah nui tura intih ka nuih a zat pawh i ring ami?" Za vak lo paw'n anuih theih alawm, chi tal ti rawh" a tih tlat vang chuan ka khi sek a "Tawk em?" ka'n ti kherah. Mi tihhlim hi chu a thiam țhin a nia, ka kal tir vat lo chuan ka țap chhuak tak ngial dawn "Kal tawh rawh," tih pahin a țangnem ațang chuan ka in la hrang hret a, ka kutah min rawn chelh vat a.

A ngawi vung vunga ka mitah tak en in "Khawihmunah pawh awm mah ila e Bawihte. Rinawmna kan tiam kha i vawng zel ang aw." tih pahin min vawnna ka kut chu a thlah rîai rîai a. Min kalsan harsa a ti ngei mai, a liam hma chu muang changin a kal a, lo hawi let pahin a bân alo vai lauh lauh reng a.

A liam tur chu mittui nen ka thlir vâwng vâwng a.

'Hlimpui i tan.. i tan chauh rinawm takin ka lo âwm reng ang. KUM SAWM PAWH NI SE. Ka lo nghak rêng ang che,' tiin ka thlir liam ta a...

THE END

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)