LAST KISS CHAPTER-12

David Nu
Posts: 22
Joined: October 13th, 2017, 1:37 am

LAST KISS CHAPTER-12

Unread post by David Nu » October 26th, 2017, 5:43 pm

LAST KISS 12
CHAPTER-12
By-Peki Ralte



Ka ngaihtuahna buai nuai kara Rafe in a kan kal tur chuan ka ngaihtuahna a ti buai zual hle a.

Rose-i chuan a phone ri chu rang taka la in thinrim zet chuan "Tunah kher hian maw?" A ti chuai raih a.

Ka lam chu lo hawiin, "Bridget pawi ka ti hle mai, "Hna lamah ka kal angai a ni, a pawimawh hle si a."

"Tun ang zanah hian maw!?" Mak ti zet chuan ka lo ti let hu a.

"Kan pu nupui a lo thleng a, Farm-House chungchang a ni ngei ang, hmeichhe khirh lutuk" lungawi lo tak chuan a ti zui sap a.

"In siam ang le, Rafe pawh alo kal țep tawh ang," inchung lamah chuan ka zui chho ve nghal a, Rose-i lo tel ve thei lo tur chu ka lungngai hle.

"Nalh i tih ngei ka beisei," Rose-i kawr ken lai chu senno tak niin a nalh hle tih chu ka hria.

"Rose inchei angai kher em ni? Rilru buai lai lai a, inchei lam ka ngaihtuahnaah chuan alut hauh lo.

"Bridget ti teh, Rafe hmu tur i nih hi," a kawr chu ka kutah chuan a rawn hmeh bel chawt zui a.

Rafe chuan ka mut lai te, ka zing tho hlim te min hmu chiang vek tawh, lan nalh tumna ka nei lo hle, bakah rilru buai takin ka awm mek si a.

"Hlim tum teh, hlim lo taka i awm khan enge rah chhuah a pek che ni? Tunah chuan ha tawh teh khai Bridget," darthlalang hmaah chuan a ding zui nghal a.

Phur fahran lo chuan ka ha ta nge nge a, ka khup a khuh vel chiah a ni, 'pawnlam chu a vawt hle awm si a' ka ti rilru nauh nauh bawk a.

"Lo kal teh," ka bânah chuan min rawn kai chhun zawmin make-up chu min hnawih nghal mawlh mawlh a.

Ka rilruah erawh chuan ka kawr hak leh make up chu ka ngaihven lo hle, ka nu leh pa te chu ka mitthlaah an lo lang leh țhin a, ka thu hriat mak tak tak te chuan ka thinlung chu an deng na em atin ni.

"I nalh tak zet," Rose-i chuan uluk zet chuan min en a, "Tunah chuan Rafe pawh a lo kal țep tawh ang," min nuih var var chung chuan ka pheikhawk bun tur chu min pe nghal a.

Kan chhukthlak hnu chuan Rose-i chuan a motor chahbi chu lain, "Bridget hun nuam tak hmang ang che, i rilru buaina te hi paih bo vek rawh, ka kal a nge" tiin a chhuak zui nghal a.

Pawnah chuan chhuakin pawnlam ațang chuan Rafe chu ka lo nghak ta zawk a.

Rei lo teah Car dum tliang nalh zetin ka hma ah lo ding in a khalhtu chu Rafe-a nilo in, a Driver Hudson-a kha a ni tih ka hria.

"Ka pu chuan a lo lam hman ta silo che a, min rawn tir ta a nih hi," hawihhawm tak chuan ka luhna tur chu a hawng zui nghal a.

"A buai hle a nih dawn chu," a mawiah chuan ka lo ti ve bawk a, Rafe chu ka hmu chak tawh hle si a, ka lungni lo hle.

Motor ka chuan lai chuan ka nu le pa te bak engdangmah ka rilruah a awm thei lo, ka mit chu chhing vang vangin hun liam tawh chu ka mitthlaah an lo lang uai uai a.

Rei lo teah Car chu a ding tih ka hria, Hudson-a chuan ka chhuahna tur kawngka chu alo hawng leh nghal bawk a, ka rilruah chuan 'hetia tih zel kher hi angai lo asin mawle' ka ti nap nap a.

Kan chhuah chiah chuan tualzawlah chuan Rafe, palian zet chu ka lam panin a lo kal hnai tih ka hria.

"I lo thleng ta maw?" Rafe chuan min rawn fawp zeuh a, "I țha em? Na te i nei lo maw?" Min ngaihtuah zia a hmelah chuan alang, "Bridget i va dawldang em em ve," ka kut chu lain a hmer vawng vawng a.

"Ka țha alawm," ngai tih hriat tak chuan ka en vawng vawng a, Rafe ka hmuh leh chuan ka thlaphanna te chuan ziaawm lam an pan tih pawh ka hria.

"Rose-i hmel hmuh ka lo beisei asin."

"Hna pawimawh takah a kal thut angai atin ni."

"Keimah ngeiin ka lo lam tak loh avang chein thupha ka chawi e," ka kawngah chuan vuanin min kal pui nghal a.

In chhunglam kan thlen chuan tumah an awm lo chu mak ka ti hle a. Eng emaw thil tih awm dawn avanga a In a min hruaiah ka lo ngai si a.

"Hello Bridget."

Ka meng phawk hraw a, "Logan" ka ti sap a.

Logan-a chu lo kal hnaiin min rawn kuah bawk a, a kut lehlam chuan a thil ken chu min pe zui nghal a.

"Phone maw? Hei hi engtin?" a ngaihna hre lo tak chuan Logan chu ka en reng a.

"Hei hi Lawngah khan i theihngilh a ni, a tuka rawn pek che ka tum khan, in lo haw hman tawh si a," a hmelah chuan lungawi lohna a lang a.

Ni dawn tak e, ka phone awmna ka hriat loh avangin ka nu leh pa chanchin pawh Rafe hnen rawn thlen an nih tak kha.

"Ka tihpalh lutuk Logan, ka hrilh hman ta si lo che a, pawi ka ti hle mai," in thiam loh tak chuan ka melh let ve bawk a.

"Logan hi nizanah a lo thleng a, a hmu chak tawh hle bawk che a ni," Rafe chu lo kal pheiin a thawmhnaw inbel chu a lo in thlak tawh a, a awmhmun thuam inbel chu a inhmeh em em lehnghal.

"Ka lo zawng ngei ang che ka tih kha, mahse zawn ngai lova kan in hmu thei hi ka lawm takzet," Logan chuan min nuih var var a, a nui hmel mawi tak pawh kha ala ngai rengin, kei hian ka lo ngaihtuah chhuak tawh lo zawk mai a ni.

Rafe chu ka bulah chuan lo țhuin "Bridget," a hmel chu a thutak hle a, a kut pahnih chuan ka lu-ah dawmin "Pawi ka ti hle mai, naktuka zin tur ka ni a, mahse zaninah ka kal a ngai dawn ta si a, chuvang chuan ka Driver-in a lo lam ta zawk che anih kha."

Zaninah maw! A zin tur thu a sawi chuan ka țah a ti chhuak hial zawk a, ka mamawh em em lai a ni asin, ani leh zel a awm loh chuan ka rilru chu a baihvai hle bawk.

Jace-a chuan kan boruak chu hrethiam ni awm takin a inthiarfihlim tih pawh ka hria.

"Bridget," ka biang bulah chuan a thaw lum ham ham a, "I țha tak zet tiraw? Nizanah khan i awm si lo va ka lo kal asin, ka mangang hman hle a ni, i Pate John-a ka lo biak hma kha chuan zawn chhunzawm zel che ka tum a ni."

"Rafe zanin teh thuta kal chu engthil nge ni reng reng?" ka zawhna chuan a ti lungawi vak lo nge, a in la hrang hret a, a hmel chu duh aiin a rum lam țep.

"Bridget ka lo let leh hunah chuan engkim ka hrilh thei tawh ang che, engkim ti fel tura kal ka ni," chiang zetin min en a, min fawp zui nghal a.

A thil tih fel tur chu Italy-ah daih maw? Mak ka ti hle a.

Duhthawh tak chuan min fawp zui zelin, ka ngaihtuahna fim pawh chu a nu leh bulh tawh a, "Ka lo kir leh hunah chuan nang nen hian kan awmdun thei tawh ang," ka beng bulah chuan a ti sap a.

Chu thu tluka ka tana mawi a awm lo, ka van hlim tak em, he pa bula ka damchhung hun hman chu ka thlakhlelh ber a ni si a, lo let vat se ka ti hle bawk.

"Tunkar tawp zirtawpni-ah hian ka lo haw ang, chak takin lo awm ang che, i damlo hmel ka hmu duh tawh hauh lo tih hria la."

A mi fawhna chu ka lo dawngsawng țha hle a, ka lo thlahlel ngawih ngawih tawh si a.

A kut lian zet chuan ka taksa te chu a zut leh heuh heuh tawh a, ka harsat manganna zawng zawng chu lak bo ang mai an ni.

Ka kawr hak lai dar lehlam chu a nuai thla puat a, "Jace" ka ti sap a.

"Hlauthawng suh a lo kal lo ang, tih pah chuan min pawm kang lawp a, a room-ah chuan min hruai lutin khumah chuan min nghat zui nghal a.

"Bridget ka ngai tawh tak zet che a ni," zawi muang chuan ka taksa bung hrang hrang chu a fawp zel a.

"Kei paw'n Rafe," ka lo ti ve sap a.

"Ka ngaihtuah zia che hi i hria em? Nizan avanga ka hlauhthawn hman zia te kha, min kalbo san ta emaw ka ti a sin." Ka pum vel chu a chul ruai bawk a.

"Rafe i hriat kha ka kalsan ngai lovang che ka hmangaih lutuk che," ka aw pawh chu a țial ruai a, ka zak deuh bawk.

"Bridget kei paw'n ka hmangaih zia che hi ka hria a ni," ka kawr chu a phelh vek tawh zawk a.

Rafe-a chetzia leh mitmengah chuan kan thil tih mek lai chu puitlin vat a duh tih ka hria, kei erawh ka chiang hauh lo, mahse ka hmangaih tak zet a, alawmna tur a nih phawt chuan ka pasal la ni lo mahse hnialna ka nei hran tawh lo tih chu ka chiang thung.

Ka hmui te chu na si lovin a seh ner ner a, a kutin ka hnute a tawh lai te chuan ka lo thaw leh hak țhin, a mipatna chuan ka mal velah chuan a lo do leh run țhin tih chu ka hre bawk.

A kawr chu phelh ve nghalin ka beng bulah chuan "I duhthlanna tel lo chuan ka che hauh lovang."

Chu aw chuan ka hmeichhe nihna a zah hlein ka duhthlanna a ngai pawimawh hle tih hre mah ila eng emaw ti takin ka thin a rim țep thung.

A phone chu alo ri ral ral a, "Ri mai mai rawh se," a ti bung nghut a.

"Rafe nupa kar lovah chuan ka duhdan a ni ngai lo țhin a lawm, mahse tunah chuan i thu thu a ni e, keipaw'n ka mamawh che a ni," zak hle mahila ka thinlung chhung chu ka sawi lang a ka lawm tho.

A khi suk a, "Bridget ila chiang chiah lo a ang mah zawk, mahse duhthlan nan chuan a tlai tawh mah mah."

Phone chu a vawi thum nan chuan a ri nawn leh a.

"Hrep tak chuan, tu phiangsen chu nge le?" Thinrim hmel ruh țul chuan a ban zui nghal a.

Meng phawk deuh hruin, a hmel chu ngui na chuan a thlak danglam nghal, "Ka lo chhuak nghal dawn e," phone chu a dah zui nghal a

"Ka kal a ngai tawh a ni," duhthawh tak chuan min lo fawp leh vawng vawng a, "Zirtawpniah ka lo haw ang."

Hmanhmawh tak chuan a inha nghal mawlh mawlh a, mak ti zetin ka lo en reng thung.

"Ka awm loh chhung chu Logan-a hi ka in ah a awm ang, a hnathawhna leh a in chu a in hlat hle si a."

Logan-a chuan London-ah sumdawnna a nei tih chu ka hria, In a nei tih erawh min hrilh hauh lo a nih kha.

"Bridget, I duh hunah ka Driver-in a thlah ang che, hun tlem te chauh ka nei tawh, ka kal angai" a bag chu lain chhuah a tum nghal mai chu rawn let leh in ka bulah chuan a ding a.

"Ka hmangaih che, hlim takin min thlah teh khai, kei paw'n kalsan che hi ka duh hauh lo, kan pahniha kan awmdun theih nan ka kal angai si a ni," ka chalah chuan a rawn fawp zauh a.

"Ka hmangaih che Rafe, dam takin lo kir leh ang che," ka nui lui hram a, Rafe pawh chu a chhuak zui ve nghal a.

A chhuak chiah chu ka mittui chu a tla nghal zawih zawih a, in hmu leh tawh lo mai tur leh rei tak zin bo tur ang mai chuan ka ngai tlat a ni, chhuata ka thawmhnaw tla chu ka en reng a.

'Logan,' ka ngaihtuah chhuak thutin, ka thawmhnaw chu inbelin ka chhuak zui ve nghal bawk a, room ațanga step ka pan thlak lai chuan inhnuai țhutna a țhu Logan chu ka hmu thei a, ka zam hle bawk.

"Bridget zahna tur a awm hleinem," aw dam tak chuan Logan chuan min lo bia a.

Logan bawk chuan, "A hma khan thudik tak min lo hrilh la țha tur," demna mitmeng chuan min melh ram a.

"Ni lo Logan, engtin nge ka hrilhfiah ang che, khatih hunlai khan engmah a awm hauh lo, a lo thleng chawpchilh mai a ni," ka ti bah deuh nawk nawk a.

Logan-a chu dingin, "Inthiam lohna tur a awm hleinem, thiam lohna i nei lo, pawnlamah kan țhu dawn em niang?" Min melh leh zauh a.

Pawnlamah chuan ka zui chhuak ve nghal bawk a, țhutna nuam zetah chuan țhuin, zan boruak chu nidang aiin a vawt lo hle a, a nuam hle bawk.

"Bridget, Rafe hi engtiang chiahin nge i hmangaih?" Chiang lutuk a min enin a thutak hle bawk a, a zawhna avang chuan ka hamhaih hle bawk.

"Ihh, ihh, englooo..."

"Bridget ka duh che tih i hriat kha, mahse chu chu inthlahrun nan hmang suh, i țhianțha tak ang khan min en leh ta che." A thusawi dan chu mak ka ti hle a, ka hmangaih zia chu engvanga hre duh kher nge maw a nih le?

"Logan, Rafe hi ka nunna ai pawhin ka hmangaih a ni," ka sawi reng lai pawh chuan Rafe-a chu ka mitthlaah lo langin ka ngai hliah hliah a.

Logan-a mitmeng chu a danglam nghal vek a, min duh hle tih ka hria, a mi duh tak
in mipa dang a hmangaih tih a hriat avang a, lungngai a ang lo hle thung.

Logan-a chu pa țha tak a ni si a, a țhianțha ber bialnu chu a duh ber hmeichhia pawh chu ni se, alawm pui ang tih ka chiang a ni.

"Ka lawmpui tak zet che u, chutih rual chuan Rafe-an nang ang hmeichhia atawng hi ka lawmpui zual bawk," a hmelah erawh thildang daih ngaihtuah a ang hle thung si.

"Bridget harsatna emaw, min mamawhna i nei anih phawt chuan min hrilh hreh suh ang che, i tan ka awm reng tih hria la, țhianțha tak angin min en chhunzawm zel bawk la ka duh a ni.

In haw tak hnu khan nikhat lek nang nen hun kan hmang tih ka hria, mahse mak tak maiin ka thinlungah i thi ngai hauh lo, ka vawikhat hmuhnaah che khan, ka duh hle che tih ka hria, mahse i awm loh tak hnu ațang khan ka hmangaih che tih ka hre bawk.

Keipawh hian mak ka ti hle a sin, hetiang thil hi ka la tawng ngai hauh lo, mahse nang chuan i nunna ai pawh a hmangaih i nei tawh si a, ka lawmpui che a ni."

Mak ka tih em avang chuan ngawi reng chuan ka en tawp a, kei pawn rei lo te chhungin Rafe ka hmangaih lai reng ka hre hman lo anih kha.

"Logan, a pawi ka ti kei hian.."

"Bridget, i chhanna ka duh ngai lo tih i hriat kha, min chhang tur pawn ka duh hek lo che, i hmangaih chu ka hre tawh alawm, mahse nang hian tu emaw hmangaih em em tu che hi an awm reng a ni tih hria la ka duh tawk a ni mai."

Logan hi mak ka ti zual tulh tulh, a hmangaih ber hnen ațang hmangaihna phut let ve hauh lo in, a hmangaih a ni tih hrereng se chu chu a duh tawk a, ka khawngaih hle zawk mai.

"I tan ka awm reng tih hria ang che, engtik hunah pawh țanpui i ngai a nih chuan min hrilh hreh suh, ka hmangaih che tih ka sawi avang hian i țhianțha ka nihna hi dah bo lovin nem nghet zawk ang che." Chiang zet chuan min enin a nui suk a.

Logan-a ang pa fel leh rilru zau lutukin kei kher min lo duh ve hi pawi ka ti hle, kei ni lo hmeichhe dang nen in hmangaih takin awm se chu chu a phu hliah hliah bawk.

"Tunah chuan London-ah ka awm a ngai rih a, ka unaupa a damloh avangin kan company chu ka enkawl angai a ni."

"Hetah i awm rih dawn tih hriat chu a nuam tak zet e," ka lawm hle tak tak bawk, a bul a awm hi a hahdam thlak reng țhin si a.

"A tlai mah mah tawh tlat, ka haw angai tawhin ka hria."

"Ka thlah ang che, mahse i haw hmain i sam vel kha tuai mam phawt la," min en chung chuan a nui vur vur a.

Ka zak hle mai, Rafe nen khan hmangaihna chendunah min ngai a ni ngei ang, phone-a be tu kha awm lo se zawng kan chendun ngei bawkin ka ring.

"Driver-in min thlah thei alawm, tihbuai kher che hi ka duh lo."

"Mahse, ka thlah duh che alawm," min kai zui nghal a.

"Bridget engtikah emaw, ka inah zanriah min kilpui duh ang em?" Motor kan chuan lai chuan Logan chuan mi zawt a.

"Tehreng mai, ka chak lutuk alawm," Logan mifel tak chaw eipui leh chu ka thinlung pawh chuan a hnial hran lo hle.

Eng engemaw chu a sawi hlut a, ngawi reng chuan ka lo ngaithla a, ka țawmpui tihlan nan chuan ka lu ka lo bu leh nghauh țhin, mahse ka thinlungah erawh Rafe chu awm rengin, ka mamawh em em laiin min kalsan si a.

Pate John-a te in kan thlen chuan a tlai tawh hle tih ka hria, ka chhuak nghal a.

"Bridget in enkawl țha ang che, kan inhmu leh thuai dawn nia muttui aw," tih pah chuan min kuah zauh a.

"Muttui le Logan," ka inher a kawngka lam chu ka pan zui nghal a, ka chhungte chu an mu vek tawh a nih ringin room lam chu ka pan chho ve nghal bawk a.

"Bawihte, i va rei ve Jace-an a nghak rei tawh lutuk che asin," Pate John-a chuan room ka luh hma chuan min lo bia a.

"Jace maw?" hmu tur chuan ka la inpeih lo hle tih pawh ka hria, Rose-i erawh a mu tawh a ni ngei ang.

"Chokaah a nghak reng tawh che a ni, jace chu i pa a ni a, i pa ang a i en thei lo anih pawhin, a tawrhna tal chu hriatthiam sak ve ang che," John chuan min lainat hmel tak chuan min en a, a room-ah chuan a lut zui nghal daih a.

Hreh zet chuan choka lam chu ka pan a, ka lungphu chu a rang em em bawk, ka hma a ngaihtuah muk tak nei tih hriat tak a, pawn lam lo en vang vang ka hmuh chuan ka ding deuh dawt a.

"Bridget, ka lo nghak reng tawh che asin, min hmu duh lo anih paw'n ka thusawi tal chu ngaithla la ka duh a ni." ka lam chu lo hawiin, inthiam lo tak leh hrehawm tih hmel tak chuan min en a.

"Engtin nge ka awmna i hriat theih, nang hmu tur che hian ka la in peih tawk lo a ni," ka zam hle a, mahse zam ang a awm ka tum hauh lo, ka kut chu ka hum ruh a.

"I in ah khan ka lo kal alawm, mahse ilo awm si lova, John-a hnenah i awm ngei ringin ka lo kal ta a, i lo awm ta reng bawk a nih hi," a hmel chuan ka pa min hriatchhuah tirin, an in ang kher em a ni.

"I in iti elaw, nangma in niin ka lo hria a," elhsen zet chuan ka ti a.

"Bridget, thutam sawi tum a lo kal ka ni lo, John-a hnen ațangin engkim i hre tawh tih ka hria, ka sawi duh zawk chu kha'ng thudik te kha i pawm thiam hun ka lo nghak reng a ni." A hmel chu a lungngai hle a.

"Ka nu leh pa te ber an awm tak loh avang in, in thusawi zawng zawng te hi thudik a ni vek kher hleinem," awih lo tih hriat zet chuan ka en chho va a.

Chiang taka min enin, "Bridget, ka hrethiam che, i chungah hian thil zawng zawng hi a thleng rang teh thut em a ni."

"Mahse, nang chuan ka nu leh pa te boral ta chu i lawm viau ang chu, ka tawrhna te enchhin tum hauh suh."

"Ni lo, ka unaupa nen hian kan inkar a țha lo hle tih chu ka hria, mahse boral mai tur atan chuan ka phal bik lo asin," a kut chuan a hmai chu zawi muanga tuai thla in, a thaw deuh halh a.

"A nih chuan an boral khan i awm lo a ni lawm ni, London-a awm ve reng chung siin," za lo tak chuan ka nuilui sak a.

"Ka awm alawm, biakinah leh tlanmualah khan.. Mahse, a ruk thei ang berin."

"I unaupa leh a nupui chu an boral a, a ruk thei ang berin i lo awm a maw?" ka melh nghek bawk a.

"I hmel kha ka hmu thei lo a ni, i bul hnaia ka awm chuan hun lo takah mi zawng zawng hian kan in laichinna hi an hriat ka hlau a ni," țhuhphahah chuan zawimuang in a țhu nghal a.

"Jace ka rilru ka thlak anih chuan ka lo hrilh ngei ang che, mahse in thusawi zawng zawng te hi awih tur a ni nge ni lo, ka chian ve phawt angai a ni, ni lawm ni?"

"Chuan he thu hi ka hrilh duh bawk che, saw in saw ka in nilo in, nangma in ngei a ni e, John-a te bul a i awm hi angai kher lo, let leh la ka duh hle bawk," a ngen a min ngen a ang mah zawk a.

"Ka in ni lovah ngaihngam takin ka awm thei lovang," ka luhlulna chu ka chhuah lui tlat a.

"Bridget, i tetlai zawng khan ka pawm chak che a, infiampui te ka chak em em țhin bawk che a, kal zirtir te kha chak ve țhin asin, zan mut dawna i chal a fawh hnu a mut te kha ka chak ber ber te anni țhin asin, mahse chutiang zawng zawng chu ka tan a rem ve lo a nih kha." A sawi zâwng pawh chuan a tuar hle tih alang.

Ka rilru pawh chu a hnehin, ka pa ngei anih chuan ka pa chu ka khawngaih ve hle a ni ang, ngawi reng chuan ka en ringawt a.

"Engkim kha hrilh che a, neih let che kha ka duhber ni mahse i natna tur anih tawh tlat avangin ka thei lo a ni, kum i tlin hun, rilru puitling i neih hun chu ka lo nghak ta char char zawk asin." A hmel chu a nguai hle a, a khawngaih thlak hle bawk.

A thusawi te chuan ka mittui a ko chhuak tih ka hria, mahse a tla tur a ni lo ka duh hauh lo.

"Jace min kalsan tawh rawh, tunah chuan ka nu leh pa te ka sun chiah a ni a, tin heng thu mak tak tak te hi hre leh in min țhawng hle si a, mahni a inngaihtuah ka duh a ni," ka luhlulna leh chapona te chu a zawr vek tawh tih ka hria, ka buai tak zet a ni.

"Bridget naktukah chuan i In ngeiah haw la ka duh a ni, kei min pawm thei lo anih paw'n, saw In tal saw chu i nu leh pa te nen in awmna a ni tih hrereng la, keimah vang chuan hnuchhawn reng reng suh," lo kal hnaiin chiang tak chuan min en a, a fanu chu kuah vawng vawng a chak tih chiang takin ka hria.

"Ka lo ngaihtuah ang, John-a pawh ka sawi pui angai alawm."

"Ka kal tawh ange," hreh hmel tak chuan chhuak nghalin, a lo hawi let tawh miah lo bawk.

Rilru buai tak chuan ka mu a, Rose-i muhil tui tak chu ka awt hle.

Engvangin nge a fanu nghak rengtu chu ka huat tlat ni, a fanu chu pawm a kuah te a thlahlel ve ngawih ngawih si a, hun kha leh chen kha a lo nghak tawh a, keiin ka lo hnar leh si ang maw? Jace-a hmel lungngai tak leh hrehawm hmel chu ka mitthlaah a lo lang leh uar uar a.

Min tihnat duh emaw, ka pa In chu neih tum ni se zawng let leh turin min ti hauh lovang, bakah a mit ngei ațang khan thudik a ni tih chu ka thinlung hian a hre tlat a ni.

Ka nu chu bum a lo ni reng a, kei pawh chutiang bawkin, thudik ka hriat hnuah erawh ka pa chu ka huat phah hauh lo, ka hmangaihna chu a ngai reng tih ka hria...
to be cont...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)