BEISEINA THAR BY Remmuana Chawngthu Jeff Jr. (Competition)

Ngaia
Site Admin
Posts: 25813
Joined: April 30th, 2016, 4:07 pm

BEISEINA THAR BY Remmuana Chawngthu Jeff Jr. (Competition)

Unread post by Ngaia » August 8th, 2018, 9:26 pm

BEISEINA THAR
(Competition)

Duhthusam hlimna.
Kum 2006 August thla chawhnu lam a ni a, favang tir a ni bawk a, Aizawl khawpui boruak a nuam khawp mai. Sik leh sa tawrh a nawm vanglai tak a ni a; ruah a la tuihul chiah lo nain fur khaw hnawm pik chuar mai chu a zo fel thawkhat tawh a. Khawpuia cheng mi tin mai chu mahni thil ṭul neuh neuh buaipuiin an phe buai sek hlawm a, lehkha zirlaite pawhin a zirna uar zawka an kalpui vanglai tak a ni. Kohhran hrang hrangten Camping leh Crusade an buatsaih hlawm a, Kohhran inkhawm boruak pawh a nuam thei khawp mai.

Aizawl Civil Hospital kawtah chuan, a hmel en reng reng pawha pa zaidam tih hriat tak mai Pu Lalrova chu a ṭhutna ngaia ṭhu ṭha hleithei lo chuan mawng vawm bain a tei kual chhen mai a. Thil huphurhawm tak hmachhawn tur hmelpu tak chung leh thil nghahhlelhawm tak hmuak niawm tak hian a awm kual vel nasa mai a. A changin rilru hah hmel tak hian a tukhum sam zut kual pah chuan a han hui leh deuh pap pap ṭhin a; a chang leh chunglam thlir pah chuan a han nui khi leh deuh vur vur zel bawk a, a bula mite chuan mak ti hmel tak hian an thlir leh deuh hu zel a ni. Hospital kawtah chuan thlanglam leh chhaklam hawi zawng hian a vei kual tawn sek mai a. Chutia darkar hnih (2) zet mai a awm hnu chuan Hospital chhung aṭang chuan rang zet mai hian a farnu Pi Lalngheti chu arawn tlan chhuak vat a, "Ka u, naute thar in nei ta e, lo tlan lut vat teh," tih pahin a kutin a han hui zeuh a. Chu veleh rang mangkhengin Pu Rova chu phur fahranin a han tlan lut zui a. Nau neihna Ward a va luh meuh chuan a fapa thar nghakhlel taka a lo beisei chu Nurse pakhat chuan a lo pawm va va mai a. Thinlung hlim leh lawm hmelpu taka rawn en pah chuan Nurse ken lai chu a va pawm zui ve vat a: a lawm thlawt a ni tih chu sawi thui ngai lovin a hmela hlimna sang tak lo lang chuan a tilang chiang hle a ni.

Chutia rei vak lo Nau neihna Ward-a hun an hman hnu chuan, a farnu leh a nupui (Thanpari) te chu Hospital-ah chuan la awm tirin, eitur leh thil ṭul pawimawh dangte lam turin Hospital chu a chhuahsan lailawk rih a. Hospital aṭanga an in lam pana a kal lai chuan a rilru chuan thil tam tak a ngaihtuah chhuak nasa mai a. A naupan laia a suangtuah fo ṭhin; nupui ṭha tak neiha fa duhawm takte nen chhungkaw ṭha tak din tura a suangtuah ṭhin chu a tak ramah a chang dawn ta niin a hria a, lawm tak chungin nui ver ver pahin a in lam pan chuan motor chuan a tlan ta zel a.

Kum khat a liam hnu Pu Rova leh Pi Pari te nupa hlimna thlentu ber chu an fapa duhtak "Lalpekhlua" a la ni fan a. Ṭhenawm khawvengte leh midang reng reng hre chang lek lo chuan an fapa neihchhun chu tuktin zantin mai hian an awmtlei hi a ni ber mai. Pathian malsawmna tam tak an dawn dangte pawh theihnghilh lek lek khawp chuan an fapa chuan an rilru chu a luah hneh a. Pu Rova chu a nitin hnathawhna Office lamah pawh a thawhpuite hre chang lek lo hian nitin mai hian a fapa hlim hmel chu a mitthlaah a lo lang leh ṭhin a, Office ban thuai thuai hi a chak et et zel mai a ni.

Zan khat chu an mutnaah Pu Rova chuan an nu Pi Pari bulah chuan mi vannei chungchuang tak nia a inhriat thu hi a sawi luam a.

"Ka pa hian kan la naupan viau lai hian min boralsan a. Chumi hnu chuan ka nuin hun harsa leh hrehawm tak tuar chungin ka farnu Ngheti nen hian min enkawl sei lian a; kan huana thlai rahte hi la khawmin bazarah te a zuar kual ve ṭhin a. Chutiang chuan kan lehkha zirna turte a lo thawhchhuah bakah kan nitin mamawh ei leh in tur thleng khan a ngaihtuah ta vek ṭhin kha ania; Ka nu kha a va han chhuanawm tehlul em!", zawi deuh hian a han ti nuap nuap a. A nupui Pi Pari chuan lo tuihnih nghal vatin, "Ni e, nang zawng Pathian malsawmna leh kaihhruaina hi i dawng hnem bik khawp hian ka lo hre ṭhin a, vawiina kan chhungkaw hlimna zawng zawng pawh hi i hnena Pathian awm thiltih a ni ngei a ni." a lo ti zui vat a. Tunlai Zoram khawvel buaina neuh neuh awmte chu an han sawi kai dun a. Ṭhalai zinga sual Setana'n hna a thawha, a inlulin nasatzia te hmun ralmuang lai reng reng awm tawh lo hiala an hriat thu te , an fapa lo seilian tur pawh chu engtia enkawl nge ṭha ber ang tih thu te thleng mai chuan an han sawi kai dun hial a. Tunlai khawvel inher danglam chho zelin thil mak pui pui a herchhuahpui dante an han thlirin an fapa hringnun kal zel dan tur pawh chu thlir lawk thiam har an ti ngei mai.

Khawvela chhungkaw tinte innghahna lungphum nghet tak hrechiang turin Pu Rova te nupa hi rinna kawngah pawh an pachhe vak bik lo a. Pu Rova hi an Kohhranah rawngbawltu chhuanawm tak niin, an nu Pi Pari ve thung hi chu Kohhran hmeichhe pawl lamah a phak ang tawka ṭhahnemngai taka ke pen ve ṭhin a ni. Ṭawngtai taima tak leh Pathian ram thilpek ngaipawimawh tak nupa an ni a. Hetia ngaihtuah mai hi chuan an fapa lo sei lian zel tur enkawlna kawngah pawh ngaihtuahawm lo lutuk tura ngaih an ni.

Vanglai nun hlu....
"Peka, zanin chu New Model Night Club-ah Spanish zaithiam leh lamthiam hmelṭha tak tak an rawn kal dawn nia aw. Chhun lamah hian a tam thei ang ber lehkha i zir teh ang." tiin Zosiama chuan a ṭhianpa Peka (Lalpekhlua) mu lai chu a va kai harh teh ngawt pek a.

"Ngawi teh, nizan khan ka thil chhiar lai kha ka chhiar laklawh lutuk a, zing dar 3 velah ka mu ve hman chiah a. Zanin chu ka mu hma ang ka lo tia sin;Vawiin pawh class ka kal peih miah loh hi..." tiin a ṭhianpa chu Peka chuan mutchhuak hmelpu tak chung chuan a han chhang zui ve nghal a.

"Kum 17 lai i ni ve tawh a, tlangval hmelṭha tak i la ni zui a. Hei, kan College hi FORTIO College, Kolkata-a College lian leh changkang ber, zirna a that bakah building pawh nuam tak a la ni zui a. Mizorama kan chhungten kan khawsak dan engkim an hre zui vak tawh chuang lo a; lehkha pawh zir ngawrh vak duh tur a ni lo. He hmunah hian vanram tlafual kan chen ve a ni mai a. Kum tawp examah kan fail loh chuan kan chhungte hmuhah kan fel a ni mai," tiin Zosiama chuan a han thlem zui lehnghal vat a. "Inbual fai la, lo insiam rawh, zanin chu kal ve ngei ngei teh ang," tih pah chuan an room aṭang chuan Zosiama chu a chhuak ta nghal daih a.

Zosiama'n a chhuahsan hnu chuan Peka chuan thil tam tak ngaihtuah zui nghalin, a mutna khuma let kual vel pah chuan a rizai sin laite chu a han pawtsawi kual vel nasa mai a. A ṭhianpa Zosiama thusawi chuan a rilru chhungril a luah hneh nghal angreng viau mai a. Naupang te anih laiin a nu leh pa ten an duat hle mai si a, a duhzawng an leisak zel a, a lungawina tur anih chuan khawi hmunah pawh an lenpui zel a, a it zawng leh duh zawng hlir mai chu an leisak thei zui a. A nu leh pa zaidam leh nunnem tak an ni a; Kohhran leh khawtlangah nise mite zah kaipha ve an ni a. A mamawh engkim mai chu a nu leh pate-ah hian a kim vek mai te hian a hria a; Van-a arsi leh thla te hial pawh khi laksak thei turah a nghet tlat hial a ni. Mahse, a han chhut zui leh deuh a; vawikhat tlangval chhuah ve manah lenlai han chen ve hlek chu fuh dawn riau hian a hre ve a; a ṭhianpa Zosiama'n vanram tlafual a tih chu tem ve thei dawnin a inhre tlat mai a. An luhna College-a Mizo zirlai awm vete pawhin nuam an tawl nasatzia te a ngaihtuah chhuak hial mai; a ṭhian kawm ngeih ber mai Zosiama rilru tihbeidawn bik chu ṭha nia a hriat bik loh avangte pawhin a mutna aṭang chuan a tho ta hluai a.

I läm ang aw...
New Model Night Club-ah chuan chhepchher chi tinreng hi a kim vek emaw tih tur a ni, thil ri thei chi hrang hrang mai chu a ri chuai chuai mai a. Stage lamah chuan Indian model nalh tak takte chu thawmhnaw pan hling hleng nena inbel chungin an lam suau suau mai a. A sir lehlamah Spanish zaithiam te chuan hla nalh tak tak chu club chhung boruak tinuam thei tur zawng tak mai chuan an han sa a. A sirah lamthiam zeihawi lutuk leh pian nalh zeihzawih te chu an lo intheh vei hawh hawh hlawm bawk a, thlir nuam tak ni turin an theih dan sang ber nen chet an lo la nasa mai a. Khawvel lam thila hlimna tinreng chu a kim vek emaw tihtur a ni deuh ber awm e. Thenkhat an lam suau suau a, a ṭhenin sir kil lamah zu no an lo dawm sen fur hlawm bawk a. Nula leh tlangval lungkham nei lem loa lenlai chen zingah chuan Peka leh a ṭhianpa Zosiama pawh chu a phur phur an lo ni pek a, Mizo ṭhalai engngemaw zat mai chu an lo tei lut ve bawk a.

Zan a rei tulh tulh a, an phur tawlh tawlh mai lehnghal a. New Model Night Club chu nula leh tlangval lenlai chen mekte tana nuam thei ang ber tura buatsaih a ni bawk a, a chhunga khawsate chu an hlim vet vet hle mai. Peka pawh chuan thildang reng reng a ngaihtuah hman meuh lo, a vanglai nun chu duhthusama nuam hian a chen ve hi a ni deuh ber mai awm e. Mizo ṭhalai tam tak chu hmuna lo lut ve zingah chuan an College-a nula pakhat, a ngaihzawn ve em em Nunmawii a telve lehnghal a, a phur zual hle. Hun engngemaw chen chutia an han lam kual vel hnu chuan a duhthusam ang ngeiin Nunmawii chuan Peka lam tui lai tak mai chu a dara va kuah pahin, "I lo telve a ni maw, nuam i va han ti ve aw...." a han ti a. Peka chu nui ver ver chung chuan Nunmawii lam chu va hawiin, "Nuam khawp mai tiraw, zanin chu i han che dun tak tak teh ang aw," tih pah chuan Nunmawii chu kuah ve nghalin, an han lam dun nghal zat a, an va hlim tehreng em!

Zu khuahkhirhna hmun aṭang lo kalkhawm Mizo ṭhalai, zu ruih thiam lo tak tak, zu thlah zalenna hmuna an han pawng tal tak tak chu awmchin tawk hre map lovin an han che pek a. Zu thiltihtheihnain a man hneh tawh chinah ngat phei chuan "Khawvelah ka huai ber" ti niawm hrimin an rui phur chuan buaina lian tham chawhchhuah an cho angreng nghal riau mai a. Pawr fe fea rak kual vel pah chuan an bula hnamdangte be kualin, a mawi lo zawng ngawt chuan an han khawsa zui zel mai a. Hnamdang ṭhalaiten intihhlimna hmun atana an siamah chuan an rui awmngaihna hre ṭha tawh lo, harhfim tawh bawk si lote chuan engtin tin emaw buaina an siam chhuak ta ringawt mai a. Night Club thuneitute beng a thleng zui vat a. Chutianga hnamdangte nena intihbuai chu tunhma deuh pawhin Mizo ṭhalaite hian an lo nei fo tawh thin a lo ni a; chuvangin henglai vela hnamdangte hian Mizo ṭhalaite an hmuh dan hi a danglam phah tlat reng a ni.

Hemi zana an khawsak dan hi arang arangin Kolkota Mizo Zirlai Pawl hruaitute beng a thleng nghal vat mai a. An intihbuai a reh fel ta tihah chuan Kolkota Mizo Zirlai Pawl hruaitute chu an lo thleng ve nghal a. Night Club thuneitute hnenah chuan ngaihdam dil nghal vatin, Mizo ṭhalai awmhote pawh chu an han zilh nghal ta char char a; chumi hnu chuan Night Club-a awm zui zel chu phalsak tawh lovin an hnawt haw zui ta nghal a ni. Hemi zana an haw hnu hian Peka chuan Night Club- a a lampui, a ngaihzawn ruk em em ṭhin Mawii chu an Hostel-a a room-ah chuan a hruai lut nghal hmiah mai pek a, zankhua chuan an riakdun ta hial nghe nghe a ni.

A nu leh pa fapa duat tak mai, Kolkota a thlen thlak hlim a tlangval fel tak pawh ni ve kha, Kolkota a awm aṭanga thla ruk hnuah meuh chuan tlangval fel tak tia chhal hleihtheih pawh a ni ta meuh lo. Tlaitin mai chuan zu a rui ve ta fo mai a; Mizoram lama a nu leh pate hnenah chuan chhuanlam hrang hrang siamin pawisa a han dil ta deuh chhen mai a. A nu leh pa a khawsak dan zawng zawng an hriatpui vek bik bawk si lo a; fapa fel tak nei nia an inhriat avangin a zirna atana ṭha tur niah an ngai zel mai si a, sum leh pai tam tak mai chu thla hnih/thla thum dan zelah hian an thawn thla ta fo mai a ni.

Chumai ni lovin Peka chuan a bialnu Mawii chu zantin deuhthaw mai hian an Hostela a room-ah hruai lut zutin a riahpui ta fo mai bawk a. An College-a Hostel thuneitute chuan an lo hriatin chutianga room pakhata nula leh tlangval riahdun fo mai chu an lo duh lo nasa mai a; a tawpah phei chuan na takin an zilh ta hial a ni. Mahse, mihur zilh an sawi ang mai hi a ni. Peka chuan luhlul chhuahin Hostel thuneitute zilhna chu engah mah hian a ngai duh ta hlek lo mai a, a bialnu Mawii chu kawp a bansan thei chuang tlat mai a; zantin hian tlai tak takah an Hostelah chuan rawn luhpuiin an riakdun leh ta chhen mai a, chumai ni lovin zu intur an keng fo zel lehnghal a, Hostel Warden chuan chutia zantin maia Peka rui tak chung leh nula hruailut chunga an Hostela luta a khawsak fo zel avang chuan College thuneitute hnenah thil awmdan zawng zawng chu a thlen fai ta vek a. College thuneitute chuan chu chu an lo hriat chuan an la thutak kher mai, a hranpaa an zilh hrep bakah warning khauh tak an pe ta hial a. Tun aṭanga a thil tih ṭhinte a sim vat loh chuan College atanga hnawhchhuah hial pawh an tum thu thlengin an hrilh nghe nghe a ni.

Hun a lo kal zel a, hnamdang zinga khawsak thiam lo Mizo ṭhalai Foratio College- a lutte awmdan ṭhalo hrang hrang an lo hriat chuan Kolkota Mizo Zirlai Pawl hruaitute chuan Foratio College zirlai zinga Mizo ṭhalai awm zawng an Office-ah ko khawmin an zilhhau ta hial a ni. Kolkota Mizo Zirlai Pawl-a an President Pu Zoduha chuan, "Kan hriat ṭheuh angin tun ṭumah hian Foratio College-a Mizo zirlai awmte kan han kokhawm che u a ni a. In luhna College hi Kolkota mai ni lovin India rama College zawng zawng zingah pawh a ṭha ber pawl tling phak a ni a, he in luhna College hi mi nazawng tana luh mai mai theih lohna a ni hial a ni tih hi in hriatchian ka duh a; zirna mai bakah hian thildang tam takah College dangte aia a ṭhat bikna a tam em avang hian India ram hmuntin aṭangin an bawh nasa bik hle a ni. Chutiang taka India ram hmun hrang hrang aṭanga mi tam takin lehkha zirna atana an hman ṭhin avang chuan nangni hi he in luhna College-ah hian Mizo hnam timawitu ni tur leh Zonun zemawi chawisang turin kan duh che u a ni. Ringlo-mi, Kristian ni lote hnenah Kristian nunmawi tak lantirtu in nih tawh kan beisei tlat a ni. In zavai hian in kholo vek kher lo tih erawh chu kan hrechiang khawp mai. In nu leh paten sum leh pai tam tak sengin in lehkha zir nan tiin an theihna zawng zawng an hlan a, nu leh pate tibeidawng zawnga in awm loh hram pawh kan beisei tlat a ni. Tun dinhmuna in khawsak dan hrang hrang in College hotute zinga mite sawi kan hriat hian kan rilru a tina hle a ni. In zavai chuan in sual vek lo:mahse, pakhat lek awm ṭha duh lo an awm pawh hian Mizo awm zawng zawng hi a mualpho vek theih a ni tih hi lo hre rawh u. He hmunah hian zirlai pakhat khawsa mawi lo taka lo mualpho awm ta se, Mizoramah chuan Mizoram pawna lehkha zir zawng zawngte hi kan zavai mai hian kan mualpho vek zel a ni tih hi lo hre nawn leh rawh u. 'Phai-a lehkha zirte hi an che kholo ṭhin emai' tiin, kan vai mai hian min hmu kholo zo vek zel a ni. Chuvangin, tuna china che mawi lo in awm leh anih chuan Mizorama in chhungte hnenah lehkha kan thawn hmiah anga, in khawsak dan zawng zawng hi kan hrilh fai vek zel dawn tih lo hria ang che u." tiin zirlai lo kalkhawmte chu a zilh nasa mai a.

Hetianga zirlai hruaituten ṭhahnemngai taka an han zilhhau hnu hi chuan hun engngemaw chen chu thawm ri-va mawi lo tak han hriat tur a awm ta lo deuh a. Peka pawh chu tlem chuan a nunphung a zawi ta deuh ve ta a. Mahse, langsar taka va mualpho lo tawk velin a ruka zu in erawh a sim thei chuang ta tlat lo mai a. A bialnu Mawii lah chuan Mizoramah a pu lung an phun dawn avang leh a nu damṭhat loh avangin a hawsan leh rih bawk si a. A khawhar lutuk awmngaihna hrelo lungleng bawk si chuan zu in lamah bawk ṭhahnem a ngai leh ṭhin a. A hmaa a ṭhianpa Zosiama ngei pawh chuan a zilhhau zawk ta fo mai a ni.

Duhthusam thamral...
Pu Rova leh Pi Pari te nupa pawh chu Kohhran leh khawtlang lamah an phar buai thei angreng hle mai a. An nupa chuan in khata khawsa dun e ti lo chuan han titi-na hun takngial pawh an nei khat angreng khawp mai. Tuk khat chu chaw an ei dun lai chuan Pu Rova chuan, "Pari, nizan ka mumang chu a fuh lo angreng tak tak a ni. Tunlai chu ka mumang hi a dik hleithei lo reng reng, thil rapthlak deuh deuh hi ka hmu fo nia mawle," a han tichhuak phawng mai a. Pi Pari lah chuan, "Akhai aw!! Nang hi Bawihtea i ngai te hi a ni lek lo maw? i ngaihtuah leh lutuk hian a chungah thil ṭhalo thleng dawnin i hre pek a nia nge?," a han ti zui zat bawk a.

"A ni maithei, tunlai chu ka rilru-ah hian a cham reng mai. Kan hmuh phak loh leh lutukah hian a awm ta si a, inngaihtuah a na duh si a, dam tea a awm anih chuan min la awm bosan rei dawn chauh ni hian a lang lehnghal a." a han ti zui veleh nghal a. Pi Pari pawh chuan an pa thusawi chu a thlawp ve viau mai a. Pu Rova bawk chuan, "Hman deuhah pawh khan Kolkota-a Night Club pakhatah buaina a chhuak a Mizo zirlai ṭhenkhatte leh hnamdangte an intihbuai thu kha chanchin thar lamah lah khan an puang vak vak lehnghal a, Bawiha hi ka ngaihtuah zual tlat a ni." a han ti zui leh hram a. Pi Pari chuan rang zetin, "Akhai khai, mai mai a che, Bawiha te zawng khawia Night Club-ah mah a kal lul lovang. Mizo ṭhalai tam tak awmphung hrelo hi an tam a, chung mite bak chu zuk ni suh.." tiin a han chhang zui a.

Pu Rova chuan an fapain sum tam tak a dil ta fo mai te chu a ngaih tiṭhalotu anih thu te bakah, tunlai khawvelah ṭhalai tam tak zingah sualna a nasat tawh em avangin an fapa, an hmuh phak loha awm pawh chu tunlai suahsualna chak tak chuan a man ve hlauh palh ang tih hi a hlau zek zek ta mai a. Pi Pari erawh chuan an fapa lakah a ngaih a la tiṭha angreng khawp mai a. A ni lah tak a, an fapa, a tette aṭanga kehthei dawma an dawm, an duat hlum loh chauh khan Kolkota-a lehkha a zir dawn thleng khan sualna lian tak dai miah lo leh, nu leh pate mit tikham zawnga vawikhat mah a la awm loh avangte chuan chuti maia an fapain sualna khur a dai palh ang tih chu han rinngam a har ngawt ta ve ang.

Nu leh pa mitah chuan fate hi engtiklai pawhin naupang chhia ang mai hi an lo ni duh riau a. Mahni inchhunga nausen ena chhungten an en ṭhinte pawh hi pawn lamah chuan an lo naupang chhe tawh lo nasa mai ṭhin a. Nu leh pa tan tak chuan an fate pawn lama sualkawng an zawh thu an hriatte hian an awih lo hial ṭhin reng a ni. Pi Pari pawh hian an fapa duatlai Peka chu sual khura tla turah a la ngai chhin eih lo a ni.

Chutia Pu Rova te nupa an inkawm tui em em lai tak chuan an ṭhenawm tleirawl Nghakte an tih chuanin lehkha pakhat hi Pu Rova chu arawn pe a, chu lehkha a pek hnu chuan Nghaktea chu rang takin a chhuak lehnghal a. Pu Rova chuan a nupui chu lehkha chu pein chhiar turin a han ti a, rang angreng takin Pi Pari chuan lehkha chu lain a han en nghal vat a; "Ehe! U Ro, Kolkota Mizo Zirlai Pawl-a an Secretary C.Lalrammawia hnen aṭanga lehkha lo kal a nih hi, kan chhiar ange aw, lo ngaithla teh aw," a han ti a, a chhiar zui nghal ta a.

"To,
Pu Lalrova
Aizawl, Mizoram.

Kapu,
He thu hi i hnena sawi kan hreh viau nain, kan sawi lo thei si lova, chuvangin rilru zau tak pu chunga minlo chhiarchhuahsak hram turin ka ngen a che.

In fapa Lalpekhlua, Foratio College, Kolkota-a First year zirlai ni mek chuan an College-a a hostel room-ah nula pakhat hi zantin a hruai lut ṭhin a. Chumai chu ni lovin a ṭhiante nen zu an rui nasa ṭhin hle mai a. Hmanni deuh lawk pawh khan Kolkota-a New Model Night Club-ah an ṭhianho zurui hian hnamdangte karah buaina an siam a. Helai hmuna Mizo awm zawng zawngte min timualpho hle a ni. Tuna an luhna College-ah pawh hian a khawsak phung hian College thuneitute mit a tikham hle a ni awm e. Hetianga in fapa a khawsak ṭhin avang hian helaia Mizo awm vete pawh hi kan mualpho phah ta fo mai a. Keini Kolkota MZP te chuan kan zilh viau tho nain, nangni a nu leh pate hian nasa lehzual zawkin a awmdan ṭhalo hi a sim theih nan lo zilh ve ula. Chumi hnua a la chet mawi loh viau zel chuan helai hmun aṭanga Mizoram lama rawn thawn haw hial pawh hi kan tum a ni.

I rintlak
C.Lalrammawia
Kolkota MZP.........".

Chutia lehkhathawn duhawm lo tak an han chhiar zo chu an nupa chu an ngui nghal hmuk a, a barakhaih kher mai. Pi Pari chu nasa takin a ṭap zui nghal hawm hawm a, Pu Rova pawh a mittui a far chhuak hial a ni. An fapa chungchang thu leh a khawsak dan an hriat chuan an thin a tiṭhawng nasa angreng hle mai a. Sawifiah mai sen loh khawpa hrehawmna hian a bawm chhuak nghal ni ber hian a lang a ni. A rang thei ang bera an fapa chu Kolkota aṭanga koh haw nghal vat an tum ta nghal a.

Buaina thuah hnih.
Thla khat leh a chanve vel chu a liam ta tih-ah chuan Peka pawh chu a nungchang a zawiawi ṭan ta viau mai a. Mahse, a nu leh pate rilru a damtheih ngang loh avang chuan a nu leh pate thupek angin Mizoram a haw chho ta a. Chutianga rilru hrehawmna nasa tak nen Peka lo haw chu Pu Rova te nupa chuan tunhmaa an lawm ṭhin dan ang lo takin hlim lo leh ngui bur chung hian an lo hmuak hi a ni ber mai. Peka pawh chuan inkiltawih leh rilru nuam lo tih hriat tak chung chuan an in chhung chu a han lut ve a. An chhungkuain an han ṭhukhawm ta a, thil pawimawh leh ṭul hrang hrangte sawia khunkhan taka an titi-ho lai tak mai chuan an kawngkhar chu pawnlam aṭangin tuin emaw a rawn kik ri dat dat a.

"Lo lut rawh"..... (Pa pahnih an lo lut a.)
"Pu Lalrova te in a ni em?".
"Ni e, eng thil nge ni ta, khawi aṭangin nge in lo kal a?" tia Pu Rovan a han zawh hnu chuan pa pahnih lo lutte chu thutthleng seiah chuan muang changin an han ṭhu fel te te a, pa pakhat kum lama upa zawk ni tura lang zawk chuan muang ban charh hian, "A..... hei, kan nau Lalnunmawii'n in fapa Peka lakah hian nau a pai tlat mai a ni awm a, anni pahnih hi Kolkota lamah College khatah an lut dun a, tun dinhmun hi an lo thleng ta hial a ni awm e, a nu leh paten min rawn tir a, chu thu rawn hrilh tur che u chuan kan lo kal a ni ber mai." a han ti ban charh a. A han sawi zo chiah chu Peka pawh a meng phawk hru mai a, a nu Pi Pari mit aṭang chuan mittui dan sen rual loh khawpa tam hi a luangchhuak nghal a, "Ava pawi leh zel em!!" ti pahin a ṭap zui vawng vawng mai a. Chu veleh Pu Rova chuan, "Ka pu, engpawhnise, in zahawm viau nain, min hrethiam ula, khawngaih takin minlo chhuahsan rih phawt mai teh u; hei, chhungkua kan lo inkawm lai tak a ni a. Hun remchang hmasa berah kan la sawiho leh zawk dawn nia aw...." a han ti a. Chumite pahnih pawh chuan an harsatna tawh mek chu an hrethiam ve viau niawm tak a ni, rang takin an tho a, an chhuahsan nghal vat a. Pu Rova chuan an kawt lai thlengin a va thlah zui a.

Pawn atanga Pu Rova lo lut leh chuan thinrim engphiar hmelpu tak chung chuan, "Lalpekhlu, min tizak zozai lutuk, engti fakau hian nge heti em ema nasaa i khawsak theih. I nu leh pa hian thu ṭha kan hrilh lo che em ni? Min va tibeidawng nasa em em ve mawle," tih pah chuan a fapa hmaiah chuan a han beng ṭhuai mai a. Chu veleh Peka thinrim letling chuan a thutna aṭanga tho hluai pahin, "Tun dinhmuna ka awmdan laka fihlim tur hian vawikhat mah hi min zilh reng reng lo e aw," tiin, a pa hmaia en pah chuan awka vin zet chung chuan ava chhuahchhal a, rang zetin an in aṭang chuan a tlanchhuak ta vat mai a.

Pu Rova thinrim laklawh chuan, "Kal bo daih rawh, khanglang mai mai a che a...." a han ti zui tuarh mai a. Pi Pari chu a ṭhutna hmunah a mittui hru mawlh mawlh chungin, a ngaihna hrelo hmelpu tak leh lungngai beidawng tih hriat tak mai hian a ṭhu ngui bur mai a. Rei fe chu an nupa chuan an melh ngai melh rengin an ṭhu ngawi duk mai a ni. Chutianga beidawng hmelpu taka rei fe an awm hnuah chuan Pi Pari chuan, "U Ro, Bawiha thusawi kha ka ngaihtuah zui a, a tetlai aṭanga tun thleng hian khawvel sual leh thil ṭhalo laka fihlim dan tur thu ṭha reng reng kan hrilh ngai awm hi ka hre miah lo mai a, hrehawm ka va ti em! Bawiha chu engtin tak awm zui ang maw; tunah lah chuan khua a thim ruai chu a ni ta mai si a." a han ti chuai raih mai a. Pu Rova ve thung chu a la thinrim vung hle tih a hriat a, a melh ngai melh reng chungin a khur hlawk hlawk hlawk mai a ni.

Beiseina thar
Zan dar 9 velah chuan kawng kual zau lai takah Street Light eng tak mai hnuaiah hian mipa tleirawl pakhat ngui bura lo awm, beidawng hmelpu taka thirban nghenga lo ṭhu reng chu kawngpuia kal mi tam tak chuan ngaihsak vak hlei lo hian an en liam a, an kalsan leh mai zel a. Darkar khat vel zet a liam hnu chuan Kohhran ṭhalai hruaitu pahnih Zuala leh Beiseia chu Sreet light eng lam pan chuan muang deuh tak hian an kal delh delh a. Kohhran ṭhalaite hmalakna hrang hrang sawiin, ṭhalai member ruihhloin a tihbuaite chhawmdawl dan turte an sawi kai a, an titi tui dun kher mai. Chutia an kal zel takah chuan Street light awmna zawn chu an va thleng phei ve ta a; tlangval pakhat hnuailam ena indawmkun reng an han hmu chu an pahnih chuan an ding chawt a. Chu veleh Zuala chuan, "Eheee, hei chu ka hmelhriat hnu a va ang ve mawle, ka han enchiang deuh lawk teh ang" tih pah chuan a va bih hnai deuh a. Beiseia pawh chuan, "Nang hi, kan Kohhran hruaitu Pu Rova fapa kha i ni em? a han ti a. Muang fahrana rawn hawichhuakin ban deuh chap hian ani chuan, "Ni e, Peka kha ka nia, Pu Lalrova fapa kha, ka hre lutuk che u lawm," tiin a han chhang zui a..

Chu veleh Zuala chuan, "Kolkota-ah khan lehkha kha i zu zir khan ka hre si a, engtiziaa hetah hian awm daih nge maw i nih chu le"mak tih hmel deuh hian a han ti zui vat a. Chutia khawhar leh mal ngawih ngawih nia a inhriat laia lo be lumlam peihtu a han hmuh chuan Peka thaw ipik zual pawh chu reh deuh ṭanin, tlemin a hmel pawh a zangkhai ṭan ta deuh a, a nun nguai tak tihharh tum tih hriat tak chuan a ṭhuthmun chu a han rem fel ṭha tete a, a khat tawkin thawpui a han la leh hluai ṭhin. Amah hmangaih riautu nia a hriat deuh tlat avang chuan Peka chuan a nelru nghal angreng riau a. A nunkawng hman chhoh dan hrang hrangte chu zep ṭhen nei miah lovin a hrilh fai ta vek nghal a ni.

Beiseia chuan a lu bu nghut nghut pah chuan, "Ṭhianpa, Lal Isuan a hmangaih che a ni. Amah pantute hnar ngai lotu a ni a. Amah ngei pawh MISUALTE ṬHIAN tih a ni hial a. Zaninah hian nunkawng thar zawh turin i tan beiseina kawng a eng a ni. Kan chunga Street light eng khi zanin atan chuan êng pawimawh tak a ni a. Mahse, naktuk khua a var hunah chuan khi light êng khi chu eng mah lo mai a ni dawn a ni. Zing khawvar eng anga beiseina chu zaninah hian i thinlungah rawn eng thar leh se ka ti hle mai. Keini pahnih pawh hi misual kan ni, mahse kan pathum hian Isuan min hmangaih a ni." mittui hru fap fap chung chuan a han ti zui veleh a.

Zuala pawh chuan rawn chhunzawm veleh nghalin, "Ni e, a dik a ni. Misual pathum awmkhawm kan nih hi, mahse Isua hmangaihte kan ni. Sualin amah bosan mah ila, amah pan turin englai pawhin min sawm reng a ni. He khawvel hian hlimna tluantling min pe emaw kan ti a, mahse, a tawpah lungngaihna hlir min thlen zawk a lo ni. Lal Isua zui man erawh a tirah hrehawmna emaw kan ti a, mahse a tawpah lawmna sawi sen loh kan chan theihna tur a lo ni. Beiseina nen zaninah hian Lal Isua zarah i chawrno thar leh dawn a ni, a tan ila parvul ngei ang tih ka ring tlat a ni." Peka dar vuan pah chuan ava ti veleh a. Peka chu hnuailam bihin a kun ngul a, a mittui hru malh malh chungin hnuk ulh ṭeuh chung chuan thei leh thei lo hian, "Zanin zet chu zan dang a ang ta lo, beidawnna ruam aṭangin beiseina engmawi tak ka hmu ta. Mahse, khawvel ka chên kholo nasa tawh si a, Lal Isua mai ni lo, ka nu leh pate pawhin min ngaidam thei dawn em ni?" a rawn ti chuai raih mai a.

Zuala leh Beiseia chuan a koki-a vuan pah chuan Lal Isua hmangaihna thute, beidawngte tana beiseina thar neih lehna a nihzia an hrilh nasa mai a, an inkawm hlim viau ta mai. Zanlai dar 12 a rik dawn meuh chuan Peka pawh chu an in lama hruai phei tumin ṭan an han la a; Peka chuan a hreh hle nain beiseina thar hmu zual tur chuan a chhungkuaa luh leh vat chu a ṭul hmasa a ni tih a hre nghal vat a. Zuala leh Beiseia chuan Peka chu kuah pahin an in lam pan chuan an pheipui ta a.

An in an va thlen phei meuh chuan kawngka bulah an han ding leh ren rawn a, in chhunglama Peka nu ṭawngtai rite chu chiang takin pawn aṭang chuan an lo ngaithla ve ngawt mai a. "Lalpa, kan fapa hi nangma duhzawng tithei tura tura kan lo buatsaih ṭhat tawk lohnaah min ngaidam ang che. Zanin hian engtinnge a khawsak dawn kan hre lo a. Mahse, engkim tithei i ni a, nangin min venhimsakin, kan inchhung ngeiah hian min hruai luhsak leh hram ang che. Nangin, beiseina eng thar pein min enkawlsak ang chu, Isua hmingin ka dil a che. Amen...." tia Pi Pari a ṭawngtai zawh veleh kawngka kik ri a hre zui a. Pi Pari chuan rang taka hawnsakin, kawngka a hawn rual rual chuan Peka chuan ṭap pur chungin anu chu ava kuah nghal chawt a, Pi Pari chu a mittui la hul lo nen, chutiang thil a han tawng thut mai bawk si nen chuan a ngaihna a hre lo lek lek zawk a, Peka kuah let ve lah chuan lungchhe zetin an ṭap zui dun ta a.

"Ka nu, Isuan min ngaidam a ni..
Ka pa nen min ngaidam ve ang che u...".

"Bawihte, i pa nen kan pahnih hian min ngaidam zawk ang che aw..... Lalpa, ka ṭawngtaina min chhansak avangin ka va lawm em!".

Kawngka bulah chuan Zuala leh Beiseia te chuan an mittui an lo hru ve nuap nuap a, hnuailam melhin an ngawi reng mai a. Pu Rova pawh chu an nu hnunga lo dingin, ṭap chungin a fapa Peka lu chu a han chulsak a, "Mama, kan va lawm em! I nu nen hian i ngaihdam kan ngai a ni e. Lal Isua duhzawnga ke pen dan tur reng reng hi kan lo hrilh ngai loh che avangin min ngaidam dawn nia," a han ti zui veleh a.

Chu veleh Pu Rova chuan, "Zuala, Beisei, thil thlen dan hi min han hrilh teh u. Lo kal teh u, nangni kan Kohhran ṭhalai hruaitute hi in va han fakawm tak e aw." tih pah chuan a han hui lut a. Zuala leh Beiseia te leh Pu Rova te chhungkua chu inkawmhoin hun ṭha tak an hmang a. Zuala chuan Peka kawngsira an hmuh aṭanga an ina an hruai haw dante kim takin a han sawi ve bawk a. Pathian thutea inkawmho zuiin, an hlim ta hle mai a. Pathian hnenah lawmthu sawi ṭawngtaina hun an hmang leh a, an ṭawngtai zawh meuh chuan khua a lo var ta viau mai. Beiseia chuan Peka dara va kuah pahin, "Peka, hei khua a var ta e. Nizana Street light eng kha chuan tunah chuan awmzia a nei ta lo. Nizan Street light eng kha chu a bul hnaia awmte tan chauh a ni a, mi zawng zawng tana eng a ni lo a ni. Tuna khawvar lo eng hi chu mihringte zawng zawng tan a ni. Hetiang chiah hian Kan Lal Isua ṭhatna leh ngaihdamna pawh hi mi zawng zawng tan a ni. Beiseina thar neia he khawvela eng tak tak chhuah turin Lalpan malsawm zel che rawh se." tih pahin a han chibai zui a. Thingpuite an han in zo a, lawmthusawina chibai an inbuk vek zawh hnu chuan Zuala leh Beiseia chuan Pu Rova te in chu an chhuahsan ta a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)