LALRINAWMI T Lalrin Mawii (Competition)

Ngaia
Site Admin
Posts: 25813
Joined: April 30th, 2016, 4:07 pm

LALRINAWMI T Lalrin Mawii (Competition)

Unread post by Ngaia » August 12th, 2018, 6:16 pm

LALRINAWMI.
(Competition)

Kum 1988 September Ni 5 chu tuk dang ang bawk in alo herchhuak ve leh ta mai a. Hlim taka an Sikul chu pan in Kawlthei huan Khatla-ah chuan a phei zel a, Sikulpui Kawn chhuah chhohna tur step thui zet mai, hnuailama awm te tana duh bak bak hmuh mai awl khawp a chho leh thui ah chuan a kal nghauh nghauh a; a hnuai lamah midang lo kal an awm leh awm loh en pah zelin a Form pawnfen khup khuh pha meuhlo chu a hup chho ṭat ṭat a.

Class room chhung chu a ṭhiannu Nghaki , Venghnuai ami nen an thleng rual chiah a, a hnu rei lo te-ah Bethlehem venga a ṭhian Rami leh Sangtea te ho an lo thleng ve chawpchilh nghal a: an hlim dar dar hle mai.

Chumi ni chu Zirtawp a ni a, class ṭan a hun chuan an class Master, Sir.Speedy chu lo lutin thu tawite a rawn sawi a; Selection Exam an neih lai mek a ni bawk a. An Sir chuan, " Vawiin hi Zirtawp a ni a, Subject hnih chauh exam tur in nei tawh a, Naktuk Rinni chawlh a, Thawhṭan a exam zawh nge in duh a; Rinni a Mathematics 1 chu exam law law a, Thawhṭan kar aṭanga chawlh hman law law, in duh zawk thlang rawh ule ?" a rawn ti a.

Chutah, anni ṭhian ho chuan inlungrual niawm fahran hian, " Naktuk-a exam tlang," an lo ti rual dial a. An section hi naupang 56 vel an ni a, midang ho, a tam zawk pawhin chawl lova Rinni exam tlang chu an lo duh ve hlawm bawk a. Chumi ni chuan Economics an exam a, nuam a tiin a chhang ṭha thawkhat hle hian a in hre nghe nghe a, a hnuhnung ber pawlah zo vin an Sir chuan an kal darh zawh hma in a han ko khawm leh lailawk a.

Board-ah chuan rawn ding chhuak in Envelope uk, a sei chi hi a rawn lek lang va va mai a.

" Lalrinawmi,
Cl- 10. Roll no. 52." tiin.

Inthlahrung tak chunga a ding chhuak ṭaih ṭaih chu lo nuih suk pah hian, " Hei, nang tê hi, nungchang ṭhat hmel tak hian i ngawi reng a; letter lah hi i dawng ngun viau mai a, i ngaihtuahawm reuh mang e, a rawn thawntu lah hi kutziak ngai char char niin, mipa kutziak mawi tak mai leh lehkhathiam tak kut hnu ngei a nih hi," tiin a'n fak belh duah pek a.

Zak chung chunga a va la tur chu, " A thawntu che i sawi thei," tiin a la ti fiam zui a. Chumi tuk Rinni chu an exam zawh ni tur a nih tawh avangin haw thuai thuaia mathematics 1 chu lo en lâwk leh thuak thuak a duh hle mai. In a thleng chu tumah lo awm lo vin a lo reh ṭhiap a, bed-room ah lut tlangin a necktie a pawt thawl a. A Kamis phelh lovin a form pawnfen erawh a phelh thung a, a lehkha dawn kha hrechhuak thut in a chhiar leh ta zawk a. Chu lehkha nghakhlel leh hmuh chak ve ngawih ngawiha a lo ṭhlir ṭhinah chuan hetia'ng hian a lo in ziak a:

To,
Duhtak,
Ka haw chho ta kha maw, rilru-ah thildang reng reng leng lo vin ka ngaihtuahna i luah khat vek a, i bula awm kha ka thlahlel in ka kham thei lo a ni ber mai. Mahse, ka hna leh i zirna vang khan awm hran kan la ngai si.
Ih maw....ka sawi hreh ngawih ngawih, sawi loh theih si loh thu avang hian ka va'n hreawm teh reng em !!
Khatia nang nen hlim leh thlamuang taka duh tin sam a hmalam hun kan thlir dun chhung khan maw; Ka nu leh pa (ka awmna nu leh pa) te'n palai tiring, ka nupui tur an lo be fel diam mai a. An mi biak chu i awm laia min rawn zarbuai ve fo ṭhin tu, Lianchhungi kha niin, ka chhungte hnenah,' Kan laklawh tawh,' a lo ti a ni awm e.

Nang chu mi puitling leh rilru zau i ni a, lo hrethiam hram hram mai rawh aw, ka ngen a che; thil hi kan tum leh duh dan ang hian ava han kal lo nasa thei tak em! Ka lei damchhung hian ka nghilh ngai lo vang che.
I ta fo.
C-a
tih hi a lo in ziak a.

A tir chuan a fiamthu emaw tiin a chhiar nawn leh a, mahse, a ziak chu alo la pangngai reng si. Chutah in ven hman hauh loh hian chhuat ah chuan engmah hre lo vin a tlu ta thlawrh a, a bek veilam vaw zawng hian a lo tlu a ni awm e.

A hriat leh hmasak ber chu, a nau (a u fanu Kimtei-i'n) in ṭap ṭeuh chung a a lo ko mawlh mawlh chu a ni .
Kimte-i sawi leh dan chuan, “ Ka sikul bang in ka thleng chu a lo reh deuh ṭhiap a, ka nu leh pa chu choka-ah awmin tlailam eirawng an lo bawl mek a, ka Nu hnenah chuan, " Ka nu, 'Pros hi a lo la haw lo em ni? a va reh ve?' tiin ka zawt a," (Pros tih hi an in koh dan bik. Tm)

" Ka nu chuan, ' Haw pawh ka hre hleinem, a ni hi chu a hlim thei a, a rawn zai lut ve ziah si a, vawiin chu a reh tlat mai,' tiin min lo chhang a……………….

Chutah,
Bed-room a ka va lut chuh ! Engmah hre lo leh mittui luang huh nuai mai hian Pros-ichu chhuat ah alo mu reng mai a! Ka nu, ka pa, engatinge Pros hi in ngaihsak loh? Lo tlan r'u, awi ka duh thei lo! Pros, harh teh, harh teh, tiin ka sawi nawk nawk a. Rei fe hnu ah chuan chianglo ruai a rawn meng chhuakin a rawn harh ve ta hram a……….

"A thu rawn sawi hmasak ber chu hriat tumin ka zu kun hniam a, a hmui chu rawn phun ve ngei siin engmah reng a rawn ri chhuak ta si lo. Mangang takin ka nu leh pa chu ka ko tuar(h) tuar(h) a, achang leh in ngaihsak lo ti hial te'n ka ankhum thul.

Engtin tin emaw ni kan han sawi harh ve ngei a, mahse, kan rilru natna bul a lo inṭan dawn chauh tih lah kan hre hauh si lo.
Pros (Lalrinawmi/Awmtei) chu kan han be teh ṭhin a, engtiang pawhin bia ila, chhanna kan dawn chu harsa ti tak chunga a lu min thin khum bakah, ri chhuak thei si lova a hmui phun sep sep a 'Aih' tihna ni a kan hriat chu a ni mai si, englai pawhin a biangah mitui a hul lo va, a muhil ngai lo va, harhfim hmel lah a pu chuang si lo." tiin a mangan zia alo sawi chhuak a ni.

Chutia engemaw chen mumal nei lo zeta a awm hnu chuan ni khat chu, a ril ṭam zia leh a chauh zia chu a hre chhuak ve ta hlawl mai a; Eng chen nge chutianga a awma nikhua a hriat loh tih erawh chu a hre mai thei ta lo.

Han ṭawng chhuah ve mai tumin a han âng zuau va, mahse, awrawl reng reng a lo nei lo va, a bula awm ho a chhung te'n lainat tak a an thlir chung a, a mamawh an zawhna ṭawng ri pawh chu a lo hre ta reng reng lo mai a!!.

Khatia rilru na lutuk a engmah dâwn thei lo va a tluk khan a aw leh beng ri hriatna a lo sawh chhe deuh a nih an ring ta ber a, kut zai zir nen engtin tin emaw chuan an han inbe ve thei ta nawk nawk a. Mahse, englai pawh a mittui tla chung leh rilru natna na tak pai reng chung chuan engkim kha atan alo va han har tak em !! Nun zel duh na reng reng kha a nei lo va hmabak beisei tur hi engmah hi awm tawh lo ni hian a hre tawp mai a ni.

Awle, khitiang thil alo thlen chhan leh a lo thlen hma lamah khan han kir leh ta ila…

Aizawlah zirna chhunzawm tura a kal hma khan, chhungkaw harsa ve tak na na na chu khaw tualah hna te thawkin sikul pawh a chawl renrawn tawh kha a ni a, khami chhung khan tlem a zawng chu nulat hun te lo hmang ve in thingtlang khua tih takah nula puitling chei hian an chei hman viau mai a, Khawtlang thiltih leh Kohhran ah pawh a inhmang ve nasa-in a tello chuan Kohhran leh Khawtlang huap thiltih hi chu a kim lo emaw tih mai tur hian a inhmang hman ve a ni.

Khami Sikul chawlh kum 2 chhung khan hmel duh zawng te pawh lo nei ve in, an khua a (kaitawi deuh mai ang aw) rawn awm thar, an Pro Pastor nen chuan an inzui ve ral ral ṭhin a, chuti chen lo in zui ve tawh chu Aizawl-a lehkha zir tura a chhuk leh hma khan rem thu sawiin, December thla Matric exam zawh, Krismas thlen hma si chu an tin zawn ve ta a, a ni tak erawh chu Rinawmi exam zawh ni tur a la chian loh avangin an bituk lawk ta lo mai chauh a ni.
Ni khat chu:
In ah a awm a, Puanbu vawngin ṭhahnemngai deuh mai hian puan a lo tah a, chutih lai chuan an Pastor lo kalin, " Kan tlangval a dam ṭha thei lo tlat mai, hei Bawng chaw satin ka kal chhuak lawk dawn a, chhunah i hman hram chuan lo va tlawh ve la, Sacramen khuhna puan te leh ama thawmhnaw bal pawh suk a ngai a, bakah a lam reng che bawk si a; Vawikhat mah i rawn kan duh si lo va, lo va kal ngei tum teh," tiin a rawn hrilh a. A nu chuan a puan tah lai hma a rawn thlaksak a.

" Ka nu, kan Pastor thu rawn sawi kha i lo hria em? Engtinnge ka tih dawn, ka Puanbu lah hi vawiin a zawh ka duh viau mai si a," tiin a han râwn a.

A nu chuan, "Ni e, Mami, ṭhahnem chu ngai viau mah la, chutia ṭhiante dam lo vin rawn sawm ve ta che chu i va kan lawk dawn em niang; insuk ngai vel i zawh hunah i rawn chhunzawm leh vat zawk dawn nia; va kal lawk mai ta che." tiin a puanbu chu a zial sak nghal a.

Chutia ava phei ta chu a damlo pawh chu pawnah lo ding chhuak vein a lo cher ve hman khawp mai a, pangchang rilru ve tak hian, " I lo va thleng har ve, ka nghak reng tawh che a, khangho kha insuk ngai chu a nih kha; engvangnge min kan duh miah loh, i insawifiah hmasak phawt a ngai ang." a lo ti nghal mawlh mawlh a.

Rinawmi (Awmtei kan ti zel mai tawh ang,) chuan, " Â, teh ngawt chuan, ka buai ve ṭhin em a, bakah nula kantute chu i chham loh khawp kha, keia lo kal ve a tulna reng ka lo hre hleinem." a'n ti ve deuh ngat a. A ei chak ber a rin Khawmhma den la thur ṭha tak mai hi phawrhin a han pe nghal a, "Zo Artui lam hi chu i nghei lo viau niin ka lo hria a, unau lungrual lo zet kha an lo inkal chhawk ngun an ti sia." a han ti zui zauh va.

Insuk turte chu su zui mawlh mawlh pah chuan titi ve luam a, C-a chuan, " Engahnge maw Matric zu zir leh kher chu i duh tlat a, eng nge under Matric nih chu i han hreh em em chhan chu ni le? Pathian zarah dam tein awm ila, keiin rawngbawl hna ka thawk dawn tho va, inchhung lam fel taka i lo enkawl a, min lo dawm chhuah zel nan chuan tuna i mizia leh nunchang thiamna hi ka duh tawk em em a sin, kal tawh lo mah la pawi ka ti lo mai ni lo vin, i kal leh tur hi ka huphurh tak zet a, a rang lamin thu kan dahsa te kha tih puitlin dan ngaihtuahin bawhzui rang zawk ila, a ṭha zawk ang, te ka lo ti hial tawh a sin."a ti a.
Awmtei chuan, "Ni e, Zirna hi ka rualawh chu thuhran nise, nakinah kan dam chuan Mizoram kher lo ah pawh i rawngbawl hna avang hian awmin vai leh hnamdang zingah pawh khawsak kan la ngai mai thei a, chutih hunah chuan, midang karah i tan nupui zahpuiawm tak nih ka duh lo va, nangmah leh i rawngbawlna thlawp zo zel tura i kianga ka din zel theih zawk nana zir leh duh ka ni a sin; in hmu pha lo va awm chu a hreawm dawn a lawm, mahse hei tunah kum 18 chauh ka la ni a, chumi kum khat lek han zir belh a, mi puitling pangngai tak a han chhuah chhoh ve kha a ṭha in, dam chuan kum khat te chu a ral ve thuai mai dawn a lawm, nangmah vang pawh hian ṭhahnem ngai leh tihtak zet a zir chhuah ka tum ngei ang, duh tak. Hrethiam la, min lo nghak hram hram rawh aw; kan pahnih tana ṭha zawk tur ni a ka hriat vang a nia." tiin a sawi ve keuh keuh a.

" A dik a lawm, i hming hi i pu zovin nang hi chu ka tluk ngai lo che a nih hi, i kum phu lo hian i puitling reuh a, amaherawh chu, Aizawl-ah mihring tam zawk leh awm awl hmelṭha ho zingah i zuk awm dawn a ni a, ka chân mai ang che tih ka hlau ve em a ni e; thlamuang takin kal la, i zirna senso zawng zawng pawh keiman ka tum vek dawn nia, keimah avanga zir leh tur i ni si a," a lo ti ve malh malh a.

Awmtei erawh chuan, " Mihring hmalam hun tur hriat a ni lo va, ka zirna senso nanga lo tum chu ka chhungte ngaihdan a ni hauhin ka ring lo va, kan la sawi ṭha leh dawn nia; pumkhat kan la nih em loh hi," tiin a nui pah sen sen a.

Chutia an titi luam chung chuan insuk pawh zo ve chiahin an in zar nghal malh malh a.

Chutah C-a chuan, " Ka lo sawi theihnghilh daih a, ka khuma bed-sheet pawh a balin, a faia thlak ka duh a, insu turin tui han khawivak ka la ngam si lo, han tlawmngai tlang law law la, ka bed-sheet chu i va thlak lawk ang hmiang," a rawn ti hnuhawh leh a.

A ni (Awmtei) hmanhmawh tawh si chuan han hnial duh viau mahse, hnial buai lo leh amah (C-a) rawngbawltu a lo ni ve bawk nen, hlauhna em em pawh nei lem lo chuan, " Nih leh va ti fel vat vat ila, haw phei thuai ka ngai ania, ka puanbu zawh hman ka beisei deuh va, " ti chung chuan a room-ah chuan an lut phei ta nghal a.

Tihdan tur te lo hrilh zung zungin puan bal chu la chhuakin han chhuah san leh mai hi a tum a, mahse, lo khapbet vatin, " Han phah fel law law la, ka tan Dunlop tuam a han kun vel pawh ka lu hai nen ka zuam chiah lo a, han zo fel law law teh," tih pah chuan Bed-Sheet fai chu a rawn pe nghal a.

Khum sir hnailam khuh zo va bilh fel zelin a tlang lehlam bang dep lam bilh fel tura a kun phei leh chiah chuh, a rinloh leh beisei loh lutuk thil a lo thleng ta!! Mipa tha chak zetin rawn bawhthuah nghalin khumah chuan a bawk nghal rawp a, hneh taka hrawm bet chungin thlem leh vau titih nen, a ka a hup beh sak tlat bakah auchhuak thei pawh lo ni ta se, a sawi ang chuan ava pantu zawk chu a nih miau avangin a hming chhe hle zawk dawn tih pawh a hmu tlang ve tho va. Mahse, tha tawp tak meuha beilet ve in au chhuak lo mahse tlawm mai chu a tum lo ve tak zet a. Mipa tha na na na chu chak leh tam zawk anih avangin thawmchhuah ngamna rual loh vin a tlawm ta nge nge a. A duh leh chak ve reng vang pawh ni hauh lo va chutiang thil a tawng ta chu hreawm a tiin a rilru natzia chu sawi maia fiah chi rual a ni lo.

Thawklehkhatah Awmtei chu tho chhuak thutin a taksa na leh thisen chhuak lam pawh hrechang lovin a tlanchhuak thut a, kawmchar lam huanah tlanchhuakin a thih hma loh chu ramhnuaia tlan zelin tlan hlum ṭhak a tum ta a. Mahse, huan pal kil tawp a zuk thleng chu, a beisei hauh loh hian Hêl (thing chikhat, hling zum leh hriam tak tak ngah em em mai, Tm) kung lian tak mai hi an lo kit kham phei rûah mai a, han zuan kan chi ziazang ni hian a lang si lo; engpawh nise, kal chhuah ngei erawh a tum ruh em avangin zuan vak a a lehlamah chuan inbilh sual a a tlakhlum theih hlauh pawhin a dubthusam hlei hlei a nih avang chuan zuang tura a in tintuah lai tak chuan, a hnunglam aṭang chuan ban tha chak zet mai hian lo man bet chawtin an hnung tluk dun ṭhuai mai a. A han enchiang chu, khawvela a hmelma lian ber lo ni thar ta, a huat leh a ten tak ngawih ngawih mai, reilo te a a pasal tur ni bawk si chu lo niin, " Nang mi tenawm khan min la dai ngam a ni maw? Min thlah rang rawh. Ka nunna hian hlutna pakhat mah a nei tawh lo. Min thlah rawh." tiin a lo vin tuar tuar a.

Chutah chhuak em em hian a ṭap ta hliam hliam a, rilru na leh tlawm theihtawpa tlawm nia a inhriatna chu engmahin han thawidam mai chi a ni mawlh lo a; a taksa na leh thisen chhuak nin nian te chu a hrechang lo reng reng a ni.

C-a chuan a thiam tawka hnemin thil awmzia leh thil thleng theite hrilhfiah mawlh mawlh chung leh eng thil pawh lo thleng se a phatsan ngai loh tur zia chu a hrilh mawlh mawlh a, chu mai ni lovin, Nula thianghlim dik tak a lo la nih thu leh, a rilru rawn hmul thut a insum zawh loh avang chuan thupha a chawi mawlh mawlh a. Ngaihnep a hneh a a ngaihsan phah sawt thu leh, an inneih hma an awmhran chhung atan pawh ti kha chuan rilru dam leh muang taka a awm theih tur thu hrilhin, 'Inti pachang hram hram la, intuai faiin in chul mam deuh la, in In lamah kan phei dawn nia, i nu'n alo ngaihtuah lutuk palh ang che,' tiin amah pawh chuan a sam te chu a chul mam sak thuak thuak a.

Engpawh nise, tui baw hnu a ruh leh theih si loh va, Awmtei pawh chuan khawdang hawi thei niin a inhre bik bawk lo va, an in lamah chuan an inzui phei ta hnak hnak a, In an luh hma deuh si chuan C-a chuan A nu hriat phak ngei tur leh Awmtei huat deuh tur ngei hian a han chhaih zauh pek a, in umkawi zawr zawr leh thinrim hmaisen ṭeuh ni awm tak chuan an in umlut ta a.
A nu pawh chuan, " Nangni pahnih inkawm lah hi, in va inti ṭap emaw ni? Mami, ṭap hlim ang mai lah ni che," a lo ti fiam zui a. Ani lah chuan, "Khi pa khian mi fiam chintawk a hre lo lutuk, Nu, han zilh deuh teh," tih pah chuan a han melh chho nghek a. C-a nuihza insum bawk si chuan, " Ka pi, ka thiam loh a ni, ka ti za lutukin abiangah ka piaisak chiam mai a, a ni lah lo khal ṭha ve siin ka duh aia na in ka fiam a, a ṭap ta alawm maw le," a lo ti ve zaih a. Engtin leh engtia han tih vak ngaihna awm tawh chuang hek lo le, a taksa na lah tih lan ngam ni si lo chu a puanbu chu vawngin a khawng tau ta sawk sawk ringawt a; a puanbu tlang pui thlunna hrui chu a khawng pelh ta rawp a.

Chutin hun a kal ve zel a, Awmtei Aizawl chhuk hun pawh a lo hnai ve ta hle mai; a mipa chuan a ngaihsakin a ngaihven thiam bawk a. Engmah boruak duhawm lo thleng tawh lo vin hun an hmang chho ve ta zel a, a kar leh Ṭhawhṭan ah chuan ani pawh chu a chhukthla ve ta a.

April thla lai a nih tawh avangin an lo zirsan ve nual tawh a, mahse, ṭhiante han nei ve in a ṭul ang ang a buaipui zung zung a, hnufum bik nih erawh a tum hauh lo. Awmtei, Aizawla a chhuk hnu thla 1 velah chuan an khaw Bus driver chu an in ah lo kal-in lehkha hi a rawn pe a, a in thleh dan aṭang ringawt pawhin a lo nghahhlelh ruk em em a ni tih chu a hrethiam mai a. Pindanah lutin a han chhiar nghal a:

To,
Duhtak,
I dam zel tih ka lo hria a, ka lawm hle mai, i chhuk hnu khan rawn zin ve mai ka tum reng a, mahse, bial fan leh Kohhran ṭul neuh neuh a awm ve reng avangin ka lo chhuk ve mai thei ta lo a ni. Dam ila, hun remchang ka neih hmasak berah ka lo chhuk dawn nia; ka lehkha-in i kut a dai bik tur erawh ka thik a ni.
Awle, ka sawi duh tak chu maw: Nang chu nula thianghlim dik tak niin ka ngaihtuah hah ngai lo vin i invawng thei ngei ang tih ka ring a,keimah ve thung hi ka rawn inpuang ang e aw.
Nang chauh ni lo hi nula tam tak ka lo khawih chhe tawhin, ka dinhmun mil lo tak hian a rukin ka khawsa nasa em em a, ṭhenkhat nula thianghlim anga leng, thianghlim tawh si lo pawh an awm ṭeuh tih ka hriat phah a ni. Nang erawh chu keimah ngeiin ka hmuh leh tawnhriat ang khan i duhawmin i thianghlim a, chumi avang tak chuan ka lo awmdan tawh zawng zawng te kha i hnena sawi lo thei lo in min siam ta a ni; hre lo leh min zawt lo vin awm mahla i duhawmna leh nun thianghlim tak khan inpuang lo thei lo vin min nawr ta zawk a nih hi!.

Ih maw, ka tunhma nun bawlhhlawh leh rapthlak tak te hi hreawm tiin ka lo inchhir ve ṭhin a, mahse, nang ka han tawn meuh chinah che chuan e, inchhir satliah lo vin, hling zum tak, ka phawichhuah mai theih si loh ang mai hian a kherin min kher ta sup sup mai a ni. Heti ka ni chung hian min la ngaidam theiin min la pawm thei fo angem le? Min pawm thei ta lo anih pawhin dem thei che ka ni lo va, min lo ngaidam thei hlauh a nih leh chu aia lawmna sang zawk leh duh chu ka nei chuang lo ang. Rinawm taka awmdun in kan hma hun hlim taka thlir dun zel aia thlakhlelh ka nei lo a nia, ka hnarna che a ni hauh lo tih erawh min lo hriat tel sak hram dawn nia. I mi chhanna nghakhlel leh huphurh ru tak si-in ka lo nghak reng a che.

I tan,
C.
tih hi a lo inziak a.

Awmte-in chu lehkhathawn a han chhiar chu mak hi a ti em em mai a, thlah a ṭhen vang vang mai a duh hial a, mahse, kawng lehlam a han ngaihtuah erawh chuan amah ngei pawh chu a lo intalawk ve tawh si. A rilru chu a na tharin hreawm a ti hle mai a, rilru fim taka a han ngaihtuah nawn leh chuan, " Tui baw hnu a ruh theih tawh lo va, thil kal liam tawh chu liam mai se, eng hun pawh lo thleng dawn se ka zirna hi chu ṭha takin ka hlenchhuak phawt tur a ni, min phatsan ta pawh a ni lo va, keia kar ngaihdam min dil zawk a ni a, ka ngaidam ngei tur a ni. Tupawh a ni ni lo hi pasalah lo nei pawh ni ila, ka neih hun hunah ka thianghlim lo tih a hre tho tho dawn a, chuvangin amahin min phatsan a nih loh chuan khawdang hawi thei ka ni bik lo ve," ti rilru neuh neuh chung chuan a rilru a siam fel ve ta a.

Chanchin zualpui leh angaihdan te han hrilh ve in, a ngaihdam vek thu leh amaha a innghah tlat thu chu a han hrilh ve ta a.

Hun te lo kal ve zelin a zirna lam pawh a tluang viau a, Term exam leh subject test chi hrang hrangah pawh a ti ṭha ber pawl a ni chho ve ta zak zak a, an class master leh zirtirtute, naupang dang ho hriat pawh kar lo-ah a hlawh chho ta thuai reng a ni.

A khat tawkin changtu pa'n a rawn kan ve reng bawk a, an sikulah te tlawhin Kohhran sikul te a lo ni veleh zel bawk nen, zirna hautak loh ṭum chuan an Head-master phalna la thlapin office dangah hlawh la tur pawhin an inzui chhuak veleh ral ral ṭhin a.

Awmtei hi nula chhe lemlo tak niin sa ṭha lampang, ria chum-bat mai an tih ang hi ani a, Mizo nula ah chuan a vantlang pawl ni pha ve in feet 5:2 vel a sang a ni a, hang chhe lem lo tak niin, a ngaih la tawk lek hian a nuih zawng hian a biang dinglamah hian biangsum a lo khuar leh kelh ṭhin a. Ngun taka entu tan chuan a mitmu dum leh var inri-na lai taka khuavang chhinchhiahna lo dum va va pawh hmuhhmaih rual a ni lo a ni.

Anmahni khaw lamah pawh, Pastor bial khat mai ni lovin Tuipuiral huap hiala lar pha ve hat kha a ni reng a, sport lam leh heng Debate leh Extempore speech, Recitation with action tih vel hi a thei em em mai bawk a, a chhuah ve tawhnaah chuan lawmman la lo vin a awm duh ngai hlek lo a ni.

Nula rilru lian leh tumruh tak mai hi a ni reuh va, thu a tiam tawh phei chu ama tana ṭha vak lo pawh lo ni leh dawn mahse, hlen tum tlat mai mi a ni a, a thiltih ve tawh reng reng hi tih mai mai a duh ngai lo va, hlawhtlinna hmu khawp ngeia hlenchhuah tum tlat ṭhin mi a ni.

Awle, chutianga hun a hman chhoh ve zel lai chuan an ṭhenawm leh Kohhran lama theih tawk tawk a a inhman ve na lamah te hmelhriattu leh lo chik ru tu pawh a nei thuai reng a, mahse, a zirna leh mi pakhat tan a lo intiam tawhna bak chuan a rilru a kuai her zo ṭhin lo a ni zawk.

Tu dang leng dang dâwn miah lo leh rilru kalkhat taka amah beisei ve tute pawh hawihhawm taka a lo hnar zel theih lai chuan a ni, khita a hmasa lama kan sawi Sepṭember ni 5, 1988 chu a lo thlen chhoh tak ni.

Zawi zawiin nikhua a rawn hrechho ve tial tial a, a chhungte'n hmangaih leh duhsak taka enkawlin vawi tam damdawiina hruai pawh an tum ṭhin a, mahse, a chhanna chu a ngai bawk, " Aih," tih a lo la ni fan a.

Khatia an exam lai a theihloh san takah khan a awmna pa, a u Liana chu an sikulah lo va kalin, an zirtir tute hnenah a lo va sawisak thlap hi a lo ni a, (Awmtei hi hetihlai hian apa u fapa Liana te hnenah a awm ve mek a ni). Ama nu leh pa hrechang lo khawpin a u nupui Sangpuii hian a duatin a enhrang lo a, a hrin a rila rah te aimah hian a ngaihsak zawk ṭhin a, Awmtei lah a kut a themthiamin a taima a, zan lehkha zir chawlh lawk chang te hian a u Sangpuii puan tah lai chu lo tahpui thuai thuai in, eng hna mah hi thawhhreh a nei ngai hek lo.
Tuk khat chu, Tukṭhuan eikham fel erh awrh tur ah hian an kawngka chu rawn kik kauh kauhin, a u te chuan an lo chhawn a, rin loh leh beisei loh lutuk maiin Synod lam hruaitute an lo ni a, ṭhutna te inkawhhmuh a, an in lawm nual hnu chuan an inlengte chuan lehkha pakhat hi an rawn lek chhuak a, chu lehkha ah chuan tihian a lo inziak vâ mai a:

To,
Ka pu, Ka lehkha hmasa-ah khan he tlangval C-a hi rawn hekin a mah nena chesual tawh ang leh, tuna a rawngbawl hna pawh hi thawk zel tlak lo ang hial khan ka rawn ziak a. Mahse, kha kha thudik ni lo vin ka thikthu chhia leh amah chang dawn chuang lo va ka inhriat avanga rawn ti ka ni a, khawngaih takin kha ka lehkha hmasa kha ka rawn hnukdawk leh a, ka hnuhdawk lehna hi min lo pawmsak hram dawn nia, engmah hepa nen hian pelhe na kan nei lo va, mi thiang a ni tih ka rawn hriattir zawk che u a ni e.ka dilna hi min lo pawmsak ngei ka beisei e.

From,
Lalrinawmi,
Cl-X rollno 52
C/0 Lianhrima
Hermon, Lower Khatla.
tih a lo ni a, chuta address inziak aṭang chuan an rawn zawngchhuak hi a lo ni a.
"Hei hi he address neitu te in chu a ni em? Khawiah nge amah chu a awm le?"
"Aw ni e, keimahni ngei hi kan ni e, kan nau khawngaihthlak chu tunah pawh la harhchhuak chiang lo vin a la mu reng a, khatia'ng lehkha ziak leh han ti thei hmel pawh ava pu lo em aw ka pu," tiin Pu Liana te nupa chuan an lo chhang ve luam a. Awmtei mu chu va kaitho vin an rawn kuah chhuak a, " Hei hi a nih hi kan nau chu, khati khawpa nula saṭha leh tituai nalh kha tunah heti hi a lo ni ta mai a, a lainat awmin chaw ei tur takngial pawh hian a la rawn tho thei meuh lo a ni; hetiang thil hi a ti duh anih chuan keini hi min thlim hauh lo ang. A nu leh pa leh keini hriatpuina nen thlapa ngaihzawng nei a, inbe rem vek tawh an ni nge nghe a sin." tiin Awmtei thlavang chu an lo hauh pah ve mawlh mawlh a. Chutah Synod hruaitute chuan Awmtei chu ko hnaiin, " Hei hi ngun takin han en la, i kutziak a ni thei em? He lehkha vanga lo kal hi kan ni a, dawt tel hauh lo vin min han hrilh teh le," an ti ta a.

Awmtei chuan ngun deuhvin a han chhiar a, " Awi, mihring hi a lova sual theih ngai em! Hetiang lehkha ziak a siam tur hian vawikhat pawh ka lo ngaihtuah miah lo a sin le; ka ziah a ni lo va ka ziak erawh chu a ang thawkhat hle mai. Ka pu, enge lehkha hmasa chu!? Lehkha hnuhnung leh hmasa a awm em ni?" Mak ti leh hrilh-hai tak chuan a leh zawh ta heu mai a, a ṭawng lah chu a zawiin a chau hle tih hi a hriat ngawih ngawih mai si a. Chutah, "Ka pu, khatia'ng lehkha kha ka ziak lo va, ziah tumna rilru pawh ka nei hek lo, ka kutziak ang thei ber tur a tuin emaw a ziak leh phuahchawp a ni thei mai angem aw? ka ti deuh a, kei chu hei min hmuh ang hian heti hi ka nia, ka u te pawh hian lehkha ziak turin theihna ka nei lo tih chu min hriatpui ngei ang chu, engtia tih chi nge ka hre ta hauh lo mai," a ti ta phawng a. A u te pawh chuan a dikzia an lo nemnghehpui ve nghal zat a bawk a.

"Awle, a nih leh khawngaihin i note bu hlui leh thar ho min entir thei angem le? Ngun taka thil kan chhuizui chu a ngai miau si a, min hrethiam a nia'ng chu?"

A note bu zawng zawng chu a va pawmchhuak ṭaih ṭaih a, a kutziak nen chuan inang viau mahse, a kutziak chu a ni thei hian an hre ta ngang lo va; chutah, "A nih lehkha in inthawnna ṭhin kawl ṭhat te i la nei mial em? Thil pawimawh tawpkhawkah kan ngai bawk si a."

"Aw kawl chu kawl e, mahse, chu chu enge a ṭulna? Eng dinhmun pawh lo tawk ni ila, an ni va tih mualpho kha enge a sawtna, a lehkha min thawnte chu phawrh mualpho a ṭulna ka va'n hrethiam phalo ve aw," Awmtei chuan a lo la ti fan a.
Mahse, Aizawl a chhukthlak a C-a'n lehkha a thawn hmasak ber, kut ziak pawh ni lo type writer a chhut chu a va phawrh ta a. Chu lehkha an han chhiar chu an chek ta tlawk tlawk hlawm a, an lehkha rawn ken luh riruang tur leh a lo chhuah ṭanna tur awm pawh chu an zeldin theih phah ta hial a.

Synod hotute ngei pawh chuan, " Awle, Mami kan lawm e, tluang taka zirin lo dam ṭha var la, i tum pawh hlenin hriselna ṭha tak lo nei zel ang che; he i lehkha min pek ama ziak ngei aṭang leh lehkha hmasa awm si lo va a hnuhnung a lo chhuah ngawt theih dan aṭang hian i ṭhianpa rilru leh thiltih dan awm ang chu kan hre thei ta e. Nang chuan engmah i rawn tih leh thehluh pawh angai tawh lo va, he lehkha hian amah ngei chu a tichhia-in a ti mualpho zo ta a nih hi, Vanneihna kan duhsak a che." tiin an chhuahsan zui ta nghal a.

Khatia engmah hre lo leh ti thei lo va Awmtei a lo awm kha hre pha tawh hek lo le; amah anga rilru chhia pu tur riakah a lo ngaiin a hek ngei ringin khatiang lehkha kha a lo ti ta mai a lo ni.
Zawt fiah hmasa-in Awmtei tuarnat zia te kha lo hre ve nise, khang lehkha amah tichhe vek tute kha a rawn inlar chhuak lek lo tur hi a nia leh.

An exam result chhuah ni chuan Awmtei pawh a lo tho harh ve tawh hle a, hlauthawng taka result an va en chuan le, pass hming tarchhuak lovin fail hming zawk an lo tar chhuak chu niin, a hming awm ve si lo leh lawm bawk si chuan, an Sir a hmuh hmasak ber hnenah chuan, " Sir, enga ti nge ka pass?" a'n ti thawr mai a.
Mathematics 1 lo, subject dang zawng zawng chu a lo tiṭha em em mai chu niin an sir chuan lawmpuina chibai a buk ve ta hial zawk a. Hlawhtlin ngei tum tlat chung leh a hmabak hlenchhuah tur huphurhawm tak nen chuan hmalam pan zel turin a insangmar leh ta zawk a. A aw leh ri hriatna pawh zawi zawi a lo kir veleh in, ngaiawh phak ta chiah lo mahse, beidawng duh hauh lo vin hmalam hun a hmang zui ve ta a.
An chhungkaw khaidingtu ber ni zelin pasal fanau lam ngaihtuah miah lo vin a awm hlen ta a ni.

Awmtei chuan a rilruin ahnuaia thute hi a chhamzui ta mawlh mawlh a:

"Awle, i duh loh a i phatsan a, uai a vuai a, thamral mai tur leh rualban lo (a beng leh aw kha a fiah lo hlen ta si a.) ni damchhung tawh tur a i kalsan tak khan, dikna laltiang chu lek chhuakin, a vanglai leh parvul tur kha famchang si lo vin phumsak mah la, nangma tuh rah ngei hmangin a hneh let ta che a sin, i lo la hrefiah lo a nih pawhin, i pawisawitu chu amah (Rinawmi)ni lo vin nangmah ngei kha i ni tih i lo hre tawh dawn nia. Dikna in sualna a ngam ṭhin tih nen hian.

"Thil ṭha lo titute avangin inti lungngai duh suh la. "
Fel lo taka ti te chu awt hek suh.
Awmte, tho la, inti harh rawh le."

A tawp ber atan chuan:
Mipa tumah hi a fala awmpuiin ring bur ngai suh, i thiam lohna awm hauh si lo vin, damlai thlan thimah i lut ve hlauh dah ang e, tui baw hnu a ruh theih loh ang hian; hmeichhia te hian kan hlutna ber kan virginity hi engtikahmah kan nei nawn dawn tawh si lo va.

Ka lawm e.
T.Lalrinmawii.
Khuangleng Venglai.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)