KA HMANGAIH CHE BY Diki Ralte (COMPETITION)

Ngaia
Site Admin
Posts: 25813
Joined: April 30th, 2016, 4:07 pm

KA HMANGAIH CHE BY Diki Ralte (COMPETITION)

Unread post by Ngaia » August 12th, 2018, 6:17 pm

KA HMANGAIH CHE
Diki Ralte

(COMPETITION)

Chapter-1

He hmun reh ruih maia ka kal hi chuan ka dam sawng sawng zel. Mipui zi nuaih nuaih hi ka zo ṭhin lo a, tlai tin he hmunah hian ka kal țhin.

Ka nu leh pain min boral san ațangin mahni-in ka awm a, chhungte han sawi tur em em ka nei lo, ṭhian ka kawm tam vak lo bawk. Ka hming chu Lalnunsangi a ni a, 'Sangtei' tiin min ko mai țhin. Ka nu leh paten kum 3 liam taah khan accident-in min boralsan a. Ka ei in tur leh ka mamawh phuhrukna tur chu ka kova tla a nih tak vangin Dawrah nitin ka inhlawh țhin a, mahni tawkah ka buai thei hle, ka thawhna hi a lûn a, engtiklai paw'n kan ri luih luih reng zel.

"Hetah hian ka lo țhu ve thei ang em?" Chu aw lo chhuahna lam chu ka hawi a, ka hmaah chuan mi pakhat a lo ding a, min en reng chu niin, "Lo țhu rawh, ka ta bik a ni hleinem..." ka tih chuan min en reng chungin, "Nitin i lo kal ziaha ngawi rengin i țhu a, i kal lehnghal ringawt zel a," a tih chuan chhân pawh tum lem lovin ka phone-a games ka khel ringawt a, ka ngawih tak rengah chuan sawi tur a hre tawh bik lo a ni ang ka piahah chuan ngawi rengin a țhu ve reng a, haw tuma ka ding chiah chu lo ding ve nghalin, "Ṭhian kan ni thei ang em?" Tiin a kut a lo phar a, "Aw le," tiin ka kut chu amah chibai turin ka phar chhuak a, a nui suk a, a nui mawi kher mai.

Nitin dawrah ka kal țhin a, U Hruaia nen pawh tlaitin kan inhmu a, a hma ai chuan kan inpawh tawh khawp mai, țawng duh tak chu ni lo mah se a bula ka awm chuan keimah zawk ka țawng reng zela, a ni chuan ngaihnawm tih hmel takin a lo ngaithla ṭhin. 'A chang hi chuan naupang ang mai hian i awm țhin' min ti ziah a, 'kei lahin kum 24 ka ni tawh' ka lo ti ziah bawk. U Hruaia hi kei aiin kum 6-in a upa a, mahse ka rualpui chei hmiah zel. Eng nge a thawh pawh a sawi ṭha duh miah lo bawk, an harsa ve a nih ka ring.

Ka mu tawh chu kawngka kik ri avangin ka tho leh a, kawngka ka hawng chu U Hruaia pawnah alo ding reng a nih chu mawle! Ka meng zau kawk a, engtin nge ka inte a lo hriat ni. Lo lut rawh tih pawh nghak lovin a lo luta, a lian ve sia; ka in a ti lang te vek alawm. "Eng nge i lo tih dawn?" Ka tih chuan, "Ka lo leng.." tiin min chhang hmuk a, amah hre chiangsa tan lo chuan nelawm loh tak a ni. A haw tâk mai si loh vangin duh aia rei ka men phah. A titi bawrh bawrh bik bawk si lova...

Zingah chuan thawh ka hai avangin hmanhmawh zetin ka insiam a, ka pi-in min hau ngei ang, a khirh ve ropui si. U Hruaia vang vek, a haw har lutuk a, dawr ka thleng chu ka pi-in min hau miah lo ve teh khiah. Tlai hi a ngai thei lovin ka thawhpui te pawh a hau nasa ṭhin. Ka vawi khat tlaina a nih vang a ni ang min hauh loh, kan buai ni ber ala ni zui a, ka chau, ka mut a chhuak em em bawk si, ina hawa mut vang vang ka chak tawh.

U Hruaia lo ṭhu chu a lu a ben lawlh pahin, "Nangmah vang mut ka kham lo," ka ti a, nui vur vur chungin, "Mut rei a ṭha lo," tiin min la chhang daih zui a, ka tûm khum nghal bur asin le. Ka thinrim tak tak emaw tiin a buai leh chung tho si a, min thlem thiam lo si, "Vur ka lei ang che," te a ti vel! A tawpah chuan insum zo lovin ka nui chhuak hawk a, a țawngkam thiam lo lutuk hi a kum zat ngaihtuah chuan a nuihzatthlak țhin em bawk a ni.

Ka nui min en reng avang chuan, "Engngatinge kha tia min en reng? " Tihpahin ka zak chuan ka hmai ka hup a, ka rin loh dan deuhin a la țawng chhuak zui a.

"Min duh em?" A tih chuan ka lo nuih vak phawt a, "Ṭhian kan ni alawm," ka tih chuan min eng reng chungin, "Ka duh che alawm," a zui zat a. Ka lo lai nghal em em ringawt, hetiang zawngin ka lo en ngai miah si lo.

Kei aia ṭha a hmu dawn lutuk tih a chiang, a hmel țha a, a mizia hi hmeichhe duh zawng chi a ni bawk. Ka sawi fiah thiam dan berin m&b a changtu ni awm a ni. Kan haw pawh chu sawitur ka vân phah vek, a thu tak ngul bawk si.

U Hruaia nen kan inkawmna pawh kum khat chuang a ni tawh. Ka hna ngaiah ka la kal reng a, U Hruaia nen kan inhmuh loh hi chuan ka ngai thei hle țhin a, karkhat chhung kan inhmu tawh lo a, a zinnaah a buai viau a ni ngei ang. A hna thawh eng mah a sawi ṭha duh si lo. 'Huan ka enkawl' a ti ringawt zel a, ka zawt zui ngai bik lo.

'I lo haw hun chu i châk lo ngawt ang' ti mawlh mawlh chungin awm hlei lo chu ka hau a, hre ta se chu naupang chhia lutuk min ti leh ang chu. Mahse, ka ngai em a ni. Tlai tin kan inhmu a, ka lungngaih changin min hnem a, ka hlimin min hlimpui bawk a, ka tan chuan ka engkim a ni. 'Ka duh che' tih vawikhat a sawi bak kha a sawi leh ta miah lo, tunah chuan kei hian ka duhin a tel lo chuan ka khua a har ṭhin si a.

Vawiin hi a lo haw ni a ni tak e tiin phur takin dawrah ka kal a, ka nui nasa aniang ka piin 'i va hlim awm ve' a rawn ti a. Ni e, ka hlim a ni; vawiinah U Hruaia a lo haw dawn a, ka ngai tawh em a ni, ka duh thu ka hrilh tawh ngei ngei ang. Mak a ti tur hmel vel mitthlaa hmu chungin ka nui vur vur reng mai.

Hmanhmawh takin ka kal a, ka hmu chak tawh a ni ka thlen chuan a lo la awm lo a, ka ngui vek ka phur ve tawh tehreng nen. Darkar chanve dawn ka ṭhut hnuah tu emawin ka lu a lo bêng fawk a, a na reuh zek lehnghal hauh hrep tumin ka hawi chhuak nghal a, U Hruaia alo ding reng chu niin, nui var var chungin ka tho a, ka kuah a, "Ka duh che," ka ti nghal ringawt a. Ka zak leh deuh si chuan ka kuah nghet sauh a

Ka kuahna la sawnin ka mitah tak min melh a, ka thin a phu dup dup mai, min duh tawh lo tih a sawi ang tih ka hlau lutuk tlat. "Ka mitah en la sawi nawn leh teh," a tih chuan zak chung chungin ka sawi nawn leh a, rawn nuih var var pahin "I sawi tawh dawn lo emaw ka ti hman asin, kha thu i sawi hun kha ka lo nghak reng a, ka lawm e." A tih chuan ka zahna chu a kiang huaiin ka hria. Engmah sawizui lo chuan kan inkuah vang vang a, nuam ka ti lutuk tlat. Ka lung a awi hliah hliah mai nia mawle.

A thangbona lam chu a nuam em tih ka zawh chuan, "Ka ngai che a, a nuam lo, i awm lohna hmun chu khawimah a nuam lo," ti a min chhan chuan ka hlim veng veng mai .

U Hruaia nen kan inngaihzawn ṭan aṭang chuan harsatna em em sawi tur awm lovin thla khat a vei leh ta der mai. A hma aiin kan inpawh a, a zaidamin abula ka awm chuan ka him hliah hliah hian ka hre țhin. Ka chanchin engkim a hre vek a, min duat phahin ka hria. Kan awmdun tawh chuan tumah kan ngai ngai lo, kan pahnihin kan hlim dun em ema a ni mai. Vawi khat chu, "Bialnu eng zat nge i neih tawh?" ka ti mai pek a, zawh awm a ni lo tih hre tho mahila ka zawt chak miau mai bawk si a. "Ka hre tawh lo," tia min chhanna chuan ka rilru a tina zawk thei.

Ka phone ri avangin ka harh hlawl a, ka muttui nen tunge mawni le tih paha ka en chuan U Hruaia a lo ni a, ka la chiah tihin 'mut duh nu' a rawn ti nghal a, 'sawiho thei si, ka mut tui tehreng nen' ka tih nuah nuah lai chuan, "Vawiin chu chawlh dil la, leng chhuak ang," a rawn ti a. "Ka piin a phal lo ang," ka tih paw'n 'dil rawh' a ti tlat lehnghal, a luhlul thei țhin lutuk. A phal lo ang ti na na a.

Ka pi chu huphurh deuhin ka phone a, a lak hma te chuan ka thin phu chu a rang teh asin, a phal ring lo deuh chung chuan chawlh ka dil a, a lo phal ve mai bawk a. Ka thawhna a rei tawh bawka a nazawngin ka chawl ngai lo chu thuhran kan hnathawh kawng hrim hrimah hian min fak ve viau ṭhin a, ka lakah hi chuan a sual lem lo khawp mai. Mahse, ka hlau tho. Min duat ve deuh ber chuan ka hria, chawlh ka dil ve mai mai ngai loh vang te pawh a ni ang a phal ni. Midang chu ni se a vin leh hrepin ka ring.

U Hruaia chu ka bezui nghal zat a, ka piin a phal thu ka hrilh nghal a, 'dil hma ngawtin a phal lo ang ti nghal tawh suh," a la rawn ti zui a, ka va ngei tak e aw. A hrawn ve lo a engmah a hre ve tawp si lo.

Ka insiam zo chiah tihin kawngka kik chu ka va chhawn nghal a, U Hruaia a lo awm reng tawh chu niin, min en vung vung a, "I nalh lutuk," a ti sup a, ka lo lai ve ziah leh nghal! Ka inchei vak ngai lo a, ka inchei chhun hi chuan ka chhe lem lo tih chu ka hre ve. Ka te chhe lo bawk nen; chubakah ka vun hi ka nu ka chhûna a mam nalh viau bawk.

Ke-in kan kal a, 'taxi la ang' a tih paw'n ka duh tlat lo, an harsat ve hmel si a kawr pawh a ngai a rawn ha tlut tlut zel. Kan ṭhut ziahnaah chuan kal zawk ang ka kal châk ka ti tlat a, pawisa sên angaih lohna lam ka ngaihtuah char char, ka nei lo chu ti dawt lo mah se a nei lo ang tih chu ka ring thiam ve tlat.

Kan inhriat țandan vel sawiin kan ti ti a, min kuah chungin, "I induh ropui si," a rawn ti thut a, "Eng nge ka induhna?" ka tih chuan min rawn fawp thut a, "Ka ngai che, ka kuah reng chung che pawh hian ka ngai ngawih ngawih che," a rawn ti leh daih lawi a, ka hlim veng veng mai. Engkimah hian ka phu lo tih ka hria; mahse, min duh ve a ni tih ka hriat hian ka hlim em a ni.

Ka hmui a fawh pahin, "Tuna i hmuh ang hi lo ni lo ta ila min duh tho ang em?" A tih chuan, "Nupui i nei em ni?" ka'n ti ngawt a.

"Nei lo e, engmah a ni lo theihnghilh daih rawh," a ti leh bawk si. A mak thut thut ṭhin lutuk, ka hmuiah a rawn fawp leh a, ka chhang let thiam lo lutuk hi a lawm ţhin a nia, min fawp lui ziah a, kei lah ka zak thei țhin si a, min nuih tawp zel 'ka zirtir ang che' a ti ve ziah leh nghal; ka ngei tawk a lo tling țhin. Kan pahnih chiah paw'n kan hlim tawk em em zel.

"I chhungte chanchin min hrilh ve la," ka tih chuan, "Ka nu leh pa leh keimah hi a ni mai, a bak sawi tur a awm lo," a ti tawp a, sawi thui a duh lo tih a hriat reng, ka zawt bik tawh lo tawp ang. "Chuvang anih chu i sual em em," tiin ka fiam a, "Duat sual theih ka ni lo," a ti nghut a nih chu. A chang hi chuan a thu tak leh run zel a, hetia a awm chuan ka hlau deuhin ka hre ṭhin.

Kan haw in kan thleng chiah tihin ruah asur a rawng ka bawl a ka che vel min lo en reng bawk si, ka chet khawr phah vek.

Ruah lah chu a sur hnem tulh tulh lehnghal emaw ni. Ka rawng bawl zo a bula ka țhu chiah chu min lo fawp nghal tawn tawn a, keilahin ka thiam ang tawkin ka chhang let ve mai bawk a. Min fawp reng chung chuan ka kawr chhungah zen lutin ka awmbawr chu a khawih a, a kutah lo man sakin ka vuan tawp ringawt a, dahkiansak tumna pawh ka nei chuang lo.

A kuta a hmeh neuh neuh lai chuan ka taksa hi engtin emaw ni a awm hian ka hria a, min fawp uar tulh tulh a, a kut lah chuan a duhthawh tial tial mai bawk si, hriat belh châknain ka khat a, ka kawr hlim chhovin a fawp ta hial a, lo dan a hnekin ka phur zual tulh tulh thung si. Ka khumah min pawm pheiin min nghat a, ka hmuiah min fawp leh nghal hmiah a, engmah ka sawi hman lo, sawi hman pawh ni ila ka aw a chhuak thei chuang lo ang, ka taksa ka thunun thei tawh si lo a, kekawr a hlip a ka kekawr hak min hlih sak vel nghal bawk a min fawp leh nghal in, "I phal em?" a ti lawirut a, ka chhang thei lo. A bak chu engkim mai kha a hlimawm ni maiin ka hria.

Ka bulah rawn mu thla ve nghalin min kuah a, min kuahna dah sawnin ka tho a, ka na vek in ka hria bathroom-ah lutin ka intifai a, ka chhuak chu ṭhuthlengah ṭhuin a lo inha fel thlap tawh a, min lo la en reng zui. 'Chaw ei la' ka tih chuan "Ka haw zawk ang e" tiin a tho a, min rawn kuah pahin ka biangah a fawp zauh a, 'ka lo bia ang che' ti leh kal a rual nghal a, a chhuak chu hrilhhai ang reng takin ka en thlir reng ringawt a...

KA HMANGAIH CHE
Diki Ralte

Chapter-2


Vawiin ka dawr kal tur chu ka phur lem lo hle mai. U Hruaia lah ka hmu hreh em em zui! Dawr ka thleng chiah chu ka piin min lo nuih var var maia eng nge maw a hriat ni, a mumang a ṭha deuh a ni a nge.

Dawr lam chu buai ana leh Pek viau maia ka chauh sa teh reng nen, kan ban ve meuh chuan a tlai hle tawh. Ka haw tlang ta ringawt a, mut veng veng ka chak tawh em a ni.


In ka thleng fel tihin ka phone a ri a, ka en chuan U Hruaia a lo ni a, ka la chiah tihin "Khawnge i awm?" a ti nghal a, ina ka awm thu ka sawi chuan thaw hawk ri ka hre thei a, 'ka lo kal tih' leh dah a rual nghal a, a lung a awi chiah lo a ni ngei ang le.


Rawngbawl pahin ka zai rat rat a, kawngka inhawng ri ka hriat chuan ka hawi phei nghal thuai a, U Hruaia lo lut chu ka en reng a, ani leh ni lo angin a smart em em a, a inhmeh tak zet. Midang daih a ang.


Ka bulah lo ding ve-in ka chawhmeh siam chu a en duk duk a, ka kawnga kuah pahin, "Heti hian nupa ni mai ila," A tih avang chuan ka lai leh tawh! Lum ka ti nghal vek thei nia. Min tih zahdan hi a thiam lutuk a, ka bianga fawh zeuh pahin 'lai hma lutuk' tiin a kal sawn a, ka thaw huai thei; a mi uap hi a na lam hret ṭhin a ni.


Chawhmeh ka siam zawh chuan chaw ka chhuang a, a bula ṭhut pahin, "Vawiin chu i va nalh ve.." ka tih chuan, "Ṭan lak ka ngai tlat alawm, nula chhe lo deuh ka hmu a," tiin min chhang a, ka nuih tawp ringawt a, kei lo keidang duh a nei lo tlat a, ka thik buai duh vel lo.

A lama min kuahhnaih pah chuan min fawp a, "Ka ngai lutuk tawh che," a ti a,ka thiam ang tawkin ka chhang let ve a, infawh hi ka zei thei thlawt lo chu a ni e.


Ka chaw chhum a hmin a, "Chaw lo ei ve la," ka tih chuan, "Nangmah vangin ka puar lo i tih phah ang," tiin min fiam a, chaw ei ka siam kep avangin kan pahnihin kan ei dun a, nupa tak tak ni tawh ila tih vel ka ngaihtuah a, tun ang hian kan hlim dun reng ang em le? tih ka ngaihtuah lai chuan, "I ei tui vak nange?" tih ri ka hre nghal zat a. Nuihsak pah chuan, "Tui lutuk, nuam ka ti lutuk a..." ka ti ta ringawt a.

Thleng vel ka seng fel chu min pui a, ka thleng sil pawh min lo sil pui phet a tum a, "Mak reuh lutuk mai, va ṭhu rawh," ka tih pawn a ṭhu duh tlat lo, ka bulah a lo ding ve reng bawk si, min ti khawr zo vek. Ka bula a awm hi chuan ka zam ve nasa thei si a.

U Hruaia pawh zantin deuh thaw a lo leng a, pangti innawk fo ta chu insum reng a lo har a, duh loh lam kan ti dawn nge, duh lam zawk ni dawn ni khumpui kan kai fo mai a, a ṭha lo tih hre reng chung pawhin kan pahniha inhip tawnna hi a chak ve em a, insum tum viau ṭhin mahila a harsa lam deuh chu a ni e.

Tun thla ka period miah loh avangin ka hlau thawng khawp mai, U Hruaia bula ka sawi lahin, "Kan innei anga a ni mai lawm," a ti mai zel bawk si.

In test ka duh a, ka lei zak bawk si. U Hruaia chu 'min lo lei sak la' ka ti a. Mahse, hnaah a buaia, a lo kal hman bawk si lo. "Naktukah ka lo pe mai ang che," min ti a, zanin hian hriat ka duh, ka awm a nuam thei tawh bawk si lo.

Dawrah lei turin ka kal ta ringawt a, a hming ka hre bawk si lo. Zak Chung chungin 'rai leh rai loh test-na ka duh' ka ti tawl mai a, mak tih hmel tawkin min en a, min la nuih vur vur zui! Ka zak lutuk hi kal sawn leh mai te ka duh. Min pek ve leh ka kal nghal a, thui pawh ka kal hman lo; pawisa ka pek theihnghilh alawm mawle ka let leh a, pawisa chu sen ṭawn ṭawn chungin ka va pe leh ta a.

Ka rai ngei e, engtin nge ka tih tak ang ka rilru a hah tak zet a ni. Mut pawh ka muhil thei lo, ka inlet sek a, leh lamah U Hruaia'n inneih a duh tho a, a ziaawm viau. Mahse, ani pawh a buaiin hna a thawk nasa a, a phur ka tirit zual dawn a ni si a, huan enkawl ringawt chuan engtin nge min chawm theih ang? A hah dawn lutuk a, ka khawngaih a ni.

Dawrah pawh engmah ka ti ṭha peih lo, ka rilru a hah lutuk a, ka engtih mah a nuam thei lo, haw hma ka dil ringawt a, ka piin a lo phal hlauh chu ka vannei hle mai. Kan dawr neitute hi chuan an chhawr fuh a nia, ka pi kutah engkim an dah a, anmahni an lo kal ngai lo. Ka pi hi an ring tawk a, ka pi pawh an rin angin a rintlak a, dawr an ngahin Mizoramah chuan an hausa berin ka ring hial! Hotel an nei bawk a, an chanchin ka hre tam lo nain mifel tak an ni ngei ang.

Ka chauh em avangin rawng pawh bawl lovin ka mu a, ka lo muhil rei viau aniang ka harh chuan dar 7 a lo ri dawn tawh a, in tifai tura ka phei chiah chu kawngka a rawn ri a, ka hawnsak nghal thuai a, U Hruaia lo lut chuan, "Engati nge phone i lak theih loh?" a rawn ti a, 'ka lo muhil a,' ka tih chuan, "I damlo em ni?" tiin ka pang a rawn dek a, a kut laksak pahin, "Dam e, ka chau deuh a," ka tih chuan min kuah a, min fawp zauh pahin, "Ka ngaihtuah che alawm phone ila thei si lo," a tih chuan ka hlim veng veng mai, min hmangaih thu sawi lo mah se min ngaihtuah tih ka hriat hian ka lawm a ni.

Ka rai tih ka hrilh chuan 'kan innei dawn nia' a ti a. "Mahse, palai te hi engtin nge kan tirh ang?" "Ni dawn tak e, naktukah ka ṭhiannu pa te ka lo bia ang," ka ti a.ka thian nu hi Shillong ah pasal neiin a awm a, pasal a nei hmaa fa pawh 2 an nei tawh. An inneihin ṭhianah min hmang a, a nu leh pa pawhin min duat khawp mai. Mahse, ka ṭhiannu ber awm tak loh achin chu ka tlawh tawh ngai lo. Ka phone hlui a chhiat avangin a number ka nei lo a, kan inbiak lohna pawh a rei tawh khawp mai. Ka ṭhiani chu thawveng ve thei tak mai hi a ni a, Lalruattluangi a ni a, 'ruat thawveng' tiin ka ko thin.

Ruati pa te ka va biak chuan an lo lawm thiam khawp a, mahse, ka inthlahrung khawp mai. Ka nu leh pa ka ngai tak zet a ni. Van aṭangin min lo thlir ang a, an fanu hi min khawngaih ve ngeiin ka ring.

Kan inneih ni pawh a hnai tawh khawp mai, nei lo thei lovin ka awm si a, ka thu hriat avangin nei lo tur chu ka ni. Mahse, ka thei lo, ka fa lo piang tur hi Keimah anga fahrah taka awm tur chuan ka phal lo.

U Hruaia hi ka dawr nghah ṭhin neitu a lo ni anih chu. An hausain duh duh a thing thei reng a, kei hi bumin ka awm char char. Engtin nge ka lo hriat lo zawk ni.

Kan inneih ni chu mipui an tamin a ropui khawp mai, ka zam zia hi tuma'n an hre si lo, hmeichhia hovin U Hruaia an thlir ngawih ngawih te leh min thik tih hriat zet a min melhtu pawh an tam e, ka luak an ti chhuak nghulh thei!

Zan lam chu hmun danga hman ka duh loh tlat avangin a room-ah min kalpui nghal a, a room ringawt pawh a zau ṭhain a pui khawp mai. Heti hian rethei deuh angin a lo awm vela, ka ngei lutuk hi ṭham nawk nawk ka chak ania!

Kan inneih aṭanga karkhat a ni tawh. Nupa nun chu kan hmang dun reng tho a, Mahse, min bum avanga ka huat a reh thei lo. U Hruaia te in chu ka thlir leh ngawih ngawih ṭhin. A nalhin a chhungte hlei hlei a nuam zawk. Ka cheng ve tih pawh ka awih lo lek lek zel a ni.

Ka inah engkim ka khawih ṭhin avangin hetah chuan engmah tih an phal si lo tih tur a awm lo bawk nen chhunah ka khua a har thei hle ṭhin a, zanah chuan U Hruaia a awm a, ka khua a har ngai hran lo. A hma angin min ngaihsak reng tho bawk si.

Tunah chuan U Hruaia chungah pawh ka thinrim tawh lo, min duatin min ngaihsaka ka lawm a ni. Han chendun takah chuan a hma aiin kan inpawh a, zanah eng eng emaw sawiin kan infiam a, kan hlim thei lutuk. Tumah dang kan ngai lo, a chang leh a hmai ka chei sak vak zel a, kan nui dun nasa ṭhin.

Zan khat pawh ka raikawr ka haktir a, a hmai ka chei sak bawk a, thla kan la dun chu kan nui nasa lutuka kan lo nui ring deuh aniang ka nu leh pa te an lo lut a, kan phu nasa! Anni pawh an mengphawk khawp mai. U Hruaia lah khumah muin puanin a inkhuh nghal a, ka nu leh ka pain an han nuih tak tak a, "Mama, i inhmeh lutuk," ka pain a ti a. Ka pate chhuah hma chu a inkhuh char char a, ka pate chhuah ve leh, "Kawngka kalh ṭhin rawh," a rawn ti a, a la tum bur zui.

Ka pum pawh a puar lian ve tawh viau a, nau neih nan thla hnih ala ngai. U Hruaia nen pawh kan hlim dun a, Damdawi in pawh min kal pui thlap thlap zel. Ka pasal hi ka tan nu leh pa, ka ṭhian ka engkima engkim a ni.

Ka nu leh pa te an felin fanu ang tak takin min en a, min duat lutuka ka no zo vekin ka hria. U Hruaia chauh fa an neih avangin ka nuin 'kawm tur ka duh ṭhin a' a ti a. Nitin ka nu nen chuan kan inkawm a, kan inzui rawt a ni ber mai. A fanu tak tak angin min en thlap niin ka hre ṭhin. Sawi tur angah ṭhin khawp mai. U Hruaia naupan lai chanchin te a sawi ṭhin a, ka nui nasa thei khawp mai. A puitlin hnua a mizia dang ta lutuk mak a tih thu a sawi a, a chhan pawh a bialnuin a lo kawp tih a hriat chhuah vang a tih chuan mak ka lo ti viau mai.

Ka nu chu dilchhut ang reng deuh hian zawt zui a, a bialnu in a kawp aṭangin hmeichhia te a kawp lawr tak zel zul thu te, a mizia a inthlak vek thu a sawi te chuan chu nu chu ka lo ngei ve ngawt a. Mahse, U Hruaia'n a hmangaih lutuka a at phah lo chauh niin Jenny thu thu chuan a awm ṭhin tih a sawi chuan ka khawngaih khawp mai. Ka nuin a sawi zo chu min nuih pahin, "Mahse, nangin i ti hlim a, ka lawm lutuk, hetianga a hlim hmel hi ka hmuh lohna a rei tawh em a ni," a ti a.

"Zanin chu ka chau min malis rawh," ka tih chuan ka chawn a hmet a, ka muhil dawn siar siar tihin, "I chawn min hmeh tir a, min mutsan i tum daih si," tih pahin ka biang a piai vak a, ka harh chiang teh e. Ka mut chhuak a reh vek avangin games khelh ka rawt a, kan kheldun rei khawp lehnghal a, ka hneh lo ve ziah kan khel apiangin, ka ti tauva a tawp nan min chak tir ve ta hram a.

Dar 3:00 vela ka harh hlawl chuan ka pasal muhil lai chu ka thlir a, ka hmangaih che tih pahin a biangah ka fawp zeuh a. Ni e, ka hmangaih lutuk tawh a ni, a tel lovin ka hlim ngai dawn lo tih pawh ka hria. Nilenga a chhuah te hian ka ngai thei em em a, a bula ka awm hi chuan ka thla a muang ṭhin. Hnathawk tura a chhuak chiah hi ka taksa peng pakhat hi a chhuahpui ni maiin ka hre ṭhin. A lo haw hian ka kim ve chauh ṭhin si a.

Ka hmangaih che ka tih a chhanna ka dawn loh aṭang khan vawikhat mah ka sawi nawn leh tawh lova, kan inhau ngai lovin kan hlim dun em em a, a hah ṭhin ve bawk nen chau hmel a pu ngai lo. Ka hlim loh a hlau ni berin ka hria. A chang chuan min hmangaih ni a hriat chang ka nei ṭhin.

KA HMANGAIH CHE
Diki Ralte

Chapter-3

Kan fapa pawhin thla thumna a hmang ve ta reng mai. Min tihlimtu ber niin U Hruaia pawh chhunah a lo haw phah fova, ka pain Vanlalawmpuia tiin sa bawk mah se tuma'n a hmingin kan ko phal lo, 'bawihpui' tiin kan ko vek a, lawm a hre ve ṭan tawh. A pain a chhaih peih a, U Hruaia a awm hi chuan ka chang ve hman meuh lo chu a ni e.

U Hruaia ṭhiannu hlui hi eng nge a hriat ni tunlai chu alo lang zing riau mai a, hna eng emaw chhuan lamin inah a lo kal fo a, engtin mah awm lo mahse U Hruaia min laksak mai ang tih ka hlau ṭhin. A la hmangaih rengin ka hre bawk si.

U Hruaia nen kan inneih hnuin ka chhuak khat em em a, ka chhuah chhun pawhin U Hruaia nen kan chhuak dun a, ka mamawh min ngaihtuah sak zel avangin bazar pawh ka bazar khat viau mai.

Ṭumkhat chu len vah ka chak tlat a, U Hruaia bulah 'leng chhuak ila, in awm ngawt ngawt chu a ninawm em mai' ka tih chuan thil pawimawhah chhuah a ngaih thuin min chhang a, ka chhuah chak nen hun awl hi a nei mang lo chu a ni e.

Kan chhuah tak silovah chuan tiin naute ka mutpui a, ka lo muhil sek a ni ngei amh. Ka tui hal em vangin ka harh a, tui ka lak chhoh theihnghilh daih leh nghal. Bawihtea amu tui tho ti rilru chungin ka chhuak a, choka lama ka lut chu U Hruaia leh Jenny an lo infawp ka va hmu thut mai a! Ka ennawn ngam lo chiang kher mai, ka tlan chhuak nghal a, ka mittui tla pawh hru lovin room-ah ka lut a, ka na lutuk hi ka thaw ṭha thei lo. Ka hrawk hi hnawhtu awm ang maiin a tawt a, ṭah chhuah hawk hawk ka chak. U Hruaia dem thei ka ni lo a hmangaih kha a ni tlat alawm. Engatinge kei hi min hmangaih ve theih loh. U Hruaia ka hmangaih ang chiahin U Hruaia paw'n ani kha a hmangaih si a.

Engmah hre lo ang maiin ka awm tlat a, kha thil thleng kha theihnghilh ka duh a ni. U Hruaia hi ka kalsan thei si lo. Jenny chu a lo kal ngun khawp mai a, hna an thawk dun a, an infiam nasa ṭhin khawp mai. U Hruaia a duh tih hriat taka a melh pawh ka hmuh hmaih ngai lo, ka haider mai zawk a ni. U Hruaia bulah pawh engmah hre lo angin ka awm a, hriat loh der theih reng se ka duh a ni. U Hruaia chân aichuan hriat loh der mai ka duh zawk.

Hman ni deuh aṭang khan ka lu na hi a awm reng a, na ngawih ngawih ni si lovin a na reng a, vawiin phei chu ana zual deuh a, a hreawm duh khawp mai. Nachhawkna ka ei leh tawp a, a nat apiangin nachhawkna hi ka ei tawp zel. Ka lu hai zeuh zeuh pawh hi ka damdawi ei nasat vang a ni ang.

Bawihtea ka mut zo ka chhuak chu sofaah chuan Jenny chu a lo ṭhu reng chu niin. Ka kal phei chu min lo melh reng a, min melh no lem lo khawp mai. "Kan pa a awm lo," ka tih chuan, "Ka hria alawm, ka rawn hmu zo chiah a..." tih pahin min en a, alung ngaih hmel em em a, sawitur vak ka hriat loh avangin ka ngawi reng a. Amah bawk chu lo ṭawng lehin, "U Hruaia'n a sawi hreh avangin nangman sawi mai la a tih vangin ka lo kal.." a ti a. A ngawi leh phawt a, khawngaih hmel deuha min enin, "Sawi nuam chu a ni lo a, mahse, ila hre tho dawn a, U Hruaia nen hian kan inhmangaiha inneih kan duh a ni," a tih chuan ka mittui ka dang hman lo, a hmuh hlau zetin ka hawi sawn a, ka chhang thei lo, ka ṭawng chhuah chuan ka tap nghal dawn si a.

Engmah sawi lovin room-ah ka kal nghal a, ka ṭap chak tak zet. Ka mittui ka hruk paw'n ar rawn tla zel a, ka aâwm hi hnawhtu awm ang maiin a awm a Bawihtea mu chu enin ka rilru a buai a ni. "Chhuak rawh," rawn ti kher lo mahse, chhuak tura intih nen a danglamna a awm chuang si lo.

Ka mittui chu hruin ka tho va, U Hruaia hlimna tur a nih chuan ka chhuak mai tur a ni, a hlim ka duh a, ka bul aiin Jenny bulah a hlim zawk a, hlim takin ka thlah mai tur a ni, mahse, a va harsa si em!

Ka insiam mawlh mawlh lai chuan ka nu a rawn lut a, "Sangte, bawihpuia kawr tur hi en teh," a ti a. Ka hawi chhuak chu min en reng a, "E he, i ṭap elo!? Engati nge?" A tih chuan Jenny thil sawi chu ka hrilh a, "Tichuan, engmah thuchiang pawh hre lovin chhuah i tum a maw!?" a tih chuan ka lu ka bu ringaw a, "Chhuah a ngai lo.I chhuak tur a ni lo, Hruaia chu lo haw rawh se," a tih paw'n ka lu ka thin khum ringawt a, ka ṭawng thei tawh thlawt lo a ni, ka ṭap mai dawn zel a.

Bawihtea ka pua a, kan thawmhnaw pawh ka keng tam thei lo. Kan bawr dawn lutuk, nakinsh ka la lehzawk mai ang. Ka in anga ka lo ngaih ve tawh chu tunah chhuahsan ka ngai ta si a.

Ka chhuak tur kawngka ka thleng tep tih in ka nuin, "Sangte chhuah ṭalh chu i tum si a maw, chhuak lo ula ka ti em mai," a mittui hruk pah chuan a ti a. Ka ṭawng dawn a, ka ṭawng chhuak thei lo, ka ṭap chhuak tak ngial dawna ka hriat avangin chhan pawh chhang let lovin ka kalsan a. Vawi khat pawh hawi let lobin ka in nia ka lo ngaih ve ṭhin chu ka chhuahsan ta a.

Kawngpui ka thleng chiah chu vanneih thlak deuhin taxi a lo tlan nghal hlauh mai a, taxi-a ka ṭhu fel chiah tihin driver-in, "Ka pi khawi lamah nge?" A tih chuan chhan ngaihna mai ka hre lo, ka pa Muana (Ruati pa)te inah kal phawt mai ang, driver bulah ka kal duhna chu ka hrilh nghal a. Bawihtea ka en a, eng mah hre lovin thlamuang takin a mu chu a ni si a. Ka hun tawn mek hi ka mumang mai ni se ka va'n ti tak em!

Ruati ka biak a ngai tak e, ka phone chu la chhuakin Ruati ka call nghal a, engmah pawh ka sawi hmain, "Min lo be dawn lo anih hi ka ti hman alawm," a tih chuan ka hre chhuak chiah, a birthday a ni tak! Kan in Happy Birthday leh rih a, hahthlak zawkin! Rilru hah nen a inrem viau lo, ṭawngna hun ka chang ve ta hram e, sawitur hi a ngah ṭhin lutuka, a bulah chuan ṭawngna hun hi ka chang mang ngai lo, ngawi renga lo ngaihthlak phawt hi a ngai ṭhin.

Ka chanchin vel chu sawiin anu leh pa te lo hrilh mai turin ka ti a, 'ka'n be nghal ange' ati a, ka thaw a veng hawkin ka hria. Ṭawngkam ka thiam lo, sawidan tur ka hre dawn si lo.

Ka nu leh pa ten van aṭangin min thlir ang a, an fanu ka baihvai zia min hmuhin min khawngaih ngei ang. Ka nu leh pa la dam se chuan min hnem ang a, hei ai hian ka rilru pawh ana lo zawk tur.

Taxi aṭang ka chhuak chiah chu ka phone a lo ri a, ka en chuan U Hruaia a lo ni a, ka be chak hle mai, mahse, vawi khat ka biak chuan biak zel ka chak dawn si a. Ka rilru a ti nain haw ngawih ngawih tur ka nih laiin ka ngai em em tho si.

Ruati pa te in kawtah chuan ka ding leh ren rawn phawt a, ka lut hreh deuh tlat. Ka ṭhiannu ber a awm si lo a, hreh tak chung in kawngka ka kik karh karh a, rei vak lovah an awmpui ni ngei tur hian a rawn hawng a, "Nu Rini a awm em?" ka ti a. "Awm e, lo lut rawh, " a ti a.

In chhungah lutin ṭhuthlengah ka ṭhu chiah chu ka hahdam sawng sawngin ka hria, kalna tur ka nei lo ang tih ka hlau a, tunah chuan zan khat lek pawh ni dawn ta se riahna tur ka nei hi ka lawm a ni.

Nu Rini bulah chuan ka chungchang vel chu ka hrilh nghal a, tunah sawi vek ila awlsam zawkin ka hria.

"In duh chen chen in awm thei ania inthlahrung miah suh ang che," tiin mon hnem a.

Nu Rini'n, "Mutna tur va ti fel rawh, Bawiha hi ka lo awm ang e, i chau awm si in mu hma dawn nia," a tih chuan ka kal nghal a.

Khum ka siam zo room aṭanga ka chhuak chu U Hruaia a lo ṭhu reng chu niin, eng tin nge kan awmna te a hriat ni.

"Hei, Hruaia a lo kal a, Sangte biak che a duh a room-ah va inbe mai ta che u," nu Rini'n a tih chuan room-ah ka kal a.

Khumah ṭhuin min en reng a, a ṭawng chhuak pawh anelawm teh chiam lo, "Ka insawifiahna pawh ngai thla duh lovin i lo chhuak a, min chhuahsan i va chak awm ve!" a ti a.

"Hmangaih dang nei reng bulah i awm reng thei bik dawn em ni?" ka ti a.

"Tu nge ka hmangaih?" A tih chuan, "I hre reng, hetah eng nge i rawn la tih a, khanu bulah khan thlamuang takin va awm rawh, keini nufa chuan kan tibuai lo ang che."

"Mi dang hmangaih ka nei lo. Ka fapa hi ka hmangaih a, a nu pawh hi ka hmangaih che a ni," tiin min kuah a.

Ṭan duh viau mahila namsawn turin chakna ka nei mawlh si lo. A awmah chuan nghet zetin min pawm a, ka thla a muang leh siai siai mai bawk si.

Duat takin ka khabe-ah a chawi kang a, ka hmui chu a zut kual zai zai a, ka inrin loh lai tak chuan duhthawh zet chuan min fawp ta ham ham a, ka chhang let mai lo nachungin chutia dawh reng chu har tak a ni. A ngawnga uai ti tih chung chuan am takin ka fawp let ve ta vawng vawng a...

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)