KHA ZAN KHA BY Tlanhlua Khiangte (COMPETITION)

Ngaia
Site Admin
Posts: 25813
Joined: April 30th, 2016, 4:07 pm

KHA ZAN KHA BY Tlanhlua Khiangte (COMPETITION)

Unread post by Ngaia » August 12th, 2018, 10:23 pm

(COMPETITION)

KHA ZAN KHA
Tlanhlua Khiangte

Thlasik zan daifimin a bawh hnawm chiap phul hmun cham diaiah chuan zandanga ka tih fo ṭhin angin ka chapal khing lehlam chungah ka ṭhu ngawi vang vang a.

October thla, full moon zan ang em chuan eng lo mahse, ka awmna tlâng zawl chu a eng nuam hle a. Zan lama eng chhuahtu awmchhun inti niawm fahranin thla chu a eng no nghulh a. Ka bialnu nena inhmu tura intiam kan nih vang nge ni Thla en dan te chu mawi danglam riau hian ka hria. A nghaktu zawk dinhmuna han din chuan hun hi a kal chak lo riau ṭhin a. Ka nghahhlelhna chuan min nem ṭhu hle hle a, ka châk ngawih ngawih vang poh ni chuang lovin, hun khawhral nan tiin ka sikret chu duhthawh takin ka fawp vang vang a.

Chumi zan chu zandang ang lo takin ngaihṭhat lohna eng emaw tak hi ka nei a, hlauhawm eng emaw lo thleng tur awm ang mai hian ka tiril hi a khur deuh tlat hian ka hria a. Ngaihtuahna mumal pawh nei lova ka hawi kualna lamah chuan ka lam pana lo kal mek hmeichhe ruangam inkhaithli zaih mai chuan ka mit ala kher mai.

Zan thla eng mai anih vangin ka mitvai emaw ka ti hial a, ka en a, ka en nawn leh a, a tak ngei chu a ni si. Ka lam pana lo kal a nih avangin a hmel chu hmuhchian tumin mit khap lêk lovin ka thlir a, zan thla engin a hmel a chhun fuh lai tak chu ka va hmu ta, min nuih ngei a ni. Khawnge ka chakna zawng zawngte kha an awm tak le? Mipa ka ni lo’m ni..?

Ka ṭhutna aṭanga thochhuak tura chakna reng ka neih tâk loh avangin ṭhu reng chung chuan ka lo thlir ta tlawk tlawk a. Ka thinphu lah chu ral leh lama khawharina zaikhawm khuang ri tluk zetin a ring tawh a. Thlasik boruak vawt raih pawh chuan ka thlanfim luang te chu an dang zo lo! Nuih let ve ka tumna lamah ka hmui ka tihchet mai theih lohna chhan chu ka lo âng rei tawh lutuk pawh a ni ta ve ang!

Eng emaw tal sawi ka duh a, mahse, ka ṭawng ri thei tlat si lo. Kawr sendâng fual hnalh mai a hak chu thlasik daifim chuan a ti huh ang tih hlau niawm takin tlemin a chawi chhing deuh a. Mahse, a kawrfual a pawh chhin hret avanga buai erawh ka ni lo. A hmel ka hmuh hian ka chhungril hi a buai niaih ringawt zel mai a ni.

Ka kiang alo thlen chuan aw ngaihnobei leh thawp sat hian, "Min lo nghak rei tawh em? I lo ning viau tawh lo maw..?" Chu aw chu ka hre fo tawh a, ka tan thil thar a ni hauh lo. Mahse, ka thinphu leh tha khur avang chuan ka chhang thei tlat si lo a ni. Chhânna a hmuh mai loh avang chuan, "I thin a rim a 'mi, tihpalh lutuk, ka nuamsam lo deuh a, ka lo chhuak mai peih lova," tih paha ka khûpa a kut nghatin ka hma zawn takah chuan a rawn ṭhu hniam a. Chu second rei lote chhung chuan a hma daih aṭanga tihtauh dan tur ka lo ruahman ve zawng zawng te chu eng mah lo mai a chang zova, ka ṭawngrik mai theih loh vang pawh ni chuang lo chuan ngawi rengin ka lo kuah a, ka thinphuin ngai a awh thleng chuan nghet takin ka kuah a, ani pawh chuan engmah sawi chhunzawm lovin min kuah let ve vang vang a...

A insi thei lai zawng zawng insiktir tum ang maiin chu zan thla eng dul ruih mai hnuaiah chuan he khawvela dam awmchhun niawm fahrana inthlahlelin kan inpawm ta vawng vawng a. Tlema ka thlahdul tâk hret hnu chuan beisei nei tih hriat takin ka khabe hnuai aṭanga rawn hawi chhoh pahin, a tluk a mawi awm leh tawh chuang lo tur hian min nuih seih a.

Thla eng chu dul viau mah se a hmui no chek mai leh a ha var rual ṭhat mai chu ka hmuh hmaih hauh si lo. A ngui hmel deuh erawh chu zan boruak vawt deuh vang anih ka ring. Ka ta ni mai tur a sakruang chu duat taka chul chungin, min nuih seihna hmuiah ngei mai chuan bawlhlawhna tinrenga khat ka hmui chu ka hnutchhiah ta a ni. Chu zan chu kan hun hnuhnung ber tur a ni tih hre lawk ngat ila chuan hmuia innâwk satliah ngawt lo deuhvin, ka ta ni kumkhua turin ka siam tur! Mahse, tunge hmalam hun hrelawk thei bîk ngai le.

Zan dangah chuan ka hmui ka lak sawn hma chuan min thlah ngai lo. Mahse, chumi zan chuan a danglam ta! Ka mitah tak min en ṭha ngam lovin ka awmah a bei hle hle a, min hrilh tur a nei tih hriat takin a thaw leh halh ṭhin. Dawhthei takin ka lo nghak a, a tawpah chuan zawi sap hian, "Inṭhen ang..." tih ringawt sawiin a thaw zui hawk a, a bak a sawi chhunzawm mai lo. Kei lah chu ka hamhaih em avangin ka chhang mai thei bik lova, ka bing mup mup a ni ber e. "Mawh, min ṭhen rawh," tih paha min pawm ngheh sauh avang chuan a fiamthu a nih ka ring deuh a, ka nuih erawh a za hauh lo thung.

A inhnit feih feih a ni tih ka hriat takah chuan hlauhthawnnain min luah nghal a, hlauthawng ru tak chung chuan zawitein a khabeah ka dawm a, "Min han en teh, eng maw i sawi kha?" tih pahin ka han kuai dâk a, a mitmeng mawi tak, min tihlimtu leh nung sar reng mai nia ka hriat ṭhin aṭang ngei chuan dan rual lohvin mittui alo luang chhuak ngiai ngiai a. Ka thinlunga lainatna leh khawngaihna inthurual chuan a fiamthu lo a ni tih min hrilh chiang hle mai. "Eng vangin maw ka ṭhen ang che?" Ka aw chu a lawi deuh rûtin ka hria. Ani chuan hnuailam en reng chung chuan zawi te bawk hian, "Ila hre ve mai ang, a chhan min zawt lo mai rawh."

Thawm dang awm lo ta chu a reh zui tlawk tlawk a, zan dang ang chu nise hlim taka kan inkawm hun ang vel a ni tawh. Kan awmna thlang deuha Leihrik hram ri leh Perhpawng chiri tih mai loh chu thawm dang reng reng a awm lo.

Engvanga inṭhen duh ta ngawt nge a nih le? Amah lahin a sawi duh dawn chuang lo tih a hmel aṭangin ka hrethiam si, ka rilru-ah chhanna tam tak alo lut zut zut a. Chu'ng zinga ka rilru tinatu ber chu ka puhthlu ta a, "Ka rethei si a, chhungkaw pa ber dinhmun han luah tur chuan a chhungte'n min duh lo emaw, amah hian a hmalam hun tur thlirin a tlai hmaa min ṭhen a duh aniang...” tiin rilru ka siam ta ngawt a. Anih loh vek pawhin kei aia ṭha midang a hmu tihna a ni mai dawn lo em ni?

Ka aw ka thian kharh a, engtinnge ka sawichhuah ang, ka thlem lungawi thei mai ang em tih ka ngaihtuah reuh reuh lai chuan ka mipa rilru, inti mipa tak mai chu alo chhuak ta tlat mai le, a va hun lo tak em! Ka thutlukna siam tawha ka inchhir kuhkhua na tur chu ka phuhchhuak ta!Thinrim insum tih hriat tak hian, "I hlimna tur anih dawn phawt chuan ka ṭhen em em ang che, ka retheih avangin min ṭhen i duh tih ka hria," tih pah chuan ka kuahna chu ka thlah nghal a. Mahse, chutilai ruam reh ruih maiah chuan min chhangtu reng reng an awm chuang lo. Ka lo rindan chu a dik ngei anih dawn hi.

"A ṭha e, inṭhen i duh phawt chuan a tawk a ni mai, mawi taka min hnar avangin ka lawm e, ka lo phu lo em che a ni, i duhaisam Vâl chu va pawm la, lungawi ka lo zir mai ang e. Mangṭha le..." tih zawm zat pah chuan ka inher nghal a.

Ka kalsawn chiah tihah chuan a ṭhuhnawk a, chu phul hring, thla engin a chhun tlêt sar maiah chuan ka taksa peng lo ni tawh ṭhin chu a tlu sawp ta niaih a! A hmai a hup tlat avang chuan a ṭap tih ka hai hauh lo, ka va lainat tak em! Mahse, mipa ka ni a, hmeichhia te chu an tam em mai, min ṭhen duh hmeichhia chu thlem reng ka tum bik lo. Ka thinlunga ka duhna te chu huatnaah a inlet zova, ka khawngaihna te chu diriamnaah an chang zo ta!

Ka kal liam dawnah chuan 'a tawp nan' tiin ka hawi let leh a, a awmna ngaiah chuan ala awm reng a. Ka ding det a, va kaihthawha a ṭap thlem paha a bianga mittui luang ngiai ngiai hruk hulsak ka châk zia kha aw... Mahse, a theih loh, mipain thutlukna ka siam tawh a, ka kalsan a ngai. Chumi zan chuan ka beiseina neihchhun leh khawvel thar min siampui tura ka thlan hmasak ber chu ka kalsan ta a ni.

A chanchin ka ngaihven zui lova, hriat pawh ka duh hek lo. Khaw khata kan awm reng chuan intawn ni te ala awm ang a, ka thinlung hliam lung anga sak hi a tuiral leh mai ang tih ka hlauh avangin ka rilru hliam te tuamdam tur leh hmangaihna avanga ka beidawnna te tinung thar leh turin kan khua chu chhuahsan zai ka rel ta a. Ka chhungte bulah chuan hnathawh tur chhuanlamin zin ka duh thu ka sawi ta ngawt a, an lo remti ve mai bawk a.

Ni rei lo te hnu-ah chuan ka nun bulṭan thar turin Aizawl khawpui lam ka pan ta nge nge a. Mizo upain, “Thihna meuh pawh khuareiin min hnem ber,” an tih chu rilrua vawng chungin, chu khuarei chu nghah chhuah ngei tumin ka hun leh nite chu ka chhiar chho ta a. Thinlunga zawhna tam tak chhan sen loh lo piang ve reng te chu ka haider lui ve thei ta viau a. Kum a vei meuh chuan ka ngaihtuah chhuah ringawt pawha thâwk harsa khawpa min hnawh tlat ṭhintu pawh a lo tlem ve tial tial a, ka thinlunga cham reng ṭhin pawh chu theihnghilh ni te ka nei ve ta hial mai!

Kum hnih lai a liam ta, kan khaw lam chanchin reng reng hriat ka duh loh avangin ka bangbo ṭhin hle a. Hre chãk ang reng takin ngaihven vût ngam si lovin ka ngaihven ru lo thei ta lova. Inbiak pawh a harsat avangin Dâk aṭanga lehkha inthawn chu chanchin inhrilh tawnna rang ber a ni mai a. Mahni pianna khua leh chhungte ngaihna chuan min hneh ve ta deuh pawh a ni mahna. Tlai khat ka haw chu ka kawngkaah hian lehkha alo inzep vâ a. Huphurh leh lawm rilru tak chung chuan hmanhmawh takin inchhungah ka luhpui nghal a, Lehkha ip pawna kutziak chu ka hmuh fo tawh hnu a nih avangin ka chhiar châk phah sauh mai.

Ka hmangaih hmasak ber leh vawiin thlenga a aiawh tur ka la hmuh zawh loh kuthnu te chu engah nge ka hai tehlul ang ni. Ka pisa kaina Bag pawh nghat hmasa ta lo chuan ka lehkha dawn chu ka hawng ta a. Ka thinphu chu a inthum rawn nghal tluk tluk a, ngaihdam min dil anih chuan ka ngaidam ngawt bik lovang tia insehruh chungin ka chhiar ta a...

Ka hmangaih ber U Muana,

Ka va ngai tak che em... Sawi tur ka ngah lutuk hi sawi ṭan dan tur pawh ka hre lo zawk. I laka ka awmdanah khan ngaihdam dil che ka tum lova, i rilru nat dan tur ka ngaihtuah hian min ngaihdam theih ka ring lo!

He khawvelah hian piang nawn leh dawn pawh ni ila nangmah tho hi tawn leh ka duh asin. Theih ni se i kianga damchhung hun hman hi ka duhthusam a ni a. Mahse, ka duhthusam te chu a taka chang turin tih theih ka nei si lo. Min ngai ve ṭhin tho ang tiraw? Vawikhat tal i hmel hmuh leh hi ka chak asin. Min kuah chunga nupuia min neih i tum thu i sawi zana ka hlimzia kha aw... Hun rei lote atan pawh ni se i nupui nih hi ka chak lutuk. Ih maw, kan inhmuh hnuhnun ber zana zawhna min zawh ka chhan theih loh che kha.. tunah ka chhang che ang a, min ngaidam dawn nia tih erawh ka ngen nawn leh che ni rawh se.

Ka lu na zeuh zeuh ṭhin ka tih kha ka inentir a, Doctorin ka thluak a Cancer tih min hrilh a, a rang chi anih avangin hun rei ka nei lo tih min hrilh bawk a. Ka rilru na lutuk kha ka thi dang hial asin! He thu i hriat lai tal hi chuan min khawngaih ve ngawt ang ka ring... Mahse, keimah ringawt ka inngaihtuah thei bik si lo. I tana ṭha ber tur nia ka hriat avangin inṭhen kha ka rawt ta a ni. Nupui sûn, Pathlawi i nih ka phal lova ka phal ngai dawn si lo a ni.

He lehkha i chhiar hunah hi chuan kei chu he khawvelah hian ka awm tawh dawn si lo, a tawp nan vawikhat tal hmuh leh che ka duh tehlul nen, kan khua i chhuahsan tih ka hriat khan he lehkha hi ka hnutchhiah ta zawk che a ni.

Sawi tur ka va ngah tak em! Mahse, duhtawk dawn ang, he khawvela ka beiseina chu he ti hian thamral mah se an sawi pialral hi a awm tak tak anih ngai chuan chu chu ka beiseina neihchhun leh innghahna a ni e. Kan la intawng leh ang tiraw, Pialralah tal chuan.. Ka ngai lutuk che...

Ka mita mittui lo hnâm ṭiam ṭiam avang chuan ka lehkha kenlai pawh chu ka hmu fiah lo zova, ka chhiar chhunzawm thei tawh lo.

Ka inluah zimte chhunga boruak chu a lum ta hle mai. Ka ṭhutthlengsei neih chhunah chuan ka ṭhu hnawk a. 'Dar chanve lai van chu a reh ṭhup a,' tih ang mai khan ka ngaihtuahna te chuan min thlawh bosan ta ang mai hian ka bo mup a. Tih hmasak ber tur pawh hre lovin ka hawi ruai ruai a. Rei fe hnu-ah chuan zawi te hian, “Manun, a va pawi tak em!” tih chu mittui parawl ṭeuh chunga ka sawi theih chhun a ni.

Ka hun hman ral tawhah khan kir leh thei dawn ta ila. “Kha Zan Kha” ka thlak danglam ngei ang le.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)