KA PA LEHKHATHAWN BY Saii Zampuii Sailo (Competition)

Ngaia
Site Admin
Posts: 25813
Joined: April 30th, 2016, 4:07 pm

KA PA LEHKHATHAWN BY Saii Zampuii Sailo (Competition)

Unread post by Ngaia » August 21st, 2018, 6:42 pm

KA PA LEHKHATHAWN
(Competition)

Hmeichhe naupang kum hnih mi lek ka nih laiin ka nu leh ka u mipa kum nga mi chu an boral a.Ka pain nupui dang nei tawh loin min enkawl chho ta a ni.Ka naupan lai atangin ka pa nen kan inzui chawt thin a,thian ka kawm a phal meuh lo a,infiam ka duh pawhin min infiampui mai thin.Rual a pawl ngai lo a,thian inleng pawh a nei ngai lo.Naupang mai ka la nih avangin thian kawm te ka chak ve thin a,ka pa bula awm chu nuam ti thin hle mah ila a chang chuan ka khua a har ve thin a.Naupang infiam ka hmuh te hian tel ve chakin ka tap thin a.Chutiang hunah chuan ka pa chuan min thlem hauh hauh thin a,min tihhlim dan tur mawlh hi a zawng thin a.Naupang a thukhawchang,ka hlim ve leh mai zel bawk a.Min duat em em a,"Bawihte,i pa ka awm chhung chu i him reng ang.Ka engkim i nih hi,ka hmangaih che."tiin min pawm vawng vawng thin.A hmuh phakah ka awm reng a duh a,min hmuh loh hlek chuan a buai phili nghal mai thin.Naupang a mai ka la nih avangin ka ti mangang fo thin a,a hmuh phak lohah awm lo turin min hrilh ngun hle thin a ni.

Nikhua ka hriat tirh atang tawhin kan pem kual nasa a,kan awmna ngaiah kan awm rei ngai lo.Pem kual reng kan nih avangin thian mumal pawh ka nei ngai lo.Ka pa chu ka thian leh ka engkim a ni.Ka u nen kan pian ve hma hian ka nu leh ka pa chu Burma ah an pem a.Ka nu leh ka u boral hnu chuan ka pa chuan Mizoram ah bawk min pem thlak pui leh ta a ni.Ka nu leh ka u thlalak pawh hmuh tur kan nei lo a.Ka pa chuan a kan ral vek thu a sawi thin.Ka pa hian eng hna mah a thawh ka hre lo nain sum lama kan harsat ka hre ngai lo. Ka duh leh awh apiang chu min leisak zar zar thin a ni.Kum 8 mi vel ka nih laiin kan bulah pa pakhat a rawn awm tan a,kan awmna apiangah a kal ve zel thin.Ka pa chuan kan chhungte a nih thu a sawi a,pa sa tha tak,tawng tlem tak leh nelawm loh tak hi a ni a.Kan inbe ngai mang lo a,ka pa nen erawh an titi fo a.Chu pa hming chu Ngaihawma a ni a,pa Ngaih tiin kan ko mai thin.Ka lo leikang chho ve zel a,kan khawsak dan chu mak tih chang te ka nei ve thin a.Kan pem kual reng mai te,thian ka kawm a phal lo thin te,a hmuh phak loh a ka awm a phal lo thin te chu a chhan ka zawt fo thin a."Bawihte,khawvelah hian mi tha an awm laiin mi tha lo pawh tam tak an awm a.Ka hnen ata an lak bo che hi ka hlau em a ni.Ka neihchhun i ni si a."tiin min chhang thin.

Kan awmna kan sawn kual reng avangin zirna lamah pawh hma ka sawn chak loh phah a.Kum laklawhah te kan pem leh thut thin avangin pawl ngaiah ka thut leh chang a awm thin a.Kan awmna thar apiangah chuan sikul chu ka lut ve zel tho a.Ka pa chuan thupek khauh tak,ka zawm ngei tur min pe ziah a.Chu chu-sikul banah ka leng tur a ni lo,ka haw nghal thin tur a ni,thian ka siam tam tur a ni lo,hmelhriat loh ka be tur a ni lo.Kan awmna danglam fo thin mahse he thupek hi a danglam ve ngai lo.
Pawl ruk ka zirlaiin tlai khat ka sikul bang ka haw chu ka pa leh pa Ngaihan kan bungrua leh thawmhnaw te an lo khung mawlh mawlh hi ka va hmu a.Kan awmna kan chhuahsan leh tawh dawn a ni tih ka hrethiam nghal a.Ka pa chuan,"Bawihte,kan pem leh a ngai tlat mai.Champhaiah kan awm tawh dawn a,nuam i ti ngawt ang."alo ti thuai thuai a.Ka huphurh tawh lutuk chu ka tap teuh mai a,"Pa,tinge kan pem reng?Pem ka duh tawh lo,hetah hian ka awm duh.Kan pem leh chuan Tetei ka hmu tawh dawn lo asin."ka ti a.Ka pa chuan ka mittui min hruksak pahin Champhai nawmzia te,Tetei ang thian ka neih leh vat tur thu te min hrilh a.Eng ang pawhin tapin ngen mah ila a rilru ka thlak thei dawn lo tih ka hria.Chaw kan ei lai chuan ka pa leh pa Ngaiha chu an titi mawlh mawlh a.Kei chu ka ngawi reng a,ka la hmuh ngai lohna hmuna nun thar tan that leh chu ka chak hlawl lo a ni.Zanah chuan motor lian tak hi kan kawtah alo ding a,kan bungrua te chu an thiar lut mawlh mawlh a.An thiar luh zawh chuan kan awmna kan chhuahsan chu a ni leh ta der mai.

Zankhuain kan tlan a,kawng lakah kan chawl meuh lo.Pa Ngaiha chuan zana thlen a that thut thu a sawi sek a,ka ning hle.A tuk zanah chuan kan awmna tur hmun chu kan thleng ve ta hram a.Ka pa chuan,"Kan thleng ta e,hetah hian rei deuh kan awm tawh dawn nia.I chau ang lo va mu la,bungrua te hi kan dah fel zawh hunah ka lo mu ve dawn nia."a ti a. Mutna min siamsak a,ka chauh em avangin tui takin ka muhil ta bawrh bawrh a.A tuk zing ka thawh chuan an lo tho daih tawh a,ka pa chuan thingpui leh chhang min lo pe vat a."Bawihte,i la chau em?I mutui thei em?"min lo ti thuai thuai a."Pa,khawiah nge sikul chu ka kal dawn?Vawiin chuan ka kal peih lo ania."ka ti a. Ka pa chuan,"Kan piah lawkah sawn sikul tha deuh a awm a,vawiin lamah kan va buaipui anga naktuk atangin i kal dawn nia."a ti a.Kan awmna chu Champhaiah pawh veng hmawr lam a nih thu leh nuam ka tih zawk a rin thu min hrilh mawlh mawlh a. Hetiang hian min hrilh ziah a,dik tak chuan veng lun lai leh mi tamna hmunah te awm ve a,thian kawm ve te ka chak zawk daih thin.Zing chaw kan eikham chuan ka pa nen chuan sikul lam panin kan chhuak a.Ka luhna tur chu kan tifel a,ka pa min dilsak angin pawl sarihah ka thu dawn a ni.Sikul compound te chu kan fang kual a,a zau nuamin thingkung te tam tak a awm a.Infiamna tur hmun zau tak a awm bakah tuichenna tur te a awm thlap a.A hmunhma vel chu a reh raih mai a,sikul awmna tur atan chuan duhthusam a ni. A nawm hmel em avang chuan keipawhin kal thuai thuai ka chak ta hle a,ka phur hmel a hmuh chuan ka pa chu a hlim khawp mai a.Nuam ka tih tur zia te sawiin thian erawh kawm tam lo turin min hrilh leh ta a.

A tuk atang chuan sikul chu ka lut ve leh ta a.Hmel thar nih mai bakah kum laklawh a lut ka nih avangin min en duh hlawm kher mai.Hetiang hi ka tawng fo thin nain ngaiah ka nei thei lo,hreawm ka ti thin.Tuman min be lo a,tumah ka be hek lo,ka kal mawl ve tawp ni ber.Chutiang chuan nitin ka kal ve zel a,lehkha hi ka thiam theih avangin zirtirtute hriat ka hlawh chho vat a.Thian erawh ka la nei lo a keimahin ka tei rak rak thin.Ka thian neih ve chhun Tetei kha ka ngai em em thin a,amah ang thian kawm tur neih leh ka chak thin.Kum tawp dawn lamah chuan thian pakhat ka nei ve ta hlawl a,pawl riat zirlai,keimah ang bawk a thian kawm vak lo chi ve bawk a ni.A hming chu Sawmzuala a ni a,mipa mah nise thian kawm tur ka nei ta chu ka hlim phah hle a.Kan awmna veng inang lo mahse kan kalkawng a inang a,a kal lamin min rawn sawm a kan haw rual leh thin.Ka pa chuan Sawmzuala nen kan inkawm chu a sawisel hauh lo a,Sawmzuala lo chu midang kawm tam lo turin min ti a.Kan inkawmngeih tial tial a, kan inah pawh a rawn leng ve ta zeuh zeuh a,kan pawl a inan loh avangin sikulah chuan kan inkawm tam vak thei lo a.Kal lam leh haw lam erawh kan kal dun ziah a,sikulah chuan chhaih kan hlawh thin hle a,pawi ka ti chuang lo.Ka kawm tur neihchhun a nih avangin chan leh ka hlau a ni.Kum lamah chuan kan inrual chiah a,hang lam deuh,hmeltha tak a ni.A tawng tam lo hle a,ka thusawi a ngaithla tam zawk a.Ka chanchin engmah min zawt ngai lo a,ka pain min khuahkhirh zia hre mahse mak tiawmin a awm ngai lo.

Chumi kum chu kan lo hmang zo ve leh ta reng mai a,kumtharah chuan kan zirtirtuten pawl riat min bawh kan tir a,Sawmzuala nen kan inpawl rual ta a.Kan inkawm nasa lehzual a,kan inzui chawt a ni ber mai.Kan awmna pawh chu nuam ka ti chho ta viau a,veng dang erawh ka kal khat hle.Ka pa sawi angin pem lam sawi a awm ta rih lo a,ka pa pawhin min thlah zalen ve tial tial a.Zan chhuah chu phal lo mahse chhun lamah chuan inkhawm te,Sawmzuala nen a infiam leh tuichen te min phalsak ve ta a.Thian pawh ka nei ve ta nual a,Sawmzuala anga kawmngeih erawh ka nei lo a,thian satliah an ni ber mai.Pawl kua kan nih kum chu tluang takin kan hmang chho a,thil thleng danglam em em a awm lo.Sawmzuala nen chuan nulat tlangval kan hre chho a,thian ni mah ila a thian aia thuk zawk hian kan inen emaw chu aw tih chang ka nei thin a.Mahse engmah inngaihzawnna lam kan sawi ngai lo.Ka lakah a thikthu a chhe em em a,mipa dangin min biak emaw ka bula an lo awm chuan a thinrim hlur thin a.Keipawh ka bang chuang lo,ani ai mahin ka thikthu a chhia a.Hmeichhe dang bula a awm chuan ka na vawng vawng thin a,ka chan dawnin ka hre tlat thin.Ka thinrim chuan ka hau hrep hrep thin a,min chhang ngai hauh lo a.Ka duhtawk ka sawi zawhin min thlem a,kei lo tumah a kawm loh tur thu te min hrilh a,ka samah a chul a,min tihnuih tumin a insiam chhe vak vak a,ka nui leh nge nge thin.Ka bula Sawmzuala a awm chuan ka hlim a,ka hlimin ka pa alo hlim a,kan hlim tlang thin.

Sawmzuala nen chuan pawl kua leh pawl sawm chu tha takin kan pass ve ve a,pawl 11 kan lo zir ve ta reng mai a.Insawn kual tawh lo a nun dan pangngai a kan awm ve ta chu nuam ka ti em em mai a,Champhai a kan lo pem ta chu ka inchhir lo ngei mai.Sawmzuala te inah pawh ka leng ve thin a,a nu leh pate an felin an zau si a,nu nei ve lo ta chu a nu phei chu nu ang maiin ka ngai a.Kan inpawh em em a,a pa phei chuan 'ka monu hual' tiin min fiam fo thin.Tiang ang taka nun nuam hi ka lo hmang ngai lo a,zan ka mut hmunah te hian ka ngaihtuah neuh neuh thin a,mumang ang mai a a tawp leh thut hi ka hlau thin.Sikul pawh tluang takin ka kal chho ve zel a,sikulah chuan 'Sawmzuala bialnu' tiin min chhaih fo thin a,thinrim a hnekin ka lawm ru veng veng thin.
Pawl 12 kan zir kum chuan kum tawp exam zawhah kan chhungkua leh Sawmzuala te chhungkua chu rih dilah kan picnic a,nuam kan van ti tak em!Kan nui rawih rawih a,exam zo rilru thawveng nen ka hlimna chuan van a tawng hial ang!Mahse kan hmaah engnge lo thleng dawn kan hre si lo.Ka hlim em em lai chuan kan hmaah lungngaihnain min lo hmuak reng mai hi a lo ni a.Kan picnic tuk chuan Sawmzuala alo leng a,a hmel chu nidang a ang lo tlat mai.A ngui em em a,ka che vel chu min lo en leh vawng vawng thin a.A chhan ka zawh lahin a sawi duh si lo,kan lo indawp vel mek laiin ka pa chuan kan pahnihin a pindan a kal turin min rawn ko a.Ka pa chuan thu turin min ti a,ani pawh a hmel a hlim lo.Pa Ngaiha chu ngawi rengin alo ding ve bawk a.Engemaw tak chu a awm chiang a ni."Pa,eng nge ni ta?Nang pawh chu i va hlim loh hmel ve."ka ti a.Ka pa chuan,"Ni e bawihte,hrilh che ka hreh khawp mai.Sawmzuala hi chu ka lo hrilh tawh a,hetah kan awm thei tawh dawn lo a,zaninah kan chhuahsan leh tawh dawn a ni."a ti ta a.Ka ding nghal awt a,"Ka duh lo!"ka ti tuarh a.Ka pa chuan min rawn pan a,min kuah a tum chu a kut ka lo vai thla lawp mai."Bawihte,hrethiam hram rawh aw,keipawhin hreawm ka ti lutuk mahse a loh theih loh si a ni."a ti a.Ka riru na lutuk chu ka puak keh ta!"Ka kal dawn lo,i bulah ka awm tawh dawn lo.Ka hlim ve hi i phal lo ami?Tinge min pem kual pui reng?Nang hian min hmangaih lo,ka pa pawh i ni lo ang.Ka hua che ka haw lutuk che!"ka ti ta piap piap mai a.Ka pa chu athu hnawk a,a kutin a hmai a hup a.Pa Ngaiha chuan min rawn kuai her lawp mai a,"Zirtluangpui,i thusawi kha sut leh vat rawh!Engkim i la hria ang,khatia i pa i ti kha i la inchhir khawp ang."a ti a."Aih,ka sut dawn miah lo ka hua,ka haw hluah hluah."Thinrim lutuk vanga rak chul chungin ka tlan chhuak a.Hetiang reng reng a dam ve hi ka peih tawh lo.Ka nun hahthlak tak hi ka titawp dawn a ni.

Kan awmna thlang a tuikhuah panin ka tlan zel a,ka thlen chuan ka zuang thla nghal a.Ka pil tan tihin kut chak tak hian min rawn pawm chhuak a,Sawmzuala a lo ni.A awmah min pawm bet tlat a,engmah a sawi lo.Sawmzuala pawh hian min hmangaih lo,kal lo tur pawhin min ngen lo,ngawi rengin alo ding tawp a nih kha."Min thlah rawh,thih ka duh!"Ka tap hlawp hlawp a."Mate,thih thu sawi suh hmeichhe chak tak i nih kha."a ti a."Ka nun hreawm thin zia i hre lo,mal taka nun ka peih tawh lo.Tuman min hmangaih lo,nang pawhin min theihnghilh thuai dawn."Ka aw chu a khur hlawk hlawk a,Sawmzualan min theihnghilh leh mai tur chu na ka ti em a ni.Zawi tein min kuai dak a,ka mittui luang zung zung chu min hruk sak a,a rawn kun hniam a,ka hmuiah a rawn fawp ta a.Induh leh inthlahlel takin kan infawp vawng vawng a,he pa hi ka hmangaih chiang a ni.A inla hrang a,min kai a,thutna lo awmah chuan min thuttir ta a.Ka hmaah a rawn thingthi a,chiang takin min en a,"Mate,ka thusawi hi ngun takin lo ngaithla rawh.I pa hian a hmangaih em em che a,keipawhin ka hmangaih che.Engkim hi i tana tha tur zawk a ni a,khatiangin i pa tawngkhum tawh suh aw.In kal tur hi ka huphurh ve em em asin mahse ka dang thei lo che a ni,a chhan min zawt suh a hunah engkim i la hria ang.Tunah inthen rih mah ila ka rawn zawng chhuak leh ang che.Chu chu ka thutiam a ni." a ti ta a.A sawi ve leh ta!Ka nunah hian thuruk inthup chu a awm ngei a ni.Zawh luih a sawt lo tih hre tur khawpin Sawmzuala mizia ka hrechiang tawh a,sawi tur dang a awm ta lo."Tirawh le,haw tawh ang le,i pain alo ngaihtuah lutuk ang che."a ti a.

Champhai chu chhuahsanin Aizawl ah kan awm leh ta a.Thildang engmah ka rilruah a awm thei lo,Sawmzuala chauh lo chu.Lunglenna leh khawharna sawifiah thiam loh khawp a thukin min chenchilh reng avangin ka mu ngawih ngawih a.Ka eng tih mah a tui thei lo a,ka pa pawhin min tihlim zo ta lo.Ka nun chu awmze nei lo mai niin ka hre thin a,ka zan mu te chu ka lo tawngvai fo a,Sawmzuala hming ka lo lam nasa hle thin.Beiseina erawh ka la nei a,chu chuan tlemin ka lungngaihna min chhawk thin.Hun alo kal ve zel a,chutiang ngawt a nun chu ni thei hek lo le,ka pain ka college kalna tura alo tih fel tawhah chuan phur lo takin ka kal tan ve leh ta a.Kan awmna atanga a hlat avangin ka pa leh pa Ngaiha chuan min thlah ziah a,haw lam pawh min rawn hruai leh ziah thin.Pa Ngaiha pawh kan bulah ala awm zel a,kan chhungte pawh ni se kan bulah a awm reng mai chu mak ka ti thin a,nupui fanau te hi a nei ve lo mawni.Vawikhat chu ka zawt a,"Nei lo"a ti hmuk a,a mimal chungchang zawt tawh ngai lo turin min ti zui a.Tlai khat kan haw chu pa Ngaiha chu alo awm lo a,ka pa chuan a zin lawk thu leh alo haw leh vat tur thu a sawi a.Nelawm vak lo mahse kan lo cheng ho rei tawh a,chutia a zin daih chu ka khua a tihar hle mai a.

Kum alo thar a,tunah chuan kum 19 lai ka lo ni ve ta.Ka hun kal tawhah chuan Sawmzuala nena kan hun hman dun lai kha ka hlim lai ber a ni.Sawmzuala ka hriatrengna chu ka thinlung chhungrilah ka dah tha hmak a,amah ka hriatrengna hi engmahin,tumahin an tichhiat ka phal ngai lo vang.College ah chuan thian bulfuk neih ka tum tawh lo.Kan department ami Mapuii nen kan inkawm ve zauh zauh a,ani lo phei chu han biak lumlam vak pawh ka nei ngai lo.Ka nungchang chu mak an ti a,min sawi sep sep thin tih pawh ka hria,pawi ka ti eih lo.Nikhat chu kan class bang,ka pa ka lo nghah laiin Mapuii leh mipa pakhat hian min rawn pan a.Ka bul an lo thlen chuan Mapuii chuan,"Tluangpui,hei hi ka thianpa Zela a nia.Engemaw sawipui che a duh a.Tikhan lo sawi dun ula ka kalsan mai ang che u."a ti a. A kal nghal daih a,"Eng nge min sawipui i duh chu sawi thuai thuai rawh,ka pa alo thleng tep ang."ka ti a.Ka pain min rawn hmuh chuan a lawm lo hle dawn tih ka hre sa a.Zela chuan,"I pa chungchang chu ania ka sawi duh."a ti a.Ka pa chungchang maw!Ka thin a phu nghal a."Ka pa chu i hria ami?Kei chuan ka hre ngai si lo che a,engtin nge min hriat a?"ka ti leh a."Aw ka hria,in chanchin pawh engkim ka hria.Mahse tunah sawi vekna hun a awm lo,naktukah kan inah lo kal la,ka pain alo hrilh vek ang che."a ti ta a.Mak ka ti hle mai a,ka nuna thuruk inthup tlat,ka hriat chak em em si hi alo ni reng lo maw!Ka hriatchhuah ngei a ngai a ni.Chutiang thil vel chu ka pa pawh ka hrilh duh hauh lo a.A tukah chuan kan ban tlai tur thu ka pa chu ka hrilh a,ka pa chuan a remti lo hle a class thulh mai turin min ti a,mahse ka kal lui ta tho a.Class banah chuan Zela chu ka lo nghak a,a bike in an in lam panin kan inphur ta nghal a.

Zela te in kan va thlen chuan pa upa tawh lam hian lut turin min lo sawm a.Zela pa a nih thu leh a hming chu Zohmangaiha a nih thu min lo hrilh a.A mitmeng chu a thip hle a,ka nel zawng a ni lo tawp mai.Kan thut hnu chuan,"Ka pu,ka lo kalna chhan chu in thusawi ka hriat duh vang ania.Min hrilh ula, ka haw leh nghal mai ang."ka ti a.Pu Zohmangaiha chu a nui suk a,"Hmanhmawh mah ta che,i pa pawh alo kal dawn alawm.A tawp a tawpah chuan kan kutah in awm dawn ta e.Thusawi lam chu muangchangin le."a ti ta mai a.Zela nen chuan min en run mai a,ka chhungrilah hlauhna ka nei ta thut mai a.Ka hriat ngai pawh ni lo ka lo zui ringawt mai chu mawl ka inti hnuhnawh hle a.An awmna a fal si,ka hlau ta riau mai.Ka kalna lah ka pain a hre si lo,pa Ngaiha zin lah ala rawn haw bawk si lo.Engmah sawi loin ka ding thut a,chhuah tuma ka pen chiah chu Zela chuan anchhe lawh chungin min rawn pan a.a ri bur a,engmah ka hre zui ta lo.

Ka han harh leh chuan khua alo thim tawh a,ka tui a hal em em mai a,ka ka an hnawh tlat avangin ka tawng thei lo a,ka kut leh ke pawh phuar tlat a ni.Ka lu chu a na ngut ngut a,hliam na tak ka tuar a nih hmel.Ka bulah chuan pu Zohmangaiha chu a tei tawn sek a,ka hlauh em avangin ka tim ur ur mai."I lo harh ta maw nula?Hetia kan tihna chhan che hi mak i ti viau ang tiraw.Engkim hi i pa vang vek a ni,ti lo thei loin min siam a.I nu leh i u thihna chhan pawh i pa vang a ni.Engmah a hrilh ngai lo che tiraw.Tlanchhe kual reng mi dawihzep hian a hrilh lul lo ang che.Keiman ka'n hrilh ang che.I pa hian ka fapa kum 10 mi lek a that asin.An ru bo a,tlanna sum kan pek hnuah pawh a that tho a.Ka nupui thinlung na lutuk a at phah asin.Tikhan engkim i hrethiam tawh em?"a ti ta a.Ka pain naupang a that maw!Ka awih lo,ka awih lo reng reng,thil ni thei a ni lo.He pa hian a hre sual chiang a ni.Thei leh thei loin pu Zohmangaiha chu ka en tawk tawk a,ka mitmengah chuan a hrethiam ni ngei tur ani."I awih lo maw?I pa tenawmzia chu i hre dawn khawp mai.He thlalak hi en rawh."tih pahin thlalak pakhat hi min rawn entir a.Chu thlalak a naupang chu a duhawm kher mai,"Kha kha ka fapa Zorinsanga,i pain a thah tak chu a nih kha.Zela hi ka fapa a ni lo,phuba kan la theihna tura min puitu a nih hi.Hun rei tak kan chhui che u sin."a ti a.A lo kun hniam a,"In pafa hian in tuar ve dawn khawp.Ka natna ang chiah kha i pain a tuar anga chumi hnuah in thi ang!"a ti ta hmiah mai a.Ka hlau lutuk chu ka thidang leh ta a.

Au ri hian min tiharh leh a,ka mit an tuam tlat avangin engmah ka hmu thei lo.Kawngka chu a inhawng ri thuai a,patling thinrim inhrosa thawmin a zui a.Chutah le,ka taksa chu a rawn na ta zawk zawk mai a,min chhirin min hnek a,dim lo baksakin min sawisa a,ka au thei si lo.Silai a rawn ri thuai thuai a,ka mangang lutuk chu ka thisen nge ka thlan zawk ka hre lo ka hmaiah a luang zawih zawih mai a.Ka thi ngei dawnin ka hria a,ka rilruin ka pa ka au mawlh mawlh a.Nikhua ka hre mumal ta lo,ka hriat hnuhnun ber chu thil ri rum rum leh silai ri kara ka pain min ko thawm chu a ni.

Ka harh hlawl mai a,damdawiinah ka lo awm reng mai.Ka lu an tuam luk a,ka taksa peng tin mai chu a na sup sup mai a.Ka khum bulah chuan police pahnih leh doctor an lo ding a.Police pakhat zawk chuan,"Tluangpui, i harh ta maw,engmah hlauh tur a awm tawh lo ania."a ti a.Ka bo deuh hu mai a,"Ka pu,ngati nge hetah hian ka awm a?"ka he haw a. Police bawk chuan,"Engmah i hrechhuak thei lo mi?Ruk bo i ni a,i pain min rawn pun a.In awmna kan rawn thlen chuan nikhaw hre loin i lo awm a.hetah hian kan dah nghal che a,karhnih zet chu i biak theih tawh loh a,tunah i lo harh chiah nih hi."a ti a.Thil awmdan ka hrechhuak leh ta..ni e,engkim ka hre leh ta vek mai.Mahse khawnge ka pa?Khawnge a awm?Hlauhthawnnain min rawn man a,ka thaw hlawp hlawp a,"Khawnge ka pa?Ka pa ka hmu duh."ka ti tuarh tuarh a.Ka taksa na ka hrechang tawh lo.Police pa chuan lainat hmel takin min en a,"Tluangpui,pawi ka ti khawp mai i pa chu kan chhan thei ta lo a ni.I nunna chhan nan a nun a hlan a ni."a ti ta a.Ka bing mup mai a,ka mittui a dir zung zung a.Ka pa,min hmangaihtu,khawvel a ka neihchhun chuan min kalsan ta maw!Chu pawh keimah vangin maw! Na ka van ti tak em!

Police ten min rawn hmuhna kha Aizawl khaw pawn daih alo ni a,hmun reh tak mai,motor pawh luh theih lohna a in rawih ve tawh tak chhungah min rawn hmu a ni.Nikhua ka hriat loh lai khan chutah chuan min lo hruai niawm tak a ni.Ka pa khan police te a hrilh zawhin amahin min ru botuten min dahna hmun an sawiah chuan min lo zawng nghal a.Police te an va thlen chuan min ru bo tute chu an lo tlan bo hman a.Ka pa chuan ka taksa hliah zawngin min lo pawm bet tlat a,a hnungzangah silaiin vawithum kah a ni.Kei chu ka lo la thaw hram hram a,ka thi tawh emaw tiin min kalsan ta mai niawm tak a ni.Ka luah hliam na tak ka tuar a,ka taksaah sawisakna hnuhma a tam hle bawk.Ka pa khan min lo hliah tlat lo se chu ka thi chiang hle dawn alo ni.Ka chanchin chu a darh nasa em em mai a,min khawngaihtu tam takin min rawn hmuh an tum thin a,mahse tumah ka hmu duh lo.Ka mu chawrh chawrh a,that chhuah leh chakna ka nei lo,ka pa a awm tawh miau lo a,ka pa awm ve lohna khawvel hi ka tan thlakhlelh tur a awm lo.Police te chuan thu min zawt nasa a,ka hriat chin chu ka hrilh zel a,hrilh tur erawh ka nei tam lo.Pu Zohmangaiha khan ka pa chungchang chhe takin sawi mahse ka pa thusawi ka hriat ve phawt loh chuan ka awih chuang lo.Police te chuan min ru botute chu Manipur lam mi daih an nih thu an sawi a,ka pa boral hnu deuhah khan pu Zohmangaiha ruang chhar a ni a,a hnu lawkah Zela ruang chhar a ni leh bawk. Tualthattu chu an hre lo nain mi pakhat thiltih niin a lang.Police te chuan tualthattu chu ka hriat ringin min zawt nasa a,mahse ka hre lo tih ka sawi,ka hre miau lo a.Rin erawh ka nei,ka ring sual lo bawk ang.

Chutiang boruak karah chuan ka nitin hun hman dan erawh a ngai reng a.Ka malin ka riang ngawih ngawih a,ka rilruin ka pa chu a hnena min hruai ve mai turin ka au mawlh mawlh thin a,chhanna erawh ka dawng si lo.Nikhat chu lehkhathawn ka dawng nawlh mai a,min enkawltu nurse in min rawn pe a,mi pakhatin keimah pe turin alo ti a ni.Chu pa chu a kal bo lehnghal a,nurse chuan a hriat ngai loh thu a sawi a.Lehkhathawn chu ka la a,envelope chu ka hmuh hnu ang riauin ka hria a,ka'n enchian chuan ka hrechhuak ta!Ka pa hman thin ngei kha a ni.Rang takin ka hawng a,ka pa lehkhathawn ka tana a ziah ngei alo ni.

Ka fanu, he lehkha hi i chhiar a nih chuan kei chu mitthi ka lo ni tawh ang.I himna hi ka duh ber a nih avangin he lehkha chhiar thei a i la dam anih chuan ka damchhan ka hlenah ka ngai ang.Bawihte,keimah vangin hreawm tam tak i tawrh a ngai thin a,engmah ka hrilh thei si lo che a min ngaidam hram ang che aw.Thil engkim ka hrilh che chuan hlau leh thlabar reng rengin i awm dawn si a,ka ngaingam ngang lo a ni.Ka fanu,tunah chuan thudik i hriat a hun tawh e,engkim i hriat hunah chuan min hua pawh ni la ka dem lo che.Ka thil lo tih tawh te kha pawi ka tiin ka inchhir em em a,inchhir a sawt lo a,inlamlet theih a ni hek lo.Hetiang hi thil awmdan chu a ni.

Ka pian leh murna chu Manipur a ni a,Manipurah hian tlanna sum pnut a naupang ruk bo a hluar hle a.Vawikhat chu milian tak mai Zohmangaiha fapa kum 10 mi lek hi rukbo a ni a.A rubotute chu pathum an ni a,ka thianpa nen chu naupang veng tur chuan min ruai a,hlawh pawh tha tawk tak pek min tiam a.Tlanna sum atan nuai za an phut a,pawisa chu an rawn pe ta ngei a.Naupang pawh chu chhuah leh mai tum an ni a,mahse thil a kal sual ta tlat mai.Naupang chuan tihpalh thilthuin amah ru botu hmai tuamna chu a phihthlak sak ta hlauh mai a.Chu pa hmel a hmuh chuan naupang chuan mak a ti kher mai.Amah ru botu chu tudang ni loin a pa nau,a patea ngei alo ni.Chutia a nihna a hriat tak si avang chuan loh theih loin naupang chu a thah phah ta ni.Chutiang thil alo thlen takah chuan ka thianpa chuan rubotute chu thah a,pawisa chu insem a rawt ta a.Pawisa tam tham tak mai a nih avangin ka nep zo ta bik lo a,ka remti ve ta a ni.Mahse mihring nunna lak chu ka thei ta tlat lo mai a,ka thianpa chuan a that ta vek a,pawisa chu lain Mizoram lamah kan tlab bo ta a ni.Bawihte,mi rawkrai lo lutuk angah chuan min ngai lo hram ang che aw.Thil chu ka tisual ngei mai,mahse tumah ka that lo.

Kan thitih chu an hrechhuak lo emaw kan tih laiin police te chuan min lo chhui zui reng alo ni a,min rawn chhui thleng a,kan tlanchhiatna lamah ka thianpa chu an kap hlum ve ta hlauh mai a.Kei erawh ka him hram a,police te chuan mualpho an hlauh avangin kan pahnih a min kap hlum angin thu an than tir a.Chutih hun lai chuan Mizoramah pawh kan chanchin chu a lar hle a ni.Ka chhungte chuan thi tawh angin min ngai ta vek a.Tichuan ka hming te thlakin Mizoramah chuan hun engemaw chen ka awm ta a,ka hun kal tawh te chuan min tibuai tawh dawn lo emaw ka ti a mahse ka thil tih sual chuan min lo la um zui dawn chauh alo ni.Naupang chhungte chuan ka la dam tih an hrechhuak ta tlat mai a,an fapa thattuah min ngai bawk a,phuba lak ngei tumin min um zui tan ta a ni.Chutih lai chuan i nu nen kan innei tawh a,ani pawh chhungte nei mumal lo,fahrah a ni a.Ka hmelma ten min rawn nangching teuh hle tihin Burma lamah kan pem ta daih a.In unau in lo piang a,i u kum nga mi a nih laiin min rawn zawng chhuak ta a,i nu leh i u min thahsak a.Nang erawh ka chhan hman hram che a,Burma pawh chu kan tan a him leh tak loh avangin Mizoramah bawk ka pempui leh ta che a ni.

Tichuan bawihte,kan pem kual sek nachhan kha i hrethiam tawh ang chu.Ka hmelma te chuan kan pahnih a min thah hma chuan an duhtawk dawn si lo.Keimah chauh chu ni ila thih thleng pawhin ka bei let tur mahse nang i awm tlat si a ka thei lo a ni.I himna tur ringawt ka ngaihtuah avaangin i hlimna tur pawh ka ngaihtuah thei thin lo a nih kha.I hreawm ti hmel te,i mittui te khan min chhun na ngawih ngawih thin a,ka inchhir in ban a pel tak meuh meuh a ni.I lo piang dawn tih chu hria ila khawvela sum zawng zawng pawh hian ka thleng phal ngai lo ang che.Pa Ngaiha kha kan chhungte ni loin nangmah venghim tura ka rawih a nih kha.Ka hmuh phak loh a i awm pawhin a rukin a veng reng thin che asin.He lehkhathawn pawh hi ka thih hunah lo pe tur chein a kutah ka dah a ni.Tin,Sawmzuala kha ka thianpa an kahhlum tak unaupa fapa a ni a,a ni khan engkim a hria.I hmangaih ang bawkin ani pawhin a hmangaih che a,ka awm loh hnuah pawh enkawl zel che min tiam a ni.Bawihte,i tan a rinngam leh innghahna awmchhun chu Sawmzuala hi a ni e.Ka sawi sei ta e,i theih chuan i pa hi min ngaidam hram ang che aw.Thlamuang takin i nun lo hmang tawh ang che.Ka hmangaih che.

Ka pa lehkhathawn ka chhiar zo chu ka khur der der a,mittui vangin ka khawhmuh a phe ruai a.Chutih lai chuan tu emaw hian ka kut a rawn vuan a,mittui kar atanga ka han en chuan Sawmzuala alo ni reng mai!Kan inpawm nghal vawng vawng a,engmah ka sawi thei lo,ka mittui a dir zung zung a.Dim tein ka mittui min hruksak a,ani pawh a mittui a parawl teuh mai a."Mate,ka thutiam ka hlen ta e."Ka pa lehkhathawn chu a en vang vang a,"Pa Rin,i laka ka thutiam pawh kha ka hlen vek ang.Thlamuang takin chawl tawh ang che."a ti sap a. THE END. (Min chhiarsak tute chungah ka lawm em em e.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)