ANGEL BY NU Boihi Ngente (competition)

Ngaia
Site Admin
Posts: 25813
Joined: April 30th, 2016, 4:07 pm

ANGEL BY NU Boihi Ngente (competition)

Unread post by Ngaia » August 21st, 2018, 6:43 pm

ANGEL
(competition)

"Naktukah lo inthiar chhuak la a tha ang, inluahman i pe mumal thei bawk si lo a, kan nauten luah an lo duh ve bawk nen, inluah tur dang i lo zawng dawn nia" ti a, ka inluahna nu in min tih na aw ri chu ka hre chiang kher mai, khawsik tlun avang a khur bauh bauh chungin " Ka pi, hei tunah ka damlo mek a, inhlawhfa tur pawn ka chhuak thei si lo a, thlakhat tal min lo hrethiam thei lawm ni? " tiin ka khum atang chuan ka han melh tawk tawk a.
" Aaa.... Lo chhuak phawt mai teh, tlangval a pumpa, chhun lai lai a mut der der tur em ni? Inluah man pawh pe thei si lo, i that chhe ve hrim hrim ani " min tih let hrep avang chuan engmah sawiin awmzia a awm dawn lo tih ka hre chiang bawk a, ka ngawi reng a.
" Naktukah lo inthiar chhuak ang che" a tih nawn leh pawh chu ka chhang peih tawh lo. Min chhuah san hnu chuan ka khum bul a Diclowin mum khat chu phawrhin tuisik nen chuan ka lem pawp a. Vawt tih avang a la khur dar dar chung chuan ka thuchhuak a, a dik tak sawi chuan inluah man pawh tun thla tir atang a malaria avanga ka inhlawh theih loh avangin tun thla hi ka la pe lo mai chauh ani a, engtikawng pawh a min hnawgchhuah an tum ani tih ka hriat chian avang a engmah sawi zui lo kha ka ni reng a.
Ka nu leh pa te fapa mal leh an fa neih chhun niturin kum 1993 ah ka lo piang a, mahse ka pian atang a reilote ah ka nu in min boral san a, pa enkawlna hnuaiah ka seillian a, vanduaina zawng zawng hi ka ta a ni ta emaw tih mai turin kum 17 ka nihin ka pa in min boral san leh a, ka nu leh pate hi manipur lam a khawsa thin niin, chhungte remtilo chung innei a, mizoram lam a rawn tlan thla ta an nih avangin chhung leh khat laina belh tur tumah ka nei lo a, ka pa nen a kan lo luah thin chu luah chhunzawmin Ignou ah lehkha zir chhunzawmin mahni inhlawhfa chawpin ka inchawm ve tawk tawk a, mahse vanduaina chuan mi rethei ka nih avangin mi kian san hek lo le, hna ka thawh nasat luatah ka taksa in a tuar lo a, chutihnakalaiin malaria natna chuan min bawh bet a, harsatna dangin min umzuiin ka inluah atanga hnawhchhuah ka tawh phah ta.
Ka luna bur chu ka rawmawl chuan na ut ut khawpin ka hreng mar a, vawt tih avanga khur hlawk hlawk chung chuan ka tho a, ka thawmhnaw neih ang angte chu khumah chuan ka vawm khawm a, ka bag ah chuan ka beng lut a, ka thawmhnaw neih ang angte bag a ka khung zawh chuan khumah chuan thu in ka indawm kun tlawk tlawk a, " Aw Pathian, hetiang tur ngawt hian em ni khawvelah hian min lo dah bik le, ka nu leh ka pa min laksak tawh a, a tawk tawh lo em ni?" tiin ka rum vawng vawng a.
Ka hmai a rawn vawt thla raih raih chu ka han khawih a, retheihna, hreawmna, manganna leh fahrah khawngaihthlak mittui chu. A ni, hringnun hian ka tan vanneihna a herchhuah pui lo a, ka tan ni tha a chhuah pui hek lo.
Ka lu chu a rawn hai muai muai a, ka tawlh hla diai diai niin ka hria, ka mit sulh a, ka hriatna te chu hla takah an tawlh liam ruai ruai a, hei hi ka tawpna tur chu ani mahna, thi tur a rilru inpeih ran chungin, khumah chuan ka mu thla riai riai a, ka thim mup a, engmah ka hre zui ta lo.
Ka lu a khawihtu an awm tlat a ka hriatna chuan min ti harh a, thlalakah chauh ka la hmuh ka nu leh min hmangaihtu ka pa chu insi rial a dingin ka hma ah chuan an lo ding a, ka pa zawk chuan " Mama, chhel takin awm la, khawvel hi hlau ngai suh, i hma lam en la, nangmah i inkhawngaihna kha inhneh tir suh" min ti ni hian ka hria a, " ka pa, khawvelah hian ka mal asin, keimah chauhin ka awm a, ka harsatna min phurhpui tu tur pawh nei loin, engkim mai hi ka koah a innghat a, ka zo lo ani, ka nu, ka pa, min kalsan hma lutuk ani" tiin ka tap zawih zawih a..
Ka nu chuan " Bawiha, kei leh i pa hian kan kalsan ngai lo che asin, i kiangah kan awm reng a, i mal lo asin. Tho la, inti pachang rawh" tih pahin ka lu ah a rawn khawih a, min tawlh liam san delh delh ni hian ka hria a, ka au tuar tuar a, mahse hre lo ang maiin nui ver ver chung min bye bye lap lap chungin an tawlh ral ta a.
Ka harh chhuak zui nghal a, ka bag siam fel sa thlap chu ka bulah a lo la let ngat a, nikhaw hre loin ka lo awm rei viau ani ang, khua chu a lo thim tan deuh chelh chelh tawh a, ka khawsik pawh chuan min lo la kian san chuang hek lo a.
Ka bag chu ka ak a, inchhung khur bungrua ka neih ve chhun ang ang te pawh han thiar chhuak dawn ila, khawi hmunah nge ka dah ang a, khawilam nge ka pan pui ang tih ka hriat loh miau avangin a awm ang ang chuan kalsan turin ka dah tawp a, ka wallet ka han en a, Rs 50 chiah ka la neih chu akin ka nachhawkna (Diclowin) ei bang mum khat chu akin ka bag nen chuan chu hmun ka pa nen a kan khawsak dunna hmun chu khawsik avang a khup sai dar dar chung chuan ka chhuah san ta.

Pan lam tur bik pawh hre lo in ka kal tawp a, kawngpui chu zawhin ka theih chin tawk kal tawp chu ka tum ani ber mai. Thil ei chakna nei lo mah ila, ka mamawh dawn a ka hriat avangin Biscuit bawm khat 35 man ka lei a, ka pawisa neih zawng chu Rs 15 chiah ani ta.
Khua a thim a, vanduaina ti zual turin ruah a tla phuar phuar a,khua in a zir loh avangin mihrung veivak hmuh tur pawh an vang hle, a khat tawk a motor min rawn tlanpel thin tute tih mai loh chu.
Ruah chu sur bur bur lo mahse min nan reng avangin ka huh vek tawh a, khawsik lah chuan min kian san a tum der si lo, nachhawkna mum khat ka la ah chu phawrhin ka mamawh leh ngei dawn a ka hriat avangin a mum khat a ei lo in a lai takah ka bung a lehlam chu ka ak tha a, mi kawmtui lo far khawm deuh lai chu ka kutin ka dawh a, nachhawkna chu ka ei a, belh tur leh panlam tur bik ka hriat miau loh avangin hmalam pan chuan ka kal zel ringawt a.
Ruah lah chu a sur tam tial tial a, ka khawsik pawh a sang tial tial a, ka khup khur phe hlawk hlawk avang chuan ka kal zel thei tawh lo. Kawng sir a miin sak lai slap chhun tawh hnuai ah chuan ka vak lut thei hram a, cement ban ngheng chuan ka thu hle hle a, ka rilru ah chuan aw hian " Dam reng i tan tulna a awm hleinem, rethei leh vakvai ni ai chuan in tihlum mai rawh" min rawn ti niin ka hria, ka hawi kual a, engmah hmuh theih pawh a ni lo, a thim hian a thim mup a, ruah sur ri chur chur leg thli thaw ri leh hiau hiau thin chauh lo chu thawm dang han hriat tur pawh a awm lo...
" A ni teh tak e, kei hi engvangin nge ka dam ve reng kher ang? Thi ila, ka tan a nuam zawk dawn ani lawm ni? " tiin ka bag ah chu ka phelh a, chu inrel thlang lam chu panin ka bawk vak thla a, ka ke chu hawlh lawr thla in, khawvel hreawm kal san tur chuan ka buk liam thla ta, ri chawrh ri ka hria a, ka bing mup a, a thim zo ta.
-------------------------
Ka ke na ut ut chu ka hriat leh hmasak ber ani. Mi tawng ri nawk nawk thawm ka hria a, ka thi nge thi lo tih hriat chian tumin ka mit chu ka han meng diar diar a, ka hma ah chuan kawr var vek a inthuam, ka ke lam atang a min lo thlir rengtu chu ka hmu a, ka ngaihtuahna a lo lut hmasa ber chu " Kei hi mitthi chu ka ni ngei e, ka hma ami hi an sawi thin ANGEL ngei chu anih hi" ka rilru in ka ti a, mahse " Thianpa, i lo harh ta maw?" tia nui sang a min lo biak avang chuan ka mit ka han nuai a, damdawiin khumah ka mu mek ani tih ka hre ta a, ka hma a nula ding mek pawh chu angel ni lovin, nurse a lo ni zawk a, mahse angel pawh hi hetiang em hian an duhawm chuang dawn bik em ni le?? A sam chu a ngil siau a, a dar rawn vaw tawk vel a sei ani a, a hmui chu a senno chek a, a nuih seih zawng chuan a ha var nalh tak chu a lang var haih a, a nui hmel timawi zual turin a nuihzawngin a biangsum chu a lang kalh bawk a.

" I harh tawh tiraw?" nui sang a a rawn tih leh takah chuan bah deuh nak hian " Aw, ka harh e, helai... Helai hmun hi khawi hmun nge?" tiin ka lo zawt let ha a, nui var var chung bawkin " Civil hospital ania" tihpahin ka ban chu a rawn hlim lang a, venflon invuah sa ah chuan damdawi eng emaw hi a rawn chiu lut a, " He tah hian engtinnge ka rawn thlen?" ka ti ha a. "ummm... Ihhh... Mi in an rawn dah che a, an sawi dan chuan an insak lai bulah i lo mu a, i thi emaw an ti zawk a, mahse i lo la thi lo tih an hriat hnu ah helai hmunah hian an rawn hruai che a... Chhungte i nei em?"

Ka ngawi vang vang a, muang ban chalhin " Nei lo, he khawvelah hian chhung leh laina tumah ka nei lo" ka ti a, ni e, chhungte ka nei lo, laina pawh ka nei lo, upaiin 'vanlaitla' an tih ang mai a, mi vakvai chu kei hi ka ni.

Ka chhanna chuan a barakhaih hle ani tih a hmelah chuan ka hre thei a, sawi zawm leh mai tur pawh a hre lo a ni tih hriat takin min en vawng vawng ringawt a, ka nui lui sak a, " Ka nu leh ka pa an thi tawh a, unau leh laina tumah ka nei lo, nurse, diktak chuan he damdawi in a in enkawlna man tur pawh neih ka nei lo bawk, chuvang chuan min chhuah tir mai rawh" ka ti tawng a, thawhchhuah mai tumin ka ke ka han tiche dawn a, mahse ka ke chu tih chet rualloh hian a in cher khawng tlat a.

Khawngaihna leh lainatna mitmeng chu tuman kan hai lo, chu mitmeng ngei chu ka hma a nurse hmeltha leh duhawm zet mitmengah chuan ka hmu a, ka awmah chuan rawn nem in " Che suh, i khup ruh kha i sawh pelh a, karkhat tal chu damdawi inah hian i awm a ngai ang, in ngaihtuah hah reng reng suh, Pathian a awm alawm" ka lam hawi tawh miah lo in a inher a min kalsan ta a.

A hnu lawkah chuan Doctor hruaiin a lo let leh a, doctor chuan hmel hlim sang hian " E.. Tlangval i lo harh ta maw? Hei nurse Emily-i hian i chanchin min lo hrilh a, engmah lungkham tur a awm lo ania, dam takin helai atang hian i chhuak dawn nia, i tan mut tam a tha rih a, chuvang chuan Nurse Emily hian mutthilhna damdawiin han chiu che se la, naktukah chuan i harh var tawh mai ang " a ti a, ka ngaihbel em maw ni chutiang thu doctor in a sawi mek lai chuan Emily hmel chu hlim hmel sawtin ka hria a, venflon ah chuan damdawi chu a rawn kap lut leh a, ka mut chhuakin min zem nghal chiai chiai a Emily chuan" i hming tal te chu min lo hrilh ve la " a tih pawh chu ka mang hriat deuh ruai in ka hria" Bernard Lal.. hruai... zela" ka tih bah niai a, ka muhil zui nghal bawrh bawrh a....
Ka h meuh chuan zing ni chhuak chuan ka hmai a rawn chhun iarh a, ka mutna khum sir lam a damlo dang awm ve te pawh an lo tho ve hlawm tawh a, tumah biak tur leh min buaipuitu nei ve ta lo chu ka khumah chuan ka mu meng kar a, mi che vel chu ka thlir a, an chhungten duat tak an enkawl lai ka hmuhte chuan khawvelah hian ka mal zia min hriat chhuah nawn tir leh a, mahni inkhawngaihna chuan ka lung no a chhun a, ka biang chu a vawt raih raih a, ka mittui chu ka lukhamah chuan a far val kalh kalh a, chhungkaw pangngai nu leh pa uapna hnuai a seilian te chuan ka dinhmun hi an hre thiam pha lo ang, mahse kei fahrah leh vakvai hian hringnun pachang taka hma chhawn hi a har ka ti ani.

Nui ri har har ri ka hriat chuan ka lungphu a ti rang tlat, ka mittui chu ka hru fai thuai a, hmangaihna hi ka pa thih hnu atangin tu hnen atang mahin ka dawng leh tawh ngai lo a, laina, u leh nau, thenrual tak ngial pawh nei lo leh thian bul fuk pawh nei lo a awm ka nih avangin tumah a engkawng zawng mah hian hmangaih ka nei hek lo. Ka khawvel khawhar ah chuan keimah chiahin ka awm a, tumah an lut chhuak ngai hek lo, mahse chu nui ri chuan ka lungphu a ti rang tlat si. " Good morning" tia damlo te nui sang chunga zing chibai rawn buktu chu Emily ngei ani.

Ka khum zawnah chuan a rawn ding chat a " Good morning Bernard" a rawn tih ri ah chuan harh ve chauh ni awm takin ka hawi chhuak a, a nihna takah chuan ka khum zawn alo thlen huna ka lo awm dan tur leh ka lo biak dan tur ringawt ngaihtuah in ka ke na pawh ka lo theihnghilh thak zawk ani a. " Good morning Emily" tia lo chhan let ve chu ka tumna a, ka tirilah ka khur a, ka zam chhe zo vek ani ber mai, ka lo nuih let ve thei hram a.

" Tukin chu i harh deuh tawh ani maw? "

" Aaa.... Ummm... aw ka tha deuh tawh a niang " ka ti bah nuai a, ka chalah chuan rawn dekin" E... I khawsik pawh a hniam tawh alawm, i dam tha vat ang, hei apple ka rawn ken che a, ka nu bulah i chanchin hi ka sawi a, keng turin min ti tlat a" tih pahin polythene chhung a apple pum 5 vel awm chu ka khum lu dawhkan a rawn dah a. Lawmthu sawi tur ani tih chu ka hria, mahse he nula hian engthiltihtheihna nge a neih bik a, a bulah chuan ka lei hi thlun beh ang mai ani a, ka chung a lainatna leh khawngaihna lantir a awm chuan ka chhungril atangin min fan a, ka hrawkah hian engemaw in a hnawh a, ka tawng chhuah chuan ka mualpho mai dawn a inhriatna ka nei a, damlo dangte kan kual tura min kalsan hnu chuan ruak huaiin ka inhre lawi si.

Khawthlang vun var ho in " Love at first sight" an ti a, tawntirh hmangaihna hi engnge anih hre turin ka la tawng hek lo, mahse he nula hi ka tan midang lam tak ani. Ka bula a awm chuan ka khawvel hi a tawp thup mai niin ka hria. Tawp thup e ti lo chuan a nuam veng veng lawi si. Nuam veng veng mahse ka bulah chuan awm rei lo se ka ti a, ka bula a awm chhung reilote chu ral vat se ka tih laiin ka bulah chuan lokal leh se ka ti lawi bawk si.Chutiang rilru pu reng reng chuan chumi ni chu ka hmang ral an ni ber mai. Ka vanneih a siamin ka hliam pawh chu alo na lem lo bawk a nihnih a liam hnu chuan ka harh viau tawh a, wheel chair ah thu in varenda ah te pawh ka thu chhuak ve thei tawh a. Ngaihsak tu leh awmpuitu nei lo ta chu mut reng aiah tiin tlai ni tla tur chu thlirin ka hun liam tawhte ka thlir kir a, ka rilru ka kawm mai mai a....

"Ehemmm... Va lungleng awm ve" min rawn ti tu lam chu ka hawi vat a, kut hnung suih atin Emily chu ka lam hawiin nui sang in a lo ding a.

"Aaahhh... Aihh... Leng lo e, mut ringawt chu ka ning deuh a" tiin a hmel pawh en ngam lo in ka kun daih a.

" A ni lo ang, tu in emaw ngaih deuh i nei ani chiang mai "

" Emily, kei ni angin tu nge kan ngaih ve ang a, kan ngaih duhtu pawh an awm nang "

" E heu.... Ka hming i lo hre ve reng ani maw? "

" Hre teh reng mai...... Ka.... " ka ti uk a, ka sawi tum chu thulhin ka ngawi leh daih a.

" Bernard, pawi i tih loh chuan i chanchin min hrilh ta che.... " thutak deuh zawkin a rawn ti leh a.

" Emily, chanchin sawi tlak engmah ka nei lo, ka nun zawng zawng hi retheihna, tawrhna leh mal takin ka hmang a, ngaihnawm lai tur engmah a awm lo"

" Thawnthu ngaihnawm min hrilh turin ka ti lo che a, i chanchin ania ka zawh che " Emily chuan a ti leh khauh a.

Ka ngawi vang vang a, " Chuti maw? I ngaihthlak peih phawt te chuan " tihpahin ka wheel chair chu hmalam panin ka kal tir a, ni tla turin kawl a chhun en phut chu thlirin ka vahvaihna khawvel chanchin chu ka hrilh ta a. Emily chuan ngawi rengin a ngai thla a, ka thusawi tawp lamah chuan"...... Khang kha ka chanchinte chu an ni a, khawvelah hian nun hi thlakhleh chhan tur ka hre lo a, beisei tur pawh ka nei hek lo, thih leh dam hi ka tan ang khat reng aniin ka hria" ka ti chuai raih a.

Emily chu a ngawi vang vang a " Bernard, ka rawn hmasa lo che a, i duh dawn nge dawn lo chu ka hre lo a, mahse min hnial lo turin ka ngen hmasa duh che a, doctor sawi dan chuan naktukah hian i chhuak thei tawh dawn a, nizanah ka nu leh pa nen kan sawiho a, naktukah hian ka nu leh pa te nangmah hruai turin an lokal dawn a, i dam that a hna i thawh theih hma chu kan inah i awm duh ang tiraw? " tiin ka mitah tak min en a, he nula hi eng ang mihring nge anih a heti em a ka chunga khawngaihna nasa a lantir le.. Makti takin ka en reng ringawt a, Emily bawk chuan" Min hnial lo ang tiraw? " a ti leh a.

" Emily, ka chunga i thatna hi engtikawngmahin ka rul thei ngai lo ang che, thian ang a min kawm duh leh ka bula ka thusawi i ngaithla duh ringawt pawh hi ka tan chuan a hlu lutuk tawh asin, mahse keimah vanga inchhungkaw tihbuai chu ka pawm thei lo ang.... " ka tih avang chuan Emily chu a kun deih a.

" A nih a ngenin ka ngen che, khawngaih takin.. Bernard"

Ava mak tak em!! Kei mi vakvai, lainattu leh hmangaihtu pawh nei lo, mi rethei leh fahrah hian lainattu ka nei ve ta.

"ummm... Bernard... Ka nu leh pa ka hrilh ang aw" Emily chuan a ti nawn leh a, duhtlan tur dang leh pan tur dang nei lo chuti tak a min ngaihsaktu sawmna chu ka hnial phal bik lo ani. Ka lu ka bu nghat a....

Emily chuan " Yess.... Ka nu leh pa kan hrilh ang nge" tih pahin hlim leh pheikhai zang takin min luhsan ta a
------------------------

EMILY te in a ka awm ve atanga thla hnihna ani a, tiang hmangin ka duh ang angin ka kal kual ve thei tawh a, he chhungkua hi Pathian hriat chhungkua leh hmangaihna a insuihkhawm chhungkua an ni tih ka hrechiang tial tial a, ka inthlahrun an hlau in fapa duat takin min duat a ni ber a, mahse inthla hrunna leh inkiltawihna chu a bo tak tak thei lo..

Harsatna dang ka neih chu Emily ka duhna chu ani, unaupa ang chiahin min nelin min duat a, ka bulah thu in a ti ti a, hlim takin min kawm bawrh bawrh bawk a, mahse kei chuan ka hmangaih ani.

Kei lu nghahna pawh nei lo, mi vakvai, mi khawngaihna ring a nung ve mai mai tan a beisei phak rual ani lo tih chu a hrechiang bertu ka ni, keimah leh keimah vawitam ka inhrilh nawn hnu leh ka rilru atang a dah bo ka tum hnu pawhin ka thunun theih piahlam thil ani tlat si. Ka hmangaih ani, ni e, ka phuloh leh ka cho loh leng zunah ka uai ani. Ka duhna leh ka hmangaihna chu nitin a zual a, keimah ah hian a khat liam a, a ruk a ka lo hmangaih ve ringawt pawh chu zak ngawih ngawih tur ka ni asin, ka phu lo hul huall ani, mahse ka hmangaih miau si.

Emily bula awm tam lo chu tha ber dawn a ka hriat avangin ka roomah ka tawm deuh chawt a, room kawngkhar chu hawngin zan thla eng ruai hnuai a Aizawl khawpui de neuh neuh chu ka thlir vawng vawng a, hmangaihna zungzam in a phuar vel tan chuan lungleng a kur pui vawng vawng tham in a mawi a, Ka room kawngkhar lehlam lawkah chuan ka hmangaih chu a awm a, mahse ka hnaih thei si lo. Ka ngai a ka thlahlel a, mahse a bulah ka awm thei si lo.

Ka room kawngkhar chu a rawn inhawng ri rak a,

" Ehemmmm... Va leng awm vang vang ve " tih pahin Thingpui no chawi chungin Emily chu a rawn lut a.

Min biakna pawh chu chhang lem lo in ka lo nuih ringawt a..

" Tunlai hi i danglam riau mai... "

Ka la chhang chuang lo...

" Bernard, nuam lo i tih zawngin kan awm em ni? Chutiang ang a kan lo awm anih chuan min ngaidam rawh aw" fiamthu hauh lo hian Emily chuan ati a, ka la chhang chuang lo...

" Mawh Bernard, i pawi kan sawi em ni? "

" Emily, chutiang engmah a awm lo, ka chunga inthatna hi ka tan chuan rangkachak tam tak ai pawn a hlu zawk asin"

"A nih leh ngatinge i inlak hran tlat a, kei pawh min be ngai lo a, room ah i inkhung tlat a"

" Ka mawl em avangin ka inhrem ani hi?

" mawl vang a inhrem maw? ""

" Aw ni e, mi mawl, mahni pawh inhre chiang lo leh mahni phutawk pawh hre lo ka nih hi " ka ti bung nghut a..

" Eng nge a awm zia? Chutiang teh nuai chu engnge anih a??! " Emily chuan a ti ha a.

" Emily nangmah hi mawle.... Ka hmangaih che ani, ka mawl i ti em? Inkhawngaihna zar a nung ve tawk tawk hian ka hmangaih che a, ka thlahlel che a, ka ngai che a, ka mamawh bawk che. Vawitam tak he thil hi tireh leh theihnghilh ka tum hnu pawhin ka thei lo a, hmuh tam loh che a, biak tam loh che hian a reh mahna tiin hetiang hian ka awm ta anih hi"

Room chu a reh vawng vawng a, Emily hmel chu ka en ngam hlawl tawh lo a ka kun nghal char char a, ka room atang a a chhuah lai pawh chuan en pawh ka en ngam lo.

Emily chhuah hnu chuan ka thlan tla zawih zawih chu ka hru fai a, khumah chuan ka mu thlawp a, zahna chuan min tuam hlup hlup a, ngahnge kha thil kha ka lo sawi kher kher le? Ka phulo tih hre reng chungin ka rilru alakah ka puang chhuak lui talh a, mi mawl tak zawng ka lo ni e. A tan han duh chi leh han pawm chi rual ka ni lo, hmangaih let tlak ka ni hlawl lo a, ka dinhmun pawn a zir hek lo. Ka chung a athatna chu a ni lo zawngin ka lo dawng sawng a, tunah chuan engkim ka ti chhe zo ta. Thil pakhat chiah tih tur ka nei ta. Ka thawmhnaw he in ka luh dawn a ka neih ve chhunte chu ka bagah chuan ngawi rengin ka khung khawm a, duhsak tak a min lei sak thawmhnawte chu khumah chuan fel tak a remin ka dah thlap a, zan reiah an mut reh hunah in ka chhuahsan ang.

Zan dar 12 a rik rual chuan thawm dim takin inchu ka chhuah san ta a, ka khup na chuan kal la ti harsa deuh mahse muang changin a hla thei ang ber thlen tum chuan ka chhuak leh a, ka hringnun a a vawihnihna atan chenna tur in nei lo in vahvaihna khawvel chu ka dai leh tan ta.

Zinglam dar hnih a rik meuh chuan ka chau tawh hle a, ka hma a dawr kawt cement chhuat zau lai chu panin bang ngheng chuan ka thu a, he hringnunah hian vahvaih mai loh chu chantur engmah ka lo nei lo anih hi.

Ka lo muhil sek ani ang, Scooty rawn ding chik tuarh thawm chuan min ti harh zawk a, "Bernard... Rawn haw rawh" chang deuh fel fawl hian a rawn ti a, Emily aw ani tih ka hai lo, street light engah chuan a bianga mittui luang chu ka hmuh hmaih lo chiang kher mai.

" Emily... Tun ang hunah........ "

" Eng vang nge ni a i rin? Nangmah vang anih hi... Rawn haw rawh"

" Ni lo e, Emily... Min haw san rawh"

" Chuti em em a i nin tur chuan kan lo awm em ni, zan a a ruk a ral a chhuah san tur khawpin maw kan in chu a lo hre awm a,? "

" Emily, chutiang ani lo, nang nen a in pakhat a khawsa dun tlak pawh ka ni lo, unau ang a i hmangaihna kha.... Kei chuan dawngsawng thiam lo in ka lo........... "

"Ka hmangaih lo che tih ka sawi em ni? Kei chuan hospital a ka hmuh hmasak ber atang che khan ka hmangaih tawh che asin, chhanna pe tur che in hun reilote chu min lo nghak ve lawk thei lo em ni?" kei chuan min hmangaih ve theih takin tiin hunrei tak ka nghak che asin....... Dar kar thum em pawh min nghak thei lo amaw? " a mit atang chuan mittui a luang ngiai ngiai a, ka insum zo tawh lo, ka pawmthlawp a, " Emily.... Ka hmangaih che asin"

"Bernard keipawn ka hmangaih che....min han fawp teh "

Emily hmui no sen siah chu ka fawp vawng vawng a, chutihlai chuan thim thuneihna kiangin khua a lo var dawn ta tih hriattir tu atan ar an rawn khuang thliai thliai a, inkuah rial in dawr kawtah chuan kan thu a, beiseina thar leh nun thar a bul min tan tir tu ka ANGEL chu kuahin nithar lo chhuak chu kan nghak dun rial a



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)