DINGDI PAR BY Maxx Mizo ( competition 2018 )

Ngaia
Site Admin
Posts: 25813
Joined: April 30th, 2016, 4:07 pm

DINGDI PAR BY Maxx Mizo ( competition 2018 )

Unread post by Ngaia » August 21st, 2018, 6:44 pm

DINGDI PAR

( competition 2018 )

( " Boihte...thihna chauh lo chuan min ṭhen lul suh se" titu te hrîngnun lamtluang chu....)

Varanda zau nuam tak mai ah chuan a sir hual vel hian pangpâr chi hràng hràng hi pot-ah chuan an khawi a, chung pangpâr te chuan he ni thàr duhawm leh boruak thiang vàk mai hmang hian, he khawvel vanduaina leh mangànna te hi rawn chhem kiang se ti ni awm fahran hian par an chhûangin an vûl chêk mai a,mit anti tlaiin boruak pawh ati thîang hle a ni,rose pâr te chu zing daifîm hian a bawh huh chîal mai bawk nen, hringfa te tan hian pangpar hi an hlû in nun an va ti hlim ṭhin em ka ti ṭhin.
He rûn ngaihawm tak hi he khawvela ka lei pangpar mâwi ber riah rûn remna leh lu nghahna anih vang chauh a máwi ti a ngainâ ka ni hauh law...mite in anga concrete ropui leh khir ûn lah ani hek lo, hmun rem taka sak assam type ve mai hî ani a,mahse a design erawh a western reuh riau thung.
Kum liam ta mai pawh a he rûn mawitu leh ti hlimtû ber.. Chu tleirawl te chû, lu thle deuh bám chung hian wheel chair-ah ṭhu in thlasik nilûm, varanda a rawn in kap lut eng îar mai hi nuam tih hmel taka chhing diar diar chung hian alo ai a.
Amah avang hian ani tuk dang anglo taka zing zing a ka thawh tak,Ka rilru leh mitthla ah a châm reng a,engvang a ka thinlung chu luah a mi helhkham tlat nge anih tih erawh ka hre bik hauh lo, ln chhung dungah chuan ka vei tawn chhen a,sana kan en a hma chu ala hmâ khawp mai, mahse a tawpa tawpah zawng ka insum theihna hian a tlin ta ngang lo a ni'ang e... tuk thuan ei pawh nghak hman lo chuan ka in siam sawk sawk a amah tlawh tur chuan ka kal tak ni.
An kawt ka va thleng ta cheng a, ahma a amah hmuh chak avang a phi rûai kha,eng in nge min mawlh ta le, va pawh mai ngamlo hian an pawn gate tlàng vuan hian ka ding a,ka en vâng vâng a,ni thlar hnuaia a hmel lainatawm tak ka hmuh chuan ka thinlung hi lungngaiin a rum a,a rum tak meuh meuh ani,heng a tawrhna zawng zawng te hi tu mawh nge ni le..?
Thinlung aṭang a chhuak lainatna mittui chu dan pawh tum hram hram mah ila dan zawh rûal loh hian a rawn hnâm ṭiam ṭiam a, mittui khâp per fap fap chung chuan ka thlîr reng ta zawk a.

A hmel dawl dâng tak leh a chal a ser kham phei rîak te chuan ka thinlung chhungril ber pawh a ka theih nghilh leh ngai rêng rêng tawh loh tur thu hi min chah nawn âwn âwn hian ka hria, aw..ka va lainat teh reng em.
Kawrlum phiar sen nô hi alo ha reuh a,a ban vei lam chu rawn tawn pûartu a awm velo tih hriat tak mai hian a uai thla hnîang a, a kawng hnuai lam puan var sâr maiin á akhuh hnuai ah chuan, a chawnban nô leh zên sei thlarh mai ni thin kha..!! tunah zawng thisen lumin a zawm loh, che theilo leh thi tawh tih hai rûal loh a cher leh sawng nawi chu a awm ani tih ka hre si a, heng chauh pawh hi ani ang nula awm nêm leh zaidam,nun nêm tan chuan tawrh tawk a tling teh reng nen hian, engvang kher nge i thluak sawh khawlo a i hriat rêngna leh zel i hlauh tak le...he khawvel ah hian nula vanduai leh khawngaih thlâk i va ni teh lul em..Lalpa engkim a mizia leh nun zia hretu ini e, a tawrh na te hi a nasa in a râpthlak iti ve lo em ni le.? khawngaih takin a hriat rêngna tâl hi chu neih let leh tir hrâm rawh.
ka mittui chu a hnâm mai pawh ni tawh lo hian a dir hian a rawn dir zung zung a, mahse atan enge ka tih theih chuan..ka mittui maw ? a kianga hetia awm châuh hi maw ni le..? ka tih theih hi avan tlemim ava beitham teh lûl em, mahni insitna hlir in ka khat a, chu chuan sawng saw hlawtna rêng a nei si lo.
Nilo..nilo..mahni insitna chauh hmachhuan in mittui nen chuan a hma ah ka in lân tur ani lo, damna erawh zawng ka pe thei hauh lo tih ka hria, mahse tlem te tâl pawha a hlimna thlentu a nih phah hlâuh tak in hlim hmel tâl ka lan tir tur ani dawn lawm ni, ka rilru no tak aṭang chuan ka inti pau khauh a, ka mittui tla chu ka hru hul a, gate chu hawngin alam pan chuan muang chang hian ka pan phei a.
A bul ka thlen chuan zawite hian a koki chu ka khawih a " Boihte i dam em,enge ilo an " hlim der ( ni e hlim ang taka ka lan a ngai a lawm ka thinlung tak tak hi ka phawrh ngam si lo ani ) hmel tak chuan ka ti a.
Zawi mûang hian mi rawn en a, mahse a hmel ah chuan ami hriat ngai leh atan a mi bîk ka lo nih ṭhinna awm hmel rêng rêng a lang lo..aw hman ah te kha chuan min hmuh ve leh ka lam pan hian alo tlan a min kuah cháng chàng pahin " Boih i dam em? min ngaih vanga lo kal ini ti raw, mawh min hrilh teh, kei chuan ê ka ngai lutuk che a sîn" tiin hlim em em hian min lo lawm ṭhin kha ani si a,tunah erawh zawng kan hun tâwn hi hriat thiam avan har teh lul êm..hlim taka minlo lawm tur chuan tun hunah erawh ka phût in ka beisei tawh hauh lo mahse khâng hun kha ka thinlung kil khat ah hian ala rîak ve rêng si a ni.
An in kawng a, atan ka lei sak ziah thin ( a naupang lawm iti mai thei mahse kan in kara hmangaihna leh in thlak hlelhna avang khan pang chang der te kha nuam kan ti a,kan lawm te hi a ho in kan hlim dun thin a sîn ) chocolate chu pek tumin ahma ah chuan ka lek vâ a, mit khap lêk lo hian ngun em em hian a thlir a,lak a tum tawh lo emaw ka tih hnu chuan,a ban neih chhun lam chu a rawn phar chhûak a.
Chhei râw le..!! engthil nge ni ta ngai,tun hun ah hian chhum zing kar atang khîan Lal Isua hi mi thiang hlim lawr turin rawn chhuk ta pawh nise katân mak ti a han meng phar âwn âwn na tur a awm bik lo ang, ka mit vai emaw tiin ka mit te chu kan nuai a,ka mit reng a vai si lo,makti êm êm hian ka thlîr a, awm ngaihna reng reng ka hre lo, ka rilru chuan kil tin kil tang a dap kual a,ka ngaihtuahna chu avak thui ngei mai, min barakhaih a min ti lawm bawk si..chu a thil ken dingdi pâr vuai khawro vek tawh chu meng bial kawk kawk chung hian ka thlir a, ava mak em tih chauh lo chu sawi tur rêng ka hre lo.
Ka thil ken chu rang takin ka thlauh vat a, ka bawh rûak a,pawm chung chung pahin a biang ah chuan ka fâwp a, ka en a ka fâwp leh thin a, a mak ani..amak ani..
" Boihte he thil hian i nun ah thu ala sawi maw..!! ani thei lo,ka ring thei lo..nang chuan kan sulhnu leh nun hlui engmah reng hrîat i neih tawh loh kha ti raw,sawi teh a dik em?" phun sêp sêp hian ka ti mawlh mawlh a, amah hre chiangtu tan chuan he khawvel thiamna leh finna zawng zawng aṭang a chhut pawh in thil ni thei hi ani mawlh si lo atin ni.
An in ka thlen hma a,a nun asam alo suk a khuih mam sak siau chu chul hliau hliau pah hian " " Boihte ka hmangaih che, ka ngai che,ka dam chhung hian ka thlah thlam lovang che, nang pawn e he thil...mi te tana pangpar vuai khaw ró mai mai nia an ngaih hi ngai hlu in,i nun chawmtu, i hriat reng na tlemte i neih hmun luah a, i thinlung rîl ber hmun lailum changtu atan ila thlang hi ka lawm in ka chhuang lutuk che..mahse kan chung a thil thleng hi kei pawn kan hma hun ka hriat loh vang ani, khawngaihin min ngaidam rawh aw" ka tih ri te chu hre awm pawn alang si lo,theih nise ṭah hawm hawm ka van chak tak em.
. Miten an thlir dan tur ka dawn pui a, mi anglo leh piangsual, hlut na neilo chhawrna awmlo tiin an sel ngei ang chê ti raw..mahse e ka tan chuan he khawvel a ka lei pangpar mâwi ber,ka nunna ai pawh a ka ngaih hlut ini tih hi hre reng rawh aw ka hmangaih..aw theih nise i tawrhna leh hrehawmna zawng zawng hi tawrh sak theih che ni ila chuan lawm takin ka tûar tur,chu chu Pathian hnen a ka rilru tawngtai na pawh ani fo reng a ni.

A nu rawngbawl chu alo chhuak a " E...tukin chu iva hma ve, ti khan lo awm lawk r'u aw, eirawng ka bawl lak lawh em mai,thingpui ka rawn siam dawn che nia" tih pah chuan a lut leh nghal a.
Min be ve thut mahna tiin beisei deuh si ring ngam chiah si lo hian ka en hâ a,mahse min be lo anga, a tawng bawk hek lo ang, a chhan chu a bul aṭang a tun hûn thleng hian amah hre chiangtu ka ni bawk si. aw..ka bei hi ava dawng em.
Thil sawi duh nei ni awm hmel tak hian min en a,nghak hlel tak hian ka thlir a,mahse hriat loh hmel taka min thlîrtu mai lo chu chhan na reng ka dawng si lo,hlim taka kan awm laia anûi ri..boruak thiang leh van dumpawl rûih mai hnuai a, phul hmun cham del sira luite luang rî her her,a kam thing hnah nem zar bela chungleng sava hlim taka an chiar nak nak ri ina a chawih vel ang mai a ri mawi kha hriat leh ka van chak ngai em...!! boihte..nui teh,ṭawng hram teh,vawi khat chauh tal pawh min biak zai i rel dawnlo em ni..ava nâ em ve le ka thinlung hi chemte a vih ang ngawt ngawtin ana a,ka tan tawrh zawh rual ani lo,tumah reng hian min hnem thei reng hian ka ring lo, heng zawng zawng hi keimah vang ani si.
.Dingdi par vûai khawro vek tawh chu ka en a..aw heng te hi an vullai a van tawi em, hringnun zinkawng tawi zia lan tirtu,thui tak anga lang si hian then khat tan zawng chhum lo lang a ral leh mai ṭhin ang hi a ni.
Boihte nimin ang leka reilo khâ ani lawm ni he dingdi par mawi ti em em a kan thlir dûn kha..!! kan nunhlui ngaihawm tak te kha Chiang em em hian ka rilru chhungril leh mitthla ah chuan an lo lang a,ṭap lo thêi ka ni lo...( min hrethiam mai teh u )...a hma ah chuan ṭhingṭhi in amal kuah tlâk pawh awm tawh lo khawp a sawng nawi nîaih chungah chuan ka hmai ka phum a, ṭap zawih zawih chung chuan kan hlimlaini leh vûllaini te ngaih tuah reng chung chuan sulhnu tuipui thûk tak ah chuan kan nun hlui chhui kir leh turin ka pil ta riai riai a.

. ************

Nîkir thla chawhnu lam a ni a, kan ṭhian ho chuan college canteen ah thil kan ei a, lll yrs lai kan zir ve tawh avangin in thla hrung lo tak hian kan ri nak nak hlâwm a, tui in tura kan din chhuah chuan kan piah dinglam pang bang kil dawhkan a, inthla hrun hmel tak a nula pahnih chow lo ei hi ka va hmu thut mai a,ani lo hâwi chhuak ve chiah nen chuan kan mit chu a in tawng Chîang hle mai, ka thinlung chu a phu nghal dawt dawt a, ka awm dan te chu a lai rút ta ve ang, zak teh mah ila mit lak sawn chu ava har em.!! a hnu deuh chuan zak sen ṭan ṭan chung hian a nui seîh a, a ṭhiannu chu in phen tir deuh hian a plate chu a khal niap niap a.
He hun leh darkar ngei aṭang hian ani tih danglam a ka awm tak, chunglam thlarau thil tih theihna vanga tih dang lam nilo in nulat tlangval in hmgaihna lam vang zawkin a ni.
Canteen aṭang chuan kan chhuak a, ka taksa chuan kal san mahse ka rilru leh thinglung erawh a hnenah khân a awm ani tih ka chiang hle mai, ṭhiante anga mi hawi zâu leh hmui politician, SU an nih leh mi khawsa thei an nih vang a nun zalen hâlh mai han ni ve ila chuan, ani hnen ah khan thu kam khat te pawh kan thlah ve tur hî ania le, mahse kei ve mai hi zawng kei ve mai kha ka la ni rêng si.
College kan ban hnu a ka haw kawngah te chuan kha nula kha ka ngaihtuah a,mî tan zawng hmeltha tak tia han sawi tur chu ani hauh lo, mahse ka tan zawng he khawvela ka mit la bêr pawl ava ni teh lul em.
Tleirawl chho ṭan tir zah zum hmêl tak phen a, a hmel nû hnap mai,zing daifîm ina a bawh chiai mai kara rose par kuhmûm, rawn pâr chhuak ṭan tir ang maia duhawm leh rimtûi kha...he khawvel a thil hmuh nuam bêr pawl ani ka ti leh pek thin ang..a hmui sen nô chêk mai chhunga a ha vâr rual sang mai lang tura min han nuih seîh mai te kha tuar ahâr in ka tui ral zo ta.
A mit meng mâwlh mai kha... Alps tlang sang lai bêra, vur var sâr ang maia thiang leh fîm, thlang lenkawl a chung tûrni liam turin a rawn chhun tlê sep sep ang maia mâwi leh mihip na ngah ani sî a, a hmelṭhatna leh duhawmna hi keia tan zawng sawi fiah thiam phâk rual ani lo,a hmelṭhatna ti zual tura a taksa in phut mâwi tak te...aaa.. a pianzia sawi fiah tur chuan a chawn ban rem zâih a jeans leh college t-shirt a haka mipa ho in an thlir dauh dauh ṭhîn hian a hrilh fiah chiang ber awm e, tin e..a awm bâwr vawng al mai step kan kal chang a, hâh avanga in sêp kang dârh dârh te khan ît awmna thianghhlim an pai a, heng zawng zawng ai pawh a, a mawina ti zualtu chu 'MIZO' mizo nula ngei a ni hi a ni.
Amah avangin mizo a ka lo piang ve hi ka lawm zual a, ka vawi khat hmuhna lêk mah nise a tâwn ah chuan ka luang liam a, ka duhna leh hmangaihna chu ka thinlungah hian a khat a, a khat liam zawih zawih ni bêr hian ka hria, zan mut hmun ah te hian canteen-a min rawn nuih seîh lai te kha ka mitthla a, duhthusam na nen mut zâi ka rel a beiseina nung nen thawh zai ka rêl leh ṭhin a ni.
Hemi kar tluan hian ka zawng ru deuh na a,mahse ka hmu hauh lo, zak chung chung hian ka ṭhiana hnen ah ka zawt a, ani lah mi zau halh tih takah ṭhian dangte hriat ngei tur hian " A ṭha..aṭha lutuk, kan ṭhiana hi mi pangngai ani ve dawn ta, kut ilo beng ang" nui uar uar chung hian atia,mahni lo maha zah nak a laiin.
" Tak tak an a, fresher aniang ka lo thli thlai pui dawn che nia " ati awlsam leh et lawi si.
A kar leh chuan kan college hian fresher social kan nei a, kan ṭhian ho chu tlema kan tlai deuh avang chuan tlar hnung ṭhutna awl awl ah kan ṭhu a, keipawh ka ṭhian pakhat nen hmeichhe pahnih chauh ṭhut na awl ah hian kan ṭhu ve mai a, ka bula ṭhu nu chu kan en a, canteen-a ka hmuh, a sakhming pawh ka hriat loh-î ngei kha lo ni in, a rûk tak chuan ka lawm lutuk hi ka khu chîai chîai ni berín ka in hria,
A mipa zawk tih takah zah theih loh kan chhuah a.
" I va vâng ve,college i kal ngai lo mi " tawng mai a.
" Nia..ka pi te tlawhin kan zin lawk a" mi zah vang nge ka ngaih bel zawk a hmel chu sen ṭan ṭan hian ka hria.
" Kan college ah hian i lut ṭan nge,ka va'n hmu ngailo che " ṭawngkam te chu bungin zei loh theih ngei mai,huii haa.
" Aw..hmanni deuh khan admission ka ti ve chiah a" tih pah chuan min rawn nuih seîh a, ka ṭhianpa zawk a nuih emaw tiin ka va ên, ani lah midang bia in leh lam alo hawi daih si, ka zak ve deuh vang nge ka zei loh ala kal tlûang ni, tiang reng reng chuan in sawi luh chu hlate khua ang a ni.
Ṭhu ho ta na náná chu kan titi zel a, kan in pawh tawlh tawlh a, a hming leh veng thlengin ka hre ta ka van lawm em.ka rilru chu a nui ver ver a,ka thinlung duhthusâm a in sang tak ka lo sak chu ka pui tlin thei ngei dawn in alâng, a chhan chu mi nuih dan leh mi biak dan aṭang hian mi hâw lo ani tih ka hre reih ruai tlat a ni.
A sei lutuk loh nan kai tawi mai ang aw......nia hun leh ni a liam a, ka duhthusam leh beisei rûk chu alo thleng dik tlat mai le, ani nen a kan in karah chuan hmangaihna par alo ṭiak a,duat taka chawi lian dunin, lûngchim takin a par zû chu kan dawt dun a,kan hlim dun in kan in lungrual dun em em a, keia tan tak phei chuan hei bak baka hlimna a awm chuang lo, hringnun hi a mawiin dam ka thla hlel thâr a, mi ten " The heart is full of love when the world is full of beauty " an lo ti hi ka nunah hian a van thleng dik teh rêng em.
Boihtei zûn a uai hi zawng ana ani,ka thla hlel ém ém a, a tello chuan ni khat lek pawh hi kar tam thla tam ang hial a rêi niin ka hre ṭhin, class banin atu zawk zawk pawh tlai ila dawh thei takin kan in nghak ṭhin, he khawvel hi kan ta emaw kan ti hial ta ve ang.
Inter college sport meet kan nei dawn a, field sir aṭang chuan ṭhu dun rial hian individual item chu kan thlir dun a." Boihte engati nge in tlan siak ah te khuan i tel ve loh" ka ti a.
" Awi..kei te chu sport lam hi ka ti gailo hrim hrim a lawm, nang pawh i tel chuang a mi"
" Nangte chu khung ek bathlar hnuk dulh dulh ho ai khu chuan i pianin a zîr em a i tlan chak daih zawk ang chu ka ti"
Mi chum taih taih pah hian " Mi bawl suh aw..kan tet laia kan in robber zuan ṭhin bak thiam pawh ka nei lo" nui hak hak hian ati a.
" Boihte ka rawh kan tel ve chuang lo field chhak tlang ah khian lêng daih ang" tih pah chuan ka kai tho a, in kai rial hian kan chho dun a.
Tlang kan thleng deuh chauh tih chuan khawpui hi a rawn ri dur dur a,thawk leh khat ah ruahpui van awn hi a sûr ta mai, thing buk hnuai hi kan chuh a, kan hul phah chuang lo, ka kawr pawn zawk chu ka phelh a in kuah rial hian kan khum dun a, mahse pahnih tan zawng a bei tham deuh ani.
" Boihte keite chu mipa ka nia huh mah ila a pâwi lo" tih pah chuan khum tir ka tum a.
" Boih.. mipa pawn vawt an hre ve thei tho alawm ka rawh kan pahnihin i khum dun ang" ati hnâp mai a.
Mi zawn ṭhaṭ pah chuan mi kuah seuh seuh a, ka hul loh a hlauh lûat ah amah zawk chu a huh hniang mai a, vawt ti a akhurh hleuh hleuh ka kuah lum laia, a pangti lûmin min ur ham ham lai te kha..aw..lung zawng avân ti leng em.
Tlai khat chu " boih naktuk chu city park ah leng ang hmiang" hi ati reuh a.ka chak ve thu ka hrilh a,mahse a tuk ah chuan geography practical ka ti ata langin boihte nen kan thu thlun khâ ka lo mang nghilh der mai, ka hriat chhuah chuan bak leng hian city park lam chu ka pan a, khua lah chu a thim dawn rûai hi a ni tawh bawk si.
A hmun ka va thlen chuan dawh thei tak hian min lo la nghak a, "Boihte min hre thiam rawh,ka buai lutuk a" in thlahrung tak hian ka ti a. hmeichhia a nih vang pawh nilo in ka thiam loh líau líau ani a, min lo hau in min ân khum bawrh bawrh pawh nise thiamthu sawi tur reng reng ka nei lo,mahse ani chuan thinrim a hnek hian.
" Boih..ka lo nghakhlel lutûk che a, ka ngai em em che ani, nang min ngai ve em"
Chu thu kan hria chu rôpui ka tiin ka va lawm em,ka hmangaihna a zual in pawm chûk chûka fawh vawng vawng ka duh ani,ka hmangaihna hi a sangin van hîal a tawng a mihringte teh phak rual ani lo,amah ka tawn avang hian Pathian hnen a lawmthu sawi mawlh mawlh tur ka ni.
Tin e..kan nun hlui ka sawi hmaih phal ngai rêng rêng loh chu, sunday tlai khat chu tlang theng thaw nuam em em ah hian kan leng dun a, hmar thlifîm te chu a rawn thâw heuh heuh a, ral leh lam tlang ngir khup mai chung zawn a, chhum var leng delh delh mai te chu mawi ti em em hian kan thlîr a, phaitual hnim chungah chuan in kuah rial hian kan ṭhu a, kan hma hun tur te thlirin beiseina nen duhthulêng kan sam a, he khawvel ah hian tu dang reng kan ngai lo.
Dîmte hian min kuai her a, a kawhna zawn kan en chuan kan thláng lawk kham pangah hian mawi em em hian dingdi hi alo pâr a.
" Awi.. boih a mawi zia khu ti raw,nang mâwi iti ve em"
" A chhun che nih khu" ka tih lai chuan lawm avang hian a nui sen sen a.
" Ti khan lo awm lawk rawh aw ka zu thliah ang che"
" Ngailo,a awi rôpui si i lum palh ang" tiin min pawt tlat a.
" Boihte.. i tan chuan thih leh nat pawh ka huam asin" ka tih lai te kha.. tun ah erawh keima tân zawk a tuar ta si,mihringte hian kan hma hun minute khat lek pawh hi kan va hre phak lo tak em.
Hun a rala Boihtei nen hlim takin hringnun kan chhiar dawn emaw kan tih lai chuan,kan dam chhung ni te hi hlimna leh lawmna hlira khat alo ni hâuh bik si lo, zan khat chu mi rawn phone a.
" Boih lo leng lawk teh thil pawimawh deuh sawi tur ka nei" a rawn ti a,a aw aṭang chuan a mangang hle hian ka hria, ngaihṭha lo tak hian aw ka lo kal nghal ang tiin ka in siam a, an in pan chuan ka kal nghal a,an in ka thlen chuan varanda aṭang chuan rawn tlanin min kuah hnawp a.
" Engati nge boihte,eng thil nge ni ta min han hrilh teh"
" Boih tun ah hian lecturer pakhatin min beisei a ka nu leh pa te hian an be ṭha in kan chung ah thil ṭhalo tâk an thlen tir dawnin ka hria" ati niap niap a
Chu thu chuan min va ṭhawng tak em, ka din hmun ka ngaih tuah a,nu leh pa thih san, thingtlang aṭang a neih thinglung khâwng tak meuh meuh a lehkha zir, thawh chhuah pawh la neilo ka ni a, ka nu leh pa te khan sum leh pai engmah reng min hnut chhiah si lo, min hnut chhiah chhun ka khum bula ka tar he thu..
" RETHEIHNA CHU THAWHRIMNA IN HNEH LA, HLEMHLETNA CHU RINAWMNA IN HNEH ANG CHE, SUAL CHU ENGKIM A I ENGKIM PATHIAN HMINGIN HNEH ZEL ANG CHE"
Tih thu ka nun kai hruaitu atân a ka hman te chauh hi a ni, ka dinhmun ka thlir a ka va beidawng em, " boihte ka hmangaih lutuk che i nu leh pa rem tihna ngei a kut in suih chu ka duhthusam ani tih i hriat kha, mahse i nu leh pa tên i tan ti a an beisei leh mitthla erawh keimah ah chuan engmah reng hmuh tur a awm si lo, khawngaihin min hre thiam la,ka hmangaih em che vangin kei chu hrehawm tuarin awm mah ila,i hlimna leh i nâwmsak na tur anih dawn phawt chuan ngai tak chung che in ka kiang mai ang" ka tih laia, mittui tla zawih zawih chunga min kuah in, he thu lûngkuai thlak tak mai ka thinlung zawng zawng chhun tlang a ti keh sawmtu.
" Boihte...thihna chauh lo chuan min ṭhen lul suh se" tih thu min hrilh kha ka bengah hian dar rimawi avâ ni em, tun hun thleng pawh a kan thu tiam ni ta chu. ava ropui em.
Mangang tak chuan ro kan rel a, lungngaih mangan kar ah zawng dawn a tawiin thil ropui tak ngaih tuah avan har em, kan duhthusam zawng ni hauh lo mahse kan theih tawk ni miau hek le..naktip mai a INRUK chu kan ti tlu a, engtin tak chuan kan hma khûa chu ni zel dawn maw, engtin nge? engtin nge? tih lam kan dawn lo hei erawh kan chiang,engkim hi hmangaihna vang liau liau a ni.
A tuk mai chuan kan khaw motor lam chu kan pan a, a bag ah chuan thawm hnaw tlem hi a keng a, motor ah chuan kan ṭhu a,a rum dut dut a kan vang khaw lam pan chuan kan kal ta, kut in vuan rial hian kan ṭhu a, a lu chu ka dar ah nghatin " boih engtik nge kan thlen ang,in thlen vêleh ka inbual ang a, mu daih ang aw,mahse i pi leh pu ten mak anti ang em, ka zeilo ropui si ka bulah awm zel rawh aw...awi kei chu ka zak e" ati siam siam a
" Boihte lungngai reng reng suh i kiangah ka awm zel dawn a lawm, hotel ah puar tawkin chaw kan ei ang a, in thlen ve leh kan mu hahdam vang vang dawn a nia" ka tih chuan a thla pawh amûang a niang a thaw sek sek a.
Beraw thlang quarry kan thlen chuan motor dang nen hian kan in sul pel a, kan motor-in a ken na lam ah kawng thlang lei nem a rap hlauh mai..kawng thlang kham sang em em ah chuan kan liam ta.
Hmangaihna avang a tlang rel,retheih pachhiat engkim tuar hûam,beiseina sâng tak leh hlim taka hma lam hun thlir chunga rûn hmun len dun zai rêl te tan chuan khawvel a thim taaaa...khawvelah hian vanduaina leh tawrhna chauh lo chu chan tur rêng kan nei ta lo...a râp thlakin hringnun hi zawng ṭah leh rum na mai ani zo ta.
*************

Nia...khang kan nun hlui zawng zawngte kha tun ah chuan chatuan atan kir leh ngai réng réng tawh lo turin zamual an liam ta, boihte....nangnen a in hmangaih leh in duat tawn dun taka run hmun lêngin fanau maltluan chawi dun a, christian chhungkaw duhawm leh hlim thei tak kan din ang chu tia duhthu kan lo sam ṭhîn te kha, tunah chuan thamral silo mitthla beiseina erawh zawng thamral mai tur an chang zo ta..aw kan nunhlui ngaiin ṭah khûa a sei dawn mang e.
Boihtei mal, kuah tlak pawh awm tawh lo sawng nawi niaih mai khuhtu puan var chu ka mittui chuan alo luan huh hniang mai a, ka tho a dingdi par vuai khawro vek tawh chu a sam ah chuan ka tawn tir a.
" Boihte he khawvelah vanduai ṭah khua sei mahse, lei piah lam ramah chuan hlîm takin kan leng dun dawn nia aw"tiin a chal ser kham phei rîakah chuan dimte a fawpin ka pawm vawng vawng a, ami hmangaihna leh ka hmangaihna min hriatpuitu, chu DINGDI PAR chu kan tân chuan he khawvela pangpar mâwi ber ani fo ang.

NB : Nupui pasal neih kawngah hian tlan chak lutuk chu in chhuih bah palh a awl ṭhin.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)