HAKUNA MATATA BY Kim X Hmar (Competion)

Ngaia
Site Admin
Posts: 25813
Joined: April 30th, 2016, 4:07 pm

HAKUNA MATATA BY Kim X Hmar (Competion)

Unread post by Ngaia » August 21st, 2018, 6:50 pm

HAKUNA MATATA
(Competion)

Teruata -
A lam pana rawn tlan phei mek chu ninglo tih hriat ngawih ngawihin a lo thlir reng a, Zothani chuan nui sang chungin a rawn kuah nghal thlawp a, "Ka lawmpui lutuk che Te" Teruata chu a nuisak a, "Engmah anihloh hi" ati a, Zothani chuan "Wow wow wow Best Composer of the Year pawh ' Engmah nilo ' iti tawh mai chu ani sia, i vawi hnih khat dawnna mai pawh nilo mahse fiamthu pawn tiangkhan sawi tawh suh. Mi nuaih tam takin i dinhmun an awh zia te hi i hria em?" nui put put chung chuan ati a, Teruata chuan "Awle Boss, tawng pial palh zeuh hi i chang ran emaw tih tur hian i awm a, i bula awm hi chu counselling class kal nen ka intehkhin thin. Mahse ka lawm e aw, ka tana tha tur duh vanga min zilh hau thin tu hmasa ber leh a awmchhun inia. Ka seilenna fahrah inah kha chuan mimal taka thahnem ngaia min zilh hau tu ka nei ngailo a, ka thinlung tak takin ka lawm lutuk ania aw Zote" tih pahin Zothani biang a'n piai zeuh a, Zothani chuan "Ehh, i thusawi chuan lung ava kuai ve, tap mai lo la" ati a, Teruata chuan "Naa chutiang zawng kherin min fiamlo la, kan tawng lo hrepha ho in thutak hla takah min laksak palh ang" ati hna hna a, Zothani chuan "Kal ang, i Boss hi ka pum a ruak, chuan 'Naa' tih kha tun minute, tun second, la la hian sim hmak angche a tuai tlat" ati a. Award Ceremony atang chuan Teruata leh Zothani te chu an inzuichhuak a. Teruata chuan hman atanga Zothani hnena a hrilh chak ngawih ngawih thin, kum engemawzat chhung a rilru luahtu leh amah Zothani vanga hmeichhe dang pawh melh ngailo a a awm thin thu chu hrilhna hun tha anih leh nihloh a rilru a inkhap nasa hle a, nidang ang bawkin a hlawhchham leh angem...

Ryan -

"Tu maw inih?"
"Ryan ka nia, Ryan Lee. Nang engtin nge ka koh angche?"
"Mapui min ti dawn nia"
Ryan - "Hming nalhtak anih ngei ka ring, i hming tawp min hrilh thei angem?"
Mapuii - "Mizo in hming hmasa leh tawp, a hranin kan nei ve ngai hleinem Mr. Lee"
Ryan - "Cool .. A mak hle mai, chuan kan tan thei tawh angem"
Mapuii - "Tehreng mai, khawngaihin a bul atangin a fiah thei ang berin min han hrilh ta che"
Ryan - "A lawmawm hle mai Miss Mapui. Chuan ka'n tan nghal mai anga, London-ah lehkha zir a awm char char ka nia, nimin lawk khan ka lo haw a, airport ah hmeichhe pahnih hi anlo inbe mawlh mawlh mai a, eng tawng nge an hman pawh ka hre miahlo, mahse an thusawi awmzia ka hre tlat, eng tawng nge tih pawh hre miahlo in an tawng ka thiam ve anihber chu! Zah pawh dawnlo in ka va be tawp a, India ram, Mizoram state-a cheng anni tihte min hrilhin, Singapore -ah hian hna thawk a awm niin, Mizo dang tamtak pawh an awm thu te min hrilh a, anni chu haw mai tawh tur annih vangin nangma address hi mi pe a,mifel tak inih thu leh ka hriat duh ang apiang nangmah lo zawt zel turin min chah bawk. Ka rilru a zawhna tamtak awm siin zawh tan mai dan tur che pawh ka hre chiahlo"
Mapuii - "I thusawi chuan beng a verh hle mai Mr. Lee. Mahse Mizo -te hi kan darhzau ve tawhin, khawvel kilkhawr ber berah pawh hmuh tur kan awm ve zel tawh asin, ka sawi tum tak chu London-ah lehkha zirin i awm thin a, chulai hmuna Mizo awmte tawng ilo hrefuh palh anga i thluakin chhinchhiah tawk aneite pawh anithei mai lawng maw"
Ryan - "Chu chu thil nithei chu aningei mai mahse an tawng kha a then chauh nilo in a vaiin ka hrethiam vek si ani Miss Mapui. Mizo itih nen hian enge maw tak inzawmna kan neih ka ring nghet bur! A hmasa in kanu ka biak angai ani. Nidangah hun ineih dan a zirin kan inhmu leh thei angem?"
Mapuii - "Tehreng mai, phone call pawn minlo be thin dawn nia, inthlahrunna tur engmah a awmlo ania"
Mapuii chuan Ryan chu a car thleng thlahin an inmangtha ta a. A haw kawngah Ryan chuan Mapuii chu a ngaihtuah zui neuh neuh a, anu leh Mapuii vunrawng leh hmelhmangte chu inang riauin a hria a, anu chu Mizo ani ve thei mai angem, apa Chinese ni si amah Ryan-a'n Chinese rawng a kailoh zia te a ngaihtuah neuh neuh a, anu chu Mizo lo nive ta pawh nise tinge an zep kher? Eng thildang nge anu leh pa te hian a lakah zep anla neih ang? A nu leh pate hrin nilo in an fa lak anihte a inring hial a. Ryan chuan a thil tawn mek mumang ang maia mak leh buaichuar chu a mit a men ruala bo vek thei nise ti hle mahse, suangtuahna khawvela chen a hunlo tih hria in, a chheber tawng turin a rilru a puahchah a, a thudik zawn mek chu thu dengkhawng tak lo ni pawh nise, pachang taka awm turin amah leh amah a infuih sauh sauh bawk a.

Teruata -
Night Club thawm bengchheng tak karah chuan Teruata chu a thu ngawi reng a, Zothani'n lamtual atangin a lamna lama kal tura koh nan alo hui zeuh a, alu thingin a hnawl a, thu chung chuan Zothani lamlai chu ngawi renga a thlir mek laiin, a bulah hmeichhe pakhat hmelkeu ve pangai tak hleitling zet mai chu lo thu ve in, Bartender hnenah Vodka no khat lam pah chuan Teruata lam chu a hawi a, hnai set sawta en pah chuan "Hi" tiin hriatngailoh lenghermawii chuan a khuhhawn nan bul a'n tan te te a, Teruata chuan chhang lemlo in a lam hawi chuan nuisang chungin a bu nghat ringawt a, inhnarna mawihnai tak ani tih a hre ve ani em angchu a be zui lemlo a, Teruata duhdan tak pawh ani reng a. Zothani'n mipa pakhat a dara dawm paha sexy tak maia, a lam vel ava hmu thut chuan barakhaih zawh hlim ang maiin a thinphu chu ati pangai thei meuhlo! Thikna in a luah khat a, a rilruah thil tamtak a rawn lang zut zut, a duhzia a hrilh mailoh vangin amah leh amah a indem hle nghe nghe, thian ang baka a hmangaih vanga Zothani'n alo haw ta anihpawn tun aiin a tawrhna anep zawk daihte a ring rum rum a. Zothani tihel nan tiin nachin lawkah pawh a biak that peihlo hriatngailoh lenghermawii chu a'n be tha hnuhnawh leh vel a! A kut vawnsak pahin a number a dil a, Zothani'n "Te haw tawh ila, zan a tlailam deuhhlek tawh ania" a rawn ti a, Zothani lam pawh hawilo chuan "Minute khat lawks" tiin a chhang a, Zothani tihel nan hriatlohlengi kut chu a fawp zauh a "Kan inhmu leh vat dawn nia" ati a, an chhuak ta a. Haw kawngah chuan rei tak anngawih dun ren rawn hnu-in Zothani chu a tawngchhuak hmasa zawkah a rawn tang a, "Chhaithardi tawn meuh zawng nuam iti bawk maw? Ka awm ve tih pawh i nghilh zo ta emaw tiin suihlung ka lo phang hman asin" fiamthu titak deuhin nui har har pah chuan ati a,
Teruata chuan thutak leh thinrim insum tih hriat tak si chuan, "Nangzawk alawm nuam ti" ati bul hmuk a, an boruak chu a uap tan ta! Zothani pawh chu a tawng zui zel ta biklo. An in kawt an thlen chuan Teruata'n car atih din hma in car kawngkhar alo hawng a, ati ding ta maw tih veleh rang lutuka chhukin a kal nghal nal nal a. Teruata chu a haw kawngah chuan a inngaihtuah nasa hle a, an boruak chu ama tihchhiat liau liau ani a, khati khawpa thikthu pe chhe tur khan dikna aneilo tih a inhre bawk, chutia rilru fim taka a inngaihtuah hnu chuan a inthiamlo hnuhnawh hle a, Zothani hnena ngaihdam a dil dan tur a ngaihtuah a, a rilru chuan thil chi hrang hrang a dap kual nasa hle, engber nge tha ang awh?

Ryan -
"Ngati nge he thu ka zawh apiang che hian min pehhel a thudanga i pakai daih zel a. Eng thil chiah chu nge ka lakah zep inneih. Kanu diktakin min han chhang teh infa lak em ni ka nih"
"Nilo Ryan. Kan hmangaih lutuk che asin, ipa damlai pawh khan i tana a inpumpek zia i hriat kha"
"Kanu khawngaihin in hrin ka nihloh vang ringawtin engtin nge ka hmangaihna cheu a dal phah ngawt ang le, thudik anih pawn sawi hreawmna tur a awmlo"
"He thil hi sawi tawhlo ang. Airport a thil thleng kha chu thil thleng palh satliahah ngai tawp rawh. Bawiha engtin nge heti em em a i rilru a kap mai le. Khawngaihin min zawt tawh lo la theihnghilh ang thlenglo angin ngai ang"
"Min hrilh duh siloh chuan keimah ngeiin ka zawnchhuah angai dawn tihna anihchu. Mizoram-ah chuan ka kal dawn"
"Khawiah mah i kal hauhlo ang Ryan Lee! Inu thu hi i awihlo ang maw?" anu awka vin tak avangin Ryan chuan mak a tiin a tawng zui biklo a."Ka fapa lo thu teh hetah hian" awka nem duai chuan a bula thu turin Mrs. Lee chuan Ryan chu a ko a, Ryan alo thu fel ta maw tihah a kut a vawn pah chuan "Mizoram ah chuan i piang a, keipawh Mizo ka nia, ipa pawh" Ryan chuan zawi sapin "Kapa pawh maw" alo ti vata, Mrs. Lee chuan "Aw ipa, ipa diktak, ipa nia i hriat thin leh 'Pa' tia i koh thin nilo zawk" Ryan chu a meng phawk nasa hle a, a mitmengah chuan zawhna tamtak a inphum a, anu vek chu tawng chhuakin "Ipa ni a i hriat Mr Lee kha mifel tak ani, ipa diktak thiantha tak niin, sumdawnna lam atanga inhmelhriat anni. Khanglai khan Mr Lee chuan vanduaina a tawk hlauh a, a sumdawnna kha tlakchhiat hmabak a a awm mek laiin ipa in puih a tum a, business plan liamtham tak hmachhawp annei a, kan sumdawnna kha ipa leh i patea ten an enkawl dun thin a, ipa thil tum kha i patea'n a kalh tlat avangin Mr Lee leh ipa chuan an thil tum pawh chu an thulh leh phah a, sum tlem a zawngin apui ta zawk ani. Chutia an thil tumber an hlawhtlin taklohah chuan Mr. Lee pawh chu a karleh mai a haw turin a inbuatsaih ta chuk chuk a. Chumi ni vek chuan ipa a rawn haw ta reng renglo mai a! Police leh mi tlawmngai ten an zawn ngial pawn an hmu zolo a, ipa bo atanga ani nga naah iu a bo leh a, chutah zet zawng mu leh mal ka nei thei tawhlo ka a vek a, engmah ka ei theilo,ka mu thei heklo. Mr Lee chuan chulai hmun chu kantan a him tawklo-ah ngaiin a rualin Singapore -ah kan nufa chuan min hruai ve ta a. Kan thlen tirh chuan rilru kimlo ang maiin ka khawsa a, nanglah kum 3 mi lek ila ni bawk si, Mr Lee khan a bat ang maiin kan nufa hian tha takin min enkawl ani. I tetlai khan heng tuna ka sawi tak zawng zawngte kha engang pawn zep mah ila sawichhuah angaih hun ala awm anga `Apa diktak ka nilo tih a hriat hunah min hua angem? Min hmangaih loh phah mai angem le?' Tiin a sawi fo thin asin a engkima engkim ini Ryan" Mrs Lee chu tap chung chuan a inhnit hlawp hlawp a, Ryan chuan "Kapa i rila rah ifa ka nilo tih ka hriat hian ka hmangaih zual sawt zawk che asin. Kapa van atang khan minlo ngaithla tiraw?" tiin mittui far zawih zawihin a sawi a an nufa chuan inhnem tur zawk pawh awmlo in an tap dun ta bawrh bawrh a. "Kapa leh ka u bo dan chu tihpalh thilthu anilo kanu" mittui kara Ryan thu rawn sawi chuan anu chu a barakhaih takzet ani, "Bawiha theihnghilh ang, ka chan ve mai angche tih ka hlau em mai" , "Kanu khawngaihin min danglo mai rawh. Thil diklo liantak a awm ani, ka zawngchhuak ngei bawk ang". Ryan chuan Mapuii call -in hun aneih chuan zanin la la a inhmuh a duh thu a hrilh a, Mapuii pawh chuan hun aneih thu hrilhin, a ina kal turin a sawm ve ta nghal a. Mapuii in a thlen veleh Ryan chuan vial chial khawmuanglo in anu thil hrilh zawng zawngte leh Mizoram-a kal a tum thute Mapuii hnenah chuan a hrilh nghal a. Mapuii chuan, "Aizawl-ah i innghat anga, ka cousin pawh inluahin a awm ve a, a bulah i thleng thei ang. Keipawh thla lehah ka contract a zo dawn a, ka part time hna pawh ka chawlhsan fel tawh a ka rawn haw thuai ang. Theih tawp kan chhuah dawn nia" tiin a theih ang angin Ryan chu a tawng thlamuan a, Ryan chuan,"Nilo e,ka thil tih tumah hian mal tlat ka duh. I inhuamna avangin ka lawm lutuk mahse hmelma insiam in, thil hlauhawm tak pawh kan hmachhawn thei, dinhmun derthawngah ka dah theilo che u. I cousin inah pawh chuan ka thlenglo mai ang, Hotel-ah ka innghat zawk ang" tiin a hnial a, Mapuii chuan, "Nilo ka cousin bulah chuan i thlen ngei ngei angai ang. Thil engkimah apui thei che anga, bakah Aizawl hmun hma engmah i hre silo min hniallo mai rawh" ti a thiam taka a thlem hnu chuan a pawm ve ta hram a. Mapuii chuan a cousin chu call-in a tul ang angte a hrilh zawhah Lengpui Airport a lo hmuak tura chahin an in mangtha ta a.

ZOTHANI IN

Teruata chuan Zothani in kawngka chu a kik karh karh a, a rilru chuan ngaihdam dil dan tur a zir lawk mawlh mawlh a, a phone call ni tamtak alak duhloh vanga a mangan zia atangin a'n tan chhin vel a, a ngaihtuahna alo kawm mawlh mawlh lai chuan kawngkhar chu a rawn inhawng a, a rawn hawngtu chuan a mit ala nghal zak mai. Chupa a hriat ngailoh thawmhnaw pawh ha lo a towel chauh venga lo ding ran chu a nam sawn dawrh a, Zothani thingpui in paha lo thu mek chu ava pan ding nghal a,"Zothan hetiang hmeichhia hi maw ilo nih a" ati nghal thawng mai a, a thinrim chuan khua a hmulo in sawi awm leh awmloh pawh a ngaihtuah tawhlo. Zothani chuan a ngaihna hrelo takin "Enga?" tiin alo chhang a, Teruata chu a insum ve deuh a, pangai takin "Kawngkhar minlo hawnsak tu kha tunge?" Zothani chuan, "Thil hrechianglo a thinrim hi sim rawh" tiin a chhang a, Teruata chuan dam duaiin "Awle ka tihpalh Zote, thianpa nangpawh minlo hrethiam rawh aw a thleng nawn tawhlo ang" tiin thupha a'n chawi kual a,"Nilo e ka hrethiam lutuk che alawm thawmhnaw ha lo in kawngkhar ka lo hawng kher a keima thiamloh zawk liau liau ani. Engpawh nise Zotei nen hian inhmelhriatna hranpa em em kan neilo a, Mizoram-ah hian hmelhriat ka neilo a, min khawngaihna vang liau liaua minlo tuamhlawm ania, tu pawimah sawi ka tumlo, in inkar a buaina thlentu nih pawhhi ka duhlo. Vawin la la hian Hotel lamah ka insuanchhuak nghal ang. Engpawh nise thianpa, Ryan ka nia ka hmu che chu ka lawm hle mai" tiin Ryan chuan Zothani chu a tawng khalh a, Teruata chuan Ryan hawihhawmzia a hmuh chuan a inthiamlohna a zual telh telh a,"Hming mawi tak anihchu Ryan. Teruat tiin min ko dawn nia" tiin dam diaiin a chhang a, Zothani'n lo chhunzawmin,"Inthlahrunna tur a awmlo Ryan, vawina thil thleng kha chu kan nitin tihdan phung pangai ve hrim hrim anihkha ngaiah ila nei thuai mai ang, i insuanchhuah hi kan phal lo bur" ati a, Teruata pawh chuan,"Ni e Ryan i insawnchhuak tur anilo ani tawp mai. Thian kan ni tawh a, a tulna leh min mamawhna apiangah kan inpuitlang ang" alo ti ve bawk a.

SOMEWHERE IN AIZAWL

First Person - "Kapu, naupang awmna fahrah in chu kan hmuchhuak tawh nimin khan keimah ngei kalin ka chian nghe nghe. Mahse kum 16 mi lek anih laiin alo tlanchhuak ani awm e, han chhuizui vak ngaihna a awm rihlo"
Second Person - "A tetlai khan lo that fel mai ila tha tur ania. Min va tibuai phiangsen ve. Motor in a sut a a hriatna a hlauh vang ngawtin i duh thlanna tlaktlailo avang khan a nunna kan zuahsak a, tunah kei minti buai tel leh si. Ngatinge mawhphurhna zawng zawng chu i lak mai loh"
Third Person - "I tawngkam kha fimkhur deuh teh Pu Mawi. Apa khan company a a chanvo zawng zawng a fapa hming khan dahin a ruang tal kan hmuhloh chuan engmah kan khawih che thei dawnlo tih kan hre lawklo ve ve. Tumah indem thei kan awmlo"
Second Person - "Ni e, Pu Lian hei inthlan a hnai tawh si a, ka tan tun tuma ka tlin a pawimawhzia min hriatpui kha, chuvang chuan inthlanah hian ka rilru ka'n sawrbing deuh anga inthlan zawh veleh naupang zawn chu kan tan lehnghal dawn nia"

ZOTHANI IN

"Ryan iva phur hmel ve vawin chu, i thil buaipuiah chuan chanchin tha tharlam a awm tawh em ni? Hriat ava chakawm ve" Teruata chuan pehhel kuallo chuan a zawt a, Ryan chuan chhang vatin,"Nia hei ni engemaw zat chu hmasawnlo a ka awm hnuah ka beidawng lek lek tawh a mahse ka u ni thei awm ka hmuchhuak tawh a, ka u bo hunlai vel nen khan a inmil chiah a Motor in a sut avangin a hriatna a hlauh a, Newspaper velah te a chanchin an chhuah a, tuman an ngaihvenloh avangin fahrah inah an dah ta mai niin ka hriatna chuan min hrilh a, khanglai kha ka chhutin Mr. Lee-a'n Singapore ah min hruai chhoh hnu ania, chuvang chuan kan hrelo anih ka ring. Ka u chu ka va lainat tak em, eng harsatna zozai nge a paltlang ang tih ka ngaihtuah ringawt pawh hian ka rilru ana ngawih ngawih", ati a, Teruata chuan,"Theih tawp i chhuahna avang ringawt pawh hian iu tan chuan a lawmawm viau ang. Puih ingaihna apiangah min hrilh hrehlo la. Kan chhuak tep ve tho a, darkar khat hnuah meeting kan nei dawn a kan rualin lo kal la kan thlah kawi che anga" tiin a sawm zui nghal zat a, Ryan chuan,"Nilo e taxi ka ko a. Bakah in pahnih khan hun thawl te in mamawh ang ka kalsan zawk angche u anih phawt u" tiin a kalsan ta zawk a.
Zothani - "Chhuak ve nghal mai ila"
Teruata - "Lawk Zote, sawi duh ka nei"
Zothani - "Um sawi la. Darkar chanve hun inei"
Teruata - "Hman zana Club a kan kal zan kha tihpalh lutuk aw. In lamlai khan mipa pakhat dara i kut i nghahlai ka hmuh khan ka thin a rim thut a, chuvang chuan i thik nan khanu kha ka be ve mai mai anihkha, a hnuah pawh inbiak zuina kan neilo"
Zothani - "Ngati nge ka thik chu i rin ngawt a"
Teruata - "Aa englo ania thik tihlemah..."
Zothani - "Sawi a harsa viau ami min duh tihhi"
Teruata chu a ka hau a, mak a tiin kum tamtak alo sawi theihloh leh a hreh em em chu awlsamte in Zothani zawk chuan a rawn sawi mai si a.Teruata chuan hamhaih vanga tawng bah deuh nuaih chung chuan,"Zote englo chu chu khami kha engtin nge i hriat a"a ti a, Zothani chuan,"Mi a nileng ka ni bik hleinem. Diktak chuan i bula thunu khan hnai deuha alo be lai che kha ka hmu cheu alawm, nanglah khan inuih vela, chuvang ania ka bula ding hmasa ber darah khan ka dawm ve tawp. I thik nan ka tih ve tho anihkha. Kan inrul tawk viau in ka hria" ati a. Teruata chuan lawmna in buala awm nimaiin a inhria a, hringmi zaleng heizawng zingah tungchho a kal tawh phawt tana hlimna vawrtawp chu tawng baw mekah a inngai a. Zothani thusawite avang chuan tlema ngampa ve deuhin,"Zote ka lakah chutiang rilru ipu ve anihchuan tinge engmah min hrilh ngai siloh" ati a,Zothani chuan,"Oi chu chu ka sawi awm tak zawk anihchu mawle! Tinge nangmah zawkin engmah sawi reng reng i tumloh, keite chu hmeichhia ka nia, nangma sawi hmasak kha a mawi zawk alawm" ati a, Teruata chuan, "Ka tihpalh, hei chen sawi nan hun lo nghaklo ila tha tur ania" ati a, Zothani chuan,"Tunah pawh ila sawi chuang miahlo ania aw, ka sawisa ring mai maiin 'aw' iti ve lek chauh chu anihkha" nui har har pah chuan ati a,"Eng eng emaw chu ka sawi ve nual kha aw, sawilo tawp bik chu ka ni miahlo ania" tiin Teruata chuan a chhang a. An hun tawn mekah chuan an hlimin tudang an ngailo hle. Teruata chuan phone call a dawng a, a hlim hmel chu thawklehkhatah ngui hmelin a thlak nghal vek a, an inbiak zawh chuan Zothani hnenah,"Meeting zawhah tihtur pawimawh ka nei a, ka thlah fel hnuah che ka kal anga, ka kal zawh veleh haw hma in hetah ka rawn kawi leh phawt ang" ati a.

Ryan -

"Aw kan Home -ah hian a awm thin ngei alawm, mahse helai hmun hi chu kum10 hnuailam tan chauh anih vangin kum10 an tlin veleh kan sawn chhuak thin" tiin Home Mother chuan a hrilh a, Ryan chuan,"Anih insawnna Home hming chu khawngaihin min hrilh thei angem, a unaupa ka nia" ati a, Mother chuan,"Awle mahse an puitlin hnu a Home atanga an chhuah tawh hnu hi chuan an awmna chin hriat ngaihna a awmlo ania, chuvang chuan i beiseina tisang vaklo la chu ka ti khawp mai" tiin a chhang a.
Ryan chu au an sawnna home ni a an sawiah chuan a thleng a, lut mailo chuan a kawta dingin a'n hui pap pap a, huphurh hmel tak chuan a lut ta a."Kum16 vel anihkhan a tlanchhuak daih tawh. Chuta chin chu a awmna kan hre tawhlo hrim hrim!" chu chhanna chuan Ryan rilru chu ati beidawng takzet, inher a kal mai a tum lai chuan,"A thlalak i duh em? Naupang zawng zawngte hi an rawn luh tirhin thla kan laksak vek a kan dahtha thin". Thlalak pek pah chuan,"A hmingpum chu Lalruathlua ania,mipa naupang hmeltha tak ani" ati a. Ryan thinlunga beidawnna zam mup mup karah beiseina chhete chu thu chuan a rawn tuh a, atan chuan chu beiseina chhete chu amah tihphurtu leh bungthar a kai nan a pawimawh hle.
Ryan chuan a unaupa naupanlai thlalak chu ak pawh aklo chuan a keng reng a, a en vang vang a, a hmelhriat leh hmuh tawh hnu ang riaute chuan a hria a, mahse a awmlo hranlo e, a unaupa ani miau a, a thlum a al ei zaa lo chengho thin chu a hriat hnu anglo se chuan a mak zawk ngei ang tiin a ngaihtuah a. Karlo ah in a thleng a, Zothani chu dawhkan bulah chuan ngui nghiaiin alo thu ngawi reng a, Ryan chuan,"Zote ka'n intifai lawk anga chuan vawin ka kalna chanchin ka hrilh angche ati a" a thlalak kenlai chu dawhkanaah a dah a,bualinah a lut ta a. Ryan intifai zo hlim lo chhuak chu Zothani chuan,"Thingpui ka siam a, ka la in biklo ilo thlen hma deuh lawk khan ka thleng ve a,kan thleng rual deuhthaw. Teruata chu tihtur anei a, a zawh veleh alo kawi leh ang" alo ti nghal zung zung a,"Teruata nen hi chuan in inhmeh ve ngawt mai" Ryan chuan nui pah leh chhaih deuh titih chuan a'n fiam a, Zothani chuan,"Diktak chuan min duh thu min hrilh nan hun a duh rei lutuk kha ka haw thin, mahse lehlam takah chuan a nula mi loh em avang hian ka ngaih a that phah letling bawk sia" ati a,Ryan chuan nui chung chuan,"Inneihlam hi ngaihtuah vat ru in sih tan tawh ania" tiin dawhkan a a u thlalak a dah chu ala kang a, a ipte a dah a tumlai takin Zothani chuan,"Lawk kha thlalak kha, Teruata hian a wallet -ah englai pawhin a dah reng zel sia, engtik laiin nge alo thlauh hman le ava fimkhurlo tak wallet ami te han thlauh theih" ati a, Ryan chuan phawk deuh hru chuan,"Han en chiang teh, ani tak tak em? I chiang maw?" ati a,Zothani chuan,"Aw chiang lutuk tlat" alo ti vat a,Ryan chuan,"Vawinah Mercy Home -ah ka kal a ka unaupa tetlai thlalak anih thu min hrilh a he thlalak hi minpe alawm" ati a, Zothani chuan,"Mercy Home maw? Teruata awmna thin alawm. Anih chuan a awmzia chu..." mak tihna nen chuan a sawi ban deuh chap a,"Teruata hmingpum hi i hre mial em?" Ryan chuan a tawngkam leh a hmel atang chuan a phur hle tih a hriat a,"Lalruathlua ania" Zothani chhanna chuan ava tilawm chiang tak em. `Kanu ka unaupa chu ka hmu tawh asin' tiin a rilru chuan anu in a hriat ve a nghakhlel hle a. Teruata lo let hlan mawlh chu an pahnih chuan an nghakhlel a. Zotei chuan Teruata chanchin leh a mizia te Ryan chu a hrilh a, ngaihnawm a tiin anu nen an mizia inang ati em em a, a ngaihtuah chiang a an hmelte pawh a inang ati leh hnuhnawh hle. Anu thlalak Zothani a hmuh ve a, Teruata nen an inan zia chu hai rual anilo! Zothani chuan,"DNA test buai pawh angailo hle mai, zawngfianphel diktak anni" ati khauh pek a, an nui dun leh hak hak thin. An boruak chu hlimna in a tuam vel ani ber mai. Chutia hlim taka an awmlai chuan kawngka rawn kik karh karh thawm chuan an beng a luah hle, Teruata anih ringin an tho rual thawt a, kawngkhar lam an pante chu a tlanin an tlan ani ber e! Kawngkhar an hawng chiah chu rinloh leh tumloh takin Mapuii alo ding nui var var a, chu aia mak lehzual chu Mapuii bula ding chu ani. Ryan chuan,"Kanu nang maw!?" ati zawi sap a. An bungruate an dahfel zawh chuan an han thukhawm a,"Zote ka fapa ilo mikhual avangin ka lawm hle mai, i chanchin hi Mapuii leh Ryan-a atang hian a thalam hlir ka dawng thin a, hmuh che ka chakna a rei tawh asin. Kei hi Lianhmingpuii ka nia, Ryan-a nu. Nu Puite tiin min ko dawn nia" tiin Pi Puitei chuan bul a'n tan a,Zothani chuan,"Ryan ivan bengvarlo tak! Inu te chu min inhmelhriattir ve bawk tur che alawm, amah leh amah insawi chawp ngailo in" ati a, Ryan chuan,"Min dem theilo ang. Diktak chuan a hming diktak kha ka vawikhat hriatna ve tho ania!" a'n ti chiah chu za lutukin an nui hlawm a. Zothani chuan Ryan chu a signal zeuh a. Ryan chuan Teruata naupanlai thlalak a kawl chu phawrh pah chuan,"Kanu he thlalak hi tunge anih i hrethei angem?" ati a, Pi Puitei chuan,"I u anihhi, mahse a bo lai kha chuan kum 4 mi lek ala nia, hei chu mipa naupang kum 8 mi bawr ava ang ve. Mahse i u ngei anisi, kafa ka rila rah ngei chu ka hai tawplo ang. Bawiha min han hrilh teh i u chu i hmuchhuak tawh em ni?" phur leh hlauthawng tak si, tah aw titih chuan a zawt a,"Kanu ka u chu ka hmuchhuak tawh alawm, fahrah inah alo seilian a, he thlalak hi kum10 mi anihlai anihhi. A chhun lutuk che asin, tunah chuan tlangval hmeltha tak ani tawh. Zaninah helai hmunah ngei hian alo kal dawn asin, i hmu duh angem?". "Ka fapa, ka fapa hi, Ryan i unaupa thlalak hi en teh a cher lutuk! Ka fapa fahrah inah chuan engte nge i ei thin ang le? Zanah ka bula i mutloh chuan i muhil thei ngai silo ka rilru ava na tak em. Ryan ani theilo i unaupa kha naupang fing tak ania sin, ama inkawng leh anu leh pa hming chu sawi nachang a hre ve em em ang fahrah inah a seilian tihchu ka ring theilo" Pi Puitei chuan mittui tla zawih zawih chuan a sawi a, an hnuk a ulh treuh hlawm a. Ryan chuan,"Kanu ka u khan a hriatna a hlauh alawm, motor -in a su a" atih ngat phei chuan anu rilru a ti na in, lusun ang maiin a tap hawm hawm a.

Teruata -

"Vawin khan i unaupa ni awm a insawiin i chungchang min rawn zawt leh a, hmanni lah khan i patea nia inchhal khan a rawn ngaihven tawh bawk che a" Home Mother chuan Teruata hnenah chuan ati a, "A hma pawh khan vawitam ka chhungte ni a inchhalin beiseina nen ka tetlai atang tawh khan mi tamtak ka lo hmu ve fo a, mahse hriatsual a awm vang leh min hai vang te ani ziah a ka rilru ana ve thin asin. Chuvang chuan hetia awm tawp hi ka duh. Chhungte ka neilo ani tihhi pawmthiam hram hram ka tum mek ani Mother" Teruata chuan ati a, Mother chuan,"I rawn luh hma khan i hriatna i hlauh avangin i chhungte nasa takin an zawng a, newspaper -ah i thlalakte an chhuah chhuai chhuai a, mahse tuman an rawn ngaihvenlo che a. Chuvang chuan tuna taka anlo ngaihven leh che chu keipawn an hresual leh che anih ka lo ring hlawm hrim hrim a" Teruata chuan,"Ka tetlaiin chutiang thil chu ka tawng amaw?" ati a, Ryan-an a unaupa chunga thil thleng a sawi nen a inang chiah chiah chu mak ati hle,"Aw tawng e i hre tawhlo chu a awmlo hranlo e naupangchhia tak meuh meuh ila nia khang hunlai kha chuan. I hming kan zawh che chuan min chhang thei mai sia, inu leh pa leh hming pakhat Ryan tih i lam ngun hle a. I tap nasa thei asin aw" Mother chuan ati a. Teruata chu a rilru alo kalthui leh hman hle a, a awmzia chu Ryan-a zawn mek a unaupa hi amah maw lo ni? Ryan hi a unaupa maw? A hlimna leh mak tihna chu a inzat reng a, Zothani in thlen hlan mawlh a nghakhlel a. A awm mekna chu khawpui atangin a hlat deuh avangin Mother hnenah chuan thil awmzia sawifiahin a chhuak nghal a. Kalkawngah chuan a inngaihtuah nasa em em a, Ryan hnenah a hrilh dawnin engtin nge bul a tan ang? Hrilh ta se a awihsak kher angem?
Zothani in kawngkhar chu kik pawh kiklo chuan a nam hawng tawp a, a hmelhriatloh anlo awm tel ve avang chuan a zam deuh a, an vai mai chuan lusun hlim ang maia ngui leh muttui tla tih hriat tak chuan anlo awm hlawm a, Teruata chu anlo en khar hlawm nen, a hrilhhai kher mai. Zothani chu lo dingchhuakin,"Te heihi inu anihhi" atih phei chuan a hrilhhai ati zual hle a, Pi Puitei chu lo dingchhuakin tawng pawh tawnglo chuan a rawn kuah nghal thlawp a, a pangti lum thar thar leh a kuangkuahna thlamuanthlak zet chu a hriat hnu leh a naupanlaia alo thlakhlelh em em thin ngei kha ani. Ryan chu lo ding ve in,"Ka u" rawn tiin a rawn kuah ve a. Teruata chuan mak atiin engtin nge anlo hriatchhuah chu a hrechak kher mai. An hlimtlangin, an titi a, an nui leh dar dar thin,anu chuan Teruata kut chu a vuan deuh reng a, Ryan chuan phone call a dawn avangin a kalsawn a, a rawn letleh hnu chuan a hmel chu diklo deuhin a hriat avangin Teruata chuan,"Ryan eng thilah nge anlo biak che a" a'n ti a, Ryan chuan,"Kapa chungchang hria niin a insawi a, a nihna leh a hming erawh min hrilhlo" ati a, chuthu chuan tek ang maiin an vai chuan a deng a,Pi Puitei phei chu a hamhaih hle. Teruata chuan,"Chuan enge maw phut te annei em?" ati a,"Ka ngaih a tha chiahlo `Naktukah inhmu ila engkim ka hrilh angche mahse nangmah chauhin lo kal rawh' antia" ati a, Pi Puitei chuan kal a remti lo a, engemaw an chungah a thlen hlauhna in a khat tawh a, mahse Ryan leh Teruata erawh chuan a hmawr bawk law law an duh ani.

SOMEWHERE IN AIZAWL

First Person - "Kapu anau zawk chu ka call tawh a, naktuk a inhmu turin ruahmanna ka siam a amah atang hian a u awmna pawh kan hriat theih ngei ka beisei, kan duh kan hmuh hunah chuan kan that nghal mai ang"
Second Person - "Keimah ngei ka lo kal ve ang, hepa hi rawn langlo se chuan inthlan zawh hma chu pawikhawihna lam hawia inhnamhnawih ka duhloh nen, ro ati khawlh khawp mai,a rang thei ang bera chinfel ka duh. Chanchinbu miten min umzui lai ani tih hria in, theihtawpin fimkhur angche u. Pu Lian nang ilo kal ve dawn em naktuk chu"
Third Person - "Kal e a Pu Mawi. Mahse ka hmel rawn lanlo in a sirah ka lo awm thung ang"

ZOTHANI IN

"Ka u lo kal lo mai rawh, hmeichheho hi lo awmpui zawk la, ka lo let leh thuai ang" Ryan chuan Teruata hnenah theihtawpin zuilo tur chuan a'n ti ve bawk tak na a, Teruata chuan anau thu a zawmloh hmel hle,"Tunge annih pawh kan hre silo, nangmah chauh chuan ka kaltir dawnlo che. `Nangmah chauhin lo kal rawh' antih danah te khan ka ringhlel tulh tulh, mifel nise nangmah chauhlo a i kal an hlauh nachhan tur a awmlo" Teruata chuan ati a, mahse Ryan chuan a kal ve a phal dawn chuanglo tih a hmuthiam vek a, chuvang chuan Teruata chuan anau chu a kaltir ta a.
Ryan chuan an inhmuhna hmun tura an ruat chu a thlen veleh tumah a hmuh siloh avang chuan,"Awm in awm em?" tiin a au a, thawklehkhatah a ban pahnihah chuan patlingin a tawn tawnin an rawn manbehsak a. Ryan chuan,"Tute nge innih a?" ati a,"Pu Mawi tiin min ko thei ang. I hriat duh ka hria a, ka hriat duh i hre bawk. Kan indawrtawn thei angchu tiraw?" a ti a,"Ryan chuan,"Khawiah nge kapa chu a awm?" ati a, Pu Mawia chuan,"I unaupa awmna min hrilh la, ipa chungchang chu ka hrilh angche" ati a, Ryan chuan,"Unaupa ka neilo" ati a,Pu Mawia chuan,"Kohhran, khawtlang leh Politics thlengin thu ka neihzia ila hrelo animaw? Min chhaihkual tum reng reng suh naua, i zawn tirh atang khan kan enthla char char tawh che. Khawiah nge i u chu a awm sawi vat rawh" a aw ka tawplam phei chu a vin kher mai,"Heta hi ka awm alawm" Teruata chuan Ryan vuantu pakhat chu a rawn vaw tlu nghal tawp a, chu veleh Ryan chuan pakhat chu alo hnek thal nghal tawp a"Ka u minlo zui ru elaw" ati a, Teruata chu anui suk a. Pu Mawia tlanchhiat tumlai mek chu umin an man a,"Khawiah nge kapa chu a awm sawi rawh?!" Teruata chuan hnek pahin a zawt a, hnek leh a tumlai mek chuan,"Ka sawi ang, ka sawi ang" ati a,"Inpa chu tuna kan dinna laiah hian a awm!" Pu Mawia chuan ati a,"Enga?!" anti rual dun nghal thawt a,Pu Mawia chuan nui uar uar pahin,"Lei hnuaiah hian mawle" atih veleh chuan a ri leh nghal pawp a,"In awihlo maw? Lei hi lai chhin ula" ati a,Ryan chuan lei chu hai nghal mai a tum a, Teruata chuan lo dangin,"Engvangin nge heng thil hi itih?" Pu Mawia en ha pah chuan ati a,"Chuthu chu ka thurualpui zawk zawhah in khek dawn nia" Pu Mawia chuan a sawi zawh veleh silai a puak ri nghal thruai a, silai rawn kaptu lam chu enin a hlat deuh avangin an hmuchiang theilo a, Ryan chuan silai kaptupa chu thui tak a um hnuah rawn let lehin,"Ka umpha lo" a rawn ti a, Teruata chuan,"Pu Mawia chu ka pawh chhawnlo in a boral nghal. A phone kha laksak la, i kal vat teh ang miin minlo hmuh hma hian" ati a, chulai chu an chhuahsan ta a. Haw kawngah chuan Teruata chuan,"Kapa chungchang a sawi kha kanu hnenah la hrilh rihlo ila a thatber ka ring. A sawi kha thudik anihchuan Pu Mawia thurualpui kha zawngchhuak phawt ila, tichuan engkim kan tihfel hnuah dan pangaiin kan vui dawn nia" ati a, a u thusawi chu Ryan chuan pawmpui nan a bu nghauh nghauh a.
Ryan leh Teruata'n inchhung an rawn rap chiah chu hnar a hlit phawi ang huaiin anlo thaw halh hlawm a. Mapuii leh Zothani chuan thingpui buaisaihin, inpah chuan an kalna chanchin chu an sawi a, Mizoram-a zahkai ve pawl meuhin chutiang thil alo ti chu mak anti em em a. Thingpui te an infel hnu chuan Teruata leh Ryan chu inkulh hrangin Pu Mawia phone chu an envel a, number pakhat call zin deuh mai rinhlel chu annei. Chu veleh chu number atang chuan phone call lo kalin anla a, recording -ah dah nghalin,"Hello" Teruata chuan ati a,"Teruat, Ryan, in dam tha maw" mak ti takin an unau chuan an inen a, chhan mai nachang an hrelo nghe nghe,"Tunge inih?" Teruata bawk chuan ati leh a,"In patea ka nia" chu phone atanga aw chuan rawn tiin, mak an tihna a zual tulh tulh a."Chuan nanghi maw Pu Mawia thurualpui a, kan chhungkua min thrensawm tu chu" Ryan chuan aw chang fak chuan ati a,"Vawina in kalna video kha ka nei ania, hemi hmang hian Police -ho rinhlelhtir che u chu a harlo ang" phone ami chuan a rawn ti leh a,"Vawin khan i awm ve amaw?Pu Mawia kaptu kha nangmah maw lo ni? I thurualpui ngei ngei pawh i that amaw?" Teruata chuan ati a, Phone atang chuan,"Hahaha ani anga mimawl ka ni hleinem. In unau khan Pu Mawia kha Police hnenah inpek ngei ka ring a, chumi hunah chuan ka hming hi min thupsak dawnlo tih ka hria. Lungte pakhata sava pathum perhthla ka nihchu!", "Chu i lungte vawm ngei sawhkhawk chuan a rawn per dawn che ani" Teruata chuan phone chu a off ta daih a. An inbiakna record chu Pu Mawia thihna a finfiahna atan Police Station -ah anpe nghal a.

"Kanu kha kha chu sawi ziah suh ka zak ania" Ryan chuan vui nang nang chuan ati a,anu chuan,"A nuihzatthlak ve em alawm mawle. Chuan Teruata pawhhi diktak chuan Ruattea tiin kan phuah ve a, alam thiamloh vangin `Tunge i hming' antih in `Teruata' ati ziah a, chuvang chuan ania Teruat kan tih hlen phah" ati a, an nui nasa hlawm dar dar hle, a bik takin Mapuii leh Zothani chu anlo uar fal a,"Teruata hi chu a mak ve re re asin apa khan thianpa pakhat Bryant anei a, chupawh chu Ryan tiin alam tlat a ipa khan Ryan tihchu nalh alo ti phian aniang, chuta tang chuan Ryan hian chu hming chu alo put phah ta a" atih chhunzawm nghal zat a, Ryan chuan,"Ka u chu hming phuah alo thiam hle mai" ati a, uar tak chuan an nui chhunzawm lehnghal a. Hlim taka an inkawm khawmlai chuan Teruata chuan Police Station lam atanga phone call dawngin "Pu Liana chu kan man fel tawh e. Inrawn kal thei ang" an rawn ti a. An vai chuan Police Station lam panin an kal ta a. An thlen chuan,"Kan dawp mek ala pha char char anlo ti a" , Teruata chuan a dawptu chu biak lawk a duhthu sawiin, a rawn chhuak a, a hrilhruk hnu chuan a lut leh a."Teruata a inpuang a, a tetlaia a hriatna hlauh takte kha lo kir lehin in thil tih chu karlo ah a langchhuak tho ang. I hremna tihtlem nan inpuang mai rawh" ati a, Pu Liana chuan,"Awle ka puang ang ka inpuang dawn" ati ta a, Teruata te chu anlo thaw huai a."Mr Lee tan a ka u pawisa sen tum kha tam ka ti em em a, mahse ka u chuan `Mr Lee vang chauha kan sumdawnna hi hetiang dinhmun sang thleng thei ani a, thatna chu thatna vekin kan thungrul tur ati' ati tlat a. Khanglai khan Pu Mawia khan campaign nan pawisa tamtak alo mamawh bawk nen, ani chuan thiam taka min fuihpawrhin ka u te chhungkua chu that a chung rosum zawng zawng chu pumbilh turin minti a, ka remti lo, ka u kha ka hmangaih lutuk asin. Mahse khalai khan a laka ka thinrim em vangin thah kha ka pawm ta mai ani. Hna a ngah vangin Office-ah zan thleng a awm zeuh zeuh a chumi hun chu changin hun tha kan hmu ta a, nikhaw hrelo a siama kan buaipui vel mek lai chuan Teruata hian a sirah chiang tak maiin minlo en kar a, ka thil tihlai mek chu ka inhriatchhuah phah uar uar a, mahse hnungtawlh tur chuan a tlai tawh lutuk. Pu Mawia chu lo lutin a naute hnenah chuan `Inva rei ve, chuan he naupang hi la ve nghal ru, dahtha ve nghal ang' a rawn ti a, keichuan `Keiman ka lo buaipui mai ang' tiin ka pawm a ka hruai chhuak ta a. Ni engemaw zat hnuah pawh Pu Mawia chuan Teruata chu that tura min tur chhen avangin ka hum tlang thei dawnlo tih inhria in, a hriatna nuaireh nan a thluak chu ka shock tir ta a, motor sut ang theiber turin hliam chhete te siam chawpin ka ruahman ta a, a hriatna ber a hlauh hnu chuan a nunna chu Pu Mawia chuan zuah a pawiti lo ve hram a. Ni tam pawh a liam hma in Pu Mawia chuan Ryan-te nufa chu a ngaimawh leh tan a, Mr Lee chuan kan thusawi lo hre ru in Ryan te nufa chu a ruala Singapore a hruai a tum a. Ka hriatchhuah veleh ruahmanna siam puiin sum tam thamtak ka pe a, rawn kirleh tawh ngailo turin ka chah a. Ka u kha ka hmangaih a, ka damchhungin minute khat te pawh inchhirlo in ka awm ngailo tihhi Teruata leh Ryan hian hria se ka ti. Unau in hmangaih tak rawn ni chho turin duhsakna ka hlan ani tihkha minlo hrilh hriatsak hram dawn nia"

THLA 3 HNU CHUAN

Teruata chuan anu hnenah,"Kanu, kapa kan vui liam chauh naa, Zotei nen hian a rang thei ang bera inneih kan duh a, in remtih chuan" ati a,Ryan chuan Mapuii kut vun pah chuan,"Kanu a rualin mo nei ta la engtin nge i ngaih ang?" alo ti ve bawk a, Mapuii chuan,"Ka kut i rawn vuan kher a, iti zahthlak e" tih pahin a kut chu a lasawn a, Zothani chuan,"A romantic zawk alawm. Thenkhat an romantic loh vei nen" tihpahin Teruata chu ava melh zeuh a, an vai chuan an nui dar dar a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)