EPHRAIM BY HT Tluangi Tluangtei (COMPETITION)

Ngaia
Site Admin
Posts: 25813
Joined: April 30th, 2016, 4:07 pm

EPHRAIM BY HT Tluangi Tluangtei (COMPETITION)

Unread post by Ngaia » August 21st, 2018, 7:32 pm

EPHRAIM
(COMPETITION)

Ka mu lai chu ka ṭhianpa chuan min rawn tung tho nawlh a,thianpa han tih ah ṭhianpa tih ai a duat tih duh zawk ang kha nia. Engkhaw sawi set set lo chuan a hma kar a ka sam kan colour uluk em em mai chu a rawn hnawih hlarh hlarh a. Zing inkaihthawh nan chuan dangdai ang reng. A ti zo darthlalang ah ka in en thuak. Awi ka duh thei lo,a dum hlup mai. A buan nalh tawh tehreng nen. Ka thiannu duh tak makima chuan,"bawiha thilpakhat min tihsak la" tih pah chuan min melh no zak zak a. "Kei chuan pawr fe hian nge ka sam hi i dum ringawt ka ṭhian aṭang i bang nghal a buan leh hma zawng" ka lo tih san a. Duati chuan a phone chu a hmet mawlh mawlh a,min rawn pek pah chuan "enteh hei nizan a whatapp a ka dawn nia han chhiar teh" a tia. Melh rum ran chung chuan ka lo ban ve mai bawk a. Ka chhiar a," duhthusam pathum. 1) mipa sam sei dum nalh tak mai nei nen a ni 3 in date. 2) in date chhung zawng a damdawi a inenkawl loh. Ephraim. "

"Kal tur in min ti tih na maw?" tih pah in a phone chu a mah vawm nan ka hmang a. "aw bawiha, kal hram la" tih pah in min nek naw naw a. "Midang pawh an kal tawh thei a,bak ah nang lo chu tiang mipa hi ka kawm ngai lo hrim hrim. Han date vel tur chuan ka thei lo" ka lo ti hluk a. Makima chuan "mipa min ti ziah suh ka hre ve reng. Bak ah nak tuk dar 10 ah ka thianpa lo kal ang ka ti tawh. Va in bual fai nghal rawh" tih pah chuan min chhuahsan a. Dik tak chuan makima hian min van bawl nasa mah mah ṭhin tak. A mah ang chi hi chu ani bak hi ka kawm ngai lo sin le,han date vel chu damlo duhthusam mah nise ka tim deuh sung sung. Mahse ka nun a thil ṭha ka tih ve vawikhat na pawh ni mai thei a,alo sawi tawh bawk si chuan min lo nghak ve palh ang,mahse ka van in bual peih lo tak zing kar ah a.

Makima chu nalh leh pek. Hmeichhe tamtak hian an tluk lo in ka hria. Kal pah chuan awmdan mawi min han hrilh vel a. "Keimah ang tho ani dawna,min ṭawngkhum ang khan ṭawngkhum vak vak lo la. Damlo anih kha alo nat viau phei chuan dim ve deuh la,a chhungten an la hmuh ngai loh mipa kut ah an fapa damlo kha an dah dawn tih hria..." a sawi zawh hma in awle hospital kan thleng ka lo tih sak a. Taxi ṭang ka chhuk a, "awi bawih, nge bike i ken ve mai loh ka pawisa vek ka pek kha" alo ti hlawk hlawk a. "Damlo na deuh lo ni se bike a chuang thei dawn mi in ti fing hle si i kawlo emai" tih pah in a mawng ah ka ben sak a.

Kan lut dawn chiah tih chuan wheelchair hian damlo hi an rawn nawr chhuak bapbap a. A cher in a dawldang kher mai. A taksa chu uluk deuh in en ila chu naktuk kan hmuhtlang theih hial ka ring. A kawrfual sendang hak chuan a ti lang dâng zual. A sam sen buang theng mai kir chiat mai te chuan thlarau a ti ang tulh tulh. Kan lam pan in an rawn innawr phei bep bep a. A nawrtu chuan,"kan nghah hi in ni ang chu maw, ephraim pa ka nia" hawihhawm tak in a rawn ti a. "Hmeichhia tak tak law!" ka lo ti thung a. Makima lah chuan,"tuai vetho maw i nih ka tia" lunghnur lek lek chuan a lo ti thung a. Ephraim chu a rawn nui hawk hawk a. Aw tham chhel hian,"hmeichhia i ni nange?" a ti ve thung a. A tha e. An inringsual ve ve.

A pa chuan,"vala, motor i khalh dawn nge driver hruai i duh zawk?" alo ti a. Ephraim lam chu hawi in,"enge i duh dan zawk?" ka ti thung a. Ani chuan aw tham chhelh hian,"kan pahnih a kal i pawi tih loh chuan ka duh zawk". A aw chu a rik chhuah loh hlauhawm khawp hian a zawi in a tham a. Kan bawr pangai ve viau e. Tum lam em em pawh nei lo in kan tlan zel a, zawite hian,"khawpawn ah aw" alo ti sep a.

Kan tlan thui tawh ang reng din a la rawt bawk si lo,ka va melh ru zeuh a,lo nuih sang pah chuan,"nuam a rin lai ah khan ding tawp mai rawh" a rawn ti a. Va han sawi har tak. Sawtah khan kan thian zaho a kan len na kan tlan pel daih tawh sin le. A nawm tehreng nen. Kosang lai ah khan han khai ila chu a cher ropui sia a thlarau a chhuak nghal ang. Ka nui hawk a. "Enge i ngaihtuah?" lo ti var a. "Aaaa..nuam deuh kan tlan pel daih a ka ngaihtuah mai mai" ka liam puat a. Kan ding ta. Kawng thlang lam mi thei huan thutna nawm hmel fe an siam na ah chuan kal thlak pui ka tum deuh. A neitute an fel tho. An hriat loh chuan kal an phal vek. Wheelchair chu ka hlang thla nghal a,han pawm thlak mai ka tum dawn a. "Nilo e,ka chhuk thei lawm,khawih vak ngam pawh ka ni lo,ka vun hi ana tlat a", an ti deuh duah a. Hmm,pawi lo e. chak deuh chuan ka nawr vak nang a chuan.

Han sawi mai tur pawh ka hre lem lo,a bul ah chuan ngawi reng in ka thu a. "Vala i hming pum enge?" a rawn ti tham ṭiak a. "Vanlalliana chhakchhuak hmelṭha dik tak". Awm dawm meuh chuan a nui ve char char a. "A van sei ve". Ka hrechhuak zawk. "Nia, vanlalliana ringawt leh si" kan ti hluai a. "I ṭhiannu,ahh ṭhianpa khan..." " makima ti mai rawh" ka lo ti vat a. "Awle nizan khan papa kha alo bia a. Thianpa samdum hmeltha deuh ka nei,vala nia alo tia. Ka lo hruai ang atia ka lawm asin. Mahse zing a ka insiam lai khan ilo kal leh thei lo thut ang tih ka hlau khawp a", a ti vei reuh niap niap a. "Nia,a sawi lawk bawk si lo a,min kaitho a ka sam a dum chawp a,min ti hrilhhai phian mai" ka lo ti ve a. "Aw haw,i va ui dawn ve" tih pah chuan pawi tih hmel fe hian a ner nang a. "Ui lo e," ka ti tak na a,pawi chu ka ti deuh tho. Eng emaw sawi in kan ti ti ve mai mai a,thli thaw heuh heuh in min chhem ve reng bawk a,rin ai tak chuan a ninawm lo. A ngawih tak rawng vang chuan kan leh hawi a,a hnar thi chu a lo luang zawih zawih,ka phu chiang lutuk. Han hruk fai mai ka tum a,"min lo khawih suh,ka bag kha min laksak thei zawk a ngem" thaw hlei thei lo chuan a sawi hram hram a. Puih duh viau mah ila a remti tlat si lo a. Harsa tak in a in tifai zo thei hram. "Kan haw tawh mai dawn mi in in ah pawh kan inkawm thei tho nia" ka tia. A lo bu ve nghat a. Ka nawr chho leh beuh beuh a.

An veng chu ka rin loh lam daih. Veng ṭhenawm mai si vawikhat pawh ka la hmu miah lo nia. "Kan awm na a la rei vak lo a", ka ngaihtuah lai hria ni awm fahran chuan a rawn ṭawng a. A khawngaihthlak reuh si. Gate lianpui lo in hawngsa huau ah chuan kan tlan lut a. Ka pawm thlak dawn in a duh bawk si lo. Amah te chuan a che vel hret hret reuh a. A chhungte an lo chhuak vat a. A hmel hian min ti hah tlat. An mut fel ve hram e. A room a ka luh ve chuan an lo thlak fel diam a,kawrlum a ha a,rizai a lo sin than bawk. Nuihzatthlak hian,damlo mahse tun ang khawlum ah te chuan a.

"Keimah vang in vawin chu ninawm tak in i hmang dawn ta nih hi,ni 3 em chu min zui peih leh lo ang a",in thiam lo hmel deuh hlek hian a lo ti tham ṭiak a. "Ninawm loh e,mahse kan leng chhuak kha chu i nat zual phah deuh in ka hria" ka lo ti vat a. Ani chuan,"nat phah nang,ka nuam viau zawk in ka hria,damdawi in ni lo a han awm hrim hrim pawh hi,damdawiin ah kha chuan in thlahrun a na lutuk a" a ti zawi raih a. Ka chhan leh hma chiah chuan anu rawn lut a,"vala thingpui rawn in ta che" a rawn ti a. "Ka va kal lawk nge aw,ka lo let leh vat ang" ka tia,ka zui chhuak nghal a.

Dawhkan bawh chuan a pa chu alo thu a,a sir a thut na chu min lo kawhhmuh nghal a. "Vala i chung ah kan lawm hle mai,lawm thu sawi ngaih na pawh kan hre lo ani" a lo ti vat a. Chhan ngaih na vak pawh ka hre lo,ka nui suk ringawt a. "Mahse ephraim damloh chhan hi hrilh ngei che chu a ngai bawk sia" a tih zawm a. Hre chak deuh hlek hian "enge a natna chu" ka lo ti vat a. "AIDS a vei" ati chuai raih a. Ka thlawk chhuak lo hram e,ka phu nasa lutuk. Ka hlau pawh ni lo,engtin mawni ka awm deuh mer mer. "Vala,a u hian a enkawl chawt a,a in thlahrung ve em em a,chuvang nia inkhua ah pawh kan lo awm ve ni,mi in a natna an hriat a hlauh em vang hian tumah pawh a kawm ve ngam ngai lo a,a in zahpui hle a ni ber mai. Hmeichhe nungchang tha tak chu a ni ngai lo a,mahse hetiang natna em vei tur a sual nasa lutuk hi chu a ni bik lo asin. Nu leh pa lak ah hi chuan fate hian an sual lutuk mawh ve deuh pawh a niange" a ti dap dap a. Ka haw daih nang a chuan. A va zia lo e aw. Ka ngaihtuah lai chu hre ve ni awm tak hian,"i haw duh tawh nih pawn ka va thlah ang che, vawin vang hian kan lawm takzet tawh ni. Ni 3 chu i tan a hautak dawn lutuk. Damlo satliah a ni bawk si lo nen" alo ti leh sup a. Sawi tur van vang tak. "A bul ah ka va kal leh phawt anga. A mah ka'n bia nge" ka tia ka tho nghal a.

A khum bul a chair hniam em em ah chuan ka ṭhu hniam ruai a. A kut chu ka vawn sak a. "Ka kut ana" tih pah in a phih let a,rizai hnuai ah a thukru nghal a. Ka khawngaih reuh lutuk a inthlahrun vang a ni reng sia. "Tinge hmeichhia si ephraim an tih daih che a" ka tia. "Ka pian hma hian mipa ka nih an ring vek a,ephraim tih hi ka hming ah an sa lawk a,thawmhnaw pawh mipa thawmhnaw vek an lei mawle,ka u Dingpuii hi hmeichhia ni bawk sia. Mipa ka nih an ring ve tawp a" nui var var chung chuan min chhang ve siam siam a. Nurse dingpuii khi i u maw a thinchhe e ka lo ti leh a. Min chhang tum chuan a ang zuau a mahse a ṭawng hma chuan nasa fe hian a khuh ngawih ngawih a. Harsa ti tak hian a rawn nui hram hram a. Ngawi reng in kan in ṭhutpui deuh tlawk tlawk ni mai. A tlai ve duai tawh mai,zan a leng leh tur in ka haw phei san ta phawt.

Makima nen chuan kan in phur phei ve leh ta vawk vawk poh a,an gate lian pui bul ah chuan a pa chu alo ding run a,len a phal leh lo mawni ka ti hman,ka melh rum chhin nang a. "E khai! Vala, ephraim kha a chau zual deuh thut a, damdawi in lam ah kan kal leh ta mai. I lo kal tak thut in lo nghak char char tur che in min hrilh a, han kal ve ka ngai dawn si a, nangni chu in haw leh mai angai zawk a nih hi" a lo ti hluam hluam a. Makima chuan,"ka pu,kan lo kal ve tawh em em a,damdawi in a kal ve chu i phal lo mi?" a lo ti khauh a. Apa chuan,"E makim phal tehreng e,ka phut ngam lo zawk che u lawm. Nih chuan kan kal nghal mai dawn mi?" a ti vut a.

Rizai var hlak sin chuan a lo mu bem a. Thisen an lo pe bawk a. Vuah theih chi hrang hrang chu an lo vuah deuh vek mai ni in ka hria. A thaw chang chang tih chu ka en khan ka hre ve tawp. Awm ve reng na chi nih lem loh vang in kan chhuak leh vat a. Apa chuan,"vala in duh chuan in haw thei nia,engtin nge kan awm dawn pawh hriat loh. Va haw ula,zing hma lam ah in lo kal leh dawn nia" a rawn ti a. Makima pek chuan,"a teuh lo e,nithum chu ephraim tan kan pe tawh,kan haw awm lo", a ti hmawk hmawk a. Kan nui tawp. A ni hi chu a zangkhai viau thin. A muhil lai chu a khat tawk in kan in en chhawk hi ni deuh ber mai. Pawn ah chuan an chhung te ho nen chuan kan muthlu deuh lawp lawp hlawm a. Makima lah chu haw an hreh nen ka malchung a mutthilh na rei tawh mai. Anu chu a rawn tlan chhuak hlawk hlawk a,"vala ephraim a harh a nia,'vala lo kal ve em' a ti nia lo lut vat teh", arawn ti hmawk hmawk a. Vai riai a meng hian min lo nuih sen sen a,"vala i lo kal kha ka ring reng ah" alo ti sap a. "In in a len ka tum a,hetah kan lo leng ta daih nih hi" ka ti thung a. "Vala min hruai haw rawh" a tia haw a ngen nghal a. "I harh deuh veleh kan haw nga naktuk ah hun nuam tak kan hmang leh dawn nia,muhil la i zia deuh veleh kan haw dawn nia,"ka ti ve vat a. A muthilh leh hma zawng a bul ah ka thu a. Kan tlaivar der mai. A lo harh rual rual chuan a u hnen ah chuan haw a ngen nghal a. An remti lo viau nachung in a haw chak tlat bawk si a,a pa chuan a rilru dam na aṭha zawk e ti in kan in phur haw leh ta.

Chair lianpui ah chuan a thu awn diai a. A nu chuan lukham in a kam kual vel vek bawk a,"vala,min kawm duh vang hian ka lawm e aw,ka thian te zawng ah chuan ka ngaina ber che nia"a ti sap a. "Kei pawn hmeichhia zawng zawng zing a ka mipa ngainat ber ini ephraim" ka lo ti ve vat a,a rawn nui ve var var a, minute tin mai ah chuan a chauh belh zel tih a lang reng. Ṭawng pawh a ṭawng peih tawh lo. A chang a arawn nui lui hram ṭhin tih loh chu. Thei leh thei lo hian a khum a mut tur in min ngen a,ka lo pawm vat a,dim thei ang ber in ka muttir a. A nu'n bawnghnute a rawn ken chu tlem te a in hlek a. Amaimitchhing vang vang a, zawite in a rawn ṭawng leh a,vala ni 3 chu ka date hman dawn ta lo che nih hi. Duhthusam pathum na chu nakin a tan ani mai aw...nuu...min lo kuah lawk teh ka ngai dawn emai cheeee...a phun sep sep a,a sawi erawh kan hre thei tawh lo. A nu ṭang a bei reng chung chuan a thlarau chu a zalen ta. Ka thinlung hi a rawn tawt pup pup a,ka hrawk a rawn sak ṭawlh ṭawlh a, ka ṭah loh nan ka insum ngat ngat a,ka mittui erawh a luang zawih zawih tho mai.

Ephraim thihna vang chuan engmah pawh tih pawh ka phur lem lo,kan inkawm ngeih ve dawn chauh a min liamsan ta mai bawk si. Ka tlan kual mai mai a,an in kawt ka lo thleng der. Nu leh pa inleng pawh an lo la awm ve nual a. Let leh ka tum thut thut a,mahse ka lut leh duh deuh zawk a. Min hmuh veleh anu chu a lo ding chhuak nghal hluai a,"ekhai vala i lo kal leh duh pawh ka lo ring tawh hleinem" a lo ti hlut a. "Nia,a khawhar thlak ve em a ka lo kal kal ve tawp mai" ka lo ti vat a. "Ih e,i duh chuan bawihi pindan lam ah pawh i awm thei nia aw",alo ti dam leh diai a. Buk zauh pah in ka lut tlang nghal a.

A khum chu a lo inkhuh fel than a. A rizai var sar chu a inthlep fel bawk a. A dawhkan erawh a kalsan ang ang khan a lo la awm ram a. Khum ah chuan ka mu hnawk a. Ka hawi kual vel a,a chul riai mai hian ka hria. Dawhkan a diary kawm sen chu ka ban a,ka keu vel mai mai a,han chhiar sak em chu ka in thlahrung deuh a. A hmelṭhat ve nen a hawrawp chu chhe ve phian nih hi. Mu chung chuan ka keu a,ka chhiar zeuh zeuh,a ni chu a chhinchhiah ngai lem lo a,a rilru a awm ang ang a ziak tawp a ni ber mai."ka dam hun ah chuan keimah ang a natna tuar zawng zawng te tan hna ka thawk ang. Mahse engtik ah nge ka dam ve ang le. He natna ṭihbaiawm tak hi ka van haw thin em. Mite hian hre tase tuman min hnaih duh dawn si lo. Ka chhungte thleng in min an hlau tawh dawn si. Ka u in a hna a bansan angai nga. Miten ka pa an zah na zawng zawng te bo tawh si. Keimah ringawt a tawrh zawh theih chu ni se engpawh tuar ka huam a sin".

Ka van khawngaih reuh tak. Hreawm a lo ti ṭhin dawn reuh e. Ka keu let leh a,"...ka dam lo a,ka u in an hospital ah min hruai a,ka khawsik deuh thin a vang in thisen min test tir a tum a,ka ban a in vih na hnu a hmuh chuan min melh rum kher mai. Ka pa a call a min lam tur in a ko nghal a. A thinrim chhan chu ka hre chiang khawp,awm ṭha duh lo in rui ve fo ma ila hei ang chen ka thlen hi chu a ring bik lo a ni ngei ang. A ṭhiannu bul ah a ai awh sak mai tur in angen a,ka pa nghak in pawn ah kan thu a,biak pawh kan in be lo. Inchhung kan luh rual rual in 'vawi engzat nge?' A ti nghal a. Room a luh pah in 'ka sim tawh. Ka ti tawh ngai lo. Ka rui ngai tawh lo hrim hrim' ka ti nghal a. Ka sim tawh tak tak. Ka piangthar tawh dawn. Fanu fel leh tha chiah ka ni tawh dawn. Room ah min rawn luhchilh a ka pa leh ka u chuan min hau in min zilh mawlh mawlh a,mahse engmah ka hre chuang lo,ka ngaithla lo hrim hrim a. Fel tak in ka awm tawh dawn a ni tawp mai.....".

A kar lak ah chuan hla thu te a ziak ve nual a. A ziah tam leh lai deuh chu ka en leh a,"...+ve maw???.....vawin hian ka thi ta,fanu fel nih ka tum a,a ṭha zawng a nun hman ka tum veleh he natna hi ka nun hrem tur in a lo kal ta si...reilo te ka nun ka chen khan ka dam chhung in min chen let dawn ta chu a nih hi. Engtin nge ka chhungte hi ka hmachhawn tak ang le?"

Phek 2 chu a pawthla a,a dawt leh ah chuan a lo ziak leh a,"...kum a liam ve ta,mi chuan nitin a thar in beisei na an nei a,kei zawng nitin a thar in ka beidawng thin a nih hi....". A hnuai lam aṭang in a ziak ṭan leh a,"...a mak lutuk,ka thiannu kha a thi a nih chu,a khum ah thi in an chhar a. Achhan chu ka hrechiang khawp mai. Khawvel a hmachhawn ngam tawh bik lo ani. Ani chiah ka in vih pui a. Ka hrechiang a sin,mahse ka haw lo,tih ve a phal lo chung kha ka dil lui tlat a. A duh lo chung kha ka nawr lui tlat si a. Aw..a thu kha lo awih ila tun ah hian nula tha tak ka ni mai tur. Ka ui a ka khawngaih takzet ani. chuan ka ngai em em bawk. Mangtha aw ṭhiannu..."

A khat tawk in tlem tlem a ziak a,"....mite hian rinhlelh en in min en vek tawh in ka hria,k chhungte pawn mizing nuam an ti tawh lo in ka hria,keimah vang vek a ni. Ka u an transfer dawn hlauh mai,ka nun dan hrengai lo tu te ka hmachhawn tawh dawn a,rinhlelh mit a minthlir ngai lo tute chauh ka hmu tawh dawn a,ka chhungte awm pawh anuam ve deuh dawn ang chu. Ka chhungte chung ah hian ka van lawm tak em. Fanu sual AIDS vei khawp a tal nasa kha hmangaih leh dimdawi tak in min enkawl thin si a. A bik in ka u hi ka hmangaih ani. Hah pawh sawi lo in min enkawl reng thin si a. Nun thar neih ka van chak tak em....".

A chauh thute,a natna hreawm a tih zia leh dam vat vat a chak thu te chu a ziak tam ber a. A tawp lam ah chuan a duhthusam kha a lo ziak a,"....DUHTHUSAM PATHUM
1)mipa samsei dum nalh tak mai nen a ni thum in date.
2)indate chhung zawng a damdawia in enkawl loh.
3)AIDS tel lo a zalen tak a nun hman a,ka nun hi vawikhat tal natna tel lo hman".

A tawp ber ah chuan "vala" tih chiah alo inziak bawk a. Ka khawngaih tak zet ani. Reilote chauh anun a chen ve avangin kum engemaw zat chu hreawm a tuar si. Avanglai tak in tar ang mai a zur in khawvel a chhuahsan a. Aw hringnun, ephraim tan hian in va rawng em..!!...

A hun tawn ah avui lo a,tumah a dem hek lo, Pathian a dem ve ngai lo a,a tuar chhel em em reng a. Siamṭhat theih loh siamṭhat tum in nitin beisei na beidawng nen nun a hmang a,a mumang mai a nih beisei in zing nichhuah rual in a tho ve thin. Mahse a siamṭha zo tawh si lo. Mahni nun uluk ai a hlu hi mahni nun ah enge awm ta ang Ephraim??...



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)