KAN INMIL SI LO BY Jona Fanai Jr.

Ngaia
Site Admin
Posts: 25813
Joined: April 30th, 2016, 4:07 pm

KAN INMIL SI LO BY Jona Fanai Jr.

Unread post by Ngaia » August 14th, 2016, 4:51 pm

KAN INMIL SI LO
.
Ka phone-a message lo thleng chu ka en vat a, "I dam em țhiannu? " tih hi Kima chuan a lo thawn a. 'Dam lo' tiin ka chhang bûl hmak a.
.
"Nga ti why, sad ve, eng nge na?"
'Eng mah'
"I hlim em"
'Hlim lo'
"Thiannu min ngai em?"
.
Chu zawhna chu ka rilru chuan, 'Kima, ka ngai che, ka ngai lutuk che. Ka mamawh che a, i tel lo chuan ka hlim thei thlawt lo a ni' tiin chhanna ka pe fel vek, mahse, kei mi luhlul hian chuti anga chhan chu ka tum lo a, inphah hniam zawka țan ka duh lo hrim hrim.
'Țhianpa, ka ngai lo che' ka ti leh hmak a.
"Kei chuan ka ngai veng veng che" a ti a,
'Ka ngai ve lo che, ka mut a chhuak, mangțha...' tiin ka reply a. Ka mu ta hmak a. Mutthilh ka tum ngial pawhin ka muhil thei thlawt lo.
.
A rûkin f.b leh WhatsApp velah a online em tih ka en reng a, a online a hmeichhe dang nen comments an pek dun phei chuan ka thin phu a rang zawt zawt a, ka thinrim si; ka thik bawk si chu awm ngaihna ka hre țhin lo a, ka tawp up up a ni ber mai! Check loh ka tuma ka rilru thil danga lak pen ka tum pawhin ka thei thlawt si lo.
.
Kima nen hian kum 2 kan inngaizawng tawh a, thla hnih liam taah khan kan in-relate anniversary kan lawm a, engagement ring pawh a inang chiah kan inpe nghe nghe a. Kan inhmangaih a, inhmu lo leh inbe lo hian rei tak kan awm thei lo ve ve a. Kan thin a chhe dun a, kan thikthu a chhe bawk a, inphahhniam kan thei lo ve ve bawk. Kan inbiak apiangin intithiam lovin kan inhau deuh ziah a, mood fuh deuh a dawhtu zawk kan awm loh chuan inhnial a inhau a ni mai! Inrunluih kan peih em vang a ni. Min runluih ang chiahin ka ti lêt ve sak a, a thin hi arim thei mai mai khawp a, a bulah chuan awm i la min chum hnang duh țhin ang.
.
A thinrimna chhan tam ber ka laka a thil beisei anga ka awm țhin loh vâng a ni a, kei lah hian tih thinrim ve hrim hrim hi nuam ka ti bawk si a. Thinchhe deuh mahse a rilru a sual hran lova, a thinrim paw'n a daih rei ngai chuang lo. Fa naupang ber a nih avangin a chhungte chuan an duat em em a, a rilru pawh a p.ch ve khawp mai. Kei lah hi a rilru mil pui chiah ka lo ni ve bawk nen kan inmil lutuk hi kan inmil thei lo a ni ber mai! Inmil lo viau mah ila kan ințhen thei chuang si lo.
.
Kan inkàr chhiatna ber chu an țhian țhenkhat te nen Holiday Palace-ah an picnic a, kal ve turin min sawm nain ka dam țhat loh avangin Mom-in kal a phal lo a, an țhian ho bakah hmeichhe dangte nen an kal a. Chhun lamah chuan mu chungin an hun hman dan tur chu ka ngaihtuah neuh neuh a. Beer leh Juice leh a red an keng nual a, hmeichhe ho nen chuan an in ho ngei ang a, an rui phur an c.k maithei tih vel tih vel ka dream vak vak a, ka thik ru nghal em em ringawt a. Ka ngaih țha vak lo chuan ka call a, hmeichhia hian phone chu a lo pick kher a, 'Hallo' a ti chiah ka off nghal hmak a, ka rin ang ngeiin maw? Ka thinrim lutuk chu ka puakkeh lo chauh a ni. Phone lo pick-tu nen chuan an c.k dun chiang ang tih bak ka ngaihtuah thei tawh lo. A hnuah chuan amah chuan min lo call back a, ka call laia an swim avanga a hriat loh thu leh midangin a phone an lo pick thu te a sawi a, ka awih sak duh tawh bik lo. 'I insawifiahna ka hre peih lo, hlim deuhin hun hmang ang che, kei chu min ngaihtuah suh... Mangțha' tiin phone chu ka cut hmak a. Sms in, "Chhun lai laia inmangțha te chu a" a ti a, an hun hman dan min lo hrilh nual bawk a, ka thinrim laklawh tawh avangin ring deuh tho mah ila ka awihsak duh lo lui ngat a, rep pawh ka rep duh tawh lo va.
.
Zanah chuan a lo lêng leh ngei a, sitting room lamah ka pa'n inleng a neih avangin dining room lamah kan inkawm a. Ka thinrim avangin ka titau bûr a, min biak paw'n ka chhang țha duh lo a. A insawi fiah mawlh mawlh a, min tih lungawi tumin fiamthu a thawh a, 'Ka nuih pawh a za lo' ka ti ram hmak a. Min kuah a tum a, a kut ka vai thlaksak a, min kiss a tum a, 'Midang i fawhna hnu ka fawp duh lo, ka ten' ka ti a. "Tumah ka fawp lo a, ka kuah lo bawk. Michael-a te pawh zawt la proof-na iduh phawt chuan an hre vek ang" a ti a. 'Anni zawh zawh a ngai lo' ka ti tlat a, phone a tuma; ka phal bawk si lo. A tawpah chuan a thinrim ve ta a ni ang, "Hmm... Min rin loh tlat chuan sawi tur ka nei tawh lo" a ti a, a tho nghal a. Ka rilru tak chuan chelh din rih ka duh a, a thusawi pawh a dik ka ring, mahse, ka thin a rim laklawh tawh, ka luhlul ka tih tawh kha. A haw tur chu biak pawh be lovin ka en liam ringawt a.
.
A hnuah chuan, "Luhlul nu, i hre ve viau ang, tunge thei rei zawk kan hria ang chu" tiin min lo inbox a, 'Nia' tih ringawtin ka chhang a, a reh ta hmak a. Chuta țang chuan min be lo char char a, biak hmasak ka hreh tawh bawk si, keimah zawk chuan hrehawm ka ti lutuka awmngaihna pawh ka hre tawh lo a ni ber e! An țhian ho Mike-a te hnen ațangin Kima chu khami ni khan an bula a awm reng thu ka hre vek tawh bawk si a, keima thiam loh chu a ni chiang mai. Ka inthiam lo tulh tulh a, ka luhlulna pawh a reh tial tial a, ka hmangaihzia ka hrechiang telh telh bawk a. Ka insum zo ta ngang lo va; ngaihdam ka dil a. Vawi-2 ngaihdam ka dil hnuah min la chhan loh avangin keimah zawk chu ka thin a ur leh hle tawh a, ka mangang ru tawh bawk si chuan a țhiante ho ngaihdam min dil pui r'u tiin ka be kual zak zak a, ka buai ngei mai. Dik tak chuan min kalsan ang tih ka hlau ngawih ngawih a ni, keima thiam loh a ni leh nghal. A tawp na'n, 'Tuna min ngaihdam loh chuan ka dil nawn tawh lo vang che' tiin a vawi-3 na'n ka dil leh a. Ka tex hnu fêah chuan, "Ka ngaidam ang che, mahse, thleng nawn tawh suh se" a ti a, ka thawl hawk mai! Min ngaihdam thu a sawi har êm avang chuan ka thin a ti rim ve deuh hrim hrim a, 'Tûna min ngaidam thei te chuan a hma khan min ngaihdam daih tawh tur a lawm' ka ti leh kher a. "I va han zak thei lo tak, inthiam lohnate nei ve ta che" a ti a. Min ngaidam chiah chu kan inhau leh nghal ringawt a.
.
Kan inhauna tam zawk hi chu thinrima inhau pawh kan ni lo va, inrunluih kan peih êm vang a ni zawk. Kan rilru chapo vang leh mahni thuduh zawnga confi kan nih vang pawh a ni mahna. Bakah, tih thinrim hi nuam ka ti ve hrim hrim bawk a. A thiam zawk a nih avangin 'min ring lo si' a ti deuh reng a, tlawn reng a ngaia hrehawm raps(hihi). Zan rei lamah phei chuan ka dawh reng peih ta bik lo va, 'kan inmil si lo, sawi țha law law ang' ka ti leh hmak tawh a. Inthinur chhawk reng hi ka ning ve det. "I luhlul em a nih kha, kan sawi țha khawp ang, engtia tih nge i duh?" a ti a, 'l duh dan dan' ka ti leh a, "A nih chuan tun ațang chuan inngaihzawng ang ni lovin țhian angin kan in-en tawh ang, kan inbiakna leh inkawmna pawh țhian ang vek ni tawh rawh se, țha em?" a ti a. 'Țha țha tha..bleh..bleh.. Mangțha' ka ti a, Mangțha tih hi a duh ngai miah loh avangin runluih na'n ka 'mangțha' rêng bawk a, a thinrim leh kher mai.
.
Chumi ațang chuan țhian angin kan inbe țan a, dik tak chuan țhian anga biak hi ka thei ve lo a ni. Kima vang hian ka țap fo va, ka rilru a na fo bawk, țhian anga in-en tawh loh lah ka rawt ngam tawh bawk si lo. Nidanga 'boih, duat' ti a min ko țhin kha tunah min runluih nàn 'țhiannu' a ti kher zel chuan min ti thinrim a, min ti na fo bawk. Hmangaih ngawih ngawihte țhian anga en tum chu a lo harsa ngei mai, rilruin țhian angin a en thei tak tak si lo. A lên chhuah changa hmeichhe dang a phurh te, a status leh pics an comment changte phei chuan țhian anga ka en theih loh zia ka inhrechiang khawp mai. Zana ka mangțha hnuah hian amah check in a men chen chu ka meng ziah tho. Min hrem ve chiang khawp mai.
.
Thla khat ai a rei mah țhian angin kan inbia a, kan inrunluih reng bawk a. Mahse, hrehawm ka ti ve takzet tawh. Lawmna pakhat chu ka nei, 'Ka hau tawh loh che a, i chungah thinrimna ka tih lan duh tawh loh chinah chuan ka ngaihsak tawh lo che a, ka hlat hle tawh che tihna a ni ang,' a tih avangin ka chunga a thinrimna a la ti lang chuan min la duh ve tho tih min hriattir a ni. Zan khat chu nidanga a tih țhin angin, "Duat..i hlim em? I țha em? Ka ngai lutuk che" tiin min lo inbox a. He thu hi kan inngaihzawn tirh ațangin nitin min zawt ziah a, ka hlim loh a, ka țhat loh a hlau thei em em a, tichuan, nilenga kan hun hman dante kan in-share tawn a, kan inbiak tawp lamah min tih thinrim a tum loh paw'n keiin ka tum ziah thung a. Chu țawngkam chu an picnic hawn zan ațang khan vawi khat mah min zawt tawh ngai lo va, chumi zana min zawt leh ta chuan ka thinlung a ti no a, ka țap ringawt a. 'Hlim lo, țha lo, ka ngai lo bawk che misualpa' ka ti a.
.
"Thiannu, naktukah MC ah inhmu ang aw, dar 11-ah ka lo nghak ang che" a ti a.'Eng-atan?' ka ti a, "Ka hmu duh che" a ti ringawt a. Rei tak kan inhmuh tawh loh avangin Kima chu hmuh a, a bulah thlamuang taka awm chu ka chak tak zet, mahse, chuti maia a duh hun huna thlem chhuah theih nih chu ka duh bik lo. Tih tawh loh lamah chuan luhlul ve tak ka ni ka tih tawh kha. 'i duh leh midang hmu rawh, ka peih lo țhianpa' ka ti a, "Luhlul nu, ka lo nghak ang che" a ti leh a, 'Min lo nghak duh suh, min nghak sual ang, kei min nghaktu chu an beidawng zel' ka ti a. "Nghak chhuaktu awm chhun ka nih dawn avangin lawmthu ka hrilh lâwk a che, lo kal ngei ngei ang che, thil ka lei ang che, muttui" a ti a. Ka rep tawh lo.
.
Atukah chuan phur tak si, huphurh ru tak siin dressing table hmaah chuan ka thu tum bâr a, nidang zawng aia nalha Kima hmuha awm ka duh a ni. Ka scooty ka la chhuak a, dar 11 pelh hlekah MC ka thleng a, Kima pawh a lo awm reng tawh a. 2nd Floor-a a țhianpa Manghet-a dawrah chuan min hruai chho a, kan thlen hnu rei vak loah chuan Umangheta chu thil dang tih chhuanlamin a chhuak daih a, a chhuah chhung dawr nghahsak turin min chah a. Kima chuan, "Hrehawm i ti ve tho em?" a ti a, 'Eng chu maw?' tiin ka hai der lui tlat a, "Țhian anga awm hi mawle, kei chuan ka thei tawh lo, bul țan țhat leh i duh em?" a ti a, ka lawm ngei mai! Mahse, lawm tak anga lan erawh ka duh lo thung. 'Ka hre lo le' ka ti tlat a, "l va han luhlul tak, i duh tih ka hre vek.Mahse, i mizia hi chu ka duh zawng tak a ni. Bulțan țhat chu i duh em?" a ti leh a. 'Um' ka ti a, 'Boih, ka lawm e' a ti a. Țhian anga kan in-en laia hrehawm kan tih zia kan sawi dûn a, kan inhmangaihna chuan pàr a chhuang leh ta a. Kima chuan a bulah min pawt hnai a, 'Ka hmangaih che' a ti a, 'Keipawn' ka ti a. Min fawp zeuh pahin, 'Mahse, kan inmil si lo' a ti a, kan nui dun hawk a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)